مرحب بالاخ عبدالكريم احمد الامين...!!!

Post: #1
Title: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 02:02 PM
Parent: #0

اليوم في غمرة الاحداث كحلت اسم في المنبر يكاد يطابق اسمي لو اجريت لاسمينا القليل من التعديلات
شوية تباديل وحبة توافيق سيصبح الاسمين سيم سيم بالكربون..وفركت عيني وقلت ياربي انا ده رحلت بحري ولاشنو ولا الزغللة حصلت يا جماعة..
ليطل علينا الاخ العزيز عبدالكريم احمد الامين عضوا جديد في هذا المنبر نتمني له اقامة سعيدة ورحلة وريفة بين صفحاته..

Post: #2
Title: Re: مرحب بالاخ عبدالكريم احمد الامين...!!!
Author: سارة علي
Date: 08-06-2008, 02:08 PM
Parent: #1

لكن بالطريقة دي بنتعب انحنا..تاني الا يفرزوكم بي تاريخ التسجيل...
ولا شنو يا كيكي؟؟؟

Post: #7
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 03:32 PM
Parent: #2

Quote: لكن بالطريقة دي بنتعب انحنا..تاني الا يفرزوكم بي تاريخ التسجيل...
ولا شنو يا كيكي؟؟؟

هلا يا سارة وحبابك الف في مدارات تشابه الاسامي
وكلو هين يا سارة
الخوف اقوم اردم بوستات الاستاذ عبدالكريم احمد(باعتبارها بوستاتي)
بالنقة التقيلة واخش فيها لفت واشبكها (موغل ودهشة) والفرمالات بتاعة اخوك دي كمان
غير التركيز الشديد مافي حلا ليكم تاني..
كثير في المنبر ده تمت كتابة اسمي علي انه عبدالكريم احمد الامين

Post: #3
Title: Re: مرحب بالاخ عبدالكريم احمد الامين...!!!
Author: محمد يوسف الزين
Date: 08-06-2008, 02:15 PM
Parent: #1

اتخيل واحد زعلان منك وجا محموق رد على عبدالكريم (الما كيكي) في بوست حقو
وردمو ردم الجن.

فـ... كيف؟

Post: #8
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 03:37 PM
Parent: #3

Quote: اتخيل واحد زعلان منك وجا محموق رد على عبدالكريم (الما كيكي) في بوست حقو
وردمو ردم الجن.

هلا يا محمديوسف وحبابك الف
وده المخوفنا ذاااتو
الراجل ياخي ذنبوا شنو يدفع فواتير حسابات اسفيرية قديمة
عموما انا بحاول اكون قريب لوحصل اي ردم بالغلط ح اجر الرادم بررره واردمو ليك ردم السنين
واخد حقي وحق عبدالكريم الجديد

Post: #4
Title: Re: مرحب بالاخ عبدالكريم احمد الامين...!!!
Author: زهير الزناتي
Date: 08-06-2008, 02:16 PM
Parent: #1

يا هندية تاني إلا بصورة بالبروفايل

في زول برضو إسمه :
زهير عثمان حمد

وانا :

زهير محمد عثمان

مرات كتيرة اقول يا ربي انا غير اسم الدخول ولا شنو

Post: #9
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 03:43 PM
Parent: #4

Quote: مرات كتيرة اقول يا ربي انا غير اسم الدخول ولا شنو

تعرف يازهير
انا لمن شفت اسم الاخ عبدالكريم احمد بالتحديد في بوست مدينة بحري
اولا شي اتخلعت خلعة شديد نفس الاسم الما بغباني داك وفي بوست نعم انا معجب به ومتابعه
لكن انا ما اون لاين.
فهنا طوالي عملت ساتر وجدعت كل شي من يدي وخشيت في البوست
واتكشفت ان القصة تشابه شديد ومفاجي..ز
عموما الاشياء الذي بتسهل تعارف الناس وحصل لاقيت شخص بنفس الاسم
اتمني ان يكون هو الاخ عبدالكريم احمد الامين

Post: #5
Title: Re: مرحب بالاخ عبدالكريم احمد الامين...!!!
Author: سارة علي
Date: 08-06-2008, 02:28 PM
Parent: #1

هههههههههههههههههههههههه
اصلا ما كذبتا في دي يا زهير...صحي هندية

Post: #6
Title: Re: مرحب بالاخ عبدالكريم احمد الامين...!!!
Author: العوض المسلمي
Date: 08-06-2008, 02:42 PM
Parent: #1

عزيزي كيكي القديم

فعلا ده تشابه كبير ..

انشاء الله كمان يكون زيك رائع واديب

واظنه سيكون كذلك ....

ويا عمك الما بلقي شبهو الله قبحو ....

Post: #13
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:05 PM
Parent: #6

Quote: واظنه سيكون كذلك ....

شكرا يا العوض وحبابك
وبالتاكيد سيكون الاخ عبدالكريم احمد اضافو لهذا المنبر
ونتمي له سياحة ممتعة بين صفحاته

Post: #10
Title: Re: مرحب بالاخ عبدالكريم احمد الامين...!!!
Author: NGABY AJOOZ
Date: 08-06-2008, 03:43 PM
Parent: #1

Quote: اتخيل واحد زعلان منك وجا محموق رد على عبدالكريم (الما كيكي) في بوست حقو

ولا المصيبة يا كيكي يقوم يكبع ليهو كوز واخوان نسيبة يقوموا
يشتكوا لي بكري وبكري يكون قايم من النوم دابو يلقي الاسم عبد الكريم
يقوم راميك الخور الله يستر .

ارحب بالاخ عبد الكريم احمد واتمني ليه اقامة جميلة بيننا

Post: #14
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:10 PM
Parent: #10

Quote: ولا المصيبة يا كيكي يقوم يكبع ليهو كوز واخوان نسيبة يقوموا
يشتكوا لي بكري وبكري يكون قايم من النوم دابو يلقي الاسم عبد الكريم
يقوم راميك الخور الله يستر

هلا يا نقابي
ولو ابوعبده كبع ليهو كوز ينجوط راس بكري جوطة شديد
لاني انا زاتي ح اركب معاهو سرج واحد وبكبع معاهو من طرف
نخلي ليك بكري ما يعرف يودي مين الخور,,,وتروح عليهو وعلي الكيزان الفرصة

Post: #11
Title: Re: مرحب بالاخ عبدالكريم احمد الامين...!!!
Author: خالد عبد الله محمود
Date: 08-06-2008, 03:43 PM
Parent: #1

نحن ناقصين ؟؟
كيكي واحد مجهجهنا بكري يقوم يجيب لينا واحد تاني؟؟

* نتمني أن يكون كيكي الصغير بقدر ظرف كيكي الكبير ...

