ركضـــــــــاً أجيئ إليك

كلام ساكت يا جماعة ....


لو أنني كنت في سنه ، ولو أنّ مثلها ناداني بهذه القوة المشوبة بالرقة ، لما تأخرت ساعة عن الاستجابة لدعوتها ... هي في غيم الدعاش ، وهو في تمام العِينة . وما يمنع الطرفة البكّاية من الالتقاء بالدعاش ؟
كان الموسم ربيعا ، وكان الوقت فجرا ، وكان نهرها يتمدد ويفيض ، يزاحم فيضان نيلنا دون أن يعتدي على خضرة الضفاف ..
كان الورد مبتسما ، وكان الصبح يتنفس طيبا وعودا ، وكانت الألوان بنفسجية ...
كانت الأضواء مشعة ، والقمر بدرا ، والشموع مضاءة لا تنطفئ ..
هناك كانت سدرة منتهى الحب ، وتمام بدره ، واستواء شمس أصيله .
هناك اجتمعت الصلوات ، والأناشيد ، وأغاريد الطير من كل جنس .
فاضت أريجا ، وهمست بشجو عذب ، ومدّت ظلها عبر المسافة بلا خوف ولا وجل ، وما خشيت في الحب شماتة شامت . فما تعثرت كلماتها ، ولا اختلت أوزان هديلها .
لو أني .................................................... لكنت أتيتها ركضا .

Quote: لو أني .................................................... لكنت أتيتها ركضا .

ولو أني..








الله عليك يا ود قاسم.. إحساس والله

عبد الله عقيد
بالله لو كنت أنت ....................... هل كنت ستأتيها ركضاً ؟

دا كلامك!؟




أُمّال أيه!؟

عبد الله عقيد
الركض أحلى استجابة للنداء الحميم ،،، وهناك الكثير من أصدقائنا يخذلوننا فعليك بصاحبك ، لا تتركه لوجع القلب ...

Quote: كانت الأضواء مشعة ، والقمر بدرا ، والشموع مضاءة لا تنطفئ .. هناك كانت سدرة منتهى الحب ، وتمام بدره ، واستواء شمس أصيله . هناك اجتمعت الصلوات ، والأناشيد ، وأغاريد الطير من كل جنس . فاضت أريجا ، وهمست بشجو عذب ، ومدّت ظلها عبر المسافة بلا خوف ولا وجل ، وما خشيت في الحب شماتة شامت . فما تعثرت كلماتها ، ولا اختلت أوزان هديلها .

ياسلااااااااااااااام ياخال يديك العافية يارب
والله كلام يريح النفس ... اللهم أوعدنا يارب
ومع اني ماعارف التحت النقاط دي شنو ياخال لكن بركض
بس وريني أركض على ياتو أتجاه

تحياتي ياخال

بدري
أهلا بك أيها الخلوق ،،
أنت من تنطبق عليه الشروط ، فإن أتاك النداء فلا تتردد كما يفعل بعض أصحابك ...

ممكن اركض ............معاكم


ولا الركض ده للرجال بس ؟!!

العزيزة نادية
اركضي معنا ، فالحب نبع صافي ينادي صنّاع الجمال إلى رشفة منه ،،، وأنت أيضا ممن تنطبق عليهم الشروط ، فلا تضيعي للحب فرصة ،،

ممكن اركض ............معاكم


ولا الركض ده للرجال بس ؟!!

جـــــــاييك مــــن آخــــر الريــــد مشيـــا علي الاشواق

كتب صديقي طلحة ذات يوم وردي

أنا جايي ليك
من جوه اجراس المــعابد جــاي ليك
بالخشوع الفي المساجد جاي ليك
ووصتني انما وصلت ليك
يدفنوني في نص الطريق
مكتوب علي شاهدي

عــــابر طريــق ماشي المليــــك

عشت يا ود قاسم
نحتاج هذه القناطر علي نهر الاحزان

زي ما قالت نادية عثمان انا ممكن اركض معاكم يا ود قاسم

ولا شنو كدا ما عارف

لك كل الود يا ود قاسم ايها الرائع

وكمان ابراهيم عدلان ابداعو ادفق فينا

الله يخليكم



مع اكيد حبي وتقديري،،،


عادل فايت

عادل فايت
ما تقولي ... الليلة الصباح قريت طلبك المساعدة ، الصورة تؤهلك للركض السريع ،،، افتح قلبك فهناك من يدق الباب ... ولا تتردد ... لا يدخل مرض القلب إلا من باب التردد ، ومن يصد النداء فليطأطئ رأسه ...

