بعبع اوكامبو والخطر المحدق بالكوز جربندي.....!!!

القصة بقت بايظة بوظ شديد وباكات شطر البقرة الحلوب التي كانت يرضع منها جربندوني اتجهجهت جهجهة ابراهيم عطا استوبر المريخ الشهير ..والنقاطة الكانت بس عاوزة ليها دقن (بكرت) و جكة جكتين في ميدان الفريق لزوم الدفاع الشعبي...ومعاها حبة تكبير وحبيتن تهليل عند اللزوم... النقاطة دي بقت في خطر
جربندي زارته سحابة ولمحة فلاش باكية من انجازاته التاصيلية السريعة والشرتيت الذي تقاطر اليه منذ بدايات اكتشافه الية عمل (كل شي لله) وسرح بخياله الي اياماته الاولي في طريق الترطيبة التي هبطت عليه عندما رشحه (شيخ يس) لتولي ميز معسكر الدفاع الشعبي في المدينة التي كان يقطنها

والله زمان يا شيخ( يس) لعبنا( ون تو) احرف ثنائي في الدوري البرازيلي ما يلعب زيو
زيت مجاهدين كف نجرف -بصل مجاهدين لب لب- رغيف مجاهدين- دمورية مجاهدين- باتات مجاهدين- موية مجاهدين....كلو ذهب ما بين جربندي افندي وشيخ (0يس) فيفتي فيفتي....
نص يمشي لجموع للمجاهدين والنص التاني كروبات وفواتير كب فيها جربندي افندي موية تقيلة وكانت اولي الاشارات التي التقطها سريعا وعرف بان الناس الدقانة ديل بجي منهم خيرات وثمرات رطبا جنيا لو دفر معاهم في سكة الدقن دي....وساعد القصة بكم جزاك الله خير ...وكب في شخصيته كوز كوزين مع شوية تهليل وتكبير...
واقتني جربندوني احلي دقن فاقت في طولها الان دقن عباس انصار السنة العامل فيها منقطها وابن كثير .....

كانت مرحلة البدايات وامطار الكروبات التي هطلت علي جرنبدي كافية لاشاعة البهجة في بيته الجالوصي ذو الاوضة الواحدة ودخلت البيت هذا ولاول مرة (اربعة غويشات) من الدهب المصقول والموضب عند احرف صائغ في المدينة...وعندما كانت المدينة تسمي تلكم الدقة الدهبية المميزة (دقة الترابي)....حلف وازبد وارغي اخونا جربندي افندي وهدد نفيسة زوجته بانه سيذهب بها الي غياهب الطلاق ان لم تشيع في المدينة بان هذه الدقة اسمها (جيبو جون قرنق حي)

وسنتابع

سريع سريع اصبح جربندي وهو الذي طرد من فصول الدراسة ذات زمان بعيد لكونه طالب فاشل يجلب البنقو الي فصول الحكومة واتهم بعدة تهم عجيبة في التحرش بالاطفال في سنة اولي ومحاولة العبث الشين معهم..ليطرده المدير الاسطوري (ود سرور) شر طردة وتلفظه كل مدارس المدينة الاخري لذات السبب ليتحول الي عاطل كبير يستمد اعاشته من والده ذلك الرجل العصامي الذي كان يعمل تزري فقير ولكنه مكافح اهلكته الاحزان عندما لم يجد ابنه جربندي سوي في طريق الضلال والاجرام

وكل يوم والتاني جايبو بتاع (كارو) من فريق النسوان الكعبات وهو ثملا منغشم نغشيمة ليها ضل... ليكافح والده ليلا ونهار ليزوجه من احدي النساء الطيبات التي اصابها الخلع والاندهاش عندما طل جربندي عليها ذات مساء وهو يحمل اربع من غويشات الدهب الما بغبباء عينها لدرجة اتهامها له بانه قد يكون نهب احدي المتاجر الدهبية ليلا...ولكنه عالجها بهتاف جادي مكبرا ومهللا.....
دي الدقن ....دي الدقن يا زولة هوووي انتي ما نصيحة ولاشنو ياوهم.. ومن الليلة....الغريق قدام قداااااااااااام وليبيا فتحت وراجلك لقي ليهو شطر ابن لذينة والقصة واااااااااااااره....ومن الليلة يا وهم تجدعي الثوب ده وشوفي ليك خمار اقفلي وشك العامل زي الكبك ده...وبكرة اشوفك في المعسكر بتاع اخوات سعدية....
وسنعود

Quote: (جيبو جون قرنق حي)

دي ايام الهوس الاولى.....

