مشكلة اغلب الأسر المغتربة:بناتنا وأولادنا لايفضلون قضاء الأجازات بالسودان ولا الدراسه بجامعاته!

1 - جرت العادة ان اقوم وكل يوم جمعة بعمل اتصالات تلفونية مع أهلي واقاربي بالسودان والسعودية وبدولة الأمارات ولندن نتبادل فيها اخرالأخبار الخاصة والعامة ونتعرف علي اخر المستجدات،

2 - اغلب الذين اتصلت بهم اشتكوا من ابناءهم وبناتهن ( الجيل الجديد ) الذين يرفضون قضاء الأجازة بالسودان... وبعض هؤلاء الاولاد يقولون ان قضاء عطلة الصيف في السودان هو الجحيم بعينه!!، والبعض الأخر من الأطفال يقولون ان قضاء الأجازة بالأسيكمو خير من السودان الذي انعدمت فيه كل مقومات الحياة الانسانية البسـيطة المطلوبة للمواطنيين، فهناك في العاصـمة يندر للمرء ان يجد ماء نظيف للشرب والكهرباء دومآ مقطوعة ومتي في عز ايام الصيف والشمس اللافحة!!، هؤلاء الاطفال - وعلي لسان اولياء امورهـم - يقولون ان المواصلات المريحة معدومة والسيارات والبصات والركشات تسير بلا ضوابط وشـوارع الخرطوم مليئة بالمطبات والحفر.

3 - فئة ثالثة من اولاد المغتربيين يقولون انهم واثناء تواجدهم بالسودان احيانآ لايفهمون مايدور حولهم من امور بسبب تفاوت عقلياتهم التي اكتسبت نمطآ معينآ من الحياة في الغربة وتتطبعوا بعادات وسلوكيات اوطانهم الثانية،... لذا فهم وينزوون بعيدآ عن باقي اولاد اعمامهم وباقي افراد الأهل والأسرة ويظلوا هكذا (منكمشين!!) حتي مواعيد الرحيل، لذلك فان الأجازة الصيفية تكون ممتعة فقط لأولياء امورنا الذين مافارقهم الطبع السوداني ومازالوا عليه ...ونراهـم مندمجيين في ونسات نحن لانحضرها للملل الزائد عن اللزوم فيها.

بعض هؤلاء الأطفال يقولون حتي برامج التلفزيون السوداني احيانآ لانفهم لغتها ولانجد في هذه البرامج اي شئ مسلي.

4 - عندما قمت بالاتصال ببعض اقاربي في دولة الأمارات ونقلت لهم متاعب بعض اقاربي بالسعودية من اولادهم الذين لايودون السفر للسودان وقضاء الأجازة اجابوني ان هذه المشكلة موجودة بصورة اكبر فـي الأمارات، فاغلب الذين نجحوا بالشهادة الثانوية واكملوا السنوات المدرسية يرفضون رفضآ باتآ الدراسة بجامعات السودان علي اساس ان الحياة في الخرطوم لاتطاق ... وثانيآ ان مصاريفها باهظـة مقارنة بجامعات سورية ومصر والهنـد... وثالثآ ( وهـذا هو المهـم ) ان اغلب الشهادات السودانية غير معترف بها عالميآ!!

5 - صـديقي فكتور من اعز اصـدقائي الأقباط ويعيش بالسعودية انه يقول ( لـم ازر السودان منذ 17 عامآ فكل اسرتي واقاربي واغلب الأقباط هاجروا وتركوا الجمل بما حمل للانقاذ ... وانه يزور اولاده الذين يدرسون باستراليا وهم جيل سوداني جديد لايعرف من السودان الا اسمه ولايتكلمون العربية الاماندر!!!!).

6 - يقول احـد اصدقائي وهو مقيـم بدبي ان اطفاله قد تأثروا جـدآ بما يردده هو واصـدقاءه سلبآ عن السودان، والتصقت تعابير كثيرة سـيئة في اذهانهم الفجـة كنا نرددها في حضورهم اثناء مشاهداتنا للمحطة الفضائية السودانية مثل تعابير ( بلد حفرة ) ( بلد خربانة ) ( حكام فاسدين لصوص ) ( البلد باعوه وسففونا التراب ) ... وتعابير اخري اكثر حـدة جاءت كلـها تبعآ للحادث الذي نكون قد شاهدناه بالتلفزيون السوداني ، وتراكمت هذه التعابيـر عنـدهم واصبـحنا وكل اجازة نفاجـأ باولادنا ويقولون لنا ( ياابوي.. نحـنا مسافرين للبلد الـحفرة!!!).

7 - اعتقـدت في بادي الأمر متعلق فقط بأهلي في هـذه البلاد، ولكن ماأن اتصلت بأخرين يعيشون فـي لندن وروسيا حـتي سـمعت منهـم العجـب العـجـاب!!

:::::::: ونـواصـل....

بكري الصايغ
تحية و ود
ياخي الغريبة أولادي عكس ... يعني السودان عندهم بيحلموا بيهو من ما تنتهي الإجازة لغاية ما تجي الإجازة البعدها ... حتى لو كان البرنامج إننا مانمشي السودان لا يقبلوا الأمر إلا رغماً عنهم ...
السودان بالنسبة للكبار يشكل هاجساً مختلفاً ... يظل الأمر عندنا مرتبط برؤية من نحبهم و حرمتنا الغربة من دفئهم من أهلنا الأحباء ... و مع ذلك نعاني كثيراً هناك من عدم مقدرتنا على التكيف على المستجدات الإجتماعية سريعة الإيقاع ... رغم أننا نعرف السودان أكثر مما يعرفه أبناؤنا ...
أما الدراسة بالجامعات فالأمر فيها وعدم رغبة أبنائنا على التكيف مع المجتمع الجامعي يرجع إلى مأساة الظلم الواقع على المغتربين و أبنائهم من التقليل من تقييمهم و تصنيفهم على أنهم فئة دخيلة و للأسف فهذه السياسة تتبناها الدولة ...
و لي عودة ...
مودتي ...

والله يا بكرى كلامك يمكن يكون صحيح...لكن انا مغترب من السودان لى 18 سنة بين
امريكا وكندا وعندما نفكر نزور السودان نخطط للزيارة من قبل سنتين من السفر
ونصل الخرطوم بعد ثلاثة ايام خاصة لمن نسافر بالخطوط القطرية او السعودية
وانا خلال ال18 سنة لم ازر السودان الا مرتين..وفى المرة الاخيرة كنت مقرر العودة النهائية العام الماضى
ولكن بعد ما شفت عذاب الروتين الحكومى والرشوات المفروض تدفعها فى كل خطوة رجعت مع الاولاد بعد ثلاثة اسابيع
يعنى معقول يا بكرى نحن الكبار ما قدرنا نستحمل الاولاد حيستحملوا كيف!!!

الأخ الـحبيب الحـبوب،
أشرف البنا،
تـحـية الود والأعـزاز،
والشكر علي مـشاركتك الـمقـدرة... وتعليقك الكريـم.

بـمجرد مانزل هذا الـموضوع بالـمنبـر العام حتـي تلقيت نحـو 9 مكالـمات من أهلي وأصـدقائي بدبـي والسعودية والـمانيا. الأخـوان في السعودية بقولو انو موضوع كراهية اولادهم للاجازة في السودان كوم... وعدم رغبتهم بالالتحاق بجامعات السودان كوم تاني. والمشكلة انهم جيل اتربي في السعودية واترعرعوا في البلد دي ودرسوا في مدارسها واصبحوا شبه سعوديين اكتر مما يكونو هم سودانيين ونحن عارفين الحقيقة دي ومابايدنا تغيرها!!!.

يقول صديقي في كلامه، المشكلة انو نحنا ذاتنا بنعلمهم بطريق غير مباشر بعض السلوكيات البتنفرهم من السودان وعلي سبيل المثال لما نقول ليهم انو النظام التعليمي في السودان متأخر والدراسات العلمية غير مواكبة للنظم العالمية بجامعات السـودان، او لما نقول ليهم انو التعليم زمان كان احسن وارقي الف مرة من التعليم الحالي، هم يحفظوا زي كلامنا ويذكرونا بيه لما نقول ليهم انتو حتواصلوا تعليمكم الجامعي بالسودان!!!.

يقول صديقي ... طبعآ كل رب أسرة مغتـرب بتمني ولدو يتعلم بالسودان عشان هـناك عنده اهلو يراعوه ويخلو بالهـم منه، ... ولكن اولادنا دائمآ عندهم رأي في أهالينا بالسودان!!!

اتلقيت مكالمة من أخ عزيز يقول في كلامه انو رسل ولدو للدراسة بالسودان ولكن الولد رجع مرة تانية لدبي بعد ماقطع الدراسة في السودان والسبب المشاكل السياسية بين الطلاب في الجامعة، واحدة من المنظمات السياسية قالت ليه لازم تحدد موقفك من الصراعات الموجودة في الجامعة ومافي حاجة اسمها ( محايـد!!) يامعانا ياضـدنا!!. ولدي قام شرح ليهم انو عاش برة ومابيعرف الاتجاهات السياسية في البلد وماحصل انو مارس نشاط سياسي في حياتو لانو كان عايش في دبي وهناك مافي تنظيمات سياسية في المدارس الأماراتية، ضايقوه وسببـو ليه امراض نفسية وبقي محبط وساب الدراسة نهائيآ ورجع لقواعـده بالأمارات محـطم ومنهـوك!!!

مكالمة تانية جاتنـي من والد يقطن في دبي يقول فيها انو في كل صيف بسوق اولادو وبناتو للسودان، وكلهم اخر انبساط وسعادة مع أهاليهم هناك، ولكن المشكلة فيني انا البتعذب في اجازتي، جري وراء تخليص الاوراق، والضرائب، وتجديدات الجوزات، وترشي ده، وتدي ده، والتالت يقول ليك ( وينـو حـقي!!?)، والرابع يحلف ليك برب الكعبة انو دواء الضغط ده مافاسـد ووصل يادوب من الهند تـقوم تشتري الدواء تلقاه حبوب سلفا!!، ترجع البيت تلقي الكهرباء قاطعة تقوم تمشي تفتش ليك علي جازولين للجنريتر تلقي الجازولين داسينـو ناس السوق الاسـود، تلملم اولادك عشان ترجع بيهم تلقي ليك مشكلة مفتعلة عاملينها معاك ( مافيا ) المطار وتضـطر تدفع غرامة لانك... مااتغـرمت قبل كـده!!!

لك مودتـي ياأشرف.

الأخ الحبـيب الحبـوب،
السر عبدالله،
تـحـياتي ومـودتي،
وسـررت لمرورك الكريـم واسعـدني تعليقك وكلامك.

صـراحة، انا اعيش هنا مابين المانيا واوكراييـنا منذ 22 عامآ وغيـر متزوج وبالتالي ماعندي لااولاد ولابنات... لذلك تجـدني تجاه هذا الموضوع ومشاكل الاولاد والاجازات والمدارس والدراسات في الجامعة خالي ذهن وعديـم خبـرة، ولكن فتحـت هـذا البوست بعدما مالمسـت معاناة بعضآ من أهلي في بلاد الغربة والضائقة النفسية التي يعيشون فيها بعد هذا العمر من الاغتراب والحصاد الناقص ... وجـحـود الحكومات المتعاقبة عليهم وعدم انصافهـم.

احـد الاخوة من اهلي يقول لي ان هذا الموضوع الذي فتحته بالمنبر العام اسمه (المسكوت عنه سودانيآ في السعودية وبدول الخليج!!)، فلا احـدآ من السودانييـن يتمني وان يكشف حاله ومعاناته والمحن التي علي رأسه بسبب رغبات اولاده وبناته، ...ولما سألته عـن السبب في عـدم قبول الطلاب الأجانب بالجامعات السعودية فاجابني هـذا الموضوع اسـمه ( الموضـوع المسكوت عنه سـودانيآ الف مليون مرة!!!).

وسالته عن حل يرضيـك واولادك في اجازة ممتعـة بالسودان وموافقتهـم علي الدراسة بجامعات السودان ، فاجاب ...هـذا الحلم لايمكن ان يتحـقق والنظام الحـالي موجـود!!!

لك مودتي.

تلقيت رسالة من والد كريم يسكن في الأمارات يقول... فيها ان اكبر مشكلة تواجهه عند زيارة السودان مع أسرته هي مشكلة غلاء اسعار السلع الضرورية والأدوية والتي اصبحت اسعارآ ليست في متناول المغتربييـن!!!.

انه يقول عندما اخطط لزيارة السودان باسرتي اكون قد خططت لصرف مبلغ محدد اقتصدته بعد عودتي من اخر اجازة صيفية واكون قد حسبت تكاليف الرحلة ومنصرفات الاولاد بالسودان ...ولكن اتفاجـأ بان الأسعار قد زادت عن اخر زيارة لي للسودان بنسبة 15% في المئة من الأسعار القديمة... الأمر الذي يحيل اجازتي والاسـرة الي جـحيم!!

انه يقول ايضآ، ان اخر اجازة قضيتها مع اسرتي كانت بالهنـد، استمتعنا فيها تمام الاستمتاع وقضينا اجمل الايام وعـدنا بعدها للامارات ونحن في تمام الرضاء من هـذه الرحلة والتي ماكلفتنا الكثير كما ورحلات السودان الباهظة التكاليف ومرهقة للاعصـاب وحـرق الدم!!!

الاخ / بكري
مساء الخير
علي العكس تماما
الان وقبل ان تبداء الاجازة الصيفية
بداء ابنائي في الحديث عن السفر
للسودان لقضاء الاجازة الصيفية علما
بانهم كانوا في الصيف الماضي هناك
ولاحساسي بانهم صادقين في طلبهم هذا
ولانني ليست لدي اجازة فاعتقد باني سارسلهم لوحدهم .
شفته كيف ياعمك
ناس افراحه زايدة
وناس يتجهجهوا

التحايا
هارون دياب

الاخ الاصيل هارون دياب
ده لانك انت اصيل وربيتهم علي حب بلدهم
لك ودي

Quote: الاخ / بكري مساء الخير علي العكس تماما الان وقبل ان تبداء الاجازة الصيفية بداء ابنائي في الحديث عن السفر للسودان لقضاء الاجازة الصيفية علما بانهم كانوا في الصيف الماضي هناك ولاحساسي بانهم صادقين في طلبهم هذا ولانني ليست لدي اجازة فاعتقد باني سارسلهم لوحدهم . شفته كيف ياعمك ناس افراحه زايدة وناس يتجهجهوا التحايا هارون دياب

(والاصالة بتنقط من بروفايلك نقيط)

صديقي رينق من ابناء قبيلة الدينكا ويعيش في المانيا منذ 25 عامآ ومتزوج من المانية وعنده بنتييـن.

انه يقول، لاعلاقة لي مع السودان بعد ان مات اغلب أهلي في حروب الجهاد الأسلامية ومن تبقي منهم فروا الي يوغندا او كينيا لذلك انقطعت علاقتي تمامآ بالسودان.

ازور اهلي في كينيا مع زوجتي وبنتاي ،واشعر بالسعادة عندما اري افراد اسرتي الألمانية بين اهلي الأفارقة والمس الود والحنان الدافق من أهلي القدامي الذين مانسيوني.

انه يقول احيانآ اشعر بالحنين لزيارة الخرطوم التي درست بها... ولكنـي لااعرف احـدآ فيـها وأخاف ان ادخـلها بدون دليل او شخصآ اعـرفه فاتعـرض لـمشاكل لاتحـصي ولاتعـد بسـبب لون سـحـنتـي!!! !!!!.

انه يقول بألم شديد ان زوجته وبناته يعرفون انه سوداني ولكنه لايستطيع ان يدعوهم لزيارة بلده الأصل... ويقوم بدلآ عنها بتوجيه الدعوه لـهم بزيارة كينيا!!!!

الاخ بكري صديقك الذي درس في الخرطوم ويعيش في المانيامع زوجته الالمانية ظلمنا كثيرا بخوفه منا نحن اهله الذين تربى بينهم وتعلم على حسابهم حتى اصبح لديه الامكانية للسفر الى المانيا والزواج من اهلها وتحول وجدانه اليهم
انه حال كثير من بني السودان

Quote: انه يقول احيانآ اشعر بالحنين لزيارة الخرطوم التي درست بها... ولكنـي لااعرف احـدآ فيـها وأخاف ان ادخـلها بدون دليل او شخصآ اعـرفه فاتعـرض لـمشاكل لاتحـصي ولاتعـد بسـبب لون سـحـنتـي!!! !!!!.

كيف يخاف منا بسبب سحنته ولماذا يا ود الصائغ لم تذكره بتسامحنا نحن اهله وبانه يظلمنا بقوله هذا


انا اتكفل بان اكون دليله ومضيفه في السودان مع بناته الالمانيات واتكفل بمصاريف الاقامة حتى يتذكر كم اهله متسامحون في السودان
ورايه في النظام ده شئ تاني لا علاقة لتسامح اهل السودان به
وعنواني يمكن اخذه من بكري ابو بكر

الأخ الحبيب الحـبوب،
haroon diyab

التحـية والقومـة لزيارتك وقـدومك الذي افرحنـي، وشكرآ علي المشاركة.

اولأ، بالطبع ماكل الناس عندها مشاكل مع اولادها في موضوع السفر للسودان وقضاء العطلة مع اهاليهم ... او مشاكل رفض اولادهم الدراسة بجامعات السودان وتفضيل جامعات تانية ولو في الصيـن!!!،

ثانيآ، عندي جماعة من أهلي بالأمارات يزورون السودان كل سنتييـن والأسرة قررت ان يلتحقن البنات بجامعات السودان ... والموضوع علي كده منتهي ولاتوجـد اي احتجاجات او اعتراضات،

ولكن كـم عدد الأسر السودانية المغتربة التي لاتعاني من مشاكل الأجازة الصيفية والبلاوي والمحن الموجودة في ثناياها ، وكم عـدد الأسر التي اصبحت تعاني من تشدد الاولاد في عدم الالتحاق بجامعات السودان، ولماذا اصبـحت جامعات بنغلاديش والهنـد وباكستان وسورية ومصر والمغرب هي المفضلة عند اولاد وبنات المغتربييـن!!?.

لك مودتي.

يقول احد لمغتربيين المخضرمييـن في دبي ان موضوع سفر المغترب مع اسرته للسودان هو امر محسوم لدي غالبية الأسر بالامارات ولامجال لقضاء العطلة بدول اخري بسبب غلاء الرحلات الصيفية من تكاليف بطاقات الطائرة وهوتيلات وتاشيرات ومصاريف اخري غير مرئية، ولكن السفر للسودان غير مكلفة للسودان ماعدا بطاقة الطائرة وهناك في السودان السكن والمعيشة مستورة!!!

رأي اخر لسوداني عاش طويلآ بالسعودية يقول ان قضاء العطلة الصيفية في مصر او الهند ارخص بكثير من العطلة في السودان، ولذلك نجد ان السودانيين اصبحوا يقومون برحـلات أسرية جماعية لعدة دول عربية ويتجنبون السودان الغالي في كل شئ ، وهـذه الظاهرة لم تكن موجودة من قبل وظهرت مع بداية هذا القرن 2000، واصبحت هناك شركات سودانية تنظم للأسر السودانية بصورة خاصة رحلات للمغرب ومصر وتركيا.

سوداني اخر يقول في احباط شديد لقد اصبح السودان بلدآ طاردآ لأهله ولذلك قررت ان ابقي مع أسرتي بجدة و ( العاوزني من أهلي يجئ يزورني لكن نحنا ماحنمشـي للسودان!!).

زمان و انا طفله كنت اكره اجازة الصيف لانه معناها الملاريا و الحر و حمو النيل و ارجع من السودان هدومي و لعبي و حاجاتي كلها شالوها مني بنات الخالات و الجارات و العمات, اجازه متعبه و تمر كأنها سنين و ياما بكيت في المطار عشان ما عاوزه امشي, هسع و انا كبيره, اخر اجازه قضيتها في السودان كانت من سنتين و قبلها 15 سنه ما شفت السودان, كانت اجازه سخيفه و متعبه و غالية التكاليف, كلها شهر, لكن مجاملات بس كانت اكثر من مرتب شهر و مصاريف شخصيه لا حد ليها و لا عد, غير المرض و مافي حتى مويه نضيفه, قزازه المويه الله يعلم قايلانها وسخانه من بره مسحتها ما نضفت دخلت اصعبي اله يعلي طلع وسخان, طين جوه. غير انه ما في ونسه مشتركه, و كله كوم و السخافات من نوع بتعرفي الراكوبه و المشلعيب يعني شنو؟ ولا انتو بنات امريكا الحناكيش و لو باكل كسره التعليق يكون انتي من امريكا ولا ال الحصاحيصا, و غير التعليقات السخيفه انه امريكا بلد كفار و السودانيين كلهم شغالين عتاله او بيتزا و الغريبه انه اي واحد بيسخر او بيعلق لمن تجي مسافر عاوزك تشيل صوره عشان تقدم ليه لوتري لبلد الكفار دي, باختصار و انا طفله و هسع انا ام لطفل لا افضل الاجازه بالسودان, لكن مجبوره عشان صلة الرحم و عشان ولدي يعرف اهله و يعرف بلده, صرف قروش و حر و مرض و سخافات,

Quote: زمان و انا طفله كنت اكره اجازة الصيف لانه معناها الملاريا و الحر و حمو النيل و ارجع من السودان هدومي و لعبي و حاجاتي كلها شالوها مني بنات الخالات و الجارات و العمات, اجازه متعبه و تمر كأنها سنين و ياما بكيت في المطار عشان ما عاوزه امشي

قاااااااااااااااااادر الله

Quote: كانت اجازه سخيفه و متعبه

قااااااااااااااادر الله

Quote: صرف قروش و حر و مرض و سخافات,

قاااااااااااادر الله

الله قادر يا اخوي


و مع كده لا ارفض الاجازه في السودان لمن كبرت و ان كنت لا استمتع بها,

كطفله الموضوع بالنسبه لي كماليات كان مفقوده في السودان لكن الواحد لمن كبر عرف انه الكماليات لا تتوازى مع متعة شوفت الاهل و صلة الرحم رغم السخافات و الحر و المرض.

