ابوساندرا... يوم 3/11 فات... تكون قاصد بتاع 2005

راجع بريدك الداخلى؟

up

إشراق

آسف جدآ ، حا تلقي رد هناك ، وأمسحيها في وجه رمضان ، وقد تكون هناك أخبار سارة

ابوساندرا


يسمع منك ملاك رمضان الرحيم

ما احوجنى للفرح فى هذه الايام

إشراق
لم أجد رسالة منك ، وبعاني لي شهر من الياهو ، يمكننا التواصل عبر الهوتميل ، ستجدي رسالة الآن هناك أرسلتها قبل دقايق على بريدك لو ما غيرتيه

ابوساندرا

الرسالة وصلت وحايصلك الرد بعد ماتنوم مرافىء

إشراق
عاينت للمتواجدون الآن ، لم أجدك وانت في الحقيقة متواجدة و أونلاين لكن ما مسجلة ! ،أتاريك كادر سري /خلايا نايمه

أنا ماشي مشوار نتقابل بكرة

اصلى ماكنت يوم كادر سرى
انا كان مانضمت بموت... بريد الونسة والنضمى الماخمج

إشراق:

حا { أنضملك } خيط الود سبحة ،تسبحي بها بآيات الحب والثورة وبحمد الوطن المأمول البعيد ، وتدعي لقدوم الحكم الرشيد ، وأن نعود لنبنيه البنحلم بيهو يوماتي بدل تشتيت أوراق مؤهلاتنا وسيرنا الذاتية بين البلاد ، وتضيع قدراتك مابين فينا والدوحة والوطن السليب لنا أحوج
وسبجي بحمد اللذي سواك وهداني الودار
ويحفظك ربي

ابوساندرا

اجتهد فى كل الاصعده

خيارى الاول والاخير السودان
ناس الوحدة الاوربية ماسكين الورق ومنتظرين السلام

لكن وسط هذه الامانى اصطدم بالواقع

واصل ومرافىء... اشتهى لهما حياة افضل بكثير من التى عشتها

سيبقى الحلم مشراعى لبكره

لن نألو جهدآ ، وتب ما حا يكون في أي تقصير من تالاي ، ونحن عايزنك هنا تعدلي مزاج الدوحة وتزيلي تكشيرتها نو ل واصل ومرافيء أمنيات طيبة ومستقبل مشرق في سودان جديد جدآ

ابوساندرا يا جميل


عارفه اجتهادك
بس دعواتك معايا
قدامى هم اساسى ودخلت فى قسم انى لازم اخلصه قبل السنه دى ما تخلص واهو تحدى بالنسبة لى عشان اكتشف انى لسه امرأة تتحدى كل الصعاب

لا الجيال تحجب خطايا
لا الشمس تحجب رؤايا

كده ممكن اكون اشراقه التى كانت والتى سنبغى ان تكون


كل ودى

اهو فرصة الزول يتونس معاك وكت تلفوناتكم دى بقت مقطوعة

إشراق:
بالضبط هذا اللذي نأمل أن تكونيه ، كما عودتينا دائمآ في خطوط المواجهة الأولى إحياز واضح وصريح لكل ماهو جميل وإنساني ، ولا تدعي لإحباطات المهاجر فرصة ان تنال من يقينك بسودان أجمل يسعنا جميعآ وحينها حا نقول تبآ للبتروريال والدولارات الخضراء ، وظيفة مناسبة تكفي الحاجة وبيت مشيد ولقمة هنية وعنقريب هبابي يطل على النجوم مباشرة ورفقة حلوة وجغمة موية من النيل لاتعادلها الألوف المؤلفة والحل والحلي.
يا زولة إتونسي علي كيف كيفك وما تشتغلي بأي حاجوة ولا الباندوث

ابوساندرا


فى عام 1994 رجعت السودان وكانت الدنيا برد على حس ناس بيتنا

الجو بالنسبة لى كان جميل واجمل منه السماء الممتده بنجومها
من صغيره بحب النجوم وامهم القمره

