من تحـــــــــت العمــــــود .. !

في تالتة جامعة .. سمستر فايف
كنت زهجت من مسألة القراية دي خلاص
وانتهت حلاوة الجامعة
كملنا القعاد في المدرجات ... و الونسة مع الجكس
وشراب السجاير
وشلت مادتين .. بمبدأ .. انه الدكتور ما ناقش حاجة
ست الشاي .. أدينت منها قروش
علي أساس انه أنا طالب قديم .. ونظام يا خديجة داير أجيب للحاجة بارد
مشيت في المظاهرات .. وسمعت أركان النقاش
وعملنا يوم مفتوح .. وتلاتة أيام مقفولة .. وحفلتين .. واعتصام
وزرت اغلب زميلاتي في بيوتهم
ودي حركة جامعية بحتة مسألة الزيارات دي
و ما زميل وكدا
وفي الخضم دا .. اتشاكلت مع العميد
فبقيت مضطهد من قبل الإدارة .. برتبة مناضل صغيروني
ما كان في حاجة ما عملتها
فجأة كدا .. جاتني الحالة مية واحد وتمنين إجراءات
وبقيت قاعد تحت العمود في ناصية شارعنا أربعة وعشرين ساعة
بلا جامعة .. بلا بلولة ياخي
بعد تلاتة أيام اكتشفت ليك .. انه اليوم مواسم
من ستة لي تمنية .. موسم الجكس بتاع العالي
وبعد تسعة .. جكس الحلة بغرف البلاعة
عشرة ونص .. يلبسوا تيابهم .. و تبدأ القطيعة
حداشر ونص .. بفكو شفع المدرسة
اتناشر .. بمرقوا ناس سنة سادسة
اتناشر ونص .. جكس العالي بجي راجع
واحدة .. ست إنصاف بتجي شايلة عيش .. وجارة شفعا
واحدة ونص
واحدة ونص
واحدة ونص .. الشارع خلا
والكهرباء قاطعة
أطير وين أنا يعني هسع
أتنين ألا تلت .. بشة بكون جا من وين ما عارف
شايل جريدة الدار .. وكيس صعوط
و مية دولار .. كان رسلها ليهو اخوهو الفي شيكاغو
وكل يوم من ستة شهور بمشي السوق عشان يفكها
بلقا السعر نازل
جيب سفة
أديني الصفحة الرياضية
كدي جيب المية بتاعتك دي
نطبقا ... نصين .. نرفعها في الشمش .. نقلبها تاني
نطمئن
ما مزورة
يدخلها في نص الكشكول بتاعو
يعاين لي .. يا زول نهاية البرنامج بتاعك دا شنو
هند بتسأل منك .. و أيمن قال داير تلفونك
و خديجة قالت دايرة قروشها
والامتحانات باقي ليها شهر .. ناس عمار معسكرين في اركويت
......................
....................
.....................
أتنين ونص
عالـــــــــــــــــــــــــم الرياضة
تلاتة .. النشرة
أربعة الدافوري
ستة .. رجعنا للعمود
ستة وربع .. حاجة بتول بتجي تشيل اللبن
ستة وتلاتة و أربعين دقيقة
حاج إبراهيم بجي ينبذ بتاع الدكان
لأنه اللبن .. قَطع
سبعة بجي .. مدحت .. يقعد يمين العمود
بعده .. بجي حسن .. يقعد شمال العمود
اسكو بكون بكورك من أول الشارع
مأمون بجيب كرتونة بقعد عليها .. عشان ما يتوسخ
حاتم .. ما بسلم .. بقعد ساكت وما في زول يسأله
عمر الطاهر .. بجيب تسالي .. و معاهو مصطفي شرفي
