Post: #1 Title: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 00:28 AM Parent: #0
يالصغنون... يافرستنا الجامحة.... متى وكيف مرت السنوات وبقيتى عروسة ماشاء الله تبارك الله... اتلاحقت الكتوف... وذاد بينا المعروف
كان ايضا يوما ماطرا يوم صرختى لاول مرة فى عالمنا فى 1983 صرخة زولة جاية وواثقة من روحها.. سنوات كتيرة تفصل بيننا وكل محبة الكون تربط بيننا... حلاة كلمة أختى البنضيفها لاى واحدة مننا- لوله اختى والنجيو الولد الحليو ومنى أختى وكبيرتكم { البكر العوير}- عويرة فى محبتكم ونفسى اشوف كل زولة فيكن سعيدة... الليلة يوم فرحتك... افرحى قدر ماتقدرى... اضحكى وعيشى الحياة كما ينبغى وكما ترغبين مع رفيقك ولد قلبه اخضر هدى ورضى {ديامى}لهفته على الناس واقفه فى باب روحه... امسكى فيهو برموش قلبك وعيشى الفرحة عيشيها... فالمؤسسة الزوجية ليها مطبات- الله ماوراك بتحتاجى لتركترات العقل عشان تقللى من مزالقها... وطولى بالك وازرعى دروب الروح بالصبر طوليهو شديبببببببببببببببببببد
عارفة ياجلو..... قادر اتخيل البيت بعد تمشى لبيتك... قادرة اتخيل كيف بيكون حالك وامنا {الاولى} اللى ربتنا جميعا- ستفقد خطوتك ورنه ضحكتك وصوتك اللى بحتو بتزيح عشراق الاسى.... كل مرة بقول ليك اضحكى- عشان ضحكتك بتصحى فينى الامل.... وحاتفتقد نجوى حتى طرقعات موية الغسيل- جنك تغسلى بالليل- اوعى تعمليها فى {جنتك} اطلعى بره القفص الذهبى- اقصد بره الليل وغسلى بالنهار- افتقد ضحكتك الآن وانا بنق فيك زى نقنقة الموية - طق- طق- طق ومافى نوم....النوم ملحوق خلونا نتونس- وضحكنا يفرح كل بيوت الديم- ناس مارقين للفرح- وبكرة تشوفى- اقيفى فى نصهم ودورى - درويشة حنان فى قلب اسامة
من زمان بقول ليكم عن مشاعرى بطرق كتيرة وبحس بيكم.... وبخاف عليكم ومازلت من خدشة النسمة...
افرحى.... افرحى... وارقصى يوم فرحك واياك من دور العروس المعسمة اليوم ده مابيتكرر تانى بشكلو ده لو اسامة فتر خليهو يرتاح ودورى انتى ياعروسة ولو لقيتى طريقة غنى... صدقينى بتكون ذكرى حلوة- تكون مفرهدة جواك.... ساغنى ايضا ا لاجلك هنا سارقص... وربما ابكى... دموع الفرح... اختى العسولة كبرت والليلة حنة قلبها لزول مافى احلى من رفقته..... اسامة اخونا – ود البيت
ونصيحة..... قلت ليك عن المطبات... بتحتاجى لزول تحكى ليهو تفضفضى معاه لكن احزرى الحكاية للاخوات... لانهن بحبنك وبيخافن عليك ويقلبن وشهن التانى – الوش الماسمح داك...لرفيق دربك... تقوم قيامتهن وترضى الواحدة مننا بكلمة طيبة- كلمة صغنونة بترضى الروح وتتطيب الخاطر- خليكى برضو عارفة- ناسنا ديل عاوزين كورسات فى الرومانسية- فترسمنى كما تحبين لكن ماتنتظرى نوع داك الكلام بتاع ياروح آلبى، معليش ياجلو.... ماتخافى لكن بنورك.... الله ينور دربك
روحى ليك.... وقلبى سماء لعصاقيرك تحلق فيه متى ماشاءت
والليلة- فى يوم فرحك عاوزة اقول ليك واشهد العالم المتصالح... اشهد انى احبك يا اختى... حبى ليك هو هدية عمرى لعيونك الحلوة... الله يحلى أيامك يافرسة....