العزيز إبراهيم عدلان
تعيش وتوصل ليها ،،، وتنال كل المنى ،،،
فقط اركض ، لا تتأخر ، ادخل بين ذراعيها قبل أن تجمعهما ، فالفرصة النادرة لا تتكرر ،،،

Quote: أنت من تنطبق عليه الشروط

شفتا كيف ياخال الدنيا دي مابتدي حريف
ناس تجيهم نداءات ويقعدوا يترددوا وناس منتظرين مجرد
همس ومالاقينو

معليش ياخال تخريمة سريعة على نادية في حوشك

نادية تحياتي

Quote: ولا الركض ده للرجال بس ؟!!

أنتي من تنطبق عليه النقاط على قول الخال
وبعدين يااختي مالك ومال الركض خلينا نحن نركض
لما نفسنا يتقطع
وبالمناسبة انتي عرفتيها ياتو شرقية ولا لسة؟؟
تحياتي مجددا

يا خال طابت أوقاتك
هما اثنان المعنيان بهذا البوست
(من سياق النص)
وهما من بورداب الرياض
أحدهما (كان نازل البلد) قريب
والثاني
عمرو زاد سنة
يعني كبر شوية
...
الأول
حسب رأيك
انو لا يعرف غير الحديث في السياسة
ولو استجاب للنداء الحار الذي وجه له
فذلك من باب
الهاشمية...!
الثاني
مقرب وأثير عندك
لكنه "رد التحية"
بأقل منها
وصارت أقرب الى المجاملة
ولو كنت
أنت مكانه
لأخذت الذي
حيّاك بـ"الاحضان"
....
...
..
.
تسلم
يا خال يا شفيف

الحبيب
عادل فضل المولى

عملتها ظاااااااااااااهرة.

دا من فهمك
يا عقيد
....
احلى تحية
ليك
وراجين
رد الخال والجماعة
الـ لمسهم
رأس السوط
...
..
.

العمدة ود قاسم

منك نتعلم الكثير و الله

قليلون هم الأوفياء في هذا الزمن

يـــــــــاه

تقديري

الصادق خليفة
لك الود أيها الوفي ،،،
واجب علينا إجابة دعوة الأصدقاء ، ولا خير فينا أن لم نستمع لهتاف الحب ونداءاته ، فهذا من أعظم النداءات ، والاستجابة لنداء من يحبونك خير من الاستجابة لمن تحب ،،، وقديما قالها أهلنا :
البيريدك أخير ليك من البتريدو ...

عادل
يقول محمد المكي إبراهيم

متى تجاوزتهم
وثباً إليك أجيئ
شعري بليل
وحضني بالورود مليء
فلتتركي الباب مفتوحا
وحظي في الفراش دفيء
ولتلبسي لي غلالت الشذى
وغناء النبع والأشجار
فلي حديث طويل مع نهديك في الأسحار
يا برتقالة
فساعات اللقاء قصار
تأمليني قليلا فالصباح أطل
البحر ساجٍ
وتحفاف النخيل غزل
وبركة القصر بالنيلوفر ازدحمت
والنحل أشبع كاسات الزهور قبل
وإنني الآن أزهى ما أكون
وأصبى من صباي
ومكسياً من النور الجديد إزار
تأمليني فإن الجزر أوشك
إني ذاهب
ومع المد الجديد سآتي

عادل فضل المولى
ألبست البوست حلة زاهية .. شكرا رهيباً لك ...