الهلال مغلوب تلاتة صفر
الصهاينة ديل محظوظين خلاص
اسمها سارة .. شديدة شدة العدو
طلع معفن ساكت ياخي
جيب سفة
السلام عليكم .. وعليكم السلام
الدولار نازل
ماشي عمرة .. احتمال ما أجي
ساكنة وين بالله ..
ههههههه .. هيق .. هيق .. هيق
جيب سفة
أبيت
عليك الله
قلت ليك .. أبيت
ادهو موتر .. جبهجي معفن
البوووووش
ما عندي قروش
خمسمية .. ميتين وخمسين .. مية جنيه
ما تعمل شطة ..
خمستاشر عيشة .. موية فول .. موية جبنة
ربع رطل زيت
جيب حبة شطة
مأمون .. جيب لينا موية من بيتكم
باردة عليك الله
جيب سفة
ميتينك ياخي .. كرهتنا والله
يآآآ شباب
يا حريقة .. أتفضل ياخي
في حِلة ناس معاوية
عرس أخت مصعب الدلاهة داك
طرزان يا معلم
قوموا .. ارحكاكوم
فيفيان .. ترا .. ترا
فيفيان .. ترا .. ترا
فيفيان يا روحي .. جنوبية
فيييييفي .. ضوت لينا الخرطوم
يا شباب
وعليكم السلام
وقلبي مشغول بصبية .. شالت النوم من عينيا
الحفلة دي مالها مليانة وهم كدا
يا معلم .. ههههههه .. بكم كرت دي
فكها
أنت داير تحك بيها ضهرك .. ما طويلة
الساعة حداشر
الحفلة انتهت
فيفيان .. ترا .. ترا
فيفيان .. ترا .. ترا
فيفيان يا روحي .. جنوبية
فيييييفي .. ضوت لينا الخرطوم
يا شباب
وين كدا
يلا .. سلام .. تمورو مورنغ
وستمية .. و دقسونا الجبهجية .. يااا ناس
وستمية .. ترم .. ترم
.................
................
اتناشر
عارف يا بشة
كلب ناس عطا دا .. غتيت خلاص
سبعة سنين .. أنا ما شفته سكا ليهو عربية
مما جا الجريو داك .. بدا يسك في العربات .. لمن علمو الحركات دي
وفي النهاية .. دقشتو عربية
وصاحبنا .. بطل الشغلة .. ورقد في حتته راجع
هههههههههه .. هيق .. هيق
الامتحانات قربت يا زول .. نهايتو شنو
.................
................
واحدة ونص
أتنين
تلاتة وربع
أربعة وخمسة و أربعين دقيقة
الله اكبر .. الله اكبر
اشهد أن لا اله ألا الله .. اشهد أن لا اله ألا الله
اشهد أن محمد رسول الله .. اشهد أن محمد رسول الله
حي علي الصلاة .. حي الصلاة
حي علي الفلاح .. حي الفلاح
الصلاة خير من النوم .. الصلاة خير من النوم
الله اكبر .. الله اكبر
لا اله ألا الله
.........................
.........................
.........................
خمسة وربع
الله اكبر .. الله اكبر
اشهد أن لا اله ألا الله
اشهد أن محمد رسول الله
حي علي الصلاة
حي علي الفلاح
قد قامت الصلاة .. قد قامت الصلاة
الله اكبر .. الله اكبر
لا اله ألا الله
.........................
.........................
.........................
ستة ونص
رواية جديدة .. من تحت العمود

