Post: #1
Title: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 07:44 PM
Parent: #0
المكان فيييا....
الزمان التاسع عشر من فبراير 1999
الثانية صباحا... بدء معزوفة حياتى
ماء دافىء وحميم اندلق منى.... ستأتى إذن ياحبيبى
ضاجا بالحياة احسست يومها فى ذلك اليوم من شهر مايو 1998 بطعم خصوبتى... بطعم الحياة
ثانية وثانية، دقيقة ودقيقة... ساعة وساعة غنيت لمطرك ليغسلنى من ساعات وسنوات الانتظار الطويل
كانت يومها كل الدنيا طمى...
والسماء ماطره
انه الطمى الذى بلّ جفاف عمرى فى سويعات حميمة
يومها احسست بان الشجرة ستثمر فى داخلى وقد كلن...
كنت حبلى... يأأأأأأأه ساصبح أما...
37 عاما كان عمرى
وانت تكبر فى داخلى احسست بانى معك اشب عن طوق التعب
ستزهر حتما... يوما ما ستزهر...
وهاقد ازهرت ياحبيبى...
ياكبدى....
ياواصل ياولدى...
فى تمام الساعة السادسة وعشرة دقائق.. فى ذلك اليوم التاسع عشر من رجب/ فبراير/برمهات/ نيسان
من العام 1999 زلقتك للدنيا.... بعد إثنى عشرة ساعة من الوجع المكان محتمل لولا توقع صرختك....
2800 جرام كان وزنك
48 سنتمر كان طولك.... هكذا تقول الاوراق الثبيوتية بالمستشفى التعليمى فى فيينا
اما فى أوراق عمرنا... فوزنك لامقياس له
وطولك يغار منه النيل ياحبيبى
يالصرختك الأولى...
وياللنمسة التى لفحت جبينى حين انتفض جسدك الصغير لتعلن لنا... ها انا قد أتيت
يالنفحة الجنة
ذات نفحة الرحمة يوم خصوبتى بك
تسعة أعوام مرت على ذلك اليوم....
تسعة أعوام وقلبى لايكف عن الغناء لأمى....
هكذا إذن حبلت بى..
وهكذا زلقتنى للحياة....
القمر يستدير الآن يا {تمبش} أمو- كلما يحلو لى ان أناديك
يستدير ويستدير معه فرحنا بيك....
بكره لمن تكبر وعمرك يكون مديد بعمق لهفتى عليك وليك
وأنا اوصيك كل صباح وانت فى طريقك للمدرسة ان تنتبه الى الشوارع جيدا
اكررها كل يوم,,,
وصوتك الحنون ينبهنى.... ياماما انتى لازم تقوليها كل يوم وتوصينى,,,,
وساكررها مابقيت فى الحياة ياكبدى....
ساحضنك تحت تلافيف روحى واغنى ليك يا لحن عمرى الفريد
وساحكيك... ساكتبك....عن التسعة اشهر وبضعة ايام
عن الهواجس والخوف
عن الترقب والانتظار
عن الفرحة الكبرى وانت ترفسنى بحنان واحس ببطنى يقفز بالحمائم
ثم.....
ثم انك حيبيى ياتمبش أمو.... ياكبدتى وضى عيونى
|
Post: #2
Title: Re: 19 فبراير.... يوم الرحيق وخصوبة عمرى
Author: ismeil abbas
Date: 02-19-2008, 07:58 PM
Parent: #1
د/إشراقة....
كل عام وأنتى وجميع ألأسرة بخير..........
مودتى...............................
إسماعيل محمد احمد عباس............
|
Post: #4
Title: Re: 19 فبراير.... يوم الرحيق وخصوبة عمرى
Author: mohanad haimoura
Date: 02-19-2008, 08:02 PM
Parent: #2
العزيزه د/ اشراقة
كل سنه وانتو طيبيب
وعقبال مليون شمعه كده
كل الود
مهند حيموره
|
Post: #7
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 08:18 PM
Parent: #4
تتيارك ايامك يامهند ويباركوا ليك الجديد
|
Post: #6
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 08:15 PM
Parent: #2
الاخ اسماعيل
تسلم يارب وتسلم اسرتك
|
Post: #3
Title: Re: 19 فبراير.... يوم الرحيق وخصوبة عمرى
Author: محمد البشرى الخضر
Date: 02-19-2008, 08:02 PM
Parent: #1
كل سنة وواصل طيب
وربنا يحفظه لأمه واخته إن شاء الله
وعقبال الشمعة المية
|
Post: #8
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 08:19 PM
Parent: #3
محمد البشرى الخضر
يخضرن ايامك وتنفرش محنة ومحبة ليك ولاسرتك وللوجيه وليدك
|
Post: #5
Title: Re: 19 فبراير.... يوم الرحيق وخصوبة عمرى
Author: ابو جهينة
Date: 02-19-2008, 08:04 PM
Parent: #1
إشراقة
أم واصل أيوب
وقفت طويلا عند كل سطر ...