لا نلوم الاطفال لانهم ما تعودوا على السودان, و على العموم ما الاطفال الاتربوا بره بس حتى الكبار المرقوا و هم بشنبات ما بيحبوا يمشوا السودان

اديك مثال واحد قابلته في طياره عمره حواله 45 كان ماشي روما و انا ماشه الخرطوم, قال لي انه ما بيحب يمشي السودان عشان مشكلته الكبيره اللي هي انه في السودان مافي ورق تواليت؟؟؟ على فكره الزول ده اتربى في ضهاري القضارف و كان بيمشي الخلا مع ابوه للزراعه بعد 4 سنوات في امريكا مشكلته بقت ان السودان ما فيه ورق تواليت.؟؟؟

تحياتي

الأخت الحبيبة الـحـبوبة،

Dania Elmaki
تـحية الود والأعزاز،
والشكر علي مساهمتك في الـموضـوع.
واشيـد بشـجاعتك ورأيك الواضـح.

اغلب السودانييـن الذين اعيش معهـم في مدينة لايبـزج الألمانية متزوجون من المانيات ونلتقي دومآ ونتقابل كثيرآ. موضوع زيارة السودان بالنسبة لأغلب هـذه الأسر شائك ومعقد بسـبب المخيمات الصيفية والتي يفضلها الاطفال.... لانها تعنـي البحر والبلاج واللعب في الرمال والسباحة والحفلات وتعارف جـديد مع شباب جدد. ولذلك فان اغلب الأسر تصرف النظر عن السفر والذي هو اصـلآ موضـوع غيـر مرغوب ولامحبوب عـندهم ويكدر مزاج الجميع.

هنا في المانيا توجـد بعض الأسر لم تزر السودان منذ 25 عامآ ...ولاتفكر في زيارة بلد يقرأون عنه كل يوم اخبارآ محـبطة ...ويشاهدون كل يوم صور المجاعة والحروب والدمار الموجود فقط في المناطق التي يقـطنها السكان المهمشـيين والأقليات!!!

صـورة السودان في مخيلة اولاد السودانييـن والأجانب انه بلد يشبه المانيا عندما كان هتلر الفاشي يحكم البلد في سنوات الاربعيينيات ...وقتل واباد الملاييـن وجوع شـعبه ورفض ان يعترف بحقوق الأخرييـن.

ولذلك نجد ان السودانييـن يتحاشون فتح موضوع السفر للسودان مع اولادهم بعد هذا الكم الهائل من الصور المحبطة للنفس والروح.

ومما زاد الطين بلة ان التلفزيونات الألمانية تبث دومآ صور الحياة في معسكرات دارفور والبؤس والمعاناة واطفال يقتاتون من صحون خاوية وامهات ماعاد عندهن من شئ ويقدم لاطفالهن الرضع.مما يعني للاطفال ان السودان ومنذ 18 عامآ هو بـلدآ لا غذاء فيه ...ولاسكن ...ولامدارس !!!

وهو مايزيد من قناعات الأسر ان السفر معناه .... الموت حيـآ بذلك البلد المسـمي بالسودان!!!

لك مودتي.

العزيز بكري

لي عوده مع الاجازات في السودان.

الاخ بكري لك كل الود والاحترام...
شكرا لهذا البوست الانيق والذي يتناول قضيه هامة ومسكوت عنها تتعلق بارتباط المغترب او المجر وابنائه بالوطن السودان...ولكن استوقفتني عبارة صديقك الجنوبي ومالمست فيها من وميض نار موجود عندنا في السودان وغير متناول والبعض الاخر يحاول غتغتته واخرون يستهجنون واخرون يدفنون رؤوسهم في الرمال...
تذكرت زميلك الجنوبي وهو يتفوه

Quote: ولكنـي لااعرف احـدآ فيـها وأخاف ان ادخـلها بدون دليل او شخصآ اعـرفه فاتعـرض لـمشاكل لاتحـصي ولاتعـد بسـبب لون سـحـنتـي!

...
عندما سالني زميلي الاسباني الذي نعمل سويا وهو صيدلي لا يعرف الكثير عن السياسة...لماذا يتم انزال البعض من المركبات العامه عندكم في السودان ويضربون بسبب لونهم ولكنتهم؟؟... للوهله تاملت مليا في ملامح صديقي وكانت اجابتي المباشره انها العنصريه... قال العنصريه!!! (باندهاش) قلت نعم انها عنصريتنا المحميه بالقانون...والتي تمارسها الدوله ضد مواطنيها

ولكنني مازلت مندهشا كيف عرف الرجل اخبار غسيلنا الغزر... لما عرفت عنه عدم مشاهدته لوسائل الاعلام وانغماسه في بحوثه وعلومه...




_____________________________________________________________________
اضف الي تلك الاسباب عدم ذهاب الاطفال الي السودان خشية اعتقالهم بسبب لونهم وخلفيتهم الاثنيه

أولا البوست مفيد جدا ولكنه مفخخ جداً أيضا،،
الأخ بكري الصائغ يثير موضوع غاية في الأهمية ويمكن أن يتم
النقاش فيه بموضوعية شديدة ، لكن مرضة المكاسب السياسية
وتجيير كل الفشل لحزب دون الآخر تجعلنا نشكك في النوايا من
وراءه لذا نحجم عن الخوض عن رؤية ابنائنا ،،

Quote: عندما سالني زميلي الاسباني الذي نعمل سويا وهو صيدلي لا يعرف الكثير عن السياسة...لماذا يتم انزال البعض من المركبات العامه عندكم في السودان ويضربون بسبب لونهم ولكنتهم؟؟... للوهله تاملت مليا في ملامح صديقي وكانت اجابتي المباشره انها العنصريه... قال العنصريه!!! (باندهاش) قلت نعم انها عنصريتنا المحميه بالقانون...والتي تمارسها الدوله ضد مواطنيها

السنوسي : كلامك والله متناقض ولا يخلو من الإستخفاف بعقولنا:

هل يعمل هذا الأسباني صيدلي في السودان تقابلتم في الشارع
وأنتم ترون بأم عينكم الناس يخرجون بناءا على سحناتهم؟؟ ولا
عاينتو من خلال قزاز الصيدلية؟؟
أسأل نيابة عني صاحب الإسباني هذا عن العنصرية التي مارسها
ملعب كرة قدم بأكمله ، وعلى مرآى من شاشات التلفزيون وهم
يرددون صيحات (القرود) للاعب إدريس كاميني حرس مرمى إسبانيول
بل ويرمون إليه بحبات الموز بين خشبات المرمى؟؟
أسأله لماذا صاح ملعب الروماريدا في وجه سامويل إيتو في
مشهد يدمي القلوب ولاعبو برشلونة يهدئون من روعه ويمنعونه
الخروج من الملعب ومنهم من تحفز : إن تخرج من الملعب خرجنا
جميعنا!!

رأفة بالسودان يابدر ،،

Quote: هل يعمل هذا الأسباني صيدلي في السودان تقابلتم في الشارع وأنتم ترون بأم عينكم الناس يخرجون بناءا على سحناتهم؟؟ ولا عاينتو من خلال قزاز الصيدلية؟؟

انا لا اعمل بالسودن... انا هنا بالمملكه المتحده كما هو واضح من البروفايل تبعي...اما قولك ان هناك عنصريه في اسبانيا اقول لك نعم وحدث تفي الملعب الذي ذكرت...ولكنك هل تعلم كيف تصرفت الدوله جراء ذلك...وكيف تصرف اتحاد الكره ومنظمات المجتمع الاسباني والاروبي...وحتي الصحف التي استقيت منها معلومتك...فالدوله هنا تضع قوانين صارمه ولكن في السودان تمارسها الدول هل عرفت الفرق يا عبداللطيف...
عبداللطيف انت تدس راسك في كوم رمله وانت الاسواء في مثال الغتغته... هل تنكر ان البعض اعتقلوا بسبب سحناتهم ولكناتهم؟؟... هل تنكر ان بعض الناس قد عذبوا بسبب الوانهم وخلفيتهم الاثنيه ثم خرجوا ابرياء ومشوهين؟؟...
عبداللطيف انت لا تقوي علي قول الحق لذلك تلجأ الي اسلوب الغتغته ورفض الحقائق...هناك عنصريه اذا لم تحس بها يحس بها اخرون وواجبنا كشف المستور... والوقوف معهم

Quote: انا لا اعمل بالسودن... انا هنا بالمملكه المتحده كما هو واضح من البروفايل تبعي...اما قولك ان هناك عنصريه في اسبانيا اقول لك نعم وحدث تفي الملعب الذي ذكرت...ولكنك هل تعلم كيف تصرفت الدوله جراء ذلك...وكيف تصرف اتحاد الكره ومنظمات المجتمع الاسباني والاروبي...وحتي الصحف التي استقيت منها معلومتك...فالدوله هنا تضع قوانين صارمه ولكن في السودان تمارسها الدول هل عرفت الفرق يا عبداللطيف... عبداللطيف انت تدس راسك في كوم رمله وانت الاسواء في مثال الغتغته... هل تنكر ان البعض اعتقلوا بسبب سحناتهم ولكناتهم؟؟... هل تنكر ان بعض الناس قد عذبوا بسبب الوانهم وخلفيتهم الاثنيه ثم خرجوا ابرياء ومشوهين؟؟... عبداللطيف انت لا تقوي علي قول الحق لذلك تلجأ الي اسلوب الغتغته ورفض الحقائق...هناك عنصريه اذا لم تحس بها يحس بها اخرون وواجبنا كشف المستور... والوقوف معهم

أتحداك يابدر أنت وصديقك الإسباني دا جيبو لينا أي لينك فيهو
يتم ضرب شخص وإنزاله من مركبة في السودان،،
هذا بالطبع لا ينفي حدوثها ولكن صاحبك هذا مالوش وجود
وهل لكونه إسباني فقط فإنه قوله الحق؟

يابدر شيء طبيعي في حالات الحرب والعدوان يتم تجريم المتشابهين
في سحناتهم أو لهم علاقة تربطهم بمرتكبي الجرم ،،
يابدر ، الآن السعوديون معظمهم محرومون من السفر إلى أمريكا
إلا بمعجزة وذلك بسبب أحداث 11/9،،

يابدر لو جاء العدوان من مصر لما طال ذوي البشرة السمراء شك،،

يابدر قالها لي صديق في باريس وهو على فكرة من الفاشر
ومعه جواز فرنسي : إن فرصه في العمل باتت ضئيلة أو شبه معدومة
لأن أسمه يبدأ بمحمد ،،
ياسنوسي : غوانتنامو ملىء بالعرب والمسلمين لأن بن لادن
يحمل نفس الصفات،،
=
هذا بالطبع لا يبرر شناعة إتهام الناس وأخذهم بالشبهات
وليس مبررا قطعاً ، ولكنها ليست سمة بارزة في وطن التسامح
السودان العزيز،،
=
قلتها لك سابقا الحكومة والمعارضة يسيئون للوطن الكبير بدرجات
متساوية،،

=
تعرف ياسنس ماذا فعلت الدولة في مقابلة الجرم الشنيع في
ملاعب أسبانيا: غرمت النادي 600 يورو ،، تصدق؟؟ أوليس العقاب
أكثر جرما من الفعل نفسه؟؟
لا تقل لي عقاب رمزي ،،
فصيحات القرود يا سنوسي إحتجاج على خلق الله الواحد الأحد،،
==

السودان هو ملاذنا ، ولنا أن ينشأ ابناؤنا على حبه ،،ولنا أن
نخاف الله في تربيتهم وننزع الأمراض التي أبتلينا بها لا أن يعيش
قادم الأجيال في واقع أسوأ من واقعنا هذا،،

الموضوع يابدر : لماذا يكره ابناؤنا السودان والإجازة فيه؟؟

ولك فائق الود والتقدير ،،
،،

يا عبدالطيف حالك باهي

Quote: أتحداك يابدر أنت وصديقك الإسباني دا جيبو لينا أي لينك فيهو يتم ضرب شخص وإنزاله من مركبة في السودان

انت يا عبدالطيف بطريقتك التطبيليه دي حت لو جابوا ليك اللينك برضك حتقول مزور...وعدين في زول بيدقو فيهو في واحد حيقدر يصور....
يا عبداللطيف السودان العنصريه فيهو زي كرة التلج في فصل الشتاء كل يوم تزداد...

Quote: يابدر شيء طبيعي في حالات الحرب والعدوان يتم تجريم المتشابهين في سحناتهم أو لهم علاقة تربطهم بمرتكبي الجرم

هل نغهم يا عبداللطيف انك تشجع الاعتقالات حسب الهويه واللون...شوف يا عبدالطيف مافي زول بياخدو بجريرة زول تاني وحتي لو ده حصل زي ماهو في السودان الان مفروض يلق الادانه من ضماير الناس الحيه...

Quote: يابدر قالها لي صديق في باريس وهو على فكرة من الفاشر ومعه جواز فرنسي : إن فرصه في العمل باتت ضئيلة أو شبه معدومة لأن أسمه يبدأ بمحمد ، ياسنوسي : غوانتنامو ملىء بالعرب والمسلمين لأن بن لادن يحمل نفس الصفات

،،ياخي في ممارسات تحدث ويحاسب عليها القانون.... اذا شعرت بالتمييز بامكانك رفع دعوة قضائيه وتوفر لك الدوله محامين...
وبعدين تعال هنا...ياخ ما ياهو انا عربي زي وزي اي ليبي ولا يمني شغال ومافي زول وداني غوانتنامو ولا بيلمارش...
دولة المواطنه والحقوق والمساوه هي الاساس لا دولة اعتقال الناس بسبب خلفياتهم وسحناتهم...مافي كم واحد ود عرب عمل انقلاب فشل في زول اعتقلوه عشان هو ود عرب في سوق املجه ولا بادية المحاميد...

Quote: لموضوع يابدر : لماذا يكره ابناؤنا السودان والإجازة فيه؟؟

هو يا عبدالطيف وطن بيعتقلو فيهو اواحد بسبب لونه ولكنته تقول لي زيارة اولادي... ما ده سبب رئسي خلي بعض الناس ما تمشي السودان عشان ما تتبهدل ويجي دكتور نافع يقول ليهم ياعبيد...

Quote: انت يا عبدالطيف بطريقتك التطبيليه دي حت لو جابوا ليك اللينك برضك حتقول مزور..

أخي بدر أنا لا أطبل لأحد،، إنت بس جيب اللينك حتى لو
مزور والله ما أقول كدا،،

Quote: وعدين في زول بيدقو فيهو في واحد حيقدر يصور

عشان كدا قلنا ليك كلامك متناقض وواضح من ورائه الغرض
ومن أجل معارضة الحكومة فإنه لا مانع من الإضرار بسمعة الوطن،،

وحالك أبهى ،،

ما تغيروا لينا مسار الموضوع و البوست, يا عبداللطيف و السنوسي, لو سمحتوا امشوا اتناقشوا في مكان ثاني


اها ده سبب ثاني يا بكري انه الواحد ما يمشي السودان ولا يعاشر السودانيين لانهم في اي حاجه لازم يتشاكلوا و كل واحد يفرض رأيه و يبوظوا المكان.

Quote: ما تغيروا لينا مسار الموضوع و البوست, يا عبداللطيف و السنوسي, لو سمحتوا امشوا اتناقشوا في مكان ثاني

شوفي يا دانيه ولا اسمك ايه انتي... نتناقش هنا ولا في السما اللحمر ده بوست الاخ العزيز بكري الصائغ هو طرح موضوع دي زاويتنا اللبنتناقش بيها منو...
وبعدين تعالي هنا...انتي اصلا ما بتفرضي علينا حته عشان نتناقش فيها...انت ما عايزه تمشي السودان because الاكل وسخان ولا الناس عيانة زي ماقلتي... دي مشكلتك براك واعتقد انها شخصيه وماتلزمناش...

Quote: شوفي يا دانيه ولا اسمك ايه انتي... نتناقش هنا ولا في السما اللحمر ده بوست الاخ العزيز بكري الصائغ هو طرح موضوع دي زاويتنا اللبنتناقش بيها منو... وبعدين تعالي هنا...انتي اصلا ما بتفرضي علينا حته عشان نتناقش فيها...انت ما عايزه تمشي السودان because الاكل وسخان ولا الناس عيانة زي ماقلتي... دي مشكلتك براك واعتقد انها شخصيه وماتلزمناش...

والله يابدر تاريك زول شراني،،

Quote: والله يابدر تاريك زول شراني،،

والله عبدالطيف انا لاشراني ولاحاجه لكن في حاجات كده بتفور دمي زي مصادرة حقي في التعبير وحرية الكلام...يمكن لانوالواحد عاش نص حياته هنا في الغرب والحريه بقت جزو اساسي من نمط سلوكة..وبعدين في حاجه مهمه برضو ملاحظه في بعض الناس اللبتكون عايشه بره كل ما تختلف مع طرح يقول ليك السودانين ديل وما ادراك ما السودانين ياخ مالهم السودانين فيهم البليد والذكي والصالح والطالح...
ما ياهو نحنا اتعلمنا في اعرق جامعات الغرب واتخرجنا منها لكين عمرنا ما اتعالينا علي اهلنا بنمشي ليهم في الخلا وبنلبس السديري والكدمول وبنشرب موية الحفاير والبرك وما قلنا ليهم انتو عيانين وله انتو متخلفين زي ما بيعملو ناس confuse.com واللهم اكبر (صفر) في حياة السودانيين في الخارج او داخل السودان...تعرف ديل الواحد بيكون برنامجو كلو بيتزا من بيتزا هت او وجك بتاع خشاف يتناول منه قطعه قطعه وهو بيحضر ليهو في (موفي) .يعني لا هو تامي سوداني ولا كمان خواجه...يعني حاجه كده في النص ماخد اكعب حاجه في الاتنين والهي (السطحيه)..
.اخونا الاستاذ بكري الصائغ طرح موضوع مهم بحكم اني اعيش بره وعندي اولاد عايزهم يكونوا جزء من منظومتهم بالاضافة انو اولادي امهم غربيه...يعني كل عناصر الاستاذ بكري الصائغ مفصلة علي مقاسنا وجينا عشان نتناقش في اسباب المشكله وجيت انت بعكازك المضبب بتاع انو ياخي الوطن ممكن نختلف فيهو لكين البوست مفخخ وانو في اغراض سياسيه وراهو ...ايوا انا بقول واحده من اسباب هجرة السودانين للخارج ورجوعهم للسودان لها ارتباطات بعوامل سياسيه... لكن كمان مايجو ناس عاجبم الزلط في امركا ولا الحصين في تكساس ويصادر حقي في التعبير يعني لزي ديل بنلبس ليهم ( السديري) طوالي ولو ما نفع بنلبس ليهم الهووت ...ولو جو عديل كمان ماعندنا مانع نكون بالفل سووت ونكون انجليز ونتعامل بادب وتهذيب عاليين وسودانيين بطيبة اهلنا في الباديه...

Quote: ما ياهو نحنا اتعلمنا في اعرق جامعات الغرب واتخرجنا منها لكين عمرنا ما اتعالينا علي اهلنا بنمشي ليهم في الخلا وبنلبس السديري والكدمول وبنشرب موية الحفاير والبرك وما قلنا ليهم انتو عيانين وله انتو متخلفين زي ما بيعملو ناس confuse.com واللهم اكبر (صفر) في حياة السودانيين في الخارج او داخل السودان...تعرف ديل الواحد بيكون برنامجو كلو بيتزا من بيتزا هت او وجك بتاع خشاف يتناول منه قطعه قطعه وهو بيحضر ليهو في (موفي) .يعني لا هو تامي سوداني ولا كمان خواجه...يعني حاجه كده في النص ماخد اكعب حاجه في الاتنين والهي (السطحيه)..

الاخ السنوسي عفارم عليك

وازيدها كمان نحن السودانيين المقيمين في الداخل الوسخانين في نظرها ديل برضو اتعلمنا بالداخل والخارج واتعاملنا مع العالم الخارجي ولا نزال , ونحمل ايضا الدرجات العلمية التي لم تحول بيننا والعراقي والطاقية والمركوب


بلد مظلوم والله من اولاده

الأخ الحبيـب الـحـبوب،
Elsanosi Badr

تـحـية الود والأعـزاز،
وسـرر لقـدومك ... ومـشاركتك الـمقدرة.

1 - نعود لـموضوع سـبب رفض بعض الأسر السودانية بالخـارج قضاء عطـلاتهم الصيفية بالسودان ... ولماذا يكره اولادنا وبناتنا ( الـجـيل الجـديد ) الدراسة بـجـامعات السودان، وهل للوالدين تاثيـر مباشر او غيـرمباشر علي اولادهـم في مقت وكـراهية اولادهـم للسودان?.

حـملت هـذه الأسئلة وتوجـهت بـها لبعض قـدامي السودانييـن المقيـمون ببـرلين منذ اكثر من 35 عامآ وبعـضـهم اصـبحوا جـدودآ وطرحـت عليـهمة ماعنـدي من اسـئلة فكانت الردود كالأتـي:

1 - احـدهـم اجاب بان اولاده يدرسون بالجامعة في برلين ولامشاكل عندهم بخصوص الدراسة ... اما بخصوص السفر وقضاء العطلة الصيفيـة هـناك فـهذا امر غير وارد علي الاطلاق فـي ظل الأوضاع الـمتدهورة والسـيئة في السودان منذ عام 1983 بعد تطبيق قوانيـن سـبتمبر الأسـلامية وايضآ في ظـل الأمراض الوبائية الخـطيرة التي اجـتاحـت البلاد ولااحـدآ يهـتـم بامرها!!!،

2 - سـودانية مسـلمة متـزوجـة من الـماني مـسيـحـي ولهــما ثلاثة اطـفال احـدهم بالـجـامعة ضـحـكت من اسـئلتـي طـويلآ عـندما سألتـها عـن السفر للسـودان واجابت ( ... فـي زول نـصـيـح بـمـشـي للـموت برجـله!!!?) وسـكت عـن الكلام،

3 - سـودانية اخري اجابت انـها تزور السودان بـحـسب الظروف ومع اولادها الذين يعودون من مديـنة كسـلا مـحـبطييـن وفي حالات نفسية سـيئـة للغاية بسـبب مايرونه من فقر وبؤس واطفال في اسـمال بالية ومدارس بلا جـدران فقط في العراء!!!

