ديك العدة !!!

قد يكون شخص عادي جدا يعني غير متعلم ولا مثقف .. وقد يكون من حملة الدكتوراة ومثقف جدا , ومع ذلك

فالقاسم المشترك بين الشخصيتين هو الروشنة أو الطقاشة , خفة الدم في غير محلها, المقال في غير

مقام أما التصرفات يا لطيف ،,, عينك ما تشوف إلا النور ....

الحسنة الوحيدة في ديك أو ديكة العدة إنه زول على نياته لكنه لا يدرك أن حسن النية قد يؤدي إلى

الجحيم , لا يفكر فيما يقوله , يعني بالعربي الفصيح متسرع أو متسرعة في الحكي , لا يوزن تصرفاته

فيؤذي الآخرين أو يجرح شعورهم ,, دايما بعتقد إنه صاح والناس غلط , عنده ثقة أكثر من اللازم في

نفسه , بفتكر دائما إنه الناس مستمتعة بحديثه فيواصل .. بيفتكر إنه مهضوم خالص زي ما بقولوا ناس

هيك وهاي دا , لكنه في الحقيقة بكون شخص ثقيل الظل , يفرض نكتته البايخة على الآخرين ويطلب منهم

الضحك بالإكراه ..

ديك / ديكة العدة ما تحاول تاخده عشان يحل مشكلة , لأنه أكيد من نوع جا يكحلها عماها , مثلا إذا

أخدته يصالح اتنين متخاصمين أول حاجة يقولها للزول الزعلان شديد من التاني ( على الرغم من إنه زول

ما كويس , وما بستحق تصالحه لأنه بقول فيك كذا وكذا ولكن معليش خليك أحسن منه ) وبدون ما يشعر بكون

ولع النيران زيادة أو صب الزيت على النار مثل ما يقولون. وإذا أخدته واسطة خير بين زوجة حردانة

قاعدة عند أهلها أول حاجة يقولها للزوجة الغضبانة غضب شديد( أنا عارف إنه زول تافه وحقير وما

بستاهلك لكن معليش , أرجعي عشان خاطر الأولاد ولو زعلك تاني أديه بالجزمة القديمة!!! )

ديك العدة في أغلب الأحوال ملابسه مخرمجة زي كلامه رغم إنه بيعتقد إنه زول أنيق وخطير وبيحب دايما

يتونس مع البنات مع إنهن في أغلب الأحوال بيتحاشن الكلام معاه خوفا على مشاعرهن أما الرجال

فيستمعون إليه على مضض وقد يحرجه أحدهم ولكنه لا يهتم لأنه شخص غير مبالي .. يا جماعة كفاية كدة

حرام .. لازم نخلي شوية صفات كدة لديك العدة عشان ما نخرب عليه مزاجه ..

أحبتي ,, صبحكم الله بألف خير وربنا يبعد عنكم ديوك العدة قادر يا كريم .. وفتكم بعافية ...

المحترمة استاذة عواطف سلامات ..

Quote: ( على الرغم من إنه زول ما كويس , وما بستحق تصالحه لأنه بقول فيك كذا وكذا ولكن معليش خليك أحسن منه )

يكحل فيها ويكحل فيها وتاريهو عاميها ....

والله ياها الحقيقة ...

خالص الود ...

يا هلا وغلا

مرحبتين يا استاذة ونتابع مع ديوك وديكات العدة


آآآآآفيلقو

ترهاقا !!!

صباحك ورد ...

منور يا جميل ,,,

تابع عن بعد .. أعمل حسابك من أنفلونزا الطيور !!! وش ضاحك ...

جوجو !!!

كيفك يا بعد عمري ,,,

عليك أمان الله في كم ديك عدة في المنبر دة ؟؟ ما تعدش !!

يسعد صباحك الحلو ...

الاستاذة عواطف صباحك خير
ديك العدة قالو كان نهروه بكسرها وكان خلوه بكسرها

كدي شوفي عمايلو هنا مع عمنا الشقليب
ديك العدة والشقليب

مودي !!!

يسعد صباح يومك الجميل ...

موضوعك جدا رائع ...

فعلا زي ما بقولو ديك العدة لو خليته يوسخها ولو نهرتو يكسرها ...

أها دة يعملوا ليهو شنو ؟

شكرا على الطلة الحلوة ...

عطوفه

صبحك الله بالخير

انت ما قلت ماب تحبي السياسة


اها هنا من اوسع الابواب

عثومي !!!

