Post: #1
Title: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 11:45 AM
Parent: #0
الحمد لله ..
كنت امتلك عجلة ( فونيكس 26 ) .. و جدي من جهة ابي برسل لينا ( الضحية ) من البلد .. خروفين أو اكثر ..
كان بيتنا ( مطرطش ) بالرمادي .. مع دهان ( السكينة ) بالابيض .. وكنا نمتلك مسطبة أمامه في وسطها شجرتين ( نيم ) و مزيرة ..
تمتلك والدتي في ذلك الحين ما عدده واحد ( احفظ مالك ) ووظيفة وكيلة مدرسة .. و يمتلك والدي و ظيفة ( موجه تربوي ) تركها في سنة 91 و فضل الاغتراب في السعودية .. و باع التكسي ..
لدى جدي من جهة امي .. ما عدده ( 2 دكان ) في سوق امدرمان لبيع التمور و العناقريب .. اغلقها بسبب الضرائب الباهظة و قعد في البيت منتصف سنة 94 ..
سافرنا الي القاهرة عن طريق وادي حلفا مرتين .. زرنا حديقة الحيوانات و وسط البلد و دخلنا السينما .. و عندما عادونا الحنين مرة أخرى سنة 98 .. لم نجد وادي حلفا علي الخريطة ..
أعمامي كانوا شبابا .. لديهم كمية من الجكس .. و شعر راستا .. و اسطوانات .. وكتب .. و اقلام و دفاتر غرام .. غادروا السودان تباعا منذ 94 و لم اراهم مرة آخرى ..
كان لدينا ( طابونة ) في الحارة .. نمشي نجيب العيش منها الساعة 3 صباحا .. و كنا سعداء ..
واصبح لدينا الآن 5 بقالات فاخرة تبيع العيش الفاخر جدا .. لا نستطيع الشراء منها .. و لقد اغضبنا هذا الأمر ..
في حارتنا كان هناك تلفون واحد عند ناس خالتي ( فاطمة ) نتحدث من خلاله مع ابي و أخرون لا نعلمهم ( بس كل مرة بيقولوا ادينا نسلم عليهو بالله ) ..
الآن لدينا عدد واحد تلفون ثابت سوداني و واحد كنار .. و عدد لا بأس به من شرائح الاتصال .. منتهية الرصيد .. ( استقبال فقط ) ..
صديقي مأمون كان يتولى مسألة ( الحلاقة ) .. مقابل سجارة برنجي .. ألآن ارتفع أجره .. الي قزازة ( بيبسي موبايل ) او تحويل رصيد ..
كان لدينا ( ميدان ) صغير .. و عراضات صغيرة .. و جزم مرقعة .. و كورة موزة .. و اتنين لعابين شديد .. نقسمهم بالتساوي بين الفريقين ..
سنة 93 .. قيل لنا نصف الميدان .. سيقام فيه مسجد .. و النصف الآخر .. وزع بين ثلاث منازل جديدة لديها سطوح .. و ابناء يدرسون في المجلس الافريقي ..
انتقلنا للميدان الكبير .. ( ميدان ابوجا ) .. ليتحول الي مضمار لتدريب الدفاع الشعبي .. تأكدنا يقينا ان لعبتنا المفضلة قد اصابتها اللعنة .. تركناها ..
في ما بعد .. امتلكنا مدرسة أهلية كتب علي يافطتها ( مدرسة امدرمان الأهلية تأستت سنة 1955م ) .. و ماتت سنة 1998م .. !!
كتب في شهادة الوفاة .. تم تحويل المباني الي الي إحدى الجامعات .. في اطار ثورة التعليم العالي ..
كان لدي جارنا ( عبدالعاطي الراجل الواطي ) قندراني و سبعة ابناء .. باع القندراني .. ثم البيت .. ثم اختفى غرب الحارات ..
تبعه ناس محجوب .. ثم ناس علوية .. ثم طلق محمد أحمد زوجته .. و اصبحت تلك البنت التي تهديني صباحات الورد .. اصبحت ( بت ما كويسة ) ..
و تبعها في ذلك كثير من خلق الله .. في ما بعد اصبحت ظاهرة .. و الآن الامر عادي ذي الزبادي ..
..
..
في العموم ..
كنا نمتلك ( وطن ) في ذلك الحين .. يدعى ( جمهورية السودان الديمقراطية ) ..
لديه نشيد يقول ..
نحن جند الله .. جند الوطن ..
عصيدة بلبن ..
مين ياكلا ..
محمد البطل ..!!
..
..
|
Post: #2
Title: Re: علي ما أظن أننا لمن نكن شحاتين في ذلك الوقت .. !!
Author: ahmed haneen
Date: 03-18-2009, 11:58 AM
Parent: #1
واصل يا شحاد
تعرفي يا حميدة ..
لو كمان تذكرت الإبتدائية .. وكيف كانت وكيف صارت ..
غايتو
نحن واهلنا كلهم كانوا شحادين ...
وكل ناس بربر وعطبرة والسكة حديد .. كوووولهم شحادين..
يارب نشوف فيهم يوم واراه قريبا
|
Post: #3
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 12:04 PM
Parent: #2
يا حنين ..
| Quote: وكل ناس بربر وعطبرة والسكة حديد |
علي ذكر السكة حديد ..
كان ابي يمتلك ( تصريح سفر ) .. كونه موظف دولة .. ذهبنا بالقطر الي الشمالية و الابيض ..
علي درجة ( نوم ) .. و علي ما اذكر اشترينا ( نبق و قنقليز ) في إحدى المحطات .. و تعرفنا علي سايق القطر ..
و في مرحلة متقدمة .. ذهبنا بذات ( تصريح السفر ) الي بورسودان ..
وعلي ما أذكر كان لعمي ( لسان الدين ) باخرة طويلة عريضة تدعى ( دنقلا ) ..
عرفت في ما بعد انه كان يعني بعبارة ( دي الباخرة بتاعتنا ) .. أي هم ( سودان لاين ) .. الخطوط البحرية السودانية .. طيب الله ثراها و اسكنها فسيح جناته ..!!
|
Post: #4
Title: Re: علي ما أظن أننا لمن نكن شحاتين في ذلك الوقت .. !!
Author: Faisal Elrasheed
Date: 03-18-2009, 12:28 PM
Parent: #3
حميده
اجترارك للذكريات حرك فيي شجون
واصل
نتابع بأهتمام
ـــــــــــــــــــــــــــــــ
سأعود لموضوع الميدان الذي تحول الي ملعب وساكنيه الجدد وناس المجلس الافريقي :D
|
Post: #5
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 12:56 PM
Parent: #4
فيصل ..
زكريات شنو .. مش قالوا التاجر لمن يفلس بفتش في دفاتره القديمة ..
عندما تعتقد انك كنت زول مبسوط .. و يجي زول يقول انت لا كنت مبسوط و لا حاجة .. انت كنت زول مقطع و شحاد ..
طوالي تقوم تعمل جرد حساب للحاجات بتاعتك ..
..
..
نواصل ..
..
..
كان يا مكان .. كشك ناصية ..
فيهو مجلات ..
الصبيان .. صباح .. سمير .. ماجد .. ميكي ..
وكتب جادة .. رجل المستحيل ( للرجال الاقوياء ) .. وزهور ( للانسات الصغيرات ) ..
و جرايد سياسة و رياضة .. و كتب العربي الكويتي .. وورق فلسكاب .. و صمغ و جلاد .. وبراية و استيكة ..
وقصص اطفال خضراء .. و قصص ملونة فيها صور لسيدنا موسي عليه السلام و نبي الله ايوب ..
و حاجات و حاجات و حاجات ..
لم نكن فقراء بهذا القدر الذي تتحدث عنه ..
كان عندنا حاجات كتيرة ..
مش كدا ..!!
|
Post: #7
Title: Re: علي ما أظن أننا لمن نكن شحاتين في ذلك الوقت .. !!
Author: مجاهد عبدالله
Date: 03-18-2009, 01:00 PM
Parent: #5
شكراً ياحميده على الذاكرة ولكن صدقني فهذا الرجل لايستحق حتى مجرد أن تتحسس تاريخك ..
ودي وإحترامي ..
|
Post: #8
Title: Re: علي ما أظن أننا لمن نكن شحاتين في ذلك الوقت .. !!
Author: Abdelmuhsin Said
Date: 03-18-2009, 01:06 PM
Parent: #5
| Quote: كنا نمتلك ( وطن ) في ذلك الحين .. يدعى ( جمهورية السودان الديمقراطية ) .. |
ياسلام عليك يا ابوحميد لكن انت فاطى سطر هنا .
بتاع الابتدئى والمتوسط ياريت ترجعهم لينا
|
Post: #10
Title: Re: علي ما أظن أننا لمن نكن شحاتين في ذلك الوقت .. !!
Author: حاتم محمد محمد صالح
Date: 03-18-2009, 02:23 PM
Parent: #5
هل تصدقون ايها الاخوة و ربما الابناء , ان هذا البوست جعلنى ابكى ابكى بحرقة شديده, ليس من كلام هذا الواطى الذى لا يصلح حتى لشىء, و انما لما يعانيه الشعب السودانى من حرمان و تضحيات, انظر كيف يساندهم الناس, و ماذا يفعلون هم و يقولون, و الا ان هذه المسيرات التاييديه مفبركة و مشتراة برزق الشعب المسكين, اقترح ان هذه اهانة جماعية تمس اى سودانى على وجه الارض, و يهتز لها ابطالنا و شهداؤنا فى قبورهم الطاهرة و التى دفعوهامن اجل الاجيال القادمه و كرامتهم, اقترح ان لا يسكت على هذا الامر ابدا, و لا نريد منه اعتذارا و لا يحزنون , فهذه لفظة يجب ان يحاكم اليها حتى يكون عبرة لمن يرى لامثاله من الغوغاء و شذاذ الافاق,
|
Post: #6
Title: Re: علي ما أظن أننا لمن نكن شحاتين في ذلك الوقت .. !!
Author: محمد خليل إسماعيل
Date: 03-18-2009, 12:59 PM
Parent: #4
أخوي حميدة
عليك الله كلام مصطفي اسماعيل دا ما يفقع مرارة الواحد
ياخي الناس ديل الظاهر قرار الجنائية جاب كثافتهم وفقدو
التركيز .
إدناه عمود تركي الدخيل بجريدة الوطن السعودية ردا على تصريحات
الدكتور مصطفي اسماعيل .
Quote: صحيفة الوطن السعودية
الأربعاء 21 ربيع الأول 1430هـ الموافق 18 مارس 2009م العدد (3092) السنة التاسعة
--------------------------------------------------------------------------------
السودانيون ليسوا شحاتين يا مصطفى عثمان!
تركي الدخيل
بعض المسؤولين الحكوميين في العالم العربي يصرحون تصريحات وقحة في حق شعوبهم يستحقون عليها أن يضربوا ضرباً.
فالمسؤول العربي يتعاطى أحياناً مع مواطنيه وكأنه جاء من السويد، أو تربى في القطب المتجمد الشمالي، وليس كأنه مواطن آخر، جاء إلى السلطة، بانقلاب، كما هو حال الباشا، مصطفى عثمان إسماعيل، مستشار الرئيس السوداني، الذي لم يجد لمدح حكومته، حكومة الإنقاذ، إلا الإساءة إلى الشعب السوداني، واعتباره كان شحّاتاً، لا يعرف السُكّر، حتى جاءت الثورة العلمية والاقتصادية العظيمة فحولت الشعب من الشحاتة إلى الاستكفاء.
أي استهتار بعقليات الناس، أكثر من هذا.
