Post: #1 Title: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:46 AM
عقب الاعلان التاريخي باحتمالية المطالبة بالريس ان وافق القضاة الملموين من كل اركان العالم (الكم كدهماعارف) ان وافقوا علي الادلة والقرائن والحنك الذي قدمه الدولي (اوكامبو)..وبعد ان عم الخبر القري والحضر وانتشر انتشار النار في الهشيم ..!! وقع الخبر في اضان الثنائي (ود قنيرة وحسن ماكردة) اثناء جلوسهما متكلين في احدي الاركان والخجانين وبدون سابق انذار او كلام كثير افتي ودقنيرة وعلي الجلسة مباشرة..!! ايوه يتسلم ولكن بشروط...!! انا كود قنيرة ومواطن سوداني عندي شروط لتسليم الزول ده ..!! يا ود قنيرة روق شروط شنو كمان البتشرطها انت الكحيان السكران الحق التمباك ماعندك لزول جعيص زي اوكامبو ده..؟؟ هنا استعدل ود قنيرة في و دنكل سفة من النوع الكديسي..!! وخش في الشروط..!! شوف يا زول هوووي لا تقول لي اوكامبو ولا ماردونا..!!! زولنا ده حررم ما بنسلموا سسسسسساااكت كده.. اول شي عاوزين حساب من الداخل مش زولنا ده قبل كده عمل (سلام من الداخل) ثم انطلق صوب العالمية في نيفاشا اها كمان حرم انا اطالب بحساب و(كوار) من الداخل ثم ننطلق صوب الاكومابوية..وحرم لو لقينا زولنا ده حسابتو نضيفة وما خارتنا قرش ولاتعريفة (اوكامبو ده يشم البشير كشنة) ...هيييع يا زول الدم ركب وما نخلي خواجة مش في السودان ده بس . حرم في تشاد والدول المجارورة ما نخلي خواجة واضان جون متحاومة...!!! يا ود قنيرة كلامك بقي كبار كبار وشين بالحيل..!! اايييوه... محاور (كواري) وحسابي الداخلي 1-الحريات منذ 89 2-الفساد 3-ملف دارفور 4-مال البترول 5-الصالح العام... الاشياء الخمسة دي لو لقينا زولنا صافي يا عسل ونضيف نضافة فضية امونة بت احمد...!! بنقيف ديك احمر واحنا واوكامبو الا يفرزونا بالسراويل..! والناس تقول ده سروالنا وده سروال اوكامبو ومن لف لفه...!!! وكمان لو لقينا شق وزولنا حالو مايل...هنا بنضاير وبنخلي القانون الدولي ياخد مجراهو.. مش في منظمة صحة عاليمة ومنظمة غذاء عالمية اها دحين يا زول هوووي الخواجة عمل منظمة (عكش) عالمية وزولنا تب ما اخير من حسين هبري او فلان بتاع يوغلاسفيا داك.. كان بقي زول ماكلة وكتل شعوب واغتصاب حريم وتجويعي تشريدي....!!! ونعود...
Post: #2 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 09:02 AM Parent: #1
هنا ظهر وبان لماكردة بانو صحبو ودقنيرة راقد ليهو فوق راي.. لذاطلب منه المواصلة في شروطه وقرر هو ايضا ان يرقد ليهو فوق راي... ولكن بعد الاستماع بمهلة لشروط ود القنيرة القاعد الليلة يتشرط ويتفاصح علي غير عادته الاولي كرجل متامل وصامت لا يحب الكلام في السياسة ومبارات التلفزيونات والخبورات بتاعة الدقانة
Post: #3 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 10:40 AM Parent: #2
ويواصل ود قنيرة في طرح شروطه.. وقال حرم ولو الترابي (الزول ابو ضحيكة) داك ما ركب مع زولنا ده في سرج واحد في جلسة الكوار (ماني مسلم تب...!!!) والترابي ذنبو شنو كمان يا ود قنيرة يا مسخوت,,,؟؟؟ ها يازول ها انت ماك عارف حاجة ساكت..!! ده الشيخ وزولنا المسكين حوار سااااااكت شيخنا ابو ضحيكة قال ليهو اذهب الي القصر وانا بلبد في كوبر دي باخد نومة نوميتن وبجيك فازع فازع في عشان ناصل ونعمل مشروعنا الحضاري..!! ونغني الطاغية الامريكان ليكم تدربنا...!!! وعشان نحفر كنانة والرهد بالكدنكات (اها انا اخوك ود قنيرة ده حفرت كيلو كامل ولي حسع ضهري ده (فاتل شاسي) و(جلبي قلبت) من حفري الباصتها بعصيدة بني كربو...خدمة قالو في عشان الله)..!! ...وبعدين حرم لو الزول الكان من الصباح داك بعوعي زيك الديك (ايها الشعب السوداني البطل)..!! ورورورر ايها الشعب المؤمن ورورورورورو ايها الشعب اربط البطون...