العزيز عادل فضل المولى
ألم تقرأ هذا ؟

Quote: كلام ساكت يا جماعة ....

ومع ذلك فإنني أقدّر تلك الورقاء التي غنّت بحديقتنا ، وقد استمتعنا كلنا بشدوها ، وامتلأت صدورنا بالهواء النقي ، وهفت قلوب أمثالي إلى أيام خوالي ، ومد الشباب رقابهم ، وتساءلوا عن نصيبهم من النداء ،،، بعض الآذان تسمع دبيب النمل ، وبعض الآذان يفوتها سماع أعتى مكبرات الصوت ،،،

إنتي يا نادية ركضك بيقطع نفس خيل القصيد

ود قاسم يديك العافية عدد خيوط عمتك ودعوات خالتك وعمتك

ما اجمل الدعوة للركض في روض الجمال وعلى الربا والتلال عبير يضوع ونبع زلال

عبد الرحمن عبد الله أبوشيبة
دعها تركض ، فهو أفضل من أن تدفعنا نحن إلى الركض المستمر ،،، قل لها أن من ركض إلينا ركضنا إليه ضعف ما يركض ... ويديك العافية أيها الشفيف

بدري
اجلس على الشط ، اكتب شعرا ، وداعب خيوط الربابة ، سيأتيك نداء من بعيد ، لن تخطئه أذنيك ، ولن يتجاهله قلبك ،،، ستتغير دقات قلبك ، وسيصيبك وجيف ، هو الحب ،،، هو الحب ،،، فلا تخف ، ولكن لا تتردد ، لا تتدثر ، ولا تتزمل ،،، افتح ذراعيك ودعه يدخل بسلام ،،، أطبق عليه ،،، ولا تطلقه أبدا ..

يا خال أنا اليومين ديل مدعوك تمارين عشان السمي فاينال ..

عشان كده الجري والركض دا ما حقي ..



بجيك بي رواقة ..

Quote: بجيك بي رواقة ..

معتصم
الرواقة دي موش في كل حاجة ،،، الأمور لا تشبه بعضها ،،، أمر هام ، وأمر عاجل ، وأمر لا يمكن تأجيله ...
كل ما ينضج من الثمار يسقط إن لم نقطفه في موعده ...

الخال ودقاسم
تحياتى كلامك كلو حلو وجميل
يظهر انو اللياقة حا تخونا
الكلام دا داير واحد لياقتو زى لياقة
المعتصم بالله عندوا الامكانيات عيبو انو جبان
فى المواقف المماثلة
لك وللجميع كل الود

Quote: ممكن اركض ............معاكم ولا الركض ده للرجال بس ؟!!

خليكى فى حتتك ، نحن حنركض نجى عندك

ترهاقا
عظيم النوبة
مراحب
أهديــــــــــــــــــــــــــك رســـــمة حنّتك

الحبيب أبو الصادق
قلت لي الولد عنده لياقة ؟
كلامك صح ، بس الولد ما جبان ، ولد نوارة ، وشهم ، وأخو أخوان ، بس تقيييييييييييييييييييل ...
وأنا خايف عليهو من الغطسة ،،،

Quote: يقول محمد المكي إبراهيم متى تجاوزتهم وثباً إليك أجيئ شعري بليل وحضني بالورود مليء فلتتركي الباب مفتوحا وحظي في الفراش دفيء ولتلبسي لي غلالت الشذى وغناء النبع والأشجار فلي حديث طويل مع نهديك في الأسحار يا برتقالة فساعات اللقاء قصار تأمليني قليلا فالصباح أطل البحر ساجٍ وتحفاف النخيل غزل وبركة القصر بالنيلوفر ازدحمت والنحل أشبع كاسات الزهور قبل وإنني الآن أزهى ما أكون وأصبى من صباي ومكسياً من النور الجديد إزار تأمليني فإن الجزر أوشك إني ذاهب ومع المد الجديد سآتي

بالله يا ود قاسم ما تجننّا
دا شنو البتنكت فيهو دا!؟

ود عقيد
وكمان عادل ولدنا فوق تمّ ليك الناقصة ...