Post: #15
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:15 PM
Parent: #11

Quote: نحن ناقصين ؟؟
كيكي واحد مجهجهنا بكري يقوم يجيب لينا واحد تاني؟؟

هلا يا ابوالخلد
وانا حسع ياخالد عملت شنو ياخي
ماياهو قاعد مسسسسسكين لابجدع لا بجيب طوب
وبالتاكيد عبدالكريم التاني سيكون اضافة ثرة للمنبر
ولو بقي بتاع شبك ودواس اسفيري ياها السيجة وتمت حنشكل فولترون ونجنن ليك البشرية
دي جنون قبورة
امسكوا قطاع ملاسي
وانا امسك قطاع بشاشا غرب

Post: #12
Title: Re: مرحب بالاخ عبدالكريم احمد الامين...!!!
Author: طارق جبريل
Date: 08-06-2008, 04:03 PM
Parent: #1

يا هندسة بالله بطلوا حركات الجيش دي
نحن برانا كبرنا وغالبنا نركز

Post: #16
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:21 PM
Parent: #12

Quote: يا هندسة بالله بطلوا حركات الجيش دي
نحن برانا كبرنا وغالبنا نركز

اووووووووووووه
بالجد مشتاقين يا طارق وانت يا زول مشيت السودان ولا مشيت فولتا العليا
لاشوفة تبل الريق ولاخبر يطمئن
فقدناك كثير
والعوض الليلة الله يفتح عليهو عمل باص للغايبن
مشينا فقدناك هناك واهديناك اللحن الفكيتو فينا وكسحت خليتنا عكس الهواء

وحمد السلامة يادوب كده الاركلوجيا احلوت وسيرة العذابات حتدور دويرة صاح
بس بالله براحة علي خالك باقي الايامات دي بقي رهيف شديد ودفاعو راقد سلطة

Post: #17
Title: Re: مرحب بالاخ عبدالكريم احمد الامين...!!!
Author: Azhari Nurelhuda
Date: 08-06-2008, 04:31 PM
Parent: #16

Quote: امسكوا قطاع ملاسي
وانا امسك قطاع بشاشا غرب

يا كيكي
و الله تمت الناقصة......

غاية في الروعة
و الله تاني إلا يفرزوكم ب
كيكي 1
و
كيكي 2

و لا شنو؟؟؟

مرحبا بعبد الكريم الجديد

Post: #18
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:40 PM
Parent: #17

Quote: و الله تمت الناقصة......

ايوووه يا ازهري وبكون الموضوع في السلك وننوع اللعب وحيكون في قلب تقيل
نجوط راس الامة دي ما بتعرف كيكي1 وينو وكيكي2 وينو ذاااتو

نتمني للاخ عبدالكريم اقامة سعيدة ومرحب بيهو والله

Post: #19
Title: Re: مرحب بالاخ عبدالكريم احمد الامين...!!!
Author: عبد الناصر الخطيب
Date: 08-06-2008, 04:47 PM
Parent: #1

مرور لتحية الاخوين عبدالكريم الامين احمد القديم والجديد
ياخي دي بقت زي حكاية الجنيه ...... ولا شنو
------------------------------------------------------------------------

كيكي تحية وسلام

تقديري

Post: #20
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 04:58 PM
Parent: #19

Quote: مرور لتحية الاخوين عبدالكريم الامين احمد القديم والجديد
ياخي دي بقت زي حكاية الجنيه ...... ولا شنو

هلا يا عبدالناصر وحبابك والله..
وفعلا القصة فيها تشابه عجيب ونادر
ونتمي معك للاخ عبدالكريم كل الاماني الطيبة
ومرحب به

Post: #21
Title: Re: مرحب بالاخ عبدالكريم احمد الامين...!!!
Author: sami Alzubair
Date: 08-06-2008, 05:08 PM
Parent: #1

كيكي العجيب
سلامات ليك وللشقلوب الاسمي بتاعك
..
اقتراح محتاج لتثنية من 10 اشخاص لفتح بوست بأسم
(من اجل نيك نيم جديد لكيكي)
..
بما انك زول معلم وكدا
واديب وسياسي خطير
وكمان ناقد فني
ولسانك سليط
ومهنضب تاس كتار
وحاجات تانية حامياني
اقترح انو بكري يديك نك نيم باسم الشهير
كــــــــــيكـــــــــــــي
ونعمل حملة مطالبة وكدا

ولاشنو

Post: #23
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 05:19 PM
Parent: #21

Quote: اقترح انو بكري يديك نك نيم باسم الشهير
كــــــــــيكـــــــــــــي
ونعمل حملة مطالبة وكدا

هلا يا ابوالسيم وحبابك
وجبت خبرية شطبت الراس والله...
وبيني وبينك كيكي اسم تاريخي ولي معاهو زكريات ووقع خاص شديد
لكن ياخي كمان انت ما تديها دفرة كده
صوب كرومة- كرمة - كريمو_كرمة البحر برضو ما بطالة مع اخوك
علي الاقل نواكب العولمة دي شوية...
وممكن نفكر لكن بكري دائما قاعد يسحب الرصيد من الشريحة بتاعة الاسم
وانا شريحتي داقة في ال11 الف دي لو لقيتها ريالات كان حسع اخوك سعو ليهو رقشة برااحة...
وشكرا يا سامي علي كلامك الجميل واخجلتم تواضعنا يارجل

Post: #22
Title: Re: مرحب بالاخ عبدالكريم احمد الامين...!!!
Author: طلحة عبدالله
Date: 08-06-2008, 05:16 PM
Parent: #1

انتهيت يا كيكي الحبيب ..
عارف ايام كنت شغال في جريدة نجوم الرياضة ربنا يرجع اياما اخدت جائزة لاحسن تغطية في اولمبياد رمضان كانت عاملاها جريدة قون الناس كلها باركت لطلحة الشفيع وأنا ما اشتغلوا بي الشغلة ..
ومرة دخلت المستشفي الناس كفرت برضو لي طلحة الشفيع وانا راقد في المستشفي ولا زول هببو لي ..
اها مرة الاستاذ طلحة دا لاقاني في مناسبة كدا فقام قال لي يا طلحة يا خوي انت والشهرة الشحمة والنار عشان كدا اعمل سماية جديدة وسمي نفسك اية حاجة انشالله شافة وحق السماية علي , وبي ضحكة عجيبة ضربني في كتفي دا وواصل مشيهو وهو يضحك ولا كأنو فقع مرارتي .
اها ياخوي كيكي السماية متين ..