ربطنا ايها الشعب امشي الدفاع الشعبي مشينا ايها الشعب اعمل نائم انا بحول ليك لجنة نضيرة الارض البور البلقع..عملنا نايمين انتظار للجنة النضيرة..!!! ود قنيرة كلامك بقي عوج شديد وشكلك كده زول تسليم سسسسسسساكت واوكامبو ده خلعتك رطانتو القالوا رطنها دي...!! لالالا انا ودقنيرة زول نصيحة بالحيل...وما بدور الخمج...!! نفتش المشاريع دي جتتتتتتت الجزيزة الرهد كنانة وكافت يا مشروع لافي في السودان ده .يمكن المشروع الحضاري متلبد فيها واحنا ماعارفين وهاجمين ريسنا وزعيمنا الكلس الكيك ابو جني جداد...!!! وكمان لو في ربط البطون يمكن انا ود قنيرة ده وباقية الشعب مانا عارفين نربط ونكرب البطون وربطناها غلط وزولنا في الحساب والكوار المحلي ممكن يدلنا علي طريقة الربطة الاسلامية الدغري....!!
ونعود الي شروط ود قنيرة في يوم المشراط الدولي..
Post: #4 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 11:22 AM Parent: #3
ود قنيرة كلامك كثر بالحيل وشروط حرم (حقنة ملاريا ما زيها) ولكن قبل ان تواصل خليني انا كمان حسن ماكردة( الكيك).... اقول قولي وما تخمني حنك بكلاماتك اللطقتها من مثقافية الفريق.....!!! اها انا حسن ماكردة ده حرمممممم اتضامن مع ناسي المهانين دقون ديل واقيف معاهم ديييييييك احمر...علا عندي كمان شروط (وما بتبقي احسن مني يا ود قنيرة وتشرط وتنط لي فوق راسي)...!! ودقنيرة احنا كان غصب وكان بالرضا وقفنا مع البوسنة ضد الهرسك (وقروشنا الاشتغلناها جتتتتت في دق العيش قسموها مع البوسنة)... ووقفنا مع طالبان والافغان و لبن عياااالنا شفطوا الملا عمر معاهم من شطر واااحد...!! ديل اجانب وناس مسلمين بعاد وقفونا معاهم جن احمر وما فضلنا لينا الا نمشي معاهم في كراكير (تورا بورا),...!! وقفنا مع الدقون دي جتتتتتتت غالبنا كمان نقيف مع دقنا...دقنا المحلي الميد في المنشية...!! علا كمان ود ماكردة ما بضامن سسسسسسسساكت كده...!! وحرم يا ودقنيرة ماك احسن مني تتشرط وتضرع في الدقون براااااك كده...!!! قول شروط يا ود ماكردة بطل اللغلغة دي....واشرط كان بشراط ...ّ!!!! اول شي الجنيات الكتلوهم الدقانة من ما جو في دبابنتهم الغبيشة...يعلنوهم لينا بره ويعملوا سوات ساحة الفداء في التلفزيون ويعلنوهم ابطال قوميين في طريق الحق...!! والدرب الاليلة ابودقن بدور يمسك فوقو ويلملم في عجائز الاحزاب الغالبهم الحيلة وناسين دم ناسهم الماتو في عشان طريق الانتخابات....!!! يسوي ساحات النضال زي ما سوي زماااااان ساحات الفداء وكتلو الجنون في الجنوب...!! سليم بلد وطني التاية بطلة قومية علي فضل بطل وطني طارق بطل قومي.. محمد عبدالسلام بطل قومي.. كل الناس ديلللل جتتتت وابو دقن عارف اساميهم جتتتتتتتت يطلعهم بره ويقول يا ناس هووووي انا كتلت غلط انا كتلت ناسا رجال بالحيل...انا سافي التراب وسامحوني واعفوا لي,,, وطريقهم الماتو في عشانو انا اليوم مسكتوا عدل وتاني لفة ولولوة منو مافيييييي تب (وشرط يجيبوا حاج ماجد ابودقن يقول) تا الله- تا الله- تا الله ثلاثة مرات تاني لولوة مافي تاني قتل مافي تاني سجن مافي تاني تعذيب مافي ونعود
Post: #5 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: khaleel Date: 07-16-2008, 11:53 AM Parent: #4
حسن ماكردة شروطه واضحة
علي الحكومة ان تصدر هذا البيان
السادة النقادة عليكم بالتوجه لفتح البارات فورا
Post: #6 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 01:07 PM Parent: #5
هلا يا خلي وحبابك في يوم شروطات ود قنيرة وود ماكردة وكلامات المرايس والبارات دي ودقنيرة بالذات عندو فيها شروط بت لذينة وعندو قناعة راسخة بانو المرايس الكشوها وودهوها نقاط البوليس وشربوها الضباط والبواليس..لو حفروا ليها مجري يتصل محل اوكامبو ده قاعد حسع...!!!
