Post: #1 Title: عشة بخسة احسن زولة شنافة في العالم...!!! Author: عبدالكريم الامين احمد Date: 02-01-2009, 09:09 PM Parent: #0
عشة بت (جالونين) الشهيرة بعشة (بخسة) في كراكير وازقة فريق وراء...كانت توب جاهز للفحان وشبشب دكتور (شول) يسهل من (طق طق) التي يحدثها في طرقات ذلك المكان ان يعلن للجميع بان الامراءة العابرة تلك هي (عشة بخسة) وايضا يحدث القاطنين بان هنالك امر جللا قد حل بالحي..فهاهي الخبيرة ذات العيون الثاقبة (عشة بخسة) في طريقها للتامل فيه والولوج عميقا في تقاضاته وتمارس في هوايتها التي ميزتها علي كل نساء فريق ورا المتفردات..
Quote: وهذا يعنى انه يرى ما لايراه الاخرون او بالاصح يرى العاوز يشوفوا وبس لزوم البشيع بالناس بالكضب وبالصح
سلام ياتيتا واولا طبعا من الضروري بالتاكيد نفرق ما بين (التشنيف والفحص).. بالتاكيد التشنيف في جانبه السلبي فهو ام في جوهره كيدي ومحاولة مكابرة وتبخيس وعدم الاعتراف زندية وقوة عين.. في جانب تاني ممكن نسميه التشنيف الايجابي فدي بكون بدون اجندة والهم الاكبر هنا هو الاصلاح (حاجة كده زي النقد الايجابي)... انا ماعارف لمن يقولو الزول ده او الزولة ده شنافة فهل يعني انو طوالي ناخذه في الجانب السلبي..؟؟؟ دي دعوة للتامل في مفردة (شناف) دي زاااتها حكايتها شنو
احتمالية تواجد (بخسة) في الجناح المويد لاهل العروس يجعل من الجانب الاخر في ترتيبات الزواج التي يقع كاهل الشيلة علي اهل العريس يجعلهم في امر عالي الضيق وتنشط غرفة عملياتهم في توضيب نواقص الشيلة..وتكاد تسمع ياجماعة الدهب زيدوا...عشة ماتشيل حسنا السكر جيبو شوالين ونص زيادة... البصل...الزيت...الثور خلو كبير..ياجماعة فعشة دوما بالمرصاد...
وان كانت (بخسة) يتوقع لها ان تكون ضمن التيم الاتي في سيرة العريس فنجد غرفة عمليات اهل العروس تتطاقش ذات اليمين ثم ذات اليسار لتجهيز الشربات المدوزن السكر لا يجد من (بخسة ) الصمت وتسمع الاصوات الت تنادي بقش الفضايات ومتشنت الملايات والمخدات وبالاضافة الي الاطمئنان علي سير (الجمرة الخبيثة) ولابد لها ان تكون في (الفل تانك)... فليس هناك احد قادر علي التبو بخط سير التفتيش عند 0(بخسة) فقد تواتر في احدي الاعراس عندما لم تجد ما تناضم فيه قيل انها احتجت علي (ايقاعات الدلوكة) والرسومات التي ترسم فيها وقالت بصوتها الذي دائما ماتحاول الي الفنجرة والبنرة(ياااي دي رسومات بلدي خالص يا بنات امي)
Quote: كيكي كدي احفظ بوستك دا و البوستات العاوزا بالبرنامج دا قبل ما تتجوكر تاني عاوزنك تكتب بقلب قوي و بال رايق
يا سلام يا نصار ياخي والف شكر علي الرابط ده وكده الزول فعلا ممكن يكتب وبالو رايق كون الامر مومن والجوكر اصابنا في مقتل يا نصار وكل مداخلة تكتبها تخاف ان لاتجدها بعد اول كلك ودمت دوما علي الكرم والجمال
Post: #12 Title: Re: عشة بخسة احسن زولة شنافة في العالم...!!! Author: صلاح ليون Date: 02-01-2009, 09:58 PM Parent: #11
Quote: وتنشط غرفة عملياتهم في توضيب نواقص الشيلة.. وتكاد تسمع ياجماعة الدهب زيدوا...عشة ماتشيل حسنا السكر جيبو شوالين ونص زيادة
اووووووووووه طارق جبريل ياخي حمدالله علي السلامة والف كفارة ولاباس عليك يا رجل ونورت الاسافير والله..