Post: #25
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 05:25 PM
Parent: #22

Quote: اها ياخوي كيكي السماية متين

هلا يا طلحة
وطلحة الشفيع كيفني جنس كيف...عافي منو الهلالابي الكبير
وده كلو يا طلحة لانك مريخابي ..حسع لو كنت هلالابي كان علي الاقل يكون اسمك عبدالكريم عبدالله
يا اخوي انا ذاتي كده احسن لي البد والقي لي حجة اغالط بيها
وانكر انو ده ماانا يازول الحكاية قالو فيها جلد يا صحبي

Post: #24
Title: Re: مرحب بالاخ عبدالكريم احمد الامين...!!!
Author: طارق جبريل
Date: 08-06-2008, 05:20 PM
Parent: #1

Quote: وحمد السلامة يادوب كده الاركلوجيا احلوت وسيرة العذابات حتدور دويرة صاح
بس بالله براحة علي خالك باقي الايامات دي بقي رهيف شديد ودفاعو راقد سلطة

اصبر لي ساكت جاييك بي شغل ليل نضيف
شغل ودار عدييييييييييييييييييييل

Post: #27
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 05:31 PM
Parent: #24

Quote: اصبر لي ساكت جاييك بي شغل ليل نضيف
شغل ودار عدييييييييييييييييييييل

برااحة علينا يا طارق ياخي
اخوك الليلة خاشي ليهو في شششششششوووو
كده بقانا شاورمة عديل كده..
عيون بطارية......ولفحة فلاش شووووووووو...!!!

Post: #26
Title: Re: مرحب بالاخ عبدالكريم احمد الامين...!!!
Author: NGABY AJOOZ
Date: 08-06-2008, 05:31 PM
Parent: #1

انت ياكيكي ما عندك خبر ريسنا بقي شيخ كبير قالوا دخلتو الامتداد
كده الطقس قلب واصبح اروبي بعد الكتاحة والرماضه البتفسخ الضهر ديك
عايز تمسخو لينا وترجعو للسهر وشنو ما عارف .

ود جبريل مشتاقين يا حبيب وحمدالله علي سلامة الوالد منتظرين جديد الصور

Post: #28
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 05:40 PM
Parent: #26

عاوز اركب وش خليل وأقول حاجة فيك

يازول جد حيرتني

Post: #30
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 05:51 PM
Parent: #28

Quote: عاوز اركب وش خليل وأقول حاجة فيك

يازول جد حيرتني

هلا ياحيدر
وتبري انت يا زول من وش خليل الشين ده
وشنو يا فردة اوع نكون غلطنا جاي ولا جاي مافي حاجة ساي علي قولة محجوب شريف..

باقي اخوك ليهو اربعة ايام بعيد عن مود المنبر واهو بنجي راسنا دايش
وبنركب الصف علي طول

Post: #29
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 05:48 PM
Parent: #26

Quote: انت ياكيكي ما عندك خبر ريسنا بقي شيخ كبير قالوا دخلتو الامتداد
كده الطقس قلب واصبح اروبي بعد الكتاحة والرماضه البتفسخ الضهر ديك
عايز تمسخو لينا وترجعو للسهر وشنو ما عارف

هلا يا نقابي
ورئيسكم ده بالله كلمو ياخي.
الراجل ده لمن يجي بولع فينا جمر الحي بحاجاتو البجيبها دي
واحنا ناس قاعدين في السهلة دفاعنا اخير منو دفاع البشير في لاهاي

Post: #31
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 05:59 PM
Parent: #29

Quote: وشنو يا فردة اوع نكون غلطنا جاي ولا جاي مافي حاجة ساي علي قولة محجوب شريف..

لا يامان

بس إفتكرتك عاوز تسلم الراية لكريم الآخر

فلنا وين نمشي بعدك

Post: #32
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 06:05 PM
Parent: #31

Quote: بس إفتكرتك عاوز تسلم الراية لكريم الآخر

فلنا وين نمشي بعدك

قاعدين هنا يا حيدر يا فردة نمشي وين يا زول..
في الاول نسلم البضاعة (لاهاي) الميناء الجوي
حتن بعدين نمشي عكس الريج نجدع وننداح شوية ونرتاح من الكوماج الهنا ده

Post: #33
Title: Re: مرحب بالاخ عبدالكريم احمد الامين...!!!
Author: khaleel
Date: 08-06-2008, 06:29 PM
Parent: #32

Quote: لكن بالطريقة دي بنتعب انحنا..تاني الا يفرزوكم بي تاريخ التسجيل...
ولا شنو يا كيكي؟؟؟

ما تحتارو يا بورداب

تفتحوا البوست لو لقيتو كلمة (موغل ودهشة ) دها كيكي الشين

واذا ما لقيتهو دها عبدالكريم الحلو

نورت يا كريم ابقي داخل الدار دارك

Post: #35
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 07:31 PM
Parent: #33

Quote: ما تحتارو يا بورداب

تفتحوا البوست لو لقيتو كلمة (موغل ودهشة ) دها كيكي الشين

واذا ما لقيتهو دها عبدالكريم الحلو

هلا يا خليل اوكامبو
في داعي ياخي لشيل الحال ده
ماتخليها كريم القديم وكريم الجديد بتكون احلي وروتانا بس

Post: #34
Title: Re: مرحب بالاخ عبدالكريم احمد الامين...!!!
Author: NGABY AJOOZ
Date: 08-06-2008, 06:32 PM
Parent: #1