لقد كان كل حرف خطته أناملك هنا تحكي سيرة أم .. و سيرة جنين ينمو و يفرهد .. و الأمل الآتي .. و الألم المحتمل .. ..
حقيقة هذه لوحة زاهية لمشاعر الأمومة .. منذ بواكير الجنين و حتى يغدو طفلاً يملا العين و الخاطر
أما هنا :
Quote: اما فى أوراق عمرنا... فوزنك لامقياس له
وطولك يغار منه النيل ياحبيبى
يالصرختك الأولى...
وياللنمسة التى لفحت جبينى حين انتفض جسدك الصغير لتعلن لنا... ها انا قد أتيت
يالنفحة الجنة
ذات نفحة الرحمة يوم خصوبتى بك |
كل أب و أم إستقبلوا طفلهم الأول ... هذا ( باسوورد تلك الأيام ) ..
فهذا يضاهي تلك الترنيمة :
النوم النوم .. بكريك بالدوم
النوم تعال .. سكت الجهال
لله درك ..
تسلمي لأولادك
و يسلمولك
و تحياتي للأسرة
دمت
|
Post: #10
Title: Re: 19 فبراير.... يوم الرحيق وخصوبة عمرى
Author: Muna Khugali
Date: 02-19-2008, 08:27 PM
Parent: #5
ميلاد سعيد..
واعياده اسعد..
ربنا يحفظه..
ويحظ أخته ويحفظك ليهم..
تفرحي ويفرح بيهم ايوب...
|
Post: #14
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 08:54 PM
Parent: #10
فى يوم 19 من كل عام قررت يامنى مع سبق الاصرار والترصد اواجه العالم الجميل فينى
جماله زى نبضات واصل وحركة اصابعه الصغيرة وهى تخربش على جدار رحم امومتى
وتعرفين...
الرعاية الصحية المتطورة فى هذه البلاد
وتعرفين {حكهم} لكل تفصيله
بداية من العمر...
وهنا كان المحك يامنى,,,
عمرك كم؟ سألتنى الطبيبة....
عمرى 37 سنة...
تاخرتى فى الحمل؟ قالتها متوجسه ومدت لى ورقة طويلة عريضة بعشرات الفحوصات
كان من اهمها فحص للجنين الذى يتعرض وفقا {لتكنولوجيا} الصحة فى {الغرب} لتشويه اذا حملت الام بعد ال 35 سنة؟!!
رددت فى سرى {المرة دى مانصيحة؟} فحص شنو كمان ده وابرة شنو البيتدخلوها جوة رحمى عشان تشفطوا موية منه عشان تطمئنوا على الجنين؟
تخلف منى... صاح؟!!
فاليكن....صورة جارتنا الدقت الخمسين فى كوستى والحول كان بزول طمننتنى...
وسألتها فى حالة رفضى لهذا الفحص خاصة وانها عددت لى المخاطر الناتجه عنه، يعنى الابرة دى ممكن بس فى حالات نادرة تصادف عيون الطفل ولا قدمه وممكن يؤدى الى اسقاط؟
قلت لا... ومضيت بقلبى الواجف...وحكيت معاه فى بطنى.. ان يطلع وسيم القلب ويفرح حياتنا... رفضت الفحص... وقلت ليها ولو كان الفى بطنى ده {قرد} عدييل كدى انا عاوزاه وما حا اجهضوا... وبالتالى مافى ضرورة للفحص دة.
ورغم فرحى وانا اتحسس بطنى بتكبر كل يوم الا ان الخوف والهواجس ان يكون طفلى {منفولى} او {معاقا}يسيطر على وبطرده بالامل وبرفسات واصل اللى زى نقرات المطر.
ومرت التسعة شهور وبضعة ايام....