صباحك إشطة ...

السياسة خشم بيوت !!!

وللأسف الشديد نحنا لا هذا ولا ذاك !!!!

خلاص يا غالية


طيب بس ممكن تعملي لينا قروبات
يعني الرجال = ديوك
النساء = دجاج
الشباب من الطرفين = فراريج

لانو الاخرين ديل فاقعين مرارتي

غايتو يا عثومي أنا الفاقعين مرارتي كتار بس خليها على الله !!!

شفت الديوك الصغار البلبسو حلقان وسلاسل ديل جايبين لي الجلطة أما الفروجات البدعن الدلع ويكسرن

في الكلام .. كلمة عربي والتانية أنجليزي ديل كمان جايبات لي العصبي ..

Quote: فعلا زي ما بقولو ديك العدة لو خليته يوسخها ولو نهرتو يكسرها ... أها دة يعملوا ليهو شنو ؟

(بثيطة) يا عواطف خلوهو لمن يمشي براهو وشيلوا العدة (غثلوها) تاني .

رايك شنو في الدياكة دي !!

الجمري !!!

والله كلامك صاح ...

وخذوا الحكمة من أفواه الديوك !!!

صاحبنا شدييييد , داك مش ديك عدة لالالالالالا داك اظنو ديك فضيّة ونمليّة وبايركس وكل انوع العدد من حلل وكبابي وكوريات ومعالق ..
عندنا بت معانا في الجامعة وبعدين قامت رسبت في زي جغلومية مادة كده وزي حا يفصلوها من الجامعة وفي النهاية سمحوا ليها بي انها تمتحن ملاحق .
البت مدبرسة وقلنا نمشي ليها نرفع معنوياتها عشان تقدر تذاكر لانو وصلنا خبر انها ما قادرة تذاكر كويس ..
قوم يا صحبنا الاشتر امشي معانا وفي اثناء كلامنا معاها وبنرفع ليها في المعنويات وووو قوم قول عايز تشارك في رفع المعنويات فقال ليها :
عايني يا هناية موضوع أختك الحملت بي الحرام ده ما يأثر فيك يعني اتناسيهو وحاولي اقري كويس عشان تنجحي !!!

لا حول ولا قوة إلا بالله العظيم ...

دة مش ديك عدة دا طلع أكتر من ديك عدة.. أريو بأنفلونزا الطيور ..

عموما ربنا يكون في عونا من جنس الديوك الزي ديل ..

عموري ,,

شكرا على الطلة ..

الأخت الكريمة عواطف
نيابة عن كل الديوك البلدية والبيطرية وجداد الخلا والرفقاء الفسلين نعلن إحتجاجنا على هذا التشبيه فكل واحد مخستك يتم تشبيهه بديك العدة فديك العدة لا عيب فيه لذاته إنما العيب كل العيب في أن يكون بجوار العدة ولما كان ديك العدة من الطيور الداجنة ولم يتغني له الشعراء كما فعلوا مع القماري والبلابل وحتى طير الرهو ولكي أكون أكثر دقة فقد فعل أحد الشعراء بأن وصف الديك دون إقترانه بعدة أو مواعين عندما قال في نشيد من أناشيد المدرسة وقد كان مقرر وللحفظ ، جاء في القصيدة "ولي ديك له صوت جميل اللحن رنان ، وعند الفجر يوقظنا وطول اليوم مش عارف إيه كده ، المهم أجد أن هناك تميزاً عنصرياً للديك فتارة يوصم بالغباء وأخرى بالزهو وحب الذات وثالثة بالخازوق كما في رواية ديك العدة الشهيرة وكأنه لم يعد للديوك حقوق. الغريبة في ناس على شاكلة جاء يكلحها عماها يتم وصفهم بعبارة :يا أخي دا راجل ديك ، والديك طبعاً في أسوأ حالته ممكن يكون حله كاربه أو بروست أو زقني على طريقة أهلنا الأحباش.
مطلوب منكي أختي الكريمة أن تعتذري لجداد الوادي وديوك الحي وجميع الدواجن ، وليقترن صنف البشر الذي ذكرتيه بألقاب أخرى على سبيل المثال "راجل دلدول" راجل خيخه ، إمرأة وهم ، إمرأة مهببه ، راجل نص راجل ، أو راجل ورم ، وأظن كلها ألقاب أو صفات تفيجد المعني ، ولنعتق الجداد والديوك من وصف الخنتيله وتشبيه البسوي والمابسوي بيهم
معاً من أجل محاربة هذه الأمثال العنصرية
البباري الجداد بوديهو الكوش
ديك العده الشهير كان نهروهو كسره وكان خلوهو بايظه بايظه
وحتى جدادتي الركطه البتيجب الخبر من قعر الوااطه فيها شئ من إلصاق تهمة حب الشمار بالجداد في زمن لم نعد فيه بحاجة إلى جداده ركطه أو بيجيه أو فوشيه حتى في ظل دخول الماسنجر والإيملات والمسكولات لعوالمنا.
====
أي بيضه مسلوقه أو محمره هي في الواقع مشروع ديك لم يرى النور