Post: #7 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 01:19 PM Parent: #6
اها يا ود ماكردة شروطك غريبة بالحيل وعصرت علي زولنا ابودقن عصرة بيلو وماباقي لي برضي بجنس سواتك دي...!!! يرضي يا ودقنيرة ولا ما يرضي دي شرطي بقولوا وبمشي دغري للشرط التاني وبلحق السوق..!!! شرطي التاني يرجعو لي ثلثي الشالو الزبير واكلو الطير من عشرين سنة في زراعتي الاكل الكعوك ثلثها التالث وخلي خشمي ملح ملح....!! السماد الضارب داك يورنا كان بجي من وين..!! ويجيبو لينا ابو دقن الجابو...!! الدواء وحقن الملاريا الكتلت نفيسة بت عثمان السمحة وكتلت معها عيال الفريق جت...!! يمكسوا لينا في يدنا دي وخلونا نسوقوا للغابة هن فريق ورا نعمل ليهو محكمتنا البنعرفها...!! مشروعنا الباعو لزولا دقنو كارة في التراب وزرعو (عباد شمس) سرق عرق ناس كمبو كتر وباعوا للسعوديين ابو دقن يدينا تعويض....!! مقابرنا البحتوها وبحتوا معاهم جثث اهلنا الراقدين في التراب من زمن حفروا البحر...وسووا كبري في محلها البنات الطشن لمن العيشة قست وركبن الطريق الكعب.. العيال الطفشوا سنين وسنين في بلاد طيرها عجمي طردوهم من الشغل زازوهم في المدارس الساحات هن الدافوري الباعوها لابودقن...!! شروط كثيرة بالحيل يا ود ماكردة ونضميك كثر.... ولكن واصل النشوف اخرك
ود قنيرة ياخليل ماسائل في اوكامبو ولافي شاكيرا ذاااتها ود قنيرة بدور حقو من ابو دقن الضلالي... يدوهو حقو علي داير المليم يتضامن حقوا مافي حرم التسليم من ديوان ود قنيرة ده
Post: #10 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 05:37 PM Parent: #9
لاتسالنى من اكون فانا.. حسن ماكردة .. الا يفرزونا بالسراويل..!
* **
Post: #14 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 05:48 PM Parent: #13
Quote: لاتسالنى من اكون فانا.. حسن ماكردة .. الا يفرزونا بالسراويل..
يا سحس ياخي مالك علي السراويل ياخي احنا دايرين نكورك ليك بحقك من ابو دقن ده وسروالك ده ارجي بيهو اوكمابو لو رئيسنا طلع صافي يا عسل وبرئي براءة الذئب هزبر الذي اكل سيدنا يوسف
وانا قلت ليهو دي صعبة امشي انضم للحركات التمرد في دارفور
Post: #18 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 05:57 PM Parent: #17
Quote: قال عائز اتصور مع هيفاء وهبي
خليل بالله ما تبهت ماكردة المسكين ده ساكت.. ماكردة كل مناهو يمشي يتصور مع عشة كبك وفاطمة برنجية وحواء بنضورة... ولو كمان الحال اتصلح معاهو ياخد ليهو فلاش فلاشين مع ندي القلعة...
Quote: خليل بالله ما تبهت ماكردة المسكين ده ساكت.. ماكردة كل مناهو يمشي يتصور مع عشة كبك وفاطمة برنجية وحواء بنضورة... ولو كمان الحال اتصلح معاهو ياخد ليهو فلاش فلاشين مع ندي القلعة...