ياخ اسمعني :


انتا كنتا ساكن في حلتنا ؟؟!

حميده يا أخي ما تستهون العمود ، نحن عندنا عمود في حلتنا من ما فتحنا ما شفناهو منور لأنو كل ما يحاول ينور شفع الشارع والشوارع المجاورة لشارع الشانزليزيه بتاعنا الأولو مجنون وآخرو بيت عرقي متخصصين في الرماية وحشر بن مكتوم العامل فيها كم بي قرش عشان ميداليتو بتاعت الأولمبيك قيمز ديك ما بياكل عيش معاهم بس دنيا دبنقا وكل العشوشات وأولاد أبرق ونمل السكر وضبابة الإشلاق التي صادوهوها لم تشفع لشفع حلتنا أن ينالوا ميدالية خشبية حتى. المهم عمودنا قطع البحر يا عديله فقد تزوج ود جيرانا الشغال في مصنع النسيج من واحده زميلتو في الشغل وكان العمود بالنسبة ليهم محراب الهوى رغم إنو بيقع عكس إتجاه الريح بالنسبة لبالوعة ناس الزعيم وهي البلاعة المسروفة منذ الأزل وكل ما يغرفوها تقول جمام تتملى والشارع قدام بيتهم بقي زي أم الحفر لو مشيت فيهو أكتر من مرة بتحتاج تغير مساعدات وركب وبلالي وأناكل - جمع أنكل شمال – وبعد المغرب وفي عز كتمة الحر الشديد داك بتجيب ليها ريحه أجارك الله يعني نظام يا نسمه يا جايه ، ويا زعيم دي بلاعة ولا أم فتفت ، ده طبعاً غير النجيلة الشاربه من لون الشفق عند المجاري ، وهي خضراء لمن غلط بالرغم من إنو الزعيم وأهله بيستحموا بي صابون غسيل عادي زيهم وزي جميع ناس الحله ، يعني لا لافندر لا كامي لا بوكيه حتى وقد أجرى عبودي دراسة وقام بأخذ عينات من بلاعة ناس الزعيم والنجيل الذي يزينها للإستفادة من ذلك في تنجيل ملاعبنا خاصة وأن الغنم تعاين في النجيلة دون أن تأكل منها. لكين ما قلت لي عمودكم ده في صفحة كم عفوا هل هو عمود نور زي عمودنا الذي تخرج من تحته ود حلتنا وتزوج وأجنجب البنين والبنات ولا عمود تلفون ، وطبعاً نحن لأنو ساكنين حي شعبي ما عندنا تلفونات قبل سوداتيل يعني أعمدة التلفونات دي إلا نشوفها من شباك قطر ماشي.
نحن بائسون محبطون ، وفي نص شارعنا وأما بيت حاج فضل المولى عليه رحمة الله في مزيره تقول عاملاها شركة كولدير الهندسية فيها مويه حاجة مبالغ فيها تشرب ما تروى وبخاصة في حر الصيف الغائظ لكين عشان أغيظك أنا في كلب تحت المزيرة دي والله إلا تشرب بي مصاصة ومن مروحية لأنو البشربو من المزيرة دي سبعة في عين العدو غير حاج فضل المولى ديل هم بس الكلب ما بسوي ليهم شي وغيرهم الله قال بي قولهم كلب تخصصو عراقيب وعوير عواره لا ينبح لا يزمجر لا يهرش على طول شورت كت يعضيك من حيث لا تحتسب ويمشي زي الما كان في حاجة لا نفسو يقوم لا يرجف يرقد جمب المزيرة تقول حقت أبوهو ، وأظرف حاجه إنو لا بتاع ترمس لا جردقه لا سمك بجي شاقي الحلة دي ساكت إنشاء الله لو راكب حصان طرواده وبي كده ريحنا من الباعه الجائلون ........... ولنا عودة إن عاد في القفة شئاً من كلام

حميده
دبايوا
يازول
يابرضك
ضليليم

Quote: سبعة بجي .. مدحت .. يقعد يمين العمود بعده .. بجي حسن .. يقعد شمال العمود اسكو بكون بكورك من أول الشارع مأمون بجيب كرتونة بقعد عليها .. عشان ما يتوسخ حاتم .. ما بسلم .. بقعد ساكت وما في زول يسأله عمر الطاهر .. بجيب تسالي .. و معاهو مصطفي شرفي

واللة يا محمد عبد القادر بالغت.
الايام دى ذاكرتى بقت زى الحديد
كدى راجع البوست دا قبل ما اواصل
اقرأوا يا من كنتم تضحكون من عمرو خالد

طبعا الصورة لى فترة طويلة اقول
دة هو ولاماهو لكن لمن جبت سيرة
مدحت وحسن وعمر الطاهر حسين
والدجال مصطفى شرفى(جوستف)
قطعت الشك .لكن تعال هنا
متين عرست انت مع انو الصورة
بتقول انك عرست .المهم بجيك راجع
وكان ما عرفتنى استعين بى صديق برضو

حميدة

الملا عمر

ده يا هو الضل البنكوسو.....لينا زمن من النضم الحلو ده



الساعة حداشر كل يوم جمعة تعود ترطيبة الجلوس تحت النيمة في الشارع مع مجموعة من اصدقائه من شباب الحلة الذين لا يلتقيهم الا في كل جمعة وفي نفس المكان