عارف يالمامور الليلة ضحكت جنس ضحك من مداخلتك اللطيفة دي ,, يعني زي ما بقول أخونا محمد فرح

مؤونة عام من الضحك ..

عموما عندك حق فللديوك (حقوق ديكة)أو ديوك رايتز يحب أن تصان وللديوك فوائد عدة إبتداء يصيح وهو

يجري يقول كيكي كيكي .. مرورا وعندما تسمعه ديوك كل الحلة .. تصيح أيضا معه تقول كيكي كيكي .. أيه

الجمال دة ؟؟ نغم ولا أحلى !! معزوفة ولا أروع .. ياخي دي سيمفونية لم يستطع بت هوفن ولا حتى ودهوفن

على عزفها .. يقول كيكي كيكي !!!

من هذا المنطلق أرفع أسمى آيات الاعتذار لكل الديوك وما شابههم ومن لف لهم سواء كانوا مجمدين في

الديب فيرزرات ولا مقليين ولا مشويين ولا على طريقة عمنا كنتاكي السرية ,, أما الديوك المفقوسين

يا دوب والديوك المشروع قيد الإنشاء فنعتذر لهم بشدة باعتبار ما كان وما سيكون ولهم العتبى حتى

يرضوا ..

الأخ الحبيب !!

نشكرك على هذه البادرة الطيبة ونتمنى لكل الديوك إقامة طيبة في أقفاصهم العاجية ونتمنى لهم حظا

أوفر وربنا يبعد عنهم آكلي لحوم الدجاج ..

الأخت عواطف
زادك الله بسطة في المزاج واضحكك حتى حدود ضرس العقل في الناحية الجنوبية الغربية
ما دمنا في شأن الجداد لابد أن نعيب على الشعب كافة إطلاق التشبيه في شأن ملاح أم رقيقه خفيفة التيلة - إن جاز التعبير أو لم يفعل - بقولهم في هذا الشأن "ريالة ديك" تأكيد على حالة كونها رقيقة وفي منتهى الرقة التي تجعل لفة الكسرة تدخل الصحن وتطلع دون أن يصيبها شي من ذلك اللايوق محاكية في ذلك فزورتنا الشعبية الشهيرة "دخل القش ما قال كش" والحال كذلك لابد أن يعى المغرضون أن الديك لا يريل ولا تسيل ريالته بل تكون ريالته حالة مرضية بينه تعرف في أمصار أهل العوض حيث أقيم بمرض سمير ، وفي الخرطوم يتغنون لذلك مرددين المشتول في ضميري وين سميري.
كل هذا لا يعفي المشاترين والنشاز عن كونهم كذلك فهم كما تفضلتي قالت فيهم الأمثال الكثير المثير ، وهم في أحسن أحوالهم رجرجه قد يبرر البعض لهم أنهم أرادوا إصلاحاً لكين كمان أحسب أنه تبرير غير مقبول خاصة وأنه في كثير من الأحيان يكون طوعي ودون إستشارة لذلكم الرجرجه صاحب الرأي التليف ، فالي كل المشرئبين وكل الدهماء إياكم والتحشر خاصة وأنكم لا تملكون أدوات تستطيعون من خلالها أن تجعلوا من إنحشاركم وشماركم ما يشفع لدخولكم تووش ، وإذا كنت على الكيف ناوي أشرب شاهي الحناوي – مين الحناوي ده I don't know
في شأن الأناقه وسوق الناقة فهذا إتجاه إجباري سوف أحاول أن أخوض فيه مع الخائضين
==
آملي أن لا أكون قد خرقت قانونا أو غيره بكلامي عن شاهي الحناوي وذلك بعمل دعاية مجانية للحناوي ، وما يشفع لي أنني لم أفصح هل هو شاي بي لبن ولا شاي أحمر وهل الحناوي شخص في ذاته أم كافتيريا أم بوفيه ناصيه ، أفتكر تفرق كتير
==
وفي الليلة ديك

أخي الحبيب الملا عمر ...

