Post: #1 Title: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 08:40 PM Parent: #0
في الفترة ديك واحنا طالعين في الكفر عمرنا عمر الزهور عمر الهناء اولاد نابحين وفاكينها في روحنا (لاعابين) في الكورة وبنجضم ليك اي تيم من طرف تجضيمة شينة خلاص اي صيوان لحفلة في الفريق تلقانا في نص الحفلة قاعدين زي الساوند سيستم اخر رقيص وجنصصة شي (بلو جينز) وشي (كونص) فنايل كيف كيف وقمصان اشكال والوان وحلاقة (كارل لويس) ذااتو يقعد يتحير في الشعر ده جاذنو كيف.. اها في هذه الاجواء العجيبة ومع الجكس الكان بطاقش زي المطر فجاة لمحتها ليك (وقلت بر امن) فبديت اقصص مقص مقصين .خفة دم دمين حنك حكنين وفجاة كده الخط (شبك ياعلي) فالزولة ياجماعة (تخلع) سماحة عجيبة كلو كلو ودم شربات و(خفة دم مببباللغة) ومعاها جدية وحدرة بالعين كده الله لا وراكم ليها قريبات دي….. والامور ولعت وولع فيني انا المسكين (جمر الحي) وبقت ماشة مع اخوكم (اخر حلاوة) والجكس مبسوط وانا مبسوط والاصحاب الحاقدين غايرين (جاتهم داهية ) واخر لقاءت علي طرف البحر مع النجيلة (الخضراء ومكوية) وحبكانة الف وجوابات تجنن (ياحبيبي احنا اتلاقينا مرة) و(حبيبي اها وقلبي تاه في يوم الزيارة) (وما بختلف) والحب صعب ياعلي…وكلام كثييييييييير كلو دعاش ومحبة وصدق ومعنوياتي بقت فووووق في السماء. ونعود.
Post: #2 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 08:43 PM Parent: #1
كورة بجضمها جضيم شديد وزمان كنت في المباراة يادوب اجيب لي قوون ..اها من ما الوريفة الشفيفة خشت حياتنا بقيت في كل مباراة قون قونين دي بتجي زي الترتيب …واتعلمت الاورغن وطلعت كم حفلة والجكس كان بين الحضور فجضمت ليك المزازيك جضيم السنين خليت الجكسوس (يااامن) والدموع نازلة من عيونهاولكن وييييين فالقلب ذهب مع البنية السكرية الشالت النوم من عينا وملت الدنيا فرحة ورفعت معنويات الجيش بتاعي… اها في وسط هذه الاجواء والكرنفالات والبهجة ومعنويات جيشي البقت (فوووووق) في هذه الفترة ويوم مع المغارب ساعة النسمة ترتاح علي دغش وين كده ماعارف وبعد التمرين استحميت (نضيييف) وبقيت ارقش (سراميك) بس وخشيت لي في بلو جينز عجيب وقميص كاروهات زمن الكاروهات (كاروهات) واديتا بخة بختين من دعاش ريحة كده (عجيبة مرة واحد) ..وضايرت الشعر القرقدي مضايرة (بخلال) اصلي ومشيت علي النجيلة وادندن (علي النجيلة جلسنا) فاليوم هو يوم (البرومس) مع الحنان والناس الشداد الشالو مننا (ابو النوم ذااتو) [/blueB]
Post: #3 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 08:47 PM Parent: #2
ومشيت لركن المحبة نجيلتنا محل كل مرة بجي الجكسوس واشبكها ليك نقة (نقن نقن) واقلب زي مليون هوبة واخفف دمي ولا عادل امام وبعد مرات افك ليك بيت بيتين من الشعر الفرمالات بتاعتي الحفظتها بعد تلتلة ديك وفجاءة جات الامورة الشحرورة لابسة المرة دي اخضر لونو (زرعي) فتخيل النجيلة خضراء والجكس لابس اخضر وانا قلبي (بقي ملاح خضرة بس) ومفروض اسمي روحي من اللحظة (خضر بشير) والجكس بتاعي يقلب اسمو(لخضرة وماءو وجه الحسن).. وفي اليوم داك بصراحة رغم الونسة والاخضر (بلومي) الذي توشحت وازدانت به البنية السكرية الا ان قلبي وبالحس الامني والوسوسة يخبرني بان هناك (شي ما) خلف افق قوس قزح بتاع الجلسة الرومانسية دي..!!![/blue]
Post: #4 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 08:49 PM Parent: #3
واها الزمن انتهي الرسمي للجلسة وطبعا وكما العادة كان لازم اقدم البنية واعمل (قدم الخير) اوصلها بالقرب من مضارب خيام بيتهم وبعد داك اكب الزوقة واعمل شتات خالي محطات..ومررنا علي الزقاق الفيهو دكان (عمر طحنية) وفجاءة البت نطت زي العاضيها دبيب (مااااااالك يازولة هييييييي)؟؟؟؟؟ يا كرمة ياهووووو داك (فلاننننننن اخويييييييي) واقف في الدكان...!!!!! اللللللليليلة...(هكذا قلتها دون حرج فلم اكن طيلة فترة علاقتي مع هذه البت الوديعة متخيل بانني ساجد نفسي (فيس تو فيس) اما م اخو جهامة وصدر صبة خرسانة بسسسسس وعضلات (تبش) وهي ذااتها الفقرية ما حكت لي بانها تمتلك مثل هذا الاخ المصارع (الاندر تيكر)..كان الواحد لقي ليهو طريقة او شاف ليهو جهة اخري...) الليلة والف الليلة والزارعها الله تقوم يازول محل ماتقوم..!!!
Post: #5 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 08:53 PM Parent: #4
وشكلوا كده شافنا ياجماعة (الاندر تيكر ده) والليلة يحلا الشبكها والكاسوري شكلوا كده حاصل حاصل والرجال ده الله يكافينا شرو ساكت محال يفهم اني بحب حب عذري واني نبيل شعيل ذااتو وزول بتاع حنك ومزازيك وشعر وكنت اتمني ان يعطيني فرصة للحوار والمفاوضات والمجادلة والنقة... ولكن وفجاءة وانا في قمة (الزنقة) وبقول للبنية طيب (مع السلامة يا فلللللللانة)... ربك ما تشوف الا الخير وتررررررررررررراح كف زي السم (كف دبل جنت) للبنية وواحد خطافييييي كده لاخووووووووكم لكن وين يازول هووووووووي ...!!!!
Post: #39 Title: Re: يوم اتكاسرت مع اخو الجكس ..كسر شديد.!!! Author: محمد عثمان Date: 08-17-2008, 11:04 AM Parent: #5
الاخ عبد الكريم...
موضوع شيّق جدا و مليان فضفضة كان بالصح ولا بالكذب...غايتو حاصل كان ما ليك لغيرك...!!
برااك بتدى خليل فرصة فيك و يجى يسرح بهنا..
تسلم يا حبيب...
Post: #6 Title: Re: يوم اتكاسرت مع اخو الجكس ..كسر شديد.!!! Author: ismeil abbas Date: 08-16-2008, 09:01 PM Parent: #1
ألأخ/عبدالكريم ألأمين
السلام عليكم
Quote: واها الزمن انتهي الرسمي للجلسة
وبديت تلعب فى الزمن الضائع لحدى مارشوك..والله لكن ماقصة..جميلة ورائعة..دى من الواقع المعاش..واللا من الخيال الواسع..
مودتى.....إسماعيل محمد احمد عباس..........
Post: #7 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 09:10 PM Parent: #6
وبديت تلعب فى الزمن الضائع لحدى مارشوك..والله لكن ماقصة..جميلة ورائعة..دى من الواقع المعاش..واللا من الخيال الواسع.. هلا يا اسماعيل حبابك.. ورش ده يا اسماعيل ما بحصل لا في الحقيقة ولا الخيال والقصة مزيج(برنت) ما بين واقع من الزمن الغابر مع شوية خيال بتاع غربة تحن لكل الاشياء التي تشدنا الي الوطن ماضيه حاضره..
Post: #8 Title: Re: يوم اتكاسرت مع اخو الجكس ..كسر شديد.!!! Author: حيدر حسن ميرغني Date: 08-16-2008, 09:11 PM Parent: #7
كيكي كسروه ..
_ بختك ... دي خليل ماحاضرا
Post: #9 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 09:14 PM Parent: #8
Quote: كيكي كسروه
كيكي كسرو وكسر ياحيدر انتظر باقي القصة عشان تشوف باقي السالفة... وفعلا الله يسترنا من خليل مهند ما يجي يلحق لينا البوست ده غنم زهرة
Post: #12 Title: Re: يوم اتكاسرت مع اخو الجكس ..كسر شديد.!!! Author: يسرى صلاح Date: 08-16-2008, 09:42 PM Parent: #9
كيكي ياحبييب
بوست رائع رجع بينا لايام جميله ليتها تعود ويلا ورينا فنونك عايزين العجايز كلهم يخشو هنا وينداحو اكيد الاخدو على راسم كتيرين خلص انتا وبنجيك مع الجماعه بمهل
ابومناع
Post: #14 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:02 PM Parent: #12
Quote: بوست رائع رجع بينا لايام جميله ليتها تعود ويلا ورينا فنونك عايزين العجايز كلهم يخشو هنا وينداحو اكيد الاخدو على راسم كتيرين خلص انتا وبنجيك مع الجماعه بمهل
هلا ابومناع وحبابك الفن والمزيكة النضيفة وفعلا يا يسري ايام لها ايقاع وايام خوالي وكل الناس الدافنةدقن دي عنها زكريات وبلاوي قريبة زي دي واتمني ان ياتي الجميع الي هنا ونشوف السوالف العجيبة دي
Post: #10 Title: Re: يوم اتكاسرت مع اخو الجكس ..كسر شديد.!!! Author: زهير الزناتي Date: 08-16-2008, 09:32 PM Parent: #1
يا هندسة والله اجمل ما كتبت حتي الآن
Post: #11 Title: Re: يوم اتكاسرت مع اخو الجكس ..كسر شديد.!!! Author: khaleel Date: 08-16-2008, 09:39 PM Parent: #10
بنطلون جنز وتي شيرت
زن زن زن زن زن
كضب اليابا عباس ود فاطنة
كيكي الشهير باسامة انور عكاشة
كمان طارح نفسك دنجوان
بعد ما طرحت نفسك محمد حسنين هيكل
ياخي قوم جك
Post: #13 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 09:58 PM Parent: #11
اخر مرة اكتفتت في حياتي الملانة شقاوة دي كان من استاذ (عنتر) لمن ضاربت الالفة بتاع الفصل وابيت يازول امشي للجلد مع المهرجلين...(داك كان كف تاريخي وخلاني الف زي مروحة التربيزة) ومن ديك قررت اني ما اتكتفت باخوي واخوك.... عشان كده مع الكفيتة الوجعتني جوه قلبي للجكس(المسكين) طوالي اتذكرت كف (عنتر الشهير) وعملت ساتر..!!! امشششششششي البيت يا زفت.!!! هكذا قالها الاندتيكر الذي تحول الي مصارع صعب المراس وسيطر علي الموقف سيطرة تامة وقام بطرد المسكينة من (حلبة المصارعة) وانا قلبي يتوجع علي هذا الكف الذي رمي به الزولة الحنينة اللطيفة الكانت قبل شوية اخر حلاوة وبقلاوة.. وكانه يريد الانفراد بالمرمي بالفارة (كريم) ويكسروا حتة حتة ويرقدوا سلطة (والله يستر)..!!! اصحبنا رغم البين مصارعين في حلبة (راس تو راس) وفلاااااااان جهامة الله لا وراكم ليهو ولا دخلكم معاهو في زقاق ضيق زي بتاعي ده....!!!
