عـــز الديــن شـــــــلاقة .. ( قراءة جديدة لشخصية نمطية ) .. !!

كما حال شخصية ( محمود الكضاب ) النمطية ..
التي وجدتها في كثير ممن تعاملت معهم في الفترة الآخيرة ..
مما أتاح لي سرعة هضم الكثير من الحكايات ( الأفلاطونية ) .. والبطولات ( الكرتونية ) ..
وبعض ( السخف الاجتماعي ) الملازم للـ ( نفاق الاجتماعي ) ..

تبرز في ( أفقي ) هذه الايام شخصية ( عزو شلاقة ) ..
كشخصية نمطية .. موجودة في ذهن كل زول عاش مجتمع ( الحارة ) ..

عزو شلاقة .. شخصية نمطية ( جدلية ) ..
ظاهريا .. زول حارة .. كريم .. شهم .. ذو مروءة ..
باطنيا .. ( أجندة آخرى ) ..
الشلاقة تأتي .. عندما يحصل تضارب بين ( المصالح والظاهر ) ..
لدرجة انه بعملها ( ظاهرة ) ..
بصورة لا تتخيلها تدعوك لممارسة فضيلة( الضحك ) ..

شخصية ( عزو طناش ) .. تفترض في الناس ( الغباء ) ..
يتبع سياسة ( كلمة حق يراد بها باطل ) ..
يتصدر المجالس بكلمات رنانة .. ( ومفروض يحصل وما مفروض يحصل ) ..
في معظم الاحيان هو علي ( حق ) .. ( علي حد زعمه ) ..
واذا كان علي خطأ ( فهو لم يكن موجودا الوكت داك ) ..
رغم علم غالبية المستمعين انه ( مولانا الذي غشانا ) ..

أهم مقومات شخصية ( عزو شلاقة ) .. الادعــــاء ..
علوم فضاء .. بايلوجي .. فن .. كورة ..
بتاع كلو ..
ممكن حتي يغالطك في ( نفسك ) ..
وله المقدرة ( يفطس ) ليك ( اجعص ) موضوع ..
اذا لم يكن هو ( المتزعم ) للأمر .. !!!

شخصية ( عزو طناش ) .. تحب ( الاعــــلام ) ..
ولا يفوت سيدنا ( عزو ) اي فرصة للبروز اعلاميا ..
سواء كان ذلك من خلال ( الشاشة الفضية ) أو ( الشاشة الغشاشة ) ..
و ( ينقشط ) السيد ( عزالدين شلاقة ) في الامور بطريقة تدعوك لممارسة فضيلة ( الاندهاش ) ..
و ذات مرة انبره صاحبنا ( الما متعود عليهو ) .. فصفق وقفز ..
وقال لي .. دا ( مبالغة ) .. اشتريتيهو من وين .. !!!!!

شخصية ( عزو شلاقة ) .. توجد بعدة مسميات آخرى ..
حسب واقع وثقافة الزمان والمكان ..
يمكن ان يكون .. ( الدكتور العلامة محجوب هجو )..
ويمكن ان يكون .. ( الاستاذ عبدو المنقشط ) ..
ويمكن ان يكون .. ( الاخت نعمات جبجبة ) ..
ويمكن ان يكون .. ( عباس ريكس ) .. كما في رواية الاستاذ علاء الدين منصور ( تمبس )

Quote: لما تلاقيني قدام بنات ما تقول لي عباس ريكس دي .. قول لي يا عباس ... يا سيد عباس .... انته ما بتعمل ليك حاجه .. وانا كمان بتريحني