يا مصطفى إسماعيل، السودانيون لم يكونوا يوماً من الأيام شحّاتين. ويبدو أننا نعرفهم أكثر مما تعرفهم أنت وإن كنت سودانياً، فهم أهل كرامة وعزة نفس وأنفة، ولو ضاقت الدنيا بهم، ولو دارت عليهم الدوائر وجاءهم من يكون مسؤولاً مثلك، ويسيء إلى شعبه بهذا التصريح المخجل!
يا مصطفى عثمان، إذا كنت تزعم أن لغة العنتريات لم تسيطر على تصريحات المسؤولين عقب صدور مذكرة التوقيف بحق الرئيس السوداني، فلغتك في تصريحك قبل مغادرتك الرياض، تلك التي تزدري فيها السودانيين، وتعتبر الفارق في تحولهم من الشحاتة إلى غيرها، باستيلاء حكومتك على السلطة، أسوأ وأنكى من لغة العنتريات.
ألم نسمع عبر شاشات التلفزة، مقولات مثل: أضع القرارات تحت جزمتي؟!
ألم نر عبر تلفزيونات العالم، من يقول: مذكرة التوقيف وقراراتهم هذه يموصوها ويشربوها؟!
هل هذه تصريحات متزنة؟!
أم إن الاتزان والعقل والحكمة تكمن في أن يوصف الشعب بأنه شحّات حتى منّ الله عليه بهذه الحكومة؟!
العارفون ببواطن الأمور يعتبرون أن المستشار عثمان من عقلاء النظام السوداني، وأرجو ألا ينطبق عقب هذه الحالة السؤال الذي يردده العرب: من عاقلكم؟ قالوا:...!
|
ابوشهد
|
Post: #9
Title: Re: علي ما أظن أننا لمن نكن شحاتين في ذلك الوقت .. !!
Author: Amany Elamin
Date: 03-18-2009, 01:51 PM
Parent: #6
حميده
ده كلام صاح...
سبقتني علي الفكره..
قال شحادين قال...
واصل ياحميده.. وأنا بواصل معاك..
وريهم منو الشحاد..
|
Post: #11
Title: Re: علي ما أظن أننا لمن نكن شحاتين في ذلك الوقت .. !!
Author: Amany Elamin
Date: 03-18-2009, 02:36 PM
Parent: #9
كانت المدارس الحكوميه تتنافس فيما بينها أكاديميا,,
وكنا نسمع عن أسماء مثل حنتوب وخور عمر وغيرها من الأسماء اللامعه..
كان التلميذ يصرف له في المدرسه الكراسات والكتب بداية كل عام جديد..
وكان التعليم مجاني..
لم يكن هنالك استثمارا في التعليم والصحه..
كانت جامعة الخرطوم عصيه الا من رحم ربي..
كانت الخرطوم من أكثر عواصم العالم أمنا..
لم يكن هناك متشردون في الخرطوم..
ولم يكن بالعاصمه كل هذا السكن العشوائي بسبب النزوح من الفقر والحروب..
لم يكن في السودان كل هذا التباين في الطبقات الاجتماعيه بين حد الفقر وقمة الثراء..
ولم تكن هناك حربا في دارفور...
بواصل,,,
|
Post: #19
Title: Re: علي ما أظن أننا لمن نكن شحاتين في ذلك الوقت .. !!
Author: شهاب الفاتح عثمان
Date: 03-18-2009, 03:36 PM
Parent: #11
اخي حميده..
لك التحيه,وللاسره..
شكرا لك تاريخ واباء,
وكريم من اصل طيب وكريم.
خلقنا اعزاء في وطن عزيز,
خلقنا كالنخل شموخ .
اللهم احفظ بلادي من كل سخف و جحد.
___________________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كـوالالمبور
|
Post: #12
Title: Re: علي ما أظن أننا لمن نكن شحاتين في ذلك الوقت .. !!
Author: doma
Date: 03-18-2009, 02:37 PM
Parent: #9
دا عرضحال بليغ جدا
|
Post: #13
Title: Re: علي ما أظن أننا لمن نكن شحاتين في ذلك الوقت .. !!
Author: حيدر حسن ميرغني
Date: 03-18-2009, 03:16 PM
Parent: #12
شكرا ليك ياحميدة
كلام بسيط ومعبر جدا
لا شتائم لا بطولات رغم أن السبب يستدعي ذلك
نسأل الله السلامة لإنسان بلدنا وبلدنا ذاتا
ليت الوزير يعتذر عن هذه الإساءة
|
Post: #14
Title: Re: علي ما أظن أننا لمن نكن شحاتين في ذلك الوقت .. !!
Author: Abdlaziz Eisa
Date: 03-18-2009, 03:23 PM
Parent: #13
سلام
المدعو مصطفي اسماعيل هذا كما عهدناه منذ ان ظهر كوزير دولة ثم وزير خارجية.. رجل لا يعرف غير الكذب والنفاق..
وزارة الخارجية التي تقلدها وزراء بقامة أحمد خير, المحجوب, منصور خالد وابراهيم طه ايوب.. يمر عليها هذا النكرة ليلطخ سمعة هذه الوزارة كأتفه وزير يمر عليها.. لا يعرف غير الكذب والنفاق..
هذا الرجل ساقط ولا يليق بأن يجلس الفة في صف سادس ناهيك عن وزارة الخارجية التي مرمطها وخرب سمعتها..
هذا هو ديدن الانقاذ ان تأتي بالنكرات الذين ليست لهم اية مؤهلات علمية او اخلاقية يتوزرون على الناس..
تبا لهذا الوقح المسمى مصطفي اسماعيل..
تحياتي
عبدالعزيز
|
Post: #15
Title: Re: علي ما أظن أننا لمن نكن شحاتين في ذلك الوقت .. !!
Author: عاصم ابوبكر حامد
Date: 03-18-2009, 03:30 PM
Parent: #14
مصطفى هذا رجل حقير وتافه ..
ويا حميد ابقى عشرة دا قرب يقول السودانيين كانو مجانيين ونحن من عالجناهم ...
انظر الى مقال تركى الدخيل..
Quote: تركي الدخيل
السودانيون ليسوا شحاتين يا مصطفى عثمان!
بعض المسؤولين الحكوميين في العالم العربي يصرحون تصريحات وقحة في حق شعوبهم يستحقون عليها أن يضربوا ضرباً.
فالمسؤول العربي يتعاطى أحياناً مع مواطنيه وكأنه جاء من السويد، أو تربى في القطب المتجمد الشمالي، وليس كأنه مواطن آخر، جاء إلى السلطة، بانقلاب، كما هو حال الباشا، مصطفى عثمان إسماعيل، مستشار الرئيس السوداني، الذي لم يجد لمدح حكومته، حكومة الإنقاذ، إلا الإساءة إلى الشعب السوداني، واعتباره كان شحّاتاً، لا يعرف السُكّر، حتى جاءت الثورة العلمية والاقتصادية العظيمة فحولت الشعب من الشحاتة إلى الاستكفاء.
أي استهتار بعقليات الناس، أكثر من هذا.
يا مصطفى إسماعيل، السودانيون لم يكونوا يوماً من الأيام شحّاتين. ويبدو أننا نعرفهم أكثر مما تعرفهم أنت وإن كنت سودانياً، فهم أهل كرامة وعزة نفس وأنفة، ولو ضاقت الدنيا بهم، ولو دارت عليهم الدوائر وجاءهم من يكون مسؤولاً مثلك، ويسيء إلى شعبه بهذا التصريح المخجل!
يا مصطفى عثمان، إذا كنت تزعم أن لغة العنتريات لم تسيطر على تصريحات المسؤولين عقب صدور مذكرة التوقيف بحق الرئيس السوداني، فلغتك في تصريحك قبل مغادرتك الرياض، تلك التي تزدري فيها السودانيين، وتعتبر الفارق في تحولهم من الشحاتة إلى غيرها، باستيلاء حكومتك على السلطة، أسوأ وأنكى من لغة العنتريات.
ألم نسمع عبر شاشات التلفزة، مقولات مثل: أضع القرارات تحت جزمتي؟!
ألم نر عبر تلفزيونات العالم، من يقول: مذكرة التوقيف وقراراتهم هذه يموصوها ويشربوها؟!
هل هذه تصريحات متزنة؟!
أم إن الاتزان والعقل والحكمة تكمن في أن يوصف الشعب بأنه شحّات حتى منّ الله عليه بهذه الحكومة؟!
العارفون ببواطن الأمور يعتبرون أن المستشار عثمان من عقلاء النظام السوداني، وأرجو ألا ينطبق عقب هذه الحالة السؤال الذي يردده العرب: من عاقلكم؟ قالوا:…!
تركي الدخيل |
|
Post: #16
Title: Re: علي ما أظن أننا لمن نكن شحاتين في ذلك الوقت .. !!
Author: Elmosley
Date: 03-18-2009, 03:30 PM
Parent: #13
حميده كلامك ده بوري وين كان السودان
وهسع وين
بعدين مالهم الشحاذين
يقول الله تعالى في محكم تنزيله
| Quote: (( عَبَسَ وَتَوَلّى أَنْ جَاءَهُ الأَعْمَى وَمَا يُدْرِيكَ لَعَلَّهُ يَزَّكَّى أَوْ يَذَّكَّرُ فَتَنْفَعَهُ الذِّكْرَى أَمَّا مَنِ اسْتَغْنَى فَأَنْتَ لَهُ تَصَدَّى وَمَا عَلَيْكَ أَلاَّ يَزَّكَّى وَأَمَّا مَنْ جَاءَكَ يَسْعَى وَهُوَ يَخْشَى فَأَنْتَ عَنْهُ تَلَهَّى . )) |
شكرا لك
|
Post: #17
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 03:31 PM
Parent: #12
يا سيدي ..
لم نكن فقراء ..
كان جدي عليه رحمة الله كل يوم جمعة .. نركب معاهو في البوكسي الـ82 نمشي الموردة.
نملا القفة ســمك .. و كمية قراقير هبة من صاحب المركب ..
في الملجة بتاعت الخدار .. ( وسط سوق امدرمان ) .. نلقط ما تيسر لنا من ليمون و جرجير و تبش ..
لا أزال اذكر صوت جدي .. ( بالله يا فتاح اعمل لينا تشكيلة سلطة و ما تنسى التبش لاولاد فاطمة ديل ) ..
زادت او نقصت ( السلطة ) كان السعر واحد .. و بدون مفاصلة ..
عند طرف بيت ناس حبوبتنا .. دكان علي .. طلبات الجمعة ثابتة .. زيت و كروسة كبريت .. وقزازة بيبسي بشرط اشربا في الدكان .. عشان الباقيين ما يتشبكوا ..
و أسأل علي صاحب الدكان .. الصرفة بتاعت السكر جات و لا لسع ..
اذا ما جات .. خليهو يديك رطل بالغالي ..
..
..
كان في سـكر .. و كنا نعرفه و يعرفنا .. الغالي منه و الرخيص ..
و في مرحلة آخرى .. ما في بيت ناس حبوبتنا .. في بيت والدي ( الاسرة الصغيرة ) كان عندنا علبة فورموست كبيرة ..
لقيتنا كيف عليك الله ..!!
..
..
|
Post: #21
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 03:45 PM
Parent: #17
و في خضم هذا .. جانا رئيس الجمهورية في حلتنا ..
جلست علي يمينه .. ( تطلب مني الامر قليل دهاء و كثير مراوغة ) ..
قال لي اسمك منو .. قلت ليهو ( كلن ) .. طير عيونه .. ( كلن ) منو .. ياخي ( كلن ) .. ما بتعرف ( كلن ) ..
( كلن ) ياخي ..
ما عرفتو و الله ..
( كلن عندك فكة شلن ) ..
لا لا ما عندي فكة شلن .. لكن هاك الجنيه دا ..
