Post: #1
Title: ... أنا بقيت برَّاي...!!
Author: صلاح أبودية
Date: 07-01-2008, 08:28 AM
(.)
شكى لى إبنى الأصغر من ملاحقتى له وقال لى بالمفم المليان يا أبوى إنت بقيت برّاى عديل كده...
تخيلوا !!! ود الكلب ده بقول فى شنو؟؟
تعال يا كلب أنا برّاى ..؟
آآآآى .. مش يا محمد ..؟ ( محمد ده ولدى الكبير).... محمد سكت
سكت مالك يامحمد ما ترد على أخوك الفصيح ده..!
أقول شنو يا بوى إنت لكن ما بتبالغ عديل كده ..!
أبالغ فى شنو يا قليل الأدب إنت كمان وأنا قلت إنت الكبير ودخلت الجامعة وح تساعدنى فى تربية الشواطين ديل ... حتى إنت يا محمد ..؟
يا بوى ... ما تزعل كدى برّاحة !! ياخ إنت إسلام ده جننتو جن : تعال يا ولد أمشى يا ولد ... يا ولد ماشى وين..؟ يا ولد سفنجتك وينا..؟ يا ولد وطّى صوت التلفزيون ... يا ولد أرقد نوم ... ياولد اصحى النايم ليها شنو...؟
يا ولد إتسوكتا ... يا ولد صليت ...؟ يا ولد إتغديت...؟ يا ولد أقفل الباب ده.. يا ولد أفتح الباب داك ... يا ولد أسكت ده غير كلمة يا ولد بدون مناسبة كده ..
والله يا هو الفضل ... تعال يا منتصر (ده الولد الوسطانى ) شوف أخوك الكبير ده بقول فى شنو ..؟
|
Post: #2
Title: Re: ... أنا بقيت برَّاي...!!
Author: صلاح أبودية
Date: 07-01-2008, 08:31 AM
Parent: #1
(.)
سامعو يا بوى ... إنت عاوز نتناقش ولّ ح تكورك فينى ...؟
ح أكورك فيك أها عاجبك ول ما عاجبك..؟
ما عاجبنى يا بوى ...
ما عاجبك يا قليل الأدب يا ولد جيب الوصلة (من أدوات الدق الصاح)...
عاجبنى يا بوى ... ده إرهاب يا بوى ..!
أخير ليكم الأرهاب ولّ البرى ..؟
يا بوى إسلام ده صغير عليك الله ما تدقوا بالوصلة ..!
الوصلة دى ليك إنت ما لـ إسلام ... تعال هنا ...
يا بوى أنا بقيت كبير على الدق ...
إنت كبير وإسلام صغير .... أنا أدق منو يعنى ..؟
يعنى يا بوى إنت لازم تدق زول ؟ ما نتفاهم أحسن..
طيب نتفاهم ... أخوكم ده ليو حق يقول على أنا برّاى ..؟
عرفنا العجوز والجلكين والحاج وعمك ... كمان جابت ليها بري ...
لكن يا بوى إنت ما ملاحظ إنو كلامك بقى كتير..؟
يعنى شنو يا ولاد (هم ما بنطقوا الألف فى كلمة ابوى عشان كده أنا ما بنطق حرف الألف فى كلمة أولاد) يعنى شنو أنا خرفتَ ...؟
يا بوى العفو ... بعد عمر طويل إن شاء الله ... لكن يا بوى ناس إسلام ديل زمنم ما زى زمنا أنا ومنتصر ... ديل زمنم مختلف ... ديل تفاتيح ..!
تفا ... شنو ..؟
|
Post: #3
Title: Re: ... أنا بقيت برَّاي...!!
Author: صلاح أبودية
Date: 07-01-2008, 08:44 AM
Parent: #2
تفاتيح يا بوى مش زينا نحن كنا مغمضين ...!
