مدخل تانى .. انا ليه تجينى الموية حفيانة وادنقر البسها شبط اخدر ..!!

ناس الأغانى الهابطة بقو يتعززو ..!!
والكلمة لا تهبط ابداً ..
انا لا اتحيز للمرأة ..
اللحن هو الهابط
اللفظ جميل
دق الباب وجانا وجريت ليهو حفيانة .. ما قصدى الخيانة دايرهو يقيل معانا ..
خدرة ناعمة وشاى منعنع .. والبعرس امو تقنع ..
اللفظ جميل ..
يتدفق عاطفة وحنان .. وترن بداخله الاجراس والاوزان
لكن .. !!
يحتاج لبعض الشهرة واللمعان ..
يحتاج لوردى او فيتورى اخر لنصدق ان بداخله انسان ..

..
..

وناس الاغانى الهابطة بقو يتعززو .. !!
والشعراء ..
(انى اتنفس تحت الماء انى اغرق .. اللون الازرق فى عينيك يدفعنى نحو الاعمق وانا
ما عندى تجربة فى الحب ولا زورق ...زيدينى عشقا زيدينى يا احلـــــــــــــى نوبات جنونى )
مدخل أول .. المدينة عارية والتفاحة فوق الماء ..
مدخل تانى .. انا ليه تجينى الموية حفيانة وادنقر البسها شبط اخدر ..!!