حقو الواحد يفتح لعشة بخسة دي ويحلق مع حواء ليمون وينزل كل الشدات الممكنة لطارق ده ياجماعة
Post: #16 Title: Re: عشة بخسة احسن زولة شنافة في العالم...!!! Author: Badreldin Ahmed Musa Date: 02-01-2009, 11:56 PM Parent: #15
عبدالكريم
سلام
والله عشة بخسة دي محبطة خلاس!! اصلها ما بتقول خير!
على صعيد اخر
كنت عايز اديك ثمب اب، لكن طريت الصرفتهم لي ديك!!!(وش مقهقه) شفت، عشان كدة خلى السبت دايمافي بالك !!!
Post: #17 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 05:22 AM Parent: #16
Quote: كنت عايز اديك ثمب اب، لكن طريت الصرفتهم لي ديك!!!(وش مقهقه) شفت، عشان كدة خلى السبت دايمافي بالك !!!
هلا يا بدر حبابك ياخي ووين انت ياخي كنا فاقدنك في بوست الديربي لحدي ما الجوكر جاء لغم الاجواء خلي خشمنا ملح ملح وياخي شنو الغتاتة دي ما تجدع لاخوك واحد صغيروني كده انشاء الله بتاع اخوان كده (وخلي الحساب ولد)...
بالمناسبة اوكامبو اتحول من
الي لانو اخر اللعب والموضوع شكلو بقي فيهو محركة دولية
Post: #19 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 06:46 AM Parent: #18
Quote: عشة دى خمسين اصبع لى تحت ياخ
ههههه عشة wayeeeee ياخي مالك عليها يا شول.. وكمان ياشول نسوان فريق وراء تحت تحت كده بقولن عشة بخسة احسن مرة بتعرف تمشي بدكتور شول (طق طق) ولكن ما بقولو كلام ده قدامها عشان عشة ما تفكها فيهم وتقبض الاجواء زيادة
Post: #20 Title: Re: عشة بخسة احسن زولة شنافة في العالم...!!! Author: abubakr salih Date: 02-02-2009, 07:27 AM Parent: #19
و بعد ان انفض سامر مؤتمر الشيوعيين الاشهر و الذى اخذ لباب الإعلام و العباد فى ايام اٍنعقاده تلك، و اٍستحسنته و فرحت به جماهير غفيرة، ليفاجاء الجميع بـ عشة بخسه و هى تقف فى نص منبر بكرى غازتاَََ كوعها الشمال فى وسطها مائلة بثقلها كله على رجلها اليسرى و جدعت يدها اليمنى بعيد تتلاعب بها ثم قالت
"بالله دا الغالبكم ليهو اربعين سنة ما كلها كورالات و حفلات و بخ بخ بخ"
ياخ دى بخسه.
ازيك يا هندسة.
