كيكى و يا ناس ال Fluid Dynamics مسـاعـدة عاجلـة - يوجد رسـم توضيحى.

فى الرسمـة الفوقانيـة، الموية أبت ليهم تمشى فى الماسـورة الصغيـرة B مع أنو الباب ليها مفتوح.
تصميم مافى زين..
قاموا غيروا التصميـم للصـورة التحتانية لكن لسـع ما نفذوه لأنو ما عارفين المويـة حتمشى فيها واللا لا.
الســؤال هل الموية حتمشى خلال الماسـورة الصغيـرة A فى الصـورة السفلى؟ وما هى المعادلـة بالنسبـة لإنسياب الماء
فى كل منهمـا.
أنا منتظر أركب جهاز الكترونى بعـد أن يخلصوا من العمليات الأرضيـة دى.

شكـراً

هلا يا هندسة..
وجبت الليلة حكاية دايرة ليها تفكيك ميكانيكي فلويدي تقيل..
وكدي نحاول ندفر معاك في الموضوع شوية..

طبعا النموذج الاول بتاع التصميم ظاهر تماما بان السريان بتاع المياه في الماسورة الفوق ضعيف جدا ..
فحركة السوائل في الانابيب تحكمها اشياء عديدة اهمها اختلاف الضغط وسرعة السائل في الانبوب والانبوبة الصغير يطل في اتجاه عمودي لحركة السائل وفي الجزء الاعلي الذي ايضا به ضغط اقل من الجزء الاسفل
(حركة السائل راسيا له الية اعتقد بانها الصغط الازموزي نحتاج ايضا ان نري امكانية حدوثها هنا ام لا)..

وفي النموذج التاني المياه حتمشي في الماسورة الصغيرة (A) ولكن الاشكال هل حتمشي في الجزء الاعلي ان كانت حوجة لذلك حسب التصميم..
وحتي حضور اهل الساس والراس سنحاول معاك نفكك ونشوف عمنا برنولي نظر في حركة السوائل في الانابيب وقال شنو..
وبجيك بالخبر اليقين

,

يا أبو الريش

للإجابة على سؤلك لازم نعرف ال pressure بتاع السائل

واعتقد يا كوستاوي ايضا بالاضافة الي الضغط لو ادانا ملمح عن اقطار فتحةالانابيب ومقاسات عن الارتفاع الراسي للماسورة الماشة في الي اعلي القصة ممكن تساعد ..بالاضافة الي المقاسات الطولية لمسار الانابيب الافقية..

يا كيكي
طبعا في variables كتيرة
أبو الريش داير يخمنا ساكت
قايل الحكاية مواسير و ربيط

والله مافاهم التكتح يا شبـاب ..

لكن:
خير .. إن شاء الله حاجاتكم دي تتصلح ..


كان في طريقة دخلونـا معاكم في الماسورة ..
اقصد في الصورة ..

p\d+.5v+gh=p\d+.5 v+gh
p=الضغط
d=كثافه السائل
v=سرعه السائل

g=عجله الجاذبيه
h=ارتفاع المقطعين عن مستوي اسناد واحد

غايتو يا كوستاوي وتمبس
ابوالريش ده عاوز يتخارج من الشغلانة دي ويركب الجهاز الالكتروني بتاعو
ولو لقي طريقة حيدفرها دفرة

الفوق ده يا ابو الريش ده قانون جدنا برنولي لسريان السوائل
والشغل كلو ما طالع من هنا بعيد..
ولو تلاحظ الموضع فيهو عوامل كثيرة الجاذبية ذاااتها لقت ليها حتة

ولكن موضوعك عن ماسوريين وهنا الموضوع دايرة دفارت وتوضيحات(الصادق المهدي مش قال توضيحاتها)
اها احنا بنكون عاوزين كمان توضيحات عشان جاي جاي ندقر ندقش في السالفة دي...

لكن عندما يتنقل سائل من انبوب ذو قطر اكبر الي اقل القصة بتكون سالكة والضغط بالتاكيد بكون مية مية..
ولكن في حالتك دي البشطب الراس هو امكانية السريان في الجزء (ب) الاعلي
دي دايرة ليها دفرات منك بتاعة معلومات قياسات زي ما قال كوستاوي..

الأخ عبد الكريم بالإضافة لضغط السائل و معامل لزوجته Viscosity و أقطار المواسير هناك سؤال مهم هل هذا المخطط يا أبو الريش يمثل منظر من أعلى Plan View أم منظر من الأمام Front View؟ لأنو شايف عبد الكريم برجح الاحتمال التاني و أنا عندي إحساس إنك قاصد الأول.