4 - سـوداني اخر يقول ان اولاده الصغار والكبار لايـحبون السودان ولـم يخفوا شـعورهم هـذا وقالوها صراحـة وبلا دس. لقـد سبق لهـم ان زارواالسـودان واسـتغربوا وجـود ( شـغالين ) رجال يقومون بالخـدمات الـمنزلية ومن كنس ومسـح وغسيل ويعملون طوال اليوم بلا ساعات محـددة ولايكلمهم احـد وممنوع عليـهم الأختلاط بأهل البيـت!!!، احـد اولاده علق وقال ان السودان يشـبه ولاية ( البـامـا ) الامريكية في سـنوات القرن الثامن عشـر عنـدما كان الكلب الامريكي اهـم من العبد الاسود بالولاية!!. يقول هـذا السوداني ان صـور (الشغالييـن) بالسودانييـن مافارقت مخيلتـهم ومنذ ان زاروا السودان عام 1983وحـتـي اليوم وماعادوا يرغبون في زيارته مرة اخري!!،

طالب سوداني يدرس ببـرلين لايفكر في زيارة السودان خلال العطلةالصيفيـة لانه سـيعمل باحـدي المـطاعم لتاميـن منصرفاته الدراسية، انه حـتي ان لم اعمل خلال عطلة الصيف فلن ازور السودان لانه بلـد قاتل ممـل لاحياة فيـه ... والناس هناك يموتون ببـطء شـديد وبلا اكـتراث!!

ونـواصـل .... مع تـحـياتي ومـودتـي الخـالصـة.

Quote: - فئة ثالثة من اولاد المغتربيين يقولون انهم واثناء تواجدهم بالسودان احيانآ لايفهمون مايدور حولهم من امور بسبب تفاوت عقلياتهم التي اكتسبت نمطآ معينآ من الحياة في الغربة وتتطبعوا بعادات وسلوكيات اوطانهم الثانية،... لذا فهم وينزوون بعيدآ عن باقي اولاد اعمامهم وباقي افراد الأهل والأسرة ويظلوا هكذا (منكمشين!!) حتي مواعيد الرحيل، لذلك فان الأجازة الصيفية تكون ممتعة فقط لأولياء امورنا الذين مافارقهم الطبع السوداني ومازالوا عليه ...ونراهـم مندمجيين في ونسات نحن لانحضرها للملل الزائد عن اللزوم فيها.

اولا العيب ليس في الاولاد ولكن في الاباء الذين لم يحسبوا حساب لعودة ابنائهم يوما ما ولذلك لم يعملوا على ربطهم بالسودان موطن جدودهم ومكانهم النهائى اذا كان لديهم تفكير في العودة اليه مرة اخرى
اما اذا كانت هذه الاسر لا تفكر في العودة فالاحسن لهم العمل على دمج ابنائهم في مجتمعاتهم الجديدة ويا دار ما دخلك شر

Quote: يقول احـد اصدقائي وهو مقيـم بدبي ان اطفاله قد تأثروا جـدآ بما يردده هو واصـدقاءه سلبآ عن السودان، والتصقت تعابير كثيرة سـيئة في اذهانهم الفجـة كنا نرددها في حضورهم اثناء مشاهداتنا للمحطة الفضائية السودانية مثل تعابير ( بلد حفرة ) ( بلد خربانة ) ( حكام فاسدين لصوص ) ( البلد باعوه وسففونا التراب ) ... وتعابير اخري اكثر حـدة جاءت كلـها تبعآ للحادث الذي نكون قد شاهدناه بالتلفزيون السوداني ، وتراكمت هذه التعابيـر عنـدهم واصبـحنا وكل اجازة نفاجـأ باولادنا ويقولون لنا ( ياابوي.. نحـنا مسافرين للبلد الـحفرة!!!).

هذا ما يؤكد ما ذهبنا اليه
كذلك هناك فرق كبير بين ارتباط السوداني بوطنه وغيره من الجنسيات الاخرى كالمصري مثلا فنجد ان السوداني دائما يعمل على سب وطنه والتفليل من شانه واظهار الكره له ووصفه باسوا الاوصاف كالحفرة والعن ابوها بلد وما الى ذلك من مظاهر ضعف التربية الوطنية لدينا نحن السودانيين على عكس المصري الذي لا يرضى اي سؤ في وطنه ام الدنيا وهو يمكن ان يكون غير راض عن النظام في مصر ولكن الخطوط واضحة بالنسبة له بين الوطن والنظام
وتجد ان كثير من السودانيين يهاجرون ويتزوجون من بلاد المهجر ويمكثون سنين عددا في اوطانهم البديلة وفي ساعة تجلي يتذكرون انهم سودانيون ولا يتذكرون الا ضعف الامكانات والفقر وقلة ذات اليد وينسون القيم والاخلاق السودانية الاصيلة التي لا تقدر بثمن كالذي يعلمه والده الفقير الى ان يتخرج ثم يعيره بانه فقير معدم ولا يليق به كاب وسط زملائه ووسطه الجديد بعد ان تخرج وتعلم وعمل

اما اولئك الذين يتزوجون من اجنبيات ويمكثون لعشرات السنين هؤلاء افضل لهم نسيان حكاية السودان دي والتعايش مع واقعهم الجديد وبلدهم الجديد ولا اظن ان السودان في قمة اولوياتهم وهو ليس في حاجة لانتقاداتهم التى تقلل من شانه ولا تزيده شيئا
كذلك لا يستطيع كثير من السودانيون التفريق بين السودان كبلد ينتمون اليه وواجب الوطنية يدعوهم لحبه والفخر به مهما كانت امكاناته ضعيفة وبين النظام الذي يحكم السودان وماهيته
لكل شخص ان يعارض اي نظام يرى انه لا يتفق معه ولا يمثله وله الحق في وصفه باسوأ الاوصاف الذي يرى انها تنطبق عليه
ولكن لا يحق له ان يسب وطنه وانه حفرة وما الى ذلك من اوصاف


اما مغتربي الدول العربية والذين لا يعلمون انهم لا محالة عائدون الى بلادهم فهم يخطئون في حق ابنائهم عندما لا يجعلونهم يعيشون واقع انهم من بلد اقل في الامكانيات من البلد الذي يعيشون فيه الان وكذلك يخطئون عندما لا يضعون منهج واضح لربط ابنائهم بعادات وتقاليد وطريقة عيش اهلهم في السودان مما يجعلهم فاقدي الهوية مهزوزي الشخصية الا من رحم ربي وذلك بسبب عدم شعورهم بانهم جزء من المجتمع الذي يعيشون فيه لان طبيعة المجتمعات التي يعيشون فيها لا تنظر لمؤهلات القادم اليهم ولا لنوع الخدمة التي يقدمها لمجتمعتهم بل ينظرون لذلك الوافد على انه مسترزق ضاقت به الحياة في بلده مما جعله ياتي لتقديم خدماته لديهم ولذلك هو اقل منهم مجتمعيا وان تسلح بالعلم والمؤهلات
هذه النظرة التي يعانيها الاباء ولكنهم يصبرون عليهاو يحاولون ابعادها عن ابنائهم بتوفير مستويات عيش مرتفعة وقريبة من تلك التي تتوفر لدى اهل البلاد الاصليين ويغفلون ربط اولئك ببلدهم الاصلي وتعريفهم بمستوى العيش هناك وانهم هنا لفترة مؤقتة لتحقيق اهداف محددة
هذا الشئ يفرز اجيال ترى انها ارفع مكانة من ذويهم في السودان دون ان تفارقهم عقدة النقص الناجمة من رفض المجتمعات التي يعيشون فيها لهم وعدم فبولهم كافراد في هذا المجتمع
ولذلك تكون النتيجة مزيد من رفضهم للمجتمع الاصلي الذي الذي جاء منه اباءهمو يحملونه المسئولية في وضعهم الحالي كونهم منه مما جعل رفضهم في المجتمع البديل واقعا يحاولون الهروب منه بالتطاول على مجتمعاتهم الاصلية

كذلك ينشا كثير من هذه الاجييال بوجدان وثقافة المجتمع البديل الرافض ويجهلون ثقافة مجتمعاتهم الاصلية مما يزيد المعاناة لديهم


الحديث اعلاه لا ينفي وجود اباء مستنيرين عملوا على ربط ابنائهم بالوطن وبالتالي كفاهم مؤونة الاجتهاد في سلخ جلودهم ومحاولة الانتماء لمجتمع لا يقبل بهم ويراهم اقل بغض النظر عن ماهي الحقيقة في من هو الاقل

الحديث يطول وهو ذو شجون


نعود باذن الله

Quote: 2 - سـودانية مسـلمة متـزوجـة من الـماني مـسيـحـي ولهــما ثلاثة اطـفال احـدهم بالـجـامعة ضـحـكت من اسـئلتـي طـويلآ عـندما سألتـها عـن السفر للسـودان واجابت ( ... فـي زول نـصـيـح بـمـشـي للـموت برجـله!!!?) وسـكت عـن الكلام،

3 لاتعليق

Quote: - سـودانية اخري اجابت انـها تزور السودان بـحـسب الظروف ومع اولادها الذين يعودون من مديـنة كسـلا مـحـبطييـن وفي حالات نفسية سـيئـة للغاية بسـبب مايرونه من فقر وبؤس واطفال في اسـمال بالية ومدارس بلا جـدران فقط في العراء!!!

4
لماذا لم تخبر هذه السودانية الاصيلة ابناءها عن البيئة التي نشات فيها ولماذا لم تعدهم لليوم الذي يشبون فيه عن الطوق لتغيير هذا الحال
هل هو التبرؤ من الوطن ومحاولة الالتصاق بالبيئة الجديدة والانتماء اليها مع نسيان الوطن الاصلي؟

Quote: - سـوداني اخر يقول ان اولاده الصغار والكبار لايـحبون السودان ولـم يخفوا شـعورهم هـذا وقالوها صراحـة وبلا دس. لقـد سبق لهـم ان زارواالسـودان واسـتغربوا وجـود ( شـغالين ) رجال يقومون بالخـدمات الـمنزلية ومن كنس ومسـح وغسيل ويعملون طوال اليوم بلا ساعات محـددة ولايكلمهم احـد وممنوع عليـهم الأختلاط بأهل البيـت!!!، احـد اولاده علق وقال ان السودان يشـبه ولاية ( البـامـا ) الامريكية في سـنوات القرن الثامن عشـر عنـدما كان الكلب الامريكي اهـم من العبد الاسود بالولاية!!. يقول هـذا السوداني ان صـور (الشغالييـن) بالسودانييـن مافارقت مخيلتـهم ومنذ ان زاروا السودان عام 1983وحـتـي اليوم وماعادوا يرغبون في زيارته مرة اخري!!،

هذا لانه لم يزر بهم السواد الاعظم من اهل السودان وذهب بهم الى بعض المناطق التي هي داخل السودان ولكنهم يعيشون بوجدان غير السودانيين وهم قلة قليلة لا يحكم بها على السودان وكثير منهم لا يشعر بهذا السودان كوطن وجلهم نتاج مثل هذه الهجرات التي تنتج هجينا لا يعرف الى اين ينتمي؟
هل يوجد هذا الشئ في معظم احياء السودان الذين يحترمون من يعمل معهم في اي عمل ويقدمون له الضيافة كضيف وليس كاجير ....... انهم لم يزوروا السودان بل زاروا احد المناطق المعلبة والتي لا تمثل السودان

Quote: طالب سوداني يدرس ببـرلين لايفكر في زيارة السودان خلال العطلةالصيفيـة لانه سـيعمل باحـدي المـطاعم لتاميـن منصرفاته الدراسية، انه حـتي ان لم اعمل خلال عطلة الصيف فلن ازور السودان لانه بلـد قاتل ممـل لاحياة فيـه ... والناس هناك يموتون ببـطء شـديد وبلا اكـتراث!!

زي ده كثيرين يتركون اهلهم ويهاجرون وينسونهم ويعادون السدان لا لشئ الا لانه بلد امكاناته اقل من حيث هم الان
اما ذا كان السبب سياسي فما ذنب الام والاب والاهل
لا حاجة للسودان بمثل طالبك هذا الذي يتخلى بمجرد ان وجد فرصة احسن رغم انه يمكنه ان يستفيد من الفرصة في تطوير نفسه دون التنكر لاهله

اني حزييييييييييييييييييييييين

Quote: ما تغيروا لينا مسار الموضوع و البوست, يا عبداللطيف و السنوسي, لو سمحتوا امشوا اتناقشوا في مكان ثاني اها ده سبب ثاني يا بكري انه الواحد ما يمشي السودان ولا يعاشر السودانيين لانهم في اي حاجه لازم يتشاكلوا و كل واحد يفرض رأيه و يبوظوا المكان.

واضح عليهم يا دانيا ، وحتى البيجيهم من برة
برضو بفرض رايه وعايز يحجر على الناس يتكلموا،،
عشان كدا ناس السودان مابتحملوك وأنت بهذا التعالي،،
==
واصلي مع الجماعة ديل في البوست بتاعهم ،،
وفي النهاية حيوصلوك لأنو الإنقاذ هي السبب
ود. خليل هو الحل ،،

Quote: هذا ما يؤكد ما ذهبنا اليه كذلك هناك فرق كبير بين ارتباط السوداني بوطنه وغيره من الجنسيات الاخرى كالمصري مثلا فنجد ان السوداني دائما يعمل على سب وطنه والتفليل من شانه واظهار الكره له ووصفه باسوا الاوصاف كالحفرة والعن ابوها بلد وما الى ذلك من مظاهر ضعف التربية الوطنية لدينا نحن السودانيين على عكس المصري الذي لا يرضى اي سؤ في وطنه ام الدنيا وهو يمكن ان يكون غير راض عن النظام في مصر ولكن الخطوط واضحة بالنسبة له بين الوطن والنظام وتجد ان كثير من السودانيين يهاجرون ويتزوجون من بلاد المهجر ويمكثون سنين عددا في اوطانهم البديلة وفي ساعة تجلي يتذكرون انهم سودانيون ولا يتذكرون الا ضعف الامكانات والفقر وقلة ذات اليد وينسون القيم والاخلاق السودانية الاصيلة التي لا تقدر بثمن كالذي يعلمه والده الفقير الى ان يتخرج ثم يعيره بانه فقير معدم ولا يليق به كاب وسط زملائه ووسطه الجديد بعد ان تخرج وتعلم وعمل اما اولئك الذين يتزوجون من اجنبيات ويمكثون لعشرات السنين هؤلاء افضل لهم نسيان حكاية السودان دي والتعايش مع واقعهم الجديد وبلدهم الجديد ولا اظن ان السودان في قمة اولوياتهم وهو ليس في حاجة لانتقاداتهم التى تقلل من شانه ولا تزيده شيئا كذلك لا يستطيع كثير من السودانيون التفريق بين السودان كبلد ينتمون اليه وواجب الوطنية يدعوهم لحبه والفخر به مهما كانت امكاناته ضعيفة وبين النظام الذي يحكم السودان وماهيته لكل شخص ان يعارض اي نظام يرى انه لا يتفق معه ولا يمثله وله الحق في وصفه باسوأ الاوصاف الذي يرى انها تنطبق عليه ولكن لا يحق له ان يسب وطنه وانه حفرة وما الى ذلك من اوصاف

اما اولئك الذين يتزوجون من اجنبيات ويمكثون لعشرات السنين هؤلاء افضل لهم نسيان حكاية السودان دي والتعايش مع واقعهم الجديد وبلدهم الجديد ولا اظن ان السودان في قمة اولوياتهم وهو ليس في حاجة لانتقاداتهم التى تقلل من شانه ولا تزيده شيئا


يادانيا قولي ثلاثـــة

سلام بكري

..
.
مقتطفات :

Quote: وسالته عن حل يرضيـك واولادك في اجازة ممتعـة بالسودان وموافقتهـم علي الدراسة بجامعات السودان ، فاجاب ...هـذا الحلم لايمكن ان يتحـقق والنظام الحـالي موجـود!!!

والله انا ما عارف الناس دى جات السودانولا بتسمع سمع بس ؟؟
النظام الحالى مالو؟؟ فيما يتعلق بتعليم الابناء وزيارة الوطن ؟؟
ضرائب ؟؟ ولا مصروفات ولا ما عاجبك النظام ؟؟
كدى اسال لينا الزول دا تانى يا بكرى انحنا اتغربنا ورجعنا وما كيزان ولا مؤتمر وطنى
عشان نفهم بس مشكلتو شنو ؟؟

Quote: احـدهـم اجاب بان اولاده يدرسون بالجامعة في برلين ولامشاكل عندهم بخصوص الدراسة ... اما بخصوص السفر وقضاء العطلة الصيفيـة هـناك فـهذا امر غير وارد علي الاطلاق فـي ظل الأوضاع الـمتدهورة والسـيئة في السودان منذ عام 1983 بعد تطبيق قوانيـن سـبتمبر الأسـلامية وايضآ في ظـل الأمراض الوبائية الخـطيرة التي اجـتاحـت البلاد ولااحـدآ يهـتـم بامرها!!!،

دا بره الاحداث ما زال يعيش على معلومات عام 83 .. وماهى الامراض البائية التى اجتاحت السودان ؟؟
طاعون مثلا ؟؟ ولا جدرى ؟
والله الواحد ما حزنان على الوضع بالسودان مثل حزنه على حالتكم وضياعكم العايشنو دا ؟؟


2

Quote: - سـودانية مسـلمة متـزوجـة من الـماني مـسيـحـي ولهــما ثلاثة اطـفال احـدهم بالـجـامعة ضـحـكت من اسـئلتـي طـويلآ عـندما سألتـها عـن السفر للسـودان واجابت ( ... فـي زول نـصـيـح بـمـشـي للـموت برجـله!!!?) وسـكت عـن الكلام،

دى اساسا ما عندها مثل ولا قيم ولا دين ؟؟ مسلمة تتزوج من مسيحى ؟؟
هى ما عارفه حتى زواجها دا ما شرعى ؟؟
فهل تعرف شيئا عن السودان ؟؟
عشان كدا احسن ليها تموت بره السودان .. وتخلي لينا

Quote: تلقيت رسالة من والد كريم يسكن في الأمارات يقول... فيها ان اكبر مشكلة تواجهه عند زيارة السودان مع أسرته هي مشكلة غلاء اسعار السلع الضرورية والأدوية والتي اصبحت اسعارآ ليست في متناول المغتربييـن!!!.

هذا عذر منطقي فى بعض الاحيان .. ولكن
غلاء الاسعار مشكلة تجتاح العالم اجمع ..
منذ 3 سنوات كان سعر كيلو الضان الحمرى فى الرياض بـ 13 ريال الأن بـ 27 ريال
فى السودان ب_ 13 جنية يعنى 26 ريال ..
كنت استئجر شقة بـ 13 الف ريال الان زملائى يدفعون 25 الف ريال
اغلى دواء اموكلان بـ 25 جنية فى دبي 60 درهم يعنى 30 جنية ..
بـ 3 جنية بتشترى سلطة كاملة .. كرتونة برتقال ب 20 جنية يعنى 40 ريال ..
ايجار العربات متوسط بـ 70 جنية يعنى 140 درهم اوريال فى السعودية بنفس السعر وكمان زيادة ..

Quote: انه يقول احيانآ اشعر بالحنين لزيارة الخرطوم التي درست بها... ولكنـي لااعرف احـدآ فيـها وأخاف ان ادخـلها بدون دليل او شخصآ اعـرفه فاتعـرض لـمشاكل لاتحـصي ولاتعـد بسـبب لون سـحـنتـي!!! !!!!.

يتصل على دينق .. ما جاء وقعد فى أوزون ووسط شماليين منو السالو عن سحنتو ولا قال ليهو حاجة
وزى ما قال توفيق .. نحن نتكفل بزيارته وارشاده .. وبنبعد عنو اولاد الحرام السودانيين البيض ديل عشان ما سألو
عن سحنتو ولا يقولو ليهو يا حركة شعبية .. ما يتكلم ساااى

Quote: سوداني اخر يقول في احباط شديد لقد اصبح السودان بلدآ طاردآ لأهله ولذلك قررت ان ابقي مع أسرتي بجدة و ( العاوزني من أهلي يجئ يزورني لكن نحنا ماحنمشـي للسودان!!).

دا قنعانين من خيرا فيه .. والما بريد اهلو مافى زول بجيهو .

Quote: مصاريف شخصيه لا حد ليها و لا عد, غير المرض و مافي حتى مويه نضيفه, قزازه المويه الله يعلم قايلانها وسخانه من بره مسحتها ما نضفت دخلت اصعبي اله يعلي طلع وسخان.. القزازة دى كانت واقعة ولا فى سوبر ماركت ؟؟

Quote: صرف قروش و حر و مرض و سخافات,

ياهو داالسودان العايز يجيهو يجى ولماعايز ينوم على الجنبة التريحو ونشوف منو الخسران ..
انتو ولا اولادكم ؟؟ على العموم نحن كسبانين .. قااادر الله يا توفيق .. اتخيل
والله يا دينا لمكى البشوفك بقول مولودة فى قصر بكنغهام ..

Quote: ولذلك نجد ان السودانييـن يتحاشون فتح موضوع السفر للسودان مع اولادهم بعد هذا الكم الهائل من الصور المحبطة للنفس والروح.

Quote: ومما زاد الطين بلة ان التلفزيونات الألمانية تبث دومآ صور الحياة في معسكرات دارفور والبؤس والمعاناة واطفال يقتاتون من صحون خاوية وامهات ماعاد عندهن من شئ ويقدم لاطفالهن الرضع. مما يعني للاطفال ان السودان ومنذ 18 عامآ هو بـلدآ لا غذاء فيه ...ولاسكن ...ولامدارس !!!

Quote: وهو مايزيد من قناعات الأسر ان السفر معناه .... الموت حيـآ بذلك البلد المسـمي بالسودان!!!

ياخى احكو ليهم عن واقعنا عن حرب الجنوب التى دامت بالسنيت
عن الخلاف بين الهامش والمركز
عن معاناة اطفال دارفور
عن معاناة ابناء الشمال
عن ان هذه بلادهم تحتاج لهم يوما ما..
ان كان الاباء ليس لهم معرفةولا ارتبط بالسودان فكيف حال الابناء

_______________

وأ شوقا على بلدى .. شوق زولا وولف بكاااى

شوفي يا دانيه ولا اسمك ايه انتي... نتناقش هنا ولا في السما اللحمر ده بوست الاخ العزيز بكري الصائغ هو طرح موضوع دي زاويتنا اللبنتناقش بيها منو

I will be back,

What you are gona do

Nothing, relax we are not at war, have a good day.

الأخ الحـبيب الحـبوب،
عبد اللطيف بكري أحمد

تـحـية الود والأحـتـرام.

(واصلي مع الجماعة ديل في البوست بتاعهم ،،
وفي النهاية حيوصلوك لأنو الإنقاذ هي السبب
ود. خليل هو الحل ،،)
"عبد اللطيف بكري أحمد"

حـقيقة احـبطت من كلامك!!!
لانك لو تـمعنت فـي مسار البوست وتعليقات وردود الاخـت دانيا وباقـي الأخوه الأعزاء تـجـد ان لااحـدآ منـهم قـد تطـرق للسياسة ...وانـما قالوا مايشعرون به من وجـهه نظر اجـتماعية تتعلق بـموضوع البوست ( لـماذا يكره اولادنا وبناتنا بالخارج قضاء عطلة الصيـف في بلدهم?).

