نار الريد.............................................

نار الريد.............................................


23-12-2013, 04:19 AM


  » http://sudaneseonline.com/cgi-bin/sdb/2bb.cgi?seq=msg&board=162&msg=1398801120&rn=0


Post: #1
Title: نار الريد.............................................
Author: munswor almophtah
Date: 23-12-2013, 04:19 AM

لَمّنْ ريدَكْ فَارْ واتْدَفّقْ شِلْتَ غطايتو ومنو غَرفْتَ
جِغِمْتو مٌوَلِعْ زى النارْ ولما وِصِلْ للجوفْ إرتِحْت
عشان للكلمه ألف معانى وغير القاصدو إنت إخترت
وما دايرين يا زول بس زعلك ودون تفهمنا إنت زعلت

نحن بشر زى غيرنا بنغلط وإنت هناك للحاله شرحتَ
وقُلت كلامك بالتحديد ونحن سِمِعْنا وإنت فِرِحْتَ
وزى ما كنا زمان حلوين فتحنا قلوبنا وإنت دخلت
وعِمْرَتْ تانى حنانْ ومَحَنّه ونار الريد البينا أشْعَلْتَ

.فَتّقْ فيها الفُل يتضاحكْ وفَقّّعْ زهْراً إنتَ غََْرستّ
وفَاحْ فى سُوحْها الصنْدّلْ وضَمّخْ غُرَفْ الحب الفيها سكنتَ
وفِرِح الطير لى فِرحّكْ غنى ومالتْ نشْوّى رُوحَكْ ومِلْتَ
ومالتْ كُلْ أهداب أزهارنا ورقصتْ فَرِحه وإنت ثمِلتَ





منصور

Post: #2
Title: Re: نار الريد.............................................
Author: خالد علي محجوب المنسي
Date: 23-12-2013, 05:18 PM
Parent: #1

Quote: لَمّنْ ريدَكْ فَارْ واتْدَفّقْ شِلْتَ غطايتو ومنو غَرفْتَ
جِغِمْتو مٌوَلِعْ زى النارْ ولما وِصِلْ للجوفْ إرتِحْت
عشان للكلمه ألف معانى وغير القاصدو إنت إخترت
وما دايرين يا زول بس زعلك ودون تفهمنا إنت زعلت


لما الريد يفوت حدو
ببقى مصيرنا في يدو



Post: #3
Title: Re: نار الريد.............................................
Author: almulaomar
Date: 24-12-2013, 06:38 AM
Parent: #2

السرورابي المنصور ما أجمل أن يفور الريد في زمن عز فيه الأمر حتى لبن الشاي بقي ما يفور لا جماده ولا رغوة كان لبن بقر كان معزه وكان ضان الموضوع أصبخ غش في غش وكما في لعبة حكم الشايب حقت الكوتشينه ، وهي فورة دون شك بلا خرخرة والدليل شيل الغطاية وهي حااااااره يا أخي إنت بتكتب كلام عادي جداً لكين تربيطك للجملة بخلي الموضوع حاجة كبيرة خلاص تقيف تتأمل فيها حتى مطلع الفجر وده البقولو عليهو البلاغة في زمن أكتر الكتابات فيه أضحت بلاغه عميقة بعد حذف النقطة من حرف الغين.
جانا سقط سمح بالحيل السنة دي وما أنفك وده في صالح بطاطسنا بإذن الله فهي البتلحقنا بعد الله في النازلات وما أكثرها في زمان قل أن يجود بطالعات حتى في حكاوي الحبوبلا لم يعد طالع الشجرة مطالباً بأن يجيب لينا معاهو بقرة أو عنزة حنى هذا إذا طلع أصلاً.
تحياتي

Post: #4
Title: Re: نار الريد.............................................
Author: munswor almophtah
Date: 24-12-2013, 12:06 PM
Parent: #3

العزيز خالد محجوب يا فنان سلام من الله عليك وعلى إبراهيم حسين الذى
سلم زمام أمره للريد الذى تجاوز الحدود ياخ إبداع رهيب وتطريب عالى
وآهة صادقه وموسيقى راقصه مع النغم الفريد ياخ بلدنا تمتلك مواهب
عباقره - شكرا لك يا خالد والود لك

Post: #5
Title: Re: نار الريد.............................................
Author: Mohamed Abdelgaleel
Date: 24-12-2013, 12:14 PM
Parent: #4

Quote: [وقُلت كلامك بالتحديد ونحن سِمِعْنا وإنت فِرِحْتَ


وفرحك عندنا يا هو المنيه

شكرا يا منصور على الكلام الخفيف الظريف ال يشرح القلب
المعنى

Post: #6
Title: Re: نار الريد.............................................
Author: munswor almophtah
Date: 24-12-2013, 11:38 PM
Parent: #5

