عوضية رتينة ست الشاي تتضامن مع عبدالمنعم سليمان..!!!

عوضية رتينة.........ست الشاي...
ياسلام يا ابو خليل حليلك وحليل عوضية رتينة اللذيذة....
سميت بعوضية رتينة تخليدا..(لوالدها )..(خضر رتينة)..
الذي كان متخصص في زمن ما في صيانة (الرتاين)..عندما كان للرتينة شنة ورنة,,
فكان عمك رتينة اشهر.(اسطي..) بتاع( رتاين) في مدينة (سنجة عبدالله).
اتي الي الكناف والتحق بالمصنع بمهنة..(زيات)..وكان ماهرا في مهنته..
ليتزوج (بام الحسن).التي انجبت (عوضية)...وعوضية فقط..
نشات عوضية (دلوعة)..وكانت كل طلباتها مستجابة
وكانت جريئة بدرجة عجيبة لاتتواني في وصفك
باوصاف من قاموس الاستعمال الرجالي..وممكن تقول ليك..ي(لو.......)....ويا(خو.......)..
وهي في منتصف دراستها المتوسطة استطاع (عمك رتينة). من
اقناعها بالزواج من..(حيدر هبشة)...ذلك سائق الجرارات الغامض..الذي
اختفي في ظروف غامضة..ليترك لعوضية (بنتين)..واب
كهل فقد مهارته في الصيانة..وانزوي عهد الرتينة..
وحاولت (عوضية )..ممارسة العمل في مصنع الكناف
الا ان قلة الراتب وتاخره في احيان كثيرة جعل..(عوضية)
المجازفة و(ركوب الكفتيرا)....
لتجد لنفسها مكانا تحت اكثر اشجار السوق ظلالا..
ساعدها في ذلك جراتها التاريخية...وخفة دمها...
ويدها الطاعمة..وامتلاكها,,لاسرار الخلطة السحرية (للشاي)..
واتطورت فيما بعد لتبيع..(الشرية)..و(الحلبة )حسب الطلب...
وكانت لها قعدة مميزة في (البنبر)..ويمكن ان تقول
ودون اي تردد ان (عوضية..رتينة)..احسن زول في العالم.. بيعرف يقعد
في (البنبر)....
وكانت ايضا تمتلك عيون نظرتها كثيرة الجراءة..والحزن الممزوج
بالجمال..(شئت ام ابيت)..نظرة منها تجعلك جلوسا في حضرتها..وتطلب..(شاي)..
وعندها تبتسم (عوضية)..في نظرة غامضة..فسرها لي
باخوس (ذات ليل)...بان عيون (عوضية)
تتكلم وتقول..( ود الكلب ..الافندي المتفلهم زيك ده...ما بجيبوا الا بجنس العيون دي..
وبعدين يفكوا عكس الهواء)
كانت (عوضية)..ورقم جاذبتها..وجراتها التي تغري(الحرفاء)..
ويحاولون الوصول اليها الا انها كانت لاتمكن اي شخص مهما كان من
الوصول الي خطوطها الحمراء..(حدها معاكم السوق..ده وبس)..
ولها قصة مشهورة جدا مع احد(المراجعين) من البندر الذين
ترسلهم شركاتهم من الخرطوم لعمل المراجعة المالية
لشركة.(الكناف)....
اتي هذا الشاب المعطر .واخذ يتجول في السوق..ومر بالقرب من (عوضية)...وعندها ارسلت عوضية
نظرتها الشهيرة...وجذبت الشاب الي مجلسها...وافتكر ابوالشباب ان (عوضية بجي منها الكتير)
.وجلس في حضرة (عوضية)..وطلب شاي.
وونسته (عوضية)..ونسة دقاق بثقافتها العالية..وحللت معه اخر كور (الهلال والمريخ)..والقون
بتاع(اقجي)..والود بتاع البندر (عمل فيها مصطفي سعيد)..
وعمل الحالة واحدة....وعندما اعطته (عوضية)..كباية الشاي..
دارر الحوار التالي...
الشاب: الشاي ده سكروا بسيط
عوضية: جيب الكباية ازيدوا ليك سكر
الشاب:لا كده ما بنفع ..دخلي (اصبعك الحلو ده في الكباية وبعدين الشاي ح يكون طاعم)..
وعندها..ظهرت عوضية الما خمج....وقال لهذا الشاب المعطر بنظرة(تنزل الصقر من السماء)...
اسمع يا(ل............) انت طايرة ليك ولا شنو...اشرب شايك ده واتطلب الله....وانا
ما عايزة (لو.......) بتاعة افندية...يا(خ.........)

فايزة كبك ايضا لها من التضامن باقات وباقات....
فايزة كبك...الشابكنها شينة شينة...

لم تكن من السكان المستقريين في تلك البلدة ..ففائذة كانت تاتي

من القري التي يفصلها النيل الازرق من منطقتنا....

وعندما تاتي كان منزل الرضية (بري)..هو ماؤاها..وهي في

العقد الثالث.. تاتي دائما بصحبة طفلتها الشليقة(ارنوبة).....

وكانت تاتي لكي تسترزق من مهرجان فترة الحصاد في الكناف...

لتعيش بنتها ارنبة التي كانت مثالا للشلاقة وخفة الاطفال وفصاحتهم

فكانت(ارنوبة)..رغم صغر سنها قادرة علي مساعدة امها

في جلب..(الكبابي)..التي تكون قد تفرقت مابين الرواد

القلائل الذين يرون في مجلس..(كبك)..جدارة بتناول

الشاي الذي قيل انه ردي الصناعة....

ولكن (فائذة)..كانت رغم كل ذلك قادرة علي انتزاع (زابون..او زانونين)...

من جوقة الذين يرتادون السوق....وذلك لتجويدها المميز..

لما يسمي بمديدة(عيش الدخن)...فقد كانت بارعة في تلك الخلطة..

وتمتلك كل (كيمياء..) ذلك الحساء..الذي قيل بانه

(مقوي)...ويزيد معدلات الفحولة........

وايضا وجودها بالقرب من مطعم الرضية اعطاءها ميزة تسويقية اخري

لكثرة رواد (الرضية بري)...وميلهم( للتكيل)..عقب تناول

طهي (الرضية المدهش).....

كانت ..(فايزة جاد الرب)..قد تكون شخصية موسمية عابرة علي ا رض الكناف..

الا ن كرجول (البذي اللسان)..اراد شي غير هذا..

فكرجول كان شديد الولاء (للرضية بري)..ولا يفسده وده تجاها الا

عند حضور فايذة جاد الرب....وعندها يداعب الرضية

ويلاسنها (اها زولتك الوشها زي الكبك دي جاتك).....

( ياخي والله دي وشها زي محل الشكلة.)


...( ياخ دي تطير النعمة منك )

ولان كرجول كان ملهم للجميع ومجبيه ومقليديه كثر..صار

اسم فايزة جاد الرب فايزة (كبك)........

واصبح رمزا (للقبح..)..والدمامة..ويبور شاهيها...

و يضرب بها المثل هناك...(امشي وشك زي وش فايذة كبك)....

والعارفيين لبواطن الامور يدرون ان كرجول

اطلق فريته تلك عقابا (لفايزة جاد الرب )...التي رفضته بشدة وحزم

عندما راودها عن نفسها...في اول عهد دخولها سوق الكناف....

ليعاقبها بذلك اللقب الذي عم القري والحضر!!!!!!!!!!!!!!!!!!!!!!!!!

قلبي قال بقققق زي الرتينة من تضامن رتينة


حب بحجم الجنريتر لرتينة

Quote: قلبي قال بقققق زي الرتينة من تضامن رتينة

شكرا علي بقبقة قلبك
واشرب شاييك وفرتق يازول
بكرة كمان الهندي يقول عليك بتقعد مع عوضية رتينة

والليلة جاتك يا منعم الشيخة الكبيرة الرضية بري احسن زول بيعرف يقول بري في العالم...

حاجة الرضية (بري)
ليس هناك تاريخ محدد لدخولها تلك المنطقة ولكن يقال انها من دار علي دينار حيث تجويد صنعة (الاكل الطاعم) الذي ورثوه من اولاد الريف الذين جاوا الي دارفور في زمن ما فامتزجوا مع اهل البلد واصبحت المراة تاريخيا في دارفور احسن من (تسوياكل) ويدها طاعمة.

الرضية تلك التي تمتلك مطعمها الشهير جد في تلك البقاع ويرتاده الجميع ويهرولون بكل نهم لتناول ( عصيدة الدخن) التي غالبا ما يكسوها ملاح من الروب او (الشرموط) او قل (بدرة اللحم( ويفتت به بعض( الكول) لتعطي تلك الوجبة مذاقا خطير تشتاق اليه كثيرا.
اشتهرت حاجة الرضية بيدها الطاعمة وروحها المرحة وخفة ظلها وحاجة الرضية احسن زولة في العالم يمكنها ان تقول بعض الكلمات التي تشتهر بها النساء في السودان مثل(بري) (وسجمي) و(كرعلي) تقولها وتحس ان هذا هو النطق السليم لها واحسن من( يزغرد في الاعراس) ويمتزج كل ذك بانوثة عالية وغنج خطير وايضا كان يساعدها ذلك في جذب الرواد الذين يسعون ليدها الطاعمة ويمنون نفسهم بسماعها وهي تقول (كر) في احد مداعباتها مع (عمر كرجول) الذي كان (زبونا له حساب مفتوح عند حاجة الرضية).
تغذي تلكم الحاجةالتي سماها الجميع (الرضية بري) كل الموسسات(الشرطة- مكاتب الادارة-
البوستة (وعمك الوكيل) والمشتشفي) بوجبة الافطار من انتاجها (المدنكل (ولها دفاتر تديرها بكل كافة
رغم انها (امية) الا ان قرشها (يصعب اكله) وذكاءها الفطري قادها لتحالف شهير مع الصراف(هرمسة ((فلان ما تصرف ليهو الا ما انا اجي) تلك كانت كلمة السر مابين )الرضية) و(هرمسة)
............
تذدهر عادة مطاعم تلك البلاد بعد الحصادعقب عودة الجميع وخاص ) الجنقو( الذين يقضون يومهم مابين السوق و(حانة حواء ليمون) اما (الرضية بري) فيدها الطاعمة جعلت كل ايامها عيد وبيع وفير ومذيد من الابداع في الطبخ وتجويد قول (بري وسجمي وكر علي

كيكى
ولا تنسئ تضامن اهل كمبو الرى ايضا ...


لك تحياتى ...

Quote: كيكى ولا تنسئ تضامن اهل كمبو الرى ايضا ...