Quote: عاوز اركب وش خليل وأقول حاجة فيك

يازول جد حيرتني ]

والله يا حيدر بنحاول نفك الكدر

Post: #36
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 07:36 PM
Parent: #34

Quote: واذا ما لقيتهو دها عبدالكريم الحلو

ياخلي عملت ولدنا عبدالكريم الخلا عديل

Post: #37
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 07:52 PM
Parent: #36

Quote: ياخلي عملت ولدنا عبدالكريم الخلا عديل

انت عارف خليل ده ما يسكت الا الواحد
يكلم بكري يغير اسمي الي عبدالكريم اوكامبو

Post: #38
Title: Re: مرحب بالاخ عبدالكريم احمد الامين...!!!
Author: عزيز عيسى
Date: 08-06-2008, 08:44 PM
Parent: #1

خلاص يا عبدالكريم إنت تكتب في نهاية مداخلاتك (كيكي)
وعبدالكريم التاني يكتب في نهاية مداخلاته (الكيك)
وبكدا نقدر نفرق بيناتكم وتكون المشكلة إتحلت.

مسألة تشابه الأسماء دا برضو عامل لي قلق..
إسمي عزيز عيسى وبرضو في أخ إسمه بالإنجليزي Abdlaziz Eisa
وبنشترك الإثنين في كتابة إسم عيسى بالإنجليزي Eisa
والأغرب من ذلك درسنا الإثنين في مدرسة السني بمدني.
يا ربي دا يكون أنا ذاتي وما جايب خبر؟

الأخ عبدالكريم الأمين أحمد نتمنى لك إقامة طيبة.

Post: #39
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 08:57 PM
Parent: #38

Quote: والأغرب من ذلك درسنا الإثنين في مدرسة السني بمدني.
يا ربي دا يكون أنا ذاتي وما جايب خبر؟

والله يا عزيز يا اخوي كلو جائز في الزمن ده
واحتمال تكون ده انتا لكن بالانجليزي واحنا الماجايبين خبر.

Quote: الأخ عبدالكريم الأمين أحمد نتمنى لك إقامة طيبة

واها شفت هنا الجوطة بدت من حسع
انا الفي النص الامين
وعبدالكريم التاني هو الفي النص احمد

Post: #40
Title: Re: مرحب بالاخ عبدالكريم احمد الامين...!!!
Author: عبد المنعم سليمان
Date: 08-06-2008, 09:03 PM
Parent: #1

انا لقيت لي زول في جوبا ما اسموا زي اسمك دا بشبهك عديييل كدا لمان قلت ليهو يا كيكي

___
يعني شنو طلع اسموا زي اسمك
انا اسمي ما زي اسم عبدالمنعم التاني
بس بصراحة انا مستفيد
اخدت منو الفحولة
انشاء الله زولك يديك الرجوله انت كمان
آمين

Post: #41
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 09:08 PM
Parent: #40

Quote: انا لقيت لي زول في جوبا ما اسموا زي اسمك دا بشبهك عديييل كدا لمان قلت ليهو يا كيكي

___
يعني شنو طلع اسموا زي اسمك
انا اسمي ما زي اسم عبدالمنعم التاني
بس بصراحة انا مستفيد
اخدت منو الفحولة
انشاء الله زولك يديك الرجوله انت كمان
آمين

اووووو
بيجو 555
ياخ مشتاقين يعلم الله..ووينك يا زول مختفي
انت اصلك مشيت جوبا ولا مشيت (لاهاي) ...
وبعدين فعلا زول جوبا ده انا ذااااتي بس انت خفت وماجيت لي
كنت ناوي امشي افسحك في خور كده اسمو خور (باعو)...وناوي اعزمك كانجي مورو في سوق رجال مافي
وبعد داك كنت حتشوف حلو يافارة
ياخ مشتاقين وكدي كلمنا عن جوبا دي شوية يا مندكرو

Post: #42
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 09:10 PM
Parent: #40

عبد المنعم الفحل راجلا ضكر

كرعيهو حديد وصلبو حجر

Post: #43
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 09:16 PM
Parent: #42

Quote: عبد المنعم الفحل راجلا ضكر

كرعيهو حديد وصلبو حجر

حيدر طبعا انت ما قاصد منعم بيجو ده
لانو بيجو صعلتو حجر وسفتو برضها حجر

Post: #44
Title: Re: مرحب بالاخ عبدالكريم احمد الامين...!!!
Author: عبد المنعم سليمان
Date: 08-06-2008, 09:55 PM
Parent: #1

اتصبر بي دي لمان اجيك واحكي ليك عن جوبا

Post: #45
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 09:59 PM
Parent: #44

كيكي يلا نمشي نشوف منعم ده قاعد وين ونجاورو

قطع شك ده قسم تولى وزارة

Post: #47
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 10:04 PM
Parent: #45

Quote: كيكي يلا نمشي نشوف منعم ده قاعد وين ونجاورو

قطع شك ده قسم تولى وزارة

ده يا حيدر قسم ثروة وسلطة عديييييييييل كده يا زول
منعم ده يا اخوي تاني ما زول بورداب الشي ده نيفاشا عديللللل كده

Post: #46
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 10:01 PM
Parent: #44

اووووووه منعم يا صحبي انت ده خلاص ورت معاك وره رهيبة
سلفاكير للتغيير شخصيا...
بيجو يا زول انت تاني الواحد يلاوز ذااتو لو عاوز يشدها معاك قرض في المنبر ده
غايتو ايامك ساكوبيس يا فردة

Post: #48
Title: Re: مرحب بالاخ عبدالكريم احمد الامين...!!!
Author: عبد المنعم سليمان
Date: 08-06-2008, 10:14 PM
Parent: #1

ودي خالتك الكينية الدكتورة وانجاري ماثاي الفائزة بجائزة نوبل 2004

Post: #50
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 10:24 PM
Parent: #48

Quote: ودي خالتك الكينية الدكتورة وانجاري ماثاي الفائزة بجائزة نوبل 2004

لها التحية يا بيجو ولجوبا الشوق الكثيف...