بتصدق إنه دمك خفيف لدرجة قف ..

يعني لاك مشاتر لا ديك عدة .. (يابخت النملية ) ...

عموما وفيما يتعلق بي وين سميري المشتول في ضميري لغاية الآن ما عرفنا سمير دة شجرة ولا زهرة ولا

شنو وبعدين لأول مرة أعرف أنه في تربة زراعية خصبة تقبع داخل الضمير لزوم الشتول وكدة ..

أما شاهي الحناوي فغالبا ما يكون شاهي سادة وكمان كشري عشان الحناوي دة شكله مصري وليس هندي

و لوكان هندي لازم يكون الشاهي بحليب ويندر أن يكون سليماني والشاهي لازم يكون لغاية نص الكباية فقط

لزوم الطقوس الهندية ..

شكرأ أيها الشاب الظريف ...

اخي الملا بن عمر (ووضعت بن بعد حذف حرف الألف لأنها وقعت بين اسمين علمين والعلم الثاني لم يكن في اخر السطر):
في شأن الديوك فهي وللحق تعد الأغبى من بين كل مخاليق ربي ويقال والعهدة على الراوي أن الديك إن خرج من باب المنزل إنشاً واحداً (والإنش ربما هو مقياس رسم يتعدى الهكتار بقليل )فإنه لا يعرف كيف يعود ومن هنا اجد نفسي متضامناً مع الحمار (الوادي منه والعادي) والذي يكفيه فخرا انه قاد فيثاغورث لنظريته المعروفة كيف لا وفيثاغورث كان يسكن في قطية خلف ميدان العراضات وربما كان (ميدان عقرب) ولاحظ ان حماره لا يذهب لسعد قشرة عن طريق السير افقيا وراسيا بل قطريا ..
الديك يكفيه فخرا انه شعار للاخوة الفرنسيين ولعل زيدان هو اشهر ديك مر على تاريخ الديك ..
بالمناسبة هل الجمع هو ديوك أم ديكة وهل هو جمع تكسير ام جمع تحطيم ام جمع تأخير أم جمع تقديم ؟
لا ادري ما هي العلاقة بين الديوك والثعالب وكتاب المطالعة فلا يخلو كتاب مطالعة من ديك وثعلب ..
واذكر ان الراحل على المك تحدث عن سخرية الراحل ابو داؤود وهو يقول ان أفضل أغنية تحب الدجاجة ترديدها وي تلقط الحب وتجري وهي فرحانة أغنية :
في الليلة ديك ..

Quote: اخي الملا بن عمر (ووضعت بن بعد حذف حرف الألف لأنها وقعت بين اسمين علمين والعلم الثاني لم يكن في اخر السطر):

إنت هييييييي ، قالوا ليك أعمل مداخلة عن الديكة ولا حصة في العربي ...........
ركز يامااااان .


مودتي


عماد محمود


أها أبو الهل كيييييف ..... ياستار أستر ....

عمودي !!!

يسعد صباحك الحلو ...

عمر الفاروق عارف إنه الديوك بتحب حصة العربي وبتكره حصة الإنجليزي عشان كدة مركز على العربي ..

شكرا على الطلة ...

عمر الفاروغ ( باللهجة السودانية )


كيفنك يابة ,, عساك طيب ..

وبهذه المناسبة أهدي أغنية في الليلة ديك إلى جدادة الوادي بحي المايقوما وجدادة الحلة بالحلة

الجديدة ,, وجدادة الخلا الطردت جدادة الحلة بالرياض ,, وإلى كل الدجاج الذي لا يزال يلقط الحب

ويجري وهو فرحان ..

تشكرات يا فندم على هذه الخلة الديكية ...

الديــــــــــــوك خشــــــــــم بيــــــــــــــــوك
(دايره ليها واحد الجن عشان يقراء الكلمة الاخيرة)

علووووووووووووبه

وإنت الصادق !!!

فعلا خشم بيوك ...

تسلم يا بعد عمري ومشكور ومنور يا جميل ..