هلا ياعاصم يا صديقي
وديل تعليمات تضامنهم بايتة اربعة وجاهزة اربعة وعشرين ساعة ضد الظلم والفساد والجهل..
والمناذج اعلا من كمبو الري وسناتي بالكثيرين للتضامن مع ابنهم منعم فهم ملح الارض والبسطاء الذين يزدريهم مثل الهندي عزالدين(عندما لبسا بدلة وكرفتة) في ظل المحسوبية والجربندية...

...وعندي زولة اسمها جنجويدة الغريبة متضامنة مع الهندي ح اجيبها ليك حسع دي..

Quote: تتضامن مع عبدالمنعم سليمان

إن شاء الله ما ينفعو
شنو الحكاية البورد دا ما فيه غيرو
كمل علينا الحنان كلو
عامل صلعتك دي

فعلا يا محمد
الزول ده كرهنا البلي ذااتو
والواحد قرر يركب الموجة (الهندي - منعم) ويلحق السوق
اتخيل لي لو فتحت ماسورة في سودانيز اليومين دي (بجيك الهندي عزالدين طائر وبالعدم منعم سليمان)
وممكن لو صبرت شوية كده تجيك بوستات محمد عادل (مع حبي وتقديري له)

دي كمان يا عاصم زولة جمجارية وجنها شمارات وخشمها خفيف
قررت انها تتضامن مع الهندي عز الدين في المعركةوقالت(منعم ابو صلعة سجم الرماد)...

جنجويدة مرة بتاعة مشاكل في حينا اللاتيني ..وجنها شمارات
وشنافة...وجنجويدة متخصصة في الشيلات بجيبوها عشان تشنف
الشيلة...سجمي دي ريحة شنو البسيطة دي..الصندل سجم يامة تايواني
والثياب التقول سكند هاند يا يمة....ده كان تخصص جنجويدة في
ليالي شيلات الاعراس في حينا اللاتيني ..وكانت ايضا بتمشي
لبعض الاحياء المجاورة.....
ذاع صيتها واخافت الكثير من الشبان والشابات وبقي الناس بعملوا ليها
الف حساب....!!!!
نشتري التوب ده يا هناية...
كدي..لا يا زولة التوب ده شين تقوم جنجويدة تشيل حسنا ساكت...!!!
امراة في عقدها الثالث..يعني ممكن تديها 35_37 سنة كده..كانت صامته
ومسكينة...حتي زواجها بعد عنوسة طويلة من مستر جنجويد..!!
وفجاءة برزت مهاراتها علي السطح...وكانت الجبنة في الحي اللاتيني
المافيها جنجويدة بتكون جبنة ناقصة..ففي حضرة جنجويدة يحلو الشمار
و الدقاق بالذات....
بري يا يمة عاشة بت العوض طلقوها....!!
كر عواطف بت سكينة جاءها عريس قالوا مغترب طلع عنقالللللي ساكت....!!!!!
حضرتي يا فريدة امس هالة شو....سجمي ..سجمي ..مبالغة لكن.....!!!
كانت هذه هي صديقنا جنجويدة دائما شمارها متجدد ومواكب..اسعار الدولار
اخبار القرار 1706..(كر يايمة..الخواجات قالوا جايننا..).....!!!!!

الان ناتي الي الحديث المليان في الرد علي الهندي السجمان
في جزئية موغلة في التكبر والعجرفة وازدراء الفقراء والفقيرات اللائي قررن ركوب سطوة الكانون
والكفتيرا والهبهان وممارسة مهنة علي هامش الطرقات التي غادرها السلطان العادل ومثل سيدنا عمر منذ الاف السنوات....
ان كان هنالك احصاء صادق وامين لقيل لنا ان في السودان اليوم مليون ست شاي في مليون كورنر وزاوية
يبعن هذا المشروب العجيب في ظروف حياتية قاهرة ومظلمة جبرا من اجل لقمة العيش من اجل قراية الاطفال
من اجل الدواء من اجل المسكن ومن اجل الكساء ومن اجل السترة التي هي والفضيحة متباريات دوما...

المتفسخ الهندي الذي اوجد لنفسه بقلمه البخس وموالاته الرخيصة لسلطة الانقاذ منذ ولوجها المظلم لساحة الحكم في السودان...
اوجد لنفسه قلما يسخره للكذب والضلال وازدراء العامة ومهن قاع المدينة المدينة التي اتت كنتاج لسياسات حكومته التي ايدها وطبل ورقص من اجلها
واحرق بها مراكب انسانيته المعدومة اصلا يري بها من العار ان تصنع فقيرة محتاجة لا تجد كتفا تستند عليها ولا والي يركب عنان الليل ليسمع انين اطفالها وتضرعهم جوعا وونعود

تتضامن ايضا يا كريم


الزيارة بت تمبك وهي تغني لصغيرها

اسمر يا اسمر نقلوك الجنيد تبع السكر وكل طموحها ان يعمل ابنها في مصنع الجنيد

ولا تعرف كمبيردج ولا ليدز ولا الامبريال كوليدج

Quote: الزيارة بت تمبك وهي تغني لصغيرها اسمر يا اسمر نقلوك الجنيد تبع السكر وكل طموحها ان يعمل ابنها في مصنع الجنيد ولا تعرف كمبيردج ولا ليدز ولا الامبريال كوليدج

مرحب بالزيارة بت تمبك العوامة وكاسحة الانهار
والتضامن يا خلي شمل بت مورلي وبت صابون
وابرقنا حسن ماكردة ايضا متضامنا مع هذه الحملة التي تزدري الناس الطيبين

Quote: وابرقنا حسن ماكردة ايضا متضامنا مع هذه الحملة التي تزدري الناس الطيبين

ولا تنسي ايضا الرعاة

ناس جماع الرزيقي وابو صقور الابي القراية

وباعة اللبن ناس ود اب سلس والخضرجية ناس الكعوك واحسن من يعمل البلاستر في العالم

عمك (درية) والطلبة بتاعه ( التوم عب القمر)

Quote: ولا تنسي ايضا الرعاة ناس جماع الرزيقي وابو صقور الابي القراية وباعة اللبن ناس ود اب سلس والخضرجية ناس الكعوك واحسن من يعمل البلاستر في العالم عمك (درية) والطلبة بتاعه ( التوم عب القمر)

يا سلام يا خليل حاذق
وهل ينسي القمر
ابو سلس صانع العناقريب
وكمان عندنا عبده تامرجتا(درب العشق في جلنقي)
وياسلام علي عمك (درية) والطلبة التوم عب القمر (اسم مدهش ياااخي)
موغل في الدهشة

بوست زي اللوري
سنجة .. الدمازين .. مدني وبالعكس


احسن ننزل قبل ما يصل الهند

Quote: احسن ننزل قبل ما يصل الهند

الهند بعيدة يا منعم ما بنصلا
ولكن هدفنا الاستراتيجي الشامل هو الهندي عزالدين
رائد صحافة الغفلة وزمن التردي والانحطاط

ابلغني الحبيب الاريب القريب حسين ملاسي بانه سياتي الي هذا البوست ويتوعدك .. وقال لي

he has
he have

وكل الدكشنري ما يحلك المرة دي



____

غايتوا قال الاحد جاي
والاحد لناظرة قريب


انا غايتوا ناظرة

Quote: ابلغني الحبيب الاريب القريب حسين ملاسي

ملاسي ده بتاع ناس كيكشن الطلعهو الطيش داك ولا واحد تاني
لو ده هو
قول ليهو قال ليك
كم اووون
كم اوون

يا كيكي ، كيفك
كم اوون .. كم اوون بتعاتك دي ، بعد شوية بتطلع كم اوزون ، اعمل حسابك ، قالو
جاي بالدكشنري الما خمج ، ومتين يوم الاحد يعني الراجل بتاع ويك اند ، اها الخواجة
طلع منو ...
وبعدين يا منعم الشخصيات الجميلة الناس التحتانية دي مضامنة معاك في معركة النشامي
تجي تتريق تقول بصات الدمازين - سنجة ، وبالعكس - كان نسيت محطة كيكي مسامحني-
والله انت حقو ينزلوك الهند باللفة !

Quote: كم اوون .. كم اوون بتعاتك دي ، بعد شوية بتطلع كم اوزون ، اعمل حسابك ، قالو جاي بالدكشنري الما خمج ، ومتين يوم الاحد يعني الراجل بتاع ويك اند ، اها الخواجة طلع منو ...

هلا يا سري
انا (كافو ياجك) زول دي ملا كبيري

سري
تحياتي

الليلة زولك كاتب في عمودو عبدالمنعم زبون ستات الشاي
اها هسع نعمل شنو
يا جماعة البلد دي بقا فيها الكيف مسبة وللا شنو ؟
اها اقول ليك بتاع شاي وتمباك كمان وحلايب مصرية
تحياتي لعوضية واخواتها
وكيكي واخوانة

كيكي ومنعم ، تحياتي
اها الزومة انضم الى كوكبة المنادين لموقع ما اسماه (الشيطان) لكن ما جاب
سيرة ستات الشاي ، وبكرة تسمع كشة كبيرة لستات الشاي للبحث ان كانن يراسلنا
سودانيز اون لاين ، وشرطة امن المجتمع ستصدر قانونا يحرم سيرة الموقع على
الالسن ، يعني المباحث سترتدي البسة معينة للتمويه ويندسون وسط الناس ويسترقون
السمع لو اي زول يردد كلمة سودانيز اون لاين ، يللا يا منعم فكر في شفرة جديدة للبورداب
ورسلها ليهم بالماسنجر ، وانت يا كيكي جبت الهوا لاخواتنا بائعات الشاي باعلان
التضامن مع منعم ، كدة كويس ..زز

كيكى صباح الخيرات معلمنا الصمود عبد المنعم سلامات

Quote: اها اقول ليك بتاع شاي وتمباك كمان وحلايب مصرية

جاين لزوم التضامن وكده بعدين الزول ده انته مفروض كان تقدر انوا صحفى جربندى وتدعو الى حفل تكريم الصحفين ... (( الزول ده انته خارت منو بلى ولا شنو))

تخريمه ..