أختك- بكركم العويرة- اشراقه
Post: #2 Title: Re: اليك ياحبيبتى.... فى ليلة عرسك روز من قلبى.... Author: اسراء عبدالله Date: 05-28-2008, 00:41 AM Parent: #1
Post: #10 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 06:53 AM Parent: #2
يباركوا ليك السمح والزين يا اسراء بركة جاه النبى
Post: #3 Title: Re: اليك ياحبيبتى.... فى ليلة عرسك روز من قلبى.... Author: طارق جبريل Date: 05-28-2008, 00:46 AM Parent: #1
اشراقة كيفنك الف الف مبروك لصغنونتكم عليك الله قولي ليهم ياجلوا العرس لي يوليو عايز احتو ياخي
تليشة: الكتاب لقيتو بس فرنسي مواعدني بالنسخة العربية او الانجليزية يوم السبت قولي يا رب
Post: #11 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 07:01 AM Parent: #3
تسلم ياطارق اتفقت معاهم قبال كدى يعملوا العرس فى شهر اربعة ورتبت امورى على كدى غيروا المواعيد فجأة هنا لازم تجدول الحاجات من زمن والا حاتفوت فرحة كبيرة- غايتو الله يفرحهم فى الحر الشديد ده
------- شكرا ياطارق على الاهتمام- ياريت لو اتلقى بالعربى لانو هنا فى نسخة بالالمانى وقريتها وفى حجاجات نتيجة للترجمة ربما او فهمى المعصلج بيكون احسن لى بالعربى- شكرا تانى ياطارق
Post: #4 Title: Re: اليك ياحبيبتى.... فى ليلة عرسك روز من قلبى.... Author: Bashasha Date: 05-28-2008, 01:02 AM Parent: #1
Post: #8 Title: Re: اليك ياحبيبتى.... فى ليلة عرسك روز من قلبى.... Author: ماجدة عوض خوجلى Date: 05-28-2008, 01:31 AM Parent: #1
الف مبروك اشراقه وبيت سعادة وحب باذن الله وعقبالك حبيبه وربنا يديم عليكم الفرح تســلمى يارب ...
Post: #14 Title: Re: اليك ياحبيبتى.... فى ليلة عرسك روز من قلبى.... Author: ابوبكر يوسف إبراهيم Date: 05-28-2008, 07:12 AM Parent: #8
الأخت الحبيبة إشراقة
سلام على روحك الطيبة
باقة من نرجس للعروس والعريس .. باقة من ليلك لك ولما تحمل روحك من مشاعر إنسانية نبيلة .. ألف ألف مبروك .. بالرفاء والبنين
Post: #20 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 07:34 AM Parent: #14
تسلم يا ابوبكر اخوى وربنا يسعدك بكل افراح الدنيا مع رفيقة دربك
Post: #19 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 07:33 AM Parent: #8
ماجدة ياحبيبة
اجمل تهانى جات بحضورك الزهرى
ربنا يخليك ويسعدك فى حياتك يارب
------ تجربة واحدة بكل جمالها واحزانها تكفى ذاد رفقة مع صغارى كل العمر- اطمئن وانفاسهم تنبض فينى وحبهم وكلام واصل لى اللى بيحيرنى من عمقه:
Post: #18 Title: Re: اليك ياحبيبتى.... فى ليلة عرسك روز من قلبى.... Author: محمد عثمان Date: 05-28-2008, 07:25 AM Parent: #1
د. اشرااقة..