ولو قرأت ببطء وعناية سـتجـد كل الذين شاركوا فـي الـموضوع لـهم أسر واولاد وشاركوا عـن خـبرة ودراية باحاسيـس اولادهم بـدون ان يتطـرقوا لسياسـة، ... وكنت انت يا عبداللطيف مـن قـمت بادخال الانقاذ فـي الـموضوع.

ثانيآ، لو لاحـظت ايضـآ ورغـم اننـي صاحـب البوست ... ماشاركت ولابتعليق واحـد ... وكـنت فقـط (نــــاقـــل ) لـمشاعر واحاسـيس القراء الـمشاركون بالـموضوع!!

ثالثآ، طالـما انـحـرف الـموضوع قليـلآ واتجـه للسياسة... فاقول لك ان كل الحكومات التي تعاقبت علي السودان منذ عام 1970 وحـتي اليوم قـد ظلمت المغتربييـن ظلمـآ شـديدآ ولـم تراع انـهم يرفعون من الدخل القومي ولايجـدون مقابله اي شكر او تحـسيـن لاحـوالـهم ... وجاءت الأنقاذ لتـزيد الطيـن بلة بقوانيـن ولوائـح (جـهاز الـمغتـربييـن) واجبار ابناء وبنات الـمغتربييـن دفع الرسوم الـجامعية بالعملة الصـعبة ...وهناك اشياء سلبيـة كثـيرة تعرفها انت احـسن منـي بـحكم وضـعك كـمغتـرب.

انا حـتـي الأن لـم اشارك بالـموضـوع لانه اصـلآ موضـوعكم انتـم الـمتزوجـون... وعـندكم أسر بالخارج واولاد... وتفـهمون مشاعر اولادكـم واحاسيـسـهم تـجاه الدراسة بالسودان ورأيـهم فـي عطلات الصيـف بالسودان ، اما عنـي فلا خـبـرة لـي بـهذه الامور لانـنـي بـحـمداللـه وشكره.... عـزابي!!!

لك مودتـي.

الأخ الحـبيب الحـبوب،
توفيق عبد المجيد،

تـحـية الود والأعـزاز،

وسـررت لـمرورك الكريـم، وتعليقاتك النيـرة... ولك شكـري علي توضـيحاتك لبعض النقاط التـي جاءت فـي ردود الـمشاركيـين الاعزاء.

1 - تلقيت رسالة يقول فيـها صاحـبها ان هناك ماهو اخطر بكثيـر من موضـوع اولادنا الذين يكرهون الدراسة بـجامعات السودان او قضـاء عطلات الصـيف فيه، فـهناك موضوع اصـبح يشغل بال كثيـر من بال الأسـر السودانية بالخارج ....وهـو رفض بعض الأبناء بشـدة الزواج من سـودانيات والأقتـران باخريات اجنبيات. انه يقول فـي رسالته لقـد كانت عمليات الزواج باجنبيات فـي البداية ظاهرة لاتلفت النظر ولكنها الأن اسـتشرت كالشرر بيـن ابناء الجاليات السودانية عندنا ( فـي جاليتنا ).

ولـما سألته عـن اين يكـمن الخـطر فـي هـذا موضوع زواج السوداني من اجنبية ...ولـماذا ينظـر الـي هـذا الـموضوع بـهذ السلبية وهو يعلم تمـامآ انه امر يـخص الابن البالغ العاقل?.

فاجاب ان الزواج من اجنبيـة معناه انهـم لايرغبـون بالعودة للسودان والبقاء بصـورة نـهائية فـي وطن الزوجة الاجـنبية وهو زواج يعنـي قطع العلاقة نهـائيآ مع الوطن الام وهـو امر يزعـج الاباء ويقلق مـضاجـعهـم كثيـرآ.

انه يقول ليـت الأمـر كان مـقتصـرآ علي الاولاد فقـط، ولكن ( موضـة!!! ) الزواج من اجانب جـذبت ايضـآ بناتنا السودانيات واصـبحن هـن يتزوجـن ايضـآ من اجانب ...واصـبح الأمر عنـدنا بالجالية اكثـر من عادي لايلفت النظر.

وراح صاحـب الرسالة ويكلـمنـي عن حالات الطلاق بيـن اولادهـم وبناتهـم الذين كانوا متـزوجييـن في السابق من اجنبيات واجانب، والـمشاكل مع اولادهـم وبناتهـن بعد الطلاق ويقول ....(ياما فـي الغـربة بنـدفع التـمن غالـي!!!).

لك مودتـي.
-------------------------------------------

رأي الشـخـصـي في هـذا الـموضوع انه ( هـايـف ) .... ولايسـتحـق الاهـتمام، ولكن يبـدو ان اعـضاء بعـض الجاليات فـي الخارج ماعنـدهـم ( شـغل ولامشـغلة!!! )...بالطبع مع احـتـرامي لصـاحـب الرسالة ومشاركته بالمـوضوع.

رأي الشـخـصـي في هـذا الـموضوع انه ( هـايـف ) .... ولايسـتحـق الاهـتمام، ولكن يبـدو ان اعـضاء بعـض الجاليات فـي الخارج ماعنـدهـم ( شـغل ولامشـغلة!!! )...بالطبع مع احـتـرامي لصـاحـب الرسالة ومشاركته بالمـوضوع.

موضوع الزواج من اجانب او اجنبيات يشكل هاجس بالنسبه للاباء في بلاد المهجر اكثر من بلاد الاغتراب. لانهم بيخافوا بزواج الابن او البنت تضيع الهويه في الاجيال القادمه, و انا أتحدث عن اسرتي و اسر صديقه نعرفها هنا, والدي ووالدتي كان مصدر رعبهم الاول ان اتزوج انا او احد اخواني من امريكي او امريكيه و كثيرا ما كنت امزح في الموضوع لكن يتحول لغضب و مشكله و لقد رأيتهم يتنفسون الصعداء (مش بيقولوها كده) لمن تزوجت من سوداني, الان اري الرعب في عيونهم لان اختي الصغيره تخرجت من الجامعه و قرروا انهم يلهوها من موضوع الزواج بدفعها للدراسات العليا. و أرى نفس الشئ مع صديقتها مع ان ولا واحده منهم تفكر في الزواج و قد تناقشت مع امي و صديقتها كثيرا و كان الجواب خليهم يحضروا هسع, قلت ليهم طيب و بعد يخلصوا تحضير, قالوا للوقت داك الله كريم, دعواتنا و صلواتنا انه ربنا يصرف مننا ناس مايكل و ماثيو انشاء الله تستجاب. يعني بأختصار الزواج باجنبي او اجنبيه بعبع لبعض الناس في المهجر, لا ننسى انه معظم المهاجرين تركوا السودان لظروف سياسيه و لطيله 19 سنه عندهم امل انهم يرجعو ثاني و كل ما مرت السنين الامل بيقل و احساسهم بعدم الامل كمان بيزيدوا زواج الاجانب لانهم بيحسوا انهم خلاص اولادهم ما حيرجعوا ثاني و الجيل الثالث من سلسالهم حيفقد الهويه. الزواج في كل مكان في العالم قرار شخصي الا عندنا قرار اسري جماعي و لا ننسى كمان اننا في السودان و خصوصا الجيل بتاع ابهاتنا لا يتقبل من هو غريب و غير معتاد عليه سوى كان شخص او عادات اخرى, لا تستغرب ان قلت ليك في ناس في المهجر بتجبر اولادها ياكلوا اكل سوداني عشان بس يقنعوا نفسهم انه اولادهم سودانيين و بيحبوا كل ما هو سودني.

تخريمه, احد صديقاني ام لبنت تناقشت معها في موضوع زواج ابنتها من امريكي كان ردها للزمن داك يمكت اموت ولا يمكن اخرف و يجيني الزهايمر و ما تفرق معاي. موش قلت ليك بعبع, و على فكره الخوف واحد عند بعض الناس بالنسبه للبنت او الولد و انا كان اكثر طبعا للبنت بحكم اننا بنكون دايما over protevtive للبنات,

اتمنى اني ما طلعت من الموضوع و سوري على اللغط اللي حصل فوق. و تحياتي

الاخ بكري تحياتي

Quote: رأي الشـخـصـي في هـذا الـموضوع انه ( هـايـف ) .... ولايسـتحـق الاهـتمام، ولكن يبـدو ان اعـضاء بعـض الجاليات فـي الخارج ماعنـدهـم ( شـغل ولامشـغلة!!! )...بالطبع مع احـتـرامي لصـاحـب الرسالة ومشاركته بالمـوضوع.

بالعكس اخي بكري الموضوع حيوي جدا وهام ويجب مناقشته باستفاضة
وفي كثير من الدول التي لها جاليات بالخارج وخاصة بلاد المهجر يكون هناك ارتباط ايجابي بالبلد الاصلي
وتجد الاجيال الاحقة رغم عدم ارتباطها المباشر بالبلد الاصلي بلد الاجداد الا انهم يشعرون ببعض الارتباط الوجداني باصولهم وفي كثير من الاحيان يعملون على تكوين (لوبيهات)لانشاء مشاريع تنموية في بلدهم الاصلي والذي يمكن ان يكونوا لم يروه ولا اباءهم حتى ولكن تجد ذلك الارتباط الايجابي
اما في حالة بلدنا المنكوب من اهله السودان لا نجد هذه الايجابية بين الاجيال اللاحقة (الثالث وما بعده) واذا كان هناك ارتباط يكون في الغالب خصما على الوطن الا من رحم ربي وذلك بسبب ضعف ارتياط الاباء اصلا

لان كثير منا يعتبر وطنه هو فقط مكان اكل عيشه وينسى مكان المولد والمنشأ حيث يمكن الانتماء لكل
منهما



مع التحايا لكل المتداخلين

بكري الصايغ ...
تحية و ود ...
أوفيت الموضوع حقه فواصل و تسامى عن من يفسدون كل بوستات المنبر بقصد أو بدونه ...
شكراً لك وواصل فالموضوع حيوي فعلاً ...
مودتي و إحترامي ...

Quote: الأخ الحـبيب الحـبوب، عبد اللطيف بكري أحمد تـحـية الود والأحـتـرام. (واصلي مع الجماعة ديل في البوست بتاعهم ،، وفي النهاية حيوصلوك لأنو الإنقاذ هي السبب ود. خليل هو الحل ،،) "عبد اللطيف بكري أحمد" حـقيقة احـبطت من كلامك!!! لانك لو تـمعنت فـي مسار البوست وتعليقات وردود الاخـت دانيا وباقـي الأخوه الأعزاء تـجـد ان لااحـدآ منـهم قـد تطـرق للسياسة ...وانـما قالوا مايشعرون به من وجـهه نظر اجـتماعية تتعلق بـموضوع البوست ( لـماذا يكره اولادنا وبناتنا بالخارج قضاء عطلة الصيـف في بلدهم?). ولو قرأت ببطء وعناية سـتجـد كل الذين شاركوا فـي الـموضوع لـهم أسر واولاد وشاركوا عـن خـبرة ودراية باحاسيـس اولادهم بـدون ان يتطـرقوا لسياسـة، ... وكنت انت يا عبداللطيف مـن قـمت بادخال الانقاذ فـي الـموضوع. ثانيآ، لو لاحـظت ايضـآ ورغـم اننـي صاحـب البوست ... ماشاركت ولابتعليق واحـد ... وكـنت فقـط (نــــاقـــل ) لـمشاعر واحاسـيس القراء الـمشاركون بالـموضوع!! ثالثآ، طالـما انـحـرف الـموضوع قليـلآ واتجـه للسياسة... فاقول لك ان كل الحكومات التي تعاقبت علي السودان منذ عام 1970 وحـتي اليوم قـد ظلمت المغتربييـن ظلمـآ شـديدآ ولـم تراع انـهم يرفعون من الدخل القومي ولايجـدون مقابله اي شكر او تحـسيـن لاحـوالـهم ... وجاءت الأنقاذ لتـزيد الطيـن بلة بقوانيـن ولوائـح (جـهاز الـمغتـربييـن) واجبار ابناء وبنات الـمغتربييـن دفع الرسوم الـجامعية بالعملة الصـعبة ...وهناك اشياء سلبيـة كثـيرة تعرفها انت احـسن منـي بـحكم وضـعك كـمغتـرب. انا حـتـي الأن لـم اشارك بالـموضـوع لانه اصـلآ موضـوعكم انتـم الـمتزوجـون... وعـندكم أسر بالخارج واولاد... وتفـهمون مشاعر اولادكـم واحاسيـسـهم تـجاه الدراسة بالسودان ورأيـهم فـي عطلات الصيـف بالسودان ، اما عنـي فلا خـبـرة لـي بـهذه الامور لانـنـي بـحـمداللـه وشكره.... عـزابي!!! لك مودتـي.

شكرا بكري الصائغ،،
أهل علم النفس يقولون بأن الحالة الذهنية لها تأثير
مباشر على الإدراك ، وهانحن نربط جل مشاركاتك بنبش
الإنقاذ والإنقاذيين ،،
على العموم الموضوع يستحق المزيد من التعمق وسوف
ندلي بدلونا من واقع تجارب شخصية،،
أشكرك مرة أخرى على هذا الفهم والرد الواعي ولك
إعتذاري،،
==
الأخ أشرف البناء : كن بناء شريف ولا تعمل معولك الهدام
بهذه السهولة ،، ليس منا من حاول يوما إفساد بوست
عن قصد أو غير ذلك،، إنها ساحة للعراك النزيه والمقارعة
بالرأي ، وكان رأيي أن الأخ بكري الصائغ لا يركز على جوهر
الموضوع بقدر ما يركز على مثالب الإنقاذ،،
إرجع لكل مشاركات بكري أو لمعظمها : ليس فيها إلا الطرق
بيد من حديد على الحكومة ، وحتى لا نلعب لصالح ورقة المعارضة
قلت رأيي لأنه للأسف للحكومة ولا المعارضة لا تلقي بالاً للوطن
أو المواطن في سعيها المحموم نحو السلطة وكراسيها،،
عرفت يا أبو شريف؟؟؟==

==
على فكرة : هذا البوست ساعدني كثير في التعرف بأحلى وأرق
وأمتع شخصية يمكن الجلوس إليها ونقاشها في هدوء،، صارت
بسبب هذا البوست لي مع هذه الشخصية علاقة متينة وكأنها
من ألف سنة،،
السنوسي بدر: رائع رائع رائع ،،

الموضوع مميز ومهم جدا أن تتناقشوا فيه بموضوعية

الموضوع جد خطير ولا بد من دراسة واقعية وعلمية

الموضوع فلذات أكبادكم يامغتربين ويمس تكوين شخصياتهم

كما أنتم تظنون أن أبناءكم لا يرغبون فى قضاء الإجازة فى السودان بالمقابل بعض الأسر

السودانية تتضايق من وجود أطفال المغتربين معهم طوال فترة الإجازة الصيفية...

يعتقد بعض (المواطنون السودانيون) أن أولاد المغتربين مدلعين وخمجانين ولا يحترمون الناس الكبار

وكثيرى التزمر والإمتعاض والشكوى ... ومعظم تصرفاتهم فيها شى من الرعونة واللامبالاة...

يجب دراسة الموضوع من كل النواحى وليس من جانب اولادكم الما عايزين يجوا السودان عشان الحر والغبار

تصرفات بعض أولاد المغتربين فى المطارات تثير الإشمئذاذ ... فوضى وصريخ وجرى والأم تلقاها منهمكمة فى

فى السوق الحر ومخمخمة بمليون كيس وما جايبة خبرم...

الموضوع ما الأولاد براهم الأولاد ديل مراية ليكم .... يعكسون رأيكم الحقيقى

فإمتعاض المغترب وتبرمه وشكواه من النزول للسودان وحكاية السوق والمرة عايزة تسافر مخمخمة ولابسة

أحسن لبس ومكشكشة بالدهب والحلى يمنح الأولاد شعور لا يجدون له تفيسر ومبرر فكيف هم مسافرين إلى

الحفرة كما يقول والدهم وأمهم فى نفس الوقت تتزين وتتحلى (مشهد متناقض) يترك أثرا عليهم

أدرسوا الموضوع من كل النواحى ...

ولا تظلموا أولادكم

والله من وراء القصد

Quote: الأخ أشرف البناء : كن بناء شريف ولا تعمل معولك الهدام بهذه السهولة

الأخ عبداللطيف ...
تحية و إحترام ...
يا أخي لم أسيء إليك و لم أوجه إليك كلمة جارحة ... و رأيي دائماً و مسلكي أنّ نعم للإختلاف الراقي و أن إختلاف الرأي لا يفسد للود قضية ... و تكلمت مع الأخ بكري بطريقة إفترضت فيها حسن النية من جانبكم فقلت ( بقصد أو بدونه ) و أنتم تحولون موضوع الحديث و مساره إلى غير ما أراده كاتب الموضوع ...
و بهدوء أقول لك : قال الأخ بكري :

Quote: حـقيقة احـبطت من كلامك!!!

فوجهت كلامي له لتشجيعه على الإستمرار في الطرح المفيد ...
نرجع لمسألة طريقة خطابك لي :

Quote: ولا تعمل معولك الهدام

ألا ترى أن أسلوبك جارح و أنت تصف معولي بالهدّام ...
إذا ماكانت مشاركات الأخ بكري جلها ينتقد فيها الحكومة فهو حق مكفول له و ليس لك أو لي أن نحدد له أو لغيره ما يريد أو كيف يريد...
يا أخي لا تكن إنطباعي و حاول أن تتعرف إلى الناس قبل أن تختلف أو تسيء إليهم ...
و لاتكن كما قال الشاعر :
و أول ما قاد المودة بيننا سباب********** قلنا كلاماً فجاءت بمثله لكل كلام يا بثين جواب
وتقبل خالص إحترامي ...

Quote: بكري الصايغ .. تحية و ود ... و تسامى عن من يفسدون كل بوستات المنبر بقصد أو بدونه ...شكراً لك وواصل فالموضوع حيوي فعلاً ...مودتي و إحترامي

أخي البنا ،لك الود ، وأرجو فعلا ألا نفسد البوست
ونحيد به عن غايته،، أنظر لقولك أعلاه وحكم ضميرك
إن كان فيه ما يغضبني أم لا!! أنا لم اقل لك إنك أسأت لي
ولكنك تركت الباب مورابا لنفهم ما رميت إليه بحسن النية
مع إن قولك يحتمل التفسيرين،،
عزيزي : أنا لم أصدر عليك حكما مسبقا ، بل بالعكس لم
أتداخل معك إلا بعد مشاركتك ، وكن علي يقين بأنه يشرفني
حقاً التعرف عليك عن كثب ، وأعلم أخي أن التواصل من خلال
هذا المنتدى لا يعكس معادن الناس على أصولها وعفوا إن
جار حكمنا على معولك،،
سلام،،

استاذ بكري الصايغ
تحية طيبة

بالتاكيد توجد ظواهر تؤكد وجود هذا المنحى بين الاجيال الحديثة ان جازت التسمية ، ولكن برضو ما ممكن نعمم انا افترض لكل حالة حالة خصوصيتها وتلعب عوامل ومتغيرات عديدة ادوار محتلفة في تشكيل اتجاهات واراء الاجيال الجديدة نحو السكن او الدراسة في السودان فمثلا اذا اخذنا متغير العمر فمن ملاحظاتي ارى ان كل ما قل العمر كلما كان الاطفال متعلقين بزيارة السودان فمثلا اولادي لما كنا نرجع السودان في الاجازة بكونوا مبسوطين خالص من الحوش ولمة الناس والونسة والفوضى عموما وهي تشكل لهم عامل جذب لما يفتقدوه هناك ( وهنا برضو يلعب متغير المكان والزمان الذي عاشوا فيه دورا) ، اما الاكبر سنا فتجد عوامل الجذب تقل لان احتياجاتهم تختلف باختلاف العمر فلا الحوش الواسع يشكل عامل جذب ولا لمة الناس حيث يعتبرونها تعدي على الخصوصية والفوضى غير المرغوبة.
اما من ناحية تردي مستوى الحياة من مقومات بني تحتية وظروف بيئية موضوعية ملائمة لحياة اي انسان فهي تكاد تكون منعدمة في السودان فهم يرفضونه لغياب هذه الاسس اذا فهم على حق
اما البعد الاجتماعي والانساني في العلاقات الاسرية فاصبح عنصر غير جاذب لاندثار قيم جميلة كان يتحلى بها افراد شعبنا من حب الخير والروابط الانسانية القوية المبنية على المودة وحلت محلها تلقائيا علاقات مبنية على المصالح فقط ( معاك فلس تسوى فلس ما معاكش ما تسواش ) وهي حقيقة مرة افرزتها لنا حالة الفقر المدقع التي يعاني منها غالبية افراد الاسر في السودان فكيف تستقيم علاقات انسانية مبنية على ان المغترب هو البقرة الحلوب فقط ولا احد ينظر لمعاناته هناك.
اما حكاية الدراسة في السودان في رايي نوع من الجنون ان ترسل اولادك للدراسة في السودان حيث يواجهون باطنان واطنان من المشاكل اخفاها ضررا ضعف مؤسسات التعليم من بني تحتية وقوة بشرية تتمتع بالعلم والمعرفة (ليس تعميما ولكن غالبية) مروار بالماعاناة اليومية في الحياة من انعدام الخدمات الاساسية من كهرباة ومياه وصرف صحي اضافة الى غلاء المعيشة ، واخطرها الفساد الاجتماعي وهنا الطامة الكبرى مع غياب الرقابة المباشرة من الوالدين ووجود اصدقاء وصديقات السوء وما اكثرهم يجد ابناء المغتربين انفسهم ضحايا وعرضة للاستغلال بشتى ضروبه. عاقل من يرسل ابناءه للدراسة الجامعية خارج السودان
خلاصة حديثي الموضوع معقد وتتداخل فيه عوامل عديدة وعلى راسها البعد الاقتصادي واندثار القيم الانسانية المبنية على الصدق والحب وازدياد وتيرة المصالح في انشاء واستدامة العلاقات فللأجيال الجديدة الحق كل الحق في النفور منه.
صفية

الأخ الـحبيب الحـبوب،
توفيق عبد المجيد

تـحـية الود والأعـزاز،
والشـكرعلي قدومـك مجـددآ والـمشاركة فيه بأهتـمام.