Post: #21 Title: Re: عشة بخسة احسن زولة شنافة في العالم...!!! Author: العوض المسلمي Date: 02-02-2009, 07:39 AM Parent: #20
عبدالكريم سلام
عشه بخسه امراه موجوده حتي اليوم في المجتمعات الريفيه والطرفيه ,,,
وحتي الاحياء المدنيه القديمه ,,,,
خطيره ياعمك ,,, دي تشيل حال الناس ولا تسمح باي تقصير ,,,
Post: #23 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 09:57 AM Parent: #21
Quote: خطيره ياعمك ,,, دي تشيل حال الناس ولا تسمح باي تقصير ,,,
حبابك يا العوض ومرحب في مدارات عشة.. وفي الزي عشة ده كثااار في خجانين الريف والحضر واينما وجد الانسان وتحياتي
Post: #22 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 09:27 AM Parent: #20
Quote: و بعد ان انفض سامر مؤتمر الشيوعيين الاشهر و الذى اخذ لباب الإعلام و العباد فى ايام اٍنعقاده تلك، و اٍستحسنته و فرحت به جماهير غفيرة، ليفاجاء الجميع بـ عشة بخسه و هى تقف فى نص منبر بكرى غازتاَََ كوعها الشمال فى وسطها مائلة بثقلها كله على رجلها اليسرى و جدعت يدها اليمنى بعيد تتلاعب بها ثم قالت
"بالله دا الغالبكم ليهو اربعين سنة ما كلها كورالات و حفلات و بخ بخ بخ"
اوووه ياابوبكر حبابك ياخي وانت قاصد اخونا المبخساتي الاسفيري حسين (بخسة).. دي يا اخوي منزليين ليهو (عشة بخسة) دي الملعب عشان توريهم التبخيس علي اصولو ونخلي صاحبني سحس دي يقهي في عمايل (عشةالرهيبة دي)
وكن بالف خير
Post: #24 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 10:00 AM Parent: #22
عشة في تحولاتها اللعبة كراسية ما بين اهل عروس وقرايب عريس كانت تجد متعة لاتضاهي للمكانة والحذر والهلع الذي تحدثه في طلعاتها العريسة اينما حلت او ادلت في فريق السوق او دعوة بتصميم عالي من نفيسة بوبار في فريق الاستبالية لمرافقتهم في _ودية-شيلة من شيلات فتيان الحي.... .... انشطة بخسة التبخيسية لم تقتصر علي العروسات وبلاويهم من شيلة وسد مال وقطع رهط ودق ريحة بل لها ايضا مساحة وزمن في كرنفالات وجيات السادة المغتربين الذين يعودون بعد سنين عديدة من وراء بحار فريق وراء....... فالتفيش البخسوي يبداء من تريبات ما قبل حضور المغترب من شمشمة لمستوي الخروف وطولة قرونه بالاضافة الي الجير او الكراسي الجديدة التي جابوها ناس (حسن كورية) في حضور ابنهم الذي افتت بخسة ذات جبنة نسائية في ضحي من ضحوات فريق وراء (كررررر يايمة دي كراسي حسع عليك النبي يجبوها لمغترب جاي من لاهاي)... ثم تتناول بخسة في قناتها اليومية التي تبث حديثها وسط ثلة من النساء اللائي يحضرن بدررررررري لمجلسها للتمتع بطلعات بخسة الجوية عندما تتقاطع مع جدعات صديقتها الشهيرة نفيسة بوبار..
Post: #25 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 10:01 AM Parent: #24
وتكاد بخسة تستلم المغترب بمصادرها ومنذ حضوره الي مطار الخرطوم لتفتي باسم الخطوط (بررررررررري يا يمة قالوا جاء بسودانطير)....يمكنك ايضا في مجلس التمتع بسماع اسامي خطوط تنطق علي شاكلة (اللفتي هازنا..او العمارتية او يمكنك ايضا ان تستمع الي القطرية الخطوط ذات القروش المطرية)....... كن جاء بلميوزين ولاتكاسي ولاجاء برقشة اوحتي امجاد فكل ذلك يكون (ورا اضان) عشة وعارفة بير الحضور وغطاها وكذلك تذهب بعيدا لسيرة جاب شنو ولمنو وليييييييييييييه ما جاب لناس فلانة ديك بت خالتو المسكينة الفقرانة ديك ثوب انشاء الله من تياب جدة البي 25 وعشرين ريال ديلك...هذا تردد بخسة في كل جزئية وهي قابضة بالقمر الصناعي الشماري بتاعها علي كل خطوات المغترب الفارة الذي اوقعته الاقدار في محيط ومدي فنياتها العجيبة
Post: #26 Title: Re: عشة بخسة احسن زولة شنافة في العالم...!!! Author: أحمد الشايقي Date: 02-02-2009, 10:11 AM Parent: #25
سيرة وانفتحـت
والليلة شيل حالك يا عشة بخسـة
(عجبني ليكي لامة في الناس نقة نقة الزمن كله-- الليلة كيكي بوريكي ليهو .................)