و ضحك الجميع ..
..
..
كان ذلك عند افتتاح مسجد هريدي .. في الثورة الحارة العاشرة .. الرئيس نميري ..
عملوا حولية .. وفتة و لحمة ..
و أكلنا جوافة و منقة .. وبلح ..
و زغردت حاجة التومة جوه الجامع .. و نهرها عبد السلام ..
..
..
منذ هذا التاريخ اعتبرت نفسي من الصفوة ..
بعرف اتنين بجيبوهم في التلفزيون .. نميري و تماضر شيخ الدين ..
..
..
وتجي تقول لي شحادين ..!!
|
Post: #18
Title: Re: علي ما أظن أننا لمن نكن شحاتين في ذلك الوقت .. !!
Author: عزاز شامي
Date: 03-18-2009, 03:34 PM
Parent: #1
شكرا يا حميضة ...
شكرا ...
|
Post: #20
Title: Re: علي ما أظن أننا لمن نكن شحاتين في ذلك الوقت .. !!
Author: Abdel Aati
Date: 03-18-2009, 03:42 PM
Parent: #18
Quote: شكرا يا حميضة ...
شكرا ... |
يا حميدة كونوا عزاز شامي شكرتك
معناها انك ابدعتا وتجليت .
واصل وافضح هؤلاء الطفابيع فقيري الفكر مقاطيع المروة شحاتي الشرف ..
|
Post: #23
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 03:59 PM
Parent: #20
ايضا ..
كان لدي محبرة ..
مالها اشيائي كترت كدا ..
ايوه محبرة .. في مرحلة الكتابة بالقلم السائل .. ابو انبوبة ..
عندما كانت المدارس توزع كراسات مكتوب فيها ( العلم نور ) طبع بمطابع ( الحرمين ) ..
في ما بعد اكتشفت ان مطابع الحرمين تقع في المنطقة الصناعية امدرمان و كان فتحا عظيما مسألة اكتشافي الكراسات بجيبوها من وين دي ..
افلست هذه المطبعة الآن .. و صاحبها كمال ساتي .. قاعد في بيتهم .. تاني بيت و انت نازل من كبرى شمبات .. ممكن تزوره يحكي ليك الحاصل ..
..
..
الكتابة بالقلم السائل فن ..
تكتب بدون ما توسخ الكراس ..
مهمة تعبئة اقلام ابو انبوبة .. مهمة شقيقتي الكبرى .. عشان المحبرة ما تدفق ..
..
..
كان عندنا درس عصر .. و درس صباح .. و طابور .. و استاذ .. و صوت عنج .. وفراشين .. و زير كبير .. و مكتب مدير .. ومكتب اساتذة ..
و ديل انجليزي .. و رياضيات .. و جغرافيا .. و رحلة مدرسية .. و ست صفية .. و كتاب مشترك .. و كنبة حديد .. ودرج بطبلة ..
كل ذلك كان مجاني .. ملح ســــــــاي ..
قروش الجير بس .. !!
|
Post: #22
Title: Re: علي ما أظن أننا لمن نكن شحاتين في ذلك الوقت .. !!
Author: ashraf mukhtar
Date: 03-18-2009, 03:49 PM
Parent: #18
يااخ مامون دا كان شحات عدييييييييل
|
Post: #24
Title: Re: علي ما أظن أننا لمن نكن شحاتين في ذلك الوقت .. !!
Author: khatab
Date: 03-18-2009, 04:15 PM
Parent: #22
الاخ الكريم حميده
رد بليغ على هذا الادعاء ..السباب .. غير المسئول من مستشار رئيس
يصف الشعب .. بالشحته ..
الى جانب انها كتابه رائعه , بكل المقاييس
شكراً لك
.
|
Post: #25
Title: Re: علي ما أظن أننا لمن نكن شحاتين في ذلك الوقت .. !!
Author: صديق الموج
Date: 03-18-2009, 04:37 PM
Parent: #24
حميده كيف حالك
تصدق بعد سؤالى وجواب الوزير...وردود فعل سؤالى الذى تناقلته كل الصحف العربيةاتخيلت الاتى
جأنى غرور بان سؤالى هو السؤال الثانى الذى ترك صدى بعد سؤال المرحوم الطيب صالح
من اين اتى هولاء؟؟
ثانيا انا قلت يمكن المستشار ده فى واحد سودانى (شحدو)زمن الثانوى(قصدى قبل الانقاذ) وكده
قام سعادته خجل وقال احسن يعمم ويطلعنا كلنا شحادين.
ياخى ممكن تشطبوا سؤالى ده من ضمن الاسئله التى رد عليها سعادته،،،
|
Post: #27
Title: Re: علي ما أظن أننا لمن نكن شحاتين في ذلك الوقت .. !!
Author: معتصم دفع الله
Date: 03-18-2009, 05:03 PM
Parent: #25
Quote: في العموم ..
كنا نمتلك ( وطن ) في ذلك الحين .. يدعى ( جمهورية السودان الديمقراطية ) ..
لديه نشيد يقول ..
نحن جند الله .. جند الوطن .. |
ضاع هذا الوطن يا حميدة ..
وضاعت معاه حاجات كتيرة سمحة ..
وأصبح له اسياد مثل هؤلاء ..
ولكن هيهات ..
أكتب يا حميدة لعل في هذا يشفي غليلنا ..
|
Post: #28
Title: Re: علي ما أظن أننا لمن نكن شحاتين في ذلك الوقت .. !!
Author: sami Alzubair
Date: 03-18-2009, 05:16 PM
Parent: #25
يـا كلن
ماتنسي..
صواني الخبيز الماشة الفرن
فتة الرحمتات
الملاهي وشارع النيل
سلكت،حرينا،كورة الشراب وسكج بكج
نيش الطير
رداء المدرسة
دوري الفصول
العيدية
يوم الجمعة عند ناس حبوبة
صف العيش وطوبتي وطوبتك
سكر مكعبات الماضاقو مات
سفر اللواري
وصوت سعدية بت جيرانا تشحد ليها في طايوق
وصوت عرفة لما تنقرش الدلوكة غناية
اللقيمات والطعمية
مسلسل الاطفال المصرين يجيبوهو وانت ماشي درس العصر
ماما عشة وجحا والسنينة
وقصر الشباب
والليلة النتائج
حلاوة المولد
وصينية فطور رمضان
خروف العيد
الحولية
والفتة في الدكان
وجكس المدرسة
وابقي واصل
عليك الله ما تنسي شيء
|
Post: #29
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 05:16 PM
Parent: #25
السكر ..
سكر كنانة .. نضيف و سـمح .. يباع بالشوال 50 كيلو .. شوال ابيض نضيف ايضا .. العلامة التجارية بالاخضر الباهت ..
يتوفر خارج ( الصرفة ) .. في المحلات الكبرى .. الاسواق المحلية .. دكاكين البرقو ..
سكر الجنيد .. دراشة مغبر .. يستخدم داخل ( الصرفة ) لتغطية النقص بتاع سكر كنانة ..
يستخدم غالبا في مصانع الحلويات .. و الباسطة .. و ناس حلاوة فولية ..
..
..
لم تأتي الانقاذ .. لكي تعرف الناس بالسـكر .. فهذه المعلومة موجودة قبل ان يبدأ الاسلاميين الجهاد ضد الشعب السوداني ..
..
..
في يوليو 89 .. هبت ثورة الانقاذ .. كما حدثنا ترباس في اغنيته الشهيرة عندما قال ..
هبت ثورة الانقاذ ..
هبت ثورة الانقاذ ..
لما الجيش للشعب انحاز ..
هبت ثورة الانقاذ ..
بعد ستة اشهر من ( هبت ثورة الانقاذ ) .. دخلنا في نظرية ( سبع بقرات سمان يأكلهن سبع عجاف ) ..
أكل الانقاذيين العجاف .. البقرات السمان .. الامة الشيوعي الاتحادي الديمقراطي الناصريين الاخوان و الما اخوان .. و قشوا خشهم ..
و كورك أحدهم .. ( يا ولد جيب الحلو ) ..
اكتشف منظراتية الحكم الاسلامي انه الشعب ابن الكلب دا .. لو ما حاربتو في رزقه ما بنصاع ليك ..
في ستة اشهر فقط .. افلس تسعين في المية من تجار سوق امدرمان ..
النتيجة ما في ســكر ..
البديل .. بلح ..
طيب ( كرت السكر ) دا نعمل بيهو شنو .. موصـــوه و اشربوهو ..!!
..
..
عندها .. او وقتئذ ..
كان سيدنا و تاج راسنا الدكتور مصطفى اسماعيل .. يعمل في لندن ..
و لندن للذين لا يعلمونها .. هي بلاد يوجد بها سـكر في ذلك الحين ..
جاء الدكتور مصطفى اسماعيل .. لسـد النقص بعد اضراب الدكاترة .. و استنجاد الانقاذ/الاسلاميين بكوادرهم في انحاء المعمورة ..
جاء الدكتور .. لقى الناس مغبشين .. و عيونهم عسلية .. و شعرهم قرقدي .. و ما بشبهوا ناس لندن ..
و لا حتي ناس الريف الانجليزي ..
فقرر قتل البعض .. و تشريد البعض .. و طحن الجزء المتبقى .. لحل مشكلة البطالة و التسول في العالم العربي ..
شكرا يا دكتور ..!!
|
Post: #30
Title: Re: علي ما أظن أننا لمن نكن شحاتين في ذلك الوقت .. !!
Author: khaleel
Date: 03-18-2009, 05:22 PM
Parent: #29
حميدة
صدق في سنة خمسة وتمانين كان ابوي عليه الرحمة بديني مصروف الشهر
خمسة جنيه للجامعة وما بكملو
كيس التمباك بي خمسة قروش بس
هسع بقينا نشحد والله
الله ياذي الاذانا
|
Post: #31
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 05:34 PM
Parent: #30
ذكر لي دكتور جحا .. في يناير الماضي ..
ان الطعمية تسبب السـرطان .. دكتور جحا يعمل في مركز الذرة .. مستشفى الخرطوم ..
قلت في نفسي .. ( حتي انتي يا الطعمية ) ..
تذكرت ثورة البروميد .. و ظهور العيش في شوارعنا بمظهر فاخر يسر الناظرين ..
وكما قال الشاعر .. العين تأكل قبل الخشـم احيانا ..
انتقلنا من خانة العيش المخوزق الملول .. بتاع الساعة 3 صباحا ..
الي العيش الفاخر الواقف في الزلط .. البعمل سرطان ..
..
..
الموظف الشغال في الخرطوم .. يعرف جيدا افران العيش الآلي .. ( متماسك فيهو دوائر صغيرة كدا من ورا ) ..
ناس هلا هلا و قريعني راحت .. لهم افران العيش البلدي .. حلو المذاق .. دائري الشكل ..
ناس الحارات و الطبقة بتاعت الاوسطجية .. افران يتفاعل عيشها مع الوضع الراهن .. مرة عيش فرن جد جد .. و مرات لخوخة عجين .. حسب وضع الجاز ..
كان كل زول .. معجب بعيشه ..
لكن عندما اختلط عيش الموظفين مع عيش الاوسطجية .. مع العيش البلدي ..
و خلط بالبروميد ..
و اصبح الجميع يشتري عيش سمح .. مقاس كبير ..
حدث خلل اجتماعي .. أدى لاصابة عدد لا بأس به من المواطنين بالسرطان ..!!
..!!
..!!
|
Post: #32
Title: Re: علي ما أظن أننا لمن نكن شحاتين في ذلك الوقت .. !!