.......
وانت زاتك يا فردة بصلعتك دي نوبل منك تكلة بس

Post: #49
Title: Re: مرحب بالاخ عبدالكريم احمد الامين...!!!
Author: عبد المنعم سليمان
Date: 08-06-2008, 10:23 PM
Parent: #1

اتصبر بالممثلة دي للصباح

دي الممثلة الامريكية ميا فارو
انت من زمن خور باعو يا باعو انت

___
خلي كوستاوي ينفعك

Post: #51
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-06-2008, 10:41 PM
Parent: #49

Quote: خلي كوستاوي ينفعك

يازول كوستاوي شنو...
انا تاني فردتك انت وبس
شايفك بقيت بتاع كلام كبار كبار
شي نوبل وشي هوليود ولو عصرنا عليك شوية احتمال تطلع لينا صورة مع اوباما ذااتو
بصراحة يا مان بقيت منك جفلة

Post: #52
Title: Re: مرحب بالاخ عبدالكريم احمد الامين...!!!
Author: حيدر حسن ميرغني
Date: 08-06-2008, 10:47 PM

Post: #53
Title: Re: مرحب بالاخ عبدالكريم احمد الامين...!!!
Author: طارق ميرغني
Date: 08-07-2008, 06:25 AM
Parent: #1

يا عبد الكريم والاعزاء عبد الكريم الجديد ده ود عمتي!!!! اعملوا حسابكم لانو لو عاينت بالجمبه حتشوف الوجاهه والصلعه المنوره اها هو

اوجه مني وبدون صلعه... قلت كيف؟؟؟؟؟؟؟؟؟

Post: #54
Title: Re: مرحب بالاخ عبدالكريم احمد الامين...!!!
Author: ريهان الريح الشاذلي
Date: 08-07-2008, 08:45 AM
Parent: #53

Quote: مرحب بالاخ عبدالكريم احمد الامين...!!!

كويس عشان يكون في خيارات

Post: #61
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 10:33 AM
Parent: #54

Quote: كويس عشان يكون في خيارات

سمح يا ريهان...!!!
خلاص كويس جاييكم برضو
الامين عبدالكريم احمد
واحمد عبدالكريم الامين
والامين احمد عبدالكريم
وهكذا

Post: #58
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 10:20 AM
Parent: #53

Quote: يا عبد الكريم والاعزاء عبد الكريم الجديد ده ود عمتي!!!! اعملوا حسابكم لانو لو عاينت بالجمبه حتشوف الوجاهه والصلعه المنوره اها هو

اوجه مني وبدون صلعه... قلت كيف؟؟؟؟؟؟؟؟؟

هلا ومرحب اخي طارق...
ود عمتك وجيهة تب وماعندو عوجة وده كلام شوف عين في مدارات اديس..
ولذا اطالب الجمهور بالتركيز فقط علي عبدالكريم القديم
وعبدالكريم الجديد...
لانو كلام والوجيهة وما وجيهة دي بدخل اخوك في امرا ضيق

Post: #55
Title: Re: مرحب بالاخ عبدالكريم احمد الامين...!!!
Author: hammama
Date: 08-07-2008, 09:48 AM
Parent: #1

سلام للجميع
ومرحب بالاخ الجديد (ملاحظين اني ذكرتو من غير اسم ) لاني بقيت ملخبت فيهم هو منو الجديد ؟ عبد الكريم الامين احمد ام عبد الكريم احمد الامين
ياخ المنبر دا عذبنا عديل كده دي يحلوها كيف يعني

خلاس واحد كيكي اسم تمام موغل في الدهشة
والتاني كرم اسم موغل في البسكويت

تحياتي

Post: #62
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 10:38 AM
Parent: #55

Quote: خلاس واحد كيكي اسم تمام موغل في الدهشة
والتاني كرم اسم موغل في البسكويت

هلا ياحمامة
وايووه تاني نزيد المحلبية بتاعة موغل ودهشة دي عشان نسهل ليكم الية الفرز
والف مرحب بيك في مهرجان الاحتفاء بالاخ عبدالكريم
وكل الود

Post: #56
Title: Re: مرحب بالاخ عبدالكريم احمد الامين...!!!
Author: عبدالكريم أحمد الامين
Date: 08-07-2008, 09:54 AM
Parent: #1

Quote: اليوم في غمرة الاحداث كحلت اسم في المنبر يكاد يطابق اسمي لو اجريت لاسمينا القليل من التعديلات
شوية تباديل وحبة توافيق سيصبح الاسمين سيم سيم بالكربون..وفركت عيني وقلت ياربي انا ده رحلت بحري ولاشنو ولا الزغللة حصلت يا جماعة..
ليطل علينا الاخ العزيز عبدالكريم احمد الامين عضوا جديد في هذا المنبر نتمني له اقامة سعيدة ورحلة وريفة بين صفحاته..

** الباشمهندس عبدالكريم

الشكر أجزله علي ترحيبك بي وكنت أتوقع منك أن تراسلني قبل سنتين عند إلتقائنا بفندق مرديان بشارع بولو بإديس أبابا وكان ذلك في اول أيام عيد الاضحي وكان الخبر الرئيسي في ذلك الصباح هو إعدام صدام حسين ..

** خوفاً من حصول لبس في الموقع هذا اسمي كاملاً ولكن المتداول هو عبدالكريم الامين ولق آثرت عدم إستعماله حتي لاأتعدي علي حقك الادبي في الموقع وخوفاً من التعويضات التي قد تُطالب بها ,, ولك شكري وتقديري ومحبتي إذ أنني ظللت مُتابعاً لما يجود به فكرك من مُشاركات...

Post: #57
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 10:16 AM
Parent: #56

Quote: الشكر أجزله علي ترحيبك بي وكنت أتوقع منك أن تراسلني قبل سنتين عند إلتقائنا بفندق مرديان بشارع بولو بإديس أبابا وكان ذلك في اول أيام عيد الاضحي وكان الخبر الرئيسي في ذلك الصباح هو إعدام صدام حسين ..

** خوفاً من حصول لبس في الموقع هذا اسمي كاملاً ولكن المتداول هو عبدالكريم الامين ولق آثرت عدم إستعماله حتي لاأتعدي علي حقك الادبي في الموقع وخوفاً من التعويضات التي قد تُطالب بها ,, ولك شكري وتقديري ومحبتي إذ أنني ظللت مُتابعاً لما يجود به فكرك من مُشاركات...