إنتو كنتو مغمضين ... طيب نحن كنا شنو ...؟
يا بوى إنتو كنتو وهَم ساى...؟
نحن كنا وهَم ..؟ (دى كانت بأعلى حس عندى)
تعالوا ما شين وين ..؟(قاموا جارين طبعا)
تعالوا ...
يا بوى أعصابك إنت زعلت ول شنو..؟
لا ... شنو.
يا بوى كده النقاش ما بنفع إنت ما بتستحمل...!
يا ولاد إنتو عواليق نقاش شنو ده ..؟ تقول لى إنتو وهَم وعاوزينى أناقشكم ...؟
إنتو الكلام ده جبتو من وين والعرفكم شنو بـ زمنا ..؟
يا بوى زمنكم كان فيهو بلى ستيشن ولّ كان فيهو إنترنت .. ولّ كمبيوتر؟ يا خ إنتو قالوا كان عندكم تلفون واحد فى بيت ناس جدى ابودية (33455) خمسة أرقام والغريبة بدون مفتاح ؟
بس كده ..؟ ده كل البتعرفوا عن زمنا ...؟ يا ولد أقعد ساى (إسلام بنطط فى السرير)
أمسك أخوك ده بقع ....
قلتو لى شنو بلى ستيشن وإنترنيت وكمبيوتر مش كده..؟ ياها دى فلاحتكم؟
نحن كان لقينا حاجات زى دى كنا بقينا علماء ...
أهااا ح تقوم تقول لينا كنت بجى الأول وما عارف شنو بتقفل الإنجليزى ياها فرمالة كل الأبهات لغاية هسه ما لقينا لينا أبو كان بجى التانى ساى خليك من الطيش...!
إنتو كلكم كنتو بتجوا الأول مشترك ...؟
أنا يا معفنين ما كنت بجى الأول فى المدرسة لكن فى الكلية جيت الأول ...
مشترك يا بوى ؟؟
|
Post: #4
Title: Re: ... أنا بقيت برَّاي...!!
Author: عبدالله كع
Date: 07-01-2008, 09:46 AM
Parent: #1
ما شاء الله عليهم .. يا صلاح
| Quote: يا بوى إنتو كنتو وهَم ساى...؟ |
صدقني ده الخايف منو!!!! ..
ـــــ
يحفظهم يارب
|
Post: #5
Title: Re: ... أنا بقيت برَّاي...!!
Author: صلاح أبودية
Date: 07-01-2008, 10:00 AM
Parent: #4
شكرا يا كع
ويحفظك إن شاء الله
|
Post: #6
Title: Re: ... أنا بقيت برَّاي...!!
Author: صلاح أبودية
Date: 07-01-2008, 12:18 PM
Parent: #5
يا دفعة نصيحة
حكاية الأبو البجى الأول وبقفل الإنجليزى دى أحسن نشوف غيرها
الجماعة ديل نقشو الفلم...!!
|
Post: #7
Title: Re: ... أنا بقيت برَّاي...!!
Author: القلب النابض
Date: 07-01-2008, 12:45 PM
Parent: #6
عاد يا صلاح اسلام دا نجضك نجاض والله ..
أما منتصر بتاع " اخشى أن يكون محموداً"* فهو زول فالح وبيقلع حقو بلسانو دا
تحياتي ليهم .. وما معانا دق .. انت الدقاك منو؟
بالمنطق وكان هزموك تستحمل الهزيمة وتحاول تاني
ــــــــــــــــــــــــ
* "أخشى أن يكونَ محموداً"
هذه الجملة قالها منتصر عندما كان ضغيراً وكان يتابع إحدى قنوات الاطفال ومندمج في البرنامج ..
باب الشارع دق ..
جات واحدة من عماتو قالت ليهو منتصر تعال ولد صحبك عايزك برة...
رد ليها بي زهج كدة : " أخشى أن يكون محموداً"
|
Post: #8
Title: Re: ... أنا بقيت برَّاي...!!
Author: صلاح أبودية
Date: 07-01-2008, 02:10 PM
Parent: #7
| Quote: بالمنطق وكان هزموك تستحمل الهزيمة وتحاول تاني |
يا قلب تحياتى
والله الجماعة ديل غلبونى عديل كده ....