Quote: أعلى Plan View أم منظر من الأمام Front View؟ لأنو شايف عبد الكريم برجح الاحتمال التاني و أنا عندي إحساس إنك قاصد الأول

كلام وجيهة تماما ياالعوض..وفي الصميم
وانا رحجت ان المقطع FRONT لاني حاسي انو القصة فيها حاجة عويصة كده ما مفهمومة وين..
ولكن يا باشمهندش سوالك في السلك والصميم....
ورغم انو يا العوض لو من (اعلي الموضوع) بكون في اغلب الاحيان اشكال بتاع ضغط..في النموذج الفاشل الاول..
اما المقترح التاني برضو القصة بتخش في روية و كلام تاني جديد..

Quote: هل هذا المخطط يا أبو الريش يمثل منظر من أعلى Plan View أم منظر من الأمام Front View؟

الكلام Elawad صحيح لازم نعرف المنظر شنو

Quote: لأنو شايف عبد الكريم برجح الاحتمال التاني و أنا عندي إحساس إنك قاصد الأول

الاحتمال التاني هو الارجح...لانه لو كانPlan View كانت المويه مشت فى الانبوب B , ما لم يكن الانبوب B مصنوع من ماده معامل الاحتكاك بتاعها كبير جدا جدا جدا بالنسبه لمعامل الاحتكاك فى الانبوب A
عشان نقول ليك المويه دى ح تمشى ام لا. لازم نعرف هل هى مويه شراب ام مياه مجارى ???(عشان نعرف خواص الماء).
هل المساوره تحت ضغط و لا المويه ماشه با لجازبيه الارضيه.
و اهم من كده ,المويه قدر شنو ? the flow بوحدات حجم و زمن .
و اقطار المواسير A & B
و الماده المصنوعه منها المواسير

http://en.wikipedia.org/wiki/Bernoulli's_principle

Kostawi
ده مش شغلك ??..مش عندك PE و حليت مسائل ذى دى لما قلت كفى???
الموضوع ما محتاج H2Onet

يا كوستاوى ما تاخذنـا بالله، أنا كنت أدك حصـة الجغرافيـا دائمـا.

الأخوة الأفاضل كيكى وكوستاوى و تمبس والعوض،

شكـرا لكم على تفضلكم وإقتطـاع وقت من زمنكم الغالى.

يا العوض السـائل هـو الماء.. فى درجـة حرارة حوالى 50 الى 60 مئويـة.
الصـورة الفوق مصـورة من الجانب، والتحت مصـورة من فوق. يعنى الماسورة الكبيرة تحت راقـدة.

بعدين يا كوسـتاوى الضغط متغيـر من صفـر الى قوة الطرمبـة النهائيـة (حأشوفها كم) فلو شفت لى
كيرف يسـاعـد كتيـر.

أنا هسى بصورة محددة داير أعرف هل المويـة ممكن تمشى نظريا فى الماسورة الصغيـرة تحت أى ضغط.. ليس مهم
كمية المى البتمشى فيهـا، لأنو فى الماسـورة الفوق مافى ولا قطـرة بتمشى تحت كل الضغـوط!! لو بتمشى
حأواصل فى تركيبو باقى الأخبار حيجيبهـا الجهاز وبرنامج الكمبيوتر.. (والحسـاب ولد)

ودمتم جميعـاً.

تمبس،
شكــرا على المواســاة.

Quote: أنا هسى بصورة محددة داير أعرف هل المويـة ممكن تمشى نظريا فى الماسورة الصغيـرة تحت أى ضغط

بتمشي يا ابو الريش
لانو الموية جاية من منطقة ضغط اعلي وماسورة قطرها اكبر الي ماسورة ذات قطر اصغر
ولا اعتقد بان هنالك شي بخلي الموية ما بتمشي,,

اذا اعتبرنا معدل دخول الماء Q1
ومعدل خروج الماء Q2

حسب قانون Q1=Q2 , CONTINUNITY EQUATION
سرعة و مساحة الانبوب A, Va, Aa

سرعة و مساحة الانبوب B, Vb, Ab
There fore VaAa+VbAb = Q1=Q2

There is no friction losses due to elbows or ######### that be cancelled out

يا أبو الريش
بالبلدي كدي و بالجربندي ال Detail الأول الفوق الماسورة الضعيفونة ما ح تجري فيها الموية بل ح يكون فيها موية ثابتة و هواء مزرور و لو فتحت الأنبوبة بمسمار حيطلع الهواء وح تجري الموية.


الرسم التحتاني
أيوا الموية ح تجري في الماسورة الصغيرة و لكن ح يكون في تفاوت في الضغط بجانبي الماسورة عشان كدي قلنا ليك الضغط عامل أساسي

داير شغل جربندي و أديناك ليه

الأخوة الأفاضل.. هـذه صـورة أدق للمواسيـر.