انت من زمن عشة كبك مياه مرت تحت الجسر
الزول اتطور وبقي بعرف نانسي عجرم وامل حجازي وبعرف الكلوت
Post: #20 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 06:08 PM Parent: #19
Quote: وبعرف الكلوت
خلاص يا زول ما عندك مشكلة لو الريس طلع صافي ياعسل احنا واوكامبو الا يفروزنا بالكلوتات
Post: #21 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبد الناصر الخطيب Date: 07-16-2008, 06:21 PM Parent: #1
عارف ياكيكي عشان فصاحت ودقنيرة وحسن ماكراده ديل الجماعة بفكروا يغيروا التركيبة السكانية ويطردوا ناس الكنابي ديل ويجيبوا محلهم ناس حسنين وعوضين وكلوا تمام ياباشا الله يخلي الحكومه وبشوات الحكومه أها ناس ود قنيرة وماكراده وكبك ديل يا يبيدوهم يا يرجعوهم محل ما جوا لانوا الحيكومة زهجت منهم عوزة شعب جديد حمّار وحلاه بدل الناس الشينه الكلامه كتير ديل وما عارف الباشا عبد الرحيم محمد حسين عمل شنو في مشروعوا داك بتاع أستجلاب حلب لتعديل التريبة السكانية عمك اوكامبو اليومين ديل بكون شغلوا شوية عشان كده ناس ود قنيرة وحسن ماكرده متجدعين ولاقين جوهم اليومين ديل يتشرطوا سأأأأأأأأأأأأأي
Post: #23 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: حيدر حسن ميرغني Date: 07-16-2008, 06:30 PM Parent: #22
Quote: لو الريس طلع صافي ياعسل احنا واوكامبو الا يفروزنا بالكلوتات
100%
Post: #27 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 06:55 PM Parent: #23
Quote: 100%
ايوه ياحيدر لو الريس طلع نضيف حرم اكومابو ده حدنا معاهو (الفوكلاند) وحرم ناسر شاكيرا ولزوجناها لكرجول يتجدع مع باقي عمرو ده... هو قبض الرؤساء ده كمان لعب عيال ولاشنو..!! ولكن في البداية الريس اليسوي لينا كشف حال فيما اثاره ود قنيرة اعلاه.. وبعد داك لكل مقام مقال
Post: #26 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 06:48 PM Parent: #22
Quote: واحد عائز اودهو الكلية الحربية
وواحد كلية الشرطة
وواحد اشغلو في البترول
وواحد في سد مروي
ايوه يا خلي وكمان اولاد جاهزين موية ونور وقارين بعرق جيب جاي من الارض الطاهرة... شروط ماكردة انو العيال ديل يخشوا معاينة حرة زيهم وزي باقي عيال البلد وما يسمع زول تاني يقول توصية ولا يقول ولاء (ولاء لشنو غير الوطن ده) ولو عيال ماكردة سقطوا اليسطقوا واخوانهم التانين مبروك عليهم التوظيف...
ماكردة ما داير يسمع في اي معاينة سيرة (شيخ فلان بسلم عليك) ولا يسمع انا ود ناس فلان ولا يسمع انا من المنطقة الفلانية العلانية..!! ماكردة داير الزول الموهل هو اليمشي الوظيفة..!! وكمان اي زول جاي لوظيفة بطريقة ملولوة من حسع ماكردة بقول ليهو بل راسك وارجي موس ود قنيرة... ولو موس ود قنيرة كسروهاحرم موسي اكومابو قااااااعدة
Post: #24 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 06:40 PM Parent: #21
Quote: وما عارف الباشا عبد الرحيم محمد حسين عمل شنو في مشروعوا داك بتاع أستجلاب حلب لتعديل التريبة السكانية عمك اوكامبو اليومين ديل بكون شغلوا شوية عشان كده ناس ود قنيرة وحسن ماكرده متجدعين ولاقين جوهم اليومين ديل يتشرطوا سأأأأأأأأأأأأأي
هلا يا ناصر وابو ريالة ده هو ذااااتو ناس ماكردة كايسنو وعندهم معاهو حساب منكر ونكير وجاينو وبمزاج كمان... في موضوع الناس الداير يجيبهم قال يعلم ناس (ماكردة) الزراعة الفلاحة... ياكلو في سمسمنا وعيشنا (وكمان دايرين ييجبو في محلنا ناس تانين).. ... وتاني شي ناس ماكردة ماقاعدين يمشوا الخراطيم لكن سمعوا تحت تحت انو عبدالرحيم ده ببني عمارات بمال الشعب وبوقع نفس العمارات باسم الشعب...وخامج سوق البندر عشان كده ناس قنيرة وماكردة في شروطهم الفتحت زي المطر دي دايرين كمان يدو ملف العمارات دي طلة ويشوفو حقهم وين من (البنو ) ومن الوقع.. وكلو جاي يا ناصر وناس ود قنيرة حقهم ما بروح باخوي واخوك سسسسسساااكت كده
