مســـــــدار الأنا المتمددة

أنا التاتاي
أنا الشايل الصّبر جواي
سايق معاهو الهمة
همّ الأمة
سايق الصّحبة لي ندداي
صحاب الحارة
والترتارة
حاضن طفلي في يمناي
أناحي همومو
أشيل الهم لتعليمو
ولي أمو الكريمة عطاي
ممدود بي محنة وشوق
لا بنقطع لا يروق
أنا اللولاي
أنا المسكين بحسبو جناي
بقش الدمعة والآهة
عشانو همومي أنساها
بحس بي ضيقو في أحشاي
وبي فرحو القليل أفرح
وفي بسمو الشفيف أسرح
أحس بالعافية في أعضاي
أنا الصّلاي
أنا الشيخ السجد بكّاي
حداي السبحة والإبريق
وسالك في حياتي طريق
وتارك أمري لي مولاي
وعازف عن مذمة زول
وكايس العيشة في المقبول
بديت من الدغش مسعاي
على البكرية من تبيت
عليها كبرت واتربيت
يباركو المولى لي مسعاي
يعوض صبري ذرية
تعيش العمر حرية
ويتحقق حلم دنياي
أنا العشّاي
أنا البكرم ضيوف العرفة والغشّاي
أسوق الغيمة للديوان
أقدم لقمة للجيعان
وفي قدحا وسيع جوجاي
عصيدةً حارة وملاحا تقلية
تعوسا السمحة لسة بنية
وبي قلبا قوي وسوّاي
أخلي ضيوفي أهل الدار
وأصلي علي النبي المختار
أقول حرّم وحات الواهب العطّاي
ضيوفي عزاز
ونومي خزاز
ووارث العفة من آباي
أنا السّواي
أنا أب قولا حقيق مو ساي
وفي فعل السمح والزين
تملي أقيف مع الواقفين
أنا الحاحاي
أرد الهجمة فوق أعداي
أكاتل فوق تراب بلدي
أزيل الضيمة من ولدي
أنا الغناي
أجر النم من الحردلو لي حدباي
أسوق النيل علي الخضرة
أسامر في جبل مرة
تجيهو الغيمة من تالاي
تصب فوق سفحو ضحوية
تغرد فوقو قمرية
تهيج المنقة والباباي
تغازل حلفا توريت
وتبقى نيالا ست البيت
تراقص كسلا صوت الناي
ونحن جزيرة بين بحرين
معاكم في السمح والشين
وفي المقرن ركزت عصاي
جاتني السمحة أم درمان
محمّلة بي عطا الحبّان
وهبّت نسمة من أعلاي
جابت بحري والخرطوم
وجالت بي أكف النوم
حلمت بي مطرا غزير سقّاي
علي الغرا وتبلديها
وهشابا ديمة راجيها
ونغمة بنكهة التم تم مع الدوباي
تقودك لي بطانة الخير
خضار ممتد وخيرها وفير
وشميت ريحة ملوك الراي
جاني النيل حلو وعسجد
خبرت الفلا وعديت الخلايق عد
لقيت تمر الشمال بكّاي
هواهو شمال ، حنينو جنوب
حبيبو شرق ، قليبو غروب
وأنا التاتاي
أنا اللولاي
أنا الصّلاي
أنا العشّاي
أنا السوّاي
أنا الحاحاي
أنا الغنّاي
أنا البكّاي

ده كلو يجي منك ياود قاسم
عفارم عليك

العزيز ودقاسم
كلامك حلو وطاعم
ولكن ندرة الخبل لا تعني ابداً أننا إذا
سرجنا الثيران فسنحصل على خيل
كثيرون أولئك الذين تجمعك بهم مفلطحات وكوازي
وكافيار ومغشات وجميع انواع الحلوى والكافيار
بماصفات تعبر عن الترف ويسقطون للأسف في اختيار
الأخوة والصدق.
ولكن كمثلك ومن تنطبق عليهم هذه الماصفات كثيرون

العزيز إيمو
لك التحية
والبركة في طعامة الكلام ،،
بس تفتكر المفلطحات أطعم من التقلية ؟
ماااااا أظن .