Post: #16 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:07 PM Parent: #11
Quote: زن زن زن زن زن
كضب اليابا عباس ود فاطنة
اوووووه خلي البلي وتعال علينا جاي وخليك من مهند ولاتركي فرعون بتاعك داك وتعال شوف الكسير في الجكس والكاسوري مع اخو الجكس.. وشكرا يا وريف
Post: #15 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:04 PM Parent: #10
Quote: يا هندسة والله اجمل ما كتبت حتي الآن
هلا يا زهير وحبابك يا مان في يوم الكاسوري العالمي وسوالف الزمن العجيب والف شكر وتحية يا زهير
Post: #17 Title: Re: يوم اتكاسرت مع اخو الجكس ..كسر شديد.!!! Author: khaleel Date: 08-16-2008, 10:11 PM Parent: #15
Quote: اوووووه خلي البلي وتعال علينا جاي وخليك من مهند ولاتركي فرعون بتاعك داك وتعال شوف الكسير في الجكس والكاسوري مع اخو الجكس.. وشكرا يا وريف
متابعين بشغف يا وريف
انا باقي ( زرتك ) بتعجبني
وكان حضرتو كان بقول ليهو (دقو دقاهو البلاء ) كمل حمامنا
Post: #18 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:14 PM Parent: #17
ا الموقف صعب والزنقة تاريخية والكبع حاصل حاصل وكان لازم التفكير في حلول سليمة حقنا للدماء 1- افتح حوار مع الانديكر ده ونحاول نمنطقوا 2-لا نبادر بالاثم والعدوان والهوكات..ونشوف اخر و ونضعه تحت الرقابة لللصيقة لانو زي ده (بنيتو ) بتكون لحام هوك منو تاني الواحد اسبيرات ما ينفع..!ّ!!! 3-تشحد الله يجيب (حجازين) من مافي ويحلوك من الشبكة ده 4-تعمل (ياااااع) وتشتت وكان هذا الخيار خيار مرفوض وغير وارد (هيييييييع) يازول (هوكات هوكات) كبع كبع والرهيفة تنقد..!!![/blue]
Post: #21 Title: Re: يوم اتكاسرت مع اخو الجكس ..كسر شديد.!!! Author: Amira Elsheikh Date: 08-16-2008, 10:21 PM Parent: #18
اسى يا كيكى لو كنت ود بندر ما كان دا حصل
ناس الهامش اصلو جنهم كسر ..
كدا اثبت انك ود هامش صحى صحى ..
انا شمتانة فيك باثر رجعى..
Quote: تعمل (ياااااع) وتشتت وكان هذا الخيار خيار مرفوض وغير وارد (هيييييييع) يازول (هوكات هوكات) كبع كبع والرهيفة تنقد..!!!
عليك الله ياكيكى طلع النصيحة .سمح..
Post: #22 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:28 PM Parent: #21
Quote: اسى يا كيكى لو كنت ود بندر ما كان دا حصل
هلا يا شماتة وزولي الماكن داك يا اميرة الله تعلم زول بندر عااااقل كده يرجاهو وكان الياااااع حصل قبيل في اطار التصرف اللائق... لكن اخوك ثبت كما ثبت فرفر وقلنا البتجي من الاندر تيكر يحملها عاشق الهامش النصيحة كده بتلقي الكلام كلو صرة في خيط (بنية بينة هووك هووك يا اميرة)
Post: #19 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:17 PM Parent: #17
Quote: وكان حضرتو كان بقول ليهو (دقو دقاهو البلاء ) كمل حمامنا
زولك ما قصر يا خليل علا اخوووك عضلات برضو تبش وعروق عجور يا زول هااا
Post: #20 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-16-2008, 10:19 PM Parent: #19
وفي اثناء محاولاتي الجادة لفرض لغة الحوار مع صديقنا (الاندر تيكر) استطاع الماهر اندر تيكر تلحيقي ثلاثة (هوكات زي السم) عينك ما تشوف الا النور هوكات ثقيلة وصعبة البلع وسريع سريع تخليك تشوف الدنيا طشاش طشاش....(وبرضو قلنا خير الراجل اخو الحبيبة اللطيفة) والبتجي من الاندر تيكر يحملها (العاشق الولهان) وحاولنا فرض لغة الحوار مرة اخري الا ان الاندر تيكر تمادي وناول ليكم صحبكم بهوككك رهيب شديد المرة دي بصراحة هووك ما بنسكت عليهو ابدا وغير قابل للهضم ولا بد من الشكل والكبع وان طال السفر ويا اندر تيكر صبرنا علي الاذي الجسيم طويلا معقولة نقيف مكتوفي الايدي ومنزوعي الارادة عشان تكسرنا كسيرة الدريش في العويش....لالالا...!!!
Post: #23 Title: Re: يوم اتكاسرت مع اخو الجكس ..كسر شديد.!!! Author: طارق جبريل Date: 08-16-2008, 11:08 PM Parent: #1
يا هندسة كيفنك (((يخاصم يوم))) دي كيف مه الهوكات دي
Post: #34 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:27 AM Parent: #23
Quote: (((يخاصم يوم))) دي كيف مه الهوكات دي
ياااا دكترة جننت الكاسوري جن...واديتو موسيقي تصويرية ما تتلقي في اي فيلم لافي وانشاء الله تخفف حمي الهوكات المولعة من الدغش دي
Post: #24 Title: Re: يوم اتكاسرت مع اخو الجكس ..كسر شديد.!!! Author: Rihab Khalifa Date: 08-16-2008, 11:29 PM Parent: #1
Quote: تعمل (ياااااع) وتشتت
Post: #42 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:24 PM Parent: #24
:
Quote:
اليااااع ده يا رحاب كان هو الخيار الاقوي في لحظة من اللحظات بالذات بعد لمحة سريعة لضخامة الزول ده وعيونو البقن فجاءة كده حمرررر خلاص وطبعا كان سيتم تركيب مكنة الجامايكي الفاز بال100 متر امس ده وتاني الاندر تيكر ده ياجر تاكسي ما يقدر يلحق اخوك
Post: #25 Title: Re: يوم اتكاسرت مع اخو الجكس ..كسر شديد.!!! Author: esam gabralla Date: 08-16-2008, 11:52 PM Parent: #1
Quote: استحميت (نضيييف) وبقيت ارقش (سراميك) بس وخشيت لي في بلو جينز عجيب وقميص كاروهات زمن الكاروهات (كاروهات) واديتا بخة بختين من دعاش ريحة كده (عجيبة مرة واحد) ..وضايرت الشعر القرقدي مضايرة (بخلال) اصلي
يعنى الحركات دى ما بديتا في الجامعة؟
متعوووووده
Post: #44 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:31 PM Parent: #25
Quote: يعنى الحركات دى ما بديتا في الجامعة؟
الجامعة يا عصااام جيناها مفلعين ومضروبين وضاربين زي ديشليون هوووك كده عشان كده كنا قاعدين نتفرج في حركات اصحابك ناس خليل وابو صلعة ومن لف لفهم من الاتعلموا الشغلانة دي في البركس
Post: #26 Title: Re: يوم اتكاسرت مع اخو الجكس ..كسر شديد.!!! Author: elnawrani margan Date: 08-16-2008, 11:54 PM Parent: #1
كيكى والله لقيتك كتاب لكن!!!!!!!!!!!!!!!!!! بتشديد التاء
Post: #27 Title: Re: يوم اتكاسرت مع اخو الجكس ..كسر شديد.!!! Author: ibrahim alnimma Date: 08-17-2008, 01:33 AM Parent: #26
افق من هذه الضربة اللكمة وواصل ياخي والله ياخي ابداع رائع وامتعتنا جدا مثل هذه الاحداث تواجه الكل ولكن تحويل لعلم ابداعي ساخر هذا هو الاروع ولكن احذر ان تكون في سجلك عندهم شايف اوكامبوا كيف ادخروها ليهو...وطلعت في اليوم الاسود
Post: #49 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:55 PM Parent: #27
Quote: ولكن احذر ان تكون في سجلك عندهم شايف اوكامبوا كيف ادخروها ليهو...وطلعت في اليوم الاسود
هلا يا ابراهيم وشكرا علي حضورك وكلامك الطيب وده المخوفنا ذاااتو يا ابراهيم مع اوكامبو الواقف للملفات بكراع واحدة ده فقلنا نفتها قبل ما يجيبها اوكامبو ونبقي في (واي واي زي الحاصل لناسنا اليومين ديل) وكل الود
Post: #45 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:35 PM Parent: #26
Quote: كيكى والله لقيتك كتاب لكن!!!!!!!!!!!!!!!!!! بتشديد التاء
هلا وحبابك يا النوراني وحبابك وكتاب شنو يا النوراني مع الهوكات الواقعة من صاحبنا الجهامة ده هوووكات زي المطر يا النوراني ياخييي
تسلم وكل التحية علي كلاماتك الطيبة
Post: #28 Title: Re: يوم اتكاسرت مع اخو الجكس ..كسر شديد.!!! Author: شهاب الفاتح عثمان Date: 08-17-2008, 02:38 AM Parent: #1
هــوك من الابداع .. و مسلسل ضحك .. و كوميديا موقف..
انطباعنا عن اندياحكــم..