كتلا

هو عضو زائر لهذه الجلسة ولقد اسماه ترطيبة كتلا لانه يقتل الونسة ويحول مسارها لامور لا يحبها ترطيبة

اتى ترطيبة يسبقه صراخه المعهود طالبا ان لا يجلس احد في مكانه فهو دائما يجلس على حجر ضخم يتوسط الجلسة كانه يعطي من يجلس عليه صلاحية قيادة الونسة

- شنو يا ترطيبة ياااخ وين بينسونك الخطير

- هاك ...........عليك الله شلاليفك دي شلاليف بينسون ياخي ما تشوف ليك ابو نخلة والا
برنجية

- هههههههه وانت برضو ترضى ندخن ابونخلة وانت قاعد......خايفين نازاااك يا وجيه

-يا ولد............. كلم امك تسوي القهوة

قال كتلا وهو يتلولح في جلسته

- الحلة مالا صااااانه كده الايام دي

- يا ساتر منك ياخي ماااااااااااااالك ياخي ما تسيبا في حالا ياخي انت ما تشوف ليك موية رايقة الا ترمي فيها حجر

حاول ترطيبة تغيير مسار الونسة المكتولة حتما بالسؤال عن عم التوم فاجاب كتلا

- ياخي عم التوم ده ما بقدر يقعد على ركبو الرضية ما خلت فيهو ركب

- عاجباني ركبك وانت ماشي نسمع صوتا تدور تقعد تكركب ...تقوم تطرقع

- ده ماااااااااااااااا من التعب .............والاكل الكعب

- يازول ركبي فور ويييل درايف......ززيت واااي ......موش هنتر بسكسك مع كل لفة

بجيكم صادي ..

الشئ الما قادر ألقى ليهو تفسير هو لماذا أدمن الكثيرين منا الجلوس أو الوقوف تحت العمود فهو كالنخلة الحمقاء لا ظل ولا ثمار وهو فوق هذا وذاك مكان تخصصت فيه الكلاب والسكاري بقضاء الحاجة صحيح أن بعض الأعمدة تقع في تقاطع أى أن المتكل فيها أو المتكل عليها يكون ناظراً للجهات الأربعة بحيث لا تفوته شاردة ولا واردة لكن مع ذلك يبقى ضرر العمود أكثر من نفعه بفعل الكلاب والسكاري.

صديقي الملا

أذكر أن العمود كان يلقي بنوره على حوشنا الصغير الذي كنت انام واحلم واصحى فيه ....وكم من حرينا وشدت والرمة والحراس شدت تحت لوائه وكم من
كتاب شممنا عطره جديداومرق يداعب عقولنا و نقش فيها من تحت نور ذلك العمود
حتى ان اخاك تعود على النوم في النور منذ تلك الايام...ورغم أن لمبته كثيرا ما تصيدها حجارة الرماة من نياشي الحلة وزوارهاالا ان عمر ابو التيمان الذي كان يعمل في شركة النور سريعا ما ياتيها بتيم من زملائه يعيدون لها سيرتها الاولى في غمرنا بفيض من الضياء
...وتحت هذا العمود كنا خريفا ندير معركتنا مع الجراد فعمود النور صديق حميم للجراد ..وكنا نأمر رجل الجرادة بعد نزعها من اصلها بيا فكي صلي ...ونرد عنها..ما بصلي ..جيب السوط... وبضغطة بسيطة على فخذ الجرادة ينثني ساقها ونتبع ذلك بقولنا ....الله اكبر

لم يكن عمود النور وحيدا فلقد رافقه وقوفا عمود التلفون والذي كان خشبيا ولم اذكر اني رايت عمود تلفون واقف على حيلو مستقيما فهو دائما مائل وسلوكه كذلك مائلة ومتشابكة وربما لاحقة ا##########