النص
يا وافقة وضلك ماشى .. يا ماشة وضلك واقف ..
يا متخبية خلف وضوحك .. يا واضحة وفيك متخبي ..
يــــــــا يااااااااااخ اقيفو اقيفو اقيفو ..
قفا نبكى من ذكرى حبيب ومنزل بسقط اللواء بين الدخول فحومل ..
أفاطم مهلا بعض هذا التدلل وإن كنت قد أزمعت صرمي فأجمل ..
قفا نبك .. فعول ..
من ذكرى .. مفاعل ..
حبيب .. فعول ..
ومنزل .. مفاعل ..
هكذا كان الشعر وليس الكلام ..
وهكذا كان يقطعها الخليل رحمنا الله ..
وشعرائنا ديل بس يرمزوا ..
فاطنة العجوز وما تصوتوا ..
الجك دا لو ما فاز بفوز ..
والزير دا ياخ ما قلتا ليك ما تخت لى فيهو كـــــــــوز ..
هو يعنى البكون كوز ما بشر ..
ما بشيل هم الشوارع والبنومو جوة الحفر ..
لن انحاز لهذا الحزب ولا لسواه ..
مجرد رقة انسان اواهــ .. الانسانية هى معناهو وهى مغناهو وهى محياهو وهى مسواه ..
لا انحاز لهذا الحزب ولا لسواه ..
كلٌ مسعاه السلطة ..
وكلٌ مسعاه الجاهـ ..
وكلُ ضل وكل تاهـ ..
حزبى نفسى .. وحسبى الله ..
يعنى البكون كوز ما بشر ..
ما بشيل هم الشوارع والبنومو جوة الحفر ..
ما بعيش الدمعة والخوف والسهر ..
ما بقول يا عمو قدامك قطر ..
يا شعبى يا سودانى هوى فتح مصيرك فى خطر ..
يا شعبى يا سودانى هوى ..
لا جينا شان جمهور .. لا شان نجيد النص ..
النــيى اخير للنار والموية ما بتنقص ..
فتح عيونك ديل ضهر البلد بنقص ..
لمتين نعيش بالدس .. جوة البيوت ندس ..
الكــــــــشة جات نندس .. لمتين نعيش بالدس ..
وطن واحد وبس .. خالقنا واحد وبس ..
ايدك على ايدى
نتصافى ونتعافى .. الهمة للهمة ..
ورحم الوطن واحد ورضعنا من بزة
النيل وياهو النيل ليه يعنى نتجزأ ..
كيف نبنى طابق فوق والساس تحت نزا ..
والطبلة لا بطيق مفتاحها لا الرزة ..
والباب قصاد الريح واقف على لزة ..
وكل الهنا الضقناهو لا طاب ولا لذة ..
مليون معزة وميل ياخوانا تنهزا ..
والشعراء ديل بس يرمزو ..
وما عندهم غير بالكنايات والمجازات القديمة ينبذو ..
بت من ورق .. الزحزحة ..
وفى اى منتدى فيهو بنات بتغزغزو ..
والعلماء .. !!
يا علماء ياخ ما توجزو .. ما تبقو قدر الحارة امشو واركزوا ..
تبت يداك ابا لهب و تب .. امريكا ما عارف شنو ..
امريكا دى واحدة قليلة ادب ..
ونحن لها والى الجهاد ...
يا علماء ياخ ما توجزو ..
ما تبقو قدر الحارة امشو واركزو ..
هو الفينا محتاج لى حكاوى ولى فتاوى ولى شعر ..
فى الفاضى بس تتنرفزو ..
والكفرة ديل ما دام فى رب خلق ابن ادم وعوزو ..
اللمسكو المال " والبنون" والاشترو الطين ويكنزو ..
الدين
وحاتو هو لا بضيع لا بوصلو لا بمسكو ..
شدهونا فى عيشتنا بس قصدونا خربو طبعنا ذاتو وبوظو ..
الزاكى مات وعليهو دين ... امونة قالو ادوها عين .. عثمان اخوى جابولو بت
السوق دا ينزل لى متين (وين الموية .. وين النور.. وين العجين .. و البنسلين .. و الاوكسجين .. البنقو وين العرقــي وين والناس توح )
والناس توح ..
زح ياخ زح ..
تنبح نبح وتردح ردح ..
تلاتين الف دى مقابلة دكتورة ولا عرس عديل ..
ان شاء الله ما يطيب الجرح ..
والناس توح ..
زح ياخ زح ..
الكسرة .. الفول .. الملح .. ود الطهور .. بيت العرس .. الضيف لعلو بخير صبح .. الدين ..
وباقى المنهج الزادهو خسارة ..
زادوهو خسارة وقام ربح .
.البنجمع والبنكسر والبنضرب .والبنطرح
البيت وقع ..
البيت وقع امسكو صرتو ..
شوفو التراب البنطرح ..
يا زمن صرة جبين الهم .. عاد كيفن ينطرح وكل الهموم الفينا كبرو وعجزو ..
ولدولنا تانى زمن جديد نادولنا شيخنا يعوزو ..
دايرين شغل عوووووك عايزين شغل وينو الشغل ..
انا قارى طب العاصمة ..
انا تكنلوجيا وهندسة ..
انا فى المعامل مدرسة ..
انا اول الدفعة اقتصاد ..
انا عندى ماجستير .. شرف ..
انا .. بت بتلعب نص وباك ..
انا زول بهدف فى الشباك ..
انا ديك وداك انا جيك وجاك ..
والناس توح
دايرين نعيش رايكم شنو العرس الجماعى قريب تجو وتجاوزو المحنة وكمان فى بيت حلال تجاوزو ..
احسن ليكم رمضان بجى وين تانى تجكسو ..
ما قلنا ليكم من زمان لامن تخشو الجامعات ..
اركزو واتمركزو .. وما تلكزو
واتكوزو ..
وادو الوطن حقو ..
العيد فضل ليهو خمسة يوم .. والدجتل فضل الله اخوى ضربو ورماهو و طفقو ..
بس اقعدو عاينو وبوزو ..
الانجليز دخلو الفريق واتحلبو واتحمضو واتكبرتو واتفولزو ..
بس اقعدو عاينو وبوزو ..
(كونو معنا على قناة الاحلام .. شكيرة فى اخر البومها الفنى .. ايهاب توفيق جرح تانى .. السينما والصيف مش حا تأدر تغمض عينيك )
بس اقعدو عاينو وبوزو ..
الانجليز دخلو الفريق اتحلبو واتحمضو واتكبرتو واتفولزو ..
حلبو الغنم شربو اللبن اتسلو بينا وقزقزو ..
ولسة .. نحنا.بنغازل فى القمر وهم طلعو فيهو وتنقزو ..
بس اقعدو عاينو وبوزو
واتحزحزو واتقمزو وارجوها فى نص الطريق واتشنطو ..
انا لو قبضتها كنت وريتا النهار بى نجمتو ( بــــــــــــت المرق ادم ابوى من جنتو ) .
شوف الحضارة السوتو والله بعد سنتين اكان تتلفتو ..
الحــــُـــــرفــــة ما حتــــــو اللــــتو .. مولانا طابق فردتو ..
الشيخ بونس فى الفتو .. بى عرفتو .. وبى هبهانو وجنزبيلو وعرفتو ..
عشرين مرأة وما كفتو ..
والــطــلـــبـة لســـــة بنقطو ..
دا زمن بنقطو فيهو حروف عاد الله ليكم نقطو ..
و الشعراء يمشو وينططو .. ( نكر صوتك صداك )
(وامونة غرقت فى الرماد ) .. (وانا جاى ليك من سكتك ) .. (وتطلعى انتى من صوت طفلة وسطة اللمة منسية )
.....................
امونة مين؟ .. والسكة وين؟ .. وتطلع متين ؟ ..
والشعراء يمشو وينططو ..
ما ينططو .. هو العلماء لسع ما فتو ..
هو الدين من ما دخلوهو وجه النهار وناس عمرو خالد وعلموهو الكمبيوتر كلفتو ..
يا علماء احسن اسكتو ..
بس اقعدو قحقحو فى الروادى علما بلا عملا دحين شن قحتو ..
سوقونا ياخ ارح ودونا لى بوش عديل فى بيتو نحنا الصغار بنكفتو ..
ايوة نكفتو ما كفت العالم دا كلو ملاهو خوف قلع هدومو و بهدلو ..