أحمد الشايقي
Post: #27 Title: Re: عشة بخسة احسن زولة شنافة في العالم...!!! Author: khaleel Date: 02-02-2009, 11:10 AM Parent: #26
السمايات ايضا كان لعشة فيها راي كل الاشياء حتي الاسامي للوليد الشديد ان تمت تسميته (وائل) كانت تردد وائل ليييييييه وشنو الحنكشة العليكن يا نسوان فريق (وراء) عيبو لي (ابكر- وبوبا وقدوم حجر) مالها ما اسامي زييييييييينة يايمة...وان دقست الاسرة وقامت بتسمية علي قرار اسامي قديمة مثل (زينيب وفاطمة وامنة) هنا تنبري عشة وهي في وسط القوم سجم يايمة من اسامي جدودنا الزمان دي واسامي حبوباتنا عميانين من اسامي (لولو...ونوسة..ونووون) وكن غلبتكن الاسامي يا نسوان فريق وراء انشاء تسموها (نانسي عجرم) شاحدة ربي تكبر يايمة وتغني ليكم (اه ونص في فضاااية كلثوم بت كلتش دي). هذه هي عشة بخسة في حلها وترحالها وفي خطابها اليومي ومنشاتها شغالة اربعة وعشرين ساعة ان ذهب القوم بيمنا ذهبت بمنشاتها شمالا..وان غربو شرقت بيها..وليس هنالك قشة قادرة ان تعتر اليها فحبها للتبخيس لايقاوم ومقدرتها علي توصيل ارائها التبخيسية عالية وتعمل علي توصيلها بدفارات من الشمشمة والشمار العالي الدق... ......!!!!!!
حواء تمتم في زمانها وسطوة غناويها الدلكوية التي صرعت بها كل اهل 0(فريق ورا شيبا وشبابا وكان مزمارها و دقة دلوكتها يهجج ويهيص بالجميع كان كل هذا الالق والفن الفلكوري من (حواية دلوكة) ليس له عند عشة بخسة الا التبخيس (وعوجة شلوفة) في الحفلات التي تذهب لها عشوشة مرغمة حتي تمارس هوايتها في التبخيس في ثوب فلانة العامل زي (ملايات ناس كلثوم بشكة) او دقة علانة بتاعة الدهب القدييييييييييييييمة يا اتي...!!! وقد تمارس طلعة طلعتين في مستوي رقيص (توونة) وانو توونة مابتعرف تحت النيق كما ينبغي له ان يحت كما يحتنو جكس فريق زنقو(وتردد في متعة عالية...سجمممممم يا يمة ده نبق شنو ده..النبق في حفلات زنقو او بلاش منو)... وعندما تصطاد رجلا يمارس الرقيص بشترة واضحة تردد ودون وجل (كرررررررر الرقيص عندابوساندرا او بلاش منوووووووووو)
Post: #31 Title: Re: عشة بخسة احسن زولة شنافة في العالم...!!! Author: خضر حسين خليل Date: 02-02-2009, 01:50 PM Parent: #30
كيكي والله ياخ انت احسن زول في العالم
تعليقي علي الصورة :
يتراقصو كدة وبعد داك يجي ينقوا لينا ! في راسنا حاسدك علي الحت يا بركات
Quote: يتراقصو كدة وبعد داك يجي ينقوا لينا ! في راسنا حاسدك علي الحت يا بركات
هلا يا خضر وعارف صورة رقصة ابوساندرا الليلة نضمنا فيها مع اربعة اصدقاء في اربع قارة من قارات الدنيا دي وكانت فيها تعليقات بالجد تموت من الضحك.. ولكن الرسالة العالية هي ابو ساندرا زول بهجة ومحب للجمال والحياة واجادته الظاهرة في هذه الرقصة تعبير حقيقي عن هضمه للثقافات المتعددة في البلد دي وانو زول ديامي جميل متمدد في كل جخنون من جخانين بلدنا دي...