_______________________________________________
ليتهم يعلمون ان عمر اللحظـه في بعـدك يا خـرطـوم سنين طـوال. د شهـاب الفاتح ـ كـوالالمبور
Post: #29 Title: Re: يوم اتكاسرت مع اخو الجكس ..كسر شديد.!!! Author: سلمى الشيخ سلامة Date: 08-17-2008, 03:55 AM Parent: #28
غايتو يا كيكى حكايا التقول حبوبتك من بربر نوح منك كل يوم تهرينا بالضحك الله يخدر ضراعك ويديك الفى نيتك يازول ياسمح يا كتاااااااااااب بلا يخمك زاتو محبتى طبعا
Post: #30 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 06:01 AM Parent: #29
وطوالي يازول اول شي لحقت الاندتيكر سريع سريع الاربعة(هوكات سريعة) جازفتها مجازفة وسط جسده العالي وعضلاته التبش ونفذت هجمة مرتدة ناجحة (عطا ابو القاسم ) ما يعمل زيها,,, وكده حبايب اربعة (هوكات) لاربعة (هوكات) وكده درون....والكاسوري دور والاندتيكر بصراحة كده جاب فنيات جديدة و بنيو بقت صعبة خلاص ومركز ة وحارة (حقنة ملاريا بس) لكن (شو فيني اسوي) لازم اقاتل واضارب وارد الصاع صاعين واستدعي مخزون الخناقات بتاعتي القديمة التي طال عهدها واضرب يازول لفت رايت وزي ما تجي تجي ومحل ما تصادف تصادف والله يهون بعد داك..... ده نوع الشكلة الكنت تتمني انك شايل (عكاز) ولا يد(ليبر) من الحماقة تفرطق راس الزول الواقع فيك ضرب (دق العيش) ما زيو.. لكن البنية كانت هي سيدة الموقف وتلهث لهث محموم لكي توصل بنيتك رغم قلة (قوة حصينها) الي هذا الاندر تيكر الشرس..الذي لايرحم ولا يترك رحمة الله تنزل ونعود
Post: #31 Title: Re: يوم اتكاسرت مع اخو الجكس ..كسر شديد.!!! Author: Rawia Date: 08-17-2008, 06:14 AM Parent: #30
انا زمــــان قلت ليك شنو؟
Post: #53 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 01:24 PM Parent: #31
Quote: انا زمــــان قلت ليك شنو؟
راووية ياخ تسلمي كثير ...وتاني لو قلتيها حيجوا مرجفين الزمن الجميل زي احمد تجاني ابو صلعة ومن لف لفهم يبلعوني ليها سسسساكت: فخليني عليك النبي عايش علي (انت حلو) بتاعة زمااااااان ديلD
وكل الود والشوق يا راوية
Post: #32 Title: Re: يوم اتكاسرت مع اخو الجكس ..كسر شديد.!!! Author: othman mohmmadien Date: 08-17-2008, 06:31 AM Parent: #30
- عبد الكريم ... ما بتعرف تقول ليه ... بخطبها ... عايز أخطبها ... وتتفك من الاندر تيكر ده ... بعدين السالفة كما قلت مافي داعي تتمها ا ... والله بالجد تزعل .... ما شفت عنتر عمل كيف .... من أجل حبه لعبلة ... والله لو ده أنا لو يذبحني من الأضان للأضان ما أخليه يديها كف .... كيف تخليه يديها كف... طلعت من أبطال الديجتال ... واصل ونحن في شوق لانتهاء السالفة ...و "رواية مختلفة" ... على وزن ... "سينما مختلفة" وشكرنا لخيالك المبدع ...-
Post: #56 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:23 PM Parent: #32
Quote: ما بتعرف تقول ليه ... بخطبها ... عايز أخطبها ... وتتفك من الاندر تيكر ده
هلا ياعثمان.. واقول ليهو عاوز اخطبها يادوبك الكبع زاد والقصة سخنت ياعثمان والزمن داك يعلم الله غير بنطلوني الكونص ده التكتحة ماعندي... وحركات عنتر دي ياها هي ذااتها الخلتنا نقيف ونتظر ام المعارك ونشوف نهايتها شنو وكل الود يا ابوعفان وحبابك والله في سيرة الكبع
Post: #51 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 01:14 PM Parent: #29
Quote: نوح منك
بررية يا سلمي نوح من الاندرتيكر ابو بونية قدوم حجر ده يا اختي
تسلمي يا سلمي وشوق الشوق والله
Post: #50 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 01:02 PM Parent: #28
Quote: هــوك من الابداع .. و مسلسل ضحك .. و كوميديا موقف..
انطباعنا عن اندياحكــم..
هلا يا دكتور وحبابك الف والله.. وسعيد تماما بحضورك للدعم والمساندة في هذا الدواس الجلل وقوول بس يارب
Post: #33 Title: Re: يوم اتكاسرت مع اخو الجكس ..كسر شديد.!!! Author: خالد عبد الله محمود Date: 08-17-2008, 06:31 AM Parent: #1
كيكي ... بطل الدجل ... الحاجة الوحيدة الحصلت ياها دي :-
Quote: -تعمل (ياااااع) وتشتت وكان هذا الخيار خيار مرفوض وغير وارد (هيييييييع) يازول (هوكات هوكات) كبع كبع والرهيفة تنقد..!!
Post: #35 Title: Re: يوم اتكاسرت مع اخو الجكس ..كسر شديد.!!! Author: إدريس البدري Date: 08-17-2008, 09:28 AM Parent: #33
عارف يا كيكي عشت معاك الفيلم ده بي مزاج
بس ياخ الكبع كتر علي ياخ.... أها المخارجة كيف؟
Post: #58 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:32 PM Parent: #35
Quote: بس ياخ الكبع كتر علي ياخ.... أها المخارجة كيف؟
هلا يا ادريس ومشتاقين يا زول والله.. وانا ذاتي يا البدري محتار في المخارجة حتكون كيف مع الهوكات النازلة زي المطرة دي
Post: #57 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:27 PM Parent: #33
Quote: بطل الدجل ... الحاجة الوحيدة الحصلت ياها دي :-
هلا ياابو الخلد يامرجف
وهييييييع ياخالد اخوك ثبت من اول هوووك لحدي اخر هووووك وكلو اخدناهو لباد وجري دي يجيب الهواء وبكرة الفرد بكرهوك البلد كلها والا تتخارج مع باقي الليل داك
Post: #36 Title: Re: يوم اتكاسرت مع اخو الجكس ..كسر شديد.!!! Author: Hala Hassan Date: 08-17-2008, 09:33 AM Parent: #1
كيكى،
دة إسمو، أمانة ما العشق قتتتال (بتشديد التاء)،
والابتدى الدرب، لااازم يدوق هوكات اخرو،،،،
واصل يا وريف.... و طمنا عليك
Post: #37 Title: Re: يوم اتكاسرت مع اخو الجكس ..كسر شديد.!!! Author: خدر Date: 08-17-2008, 10:03 AM Parent: #36
Quote: واديتا بخة بختين من دعاش ريحة كده (عجيبة مرة واحد)
حدد يا مواطن .. البخة طالعة منكـ ولا ماشة ليكـ ؟؟
__ ماتفسد علينا تسلسل الحكايه
Post: #38 Title: Re: يوم اتكاسرت مع اخو الجكس ..كسر شديد.!!! Author: عبدالكريم أحمد الامين Date: 08-17-2008, 10:31 AM Parent: #37
الباشمهندس الرائع السمي
أقول لك هل الهندسه كانت خيارك أم خيار الاسره ؟؟
بعد كل هذه السيناريوهات أكاد أجزم بانك ضللت الطريق ,, ولو غلبت الموهبه علي الرغبه لكن خيارك أن تكون كاتب لاعظم السيناريوهات ,, لك تقديرى وإحترامي علي خياراتك وعلي ما تتحفنا به من روائع فهي زادنا في هذا الزمن الجافي ذا الإيقاع السريع ...
Post: #40 Title: Re: يوم اتكاسرت مع اخو الجكس ..كسر شديد.!!! Author: ممدوح أبارو Date: 08-17-2008, 11:58 AM Parent: #38
كيكي بتاع السبعة ورقات
ضرب أخو الحبيب أحلي من أكل الزبيب وفي روايه أحر من قرص الدبيب
عارف أجمل حاجه تناضل من أجل قضيتك حتي ولو خسرانة
Post: #62 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:54 PM Parent: #40
Quote: ضرب أخو الحبيب أحلي من أكل الزبيب وفي روايه أحر من قرص الدبيب
Post: #61 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:51 PM Parent: #38
Quote: أقول لك هل الهندسه كانت خيارك أم خيار الاسره ؟؟
بعد كل هذه السيناريوهات أكاد أجزم بانك ضللت الطريق ,, ولو غلبت الموهبه علي الرغبه لكن خيارك أن تكون كاتب لاعظم السيناريوهات ,, لك تقديرى وإحترامي علي خياراتك وعلي ما تتحفنا به من روائع فهي زادنا في هذا الزمن الجافي ذا الإيقاع السريع ...
هلا يا سمي وحبابك والف شكر علي تشريفنا الي هذه الساحة ساحة حكاوي وبلاوي الزمن الغابر.. وهي هوايات ونقرشة علي الورق يا صديقي الجميل نجترها كلما اتيحت سانحة من سوانح هذا الزمن الصعب والهندسة يا كريم في ممارسستها تتيح اليك ايضا بعض التاملات في كهنة الاشياء وتتبع التفاصيل حتي المملة منها لذا هي قاسية وشاقة واعتقد بانها تحتاج الي مثل هذه النوافذ لامتصاص سطوتها
وكل الود والتقدير
Post: #60 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:43 PM Parent: #37
Quote: حدد يا مواطن .. البخة طالعة منكـ ولا ماشة ليكـ ؟؟
شنو ياخدر اتصلح معانا نقول ليك هوكات وكبع وكربون.. تقول لي الطالع منك يطلع منك (زي شعر ناس الصادق الرضي ده) يا عالم اتصلحوا واتضامنو معانا في ام المعارك دي
Post: #59 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:37 PM Parent: #36
Quote: والابتدى الدرب، لااازم يدوق هوكات اخرو،،،،
هلا ياهالة ويادوبك الواحد عرف الناس بتقول الدرب ده قاسي وصعيب من اولو وهووكات الله لا وراها لصليح ولاعدو ذاااتو
وحبابك يا هالة وبالله خلي ابو اليسر يكون قريب احتمال الاندر تيكر ده يفتح الموضوع ده تاني فممككن احتاج لهوكات صديقة
Post: #41 Title: Re: يوم اتكاسرت مع اخو الجكس ..كسر شديد.!!! Author: هاشم أحمد خلف الله Date: 08-17-2008, 12:08 PM Parent: #1
رهيب والله يا كيكي بس نصحيتي ليك تبعد من صاحبك خليل ده والله يطير عليك الجكس
طيب الكلام ده كان زمان هسع كيف ؟؟؟؟
Post: #63 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 05:57 PM Parent: #41
Quote: بس نصحيتي ليك تبعد من صاحبك خليل ده والله يطير عليك الجكس
طيب الكلام ده كان زمان هسع كيف
هلا ياهاشم وحسع يا هشام عقلنا وختينا الكورة (واطا).. وخليل يطير الكحل من العين زول وسخوت شديد هااي الرجال
Post: #43 Title: Re: يوم اتكاسرت مع اخو الجكس ..كسر شديد.!!! Author: ناذر محمد الخليفة Date: 08-17-2008, 12:30 PM Parent: #1
Post: #46 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:46 PM Parent: #43
شكلة ليها ضل مع الاندر تيكر ابو النسب العجيب تخليك تكره الحب والشلاقة البخليك تجكس بنات اخوانهم (بنيتهم) لحام زي صاحبنا الشبكة ده وتواصل القذف المتبادل بنية وراء بنية وهوك ياتي م ن حيث لا يحتسب وبنية تفكها انت مطرح ما( تسري تمري) والدشمان نارو ولعت في السماء.... وفي لحظات الضعف والهوكات الاندرتيكرية الرهيبة (بينك وبين نفسك تقول يا ربي البلد دي ما فيها حجاز ولا شنو).. ياخ ديك هوكات انا ماعرف الزول ده (ما عندو رحمة في قلبو ولا مامومن عديل كده...كافر ياخييييي)..!!! ونحن في عز الضرب و الكبع المتبادل كنت حريص وحسب خبرتي بتاعت الشكل حريصا تماما الحرص علي عدم الاقتراب من الاند تيكر ده كثيرا..(تفك بنيتك وتبعد علي الاقل مترين) لانو زي صاحبي ابو النسب ده لو مسكك كربون تاني موضوعك بايظ (وبموتر قريدر ما تتحلا) يلحقك (سيدو) المصارع العجيب الذي قيل انه متخصص في هذه الحركة الرهيبة التي تتيح للمصارع وضع رقبتك ثم توجيه ضربات للراس بعدها موضوعك بكون بايظ ورغم محاولات الاندر تيكر تطبيق هذه الحركة وحسم هذه الجولة لصالحه بالكربون القاضي الا انني كنت اردد في سري ويييييييين يا اندتيكر (الكربون ده تلقاهو عند الغافل)...!!!!