هزليـــــات فرنكش – ود الحلــه

Quote: هزليـــــات فرنكش – ود الحلــه وين يا .... لزززيززززز يا عسوله ... وا حلاتي يا ناسي .. شنو فاتح لينا كده؟؟؟ هكذا تبدا هزليات احمد ( فرنكش ) من مكانه المعروف الذي أفترضه لنفسه .. ( لستك ) قديم مزروع علي الناصيه عند مدخل الحله .. بحيث يستطيع من مكانه مراقبة الماره وأصطياد عباس في تحركاته المريبة .. وبأمكانه زرع البهجه في نفوس الجميع من خلال تداخلاته .. دواخله المحتشدة بمسرح داخلي يستطيع وحده التحكم في العملية الإخراجيه وكل العمليات الفنيه .. حتي أدمن ( اللستك ) نسيج خيوط الرداء المهترية .. واعتادت أرضية المكان الصلبه علي خطوط حزائه ومخلفاته المزاجيه دون ملل – اصبح معلم بارز .. دليل للوصف .. أصحاب (الرقشات) يستغلون تواجد فرنكش في المنطقه المعنيه لإفتراس الزبائن المتسكعه حوالين فرنكش ( فرنكش ) يعرف كيف إرضاء معجبيه كلا حسب هواه .. نساء الحله عند مرورهن بالسوق يحرصن علي خدمات التوصيل المجاني التي يذودهم بها فرنكش دونما مقابل أطفال المدارس في علاقه حميمه معه لاينسي عملية توصيلهم إلي باب المدرسة حسب جدولة أسبوعيه أفترضها .. فرنكش دفع به المظروف (الكاكي) اللون إلي هذا المنفي الإختياري .. أصبح غير قادر علي العمل بأي مصلحة حكومية أخري . بكالريوس الجامعة أكتفي بأن يحتفظ بنفسه داخل الشنطة الحديدية المغلغة بأحكام .. الأعمال التجارية هو ليس من روادها .. الكثير من له علاقه بهم أختصروا المسافات – هاجروا بلا عودة .. أحتفظ بزكرياتهم الجميلة في دواخله العزيه دون التفكير ولو مرة باللحاق بهم .. سكرة : عليك الله كباية نص قهوة في نص شاي بس ما تحركي السكر. ....... فرنكش يا ولدي الله يباركك كان تلحقني علبة صلصة من دكان الفوراوي ............. سلامات يا فرنكش ... اهلين يا توحه .. وينك ما ظاهر ( بِسس ..) الكريه ده .. إنته غير العطالة وقاعد اللستك ده .. ومشاغلة البنات ماعندك شغله تقضاها .. عما اا.. - انتي غير شناتك .. ومساختك دي مافي حاجه حامياك العرس .. عامله راسك القاطعاهو من راسك ده. .................. - - يافرنتش التفر بتاعنا طار لينا في راس الدراش بتاع ناس عمي حسين ، والتلب بتاعم سعران .. تعال جيبو لينا .. - طيب تعال انا بدق ليك شنكل وانته اطلع جيبو .. ............ - يا ريكس ... يا جوكس ... شنو الفنايل العفنه دي .. ؟ !!! جنصصــــــــه ............ عباس في تحركاته داخل عوالمه الملئة بالنصب والإحتيال وفي التعامل مع ضحاياه من الشخصيات اللأمعه يستغل كل فرصة للكسب المادي ، كمية من الكروت الشخصية بأسماء والوان مختلفة دفاتر شيكات وهميه بناطلين وفنايل من آخر بيوتات الموضة لاتتوافق مع عمره المتقدم .. يتحول لون الشعر اسبوعيا إلي الأسود الداكن بفعل الأصباغ .. يتواجد عباس عند الأماكن الراقية وعند العودة يحرص أن لايمر عند ذلك اللستك متحاشيا فرنكش الذي أعتاد علي مزاحمته وكشف قناعه المستعار . عباس يعرف أن المرور عبر الشهرة وأرتفاع الأسهم لايمر الأ من خلال فرنكش .. عباس لا يغادر المنزل صباحا الأ عند التاكد من غياب فرنكش ، متعمدا مصادفة طالبات الثانوي عند المحطة الرئيسية وهو أكثر تشبسا بالحياة . صباح الخير يا شباب .. اهلين يا حبه ... شنو مضيقه كده يا منقه ؟؟؟ اهلا يا احمد كيف أخبار الوالد والوالده ( عباس اكتر جديه ) علي وين الليله كده يا وجيه .. كدي تعال جيب سجاره من البينسون بتاع المرتاحين ده وكان ساعدتها بي واحده تانيه تكون بالغته .. الليله القاعه فيها شنو؟؟؟ ما زي مشينا وكده .. جيبك كيف؟؟؟ عباس تمر دقائقه بصعوبه بالغه في مواجهة فرنكش المتلزز بتعزيب عباس .. فرنكش يستغل لحظه ضعف عباس وتوتره ويتمادي في قفشاته .. بنات الثانوي عند المحطة الرئيسية اكثر اعجابا بفرنكش .. هو يعرف ذلك .... حنــــــــــان هي كل العذاب وســــــــــــــــــــر الألم اذيك يا فرنكش ... اهلين يا حن...ا.ن كيفك كده ؟؟ كويسه والله الحمد لله انته كيف عامل قلته ليك .. داير أقول ليك شنو...؟ عايني..انت أمير بسافر متين ؟؟؟ امير ؟؟؟!! امير يا فرنكش ليهو سنتين في الهند انته في الحفله بتاعتو ما كنته ماسك البيبسي والعشاء .. بتاع الفنانيين تسالني منو حسع دي ؟؟ مالك يا فرنكش بتتهوزز كده الحاصل ليك شنو؟؟؟؟ لالا بس الحاجات جاطت لي في راسي .. بس انا كنته داير اقول ليك شنو ؟ خلاص يا فرنكش لانو انا ماشا المعهد .إتاخرته طيب اوصلك ؟؟ لالا انا ماشا مع هدي منتظراني .. اها اشوفك متين تاني حنان تلاحظ الربكه في مفردات فرنكش وتتعمد استعراض انوثتها بحقاره بالغه معتمده علي مكانتها المميزة داخله .. هي تخفي اعجابها به .. فرنكش لايقوي علي المواجهه عباس ركس لو عرف نقطة ضعفه ..... لكان ..... مساء شتوي كئيب .. تجمعت كل الرقشات حول البيت بعد رحلة بحث مضنيه .. الأعداد الهائله من البشر المتجمعه حوالين النيل لاتنسي من تضخيم الحدث ..بإضافات خياليه... اطفال الحي اعلنو عزوفهم عن الطعام .. وعن الطابور الصباحي في غياب فرنكش المفاجي .. امه لاتقوي علي شئ ... حنان اكتفت بالصمت ... الصمت .. الصمت . عباس اكثر الوانا ... واكثر احتيالا وخيلا ... يختلط صوته احيانا مع صوت ماكينات عد النقد .. مع اصوات الباعه المتجولين .. اصوات مكبرات الصوت في الحفلات .. عباس في سوق ليبيا امدرمان يمارس مهنته المعهوده تبديل العملات الأجنبيه .. عباس يدخل ويخرج .. رزمه من اوراق البنكنوت .. شنطه .. مسبحه .. جلابية سكروته .. وييييييييييين يا قندولـــي يا مرطب .. والله مشتاق ليك شوق .. انته قايل قدر كيف؟؟؟ منو ( فرنشك ) ؟؟ كرنشف ؟؟ فرنكش .. احمد ده شنو انته مش مته قبل كده؟؟؟؟؟؟؟؟؟؟ انا اموت وين يا حبه .. افوتك ... كده بس ... دي بتجي ... مشيت ناس عمتي في الأبيض .. خريف مبالغه .. مطر ألف .. رطبته لي شهرين .. كدي تعال حاسب خالتك دي ... وادينا سجاره .. وجيب حق الرقشه ... الليله القاعه فيها شنو؟؟؟؟ طيب يا فرنكش مافي مشكلة انا بعمل ليك الحاجات دي كلها بس عليك الله تاني لما تلاقيني ما تقول لي كلامك المقلبن ده لاني ما قاعد افهمو ... وكمان لما تلاقيني قدام بنات ما تقول لي عباس ريكس دي .. قول لي يا عباس ... يا سيد عباس .... انته ما بتعمل ليك حاجه .. وانا كمان بتريحني