مساء النور

فعلا ,كلامك فى محلة ,هؤلاء اصناف موجودة من البشر(الديوك)


كما غناء الفنان زيدان ابراهيم

اغلطوا انتوا يا احباب نجيكم نحن بالاعزار

عشان ما نعيش فى ودار.......

عشان خاطر عيون حلوين

.....................

هذا باختصار شديد

تحياتى

الاخ الملا عمر

Quote: بقولهم في هذا الشأن "ريالة ديك" تأكيد على حالة كونها رقيقة وفي منتهى الرقة

نحتاج لمزيد من الشفافية !!!!!!!!!!!!!!!!

واد بطل حركات !!!

شفافية شنو كمان مع الديوك ؟؟؟ أصلو ديك العدة دة متربي في البيت الأبيض ؟ ما في قفص وكمان عادي !!

سيف !!!

يسعد صباحك أيها النبيل ...

عارف أنا طول عمري بكره الديوك وبالأخص ديك العدة ,, عشان لما كنت صغيرة كان علي غسيل العدة أول

ما أخلص يجي الديك ناطي يوسخها أقوم أعيد غسيلها تاني يجي ناطي أنهره يقوم يكسرها ,, عشان كدا

سامحوني ما كانش أصدي !!!

أستاذتنا الكريمة عواطف
مساء الخير

وين الغيبة الطّويلة دي ؟

Quote: ديك / ديكة العدة ما تحاول تاخده عشان يحل مشكلة , لأنه أكيد من نوع جا يكحلها عماها , مثلا إذا أخدته يصالح اتنين متخاصمين أول حاجة يقولها للزول الزعلان شديد من التاني ( على الرغم من إنه زول ما كويس , وما بستحق تصالحه لأنه بقول فيك كذا وكذا ولكن معليش خليك أحسن منه ) وبدون ما يشعر بكون ولع النيران زيادة أو صب الزيت على النار مثل ما يقولون. وإذا أخدته واسطة خير بين زوجة حردانة قاعدة عند أهلها أول حاجة يقولها للزوجة الغضبانة غضب شديد( أنا عارف إنه زول تافه وحقير وما بستاهلك لكن معليش , أرجعي عشان خاطر الأولاد ولو زعلك تاني أديه بالجزمة القديمة!!! )

ولا تعليق
نقوم نتديّك ساي





وُدّي وإحترامي

أنـا في البـعـيـد مُـشـتـاق لهـمـسـة من الوطن يا نـسـمـة

العواطف

احلى حاجة تجي ضيف عند ناس الريف اها جابوا ليك الموية شربت والشاى اتقهيت وبعد شوية تسمع الوليدات ساكين الديك وانت جعان تكون بتتونس وراخي اضانك اعصابك متوترة مع ترسة الوليدات خلف الديك بين الصرفات والكنج وما ترتاح الا تسمع كييييك كيييييك خلاص الجماعة كاوشوهو طاااااب وبعد شوية تجيك ريحة الكشنة البتسيل لعابك .

عواطف انا في الكيو؟

شيقا !!!

ياتو كيو ؟

حق الرغيف ولا البنزين ؟؟؟؟

شيقا !!!

والله إنت زول تحفة ...

أها ديك الجن دة لو ما قبضوه .. الضيف يعمل شنو ؟؟ سؤال وجيه مش كدة ؟؟

يسعد صباحك الحلو ..

ها ها ها ها ها ها !!!!

لؤي الظريف هنا !!!

ياه ليك مدة ما بنت ..

وين إنت ...؟

عارف يا لولو ديك العدة دة طبعه ما بتغير أبدا قدر ما تقول تصلحه وتخليه زول رزين وواعي ما تقدر

عشان كدة أحسن تبعد منو عشان هو زول كلكي جنو ..

عندي صاحبتي حردانة جا صاحب زوجها ديك عدة قال ليها لو ما رجعتي الليلة البيت والله بكرة بنعرس ليه

واحدة صغيرة وجاهلة !!!!! هاهاها.. أنقر رجعت .. حلفت ما ترجع ...