Quote:

شكـرا يا كوستـاوى ومن بكرة حأقول ليهم ينفذوها.
الموضوع هـو flow sensor، وليس flowmeter ، لذلك زى ما شـايف بسيـط.


شكرا لكم جميعـا.. وخصوصـا الأخت سمارتأنا التى تفضلت بالتعليق أيضـا.

we need

moody diagram

to find

some parameters

يا ابو الريش حمد الله علي السلامة ما دام خلاص حتركبوا
وبمناسبة الحساب ولد دي..
فانا كزول قاعد معاك في الدوحة بكون مكلف بحكم القانون الامريكي والكندي اني استلم حقوق الاخوة المهندسين والاخت اسمارتنا...
ولو دايرين حفر للبايب ده او عاوزين نتقلو لحتة تاني برضو جاهزين كمساحين

Quote: وبمناسبة الحساب ولد دي.. فانا كزول قاعد معاك في الدوحة بكون مكلف بحكم القانون الامريكي والكندي اني استلم حقوق الاخوة المهندسين والاخت اسمارتنا...

إنت مافى زين


خلاص.. بكرة انت يجى سـوى ترتيب مال ماى.

khaleel

Quote: we need moody diagram to find some parameters

و ده moody diagram عشانك ...





عبدالكريم
سلامات يا بشمهندس...للشركه اللى انا شغاله فيها مكتب فى الدوحه..
ارسل ليهم اقول انا قدمت استشاره لشركه "ناس Abureesh"...بكره دى يرسلوا ليهم الفاتوره.

Quote: عبدالكريم سلامات يا بشمهندس...للشركه اللى انا شغاله فيها مكتب فى الدوحه.. ارسل ليهم اقول انا قدمت استشاره لشركه "ناس Abureesh"...بكره دى يرسلوا ليهم الفاتوره

هلا يا باشمهندسة
ومادام القصة حتكون عبر الشركات شركة ابو الريش شكلها كده حتتعب..فانا اخلي شركتي الهنا(طبعا لانها ست بلد) تشيل من شركة ابو الريش وترسلها لمكتبها في بلدكم ديك وديلك يدوها لشركتك يد في اليد....

وشايفكم جبتو سيرة (PE) البروفيشنل انجنير..الشهادة مكسرة فينا ضلوع كثيرة فياريت تدونا لمحة عنها شوية كده باقي احنا في المساحة عندنا واحدة اسمها (PS) لا تختلف عنها كثيرا ....
وما دام ابو الريش ده خلاص قصتو بقت قصة تجميع قروش الموضوع هين
كدي خلونا في البي بي سي دي..

الحمـد لله الما عندكم فروع فى الصين!

كيكى وسمـارتأنا..
الشغل دا لشركتى فى الصين، أنا هنا كونسلتانت بس. Independant contractor

بعدين شـوف سمارتأنا الجاية لافحـة ليهـا كيرفات من وين ما تعرف، وعايزة تعمل بيهم
حركات الســودانيين فى دلالـة العربات!

الموضوع دا يا كيكي حلاه كوستاوى بنظرية د. جربندى Garabandi Transformations

وجاب قانون ميرفى رقـم 17، البيقول إنو لو فى ماسورتين، الصغيـرة دغريـة، والكبيـرة
لافـة حولها، فإن السـائل يمشى برضو فى الصغيرة.

Murphy's Law # 17
If water can go in a small pipe, it will go

هلا يا ابو الريش..
والله انت وكوستاوي اتلومتو مع ميرفي حنانيا ده.
يعني حسع المصاري الصينية دي حتمشي لكوستاوي والكيرفات والبايب الظهري الفوق داك يروح شمار في مرقة..
يازول هوووي القصة دي كده ما بتمشي يا ابو الريش..
انا غاتيو عندي النص والباقي انت وكوستاوي اتصرفوا فيهو بمعرفتكم

Abureesh

Quote: الحمـد لله الما عندكم فروع فى الصين!