الف مبروك..و ربنا يسعدهم ويبارك لهم
Post: #21 Title: Re: اليك ياحبيبتى.... فى ليلة عرسك روز من قلبى.... Author: محمد عثمان Date: 05-28-2008, 07:35 AM Parent: #18
Post: #22 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 07:36 AM Parent: #18
محمد عثمان ياناثر قمح الفرح ودخن الغنا فى المكان ده... تسلم وتفرح ايامك
وانثر لينا من بهجة غناك اللى بتفرح بيهو خلق الله
وليك المودة
Post: #23 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 07:39 AM Parent: #22
وتقاطعت خطوط الفرح يامحمد عثمان لمن كنت بكتب واقول ليك انثر لينا من باقات غناك هنا كنت انت نثرت قمح الفرح لاختى ولينا
تسلم
Post: #24 Title: Re: اليك ياحبيبتى.... فى ليلة عرسك روز من قلبى.... Author: azhary awad elkareem Date: 05-28-2008, 07:56 AM Parent: #1
Quote: ساغنى ايضا ا لاجلك هنا
عارفة يا إشراقة واحدة من الإغراءات الإستعملتها نجوى وهى تحثنا على الحضور إنك إحتمال كبير تجىء.. ولكن يبدو أن رياح سفنك قد أتت بغير ما تشتهين ونشتهى..
عموماً البركة فى الموجودين.. لك التهنئة بزواجها.. ولها الأمنيات بزواج سعيد مبارك.. وعقبال لى نجوى..
Post: #26 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 08:37 AM Parent: #24
سلامات ياصديقنا ابو الزهور
خسارة انو الزول ماحايكون معاكم فى اليوم ده بس انتو ماتقصروا قوموا لى بكل الفرح والغناء
وتتهنأ يا ازهرى بروحيتك الحلوة واسرتك الاحلى منها مافى
-----
راجع الماسنجر
Post: #25 Title: Re: اليك ياحبيبتى.... فى ليلة عرسك روز من قلبى.... Author: الجندرية Date: 05-28-2008, 08:15 AM Parent: #1
الف مبروك يا شروق ربي يهنيها وعقبال واصل ومرافئ
Post: #28 Title: Re: اليك ياحبيبتى.... فى ليلة عرسك روز من قلبى.... Author: Emad Abdulla Date: 05-28-2008, 09:29 AM
حاجة في بيتكم عجيبة يا إشراقة .. حاجة طاعمة .. و بهارها كتير .. الألسع و الأكتر نكهة .. نجوى .
إجلال الجميلة .. إزيك يا بت يا براااااحه و راسية . كبرتي ؟ .. سبحانه .. و بقيتي عروس الديم .. ؟ سلمتي علينا - بتذكر - و سكتتي .. كوجان و إشراقة نقوا و نقوا و نقوا , و إنتي تعايني و مقهومة و بسامك يحلى و يحلى .. و إشراقة تدلع فيك : ( يا عروس .. شفتا أختي العسل دي ؟ محظوظ يا ود يا أسامه ) .. و تخجلي من ربربتنا و ليل الأصحاب .. و تغرود عينك .. ملحوظة : إياك تسمعي كلام إشراقة و وصاياها .. ولأنها بتحبك أكتر من روحها .. عشان كده ح تلاقى وصاياها مافيها إلاك .. و أسامة يروح فيها بيش .. أختك البكر دي .. مغرمة بيكم و خوّافة عليكم .. و فخورة . و ح تظل شايفاكم صغار و تظل تخاف ( حتى من أسامة ) . يا عروس الديم يا سمحة و برااااحه .
ابتهال الدلوعة الخدرا و نديانة , فرحانة الليل داك بالنخلات بنات مصطفى .. عينيها كبار إبتهال ( و كأنها في غفلة سرقت كبر العيون كلها و مقلبتكن ) .. عينين مليانيين فخر و عزة بالبنات الثريات أخواتها .. نص بالها معانا .. و النص التاني مباري الولد الصايع بمزاج و جميل بمزاج و ديامي و .. زوج و حبيب . من جواي ضحكت ضحكت و أنا بسمع حكاويكن و الليل في الديم خانس و متناوم .. يا مجنونات يا بنات مصطفى .. و بني آدمين . نجوى ما عزمتني يا إجلال .. شفتي الحقرة ؟؟ يا نجوى القصب الأحمر .. يا زولة يا همبريب و جميلة جميلة .. و نسّاية . مجنونة يا بت بمزاج .. و حنينة حنينة و غنّاية .. جنك مقصات و مقالب و ضحّاكة .. ياخي ضحّاكة يا بت .. و الأجمل فيك جنك و ضفاير روحك .. يا بابوية .. أصبري لي .. و .. سمح الدهب .