ياااااااااا
استاذي الكبير عبدالكريم
والله زمان ومشتاقين
بالامس ذكرت هنا بانني التقيت نفس الاسم في مكان ما وكنت اعني تماما فندق مريديان ومدارات اديس وجمالها الاخاذ
وفعلا لازال كرتك الشخصي قابع في ذلك الجذلان الاديسي الي منحني له سوق مركيتو الجميل ولازالت تلك الايام الرائعة تعشعش في الوجدان
وتمنحنا سيرة اجمل المدن واروع الناس...
اعذرني علي عدم التوصل لمشاغل الدينا ام قدود ولكن نشكر الزمان وهذا المكان الذي جلبك الينا هنا حتي نسعد مرة اخري بلقاكم
والف مرحب ....
لاتعويضات يا عبدالكريم فانت قانوني ضليع قادر علي امتصاص دفوعاتي D
وكن بالف خير وحبابك عشرة والف مرحب

Post: #60
Title: Re: مرحب بالاخ عبدالكريم احمد الامين...!!!
Author: عبدالكريم أحمد الامين
Date: 08-07-2008, 10:31 AM
Parent: #57

الـــشـــكــر أجــزلــه لــكــل مــن رحـــب بـــي ,,

وهــذه شيمة من كانوا أهلاً لإكتساب عضوية هذا المنبر المُميز ,, فشكراً مرة أخرى للباشمهندس بكرى إبن بحري ست الهوى والطراوه ,, وشكراً لاعضاء المدونه وشكراً لصاحب هذه الدانقه الصغيره (السمي) والتي تتوسط هذه الدانقه الكبيره روعة وإبداعا...

Post: #66
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 11:17 AM
Parent: #60

Quote: وهــذه شيمة من كانوا أهلاً لإكتساب عضوية هذا المنبر المُميز ,, فشكراً مرة أخرى للباشمهندس بكرى إبن بحري ست الهوى والطراوه ,, وشكراً لاعضاء المدونه وشكراً لصاحب هذه الدانقه الصغيره (السمي) والتي تتوسط هذه الدانقه الكبيره روعة وإبداعا...

مرحب يا سمي وحبابك والله..
ونتمني ان يطيب لك المقام بين هذه المجموعة التي جمعها صديقنا الجميل بكري ابوبكر حول الوطن وحلملنا به الذي نرنو اليه
جميعا...ومتابعين معاكم الكتابات الحميمة حول مدينة بحري وناسها الرائعين وفي انتظار الكثير
وكل الود

Post: #59
Title: Re: مرحب بالاخ عبدالكريم احمد الامين...!!!
Author: esam gabralla
Date: 08-07-2008, 10:27 AM
Parent: #1

حوصتو بينا

واحد يلبس طاقية وبنطلون و التانى نضارة و عراقي

يا كيكي نفس الاسم و تتقابلو "بالصدفة" في اديس في نفس الفندق

الاخوة مخابرات و لا حاجة؟

Post: #63
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 10:42 AM
Parent: #59

Quote: واحد يلبس طاقية وبنطلون و التانى نضارة و عراقي

يا كيكي نفس الاسم و تتقابلو "بالصدفة" في اديس في نفس الفندق

الاخوة مخابرات و لا حاجة؟

ايو وبعد ده اعمل حسابك..!!
الاخ عبدالكريم ماسك قطاعات ثانية
لكن انا ماسك قطاع الشيوعيين والشيوعيين المتمردين بالذات
ديل ح انجضهم نجاض قبورة تاني ياعصام
وتقارير الف

Post: #64
Title: Re: مرحب بالاخ عبدالكريم احمد الامين...!!!
Author: NGABY AJOOZ
Date: 08-07-2008, 10:58 AM
Parent: #63

العزيز كيكي
لمن شفت صورة عبدالمنعم ابو صلعة قلت ده كيكي الجديد لكن لقيتك ده انت
بس جينا نسلم وكده

Post: #65
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-07-2008, 11:14 AM
Parent: #64

Quote: لمن شفت صورة عبدالمنعم ابو صلعة قلت ده كيكي الجديد لكن لقيتك ده انت
بس جينا نسلم وكده

هلا يانقابي يا عجوز
ومنعم بقي (غير) علي قولة ناس الخليج
وصلعتو ذااتها ماياها الصلعة البنعرفها ديك
دي صلعة يانقابي شكلها(نيفاشا نيفاشا) كده

Post: #67
Title: Re: مرحب بالاخ عبدالكريم احمد الامين...!!!
Author: Adam Mousa
Date: 08-07-2008, 11:25 AM
Parent: #65

Quote: لكن انا ماسك قطاع الشيوعيين والشيوعيين المتمردين بالذات
ديل ح انجضهم نجاض قبورة تاني ياعصام
وتقارير الف

Post: #74
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 07:55 PM
Parent: #67

هلا يا ادم موسي وحبابك
وصحبي عصام ده تاني اليشوف ليهو جحر يخش فيهو تاني

Post: #68
Title: Re: مرحب بالاخ عبدالكريم احمد الامين...!!!
Author: كمال سالم
Date: 08-07-2008, 11:36 AM
Parent: #1

كيكى ,, لخبطتونا , هسه البرد ده هو ولا إنت ؟

Post: #75
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 08:02 PM
Parent: #68

Quote: كيكى ,, لخبطتونا , هسه البرد ده هو ولا إنت ؟

هلا يا ابوكمال وحبابك
ودي المناظر يا ابو كمال
فصبرا لمن الفيلم يدور تاني حنشغل ليك راسك ده مروحة تربيزة

Post: #69
Title: Re: مرحب بالاخ عبدالكريم احمد الامين...!!!
Author: صلاح شكوكو
Date: 08-07-2008, 05:01 PM
Parent: #1

...

هو المشكلة مش في دا
المشكلة أنا قلت عبد الكريم مالوا برحب بنفسه
لأن عارف عبد الكريم الجديد نال العضوية من يومين

لكن حركة ظريفة منك للتفريق بين المتشابهين

لكما كل الود

..

