Post: #1 Title: كاروشـــة و كواريك ســــــاطع الحاج .. Author: humida Date: 12-23-2009, 11:56 AM Parent: #0
برنامج الاتجاه المعاكس علي قناة الجزيرة و تحت عنوان هل يبقى السودان موحداً يوم 22/12/2009 .. استضاف فيصل القاسـم .. الاستاذ الطيب مصطفى .. و المحامي سـاطع الحاج ..
.. ..
موقف الطيب مصطفى واضح للجميع ( اتقفنا ام اختلفنا ) معاهو .. و جريدة الانتباهة و منبر السلام العادل تعبر عن افكار الرجل .. كنت اتمنى ان تستضيف القناة احد الاخـوة الجنوبيين فهم المعنيين بالأمر .. اضاع معدي البرامج فرصـة ذهبية لفتح باب النقاش بصـورة واضحة ( بدون خجل ) بإستضافتهم للمحامي سـاطع الحاج .. الذي ذكرني بجارتنا ( نجاة سكلبة ) .. سـاطع الحاج .. شخصن موضوع الحلقة .. و صب كل هراءه علي الطيب مصطفى .. و لم يخرج من تحت عباءة الطيب مصطفى بـ( الزول دا قال و الزول دا عمل و الزول دا ما عارف شنو ) .. طيب وين القضية يا ســـاطع .. !!
Post: #2 Title: Re: كاروشـــة و كواريك ســــــاطع الحاج .. Author: humida Date: 12-23-2009, 11:59 AM
عبارة فيصل قاسـم كانت واضحة ( يا سيد ساطع اضعت الحلقة بشـخصنة الموضوع )
Post: #3 Title: Re: كاروشـــة و كواريك ســــــاطع الحاج .. Author: Dr.Elsadig Abdalla Date: 12-23-2009, 12:11 PM Parent: #2
سلامات للجميع ... فكرة البرنامج كانت جيده...ساطع أفسد الحوار بالصراخ مما أعطي انطباع للمشاهد أنه جاء ليهاجم الطيب مصطفى لا ليحاوره ... لا اتفق مع الطيب مصطفى بان اختلاف السحنات هو سبب للانفصال..... سؤال: من الذي طالب بحق تقرير المصير في نيفاشا؟..لماذا يوصف من يطالب بالانفصال من الشماليين بالعنصريه؟بينما الحركه الشعبيه طالبت بحق تقرير المصير والذي قد يفضي للانفصال. هل من يصوت لصالح الأنفصال من أهل الجنوب هو عنصري؟؟ تحياتي للجميع
Post: #6 Title: Re: كاروشـــة و كواريك ســــــاطع الحاج .. Author: Faisal Elrasheed Date: 12-23-2009, 12:23 PM Parent: #3
ساطع ده علي ما اظن ما صدق انه ناس الجزيرة قالو ليه تعال اتهجم لدرجه انه نسي الموضوع الجايي ليه شبك الراجل انت خال الرئيس واعترف وما عاوز تعترف ..ولو فكوهو احتمال كان خنقو ولا يغيب عن المتابع انه وبعد كل هجمه ونباح يبدا في التبسم للكامير ابتسامته البلهاء لقد ازبد وارغي ونقرط وتفتف .... وحير فيصل القاسم زاتو
اعتقد ان الجنوبيين ان كان هذا من يمثلهم فقد ضاعو كمغتصبي الطفله مرام الذين علقوا في المشانق بعد فعلتهم الشنيعه حين كان ذاك الساطع محاميهم وقد قالها الطيب مصطفي علي الهواء..لو كنت اعلم ان هذا هو من سالتقي به لما جئت الي الدوحه بئس الضيف (المسطح)
Post: #29 Title: Re: كاروشـــة و كواريك ســــــاطع الحاج .. Author: humida Date: 12-23-2009, 03:47 PM Parent: #3
Dr.Elsadig Abdalla ..