يقال أنق الشيء أنقاً من باب تعب ، وشيء أنيق مثل عجيب، وتأنق في عمله أحكمه. والمراد به هنا هو المظهر العام الذي يلزمه الشخص. والمعني بين والله أعلم
(المرجع: كتاب أكل البعجبك وألبس البعجب الناس)
ولأنك لن تستطيع أن تأكل البعجبك في هذا الزمان من منطق وما نيل المطالب بالتمنى وبالتالي ينتفي باقي المثل تباعاً فلن يعجب الناس مظهرك ، فعلي سبيل المثال إذا لبست أبيض حا يتوسخ وإذا لبست أحمر أو أسود الحر حا يفسخك وفوق هذا وذاك أجد أنك تملك حق الرد وحق النقض على من يسخر منك ويقول ليك دا الشنو اللابسو ده فتقول بحرقه يعني عاجبني إنت ، أو تكون أقل حرقة عندما ترد وتقول يا أخي أنا حر. وما بين حرية الملابس وحرية النشر وحرية الحركة تضيع الكثير من الحريات ، سمعت أن الملابس المخرمجه والغير أنيقة فيها أذي للناظر ويمكن أن تصل حد التلوث البصري وهي جريمة لا تقل عن جرائم التلوث الخرمت الأوزون وسيحت التلج في القطبين وقربت تقرض طيور البطريق ، وفي الجانب الآخر من القصة فإن الشخص الأنيق يبعث على التفاؤل لكل من يراه ، وإن كان لايخلو من همز الحاقدين والحاسدين بقولهم يا أخي دا فاكيها في نفسو.
نحن كأمة إلى وقت قريب أفقر شعوب الأرض في الأناقة والتي باتت من أهم معايير الحكم عند التعامل مع الآخرين. الأناقة كما نردد دوماً في البساطة ، والبساطه هي أن نكون نحن نحن يعني دون تكلف أو تقليد الأمر الذي يظهرنا بمظهر طبيعي وهو أمر يبعث على الراحة ، هذا عدا عن الثقة بالنفس والتي أجدها أحد أهم أركان الأناقة فحتى لو إرتدينا أكثر الملابس أناقة يمكن لعدم ثقتنا بأنفسنا أن يمسخ كل هذه الأناقة ويحولنا إلى أشكال سخيفة بالقدر الذي تثير السخرية.
الأناقة هي فن لتنسيق ما لدينا من أمكانيات دون أن نبالغ في ذلك ، وهي أى الأناقة تنبع من دواخلنا فيفيض إشعاعها على مظهرنا الخارجي ، وليس عيباً أن نستشير من حولنا في أى أمر .
الأناقة هي أيضاً في التفكير وفي حسن التصرف وفي التعامل مع الآخرين وفي شأننا كله.
نقاط أنيقه
- الإهتمام بالنظافة بصفة عامة نظافة البدن ونظافة الملابس
- التنبيه على المكوجي إذا كنت ذا سعة وبتكوي عنده بعدم تطبيق القميص على طريقة عاوز أختو في الشنطة والتي تترك آثاراً يراها القاصي والداني
- الإهتمام بالمقاسات يعني تلقي ضهرية القميص عند منطقة الكتفين أكبر من اللازم وكم القميص يكون بادي من حوالي 3 – 4 إنشات من الكتف.
- أيضاً تتأثر الياقة (اللياقة) تبعاً لذلك فتكون كبيرة خاصة إذا تم زر الرقبة بكرافته كما في برامج التلفزيون الحوارية والمقابلات الأمر الذي يجعل القميص المزرود بكرافته يماثل السروال الطويل أبو تكه أو كيس البزازة بتاعت الأطفال أيام أن كان للأطفال بزازة وللبزازة كيس.
- تقليم الأظافر
- تشذيب الشنب وقص الشعر خاصة للذين أصاب مقدمة رؤوسهم الصلع فتلقي الواحد مشعف بتشديد العين وتفتو كأنها رؤوس الشياطين ومن الأمام جبهة ناصعة والود يعني بتسرح بي خلال أو مشط أسنان كبيرة.
- حكاية الألوان مهمة برضو وأجد ان الألوان في هدوم الكثيرين منا عاوزه فرز عديل كده ويخيل لي لو واحد تخصص فرز ألوان حا تكون مكاسبو كبيره من الشغلانه دي ، وشكل القماش مهم ، مرة واحد في مطار الخرطوم كان داخل ليهو في بنطلون كاروهات مبالغ فيها مع قميص كاروهات وبدلة كاروهات وربطة عنق كاروهات لمن جهجه ليك الكلمات المتقاطعه ذاتها.
- الجزمة آخ أنا من الجزمة دي داير ليها سيد ورنيش ونقلتي على طول معظم الجزم مغبرة ولا الشبط الصندل. وما تنسوا الشراب يا شباب دا برضو يتم غسله زيو وزي أى unerwear ومشوار واحد في حر البقعه بسيحو عشان كده من كراعك ولي الطشت.
- وعن الجنس اللطيف أستميح كاتبة البوست العذر في أن أعود لتناول أناقتهن بشئ من التفاصيل إذا لم يكن لديها مانع لأن حقوق البوست محفوظه.