تحمل طفلا
واخر في بطنها يكاد يقفز خارجا
وثالث تسحبه ماشيا
التوب تمرغ بالتراب وهي غير عابئة به
شعرها لازال كالليل البهيم يتهدل في غير ما انتظام
كعادتها لايعرف وجهها المساحيق
فهو سمرة الزجاج اللامع رغم مر السنوات
ارتبكت قليلا وهي تمد يدها بعد ان مسحت ما بها على ثوبها
مد يده والذكريات تتلاطم امامه
فتذكر وهو حديث التخرج من الجامعة عندما دعته لامر هام
وجلس لها لتقول ان كنت جاهزا فتقدم للزواج والا فهناك زميل شقيقي تقدم لخطبتي
اسرته كانت تحتاجة بعد وفاة والده
وزميل شقيقها كان جاهزا ووضعه لا يقارن بذلك الخريج الجديد الذي يحتاج سنوات طويلة لاعداد نفسه للزواج اتفقا على الفراق المر .....
شجعها هو لاغتنام الفرصة والتضحية بحب الطفولة الذي بدا باكرا جدا

كانا يلعبان بجدية دور العريس والعروس
يدفع ترتارته امامه
يذهب للعمل وياتي بالخضار تماما مثل ما كان يفعل اباه
ليعود ويجدها قد طبخت في كوز الصلصة

سحبت يدها بهدؤ من يده التي انتقلت عبرها رعشة كهرباء تحمل ذلك
الذي تعودته منه قبل عشرين عامامن سخونة اللقاء

قالت وهي تسحب نفسا عميقا
حمدالله على السلامة
متين جيت

ولم تنتظر اجابته لانه بحلق بها كما لم يفعل من قبل

وسحبت جوقتها وواصلت طريقها

نسيت حاجة يا طبزة ...!!!

مفروض كان تذكرة في خواطرك دي ...!!!

((((((((( أعصرني عليك شديييييييييييييييييييييييد يا مــــ......))))))))))))


أكيد عرفتها دي ....!!!

والله يا بشة ..
الديمقراطية لسع ما وصلت الحتات دي ..
ونظام سيرفر بكري دا شغال شطف شديد ..
وبرضو عندو .. نظام اعصرني شدددددددديد ..
انشاء الله نموتو زاتو .. !!

طبعاً انت بتمثل شاهد علي العصر .. آنف الذكر
وغايتو محاولة لتجميل الواقع المأساوي
مشيها ذي ما هي ..

وعموما انا داير اكتب عن هاني ورامي ..
ديل حبايبنا .. قوووووووووي .. !!


الملا صديقي ..
لي عودة تليق بك .. انتظرني

غريبة ..
لك العتبى ..
سأعود اليكم ..



ياسر مكاوي ..
يتعرف ياسر كديس بتاع محطة تمنية .. !!!!

لو لحقت جبت سيرة هاني و رامي ديل ...

أكيييييييييييييد هتتشفط .... لأنو هيقفشوك بيهم في الشارع ...
و بالمناسبة هاني و رامي خشو المدرسة ....
و الايام دي شغالين كورس بتاع تخسيس و تطويل ....
و ربنا يجيب العواقب سليمة ...!!!

شنو .. !!!
تخسيس عرفناهو ..
التطويل لزمو شنو ..
بالطريقة دي هيصلو الركب .. !!

مكسب

لسة ما قلت حاجة عن المراسيل!

مراسيل ..!!
ما فهمت عليك والله ..
يبدو انه في ريحة معرفة
بس ما قادر افرق نور دا واقع وين
خليني افتش في ذاكرتي ..
وسأجده في القلب .. ربك يستر .. !!

مراسيل
جمع مرسال
بالعامية يعني لمن زول يرسل ليو زول للدكان او لي ناس وكدة
دا كل القصد
فتش في الذاكرة عن الحكاوي الظريفة وبس

....

ما قلت ليك ..
سأجدك في القلب ..
لك التحية
نور علي نور .. !!