Post: #31 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 07:07 PM Parent: #28
Quote: ما يطلعوا بلادي بلادي ساكت
ماكردة قال ماشي الحج علي حساب الدولة
ايوه يا خليل ماكردة برضو ما داير يسمع فلان ولا علان ولا اي دقاني من طرف ماشي بيت مكة من خزينة ماكردة ومافي بعثة رسمية يدفروا فيها دقانة ويعملوا فيها مسئوليين في الدولة.. ديل ياخليل بغشوا الله تمشي لله في بيته باوراق مزورة ولو شفت البكي والنحيب تقول حرم دي مسلم من النوع الابو كديس داك... ماكردة داير يوقف الماكلة بتاعة مال الشعب .... وعيال ماكردة ياخلي ما بلادي بلادي عيال قارين قراية جد وجاهزين جاهزين لحماية الدين لكن ما دين الدقانة ديل ده الدين الفيهو العدل الدين الفيهو كل شي سمح.. مش دين الترابي وحواريه
Post: #29 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 07:00 PM Parent: #25
Quote: وبت قادم زوجة ماكردة قالت عائزة تلعب تنس
بت قادم يا خليل ما بدور التنس والخمج بتاع التنورات القاعدة في السهلة دي بت قادم داير اللبن للعيال بت قادم ما دايرة عيالها يمشو الدفاع الشعبي ويجدعوهم في العيلفون بت قادم دايرة السترة ماكل يوم ناطي ليها زول بلاند كروز مخليها منططة عيونها بت قادم دايرة سلام وامن ودايرة رغيف ...
حسن ماكردة قال عائز اشتري اسهم في شركة شهامة وعائز افتح حساب في البنك الفرنسي
Post: #40 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:06 PM Parent: #37
Quote: حسن ماكردة قال عائز اشتري اسهم في شركة شهامة وعائز افتح حساب في البنك الفرنسي
قروض البنك الزراعي قروض البنك الزراعي ماكردة عاوز يلغوها ويعفوها فورا... والا تضامن تككككككك تضربوا البنوك دي سااااااكت براكم... بعدين ماكردة داير فتح لملفات بنك نيما الضربو ابودقن الزمان داك داير يعرف ويشوف الحاصل شنو في بنك نيما ده
Post: #42 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:09 PM Parent: #35
Quote: لي بت كتوتة
بت كتوتة دايرنها تمشي معاينات التلفزيون باقي هي بنية سمحة بالحيل وما بتعمل كريمات ولا روج... يعملو ليها معاينات بطرق سودانية بعيدا عن الحركات دي ويااااااي
Post: #38 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 07:52 PM Parent: #32
Quote: يا كيكي ماكردة دا زولنا تب معاو للدين سير سير يا ماكردة
انا ذااتي يا ابو الشوش مبسوط من ماكردة ده بسطة جد وزولي للدين ذاااتو...شروطه هو شروطي والقول ما قال ماكردة واذا قال ماكردة قولا قلت
قال عائز اخش المجلس القيادي ممثلا لمنطقة عبل وهارون وجبل جاري
زول طماع ماكردة دها
Post: #44 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:13 PM Parent: #41
Quote: شفت حسن ماكردة القدر عليها قال عائز اتزوج تاني من الاحفاد او مامون حميدة
يا اخوي ماكردة عندو راي في مامون حميدة دي ذاااتها وداير يوقف التجارة في القراية وسحب البساط من جامعات الشعب ... داير تزبيط لكليات الطب والهندسة في كل الجامعات وكل الكليات تكون احسن من مامون حميدة دي وبعد داك الداير يمشي جامعة مامون حميدة دربو اخضر وقشة ماتعتر ليهو
Quote: داير تزبيط لكليات الطب والهندسة في كل الجامعات وكل الكليات تكون احسن من مامون حميدة دي وبعد داك الداير يمشي جامعة مامون حميدة دربو اخضر وقشة ماتعتر ليهو