Author: Bakhaf
Date: 03-18-2009, 05:51 PM
Parent: #31
بكري ابوبكر البوست ده بيتعلق فوووق
Up
شكرا ياحميدة وواصل
.
|
Post: #33
Title: Re: علي ما أظن أننا لمن نكن شحاتين في ذلك الوقت .. !!
Author: عبدالوهاب علي الحاج
Date: 03-18-2009, 06:06 PM
Parent: #32
|
Post: #35
Title: Re: علي ما أظن أننا لمن نكن شحاتين في ذلك الوقت .. !!
Author: Nagi Ahmed
Date: 03-18-2009, 06:19 PM
Parent: #33
حميدة اول مداخلة لي معاك و ربنا يديك العافية و يعوض اهلنا المساكيين و يرد المظالم
و اثني الاقتراح يا بكري علق البوست دا في السماء
|
Post: #34
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 06:09 PM
Parent: #32
مدرسة ابوبكر سـرور .. لم ينجح أحد ..
مدرسة كرري .. لم ينجح أحد ..
مدرسة ست فلة .. لم ينجح ..
الرابط .. مدارس خاصة ..
السنة الدراسية .. 93-92
..
..
درست في بكار المتوسطة .. كنا ننافس التدريب المتوسطة .. علي نفس الشارع ..
دوري الطائرة .. نذهب بالباصات الي قصر الشباب و الاطفال .. نردد .. السنجك جاكم السنجك جاكم ..
سيلفر كان احرف زول في الطائرة .. بس ما احرف من تيم بنات امدرمان الثانوية ..
في سنة تالتة .. انضباط .. مذاكرة مسائية .. درس صباحي .. حالة من الاستنفار تنتهي بمجموع يليق بزول بقرا في بكار المتوسطة ..
..
..
مدرسة بكار .. تم تحويلها الي مدرسة ثانوية - نسبة النجاح 40%
مدرسة التدريب .. تم تحويلها الي مرحلة اساس
مدرسة ابوبكر سرور .. تم تحويلها الي مدرسة ثانوية .. نسبة النجاح 100%
مدرسة كرري .. تم تحويلها الي مدرسة ثانوية .. نسبة النجاح 100%
مدرسة ست فلة .. تم تغير اسمها الي اسم صحابية جليلة .. و للاسف لم ينجح احد ايضا ..
الرابط .. مدارس خاصة ..
السنة الدراسية .. 98-97
|
Post: #37
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 06:37 PM
Parent: #34
سنة 98 .. تمت إحالة السيد م.ع.ن .. الي الصالح العام ..
سنوات العمل 30 سنة .. الرتبة ملازم أول .. ( من صف جنود ) ..
التهمة .. السماح بخروج عشرة جركانات زيت من المصنع بدون فاتورة من ادارة الضرائب ..
..
..
اتجهت بعدها فتحية ( البت الكبيرة ) الي العمل في محل الاتصالات القريب من المنزل .. بعد ثورة سوداتل ..
حملت سفاحا .. بطريقة ما .. تم اسقاط الجنين بمعرفة خبراء يكبروننا سنا ..
بعدها اصبحت فتحية اكثر حرصا .. و لم اسمع انها حملت مرة آخرى .. مع مواصلة عملها في مركز الاتصالات ..
..
..
اتجه الاخ الاصغر من فتحية .. الي السوق .. قبضوه في شيكات .. مرقه عسكري برشـوة ..
سافر الي سوريا ..
يقول أحد شهود العيان انه شاهده في اليونان قبل خمسة سنوات .. حالته تحنن العدو ..
..
..
شادية الصغيرة .. تزوجت .. تأتي مرة مرة .. لا يأتي زوجها معها .. اختفت تمام عن حياة الاسرة في الآونة الاخيرة ..
..
..
الوالدة توفاها الله ..
..
..
تزوج السيد م.ع.ن السنة الجارية .. من فتاة تبلغ من العمر 18 سنة ..
..
..
قصة عادية بنسمعا كل يوم ..!!
|
Post: #38
Title: Re: علي ما أظن أننا لمن نكن شحاتين في ذلك الوقت .. !!
Author: mutwakil toum
Date: 03-18-2009, 06:39 PM
Parent: #34
حميدة:
شهيتني الكتابة
**
طيب يا اخي ما ياكا زول فنان..
مالك مشتت جهودك؟
|
Post: #36
Title: Re: علي ما أظن أننا لمن نكن شحاتين في ذلك الوقت .. !!
Author: Nuha Ahmed
Date: 03-18-2009, 06:31 PM
Parent: #32
شكرأ حميدة،،،
كنا في نيالا الاميرية ( الحكومية) المتوسطة نلعب الفولي بول، الباسكت بول ، الهاند بول والتنس
والآن ابنائنا في ..... international في الخزطوم ولا يوجد ملعب واحد في المدرسة.
كن نذهب و نشاهد نازك اختي ( رحمها الله) وصديقاتها في مسرح نيالا الثانوية وهن يعرضن " Flowers for Mrs Harris " .
والان ابنائنا في الخرطوم لا يعرفون المسرح لا بالعربي ولا الانقليزي .
كان جدي يمتلك فرن في ودارو ومطعم في حي العرب ويستضيف بمنزله بامدرمان عشرات من طلبة قريتنا في الشمالية
والان لو زول ضرب ليك وقال جاي يتغدا معاك تنطط عيونك و تمش تشوف ليك طريقة دين عشان تغديهوا .
|
Post: #39
Title: Re: علي ما أظن أننا لمن نكن شحاتين في ذلك الوقت .. !!
Author: humida
Date: 03-18-2009, 06:42 PM
Parent: #36
فاصـل ..
..
..
مسطول سألوه : الفرق بين زمان واسي شنو ..
قال ليهم .. زمان كان بجيبو الاكل يختوهو .. الناس يقولو بسم الله وياكلو ..
ولمن ينتهوا بقولو الحمد لله ..
لكن اسي بقى لما يجيبو الاكل يقولو الحمد لله الاكل جابو ..
ولمن ينتهو يقولو بسم الله ده متين كمل .. !! 
..
..
|
Post: #40
Title: Re: علي ما أظن أننا لمن نكن شحاتين في ذلك الوقت .. !!
Author: elsawi
Date: 03-18-2009, 07:10 PM
Parent: #39
اول مرة اتكيف منك يا حميدة!!
|
Post: #41
Title: Re: علي ما أظن أننا لمن نكن شحاتين في ذلك الوقت .. !!
Author: عبدالكريم أحمد الامين
Date: 03-18-2009, 09:13 PM
Parent: #39
Quote: مسطول سألوه : الفرق بين زمان واسي شنو ..
قال ليهم .. زمان كان بجيبو الاكل يختوهو .. الناس يقولو بسم الله وياكلو ..
ولمن ينتهوا بقولو الحمد لله ..
لكن اسي بقى لما يجيبو الاكل يقولو الحمد لله الاكل جابو ..
ولمن ينتهو يقولو بسم الله ده متين كمل .. !! |
الاخ حُميده
مساء الخيرات...
** دى بالغتا فيها عديل ,, ضحكت حتى أنزعج ناس البيت من ضحكتى الهستريه وظنوا أن هنالك أمر جلل..
** بس المسطول دا لو أدى الوزير الطفل المُعجزه القال علينا شحاتين من الواويه البي كرتين دى نفس كان علي اقل تقدير صلح ليهو الفاظو وعلمو بتين يتكلم وبتين يسكت..
(ودام الود بين الجميع)
(ابو محمد فؤاد)
|
Post: #42
Title: Re: علي ما أظن أننا لمن نكن شحاتين في ذلك الوقت .. !!
Author: esam gabralla
Date: 03-18-2009, 09:57 PM
Parent: #41
شكرا يا حميده ...
افضل ما قرات حتى اللحظة في الرد على المنحط مصطفي اسماعيل
|
Post: #43
Title: Re: علي ما أظن أننا لمن نكن شحاتين في ذلك الوقت .. !!
Author: حامد محمد حامد
Date: 03-18-2009, 10:16 PM
Parent: #42
والله يا حميدة ماك هين
وقس على ذلك اذا رجعنا شوية لورة
|
Post: #44
Title: Re: علي ما أظن أننا لمن نكن شحاتين في ذلك الوقت .. !!
Author: عاطف عمر
Date: 03-18-2009, 10:22 PM
Parent: #1
شكراً حميدة
جاء في الأثر
بني الانقاذ على خمس
تاكل ما تشبع
تلبس مرقع
تمشي الجنوب ما ترجع
عندك ما عندك تدفع
تفتح خشمك صليبك يطلع
|
Post: #45
Title: Re: علي ما أظن أننا لمن نكن شحاتين في ذلك الوقت .. !!
Author: ASHRAF MUSTAFA
Date: 03-18-2009, 10:30 PM
Parent: #44
Quote: هسع بقينا نشحد والله
الله ياذي الاذانا |
اهئ اهئ اهئ..
ارحموا عزيز قوم ذل!!!
|
Post: #46
Title: Re: علي ما أظن أننا لمن نكن شحاتين في ذلك الوقت .. !!
Author: Ahmed Elmardi
Date: 03-18-2009, 11:22 PM
Parent: #45
كتابة بسيطة وصادقة.
شكرا حميدة
|
Post: #47
Title: Re: علي ما أظن أننا لمن نكن شحاتين في ذلك الوقت .. !!
Author: نوفل عبد الرحيم حسن
Date: 03-18-2009, 11:55 PM
Parent: #46
Quote: مسطول سألوه : الفرق بين زمان واسي شنو ..
قال ليهم .. زمان كان بجيبو الاكل يختوهو .. الناس يقولو بسم الله وياكلو ..
ولمن ينتهوا بقولو الحمد لله ..
لكن اسي بقى لما يجيبو الاكل يقولو الحمد لله الاكل جابو ..
ولمن ينتهو يقولو بسم الله ده متين كمل .. !!
|
دي قويه .. قويه .. قويه
|
Post: #48
Title: Re: علي ما أظن أننا لمن نكن شحاتين في ذلك الوقت .. !!
Author: ibrahim alnimma
Date: 03-19-2009, 00:42 AM
Parent: #47
الاخ حميدة والله رد شافي ملئ بالابداع ....وبجد اول مرة اتكيف من كتاباتك شوف كيف الكتابة
المنحازة لهموم البسطاء كيف تجد شعبية وكيف تجعلك متصالحاً مع نفسك؟؟
شكراً ليك كثير ...
واصل الابداع ..
|
Post: #49
Title: Re: علي ما أظن أننا لمن نكن شحاتين في ذلك الوقت .. !!
Author: ahmed haneen
Date: 03-19-2009, 07:30 AM
Parent: #48
بمناسبة سكة حديد يا حميدة
تعرف كنا بنركب القطر بتصريح واحد من عطبرة حتي الأسكندرية.. بما فيها
الباخرة درجة اولي كمان ..وكانت دي اتفاقية بين سكك حديد مصر والسودان
ويسموها تبادل الأمتياز ..
وبرضو كنا شحادين ...
ونحن في الأبتدائي لمان نمرض بي كحة ولا حمي .. ولا كتكوته .. نشيل دفتر الأسبتالية
من المدرسة ونمشي المستشفي .. ويتم الفحص والتحليل والعلاج ..وكمان يوم علاج وراحة
ونجي راجعين كل واحد شايل كيس مليان ادوية .. مجانا ..
عشان كلنا مفلسين وشحادين ....
...
ربي انتقم منهم فردا فردا ...من كانوا سببا في شحدتنا
|
Post: #50
Title: Re: علي ما أظن أننا لمن نكن شحاتين في ذلك الوقت .. !!