الزول ده لسع بكتب هو

التجلة لستات الشاى فى كفاحهن اليومى

ومعزتى ياكريم وانت تتضامن مع ناسنا المهمشين

Quote: ومعزتى ياكريم وانت تتضامن مع ناسنا المهمشين

مرحب والف تحية يااشراقة
وحبابك في مهرجان الغبش وملح الارض الذين باسمهم تقام الحروب
وتقام الدول وتمتلي كروشهم الحكام الفاسدين باموالهم وحقوقهم
ولكن مدارات حياتهم تضج بالنبل والجمال والصدق

Quote: جاين لزوم التضامن وكده بعدين الزول ده انته مفروض كان تقدر انوا صحفى جربندى وتدعو الى حفل تكريم الصحفين ... (( الزول ده انته خارت منو بلى ولا شنو))

هلا يا عامر
ودخول المدعو الزومة الي مسرح الاحداث يعطي (كيكشن دوت كم)
حق اجراء استفتاء جديد وكل المواشرات توكد بان الطيش ليس الهندي وحده
بل هناك طيشا اخر يسمي الزومة...
والاستفتاء بعنوان(عفوا هنا يوجد طيشا اخر اسمه الزومة)

Quote: اها الزومة انضم الى كوكبة المنادين لموقع ما اسماه (الشيطان) لكن ما جاب سيرة ستات الشاي

هلا يا سري والناس ديل الظاهر المكرسح بقي شايل العميان وهاجمين علي سودانيز
والظاهر ان سقف الحرية هنا قد اوجع وضرب الخفافيش في مقتل..
ستات الشاي بحسهم الامني الفطري قادرات علي تفزيز الامنجي من الزبون
وجاهزات موية ونور بالموية السخنة وجمر الكانون لسكبه في وجوهم

كيكي
مساء الخير
متعنا بظرفاء المدينة .... متعك الله بالصحة.
بعدين يااخوي نحنا لسه ماخلصنا من مستورة بت قنيرة ....طلعت لينا بي عوضية رتينة.
الحكاية شنو ياماااااااااااااااااااااان ....؟ مافي رجال يتكتب عنهم والله شنو ...؟

Quote: اسمع يا(ل............) انت طايرة ليك ولا شنو...اشرب شايك ده واتطلب الله....وانا ما عايزة (لو.......) بتاعة افندية...يا(خ.........)

طبعا صحبك عمل شتااااااااااااااااااات يافرده
التحايا
هارون دياب

Quote: طبعا صحبك عمل شتااااااااااااااااااات يافرده

هلا ياهارون..
وصحبك عمل شتات خالي محطات وفحط فحيط تقيل

Quote: الحكاية شنو ياماااااااااااااااااااااان ....؟ مافي رجال يتكتب عنهم والله شنو ...؟

رجال متروس يا هارون وكدي هاك (عمر لصقة ده) برضو جاااي بكاسو ومضامن مع الجماعة..

عمر لصقة.....!!!!
سمي بلصقة واخريين اكثر تمدنا كانوا ينادونه عمر نحل فقد كان مرتاد غير مرغوب فيه
لحانات جوك وحواء ليمون يحتسي ويشارك مرتاديها كاساتهم دون خجل ودون ان يدفع
ذاده في ذلك خفة دمه الطاغية ومقدرته الفذة في اجترار ابيات موغلة في القدم من دوبيت
يخلد ود ضحوية وقدامي الهمباتة....وكان يبدو في ذلك كانه يبيع محفوظاته تلك مقابل
كاس كاسين من العرقي جيد التقطير ..او مقابل جردل من المريسة عالية التخمير...!!
عمله كمساعد كبير في احدي اللواري السفرية قللت من تواجده في ذلك المدار الانداي
وكانت ساعات وصوله تشكل توتر كبير وقلق بالغ للرواد وتتناقل اخباره الرضية...
بصوتها المصحوب بغنج ظاهر....
كر يايمة لصقققة جاءنا الليلة....!!!!!
ويصيح كرجول وهو يبايع احد زبائنه...( الزفتي) ده الجابوا شنو الليلة واماني ما اتلخبتت سكرة الليلة(وكان كرجول حريص كل الحرص علي تناول كوته اليومية في انداية حواء ليمون)...!!!
ترديد لصقة لابياته الدوبتيه تلك جعلت الرواد المدواميين علي حانة حواء ليمون
يحفظونها علي ظهر قلب..وما ان يبداء لصقة في ترديد مواله ذلك حتي يقابله احدي الحضور
بتقديم كاس.....ومصحوبا بمقولة عليك الله شيل الكاس ده...وقفل صليبك ده...!!!
الا ان جاء الي تلكم البقاع ذات خريف كثير البرق والمطر وفي احدي رواكيب جوك المزدانة
بالفول السوداني المصبوغ بالوان زهية يتدلي علي جنباتها ووسط الجوكيات اللائي وجدن اليوم
سوقا كثير الربح والقبض...كان وسط هذه الجموع احد التجار الجوالة جاء الي هذه الاماكن باحثا
عن (سالفيين) والسلف هو بيع المحصول قبل نضوجه اي يباع وهو لا يزال زرعا اخضر...وكان هنالك
ايضا عمر لصقة يتلصق ما بين هذا لابعا منه كاسا ومابين ذلك لابعا من عبار او عباريين كل حسب
قدرة احتماله قوة التصاق عمر....!!!!!
ليذهب لصقة الي الركن الذي يحتله في عظمة ظاهرة ذلك التاجر الجوال ويبداء في ترديد اصوانته المشروخة تلك التي تفاعل معها تاجرنا الجوال تفاعلا ظاهر اغري عمر للتمادي والتجرو بتناول القزازة وبداية سكب كاسه الاول...وعندها وكما البرق تماما والصاعقة انتفض التاجر الجوال ليصفع عمر لصقة صفعة تردد صداهافي كل ارجاء الكمبو وذهب صداها ليعانق حقول الكناف لترتد ونجد التاجر المقتول العضلات يواصل ضربه المبرح لصديقنا عمر لصقة بطريقة لم تشدها تلكم الفيافي من قبل...!!!!!!
عندما حمل لصقة الي المستشفي الوحيد في تلكم المنطقة كان ضابط التحري زاهر يواصل تحرياته في ملابسات هذه القضية التي كشفت الكثير عن هذا التاجر الصعب اهمها انه كثير مشهور تماما بالكرم ما عدا في هذا العرقي والمرايس التي قيل انه قد ارقد العشرات من شاكلة صديقنا عمر لصقة مستشفيات في مدن وقري عديدة...!!!!

وده كمان يا هارون جايب عكازو وبعلن تضامنوا.

ونذهب اليوم عميقا بين ازقة الكمبو ونستدعي فتي كان يتجول
مابين ازقته دوما وتراه ايضا في مدارات السوق الوحيد
وكثيرا ما تراه من خلال سياج نقطة البوليس الاسطوري
الصادق اجراءت حبيسا لخناقة او تهمة الضرب المبرح
ودون رحمة للذين تقع بهم الاقدار بين يديه وهم يتجولون ليلا كغرباء
مابين طرقات الكمبو ذات الكلاب النابحة والعتمة المظلمة
(قوة) في مشاجراته تلك لمرتادي الكمبو ليلا كان ظاهرا انه
يتحاشي الاحتكاك مع الذين يعرف نواياهم الواضحة بالنسبة له
وكثير ما قدم خدمات حماية للكثير من الموظفين الذين
انقطع بهم سبل (العرقي) ليلا وارادو جلب الزيادة وكان
ودودا ومتعاونا مع الشهير راشد كرشة ويتبادل معه دعابة شهيرة.
(كرشة ود الهرام انت ارقي ده لازم تزيدي)....ليضحك الاثنان
وتنتهي المزحة بالسير سويا الي احدي المحطات التي يكون(قوة) يعلم
بانها لازال بترولها قابعا في الجركانات وقد يحدثك عن تاريخ الشدة ايضا.
(قوة) كان يمثل حماية تطوعية لكل اهل الكمبو من زوار الليل الذين
قد تكون افكارهم ذهبت بهم في اشواق دافئة لحضن وريف
ويمنون نفسهم بقضاء اوقات حميمة ..ولكن اين لهم كل ذلك وقوة
مرابض لهم كالاسد...
ذكر كرجول انه كان شاهد ذات ليل دامس علي احدي المعارك (القويية)
الشهيرة وسرب باعجاب ان قوة كان دائما ما يبداء امره العنيف هذا
استجواب سريع بلكنته العجمية....وان احس باي تردد في ردود فريسته
كان يعالجه بضربة وكما الصاعقة من عكازه (المضبب) الذي كان يختزنه
لهذه المواقف وقوة يمكن لك ان تقول بكل ارتياح انه احسن زول في العالم يمكنه استعمال هذا السلاح الذري(العكاز).ووصفت ضربته في سرعتها
كالبرق وكانت واحدة لايكررها ابدا وبعدها تري الفريسة المسكينة
مضرحا بدمائه ومستلقي علي الارض بكل استسلام ..لتبداء بعدها رحلة
طويلة من اجل البحث عن هذا(الشرس) قوة مابين كراكير الكمبو
وجقانينه الكثيرة ...وكان في غالب الاحوال يحظي بحماية نشطة
وصارمة من جل اهل الكمبو الذين يرون فيه حاميا لحمي الكمبو
وقادرا علي حماية نسيج مجتمعهم من كل التدخلات الخارجية..وكانت
قمة فائدته لاهل تلكم الفيافي هي تخصصه كشرطي تطوعي للحانات
والاندايات من الفوضي والجلبة التي كان يحدثها بعض السكيرة
خفيفي الراس الذين يكونوا قد ذهب العرقي او المريسة برؤوسهم بعيدا
و(خاصة سكاري المريسة لما تمثله من سكرة لو تفاعلت في قمتها
قد تصبح من اصعب السكرات واكثرها مقدرة علي برجلة
السكير..فسكرة المريسة مثل البركان العنيف الذي يكون في احضان
هدوء مريب يسبق العاصفة ..ويحذر الخبراء من انفجار بركان سكاري
المريسة بالتحديد لانها من السكرات التي يصعب العثور فيها علي حل
جذري اني)..فمثل اولئك الذين برجلتهم المرايس كان( قوة ) هو الوحيد
القادر علي كبح جماحهم وضربهم وبل تربيطهم ان اراد....
ونعود قريبا لنوادر صديقي الاسطوري قوة....

كيكي
عارف صاحبك الهندي مافي زول إشتغل بيهو
ماشي ساكي الهكرز عشان إضربوا سودانيزاونلاين

اها ده تقول عليهو شنو

وحاتك يالغالي نحنا قاعدين نعمل منو زول

التحيه لمنعم سليمان و كل الشرفاء

ودابكدوك

Quote: عارف صاحبك الهندي مافي زول إشتغل بيهو ماشي ساكي الهكرز عشان إضربوا سودانيزاونلاين

هلا يا دفعة ومشتاقين والله
تخيل يا نادر في عز النهار وفي جريدة يومية صحفي يدعو الهكرز لممارسة خرقهم للقانون
وبكل دم بارد في واحدة من اجبن ممارسات التحريض وارخصها...
جرنبدي رعديد عديم شغلة

Quote: احسن ننزل قبل ما يصل الهند

تفصل يا منعم

ما قلتو نوبة

تعرف قالو واحد من الجماعة القلاد بتاعين ناس الهندي

اتصل على اخر لحظة قال ليهم دي شنو الهبالة البسوي فيها الود ده

اخر الزمن يشيل حالنا ( )

حبيبنا كيكى
تعرف يارجل، كنت كالعادة مشغول بامور الدنيا ومحدثاتها ظانا (كالعادة ايضا) اننى سأحمل بعضا من نعيمها معى الى دار الخلود. وقد عدت قبل قليل لأفاجأ بهذا البريد التضامنى العنيف ....