Quote: رأي الشـخـصـي في هـذا الـموضوع انه ( هـايـف ) .... ولايسـتحـق )الاهـتمام، ولكن يبـدو ان اعـضاء بعـض الجاليات فـي الخارج ماعنـدهـم ) شـغل ولامشـغلة!!! )...بالطبع مع احـتـرامي لصـاحـب الرسالة ومشاركته بالمـوضوع.


عـدت لاوضـح لك ان الـمقصـود بالـموضوع )الـهايف) هـو موضوع زواج السوداني من اجنبية ام العكـس ومايدور حـوله من لغـط الكلام وتشـنجات وتعصـب في الرأي. هـذا الـموضوع عندي لايسـتحق وان يكون محـل اهتـمام اعضاء الجاليات السودانية بالخارج. والايتدخل الوالد اوباقي في مشاريع وخـطط اولادهـم وبناتـهم الـمستقبلية.

باقي مواضـيع البوسـت جديـرة باهـتمام وبعـناية من عـندهم ذرية بالخارج.

لك مـودتـي.

انا اعتقد بان موضوع ابناء وبنات المغتربين والمهاجرين فى الخارج موضوع حيوى وهام
وكذلك الموضوع الجديدالذى اشارت اليه بنت المكى عن زواج السودانيات من اجانب والسودانيين من اجنبيات ايضا موضوع جدير بالاهتمام
فانا لا اقول بان الزواج من اجنبى او اجنبية غلط لان الحب ليس له حدود ولكن اغلب هذه الزيجات فاشلة...
ويا بنت المكى انت قايلة الزواج من امريكى حيكون زواج ناجح؟؟؟ انتى ما سمعتى بقصة الجندى الامريكى الذى تزوج
من اميرة بحرينية وذهب بها الى امريكا وهناك دبت الخلافات حتى انه جعلها تمارس الدعارة واخيرا طلقهاوتبهدلت اخر بهدلة
وحكوا قصتها بالتفصيل فى الاسبوع قبل الماضى فى قناة تلفزيونية امريكية واجروا معها ومع طليقها مقابلات وحكوا عن تجربتهم الفاشلة

ويا بنت المكى انت قايلة الزواج من امريكى حيكون زواج ناجح؟؟؟


يا أخ السر

انا لا قلت الزواج من امريكي ناجح و لا قلت فاشل لاني لست في موضع حكم بحكم اني متزوجه من سوداني و بالتالي لا استطيع الحكم, انا ناقشت الخ صاحب البوست انه موضوع زواج الاجانب و الاجنبيات موضوع مهم جدا و بيمسنا كلنا كمهاجرين و انا ناقشت واقع اسرتي و اسرة صديقه و موقفهم من الزواج المختلط, لكن بصراحه ما عندي فكره انه ناجح ولا فاشل لان في ناس ناجحين و ناس فاشلين في الزواج المختلط, زي مافي زواج سوداني بحت ناجح و واحد ثاني فاشل. و على الرغم انه عندي صديقات متزوجات امريكان و زواج مستمر من كم سنه على العموم عمري ما فكرت فيه لان ما يناسب صديقاتي قد لا يناسبني و في نفس الوقت صديقاتي المتزوجات امريكان ما اتزوجه سودانيين لان ما يناسبني لا يناسبهم. انا في رأيي ان لحكم على الزواج المختلط سابق لاوانه بالنسبه لينا كسودانيين في دول المهجر لانه انتشر بالصوره دي من يمكن 5 او 10 سنوات و اعتقد انها فتره غير كافيه. لكن ممكن ينجح, انا عندي صديقه طبيبه متزوجه من 11 سنه من امريكي و معاها بنتين و اسعد من يكون, و هي على فكره 34 سنه في امريكا و مشت السودان مره واحده تفتكر انها ممكن كانت تتزوج سوداني؟ لكل حاله ما يناسبها, بأعتباري ام لطفل اتخوف احيانا من فكرة زواجه من اجنبيه لكن اسأل نفسي هل انا على حق؟؟؟
و لك تحياتي

الأخ الحـبيب الحبـوب،
أشـرف البنا،

تحـية الود والاعـزاز،

والشكـر الكتيـييييـر علي عـودتك ومشاركتك، وخـليك حـليـم وان شاء اللـه البوست مايتخـرب ويحـقق اهـدافه ونلقي لينا حلول مع الـمشاكل العملوها ...الكبار وبدفعوا تـمنها الكل ( الصغار والكبار ).

وصـلتنـي مكالـمة من أخ عزيز يعيـش باحـدي دول الخليـج يحكـي فيـها بـمرارة شـديدة سـبب كراهـية ابنتـه للسودان ولاي حاجـة لـها بالسودان. يقول الوالد في مكالـمته انه وفي احـدي العطلات الصيـفية ولظروف خاصـة به لـم يستـطع السفر فارسل العائلة للسودان وبقي هو في بلده التاني. وكانت ابنته وقتها عمرها خمسة اعـوام فقامت امـها وشقيقاتـها باجراء عـملية الختان لـها وتعرضت لنـزيف وتـم نقلها للمستشـفي وتـدهورت حالتها الصـحية طويلآ وعادت الأسـرة بعـد خـمس اشـهر ووقتـها ولـحظة رؤيتـي لابنتـي ماعرفتها في الحال بسـبب البؤس والحالة الصحـية الـمزرية التـي كانت عليـها.

وبدات مشاكل ابنتـي في الـمدرسة عنـدما شـعرت انـها وعـضويآ تختلف عن باقي بنات جـنسـها سواء كانوا عربيات او اسـيويات. وبدات تتخـلف من حـصـص الرياضة وتركت رياضـة السباحـة التـي كانت هـوايتها الأولـي، وتغيـرت تـمامآ واصبـحت منطوية بصـورة شـديدة علي نفسـها. ورحـنا نهـئ لـها انواع الرفاهية ونتـجـنب سـيـرة السفر للسودان والتـي وماإن تسـمعها حـتي تصـاب بالدوار الغيـر مفتعل.

انه يقول في مكالـمته، ابنـتي عـمرها الأن 23 عامـآ ولـم تقم بزيارة ولو واحدة للسودان بعـد سفـرتها الاخيـرة، وكنت ابقي معـها احيانآ في عـطلات الصيـف وتسافر باقي العائلة واحيانآ تبقي امـها واسافر وحـدي بـدونهـم.

ماهـو مستقبل ابنـتي في ظل عـدم رغبتها زيارة السودان ولاتود رؤية اي كائنآ ماكان من أهـلها?، لقد ناقشـتها في هـذا الموضـوع واوضـحـت لـها اننـي كوالد وأب قلق للغاية علي مـستقبلها والعمـر يجـري بي سـريعآ واتـمني ان اموت مرتاح البال وانني ماقصرت معـها، وماكنت اجـد منها اجابة الا انهيار الدموع و ( تهـتهـة ) فـي الكلام لااعرف معناه!!

انه يقول، قريبآ سـأكون بالـمعاش وعلي ان اغادر البلـد الذي قضـيت فيه 31 عامـآ، ولكن ماذا عن ابنـتي!!.. .. اللـه اعلـم!!

حاولت ان اواسـيه واخـفف عليه ومابه من حـال،.... فزجـرني قائلآ انه يكره الـمؤاساة التـي ظل يسـمعها وطوال 26 عامآ!!


لك مودتـي،

الاخ بكرى الصايغ

البوست ممتع وحيوى المراد به عكس مشكلة اساسية يتعرض لها
جزء كبير من المغتربين وهذا ليس اجماع طبعا .
انا اتكلم عن تجربتى انا شخصيا عشت فى الامارات لاكثر من عشرين عاما
مشكلة الابناء نحن السبب الاساسى فيها حبهم للوطن والسفر اليه نحن الذى
نحبب لهم السودان او نكرههم فيه طفلك انت باستطاعتك ان تطوعه وهو طفل
ليشب على ما زرعته فيه ابنائى وضاح وشيماء والدهم له الرحمة والمغفرة
من هم اطفال لا يناموا الا بحديث عن السودان وتاريخه وبطولاته ومدنه وقراه
اطفالى منذ الروضة لا يتكلمون الا عن السودان ابنى وضاح وعمره سبعة سنوات
ذهب لمعرض الكتاب بالمجمع الثقافى وطلب من مكتبة جامعة الخرطوم كتاب للشاعر
الجاغريو ذهل الرجل واداهوا الكتاب مجانا وكان سعره خمسون درهما وحفظ اشعار
الحقيبة وتغنى بها فى النادى السودانى بابو ظبى وهو فى العاشر من عمره وغنى
ارض النيل افريقيا مكانى للكاشف وهو فى الخامسة عشر من عمره ويشهد على ذلك
الاخ عبد الرحمن سوركتى واراهو الان مع الحضور وهو من علم ابناءنا معنا حب الوطن واذهل
الحضور بادائه .
ابنائى اخر يوم للامتحانات لا يجلسون فى ابو ظبى ولا ساعة ومرات من المدرسة
على المطار لانه نحن اجازاتنا خمسة واربعون يوم وهم يجلسون فى السودام من مايو الى
نهاية اغسطس سنويا ولان وضاح شهادة عربية وعامله ليهو عقدة وزعلان انه امتحن من ابو ظبى
اصر ان شيماء ترجع تدرس سنة تالتة ثانوى فى السودان وتمتحن من السودان وهذا ما حصل
وعندنا اخى بكرى احسن الجامعات واعرقها وكفاءات السودان هى التى تدرس فى كل دول
العالم واقول للاخ القال الجامعات فى سوريا ومصر والهند احسن من السودان اتقى الله فى
قولك هذا جامعة الخرطوم الرباط الجزيرة السودان الاحفاد مامون حميدة التقانة الاسلامية الاهلية
كمبيوتر مان وعفوا لمن فاتنى ان اذكرها حاجيك بالتفصيل ان شاء الله .
من يريد ان يجعل ابناءه لهم انتماء للسودان يستطيع ذلك بكل سهوله ومن يريد ابناءه ان يجاروا
الغرب والخليج فى كل شىء حتى ثقافاتهم ايضا يستطيع لان الامر اولا واخيرا يرجع للوالدين لغرس
كل جميل ومافى اجمل من السودان طالت الدنيا ام قصرت .
ولى عودة وتحياتى لكم
ولك الود اخى بكرى
ام وضاح

Quote: زمان و انا طفله كنت اكره اجازة الصيف لانه معناها الملاريا و الحر و حمو النيل و ارجع من السودان هدومي و لعبي و حاجاتي كلها شالوها مني بنات الخالات و الجارات و العمات, اجازه متعبه و تمر كأنها سنين و ياما بكيت في المطار عشان ما عاوزه امشي



\\
و المشكله شنو انه طفله عمرها 5 سنوات تقول ما بحب امشي السودان عشان بيجيني حمو نيل و ملاريا و مافي مكييف امي بتوزع حاجاتي على الناس لاني بره و مكن يشتروا لي غيرها لمن نرجع.؟؟ الناس الكبار لو خيروها تمشي تمرض و تقعد في السخانه ولا تقعد ترطب بره حتختار شنو؟ لاحظ انه دي فترة بداية الثمانينات لمن كان لبن النيدو بيجبوه من بره و من السوق الحر يعني ما سودان هسع الفيه كل الكماليات طالا ما معاك قروش.

الأخ الحـبيب الحبـوب،
صلاح أبودية،
تـحـياتي ومـودتي،

وسـررت لمـشاركتك الـمقدرة، وامل ان تواصل بتعليقاتك الـمثمرة.

تلقيت مكالـمة من أم عزيزة اكن لـها كل الود والأحـترامات... وقالت انـها ام لخـمسة بنات وولد ويعيشون جـميعآ باحدي دول الخليج منذ اكثـر من 30 عامـآ وزوجـها معلـم بنفس الدولة.

والـمشكلة التـي تؤرقـها ان ثلاثة من بناتـها اكملن الجـامعات ويعملن طبيبات باكبـر مسـتشفيات الدولة ولـهن سـمعية مهـنية عالية ... ويسافرن للخارج في مؤتمـرات طبية علي حسـاب الدولة واكتسـبـن خـبرات ومـهارات في مـجالات تـخصصـهن بعد اجـتيازهن امتحانات الدولة في التخـصصات العالية.

سافرت احـدي البنات لتقديـم اوراقها للمجـلس الطبي بالخرطوم بغية العمل ببلـدها السـودان... وفعلآ تـم قبول اوراقـها وعاينت اللجـنة اوراقـها بعـد قضاء اكثـر من سـتة اشـهر من تقـديـمها الاوراق والمعاينات والـمقابلات تـم رفض طلبها بدون ابداء اي اسـباب!!!!

تقول الأم بـحـسرة شـديدة، لقـد اقسـمن بناتي انـهن لن ولن يعملن بالسودان الذي هـو اصـلآ ماقدم لهـن شـيئآ، وانهـن ايضـآ لن يزرن هـذا البلد الطارد لأهله وكفاءاته ويرفـض عـوده ابناءه وبناته ويضـع امام العائـدين عقبات وصـعوبات حـتي لايرجـعوا.

تقول الأم، لقـد اصـبح وضـعي مـحـرجآ بعد ان رأيت بعيـني اضـطهاد بنتـي الدكتورة الكبيرة الـحاصلة علي ارقي واعلي الشهادات الطبية من قبل الـمجلس الطبـي الذي ينظر طلبات التقديـم للعمل كأطباء ... وتعامل ابنتـي الـمؤهلة تاهيـلآ عاليآ وكانها تسـتجـدي العمل بالسودان... وتعامل وكانها خريـجـة جـديدة عـديمة الـخبـرة والـحنـكة بامور الطب... ناسـيـن اعضاء هذه اللجنة انها تخـرجـت قبل عشـرة اعـوام مضـت، ....

وتكمل الام كلامـها واصـبحـت صـامته لااقول ولا كلـمة حـيال رفـض بناتي السـفر للسـودان .... ولا حـتـي قضـاء اجـازة الصـيـف بيـن الأهل والاقارب!!!

قلت للأم المـكلومة اننـي سـأنقل كـلامـها للقراء الأعـزاء بالـمنبـر العام وقـد يقـدمون حـلآ يـجـمع هـذه الأسرة مرة اخـري بالسودان!!!

لك مودتـي.

عزيزي ابوبكر(بكري)

Quote: وكانت ابنته وقتها عمرها خمسة اعـوام فقامت امـها وشقيقاتـها باجراء عـملية الختان لـها وتعرضت لنـزيف وتـم نقلها للمستشـفي وتـدهورت حالتها الصـحية طويلآ وعادت الأسـرة بعـد خـمس اشـهر ووقتـها ولـحظة رؤيتـي لابنتـي ماعرفتها في الحال بسـبب البؤس والحالة الصحـية الـمزرية التـي كانت عليـها.

لماذا سمح لزوجته وشقيقاتها بقتل طفولة ابنته ؟؟؟؟البعد الجغرافي لا يعني انه غير مسئول تماما عما حدث لابنته من تشويه لجسدها يلازمها ما بقيت حية ؟؟؟...عموما قضاء اجازات في السودان لا اراها موجبا لترسييخ سودانية بنتي وولدي ...كبرت البنتيين والولد دون قضاء اجازات في السودان ويصرون فعلا وقولا علي سودانيتهم كونها حقهم وليست منحة تعطي او تسقط بقضاء اجازة او بتناول وجبة سودانية او بنوبة ملاريا ... يعيش الملايين من الصينيين والهنود في قارات وبلاد بعيدة عن ارضهم ويرزقون بابناء وبنات لم يرو الارض الام ويبقون هنودا وصينيين.. اليوم وبعد الانفتاح الصيني او انفتاح العالم علي الصيين وبعد ان صارت الهند المركز التقني الاول في العالم فيما يخص IT وانتعش الاقتصاد الهندي اري الاف من الاجيال الثالثة والرابعة من الصينيين والهنود الذين لم يزورا الصين ولا الهند من قبل يعودون اليها مستثمريين حقهم في ارضهم وشعبهم وبخبراتهم ومالهم ...عاشت مئات الاسر النوبية شتاتا في مصر وغيرها وعادت اجيال ثانية وثالثة الي السودان نوبية وبقيت خارجها نوبية ....الاف الاسر الكوبية تعيش في امريكا واتت اجيال ثالثة اليوم وهي كوبية ولم تزر كوبا وتصر علي كوبيتها ....
الامثلة كثيرة وامل ان يبقي الذين في الشتات مخزونا لسودان او سودانية تبقي في مسام الجلد ومسار الدم ليوم يحتاجهم السودان حقيقة وليس شعاراتا وقولا وزيادة عدد في بلد تثتاثر فيه الجهوية والسلطة بكل المصادر والرفاهية ويعيش الملايين ةالفقر والمرض والجوع والاحتراب يحاصرهم ....

مودتي
ابوبكر

Quote: خلاصة حديثي الموضوع معقد وتتداخل فيه عوامل عديدة وعلى راسها البعد الاقتصادي واندثار القيم الانسانية المبنية على الصدق والحب وازدياد وتيرة المصالح في انشاء واستدامة العلاقات فللأجيال الجديدة الحق كل الحق في النفور منه. صفية

هذه خلاصة تجربة ام عاملة يبدو انها عاشت وتعيش حالتي الاغتراب والتواجد في السودان وبالتالي ادري بنواح القصور التي لا تجعل التواجد في السودان لمن جرب وعاش خارجها في هذا الزمن مرغوبا...
وهل الاصرار علي اضافة بناتتنا وابنائنا نحن الذين في الشتات الي الكم الهائل من بنات وابناء السودان اليوم والذين يعانون ما يعانون من قصور تام في التعليم والصحة والعمل والاجر في زمن استعلاء جهوية سلطوية تجعل من اعدادها القليلة هي كل السودانيين الذين يستحقون الرعاية ومن هو خارج منظومتهم الصغيرة لا يستحقون الا المكابدة ...هل مزاحمة بناتنا وابناؤنا نحن المغتربون والمهجرون للاعداد الهائلة من اقرانهم الذين لم تسمح لهم ظروفهم بالخروج مثل ابناؤنا في الفرص القليلة المتوفرة (دراسة وعملا) في السودان امر عدل بحجة اثبات سودانيتهم ؟؟ واقع حال السودان واهله في الداخل لا تحميه شعارات بتنمية ورفاهية وليست جسور في عاصمةتتمدد عشوائيا ودون خدمات وبنية تحتية وعدة بنايات (وانا مهنتي العمران والتطويير المعماري) هنا وهناك تجعلها مدينة حديثة او في مصاف عواصم العالم او الاقليم ... عورتناالمتمثلة في سوء ادارة للبلاد والعباد فجعلتها طاردة لابنائها لا يجب ان نظن اننا نغطيها بشعارات وادعاءات وصراخ اعلامي مسموع ومرئ واسفيري وقضاء اجازات هناك ...هل الاغتراب او الهجرة تنزع عنا وعن نسلنا سودانيتهم حتي نفرض عليهم تواجداقسريا يكرهونه ويكرهمم في بلدهم .؟؟. مسئولية الامهات والاباء في المهجر هو ترسييخ دون شطط في ادمغة ووجدان نسلهم احترام وحب ان امكن لارض السودان واهله وليس كرها بفرض زيارات قسرية .. اليوم العالم تجده كله بكبسة زر امامك في شاشة بلورية او قضاء عدة ايام سفر بطائرات تقطع المسافات بين القارات في ساعات وبناتنا وابناؤنا يرون ويسمعون ولهم فكرهم وطموحاتهم وحب الاوطان ليس منحة نعطيها لهم وانما خيارهم والارض والسماء كلها لخلق الله وللانسان الخيار ....

مودتي

ابوبكر
ابوبكر

الأخـت الحبيـبة الحـبوبة،
Safia Mohamed

تـحـية الود والأعزاز،
وسـررت لـمرورك الكريـم ...ومشاركتك الـمقدرة... وأمل ان تواصـلي وتـمدينا بما عندك من خـبـرة يسـتفيد بـها من يكتوي بنار الغربة وعلي عاتقه مسؤولية اولاد ( مـجـهـجـون ) فـي الـهوية الضائعة وكره الأجازات فـي السـودان والدراسة بـجامعات تسـتنزف وتـمـص نـصـف دخـل الأب الذي احيانآ يعمل ثلاث ورديات فـي اليوم لتغطية رسـوم هـذه الجامعات التجـارية!!

فـي مكالـمة مع احـد اصـدقائي يقيـم باحدي دول الخليـج ويقيـم بـها منذ تسعة سـنوات ان مشاكل الجاليات السودانية بالخارج كثيـرة وتخـتلف مشاكلها باختلاف البلد الذي فيه هذه الجالية، مشكلتنا فـي دول الخليج ان الدعم الذي نجده من حكومة الخرطوم مفقود بصورة نهائية، فقد كنا نتوقع مثلآ ان يقوم (جهاز المغتربييـن) وهو جـهاز يملك المليارات من الجنيهات بانشاء مدارس سودانية بدول الاغتراب لابناءنا المغتربييـن ويـمولها ويستجـلب لها احسن المعلميين ومااكثرهم بدول الخليج، لو كانت هذه المدارس موجودة لما كانت هناك مشكلة عند اولادنا وبناتنا... ولاكانت هناك قصة الأف الاولاد والبنات الذين وحتي بعد اكمال تعلميهم بمدارس الخليج لايعرفون تاريخ السودان ولاجغرافيته ولادرسوا التربية الوطنية (الملغاة حاليآ في السودان!!).

. كنا نتوقع من (جـهاز المغتربييـن) ان يساهم بربط ابناء جالياتنا بالوطن الام من خلال بناء نوادي ثقافية بها كل مايربط المغتربييـن بوطنهم، ان تكون هناك مكتبات سـودانية ...قاعة للمحاضرات ولعرض الافلام ...ونادي للأسرة... صالة للمعارض والفنون السودانية... مناشط ثقافية ورياضية... تسـهيل رحلات للسودان للأسر خلال عطلات الصيف... طبع نشرة دورية توزع لاعضاء الجالية عن السودان ونشاطات الجاليات. هناك الكثير والكثير جدآ كان يمكن ان يقدمه الـجهاز لابناء وبنات جلدته ولكنه مع الأسف لايساهـم بشـئ وينظر الي جـيوبنا اكثر مما ينظر لقلوبنا وطموحاتنا وخـططنا المتواضعة الهادفة لربط المغتربييـن بالسودان!!!