ليتك تعود

وتمبس

لحرفتكما القديمة

فلقد كنتما أجمل

حميده

الحكايه دى ليها نهايه والا انتا اقتبستها من مكان تانى
والا شنو الحكايه .. ياخى جهجهتنا عديل كدا
تتصور انا عشت ليك مع ( فرنكش ) دا وازكرت ليك الحله
والحالات المشابهه

ارجوك لا تتوقف ... وواصل

قرجة يا عزيزي ..
نحن يانا نحن .. لا غيرتنا الظروف لا بدلتنا محنة ..
بس ما بنموت بـ( مغستنا ) ..

استاذنا علي بشير ..
هذليات فرنكش كتبها ( تمبس ) قبل ما تقوم ليهو ( جضوم ) ..
ايامها لم يكن يعاني من عقدة ( ادارة الحوار ) ..
فكان جميلا ..
في هذه الاثناء اصبح ( بتاعة ) كدا ..
ينطبق عليها قول ( فلتقل خيرا او لتصمت ) ..
وهسع نحن في الطريقة ( التسكتو ) .. !!

عباس ريكس ( تجسيد واقعي لشخصية عزو شلاقة ) ..
وفرنكش ..
..
..
..

Quote: عباس في تحركاته داخل عوالمه الملئة بالنصب والإحتيال وفي التعامل مع ضحاياه من الشخصيات اللأمعه يستغل كل فرصة للكسب المادي ، كمية من الكروت الشخصية بأسماء والوان مختلفة دفاتر شيكات وهميه بناطلين وفنايل من آخر بيوتات الموضة لاتتوافق مع عمره المتقدم .. يتحول لون الشعر اسبوعيا إلي الأسود الداكن بفعل الأصباغ .. يتواجد عباس عند الأماكن الراقية وعند العودة يحرص أن لايمر عند ذلك اللستك متحاشيا فرنكش الذي أعتاد علي مزاحمته وكشف قناعه المستعار . عباس يعرف أن المرور عبر الشهرة وأرتفاع الأسهم لايمر الأ من خلال فرنكش .. عباس لا يغادر المنزل صباحا الأ عند التاكد من غياب فرنكش ، متعمدا مصادفة طالبات الثانوي عند المحطة الرئيسية وهو أكثر تشبسا بالحياة . صباح الخير يا شباب ..

قال له ذات ( شجن )..
انت غبيان ما بتفكر ..
وصابك الخرف المبكر ..
وانت راكب فوق مسطح ..
وانت عامل زول مفتح ..
انت عيان .. ما نصيح ..

شخصية ( عزو شلاقة ) .. ترتكز علي ( عامل زول مفتح ) ..
رغم ان سياسة ( التفتح ) ترتكز علي ( لا من سمع لا حد شاف ) ..
والزول الحريف ( ما بعملا ظاهرة ) ..
لكن كما يبدو لي ان ( النزعة الإعلامية ) لدي سيدنا ( عزو ) ..
بتبوظ ليهو جانب ( عامل زول مفتح ) ..
علمتني الحياة .. انه ما في حاجة بتدسا ( عاجلاً أم آجلاً ) ..
ومع ثورة الاتصالات .. الحكاية بقت ( صعبة ) عديل كدا ..
و مقولة ( يا حاوي عقدت البشر ) .. اصبحت قديمة وبالية ..
حتي ( ديفيد كوبر فيلد ) .. كشفت برامج ( ما خلف الكواليس ) ..
انه ( زول عادي ) .. ذينا و لجاي ..
وعموما .. خلق الله ضاقت في الارض ..
و اصبح لا يدهشهم شئ ..
حتي لو واحد ركب ( برشوت ) .. ونزل بيهو بين ( البصلة وقشرتها ) ..

فقدان الهوية .. ( الثقافية والاجتماعية ) ..
يجعل شخصية ( عزو شلاقة ) .. شخصية ( متخبطة ) ..
ذي ( غصن البان ) .. يميل مع ( الريح ) حيث شاءت ..
راكب في ( العشوائي ) ومسافر ..
عايش عهد السرمدية ..
لا هو .. من حضر المدينة ..
لا هو .. من عرب الحَنية ..
صورة ذي .. ( نمر الورق ) ..

السؤال هنا ..
هل شخصية ( عزو شلاقة النمطية ) .. معرضة للانقراض ..
أم انها .. تنمو وتزدهر ..
بتحالف صريح مع ( شخصية محمود الكضاب النمطية ) ..
في زمن لا يعترف الا بـ( التكتلات ) ..