كيف الكلام ده???
معقوله بس شركه هندسيه امريكيه كبرى و ما يكون عندنا مكاتب فى الصين و الهند و العراق كمان ??
احنا Global company ...Corporate America....طالعين واكلين ...نازلين واكلين

ال PE امتحان ساهل ...لو قريت ليه...بيسالوك عن اى حاجه ليها علاقه بالهندسه انت درستها او سمعت بيها. فى الCivil بيسالوك من فلويد عكود لحدى سنترى خدام مرورا بزروق و عبد النبى ,و "اسم النبى صاينو و حارسو " عبد الله ابراهيم.
الامتحان open book بس الزمن ضيق جدا...جدا.
ده اذا كنت عايش فى اى ولايه امريكيه غير طيبة الزكر "كلفورنيا". لو كنت تعيس الحظ و عايش فى كلفورنيا و كمان مهندس مدنى...فانت من المغضوب عليهم. عشان يدوك PE لازم تمتحن بالاضافه لامتحان اعلاه " اللى هو بالمناسبه 8 ساعات" لازم تمتحن امتحانيين اخرين .و احد بتاع زلازل ..و التانى ....Surprise
اه... قصدى مساحه...و بتاع المساحه اجارك الله....قاااسى.
و بعد العذاب ده كلو كل البحصل انهم ح يختوا ليك PE فى كرت العمل....بس

OPEN BOOK دي احسن خدمة يقدموها لزول خبير ترس وبلقطها وهي طايرة..
وبتاع كلفورينا ده اتخيل لي مع ناس السفل بكون واقع في جرح لانهم بكونو عارفين المساحة والجيولوجيا برضو بكون عندهم شوية رقشة كده..
لكن كرت العمل بس ده الكلام المش كويس..لانو القصة بالاضافة للفوائد المهنية اتخيل لي الدولار برضو مهم
شديد في الهيلمانة دي كلها...
لاني لاحظت في معظم الوظائف الفي امريكا خاتين البي دي...
تقصدي يا باشمهندسة ماعندها ثاتير علي نوعية الوظيفة قروشها,,,؟؟

عبدالكريم و ابو الريش
كستاوى ده شغال فى الحكومه..."اظنوا" ...متعودين على الشغل الملح " لما يشتغلوا" ....و لما يكون عندهم شغل بالجد بيدوه اللشركات الاستشاريه

عبدالكريم

Quote: OPEN BOOK دي احسن خدمة يقدموها لزول خبير ترس وبلقطها وهي طايرة..

فى ناس بتجى الامتحان بشنطه سفر مليانه كتب...لكن المشكله فى الزمن الضيق جدا.

Quote: وبتاع كلفورينا ده اتخيل لي مع ناس السفل بكون واقع في جرح لانهم بكونو عارفين المساحة والجيولوجيا برضو بكون عندهم شوية رقشة كده..

السفلنجيه ناقشين مساحه...لكن فى حجات كتيره خاصه بنظام المساحه فى امريكا و القانون بتاع ممارسه المهنه...و هنا بتجى المشاكل
الجيولوجيا مكسب ما فيها مشكله

Quote: لكن كرت العمل بس ده الكلام المش كويس..لانو القصة بالاضافة للفوائد المهنية اتخيل لي الدولار برضو مهم شديد في الهيلمانة دي كلها... لاني لاحظت في معظم الوظائف الفي امريكا خاتين البي دي... تقصدي يا باشمهندسة ماعندها ثاتير علي نوعية الوظيفة قروشه ا,,,؟؟

الامريكان المستهبلين لما تجى تشتغل فى شركه "و يكون عندك خبره" يشبكوك PE.
انا اشتغلت معاهم "صغيره و جاهله" ...لما عملت الPE "كنت شغاله لى سنتين".. قاموا ذادوا لى الماهيه 1%...ايوه "ده ما خطا مطبعى" ...واحد فى الميه.
و كتر خيرهم .. غيروا لى كرتى

Quote: عبدالكريم سلامات يا بشمهندس...للشركه اللى انا شغاله فيها مكتب فى الدوحه.. ارسل ليهم اقول انا قدمت استشاره لشركه "ناس Abureesh"...بكره دى يرسلوا ليهم الفاتوره.

شكـرا يا باشمهندسـة..

إستشـارتك ياهـا الستـارة دى؟

Quote: إستشـارتك ياهـا الستـارة دى؟

والله يا ابو الريش انت نفر مافي زين..
ياخ الهندسة دي ما قصرت ودايرة تسوق الكورة بطريقة علمية مش زي زولك الجربندي بتاع الحكومة داك
الاسمو كوستاوي ده

Quote: ياخ الهندسة دي ما قصرت ودايرة تسوق الكورة بطريقة علمية

عارف وبينى وبين نفسى شـاكر ومقدر..


لكن هى دايرة ترسل لى فواتيـر بطريقـة علميـة برضو!