قلت لي يرقصو ويحتو الاتو ويعجبو الشنافة الدولية (عشة بخسة) ويجي يعملو ليكم كاني ماني لوووووووووول ولوووووووووول شديد ياخضر ياخي
Post: #33 Title: Re: عشة بخسة احسن زولة شنافة في العالم...!!! Author: عبدالوهاب علي الحاج Date: 02-02-2009, 04:06 PM Parent: #32
كيكي ياجميل والله بوستاتك مريحة
Quote: ابو ساندرا زول بهجة ومحب للجمال والحياة واجادته الظاهرة في هذه الرقصة تعبير حقيقي عن هضمه للثقافات المتعددة في البلد دي وانو زول ديامي جميل متمدد في كل جخنون من جخانين بلدنا دي...
ابوساندرا فعلا زول جميل ومحب للحياة جدا لاقيتو كم مرة في الخرطوم في زيارتو الاخيرة فله ولك الف تحية
والله ياخلي عريف ياخي لخبورات وبلاوي فريق زنقو ده وانا كنت قايل (عشة) الغلاغل دي بتعملها مغارز وحسسسسسسسسادة ساااكت كده منها اتاريها متوكة ودفاعها اخير منو دفاع المريخ
Post: #37 Title: Re: عشة بخسة احسن زولة شنافة في العالم...!!! Author: عبداللطيف حسن علي Date: 02-02-2009, 06:02 PM Parent: #36
Quote: بان الامراءة العابرة تلك هي (عشة بخسة) وايضا يحدث القاطنين بان هنالك امر جللا قد حل بالحي.
ممكن توصف لينا الوضع الطبقي للمرأة دي ، لانو شايف انها متناقضة، شبشب وكركر وشنافة!
وهل هي امراة عابرة في كلام عابر (ساي)! ولا طبيعة المراة الشنافة رغم فقرها ووضعها الطبقي
حيرتنا ياكيكي !
Post: #38 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-02-2009, 06:57 PM
Quote: ممكن توصف لينا الوضع الطبقي للمرأة دي ، لانو شايف انها متناقضة، شبشب وكركر وشنافة!
وهل هي امراة عابرة في كلام عابر (ساي)! ولا طبيعة المراة الشنافة رغم فقرها ووضعها الطبقي
حيرتنا ياكيكي !
هلا يا عبداللطيف ووينك انت يا زول..؟؟ ومن تسمية فريق (ورا) يا عبداللطيف يمكن يقاس الوضع الطبقي لعشة ولكن طبعا هذه الوضع الطبقي في النقة الانا قلتها دي ليس بعامل كبير.. فاعتقد بان الشنافة او الشناف قد يكون من اي طبقات المجتمع لعل الامر مربوط بجانب تركيبة بشرية ممكن تفجرها الظروف الاقتصادية ويمكن ان تفجرها ايضاالدعة الحنكشة الشديدة... عشة عابرة وفريق ورا عابر وهي سلسلة يا لطيف فيها ناس كثار خلاص عوضية رتينة عوضية مجروس عوض فرملة عثمان كلتش نفيسة بوبار وكل البشرية دي بجمعها فريق ورا ...