اخت سـودانية اخري تقول ان الجاليات الاجنبية الاخري بدول الاغتـراب تجد العون الصادق والدعم الكبير من حكوماتها وبعض هذه الجاليات رغم انها اصغر حجـمآ من ناحية تعداد سكانها الا انها استطاعت ان تربط ابناءها ببلدهم ويحبونها ويقدرون مساهمات حكوماتهـم، عكس الجاليات السودانية الـمنبوذة من حكومة بلادهـم التي رفضـت الاعتراف بهم كسـودانييـن واسـتبعـدتـهم من الاحـصاء السكاني الأخيـر!!! واعتبـرتهـم ( ابقار حلوب )... والابقار لاتدخل في قوائـم التعـداد!!!، لقـد سـخرت منا الجاليات الاجـنبية الاخري الـموجودة معنا هنا واستـغربوا كيف تقوم حكومة السودان بعدم الأعتـراف بسـودانية نحو مليون سـوداني مغتـرب يقدمون الدعم المادي الكبير لخزينة الدولة!!?.

سـودانية اخري تقول لو الحكومة خفضت مننا الضرائب وساعدتنا بتخفيضات خاصة في اسعار بطاقات سـودانير واللـه... واللـه... كل يوم ازور السودان مع وليـداتي، ...ولكن بالحال العلينا حـسه الانزور بلدنا مرة كل خمسـة سـنوات!!!

لك مودتي اخـتـي صـفية.

الأخ الحبيب الـحبوب،
والأخـت الحبيبة الحبوبة،
essam&amal
تـحياتي ومودتي لكما،

وسـررت اخي عصام بـمشاركتك ولااملك تجاه ماقلت الاان انحني لكما تحية واحترامآ ... وابقي اللـه ذريتكم ذخرآ للوطن وامدكم بالعافية والسعادة.


لو تلاحـظ حـركة سيـر هذا البوسـت المخصص للنظر في موضوع (لماذا يكره اولادنا قضاء العطلة في السودان، ولماذا لايحبذون الدراسة بجامعات الوطن?) تجد ان الأراء متفاوتة حول الاسباب التي ( كرهـت ) اولادنا وبناتنا في حاجة اسـمها السودان.

هناك فئة من القراء شاركوا واكدوا انهم يقومون بزيارة دائمة للسودان وان اولادهم وبناتهم يحبون بلدهم ولم يلاحظوا اي علامات كره او حساسية تجاه وطنهـم.

الفئة الثانية اكدت انهم يعانون من حساسية اولادهم قضاء العـطلات الصيفية بالسودان ويلمسون عدم رغبتهم في زيارة اهلهم.

الفئة الثالثة من القراء قالوا صـراحة ان السودان الطارد لهم لن يغشوه ولن يواصلوه وابدوا صراحة اسباب لهذه القطيعة.

اسـتغربت ان لااحـدآ من المتداخلييـن وقد تعرض لموضوع ارسال اولادهم وبناتهم للدراسـة بجامعات السودان، ومارأي ذريتهم في الدراسة بالوطن الأم، وهل هناك نفور وعدم قبول بالالتحاق بهذه الجامعات?.

لـماذا نجد طلابنا وبناتنا يفضلون الدراسة بالجامعات الأجـنبية كالهند وباكستان وسورية ومصر والمغرب ويرفضون الوطنية، ... هل بسبب النشاطات السياسية الموجودة داخل الجامعات السودانية والتي تصـل فيها المناوشات بين الاجـنحة المتصارعة الي حـد الأغتيالات والتصفيات الجسـدية فما بينهم البعض البعض، ... هل بسـبب تدني المستوي في هذه الجامعات،... ام بسبـب عدم اعتراف كثير من الدول بشهادات الجامعات التجارية، ... ام بسبـب غلاء الرسوم?.

هـل صحيـح ومايقال ان موضوع كراهية اولاد وبنات المغتربييـن لموضوع السفر للسودان لقضاء العطلات يعتبـر من المواضيع ( الـمسكوت عنها سـودانيآ!!) وانه موضوع لايناقش اصـلآ بالمفتوح بيـن اعضاء الجاليات السودانية عـملآ بالقول الكريـم ( اذا بليـتـم فاسـتتـروا!!!) وبلاش فـضائـح وشـماتة وسـط باقي الجاليات الاجـنبية!!?.

هـل زواج اولاد المغتربييـن بالاجـنبيات تزداد كل يوم عـددآ ولاعزاء للسودانيات!!?،

هـل صـحـيح ومايقال ان زواج بنات الـمغتربييـن من اجانب ازدادت وتزداد كل يوم عـددآ في ظل احجـام السودانييـن عن الزواج او بسـبب نفورهن من السودانييـن!!?


لااحـدآ من السودانييـن هنا في اورويا او امريكا ويكتـرث لموضوع زواج السودانييـن او السودانيات من اجانب ، فهل نفس الحال موجـود في جالياتنا ببلاد الخليج والسعودية!!?،

لكـما مودتـي essam&amal

الاخ الحبيب الحبوب بكرى الصائغ


كمان عشان ما نخت اللوم كلو على جسد الوطن المتهالك نجد الشريحة العظمى من مغتربى الخليج
غادرت السودان بعد ان تاهلت فى مؤسساته التعلمية المسيرة بجبايات منهوبة من لقمة الغلابة الذين لا يعرفون درب المطارات

المهم يمشو يعطو عصارة خبراتهم وفكرهم للبلد الخليجى ودايرين السودان يكون ملاذ
لشيخوختهم بعد تلفظهم تلك البلاد بمجرد توقف عطائهم

ايهما احق بالنقد الوطن الكبر وعلم واللا الوطن التانى المصة الثمر
انا بشوف انو الانسان يقيف مع نفسو ويعمل جرد حساب لحياته ويشوف ويحدد بالضبط اين اعطى فهناك ترقد حقوقه
وهناك له ان يوجه نقده ويطالب بحقوقه

الاخ الصائغ
مشكلة ارسال الاولاد ليدرسوا بالجامعات السودانية مشكلة كبيرة وعويصة
اولا المصروفات الجامعية خيالية ...وفى امريكا وكندا الحكومة بت\منح
قرض للطلاب والطالبات للدراسة الجامعية وبعد التخرج والعمل تسدد هذه القروض
ثانيا المدارس الثانوية هنا مجانا وبعد دراسة الثانوى فى كندا وامريكا تجد
الطالب مستواه فى اللغة العربية ضعيف جدا وما تنسى ان اول شروط الالتحاق بالجامعات السودانية
النجاح ى اللغة العربية واذا فكرت ترسل الاولاد ليدرسوا الثانوى فى السودان فى مدارس خاصة فهنا تاتى
مشكلة المادة والمصاريف الباهظة التى يفرضها اصحاب المدارس الخاصة على الطلاب وقد سمعت ان بعض المدارس تفرض رسوم
5الف دولار فى السنة للطالب الواحد وبعض المدارس تفرض 3الف دولار..مع الاشارة ان المدارس الاسلامية فى كندا وامريكا ايضا تفرض
3الف دولار فى السنة للطالب الواحد من سنة اولى ابتدائى وحتى الثانوى العالى..وعشان كده حتى هنا ما ممكن ندخل اولادنا فى المدارس الاسلامية
ولى عودة للشرح بالتفصيل

الاخ الحبـيب الحبوب،
abubakr

تـحياتي لك ياقريبـي واشكرك علي الـمشاركة والاهـتمام بـموضوع البوست.

حـتـي الأن لـم اجـد احدآ من القارئات والقراء الكرام وقدم لنا حلولآ واضـحة ازاء موضـوع (لـماذا يكره اولادنا قضـاء العطلات الصيفيـة بالسودان ولـماذا لايرغب اغلبـهم الالتـحاق بـجامعات الوطن ويفضلون الـجامعات الأجـنبية?).

لااحـدآ من الأخـوات والأخـوة الأجـلاء ووضـع اقتـراحات مـحـددة وواضـحـة ازاء مـشكلة سـودانية عـمرها الأن اكـثـر من 40 عامـآ ...وتتفاقـم وتتضـخـم فـي ظل رغبـة مئات الأف من السودانييـن الراغبييـن فـي الهـجـرة النهائيـة من بلد لايقـدرهم كبنـي ادمييـن وكـكفاءت ومـؤهلات عالية.

عـندما خرجـت من السودان عام 1985 كانت صـفوف السودانييـن الواقفييـن امام ابواب سفارات الـمملكة العربية السعودية والأمارات والبحـرين تسـد الشوارع وقتـها، وأسال لـماذا تضـاعفت الأن اعـداد الواقفييـن امام هذه السفارات... لـماذا لايـهتـم احـدآ من الـمسؤوليـن الكبار ويسأل لـماذا هـذه الصفـوف ... والـي متـي ... واين هـم الذين خـرجوا من قبل... وماذا قدمنا لـهم... ولـماذا يكرهون بلـدهـم ويلعنوننا سـرآ وجـهرآ وفـي صلواتـهم الخـمس!!?.

كلنا نعرف ان الحكـومة الحالية بالخرطوم لاتـملك اي حـلول واضـحـة لانصـاف المـغتربييـن ولاتـملك امكانيات لاصـلاح احـوالهم، بل كلنا ايضـآ ويعرف ان الحكومة من مـصلحـتها هـجـرة السودانييـن من بلدهم ولو بالمـلاييـن لان ذلك فـي مـصلحـتها.... وتتـدفق الدولارات والريالات عليـهم من قبل المغتربييـن التسعاء قبلوا او رفضـوا ...

(والعاجبو عاجـبو ... والماعاجبـوا يقعد في بلد الاغتراب الي مالانهاية اويرجع في تابوت!!!).

مـاالـحـل ياسادة ياكرام بلا دس او خـجـل، الـحال كـده مابـمشـي لقـدام خـصـوصـآ وانو بقيـنا فـي بلاد الغربـة ........ عـشـرة مليون سـوداني...
نـصـهم شـباب واطـفال!!?.

لك مودتـي ابن عـمـي.

الاستاذ/ بكري الصائغ
مساء الجمال
_____________________________________________________________________________

Quote: كما أنتم تظنون أن أبناءكم لا يرغبون فى قضاء الإجازة فى السودان بالمقابل بعض الأسر السودانية تتضايق من وجود أطفال المغتربين معهم طوال فترة الإجازة الصيفية... يعتقد بعض (المواطنون السودانيون) أن أولاد المغتربين مدلعين وخمجانين ولا يحترمون الناس الكبار وكثيرى التزمر والإمتعاض والشكوى ... ومعظم تصرفاتهم فيها شى من الرعونة واللامبالاة... يجب دراسة الموضوع من كل النواحى وليس من جانب اولادكم الما عايزين يجوا السودان عشان الحر والغبار تصرفات بعض أولاد المغتربين فى المطارات تثير الإشمئذاذ ... فوضى وصريخ وجرى والأم تلقاها منهمكمة فى فى السوق الحر ومخمخمة بمليون كيس وما جايبة خبرم...

أنا من داعمي وجهة نظر صلاح دي
وبشده وفي تصوري الخاص السوداني في المملكة والخليج ...
إلا من رحم ربي صعب التعامل معهم أو أحتمالهم
ناهيك عن أبنائهم .... ما عوزين يمشوا السودان ده من حظ السودانين الهناك ربنا رحمهم من (سخفهم)



____________________________
تقديري

صراحة يا بكرى انا عندى تجربة مع اولاد المغتربين المهم المشكلة مافى السودان المشكلة تربية البوين للاولاد وانا بمدك با القصة بعد شوية

)QUOTe )كما أنتم تظنون أن أبناءكم لا يرغبون فى قضاء الإجازة فى السودان بالمقابل بعض الأسر

السودانية تتضايق من وجود أطفال المغتربين معهم طوال فترة الإجازة الصيفية...

يعتقد بعض (المواطنون السودانيون) أن أولاد المغتربين مدلعين وخمجانين ولا يحترمون الناس الكبار

وكثيرى التزمر والإمتعاض والشكوى ... ومعظم تصرفاتهم فيها شى من الرعونة واللامبالاة...

يجب دراسة الموضوع من كل النواحى وليس من جانب اولادكم الما عايزين يجوا السودان عشان الحر والغبار

تصرفات بعض أولاد المغتربين فى المطارات تثير الإشمئذاذ ... فوضى وصريخ وجرى والأم تلقاها منهمكمة فى

فى السوق الحر ومخمخمة بمليون كيس وما جايبة خبرم...

الموضوع ما الأولاد براهم الأولاد ديل مراية ليكم .... يعكسون رأيكم الحقيقى

فإمتعاض المغترب وتبرمه وشكواه من النزول للسودان وحكاية السوق والمرة عايزة تسافر مخمخمة ولابسة

أحسن لبس ومكشكشة بالدهب والحلى يمنح الأولاد شعور لا يجدون له تفيسر ومبرر فكيف هم مسافرين إلى

الحفرة كما يقول والدهم وأمهم فى نفس الوقت تتزين وتتحلى (مشهد متناقض) يترك أثرا عليهم

أدرسوا الموضوع من كل النواحى
...............................
يا صلاح انامهاجر منذ 18 عاما ولا اقول مغترب لان الحكومة السودانية بتقول ان السودانيين فى
امريكا وكندا واوروبا مهاجرين وليسوا مغتربين والسودانيين فى دول الخليج هم المغتربين ويدللون على ذلك
بان مغتربى الخليج اغنياء ومهاجرى اوروبا وامريكا وكندا فقراء وما عندهم التكتح..وهذا الكلام الذى كتبته انت من اصدق الحديث
ويعبر فعلا عن الحقيقة المرة ..وانا عندما اكون مسافر ومار بالمطارات المختلفة ارى جميع هذه المشاهد التى ذكرتها
عن تصرف اولاد المغتربين والمهاجرين ووالديهم ...والله يا صلاح انت فاهم المشكلة صاح

الأخ الحـبيب الحـبوب،
Ahmed Osman

تـحـية الود والأعـزاز،
وسـررت لقـدومك الـمقدر، ومشاركتك الكريـمة.

هـل تعـرف انو... السوداني هـو الشـخص الوحيـد في العالـم ومـمكن يتغيـب عن بلده ولايزورها ولايشـوفها بالسنييـن الطوال ومـمكن تمـتد لعشـرات الاعوام وبدون مايجـيه حنيـن او رغبة في السـفر!!!?.

وهـذا الكلام اقوله من واقع احتكاكي بسودانيـن ليهم سنـييـن وسـنييـن طوال لاقربو بلدهم ولاحـتي ترانزيت وديل مـش في اوروبا بس ولكن قابلتهم في بعض دول الخليـج ... واعرف بعضـهم في اسـتراليا، وهي ظاهرة موجودة بصـورة كبيرة خاصـة وسـط الاخوة اقباط السودان الـمشتتيـن في كل بقاع العالم بعـد ماطردتهم الانقاذ من بلـدهم وبقو مـجـبورين علي القطيعة!!!

الغريب ان كل اعـضاء الجاليات الاجـنبية الاخري تـجدهم يحبون السفر لبلدهم ...وينتظرون بفارغ الصبـر موسم الاجازات الصيفية والمناسبات الدينية للسفر لبلادهم والالتقاء باسرهم وذويهم،... عـكس اغلـب ( اكرر كلمة اغلب مرة اخري للتاكيد!!) السودانييـن عندهم مناعة تجـاه السفر ( والركـلسـة!!) في بلد الاقامة حـتي اشـعار اخـر!!!

عـندنا عشـرة مليون سـوداني بالخارج، كـم منهـم بزور السودان كل سـنة او حـتي كل خمـسة سـنوات !!?،

مرات اقرأ في الجرائد المصرية اخبار بتقول انو مطار القاهرة اعلن عـن حالة الطؤاري بين كل موظفيه استـعدادآ لاستقبال ملاييـن المصرييـن العائدين لبلادهم لقضاء عطلة الصـيف، نفس هـذا الخبـر صـادفني ايضآ في جـريـدة مغربية. واللـه مطار الخـرطوم ده ماسـمعت بيه ولامره عمل حالة طوارئ الا مرة واحـدة لما نزلت طيارة عسكرية حربية امريكية بـمطار الخروم عام 2002!!!

لك مـودتي.

اولادنا المغتـربون طـلاب الشهـادة العـربية:
يسمونهـم الحنـاگيش ويصفـونهم بالسذاج !!!
--------------------------------------------


©2004 Alsahafa.info. All rights reserved.

العدد رقم: 5297
2008-03-18

طـلاب الشهـادة العـربية........
يحملون الجنسية السودانية،
ولكنهم يعاملون كالاجانب ،
وغرباء داخل بلادهم ،
وينعتهم اندادهم في الجامعات بالحناكيش ويصفونهم بالسذاجة والتكبر والبعد عن ملامسه الواقع!!!!.

فهل يستحقون ما نعتوا به . وهل هم بعيدون عن عاداتنا وواقعنا وهمومنا ومشاكلنا ويرسمون مستقبلهم بعيدا عنا وعن وطنهم؟

كلمة شهادة عربية مستفزة:
------------------------------
عبير عبد الرحيم تدرس بجامعة الخرطوم بكلية القانون الفرقة الثالثة فتقول عشت في الامارات وكنت احضر الى السودان من فترة لاخرى وعندما حضرت للاستقرار في السودان للدراسة وجدت ان هنالك حاجزا ما بيني وبقية الطلاب وهو الفهم السائد بان طالب الشهادة العربية ليس لديه هموم سوى الاكل واللبس ولكنني استطعت كسر هذا الحاجز وساعدني فيه الطلاب من حولي حيث انني بطبيعتي اجتماعية وكنت عضوا في النادي قبل حضوري الى السودان ولي مشاركات وانا الآن عضو في رابطة كلية القانون.

اما وائل صلاح الدين والذي يدرس قانون الفرقة الثانية والذي حضر من الامارات من (دبي) ، تحديدا ، فيرى ان كلمة شهادة عربية (مستفزة) وان طلبة الشهادة السودانية يستفزون طلبة الشهادات الاخرى بأنها يسمونهم (الحناكيش).فبمجرد ان يعرف طالب بأنك شهادة عربية تتغير نظرته وتتحول الى تجاهل تجاهك فهنالك فهم خاطيء بأن طالب الشهادة العربية كفاءته اقل من الناحية الاكاديمية وفي التفكير عموما وانا ارى الفرق الوحيد هو الناحية الاجتماعية فطالب الشهادة العربية اجتماعياته اقل خصوصا مع بداية دخوله المجتمع الجامعي .

لذلك فقد واجهتني صعوبة في التعامل مع الطلاب والناس عموما في البدء فأصحابي كانوا كلهم اماراتيون وطريقة تكفيرهم تختلف عن تفكير السودانيين.

حياة اخرى واصطدام بالواقع:
------------------------------
ويضيف محمد مصطفى نور الهدى والذي يدرس الطب بالمستوى الاول، انا شهادة لندن ولكني حصلت على شهادة لندن من الامارات وكنت احضر الى السودان سنويا في الآونة الاخيرة.. وعندما انخرطت في المجتمع الجامعي وجدت ان هنالك اختلافا في طريقة التفكير بيني وبين بقية الشباب وهو ما عانيت منه خصوصا في الايام الاولى كما اني اعرف بعض الزملاء من حملة شهادة لندن وتربوا في لندن ولم يحضرا الى السودان من قبل واخبرهم اباؤهم بان السودان افضل من لندن نفسها ولكنهم عندما حضروا وجدوا حياة اخرى واصطدموا بالواقع .

وتوضح آيات بشير والتي تدرس ادارة اعمال المستوى الاول انها كانت مستقرة في سلطنة عمان، وتقول عانيت في الايام الاولى وما زالت اعاني من نظرة الطلاب لي بأني شهادة عربية فكانوا يعاملونني على اساس اني متكبرة و(شايفة نفسي).

وان كان هنالك بعض المتفهمين ، كما انني احس ان كلامي مختلف ولبسي مختلف وافكاري مختلفة.

طلاب الشهادة السودانية اكثر طموحا لكن تنقصهم الامكانات:
------------------------------------------------------
ü ترى عبير وبحكم انها من طلاب الشهادة العربية ان اغلبية ان لم تقل كل طلاب الشهادة العربية تنحصر اهتماماتهم في اشياء معينة مغروسة فيهم بحكم البيئة والتربية وان الشباب السوداني او طلاب الشهادة السودانية اكثر طموحا ولكن تنقصهم الامكانات.

اما وائل فيقول بأن اهتماماته قبل السنوات الثلاث التي قضاها في السودان كانت تنحصر في السيارات والموبايلات حيث ان شباب الامارات يحب التجديد ولكن الشباب في السودان يهتمون بالمستقبل وينظرون للامام ويضيف .. لكنني بعد ان عشت داخل السودان لسنوات احس الآن ان هنالك تغييرا ما في طريقة تفكيري واصبح هناك اختلاف بين تفكيري وتفكير اخوتي الذين ما يزالون في الامارات.

الاقرب الى فهمي وتفكري :
--------------------------------------
ويرى محمد ان الطلاب في السودان اجتماعيين ا كثر.

وتصف آيات الفتاة السودانية بالطيبة ولكنها لا تميل الى الخروج والتغيير وتقول انا كنت اخرج مرة على الاقل في الاسبوع للترفيه ولكن في السودان قد يمضي شهر ولا اخرج ولا توجد اماكن لكي اذهب الىها اصلا..

ويميل محمد الى طلاب الشهادة العربية وشهادة لندن للتقارب الفكري ، وتوافقه الرأي آيات التي تقول ان اغلب اصدقائها شهادة سودانية ولكنها تميل الى طلاب الشهادة العربية لأنهم الاقرب الى تفكيرها وفهمها..

يقلقني ما يدور حولي وافشل في احيان كثيرة:
------------------------------------------
ü وتستمع عبير الى محمد المازن وراشد الماجد اضافة الى وردي وسيد خليفة وبعد ان حضرت واستقرت بالسودان اصبحت تستمع الى ابو عركي وزيدان ابراهيم.

اما وائل فيستمع للاغاني الاجنبية والعربية والى حد ما الاغاني السودانية . ويضيف وائل ليس لدي اهتمام بما يدور من حولي من تغييرات اقتصادية وسياسية واحاول ان ابعد نفسي عن المشاكل وابذل جهدي لكي اكون مسالما .. ولكن في قرارة نفسي يقلقني ما يحدث حولي واحاول ان اجد له تفسيرا ولكن في احيان كثيرة افشل لجهلي بكثير من الامور السياسية والاوضاع المعيشية.

نستمع للاشرطة الغربية:
----------------------------------
ويقول محمد انه يستمع للاغاني الاجنبية ولا يهتم بما يدور حوله وخاصة السياسة والمشاكل السياسية التي لا يعرفها ولا يريد ان يعرف عنها شيئا .

