Post: #1
Title: كل يوم هيلاهوب ما معقول يا تلفزيون
Author: mohmmed said ahmed
Date: 10-06-2007, 09:50 AM
اول حاجا مافى زول يقول لى تستاهل انت الوداك تتفرج شنو
الدنيا رمضان ومصاقر التلفزيون
اهلا كل بوم هيلا هوب
مرة العجب كيف
مرة ياشمس لالالا
مرة ربيع طه عامل حبيب وقبل شوية شفناهو فى الكاميرا الخفية
فى بت سمحة كدة مسرحا ضفائر محتلا الشاشة عديل
طارق الامين زول فنان لكن والله كترة الطلة بتمسخ خلق الله
بعدين الفرق الكوميدية المنتشرة دى الفروقات بيناتنا تكاد تكون منعدمة
يعنى نكتة عن الرباطاب واحدة عن الفلاتا وتقليد اطفال وفنانيين
طيب ما يدوا الفرق البايخة التانية فرصا يقدونا شوبة
|
Post: #2
Title: Re: كل يوم هيلاهوب ما معقول يا تلفزيون
Author: عثمان سيد أحمد
Date: 10-06-2007, 11:20 AM
Parent: #1
Quote: بعدين الفرق الكوميدية المنتشرة دى الفروقات بيناتنا تكاد تكون منعدمة
يعنى نكتة عن الرباطاب واحدة عن الفلاتا وتقليد اطفال وفنانيين
طيب ما يدوا الفرق البايخة التانية فرصا يقدونا شوبة |
شلاقة عليك يا محمد سيد أحمد
ما داير أقوليك ما تشاهد القنوات السودانية
قومية كانت او خاصة 00
شاهدها 00
واسال الله لك دوام الصحة والعافية
من هذه المشاهدة !!!
واللهم إني صائم 00
وكل عام وأنت بخير
مع مودتي 000
|
Post: #3
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-07-2007, 07:03 AM
Parent: #2
اخى عثمان
مجبر اخاك
ناس الهيلاهوب
كويس انهم عملوا قصيدة محجوب شريف ميرى كلمينا
لكن الامر كان محتاج شوية جدية
عبد السلام جلود عندو دعاية كدا عن بنك فيصل
غايتو لمن اشوفا بقرب اطرش
|
Post: #4
Title: Re: كل يوم هيلاهوب ما معقول يا تلفزيون
Author: Nader Abu Kadouk
Date: 10-07-2007, 07:14 AM
Parent: #3
رايك شنو في جمال حسن سعيد ودعاية ATM
ودابكدوك
|
Post: #5
Title: Re: كل يوم هيلاهوب ما معقول يا تلفزيون
Author: maia
Date: 10-07-2007, 08:08 AM
Parent: #3
Quote: عبد السلام جلود عندو دعاية كدا عن بنك فيصل
غايتو لمن اشوفا بقرب اطرش |
الاخ محمد سيداحمد
رمضان كريم
ومين سمعك!!! دعاية ما عارفة جايبنها عشان يقتلوا بيها المشاهد والا الموضوع شنو!!
بمناسبة برامج التلفزيون رغم انه الموضوع ما عندو علاقة لكن الشيء بالشيء يذكر
امبارح للتعتر لي حضرت جزء من سهرة عوض ابراهيم عوض مع الاستاذين وردي وعثمان حسين
فجأة في بداية اللقاء ، التفت الاخ عوض ابراهيم عوض للاستاذ عثمان حسين مخاطبا بشكل يخلع ( عثمان ... قلت انك ..) واكمل الحديث الذي لم احاول اركز فيهو من خلعتي !!
عثمان !!! حاف كدا .. كانما الناس قعدة في حوش بيتهم والا في مدرسة واحدة!!
برضو الاحترام ليهو اصوله على الاقل رجل في قامة عثمان حسين ايا كانت محاولة فرض بساطة اللقاء التلفزيوني الا انه من الواجب تقديم واجب الاحترام
صراحة طوالي غيرت القناة لانه جاتني صدمة !!
لك تقديري
|
Post: #6
Title: Re: كل يوم هيلاهوب ما معقول يا تلفزيون
Author: Alshafea Ibrahim
Date: 10-07-2007, 08:52 AM
Parent: #1
أخي محمد :
لا بد لنا من الاستراحة أو طلب الراحة لوقت قصير أمام التلفزيون السوداني شوية مدائح نبوية مع الإفطار ممكن ضحكة طائرة من الفنان جمال سعيد أو حتى ربيع طه لكن ناس هيلاهوب ما فيهم عشم ضحكة تب ....