Quote: عشة عابرة وفريق ورا عابر وهي سلسلة يا لطيف فيها ناس كثار خلاص عوضية رتينة عوضية مجروس عوض فرملة عثمان كلتش نفيسة بوبار وكل البشرية دي بجمعها فريق ورا ...
يا إلهى ... فريق ورا ده مليان بشرية عجيبة ملى جد! اها فريق نقزوا ولا إسمها شنو الفريق التانى دااااك؟ فيها ناس منو؟
شول اشوانق دينق ________________________ كيكى ياخ بتعطل الناس من مشاغلها ... كمل باقى الحنق ياخ ههههههههه بالله عشوشة طلعة جغجمية اصبع لى تحت (ههههههههه) ... اعلن تضامنى مع عشة بخسة
Post: #41 Title: Re: عشة بخسة احسن زولة شنافة في العالم...!!! Author: عزيز عيسى Date: 02-02-2009, 09:50 PM Parent: #40
Quote: صاحبك بتاع البلنجات داك قال ليك لو جيت تاني معدي على فريق ورا حيكسر كراعك.
هلا ياعزيز وتحياتي ياخي ومالك يازول قاطع قلبنا مع الليل وجايب لينا سيطرة المسخوت (عمر هوووكات) احنا زااتو يا عزيز رحلنا فريق زنقو و عمر هوووكات انشاء الله فريق ورا ده يضوي ليهو... يا زول اصحابي ديل اسماهم عجيبة ولسع ياخيي في ابراهيم كتاوت وعثمان مغنيتة وزي ماقلت تلمهم كده في بيت وتخلي جنبهم جالون بنزين تسمع صوت اسستارتر وتدور طوالي تفرتق في شكل عربية
Quote: يا إلهى ... فريق ورا ده مليان بشرية عجيبة ملى جد! اها فريق نقزوا ولا إسمها شنو الفريق التانى دااااك؟ فيها ناس منو؟
فريق زنقو - زنقو يا شول دي محلات ناس عمر جكس وعثمان هوووكات وابكر عفريتة وعباس كبنغة ومعاهم ثريا طرمبة..وده فريق مسجل خطر وبكرة منزلين ليك باذن الله (عمر انفاس) في جولة من جولات ركوب الفيل وخليك قريب.. وايامات دي يافردة ناس زنقو وورا ديل دافرين شديد ويومي شكلنا كده حنتفرج في فيلم من بطولة واحد منهم.. وعشة بخسة مادام شمارها مسكو ابو خليل ده بعد شوية ممكن يطلعها لينا بتاعة طشمة ونبقي في نظام عام وشيشان وبلاوي يا شول ...
Post: #44 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-03-2009, 08:30 AM Parent: #42
ولسع لاصقين في حضرة سيرة (بخسة),,,, الماسكة باصرار عنيد في تخبيس اي حاجة تقع عليها عينها وعاملة شمطة يوماتي في صباحات جزارة (كباية) ..الذي يحاول في جزارته ارضاء الزوق اللحمي العالي لفريق وراء ولكن بخسة في حضورها المفاجئي قادرة علي ابتدار حديثها وسط كومة الزبائن بكلمات تبخسية اقل ما يسمع منه هي كلمة (جلافيط وكيري) وانو الخروف او البقرة يبدو عليها سمات (ابو نيني) وهو مرض يقضي علي لحوم البقروالخراف وشحومها.... تمرجية المركز الصحي الوحيد في الفريق تكره اليوم الذي ولدت فيه عندما تطل (بخسة) في جولة روتينية لحقنة ملاريا او لمعالجة ابنها (كتكوتة) من الرمد العجيب لتفتي في حقنة الملاريا وتتهتم (زبيدة التمرجية) بتهمة عدم طعامة اليد(سجممممممم يا زبيدة يدك ما طاعمة وده شنو السلخ والهلاك ده يا زولة)
Post: #45 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-03-2009, 08:38 AM Parent: #44
الداية الحريفة (نفيسة بت الحسين) واحسن ولادة في تلك الربوع والتي يهرع الي بيتها الرجال والنساء وهم في قلق وشفقة علي بنتهم التي داهمها الوجع..و لاتمر ساعات قليلة حتي تعم الفرحة والزغاريد فنفيسة المشهورة بيدها الطاعمة والبلسمية الاداء تترصدها وتتحرش بها (عشة بخسة) وتشيع بين الجموع النسائية بان فلان ود فلانة ما يجي الطيش كيف مادام دايتو كانت( نفيسة بت الحسين)...وراس (ادومة) ده كبير كده لانو نفيسة ما جرتو صاح عند ولادته وسجم يا يمة (زبيدة بكش) ما تبور كيف مادام الداية الجات يوم ولدوها هي نفيسة..وتشيع ايضا بان نفيسة لا بتعرف تعمل (طلق صناعي ولا حاجة)..