بين ( الكضب ) و ( الشلاقة ) .. خيط رفيع ..
رغم ان الغاية ( إعلامية ) في الحالتين ..
لكن ليس بالضرورة ان يكون ( محمود الكضاب ) .. شليق ..
و لكن واقع الحال يجعل ( عزو شلاقة ) .. كضاب ..

يقول ( فطيم ) ..
" إن الشخصية النمطية مهددة بالانقراض في حال عدم توفر مقومات البقاء "

وبنظرة الي واقع الحال .. الذي يعطيك الاحساس بان جواب 1+1=150 ..
وبسبب حالات تضخم ( الأنا ) .. المرتفعة .. كما ( خام برنت ) في البورصات العالمية ..
تجد ان فرصة ( شخصية عزو شلاقة ) .. في البقاء .. تتجاوز مؤشر السوق السعودية قبل ( الانهيار ) ..

هناك علاقة حميمة بين ( شخصية عزو شلاقة ) .. و ( حمار جارنا ) ..
والدليل علي ذلك ..
انه اذا نهقت ( حميرنا ) .. نهق ايضا ( حمار جارنا ) وبدون خجل ..
المشكلة تكمن في عنجهية ( حمار جارنا ) ..
فهو يعتبر نفسه ( الناهق الرسمي ) في حلتنا ..
و يعتبر انه ( صوته ) هو الأعلي ..

عزو شلاقة .. وعلي سبيل المقارنة ..
يشتغل بنظرية ( وفوق كل ذي علمً عليم ) ..
انت بتعرف تسوق ( عجلة ) .. انا بقوم ( سداري ) ..
انت ( بتضقل ) برجلك .. انا ( بضقل ) برأسي ..
انت ( عوير ) .. انا ( عبيط ) ..
انت ضربت تلفون لـ ( هالة ) في ( هولندا ) .. انا ضربت تلفون لـ ( اميمة ) في ( واشنطون دي سي ) ..
وما فيش حد أحسن من حد ..
رغم انه ( هالة ) دي ممكن تكون ( بت خالتك ) .. !!!!!

عزو شلاقة ..
فنان .. رسام .. تقني اجهزة طبية .. اخصائي محاليل وريدية .. مانجلوك .. و فكي ..
وضليع ضليع ضليع في ( الدفاع المدني ) ومنظمات تحرير المراة و ( المسرح ) ..
ولديه بعض الأهتمامات ( العسكرية ) ..
وفي اوقات الفراغ بشتغل ( رائد فضاء ) ..
وتحدث مجتمع المدينة ذات مرة .. بأنه مأخد دورة في ( التكاثر الخضري ) ..
ولديه اهتمامات عديدة .. تندرج تحت بند ( بُص شُوف عزو بيعمل إيه ) ..

علاقات ( عزو شلاقة ) الاجتماعية .. واسعة ..
واسعة جدا .. يعني ممكن تكون أوسع من ( ذمتي و ذمتك ) ..

يا ( عزو ) بتعرف العقيد ( عضلات محمد قنبلة ) ..
ايوه بعرفو ( كان ساكن جارنا ) ..
و كنت مستلف منه ( بازوكة ) .. ذكرتني عشان ارجعها ليهو ..

طيب يا ( عزو ) .. بتعرف ( الدكتور بشتنة حسن بشتنة ) ..
ايوه بعرفو ياخي ( درسني في كلية الطب قبل ما اترفد لمواقفي السياسية ) ..
رغم انه الدكتور دا بالذات .. دكتور بتاع ( لغة عربية ) ..

طيب بتعرف اللاعب ( جكسا في خط ستة ) ..
والله ( جكسا ) ما بعرفه شخصيا ..
بس والده ( في خط ستة ) عليه رحمة الله .. كان صاحب عمي الروح بالروح ..!!!

طيب يا ( عزو ) .. بتعرف ( بـت هوفن ) ..
قصدك ( رحاب ) .. ولا ( الصغيرونة ) .. !!!!