لا نفع منطق ولا نقاش ...
ومنتصر ده بالذات أنا زعلان منو ...
لأنو ممتحن السنة دى ومشى أدبى ...
تقول خلاص مكمل الادب
|
Post: #9
Title: Re: ... أنا بقيت برَّاي...!!
Author: صلاح أبودية
Date: 07-02-2008, 08:04 AM
Parent: #8
(..)
مشترك آآى العيب شنو...؟ إنت بتتريق علىّ؟
لا يا بوى والله ما بتريق ولا حاجة بس أنا مستغرب !!!
مستغرب من شنو..؟
إنت بتكرر الكلام ليه...؟
لأنو إنتو ما بتفهموا من أول مرة لأنكم حمير وما بتحسوا
كم مرة أنا قلت ليكم لما أجى من الشغل أنا بكون تعبان وعاوز أرتاح..؟
كتير يا بوى... مليون مرة (ده إسلام زاتو)
طيب ليه ما بتخلونى أرتاح وكل دقيقة واحد داقى باب الأوضة عاوز حاجة...
العاوز خمسمية والعاوز كراس والعاوز بطل ... شنو البطل ده...؟
البطل ده شبس او بطاطس مقرمش ...
والله إنتو ما عارفين البطل منو..؟ (دى من تحت نخرينى)
قلت شنو يا بوى..؟
ما قلت حاجة ... وين كولا..؟
نائم .
|
Post: #10
Title: Re: ... أنا بقيت برَّاي...!!
Author: صلاح أبودية
Date: 07-02-2008, 09:08 AM
Parent: #9
(.)
وشهد ..؟
شهد عند الجيران .
عند الجيران ..؟ بتعمل شنو عند الجيران؟
يا بوى صاحبتها عيانة مشت تشوفا
صحبتا عيانة (هم هم هم هم هم) أمشى نادى البت دى
كويس يا بوى أقول ليها شنو؟
تقول ليها شنو..؟ قول ليها أبوى قال ليك تعالى
هسى إنتو عاوزين شنو ...؟ أنا تعبان وعاوز أنوم
عاوزين نتناقش إنت مش قلت نتناقش...؟
الموضوع كان شنو...؟
إنت مش قلت إسلام قال ليك إنت بقيت برّاى
والله إنت ما بقيت برّاى إنت بقيت نسّاى
ده ولد ما عندو أدب وأنا ح أجلدو عشان تانى ما يقول الكلام ده لى زول كبير
تانى جينا لحكاية الدق دى؟
قالت جايه يابوى...
دى منو دى ... شهد ؟ أمشى يا ولد جيب إختك دى قبل ما أمشى أنا
بت مفعوصة قال جاية قال والله ياهو الفضل
|
Post: #11
Title: Re: ... أنا بقيت برَّاي...!!
Author: Mohamed Mohyieldin
Date: 07-02-2008, 10:36 AM
Parent: #10
السلام عليكم ورحمة الله وبركاته
الأخ صلاح أبو دية
تحياتي
معليش سؤال خارج النص
هل أنت صلاح أبو دية الذي درس في مدينة بونا بالهند ؟؟؟
وربنا يحفظهم ليك
محمد محي الدين
|
Post: #12
Title: Re: ... أنا بقيت برَّاي...!!
Author: صلاح أبودية
Date: 07-02-2008, 10:41 AM
Parent: #11
Quote: معليش سؤال خارج النص
هل أنت صلاح أبو دية الذي درس في مدينة بونا بالهند ؟؟؟
|
لك التحية الاخ محمد محى الدين
لا أنا ما قريت فى الهند ربما تقصد أسامة أبودية
هو الوحيد من الأسرة درس فى الهند
|
Post: #13
Title: Re: ... أنا بقيت برَّاي...!!
Author: صلاح أبودية
Date: 07-02-2008, 11:46 AM
Parent: #12
(.)