ياريت ارجع
مشتهية ارجع
بس حالقى هناك منو؟
منو من ناسى الزمان؟

يا أم واصل المشكلة نحن عايزين لمن نرجع يكون كل شيء كما تركناه حتى الأصدقاء ! لو تمنيت هكذا حا تتورطي وحا تفوتي على نفسك فرصة التعرف على جيل جديد شباب مصادم يقرضون الشعر ويكتبون المقالات ويغشون المنتديات ويحتفلون برأس السنة في النوادي والحدائق تحت عين السلطة وغصبآ عنها ، ويقيمون المعارض وعروض البلوم زي أيام زمان وأجمل لأنهم يناضلون بحق وحقيقة ، إنت ما شايفة ناس ميسون نجومي وماهيتاب وقرمبوز وعاصم الحزين وإسلام عبدالرحمن وسامس وإسماعيل ميرغني وعبير خيري ورهط جميل من المبدعين وكمان من الحرس القديم حاتلقي ناس عصام عبدالحفيظ وبشير أمل وحنان شنكل ، شباب أذكى وأوعى وأرجل من جيلنا بمراحل ، بس إنتي كيف تقتنعي وترجعي!

ابوساندرا

ياللسعاده
بوست لينا برانا!


اعرف ياصديقى بان هناك جيل جديد، قلت لك قبلا بانى حرصت فى كل زيارتى للتواصل مع من التقيتهم/ن وحقيقة مدهشيين/ت لحد الشرقه!

لكن يا ابوساندرا... ناسى الزمان ديل هم اللى طعمو حياتى بملح الحياة الحادق... صعب اكون موجوده هناك وهم/ن مافى، اما ان انزع عنى هذا الحنين واهزمه وبجتهد فى ذلك واتمنى ما انجح لانو بتكون طامة كبيرة... عارف ليه؟ لانى بكون بقيت زولة تانية، تانية خالص وما اشراقه!!! فهمتنى يازول رشيده الجميل؟

اليوم شغالة فى الجامعة، بعد اجى راجعة بواصل معاك الحوار ده

بالمناسبة البوست ده الجماعة حرداننو لينا.. ولا شنو الحكاية؟

منو القال ليك حردانين ، 192 مشدوهين وحا نطور البوست وجماعتك بيجو بس صبرآ آل واصل

مشكلة الحنين للماضي تسجنا في ذلك الماضي السعيد وتفوت علينا متعة التواصل مع حاضرنا ، حاضرنا في الداخل ، هناك متع ، وهناك تجارب جديدة وفنيات عرفها أولاد اليوم فأنتجوا إبداع وفن جميل ، وكذلك إكتشفوا أدوات نضال جديدة وخاصة هم يتعاملون مع سلطة شرسة.

وهناك مشكلة حنين أخرى ، اراها في الجيل اللذي سبقنا ، جميعهم ما زالوا يعيشون ، بل يحلمون بعودة أيام وأمجاد الستينات ، الفترة الذهبية لكل شيء
-في الستينات برع عدد من الأفذاذ في كرة القدم ، وعلى رأسهم الأسطورة جكسا
- في الستينات ،أجمل فترة للغناء السوداني وبزوغ فجر وردي وإكتمال تجربة الكاشف ، الشفيع ، عثمان حسين ، سيد خليفة وعدد من المبدعين
- في الستينات ، الخرطوم نظيفة ولياليها ملاح في كوبا كوبانا والأتنيوكل شيء متوفر والحياة متيسرة وهنية
- في الستينات صعود اليسار وأعظم فترات الحزب الشيوعي اللذي شهد إنعطاف نحوه من جيل بحالو
- في الستينات البلاد مفتوحة للمبدعين ، ونذكر زيارات أم كلثوم ، منليك ، المايو
- وفي الستينات أفضل فرق كرة القدم زارتنا ، الهونفيد ، والدينمو وإسبارتاك وغيرها
- في الستينات نهوض حركات التحرر الوطني ، و صعودالقومية العربية الناصرية قبل هزيمة يونيو المدمرة والتي بسببها إنكفأت الجيوش العربية للداخل وأنجزت إنقلاباتها

مازال عدد كبير أسرى لأمجاد الستينات

و أراك تحني لأيام مجيدة ورفاق نرى أن الزمان قلما يجود بمثلهم
لكنه يجود وتمضي الحياة

ابوساندرا

فعلا ان الحياة ستجود
وساحتفى بكلامك هذا على طريقة عشقى الخاصة للوطن
وبجيك راجعة


تخريمة... انت من زمن ناس جكساّ؟؟؟؟؟؟؟

لا ، أنا من زمن النكسة!