وتستمع آيات للاشرطة الغربية وليس لديها اهتمامات سياسية او اقتصادية او اجتماعية وتقول انا لا اهتم ولا اشارك وحتى اصدقائي المقربين لا يهتمون بهذه الاشياء.

السكن الاستثماري عزلني عن العالم:
---------------------------------------
ü توضح عبير انها كانت تقيم في سكن استثماري في البداية ولكنها رجعت للسكن العام ، وتوضح ان الطالب في السكن الاستثماري يكون بعيدا ومعزولا عن العالم ولا يعرف حتى زملاءه المقيمين معه كما ان الاهتمامات تكون محصورة في الافلام والمسلسلات والاغاني اما الداخلية العامة ففيها استطاعت ان تكون قريبة من الطالبات وان تتلمس مشاكلهم وهمومهم.

الممنوع مرغوب !!
---------------------
اما وائل الذي يقيم في داخلية خاصة كل طلابها شهادة عربية او شهادة لندن، فيقول اهلي ارادوا ان يوفروا لي (وضعية مريحة) وان اعيش في مستوى مساوٍ لوضعي في الامارات.

يقوله وائل .. هناك تغيير كبير في مفهوم ومساحة الحرية حيث ان هناك تحولا من مجتمع مغلق الى مجتمع مفتوح ويكفي احساس انك في بلدك وتستطيع ان تفعل ما تشاء دون رقيب. وهذه الحرية اساء استخدامها بعض الطلاب فهم الآن يقوموا بفعل اشياء لم يكونوا يفعلونها من قبل. فالبرغم من وجود ضوابط مشددة داخل السكن الا ان هنالك تجاوزات تحدث من الطلاب مثل التدخين داخل الغرف فكل الطلاب يدخنون، اضافة الى تعاطي بعضهم لبعض الاشياء الممنوعة ولكنها ليست كثيرة في اغلب الاحيان في المناسبات مثل رأس السنة مثلا كما انك احيانا قد تشك في سلوك طالب و (تخمن) انه قد تعاطى شيئا ما وعلى كل الحرية الشديدة تؤدي للانحراف بحكم ان (الممنوع مرغوب) وكل ما كنا ممنوعين منه اصبح متاحا.

وانا مع الرأي الذي يقول ان طلاب الشهادة العربية بهم بعض السذاجة ويسهل خداعهم بدعوى انهم لا يعرفون البلد جيدا.

اختلاف بين ما تربيت علىه والواقع السوداني:
------------------------------------------
وتوضح عبير ان اهلها وصوها قبل حضورها بالابتعاد عن
السياسة والطلاب السياسيين نتيجة لفهم ان ممارسة السياسة في السودان ضياع للمستقبل.

ذات الوصية استمع لها وائل لكن بشروط جديدة حيث اوصوه ان يهتم بالقراءة وان يمضي على ما تربى علىه وخصوصا المحافظة على الصلاة.
ويوضح محمد انه اوصوه بان يعتاد على الاجتماعيات السودانية والتي قد تكون صعبة علىه في المرحلة الاولى ولكنه سيعتاد علىها ويحبها.
آيات تقول اهلي اوصوني بأن اتعامل مع الناس تعاملا جيدا واعلموني ان هنالك اختلافا بين ما تربيت علىه وبين الواقع السوداني.
ينتظرون نيل الشهادة والسفر للعمل بالخارج:
عبير تنوي ان تحضّر في نفس مجال دراستها وان تستقر في السودان لأنها لن تجد بلدا يماثل السودان.
وائل يفكر في ان يواصل الدراسة ويحضر في مجال القانون ويقول سأحضر في الخارج لأن المجالات هنا محدودة واود ان اتخصص في مجال نادر في السودان ومتى حققت ما اريد سأعود للعمل في السودان اما اذا كان تخصصي في مجال عادي فسأعمل في الخارج. وعن الطلاب الذين يقيمون معه في السكن يقول .. هؤلاء ينتظرون نيل الشهادة والسفر للعمل في الخارج لماذا؟ يقول وائل .. لديهم احساس بأنهم حضروا من وضع احسن الى وضع اقل وهم متأكدون ان السودان ميزته الوحيدة في الشهادة القوية والمعتمدة.

مكان أفضل:
----------------------
يخطط محمد للدراسات العلىا ولا فرق لديه بين الاستقرار في السودان او السفر للعمل في الخارج.

ولآيات قبل الختام رأي آخر:
-----------------------------
فهي لا تريد الاستقرار في السودان لأنها تأمل ان يعيش اولادها في مكان افضل وان كانت لا تمانع في ان يدريس اولادها الجامعة في السودان لأن هنالك اشياء لا يتعود علىها الإنسان في اي مكان آخر مثل ركوب المواصلات والاعتماد على النفس.

الإغتراب والأسرة:
----------------------
الزوجات بين سندان غياب الزوج ومطرقة المجتمع
جاءتنا رسالة في البريد رمزت صاحبتها إلى نفسها بالحروف أ، هـ ،ح ، قالت صاحبتها الآن يقترب زواجي من ثلاث سنوات وكل هذه الفترة زوجي مغترب وخلال كل هذه المدة لم يقيم معي سوى شهر واحد بعد الزواج وكثيراً ما يعدني بالسفر ولكن دون نتيجة ظاهرة وصبرت كثيراً واحتملت أقاويل الناس ولكن الآن وصلت للقرار وهو البحث عن الطلاق حتى يكون الحل. انتهت الرسالة وبدأنا نحن نبحث عن المغتربين أعدادهم وفي أي البلاد وماهي الآثار الاجتماعية والنفسية للاغتراب والتي خلفها على الزوجات والأبناء؟

الإحصاءات والأرقام:
---------------------------
تقول سجلات جهاز شؤون العاملين بالخارج بأن عدد المغتربين السودانيين في عام 1999م بلغ مليون وأربعمائة ألف سوداني وهذا رقم ضئيل جداً إذا نظرنا لما تورده أجهزة الإعلام بأن أعداد السودانيين في مصر بلغت أربعة ملايين شخص وإذا أضفنا لذلك ما أوردته أجهزة الإعلام أخيراً بأنه في أمريكا وكندا «120» ألف أسرة سودانية فإذا أخذنا لهذه الأسر متوسط خمسة أفراد نجد ان العدد يقارب الستمائة الف شخص ولكن لننظر إلى توزيع المليون وأربعمائة ألف.



تقول السجلات بأن 47% من هؤلاء في المملكة العربية السعودية و 4% في جمهورية مصر العربية وفي الكويت 3% أما الإمارات فتبلغ النسبة 6% وفي اليمن 4% و 9% في العراق أما سلطنة عمان فالنسبة 1% و 19% في بقية البلاد العربية مثل قطر، البحرين، وليبيا وفي أفريقيا 1% و2% في أمريكا وأوروبا.

وهذه النسب يتصدرها العمال ثم الموظفون وبعدهم المعلمون ثم يأتي الأطباء والصيادلة والمهندسون وبنظرة نحو سنوات سبقت هذا الإحصاء نكتشف حجم الزيادة الكبيرة ففي عام 1995م كان العدد 435.64 وانخفض في عام 1996م إلى 531.57 وفي عام 1997م 222،28 وبلغ في عام 1998م 015.39 وعلى الرغم من عدم دقة الأرقام ولكن لا أحد ينكر الأعداد الهائلة من المغتربين في السودان بل يمكن القول ان كل بيت في السودان لديه مغترب وهذا يعطينا فكرة عن الاغتراب.

الاغتراب قطعة من نار:
-------------------------
بدأت هناء عباس وهي طالبة جامعية وابنة مغترب حديثها بقولها تجربتنا مع الاغتراب مرة واتمنى ان لا اكون مثل والدي، فسألناها هل تفكر في الزواج من مغترب فانتفضت وهي تقول أرفض هذا بشدة وأنا أدرس بالسودان واقضي العطلات بالخارج ولا أحس بالراحة النفسية إلا عندما أعود إلى السودان، ولكن محمد أحمد البشير وهو طالب وابن مغترب ابدى حماسه لتكرار تجربة والده من أجل تحسين الوضع المادي ومضى أكثر من ذلك بقوله أنه لا يمانع في الارتباط بمغتربة ، ولكن عزة عبدالعال الطالبة في العلوم الإدارية قالت لن اغترب مهما كانت ظروف الذي سأرتبط به.

وتضعنا على حجم المأساة ضحى الأمين وهي طالبة في جامعة الخرطوم فتقول على الرغم من صغر سني عندما كانوا أهلي مغتربين ولكن أدرك حجم المرارة وقسوة السجن الذي كنا نعيش فيه ولن أكرر تجربة أبي وأمي.

ونمضي أكثر لتحدثنا سلمي كامل مليجي وهي مقيمة في السعودية 26 عاماً فتقول الصعوبات بعضها مادي والبعض الآخر مرتبط بتربية الأبناء ودراستهم، وتتفق معها فاطمة يوسف وهي معلمة وزوجها مقيم بالسعودية ولديها خمسة أطفال تقول بأنها تحل مكان الأب في كل التزامات الأسرة بجانب دورها في الأمومة، والتربية كما تقول لا تعتمد على المال فقط وتطرح مشكلة جديدة وهي عدم تأقلم الأبناء على الحياة في السودان ، وتتفق مع حديثها الأستاذة عنايات النقر المحاضرة بجامعة النيلين قسم الاجتماع بقولها ان المعاناة تقع على الزوجة والتي تقع عليها مسؤوليات كبيرة في ظل غياب الزوج مثل توفير الاحتياجات الأساسية، وكذلك تتحمل عبء تربية الأبناء متحملة مسؤولية تنشئتهم تنشئة صحيحة وهي في هذا تدفع وقتها وراحتها يضاف لهذا الأثر النفسي الذي يخلفه غياب الزوج على صحتها. أما البروفيسور أحمد إبراهيم أبوسن فيجمل الآثار الاجتماعية في الميل إلى الاستهلاك بدلاً عن الإدخار وهذا سببه توفير السيولة واتجاه أسر المغتربين نحو الصرف البذخي وحتى التوفير يكون في شكل ذهب وحلي.

أما في جانب الأطفال الشباب فالطفل ينشأ في بيئة مختلفة عن السودان وعاداته وتقاليده وبعض الأسر تترك وراءها أبناءها في سن التعليم الثانوي أوالجامعي وهؤلاء شباب يفقدون الرعاية الأبوية وقد ظهرت بعض الحالات في تعاطي أبناء المغتربين للمخدرات والمسكرات وهذا مع غياب الرقابة الأبوية سببه توفر الأموال في أيدي هؤلاء الشباب، ويفجر البروفيسور قنبلة عندما يقول بعض زوجات المغتربين من ذوي الدخول المحدود لا يستطعن مرافقة أزواجهن وهذا يؤدي إلى بقائهن سنوات طويلة في السودان بعيداً عن أزواجهن مما يؤدي إلى انحراف بعضه، بينما يلجأ البعض لطلب الطلاق عن طريق المحاكم بسبب طول غياب الزوج ، ويمضي البروف ليفجعنا مرة أخرى بطبقة من المغتربين يسميها الهاربين من العودة إلى وطنهم وهؤلاء الذين انتهت عقود عملهم وتم الاستغناء عنهم ولكنهم يتشبثون بالبقاء بالخارج وهؤلاء لا يأبهون كثيراً لأسرهم التي تركوها في السودان.

وضعنا الجميع أمام حقيقة وهي أن زوجة المغترب هي التي تدفع القدر الأكبر من ضريبة تحسن الوضع الاقتصادي لأسرتها.

زوجة المغترب بين المطرقة والسندان:
-----------------------------------
تقول الدكتورة سعاد موسى باحثة في مجال علم النفس بجامعة الأحفاد: القضية تعتمد علي تقسيم زوجات المغتربين إلى شرائح فهناك فئة اغترب الزوج بعد عشر إلى عشرين سنة من الزواج وفئة أخرى سافرت مع زوجها وعادت للاستقرار بالوطن وهذه كلها عوامل لديها تأثير والمرأة ككائن حى مثلها مثل الرجل لديها احتياجات اجتماعية ونفسية وجنسية والزواج لحد كبير يغطي هذه الاحتياجات بشقيها الانفعالي والمادي ، ولذا فان اختفاء أحد الطرفين قد يحدث فراغاً في حياة الطرف الآخر وفي ظل هذا الوضع إذا لم تكن الزوجة مدعومة باحتياجات أخرى وخاصة لديها أولاد وبنات ترعاهم، أما إذا لم يكن لديها عمل أو أسرة تعينها والزوج نفسه لا يرسل المصروفات الشهرية فهي مثل أى إنسان لا يتوافق مع بيئته ينحرف ولكن هذا تدخل فيه عوامل أخرى مثل شخصية المرأة وتربيتها وتدينها ومدى الدعم الاقتصادي والاشباع الروحي والنفسي والانفعالي ودرجة الصبر والوضع المعيشي الذي يعول عليه كثيراً ولكن الجانب الانفعالي والجنسي إذا لم يشبع يقود للانحراف ، وفي الآونة الأخيرة زاد عدد المغتربين وخاصة الذين لديهم أطفال وامتدت سنوات اغترابهم لسنوات طويلة.

ولكنها تعود لتؤكد بأن المادة ليست سبباً للانحراف وحتى بعد الزوج لأن المرأة يمكن ان يكون زوجها موجودا وتنحرف وتعود لتؤشر على دور يلعبه البعد الزماني والمكاني، والشريعة الإسلامية انتبهت لهذه النقطة عندما حددت غياب الأزواج في صدر الإسلام في الغزوات بثلاثة أشهر فقط، ولكن الأزواج لا يتفهمون هذه النقطة.

ثم تضئ جانبا آخر من خلال إحدى النظريات التي تقول بأن الإجرام يورث وهو جزء من تركيبة الإنسان وليس شيئا مكتسبا ، وعلى الرغم من صعوبة إثبات هذه النظرية ولكن الإجرام أو الانحراف يكون متكرراً في الأسرة بالرغم من استنكار الناس له .

في الختام تقدم الدكتورة سعاد موسى روشتة الحل بقولها التوازن أفضل وهو ان يكون الزوج مع أسرته وأبنائه حتى لو كان الدخل بسيطا والطبيعي ان تكون الأسرة في مكان واحد زوج وزوجة وأبناء وبهذه الروشتة أغلقنا الباب.
-------------------------------------------------------------------

مشكلة اغلب الأسر المغتربة:
بناتنا وأولادنا لايفضلون قضاء الأجازات بالسودان ولا الدراسه بجامعاته!

قبل السلام وقبل اي كلام سؤااااااال لكل عضو ..
---------------------------------------------

Copyright ©2000 - 2008, Jelsoft Enterprises Ltd.

رابطة الشباب السودانيين بالرياض > شباب الرياض > ساحة المغتربين.

04-16-2008

هل انت حنكووووش او حنكوووشه ..؟
طبعا الموضوع باين من عنوانه ...
(المغتــربين والحنـــكشه ..)
طبعا كلمة (المغرتبين) وكلمة (حنكوش) بقو أكتر من اصحاب والظاهر في علاقة حب كمان!!
و 24 ساعه مع بعض وما بتفارقوو نهائي ..
ودا طبعا كلام اهلنا في السودان وعموم الشارع السوداني ..
يلا نحنا عاوزين نعرف حكاية الحنكشه بالمغترب شنو؟
وليه المجتمع السوداني خاتي الفكره دي عن المغتربين ؟
في البدايه هو المغترب زاتو شنو؟ او اولاد المغتربين ديل منو؟ بين قوسين طلاب الشهاده العربيه ...
انا البعرفو انو اولاد المغتربين .. هم ناس اتربو وعاشو خارج وطنهم وواختلطو بفئات من معظم المجتماعات ..
وانا بتصفح في النت وفي المواقع السودانيه لقيت ليكم تعريف لكلمة حنكوش هع هع!!!
عملو ليها مصطلح كمان ..

قالو الحنكوش :
------------------
الحنكوشة هو ذلك الزوووول الذى لم يذق طعم البشتنه فى حياته الدنيا
ولم يتمتع بمذاق الشلهتة فى مدافرات مواصلات الكلاكلة ...
ولم يستمتع بسكن رواكيب الحاج يوسف التى تقى حرارة الشمس ولا تغنى عن زمهرير الشتاء ..
وقضى جميع مراحله التعليمية فى المدارس غير الحكومية ذات الطوابق المتعددة والبلدان العربية ذات الرفاهية المطلقة..
والمكيفات ذات الهمبريب الضاغط ...
ولم يشرب من المياه سوى المياه الصحية..

صفات الحناكيش:-
--------------------
الحناكيش ناس (بابــــــــا) و (مامـــــــا) وناس ال (جلكسي جواهر) و (البيرقر الجامبو)
وناس (أحواض السباحة) و (لعب البلياردو) وناس (عمرو دياب) و (نانسي عجرم) ...
يا جمااااااعه دا الحاصل ودا فهم اهلـــــــــنا في السودان .... والكلام دا انا ماجبتو من راسي!!!
في النهايه البوست دا للنقاش وعاوز اشوف راي اي عضو سواء مغترب والا في السودان ...
ويااااااااريت تجااااااااوبو لي على السؤاال بحكم انكم مغتربين ..

هل انتو حنـــــــــــــــــــــــــــاكيش يا مغتربين ؟.

................................................

ردود القراء:
----------------

1 - والله ماعارفة اجاوب اقول شنو!!!?.

لكن اذا دا كان تعريف الحنكوش والحنكوشة (الحنكوشة هو ذلك الزوووول الذى لم يذق طعم البشتنه فى حياته الدنيا ولم يتمتع بمذاق الشلهتة فى مدافرات مواصلات الكلاكلة ...

وقضى جميع مراحله التعليمية فى المدارس غير الحكومية ذات الطوابق المتعددة والبلدان العربية ذات الرفاهية المطلقة..ولم يستمتع بسكن رواكيب الحاج يوسف التى تقى حرارة الشمس ولا تغنى عن زمهرير الشتاء ..والمكيفات ذات الهمبريب الضاغط ...والمكيفات ذات الهمبريب الضاغط ...ولم يشرب من المياه سوى المياه الصحية..)...

اذا دة صح معناتو نحنا جد حناكيش لانو الحاجات دي كلها بتنطبق علينا
عشان كدة انا بفتكر انو اهلنا في السودان عندهم حق لمن يقولو عناا حناكيش
شكرا.

2 - يا جماعة والله انا عشت في السودان وعشت برا وشايف مافي فرق بين شباب هنا و هناك... صحيح نشأنا في ظروف مختلفة بس الحياة فرضت علينا نبقى تفتيحة ذي ناس السودان.( وللمعلومية الحنكشة بقت في اولاد السودان ما فينا).

3 - نحنا والله عادين صح بس ناس السودان فاكرين انو نحنا عايشين احسن عيشة وماعشنا حياة صعبة عشان نحنا مغتربين وكدة ...لكن والله في ناس في السودان عايشين احسن مناا ...والله بس المشكلة انو ناس السودان خلاص ختو الفكرة دي في راسهم وماممكن يغيروها الا يمشوا يعشوا برة بعدين في ناس عايشين في السودان حناكيش لمن غلط!!!
-------------------------------------------------------------


لقد تـعمدت ان اقوم بنقل وبث ماجاء بالموقع الألكتـروني (رابطة الشباب السودانيين بالرياض ) لان الـموضوع المـنقول منه له علاقة بالبوست الـمفتوح.

وهنا اطرح سـؤالآ هامآ يقول:
هـذا العداء الـحاد ضـد المغتربييـن السودانييـن وتحـقيـرهم واطلاق النعوت والـمصطلحات السـخيفة والخارجة عن حـدود الأدب واللياقة... لـماذا لانـجـده فـي اي دولة اخري الا بالسـودان!!?.

اخ بكري ارجو ان لا يزعجك كثر ترددي على بوستيك و اسمح لي ان ادلو برأيي في موضوع الحنكشه بحكم اني عانيت كثيرا من الكلمه دي. مشكلة ابناء المغتربين في السودان مع الحنكشه مشكله عويصه جدا لانهم تقع تحت بند stereotyping انت اتربيت بره, انت حنكوش, انت ما ناقش ما تفتيحه, اولاد المصاريين البيض و بالتالي من حق الناس الاندرشوا انهم يخلوك موضع سخريه و ليس من حقك ان تدافع عن نفسك, بيفترضوا انك ما بتعرف عربي كويس لو متربي في الغرب و لو متربي في الخليج بتعرف عربي لكن لهجة الشفتنه ما بتعرفليها, و اكيد ما بتاكل كسره و قراصه و ما بتعرف الراكوبه و القطيه و الجنا جداد و طبعا يتلموا فيك ناس الحله و اصحابهم و تكون انت مصدر تسليه ليهم طوال اجازتك.. اهتمامات الناس غير بحكم التربيه و المكان الاتربوا فيه و ليس كل من اغترب او هاجر خلاص عايش على البيرجر و البيتز و كل يوم في الديسكو. معاملة ناس السودان لاولاد المغتربين قاسيه جدا يعني مثلا اولاد السعوديه بيقولوا ليك ما لاحظت اولاد فلان ديل لمن رجعوا من الرياض العواره كاتلاهم كيف؟ يقوم الثاني يقول ليك من القفله طبعا ديل ما بيرقوا عشان ما عندهم اقامات و بخافوا الكشه و عشان كده بقوا عورا و ما بعرفوا يتعاملوا مع الناس و الواحد شكله دلاهه دلاهه و سمين كده. اولاد امريكا و الغرب, عليك الله شوف الخواجه الدلاهه ده بياكل الكسره كيف, هوي يا خواجه بوش بياكل كسره؟ و طبعا لمن يتكلم عربي مكسر يقولوا ليه مالك بتتكلم عربي جوبا؟؟ لسانك معوج و راجل كبير كده ما بتعرف المشلعيف؟؟ ليس كل من اغترب و هاجر نسى وطنه و خلاص ما بيعرف الكلام السوداني, اقول ليك حاجه شفت فصاحتي دي انا ما عشت في السودان غير سنتين عمري كله و لمن مشيت السودان اخر مره ناس الحله بيسألوني وينا بت امريكا؟ لانهم بعد الونسه معاي بيفتكروني ضيفه ثانيه. أختي اصغر مني مشت السودان من كم شهر و بحكم انها محجبه استغرب الجميع انها بتلبس توب لمن يجي راجل غريب و كانه لانها اتربت في امريكا مفروض انها تكون عريانه يعني حتى الستره شايفننا ما مؤهلين ليها.
و على فكره السخريه من المغتربين ليست مع اولادهم بس لانه حتى الناس الكبار لمن الواحد يرجع ناس الحله سخريتهم بتكون من نوع قاعد في السعوديه ليك 18 سنه سويت شنو؟ نحن قلنا تجي تبني عماره طوبه فضه و طوبه دهب؟؟ او ناس فلان كشوهم من دبي بعد 20 سنه جوا و قاعدين في بيت ايجار و طبعا لا يخلو الحديث من شماته و بينسوا انه 20 سنه في دبي الناس ديل بيرسلوا للبكيات و الاعراس و العلاجات و الاكل و الشراب و غيره و كانه انك عشان مغترب و ممكن تكون عيش وضع افضل لازم تدفع ضريبه كأنه اغترابك دنب لازم تكفر عنه او عشان مغترب لازم الناس دي تستنزفك و تسخر منك و لا فتحت خشمك تبقي متكبر و متعالي و مغرور. مره شفت ولد من السعوديه في السودان اولاد الحله حاقرينه عشان سمين و على قولهم ابورياله و حنكوش و مدلع و ما بيعرف يتشاكل, المهم الولد صبره قل يوم الاولاد ما عارفه عملوا ليه شنو و قالوا ليه يلا امشي ابكي لمامي خليها تجى تشاكلنا ليك. زولك طبع بتاع كراتيه و في دقيقه دقاهم دق العيش و كان بامكاني ان احجزهم منه لكن فضلت اخليه يوريهم و ياخد حقه و حياتك من يومها بقوا اخر احترامات ليه. من الحكومه لسيد اللبن في السودان بيستنزفوا المغترب و زي ما قلت ليك تدفع ضريبه انه ربنا سهل ليك تغترب. اولادك يدفعوا مصاريف اكثر لانك مغترب, اقول لك مواقف من اجازتي, كنت في صالون تجميل لابسه لي توب عادي و اليافطه معلقه فيها الاسعار المهم جات زبونه و قالت لي انا شفتك وين قبل كده شفتك في امريكا و انت بت فلانه طوالي صاحبة الكوافير نادت البنت الشغاله معاها يا فلانه انتو انا موش قلت ليكم اليافطه دي غيروها؟.؟ لي ما كتبتوا الاسعار الجديده؟؟ و لمن جات تحاسبني قالت لي 50000 ما 35000 زي ما مكتوب بس البنات نسوا. المهم دفعت ليها في صمت, و قبل ما امشي قالت للزبونه الوراي خليها تدفع نضوق دولارت بوش بعد اسبوعين رجعت تاني لقيت برضه اليافطه ما اتغيرت لمن جيت احاسبها قبل ما تفتح خشلمها قلت ليها لسه البنات ما غيروا الاسعار في اليافطه؟؟ المره الفاتت دفعت ليك الفرق بمزاجي و عشان خاطرتضوقي دولارات بوش لكن المره دي حسب اللاسعار المعلقه.