عزو شلاقة ..
انسان ( خدوم ) .. للطيش ..
خصوصا اذا تعلق الأمر بـ( الجنس الناعم ) ..
ولديه ( حيوية ) مفرطة .. مصحوبة بنشاط زائد في ( الطفولة ) ..
يستخدم اسلوب ( الدردقة ) و ( شتيت السكر ) و ( كسير التلج ) ..
بطريقة تجعلك تظن ان لديه ( اختلال في الهرمونات ) ..
وهو ( كتوم ) من الناحية العاطفية .. خوفا من ( الشمار ) ..
وذلك لإخفاقاته المتعددة في مجالات ( جلب الحنان ) .. و ( الونسة الدقاقة ) ..
و يعتبر ( دردقة الحنان ) .. الي أي طرف محايد آخر ..
من الخدمات ( الجليلة ) .. ومن ( طبقات التعامل بين البشر ) ..
مما يضمن له الدخول بين ( البصلة وقشرتها ) ..
وهي متعة تضمنها له ( نستلة ) ..!!

يعتبر ( عزو شلاقة ) خامس ( اجدع ) سبعة في افريقيا ..
بيدقوا ( جرس ) ..
المراتب الاولي يحتلها ( ثلاثة من مصر يا اخت بلادي يا شقيقة ) والرابع ( نيجيري أبكم ) ..
و جرس ( عزو شلاقة ) من النوع ( الرنان ) ..
حتي لو كان ( لا يعلم ) .. ما هو البرنامج الداقين ليهو هذا ( الجرس ) ..
و يحاول ( اقناع ) المشاهدين .. انك علي ( باطل ) ..
يستخدم في ذلك كمية لا بأس بها من الكلمات ( الكُبار كُبار ) ..
البعيدة كل البعد عن الموضوع الأساسي ..
بتكنيك ( كلمة حق يراد بها باطل ) ..
وكان زنقتو شديد .. بقول ليك ( والله اللكشر دا ما كنت حاضره .. كنت غائب ) .. !!!!!

لا أعلم عن ( عزو ) الكثير ..
فهو يتكتم علي شانه الخاص .. او ممكن تقول ما عنده ( صاحب ) ..
مع أصرار شديد من طرفه .. أن يعرف كل شئ يتعلق بك ..
فهو قريب لجميع الاطراف .. مما يتيح له فرصة ( تصدر ) أي موضوع ..
او ( نسفه ) .. اذا لم يستطيع الي ( تصدره ) سبيلا ..
هذه الميزة تؤهل ( عزو شلاقة ) لشغل منصب ( سفير فوق العادة ) ..
لما يتمتع به من ( مرونة ) .. تجعله يتخذ وضعية ( القرفصاء ) في ( فنجان قهوة ) ..!!!
مع أمكانية تغيير رأيه بـ( كبسة زر ) .. كما يقول اخوانا ( الكهربجية ) ..

كالعادة .. سيقول أحدهم ( البوست دا مكتوب لمنو ) ..
كما حدث في ( بوست محمود الكضاب ) ..
فعلي من يأنس في نفسه الكفاءة .. ويجد هذه الصفات فيه ..
التقدم الي مكاتبنا .. شارع القصر بجوار سينما كلزيوم ..
وعلي مشاهدينا في الاقاليم .. التسجيل لدي اللجنة الشعبية بالمحلية ...
والله ولي التوفيق ..


الي الآن لدينا ( متقدم ) واحد ..
يصر و ( بشدة ) ان هذا البوست ليهو ..
ودا زاتو نوع من ( الشلاقة ) ..
سنعلن فوزه بـ( الاجماع ) السكوتي .. اذا لم يتقدم ( شليق ) آخر في الفترة المحددة ..

تابعونا في الصحف اليومية ..

Quote: طيب يا ( عزو ) .. بتعرف ( الدكتور بشتنة حسن بشتنة ) .. ايوه بعرفو ياخي ( درسني في كلية الطب قبل ما اترفد لمواقفي السياسية ) .. رغم انه الدكتور دا بالذات .. دكتور بتاع ( لغة عربية ) .. طيب بتعرف اللاعب ( جكسا في خط ستة ) .. والله ( جكسا ) ما بعرفه شخصيا .. بس والده ( في خط ستة ) عليه رحمة الله .. كان صاحب عمي الروح بالروح ..!!! طيب يا ( عزو ) .. بتعرف ( بـت هوفن ) .. قصدك ( رحاب ) .. ولا ( الصغيرونة ) .. !!!!