الاكرم حميدة

ازيك

ممكن بس اعرف عامودكم ده بيقع وين جغرافيا ؟

لو فى الحاج يوسف او اشلاق بوليس بحرى جنب ميدان عقرب او فى بحرى الشعبية جنب بيت ناس السماكية كلمنى

سمح

وشكرا كتيييير

إشلاق بحري لم يعد كذلك فقد تفتق ذهن ناس الحكومة ببيع الإشلاق فهي حكومة تبيع كل شئ في طرف السوق ولو تعرض أحداً لها محتجاً قالت قولاً جامعاً كل المعاني أنها تفعل ذلك من باب الخصخصة وهي خصخصة دخلت حتى في خصوصيات الأمه الأمر الذي ينتفي معه التجسس والتحسس.
أما الشعبية بحري فقد أصبحت من بره هلا هلا ومن جوه يعلم الله ، فقد إرتفعت عماراتها وبناياتها إلى عنان السماء في أطرافها وبقي داخلها منازل تحاول التطاول تفشل في بعض نواحيها وتنجح في البعض الآخر.
وعقربنا ماتت والميدان محاصر من كل الجهات وربما يلفظ أنفاسه الأخيرة في أى خطة تختطها الحكومة. الأعمدة هي الأعمدة كما قال صديقنا نشأت الأمين لكن يبقى هناك فرق يقاس بميل العمود بحسب إتجاه الريح أو تعامد شمس الصباح مضافاً إلى ذلك التقادم. فأعمدة ديوم بحري على سبيل المثال أكثر ميلاً وتآكلاً من أعمدة المزاد والحال يزداد تحسناً كلما إتجهنا شمالاً حتى الوصول إلى نقطة التعادل ممثلة في حي الصافية ثم تبدأ الإنتكاسة الأولى من شمبات وهكذا ..
يقولون أن العمود عادة ما يكون مبربحاً أى أنه لا أغصان ولا فروع له وهو في أحسن الأحوال يحاكي النخلةالحمقاء التي لا تحمل ثماراً ولا ترمي ظلالاً ومع ذلك يظل متكأ وملاذ لكثيرين من أمثالي وأمثال حميدة وآخرين ومع حرية الوقوف تحت ظلاله طوعاً يظل أفضل بكثير من أعمدة الصحف التي تخضع للرقابة بإعتبار أننا أمة بالرغم من عشقها للحرية إلا أنها تفتقد لذلك في كافة مناحي الحياة ونقبل بالمنطق القائل ما كل ما يتمني المرء يدركه برغم من مجاهدات البعض منا.

العزيز humida

استمتعت بالوقفة "تحت العمود"... رغم طولها (الوقفة ... لا السرد).
عمل جميل، أحسست أنني أشاهد "الشريط الفائز" في مسابقة للأفلام القصيرة.
جميل ...فعلاً.

شكرًا لعودة العمود لموقعه الطبيعي..ناصية البورد..فهو يستحق


الاخ العزيز حميده وصحبه الكرام

..ينعم صباحكم خير ويسعد مساكم نور..نور عمودكم ..الباهر ..بوست
أنيق..ومداخلات غايه في الجمال..شكرًا لمتعة القراءه.



..حميده العزيز لك تقديري ولكل الذين شاركوا في هذا السرد الجميل

......شــتات

Quote: غريبة .. لك العتبى .. سأعود اليكم ..

انا قرجة يا حلو

قررررررررررجا

ما شايف العكاز ده

وللعمدان في زمن كل عاطل
ظل رمى او تكييل مستحق

هي الأعمدة.. أنما كانت.. لها ذاك الحضور الطاغي في الحلة.. روادها
يعرفهم القاصي والداني.. سيماهم في مؤخرات بناطلينهم من أثر التكييل
وتجدهم في مساسقتهم الابدية بحثاً عن الظل يدورون في اتجاه عقارب الساعة
وعكسها في بحثهم الدؤوب عن موطئ ظل يلوذون به نهاراً.. وفي المساءات
يكون الابتعاد قليلاً من الحيطان لان بها بعضاً من سخونة اكتسبتها نهاراً..
في الحارة الثامنة.. في الكلاكلة.. في الصحافات..وأيضاً في مدني.. نفس الأعمدة
نفس المناظر.. الهي ذاتا والصور نفس المشاهد

اكتبوا يا اصدقائي
فلنا تحت كل عمود ذكري
غار بها الزمن التعيس
اهطلوا دوما كما كنتم هناك
وانتم قعود .. تحت العمود

ياطبزة..
عـــــــــــــــــــــــالم الرياضة عجبتني...
سنار من خليفة الصافي

إلـــــــــــى لقاء
..
.


ركن الاطفال
يقدمه
عمكـــــــــــــــم مختار..