Abureesh

Quote: إستشـارتك ياهـا الستـارة دى؟

طبعا....الستاره دى كما قريت Fluid mechanics, ما تعرف تعمل بيها شنو..
انت زول Independant contractor و اكيد عارف الاستشاريين بيسرقوا الناس كيف

عبدالكريم ...شكرا على الدعم المعنوى

Quote: الامريكان المستهبلين لما تجى تشتغل فى شركه "و يكون عندك خبره" يشبكوك PE. انا اشتغلت معاهم "صغيره و جاهله" ...لما عملت الPE "كنت شغاله لى سنتين".. قاموا ذادوا لى الماهيه 1%...ايوه "ده ما خطا مطبعى" ...واحد فى الميه. و كتر خيرهم .. غيروا لى كرتى

يعني القصة طلعت زي امتحان الفيزياء في الشهادة السودانية زمان
يشبكوك الفيزياء -الفيزياء صعبة- ونفسك يكون قايم السنة كلها ولمن تجي الامتحان تلقي القصة ممكن تتباصر وبشوية رجفة..
ناسكم ديل بتاعين محن وتفاصيل كثيرة خلاص 1 في المائة بس بعد التلتلة دي..


وابو الريش شكلو كده خبير مناقصات وعندو مقدرة في قصقصة اجنحة المقاول حتي لو جاب كيرفات في شكل ستارة

ما عارف يا سمارت موضوع الامتحان دا لكل المتقدمين ولا للناس الشهاداتهم ما أمريكية؟
هنا في كندا يسموها PEng و شروطها عموما بكالريوس في الهندسة و خبرة أربعة سنوات منها سنة على الأقل لازم تكون خبرة كندية. لو اليكالوريوس ما من جامعة كندية أو من دولة بينها و بين الجمعية الهندسية في الولاية المعينة اتفاقية (عندنا في ولايتنا مثلا بقبلوا شهادات دول زي أستراليا و نيو زيلندا) غي الحالة دي الواحد يخش في موضوع امتحانات و ورطات زي دي. لكن إذا الواحد جا و عمل ليهو شهادة كندية فوق الجامعية بتخارجو من الامتحانات. بالنسبة لتقرير الخبرة لازم يغطي أربعة حاجات:
Part 1 - APPLICATION OF THEORY و يشمل:
Analysis
Design and synthesis
Testing methods
Implementation methods
Part 2 - PRACTICAL EXPERIENCE و يشمل:
Studying or being exposed to existing engineering works
Application of equipment in larger systems
Limitations of practical engineering
Significance of time
Part 3 - MANAGEMENT OF ENGINEERING و يشمل:
Planning
Scheduling
Budgeting
Supervision
Project Control
Risk Assessment
Other
Part 4 - SOCIAL IMPLICATIONS OF ENGINEERING و يشمل:
The value or benefits of engineering works to the public
Safeguards
Engineering activity and the public at large
Interest and involvement in the broader social implications of engineering
Significance of regulatory agencies
طبعا ما بالضرورة الخبرة تغطي كل الفروع في المجالات الأربعة دي لكن لازم يكون في خبرة مقبولة للجنة التسجيل في كل مجال من المجالات الأربعة. و زي ما قالت اسمارت ماديا ما بتغير كتير لكن نظام حروف تزيدها في الكرت بتاعك و كدا.

ما عارف ليه الشـركات بقت تفضل توظيف الكونتراكتور بدل الموظف الرسمى.
زمان قدمت لوظيفـة QA engineer أعلنتهـا واحدة من شـركات توظيف الأى تى، وعملت الإنترفيو بالتلفون من تكسـاس
وكان التيم ليـد العمل إنترفيو فى النمسـا!! المهم بعـد سـاعـة من الإنترفيو أتصلت بى شـركة التوظيف
وقالو إنهم أدونى الوظيفـة المقدم ليهـا بتفس المبلغ الذى طلبته.. وعلى أن أمر علي (مكتبنـا) فى
أورلاندو، فلوريـدا، قبل المواصلـة للشـركة (عشـان يدونى تنوير، و الأهـم، شيك ال (relocation).. بعد وصولى
لأورلاندو حتى عرفت إنو الشركة الحأشتغل فيهـا هى IBM فى وست بالم بيتش، WPB, Fl.. وعملوا لى غسيل
مخ، إنو أنا شغال موظف عندهـم، ما مع IBM وشيكى الأسبوعى حيجينى منهم.. باعونى ب70 دولار فى السـاعـة
لأى بى أم، وشـالوا قريب من نصهـا.
لما جيت مكاتب الشـركة فى WPB، لقيت كل ناس الكيو أيه عبارة عن كونتراكتورز، بل معظم المطورين أيضاً.
هنود صينيين عرب سرلانكيين.. وهلمجرا.. الككونتراكتورز، بالرغـم من مواهيهم أكبر من ال IBMers، إلا أنهم
لا فوائـد بعـد الخدمـة لهم.. مافى معاش مافى تأمين صحى مافى أى شئ.. بس ماهيتك دى وتتخارج..
شغل W2. وبرضو الوظيفـة محددة بزمن معين، إلا لو المشـروع جـر مثلما كانت الحالة عندنـا، وناس الكيو أيه
من الكونتراكتورز دائمـا يطلعـوا ليك شغل المطورين كلام فارغ، يرجعوه ليهم كل أسبوع مع تقرير الأخطاء
(الشنيعـة) والتى لا يرتكبهـا تفل!! أذكر مـرة مدير المشـروع عرض علينـا حافز يومين ما نجى الشغل،
أو يدفع لينـا حقهم لو جينا ويعتبر أوفرتايم، لكل ََِQA يستطيـع إكتشـاف 3 أخطاء من نوع severity 1
وأذكر واحـد مهندس من أستراليا رفع التقرير بتاعو ب 8 أخطاء S1!!.. ولا واحدة من ديل طلعت حقيقية
وإستطاع المطور أن يدافع عن عمله.. وبعد يومين شـالو صاحبك.