Post: #70
Title: Re: مرحب بالاخ عبدالكريم احمد الامين...!!!
Author: عبود عبد الرحيم
Date: 08-07-2008, 05:18 PM
Parent: #69

يا عمكـ
مرحب بيكم الاثنين
جننتونا عبدالكريم الامين محمد
وعبدالكريم محمد الامين

المشكلة يكونوا الاثنين هلالاب

وين حمــــودي يفك الشربكة دي ؟؟؟؟

Post: #71
Title: Re: مرحب بالاخ عبدالكريم احمد الامين...!!!
Author: Kostawi
Date: 08-08-2008, 03:00 PM
Parent: #70

Post: #83
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 10:14 PM
Parent: #71

والترابي ده يا كوستاوي تاني بالتاكيد بعد الصورة دي
ماعندو عمار في الحركة الاسلامية المحلية والعالمية

Post: #79
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 09:46 PM
Parent: #70

Quote: المشكلة يكونوا الاثنين هلالاب

هلا يا عبود وحبابك ياعمك
وغايتو انا كنت هلالابي لحدي يوم امس وقبل الدقيقة 44 من الشوط التاني
ولكن بعد طمبلكو ده تاني حنقرض علي تشجيع الحكام وبس
وحبابك الف يا عبود وكن بالف خير

Post: #78
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 09:39 PM
Parent: #69

Quote: هو المشكلة مش في دا
المشكلة أنا قلت عبد الكريم مالوا برحب بنفسه
لأن عارف عبد الكريم الجديد نال العضوية من يومين

لكن حركة ظريفة منك للتفريق بين المتشابهين

هلا ابوصلاح
وحبابك في مهرجان الترحيب بالاخ عبدالكريم
والامر الجميل هو انني التقيت به قبل سنتين في اديس فوجدته اخا شهما اصيلا
نتمني ان يطيب له هذا المكان
والف مبروك له العضوية

Post: #72
Title: Re: مرحب بالاخ عبدالكريم احمد الامين...!!!
Author: عبد المنعم سليمان
Date: 08-08-2008, 06:51 PM
Parent: #1

وانت قاعد لي 100 سنة في امريكا وللا صورة ما شفناها ليك مع عمر عبدالرحمن
عيبوا لي ال في صورة ده ؟
يفزعنا ويلحقنا ومؤيد لسلفاكير في الانتخابات

___
موش زي صورك ال كلها مع التون جون واشباهه العياذ بالله

_
كيكي حيصل امريكا قريب وبوريك الصور ال ما خمج
يمكن يصور لينا مع باريس هيلتون زاااتا

خاصة لو عرفت المؤهلات
فلاتي ومتربي بي قدو قدو
خلي الفياجرا تنفعكم يا خرده

Goكيكي Go كيكي GO GO

Post: #73
Title: Re: مرحب بالاخ عبدالكريم احمد الامين...!!!
Author: Kostawi
Date: 08-08-2008, 07:31 PM
Parent: #72

Post: #76
Title: Re: مرحب بالاخ عبدالكريم احمد الامين...!!!
Author: Tragie Mustafa
Date: 08-08-2008, 08:14 PM
Parent: #73

كيكي و كرم زي ما دلعوكم هنا سلامات وبركه الفرقتوا لينا الفيلم .

اتخيل يا كيكي انا قايله اخوك احمد ولدوا له ولد وسماه عبد الكريم
وقال داخله ابارك تخيل؟؟!!

ويا عبد المنعم سليمان بالغته لكن في الصورة مع الممثله ميا فراو
معقوله بس....دي صورة تتصورها يا اخي؟؟؟
ما فضل الا تديها ضهرك....يا اخي مفروض تحتفي بيها وعلى الاقل يا
رحعته شويه لجوارها يا ختيت يدك في كتفها...من باب التقدير و الجنتل مان بهفير
مش عامل لي انصار سنه وزاحي منها زي المجربه!!

دي صورة غايتو تنفع للعالم الثالث بس...اوعك تفكر تقشر بيها لناس كستاوي.

Post: #84
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 10:25 PM
Parent: #76

Quote: كيكي و كرم زي ما دلعوكم هنا سلامات وبركه الفرقتوا لينا الفيلم .

اتخيل يا كيكي انا قايله اخوك احمد ولدوا له ولد وسماه عبد الكريم
وقال داخله ابارك تخيل؟؟!!

هلا يا تراجي وحبابك والله
وياريت والله ابوحميد يجيب لينا كيكي صغيروني كدي نفرح بيهو كلنا
وصحبي عبدالمنعم شايل ليهو صورة (انصار سنة) وحايم فرحان بيها في الاسافير
وصورة زي دي حرم (الطقي ) ما يتصور زيها في زمن التقارب الانساني ده
لكن نقول شنو مرمي الله ما بترفع

Post: #80
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 09:58 PM
Parent: #72

Quote: Goكيكي Go كيكي GO G

YES MAAAAAAN IWILL GO
ولمن نمشي بالتاكيد علي نعومي كامبل ومن لف لفها من الحسناوات
تجهيز كاميرا كانون ياوندي...حتي نتصور

Post: #77
Title: Re: مرحب بالاخ عبدالكريم احمد الامين...!!!
Author: Kamal Karrar
Date: 08-08-2008, 08:23 PM
Parent: #1

يا عبد الكريم السنير ٍSENIOR

أزيك وسلامات يا أخي أنت قاعد من زمن حفروا المنبر ده.. وبنعرفك بإسم كيكي..

أما عبد الكريم ود عمة طارق ده.. ده يا دوبك.. ممكن نفرق بينكم...

ونسميه عبدالكريم الظريف... عارف ليه؟؟؟ لأنو من بحري وبحري طراوة يا كيكي..

يا أخي أنت برضو ظريف بس معتق وعبدالكريم أحمد الأمين ده لنج..

برضو أنا أتخلبطت لما لقيت بوست بإسمك قلت متين عبد الكريم نال عضوية بحري وشتت...

تحياتنا ليك ولي عبدالكريم ولدنا.. أها قصرنا...