التحية للهندى!!
طالما انه ساعد على اخراج مكنونات صدر كيكى لامتاعنا بهذه الكوكبة الفذة من نساء ورجال شعب السودان المسحوقات والمسحوقين حتف انوفهم بلا جريرة ارتكبوها سوى جريرة الفقر والتى اجتهد كافة الحكام (مع اختلاف تراتباتهم ودرجاتهم وانتماءاتهم السياسية والاجتماعية والرياضية والفنية ايضا) ومنذ ماقبل الاستقلال على زيادة فقرهم والاجتهاد فى زيادة تهميشهم.
بالله تأمل معى هذا الشريط ...

Quote: عوضية رتينة خضر رتينة ام الحسن حيدر هبشة فايزة جاد الرب او( فايزة كبك) او ( فايذة) وطفلتها ارنوبة الرضية برى عمر كرجول هرمسة الصراف حواء ليمون جنجويدة عائشة بنت العوض عواطف بنت سكينة الزيارة بنت تمبك عمر لصقة ضابط التحري زاهر راشد كرشة (كرشة ود الهرام)

واخيرا وليس آاخرا

Quote: قوة

نموزج لود البلد الشهم الذى يدافع عن ارواح الناس وممتلكاتهم الامر الذى عجزت الحكومات المتعاقبة فى فعله
ولقد اضاف خليل

Quote: بت مورلي وبت صابون حسن ماكردة جماع الرزيقي وابو صقور الابي القراية وباعة اللبن ناس ود اب سلس ( ووالده ) ابوسلس صانع العناقريب والخضرجية ناس الكعوك واحسن من يعمل البلاستر في العالم عمك (درية) والطلبة بتاعه ( التوم عب القمر) وعبده تامرجتا (درب العشق في جلنقي)

Quote: و ستات الشاي بحسهم الامني الفطري قادرات علي تفزيز الامنجي من الزبون وجاهزات موية ونور بالموية السخنة وجمر الكانون لسكبه في وجوهم

ليس ستات الشاى وحدهم بل كل شعب السودان بمافيهم

Quote: مستورة بنت قنيرة

التى جاب سيرتها هارون دياب

عاتب عيك ياكيكى لاهمالك ايراد تفاصيل عن حياة

Quote: حواء ليمون

هذه يارجل ليست ممن يمكن المضى بدون ذكر جانب او اكثر من شخصيتها

شوالات الحب تصلكم بالبريد المستعجل
منعم الجزولى

Quote: حواء ليمون

الف تحية اخي عبدالمنعم
ونشكر حضورك الي هذا الكرنفال التضامني الذي عبق بملح الارض وسادتها
الناس الشايلة من طين البلد دعاش بساطتها ويحبون الحياة والنبل رغم الفقر والظلم
وجور السنين...
وحواء ليمون نفحة من النشاط والحياة في اعلي مراتب سهلها الممتنع ولقد تحدثنا عنها يا منعم في كمبو الري حكايات سوفيت واخريين ما يلي


تكلمنا عن الثنائي المدهش بلية وجوك والان لا بد من ذكر الراس الثالث من هذا المثلث الذي احتكر هذه الصنعة العجيبة ويجيد فنون تسويقها ويمكن ان ينافسو (جون وكر)
وهنا تبرز حواء ليمون التي تتميز طريقة توزيعها علي فهم عالي لنفسيات الرواد هي الاشاعة وجذب الرواد بمختلف الطرق كانت اكثر تلك الطرق هي احتكار المدهش( سكسك) واطلاق مقولة لقد مر سكسك (بهنا امس) وكان روادها من البسطاء سائقي الجرارات الزراعية وعمال المصنع المهرة (وباخوس) وكان مجلسها يعج بظرفاء تلك البقاع ويتبادلون القصص..والغناء والدوبيت واشعار وقصص الغرام ومغامرات قطاع الطرق والهمباتة وكان (علمها لاينزل ابدا) وتنزيل العلم كانت دلالة علي ان هذه المنطقة محجوزة لشخص معين فحانة حواء ليمون..كانت
مفتوحة لكل الناس بمختلف اجناسهم وديانتهم وثقافتهم

كيكى انت زول رائع جدا
كتاباتك ممتعة
توصيفك للشخصيات توصيف روائى قدير
والمكان عندك مفتوح على الواقع
بالجد اندهشت لشخصياتك رغم انك (ماجادى) لكن دى كتابة جادة ورائعة جدا
اعجبتنى شخصياتك النسائية كلها واحببتها


كلام تحت تحت


ومثلما تضامنت مع (عب منعم سليمان )
ارجو ان تتضامنوا معى فلم اعد اعمل فى الصحافة (لا زلط ولا شرق )
بقيت شغالة فى مدسة (ابتدائية _ وحضانه) من الصباح ( برضع الشفع اللبن حق امهاتهم ، وبغير الدايبر ، وبغسل الوشوش من لامؤاخذة المخاخيت ) ومسكينة كمان قاعدة فى بلاد الكفر والنصارى
اها ما مستحقة التضامن ؟ يعنى كان الهندى عرف انى دى شغلتى ووووووووووب على اماتى

Quote: ومثلما تضامنت مع (عب منعم سليمان ) ارجو ان تتضامنوا معى فلم اعد اعمل فى الصحافة (لا زلط ولا شرق ) بقيت شغالة فى مدسة (ابتدائية _ وحضانه) من الصباح ( برضع الشفع اللبن حق امهاتهم ، وبغير الدايبر ، وبغسل الوشوش من لامؤاخذة المخاخيت ) ومسكينة كمان قاعدة فى بلاد الكفر والنصارى اها ما مستحقة التضامن ؟ يعنى كان الهندى عرف انى دى شغلتى ووووووووووب على اماتى [

هلا ومراحب يا سلمي
وتحياتي وانتي تاتين من البلاد البعيدة مثل الدعاش الذي يهطل مودة وحنان
والفة بقيت بيننا عند مرورك الباهي بارض منفانا القاسي...
ويا سلمي اهو بنجي نتونس مع الاخوان ونجتر ذكريات وايام هذه الشخوص التي بقيت في جدار الذاكرة
الذي اتلحس...
وشكرا علي كلماتك التي كبرت راسي (جنس كبر)..
وشالتني الهامشية وقررت اني اتضامن معاك تضامن ما حصل
واجيب معاي متضامين جدد اشهرهم (بت قادم الكوافيرست) التي دقت صدرها وقال بت الشيخ سلامة ما بخليها
تضاير الشفع براها..(انا كمان ح اضاير شعر الحروم البجيبن عيالهن وببالوا بيهو سلمة سلملم دي)...

بت قادم الكوافيرتست
كل راس امراة لم تمسه انامل بت قادم يعتبر في تلكم الفبافي راس بور وسبة لاتطاق في وسط
الكرنفالات والاعراس العديدة التي كانت تضج بها تلكم البلاد..وبت قادم زولة تمتلك ناصية
الابداع الفطري وامراة كاملة الدسم بجثتها المكتنزة وحديثها الموغل في الغنج والدلال
بجانب نضافتها التي تضرب بها الامثال ورائحتها الي تسبق مجيئها الي كل مكان بعطرها
المميز المحتوي علي بخا ر الطلح والروائح البلدية ذات الرائحة النفاذة ومذهبة للعقول..
هذه اللوحة البت قادمية جعلت ادم تمباك في فترة هووسه الزيري يردد وبمرح
(والله يا باش لو لقيت بت قادم ده مشطاني).....!!!!!!!!!!!!!!!!!!!!!!!!!!!!!!!!!
ولعل تمباك قد اعجبه جلسة المشاط المليئة بالدهشة التي كانت بت قادم
تقيمها بمهنية عالية وحماس كبير واحتضانها للنساء امامها في عنقريب تحرص
بت قادم ان يكون عالي النضافة لترسل اناملها الذهبية بين خصلات تلكم الشعور القرقدية
ذات الملمس الخشن وتحولها الي لمحة جمالية تعطي نساء تلكم البلاد انوثة افريقية
طاغية....!!!
اكثر ما تسرب الينا عن الكوافيرست المدهشة بت قادم انها تعلمت هذه الصنعة
من امها حواية التي قيل انها كانت صرعة ومودل لا يوصف في بلاد بعيدة
قبل مجيئها في رحلة غامضة الي هذه البلاد برفقة ابنتها ذات الاصول الغامضة
لتتحول حواية الي عجوز منتجة للبروش والقفف وتجيد صناعة الطواقي بحرفنة عالية
وتبقي بنتها الشهيرة ببت قادم وريثة شرعية لمهارات حواية التي وصفت بانها
كانت بارعة ولا تنافس...!!!!!
تنشط ويروج سوق بت قادم في الافراح التي كانت غالبا ما تاتي مع مواسم الحصاد
وعندها يكون ذلك المجتمع في كامل تة توهجه وتصبح النساء فرحات بالكسب الكبير
وتزداد خصوبتهم وتمتلي رغبتهن للخصوبة وابراز الانوثة حتي يكافي الرجال المنتجين
والذين عادوا من رحلات عمل شاقة في ضواحي القضارف كجنقو حربي او التجمل
للاصدقاء في جنقو عوضية الذين قد يكونوا قد عادوا من مدارات ليس ببعيدة فلابد لهم
ان يجدوا مبتغاهم من هذا الجمال المدهش والانوثة التي قد تكون الحقول قد اخلت بمعيارها
بفعل مداومة النساء للغيط ومعاشرة الخشونة والدرش دون التفكير في الجمال الانثوي الذي
ليس له سطوة في ظل الانتاج والعمل ....!!!!!!!!
اكثر ما يعكر هدو وصمت بت قادم هي الشوشرة والاشاعات المقرضة التي كانت كاويك
تطلقها ضدها في سماء ذلك الفضاء وربما تلكم كانت اسقاط لغيرة النساء التاريخية منذ زمن بعيد
ولقد كانت كاويك شديدة الحساسية تجاه من يشاركها سريرها الليلي في حضن رجل اختارته هي..
ولعلها تريد الانتقام لتلكم الحادثة الشهيرة التي افسدت احدي ليالي جولاتها الشهيرة ليلا لتكتشف
ان من اختارته كان في احضان بت قادم....ومن ذلك الحين صارت كاويك اكثر عداء وبثا للاشاعة
المغرضة ضد بت قادم وحتي استايلات مشاط بت قادم التي كانت تبدع فيها باخلاص صارت
كاويك تشكك في جدواها......عندما سمعت وهي تعاير حواء المجروس.....بقولتها الشهيرة....
والله براسك الخربتوا ليك بت قادم ده شوفي ليك زول يدق ليك جاز تاني...!!!!!!!!!!!!!!!!!!