وركض مــعنا الحاردلو الصغير محمد عبدالقادر وقــال

نسيما هب من بعد التعول ما كبن
ذكر عقلي بالفيهو النفوس انصبن
حمول الهم علي قلبي التقيل اتردن
كل ما يقول وصـل تاني الدروب اتمدن



جار بينا الزمن وداناغادي ابعدنا
كيف عاملين وكيف عوس الليالي بعدنا
طلبناالمولي في الايام يكتبوا سعدنا
يطفي الليلة جمرا فوق لهيبو قعدنا

الدنيا قالو قديمها بمحي جديدة
إلا صبابتي تكرار الليالي بزيده
عشانك نوحي اما القسمة كيف تجديده
حيلتنا الأماني انشاء الله تبقي سعيده

حفظتك آية في الأسحار بجــيب ترديده
شلتك دره في اعماقي غايصة بعيده
حسبة حبك النبتت بقت فرهيده
دواها الروح وتاني المال وجبره شديده

كل ما تطول علي طرق الحياة و تتعدد
الاقي هواك مرفأ و فوق رمالو اتمدد
انا يا ربي أملي الكل يوم بتجدد
اكتب ليهو فرصة و ايامو ما تتبدد

نسيمات الخميل الحاملة طيب و رزاز
ادمت فينا مدفونا صبح نزاز
الزول السمح و عهودنا عندو عزاز
سلبني يقيني و النوم من عيوني خزاز

ونواصل الركض يا ود قاسم

نستأذن الحاردلو الصغير في بعض المجادعة

نسيما هبّ بعد النجمتين ما اتخبّن
ذكّرني الجريف العيشو يادوب لبّن
حمول الهم علي قلبي الرهيف ما غبّن
كل ما أقول يزولن من جديد يتربّن


قعاد الغربة طال وبعادنا ما أسعدنا
جمر البين قدُر ما حرّ فوقو قعدنا
قبيل ساعة الفراق ما اظننا اتواعدنا
دحين حبّانّا يبقى طرونا بعد ابعدنا؟


ود عقيد

الخال ود قاسم
تحية طيبة

ده اعلان بمناسبة اليوم العالمي للجري ولا شنو?!
غايتو انا اكيد من المشاركين في "الجكه" دي
لكن بس ممكن اركض من عندي عشان نقصر المسافه و نتلاقى في النصف? و بعد داك يا واصلنا معاكم او اتفاصلنا بس عليكم الله ما تقطعوا نفسنا بالركوض.....
وهاك الهروله دي عربون ركوض:

امشي اليك...فعمري كله سفر
امشي اليك على جفني...و لا اصل
ما كنت ترحل في يوم و تتركني
لو كنت تعلم:كم اهواك يا رجل!!

"زهرة المنتدى"

ابنتي رنّوية
كيفك ؟
وكيف الشجرة حقتي ؟
تعرفي أنا دائما من الداعين لموضوع الركض ، أو الوثب كما يسميه محمد المكي إبراهيم،،، لا يعجبني الركود والانتظار ،،، ولا يريحني الصمت ... أعتبر الصمت خيبة تقتل الحب في طور العلقة ... والحب بمعناه الواسع هو الدم الذي نضخه لتستمر حياتنا ممتلئة بالروعة ، ولو انعدم هذا الحب ، وجف في شراييننا فإن حياتنا ستكون ماسخة لا طعم لها ، وستكون حياة أشبه بالعدم ، بل ستكون العدم نفسه ...
لك أن تشاركينا ( الجكة ) كما يحلو لك أن تسميها ، وطبعا في يدك باقة ورد ، فأنا أعرف أن الورد رفيقك وأن الخضرة ديدنك ،،،
والرجل الذي لا تهواه أنثى رجل بلا روح ، والأنثى التي لا تجعل حياتها سفرا من أجل الحب أنثى بلا روح ، والجفن الذي لا يتحرك في مساحات الحب جفن بلا إحساس .
ولك التحيات الطيبات ...