شخصيـا أفضل الكونسلتنج وال independant contractor على الوظيفـة التقليديـة.

Elawad
سلامات
مابيعفيك من الامتحان ده الا الموت ..."و اظن لو اشتغلت فى المجال الهندسى المعين لمده 18 سنه". و طبعا بتكون شينه فى حقك لما ما تمتحن وسط زملائك فى العمل. نفسيا كده لازم تمتحن ..مع انك لو نجحت ما ينوبك اى حاجه فى الشغل . على الاقل لو كان شغلك ذى شغلى . لكن لو كنت مهندس بتعمل تصمييم, ال PE هو الرخصه بتاعتك عشان تعتمد التصاميم. ذى الرقم الهندسى فى السودان.
لازم تستعمل الختم بتاعك " فيه رقم و تاريخ ال PE بتاعك" و تختم به التصاميم "لمواسير, كبارى , بيوت اى حاجه بعدين بيبنوها ". و لو ختمت ليك تصميم و طلع اى كلام ممكن تخش السجن. يعنى الموضوع فيه تبعات قانونيه. و لازم اى زول يمتحن حتى لو عامل دكتوراه فى امريكا و كنت امريكى " ود قبائل".... لازم تمتحن.
اما ملى الفورمات للامتحان فده براه امتحان..و عشان تتاهل للامتحان لازم تكون شغال مع اربعه ناس عنهم PE لمده سنتين لو عندك درجه عليا" ماجستير او دكتوراه" و ما عارفه كم سنه لو كان عندك بكلوريوس بس. بس سنوات البكالاريوس برضو محسوبه كخبره.... الموضوع معقد جدا
و ده المقرر لواحد من امتحانت الهندسه المدنيه:
http://www.ncees.org/exams/professional/pe_civil_water_...ental_exam_specs.pdf
و دى لنكات اخرى مفيده
http://www.ncees.org/exams/formats/
http://www.ncees.org/licensure/licensure_for_engineers/
http://www.engineeringlicense.com/peexam/

...

... ابو الريش و البقيه .... سلامات..
... ابو الريش ...( اللهم اجعلو خير)...
... ياخوي داير تعملو المويه بنظام الجمره الخبيثه...
..(نظام الدفع المقدم)...بسنسركم ده.. زي الكهرباء و الا شنو؟؟؟؟

الأخت اسمارت
تحياتي
والله كان كدا السيستم في كندا أرحم. يعني انا عشان آخد الـ PEng ما احتجت لأي امتحان بخلاف امتحان أخلاقيات و قوانين المهنة و دا طبعا إلزامي لكل من يريد أن يحصل على الـ PEng. بالنسبة للختم و ضرورة وجوده في التصاميم و حتى التقارير الهندسية و المسئولية المترتبة عليهو فنفس الحكاية هنا. وأي مخالفة ممكن تترتب عليها محاكم أو على الأقل محاسبة مهنية حسب نوع المخالفة. هنا الواحد بحتاج يشتغل تحت إشراف PEng خلال سنين الخبرة المطلوبة. بالنسبة لي شغلي ما بتضمن تصاميم أو رسومات أو حتى تقارير فنية فبتيقى الحكاية إنو الواحد مسجل و خلاص.
في مداخلتي الفاتت نسيت أضيف الجزء الخامس في تقارير الخبرة و هو:
Part 5 - COMMUNICATION AND WORKING SKILLS
و إمكن دا ناتج من إهمالنا الشديد للناحية دي في السودان و الناس ديل صراحة فايتننا فيها. عشان كدا الواحد فيهم ممكن بكل بساطة يعمل من الحبة قبة.