وجاء واصل كاحلى ماتكون فرحتنا بيهو وبزقزقة قلبه العصفور
كان اول سؤال سألته لابى واصل- أيوب- الذى خفف وجوده بجابنى طيلة فترة الوجع الفظيع وقاسى وكمية الابر والحدايد اللى اتركبت على طهرى عشان تخفف الالم... سألته وآخر قطرة عرق من جبينى بقيت على اصابعه... ولدنا سليم وكامل... وكانت فى الفرحة البانت فى عيونه الاجابة اليقين... الحمد لله.... كل الالم راح... والقابلة اللى كانت قبلها بدقائق معدودة بتحفزنى بان {ادعم} وهى تقول لى رأسو بان... سنة واحدة ... دعمة واحدة ويطلع وترتاحى...
كانت خلااااااس آخر قوة فينى خارت... يومها عرفت ليه {الجنة تحت اقدام الامهات}
ويومها ندهت أمى العفو...
يا اجمل حبوبة فى الدنيا- يامنو
تسعد ايامك يامنى
وتتحفينا بطيب كلامك ودرر ذكرياتك
زربنا يخليك لروحك الحلوة دى ولبنتنا آية وحفيدنا الحليو وربنا يحفظكم من كل شر
|
Post: #11
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 08:31 PM
Parent: #5
يسعد مساك يا اباجهينة
تجربة الحمل والولاده من أعظم التجارب البتمر فى حياتنا
لم اكتب الا {طشاش} من مشاعرى بذلك اليوم وفترة التسعة اشهر وبضعة ايام
لم يجعل الدنيا حينها محتملة غير وجود بزرة واصل الواعدة بالحنية..
تجربة الولاده فى المهجر واختلاف الثقافات
تجربة افتقدت فيها صوت الام، الخالة، العمة والوصايا العشرة - تأكلى شنو وتشربى شنو
تنومى كفاية وترتاحى..... راحة فى مهاجرنا دى مافى....مافى {ضمة- بضم الضاء}
جارتى اليوغسلافية البالغة من العمر حينها قرابة الثمانين عاما إهتمت بى ، بتجيب لى كل ماتراه طيبا ومغذيا للطفل الفى بطنى... ماكان بينا لغة مشتركة زى العربى ولا الانجليزى ولا الالمانى... وماكنت بعرف لغتها، لكن اللغة البينا واللى جكينا بيها لغة اشتاق ان يكتشفها العالم وتصبح ديدينه.. كانت عيونها بتضوى لى وبشوف فيها امى- جدتى- اللى اشتهت تشوف جناى... سمعت زغروتها وانا بتصل بيها من المستشفى وبقول ليها ولدت يا امى..... وصوتها يقطر بدموع الفرح... اها الجية متين يالحبيبة.... ووعدتها...قريب بجيك ومعاى جنايا يا امى....
وما انتظرت...
اتزكرتها الليلة حتى فاضت كل البحار بدموعى
اتزكرتها وبكييييييييييييييييييييت واستغفرت لى ملائكة الرحمة الفى عيون ولدى
الدنيا جميلة يا اباجهينة.... ومايجملها ويجعل ليها رحيق ونسمات هم جنا الحشا...
ربنا يخلى كل الصغار
ويخلى واصل ويمتعنا باسئلته الذكية والمحرضة على التفكير
والبريق الفى عيونو المحرض على المشى حتى على الجمر...
تسلم يا اباجهينة وتسلم بيناتك
|
Post: #12
Title: Re: 19 فبراير.... يوم الرحيق وخصوبة عمرى
Author: Muna Khugali
Date: 02-19-2008, 08:33 PM
Parent: #5
ميلاد سعيد..
واعياده اسعد..
ربنا يحفظه..
ويحظ أخته ويحفظك ليهم..
تفرحي ويفرح بيهم ايوب...
|
Post: #9
Title: Re: 19 فبراير.... يوم الرحيق وخصوبة عمرى
Author: Adil Osman
Date: 02-19-2008, 08:26 PM
Parent: #1
عيد ميلاد سعيد يا واصل ايوب. مبروك اشراقة وايوب.
|
Post: #13
Title: Re: 19 فبراير.... يوم الرحيق وخصوبة عمرى
Author: ABU QUSAI
Date: 02-19-2008, 08:38 PM
Parent: #9
إشراقة مصطفى الزولة الجميلة
لك ولواصل وأخته ألف تحية وربنا يخليك ليهم ... وعقبال واصل يطفي الشمعة المية ... وحكيك يعكس إحساس كل أم بقدوم مولودها في لوحة رائعة وهكذا دائما الأديبة الدكتورة إشراقة مصطفى حامد ....