Quote: من الذي طالب بحق تقرير المصير في نيفاشا؟ لماذا يوصف من يطالب بالانفصال من الشماليين بالعنصريه؟ هل من يصوت لصالح الأنفصال من أهل الجنوب هو عنصري؟؟
اسئلة مهمة جدا تحتاج لإجابات وافية .. كل حسب رأيه .. سـأحاول الاجابة عليها واحدة واحدة .. و اعطي الفرصـة لبقية المتداخلين للاجابة علي نفس الاسئلة .. من الذي طالب بحق تقرير المصير في نيفاشا؟ الجنوبيين هم من طالب بهذا الحق .. لكن رأيهم ما كان علي ارضية ما يعانيه الجنوبية من ازمات .. علي ما اعتقد هي فلسفة المثقف الجنوبيين الذي اراد تتشبيه وضعه بالثورات النضالية حول العالم .. مرات القراية الكتيرة بتخلي الزول ما يكون واقعي .. و يتوهم اشياء غريبة .. ولك في الفترة القضاها ( باقان ) في كوبا .. خير مثال .. لماذا يوصف من يطالب بالانفصال من الشماليين بالعنصريه؟ حسـب الفهم السائد الآن .. مما ولدونا و الجنوبيين يلعبوا دور الضحية .. اي احتكاك بسيط يهرب الجنوبيين الي مصطلح العنصرية .. و انهم مضطهدين و عملوا لينا وسووا لينا .. حتي لو اجمع الجنوبيين كلهم علي الانفصال و شمالي واحد قال ليهم معاكم حق .. حيقولوا عليهو عنصري .. هل من يصوت لصالح الأنفصال من أهل الجنوب هو عنصري؟؟ لا .. حيكون تحرري قومي امبيريالي .. و احتمال كبير اذا حدث الانفصال .. نجد اسماء الاطفال في الجنوب تتحول الي جيفارا و ماو سي تونغ و عبد الحليم ( دا واحد في حلتنا قاد ثورة ضد اللجنة الشعبية )
Post: #30 Title: Re: كاروشـــة و كواريك ســــــاطع الحاج .. Author: humida Date: 12-23-2009, 03:55 PM Parent: #29
Faisal Elrasheed
Quote: شبك الراجل انت خال الرئيس واعترف وما عاوز تعترف ..ولو فكوهو احتمال كان خنقو
في ناس كتيرة ما قادرة تفصل بين ( لسـتك ) في ناصية الشـارع .. و منبر علي اشهر قناة اخبارية عربية في العالم .. في رأيي الشخصي .. كان علي المحامي ســاطع ان يتجاوز كراهيته للطيب مصطفى في هذه السـانحة .. و يجيب للوطن ( قووون ) .. و يستفيد من الفرصـة دي .. خصوصا انه الإعلام العربي شحيح في متابعة الشـان السـوداني .. من بين مليون برنامج عن العراق او عن لبنان تجد برنامج واحد يتحدث عن الشأن السوداني .. تصــرفات ســاطع دي بتخلينا نفكر انه لمتين نحن بنضيع الفرص .. و نتعامل مع قضايانا بالسبهللية دي ..
Post: #4 Title: Re: كاروشـــة و كواريك ســــــاطع الحاج .. Author: بشير أحمد Date: 12-23-2009, 12:15 PM Parent: #2
الاخ/حميدة تحياتي؛؛؛
ساطع ده كأنه عمل ليهو كوبي أند بيست لبعض بوستات مُهرجي سودانيزاونلاين ؛
وماطلعنا من نقاشه بشئ يذكر.
كان فرحان بسؤاله للاستاذ الطيب مصطفي (إنت موش خال الرئيس؟)
ياخي هو ماله ومال يكون خال الرئيس او أخو الشيطان ذاتو
لم يناقش اي فكرة ولا موضوع الحلقة
ساطع الحاج كلما يتذكر ليهو حاجة ؛تلقاهو يكورك فندي فنديييي
غايتو...
طلع راجل بيض خالص..
Post: #5 Title: Re: كاروشـــة و كواريك ســــــاطع الحاج .. Author: humida Date: 12-23-2009, 12:23 PM Parent: #4
كاروشـة ســاطع هي حالة مصاحبة للهسـتيريا النضالية .. ضاعت بسببها كثير من القضايا ( شـمار في مرقـة ) .. أمثال سـاطع الحاج هم الركيزة الاسـاسية في استمرار حكم الانقاذ حتي الآن .. لا أعلم بالتحديد لماذا كان الرجل يصـرخ بهذه الطريقة العبيطة جدا .. المايك قدامه و الاستديو فاضـي .. كان يمكن ان يقاطع الطرف الآخر بدون كواريك و انفعال و تفتيف في المايك ..