Post: #48 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 12:49 PM Parent: #46
ودار الكاسوري دورات وجولات كرا وفرا ومرة هوكات ومرات لبع وكبع فجاءة كده ربك رب الخير يجيب لينا حجاز من عدم (والحجازين ديل بقوا صعبين ونادرين اليوم داك) عمك (فتريته) الزول المحترم الكلمتو مسعوعة في الفريق جابتو السكة (عفارم عليك يا عم فتريته) يا احسن حجاز في الشرق الاوسط يا رجل النوايا الحميدة المبادرات التي تجي في وقتها(لاني بصراحة فتريتة ده لو اتاخر شوية كده اندتيكر ده كان لحقني غنم زهرة)... كنت حريص ومبسوط وفاكر عمك (فتريتة) اول الواصلين الي مكان (الكبع) ومتخيل مافي زول تاني شاف الحاصل يقوم كمان (يفك الشمار) ويولع في الفريق انو الاندتيكر كسر كروومة كسر ثقيل ..ولكن ظني خاب لمن كحلت كده بالجنبة ولقيت عمك (عمر طحنية بتاع الدكان) ماخد ليهو كورنر زي السم وبتفرج في الكاسوري وشكلو كده متكيف.. اهههههها منك يا طحنية ياجبان يا رعديد عينك من قبيل في الدفس والهوكات تتطاقش والبنية مدورة وعامل لبتون وتتفرج يا طحنية يا جبان يا الذي قاعد تبيع السكر بالسوق الاسود وتحت تحت قالوا بتبيع (بنقو) ذاتتو اصبر لي يا طحنية بنظمك..ياجبنة يا متامر مع الاندر تيكر
Post: #47 Title: Re: يوم اتكاسرت مع اخو الجكس ..كسر شديد.!!! Author: عبدالله شمس الدين مصطفى Date: 08-17-2008, 12:48 PM Parent: #43
اها واصل يا كيكى، رغم إنه معلوماتى بتقول إنك ما حضرت نهاية قصتك دى لكن حكوه ليك
فاعل خير قال لى كيكى من الهوك التالت أغمى عليه لمن جبنا ليه كوز ليمون بعد ما جريناه على الضل على حسب رغبته رغم انه الدنيا كانت ليل يستر الجبال ، وقالوا لى عيونك كانت بتلمع يومها زى فلاشات الكاميرا الكانون .
Post: #65 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 06:05 PM Parent: #47
Quote: اها واصل يا كيكى، رغم إنه معلوماتى بتقول إنك ما حضرت نهاية قصتك دى لكن حكوه ليك
هلا يا عبدالله... ودي اشاعة مقرضة واحتمال يكون طلعها صحبك ملاسي (ما معروف زاتتتو) اخوك كان حاضر موية ونور وتركيز علي من(اي تو زيت).. وكل الاحداث بكامل الوعي حتي اصعب الهوكات امتصينها بكل تركيز
Post: #64 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 06:01 PM Parent: #43
Quote: أخو الغزالة يبقى ليك شنو ؟
اخو الغزالة شنو ياناذر اخوك لو ما خايف الفضيحة كان هو زاااتو ركب مكنة غزالة وشتت شتات خالي محطات من الهوكات دي
وبالله يافردة انت برضو خريج مدرسة الهوك الاخو غزالية
Post: #52 Title: Re: يوم اتكاسرت مع اخو الجكس ..كسر شديد.!!! Author: Mohamed Ibrahim Ahmed Date: 08-17-2008, 01:15 PM Parent: #1
الباشمهندس المبدع كيكي لأول مره أتداخل معك رغم إنني أتابع جل ما تكتب وكما قال من سبقني فأنت أديب ضل طريقه للهندسه ... وأصل وأستمر وستجدني بحول الله من المتابعين حيث العفويه والتلقائيه في السرد وتسلسل الأحداث يجعلك كمن يجلس في قاعه سينما. سؤال صغير الريحه الأخته منها بخه بختين كانت ونمان شو ولا جامبت
Post: #54 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 04:36 PM Parent: #52
رغم الحضور المفاجي للحجاز الذي لايمكن ابدا ان ينال عكاز (عمك فترتيه) ديل الحجازين يا بلاش مهما كانت شكلتك بتضمن تماما ان الحرب ستضع اوزارها وترفع الرماح والسيوف بكلمة حاسمة (يا ووووولاد ده شنو ..ده) احبك يا فتريتة وبس لوتديني جانص يا( عمك) ارد علي الجاسو س ده الكم (بنية) المافيها رحمة دي.... بقدر ما ابهجني وسر بالي حضور (فتريتة) رمز السلام والنوايا الحميدة (الاخضر ابراهيمي) انا كنت عارف الخضرة الدورت في النجيلة دي الليلة بتجيب خبري الا انني ومع الانهاك والتعب والكبيع الحاصل زعلان شديد لموقف (عمر طحنية) المتواطي الذي كان نموذج للمشاهد (السلبي)..عينو في الكبع والكاسوري عجاجو في السماء وعامل فيها (ميت) وماخد كورنر يتفرج..... اصلو انا من زمان (مكجن) طحنية ده..وسمعت تحت تحت انو بيع السكر بتاع الفريق في السوق الاسود وكمان الليلة مع الزعلة دي اطلعوا ليكم بتاع (بنقو) ذاااتو.. ونعود......!!!
Post: #66 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 06:14 PM Parent: #52
Quote: الباشمهندس المبدع كيكي لأول مره أتداخل معك رغم إنني أتابع جل ما تكتب وكما قال من سبقني فأنت أديب ضل طريقه للهندسه ... وأصل وأستمر وستجدني بحول الله من المتابعين حيث العفويه والتلقائيه في السرد وتسلسل الأحداث يجعلك كمن يجلس في قاعه سينما. سؤال صغير الريحه الأخته منها بخه بختين كانت ونمان شو ولا جامبت
الف تحية ومرحب بيك يا محمد ابراهيم.. وقبل كلو شي نخلينا نرحب بيك في هذا المكان ونتمني ليك اقامة سعيدة.. وشكرا علي حديثك الطيب واتمني دوما ان اكون علي قدر العشم وانال رضاكم.. والريحة يا محمد كنت متذكرها لكن مع سيرة الهوكات دي طارت من الراس زاتتو وكل الود والف مرحب بيك يا ابوحميد مرة اخري
Post: #55 Title: Re: يوم اتكاسرت مع اخو الجكس ..كسر شديد.!!! Author: waleed dawash Date: 08-17-2008, 04:38 PM Parent: #1
Quote: اها واصل يا كيكى، رغم إنه معلوماتى بتقول إنك ما حضرت نهاية قصتك دى لكن حكوه ليك
فاعل خير قال لى كيكى من الهوك التالت أغمى عليه لمن جبنا ليه كوز ليمون بعد ما جريناه على الضل على حسب رغبته رغم انه الدنيا كانت ليل يستر الجبال ، وقالوا لى عيونك كانت بتلمع يومها زى فلاشات الكاميرا الكانون
عبدالله شمس الدين
ياخي ما عارف ليه جاني احساس بنفس كلامك الفوق ده..
غايتو الله يكضب الشينه.
لكن يا كيكي شايفك بقيت تمشي و تجي وانت واقف في
حتة الهوكات دي ..لاقادر تواصل لا قادر تزوغ...
تضامنو مع الاخ كيكي في محنته.
Post: #67 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 06:18 PM Parent: #55
Quote: لكن يا كيكي شايفك بقيت تمشي و تجي وانت واقف في
حتة الهوكات دي ..لاقادر تواصل لا قادر تزوغ
هلا يا وليد وابشر يا زول فرجت تببببب وعمك فتريتة الحجاز التاريخي واحسن حجاز في الشرق الاوسط وصل الي ارض المعركة والاوامر ماشة في طريقها للانفراج
وبعدين عبدالله ده ما تسمع كلامو كثير الراجل بقي بتاع لفحي ولفحي من ملاسي ومن لف لفه كمان
Post: #68 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 07:24 PM Parent: #67
عملت جرد سريع للمخلفات في المعدات والارواح التي تباينت ما بين (ورم) في الشلوفة الامامية (بقاها كيلة وملوة) علي العليها وفلعة سلاخية كده ناتجة عن (هوك من الهوكات الثلاثية الابادة في بدايات المعركة الرهيبة دي..!!!! وبعد فحص سريع لحالة الاندرتيكر حتي يطمئن قلبي علي اختبار الكفاءة والمقدرة الشكلية بتاعتي لاحظت ايضا ان هوكاتنا احدث ورما (ما بطال) في العين اليسري للشرس الاندر تيكر وكم خربشات مجدعة في اماكن متفرقة من وشو (الشايفو) انا اليوم داك (زي الكبك) واكعب.....!!!
فتريتة نزع فتيل العراك وتحرك كل (قرد منا ) الي حاله وانا حاسي بغصة وحزن ليس لحالي الذي لايسر عدو ولا صديق ..بل لحال الوريفة ال الليلة الله قال بقولها في البيت لمن (الاندرتيكر ده يرجع ليها في البيت)...ياخ ده انا العامل فيها فصيح ده (جهجهه) دفاعي, باقي ليكم زولتي الوديعة المسكينة دي الليلة (كيف يكون الحال)... وفي الطريق وانا مقطع القميص الكاروهات والزراير (رقدت هبطرش) قطعها الاندر تيكر قطع الله موينه وكهربته.. وانا في الطريق قعدت اتخيل بنيات الاندرتيكر الرهيبة دي واقعة في الجكسوية و وحال امها المسكينة التي تسرب الي جلسات الخضراء بانها تعاني من الضغط (اذن الليلة ميتة وخراب ديار) (دق جكس وموت ام) وكل السبب هو قلبي العامل زي االلكونده ده,,وبديت احاسب في روحي واوبخها توبيخ السنين..