فعلا يا ود العمدة
اخر الزمان بتقوم للناس ضنبة وياتي من اقصي المدينة جاهلا مثل الهندي والزومة
يشيل حال الناس لايدهم ولا كراعهم

كيكي
مساء الخير
عارف ياحبة ابيخ حاجة بوست جميل ولذيذ ذي ده يخربوا لينا...زي ديل

Quote: تخيل يا نادر في عز النهار وفي جريدة يومية صحفي يدعو الهكرز لممارسة خرقهم للقانون وبكل دم بارد في واحدة من اجبن ممارسات التحريض وارخصها... جرنبدي رعديد عديم شغلة

المصيبة انوا بوردابي وبيكتب في المنبر وبعدين يجي يقول ليك قفلوه( حقيقة الاختشوا ماتوا من زمااااااان )
ابقي واصل
هارون دياب

Quote: المصيبة انوا بوردابي

هلا يا هارون
وفعلا دي المصيبة الكبري يعض الايادي التي امتدت له اسفيرا
ولكن اهلنا قالوا (مرمي الله ما بترفع)..
وطبعا الزول كان هنا يا هارون هزم خطابه البائس شر هزيمة ولم يجد له قدما في هذا الموقع العالي الاستنارة لذا نجده يمارس الانتقام..

يا الله ياااا كيكي
الزول دة تاني الليلة جاب سيرتي وسيرة ناس عوضية رتينة في عموده
الواحد ما يشرب شاي في البلد دي وللا شنو ؟




°°°°
والله لو واحد القا طيارة نفاثة اكان شربت الشاي طااازج ومن مزارعة في الهندي وكينيا
وسيريلانكا ..
شاي اب رتينتين من مزارع سيريلانكا الخضراء

Quote: الزول دة تاني الليلة جاب سيرتي وسيرة ناس عوضية رتينة في عموده الواحد ما يشرب شاي في البلد دي وللا شنو ؟

هلا يا بيجو 404
وانا قريت (حصاد البلاغ) واليتو حصاد السواد
والهندي ده طلع بتاع جاكات وكضاب كضب السنين
وعمل دراما عالية التسبيك عن الشارع الذي هاج وماج وغضب وارغي ثم ازبد
وقمة الاسفاف والدجل هي قصة الضابط الذي اتي وهو مفصولا الي موازرته ...

...انا شخصيا يا منعم احس بالاسف تجاه هذه العقلية العجيبة التي يعيش فيها مثل الهندي عزالدين هذا
فهي لو وجدت مساحة وزمن لدمر السودان دمار تقيل...

يا كيكي اللهم لا اعتراض في حكمك يا الله

خليني امشي اشرب لي شاي عند علوية ست الشاي واجيك راجع


سمعت تحت تحت الحكومة كلمت امن المجتمع بالقبض ع شاربي الشاي
وحركات الهندي دي مقدمة ..
الله يهون نشرب شنو بعد كده
اوع يكونو عاوزين يعلمونا الخمرة
لعن الله شاربها

Quote: سمعت تحت تحت الحكومة كلمت امن المجتمع بالقبض ع شاربي الشاي وحركات الهندي دي مقدمة .. الله يهون نشرب شنو بعد كده اوع يكونو عاوزين يعلمونا الخمرة لعن الله شاربها

يامنعم ستات الشاي واخريات واخرين
مقبوض عليهم منذ زمن بعيد
فالحكومة وسياستها هي التي جعلهتن يقيلن في هجير الكانون
ونار المنقد..
ومهما كان القبض الذي حتما سياتي فلم يكن اكثر قسوة
من رفع الحكومة يدها عن كاهل المواطنة الغلابة
كلوا بقي بالشي الفلاني
لا تعليم مجاني
لا علاج مجاني
ولا تنمية مجتمع
ولا زكاة لا صندوق زكاة شايف شغلو
...
خليهم يقبضوا اصلوا القبض حاصل من زمااااان

لا فض فوك يا صديقي كيكي

Quote: لا فض فوك يا صديقي كيكي

شنو فض فوك ولا فض خشمك
انا اشيل واجيب ليك في المتضامين النادرين اجي القاك ركنت البوست وخليتو يمشي اللقيط
والقاك عامل عشرين مداخلة في بوست (سوركتي)...
دي الحركات البتخلي الهندي ياكلكم ذاااتو

كيكي
مساء الخير

Quote: انا اشيل واجيب ليك في المتضامين النادرين اجي القاك ركنت البوست وخليتو يمشي اللقيط والقاك عامل عشرين مداخلة في بوست (سوركتي)...

ماياهو ده المجنن ............ ذاتوا .
والله بي هناك جنس كسير تلج ..... وسماحة بطاقات وجنس تمسح كده ....!
وياناس عوضية رتينة ليكم الله .
وكيتن في نسرين سوركتي انا كل ماالقي عوضية رتينة رجعت وراء اديها ليك دفره .... وقول لي منعم سليمان خلي نسرين تنفعك .
ابقي واصل
هارون دياب

Quote: والله بي هناك جنس كسير تلج ..... وسماحة بطاقات وجنس تمسح كده ....! وياناس عوضية رتينة ليكم الله

.
هلا يا هارون
وشايف القصة زحمة شديدة بهناك (ياكافي البلا التقول السوق العربي)
عموما نحن من موقعنا الرتيني ده وفي حضور ناس عوضية
برضو بنرحب ونوكد وبنشجب

وعوضية الجات تتضامن يا هارون بقت في روحها ودايرة ليها زول يتضامن معاهامع زحم السوق العربي دي

في الغياب القسري للنجمة سكورتي
اعتقد ان عوضية رتينة وصديقاتها سيجدن ارض خصبة
ومساحة اسفيرية وريفة يا هارون...

واحنا ومن موفعنا الرتيني هذا كنا قد اعلنا علي خجل

Quote: برضو بنرحب ونوكد وبنشجب

سلامات ياكيكي ..

هلا والف تحية يا منعم
والف مرحب بحضورك الجميل الذي يرد الروح
وبالجد مشتاقين ليك يا منعم
تحياتي ليك وللاسرة الكريمة

عبد المنعم ابراهيم
صباح الخير

Quote: سلامات ياكيكي ..

يااخوي سيبك من كيكي , عاوزين ترحيب حار بعوضية رتينة والا سنهاجم بوست الترحيب بنسرين سوركتي وقد اعذر من انذر .
تحياتي
هارون دياب

عبد الكريم
سلام

Quote: ترحيب حار بعوضية رتينة

كيكي عليك الله كان ما كتبت لينا عن جبارة و عوضية الراقصان بتاعين الدويم ، اكيد بتتذكرهم

جبارة ده كان فلته في الرقيص
جون ترافلولتا شنو !
مايكل جاكسون ذاتو إمكن يكون إتعلم منو
فوق ذلك كان مهذب و محترم إلى حد كبير
تتصور كان العرسان في الدويم يحرصوا ان يأتي جبارة للرقيص في عرسهم
و كانوا يرسلو ليهو دعوة يحجزو عشان يجي يرقص ليهم
و لو مرة حضر حفلة و ما كانوا قدموا ليهو دعوة يجلس بتهذيب ولا يرقص ابدا.
و في مرات كثيرة يجي العريس و يكتشف ان جبارة و عوضية من ضمن الحضور و يمسك المايكرفون و يرحب بيهم و يطلب منهم ان تكون الاغنية التاية فقط لجبارة او جبارة وعوضية لو كانو مع بعض

ياخ السودان ده كان لذيذ جدا
إلا ان أتى هؤلاء


كيكي بعد ما تخلص ديل
أحكي لينا عن د. ميرغني بتاع يا فتاتي.

وعثمان الفنان بتاعين الجامعة
ما تخلي اي حاجة حلوه عليك الله كان ما حكيتها




سلام

عاشق بخت الرضا
عاشق الزمن الجميل

الأخ العزيز/ عبد الكريم

والله مستمتعين جــــداً ..
واصل ..

تحياتي،
خالد الأرباب

Quote: والله مستمتعين جــــداً .. واصل ..

الف تحية وشكر اخي خالد
ونشكر اهتمامك ومتابعتك لهذه السياحة بين الناس الطاعمة ملح الارض

Quote: جبارة ده كان فلته في الرقيص جون ترافلولتا شنو ! مايكل جاكسون ذاتو إمكن يكون إتعلم منو فوق ذلك كان مهذب و محترم إلى حد كبير تتصور كان العرسان في الدويم يحرصوا ان يأتي جبارة للرقيص في عرسهم و كانوا يرسلو ليهو دعوة يحجزو عشان يجي يرقص ليهم

ياسلام ياعمار علي (الجبره) اشهر واحرف راقص في العالم راته عيني
سالت عنه لاحقا احد ابناء الدويم فحدثني بوفاته فله الرحمة
راقص خفيف ومرن وعالي الهارموني وبحت حت تاريخي مع مرح
وجمال مدهش وسنعود اليه
والي اصدقائنا ناس ميرغني وعثمان البغني (اماني ام شعر)
وكل الناس الطيبة دي

Quote: يااخوي سيبك من كيكي , عاوزين ترحيب حار بعوضية رتينة والا سنهاجم بوست الترحيب بنسرين سوركتي وقد اعذر من انذر . تحياتي هارون دياب

هلا يا هارون
ومنعم حبيبنا طول من المنبر
والاشواق جعلته ياجل عودته الي عوضيتنا
وتخيل يا هارون (سوركتي ) موضوعها اصبح سراب بقيع
حسبوه ناس قريش وملاسي دهشة والق جديد
وعندما هرولوا وجدوا هنالك هكر ابن لذينة

تعيش رتينة
تسقط سوركتينا

Quote: تعيش رتينة تسقط سوركتينا

بعد إيه جيت تصالحني

التحية لكل اخواتنا وامهاتنا العاملات بشرف
لا يعرفه مترفو الانقاذ اكلي السحت والمال الحرام ..

