Post: #1
Title: عِرس و حِنّة و سد مال و مطر
Author: علاء الدين يوسف علي محمد
Date: 06-06-2008, 05:49 PM
ثلاث عزائم في يوم واحد و كلهم من المُقرّبين ، الأول عُرس أحد أقربائي بنادي الشُرطة ، و الثانية حِنة بن الجيران حيطة بالحيطة الصديق مُعتصِم ، و الثالثة نسيبنا بكري و هو يعتمِد علي العبد لله في سد ماله بأن أُسخِّر له دابتي.
و بينما أنا مُحتاااااااار
تجي المطرة و هسي شغالة شووووووووووووووووووو
بس قلت الله حلّاها
و يبدو أنهم جميعهم من آكّالة الحِلل
|
Post: #2
Title: Re: عِرس و حِنّة و سد مال و مطر
Author: علاء الدين يوسف علي محمد
Date: 06-06-2008, 05:52 PM
Parent: #1
لكن المزعِّلني العربية
متعود أغسِّلة برااااااااااااااي و أشيل ليك فوطتي و جردلي و هاك يا تلميع
الليلة من دون الأيام و قبل ساعتين بس مشيت وديتة جنب سوق 4 بري و قلت للأولاد البيغسِّلوا عايز كوفير
كوفير دي يعني حتي الكراسي بفكوها مرات و غسيل شديد.
جات المطرة و قبالة هواء و كتاحة و هسي لو لقينا لينا مسطرينة و مُعلِّم بياض تبقي حاجة تانية
لكن كيتاً في السخانة الهرتنا دي
صبي و ما تقيفي ذاتو و أجري سيل
|
Post: #3
Title: Re: عِرس و حِنّة و سد مال و مطر
Author: motaz
Date: 06-06-2008, 07:51 PM
Parent: #2
الاخ علاء
اولا مبروك على كل الحاجات الحلوة دي
الـعِرس و حِنّة و سد مال و مطر
وبمناسبة المطرة دي
واحد من ناس زمان وزول بيحب الطرب شديد
حكى لنا انه كان عندهم مناسبة
وأثناء ما العازفين بيجهزوا لبدء الحفل
قومي يا المطرة صبي هههههههههه
ومش شووووووو وبس دي كانت شووووووو و شوووووووو و شووووووووو كمان
لمن الشارع اصبح نهر عديل كدا
والناس خلاص بدأت تتلملم وماشين لانو الحفلة باظت خلاص
وفجأة
يظهر لوري مليان تراب وبدأ كل الشباب في "ردم" الشارع وثواني بس وكان الشارع جاهز لاستقبال الحفل
ورجع العازفين تاني وبدأت الحفلة لكن منظر الناس خصوصا الشباب كانوا كانهم قاعدين يبنوا ليهم في بيت
البناطلين كلها طين ومكفكفين وحالتهم حاله ،، لكن الناس اتكيفوا منهم شديد وهم زاتهم اتكيفوا من نفسهم شديد
وآآآآآآآآآآآآآخر هجيج
دحين انتو هسي ردمتوا الشارع ولا نجيكم
هههههههههههه
مرة تاني الف مبروك لكل الحاجات الحلوة وربنا يتمم على خير ومبروك برضو وعقبال الجميع
وفي امان الله
|
Post: #4
Title: Re: عِرس و حِنّة و سد مال و مطر
Author: علاء الدين يوسف علي محمد
Date: 06-06-2008, 09:14 PM
Parent: #3
حبيبنا معتز
الله يبارك فيك ياخ
قصة شبابك حلوة و تحكي عن معدن السودانيين الأصيلين أولاد الناس
أما نحن يا أخوي الحمد لله المطرة يظهر كانت فأل حسن ليهم ما كُج
لأنو رشت بغزارة لدقايق بس و رطّبت ليك الدنيا ترطيبة صاح بعد فرِم شديد
مهما وصفت ليك أمس الجو بالليل كان كيف ما بتصدق خليك من بالنهار
المهم الحفلة دوّرت و أخوك لأنومااااااا زول ربة و كدة كل واحدة مشيت لبدتة ليك ورا الساون لحدي ما أقبض ليك العريس و أقلِدو ليك شدييييييييييد نظام يا زول هوي فتِّح عينك أنا جيت و إنكشح ليك برة
و تسلم علي المرور
|
|