يا زول حسن ماكردة عجبو الجكس وما عندو في تزبيط الطب
Post: #48 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:28 PM Parent: #46
Quote: لكن يا كيكي شائف كنيرة
ما عنده طموحات نووية زي حسن ماكردة
قنيرة يا زول نضمي كثر وبس ماكردة مابديهو في النقاش.. لكن قنيرة مشكلتو( شنات طبع)بدور المرايس والكلام ده الدقن بلقي فيها فرقة ممكن يكابسو فيها
Post: #47 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:25 PM Parent: #45
Quote: يا زول حسن ماكردة عجبو الجكس وما عندو في تزبيط الطب
قال لي انشاء الله اتخرجوا ممرضين
يا صحبي ماكردة ده لو باري الجكس ده ياهو بكره الجابو ليهو واحدة قالت ليهو يا ماكورتي وصحبك ماكردة انت عارف دفاعو ضعيف وهااك يا تضامن مع ابو دقن...!! ماكردة يا خلي لمن يجي لساحة منازلة الدقون بنسي الجكس وبنسي العدة ذاااتها همو كل في جنة نضيرة يحول الارض البور البلقع.. وبعدين الجكس ملحوق حوور ساااكت قال ليك
Post: #55 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:51 PM Parent: #53
Quote: ماكردة بقي بصلي الصبح خاضر وما بفوت خطبة للكاروري
ياخلي ماكردة شجر ثابت بصلي الصبح لكن خطب الكاروري دي حرم لو جابوها ليهو في قدام بيتو ما يسمع فيها (بغم)... يا اخوي ماكردة ماسك كتاب الله وعارف الدين الصاح وين وعارف مجارمة الدين وين...!! ماكردة في الحلة ممكن يقدم محاضرة عن تسخير المسجد لخدمة السلطان خطب الكاروري نموذجا
Quote: ماكردة في الحلة ممكن يقدم محاضرة عن تسخير المسجد لخدمة السلطان خطب الكاروري نموذجا
يا زول انت اظنك طولت ما لقيت ماكردة
انا لقيتو راكب BM W
واتغابي فيني العرفة عليك الله شوف المهمش دها
Post: #57 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-16-2008, 08:57 PM Parent: #55
دي هدية مني لماكردة وود قنيرة في عشان شروطهم الفي السلك دي .....
Post: #58 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-17-2008, 07:52 AM Parent: #57
شروط ود قنيرة للتسليم وشروط حسن ماكردة للتضامن مع الكيزان...!!!
Post: #59 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: Mekki M Alhassan Date: 07-17-2008, 08:50 AM Parent: #57
يا باشمهندس سلامات والله طولنا منك زمن أخبارك مقطوعة عننا واخبارنا عليك مقطوعة علا متابعين من فترة لي فترة كده زول البوستة بجيب لينا الاخبار اها اسع انا دي جاي ماشي بالشارع داك لقيت ليك جنس لمة ناس ومعاهم البوليس قلت ليهم في شنو قالوا لي :
Quote: وقع الخبر في اضان الثنائي (ود قنيرة وحسن ماكردة) اثناء جلوسهما متكلين في احدي الاركان والخجانين وبدون سابق انذار او كلام كثير افتي ودقنيرة وعلي الجلسة مباشرة..!!
وقال ليهم وهو في ذلك الجخنون .. الكشة جاتكم .. اها قمت قعدت اتفرج..يا ربي ممكن ولا في زول بيقول لي أمشي نوم يا زول انت المسهرك هنا شنو؟؟
Post: #60 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: khaleel Date: 07-17-2008, 11:22 AM Parent: #59
حسن ماكردة
يدخل دورة متقدمة للدفاع الشعبي
Post: #61 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-17-2008, 08:25 PM Parent: #59
Quote: وقال ليهم وهو في ذلك الجخنون .. الكشة جاتكم
هلا يا صديقي مكي واين انت يارجل نسائل عنك الاسافير وانت تمارس الغياب اتمني ان تكون بالف خير وبركة... والكشة الجات دي لعنات المسكينات اللائي تم كشهن في ذات يوما ما من ايام ابودقن التعسفية... البغيظ في الموضوع انو البوليس البكش هو البشرب الشي المكشوش ده في التمنة بالليل ويوزعه لاصحاب الحظوة..