إزيك يا حبيب....شوق مطر...

وتعلق ال###### الراكن منذ الحجريون على الظهر المتسخ بقازارات اندايات هايد بارك وبيرة ايطاليا الباردة ووسكي اسكوتلندي معتق يكسر بالموية عشان يشربو الجربان القزر ، ويترنح في شوارع باريس وروما فهل عرفتم من اعني

هههاي قررررر

Quote: وتعلق ال###### الراكن منذ الحجريون على الظهر المتسخ بقازارات اندايات هايد بارك وبيرة ايطاليا الباردة ووسكي اسكوتلندي معتق يكسر بالموية عشان يشربو الجربان القزر ، ويترنح في شوارع باريس وروما فهل عرفتم من اعني

هلا يا المكاشفي وسلام
وشنو يا زول الغلغلة دي والكلام العجيب ده
فياريت تفصح وتبان وبالتاكيد ليك الامان....
انت بتعرف شيج جربندي ده ولاشنننووو..؟؟
متور نفسك كده

ما شاء الله تبارك الله

بقيت قاص كمان .........

Quote: دي ايام الهوس الاولى..... إزيك يا حبيب....شوق مطر...

اووووووووه يا كدوك
ومشتاقين شديد ياخي
ونعم يا صديقي انها ايامات الهوس الاول وسيرة فلترق كل الدماء
وسيرة امريكا وروسيا قد دنا عذابها وعلي ان لاقيتها مطرفة ضرابها...
وفي وسط كل هذه الاجواء والعيون الكيزانية المحمرة الكايسة الدواس كان شيخ جربندي متواجد ومنغمس ولابع وحامد ثم شاكر

Quote: ما شاء الله تبارك الله بقيت قاص كمان .........

هلا يا باوقة
ومافي قاصا كده لمن ينضمو بيهو
ولكني بقيت قصاص اتر ولذا قررت في شغلتي الجديدة والشديدة دي اقص اتر الشيخ الحرامي جربندي ده
واونس بيهو الشعب السوداني الفضل ده شوية...!!!
بعدما مص جربندي واخريين من بني كوز دم الشعب السوداني الفضل في اكبر عملية ثنائية وتحالف ما بين الباعوض وبني كوز
والمطبلاتية

وشكرا علي مرورك يا عمر
وانا عارف اوكمابو ده عامل ليك موية في الضهر عشان كده قلنا نديكم تحية صباحية
وردية في شكل بعبع اوكامبو

سريع سريع عربية الطوب والرملة والابواب الحديدية الفور ويل درايف هطلت علي بيت جربندي...وشوية شويةاتوضب صالون ابن لذينة...ودقن جربندي ماشة في سكة اللبع تمد وتطورت علاقاته الي ضابط المجلس وامير المجاهدين البجي من الخرطوم
ودقاني خاشي ودقاني مارق من صالون جربندي الذي تمدد الان واصبح هو رجل المرحلة التي عليها تفريخ محاربين ومحاربات بالذهاب بهم الي العمليات وحبة حبة فضي له الجو بموت شيخ (يس) في الحرب الجهادية واصبح هو الكل في الكل تربيع
ليعالج سطوته ويحي ذكره فردة باكه اليمين (يس) بزواج سريع وعاجل لزوجته استخلافا وطمعا في الفيفتيات القبيل كان شيخ (يس) يكابسه فيها

كريم
كيفك يا عمك
العمر بلع شوق السحاب
ورجع اوجاع الحنين للديار
وشال غيبة سعدية في ترك الترك وعثمانية السلطان
فصلاح الدين والناصر غلاوون شبعو ابو مخالب من السكارى اللابعين والقرقانيين في الوسكي الاسكتلندي والبيرة الايطالية