.. ..
كاتلوج النضـال الحايم في السودان الآن .. شكلو مضـروب .. ما هكذا يا مناضلين ..
Post: #7 Title: Re: كاروشـــة و كواريك ســــــاطع الحاج .. Author: humida Date: 12-23-2009, 12:30 PM Parent: #5
في ناس كتيرة هنا في سودانيزاونلاين بتعبرنا بندافع عن الحكومة .. لمن ننتقد زول ذي سـاطع الحاج .. اتمنى ان يتحفونا برأيهم في حالة ( النباح ) الفريدة من نوعها دي .. في قضية حسـاسة جدا .. كنا نتمنى انه نفهم فيها حاجة ..
.. ..
لو استضاف فيصل القاسـم زميل المنبر ( انور دفع الله ) لكان خير لنا من ســـــــاطع الذي لم يســـــطع ..
Post: #8 Title: Re: كاروشـــة و كواريك ســــــاطع الحاج .. Author: حيدر حسن ميرغني Date: 12-23-2009, 12:31 PM Parent: #5
والله ياحميدة لم ارى هذا الساطع الا اليوم لكني حزنت جدا لاسلوبه في الحوار كان بامكانه ان يستغل المساحة المتاحة له في مايفيد طرحه للاسف الشديد هذا كله ليس في مصلحة البلد
Post: #9 Title: Re: كاروشـــة و كواريك ســــــاطع الحاج .. Author: محمد فرح Date: 12-23-2009, 12:32 PM Parent: #5
ساطع دا كان ساطع بالجد
لو كانو استضافو ين ماثيو مثلاً كان بكون أفيد.
بس كلكم شكلكم ما حضرتو الحوار مع الصحفية لبنة أحمد حسين في تلفزيون الحياة المصري بعد حلقة ساطع وكوراكو مباشرة!
Post: #11 Title: Re: كاروشـــة و كواريك ســــــاطع الحاج .. Author: Hussein Mallasi Date: 12-23-2009, 12:34 PM Parent: #9
Quote: لو استضاف فيصل القاسـم زميل المنبر ( انور دفع الله ) لكان خير لنا من ســـــــاطع الذي لم يســـــطع ..
ما للدرجة دي كمان.
Post: #10 Title: Re: كاروشـــة و كواريك ســــــاطع الحاج .. Author: داليا حافظ Date: 12-23-2009, 12:34 PM Parent: #5
Quote: كاتلوج النضـال الحايم في السودان الآن .. شكلو مضـروب .. ما هكذا يا مناضلين ..
يعني ياحميدة أسمح لي من الله خلقك شفت ليك نضال بصوت واطي ..هو النضال أساسا بعتمد على الروح
الثورية الهايجة ..وما "التفاف" إلا حمم بركانية خارجة من أعماق النفس المنفعلة تتقاذف هنا
وهناك ..علها تصيب نفوسكم المتجمدة فيتدفق نهر الوطنية والمحبة ..ألخ
ـــــــــــــــ
بالجنبة كدة ساطع ده مازول هين ما تضغطوا على كواريكو شديد ..
Post: #12 Title: Re: كاروشـــة و كواريك ســــــاطع الحاج .. Author: حيدر حسن ميرغني Date: 12-23-2009, 12:40 PM Parent: #10
ساطع موقفه بشكل عام من قضايا البلد كان جيد فقط كان يحتاج ان يكون مرتبا في الطرح
Post: #32 Title: Re: كاروشـــة و كواريك ســــــاطع الحاج .. Author: humida Date: 12-23-2009, 04:20 PM Parent: #12
حيدر حسن ميرغني ..
Quote: ساطع موقفه بشكل عام من قضايا البلد كان جيد
موقفه دا ما شفته انا قبل كدا .. و لم اسمع بأسمه ألا من خلال هذا البرنامج .. لكن جميع مواقفه البتتكلم عنها دي .. علي ما اعتقد ضيعها بالتهريج الذي احدثه في نقاش قضية حساسة مثل قضية انفصـال الجنوب ..