وقدد برر لي حسن ماكردة بان هولاء يذكروهو بايام الفقر
Post: #65 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-19-2008, 08:47 AM Parent: #62
Quote: يوسف دينار وابكر دليل زعلانين جدا من ماكردة
قابلهم بكل (طنقعة) ونسي ايام كرنقو
هلا يا خلي وماكردة غياب لعطل في السيرفرات ويبدو انو السيرفر مكجن اوكامبو ويعمل ضد تطلعات ماكردة اللاهاية... ماكردة يفتح لمية زي ابكر دليل ويوسف دينار ديل لانهم باعو القضية وعملوا ليهم دقون (متر) ونص وضربوا التموين بتاع الحلة اثناء تواجدهم في اللجنة الشعبية
Post: #63 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: Mekki M Alhassan Date: 07-18-2008, 07:58 AM Parent: #61
الاخ الحبوب عبد الكريم غيابنا لأسباب عدة ..اسرية وأكاديمية وعملية .. ولكننا نمتع انفسنا بالقراءة ..متعك الله بالصحة والعافية ..اها ال( كوت ) ده بذكرني نكتة قديمة
Quote: البغيظ في الموضوع انو البوليس البكش هو البشرب الشي المكشوش ده في التمنة بالليل ويوزعه لاصحاب الحظوة..
قال ليك صاحبنا ( كشوه ) ناس البوليس ومعاهوا المظبوطات ( جركانة ) عرقي ( ابو سكسك ) داك صاحبنا بيتوهوا ليك في الحراسة الصباح عرضوه للقاضي ( محكمة العمد ) ومعاهو المظبوطات القاضي سالوا : انت يا زول قبضوك بي ( الجركانة ) المليانة عرقي دي امبارح ؟ صاحبنا عاين ( للجركانة ) وقد اختفت ( الفقعات ) العائمة علي سطح السائل الشفاف الذي يملأؤها .. فقال مجيباً القاضي : يا مولانا ( الجركانة ) حقتي ..نعم لكن الفيها ده ما ( عرقي ) ..القاضي : يا زول ده عرقي ؟ لا ما عرقي .. نادي القاضي لاحد عناصر الشرطة بالمحكمة وطلب منه أن يفتح ( الجركانة ) ويتذوق ما فيها .. هل هو عرقي أم لا .. العسكري فتح ( الجركانة ) وتذوق .. صمت قليلاً وقال : يا مولانا ده ( عرقي ) لكن ممكن يوضي ..
Post: #64 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: الفاتح ميرغني Date: 07-18-2008, 08:24 AM Parent: #63
Quote: وكمان اولاد جاهزين موية ونور وقارين بعرق جيب جاي من الارض الطاهرة... شروط ماكردة انو العيال ديل يخشوا معاينة حرة زيهم وزي باقي عيال البلد وما يسمع زول تاني يقول توصية ولا يقول ولاء (ولاء لشنو غير الوطن ده) ولو عيال ماكردة سقطوا اليسطقوا واخوانهم التانين مبروك عليهم التوظيف...
ماكردة ما داير يسمع في اي معاينة سيرة (شيخ فلان بسلم عليك) ولا يسمع انا ود ناس فلان ولا يسمع انا من المنطقة الفلانية العلانية..!! ماكردة داير الزول الموهل هو اليمشي الوظيفة..!! وكمان اي زول جاي لوظيفة بطريقة ملولوة من حسع ماكردة بقول ليهو بل راسك وارجي موس ود قنيرة... ولو موس ود قنيرة كسروهاحرم موسي اكومابو قااااااعدة
يا سلالألألألألألألألألألألألألألأم يا كيكي ياخ قراءة عالية لنبض شعب مثخن بالاشجان ومثقل بالظلامات ود قنيرة ده بتكلم كلام كبار كبار عشان كدة الشعب ده لازم تتغير تركيبته الديموغرافية ولو بالإستيراد من الدول الشقيقة( حلوة الشقيقة دي مش كده؟).
Post: #68 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-19-2008, 09:37 PM Parent: #64
Quote: ود قنيرة ده بتكلم كلام كبار كبار عشان كدة الشعب ده لازم تتغير تركيبته الديموغرافية ولو بالإستيراد من الدول الشقيقة( حلوة الشقيقة دي مش كده؟).
هلا يا الفاتح وودقنيرة فعلا كلامو بقي كبار كبار وخلعني انا ذاتي وشروط نار منقد بس..!! والشعب قاعد يا الفاتح ضاربة جذوره في ارض هذا السودان وبعرف حاجاتو كويس ومستعد لامتصاص اي قادم جديد بكل اريحية وهو شعب طيب و بسيط ولماح.. وحقوما بتاكل باخوي واخوك..