حبيبنا عبد الكريم فهمت ولا اشرح ليك اكتر

Quote: حبيبنا عبد الكريم فهمت ولا اشرح ليك اكتر

هلا يا مكاشفي
وبصراحة وبكل شفافية ما فهمت تماما كلامك ده
وياريت توضحو بصورة مباشرة وواضحة وشجاعة
لاني ماعاوز اظلمك كمان وافهم الايحاء الفيهو واكون ظلمتك ساااكت يا زول
وقد تكون قاصد حاجة وانا فاهم حاجة تاااني خلاص فلذا اتمني ان تفكك كلام بتاع الويسكي والقرقانين في الويسكي ديل منو..؟؟
وعلاقة صلاح الدين والترك والعثمانيون شنو بالحكاية دي...
فهمنا يا مكاشفي القوم وافصح يا رجل بعربي مبين ..؟؟
عشان ماا تكركب معاك من وحي فهم خاطي..

يا جربندي ياخي ما ارح معنا الجنوب...
هيييع انا زول من جهز غازيا فقد غزا فخلوني يا اخواني في الله في هذه الابتلاءات وخلوني اعد لهم من رجال وقوي ورباط خيل...والله اكبر الله اكبر..عندما شالته الهاشمية ذات يوم من ايام حضور الزعيم الكبير الي دائرة اختصاص جربندي الجغرافية وشاف بام عينه معنويات المجاهدين فوووووووق والتكبير كان عنانه السماء واختلطت تكبيراته مع تكبيرات الشيخ الكبير الجاي من الخراطيم
مع تكبيرات المجاهدين فكر وقرر سريعا جربندي الذي هو الان شيخ جربندي ان لايفوت هذه السانحة التي يمكن ايضا ان يجي منها وفير المال العام والخاص فقرر بانه سيقود جموع المجاهدين وتوريت توريت يا ارض الفداء اقسم جربندي ان يجعلها ارض للعداء كان هذا هو شعار جربندي الذي عصر فيها علي روحه وقدمها الان رخيصة من اجل الدين ظاهريا ولكن باطن الامر رغبة في مزيد من الكروبات والسفسفة ورا المشية القلبو ما كان دايراها دي لكن يسوي شنو ياخي مع الشيخ الكبير الفقررررررررري ده......

Quote: وفي وسط كل هذه الاجواء والعيون الكيزانية المحمرة الكايسة الدواس كان شيخ جربندي متواجد ومنغمس ولابع وحامد ثم شاكر

اهلا يا كيكى .........امثال هذا الجربندى اراهم كانوا ولا زالوا منغمسين ولابدين ولابعين غير حامدين وشاكرين

ياخى مشتاقون..

الزول الفنان عبدالكريم




واصل ياخ


والنشوف الدقن دي حدها وين



تحياتي

Quote: واصل ياخ والنشوف الدقن دي حدها وين

هلا يا ادريس
وحبابك والله في مدارات بني دقن واخريين من جربندية الزمن الزيف وسطوة الطفابيع
وحتما سيحلو السفر صوب عوالم بني دقن وشيخ جربندي الانفلوسي العريق

وتحياتي وكل الود والتقدير

كان يوم تحرك جربندي من المدينة هو يوم للوصايات واظهار المغتغت في ثروته التي
لملمها من مرحلته الاولي في سكة اللبع..ووصي بالحواشات والدكان الناصية القاعد فيهو عبود ود اختي ده حقي و الطاحونة الفي فريق ورا حقتي والدكان الفي فريق الاندايات تبعي...وانداية بت شلخة برضها حقتي...وابقي عليها عشرة يا ابوي لحدي ما اشوف لي صرفة مع الجهاد ده واجيكم نابل....ووب عليك يا جربندي من ناس كتيبة جاموس وكتيبة زعلان القالو بلقطو من طرف ديل...!!!!
ونعود

Quote: اهلا يا كيكى .........امثال هذا الجربندى اراهم كانوا ولا زالوا منغمسين ولابدين ولابعين غير حامدين وشاكرين ياخى مشتاقون..