Post: #81
Title: Re: مرحب بالاخ عبدالكريم احمد الامين...!!!
Author: Rawia
Date: 08-08-2008, 10:06 PM
Parent: #77

what if Aldama alheart (waga3at) in one of his posts?LOL

Post: #82
Title: Re: مرحب بالاخ عبدالكريم احمد الامين...!!!
Author: Kamal Karrar
Date: 08-08-2008, 10:09 PM
Parent: #81

Quote: what if Aldama alheart (waga3at) in one of his posts?LOL

!WHAT A QUESTION
Double LOL

Post: #88
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 10:49 PM
Parent: #82

Quote: WHAT A QUESTION
Double LOL

TRIPLE LOOOOOL
عديل كده يا ابوكمال
راوية هبشتني في بكان عجيب خلاص بودي الناس لاهاي طوالي

Post: #86
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 10:40 PM
Parent: #81

Quote: what if Aldama alheart (waga3at) in one of his posts?LOL

هلا يا راوية
وساعتها ستكون الدامة هي (ابيي) نيفاشتنا وساتحول الي موتمر وطني
وسيكون عبدالكريم الثاني هو الحركة الشعبية
واحتمال اصعد الموضوع المحكمة الدولية في لاهاي لو الخرخرة حصلت

كل شي ولا الدامة دي يا راوية هوووي

Post: #85
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 10:32 PM
Parent: #77

Quote: برضو أنا أتخلبطت لما لقيت بوست بإسمك قلت متين عبد الكريم نال عضوية بحري وشتت...

تحياتنا ليك ولي عبدالكريم ولدنا.. أها قصرنا...

هلا ابوكمال
حبابك وحباب ناس بحري الطراوة الملانين دعاش وظرافة
ويعلم الله يا ابوكمال انني زائر دايم لبوستكم العامر عن زكرياتكم في تلكم المدينة العامرة
ونسعد الان ان يكون الاخ عبدالكريم اضافة ثرة حتما ستدفع بالجمال والروعة البحرية..
وما قصرت تب معانا ومع ولدكم
وانشاء الله ياناس بحري نجيكم في السمح والزين

Post: #87
Title: Re: مرحب بالاخ عبدالكريم احمد الامين...!!!
Author: طلحة عبدالله
Date: 08-08-2008, 10:46 PM
Parent: #1

باللخبطة الواحد نسي ظاطو يرحب بالأخ الزميل الجديد عبدالكريم أحمد الامين ..
مرحب بيك كتير يا عبدو ..
الاخ صاحب البوست زميلنا القديم ما وريتنا الأسم الجديد ياخ .
مفلس واللا شنو ..

Post: #90
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 11:40 PM
Parent: #87

Quote: الاخ صاحب البوست زميلنا القديم ما وريتنا الأسم الجديد ياخ .
مفلس واللا شنو

هلا بطلحة عدة
وحبابك والله واليومين دي تقدل واها اقول ليك قولة اسمي الجديد حيكون
(الهلال) عشان كل ما تشوفني اخر المداخلين تجيك كاروشة يا طلحة

Post: #89
Title: Re: مرحب بالاخ عبدالكريم احمد الامين...!!!
Author: Raja
Date: 08-08-2008, 11:33 PM
Parent: #1

مرحبتين حباب عبدالكريم أحمد الأمين يا عبدالكريم الأمين أحمد.

ونتمنى أن يكون قلم وروح مثلك تمام. لأنه حيكون مكسب حقيقي. ويا بختنا

* يا كيكي إنت اليومين دي حكاية التباديل والتوافيق شنو معاك؟
إن شا الله عبدالكريم الجديد يطلع مريخابي وهنا أكيد لخبطة تب ما حتحصل

Post: #91
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-08-2008, 11:49 PM
Parent: #89

Quote: يا كيكي إنت اليومين دي حكاية التباديل والتوافيق شنو معاك؟
إن شا الله عبدالكريم الجديد يطلع مريخابي وهنا أكيد لخبطة تب ما حتحصل

هلا يارجا
وحبابك في مهرجان تباديلي وتوافيقي والاحتفاء بالاخ عبدالكريم احمد الامين..
وديل ناس بحري يا اختي هلالاب بالتاكيد من زمن ابراهومة وجعفر عبدالرازق وكدوس والبرنس
واكيد كريم حيكون هلالابي ..والا ستكون حسرة كبيرة خلاص..

واليومين دي يا رجا حابين نغير اللوك شوية والقصة كلها ماشة تباديل وتوافيق
قبل هلال مريخ كنت مكجن صلاح ادريس وبعد المباراة حصلت توافيق مسمارية فكجنت معاهو فلان طمبل بتاعكم الكيشة ده..
وبرضو كنت مكجن البشير وحصلت تباديل في قناة الجزيرة وجابت لقاء مع غازي العتباني فحصل التوافيق
وكجنت مع البشير غازي صلاح الدين...
كجنت برضو كوستاوي وعبدالمنعم..وهكذا
كل الاشياء اثنين اثنين وانت ياكيكي حبيبك وين

Post: #92
Title: Re: مرحب بالاخ عبدالكريم احمد الامين...!!!
Author: عبدالكريم أحمد الامين
Date: 08-09-2008, 09:56 AM
Parent: #91

العزيز الباشمهندس السمي

هل يعقل لشخص يحمل هذا الاسم الثلاثي بتباديله وتوافيقه "ودا طبعاً بلغتكم الهندسيه" أن يكون دمه يحمل غير اللون الازرق ,, اللون الذي يعشقه اللوردات والملوك والامراء وذوى الصفاء النفسي ومحبي البهجه والحياه ..

أنه الهلال يوجد منه في السماء واحد فقط ,, وما أكثر جوالين شل في السماء فهي لاتُحصي ولاتُعد..

Post: #93
Title: Re: مرحب بالاخ عبدالكريم احمد الامين...!!!
Author: عبدالكريم الامين احمد
Date: 08-09-2008, 06:51 PM
Parent: #92

Quote: أنه الهلال يوجد منه في السماء واحد فقط ,, وما أكثر جوالين شل في السماء فهي لاتُحصي ولاتُعد

هلا يا سمي
وخبرية رائعة كونك هلالابي تعشق قمر الدورين هلالنا الصعب الذي كاستو دهب
ويا رجا العباسي امسكي الخشب بعد ده.