إسلام !! إنت جبت كلمة برّاية دى من وين..؟؟
ده أحمد (ده فى خامس ويلقب بالديجيتال) قال لمحمد كده
قال ليو شنو ..؟؟ أبوى بقى برّاى؟
لا أحمد قال لمحمد منتصر بقى براية خدرة بمراية
شنو...؟
خدرة بمراية !!!
ياولاد إنتو الكلام ده بتجيبوا من وين؟
أيوة يا بوى إنت ناديتنى (دى المفعوصة الإسمها شهد)
آآآى ناديتك ما عاوزه تجى؟
بس يا بوى مافى داعى للأحراج قدام صحباتى
أنا مش قلت ليك لمن تكونى مارقة لازم تكلمينى؟
آى بس أنا ما حبيت أزعجك لانك كنت عاوز تنوم (فيلسوفة طبعا)
أنوم؟ أنوم وين أنا مع العباقرة ديل بعدين تعالى...
ده شنو الابساهو ده؟
شنو يا بوى البرمودا ولّ التى شيرت؟
الإتنين...
الإتنين جبتهم لى إنت ، آخر مرة لمن جيت من العمرة
يا بت البرمودا ده أنا جبتو لاخوك الخوخة التقلع ضروسك
تانى ما أشوفك لابسه كده ... مفهوم ؟
|
Post: #16
Title: Re: ... أنا بقيت برَّاي...!!
Author: صلاح أبودية
Date: 07-05-2008, 11:13 AM
Parent: #13
طيب أوديهم وين
ما عارف إن شاء الله ترميهم فى الزبالة ما شغلتى
طيب إنت جبتهم لى ليه
جبتهم عشان اقول ليك ما تلبسيهم ... كويس
طيب ممكن ألبس العباية من فوق عليهم؟
يا بت قلت ليك ما تلبسيهم تانى الكلام ده ما واضح؟؟
عليك الله يا بوى (دمعة كده على الماشى)
البت دى دون أخوانا بتقتل قلبى
خلاص كويس ألبسيهم بالعباية
شكرا يا بابا
ما تنسى الطرحة .......... حااااااضر
الله أكبر (صدق الحق)
يلا ياولاد الصلاة
يابوى دى صلاة شنو..؟(ده القليص الإسمو إسلام)
دى صلاة الضهرأمشى إتوضا
.......................
نصلى ونجيكم يا جماعة باقى الضهر ده فى الإجازة صعب خلاص
|
Post: #14
Title: Re: ... أنا بقيت برَّاي...!!
Author: Tabaldina
Date: 07-02-2008, 12:55 PM
Parent: #1
..
.
ياخى اسلام دا تفتيحه وشايل مفاتيحه ..
غايتو المرحلة دى ما وصلناها لكن يا مولانا
وليدات الزمن دا ناس الفضائيات والانترنت والبلى استشين ديل صعبين خلاااص
والله امس الاول حصلت لى قصة حيرتنى ..
شودادى ابنة اختى الصغرى التى لم تتجاوز 3 سنوات
عادو من اجازة صيفية وكدا ..
نظام حلاوة وكدا وزيارة سلام ..
البنية تاكل فى الحلاوة .. قائلة
والله يا خالو الحلاوة دى حلوة حلا .. زى راجل المرا
اتخيل يمين مافى شريط فى البيت عن الاغنية
ولا والدها والدتها من السمعين لها ..
بالجد للان انحنا محتارين من ووين جابت النقشة دى
_____________
بوستيك حلو حلا
|
Post: #15
Title: Re: ... أنا بقيت برَّاي...!!
Author: صلاح أبودية
Date: 07-03-2008, 07:37 AM
Parent: #14
شكرا تبلدينا على المرور
| Quote: بالجد للان انحنا محتارين من ووين جابت النقشة دى |
والله إنت الما ناقش أى حاجة ما قال ليك ديل تفاتيح
شوف الإسم فى حد زاتو أو فى الحدود دى
|
|