Quote: أها ديك الجن دة لو ما قبضوه .. الضيف يعمل شنو ؟؟ سؤال وجيه مش كدة ؟؟

يمدد كرعينو في الهباب ويخت راحات يديهو بوراء في عنقرتو ويرمي الطاقية يسويها مخدة عديل كده على بال يسوا ليهو كسرة بموية يفك بيها الريق ليكون في انتظار الجولة التانية لمطاردة الديك ابو علاعل و التي قد يحشد اليها نفير من فئة عمرية متقدمة .

ها ها ها ها !!!

والله يا شيقا ضحكتني لمن قلت بس ؟؟

عارف إنك كاتب سيناريو بارع ؟ والله ولا أسامة أنور عكاشة ... يخرب عقلك !!!

ياسلام عليك يا الملا عمر والله إنت أسامة بن لادن زاتو !!!

نحن بالفعل بحاجة إلى كورسات في الأناقة يعني إن أند أوت عشان الناس تبطل تتمسخر علينا ,, عارف

ياالملا بقينا ملطشة بين الناس .. كل واحد يضرب بينا المثل في البهدلة والخرمجة أما الستات فعينك

ما تشوف إلا النور واحدة جاية المول في نص النهار ولابسة توب شيفون أحمر وكله خرز وترتر ولمعاع

والشبط أحمر والشنطة حمرا والحنة لغاية السيقان لزوم عروس يعني تفتكري دي لو شافها تور أسباني

حيعمل فيها أيه ؟؟

واصل يا بعد عمري فالبيت بيتك .. أقصد البوست بوستك ...

وتسلم من كله شر ...

طوفي

Quote: ياسلام عليك يا الملا عمر والله إنت أسامة بن لادن زاتو !!!

والله انت مسلطة كتلتيني بضحكة لحدى دموعي سالت .

شيقا !!

تبرى يا يابة من الموت إنشاء الله عدوينك ...

Quote: وخذوا الحكمة من أفواه الديوك !!!

هههههههههههههههههههههههههههههههههههههههههاي

شكراً يا دجاجتي الصغيرة الحمراء

الجمري !!!

يسعد صباحك ...

الفول فولي .. زرعته وحدي .. وحصدته وحدي .. و سآكله وحدي كذلك ...

والله الدجاجة الصغيرة الحمراء شهتنا في الفول أكان ما فول حاجات كان تحتعمل شنو ؟؟؟

Quote: وبعد شوية تسمع الوليدات ساكين الديك وانت جعان

شقاشيقو .. انت اقعد باري لي الديكة والجداد كده لمن يلم فيك (ثعلب) يزعمطك .. وما عماد محمود عنكم ببعيد !

الجمري

رجل مسيحي دخل مسجد في مصر و معاه سكين و قال: مين فيكم مسلم ؟

محّدش رد عليه إلا واحد شجاع قاله: أنا مسلم

اخذه برا المسجد و قاله: عندي خروف عاوزك تدبحه و تسلخه على ا لطريقه الإسلاميه

قال المسلم: أنا اعرف أدبح بس شوف حد تاني يسلخ

دخل المسيحي المسجد و السكين كلها دم من الخروف و قال: مين مسلم كمان؟

اشروا المصلين على الإمام

رد الإمام عليهم: ' في إيه ؟ هو عشان صليت فيكم ركعتين بقيت مسلم خلاص '

هاهاهاها...

هي .. هي .. هي ..