Author: حسين حسن حسين
Date: 03-19-2009, 07:32 AM
Parent: #49
أخي حميد.. حقو تشكر صديق الموج الذي كان سبب هذا الاستفزاز، الذي استفزك فأخرج كل هذا الإبداع، أخي حقيقة هذا مشروع رواية بديعة، إذا لململت أطرافها وأبرزت ملامح الجد والحبوبة وعبدالعاطي وإخوانه.. أظن أنت المستفيد من (الشحدة) دي..واصل
|
Post: #51
Title: Re: علي ما أظن أننا لمن نكن شحاتين في ذلك الوقت .. !!
Author: خضر حسين خليل
Date: 03-19-2009, 07:48 AM
Parent: #50
Quote: .. و عندما عادونا الحنين مرة أخرى سنة 98 .. لم نجد وادي حلفا علي الخريطة ..
|
حتي السودان لم نجده يا حميدة حتي السودان !
لاحول ولا قوة الا بالله
الله في يا صاح
الله في !
|
Post: #54
Title: Re: علي ما أظن أننا لمن نكن شحاتين في ذلك الوقت .. !!
Author: مجدي عبدالرحيم فضل
Date: 03-19-2009, 08:23 AM
Parent: #50
أخونا حميد
لعمري ما وجدت رد أبلغ مما تسرد ببساطة المفرده التي يعلمها كل أصيل يعشق المليون ميل مربع تربعوا عليها هولاء الشرزمة من طفيلي الأنقاذ الذين لم تنقذهم حتي عباراتهم من درك الأسفلين والأنحطاط الأخلاقي الذي هم يعمهون فيه كل ما حلت مصيبه من مصائب الفكر الغريب علينا ومتي كان السودان فيه تلك الجرائم التي لم تكن من طبائع السودانيين اللهم عريهم وأفضح مقاصدهم في كل محفل حتي شهدوا للشعب السوداني أخوانا العرب في ذات التصريح الغريب لك مودتي مره أخري حميد
• إياك والضجر والملل، فإن الضجر لا يؤدي حقّاً , والملول لا يرعى حرمه وعليك الصبر والثبات.
• من ثبت نبت، ومن جدَّ وجد، ومن زرع حصد، ومن صبر ظفر، ومن عزَّ بزَّ.
• النملة تكرر الصعود ألف مرة , والنحلة تذهب كرَّة بعد كرَّة , والذئب من أجل طعامه هجر المسرَّة.
• لمَّا هوى السيف قَطَع، ولمَّا اشتعل البرق سَطَع، ولمَّا تواضع الدر رُفِع، ولمَّا جرى الماء نفع.
• الكسول مخذول, والهائم نائم، والفارغ بطال، وصاحب الأماني مفلس.
• من يكن له في بدايته احتراق لم يكن له في نهايته إشراق، ومن جدَّ في شبابه ساد في شيخوخته.
• تذكر أن في القرآن: سارعوا، وسابقوا، وجاهدوا، وصابروا، ورابطوا.
• وفي السنة: أحرص على ما ينفعك، وبادروا بالأعمال، ونعمتان مغبون فيهما كثير من الناس: الصحة والفراغ.
• أبو بكر الصديق ثاني اثنين، أنفق كلَّ ماله، ويدعى من أبواب الجنة الثمانية, وهو قامع الردة.
• عمر بن الخطاب, يفرُّ منه الشيطان، وافقه الوحي أكثر من مرة.
• عثمان بن عفان يجهز جيش العسرة، ويوقف بئر رومة، ويختم القرآن في ركعة.
• على بن أبي طالب يبارز في بدر، ويفتح حصن خيبر، ويقتل مرحباً، ويذبح عمرو بن ود يوم الخندق.
بالله هل قالوا هولاء نحن فعلنا ولو لانا هلك القوم وإنما قاموا وربحوا !
كل هذة المعاني هم لا يمدون إليها بصلة اللهم رحماك في شعب بلدي الصابر علي بلاء هولاء الطغاء وحان يوم الحساب وليس ذلك ببعيد.
،،،،أبوقصي،،،،
|
Post: #52
Title: Re: علي ما أظن أننا لمن نكن شحاتين في ذلك الوقت .. !!
Author: أبو الحسين
Date: 03-19-2009, 07:53 AM
Parent: #48
Quote: كتابة بسيطة وصادقة.
شكرا حميدة |
شكراً جميلاً صديقي الجميل حميدة...
مقالك دا عمل عمايل يا الحبيب وتم توزيعه لعدد كبير من الأحباب المندهشين جداً من هذه التصريحات الغريبة من السيد مطصفى عثمان المعروف بإتزانه ولغته الهادئة...
نسأل الله له وللجميع الهداية والصلاح...
ولك يا عزيزي قواسيب مودتي...
أبو الحُسين...
|
Post: #53
Title: Re: علي ما أظن أننا لمن نكن شحاتين في ذلك الوقت .. !!
Author: Faisal Elrasheed
Date: 03-19-2009, 08:15 AM
Parent: #52
حميده
ياخ واصل
الموضوع شيق وحارق الناس كلها ذلك التصريح
احكي لهم
حينما كان لنا سكك حديد
وحينما كان عندنا جامعة اسمها الخرطوم يدخلها الشطار ما بالقروش
وخور عمر وخور طقت
والخرطوم القديمة
وسينماكلوزيوم والوحده والنيل الازرق
احكي لهم عن الخرطوم النظيفه
وعن مستشفي الخرطوم عندما كانت نظيفة ... خاليه من الكدايس... ومجان
احكي لهم
ولو ماكنت عارف عمرك كم كان قلته ليك احكي لهم عندما كان عندنا ترام بالكهرباء كما في اوربا
وعن كتابي الاول والنايل كورس وكتب الريدر
ولبن كافوري حين كان يوزع في زجاج ... نظيف
واكياس الورق النظيفه التي عادة ما تحوي كم كيلو موز او لحمة عجالي .. او كوارع
احكي يا حميده
احكي والله طلعته زيتنا زاتو
|
Post: #56
Title: Re: علي ما أظن أننا لمن نكن شحاتين في ذلك الوقت .. !!
Author: Ashraf yassin
Date: 03-19-2009, 08:54 AM
Parent: #53
Quote: في العموم ..
كنا نمتلك ( وطن ) في ذلك الحين .. يدعى ( جمهورية السودان الديمقراطية ) ..
لديه نشيد يقول ..
نحن جند الله .. جند الوطن ..
عصيدة بلبن ..
مين ياكلا ..
محمد البطل ..!!
|
نحن بنحب شاي الصباح والمغربية مع الولاد
والزوجة والأم الحنون
والأصدقاء
على اللقاء
واللمة عند الأمسيات
والتكية جنب الاغنيات
والقدلة في السوق الكبير
وبرضو بنحب الشاي بالسكر وبالجكة كمان
ويا تلك الترامس
وين الصوتو هامس
كالمترار يساسق ويجرى كما الحفيف
وبينات الكبابى والشاى الوريف
احمر زاهى باهى
يلفت انتباهى
هل سكر زيادة أم سكر خفيف..
شكراً حميدة أعزف لعلهم يفقهون
|
Post: #55
Title: Re: علي ما أظن أننا لمن نكن شحاتين في ذلك الوقت .. !!
Author: رامي يوسف الصديق
Date: 03-19-2009, 08:27 AM
Parent: #52
شكرا يا حميده ...
|
Post: #57
Title: Re: علي ما أظن أننا لمن نكن شحاتين في ذلك الوقت .. !!
Author: شول اشوانق دينق
Date: 03-19-2009, 09:06 AM
Parent: #55
شكراً لصديق الموج الذى إستفز سيادة المستشار والذى بدوره إستفز اخونا حميدة والذى جاء بدوره وإستفزنا وذكرنا ماذا كنا وماذا اصبحنا.
حميدة إنت زول خترى عديل
ياخ واصل ووريهم من نحن وكيف كنا وماذا صرنا بعد مجيئهم
ياخ إنت زول مستفز جداً
|
Post: #58
Title: Re: علي ما أظن أننا لمن نكن شحاتين في ذلك الوقت .. !!
Author: إسماعيل التاج
Date: 03-19-2009, 09:54 AM
Parent: #57
رد شــافي على مسئول غير مسئول وغير ناضج.
|
Post: #59
Title: Re: علي ما أظن أننا لمن نكن شحاتين في ذلك الوقت .. !!
Author: صديق الموج
Date: 03-19-2009, 10:07 AM
Parent: #58
رائع...
احب محسن خالد زاتو
طبعا رائع دى شايفه عجبتك ياجبان
صديق يسال والشكر لى حميده
طبعا ياحميده بعد رواية موسم الهجرة الى الشحدان دى تتم وتبقى كتاب
لازم فى الاهداء تكتب الى صديق الموج رحمه الله..
واصل يارباطابى يا شقى،،،
|
Post: #61
Title: Re: علي ما أظن أننا لمن نكن شحاتين في ذلك الوقت .. !!
Author: Sabri Elshareef
Date: 03-19-2009, 10:37 AM
Parent: #60
الاخ حميده
لاول مرة ادخل لك بوستا
حقيقه قول حسن وجهد مرتب
احييييك اخي
حديث صادق جدا
اتابع معك
وفقك الله
اخر النهاية ديل واحد طلع الشعب شحادين
والاخر يستعد لقطع الاوصال
ولا اعرف ماذا يخبرنا الغد بسوء ومال حالة الجبهة الاسلامية
|
Post: #62
Title: Re: علي ما أظن أننا لمن نكن شحاتين في ذلك الوقت .. !!
Author: nazar hussien
Date: 03-19-2009, 10:44 AM
Parent: #61
بالله اتارينا نحن مظلومين جنس الظلم دا وما عارفين؟؟
|
Post: #63
Title: Re: علي ما أظن أننا لمن نكن شحاتين في ذلك الوقت .. !!
Author: احمد محمد بشير
Date: 03-19-2009, 10:49 AM
Parent: #62
كنا مرتاحين وكنا نملك الكثير
وكان مافي حرب في دارفور
اما الان فحدث ولا حرج ... تشردنا من ديارنا بغير حق
تحية خاصة يا صاحب البوست
|
Post: #65
Title: Re: علي ما أظن أننا لمن نكن شحاتين في ذلك الوقت .. !!
Author: Hawari Nimir
Date: 03-19-2009, 11:11 AM
Parent: #62
Quote: في يوليو 89 .. هبت ثورة الانقاذ .. كما حدثنا ترباس في اغنيته الشهيرة عندما قال ..
هبت ثورة الانقاذ ..
هبت ثورة الانقاذ ..
لما الجيش للشعب انحاز ..
هبت ثورة الانقاذ ..
بعد ستة اشهر من ( هبت ثورة الانقاذ ) .. دخلنا في نظرية ( سبع بقرات سمان يأكلهن سبع عجاف ) ..
أكل الانقاذيين العجاف .. البقرات السمان .. الامة الشيوعي الاتحادي الديمقراطي الناصريين الاخوان و الما اخوان .. و قشوا خشهم ..
و كورك أحدهم .. ( يا ولد جيب الحلو ) ..
اكتشف منظراتية الحكم الاسلامي انه الشعب ابن الكلب دا .. لو ما حاربتو في رزقه ما بنصاع ليك ..
في ستة اشهر فقط .. افلس تسعين في المية من تجار سوق امدرمان ..
النتيجة ما في ســكر ..
البديل .. بلح ..
طيب ( كرت السكر ) دا نعمل بيهو شنو .. موصـــوه و اشربوهو ..!! |
و مابين الشحده...و تقطيع الاوصال..
يطحن الشعب السوداني..
الله في..
الله في..
الله في..
وشكرا لكل الكرام\ات
اعلاه..
|
Post: #64
Title: Re: علي ما أظن أننا لمن نكن شحاتين في ذلك الوقت .. !!
Author: عبدالأله زمراوي
Date: 03-19-2009, 10:57 AM
Parent: #60
عفيت منك يا شاب...