من وين أخواتك يا إشراقة مكاوشات كل طعامة الدنيا و ملمومات على قلب وحيد ؟؟ يا بنات يا أحلى و حبوبات .
مبروك يا إجلال .. و مبروك يا ماما إشراقة .. يا كبيرتهم و زينة العنقود .. عازم نفسي براي .. و الله يحلك مني يا نجوى .
Post: #58 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 04:13 PM Parent: #28
سلامات ياعماد
بيتنا ده مبهرينو الناس بانسانيتهم وجمالهم بيتنا ده من غيرهم مسييييييييييييييييخ مساخة عدوك
البنات الحلوات- اخواتى- بناتى هن بهجة وبيكونن بهجة اكتر لمن يعرفن قيمة الريدة- الريدة البتدخل فى العضام ديك- حصل جربتها؟ مهبوشات بكل تناقضات الدنيا....
جلو محظوظة- انا من زمان اعلنت انحيازى لاسامه- لهدوئه وجمال روحه و {خدرته} الدقاقة قلت ليها يوم عرسها انا بريدها وبريد البريدها
كانت مفاجأة ليها وقربت تقع من طولها لمن شافتنى قدامها- المسكينة ورمت وشها بالبكاء كانت مفاجأة ليها وليهن لمن غنيت ليها مع الفنان { يكون ليوم الليلة مندهش فى الاقتحام اللى تم لحقوقه الصوتية}
لمن تدخل جلو فى دور العروس المعسمة بمرق ليها انا باخت العروس {المجنونة}- زول يسمع الغناء ده ما يجن رقصا- الله ماليهم الناس ديل- اهلنا الديامة الله يطول عمرهم كانوا بهجة البهجة ذاتها
الصالة اللى ماشالت الناس اللى وصل عددهم فوق ال 1000 كانت مبتهجة ومافى زول كدى فى النهاية قعد فى كرسيهو... فى لحظة كدى قربت اقول ليهم تعالوا نطلع مظاهرة بس الله سترD :
--- على هامش الوصايا- بعد الصبحية اللى جابوا فيها {حماده بت}- جلسنا منى الجات مخصوص للعرس وبرضو كمفاجأة- وكبيرتهم وقلنا الوصايا العشرة لاجلال- { ماتطلع همس روحها لبره- فى بيتها ومع زولها الاخدرانى الحلو- قلنا ليها المفيد لاستقرارها فى حياة ليها جخانينها زى ماليها انهارها الصادحة} اول تلفون رن كان لنجوى - جلو المشت ليها ساعتين مع راجلها لشقه لحين سفرهما لشهر العسل- اتصلت عشان تشكى من الشقة المافيها موية.... عارف نجوى قالت ليها شنو؟ تعالى راجعة وسافرى من بيت ابوك!!
نجوى لذيذة- لكن درابها قاعد جنب شطة وشمار وكسبرة روحها
احلى زول كانت لوله- هى وراجلها وجناهم الفى البطن ماقصروا
اما فعايلى انا- اسكت خليها كل الطاقات الماياها فكيتها فى الصالة ديك وجيت راجعة زى وزى اى قمرية قوقاية
شكرا ياعماد وعقبال ماتشوف جديد بناتك
Post: #55 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 11:44 AM
امانى صاحبتى يتبارك عمرك وتتبارك ايامك يمه
ماهان على ما اكون هناك فى اليوم ده وفرحنا شديد ربنا يفرحها ويفرحك والجميع
Post: #27 Title: Re: اليك ياحبيبتى.... فى ليلة عرسك روز من قلبى.... Author: AMNA MUKHTAR Date: 05-28-2008, 08:46 AM Parent: #1
ألف مبروك يا اشراقة.. وانشاء الله بيت مال وعيال وهناء
ومبروك للباقيات .