Quote: (نظام الدفع المقدم)...بسنسركم ده.. زي الكهرباء و الا شنو؟؟؟؟

الأخ هولوى،

شكـرا على المرور..
الموضوع هـو لحل مشكلـة الكسـر (كسـر المواسيـر).. وطبعـا فى حلول كتيرة فى السـوق لكن نظامنا
دا أفيـد منها!

Elawad

Quote: والله كان كدا السيستم في كندا أرحم.

امريكا دى حاجه فيها وجع قلب.. بس نقول شنو ؟ المعايش جباره


Abureeshل

Quote: ما عارف ليه الشـركات بقت تفضل توظيف الكونتراكتور بدل الموظف الرسمى.

الشركات الكبيره دى لو لقت ليها فرصه توفر 10 دولار ...بينتهزوا الفرصه دى
بس الموضوع ده بيعتمد على نوع الشغل. مثلا فى الشغل اللى انا بعمله مهم جدا عامل الزمن...بعينوا الناس اول ما يتخرجوا من الجامعه و بيربوهم فى الشركه. بعد اربعه سنوات خبره بتكون عرفت جغرافيه و تاريخ المنطقه ..العملا المهمين ...و الحاص شنو فى السوق..و بالتالى بتزيد قيمك.

Quote: الموضوع هـو لحل مشكلـة الكسـر (كسـر المواسيـر).. وطبعـا فى حلول كتيرة فى السـوق لكن نظامنا دا أفيـد منها!

و الله ما شاء الله marketing تمام التمام لشركتكم

هلا يا ابو الريش والعوض واسمارت والجميع..
وبالجد يا ابو الريش
شكرا لذلك البايب الذي جعل من هذه اللمة ممكنة...
والناس ديل جابو كلام بالجد الواحد كان محتاج لتنوير فيهو عشان يعرف (ايش لون)..
وسنواصل

You guys dont have a CFD software ? , Just plug it and run it

Without two main variables , no one can assist I guess , pressure and tube diameter. Since thefluid is water , we know the other variables and we can take generic friction variable assuming tube is made of steel.

Buttom line , pressure and diameter and you are good to go .....

عوووووك
و الله إنتو ناس ما عندكم شغلة
إنتو الوقت دا بتجيبوه من وين?

حبة موية جارية تجهجهكم قدر دا?

و جماعة فنجطوا و جابو ال PE و PEng و PMP و هلم جرا

smart_ana دي ماركة مضروبة و ليس لها أي أساسة من الصحة.

يا أبو الريش هل قابلت آفو صحبي ولا لسع.

كيكي
سلملي على الجرجير يا وريف

يلا فرقعوا

سلام يا باشمهندس بدالدين محمود

رجعتنى لمكتب كوستـاوى.. طيب دى المعلومات العندى:

The big pipe is 3" and it is made of PVC

the small pipe is 3/4" and made of brass. it's length is very short though.. only 20" long

The pump preasure is 5 psi (bar).....!1

As mentioned, I am more inerested in the flow and not much in it's values, because I want to detect leaks

شكـرا مرة أخرى

أبو الريش
يعني عاوز
to detect the leak by montoring the pressure

يعني رجعت لكلامي بتاع ال pressure

ما تخاف ما ح نسرق ال design بتاعك دا

بس سؤالى ليه إستعملت ال PVC pipe مع ال copper pipe

يعني ملاح خضرة بالفسيخ
طبعا ح تقول لي ال PVC خفيف و رخيص

عالم غايتو

كوستـاوى،

thanks for the tip

will try distributed pressure gauge system

عليك الله يا كستاوى انا بجيب الوقت ده من وين و لا انت ؟؟؟

ده تاريخ اشتراكى فى البورد ده :

تاريخ التسجيل: 17-04-2002
مجموع المشاركات: 1175

و ده تاريخك انت :

تاريخ التسجيل: 04-02-2002
مجموع المشاركات: 11652



خلاص ..اها....فرقعنا

ya
smart_ana

لا لا ما بعدوها كدا

عدي عدد الحروف
أنت كتبتي تلات بليون حرف
و أنا كتبت إتنين مليون حرف

كمان جابت ليها إستكرات!!!

Quote: والناس ديل جابو كلام بالجد الواحد كان محتاج لتنوير فيهو عشان يعرف (ايش لون)..

شكرا ليك يا عبد الكريم... و دا كان الغرض من الكتابة عن الـ PEng. لو داير ليك معلومتين تلاتة عن الـ PMP برضو حاضرين بهزر بس عارفكم مقطعين المعلومات عنها.

هلا يا العوض
ومنكم نتعلم
وانتو شقيتو البلد وقالو شقة البلد (تفتيحة)..