أبو قصي
|
Post: #16
Title: Re: 19 فبراير.... يوم الرحيق وخصوبة عمرى
Author: رأفت ميلاد
Date: 02-19-2008, 09:48 PM
Parent: #13
ياسلام يا أم واصل
مشاعر أم دفاقة .. ما أجملها لحظات اللقاء بعد تواصل تسعة يكون خلالهما تم العشق وتلاقت الأرواح .. يا له من لقاء ..
طفلتى الأولى كانت زهولى فى المعجزة .. تحنن قلبى لها عندما تلاقت عينانا.. عشقتها عندما إبتسمت لى .. تقالدت أرواحنا عندما نادتى بإسمى .. ولكن الأمهات أكملن التلاحق قبل اللقاء ..
روح خارجة من روح
ربنا يخليه ليكى ولوالده أيوب ويتوج ملك على قلبوبكم مع المتوجة مرافئ
|
Post: #18
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-22-2008, 11:36 AM
Parent: #16
وساحكيك... ساكتبك....عن التسعة اشهر وبضعة ايام
|
Post: #15
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-19-2008, 09:07 PM
Parent: #9
خالو عادل
شكرا على الشموع الحلوه
تعيش يارب
|
Post: #17
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-20-2008, 08:32 AM
Parent: #15
اقل من يوم كان عمره فى مثل هذا اليوم من تسعة اعوام
وفى مثل هذا اليوم تدر الانهار حليبها لصغار العالم
صباح الامومة والحليب ياواصلى بالحياة
|
Post: #19
Title: Re: 19 فبراير.... يوم الرحيق وخصوبة عمرى
Author: عاطف عمر
Date: 02-22-2008, 11:54 AM
Parent: #1
( واصل ) هو فرحك لأعماقنا
يدغدغ مشاعرنا حتى يحيلها ( بسمة ، بسمة )
عشناها معك رحلة تحقيق الذات ورحلة الإسهام في ( عمار الكون ) ، فأدهشتنا القدرة الفائقة على الوصف البريع للرحلة بتفاصيل قد يغفلها أكثرنا حرصاً .
لـ ( واصل ) و ( محمد الأمين عاطف ) أرجو مستقبلاً أكثر أمناً ، وحياة أفضل من حيواتنا ، و( معاناة ) أقل مما جابهنا . لهما أتمنى أن ينعما بشبابهما في حضن وطنهما الأم وأن يقيهما الله شر التشتت وشر المنافي .
ولك أختي أم واصل
أتمنى حياة سعيدة ، مترعة حباً وعطاء
|
Post: #20
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-25-2008, 10:48 AM
Parent: #19
***
|
Post: #21
Title: Re: 19 فبراير.... يوم الرحيق وخصوبة عمرى
Author: العوض المسلمي
Date: 02-25-2008, 11:15 AM
Parent: #1
عزيزتي اشراقه تحياتي وودي
كل سنه وانتي بالف خير
كل عام والربيع يقيم بينكم
كل عام والخضره تعمكم
كل سنه والاسره في سرور وحبور وانبساط
|
Post: #23
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-25-2008, 11:45 AM
Parent: #22
|
Post: #24
Title: Re: 19 فبراير.... يوم الرحيق وخصوبة عمرى
Author: انعام عبد الحفيظ
Date: 02-25-2008, 01:48 PM
Parent: #1
كل عام وواصل يرفل في الصحة والعافية
ويخليه ليك هو ومرافئ يا إشراقة
|
Post: #25
Title: Re: 19 فبراير.... يوم الرحيق وخصوبة عمرى
Author: Sahar Abdelrahman
Date: 02-26-2008, 04:15 PM
Parent: #24
الحبيبة اشراقة....أجمل التحايّا
كل سنة وواصل طيب وبألف خير
ربنا يخليهم ويحفظهم وتفرحي بيهم في كل مراحل حياتهم
محبتي
|
Post: #26
Title: Re: 19 فبراير.... يوم الرحيق وخصوبة عمرى
Author: تماضر الخنساء حمزه
Date: 02-26-2008, 04:37 PM
Parent: #1
كل سنة وواصل طيب,,
وانتو حلوين
الشوفة قرَّبت
|
Post: #27
Title: Re: 19 فبراير.... يوم الرحيق وخصوبة عمرى
Author: خدر
Date: 02-26-2008, 04:49 PM
Parent: #26
| Quote: تتيارك ايامك يامهند ويباركوا ليك الجديد |
يا سلام علي الكلام السوداني الدافئ
كل سنه و واصل و حبانو بخير يا اشراقة
واصلي الحكي
و ماتقطعي التلفونات
|
Post: #28
Title: Re: 19 فبراير.... يوم الرحيق وخصوبة عمرى
Author: نادية عثمان
Date: 02-26-2008, 04:49 PM
Parent: #26
أم تمبش أمووووووووو
شوشو ياحنونة
ام واصل ياراقية
كل لحظة وحبيبك بالف خير وعقبال يطفئ الشمعة المائة يارب
|
Post: #29
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-26-2008, 07:13 PM
Parent: #28
حين انزلقت قدمى وانا نائمة انزلقت معاها موية درجة حرارتها غريبة، بدأت كل حتة فى جسمى ترتجف، برد دخل كل حتة فينى، ايقظت ايوب وصوتى واجفا، يبدو انى حا الد الليلة..