صديقنا النافذ في الجزيرة قال كلام مشجع ، بكره بقولو ليك في البريد ، ونصح إنو العايز يلقى فرصة يقوم يجي زيارة هنا ، وقال يستحسن ان يكون ذلك في بداية سنة خمسة {5}

ابوساندرا

يفرحك ربى

ماقلت ليكم خلونا نجىء قلتوا لا لمن يكون فى كلام نجيض

مافى مشكلة
قطر مالعيدة وتزكرتها ما غالية من فيينا

يالله افرشوا/ن الرملة وكلم ود رملبة، اصلى انا بريد كتاباته وريدته لكوستى

ود رمليه قابلتو نهار اليوم في المطار ، وسوف نلتقي أول يوم العيد ، في الفندق ، معايدة ناس التجمع المحضورة ، وصاحبنا النافذ قلت ليهو ، زمان ما قلتو أحسن إرسال الشهادات بالفاكس ، المهم قال لاحظ تجارب ناجحة لي ناس جو تابعوا من هنا والتفاصيل لاحقآ بالمغطغط

ممكن اخش يا جماعة اقعد في نصكم واشترك في الونسة الجميلة دي؟؟؟
الكلام عن الرجعة بيعذبني عشان كدة قلت الا أنحل ( بفتح النون وكسر الحاء)
يا اشراقة اذا لم يعد الأطفال وهم صغار فستصبح عودتهم مستحيلة.... وستتحول ألقابهم الى الجيل الثاني من المهاجرين..... العودة قرار يحتاج فقط الى الشجاعة ثم التخطيط وكما قال أبو ساندرا حوا والدة.... والأرض نفسها تستحق أن نعود اليها.... لن نوقف الزمن ولن نعيده الى الوراء ولن نبقى في سجن الحنين .... سننظر الى الأمام وسنصنع الغد... غد أفضل لواصل ومرافئ في وطنهم لم يستطع من قبلنا منحنا اياه... والا فسنضطر للاعتذار والتواري يوما ما....

سماح مرحب بيك
وانتى اول قطرة مطرة حنينة تنقر على قلوبنا
بجيك راجعة للتعليق لكن قلت احييك

ابوساندرا... الهطل بدأ

سماح سيد إدريس:
أهلآ بيك ، وبمداخلتك الوسيمة وهي صدقآ في الصميم ، وأتسآل بوجع حقيقي : ألا يدرك القوم أن هوية أولادهم سوف تتغير هناك ، وهل يحتمل أي منهم حقيقة أن يكون ابنه غير سوداني ولا يعرف ثورة أكتوبر . أعرف الظروف القاسية التي دفعت بالمناضلين الأشاوس لآرتياد هذا المصير ، والحل القاسي ذي الثمن الفادح ، ولكن أظن ان هناك فرصة للمعاجة وخاصة بعد السلام ونتائجه.
بس الحايقنع الديك منو
تجربتي الشخصية ، أبقيت بناتي في الوطن ، وأعتقد أن ذلك كان قرار صائب ، فهن الآن سودانيات ومنتميات


إشراق:
مش قلت ليك روقي وأحلي الحلوين جايين ، أها شفتي حلاة رأي السمحة سماح؟!

ابوساندرا

منتظرة الايميل

الظاهر طالع على ظهر سلحفاة

لحدى ما اجىء لمداخلة سماح كل الود

منتظره الايميل

مساكم خير وكل سنة وانتوا طيبين.....
قلت أجي أتحشر تاني بعد ما أبو ساندرا وعدنا بالسلام ونتائجه..... بس خايفة أصحا مهجومة أتمقلب أكتشف انو القصة حلم في حلم.... قلت انو قرار العودة يحتاج الى شجاعة وتخطيط لأن مستقبل السودان صار شيئا يصعب التنبؤ به... أنا شخصيا راجعة ما أسي طوالي بس كمان ما بعد كتير... وأعرف أنني الوحيدة التي ستدفع ثمن هذا القرار فلا أطفال لي من أصلو... أنا شخصيا أمنح احتمال 10% أن الانقاذ يمكن أن تنفذ اتفاقامهما كانت الضغوط ... فهؤلاء كذابون متمرسون... ولو حصل حنكون موهومين اذا تخيلنا أن الديمقراطية والتطور الاقتصادي سيأتي بهما خاتم علاء الدين متى ما ولت الانقاذ....
سنحتاج الى نضال بنفس يشبه روح مانديلا في سنوات سجنه الثلاثين... بلا ملل ولا يأس وستظهر الثمرات بعد ذلك...وأهو أنتوا حاضرين الديمقراطية الأخيرة وحتكونوا متذكرنها أحسن مني...استمرت حالة الطوارئ وقوانين سبتمبر وكأن الشعب السوداني كان يؤذن في مالطة... لكن التغيير لن يحدث مالم نضحي بدرجة أو أخرى وندافع عن قيم المؤسسية والديمقراطية والعدالة الاجتماعية بتشبث وفي كل الظروف ومن داخل الوطن ما أمكن... وبناتك محرومين منك بدفعوا تمن انهم بيعرفوا عن أكتوبر .... ومين عارف أيهما أغلى فيما يدفعه الأبناء من الثمن الوطن أم الأب؟؟؟