بس الشئ المؤسف ويستحق بوستا كاملا تلك الدعايات والإعلانات الاستفزازية التي تستهدف وتخدم نسبة من المواطنيين لا تزيد عن 5% أو بالكاد تصل 7% - دعايات وإعلانات السراميك ولأثاث الفاخر والبوهيات وخزانات الماء والسيارات وقطع غيارها ... شئ مزعج خلاف أنه استفزازي شعب فقير وجائع ومريض يشتري من أبو فاضل ؟؟؟ ... والبركة في دعايات وإعلانات زين وسوداني حتى المذيع لابس (طقم) زين .... أرحمنا يا تلفزيون نحن في السودان .. الأغنياء والميسورين الله يزيدهم بس خصصوا ليهم قناة فضائية مشفرة وباشتراكات باهظة وخلوها إعلانات بس وشوفنا كان نجي عليها أو نزعل منكم ...كل سنة وأنتم بألف خير وخليك (شيييييييييييك)
الشفيع إبراهيم
|
Post: #7
Title: Re: كل يوم هيلاهوب ما معقول يا تلفزيون
Author: الزنجي
Date: 10-07-2007, 09:07 AM
Parent: #6
محمد ودسيد احمد
مسكاقمي هكرفي
عافيلقو سلاملقو
نتلمس فى هذا الضباب عن ارث تاريخي مندثر
لك التحية فى دار الزين
|
Post: #8
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-08-2007, 06:55 AM
Parent: #7
الاخ نادر
جمال انا بتكيف ليهو وبجاملو عشان درستو
لكن برضو كترة الطلة ما كويسة
الاخت مايا
بالله جلود دا مش ممكن يقتل لى زول
عوض ابراهيم عوض دايما بحس انو مصطنع ومتكلف
الاخ الشفيع
يازول اثاثات بالملايين وحلاويات غالية وناس عندها قروش وما عندها ذوق
الزنجى
اخوى النسا قديمو تاه
تحياتى
|
Post: #9
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-09-2007, 06:24 AM
Parent: #8
امس فى سهرة النيل الازرق برضو استضافو بتاعيين النكت
صالحين والسمانى
اها السهرة كلها البوش والفتة والاكل حتى يمكن ان نقول انو السهرة كانت مبوشة
اسئلة غريبة
الفرق بين السخينة والشوربة شنو
واحدة تتكلم تقول واحدة صحبتى حنكوشة ما كانت بتاكل البوش وتختم بسؤال عجيب
انا عاوزا اعرف الفرق بين البوش والفول المصلح
د عمرو خالد كان اظرف من فى السهرة بتعليقاتو السريعة والمضحكة والناس اللاصلو شغلهم البيكسبو منو القروش طلعو بايخين وما بيضحكو
اجمل حاجا فى السهرة المذيعة جميلة وعاملا مكياج اخضر جميل حول العيون متناسب مع لون التوب الاخضر ولابسا عقد جميل
|
Post: #10
Title: Re: كل يوم هيلاهوب ما معقول يا تلفزيون
Author: nazar hussien
Date: 10-09-2007, 07:00 AM
Parent: #9
| Quote: اجمل حاجا فى السهرة المذيعة جميلة وعاملا مكياج اخضر جميل حول العيون متناسب مع لون التوب الاخضر ولابسا عقد جميل |
الا صالحين مشوه المنظر...
|
Post: #11
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-09-2007, 10:06 AM
Parent: #10
ناس الفرق الكوميديا البيقولو النكت والمنولوجات ديل
اصبحوا شخصيات عامة وكل يوم ظهور فى التلفزيون
وهات يا كلام فى كل موضوع مرات فى الاجتماع ومرات فى الغناء ومرات فى الاقتصاد طبعا السياسة هم اكثر ذكاء وحرص من انهم يقربوا منها
تلقى عبد السلام جلود يفتى فى البعرفو والما بعرفو
بالمناسبة ناس المنلوجات والتقليد والنكات فى دول تانية
حدهم حانات والملاهى الليلية وجمهور من السكارى
لكن فى بلدنا
لقو الهوا ويضرو عيشم ساى علينا نحنا الغلابة
|
Post: #12
Title: Re: كل يوم هيلاهوب ما معقول يا تلفزيون
Author: othman mohmmadien
Date: 10-09-2007, 12:57 PM
Parent: #10
حذف للتكرار
|
Post: #13
Title: Re: كل يوم هيلاهوب ما معقول يا تلفزيون
Author: othman mohmmadien
Date: 10-09-2007, 12:57 PM
Parent: #10
كل عام وأنتم بخير
وخواتيم مباركة ...