اووووووه
هلا يا حامد ومشتاقين شديد ياخي
ونعم امثال جربندي والكثير من الذين يركبون مكنته لايزالو يصولو ويجولو ومتمددين في كل الكون السوداني
وبعضهم في خارج الحدود لابعين وماصين بمصاصة تفوق في حدتها مصاصة باعوضة سنار الشهيرة
ولاشاكرين
ولا حامدين
بل مسلوعين وطالبين المزيد من اللبع والفرص التي تتولد لهم بكل سهولة ويسر...
ايام الانقاذ الاولي كانت الحرب وتوابعها اللوجستية هي شطرهم الميت الذي رضعو منه
وفي ايامات نيفاشا نيفاشا تحولو الي دروع جربندية مقاولة ومنفذة لمشاريع تمتص مال الشعب السوداني الفضل بمزااااج
وخبرة دقنية باعوضية كبيرة

وتحياتي يا حامد وكل الود

عندما وقع المتحرك الذي كان بين صفوفه جربندي مزرقنا بين كمين من الكماين التي نصبتها (كتيبة زعلان) واختلط الحابل بالنابل تحت وابل رصاص الدوشكا والقرنوف والاربجيهات (والبي تو تونتي وهاجة) لم يجد جربندي ادني طريقة من مقاومة (الياااع )والرغبة في الشتات ولكن الامر اصبح له شينا وقاسي وصعيب ..فداااااااك شيخ فلان مضروب دانة مفرطاقهو قطعة صواميل للمجاهدين تاني ما ينفع...!!!
وياهووو داااك فلان الفلاني مضروب ومفرطق الراس وكيف له ان يطلع من هذه القبضة الثمينة (حرب الكفار) الرعاديد دون عاهة مستديمة وجرح غائر يمكن ان يساعد في الايام اللاحقة في معركة لملمة الثروة وحور عين الدنيا...!!!
فخش تحت اقرب (شجرةلالوب) وادي المجاهدين ضهرو ورشا روحو واحدة طلقة سلاخية زي السم في (الرجل الشمال) وليجري سريعا صوب المعسكر بطريقة (الهرك) الشهيرة او( الشدت) راجعا الي صفوف الجرحي ومدعيا بانه ضرب في مقتل ولولا القرود الاثنين اللائي هبطا من( شجرة لالوب) مقاربة لمكان ضربه بواسطة الكفار وليحملا ه الي مكان الجرحي....!!!
وتعالت الصيحات الله اكبر الله اكبر
وليصبح ومنذ ذلك التاريخ اسم الشهرة للشيخ جربندي هو (الشيخ الشالتو القرود)..هيييييييييييع ...!!!!

وعاد جربندي موشحا بسيرة بطولات خارقة واسطوريةوجد لها من بين صغار الداقنةو جوقة تاكل عيش من المطبلين الجدد ثوما وشمار وثلجا كاد هو ان يصدق بل عندما يجد مساحة وزمن وساحة للجاكة يردد بان القرود التي شالته وحملته علي عجل قد قالت له حرم يا شيخ جربندي لوما احنا كقرود سماوية تفتيحة عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..

مشية جربندي تلك كانت هي الاولي والاخيرة فقد قرر بينه وبين نفسه وبعد ماراي من الدماء والقرنوف البفرطق البني ادميين حتت حتت والالغام التي تنبل من حيث يحتسب ولا يحتسب قرر( تاني جهاد نهيييي) ويلقوها عند الغافلين الدقانة مجرمين ديل...
وساعتها كانت اليته الي الالتفاف هو تغيير التخصص والرمي قدام والبحث عن مورد (كجمة) تاني بعيدا من مدارات حاربو واقتلو وجهزو غازي قد غزا دي....
فقرر تنويع اللعب والدخول الي عوالم البندر والرمي قدام في الخرطوم محل الطيارة بتقوم والشيخ ابودقن كبيرة بنوم...!!!
فاصبح الان بعدما كان دمورية مجاهدين لب لب في الماضي .... اصبح الان الشغل بنية تحتية...طرق وعطات لب لب... شركة اتصالات عاوزة تصديق عشان الناس تقول عبرها (الوو) جربندي جاهز موية ونور لب لب عبر تسهيلات من مكتب الوزير شخشييا
صينين عيونهم صغااااااااار عاوزين يحفروا ليهم بير بيرين في البترول جربندي جاهز موية ونور وبقشيش تقيل بكرة الصيني يجيب حفارتو ويدور حفر ..ما ضروري يلقي ليهو بترول او ما يلقي ..ولكن المهم في الامر انو جربندي ياخد
حقو كاش ويقلل النقاش