Quote: فقط كان يحتاج ان يكون مرتبا في الطرح
الكلام دا تقوله للزول القدم حاجة .. و فاتت عليه بعض الاشياء البسيطة او للزول الكان منتظرين منه المزيد .. من قول تيت الزول دا ( جلا الكورة ) .. و أحيلك مرة آخرى للفنان ( يونس شلبي ) .. في مسـرحية ( مدرسـة المشاغبين ) .. لإعطائك صورة واضحة لاداء ســاطع الحاج في الحلقة ..
Post: #13 Title: Re: كاروشـــة و كواريك ســــــاطع الحاج .. Author: humida Date: 12-23-2009, 12:41 PM Parent: #10
داليا حافظ .. لو كنتي ولد و بتلعبي في رابطة كورة .. كان قابلتي ذي ســاطع دا كتير .. حياتي مليانة بالشخصيات النمطية .. بواقع انه السودانيين ديل ذي 13 قالب متكرر .. ( علي حد زعمي ) .. ســاطع الحاج .. شخصية مكررة .. دفاعه عن قاتلي الطفلة ( مرام ) .. و كواريكه في هذا البرنامج .. بتديني صـورة واضحة لـ( نفسيات ) الزول دا .. حاولي تقري عن الشخصيات النمطية السودانية ..
Post: #14 Title: Re: كاروشـــة و كواريك ســــــاطع الحاج .. Author: Faisal Elrasheed Date: 12-23-2009, 12:46 PM Parent: #13
Quote: .علها تصيب نفوسكم المتجمدة فيتدفق نهر الوطنية والمحبة
حميده بما انك من اصحاب النفوس المتجمده وانهار الوطنية عندك نشفت فعليك الله لو سمحته اديني سحبه لحد الحيطه ديك داير ارد علي داليا دي رد متزمزغ
Post: #15 Title: Re: كاروشـــة و كواريك ســــــاطع الحاج .. Author: داليا حافظ Date: 12-23-2009, 12:51 PM Parent: #14
Quote: داير ارد علي داليا دي رد متزمزغ
غايتو كان رديت جادي تكون إتلومت ..
ما شايف الوجه المدرق الفي مداخلتي الفوق دي ..حسكم المضاد للنضال غلب روح الدعابة ..
Post: #17 Title: Re: كاروشـــة و كواريك ســــــاطع الحاج .. Author: Faisal Elrasheed Date: 12-23-2009, 12:58 PM Parent: #15
Quote: .حسكم المضاد للنضال غلب روح الدعابة ..
داليا ....
دقيقه بس ..
ارقع اللستك واجيك ...الود حميده قداهو
Post: #16 Title: Re: كاروشـــة و كواريك ســــــاطع الحاج .. Author: السيد أحمد إبراهيم Date: 12-23-2009, 12:57 PM Parent: #10
Quote: الروح
الثورية الهايجة ..
ياداليا
مصطلح جديد وخطير
فعلاً آليات ( النضال تطورت )
مصطلح يستاهل براءة إختراع
Post: #18 Title: Re: كاروشـــة و كواريك ســــــاطع الحاج .. Author: صلاح أبودية Date: 12-23-2009, 01:00 PM Parent: #16
صدق يا حميدة !! أنا كنت بكتب فى بوست إسمو .. كواريك ساطع الحاج
Post: #19 Title: Re: كاروشـــة و كواريك ســــــاطع الحاج .. Author: humida Date: 12-23-2009, 01:10 PM Parent: #16
Quote: حسكم المضاد للنضال غلب روح الدعابة
يا داليا .. السخرية في حد زاتها نوع من النضال .. و كثير من الاعمال الكوميدية كان اثرها واضح و احسن من كثير من الخطب الرنانة من شاكلة ( إني لأرى رؤوسا قد أينعت ) .. و حس الوطنية .. بختلف من شـخصية لشـخص .. و كل زول عنده رأيه .. و بمارس الوطنية بتاعته بالطريقة البشـوفها مناسبة .. لكن الجميع بتفق انه اسلوب الحوار مهم .. و العوارة و دق الكاروشـة في الفاضي او كما سميتيها ( الثورة الهائجة ) .. اسلوب ما كويس .. دايرك و انتي ( الثائرة الهائجة ) .. تلخصي لي المستفاد شنو من حديث المحامي ساطع الحاج في الحلقة .. و هل كان مقدم البرنامج متحيز للطيب مصطفى حين قال و بالحرف الواحد لـساطع .. ( لقد اضعت الحلقة بشخصنتك للمواضيع ) .. و ماذا يهمنا ان كان الطيب مصطفى خال او عم الرئيس في قضية مثل قضية انفصال الجنوب .. و ما هو السبب المفرح الذي جعل ساطع يسطع بابتسامة ( كلوز أب ) عندما جاوبه الطيب مصطفى انه فعلا خال الرئيس .. ماذا وراء هذه الابتسامة .. و الفات علينا فهمه شنو كوننا ما ضمن ( الثورة الهائجة ) ..