Post: #69 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 07:29 PM Parent: #68
اها في داعي لجنس ده حسي ضلوع البنية تتكسر والام الضغط يجيب خبرها وانا كان مالي ومال البنات الملانات مشاكل ديل (اخو عضلات تبش) وام ضغط واحتمال سكري وشكلة انتهت الي ما انتهت عليه من ورم شلاليف وحضور مخفي للزول بتاع الشمارات (عم طحنية) الخشمو خفيف وطبعا بكرة حيوزع الشمار التقيل لكل محطات البث الارضية والهوائية وشوف ياجبنة وهاك يا ودع وهاك يا قرقرة (يقرقرنك السم يا ناس عوضية شرقرق)... شاحد ربي الخبر ده ما يصل عوضية (شرقرق) طبعا حتدي القصة توم وشمار تقيل وتعمل دبلجة وتغير في السنياريو بتاع الاكشن واحتمال تغيير الفيلم ذااتو والممثليين)...وكان وانا في طريقي ملي بالهموم ورغم اني حمدت الله علي العواقب التي جات شبه سليمة..وخروجنا سالمين معافين من معركة مع زول (فيل) زي ده كانت مكسب كبير لقوي الحب والسلام في كل العالم...
Post: #70 Title: Re: يوم اتكاسرت مع اخو الجكس ..كسر شديد.!!! Author: Abdel Aati Date: 08-17-2008, 07:52 PM Parent: #69
عجيب والله
ليه الناس دي شرسة كدا ؟؟؟
Post: #72 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:08 PM Parent: #70
Quote: ليه الناس دي شرسة كدا ؟؟؟
شفت ياعادل السادية دي كيف.. عالم لا بتحترم القديس فلنتاين لا سيرة عطيل ولاحتي ناس عمك امرؤ القيس وطوالي واقعين في الناس هوكااات من طرف
Post: #71 Title: Re: يوم اتكاسرت مع اخو الجكس ..كسر شديد.!!! Author: ASHRAF TAHA Date: 08-17-2008, 07:52 PM Parent: #1
Quote: وكم خربشات مجدعة في اماكن متفرقة من وشو
ليه؟ إنت كُنت شايت (ضفاري)
Post: #74 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:12 PM Parent: #71
Quote: ليه؟ إنت كُنت شايت (ضفاري)
ضفاري اييه يا ابو اشرف...!!! الراجل شكلو كده مدرب بوكس وعندو خبرة ميدانية كبيرة وبعرف بغطي اللعب كويس.. فلذا كان لابد من ابتداع طرق قتالية جديدة توصل بيها هوكاااتك
Post: #73 Title: Re: يوم اتكاسرت مع اخو الجكس ..كسر شديد.!!! Author: ابراهيم ابوسمرة Date: 08-17-2008, 08:09 PM Parent: #1
يا كيكي انت وصلت حتة نشر الغسيل والله يا خليل حقو تلحقو انا عارف الحالة صعبة لكن ما للدرجة دي وبعدين انت احمد التجاني دا جاك هسع ولا بقيت تحلم بيهو زي ود الاسد مع الاصم
Post: #75 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:18 PM Parent: #73
Quote: يا كيكي انت وصلت حتة نشر الغسيل والله يا خليل حقو تلحقو انا عارف الحالة صعبة لكن ما للدرجة دي وبعدين انت احمد التجاني دا جاك هسع ولا بقيت تحلم بيهو زي ود الاسد مع الاصم
اووووه ابو سمرة وطبعا انت يا وريف الهوكات دي شغلتك بتعرفها كويس عشان كده جريت جاااري وياصديق مافي نشر غسيل كده لمن يتونسو بيهو واهو بنسولف بحكايات حصلت زمااااااااااان يا ابو سمرة رفعت عنها السرية زي دي حتي طه النور بكون ما سمع بيها في ليالي البركس العجيبة ديك (دس كورة وكدا).. وبعدين احمد تجاني ده ياخي بقي فقر جدا ياخي. كلاماتو كلها فاكة الدرب فعشان كده بقيت عندي ام هلا هلا اسمها احمد تجاني ابو صلعة
Post: #76 Title: Re: يوم اتكاسرت مع اخو الجكس ..كسر شديد.!!! Author: khaleel Date: 08-17-2008, 08:29 PM Parent: #75
Quote: والله يا خليل حقو تلحقو انا عارف الحالة صعبة لكن ما للدرجة دي وبعدين انت احمد التجاني دا جاك هسع ولا بقيت تحلم بيهو زي ود الاسد مع الاصم
ابو سمرة
والله الزول دها
حيرنا
بعد ان طرح نفسه كسياسي لا يشق له غبار
المرة دي طارح نفسو دنجوان وزي ما قالت حبوبتي
(البلقي هبوبو بضري عيشو )
Post: #77 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:42 PM Parent: #76
Quote: البلقي هبوبو بضري عيشو )
هبوب شنو انت كمان يا ابوخليل اقول ليك هوكاات وكبع تقيل تقول لي عيش ولاعرقي عيش ماعارف..!! كدي خلينا في المهم وخلينا نقيم الموقف
الا ان الهواجس لازالت تتمحور في الاتي 1- التفتيش المنزلي للحاجة (جاي من وين..وشلوفتك دي مالها مورمة كده..وقميصك ده مالو زاريرو مقطع) وسوال منكير ونكير وما تعرف تتخارج كيف من المحاصرة الرهيبة دي.. 2-حضور عمر طحنية صاحب الخشم الخفيف وعواقب (يوم بكرة) واول مرة تتمني انو يوم بكرة ده ما يجي كلو كلو 3- الكسر الذي في انتظار الوريفة وخوفي علي حاجة نفيسة من الموت والعقاب الضميري 4-هاجس (عوضية شرقرق) ومعرفتي العميقة بامكانياتها الشمارية ومقدرتها علي توضيب الاحداث وزيادتها موية لدرجة تجعل (اجعص) جعيص يصدقها....
Post: #78 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 08:46 PM Parent: #77
كل تلك الهواجس والهموم قررت اني اداهم (عبس) صديقي وكاتم اسراري والاستشاري الذي لايشق له غبار ولا يتواني في تقديم النصح والارشاد رغم طولة لسانه وزهجه الدائم وتندره من كل الاشياء فكان القرار..هو كنغ كنغ ضرب متوجس علي باب بيت ناس (عبس) صاحب الجغرافية المطرفة من ذلك الفريق..!!! مرحب شنو جاييينا بالليل ده يا زول انت حرامي ولاشنو ولا ما عندكم عشاء في بيتكم..؟؟؟؟ هكذا قالها عبس وهو لا يهتم لدخولي السريع في ذلك الظلام الدامس..؟؟ ياخ دقيقة عشاء شنو وحرامي شنو..!! انا ياعباس اتكاسرت مع (اخو فللللللانة كسر شديد)..!! اخووها منووووووو اوع يكون (عمر هوك)..!!![/BLUE]
Post: #79 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 09:07 PM Parent: #78
هنا نهض عباس سريعا واقام تفتيش سريع للراس والضلوع وهو يرتجف خوفا ورغم كل شي لقد كان (عباس طرمبة) هو صديقي وفردتي ودوما هو طيب القلب واخو اخوان ...!! وهز عبس راسه وقال لي يازول انت متاكد انو اخوها ده ياهو المفتل وطويل داك..؟؟ ياخ يا فردة والله انت لو ما مت من هوكات (عمر هوك ده) تاني موت ليك مافي تاني قريبات دي.. ياخي عمر هوك ده الله طلعك منو ساكت وانت زول جسمك قوييي ساكت والظاهر الله بريدك..!! لاني شفتو مرة في السينما كسر ليهو 4 شباب كبار ومكان ورقدهم سلطة الله نقلوهم ببوكس راقدين هبطرش للطواري وسبعة يوم راقدين في الانعاش....!!
Post: #80 Title: Re: يوم اتكاسرت مع اخو الجكس ..كسر شديد.!!! Author: Abdel Aati Date: 08-17-2008, 09:14 PM Parent: #79
Quote: وهز عبس راسه وقال لي يازول انت متاكد انو اخوها ده ياهو المفتل وطويل داك..؟؟ ياخ يا فردة والله انت لو ما مت من هوكات (عمر هوك ده) تاني موت ليك مافي تاني قريبات دي.. ياخي عمر هوك ده الله طلعك منو ساكت وانت زول جسمك قوييي ساكت والظاهر الله بريدك..!! لاني شفتو مرة في السينما كسر ليهو 4 شباب كبار ومكان ورقدهم سلطة الله نقلوهم ببوكس راقدين هبطرش للطواري وسبعة يوم راقدين في الانعاش....!!
لا دي لذيذة ...
صاحبك رفع معنوياتك والا انت اسا بترفع معنوياتك - على حسابنا - .
Post: #83 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 09:26 PM Parent: #80
Quote: صاحبك رفع معنوياتك والا انت اسا بترفع معنوياتك - على حسابنا -
عادل بالله براحة علينا ياخي انا القاها منكم ولا من عباس طرمبة ولمن عمر هوووك شخصيا المعنويات قبل هذه الحادثة ساعتها كانت فووووق ولكن بعد مساخة عباس دي والعكة اياها القصة ساعتها نزلت بورصتها نزول تاريخي
Post: #81 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 09:17 PM Parent: #79
هنا كرهت ليك عباس طرمبة واليوم اللماني في جنس اصحاب زي ناس عباس طرمبة..ديل وكوركت فيهو بكل غضب (طيب يا فقر لمن كنت انت يا زفت عارف انو البت دي اخت عمر هوك) ده ليييييه يا عباس عامل (ميت) وما عاوز تباصي لي المعلومة دي...!!؟؟؟ ليييه يا طرمبةياحاقد..!! اوريييييييك هنا نطط عباس عيونه وتقمصته روح الخبث الذي اشتهر به (طرمبة).. ما كنت عامل لينا فيها (قيس ابن منو كده ماعارف)..!! وفاتح لينا فتح السنين وعامل مهم وسلطان (برناوي* ظاااااتو).. ياكرمة ارح معانا الحفلة في فريق (زنقو)..!! وبترد لينا لالا يا وهم انا لو بمشي مع زيكم ديل كان جكس زي ده طفش من زمان.. يا وهم ..!! ياكرومة بكرة الهلال والمريخ لعبين تعال احضرها معانا.. هلال ومريخ واحضرها معاكم انتو ياوهم انا يا فارات بكرة عندي (برومس ) من الجكسوية في النجيلة اقعد اتلهي معاكم عشان اتفرج في برشم وجلال كادوقلي ياوهم وفي خلقكم الجايبة لينا الفقر دي..!!!