Post: #46 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-03-2009, 08:45 AM Parent: #45
لبن الصباح في غضب الله..وسيد اللبن تكاد كراعيه هي من تطلعه من نقة بخسة الصباحية التي تقلب اللبن يمينا ويسارا ومهما كانت درجة طازجيته الا انه عندها دوما (لبن مقطع) وشووووووووووووية كده يبقي روب يا اتتتتتتتتتتتتتتتتتتتته
كيكى يعنى عامل فيهو ما قانش رندوك يا درفة (ههههههههههه)
شول اشوانق دينق
Post: #48 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-03-2009, 08:55 AM Parent: #47
Quote: كيكى يعنى عامل فيهو ما قانش رندوك يا درفة (ههههههههههه)
هههههه هلا يا شول وقانش قانش يارفدة لكن ناس زنقو ديل لو سمعو بي اتلاعبت باسم فريقهم السنة دي الاجازة الا اقعد اقضيها معاكم في الخرطوم وما اهوب ناحيتهم ديل ممكن يضبحوني زي الما حصلت حاجة ويعملوني اقاشي كمان
Post: #49 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-03-2009, 11:15 AM Parent: #48
كل تلك المهارات والمقدرات العالية عند بخسة لم تكن ذاهبة الي ادراج الريح فسوق الفريق الوحيد ايضا كان مسرحا ومبخسا تصب فيه (عشة) مقدراتها العالية وتقاتل اشرس قتال حتي ترمي سعر السلعة التي تريدها في (تراب الله) ده ومالها كدي يا ولدي ودي طماطم شنو يا ناس الله..ترمي السعر وتذهب به الي اللقيط وكانت قادرة عندما تفتح صواريخها لاقناع بعض الباعة قليلي الثقة في بضائعهم قليلة القيمة والجودة وتحبطهم ليك من اليوم الذي فكرو فيه في ركوب موكبة (بيعوووووو واشتروووووووو دي).... اعظم الاكتشافات في فريق وراء هو الاكتشاف الذي جعل النساء يهرولن الي اصطحاب (بخسة) الي جولات الاسواق عندما يشتهين حاجة غالية السعر فذهاب عشة مع احداهن يعني بان السلعة والبضاعة المراد شرائها مهما غلا تمنها وزاد وزنها فامر امتلاكها منتهي ولما لا..انها (بخسة الكيمائية النووية الذرية)...حتي الدهب الغالي ده قالو زي السلام عليكم تشيلو بالسعر المناسببببببببب وتركب رقشة زي السلام عليكم وتعود الي الحلة سالمة غانمة
Post: #50 Title: Re: عشة بخسة احسن زولة شنافة في العالم...!!! Author: عبدالكريم الامين احمد Date: 02-04-2009, 10:54 AM Parent: #49
هلا يا اماني وحبابك والله والف مرحب بيك في مدارات فريق ورا وحباب زبيدة بكش وياسلام علي زبيدة بكش واتخيلي بكش دي فيها طلعات وجدعات رهيبة لما تحتويه بكش في نمطها من حاجات تجنن ..بكش حتي مشيتها دي متفردة ولو مسكت ونسة في وسط نسوان فريق يحلهم منها الجليل الرحيم.. توبي ده يااتي دعايتو مافي الا في روتانا... ودقة دهبي عندي انا بس وفلانة كامبل ديك ..وهكذا لحضورك الاول الي ديارنا والي مدارات فريق ورا وزبيدة دي خليني بس اوضبها ليك زي الناس واجيبها ليكم هنا ده باذن الله..باقي مدارتها عجيبة ودايرة ليها مساككة.. وكوني بالف خير