والله برّدت حشا السودانيين...
أرقد عافية..
|
Post: #66
Title: Re: علي ما أظن أننا لمن نكن شحاتين في ذلك الوقت .. !!
Author: الرفاعي عبدالعاطي حجر
Date: 03-19-2009, 12:02 PM
Parent: #64
Quote: عفيت منك يا شاب...
والله برّدت حشا السودانيين...
أرقد عافية.. |
بحق كفيت شكرا حميدة .
.................................حجر.
|
Post: #67
Title: Re: علي ما أظن أننا لمن نكن شحاتين في ذلك الوقت .. !!
Author: مدثر محمد عمر
Date: 03-19-2009, 12:32 PM
Parent: #64
كتبت ببساطة وكأنك... تقرأ من أحد الكتب المدرسية "التي كانت توزع مجانياً" ايام كنا متسولين!! الكتب التي كنا ننال الجديدة منها لأننا "فقراء محترمين" وكتكريم بسيط من الاساتذة لمجهود الطلبة الأوائل ... الطلبة الأوائل الذين جلسوا فيما بعد في حجارة شوارع الإنقاذ عاطلين عن العمل أكثر مما جلسوا في قاعات الدرس .... المحترمين أبناء المحترمين مثل ابناء الاستاذ سعد الدين والصادق عبد الخالق وسيف البرعي ومحمد حمير...أشخاص رأيتموهم في كل مكان وتعرفونهم في شخوص اخري ...فقراء محترمين... جلسوا كثيييراً، ثم طاردهم العسكر وكأنهم حرام!!!
بيوم ما ونحن نبحث عن عمل أرسل لي صديقي عبارة أظنها للفيتوري... صديقي الذي لم يكن فقيراً جدا عندما كان صغير لدرجة ان حبوبته أتته بترتار من الحلة الجديدة ... ترتار ربط في البص ولم يطلق الا في حلتهم "كَجَنَه" ... صديقي أرسل لي:
"لم نكن فقراء جداً... ولم نكن فقراء بالمعنى الانساني المهين .... بل كنا فقراء محترمين !!!"
|
Post: #70
Title: Re: علي ما أظن أننا لمن نكن شحاتين في ذلك الوقت .. !!
Author: Nazik Eltayeb
Date: 03-19-2009, 01:39 PM
Parent: #67
حميدة
اثرت الاشجان و كاني بك تسكن الثورة امدرمان احد احياء الطبقة الوسطى العاصمية عندما كانت هناك طبقة وسطى
لم نكن شحادين في ذلك الوقت
في مدرستنا الابتدائية الحكومية كانت تصرف الكراسات و الكتب و احياناً الحبر
وكان في المدرسة حديقة جميلة بها اشجار رمان ناضجة ولدينا غرفة تدبير منزلي
وكانت ملابس المدرسة جميلة وكنا نشتري ورود حمراء نقوم بلصقها بواسطة المكواة علي فستان المدرسة
وكان الاولاد في المدرسة المجاورة يلبسون شورتات جميلة ولم يسخر منهم احد
وكانت المدرسة تقيم الاحتفالات بصورة مستمرة وتحضر اسرنا
وعندما انتقلنا الي الثانوي الحكومي طلب منا الذهاب لمخزن المدرسة و استلام درج وكرسي جديدين وكل الكتب و الكراسات
وفي يوم جاءت سيارات تابعةلوزارة التربية انزلت كمبيوترات لم نرها بعد ذلك ولم ندري ما فعل الله بها
كان العيش مرات بالصف و البنزين
لكن الناس ماكانوا جعانين ولا كانو ا جشعين وبالتاكيد ما كانو شحادين وكانو شبه متساوين
ومع ذلك تفرجنا علي المظاهرات ضد نميري و نحن صغار وخرجنا في المظاهرات و نحن كبار في عهد الديمقراطية ولم يعتقلنا احد
قضينا الاجازة في عام 1985 في السعودية كنا صغارا لكن وجدنا ان خالي قد اعد لنا ارشيفاً من الصحف بكل ايام الثورة وقطعة من العلم الذي كان في بيت نميري بود نوباوي.
كنا شعباً كريمأ حتي عنما عضه الجوع وغنا لنا العالم (وي ار ذو يرلد) كان ذلك لفترة محدودة
وكانت المنظمات التي تسبب في حضورها سئ الذكر نميري و عهده لم يكن لها هذا الرواج لدرجة طرد 13 منظمة قيل انها تشكل اقل من 10% من المنظمات العاملة فكيف تكون الشحدة ان لم تكن الان.
و عندما نفذ برنامج شريان الحياة بعد ذلك لجنوب السودان كانت الحكومة تشارك فيه تمويلاً بالاضافة للعون الخارجي مع تنفيذ يكاد يكون سودانياً مائة بالمائة واشراف حكومي واستمر البرنامج سنوات طويلة وشهدت الامم المتحدة انه كان من انجح برامج العون الانساني
اما حكومة غير الشحادين فقد غيرت العملة واصبح الناس بين ليلة وضحاها فقراء و وكانت دكاكين التمكين(شركة سينين) تحرم الجميع من قوتهم
و ظهرت بالشوارع ستات الشاي و الكشات والمجاري الطافحة والكوليرا باسم الدلع (الاسهال المائي) وتمددت المدن مع تمدد الحروب الجهادية واصبحت بؤر للفقر و البؤس.
كم يساوي عدد اربعة كباري او خمسة و وكم شارع وسد من عمر شعب تدمر انسانه في عشرين عاماً
وليحيا الشحادين .
|
Post: #68
Title: أجمل رد
Author: مها عبد الله
Date: 03-19-2009, 12:57 PM
Parent: #1
أفضل ما قرأت رداَ للدبلوماسي ( المتهور ) وحكومة الإنقاذ تعاني الأمرين التخبط ومن ثم التخبط
حديثك أخي حميده في مكانه ( لمسؤول في غير مكانه)
|
Post: #69
Title: Re: أجمل رد
Author: Mohammed Tirab
Date: 03-19-2009, 01:39 PM
Parent: #68
يشكر للموج
الاثارة
ويحمد لحميدة
أنه عبّر عن ذواتنا
فكن كما انت يا اخي حميدة
ونكون كلنا كما نحن الحقيقة
أما الزبد فسيذهب جفاء
د.محمد عبدالله تيراب
_______________________
الحق يعلوا ولا يُعلى عليه
|
Post: #71
Title: Re: أجمل رد
Author: Nazik Eltayeb
Date: 03-19-2009, 01:59 PM
Parent: #69
في مدرسة الشحادين الابتدائية طلبت منا استاذة اللغة العربية كتابة موضوع انشاء عن الشتاء
و بعد التصحيح اشادت بمن اشادت وزجرت من زجرت
وكان من اللذين زجرتهم الفنانة اللامعة جداً رشا شيخ الدين زميلتي في الفصل والتي كتبت على ما اذكر ان (اجمل ما في الشتاء الشاي باللقيمات)
ولعل ذلك كان التماساً للدفء و رغم انسانية الموضوع وواقعيته لم ترى الاستاذة ان كلمة اللقيمات تليق بموضوع انشائي محترم
ترى هل خرجت رشا تلتمس الشاي باللقيمات عند الخواجات
ام ان طبق اللقيمات اختفي من امام العديد من الاسر فا اصبحو شحادين
|
Post: #72
Title: Re: أجمل رد
Author: Nazik Eltayeb
Date: 03-19-2009, 02:39 PM
Parent: #71
Quote: في مرحلة آخرى .. ما في بيت ناس حبوبتنا .. في بيت والدي ( الاسرة الصغيرة ) كان عندنا علبة فورموست كبيرة ..
لقيتنا كيف عليك الله ..!!
|
في يوم من الايام وجدت الاسرة متحلقة حول التلفزيون و النميري يلقي خطابا و خالي يشتم فيه و كان من ماقاله و اغضب خالي ان علي الناس ان لا يأكلوا الماكينتوش.
كانت علب الماكينتوش- كوالتي ستريت هي الهدية الرسمية المقبولة في ذلك الوقت في المناسبات الاجتماعية بين الشحادين
|
Post: #73
Title: Re: أجمل رد
Author: AnwarKing
Date: 03-19-2009, 06:28 PM
Parent: #72
شكراً يا حميدة...دمعت عيناي وأنا أقرا هذه الذكريات الجميلة..
|
Post: #75
Title: Re: أجمل رد
Author: Seif Elyazal Burae
Date: 03-19-2009, 06:49 PM
Parent: #73
الاخ\حميده العسل
من يومين يا حميده طممته بطونا و ليمون السوق كله مانفعنا لكن الليلة قلبت هوبه شفيت غليلنا ورديت لينا كرامتنا صدق المثل البقول السمح سمح كان زرعو عيش يقوم قمح وانت السمح ويا كا السمح ودحين امشي لاقدام وانسي الفات ولا ترجع , وا ن شاء الله ربنا يحبب فيك خلقه وشوف بوردك زاروه كم والردو عليك كم عشان تعرف كلامك الطيب لمه الناس حولك كيف وحبنا ليك يا منقة
by:Seif Eldawla kamil
from :Newyork
|
Post: #74
Title: Re: أجمل رد
Author: محمد نجيب عبدا لرحيم
Date: 03-19-2009, 06:38 PM
Parent: #72
يا حميدة جاتنا الحمى
بلد بترولية الآن المواطن بموت
لانو ما عندو ثمن الدواء
فتك بعافية
|
Post: #76
Title: Re: أجمل رد
Author: طارق ميرغني
Date: 03-19-2009, 06:50 PM
Parent: #72
اخي حميده والله رد بليغ ومحترم .
والف شكر ايضا لصديقي صديق الموج الذي نقز المستشار.
Quote: في يوليو 89 .. هبت ثورة الانقاذ .. كما حدثنا ترباس في اغنيته الشهيرة عندما قال ..
هبت ثورة الانقاذ ..
هبت ثورة الانقاذ ..
لما الجيش للشعب انحاز ..
هبت ثورة الانقاذ
|
الغريبه ذلك النشيد لم يشفع له عند محكمة النظام العام بعد ذلك بشهور.
| Quote: كيس التمباك بي خمسة قروش بس |
90 % من الشباب الذين كنا نحن نسجر لم نعرف التمباك الآن 90 % من الشباب يسفون.
لو ما الشحده كترت الآن لما جاءت اكثر من مائة منظمة اغاثه
ماذا تعني كلمة اغاثة كما قالت الاخت اسهال مائي دلع الكوليرا فاغاثه هي دلع الشحده.
ولا شنو يا حميده.
|
Post: #77
Title: Re: أجمل رد
Author: imad hassan
Date: 03-19-2009, 07:16 PM
Parent: #76
الشحدة الخلاقة
صديقالموج اتحفنا بكاتب نبحر في حديثة السلس المنساب وكانا ي حاله تفكير بصوت عالي.
شكر حميدة
|
Post: #78
Title: Re: أجمل رد
Author: imad hassan
Date: 03-19-2009, 07:21 PM
Parent: #76
الشحدة الخلاقة
صديقالموج اتحفنا بكاتب نبحر في حديثة السلس المنساب وكانا ي حاله تفكير بصوت عالي.
شكر حميدة
|
Post: #79
Title: حميدة !!
Author: Hani Arabi Mohamed
Date: 03-19-2009, 08:09 PM
Parent: #1
الأخ حميدة
الإخوة والأخوات الكرام ..... كتبت هنا مرارا قبل وبعد صدور المذكرة
أن السودان ليس هؤلاء
وهؤلاء ليسوا هم السودان
لقد وجد السودان عظيماً قبل أن يأتوا
وسيبقى عظيماً بعد أن يذهبوا
لا تجعلوا مصير البلد هو مصير هؤلاء !
|
Post: #80
Title: Re: حميدة !!