..
..

وما مشكلة الزول يتزلق فى المطرة ويكسر ركبتو ..
وما مشكلة الزمن ينحرق ويفقد نضارو وروعتو ..
وما مشكلة الزول العزيز يفرض علينا معزتو ..
وما مشكلة البت تبقى لى زول اصلو ما حبتو
وما مشكلة الروح تمشى دون حلما عزيز ما تمتو ..
وما مشكلة الفصل ينكتب مزعج لغاية ألفتو ..
بس ...
لو صدق خاطر القصيد والفينى رجح كفتو ..
الزول اخير يمسك لسانو عليهو جد و يبقى عشرة على ..
سجارتو و سفتو ..
عفوا ...
يبقى عشرة على كرامتو وعفتو ..




..
..

* احمد عليش ..

up

Quote: لو صدق خاطر القصيد والفينى رجح كفتو .. الزول اخير يمسك لسانو عليهو جد و يبقى عشرة على .. سجارتو و سفتو .. عفوا ... يبقى عشرة على كرامتو وعفتو

حميدة
كل سنةوانت طيب
بالجد عجبنى النص جدا
شكرا على هذه العيدية
واتمنى ان تكون دائما بخير

تحياتى

عيدية طاعمه يا حميد


كل سنه وانت طيب

عيد مبارك

Quote: بالجد عجبنى النص جدا

سلمى .. كل سنة و انتي طيبة ..

Quote: كل سنه وانت طيب

و انت طيب يا فاروق .. !!

حميدة .. تعرف انا جيت هنا وما فهمت اي حاجة

صدقـنـي ..

تعرف مسعلة الفورمه دي مشكلة

زي لاعب الكرة الجديد لما يدخل الميدان لأول مرة ..

ويواجه الجمهور الكبير بالمدرجات ..

اعصابو بتكون بايظة ويقعد يجلط يمين ويسار لحدي ما يثبت

دي حالتي انا هنا مع البوستات الكثيرة ..

طبعاً خبراتكم الطويلة والقديمة خبرة الزول المتمرس زيك كدا ..

مررت هنا للسلام والمعايدة .. وعجبتني حكاية الشبط الاخدر دا

والاغاني الهابطة ذات الدلالات والمعاني السامية ..

فقط الموسيقى والالحان والطريقة هم الهابطتين ..


خالص محبتي ..