Post: #20 Title: Re: كاروشـــة و كواريك ســــــاطع الحاج .. Author: humida Date: 12-23-2009, 01:16 PM Parent: #19
أوعدك يا داليا في بداية الربع الجديد ببوست طويل عريض تحت عنوان .. الثورة الهائجة .. حاجة كولن كولن ما شاء الله ..!!
Post: #21 Title: Re: كاروشـــة و كواريك ســــــاطع الحاج .. Author: Kamal Karrar Date: 12-23-2009, 01:31 PM Parent: #20
Quote: [يعني ياحميدة أسمح لي من الله خلقك شفت ليك نضال بصوت واطي ..هو النضال أساسا بعتمد على الروح]
ليس بالضرورة... النضال الهادي.. القوي..هو المطلوب...
ده بيقود مباشرة لتعريف النضال!!! حتى الجهاد...وهو أعلى مراتب النضال...
هو جهاد أصغر وجهاد أكبر... ولمحاسن الصدف أن الجهاد الأكبر هو أهدأ مايكون...
جهاد النفس... طبعا ما شفنا زول بيكورك في نفسه إلا إذا كان مجنون لاسمح الله...
شكرا أختي الكريمة...
Post: #22 Title: Re: كاروشـــة و كواريك ســــــاطع الحاج .. Author: عصام دهب Date: 12-23-2009, 02:27 PM Parent: #21
Quote: الثورة الهائجة
في مستودع الخزف .
ــ
ثورة = أنثى الثور .
Post: #23 Title: Re: كاروشـــة و كواريك ســــــاطع الحاج .. Author: humida Date: 12-23-2009, 02:35 PM Parent: #22
Quote: في مستودع الخزف .
عصــام يا صديق .. مرات معرفتنا الشــخصية بالزول بتخلينا نحاول خلق مبررات للـ( عوارة ) بتاعته .. و بنحكم علي عمله العام من خلال علاقته الخاصة بينا .. في ناس كتيرين ما بينفعوا للعمل للعام .. و كويسين جدا و طيبين في علاقتهم بالناس في الخاص .. علي ما اعتقد ان ســاطع الحاج .. و من خلال قراءة اراء المتداخلين .. زول كويس شديد و بحب السودان و بكورك في التلفزيون .. علي وزن .. ( ينعى والده و يصلح ساعات ) ..
Post: #24 Title: Re: كاروشـــة و كواريك ســــــاطع الحاج .. Author: اساسي Date: 12-23-2009, 02:52 PM Parent: #23
لو استضاف البرنامج احد الجنوبين كما تقول لكان الميزان مختل , الفكرة هي ان هناك شمالي يدعو للانفصال وشمالي يدعو للوحدة وعلي ذلك كان البرنامج كما بالمقابل يمكن ان يكون هناك برنامج يستضيف فيه جنوبي مع الوحدة وجنوبي اخر مع الانفصال فهذا منطقي جدا فانا اعتقد ان ليس علي فكرة البرنامج لبس وانما اللبس في الاذهان ساطع دخل الحوار ليقول اشياء محددة جاء بها كان يلتف علي الاسئلة بطريقة غير مقنعة ليقول ما جاء من اجله وهو الهجوم علي الطيب مصطفي لذا ظهر ساطع منفعلا في غير مكان الانفعال مسهبا في غير مكان الاسهاب مقاطعا في غير مكان المقاطعة ومقلا في مكان الاسهاب وهادئا في مكان الصخب لذا اعتقد انه ساهم في تجييش عدد كبير مقدر من السودانيين الذين تابعوا الحوار ولم يتخذوا رائيا في تجير ارائهم للانفصال ساطع افل نجمه في حوار الامس وتسبب لي انا والاخ احمد التجاني في احراج كبير بضعفه ونبيحه حيث انا حضرنا الحلقة بالامس في كافي فيه عدد كبير من غير السودانيين تابعوا معنا الحلقة بناء علي رغبتنا ورضائهم .