يا سلام يا كيكي,

من زمااااان طولنا من رواياتك الاسفيركيزانية دي,

واصل ونتابع,


أحمد الشايقي,

Quote: الاسفيركيزانية

هلا يا ابو حميد
ولينا طولة ياخي ومشتاقين كثير
وحبابك كثير في مدارات وكراكير شيخ جربندي رائد العمل الكيزاني في كل الازمنة الانقاذية
وسنواصل باذن الله السفر الي عوالمه الضاجة والعجيبة والغريبة

وتحياتي وكل الود

دايما ممتع في تناولك .. متعك الله بالصحة و العافية.

Quote: وابقي عليها عشرة يا ابوي لحدي ما اشوف لي صرفة مع الجهاد ده واجيكم نابل

احكي ليك قصة في ذات الاتجاه

في المدينة التي كنت اعمل بها خرجنا لوداع المجاهدبن (90/91).

شاهدت جارا لي - جبهجي - في الصف مع الجماعة يهلل و يكبر ثم اعطي الاذن ليتحدث
عن الجهاد و الجنة و... و.... و انهم ذاهبون لتدمير الخوارج و نصر الاسلام

ثم قيل لنا ان الافضل ان نركب و نودع المجاهدين خارج المدينة

وقبيل وصولنا الى خارج المدينة جاءت عربة مندفعة واوقفت الركب و قيل لنا جاءت اوامر عليا من الخرطوم
بان لا يسافر فلان ( جاري الجبهجي)

ادهشني انه نزل من البص و لم اره يحمل شنطة ملابس او حقيبة تدل على انه كان مسافرا.
نزل من البص و ايدو فاضية.

في ما بعد سالته عن لماذا لم تكن له شنطة ملابس وهو على سفر فارتبك وقال لي الامر كان مرتبا.


الحبكة دي فاتت جربندي يا كيكي
ديل ناس حرفاء

Quote: ادهشني انه نزل من البص و لم اره يحمل شنطة ملابس او حقيبة تدل على انه كان مسافرا. نزل من البص و ايدو فاضية. في ما بعد سالته عن لماذا لم تكن له شنطة ملابس وهو على سفر فارتبك وقال لي الامر كان مرتبا. الحبكة دي فاتت جربندي يا كيكي ديل ناس حرفاء

هلا والف مرحب يا زول واحد وتحياتي
وزولك ده فعلا فات شيخ جربندي بغادي وحبكتة الدارمية كانت واضحة
وهنالك اخرين بالتاكيد من دقانة الزمن الزيف حيقولو لجربندي وزولك ده ..زحو كده انتو الاثنين وخلونا نحن نعبر عن السلفكة
والفنون والجنون الدقنيةفي زمانات المال السائب الذي يعلم السرقة واللبع
وما بحتاج كل هذا الا لدقننة كرتونية وشوية تكبير واخلاص في التعبد والتهجد الكاذب