تعرفوا يا جماعه من ما دخلت البلد الركشه والمول وعرفنا المسكول حكايتنا باظت ، أول حاجة سيدتي دعي ديانا يا غبيانه فالسمح سمح كان قام من النوم والشين شين ثلاث مرات في اليوم يعني بايظه بايظه. إياكي والبوبار ، وتقومي تشدي من صاحبتك توب ومن أختك شبشب لزوم الأناقة. أكثر نسوانا البشوفهم الواحدة بتكون بتلبس بالميت كده مقاس 39 شبشب تقوم تشتري 37 أو 36 لزوم كراعي صغيرة ، والواحدة برضو تكون طويله وسمينه تقوم تلبس كعب عالي والله لمن تجي قادله تسكت الخشامه لمن تخاف على الهاي هييل والحسنة الوحيدة أنها تمشي الهوينا وفي رخام غالباً أو سيراميك يعني أرض ممهدة لكين لو جات عندنا والله إلا تشغل ترس القوة وتقول يا أبو مروه.
نسوان متفرجخات لأنو بالجد المنظر بكون فرجخة أكثر من حالة كونه قعده أو جلسه ما منظور مثيله في برنامج تلفزيوني كل واحده عامله فيها وزن الريشه وهاك يا إستعراض أى كلمة معاها حركة وإشارة عشان تظهر اليدين وتكشكش ليك الغوايش لمن تقرب تقول ليها وكده كشكشي ، ناهيك عن الخاتم والحنا ونقش الحنه وطير الجنه وشعر للسماحة مستعار ترمي ليك التوب عمداً وتعمل نفسها مهجومه تقوم تصلحوا تاني وفي اللحظه ديك يظهر ليك الحلق المفصفص كان صحيح كان wishshat (كذب بالأمهري) والسلاسل والأغلال والحلق الكبير والأخير مقصود بيهو البلعوم وبتاع الكاميرا لو يبالغ شويه ويظهر لينا النعلات وما أدراك ما النعلات والله وبالله ما شفت لي لغاية الآن واحده لابسه شبشب قدر كراعها بالضبط يعني لازم الكعب يكون مارق شوية وكان الأنفس بتأتلف العنقريب بشيل ألف وهنا مقاس 37 يلبس مقاس 41 بالمباصرة وخاصة إنو التكويشه في الشحنة بتكون من الخلف لذلك ما في واحد بشوفها. أها برضو في نوع خفه كده بايخه شديد الواحده لو قلت إن شاء الله موية النيل قرقرقرقر تضحك ولو قلت موية بلاعه برضو تضحك ، ده غير المقاطعات في المحادثات بإختصار كثير من جلسات النسوة على الهواء مباشرة عبارة عن ركن شمار في بيت بكا أو صبحية عرس. والكلام عادة ما يكون من خلال الأنف لزوم الحنكشة على طريقة عم جابر عندك جبنه بتعطيش الجيم لمن تفقد سوائل.
أنا أستغرب يعني شنو المرأة تلبس ليها 12 غويشه في يديها أهي فخر وفنجطة أم أناقه ، نحن من إخترع كرسي جابر وكراسينا مكسره ، ونحن من إخترع أحفظ مالك وجيوبنا مقدده. وفي كمان حكاية الميك أب ، ياه على الميك أب كثيراً ما أتذكر عبد العزيز المبارك في أغنية التي تأوه فيها من جور زمانه عندما قال "أصفر أخضر أحمر زي شفق المغارب.
والثوب لا أقول إلا كما قال شاعر حلمنتيش "أعاين تاني ما أقدر أشوف التوب أريت التوب تشيلو هبوب" وفي رواية أخرى وتاني التوب تشيلو هبوب.
===

الملا عمر !!!

كم أنت رائع ...

ولا تعليق ...

وأريت التوب تشيلو هبوب ....

والعجب الكان جاى ماشى بيعفصك بيعفصك
وكان قعد يمدد كرعينو يعكسوا للماشى
الا تقولى ليهو لم كرعينك ديل خلى الناس يعدو
والكان قعد جمبك وانت سايق يلخبطك ويشتت تركيزك
وكان جاتك مكالمة ما يفضل ليهو الا يخش جوه السماعة

بث

عبوووووووووووودي ...

سلامات ...

والله مشتاقين ...

ها ها ها ..

مداخلة ظريفة ..

وأزيدك من الشعر بيت ...

ولم يشوف جنس لطيف يتكبكب ويتراجف .. و يتكبكب ويتلخبط تقول راميه جمل !!!

آآآآآخ من ديك العدة ,,,

وياسلالالالالالالالام !!!!

العزيزة عواطف .. طلة حلوة وظريفة كالعادة ..

Quote: دايما بعتقد إنه صاح والناس غلط

ودي المشكلة الكبيرة بل الكارثة في اي شخص ..دمتي