الصديق موصلي
لك التحية
أقول ولدينا مزيد ،، ما دام الموضوع جاب ليهو مكتبات وأرشفة وشغلات زي كده ، لا زم الناس تطلع العندها ،، ولا شنو ؟
ما تعمل لينا مكتبة غنا منفصلة ، ومكتبة كلام منفصلة ، رأيك شنو ؟

ود قاسم
تحية عارمة

إنه مسدار و ياله من مسدار ،، و لكنني أربأ بها من ( أنا ) ،، فأنا كلمة توحي بالأنانية ،، و لكن أسمح لي بأن أطلق عليها مسدار الرجل الأصيل. فهذه الصفات التي يذخر بها المسدار ،، إن لم تكن فينا ،، لتمنيناها

( أخلي ضيوفي أهل الدار
وأصلي علي النبي المختار
أقول حرّم وحات الواهب العطّاي
ضيوفي عزاز
ونومي خزاز
ووارث العفة من آباي
أنا السّواي
أنا أب قولا حقيق مو ساي )

هذه الكلمات التي أنتقيتها ،، أهديها للتي في بالك و بالي.

تسلم

ودقاسم
يازول انت مبدع عديل لو دى تبعك نسجل معانا
فى اتحاد الشعراء الخفاف , دا بعد اذن ابوجهينة رئيس اتحاد الادباء المبدعين
لانك انت عضو مهم معاهم
بهدى ليك بت ابو جهينة وزهوره
وتسلم ياغالى

الشاعر أبوقوتة
أنا أنتمي للفئة ما قبل الخفيف ، وهناك محاولة للتطوير ، لكنها الإنسان في عمري هذا يحاول أن يكتسب خطوة للأمام فيفقد خطوتين إلى الوراء .
شكرا للدعوة وجاهزين للاستجابة ، بس الجبص اتفك وللا لسة ؟

الشاعر أبوقوتة
أنا أنتمي للفئة ما قبل الخفيف ، وهناك محاولة للتطوير ، لكنها حال الإنسان في عمري هذا يحاول أن يكتسب خطوة للأمام فيفقد خطوتين إلى الوراء .
شكرا للدعوة وجاهزين للاستجابة ، بس الجبص اتفك وللا لسة ؟

أبوجهينة الرائع
وسط الزهور متصور
وجهو الصبوح ومنور
تعرف أبو جهينة العنوان عشان الجماعة يجوا ، خاصة الناس التي تنظر إلينا شذرا ، والذين لا ينتظرون منا إلا مواضيع للشكل ،،
لك التحية .

اليوم اكتمل يقينى بان لهذا الرجل الف باب
للدخول وواحد فقط للخروج يفضى الى فناءات بالوان الطيف,فادخلوه من اى باب شئتم فانكم ستجدونه
التاتاي
اللولاي
الصّلاي
العشّاي
السوّاي
الحاحاي
الغنّاي
البكّاي

قولا وفعلا
هيا ادخلوا الى قوس قزح فأنكم حتما خارجين
بظلال منه.

محمد الشيخ
صباحاتك نور
صاحبك ده جربناه ، ما لقينا منو أي فائدة ،،
واسال منو تبلدينا ، وعمر مهدي .

..
.
انا العّشاى
وانا الغاغاي
وأنا السواّي
وانا الخالاّي

وازيك يا حال لقيت نفسي شايت انا وانت راس
قلت ادخل راسي اسلم عليك الله يستر من الكرتبو

مودتى واشواقي

تبلدينا مرحب السلام ،،
إيه رأيك في جولة تانية زي بتاعة بيت وراق ؟
سلم لي على عمر مهدى وعبد الحفيظ ، وقول ليهم الخال راجيكم ،،والمرة الجاية اليجينا لازم يكون شايل معاهو مستنداتو .