Post: #82 Title: Re: يوم اتكاسرت مع اخو الجكس ..كسر شديد.!!! Author: ابراهيم ابوسمرة Date: 08-17-2008, 09:23 PM Parent: #1
عباس ماث وعرفناه عباس جاز وشفناه عباس طرمبة ده ....جبتو من وين
الظاهر يا خلي انو كدة التهميش خلاص والجاي احلى
وقول يا كريمو تاخد البريمو
Post: #84 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 09:39 PM Parent: #82
Quote: عباس طرمبة ده ....جبتو من وين
هلا يادفعة واقول ليك عباس طرمبة يا ابوسمرة تقول لي عباس رب الجاز ولا عباس ماث الجلكين داك ده عبس طرمبة رائد الدهشة في فريق وراء وزينة شبابه ولو كان لحق جاكم في الهندسة دي يا ابوسمرة يخرتكم(ماث وجكس وكلو) الا عبس راسو قوووي وركب الحديد ده وبقي اشهر ميكانيكي في الهامش الان
وشوق يا ابي سمرة ولايمن صحبي ياخ
Post: #87 Title: Re: يوم اتكاسرت مع اخو الجكس ..كسر شديد.!!! Author: Mutwali Malik Date: 08-17-2008, 10:59 PM Parent: #84
كيكي صديقي الذي ضل طريقه الي الهندسة ذكرتنا ايام معيط النجيلة الله يديك العافية وليك هدية بت هندسة
< width="425" height="344">
Post: #88 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 11:07 PM Parent: #87
Quote: كيكي صديقي الذي ضل طريقه الي الهندسة ذكرتنا ايام معيط النجيلة الله يديك العافية وليك هدية بت هندسة
هلا بالفردة متولي ومشتاقين والله.. ووينك يا وريف لابد اليومين دي وبقينا نمشي نفتش ليك حتي في موقعكم بتاع الجالية وبرضو ما لاقنك بهناك.. وشكرا علي بت هندسة... وزكريات معيط النجائل يا لها من زكريات يا متولي وتحياتي وبيننا سلك قريبا باذن الله
Post: #85 Title: Re: يوم اتكاسرت مع اخو الجكس ..كسر شديد.!!! Author: طارق جبريل Date: 08-17-2008, 10:44 PM Parent: #1
انت يا هندسة بعد ورم الشلاليف دة والهوكات والزراير الطارت دي دحين ما تبنت بنطلونك تحت كدي لا يبقى لين شي
Post: #86 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-17-2008, 10:53 PM Parent: #85
هلا ياطارق ولايا دكترة ما حصلت القصة للدرجة دي .. ورغم الخسائر الاوردناها فوووق دي الا انها هنالك ليس خلعة او رجفة بهذا المستوي المعركة مهما كانت فانها كانت (مان -تو -مان)
Post: #89 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 06:42 AM Parent: #86
هكذا وجد الرعديد عباس طرمبة فرصته التاريخية لممارسة الغلغلة واخد حقوق كل الشلة بالكاش وسرح ومرح في فنيات غلغلته وافتي ضاحكا بانهم في احدي جلساتهم الليلية قدام محل الفول قد تناولوا هذا الامر (امري) مع اخت عمر هوك والاراء التي طلت بضرورة التحذير حتي اخذ الحيطة والحذر من الموضوع واعمل حساب لمقصات (هوك) التي يمكنها ان تطل في اي لحظة ولكنه افتي بان هنالك بعض الاصوات بقيادة (حسن كبريتة) افتت بان يترك هذا الفارة ياكل نارو وكنت عارف بان حسن كبريتة صحبي اللدود قادر علي اقناع حلة كامل بخبثه ودهائه وافكاره الشيطانية وبالتاكيد بكرة حيعمل بارتي وحيدق صفائح تقيلة وحيكرهنا الدافوري والعشاء وعييييك ومن الصعب اقناعه بان جولات الهوكااات كانت (متكافئة) وسيعمل سنين طويلة علي هذا الهدف الاستراتيجي بمرحه الرهيب ومقدرته العالية علي توضيب الاحداث…!!
Post: #90 Title: Re: يوم اتكاسرت مع اخو الجكس ..كسر شديد.!!! Author: haroon diyab Date: 08-18-2008, 06:54 AM Parent: #1
كيكي ياجميل صباحك جميل
اخو الجكس ده نظام من اجل عين تكرم الف عين
لكن الهكروك وسامحوك مع ملاسي دي نظام تااااني
ماتقول لي نيران صديقة......!
حسع تاني ملاسي يمسك فوقه ويقول ليك ماجيت اعتذرت
ويجيب ليك الرابط والله بعد داك الا نشمت فيك ناس مستورة بت قنيرة عوضية رتينة وتلوشة ملك التلاليش
لقيتني كييييييييييف .....؟ مذاكر كويس .....؟
سلام ياعمك هارون دياب
Post: #91 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 07:19 AM Parent: #90
Quote: اخو الجكس ده نظام من اجل عين تكرم الف عين
لكن الهكروك وسامحوك مع ملاسي دي نظام تااااني
هلا يا سكورتا وصباحتك ورد وتخيل ياهارون انا ارجع تاااااااني لعمر هوك ده واتضارب معاهو سنة كاملة ولا البوست الشين ياااخي بتاع الهكر الرعديد ده..
ولكن صدقني الهكر ده اخوك حيدخلو اللستة الذهبية طوالي وسيبقي المطلوبيين 1- ملاسي 2-الهكر 3-بشاشا 4- عمر هوك. 5- واحد اخونا كده داير ليهو جمعة جمعتين كده ونعلن اسمو علي طريقة لستة اوكامبو
Post: #92 Title: Re: يوم اتكاسرت مع اخو الجكس ..كسر شديد.!!! Author: Hala Hassan Date: 08-18-2008, 08:21 AM Parent: #1
Quote: ورغم محاولات الاندر تيكر تطبيق هذه الحركة وحسم هذه الجولة لصالحه بالكربون القاضي الا انني كنت اردد في سري ويييييييين يا اندتيكر (الكربون ده تلقاهو عند الغافل)...!!!!
كيكى، خبرة بالكاسورى.....:D
منك يا كيكى، تعمل كورسات و تعلم الناس كيفية تلافى الهوكات الخطافية....
لكن خبرتك دى كانت محتاجة tools فكيتها فى عمك طحنية ساكت بس،
أحمد الله، الحجاز وصل فى الوقت المناسب،
Post: #93 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 09:22 AM Parent: #92
Quote: تعمل كورسات و تعلم الناس كيفية تلافى الهوكات الخطافية....
لكن خبرتك دى كانت محتاجة tools فكيتها فى عمك طحنية ساكت بس،
هلا يا هالة وفعلا الواحد مفكر يعمل ورشات متجولة عن (الية تفادي الهوووك الناري...هوكات عمر هوووك نموذجا) ويحوم بيها البلدان يعلم الناشئين ده لو الكبار ما كابسونا فيها كمان وبعدين طحنية ده زول جبان ورعديد ودقيقة بس الافضاء ليهو عشان اكرهو ليك الفريق والدنيا ذاااتها وتحياتي يا هالة
Post: #94 Title: Re: يوم اتكاسرت مع اخو الجكس ..كسر شديد.!!! Author: Ahmed musa Date: 08-18-2008, 11:56 AM Parent: #1
والله يا عبدالكريم ياخوي ما تصدق إنيّ إتعاطفت مع القصة قدر كيف ؟؟؟ ما إتعاطفت معاك ... ولا مع أخو الجكس ... مع الجكس إحتمال ...لكن المؤكد إني أنا واللابتوب إتعاطفنا مع القصة ... كيف ما عارف !!!! ... المهم لدرجة أحياناً كنت بقش بقع دم من اللابتوب ما عارفة إسقاط خيال القصة علينا ولا دموع اللابتوب ... يازول لي قدام ونحن (أنا واللابتوب) متابعين ....
Post: #95 Title: Re: يوم اتكاسرت مع اخو الجكس ..كسر شديد.!!! Author: khaleel Date: 08-18-2008, 12:16 PM Parent: #94
احمد التجاني
يا زول تعال ربط الزول دها
انا غلبني خلاص
Post: #96 Title: Re: يوم اتكاسرت مع اخو الجكس ..كسر شديد.!!! Author: Mutwali Malik Date: 08-18-2008, 05:24 PM Parent: #95
كيكي الفردة مابراك المكسر وهذا هو شاعرنا ابن امدرمان الراحل المقيم صلاح احمد ابراهيم مكسر معاك بالله هل ... شفت الورد في باقة ماشي وفي شفافيو بيندي طل او لمحة من شباك اطل شباكو شيش ياقلبي دق لكن بشيش لا ينفضح للناس هواك قول ليه ناشدك من هناك شايلني ليك براق شلع عبادي شققني الاراك دوخ شذاه الفجري من الاتبراوي لحد جبيت وقفني فوق جبل اركويت قال لي دير عينيك تحت شوف السما النزلت وعامت في البحر خذ ليك نفس املأ شعاب رئتيك بشر واسجد وطوف من بيت لبيت تلقى الامل بالفرحة قوم ليهو ريش اهدي الجواهر والحرير بنت الامير شقيانة في الحر لابسة خيش نقرش قليبك بس بشيش كم فيهو قاطع ليك وتر قل للملاك وقتين سفر سيد مهجتي الما ساد سواك جاييك اموت مرتاح حداك سميهو حب، سميهو جن ، سميهو طيش اموت وتسلم لينا يا غالي وتعيش اموت لبسمة تضوي في الثغر الجميل زي نيل تبهرج بالقمر الرملة والقيف والشدر ليلك طويل بالغربة جاريها السهر مانسيت مواثيقنا القبيل اصدح بفرحتنا القلوب تصدح معاك واموت وفي شفتي غناك قرقورة لاصقة على الحجر عصفورة ضاميها الوكر مطمورة فضت ليها عيش شبورة نازلة على الاراك شبورة نازلة على الحشيش وياقلبي دق لكن بشيش
Post: #100 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 06:44 PM Parent: #96
Quote: شوف السما النزلت وعامت في البحر
هلا يا فردة.. وصلاح شاعر كبير وتاريخي وشوف بالله كدي السما النزلت وعامت في البحر دي... حكاية عجيبة ورهيبة وشاعرية رومانسية ...
والتكسيرة دي يا فردة بعض مرات اخير منها الصقعة لانها بتجيب كلامات خطيرة زي دي
Post: #98 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 06:39 PM Parent: #95
Quote: انا غلبني خلاص
شنو يا بوخليل رافع الراية ومغلوب سريع كده خباااارك رجعت الهلال تاني ولا شنو..؟؟
وبعدين احمد تجاني ابو صلعة ده مربوطة ناجي ما يربطها معقول يربطني انا ده...
مربوطة ناجي دي مربوطة ناجي صديقنا وزملينا سمي مربوطة وبعد ده اخد سيييييك في قبولو
Post: #97 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 06:34 PM Parent: #94
Quote: يازول لي قدام ونحن (أنا واللابتوب) متابعين ....
هلا يا ابوحميد وحبابك وحباب لابتوبك في سيرة الكبع والكاسوري العجيب ده والف تحية وشكر علي التفاعل ... وياخي كان علي الاقل واحد فيكم انت او اللابتوب يتضامن مع اخوك المسكين ده وكل الود
Post: #99 Title: Re: يوم اتكاسرت مع اخو الجكس ..كسر شديد.!!! Author: خالد عبد الله محمود Date: 08-18-2008, 06:42 PM Parent: #1
كيكي ....
ياخ شابكنا الأندرتيكر...الأندرتيكر لمن قلنا الزول ده فيل بس .... لكن مشيت قوقلتو ليكـ و لقيت ليكـ صورتو ....
Post: #101 Title: Re: يوم اتكاسرت مع اخو الجكس ..كسر شديد.!!! Author: عبدالله شمس الدين مصطفى Date: 08-18-2008, 06:59 PM Parent: #99
Quote: (أنا واللابتوب
إنتا معليش يا أبوحميد لكن اللابتوب ده خلى بعيد، اللابتوب ده قرررب يلحق ليك كيكى أمات طه، ويخليه ينضم لمعسكر الملاليس بس ربك ستر، تعال براك يا زول، ولا كيكى يقوم عليك يديك واحد "بلنجة" يلحقك الأندرتيكر،
ألآ أولى يا كيكى ، يعنى إيه أندرتيكر دى باقى أنا كنت بعزل الجكس الأخوانو ما عندهم عضلات تبش تحسباً لمثل هذه المواقف .