Post: #29 Title: Re: اليك ياحبيبتى.... فى ليلة عرسك روز من قلبى.... Author: رأفت ميلاد Date: 05-28-2008, 09:41 AM Parent: #27
ألف مبروك .. بيت مال وعيال
ويديم الله الأفراح
Post: #30 Title: Re: اليك ياحبيبتى.... فى ليلة عرسك روز من قلبى.... Author: Emad Abdulla Date: 05-28-2008, 09:46 AM Parent: #29
رأفت ..!!!! إنت زاتك : زور هوشزيت .. ZUR HOCHZEIT
لغتكم لغة التابا و اليابا .. شينة ياخ
Post: #60 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 10:00 PM Parent: #29
سلامات يا رأفت!!
يباركوا ليك السمح والجديد بركة الليل وسجود المصلين/ت
----- ووينك ماباسن؟ ليك وحشة
Post: #59 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 04:19 PM Parent: #27
الف شكر يا امنة وعقبال كل البنات العاشقات
Post: #31 Title: Re: اليك ياحبيبتى.... فى ليلة عرسك روز من قلبى.... Author: abubakr Date: 05-28-2008, 10:04 AM Parent: #1
Quote: إياك تسمعي كلام إشراقة و وصاياها .. ولأنها بتحبك أكتر من روحها ..
تعرف كلمة (شين) بى قلبة شلوفة أشنا .. معناها سمح وأظرف حاجة (فرتق) بتاعة خوة فرتق ديك .. نفس الكلمة ونفس المعنى .. بس ما بتاعة شرامة .. شفت مصيبتنا .. يا زول فكنا ما نقوم نفترق اللعبة .. لكن شفت العروس حارة كيف بالله ؟
Post: #61 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-04-2008, 07:16 AM Parent: #31
ابا بكر ياصديق
تسعد ايامك وايام بنياتك
وانشاء تشوف جديدهن وتفرح ليهن بكل حنان ابوتك واخائك لينا
Post: #33 Title: Re: اليك ياحبيبتى.... فى ليلة عرسك روز من قلبى.... Author: Adil Osman Date: 05-28-2008, 01:33 PM Parent: #1
Quote: افرحى.... افرحى... وارقصى يوم فرحك واياك من دور العروس المعسمة اليوم ده مابيتكرر تانى بشكلو ده لو اسامة فتر خليهو يرتاح ودورى انتى ياعروسة ولو لقيتى طريقة غنى... صدقينى بتكون ذكرى حلوة- تكون مفرهدة جواك.... ساغنى ايضا ا لاجلك هنا سارقص... وربما ابكى... دموع الفرح... اختى العسولة كبرت والليلة حنة قلبها لزول مافى احلى من رفقته..... اسامة اخونا – ود البيت
الف مبروك يا اجلال واسامة.. الف مبروك يا اشراقة ونجوى.. الف مبروك يا مصطفى وعشة حامد.. عقبال نجوى.. من اجمل واذكى والطف الفتيات السودانيات..
Post: #34 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-28-2008, 02:53 PM Parent: #33
الف سلام ومحبة للجميع
بجيكم راجعة عندنا عرس فى فيينا بنتنا سحر العجبانى- اللى كان عمرها يوم جيبت فيينا اربعة سنوات كبرن البنات
ربنا يسعدن ويسعدكم
Post: #35 Title: Re: اليك ياحبيبتى.... فى ليلة عرسك روز من قلبى.... Author: مامون أحمد إبراهيم Date: 05-28-2008, 03:41 PM Parent: #34
ألف مبروك يا إشراقه ,
وياسلام ! والله حاجه مفرحه
ربنا يهنيها , ويهنيك بيها .
Post: #63 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-04-2008, 11:05 PM Parent: #33
سلامات ياعادل
وصلتك تهانيك الخلوة للعروسة فزادت حلاوتها
Post: #36 Title: Re: اليك ياحبيبتى.... فى ليلة عرسك روز من قلبى.... Author: zozo Date: 05-28-2008, 04:15 PM Parent: #1
الف مبروك اشراقة
Post: #37 Title: Re: اليك ياحبيبتى.... فى ليلة عرسك روز من قلبى.... Author: معتصم الطاهر Date: 05-28-2008, 04:17 PM Parent: #1
الزولة السمحة دي قولي ليها مبروك قدر دا " وفتح يديه 180 درجة ليسع الكون ثم دار ليجعلها 360 درحة "
اشراقة
كدى عليك الله نقول ليك ..