Quote: بعد إيه جيت تصالحني

نعم يا زهير
ورتينة جنها وجن تتباع الي الهكر

Quote: تعيش رتينة تسقط سوركتينا

عفوا منعم
رتينة حالفة ما تديك وش تاني
امش شوف ليك (سراب سوركتي ينفعك)

Quote: التحية لكل اخواتنا وامهاتنا العاملات بشرف لا يعرفه مترفو الانقاذ اكلي السحت والمال الحرام

الف سلام وتحية اخي عادل
ونشكر حضورك الطاغي الي مهرجان البسطاء الناس الذين باسمهم يقيم سلطان الزيف دولته
ويمتص رحيقهم سحتا وحرام...
وهو يا عادل سادة الارض الحقيقين وتوابلها وملحها
وعانو ما عانوا من تنكر النخب لهم وامتصاص حقوقهم

ياعمار يس لحدي ما اجييك للجبره
هاك اصبر بالثنائي المدهش ده شوية...


محكمة وكرنتنغ والرقص الجميل

ان وجدت نفسك في المدينة تلكم القريبة من (الكمبو) ليلا واتيحت لك الفرصة ان تكون شاهد علي حفل في ذلك المساء لامتلات طربا ودهشة وانبهار حتما ستشاهد راقصيين تقف عندهما طويلا وتسال عنهم وفورا رجل في الاربعين من عمره ضخم الجسم وخفيف الحركة له ملامح خلطة عربية وزنجية واصلع الشعر في كل الاوقات ذلك هو( كرنتنغ) الذي يعمل موظفا صغيرا في بوستة تلك المنطقة ويودي عمله بكل الفة وجدية اما الراقص الاخر الذي ستسال عنه فانه محكمة (المساعد الكبير) لسنيين طويلة ولم يترقي حتي الان الي (سواق) ولكنه يفوق الجميع رقصا وما وجد عرسا الا وكان (محكمة ) هو فاكهته عمره يقارب رفيقه(كرتنغ) وتجمعهم صداقة حميمة انها صداقة الموهبة المشتركة ياتي دائما فناني تلك الفيافي من المدن المجاورة مثل سنجة وسنار والرصيرص ويتفنون في الغناء والعزف علي الة (المندليين) ذات الالحان الشجية ويرافق كل ذلك عزف متفرد علي طبلة الايقاع (الدربكة (ويغنون اغاني تتراوح مابين التقليد لوردي عثمان حسين وخوجلي عثمان وبعد الاغاني المحلية) سنجة انا قلبي ولع نار) و (من قلبي بدعو لها في القضارف يدوم سعدها) (ثلاثة سنة يوم وراء ويوم بصبر شديد منتظرك انا (اغاني تغني ويفعل فيها وتر المندلين افعاله ويهج الجميع في رقص وهجيج رهيب ولكن يبقي محكمة وكرتنغ هما العلامة المميزة والرقص الممتع والسهل الممتنع رشاقة وخفة راقصات البالية وخفة دم وتحركات مدهشة تودي بكل حرفنة تنوع في الرقص اثناء اللحن الواحد وقد تشاهد (السامبا) و(الهورس) و(الكشف) و(البامبنغ (و(العشرة بلدي) في لحن واحد ويتبادلون المراكز والمواقع فيما بينهم في خفةعالية وانسجام اعلي وسط انزواء النساء ومشاهدتهن لهذا الثنائي العجيب بكل اعجاب وغيرة ايضا.
كان محكمة ياتي الي الحفل بعد ان يكون قد مارس هوايته العجيبة في (ركوب الفيل) وركوب الفيل هو مصطلح شعبي واسع الانتشار يطلق علي الذين يتعاطون دخان حشائش(البنقو) وهي مخدرات شعبية شديدة الشهرة في السودان تحت تاثير هذا المخدر ينسي (حكومة) كل شي ليجود رقصاته وينسجم مع صديقه كرتينغ الذي قيل انه لايتعاطي مثل هذه الاشياء بكل يسكره فقط الطرب واللحن الجميل رغم رقة ولطافة محكمة وكرتينغ الا انهم لا يترددون في افتعال المشاجرات وخاصة مع فرقة الغناء ان لم تجود عملها وساعتها يقومون بالدخول في معركة حامية الوطيس وردع الفنان الذي لا يجيد الغناء مما جعل الكثير من الفنانييين (النص نص) يتحاشون الغناء في حضرة محكمة وكرتينغ حراس الفن الجميل في تلك الفيافي.

الظريف كيكى
أهو منعم ..هندى رجعنا لامتاعك ..
ومع ناسك العجيبينن ديل.. الظاهر منعم حينسى موضوعه مع هنديو
متشكرين كيير ياكيكي... و متضامنين كمان

Quote: ومع ناسك العجيبينن ديل.. الظاهر منعم حينسى موضوعه مع هنديو متشكرين كيير ياكيكي... و متضامنين كمان

الف شكر ومرحب بيك يا بشير
وحبابك في مهرجان التضامن العجيب ده
ومنعم خلاص ومنذ حادثة(سوركتي) نسي ليك هنديو واحتمال يكون نسي روحو ذاااتو

كيكي

رتينة ايه
وهندي ايه
وسوركتي ايه


قالوا امس جاء واحد توووووش فتح بوست وعملنا في الامن مع قوش وبوش وما عارف ايه
باللة لو قريت البوست المحذوف دااك اديني خبر والجماعة ادونا رتبة ولا صف ساااي
اشوف فيهم يوم وفيك انت ذاااتك

Quote: قالوا امس جاء واحد توووووش فتح بوست وعملنا في الامن مع قوش وبوش وما عارف ايه باللة لو قريت البوست المحذوف دااك اديني خبر والجماعة ادونا رتبة ولا صف ساااي اشوف فيهم يوم وفيك انت ذاااتك

والله يامنعم 0(انا مافي معلوم)..
لكن يازول لو طلعوك بتاع (امونة) بالله ادينا عرض اكتافك
يا رعديد
وانا من زمان اقول الصلعة دي انا شفتها وين...

.....
منعم يااخي ما تشيل هم للمنبر ده
ممكن يطلعوك ايتها حاجة في هذا الزمن الردي المنحط

ياسلام ياعبدالكريم ,

دايماً تسافر بينا البلد , وتدخل جوه الحِله !

مليون سلام لى عوضيه وفايزه , وعمتنا أم الحسن وعم خضر رتينه .

إلا قول لي ياعبدالكريم , مافى خبر من أخونا ( حيدر هبشه ؟!!! ).

يتضامن ايضا المهمش الاكبر الامين قدوم الابريق ولقبه سببه شلاليفه الكبيرة

وقدوم الابريق من المهمشين خفيفي الظل

حيث تاخر جدا في الزواج والجماعة بشاغلوهو ( يا الامين اظن ما عندك شي)

الامين قال ليهم ( علي الطلاق الشفع البقولو كيس كيس ديل في الحصاحيصا كلهم اولادي)


ويتضامن النيل جاه الله المهمش الاعظم الجزار العاتي

ايام التسجيل للانتخابات ذهب النيل للتسجيل اسمه في كشف الانتخابات

فساله الضابط اسمك منو

قال ليهو النيل جاه الله

الضابط قالو ليهو جاه الله منو

النيل قال ليهو ( انت يازول مجنون وكت لقيت ليك (عب) عندو ابو كمان بتفتش لي جدو

ولا ننسي

الجنة بت الرضي

احسن من يعمل لبن رائب بالسعن


كابو ايه ومراعي ايه

Quote: وقدوم الابريق

Quote: النيل جاه الله

Quote: الجنة بت الرضي

يا سلام ياخليل دائما بتغيب وبتجيب ناس رائعة مدهشة خلاص
قدوم الابريق والجنة بت الرضي وجاه الله النبلاء يصلون الي الصفوف الامامية في
كرنفال البسطاء وسادة الارض وملحها ولهم مننا كل الحب والتقدير..

Quote: إلا قول لي ياعبدالكريم , مافى خبر من أخونا ( حيدر هبشه ؟!!! ).

يا سلام يا مامون يا جميل
سالت عن زول والله..
وهبشة سافر رحل يامامون وعوضية بنقتها الكثيرة كرهتو قعاد الفريق..
سافر في بدايات موسم الحصاد مع الجنقو وعاد الجنقو ولم يعود معهم صديقي الجميل (هبشة)
فقيل انه سافر المدينة وتواترات اخباره واصبحت غامضة
اخريين قالوا بانه طعن في خناقة في اندايات حواف القضارف
واخريين اكدوا بانهم شاهدوه يحمل صفيحة بها (ماء) يبيعها للمارة في شوارع سوق الخرطوم..
حيدر هبشة راح يا مامون هل اكلته المدينة
ام ضاع في كراكير المرايس
ام؟؟؟
انا ايضا اسائل النجوم عن صديقي الجميل هبشة

"يااخوي سيبك من كيكي , عاوزين ترحيب حار بعوضية رتينة والا سنهاجم بوست الترحيب بنسرين سوركتي وقد اعذر من انذر .
تحياتي"


العزيز..هارون دياب




لك التحية والتحية لعوضية رتينة..في وقفتها النبيله مع نشيد الغلابة
ولكل نساء بلادي الهميمات..لانهن ناضن من اجل استمرارية الحياة لابنائهن ولاسرهن..تحت ظلال انظمة لم تكتفي بجعل الغالبية تحت خط الفقر ..بل بملاحقتهن
وتشريدهن.. واستغلالهن .

لكن ياكيكي عوضية دي شافت صورة بيجو مع الشيخ ?

Quote: لكن ياكيكي عوضية دي شافت صورة بيجو مع الشيخ ?

هلا يا منعم
وده السبب الخلا عوضية تتضامن فقط
فقد كانت تريد القتال مع منعم بيجو ولكن عندما تذكرت تلكم الصورة الضاحكة
مع ابو الشيوخ تراجعت عن القتال بجانبه خوفا ان يكون (الراجل ده هكر)

وانت يا منعم
شفت صورة عوضية مع الشيخ ؟




مشتااقين يا رجل
وشوقنا الاكبر للفاضلة عوض وض

سلامات يا منعم

انا شفت صورتها متضامنة معاك..
انت سربت صورة كمان للشيخ?

وهذا هو المساعد (جنا جداد) يصل الي مهرجان التضامن..
وبيديه (ليبر) شعارا لمهنته النبيلة..