Post: #66 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-19-2008, 08:50 PM Parent: #63
Quote: العسكري فتح ( الجركانة ) وتذوق .. صمت قليلاً وقال : يا مولانا ده ( عرقي ) لكن ممكن يوضي ..
تخيل يا مكي ثلاثة ارباع العرقي المشكوش في السودان بتشرب قبلو في نقطتو
Post: #67 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: سلمى الشيخ سلامة Date: 07-19-2008, 09:20 PM Parent: #66
هلا يا سلمي سلملم ومشتاقين والله.. وماكردة وودقنيرة يا سلمي شطبوا راسي انا... الزمن ده كلو عاملين فيها رايحين واها من خبر قبضة الريس دي وقعت في اضانهم قاموا للفصاحة والمشراطة وحلفين وواقفين ديك احمر شروطهم دي ما تتنفذ حرم مع الجامبو الجاي يرفع ابودقن هم برفعوا خروف لاوكامبو ده.. ولكن يوم الشروط دي تتحقق اوكامبو السكين الا تباهو وشايفهم المساخيت جابو سيرة فرزة بالسراويل ......
سنلقي قريبا يا سلمي وقد في بكانكم السمح داك بس كدي النشوف اخرة ناس ماكردة وودقنيرة ديل ويا منيسوتا جاك بلا
Post: #70 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: Mekki M Alhassan Date: 07-19-2008, 10:50 PM Parent: #69
أها شفت ما نيسوتا دي فوق ليه طوالي في اتجاه الشمال الجغرافي مانيتوبا ابقي قريب ورينا اخبار ناس ماكردة ودقنيرة وعلي فكرة ما يقوموا في قعادم داك وتشرطهم يقروها مجزئة ...( ماني توبه ) ..
Post: #71 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-21-2008, 08:38 PM Parent: #70
هلا وغلا يا مكي وناس ماكردة وود قنيرة مافي ليهم طريقة مشية مادام لسع موضوع الريس ما اتحسم ومنتظرين نتائج مفاوضاتهم مع ابودقن في الشروط.. ولكن يا صديقي حتما سنلتقي ما دام القصة حتكون حيطة بالحيطة و(ماني توبة) هو شعارنا في الاولمبياد الشمال امريكي وحتما سنلتقي باذن الله يا مكي
Post: #72 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-22-2008, 07:33 PM Parent: #71
ماكردة وودقنيرة في اطار سونامي الشروط التي اجتاحهما عقب الاعلان عن نية خواجة ارجتيني ابن لذينة القبض علي البشير قررا ممارسة الضهب والحوامة في مكاتب الولاية (ام مراوح) وشمشة الاخبار وطقيس خبورات التسليم والتسلم.. واول امس الغريب دلفا الي مكاتب الولاية ووجدوا حشود وجلبة وزول ذو دقن اسطورية يرغي ويزبد ويتحدث حديث جعل ودقنيرة يعتقد بان عهود المتحركات والجهاد والذهاب الي الجنوب قد عاد مرة اخري.. واتخلع وحاول التملص والكسح من هذه اللمة حتي لايقبض عليه ويذهب به الي التوج.. لكن ماكردة بحسه الامني اكتشف بان هذه اللمة بجي منها ..!! وفعلا صدق ماكردة ما ان انتهي ابودقن من حديثه الممل حتي اتي ابودقن اخر وبداء في توزيع 100 الف 100 علي كل الحضور ... تسلتم ال100 الف حقتك وتهتف الله اكبر الله اكبر.. لاتسليم بل موت كهييي الموت للخونة الموت لاكامبو... ركب قنيرة وماكردة الصف ونالو في لمح البصر 200 الف متكفي.. علي اتقاف ان يذهبا غدا الي المظاهرة الكبري المسيرة المليونية..!!
وهنا قال ماكردة مليونية ايييييه يا ابود قن ان مجنون ولا شنو 100 دي فيها لبن وسكر وفيها رغيفات للاولاد كدي بكرة النمشي نضايرها وانتو سيادها ديل ظاهروا.. احنا مافي لينا مظاهرات تاني الا مظاهرات تسقط تسقط يا انقاذ التسليم التسليم
ونعود
Post: #73 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-24-2008, 11:35 PM Parent: #72
Post: #74 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 07-30-2008, 01:36 PM Parent: #73
up
Post: #75 Title: Re: شروط ود قنيرة للتسليم وشروط حسن ماكردة للتضامن مع الكيزان...!!! Author: عبدالكريم الامين احمد Date: 08-30-2008, 06:04 PM Parent: #1