وتحياتي يا زول واحد
وكل الود والتقدير

سلام يا عبدالكريم
كوراع بحكي عن صاحبو ربيع و اللكان عندو تجربة من داخل الاحراش

Quote: حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط .... - حينها فقط شيل كوعك دا من كتفي يا أُم, و عليك دينك اعفيني منك إنت قايل نفسك (مجدي احمد اباظه)؟ اسمو اسامه انور عكاشه يا لوح, إنت يا معلم راسك بقي خفيييف و بقيت بتعبُر سريع ... الاسد لمن يعجز مالو؟ - الغنمايه بتشرب كاسو هاهاهاهاها تشرب كاسو برضو حييييييييينا, إنت بي راسك العامل زي اخر الزقاق دا اصلو ماعندك صبر, خليني اتم ليك الخاطره بتاعتي دي ما تنسيني ليها هوي يا (كوارع) هوووي ما تشغلا لي انتظر ربيع دااااك شايفو جاي اقعدو اتخاطرو سوا *تطول لحظات انتظارهم لربيع فيتقالدا سوياً صوب دقن الباشا ( شجرة ناس اصطاف) و التي تعد الاكثر ظلاً في الحي, ناهزت عقدين من الزمان و مع ذلك لا تمل من فرد افرعها تحناناً لكل حيران و كل عاطل طالته سياسات الدوله التعسفيه, حتي خالج الناس ظناً انها مسكونه بنبي الله الخضر إختارها لموقعها الرابط ما بين من هم يلوزون بأحزانهم الي اللاوعي و بين (حي فنقر) و ما ادراك ما حي فنقر, المره تدق و الراجل ينقر. إنت يا (صامولي) ربيع دا الليله شكلو شرب فنقر كلها و جا, عاين ليهو بخيط في الشارع كيف؟ - يخيط شنو يا كوارع!! الزول دا ما شغال ياخ و مما رفدو من الجيش ليهو عشرة سنه ساكي حقوقو و لسه ما طلعت والله كان راجيها دينو ح يطلع, ياخ دي بلد دي... الود كان شاااااطر في المدرسه و فجأه و الزمن قلب عليه: ابوه مات و امو راقده بالشلل و هاك يا دورة البحث عن العلاج ديوان الزكاه ما نفع حتي المحسنين بقو ناشفين, فقال يختصر طريقوو طبق المثل البقول ( إن فشل للطوريه و إن نجح للعسكريه) و خش الجيش و تعال شوف بعد داك شبكو ليك لواء القعقاع المتجه لتحرير توريت و شعارات من نوع: نحن الدنيا الما مسكنا نحن خلودنا هناك في الجنه, الودا إتحمس و مشت فيهو قال اهو برضو نختصر طريقنا للجنه, صاحبك لمن نزل من الطياره في الجنوب قايل نفسو في كولومبيا ريحة البنقو ما تديك الدرب لقي ليك المجاهدين كلهم يد في الزناد و اخري تحمل الكبنقه, قال انا يا دووووب عرفته الناس دي ليه شابكانا لقد شممنا رائحة المسك, و كنا عطاشا فإذا بغيمة ظليله تهطل بالوادي الذي قبالتنا و شربنا حتي بانت نواجزنا, البنقو و احكامو يا معلم ... اها بقي لافيها معاهم 4 سنين تنتهي سجارة لواء ابودجانه يولعو سجارة الميل اربعين .. بعد داك جابوهو راجع – و قالوعليه فوت فوت – لكن هو ما فوت فوت – و كدا كدا يا الترله و تقول لي ساكي حقوقو, إنت عارف يا صامولي اخوي نحن الكادحين ديل عاملين زي الكبنقه لمن تكون محكومه, اي واحد يجي يشفطنا تماااااام و يدي البعدو, و الغريبه دائماً قعد تكون محكومه لي عساكر و العساكر راسهم ما بجي بسرعه شفطونا طلعو عينا ياخ,,, عشان كدا انا وريت ربيع قولته ليه حقك تحرسو ولا بجيك حقك تقاوي و تقلعو - يقلع ضرسك يا كوارع ياخ قلبته لينا القعده ( في ساحات الفداء) يقلب بطنك إنشاءالله ساحات الفداء شنو!! لسه انا الخاطره بتاعتي القبييييل ما تميتها و ربيع دا شكلو ح يتأخر, اسمعني للنهايه و ما تقاطعني - اها يا كوارع احكي !! حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط *حينها فقط اختارت يد المنيه (عصام) و تلقفته في ذات الصباح اثر تسمم احدثه له ذاك السم الهاري الذي ما انفك يشربه ظناً منه انه سينسيه شظف الدنيا... الصبايا و النساء و بائع الصعوط و مناضلات حي فنقر كما كان يحلو له ان يناديهن, جميعهم جزعوا لفراقه الدنيا التي ما لبست تنال منه و تجرده من ابسط حقوقه حتي اسمه الذي هو خاصته جردته منه و اصبح في لمح البصر (كوارع)

ادينا طلة بيجاي كــوارع - مهداة الـي خضر حسين و حلــيم

تحياتي

Quote: القرود التي شالته وحملته علي عجل قد قالت له حرم يا شيخ جربندي لوما احنا كقرود سماوية تفتيحة عارفين انو الدنيا لسع محتاجة ليك عشان تعمرها وتحول الارض البور البلقع الي جنة نضيرة كان شلناك يا جربندينا الي الفردوس ونعيم..