Post: #25 Title: Re: كاروشـــة و كواريك ســــــاطع الحاج .. Author: Rawia Date: 12-23-2009, 03:15 PM Parent: #24
ساطع ماقادر ينسى أركان النقاش في الجامعة وأسلوب أركان النقاش
_____________________________ وطنية ساطع ووحدويته مابيختلف فيها أتنين
Post: #28 Title: Re: كاروشـــة و كواريك ســــــاطع الحاج .. Author: أسامة عبد الجليل Date: 12-23-2009, 03:37 PM Parent: #25
Quote: وطنية ساطع ووحدويته مابيختلف فيها أتنين
وعنصرية الطيب مصطفى لا تتناطح فيها عنزان.
Post: #37 Title: Re: كاروشـــة و كواريك ســــــاطع الحاج .. Author: humida Date: 12-26-2009, 10:20 AM Parent: #28
أسامة عبد الجليل ..
Quote: وعنصرية الطيب مصطفى لا تتناطح فيها عنزان.
الحديث هنا ليس عن عنصرية الطيب مصطفى .. و عشان تفهم كلامي أديك مثال بسيط .. عندنا شخصين .. واحد اسمه فلان .. و التاني اسمه علان .. قام فلان سـرق قروش .. و علان شافه .. جابوهم في المحكمة .. و طلب القاضي من علان ان يشهد في الواقعة .. قام علان قال بأعلى صوته .. يا سيادة القاضي الزول دا زمان كان عندو عجلة فونيكس 26 .. !!
Post: #26 Title: Re: كاروشـــة و كواريك ســــــاطع الحاج .. Author: داليا حافظ Date: 12-23-2009, 03:31 PM Parent: #19
Quote: ماذا وراء هذه الابتسامة .. و الفات علينا فهمه شنو كوننا ما ضمن ( الثورة الهائجة ) ..
حميدة أنا حاولت أقول أنو مداخلتي الأولى هي ذاتها سخرية وأنا ما جادة فيها ..ولفت إنتباهك
انت وفيصل لأني بهذر وأنتو إتعاملتو مع كلامي على أنو جد ..لأن إعتبرت فكرة البوست كلها مزاح
إستنادا على الأيقونة ..أنا ما جادة ولا في كلمة من القلتها عن الثورة الهايجة ..وعن الوطنية
ده كلو خستكة ما أكتر ..وده مأأسلوبي لمن أكون جادة ..فلو ما فهتو أني ما جادة ..أنا بقول ليك أنا
ما كنت جادة وما بعني فيهو ولا كلمة ...معقول تعريفي للنضال يكون بالسطحية دي ؟
أنا ذاتي ماشفت الحلقة بالمناسبة ..وحبيت أعلق على كلامك عن( كاتلوج النضال ) ما أكتر ..لكن يبدو أني
ما إتوفقت ..عذرا
Post: #27 Title: Re: كاروشـــة و كواريك ســــــاطع الحاج .. Author: humida Date: 12-23-2009, 03:34 PM Parent: #26
ديني انا .. انتــي بقيتي بروفيشنال عديل .. تاني لو قلتي لي الســلام عليكم .. بقعد أضحــك .. ( للضمان يعني ) ..
.. ..
عذرا داليا .. معليش ما فهمنا كتابتك بالنية بتاعتك ..