كان الزمن يحلو للنوم، لاحظت انه يرتجف ايضا وسألته ضاحكة هو اللى حايلد فينا منو؟
اتصل بالاسعاف؟
اقول ليهم شنو؟
قول ليهم البيبى حايجىء الليلة..
لم تكن ساعتها هناك اى بوادر للوجع.. اشارة ولكن ليس هناك شىء آخر..
فى اقل من 20 دقيقة وصل الاسعاف
طبيب واثنين مساعدين له
قلت لهم ساستطيع ان امشى؟
ليس فى هذا الامر استهتانة، لن تتحركى قيد انملة، مكانك وسنحملك
عربة الاسعاف كانت معدة تماما بحيث يمكن لاى امرأة ان تهب العالم طفلها الجميل فيها
ضحكنا كثيرا فى عربة الاسعاف وتذكرنا حال بلدنا وكيف ان النساء يمتن من الاهمال الصحى وسؤء التغذية نتيجة للسياسات المتخبطة
كنت بتفاصح وماعارفة الراجينى لقدام
فى المستشفى الانيق والمرتب للغاية ادخلونى للكشف وتأكد انه اعلانا لقدوم فرحنا
قالت القابلة لايوب ان يذهب وينام وبانى لن انجب الا فى حدود السادسة مساء
ووعدته بان المستشفى ستتصل به اذا حدث شىء ما
والمسكين يادوب وصل البيت وبدأ قلع الضروس
وجع الطهر
وجع العيون
كل اوجاع الدنيا
حاجات كدى بتجى من ووين ماعارفة، عاد بعد اقل من ثلاثة ساعات
رغبة مستمرة للذهاب لدورة المياه
والقابلة النحيفة التى ستحتار فى نحفاتها داياتنا فى ام درمان تمنعنى من الحركة وباوامر رقيقة
ومرت الساعات بطئية للغاية
المدهش لم ابكى ولم اصرخ غير بعض الأنات
لم اصرخ ولكن...
تورمت اصابع ايوب من ضغطى عليها كلما جاء الطلق وكلما ذاد الطلق كلما ذاد الضغط
حين فاق الالم حده وان الولادة
ه طبيعية وليست هناك ضرورة لعملية قيصرية
ترجوتها ان تفتح البطن وتريحنى ولكن... مستحيل الزول الحلو ده نزل خلاص وساعدينا بدعمة دعمتين- قلت لايوب انا مافينى حيل غايتو الا تدعم انت..
اثنى عشرة ساعة والالم فاق التصور
كمية من الحديد الكهربائية تم تركيبها على ظهرى لتخفف الألم وقد حدث
دقائق معدوده بعد السادسة صرخ واصل بهدوء ووداعة
زى السوسيو
ولفحتنى نسمة الخلاص
نسمة ما احسستها الا حين دلقت مرافىء الخلوة
وقبل ان تغسله القابلة وضعته بدمة وماء الحياة العالق برأسه على صدرى
كان اول مافعل فتح فمه الصغنون بحثا عن حليبه-
يالحكمة الله.... باللامومة... ليس هناك مشاعر تماثلها... ابدا ابدا
بعد غسله سلمته لابيه بينما انهمك الجمع لتكملة المهمة المتبقية
قلت لايوب شنو استلمت ولدك وانشغلت عنى
لم يرد فقد كان منهمكا هو يؤذن بصوت الابوة وحنامها فى اذن واصل... الله اكبر...