Post: #105 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 08:25 PM Parent: #101
Quote: ألآ أولى يا كيكى ، يعنى إيه أندرتيكر دى باقى أنا كنت بعزل الجكس الأخوانو ما عندهم عضلات تبش تحسباً لمثل هذه المواقف
عزال يا عبدالله ومالك يازول ومال الحبكانة ام دق دي.. والفوووق ده يا عبدالله اهو الاندرتيكر سيد الاسم شخصيا وعلي ذلك قس
Post: #102 Title: Re: يوم اتكاسرت مع اخو الجكس ..كسر شديد.!!! Author: خدر Date: 08-18-2008, 08:06 PM Parent: #99
Quote: محل كل مرة بجي الجكسوس واشبكها ليك نقة (نقن نقن) واقلب زي مليون هوبة
قلب الهوبه ده هو النزل لياقتكـ و خلي اخو الجكس يكسركـ
تستاهل عشان تاني تتراشق
Post: #106 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 08:29 PM Parent: #102
Quote: قلب الهوبه ده هو النزل لياقتكـ و خلي اخو الجكس يكسركـ
هلا بالشمات وبمن لف لفهم.. تعرف ياخدر يادوبك عرفت السبب الرئيسي الذي منعني من تنفيذ الياااااع قبل المعركة.. فالجري الحديث قالوا (ركب) ودي من ركبة والهوبة الحديثة برضو (ركبة) من ركب...
Post: #104 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-18-2008, 08:17 PM Parent: #99
ياخالد انت مشيت القوقل بتاع البنجوسات ولاشنو
ده الاندتيكر البشبه زولي زااااتو
Post: #103 Title: Re: يوم اتكاسرت مع اخو الجكس ..كسر شديد.!!! Author: Ahmed musa Date: 08-18-2008, 08:13 PM Parent: #1
Quote: إنتا معليش يا أبوحميد لكن اللابتوب ده خلى بعيد،
والله يا عبدالله لو قلت لي خليك إنت بعيد كان أسهل ... اللابتوب بقى أقرب للقصة مني
Post: #107 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-19-2008, 07:23 PM Parent: #103
Quote: الاخ عبد الكريم...
موضوع شيّق جدا و مليان فضفضة كان بالصح ولا بالكذب...غايتو حاصل كان ما ليك لغيرك...!!
برااك بتدى خليل فرصة فيك و يجى يسرح بهنا..
يااااااا محمد عثمان يا صديقي الجميل لك العتبي حتي ترضي ومداخلتك دي مع الهوكات البتطاقش دي شفتها يادوبك حسسسع دي يعلم الله وصحبك خليل لقي فرصتو وعاوز يربط كمان بعدما سرح ومرح
Post: #108 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-19-2008, 07:36 PM Parent: #107
Post: #109 Title: Re: يوم اتكاسرت مع اخو الجكس ..كسر شديد.!!! Author: حيدر حسن ميرغني Date: 08-19-2008, 07:39 PM Parent: #108
يامان
ماك عاوز فزعة
Post: #110 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-19-2008, 07:47 PM Parent: #109
Quote: يامان
ماك عاوز فزعة
خلاص يا مان فرتقت والاندرتيكر ادانا عرض اكتافوا ولكن ممكن نحتاج لقوات صديقة لمن نعمل ليهو مقص تاني في زقاق ضيق ونوضبوا
Post: #119 Title: Re: يوم اتكاسرت مع اخو الجكس ..كسر شديد.!!! Author: عبدالكريم أحمد الامين Date: 08-20-2008, 09:08 PM Parent: #108
الباشمهندس السمي
هسه اخو الجكس كان اخد ليهو رقصه في الجالوه الحاره ما اخير ليهو من المضاربه ...
**** (ابو محمد فؤاد - دبي ) وذلك منعاً للتضارب وحفظاً لحقك الادبي في هذا المنبر...
Post: #120 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-20-2008, 09:46 PM Parent: #119
Quote: هسه اخو الجكس كان اخد ليهو رقصه في الجالوه الحاره ما اخير ليهو من المضاربه ...
...
هلا يا سمي وتقول شنو بالله مع الناس الشريرة دي..لو صبر شوية وفتح تفاوض كان (عزمناهو) في نفس اليوم داك علي جالوة رهيبة تمتص شره ده وتنفعو في باقي عمرو ده...
وحبابك يا سمي والف مرحب بمحمد فؤاد وربنا يحفظه لك مع كل الود
Post: #111 Title: Re: يوم اتكاسرت مع اخو الجكس ..كسر شديد.!!! Author: عزيز عيسى Date: 08-19-2008, 09:56 PM Parent: #1
بالله هو دا إنت يا كيكي الكان بيكسروا فيه شيء هوكات وشيء شلاليت وأم دلدوم وخنق رقبة.. تصدق كنت واقف مع (عمر طحنية) أشاهد منظر الكبع ونضحك مع بعض.. قلت لي (عمر طحنية) ما نمشي نحجز الزول دا قبل ما أبودومة يجيب خبرو.. عارف قال لي شنو؟ (ياخي دا الجكس كلو مكسر فيهو.. خليهو يكسروا علشان تاني ما يعمل فيها حبيب)!
Post: #112 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-19-2008, 10:09 PM Parent: #111
Quote: (ياخي دا الجكس كلو مكسر فيهو.. خليهو يكسروا علشان تاني ما يعمل فيها حبيب)!
اوووه عزيز بالله ده انت الكنت واقف مع الزول القلبو اسود الاسمو طحنية ده.. ياخي بالغت يا عزيز حسع انا بطلت ابقي حبيب .. لو داير يحنك مع جكسوية ساااكت بسالها ..عندك اخو..؟؟ بتقول ليه اييييي ...لكن بتسال ليييه
اقول ليها لا ساكت..وعضلاته قدر شنو.؟؟ الجكس يقول لي قدر الليلة وباكر..
اها بقول ليها يا بت الناس الله بيني وبينك وجاااو
Post: #113 Title: Re: يوم اتكاسرت مع اخو الجكس ..كسر شديد.!!! Author: Abdulbagi Mohammed Date: 08-20-2008, 08:49 AM Parent: #112
Quote: اها بقول ليها يا بت الناس الله بيني وبينك وجاااو
اثبت يا رجل ما تشمت فينا الكدايس و الرجال مواقف في الحب ولا في الكورة ما في فرق
Post: #114 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-20-2008, 09:03 AM Parent: #113
Quote: اثبت يا رجل ما تشمت فينا الكدايس و الرجال مواقف في الحب ولا في الكورة ما في فرق
هلا يا باقي واخوك ثابت برا وبحر وجوا... ومافي كديسة بتقدر تعمل سيك ميك وبس حبينا نحقق امنية الصديق عزيز وصحبو الرعديد عمر طحنية.. وهم طبعا بالتاكيد شايفين الاداء الميداني بتاعنا مع الزول الجهامة الاندر تيكر ده البنية بالبنية والهوك بالهوك والبادي اظلم
Post: #115 Title: Re: يوم اتكاسرت مع اخو الجكس ..كسر شديد.!!! Author: Mohamed Ibrahim Ahmed Date: 08-20-2008, 09:25 AM Parent: #1
كيكي صباحك ورد سعال صغير كده يا كيكي لو هسه الزول قال ليك إنو معجبه بيك ممكن تتحسب سابقه عليهو والناس يمسكوهو ليهو لليوم الأسود وبعد مايدخل ليهو في كم دشمان هنا يقوم زول يجيبها ليهو من الأرشيف ويقول ليهو مش زمان إنت قلت لكيكي كده غايتو لحدي ما تجاوب أحسن نقول معجب بكتاباتك والزول بقي يعرف المجلد زي العاش فيها بفضلك وبقي يعرف بشاشا برضو بفضلك الله لا جاب يوم شكرك إنت وتمبس وتراجي محمد
Post: #116 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-20-2008, 03:24 PM Parent: #115
مرحب يا محمد ابراهيم وحبابك وياخي قلت بالجد كلام موثر وعميق واعجابك بحمل الزول مسئولية كبيرة يعلم الله واتمني ان اكون اهلا لها .. وطبعا في المنبر ده ما تستبعد اي حاجة في صفحاته عشان كده خش دوشماناتك عااادي يا زول ولكن تسلح لها بالحجة والمنطق وخلي دفاعك(كونكريت) مع رفع راية الاحترام للجميع الا لمن ابي واستكبر فهذا عليك بالبوت والنبوت والكبع الذي عليه ان ياتي من طرف
وانا ذااتي يا محمد مشترك معاك في ثنائية تراجي تمبس دي والاثنين من اعز الناس في هذا المنبر بالذات لمن يكون بالهم رايق والقعونج بتاعهم ما مضايق
والف تحية وشكر مرة اخري اخي محمد ونتمني ان نلتقي ذات يوم من ايامات هذه الدنيا ام قدود حتي نسعد بتمام معرفتك وكل الود
Post: #117 Title: Re: يوم اتكاسرت مع اخو الجكس ..كسر شديد.!!! Author: عزيز عيسى Date: 08-20-2008, 07:56 PM Parent: #1
غايتو يا كيكي لو ما لحق (عمك فتريتة) سحب عكازو وتدخل بسرعة ما عارف كان حالتك تكون كيف مع باقي الهوكات اللي كان حتقع فيك؟ لكن بيني وبينك (عمر طحنية) زولا حاسد وغتيت وعايز ليك الكسر التقول عندو تار معاك.. والمصيبة التانية (عوضية شرقرق) ما حتسكت وتصم خشمها ساي بالشافتو كدا بأخوي وأخوك.. إنتظر الشمار الجاييك.. أنا بره من الموضوع!! والمرة الجاية لما تتكسر ليك في واحدة كلمني ببقى ليك (بودي قارد) علشان لو جات على الهوكات نقدر نحجز أو نشاكل (العدو) معاك.
Post: #118 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-20-2008, 08:51 PM Parent: #117
Quote: لكن بيني وبينك (عمر طحنية) زولا حاسد وغتيت وعايز ليك الكسر التقول عندو تار معاك.. والمصيبة التانية (عوضية شرقرق) ما حتسكت وتصم خشمها ساي بالشافتو كدا بأخوي وأخوك.. إنتظر الشمار الجاييك.. أنا بره من الموضوع!!