عزيزنا المله عمر سلام من الله عليك يا رجل وأنت سيد العارفين
فالكرنق نقطع شعبو ومروقو من أبلعوت وأبومريخ وخور ود
عبدالوهاب والدهسير والحلفا من الخيران والعلق من الطندب النابت
على كتف الخيران وربما يكون كوجه من عشر ونخرجه كما السدير قصرا
يحفظ البطايس بموادنا المحليه وكذا اللغه العاديه جدا يمكن لنا
أن نصنع لها فرادة وغرابه ياخ اللبن سايل والمويه سايل وبت
الزريعه سايل واحد يقوم بك وواحد يرميك فى الشوق -نسأل الله
أن تنجح البطاطس فى الحوض وفى السوق وتجيب لك أكثر من تيمس أشول
ياخ عليك الرسول تسلم على ود المامور سلام خاص وقل منصور بتاع
المايكرفون فى دعاية شيخ عبدالرحيم وسلم على جون وشقيقه بتاع
المجلس وعلى كل الجميعاب
ياخ

Post: #7
Title: Re: نار الريد.............................................
Author: munswor almophtah
Date: 25-12-2013, 09:11 AM
Parent: #6

العزيز محمد عبدالجليل ألف حمدا على العوده من مضارب الخير وربع
الصبا وعلك شبعت من الأنس مع البشير ود دربين ومع غيره من أهل
الحكمة الشعبيه الرصينه فهم كثر فى تلك الديار ومن الجنسين وفى تساو
كما جيوب الخرج أو جيبى أم جكو-ياخ إكتشفنا ريادة الوجبات السريعه
وقلنا نواكب ياخ والله العادى دا صعب جدا لكن سوقه حار عكس الآخر
يموتلك فى إيدك حق الفاضى ما يجيبو ليك ياخ مشتاقين وألف سلام عليك

Post: #8
Title: Re: نار الريد.............................................
Author: almulaomar
Date: 25-12-2013, 10:26 AM
Parent: #7

سلامك وصل إن شاء الله
ويا زول تعال صاد البلد والله سمحه بي ناسا زيارة ساااكت
أول أمس كنا متفنين في عتمور ودتور مروي والسقط ده يهب فينا لامن شقق إضنينا بتنونس ساكت لي الله سيدنا ، أها كفوه قال ذات خريف إنهار جدار الحوش وخر منبطحاً من الركن للركن أها جو ناس المجلس وليدات بي سفاري وبنيات بي سكتيرتاتن وبلوزاتن يا حلاتن للوقوف على الأوضاع بتوجيه من الوالي ، أها قومي يا واحده من الحنكوشات أسألي كفوه وسؤال ورا سؤال لامن قالت ليهو يا عم ...... إنت زوجتك بتشتغل ، فضحك ثم بسر وجوووووط بصق السفه وقال ليها "تعوس الكسرة إذا وجدت الدقيق ، فضج المجلس الشهينابي بالضحك حتي يقال والعهدة على الراوي أن ود بركات بلع سفتو.
يااااخ تعال إن شاء الله زيارة – والليله صبحت يا أخوي مصيفه عديل جابت ليها حرايه تتحتتاج لي مقيل.

Post: #9
Title: Re: نار الريد.............................................
Author: munswor almophtah
Date: 25-12-2013, 09:46 PM
Parent: #8

يا المله حرم الحياة هى الإنت ود بركات والمعاكم ديل عايشنها قعادكم
فى الدفويه وتكسعون الأنس وتقرطعون سمح الكلام من سحارات قصه الرهيبه
ياخ ود القرم شديد ? ياخ هذا مدرسه مره جاء ببوكسيه ووجد زول من جماعتنا
وزوجته فى الشارع وقف أخدهم وهو يعرف الرجل قال له المعاك دى منى
قالو بت أعمى ومرتى قالو يا النبى فى حواك والله دى ما أصابحها وأمسيها
عندك غيرها قالو لا قالو سكرها وسوقها تخطب لك على الطلاق أنا المره
شلعتها وقلت لها تخطبى لى قالت لى قوماك حرم عزلت عروس 19 سنه
حرم توّج ياخ يا حليل ود القرم.



منصور

Post: #10
Title: Re: نار الريد.............................................
Author: munswor almophtah
Date: 26-12-2013, 09:26 PM
Parent: #9

لَمّنْ ريدَكْ فَارْ واتْدَفّقْ شِلْتَ غطايتو ومنو غَرفْتَ
جِغِمْتو مٌوَلِعْ زى النارْ ولما وِصِلْ للجوفْ إرتِحْت