وكوستاوي الفيك اتعرفت
شابكنا جرجير جرجير وانت بهناك كاتل المواسير وخامي الدولارات
وكمان القصة فيها (بي اي) ولا (بي بي سي) ماعارف......
...
ابو الريش ضروري كمان تدينا الاخبار من ساحة تركيب البايب يمكن كلام كوستاوي ده يطلع
اشاعة ساكت ويكون خم الدولارات الشافتها عيني الليلة في الوست يونيون الدوحة في طريقها الي ويست يونيون-ميرلاندا من الصباح..
ويبقي اسمارات ضاعت عليها حقوق ستارة وتالق هندسي ساكت
....
انت عارف يا ابو الريش لو القصة دي عصلجت تاني غير ستارة اسمارتنا دي
تاني مافي شي حيحلها ليك..مجلس الامن ذااتو ما يقدر علي (هييك فلو)

عقدوتونا الله يجازيكم(بالخير).. جني وجن المصايب دي.. بس الله يوفقكم


بنت الحسين

مريم صحبتى ....مشتاقين
شفتى ? بعد تعبى ده كلو جو قالوا لى ستاره. و عمك كوستاوى قال لينا "فرقعوا"

Quote: مريم صحبتى

أهو خلاص لقيتي ليك فردة
بقيتوا إتنين بس

برضو هامش

أها دي مش أحسن من الستارة يا خالتو

يا سمارتأنا والله أسف على العبارة القلتها فى صيغـة مزاح.. ودا كلو من كيكى الشايل
مديدتـو وحايم.


كوستـاوى، داير تطرد ضيوفنا مالك ياخ تقول ليهم يللا إفرنقعوا واللا فرقعـوا ما عارف..
ضيوفنـا هنا عندهـم حصانـة دبلوماسيـة.

بالمناسبـة أنا سـألت السبـاك الشغال فى الشـركـة.. قال ياخ أفتح المويـة وشـوف كان تمشى واللا ما تمشى!!
بالله موش كان أخيـر تقرأ سباكـة؟

على أى حال برضـو شكـرا على المجهـود فى المسـاعـدة، والأعمال بالنيـات.

بالمناسبة
يا أبو الريش
السباك في أمريكا بيعملى 3 أضعاف المهندس المدني أبو دبابير PEs

يعني smart_ana لو كانت سباكة
كان ما ح تتكلم معانا

الحمد لله الطلعت أم دبابير

Quote: السباك في أمريكا بيعملى 3 أضعاف المهندس المدني أبو دبابير PEs

ال PEs لكن ما فيهـا وجاهـات وجعاصـات.. دى السباك لو قلب هوبة ما بلم فيها..
لقد صبرت عن لذة العيش أنفس.. وما صبرت عن لذة النهى والأمر.

القروش ما كل شئ
زى ما يقولوا أهلنا الصينيين.. بالمناسبـة يبلغوك تحاياهم واحد واحـد.. لما فترت من شيل التحايا.

Abureesh

Quote: يا سمارتأنا والله أسف على العبارة القلتها فى صيغـة مزاح.. ودا كلو من كيكى الشايل مديدتـو وحايم.

العفو يا اخى...احنا ناس هندسه ناس ظراف و بنعرف الهظار...(اسال عبد الكريم).

Kostawi

Quote: بالمناسبة يا أبو الريش السباك في أمريكا بيعملى 3 أضعاف المهندس المدني أبو دبابير PEs يعني smart_ana لو كانت سباكة كان ما ح تتكلم معانا الحمد لله الطلعت أم دبابير

هسى عليك الله فى سباك بيكون عندو بنشن زيك? ما شاء الله و عينا بارده
تلاقيك (ذى ما بتقول حبوبتى :كاتل الجداده و لامى بيضا)

Quote: اشاعة ساكت ويكون خم الدولارات الشافتها عيني الليلة في الوست يونيون الدوحة في طريقها الي ويست يونيون-ميرلاندا من الصباح..

يا كيكى القروش حأرسلهـا لكوستى، لحد ما كوستاوى يغير اسمو لميرلاندى.. فوضى هى؟
من سنـة 2004 مرق من كوستى وما شـافهـا تانى، وبرضو يقول لينـا كوستـاوى.

Abureesh

Quote: من سنـة 2004 مرق من كوستى وما شـافهـا تانى، وبرضو يقول لينـا كوستـاوى.

2004 ؟؟؟؟؟ يااخى قول 1904

Quote: 2004 ؟؟؟؟؟ يااخى قول 1904

سمـارتأنا،

2004 دى باصيها للفنكشن ديك تديك الزمن الحقيقى.. إنتو الهندسـة دارسينهـا لشنو؟