اشراقه وابوساندر وسماح

كل عام وانتم بخير ..وربنا يحقق امانيكم يارب ...

اسف يااخوانا قطعت عليكم ونستكم ...بس عندي سؤال لابوساندرا ، معايدة ا لتجمع المحضورة ده ماعندنا فيها مكان ؟ ، بتقبلونا نجي نعيد عليكم ؟ شخصيا مابشاوركم بجي بجي وانشاء الله تقولوا دمو ثقيل ، بس اعرف اسم الفندق ...

تحياتي وعيد سعيد عليكم

1-إشراق
راجعي بريدك

2- محمد عبدالرحمن
كنا في الغزال تجنبنا الفنادق نسبة للتحذير الأمريكي وجماعتك كانو هناك ، ولكن بهاء بكري وجماعتو غابو ، ونعتذر

3-سماح
وصفتك السحرية ناجعة ،{ قيم المؤسسية ، الديمقراطية ، العدالة الإجتماعية ، نتشبث بها في كل الظروف ومن داخل الوطن }


وراجعين

Quote: وراجعين

هى لكن متين ياابوساندرا

إشراق
اليوم ماشي الخرطوم لمدة إسبوعين ولمن أرجع حا أفيدك بالمستجدات ويمكنك المتابعة مع نادوس2000 علمآ بأنني أخبرته بشأن طلبك لدى أبنوسة

اشراق وابو ساندا يا لجمال الجلسة ورهف الحنين ، وبعد كل هذا المدة يحفزني هذا البوست لا قول لكما العيد مبارك وانشاالله قريبا عيد في الوطن ومشاكيك على ضفاف النيل ..ابوساندرا تمشي وتجي بالسلامة وتحياتي لجيل الوعد وامهن الرشيدة ..

عشة بت فاطني:
بت حلال ، أمس إتذكرتك في عفراء مول ،عندما وجدت عرائس سود مليحات ، حا أشتري منهن 2 واحدة للبيت ، تحرسه من العيون ، تميمة ، والأخرى لك حتى أعرف كيف أرسلها ليك ، فإذا بك هنا اليوم تنورين البوست اللذي جملته من قبل سماح سيد
أهلآ بيك ، وكل سنة وانت في تمام الصحة والسعادة ، وحتمآ حا أفتح عيوني قدر الريال أبو عشرين عشان نسجل مشاهدات الخرطوم
تحياتك وصلت للبنات وأمهن الحلوة زيهن

ياريت ارجع
مشتهية ارجع
بس حالقى هناك منو؟
منو من ناسى الزمان؟
ستجدين كل الجميلين هناك ..
عثمان عبد الله ما زال يكتب ..
ويسافر بين المسلمية وطابت ..
وعادل سليمان أظنه هناك ..
"وجوا " الت تمنتك وزيرا للثقافة ..
أزهرى محمد على ..
الصادق الرضى والذى يكتب ملحق ( الأضواء ) الثقافى ..
عاكف .. هاشم ..
وفى كوستى ( الرشيد على عمر .. فايز ..
لكنك ستجدين أن محطة الكشك صار اسمها ( ....)
وابراهيم داوود لم تعد محطة ..
وعوض شلك .. لأن أكتب اسمها حتى لا تغيرى رأيك..
لكنهم يفرحون أيضا ..
وناس زمان الجدد ..
انتى أرجعهى فقط
عشر سنين كثيرة ..