هلا ياعزيز وعمك طحينة ده انا عارفو من زمان زول غتيت وكان ممكن ادبسو ليك واجيب ليهو هواء تقيل بالذات في موضوع السكر والبنقو الببعيو تحت تحت لناس حسن عفريتة ..ولكن خليتو لانو خال الفردة حسن كبريتة اصلو وراث الغتاتة والقلب الاسود من خالو طحنية ده.. وشرقرق دي مافي ليها حل يا عزيز الا تقطع فيها باكو بتاع برنجي وتديها حق الجبنة ولو اجننت زيادة حنقطع فيها ثوب انشاء الله بتاع (ترفيلا) بس تختا سيرتنا دي واخوان الجكس تاني لو اجننوا (تطلع ليهم) شهادة مضاربة مع الاندر تيكر (دي زي الشهادة الصحية) يكحلوا في الشهادة دي طوالي يجروا واطي
Post: #121 Title: Re: يوم اتكاسرت مع اخو الجكس ..كسر شديد.!!! Author: Mohamed Ibrahim Ahmed Date: 08-21-2008, 09:21 AM Parent: #1
كيكي شكراً للكلام الطيب البيشبه السوداني الزماااان كان خلاص ضفناك للفيس بوك بتاعنا للبورد وللدشمنات ماعندنا ليها وقت ممكن تلقاني مع نوبي في برسيون بريك وومكن أمر على ناس بحر طراوه وومكن أمشي لحدي منى خوجلي في لحظه من فضلكط وودالزين برضو من الناس البتلقاني عندهم ( كمال على الزين ) وتمبس برضو دي مادايره كلام بالذات لمن يكتب عن أمدرمان وناذر الخليفه برضو بتلقاني هناك تراجي لازم الزول يمر عليها عشان يعرف الحاصل في البلد شنو بس شفت ناس قلت لي وقلت ليك ديل ما بتلقاني عندهم طبعاً بوستات كمنجات الجسد وقالت لي العزراء وتأملات في المابعرفوا شنو داك والكلام الكبار كبار ده أخوك فيهو زي الزول الجا من البلد وعاين لعمارات الخرطوم وقال بختهم يكونوا كل يوم بيأكلوا لقيمات ( زلابيه ) فديل ممكن الزوول يمر عليهم مرور الكرام إستفدت جداً من بوستك بخصوص إتجاهات الكتابه في البورد وده بيذكرني بالعزيز ود البشرى اللازم الزول يخش يشوفوا بيقول في شنو طبعاً بعد ده الواحد ما ممكن يبقي ليبرالي ولا شيعي ولا وهابي ولا إنقاذي ولا شيوعي زاتو فعشان كده البوستات الدعويه البيكتبوهو الناس ديل ما بنجي داخلين عليها أها ممكن زوول يقول يعني إنت زول فارغ وبتاع قصص وأفلام وبس الإجابه ليه ما ممكن أكون زول سوداني بس .. لحدي هسه بيؤمن بأن فطور رمضان لازم يكون قدام الباب وفي البرش شكراً ليك والشكر يصل لسيد الحته دي كترنا الشكر لمن قرب يبقي كسير تلج ( مالبوست زاتو كسير أخو الجكس )
Post: #122 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-21-2008, 10:13 AM Parent: #121
Quote: خلاص ضفناك للفيس بوك بتاعنا للبورد
هلا يا محمد وحبابي والله في الفيس بوك بتاعك.. وكده ممكن نقراء محمد وكريم نااو ار فريند وقبل فترة قلت لاحد الاخوات هنا بان الفيس بوك ده خشمو خفيف خلاص محمد وكريم بقوا اصحاب حسسسسسسسسع دي عشة ركبت صورة جديدة كلثوم وابكر ماشين السوق عواطف وهارون عرسوا امبارح وهكذا خشمو خفيف وفولة في خشمو ما بتتبلا الفيس البوك ده ومرحب بيك ومرحب بروحك الطاعمة العمقية يا صديقي واراك الحمد الله واثق الخطي وعالما بكل الدورب ونتمني لك التوفيق والانطلاق وانت لها باذن الله يا فردة
Post: #123 Title: Re: يوم اتكاسرت مع اخو الجكس ..كسر شديد.!!! Author: عصام الجيلي Date: 08-22-2008, 00:45 AM Parent: #122
Post: #124 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-22-2008, 09:31 AM Parent: #123
هلا يا عصام وحبابك وعوضية شرقرق دي متين كمان بقت بتاعة اوركسترا... ما القصة كانت دلاليك وكدا
Post: #125 Title: Re: يوم اتكاسرت مع اخو الجكس ..كسر شديد.!!! Author: Fadl Karrar Date: 08-22-2008, 11:29 AM Parent: #124
سلام
قصة جميلة ومؤثرة علي قدر ما فهمت من كلمات وإن إستعصي علي بعضها مثل كسر و هوك بالمناسبة حلتكم ( يعني محل كنت ساكن ) وين ؟ عشان في أسماء غريبة زي عمر طحنية ، عوضية شرقرق وعباس طرمبة؟؟؟؟ والكلام دا كان متين؟ قبل المهدية واللا بعدها بي شوية؟؟
Post: #126 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-22-2008, 11:47 AM Parent: #125
Quote: قصة جميلة ومؤثرة علي قدر ما فهمت من كلمات وإن إستعصي علي بعضها مثل كسر و هوك بالمناسبة حلتكم ( يعني محل كنت ساكن ) وين ؟ عشان في أسماء غريبة زي عمر طحنية ، عوضية شرقرق وعباس طرمبة؟؟؟؟ والكلام دا كان متين؟ قبل المهدية واللا بعدها بي شوية؟؟
هلا يا فضل وحبابك والله في مدارات الهووكات والكاسوري.. وكنت عاوز اقول ليك ياريت كنت واقف مع عمر طحينة في الزقاق الخفي عشان تشوف بيان بالعمل لمعني الهووك الاصلي والكاسوري (لكن قلت ياخي فضل ده مالو ومال البلاوي دي ياخي) الهووك يا فضل هي البنية ذات القوي الرهيبة اما الكاسوري فهو الشجار في لغة حينا اللاتيني (وده طبعا هو فريقنا او حلتنا) الملمح الرئيسي فيه كما لاحظت هو ارتباط اسامي اهله بالاشياء عمر طحنية عباس طرمبة عوض فرملة عثمان كلتش وقبل كم يوم كده ظهر اسم جديد هو (حواء اوكامبو)
شكرا يا فضل والف شكر علي التجوال في صفحات هذا الكاسوري
Post: #127 Title: Re: يوم اتكاسرت مع اخو الجكس ..كسر شديد.!!! Author: Fadl Karrar Date: 08-22-2008, 11:58 AM Parent: #126
علي حسب ما جاء في القصة إنو أخو ( الجكس ) ما أداك فرصة للكلام ،،، نزل فيك طاخ طيخ طوخ طوالي لكن يا عزيزي - ودا من حسن حظك - لو كان نضمت معاهو بي فصاحتك دي هسه كان تكون دورة الشهيد كيكي الرياضية مدورة ليها عشرين سنة
Post: #128 Title: Re: يوم اتكاسرت مع اخو الجكس ..كسر شديد.!!! Author: Amira Elsheikh Date: 08-22-2008, 12:02 PM Parent: #127
اغنيتى المفضلة من الليلة..
انت يالكسروك ومن الجكس طيروك..
Post: #130 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-22-2008, 12:09 PM Parent: #128
Quote: اغنيتى المفضلة من الليلة..
انت يالكسروك ومن الجكس طيروك
يا شماتة يا ابلة ظاظا
انقري انا كنت قايلك عاوزة تقولي شنو..؟؟ كنت قايلك عاوزة تكتبي الليلة ..ووووووووب
Post: #129 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-22-2008, 12:05 PM Parent: #127
Quote: إنو أخو ( الجكس ) ما أداك فرصة للكلام ،،، نزل فيك طاخ طيخ طوخ طوالي لكن يا عزيزي - ودا من حسن حظك - لو كان نضمت معاهو بي فصاحتك دي هسه كان تكون دورة الشهيد كيكي الرياضية مدورة ليها عشرين سنة
يا فضل ياخي بالجد ضحكت من العمق... وياخي لو ابو الشباب ده اداني فرصة للنقاش والفصاحة كانت دورتو هو هي البتكون (شغالة تش) لحدي يوم الليلة... لانو الفصاحة والنقة بتخليك تستعد بقوي ورباط خيل وكنت ح ادرخو...ادرخوا وفي النهاية هوووووووك واحد يجيب خبرو ونبقي في (كتل اخو البنية)
Post: #131 Title: Re: يوم اتكاسرت مع اخو الجكس ..كسر شديد.!!! Author: Amira Elsheikh Date: 08-22-2008, 02:10 PM Parent: #129
المكسر دا تانى وين نلقى..
الليلة ووووب..
Post: #132 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 08-22-2008, 04:04 PM Parent: #131
Quote: المكسر دا تانى وين نلقى..
قااااااعد راسو المدوقس ده ومتوفي في الاسواق المحلية...مالك يا اميرة عاوزة تلحقيهو انتي كمان (غنم زهرة)
Post: #133 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 09-05-2008, 12:48 PM Parent: #1
.
Post: #134 Title: Re: يوم اتكاسرت مع اخو الجكس ..كسر شديد.!!! Author: Mohamed Bannaga Date: 09-05-2008, 08:14 PM Parent: #1
كم فتاة مثل ليلى وفتا كابن الملوح امضيا الساعات في الشط هي تشكو وهو يشرح حتي اذا جاء العتوو فخف قلب عشق الجمال وكان اشطـح لم يدر ما قد ترسل الايام تحت ستارها ليث غضنفر كان اشنخ كره الكماة محبة في اهله فر الحبيب ب وش مشلخ فالضرب والهوكات يا كيكي بها برهان حب لو سلمت ولم تكسح بالجينز والتيشيرت كان عراكه كيكي من القوم اضحى كالملـوح
تحياتي يا كيكي و ولا يهمك الوهم ده بدل يدقك كان يقول لي اختو براوة عليك لانها عرفت تختار وطبعا يعقد ليك عشان كل ما تزرقن معاها تنادي ليك اخوها
تحية اخرى اخوك البدوي
Post: #135 Title: Re: يوم اتكاسرت مع اخو الجكس ..كسر شديد.!!! Author: عبدالكريم الامين احمد Date: 09-05-2008, 08:21 PM Parent: #134
Quote: فالضرب والهوكات يا كيكي بها برهان حب لو سلمت ولم تكسح بالجينز والتيشيرت كان عراكه كيكي من القوم اضحى كالملـوح
تحياتي يا كيكي و ولا يهمك الوهم ده بدل يدقك كان يقول لي اختو براوة عليك لانها عرفت تختار وطبعا يعقد ليك عشان كل ما تزرقن معاها تنادي ليك اخوها
بالجينز والتيشرت كان عراكه كيكي من القوم اضحي كالملوح
ياخي وضبتني وضيبة شديدة خلاص يا ود البدوي بالقصيدة دي والواحد قرب يقول اين هذا الاندتيكر الرعديد حتي انال منها هوكات وهوكات.. ويا صحبي ده لو كان عقد لي كان حسسسع اخوك بقي مرتبة بس من الدق اليوماتي الاخت تدق والاخو هوكااات واحتمال حبوبتهم ذاااتها تجي تاخد ليها باص باصين في الغنيمة دي..
وكل الود يا ود البدوي وعاملين ليك ياخ بوست استقبال قدر الضربة منتظرين تشريفك ايها الكاهن الاعظم