ناس الهيلاهوب يشكرون على إجتهادهم ....
خاصة أداؤهم الغنائي
بس المشكلة في القائمين على أمر التلفزيون .....
======================
شفت شباب البيت السعيد ...
ما قادرين يميزوا بين التبش والفقوس والعجور
حينما أراد الأخ ..... أن يشرح للشيف اللبناني .... إيش هو التبش
وأختنا المذيعة إقبال ...
شرحت لنا كيف أنتصرت قوات دفاع السودان في موقعة كرري ....
تاريخ الاثنين 8/10/2007م الساعة 4:30 مساء
أسوأ الأشياء أن تكون مذيعاً غير ملم بتاريخ بلدك وبالتالي فأنت غير مثقف ... البمسكك المايك شنو
وللأسف لقطات المخرج كانت عن الحرب العالمية الثانية... والمذيعة تتكلم عن كرري
والله فعلا من أين أتى هؤلاء
|
Post: #14
Title: Re: كل يوم هيلاهوب ما معقول يا تلفزيون
Author: othman mohmmadien
Date: 10-09-2007, 08:28 PM
Parent: #13
حلقة اليوم الثلاثاء ...
عن النزلة وبتجيب نزلة .....
|
Post: #15
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-10-2007, 06:49 AM
Parent: #14
الاخ عثمان
نشكر الهيلاهوب ولا هم يشكرونا بنشوف فيهم كل يوم وحقو يشتغلو بجدية شوية ويهتموا بالاتقان بدل من شغل السرعة
وحليل ناس بلبل بتاع المنلوجات الزمان يمكن ولا مرة ما ظهر فى التلفزيون وديل قادننا كل يوم
قوة دفاع السودان فى كررى
ديل نتاج ثورة التعليم الانقاذية
|
Post: #16
Title: Re: كل يوم هيلاهوب ما معقول يا تلفزيون
Author: محمد الأمين موسى
Date: 10-10-2007, 07:38 AM
Parent: #15
أخي الفاضل محمد رمضانك كريم وعيدك مبارك وسعيد..
لا أتفق معك على إلقاء اللوم على الهيلاهوب، لأنهم ليسوا مسؤولين عن برمجة التلفزيون.. ونشكرهم على الأقل لأنهم ابتعدوا عن فجاجة واحد شايقي وواحد فلاتي وده جنوبي وكان في أدروب.. إلى آخر موجة تكريس القبلية وتنميطها.. نبعث لهم التحية بقيادة المبدع طارق الأمين الذي غالبا ما يتوفق في استشراف الثقافة الجوانية السودانية ويلامس نبض المجتمع..
ألا ترى معي تراجع الانتاج الدرامي هذا العام كان سببا في أن تظل أعمال الهيلاهوب هي الوحيدة، علما بأنها لا يمكن بأية حال من الأحوال أن تغني عن الدراما؟؟ لماذا خطوة نحو الأمام وخطوتين إلى الخلف؟
|
Post: #17
Title: Re: كل يوم هيلاهوب ما معقول يا تلفزيون
Author: mohmmed said ahmed
Date: 10-10-2007, 08:29 AM
Parent: #16
اخى الاعلامى د محمد الامين
الهيلاهوب برضو عندهم مسؤلية الالتزام الفنى بمعنى الحرص على التجود وعدم الانجرار وراء اغراء المشاركة اليومية
فرقىة الهيلاهوب ايضا يروجون لنكات عن ابناء القبائل المختلفة السودانية
اعتراضى على الاعمال السريعة المسلوقة دون اى جهد
نكتة اسكتش منلوج
طبعا مسؤلية التلفزيون هى الاساس يعنى ما ممكن اهدار ساعات البث عالية التكلفة فىنكات لا تضحك
نصيحة لطارق الامين وهو مبدع خفيف الظل
عدم الاستعجال وتجويد العمل
التركيز على مجال او اكثر فقط فى العملية الابداعية يعنى ما فى داعى لمؤلف وملحن ومخرج كمان الاعلام الحديث يحتاج للتخصص
تراجع الانتاج الدرامى
اظن ان العلة فى عدم توفر الميزانيات يعنى الاصدقاء وقرنى والرشيد لديهم امكانيات لتقديم اعمال د رامية جيدة اذا ما توفرت الامكانيات
|
|