جنجويدة مرة بتاعة مشاكل في حينا اللاتيني ..وجنها شمارات وشنافة...وجنجويدة متخصصة في الشيلات بجيبوها عشان تشنف الشيلة...سجمي دي ريحة شنو البسيطة دي..الصندل سجم يامة تايواني والثياب التقول سكند هاند يا يمة....ده كان تخصص جنجويدة في ليالي شيلات الاعراس في حينا اللاتيني ..وكانت ايضا بتمشي لبعض الاحياء المجاورة..... ذاع صيتها واخافت الكثير من الشبان والشابات وبقي الناس بعملوا ليها الف حساب....!!!! نشتري التوب ده يا هناية... كدي..لا يا زولة التوب ده شين تقوم جنجويدة تشيل حسنا ساكت...!!! امراة في عقدها الثالث..يعني ممكن تديها 35_37 سنة كده..كانت صامته ومسكينة...حتي زواجها بعد عنوسة طويلة من مستر جنجويد..!! وفجاءة برزت مهاراتها علي السطح...وكانت الجبنة في الحي اللاتيني المافيها جنجويدة بتكون جبنة ناقصة..ففي حضرة جنجويدة يحلو الشمار و الدقاق بالذات.... بري يا يمة عاشة بت العوض طلقوها....!! كر عواطف بت سكينة جاءها عريس قالوا مغترب طلع عنقالللللي ساكت....!!!!! حضرتي يا فريدة امس هالة شو....سجمي ..سجمي ..مبالغة لكن.....!!! كانت هذه هي صديقنا جنجويدة دائما شمارها متجدد ومواكب..اسعار الدولار اخبار القرار 1706..(كر يايمة..الخواجات قالوا جايننا..).....!!!!!
جنجويدة في مهارتها المتعددة..وموهبتها الظاهرة تماما...كان البوبار هو اكثر حاجة بتلقي فيها نفسها...اتاح لها سفر زوجها(جنجا) الي دبي...وسفرياته العديدة..فرصة وجدت فيها مساحات واسعة للبوبرة... تخيلي يا فريدة..دقة دهبي دي اسمها (حسن نصرة الله)...ودي اسمها (نانسي عجرم) ..والتلفزيون (ل.جي) ده (جنجا) جابو لينا من (ساتي سنتر) في دبي...(لاحظ ليس ستي سنتر)... وكانت اكثر سعادة جنجويدة فرحا والقا...وبوبره هي اللمات التي تكون جنجويدة في كل زينتها..فقد كانت حريصة كل الحرص ان يصدر الدهب (صوتا)..ويكون مسموعا لكل النساء.....وكانت جنجويدة هي رائدة الحديث دوما..وعندما تنافسها احدي النساء علي ناصية الحديث,,,كانت جنجويدة تنظر في اتجاه صديقتها الوحيدة فريدة..(وتلوي شلفتوها.........)....... ويكون حديث الطريق بينهما وهن عائدات......(بري بري يايمة المراة التقول ...رادي.......ورورورورورو)............. قطعت قلبي يا يمة بالبوبار.............!!!!! ونعود قريبا الي جنجويدة البوبارة..................