حميدة إزيك
شكلك البوست ده كاتبو من زمان وإلا فأين كل هذا الزمن الذي وجدته لكل هذا التفصيل العجيب !!
بعدين تعال هنا في زول في الدنيا فيهو الحاجات دي كلها ؟؟؟؟؟؟؟؟؟
ياخي ده بكون في المريخ بس ؟ أو في حتة كده فيها حياة بس ما عندنا بيها خبر !!!!
الله يجازي محنك

ما عارف لكن الشخصية دي ما غريبة علي ...

الكلام ده في امدرمان يا حميدة ..

عمـــران ..

Quote: بعدين تعال هنا في زول في الدنيا فيهو الحاجات دي كلها

الشخصية النمطية .. تراكم سلوكيات عدة افراد في حقب مختلفة ..
ربما تمتد السلسلة الي اربعين شخصا ..
عملاً بالمثل القائل " يخلق من الشبه أربعين " ..
يضيف عليها كل شخص في هذه السلسلة شئ من روحه ..
مع بعض " المبالغة " وشوية " توم وشمار " من أجل النكهة ..
ومثال علي ذلك شخصية " جحا " .. رغم وجود أصل يمكن الرجوع أليه ..
ألا أن الشخصية اصبحت " نمط " لسلوك معين .. واصبحت شخصية " عالمية " ...

في العرف السوداني .. " محمود الكضاب " .. و " أب الصلعة المخلوع " ..
و " عشة أم رشيرش " و " ابراهيم الفلتة " و " النملة الشفوقة " .. و " اب كوكا ناس الغرب يبكوكا " ..
والكثير من المسميات الدارجة في الحياة اليومية ..
طيب معشر الشخصية السودانية .. يجعلها تقوم بتفريغ الشحنات السالبة الي " نمط هزلي " ..
يسهل معه تقبل هذا السلوك ..



خارج النص
للشخصية السودانية ايضا مقدرة علي تفريغ مضمون اي حاجة ما تعجبها ..
وكمثال الشارع المسمى " شارع عبيد ختم " ..
و مع تردي الحالة الاجتماعية والاخلاقية في السودان .. والحنق علي حكومة الجبهة ..
اصبح اسم الشارع .. " شارع عبيد ختف " ..!!

ياحميدة سلام
قالوا الشلاقة عاقة
مش كدا

Quote: الكلام ده في امدرمان يا حميدة ..

يا سوباجو ..
في " امدرمان " و " القضارف " و " رهيد البردي " ..



ريحتك مش كدا ..!!

up

حميدا والله لاكين شغلك نضيف واسلوبك ممتع ..

.
.

بس مخاشنتك مع الاستاذ مهدي الصادق دي كتيرة شوية ..

منير ..
صورتك شديدة ..
قرأت البوست عدة مرات ولم أجد ..

Quote: مخاشنتك مع الاستاذ مهدي الصادق

ولم أجد ..

Quote: الاستاذ مهدي الصادق

Quote: طيب يا ( عزو ) .. بتعرف ( الدكتور بشتنة حسن بشتنة ) .. ايوه بعرفو ياخي ( درسني في كلية الطب قبل ما اترفد لمواقفي السياسية ) .. رغم انه الدكتور دا بالذات .. دكتور بتاع ( لغة عربية ) .. طيب بتعرف اللاعب ( جكسا في خط ستة ) .. والله ( جكسا ) ما بعرفه شخصيا .. بس والده ( في خط ستة ) عليه رحمة الله .. كان صاحب عمي الروح بالروح ..!!! طيب يا ( عزو ) .. بتعرف ( بـت هوفن ) .. قصدك ( رحاب ) .. ولا ( الصغيرونة ) .. !!!!

الله يجازى محنك يا حميده

علي بشير ..
النوعية دي موجودة ..
وفي ( أكعب ) منها ..
النو%D

علي بشير ..
النوعية دي موجودة ..
وفي ( أكعب ) منها ..
النوع الممكن يغالطك في اسمك ..
إدعاء المعرفة .. يدخل بين البصلة وقشرتها