Post: #31 Title: Re: كاروشـــة و كواريك ســــــاطع الحاج .. Author: humida Date: 12-23-2009, 04:05 PM Parent: #4
بشير أحمد
Quote: ياخي هو ماله ومال يكون خال الرئيس او أخو الشيطان ذاتو
الفرح الشديد الذي انتاب ســاطع بعد طرحه هذا السـؤال اداني احساس انه الموضوع دا ( ســر ) .. او انه اســتجد أمــر في موضوع ( خال الرئيس ) .. و توقعت بعد جواب الطيب مصطفى بأنه ( فعلا خال الرئيس ) ..!! انه ســاطع يقول ليهو ( لا لا انت ما خاله و يجيب فحص الـDNS بتاع حوش بانقا كلها و يطلعهم بقايا ارناؤؤط ) .. و استغربت جدا لإبتسامة النصـر التي علت وجه سـاطع .. بعد الاجابة .. ذكرتني الفنان ( يونس شلبي ) .. في مسرحية ( مدرسـة المشاغبين ) ..
Post: #33 Title: Re: كاروشـــة و كواريك ســــــاطع الحاج .. Author: عبدالكريم أحمد الامين Date: 12-23-2009, 04:56 PM Parent: #31
** الاخ حُميده.. ## مساءك خير.. ** لقد ظننت أن ساطعاً هو فيصل القاسم ,, وفيصل القاسم هو مُراقب الصِراخ التلفزيونى.. ** بالامس لم يكن ساطع ساطعاً ولم يكن موفقاً ,, بل كان مُسطحاً ,, وكانت فرصه ذهبيه قد لاتتكرر ليطرح وجهة نظره التى يؤمن بها ,, وبالرغُم من أن هنالك أشخاص لاتعجبهم كتابات الباشمهندس الطيب مُصطفى ولكن مناقشته وطرحه كان مُقنعاً وإن أختلف البعض معه فيما طرحه.. ## السؤال هل من مصلحة الجنوب الإنفصال ؟؟ ** ولماذا التصويت من طرف واحد (الجنوبيين) ؟؟ ** أم أن من صاغوا النص فى الإتفاقيه أرادوا أن يرمو الكره فى ملعب الجنوبيين !!! ## ساطع بالرغم من إمتهانه لمهنة المحاماه والتى نتعلم منها الصبر لسماع من يكون خصمك حتى تدحض مايقدمه من دفوع وأسباب كان مُتسرعاً ومنفعلاً فأضاع ماجاء من أجله ,,, ونشاطه فى مُنظمات المجتمع المدنى لاينكره أحد ولكنه لم يكن موفقاً فى طرحه على حسب الموضوع المُثار فى موضوع اللقاء..
(ودام الود والإحترام بين الجميع) (أبو محمد فؤاد) - الماكيكى..
Post: #34 Title: Re: كاروشـــة و كواريك ســــــاطع الحاج .. Author: humida Date: 12-23-2009, 07:41 PM Parent: #33
عبد الكريم ( الما كيكي ) ..
Quote: هل من مصلحة الجنوب الإنفصال ؟؟
اتمنى ان أجد الاجابة ايضا ..
Post: #35 Title: Re: كاروشـــة و كواريك ســــــاطع الحاج .. Author: حمزه بابكر الكوبي Date: 12-24-2009, 03:38 AM Parent: #34
Quote: كاروشـة ســاطع هي حالة مصاحبة للهسـتيريا النضالية .. ضاعت بسببها كثير من القضايا ( شـمار في مرقـة ) .. أمثال سـاطع الحاج هم الركيزة الاسـاسية في استمرار حكم الانقاذ حتي الآن .. لا أعلم بالتحديد لماذا كان الرجل يصـرخ بهذه الطريقة العبيطة جدا .. المايك قدامه و الاستديو فاضـي .. كان يمكن ان يقاطع الطرف الآخر بدون كواريك و انفعال و تفتيف في المايك ..
حميده لك التحايا ده حال كثير من المناضلين للاسف.......... عدم الموضوعيه !!!!!!
Post: #36 Title: Re: كاروشـــة و كواريك ســــــاطع الحاج .. Author: humida Date: 12-25-2009, 09:53 PM Parent: #35
حمزة الكوبي .. للاسف الشديد اصبح امثال ساطع الحاج هم الممثلين للشعب السوداني ..