عاش طفولة مرحة علي اطراف(نامورة) تلكم البركة المائية الشهيرة التي تحف
اجزاء كبيرة من بلدته ذات الصدي العالي وكثيرة التردد بين اروقة المثقفين ورجال
الحكومات الذين يمهرون الاتفاقات والعهود متحدثين عنها بحماس عالي ولغة جهاد تتيح
لهم حمل السلاح والقتال ودونها القتاد..
وعندما ضرب احد الالغام الارضية التي نصبتها قوات انانيا في ذلك الزمان وبقيت حبيسة
الارض حتي فجرت بعنف يشابه السم الرعاف احدي اللواري السفرية القادمة من صوب
الشمال . في ذلك المكان وجد (جني جداد) ضالته في احدي الاسر المسافرة شمالا ليحقق
حلمه الطفولي الذي كان يراوده كثير بالسفر الي نهايات المراحل التي تصلها تلكم (السفنجات)
والهواستن السفرية التي تتردد كثيرا علي الطريق الرابط ما بين شمال بلدته ويغاول في
احدي تكويعاته اطراف (نامورة) واكثر ما يدهش (جني جداد) وظل حلما يقرع اجراس تمرده
الطفولي كثير هو ذلك (الفتي) الذي لا يختلف عنه كثيرا في الملامح والشبه وتجده دائما
في مقدمة اعلي تلكم (الدابة) المتحركة في منطقة علمنا فيما بعد انها( التندة) ولعله بذكائه الفطري
اكتشف مبكرا تميز هذا القابع علي ذلك السفح المتحرك وعلاقته الوطيدة مع (الهوستن).....ونعود

دخل (جني جداد) عوالم مدينته الجديدة وعشق التمرد وممارسة احلام السفر علي سفح
الهوستن فاكثر من التردد الجرئي علي مواقف اللواري السفرية في اطراف سوق تلكم المدينة
وكان ينظر للذين تم تجنيدهم علي خدماتها (كمساعدية) بكل اعجاب ودهشة وينمي دواخله كثير
بالعمل والسفر معهم الي عوالم جديدة...وخالط ابناء المدينة الكثر الذين لفظتهم مدارسها في مراحلهم الاولي لعدم تواجد الطموح تجاه الشان الاكاديمي واهمال وتفكك الاسر لانغماسها في تفاصيل الحياةو التي صارت اكثر قسوة ومشقة منذ وصول صدي السياسات الاقتصادية التي اعلنها ذلك الحاكم باسم الله الجديد في الخرطوم

انهم ملح الارض وصهيل الفقراء وسادة الزمن الردي و وعصرتفكك الحكومات
وانحراف المثقفين الذين ذهبوا للمدارس ذات صباح بعيد ليذهبو بوجدانهم بعيدا ايضا
عن هموم والام هؤلا واحلامهم وشعرهم القذر الذي ينعق فوقة (القمل) والمرقوت يجد
له مسارات امنة في جغرافية تلكم الاجساد البالية الهزيلة التي اضناها ناموس الملاريا
وفيروسات الامراض التي توفر الحكومات لهم الموت بدلا عن امصالها الوقايية..
انها كلامات الزمن الردي وحكاوي الغبش ونقرشة خلف جدران الذاكرة لنسافر عبر المسافات
الي ازمنة وعوالم وحكايات الزمن الردي... الي ملح الارض وحكاويها...

لمحة من بت قنيرة وتحية وجلبة وكيتا صارخة لوصولها وهي تستصحب كارزيمتها التاريخية في مهرجان التضامن ضد الهندي الذي يزدري مهن القاع..

Quote: لم تكن مستورة دخيلة علي هذه الصنعة بكل كانت جودتها واخلاصها العالي لصنعة الكبكبة والسنسنة والمشك القادر علي در البان تفي كل تلكم الفيافي .كل هذا التراكم والخبرة وعلو الكعب اتي عبر ورثة محكمة ومثقلة بالهموم من اجل الزبون والسوق الرائج ورثته (مستورة) من جدها ود قنيرة رائد العمل الخمري ومالك للعديد من الاندايات في تخوم تلكم المدينة الكبيرة المليئة بمحبي العرقي بكل انواعه... وقيل ان ود قنيرة في تجارته ومهنته العجيبة تلكم حرص تمام الحرص علي تدريب (مستورة) ومنحها كل المعادلات السرية والمقادير والفترات الزمنية والمكانية والذكاء الاجتماعي القادر علي السيطرة علي مدينة باكلمها عبر (كاس وكباية وقرعة ومشك) اول ما يتجاري اليه هم الافندية والضباط وسادة المدينة الذين تهمهم (سمنة ابقارهم والبانها) ويتفاخرون بها اسوة بزينة نسائهم من الذهب والفضة واللحم التقيل..ونعود

انداية مستورة بت قنيرة العجيبة..!!!

الكجيك وفار البوص والنونقق طعام الفقراء وهبة الطبيعة اليهم عندما عز الطعام الميري
لابد من حضورهم العالي في هذا المهرجان التضامني...

بهبابة من سعف اشجار الدوم ضاربة جذورها عميقا في فيافي الصعيد البعيدة
شاربة من موية النيل الازرق لمن يرسل رزاره للضفاف عند قيسان, كرمك, دمازين ,رصيروص
جلقني, ام درمان, فلاتة وبنزقة, وود النيل محل القمري (قيل) وبعيدا حتي القربين وفيافي الصهباء نواحي ضيعة (كمال جار النبي)....
بتلك (الهبابة) ولع فيني (جمر الحي) واشتهيت وجبة من الكجيك وشواء (فار البوص) وكديس الخلاء وذلك المخلوق الذي يشابه كثير (اللاكوست) المرسوم علي جنبات فانلات اولاد البندر عندما رايتهم في زيهم الانيق في ذلك الزمان البعيد.....
شوال فرش لا ادري لماذا (شوال) وليس الا شوال فقط..لعل ذلك اتيا من فوبيا ذلك المكان الذي ينشط فيه الالاف من البشر وتحرق الاطنان من محروقات البترول وتدور المئات من المحركات وعتاد غربلة الارض
ليصبح الناتج هو (شوال)....
فليكن شوالنا مخلفات لدقيق ردي (السحن) وتمارس بين مسامه (حشرات) عسلية اللون اوجدت لنفسها مساحة داخل تلكم الكيلات التي سحنتها طاحونة (ود اب كريعة) وحولتها الي بودرة الذرة التي في (استاندرها)كان عليها ان تكون بيضاء اللون ولكن هي الان تميل الي لون العسل في اطراف تلكم الالوان المتمردة علي لون البودرة الاساسي...... انه طعام الفقراء (البني كربو) هو عجينة ذلك الدقيق الردي الصناعة الملي براغيث الارض وتصنع منه عصيدةقادرة في ادني معدلات تماسكها في تجاوز اختبارات السماكة للصخور في اعلي معامل قياسات التماسك دقة وكفاءة وانضباط..عصيدة يمكن ان تطلق عليها بكل ارتياح انها يمكن ان (تفلع) وقادرة بكل يسر علي تهشيم (راس) ادمي ان استعملت في خناقة ليس ابتزالا لها بل دقة في توصيف تماسكها وصلابة ايوناتها..
في تلكم الفيافي وعندما يرسل النيل الازرق باطنه عبر فيضانه النشيط او عبر مراكب مدهشة يقودها رجال يغيبون خلف الشفق الي مسافات بعيدة في سطح ذلك النهر ويعودن الينا حاملين اطنان من (السمك) وانواعه المدهشة تباع علي ضفاف النهر الذي يكسوه(الطين الازرق) ويلتف حولهم سماسرة الاسماك واصحاب المطاعم ومخزني السمك ومحولينه الي اسماك ناشفة قادرة علي البقاء لسنين عديدة حتي تجد لها سوقا يحملها الي بيوت وكنابي وقطاطي الفقراء في اطراف القري الكثيرة ومعسكراتهم المنتشرة في غيط ذلك المكان المدهش الجغرافيا والمناخ.....
اذن انه الكجيك .....

الجلوس ارضا (شوال فرش ) و في انتظار الكجيك...!!!

جلبة وصراخ هستيري وفرح بادي علي المارة في الطرقات
وافتحوا الابواب انه حضور سلطان الكينغ اليابا فكي الاسطوري صاحب الالق والكارزيما
والتسامح الجميل اتي بجوقته وتاريخه العتيد الي هذا المهرجان...

في ذلك الحي الصاخب وعلي مرمي حجر من السوق الاسطوري (رجال مافي) يقبع دكان اليابا فكي
سحنة اتية من الغرب الافريقي مشحونة بجرعات من المرح وحب الحياة والعمل الشاق كالنحل في بدايات
تشيد خليته ثم صرامة بادية وقلق موروث من الترحال الذي بداء من عمق (كانو) مرورا بفيافي ومدن وضياع عديدة حطت اخيرا علي اطراف رجال مافي......
خمسيني العمر وحليق الراس دوما هو اليابا فكي في اطلالته الباكرة لادارة تجارته التي كان اغلبها هي البافرا ثم العسل الاصلي وهنالك ايضا عسل يصنع محليا في براميل متسخة تري دوما النحل يجوب في دائرة
فتحتها التي يخزنها اليابا في كراكير بيته ذات الجفرافيا المتغيرة كل جمعة واخري
مامن (كينغ) وهو تمساح سبح في نواحي ليريا الا وكانت رماح الصيادين من اللكويا والباريا له بالمرصاد
في واحدة من اروع فنون الصيد الاستوائي وامهرها ثم يسلخ ويملح جلده ليحمل الي اليابا فكي في حضوره الاول الي تلكم المناطف الاستوائية ليذهب به الي اسواق الجلود الشهيرة في اوساط امدرمان لتهطل الاموال الكافية لتشيد تلكم الضيعة الغنية بالانتاج والعمل والافريقية الصاخبة في ممارسة مهنة التجارة والامتزاج والانصهار بين بقعات القارة المختلفة..من عمق كانو الي اطراف الرجال مافي,,ولتبداء اسطورة التماذج وسيرة اليابا فكي... لم يكن اختيار تلكم النقطة ذات الحركة التجارية النشطة في وسط ذلك الحي المغمور اختيار ناجح لولا تلكم الجولات النشطة التي قام بها اليابا فكي بصحبة صديقه الصائد العجوز واني الذي هجر مهنة الجدود
وتحول لشريب مداوم لجعة (الكانجي مورو) ولكن اثره اليابا بحكاويه الموغلة في الافرقة..عن اسطورة
دونا دواري
وقرقر مسو
واغاني الرمتو رمتمتم التي كانت تخلد للسحرة الجوالة فامتزج كل ذلك في تجوالهم المرح بين الفرقان
والاحياء لاختيار نقطة انطلاق اليابا فكي صوب الاستقرار والعمل الساكن وسط الاهالي...وكانت لياليهم
تتنهي الي ذهاب اليابا فكي الي المسجد ويذهب الساحر العجوز واني الي حانات تلكم المدينة المدهشة ليقضي ليله فيها ويرقض علي ايقاعات الترم ترم..