(ها أمانه ما كبرنا .. )..
Post: #38 Title: Re: اليك ياحبيبتى.... فى ليلة عرسك روز من قلبى.... Author: انعام عبد الحفيظ Date: 05-28-2008, 09:15 PM Parent: #1
يا إشراقة ربنا يهنيها ويسعدها ومليون مبروك ليها
وعقبال تفرحي بـ أولادك يا رب
Post: #39 Title: Re: اليك ياحبيبتى.... فى ليلة عرسك روز من قلبى.... Author: yasir Abdelgadir Date: 05-28-2008, 09:19 PM Parent: #38
مبروك ...وبيت مال وعيال
Post: #40 Title: Re: اليك ياحبيبتى.... فى ليلة عرسك روز من قلبى.... Author: khatab Date: 05-29-2008, 00:06 AM Parent: #39
مبروك يا إجلال .. و مبروك يا ماما إشراقة .. يا كبيرتهم و زينة العنقود .. عازم نفسي براي .. ... ولو سألنى زول بقول ليهو .. اتكلم مع عماد . لحدى ما اجى اسامه .
Post: #41 Title: Re: اليك ياحبيبتى.... فى ليلة عرسك روز من قلبى.... Author: mamkouna Date: 05-29-2008, 00:26 AM Parent: #1
ألف ألف مبروك ل جلٌو.. ربنا يهنيها..و عريسها أسامة.. عقبال تفرحي بواصل و مرافيء.. يا ألذٌ و أحنٌ بِكِر..!
Post: #42 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 05-31-2008, 10:50 PM Parent: #41
سلامات يا اهلنا من الديم سلامات من ايام مفرحة من شجون وايام وضحك ورقص حد الجنون وغناء حد جمالكم جميعا يا اهلنا ياالمريتو من هنا كان لابد من حضور الفرح لابد من مفاجأة العروسة وكان لابد من ممارسة الجنون فى اقصاها
شكرا لحين عودة شكرا لكل من شاركنا بالحضور وشاركتنا الفرح
ومحبة من ديمنا الجميل
وغدا بلاد اخرى
Post: #43 Title: Re: اليك ياحبيبتى.... فى ليلة عرسك روز من قلبى.... Author: علاء الدين حيموره Date: 05-31-2008, 11:00 PM Parent: #42
ربنا يسعدها ويهنيها وتفرحي بجديدها ..
يديك الف عافية يا دكتورة
Post: #44 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-01-2008, 07:55 PM Parent: #42
و....... بلاد اخرى
Post: #45 Title: Re: اليك ياحبيبتى.... فى ليلة عرسك روز من قلبى.... Author: sara abass Date: 06-01-2008, 10:29 PM Parent: #1
العزيزة الغالية الأديبة المؤدبة.
الف مبروك لها وانشاء الله ربنا يسعدها .وأنا معجبة جدا بك وحقيقية أنت مثال للمرآة السودانية.أعجبت بك من كتاباتك ومن اللقاء الذي بث منذ فترة في قناة النيل الأزرق ربنا يوفقك ويحفظك .
اختك سارة
Post: #46 Title: Re: اليك ياحبيبتى.... فى ليلة عرسك روز من قلبى.... Author: عزاز شامي Date: 06-01-2008, 11:11 PM Parent: #1
اشراقتي ..
وصلت سالمة يا بت امي؟
ما اوصيك ... تمي الفرحة لآخرها و ادي شبال من القلب!