Author: رأفت ميلاد
Date: 03-19-2009, 09:46 PM
Parent: #79
حميدة أغرب حاجة موضوع زى ده يعدل المزاج بدل ما يعكره بعد المقارنة بين الحاصل وما قد كان ..
شايف الناس شابكنك شكرآ شكرأ .. ما لقيت أحسن منها .. وليك شكرآ جزيلآ ..
تحية خاصة شديد
|
Post: #81
Title: Re: حميدة !!
Author: Ishraga Mustafa
Date: 03-19-2009, 10:09 PM
Parent: #80
Quote: كنا نمتلك ( وطن ) في ذلك الحين .. يدعى ( جمهورية السودان الديمقراطية ) ..
|
يالها من ملحمة..
يالها من كتابة..
---------
هناك فرقا شاسعا بين ان تكون فقيرا وبين ان يتم إفقارك!!
|
Post: #82
Title: Re: حميدة !!
Author: عمران حسن صالح
Date: 03-19-2009, 10:32 PM
Parent: #81
فى بلد يتناسل فيه الصبر
.................
فى بلد شاخت فيه الأمال
نسيته الدنيا...
وهاجر صبيته بحثا عن دفء الحب
" وتحسين الحال "
فى بلدى بلد الأرزاق يموت الأطفال
تنتصب رماح الأوغاد لتسكت آهات الاذلال
وتصادر تسرق حتى الأثمال
فى بلدى...آه
يقتات الناس الأوحال
وأصيخ لأسمع أخبار الناس...
أخبار الناس... الأهوال...! ألأهوال!
وخطابات الأهل الغبراء العجفاء...
تنؤ بآهات الذل...
وتشكو من ضيق الحال
فأصيح أناديه السودان
قسما بالله أناديه...
وألح عليه فى التسآل
الشوق إليك يبعثرنى فى كل الأنحاء...
ويرهقنى الترحال
والغربة تفتك بالنبض الباقى فى قاع القلب
ويسحلنى الأذلال
قسما بالله أناديه فى أحلامى...
وتضج عروقى بالتسآل
ماذا عندك لى يا شيخ الدنيا من حزن؟
يا شيخ الأبطال!
ويخبىء عنى السودان الأحوال
كى لا أتهاوى فى الغربة...
أعرفه لا يعجبه "مكشوف الحال"
وأسآئله خبرنى بالله عليك
فأنا مشتاق "لملاح الويكة...والورق"
واللمة عند الأصآل
أشتاق لرائحة الذ كر صباحا
والجلسة تحت "النيمة" عند المتعال
أفتقد عفاريت الأطفال
ودبيب النيل الأزرق عند " رفاعتنا "
ضحكات الأخوان على قعدة شآى
وصراع الرأى... صراع الأجيال
أشتاق اليك ويا حزنى...
أشتاق ولا ألقى إلا الترحال
*************
يا هذا البلد المضياف
" لم تلق من دين الله السمح..
سوى السوط
لم تلق الا الأسياف "*
يا بلدا عملاقا... عملاقا... عملاق
يا بلد الشمس ويا ملء الأفاق
يا قلب الدنيا ويا نهرا دفاق
أشتاق إليك يمين الله...
وتقتلنى الأشواق
وأرى أبنى وبنتى فى عينيك
وتشكو رئتاى الإملاق
أبكيك من الغرب الى الرجاف
وأستصرخ كل العباد
أتوسل لله بأضرحة الزهاد
الحسن القابع فى كسلا...
"والعركيين" الأسياد
والشيخ الأغبش فى بربر
مجدوب الدامر والأحفاد
أملاح الأرض الأوتاد
ارفع كفى وأندههم وأناديهم
هذا موعود الله يناديكم ...
هذا الميعاد
هذا قلب الدنيا النابض بالحب...
الرافل فى ثوب الأمجاد
السمح حبيب أبى... حبى
تدهسه الدبابات فلول الأوغاد
***************
الليلة أبكتنى أمى...
إمرأة كانت خارطة السودان
إمرأة كانت من عشب السودان
فتذكرت القبر المخضر بأنفاس الرحمة...
والطوب الأخضر والإيمان
وتذكرت الشيخ الثاكل زوجته...
والواهن والغارق فى لجة أحزان
الضائع فى عصر الحرمان
وضعاف الأهل من الجوعى...
والمعتقلين... تذكرت الاخوان
الغرقى فى البحث عن اللقمة للأطفال...
وعن ثمن الأكفان
لا وقت لديهم للموتى...
فالحى هو الأولى...
هذا ما كان يردده الأهل...
هذا ما كان
وتسآلت والهم رفيقى فى الطرقات...
وأحزانى ملء العظم...
ومعلقة فوق الجدران
وأنا أتخثر فى المنفى...
من يقرأ للقبر القرآن
ويزور القبر مع الأعياد وفى رمضان
ويقدم للطير الأكل...
صدقات ونذور عرفان
ويرش على جنبيه أنوار الاخلاص...
ويسقيه من رحمة فاتحة الفرقان
من يدعو للمرحومة...آه ؟
من يدعو الرحمن؟
من للسودان؟
والأهل حفاة وعراة...
فى شغل لاوقت لديهم للموتى...
لا وقت لديهم للأحزان
وقلوبهمو تتقلب فى الخوف...
لا وقت لديهم للأحزان
فالحى هو الأولى...
فى بلد أضحى الموت لأهليه...
أمنية يتبادلها الناس...
أمان
************
أسمع أخبار السودان من المذياع
مذياع الغرب وأسمع أخبار الإنجاز
من راديو أم درمان
وأسمع ثوار الانقاذ
ونعيق الموتورين المهوسين شذاذ الأفاق
وجنوب السودان المخضر الأخآذ
مجروح القلب ومغتصب الأفخاذ
وأسآئل تاريخ الثورة فى بلدى
تاريخ الأستاذ
والجرح بليغ منسرح الأبعاد
من أين أتى هذا الحزن النفاذ ...؟
وبأى قبيل يتوكأ طاعون الانقاذ ..؟
.
د. أحمد الحسين
|
Post: #83
Title: Re: حميدة !!
Author: عبد المنعم عمر عثمان
Date: 03-19-2009, 10:37 PM
Parent: #79
*
*
والله ياحميدة كلماأقرأ أتفقد نفسي هل أنا صاح ولا نايم!!
غفر لك الله ما تقدم و ما تأخر من زنوب 000 آمين
إبداع مابعده إبداع 0000 سلمت يداك .
لك ودي ،،،،،،
|
Post: #84
Title: Re: حميدة !!
Author: Seif Elyazal Burae
Date: 03-19-2009, 10:51 PM
Parent: #83
يا حميدة العسل
سمعنا في الخليج بياكلوا الرز برياني
ونحن بناكلوا بالسكر ويا حلاته بالكستر
ويجي رمضان نسوي من السكر قمردين
والنشا ونكب منه شويه في التين
وكان جاك حريقان تاخد منه سفتين
تقولي برضو شحادين
والله يا سعادة المستشاركان نحن ما بنعرف السكر ما كنت انت بقيت دكتور اسنان
ويا حبايبنا في سودانيزاونلاين كلكم سكر وكل يوم احلي وانضر
سيف الدولة
|
Post: #85
Title: Re: حميدة !!
Author: أنور أدم
Date: 03-19-2009, 11:05 PM
Parent: #84
حميدة
| Quote: مهمة تعبئة اقلام ابو انبوبة |
قصدك قلم برميل ...
تخريمة:
بمناسبة الثورة العاشرة ::: جنب شقلبان كان في بلدوزر واقف قصاد بيت ناس عمك بلال تتذكره
|
Post: #86
Title: Re: حميدة !!
Author: عماد شمت
Date: 03-19-2009, 11:40 PM
Parent: #85
شكرا حميده والله ابداع عديييييييل كده
واصل ياجميل خلينا نعيد الكان وحليل الكان ......
سلمت من كل سوء
|
Post: #87
Title: كتابة حلوة
Author: Nasr
Date: 03-20-2009, 09:05 AM
Parent: #1
كتابة حلوة
ملأتني شجنا
لا أحفل كثيرا بما يقوله "أب حرام" الدبلوماسية السودانية (علي وزن ود حرام)
ولكني أحتفل بردودكم الجميلة هذه
فزدنا شجنا وحنينا
وأفتخارا
|
Post: #88
Title: Re: كتابة حلوة
Author: elfadl abdellatif
Date: 03-20-2009, 10:57 AM
Parent: #87
الاستاذ حميدة
تحياتي
يعلم الله كنا شحاتين
نميري كان يمشي يشحد كان من امريكا كان من الخليج .. ونحن كنا بي قروشنا ما لاقين البنزين والرغيف وزي ما قال لي صاحبي صلاح حمادة الايام ديك : احسن حاجة في نميري انو ساوى بين جميع طبقات الشعب ..الغنيان والفقران .. لانو الغنيان ذاتو بتعب عشان يلقي المواد التموينية.. طبعا الا من رحم ربي ورضا عنه نميري
بس الكلام دة نقولو نحن عامة الشعب في الونسة الخاصة مش على الملأ ومش من وزير مسئول
اها جات الانقاذ ووفرت كل حاجة الا القروش .. وقدر القروش العندك بشيلوها منك رسوم وضرائب
اما لو داير تتكلم عن ذلك الزمن الجميل ما قبل السبعينات فدة موضوع تاني
الماهية 20 جنيه مقضية البيت لانو ما كان في متطلبات كتيرة .. العجلة الرالي كانت بي 9 جنيه .. وما كتيرة على النجاح .. القرش تمشي الدكان تشتري ويدوك باقي ..
لكن بفضل مايو 69 فقد بدأت الاحوال تتغير .. مش الاوضاع المادية لكن الاجتماعية والنفوس دخلها الجشع والحسد .. واتنزعت البركة من كل شئ .. المال والوقت
| Quote: كنا نمتلك ( وطن ) في ذلك الحين .. يدعى ( جمهورية السودان الديمقراطية ) |
كان لنا وطن جميل اسمه جمهورية السودان وكانت ديمقراطية ولكن حينما انتفت الديمقراطية عن هيئته اضفناها الى اسمه
|
Post: #89
Title: Re: كتابة حلوة
Author: Nazik Eltayeb
Date: 03-20-2009, 11:43 AM
Parent: #88
Quote: والله يا سعادة المستشاركان نحن ما بنعرف السكر ما كنت انت بقيت دكتور اسنان
|
كان السكر قديماً في ثقافتنا السودانية منذ زمن راس السكر الذي حكى لي عنه جدي الذي توفي في عام 1986
ولقد عجزت عن تصور راس السكر وتخيلت وانا صغيرة ان السكر كان تصنع منه رأس كرأس التمثال البرونزي الموجود في متحف السودان القومي والغريبة ان عروسة المولد ضيفتي السنوية والتي كانت تقصر في القامة كل يوم نتيجة لقضمي لها من اسفل لم تخطر لي علي بال
|
Post: #90
Title: Re: كتابة حلوة
Author: yasir Abdelgadir
Date: 03-20-2009, 11:57 AM
Parent: #87
تسجيل تحية وإعجاب للصديق حميدة
|
Post: #91
Title: Re: كتابة حلوة
Author: Waly Eldin Elfakey
Date: 03-20-2009, 01:34 PM
Parent: #90
شكرا يا حميدة لقد عبرت عنا جميعا خير تعبير
لكن السبد المستشار قال رب الاسرة يجد رغيفتين للابناء وهو يمشي ياكل عصيدة ولا هناي.......