يا اخي مبالغة في الابداع...
تشكر كثير لانني ضحكت كثيرا هذا الصباح التورنتوني

Quote: يا اخي مبالغة في الابداع... تشكر كثير لانني ضحكت كثيرا هذا الصباح التورنتوني

هلا وحبابك يا محجوب
واضحك الله ياخي سنك وكل ايامك التورنتية
وصاحبنا جربندي كان لمن يلقي مساحة وزمن بجنن الجاكات جك شديد
وهو يدري بان هذه الجاكة طال الزمن ام قصر ستاتي له بمريسة من مرايس تام زينو حيث القروش المطر
والتصديق من قبل الحواريين وبعض السلطة والجاه
ورغم الشعار الرسمي المعتمد له
لا للسلطة ولا للجاه
هي لله هي لله

Quote: فقال يختصر طريقوو طبق المثل البقول ( إن فشل للطوريه و إن نجح للعسكريه) و خش الجيش و تعال شوف بعد داك شبكو ليك لواء القعقاع المتجه لتحرير توريت و شعارات من نوع: نحن الدنيا الما مسكنا نحن خلودنا هناك في الجنه, الودا إتحمس و مشت فيهو قال اهو برضو نختصر طريقنا للجنه, صاحبك لمن نزل من الطياره في الجنوب قايل نفسو في كولومبيا ريحة البنقو ما تديك الدرب لقي ليك المجاهدين كلهم يد في الزناد و اخري تحمل الكبنقه, قال انا يا دووووب عرفته الناس دي ليه شابكانا لقد شممنا رائحة المسك, و كنا عطاشا فإذا بغيمة ظليله تهطل بالوادي الذي قبالتنا و شربنا حتي بانت نواجزنا, البنقو و احكامو يا معلم ... اها بقي لافيها معاهم 4 سنين تنتهي سجارة لواء ابودجانه يولعو سجارة الميل اربعين .. بعد داك جابوهو راجع – و قالوعليه فوت فوت – لكن هو ما فوت فوت – و كدا كدا يا الترله

هلا يا حسبو
وشرفت والله مدارات وعوالم جربنديو الضاجة
وريحة المسك التي هطلت في شكل كبنغا غمرت البكان والله
بنقو بحر الغزال الذي شفط في زمانات الكركبة والدشمان قادر لوحده من ان يكفي كولومبيا وجامياكا وكل راستا مرتحل في كراكير هذا العالم
ودبرست ياااخ لابو الشباب الجابو بالطيارة وباعو حقوقو بالخسارة وقيل في الورق الرسمي بانه رافع جنينة ولكنهم فقد تشبه لهم

وسنتابع بهناك وختينا طوبة ونص

رشو يا كيكى
رشو رشاه بلا
متكيفة منك كيف

تعرف لمن الزمن يروق ويصفى القصص دى كلها حتبقى مسلسلات وافلام وكرتون اطفال
حياة كاملة
من هسى جهزنا الملعب

Quote: رشو يا كيكى رشو رشاه بلا متكيفة منك كيف تعرف لمن الزمن يروق ويصفى القصص دى كلها حتبقى مسلسلات وافلام وكرتون اطفال حياة كاملة من هسى جهزنا الملعب