باركي لأختك أخوتك وفرحتها ... وبوسي لي راس الوالدة
محبتي الدائمة
Post: #47 Title: Re: اليك ياحبيبتى.... فى ليلة عرسك روز من قلبى.... Author: Rawia Date: 06-01-2008, 11:31 PM Parent: #46
الف مبروك للاجلال واسامة ويارب يتهنو ويسعدوا العمر مله
ومبروك ليكم يا اشراقة وكل الاسرة وخاصة الوالدة ودايما فرحانين
_______________________ اسفة للتأخير لم ار البوست الا الان
Post: #49 Title: Re: اليك ياحبيبتى.... فى ليلة عرسك روز من قلبى.... Author: Raja Date: 06-01-2008, 11:51 PM Parent: #47
ألف مبروك للعروسة الزينة وعريسها النقاوة..
وربنا يديم الأفراح يا إشراقة
Post: #48 Title: Re: اليك ياحبيبتى.... فى ليلة عرسك روز من قلبى.... Author: رشا سالم Date: 06-01-2008, 11:48 PM Parent: #46
Post: #50 Title: Re: اليك ياحبيبتى.... فى ليلة عرسك روز من قلبى.... Author: نيازي مصطفى Date: 06-02-2008, 00:54 AM Parent: #48
الف مبروك ..ربنا يجعله زواجا مباركا وبالرفاه والبنين
Post: #51 Title: Re: اليك ياحبيبتى.... فى ليلة عرسك روز من قلبى.... Author: منوت Date: 06-02-2008, 08:50 AM Parent: #1
بنت كوستينا الجميلة ، أقول مثلما قال عماد : " حاجة في بيتكم عجيبة يا إشراقة .. حاجة طاعمة .. و بهارها كتير .. الألسع و الأكتر نكهة .. نجوى ... "
* مبروك لنجوى وأسامه وعقبال الحاجات السمحة كلها .
Post: #52 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 10:20 AM Parent: #51
ساعود بالحكاية وسوف انطلق باجنحتها الى مداكم
Post: #53 Title: Re: اليك ياحبيبتى.... فى ليلة عرسك روز من قلبى.... Author: salah elamin Date: 06-02-2008, 10:56 AM Parent: #52
Post: #56 Title: Re: اليك ياحبيبتى.... فى ليلة عرسك روز من قلبى.... Author: أيزابيلا Date: 06-02-2008, 01:28 PM Parent: #51
Quote: مبروك لنجوى وأسامه وعقبال الحاجات السمحة كلها .
انت يا اشراقة نجوى هى العروس؟
منوت خلعتنا ياخ؟
Post: #57 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-02-2008, 01:40 PM Parent: #56
Quote: منوت خلعتنا ياخ؟
Me too ya Shaza
-------- it was nice to meet you again ya Shaza- althougth it was v. short time
Post: #54 Title: Re: اليك ياحبيبتى.... فى ليلة عرسك روز من قلبى.... Author: خالد العبيد Date: 06-02-2008, 10:59 AM Parent: #1
مبروك لاختي الصغيرة وعقبال عيالي وعيالك !
Post: #62 Title: Re: اليك ياحبيبتى.... فى ليلة عرسك روز من قلبى.... Author: lana mahdi Date: 06-04-2008, 08:37 AM Parent: #1
تستحق الصغنون الفرحة يا شروق كما تستحقينها باقات ورد و رشات عطر و سحابة تقبضين عليها بيد من حرير تتوسدينها و ترين كل أحلامك محققة على صفحة وجهها ألف مبروك لها و لعريسها وتقبلي مباركة أمي محبتي و تقديري لنا
Post: #64 Title: Re: اليك ياحبيبتى.... فى ليلة عرسك روز من قلبى.... Author: maia Date: 06-05-2008, 06:32 AM Parent: #1
الاخت العزيزة اشراقة
الف مبروك لشقيقتك وربنا يسعدها ويهنيها وزوجها
ولكي كل الامنيات الطيبة
Post: #65 Title: Re: اليك ياحبيبتى.... فى ليلة عرسك روز من قلبى.... Author: Ishraga Mustafa Date: 06-29-2008, 10:19 AM Parent: #64
كل الناس العزيزة المرت من هنا ونثرت زهور فرحها لاختى ولى
شاكرة ليكم وليكن كان نقسى ارد ليكم عطركم بعطر يشبه انسانكم ولكن ضيق الوقت والارشفة