العصيدة عرفناها يا حميدة وهي والحمد لله ما شئ كعب ....
الهناي القاصده الوزير ده شنو؟..........
الشكر ايضا موصول للعم صديق الموج........
|
Post: #92
Title: Re: كتابة حلوة
Author: Faisal Elrasheed
Date: 03-20-2009, 04:10 PM
Parent: #91
| Quote: الهناي القاصده الوزير ده شنو؟.......... |
خلوها مستوره ...
|
Post: #93
Title: Re: كتابة حلوة
Author: Faisal Elrasheed
Date: 03-20-2009, 04:22 PM
Parent: #92
حميده
ممكن سحبه في البوست ده لحدي اخر الشارع وارجعه ليك يا عمك
|
Post: #94
Title: Re: كتابة حلوة
Author: ادريس خليفة علم الهدي
Date: 03-20-2009, 06:41 PM
Parent: #93
أخوي / حميدة
لا تكسي لا فونكسي .. حالتك بقت صعبة
ودي الذي تعرف
|
Post: #95
Title: Re: كتابة حلوة
Author: Ashraf yassin
Date: 03-21-2009, 06:35 AM
Parent: #94
Up
|
Post: #96
Title: الزول دا راح وين
Author: ahmed haneen
Date: 03-21-2009, 07:18 AM
Parent: #1
واصل .. هذا التدفق الأبداعي
|
Post: #97
Title: Re: الزول دا راح وين
Author: humida
Date: 03-21-2009, 09:21 AM
Parent: #96
بعد جهد ..
وجدت أحد الشحادين من الذين تحدث عنهم السيد مستشار الجمهورية ..
..
..
وإن قالها فقد صدق..كنّا شحادين !!
..
..
|
Post: #98
Title: Re: الزول دا راح وين
Author: humida
Date: 03-21-2009, 10:03 AM
Parent: #97
شكرا لكل الناس المتداخلين معانا في هذا الخيط ..
نواصل .. و نواصل لبكرة .. ورانا شنو ..
..
..
قالوا ..
ود أبرك ضاجع كل طيور الحلة ..
ود ابرك داير يملا الدنيا طيور ..
ردا لسان الحكمة العارف .. ( ود ابرك كان لابس كندوم ) ..!!
|
Post: #99
Title: Re: الزول دا راح وين
Author: Faisal Elrasheed
Date: 03-21-2009, 10:32 AM
Parent: #98
Quote: قالوا ..
ود أبرك ضاجع كل طيور الحلة ..
ود ابرك داير يملا الدنيا طيور ..
ردا لسان الحكمة العارف .. ( ود ابرك كان لابس كندوم ) ..!! |
يا عمك ده مشروع تشتيت للخور والا شنو
|
Post: #100
Title: Re: الزول دا راح وين
Author: humida
Date: 03-21-2009, 10:46 AM
دي ذي ثورة التعليم العالي ..
الهدف تملا الدنيا طيور .. ملتو لينا عطالة ..!!
|
Post: #101
Title: Re: الزول دا راح وين
Author: بخاري عثمان الامين
Date: 03-21-2009, 11:52 AM
Parent: #100
التحايا لك حميدة
خزنة وتنك
لحية فشنك
طلع البدر علينا
أم
يا مستهبل طلع البنك
سيد اللبن في الباب
أم
مخبرين أشرار
سيد اللبن فورموست
هولندي بالدولار
فلتستعد يا زول
للنبش بالاظفار
الربة الربة
المنقة تجينا مربي
الصمغ العربي معبأ
والكورن فليكس الفاره
راقد في سوق الدبة
مولاي البنك الدولي
اهلا سيدي اب كسكتة
جمبك في التو واللحظة
ابصم بشلوخي الستة
اديك ضمانه اضاني
ولساني كمان كرفته
معلبات وبسكويت
همبرقر أم هم المبيت
يارب دخن ولبن سخن
صحن ربيت
|
Post: #102
Title: Re: الزول دا راح وين
Author: Ashraf yassin
Date: 03-22-2009, 07:00 AM
Parent: #101
Up
حتى يعود هذا الشعب العظيم من هجرته ويذهب الأقزام إلى المزبله
|
Post: #103
Title: Re: الزول دا راح وين
Author: naeem ali
Date: 03-22-2009, 08:50 AM
Parent: #102
حميده العريس
جزيل احترامي
وكامل اعجابي
كنا نخطط لان نصبح (سلة غذاء العالم)
اصبحنا بفضلهم (سلة مهملات العالم)..
في الاسواق تجد اكياس (من كل دول العالم)..
و(سلة روح العالم)..
فشكرا (لهؤلاء)..
كنت انوي ان استفيض..
لكن قررت ان اذهب لاكل (عصيده ولا هناي...)
|
Post: #104
Title: Re: الزول دا راح وين
Author: humida
Date: 03-22-2009, 04:32 PM
Parent: #103
تشـابه علي البقر ..
ما عارف البوست دا ردة فعل لما قاله السيد مستشار الرئيس .. أم الحوجة لعودة اشياء جميلة تسر الناظرين ..
لي كم يوم سارح .. اشيل و ابتسم براي .. عايش في دنيا الخيال ..
الحقيقة .. كنا افضل بكثير من الوضع الحالي .. كنا بنمسع Ray Charles
اغنية واحدة .. لا نعرف معناها حتي .. بس بتخليك تنطط .. و لا بأس بترترة لورا كدا عدة مرات .. و التوهم انك تعزف علي بيانو ..
بالضغط علي الازرار الوهمية بعنف ..
..
..
Hit the road Jack and don't you come back
no more
no more
no more
no more
..
..
كنا بنرقص الـBreak Dance .. و نقلد مايكل جاكسون و نخاف لما الـ Zombie يقوموا من المقابر ..
و كدا كدا فنتاستك .. وكدا كدا يا اب ردا ..
و موسيقى الـThriller .. البجيبوها في المصارعة الحرة ..
و نردد مع بوب مارلي ..
..
..
How good and how pleasant it would be
Before God and man, yeah
To see the unification of all africans, yeah
As its been said already let it be done, yeah
We are the children of the rastaman
We are the children of the higher man
..
..
|
Post: #105
Title: Re: الزول دا راح وين
Author: humida
Date: 03-22-2009, 04:58 PM
Parent: #104
Get up .. stand up .. stand up for your rights
Get up .. stand up .. don't give up the fight
..
..
كنا نرتبط بشكل عاطفي بحركات التحرر في العالم ..
بنعرف مالكوم إكس او الحاج مالك شباز .. و نعتقد ان بوب مارلي بديري دهمشي ( سوداني اصيل ) .. و بنقرا جيفارا .. و نلقب بعضنا بلقب ( كوبي ) دليل الصمود ..
كان لدينا هامش من الرفاهية لكي نصبح شعب مثقف .. و المقولة كانت تقول .. ( القاهرة تكتب ... بيروت تطبع ... الخرطوم تقرأ ) ..
و كنا نجيد قراءة الوضع .. لدرجة ان مولانا علي الميرغني تنبأ بوصول رجل اسود الي الحكم في البيت الابيض بعد سنة 2000 م ..
كنا نعرف اين تقع كراكاس .. و قد حدثني سيد الكارو مرة انه ينوي الذهاب الي هناك لجمع ثروة من خلال العمل في شركات البترول ..
و يعلم ابن اختي الصغير ( في ذلك الوقت ) ان ( مالي ) هي عاصمة المالديف ..!!
و ان لماردونا اخ غير شقيق .. وان النمسا وألمانيا تآمروا لإقصاء الجزائر عن كأس العالم ..
من أين لشحادين .. او شبه شحادين .. هذه الفياقة التي تمكنهم من ممارسة رفاهية المعرفة او التعاطف مع أحد غير بؤسهم ..
|
Post: #106
Title: Re: الزول دا راح وين
Author: عمر الفاروق عبد الله الشيخ
Date: 03-22-2009, 05:13 PM
Parent: #105
كنا بعد شاي العصر بنمشي استاد الهلال لنشاهد كسلا والدحيش وقاقارين ..
المحطة الوسطي بام درمان نظيفة وعربات التاكسي تعزل احسن واحد عشان تمشي الخرطوم ولا تركب ابو رجيلة الجديد وقبل ده كله تمشي خيرات تاخد سندوتش معتبر معاه كباية ليمون هسي وينا المحطة الوسطي امدرمان
كل احد نمشي غرب نشاهد فيلم غربي فيه قصة وموسيقي تصويرية .. وسيناريو محبك درامياً ولا يوم الخميس علي البلو نايل هسي وين البلو نايل وحفلات زيدان ووردي بقاعة الصداقة والحب البريء هسه وينو الحب
نغني مع هاشم ميرغني اسبوع تمام ونشاهد لقطات فريد عبد الوهاب ..نتعشي عند احمد سعد بودنوباوي ونجيب باسطة من الطيب سيد مكي مع كباية لبن بالشوب الكبير هسي وينو اللبن وقبل كدة كان لبن كافوري بتوزعه العربات ونحن صغار مندهشين من منظر العربية البتخت اللبن جمب عتبة البيت وتمشي .. هاك الشحدة دي!!
كيف كنا قبل مايو وكيف صرنا بعد مايو .. خشينا الطلائع وعملنا مهرجان الشباب الثالث في استاد المريخ ونميري حضر البروفات وغشانا وقال حاوديكم مهرجان الشباب العالمي بالجزائر ولا ودان ولا حاحة بس عمل لينا رياضة جماهيرية بدون جماهير هسي وينا الجماهير
وجاييك يا حميدة
|
Post: #107
Title: Re: الزول دا راح وين
Author: مها عبد الله
Date: 03-22-2009, 05:36 PM
Parent: #106
أتت الإنقاذ للإنقاذ 1989 علي حد قول رئيسهم وخطابه يوم إنقلابه المشؤوم بأنه ( لولا إرادة الله لوصل سعر الدولار إلي 20 جنيهاَ !! لا أدري ( إقتصادياَ وحسابياَ نسبة سعر صرف الدولار اليوم مقارنة بالعام 1989 !! ) وشعارهم نأكل مما نزرع ونلبس مما نصنع فهل أكلنا مما زرعنا ولبسنا مما صنعنا ؟؟ الرد عند الإقتصاديين !!!
|
Post: #108
Title: Re: الزول دا راح وين
Author: Nazik Eltayeb
Date: 03-22-2009, 05:49 PM
Parent: #107
ركبنا بص ابورجيلة الاصفر الجديد وانا صغيرة
الباص كان مليان لكن بدون وقوف
جلست بجانب امي في كرسيها
وبعد لحظات اصبح هناك مقعد شاغر
امرت بان اذهب اليه
جاني الكمساري وبمزاح لم افهمه امرني بان ادفع تذكرتي
اشرت لوالدتي رد باصرار انت تجلسين لوحدك ويجب ان تدفعي لوحدك
نظرت لوالدتي فاذا بها تشارك في المؤامرة المحبوكة بدقة
ايضاً كل الركاب شاركوا وطلبوا مني ام ادفع
وعندها وعندما لم اجد مخرج انفجرت باكية وجعل جميع من في البص يرضيني وانا ارفض ان استجيب(زي نكته عادل امام في المسرحية... وانا اعيط).
ناس كانت رايقة كمساري راقي وحياة جميلة. ومرة اخري يحى الشعب السوداني الشحاد
|
Post: #109
Title: Re: الزول دا راح وين
Author: ahmed haneen
Date: 04-04-2009, 07:48 AM
Parent: #108
الزول
دا
يا صديقي
موقوف قسريا
.. وهذة تحية له
|
Post: #110
Title: Re: الزول دا راح وين
Author: Faisal Elrasheed
Date: 04-04-2009, 08:29 AM
Parent: #109
up
|
|