اين كيكي ؟

http://www.sudaneseabroad.com/vb/showthread.php?t=911

سرقو عوضية رتينة ايضا
في جولة قوقلية خجولة وجدنا عوضية تتهادي في احد المنابر وسط بعض الاخوة يجلسون في البنابر
يتداولون عن عوضية بنفس الملامح والشبه وبضبانتها ووياسلام يا خليلها ايضا...
موسف ومقرف ما يدور في هذه الاسافير
ومقرفين مثلهم ومثل المدعو الهندي عزالدين التي جعلنا نستخرج عوضية رتينة من كراكيرها

بالله شوف جنس السرقة دي !!؟
وانت مقرر تعمل شنو ؟
عالم ما بتخجل

Quote: بالله شوف جنس السرقة دي !!؟ وانت مقرر تعمل شنو ؟

انا شاكي يا منعم الزول ده يكون صحبك الهندي ذاااتو
سرق لينا عوضية دي
حليك يا عوضية السرقوك ودفقوا شاهيك في الاسافير

يا زول شاي شنو
والله ده حلبة ما يدفقا تاني

Quote: يا زول شاي شنو والله ده حلبة ما يدفقا تاني

معليش يامنعم
انا نسيت انك خبير

يض...
ليك الزبير

وعوضية رتينة في ظهورها وهي تتاسي علي موازرة (مسخوت) مثل منعم سليمان
صاحب هيك الفاظ

Quote: يض... ليك الزبير

هلا برتينة وهلا بيك يا كيكي

Quote: هلا برتينة وهلا بيك يا كيكي

هلا يا منعم
كيكي وعوضية رتينة مادين بوزهم متر ونص
لانو سعموا تحت تحت كده انو الشيوعييين قعدوا مع الموتمر الوطني
انت يا منعم الشيوعييين ديل كورتهم فكت ولاشنو

Quote: كورتهم فكت وللا شنو

قول لعوضية ما تتكلم في السياسة

والله يا كيكي اخوي الواحد بقا ما عارف حاجة
خايفين نصبح الصباح نلقا صحبك ابوساندرا بقا وزير الري
الري ذااااتو يا كيكي
احب الري واحب مدني السني
وسلملي ع عوضية

Quote: خايفين نصبح الصباح نلقا صحبك ابوساندرا بقا وزير الري

ابوساندرا وزير ري دي حتكون مشكلة
دي حيملا لينا ترعة المناقل (عرقي)
وتسالوا في البرلمان يقول ليك
نروي مما نصنع...

القصة فعلا ماشة علي وزن سعد باشا
(مافيش فايدة)..
وكدي الواحد ينوم ويصحي بكرة يشوف القصة دي ماشة علي وين

Quote: عرقي

هو لمتين حيشرب في السم الهاري ده



___

سمعنا تحت تحت انه لا شبكية لا يحزنون

الراجل عمي بالاسبرت

وزير اعمي يبقا زي رئيس اندونيسيا العميان ال شالوا داااك

حيروي القري والحضر

Quote: وزير اعمي يبقا زي رئيس اندونيسيا العميان ال شالوا داااك

عبدالرحمن واحد
وكلو يبقي عبدالرحمن ابوساندرا (واحد)..
تخيل بتاع اندونسيا داك زول شفت كبير وعامل ليهم جوطة كبيرة وكان زول موهوب...
مرحب با ابو ساندرا وزيرا للري والمجاري المائية
علي الاقل نلقي لينا شغل في الري ده(الما اشتغل في الري مدني ما اشتغل*)

Quote: وكلو يبقي عبدالرحمن ابوساندرا (واحد)..

صحبك اسمة عبدالرحمن بركات

يعني بشري عظيمة لاهل بركات ومارنجان وحلة حسن

ابشرو بالري يا اهل ودمدني

قد اتاكم وزيرا اعمي املح اقرن

فاذبحوة ولا تخافوا من النزفية

الحبيب / كيكي

مالقيتك في اي مكان ....
قلته اكيد حاالقاك عند عوضية رتينة ....
عشان اقول ليك حمد الله علي السلامة .
وقول للمطوفش خليل ....
تساهر بي الليل كلوا وتعمل حميييييييييييييل
طيب ياطارق غطي سعلب

الف حمد الله علي السلامه
وخلي ضحية ينفعك
هارون دياب

لا حولاااااااااااااااااااااا أنا كنت وين؟
و ما جاي تاني ، و حردان عشان ما تدسدسوا حاجاتكم
و تعملوها تحت تحت
و القعدة مع عوضية رتينة بنقعدها برانا و بنوصفها برانا

Quote: مالقيتك في اي مكان .... قلته اكيد حاالقاك عند عوضية رتينة .... عشان اقول ليك حمد الله علي السلامة . وقول للمطوفش خليل .... تساهر بي الليل كلوا وتعمل حميييييييييييييل طيب ياطارق غطي سعلب

هلا يا هارون سكورتا
والعربية مبروكة وهنية ورضية
وحاجزنها مشوار لام سعيد عشان نجيبها ليك (تكركب)

عدنا يا هارون ومركب مخفي ودافن دقن
وحتما ساظهر وابان واتمني ان يكون لي الامان
واغطي الثعلب
خليل مشتاقين ليهو شوق السنين ولكن طفش وين الفتي النحيل ده الله اعلم
تلفونه لا يمكن الوصول اليه زيو وزي تلفوني السبب لي اذاي

Quote: لا حولاااااااااااااااااااااا أنا كنت وين؟ و ما جاي تاني ، و حردان عشان ما تدسدسوا حاجاتكم و تعملوها تحت تحت و القعدة مع عوضية رتينة بنقعدها برانا و بنوصفها برانا

هلا يا بقة هلا والله
وانت ودرو وين يا زول
القعدة كانت مدورة وليها ضل
سري
ومنعم الف وب
وسلمي الشيخ
وكل الرواد
وعوضية رتينة بيننا ترغي وتزبد وتعاير في الهندي الدلاهة
الكمل سكرها

يااخ تعال عشان ندور مدارات رتينة واخريين وسيرة الناس المهمشة
في زمن اركلوجيا صحافة الغفلة

كيكى الحبيب
سلام مربع
جيت اشرب زنجبيل
واحى الاخ عبد المنعم سليمان
وقد التقينا فى عرس ودرملية
فاتك ياكيكى

Quote: جيت اشرب زنجبيل واحى الاخ عبد المنعم سليمان وقد التقينا فى عرس ودرملية فاتك ياكيكى

هلا يا تيتاوي
عدت وانا معتقل في اركلوجيامسكين -عصام- مدني.. ولا اسيبا مدنى واجى اسكن حداكا !!
ده اغنية يعلم الله ليها ضل...

مرحب واشرب الزنجبيل وياريت كمان الفرد ناس (الكج) وحنفية يدونا طلة
ويشربوا ليهم كباية كبايتين(قول ليهم شاي وزنجيبل ما عندنا ليهم كباية حاجة تاني)
مرحب يا تيتا ومنور والله

حبيبنا كيكي
بركة بالوصول
وما تهنينا بي شوفتك
المرة الجاية كتر القعدة
تسلم كتير

Quote: حبيبنا كيكي بركة بالوصول وما تهنينا بي شوفتك المرة الجاية كتر القعدة تسلم كتير

هلا يا سموال
وشوق وشكر كبير والله
ونتمني يا سموال يا يهبنا الزمان مدة وتواصل ختي نسعد بنبلكم
وكل الود يا صديقي الراقي

حبيبنا كيكي
بركة بالوصول
وما تهنينا بي شوفتك
المرة الجاية كتر القعدة
تسلم كتير

Quote: يااخ تعال عشان ندور مدارات رتينة واخريين وسيرة الناس المهمشة في زمن اركلوجيا صحافة الغفلة

هلا يا ابو الزهور
وكل التحية
وحبابك في مدارات عوضية رتينة واخريين
من ملح الارض

صاراها ليك فى منديل من لون البحر
يعنى يا كيكى تجى (امريكى ) وما تسلم على حتى فى التلفون ؟
الفيك انعرفت

وبعدين اين المدعو عبد المنعم سليمان ؟
اين كيكى ؟ اين صلاح الامين ؟
اين واين ؟

اشتقت ليك
فتحت عين الشمس كان تشوفك
او تجيبك لى سحابة تبل شوقا طمح
اشتقت ليك يا ود مدندن بالحروف
يا ود مجرتق بالسمح
اشتقت ليك
وانا فى رجاك
بعجن خبيز العيد واخبزو ليك
من لونو ضحكات القمر او
من النيل مجدول لوشيك
اشتقت ليك
ياخ احبك جدا ولا على كيفك

Quote: صاراها ليك فى منديل من لون البحر يعنى يا كيكى تجى (امريكى ) وما تسلم على حتى فى التلفون ؟ الفيك انعرفت وبعدين اين المدعو عبد المنعم سليمان ؟ اين كيكى ؟ اين صلاح الامين ؟ اين واين ؟ اشتقت ليك فتحت عين الشمس كان تشوفك او تجيبك لى سحابة تبل شوقا طمح اشتقت ليك يا ود مدندن بالحروف يا ود مجرتق بالسمح اشتقت ليك وانا فى رجاك بعجن خبيز العيد واخبزو ليك من لونو ضحكات القمر او من النيل مجدول لوشيك اشتقت ليك ياخ احبك جدا ولا على كيفك

يا سللاام يا سلمي
وانا لي كم يوم ما عارف اودي وشي وين منك ومن ناس كثااااار في المنبر ده
فيا سلمي يا بنت امي العزيزة انه اللفيت والتقهي في بلاد الفرنجة
امريكا(يا النبي يا سلمي) اخوك تحت تحت كده سمع بالصقع وفي اشاعة انو صقع ذاااتو
لكن امريكا دي من مطار دالاس فانها الصقعة الكبري (حرممم بتاعة الكرمك ما زيها ) شوفة امريكا دي
ياخ ناس كيف كيف
وزلط كيف كيف
وانوار كيف كيف
وعمارات كيف
والبيرة ذااااتها كيف كيف برضو
ونسيت اقول ليك والطيارة تطوي العالم ده طووي شي ايران وشي السوفيت وشي تخوم كندا
يعلم الله كنت خاتيكم كلكم في وجداني المجنون بحبكم ومتمني القاكم ووواحد
لسلمي في ايوا واشرب معاها (شاي) اصلو الشاي صعب هناك
لكوستاوي في ميرلاند واشتل معاهو جرجير
لدينق في ميامي وانبز معاهو الكيزان اولا اللذينة
ولراوية اجوب معها شارع الجورج تاون (وكرررررر يا سلمي من شارع الجورج تاون ده)
حمرا وحلا وحلو جنس حلا...
ولكن حتما يا سلمي الجيات كثارباذن الله وبجيك في محلك لزم (بس كثري الشاي) والشية زي الاكلناها
في حجخانين الدوحة ديك ذات يوم برفقة صلاح الامين وعثمان النعيم...


اردد ايضا اين مصطفي سري
واين صلاح الامين قالوا غرب
ومنعم بقي بتاع صحافة عاوز يلحق الهندي
ومشتاقين يا سلمي ومتلومين وسافين التمباك ذاااتو