هلا يا سلمي وحبابك شديد ياخي ومشتاقين
ورشهم يا سلمي واجب وطني فهم قد خربو ودمروا الان ايضا قد يكونو فصلو البلاد والعباد
لذا فضربهم في الركب الجربندية حقتهم حلال بلال ولاهوادة او تردد فيه...
ونعم الشعب في ذاكرته الحية واقلام بنيه راكم المئات والالوف من الصفحات والحروف يقاوم هذه الانقاذ اللعينة
وبالمثابرة والضرب علي الحديد ساخنا سياتي اليوم الذي ستري كل هذه الاشياء النور
وجربندي زولي ده من حسسسع انا حاجزو فليم كرتوني

وكل التحية

Quote: رشو يا كيكى رشو رشاه بلا

رش يرش رشا فهو مرشوش
والرشاش هو مطر خفيف يسقط في اوائل لاواواخر المطر
والرش منها رش البعوض ورش المزارع بالمبيدات الحشرية
الرش ايضا معناها رش الحوش بالماء حتى يتلطف ويترطب الجو
ورش الولد الجرجير معناتا رشاهو اي خلاهو ناير عشان ناس الزبائن لمن يجو يشوفوهو ناير يشتؤوا منو ما شفت الجماعة في سوق الخضار قاعدين يرشو في الطماطم والجرجير
ورش الولد الغرفة اي طيبها بالبخاخ العطر
ورش كيكي جربندي اي افحمه بالحجة والمنطق الاعوج والعديل
ورشت ست الشاي الكانون اي بعد الانتهاء من اليوم العملي في المغربية لانها تريد لبقية الفحم ان تعمل بيهو يوم باكر
ويقولون في المثل دي ايام الرش أي ايم رش المبيدات
ورش المكوجي الثياب عندما يكون قاعد يكوي عشان ما تتكرفس
اها يا جماعة في خلاس

هلا يا مكاشفي
وشكرا علي مرورك وحديث الرشوشات
بس حاسب من الرش ما تترشي انت كمان

وسنتابع

يتبع علي قولة طلحة تنظير

الي جربندي في ورطته الاخيرة

الي جربندي واخرين في عليائهم الفنكوشي

Quote: فخش تحت اقرب (شجرةلالوب) وادي المجاهدين ضهرو ورشا روحو واحدة طلقة سلاخية زي السم في (الرجل الشمال) وليجري سريعا صوب المعسكر بطريقة (الهرك) الشهيرة او( الشدت) راجعا الي صفوف الجرحي ومدعيا بانه ضرب في مقتل ولولا القرود الاثنين اللائي هبطا من( شجرة لالوب) مقاربة لمكان ضربه بواسطة الكفار وليحملا ه الي مكان الجرحي....!!! وتعالت الصيحات الله اكبر الله اكبر

ومثل هذا كثيرون ،، تابع لكى لا تتداخل القصص ،،، نعود لاحقاً لمدعينا هذا

Quote: ومثل هذا كثيرون ،، تابع لكى لا تتداخل القصص ،،، نعود لاحقاً لمدعينا هذا

هلا يا كمال وتحياتي
وايووه زي زولنا جربندي من سماسرة الجهاد ولصوص الحروب كثيرين وفي زمانات الحرب كانو هم الاعليس صوتا
وصيتا ولان ايضا هم خير مرتدي لجلابية المرحلة التي تستدعي الابداع في فنون الاستهبال ورقد القش السياسي حتي تمر سحب المصائب والبلاوي التي وجدت الانقاذ نفسها فيها بتدميرها لامر البلاد والعباد

وسنواصل باذن الله
وتحياتي

Quote: والله زمان يا شيخ( يس) لعبنا( ون تو) احرف ثنائي في الدوري البرازيلي ما يلعب زيو

سرد ممتع ياهندسة... يديك العافية ..
وكانت لهم أيام!!!

Quote: تعرف لمن الزمن يروق ويصفى القصص دى كلها حتبقى مسلسلات وافلام وكرتون اطفال حياة كاملة من هسى جهزنا الملعب

التحية للأستاذة سلمي ... وبكرا أحلي

Quote: سرد ممتع ياهندسة... يديك العافية .. وكانت لهم أيام!!!

هلا يا الشفيع
والف شكر وتقدير علي الحضور الي ساحات جرنبدي وسيرة بني الكوز
وسطوتهم التي حتما هي ذاهبة مع الريح طال الزمن ام قصر

وتحياتي