السلام عليكم خالتنا الشول تسكن القرير مركز مروي بالشمالية أصابها ما أصاب اختنا اشراقة بفيينا مركز النمسا من وجع الضرس والوجع واحد لا يعترف بالنمسا ولا بالسودان فهو وجع في غاية الديمقراطية البني آدم عنده واحد لا فرق بينهم الا في مقدار الوجع لا أدري وجه الشبه بينه وبين العِرس حتى جُمِع بينهما في المثل المعروف وجع العرس ، ولا وجع الضرس .................. عودة لخالتنا الشول ضاقت بها الأرض بما رحبت فقررت أنه لا بد مما ليس منه بد ولكن.. لا وجود لطبيب في القرير وسمعة مستشفى مروي لا تشجع على الإقتراب منه إذا فهي كريمة ولا بد لكريمة من ركوب البحر والمراكب أو البنطون مشوار قد يستغرق الأربع ساعات براً وبحراً ثم براً بالرغم من إنه لا يبعد سوى 60 كيلو ........... يبدو أن قلع الضرس كان مؤلماً مما هيج شاعرية خالتنا الشول لتهجو الطبيب هجاء مراً دعنا نسمع قصتها بصوتها
......... وما الناس إلا هالك وأبن هالك *** وذو نسب في الهالكين عريق
Post: #2 Title: Re: ضرس الخالة الشول ... عناية اسبوع ود البشري للضرس بواسطة اشراقة مصطفى Author: Ishraga Mustafa Date: 06-18-2008, 08:20 PM Parent: #1
الزول سلامات
يا اخوى صوت خالتنا دى وقصيدتها الحنينة دى تطيب اى جرح روح لمن بكيت والله- هاجت الذاكرة بالامهات - بامى ..
Quote: فهو وجع في غاية الديمقراطية
وبيؤمن بالمشاركة الشعبية لايفرق بين الناس بس اختلاف الانظمة بين البلدين بيخلى الزول هنا مطمئن انو لمن يمرض بيتعالج لانو التأمين الصحى- او الاجتماعى فى النمسا تحديدا ضارب بجزوره فى تاريخهم يعنى جماعتنا الله يديهم الخير عملوا نظام التأمين الصحى فى السودان مع ايمانى التام بانو التأمين ده جزء من نظام صحى متكامل فكيف فى ظل السياسات الصحية اللى ادت الى المزيد من الامراض الصحية ممكن ينجح نظام التأمين الصحى خاصة لو طلعنا بره شوية من الخرتوم تلقى الحال مايل شديد؟
Quote: وجع العرس ، ولا وجع الضرس
المثل ده وقع لى فى جرح رغم انى اول مره اسمع بيهو
ياربى العرس البيوجع فيهو شنو؟ اها ده موضوعو براهو بديك خبر لمن ابحت فيهو
تسلم يا الزول وانشاءالله مايصيبك وجع ضرس
Post: #3 Title: Re: ضرس الخالة الشول ... عناية اسبوع ود البشري للضرس بواسطة اشراقة مصطفى Author: الزوول Date: 06-19-2008, 02:50 AM Parent: #2
السلام عليكم الأخت اشراقة شكراً على المرور والتعليق وشايف ود البشرى –أبعد الله عنه وجع الضرس- لم يود تعميد هذا الأسبوع اسبوعاً للضرس ويبدو إننا في حاجة لمزيد من بوستات الأضراس وأطباء الأسنان ودعايات معجون الأسنان –بدلاً من الفوركس- والذي منه حتى يرفع التهميش عن الأضراس وينجلي الليل الطويل البهيم.
Quote: حتى جُمِع بينهما في المثل المعروف وجع العرس ، ولا وجع الضرس
للأسف الشديد اكتشفت أن المثل الوقع ليك في جرح ده انا قاطعو من رأسي سايي والمثل الصحيح يقول لا هم كهم العرس ، ولا وجع كوجع الضرس وأظن انه لا يبعد كثيراً عن المثل الأول تحياتي
......... وما الناس إلا هالك وأبن هالك *** وذو نسب في الهالكين عريق
Post: #4 Title: Re: ضرس الخالة الشول ... عناية اسبوع ود البشري للضرس بواسطة اشراقة مصطفى Author: الزوول Date: 06-20-2008, 08:43 AM Parent: #1
السلام عليكم هسة عليك الله يا ود البشرى بعد الضروس دي كلها ما بنستحق اسبوع الضرس البوردابي؟ ....... وما الناس إلا هالك وأبن هالك *** وذو نسب في الهالكين عريق