مرت تسعة اعوام
مرت ومرت معها حكايات وحكايات
مرت وبقى واصل واصلا بيننا بمودته وجمال روحه
ويرطب على احزان غربتنا ويمنحنا القدرة على الحياة....ستمضى الحياة
وسلام للجميع..
وشكرا لخالات واصل ولاعمامه
------------------
واصل فى عامه التاسع وفرحة وجود ابيه تشع من عيونه
|
Post: #30
Title: Re: 19 فبراير.... يوم الرحيق وخصوبة عمرى
Author: Raja
Date: 02-26-2008, 07:26 PM
Parent: #29
المكان: القاهرة - دار الأوبرا المصرية
الزمان: 2000
الحدث: أسبوع ثقافي لمركز الدراسات السودانية
الصورة: مشاركة هميمة تحمل في يدها اليمنى المهد المحمول به طفل حلو. وفي يدها اليسرى أوراق مشاركتها في ذلك الحدث.
كنت وراوية أختي نتناوب مجالسة الطفل "واصل" حينما تنشغل أمه في عملها..
طبعا يا إشراقة لغاية هسع واصل ده ما قادرة اصدق إنه كبر وبيتكلم زي آخر مرة شفته في فيينا 2005..
كل يوم وواصل ولدنا بخير. ودايما الفرحة شاعة من عيونه الحلوة بوجود ماما وبابا وروفي وكل أحبابك
|
Post: #32
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-26-2008, 07:54 PM
Parent: #30
Quote: الصورة: مشاركة هميمة تحمل في يدها اليمنى المهد المحمول به طفل حلو. وفي يدها اليسرى أوراق مشاركتها في ذلك الحدث.
كنت وراوية أختي نتناوب مجالسة الطفل "واصل" حينما تنشغل أمه في عملها..
|
الزمن بيجرى يارجاء
بيجرى لدرجة مرعبة
سنة كدى ويبقى اطول من ابوه ومنى.... وبعدين تحصل الانكرابة الجد جد
مازلت اذكر تعلقه براوية ولن تطلع راوية وتجىء انتى يكون بيتلفت وشايف فيك ملامحا ولمن تجىء رواية يشوف فيها ملامحك..... مر الزمن وكبروا العيال يارجوية
------------
الصورة اثناء مؤتمر الدراسات السودانية والصورة لواصل وايوب واستاذنا الكبير الطيب صالح فى ذاك الزمن { 1999}
|
Post: #31
Title: Re: 19 فبراير.... يوم الرحيق وخصوبة عمرى
Author: lana mahdi
Date: 02-26-2008, 07:52 PM
Parent: #1
هوها يا هوها
كل عام و انت أحلى أم
وواصل و مرافيء يضيئان حياتكم
ربنايسعدكم كأسرة تستحق كل السعادة
كم حكيت لي عن سعادتكم
عن دفء أسرتكم بولديك الحبيبين وربها نوارة الحياة
ربنا يحفظكم
لنا
|
Post: #33
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-26-2008, 08:11 PM
Parent: #31
لنا الحبيبة
ليس هناك اجمل واعظم من مشاعر الامومة... بيشعوا بالفرح جوانا وينسوك همومك واحزانك ويقولوا ليك ها... الصحو واجب.. ان الحياة ماضية فغنوا لها...شكرا ياخالتو لنا وعقبال مانبارك ليك الجديد يابت امى
عمك مصطفى حامد والحلوين فى 2005- ابوى بيقول ما احلى من الجنا الا جناهو
|
Post: #34
Title: Re: 19 فبراير.... يوم الرحيق وخصوبة عمرى
Author: Ishraga Mustafa
Date: 02-27-2008, 12:02 PM
Parent: #33
ما احلى من الجنا الا جناهو
|
Post: #35
Title: Re: 19 فبراير.... يوم الرحيق وخصوبة عمرى
Author: أبو عبيدة البصاص
Date: 02-27-2008, 02:02 PM
Parent: #1
.
.
.
اشراقه موضوع سمرتنا وفاكهة كل حديث يقال
.
.
.
تهانينا وامنيتنا بتواصل ايام الحب بينكم جميعاً
.
.
.
البصاص
|
|