البوست ده مريح جدا..

يا تايه الخصل

Quote: فى بحرى الشعبية جنب بيت ناس السماكية

بس اتكل عجلتك في العمود

تلقاني واااااااااقف منتظر

شنطة قاضي والرأس فاضي
بتاع الترمس
أسمع قلت ليك يا
تقليد بدرجة جيد لنباح الكلب
وين يا
بعض من تعليقات من يتخذون من أعمدة الإنارة متكأ ومقر يمارسون هواية معاكسة خلق الله

*

حاجة اسيا مدت راسا بالباب

- اكيد كايسة ليها واحد ترسلو

- ياخي دي طفشّت اولادا اخر الدنيا واحد في كندا وواحد غي استراليا

- وواقعة فينا مراسيل

أثبت يا قرجة لازم ترسلك يعني عاوزه ترسل منو؟ بعدين إنتو كلكم قاعدين من ضل لي ضل ومن حيطه لي حيطه ومن عمود لي عمود ضايقتو الغنم وكلاب الحلة في الضللة وما عندكم شغله غير تخميس السجاير وتصبين السبارس وكيس التمباك – بالمناسبة في السودان أوعك تطلع كيس تمباك – لأنو ما برجع ليك تاني أو بمعني آخر بيرجع فاضي – واحد من أولاد حلتنا الله يطراهو بالخير كان بخلي الكيس بتاعو هزاز يعني يفتح الكيس في جيبو وينشن لي السفة ويدنكله ويطلعها ويختها كمان في الجهة اليمني من الحنك الأعلى وما في أى واحد يكون ناقش حاجه ولو ضايقوهو أو واحد حاول يركز عليهو بيعمل نظام عطسه عشان يقفل الأنف والشفتين من الناظرين وباليدين الإتنين.
بس في نوع مراسيل بتكون ما موقوته يعني مواعيدها مجليه زي مواعيد كل السودانيين ، يعني تناديك خالتك فاطنه وتقول ليك تعال يا ... جيب لي عليك الله تمباك من سعد قشرة في درجة حرارة تذيب كل القشور الفي شعر الرأس وطبعاًتمشي وتجي بالسلامة بس كداري يعني لا عجلة لا كارو لا ياعم قادم ، ولا يطلع ليك عمك مصطفى ويقول ليك تعال عليك الله جيب لي قش لي الغنم ، ياعم ده وقت قش ، وشيلتك للقش بيضربك الهمبريب وتشعر بشئ من الإنتعاش لكين أول ما تخت القش حا تدخل في دور كاروشه وهي ما يعرف علمياً بكاروشة البرسم وما خالطه من سعده ونجيله وبعض النبت الشيطاني.

تمبس ..
في انتظارك نحن
حلقة جديدة من فرنكش ود الحلة

الملا عمر ..
وقرجة .. يديكم العافية

ويديك

يا حميدة

خليك معانا في الضل وما تطلع في الهجيرة دي

ناس العمود

سلام


ما قلت يا حميدة الراجل كان بحمر ليك ليه ؟؟؟؟

والله يا عمنا قرشو
كما يبدو وللمشاهدين الكرام
انه اساسا التحميرة دي عندنا نحن
باي ديفولت .. كدا
بفترض فيك مشروع شكلة ..
لحدي ما اقتنع انك ود ناس
وممكن تدقني .. كان دافرتك كتير

نزح كدا شوية .. الضل اتبرا ..

قرجااااااااااااااااااااا

Quote: بس اتكل عجلتك في العمود تلقاني واااااااااقف منتظر

انا ماعندى عجلة ..عندى نوبيرا خضراء اللون..


حميدة


كتر خير الناس الردو وعبرونا ولو حتى شاغلونا وكت انتو طنشتونا ياناس الحلة !!!

العزيزة نادية ..
دا منو البقدر يطنشك دا ..

يا ولد .. تعظيم سلام
للاستاذة الصحفية اركان حرب ..

قلتي لي اسمك منو ..

Quote: ((((((((( أعصرني عليك شديييييييييييييييييييييييد يا مــــ......))))))))))))

ها ها ها هااااى
انتو بالله كده

ايوه كدا ..
انت فهمت شنو .. !!