شكلي بهضرب كثير, خلاصة الموضوع ان النظره للمغترب و اولاده ظالمه جدا, مغترب ما معناها جبل قروش ولا اولاد قليلين ادب و ما بيعرفوا الكسره زي ما بيعرفوا الكبسه و البرياني. بعض الغتربين و الله يعيشون حد الكفاف و اولادهم قمة الاخلاق و الادب و السودانيه لكن مظلومين. يمكن عشان كده ما كنا بنحب الاجازه في السودان

الاخ بكري الصايغ والمتداخلون الكرام

بوست جميل جدا يناقش مشكلة حقيقية بتواجه ابناء المغتربين والاباء نفسهم لما يواجهوا مصير العودة النهائية للوطن مع تعود الابناء على نمط حياة معين

كما قالت الاخت دانية ، زمان كانت العودة النهائية للسودان ماساة حقيقية لما كانت علبة اللبن الناس الا تجيبها من السوق الحر ، وابسط الاشياء الناس بتحلم بيها
حسه مع توفر اي حاجة في المحلات والاسواق الحياة بقت ساهلة ، اي نعم القروش البقت مشكلة شوية لكن برضو يظل في نوع من الرفاهية ما بيعرف قيمتها الا من عاش في السودان زمن الناس كانت عشان تحصل على رغيفة بتعاني وتقيف في الصفوف بالساعات

مشكلة ابناء المغتربين انهم اتعودا على حياة معينة ، ساهلة جدا ، ما فيها تعب ، لما يرجعوا للسودان بتبدأ المعاناة مع اختلاف طبيعة الحياة ، واللي ممكن جدا تسبب في دخول الشخص في حالة تازم وانعدام وزن
غايتو السودان هو عبارة عن حلو مر ، ما بتقدر تقول كويس ولا بتقدر كعب بيعتمد حسب الحالة والوضع والجو النفسي الانت فيه

لي عودة

شكرا للاستاذ بكرى الصائغ لفتحه لهذا البوست الرائع كروعته ولنا عودة

الأخ الـحبيب الحـبوب،
السر عبدالله ،
تـحـية الود والأعـزاز،
وسـررت كثيـرآ علي مشاركاتك الـمكثفة حول الـموضوع،... وامل ان تواصـل وننـتظر كتاباتك الجـميلة.

كتبت انت فـي ردك علي الأخـت دينا الـمكي وتقول:
-----------------------------------------------
( انا اعتقد بان موضوع ابناء وبنات المغتربين والمهاجرين فى الخارج موضوع حيوى وهام وكذلك الموضوع الجديدالذى اشارت اليه بنت المكى عن زواج السودانيات من اجانب والسودانيين من اجنبيات ايضا موضوع جدير بالاهتمام.
فانا لا اقول بان الزواج من اجنبى او اجنبية غلط لان الحب ليس له حدود ولكن اغلب هذه الزيجات فاشلة...ويا بنت المكى انت قايلة الزواج من امريكى حيكون زواج ناجح؟؟؟ ...انتى ما سمعتى بقصة الجندى الامريكى الذى تزوج من اميرة بحرينية وذهب بها الى امريكا وهناك دبت الخلافات حتى انه جعلها تمارس الدعارة واخيرا طلقهاوتبهدلت اخر بهدلة!!. وحكوا قصتها بالتفصيل فى الاسبوع قبل الماضى فى قناة تلفزيونية امريكية واجروا معها ومع طليقها مقابلات وحكوا عن تجربتهم الفاشلة!!!).

اولآ: زواج السودانيات من اجانب اصـبح لايلفت النظر ولايثيـر اي اعتراضات فقبل ثلاتة شـهور مـضت نشرت جريدة سودانية موضوعآ حول زواج البنغلاديشيون المقيمون في السودان من سودانيات وماكان موضوع الجريدة حول رفض المجتمع لهذا الزواج ولكن الصحيفة طرحت سؤالآ حول هل هذا الزواج فقـط من اجل حصول الزوج البنغلاديشي علي اقامة بالبلاد ويحـق له العمل والتكسـب... ام هو فعلآ زواج مبنـي علي الحب والتفاهم وبغرض تاسيـس اسرة وانجاب ذرية صالحـة?. قامت الجريدة بسؤال طرحته علي الجمهور حول ظاهرة زواج الاجانب من سودانيات فكانت اغلب الردود وبنسبة عالية مع زواج السودانيات من اجانب.

ثانيآ: تطرقت ياأخ السر لـموضوع فشل اغلب حالات الزواج التي تتـم بيـن الاجانب، وان الزواج بيـن الاجـنبي من زوجة اجـنبية مصـيـره، بخـصوص هـذا اقول لك هل تصـدق ان جريدة مصرية نشـرت تـحقيقـآ خـطيـرآ يقول انه وكل سـبعة دقائق تقع حالة طلاق فـي مـصـر!!.

حالة طلاق في مصر كل 6 دقائق وتحذير من انهيار أسري!!
----------------------------------------------

منتديات ستوب > المنتديات الأسرية > قضايا المجتمع والأسرة.

12-04-2007,

كشفت إحصاء صادر عن الجهاز المركزي للتعبئة العامة والإحصاء في مصر، عن وقوع حالة طلاق كل 6 دقائق، وأن هناك 88 ألف حالة طلاق تحدث كل عام. ورصدت الإحصاءات 240 حكماً بالطلاق تصدر كل يوم في محاكم الأحوال الشخصية.

وطبقا لأحدث إحصاء سكاني تم إصداره مؤخراً فإن النسبة الأكبر من حالات الطلاق تقع بين المتزوجين حديثاً حيث تصل نسبة الطلاق في العام الأول 34% ، بينما تقل النسبة إلي 21.5 % خلال العام الثاني من الزواج.

ثالثآ:
ارتفعـت ارتفاع نـسبة الطلاق فـي السـودان، وهاك هـذه المعلومة اخـي السر:
في عام 1999، كـانت حصيلة وجملة الزوجات اللائـي تقـدمن بطلبات طلاق للـمحاكم الشـرعية في الخرطوم فقـط هـو 44 ألف حالة، وجاء هذا الرقم الـمحبط في تحــيق صحــفي أجري مع رئيس قضاة المـحاكم الشـرعية وقتها،ولايدخل في هذا الرقـم الطلبات الخاصة بالاقاليـم الاخري!!!!!.

خـبر أخر سـبق وان إطلعت علية قبل عام،يقول ان المحاكم الشرعية تعاني من مشاكل كترة التأجيلات الكثيـرة والمـبررة أحيانآ من ازواج الغائبيـن ،وان بعض المحاميـن يعرفون تمامآ كيف يوقفون أجـراءات السـير في القضيـة عندما تصـل الامور لصـالح الزوجة مقدمة الطلاق.

أخــر إحـصائيــة تقول،ان عدد حالات الطلاق في السودان قـد فاقت الـمائة الـف حااـة طلاق، والعهـدة في هذا الكلام لجــريدة (الخـليـج) الاماراتية!!!!.

-------------------------------------------------

لقـد قصـدت من سرد هـذه الارقام لابيـن ان الطلاق ايضـآ يقع باعـداد كبيـرة حـتـي بيـن المـتزوجـييـن الغيـر اجانب ، بل واقـول ان زواج الاجـنبـي من اجنبية يعمر احـيانآ اطول من الزواج الوطـنـي!

ساعـود لاحـقآ اخـي السـر لارد علي باقـي تعليقاتك.
لك مودتـي.

أبنائي (5) مواليد السعودية الرياض،،
الكبير خالد سيجلس لإمتحان الشهادة السودانية
في العام القادم،، طالب مستواه ممتاز أكاديمياً
أنا الآن في حيرة من أمري ، وكنت بالأمس نقاشا في
هذا الموضوع:
- المدارس السودانية ممنوعة بأمر الجامعة العربية
للجاليات لذا هي وإن قامت تعد مخالفة للقانون
ومحاربة من إدارة التعليم ومن السودانيين أنفسهم،،

- المدارس السعودية تدخلني في حسابات الخصم بكل أشكاله
وتقليص نسبة المنافسة على الجامعات ،،

- مقترح : أن يذهب مع والدته وبقية أخوانه للسودان فقط لكي
يتمكن خالد من الحصول على مدرسة ممتازة ومستقرة في السودان،،

- هذا يعني التضحية بكل أخوانه الذين يدرسون على نظام إنترناشونال
وحسب سمعي أن الرسوم بالسودان قد تصل إلى 4 ألف استرليني للطالب ،،

- المقترح الآخر : بقاء خالد بالرياض والدروس مع اصدقائه في
نظام مجموعات كل خمسة أو ستة في بيت ومواعيد الدراسة نهارية
أو مسائية مما يعني إمتداد الليل ونوم النهار وضياع وقت كبير
وضياع التمتع بالمفهوم الإجتماعي للمدرسة،،

- مقترح آخر : ذهاب خالد لوحده للسودان وله من البيوت مائة
في السودان من ضمنهم صلاح الفوق دا ،، ولكن لا أحد نصحني بهذا
الخيار نسبة للنتائج الباهتة التي حققها من فعل كذلك،،

- العام الدراسي على الأبواب : وانا ما زلت غير قادر على إتخاذ
قرار بهذا الشأن ،،
====

من الناحية الإجتماعية أبنائي لا يجدون مشكلة في السودان بل
العكس يرحبون جدا بالذهاب من واقع الإرتباط بالأسرة الكبيرة
رغم صعوبة السفر (الخرطوم - مدني - الابيض وبالعكس،))

==
إرتباط ابنائي بالسودان حتمي ولهم فيه ذكريات فمثلا
عمر (8) سنوات : يحب الأبيض لدرجة الهوس والكل في الأبيض
يسألني متى يأتينا عمر ،، + إرتباطه بالطائرات الضخمة التي
تأتي فوق بيتنا كل صباح فحفظ كل أنواع اليوشن بل واصر
لمعرفة المزيد وقادته قدماه إلى داخل إحداها والحديث
مع الروس كباتنة هذه الطائرات إرضاءاً لشغفه،،
== عمر هذا (8) سنوات / يعلمني كيف ابحث عن القنوات أبجدياً
وكيف أعيد ضبط الهاتف وتصوير الكاميرات الديجتال ويبكي
عند إصابة هيثم مصطفى أو هزيمة الهلال أو السودان لأن في
بص المدرسة معهم مصري يشجع الأهلي والمنتخب ، فليتكم شاهدتهم
مافعله به يوم صرع الحضري بهدف كرنغو،،
=

هم ليسوا أغبياء أو (عوراء) كما يقال عنهم ، ولكن ظروفهم مختلفة
وعلى فكرة ليس أبناء السودانيين بالخليج فقط هم المنغلقون على
أنفسهم (لنفي التهمة عن دول الخلجيج بأنها سجن كبير) ، ولكن
حتى القادمين من أوربا وأمريكا لهم ذات الخاصل بالإشتراك مع أبناء
الخليج،،
الحل الوحيد هو العودة الطوعية للبلد ونلحظ تسارع الخطى مؤخرا
فمنهم من ذهب نهائيا ومنهم من أرسل أبنائه ليحلق بهم عما قريب
لذا : لابد من وطن يسع هؤلاء القادمين على علاتهم،،

ياقريبي بكري

Quote: مـاالـحـل ياسادة ياكرام بلا دس او خـجـل،

تربية الاولاد في السودان او خارجه مهمة الوالدين والاسرة ولا اظن ان المكان هو المؤثر الاول في ذلك الامر .. التزام الوالدين بضوابط اخلاقية واجتماعية يطبقونها في انفسهم ثم اولادهم تجعل امر التنشئة متناغمة مع موروثات الوالدين وجربت هذا في بنتي وولدي ولم اقابل مشكلة والحمدلله وكذلك عايشت ذلك في ابناء اقربائي هنا وفي غيرها وعندما تسمح الظروف بتجمع اسري لمن في الداخل والخارج لا اري شيئا مختلفا بينهم ..لي ابن واحد وله من الاصدقاء عدد من غير السودانيين لقلة تواجدهم في المدرسة التي يدرس فيها ولاحظت تناغما اخلاقيا واجتماعيا وانضباطا في الوقت واماكن ذهابهم حيث يقوم احد الوالدين من اسرهم بتوصيلهم وارجاعهم وحين يتبادلون الزيارات في المنازل يكون ذلك وفق اتفاق بين الاسر بحيث لا يتجاوز يقاء احدهم خارج منزل اسرته وقتا محددا ... رايت ذلك كذلك في بنتي مع رفيقاتها في زمان دراستهما قبل الجامعية والان في الاجازات وحيث ان بعض صديقاتهن يعملن يكون الخروج ان لزم محددا ببرنامج ومكان ووقت .. علما بانهن من اجناس مختلفة ..ولاحظت ذلك كذلك حيث يدرسن ويعملن في الخارج بعيدا عنا ....الاحظ ذلك كذلك في ابناء اخي وهم صغار وفي ابناء عديلي واحفاده ..
عدم القدرة علي التعامل مع صعوبات الحياة في السودان لابناء ولدوا وتربو في بلاد احسن حالا من السودان لا يعني ان هؤلاء اضعف عودا والبشر يحتاج الي التعود والتكييف وهذا يتفاوت بين واحد واخر ... التعميم امر ظالم ولا يخدم قضية وعندما رات بنتي قبل اعوام حيث يدرسن اول مجموعة من الطلاب السودانيين من الداخل والذين كانو في شان تبادل دراسي ولاحظن ان بعض منهم يتصرف بغير انضباط فانزعجن اكدت لهن ان ذلك لا يعني الجميع وان الغالب اكيد اكثر انضباطا ومسئولية وان في الداخل كما في الخارج بعض ممن انشغل عن تقويمهم الوالدين ..هذا الامر ليس سودانيا فقط فقد لاحظت عند عودتي من اسفار الي الشرق الاقصي اسر شرق اوسطية اتية من المهجر في استراليا ورايت كيف يعبث بعض اطفالها وحتي الكبار منهم داخل الطائرة وفي المطارات بحيث لا تكاد ان تغفو لحظة في سفر طوييل ...
انا شخصيا لا احب قضاء اجازتي في السودان لاسباب صحية واجتماعية حيث غبت كثيرا وصار امر تغطية اجتماعيات متراكمة تستوجب سفرا الي مناطق فيها اهل في الشمال والشرق لا توفره لي ايام اجازاتي المعدودة والتي اوفرها لجمع اسري مع بنتي اينما يعشن .

كما اشرت في مكاتابتي السابقة ليس ضروريا ان يقضي الابناء الاجازة في السودان ويمكنهم الاستفادة منها في اشياء كثيرة تساعدهم في حياتهم مستقبلا وليس قضاء الاجازات في السودان مؤشر او شرطا لاثبات سودانية ....

مودتي
ابوبكر

..
.
Move 2 the End

الأخ الحـبيب الحـبوب،
عبد الناصر الخطيب،

تـحـية الود والأعـزاز،
وشـكرآ علي قـدومك الـمقـدر، وتعليقك علي سلوكيات اولاد المغتربييـن كان حاد وشوية سـخن!!

تعرف ياناصر، هنا فـي المانيا تربية الاولاد والبنات تختلف اختلاف كبيـر وشاسع عن تربية اولادنا في السودان او في دول الأغتراب.

هنا في المانيا الحكومة بتتدخل بصورة مباشرة في تربية النشء والجيل الجديد ، ومافي حاجة اسـمها فقط الوالدين يملكان الحق في تربية اولادهما كما يريـدان.

علي سبيل المثال، اذا اساءا الولدان تربية اولادهـما فللحكومة الحق في انتزاع الاطفال منها وتقوم هي بتربيتهـم.

علي سبيل ايـضآ، اذا كان الوالد مدمن علي الكحول او المخـدرات ومهمل لاولاده ولايهتم باحوالهم والعناية بهم فلـمـكتب ( الضمان الأجتماعي ) الـحـق وان يقوم علي الفور وبواسطة القانون بسـحـب الاولاد والبنات منهـما وتضـعهـم في مساكن خاصة بهم حـتي يبلغوا الرشـد... وفي اثناء هذه الفترة يتلقون تعليمهم بالكامل وتؤمن لهم الدولة كل مستلزمات المعيشة والحياة الكريـمة.

فـي المانيا الاطفال يتعلمون ومنذ الصغر مامعني الانضباط واحترام القوانين والعادات الموجودة في المجتمع الالماني.

يتعلمون بالمدارس التربية الوطنية والنظافة وحماية البيئة واحترام اشارات المرور والعناية بالحدائق والاسعافات الأولية ومخاطبة الكبار بالقاب الاحترام واحترام العمل المهني وعدم احتقار اي نوع من المهن الصغيرة التي يعملها الاخرين.

يتعلمون بالمدارس ايضآ احترام المواعيـد وان التاخير في المواعيـد هـي ( ام الكبائر ) الالمانية.

لايـحـبذ الالماني وان يتكلم الاطفال بصـوت عال ولذا تجـد بكل مدارس المانيا حـصص دراسية لتعليم الاطفال اصـول السلوك الصـحيح ( والاتيكـيت ) وطرق المعاملة مع الاخرين.

بالطبع لاننكر انه وهناك فلتات في المجـتمع الالماني ويوجـد الأف الاطفال يختلفون عـن الأخريـن... وسلوكياتهم وتصرفاتهم رعناء وتتسـم بالعدوانية والكراهية للانضباط ومراعاة السلوك القويـم ويخلقون المشاكل والمتاعب بالمجتمع، ولكنهم ايضآ يكونون ودومآ تحت الرقابة المستمرة والدائمة من قبل مصلحة ( الشؤون الاجتماعية )التي تتدخل علي الفور لتحجـيم اعدادهم حتي لايتفاقموا ويزدادون عـددا.

علي سبيل المثال، اذا شعرت مدرسة الفصل مثلآ ان احـد طلابها يعاني من الهزال من جراء الجوع او سوء التغـذية او يعاني من مشاكل صـحية ونفسية فمن حـقها اسـتدعاء الوالدين ومعرفة الاسباب في اهمالهـما لولدهـما، ولايملكان الحق في عـدم الحضور والاعرضا نفسيهـما للمساءلة القانونية،.. وايضآ اذا اذا كان احـد التلاميذ كسولآ لايقوم بواجباته المنزلية ويتعمد التاخير في الحضور المبكر للدراسة فللـمدرسة الحـق في مساءلة الوالدين.

اما عندنا في السـودان او في اي دولة عربية فقـد جـرت العادة ان تكون مسؤولية المدرسة ازاء الطلاب محـدودة بالزمن الدراسي اليومي ( من الساعة السابعة والنصـف صـباحآ وحـتي الثانية ظـهرآ ) وبعدها لاتهـتم المدرسة اطلاقآ بحال طلابها وظروفهم الأسرية ولاتكون هناك اي علاقة بين المدرسة والأسـرة.

عـندنا في السودان وفي كل البلاد العربية ايضـآ،انه ومن واجـب المـدرسة فقط ان تعلم الطلاب القراءة والكتابة والحفظ، ولاتتـدخل في باقي شـؤونه المتعلقة بالتربية والسلوك!!

لك مودتي.

الاخ عبد اللطيف
الحل الامثل لولدك الكبير خالد الذى يستعد لامتحان الشهادة السودانية هو ان ترسله للسودان مع والدته كى يمتحن من السودان ولكن مع مراعاة الظروف الاتية:-
اذا كان مستواه جيد فى اللغة العربية يدخل مدرسة حكومية ويجتهد ليدخل جامعة الخرطوم او جامعة الجزيرة او جامعة امدرمان الاسلامية او جامعة جوبا او كلية الاحفاد الجامعية وهى الجامعات السودانية المعترف بها عالميا .. لان اللغة العربية \مادة اساسية لدخول الجامعات السودانية اما اذا كان مستواه ضعيف فى اللغة العربية فهنا تختار اهون الشرين وهو ادخاله فى مدرسة خاصة وتستعد لدفع المصروفات الباهظة التى تفرضها هذه المدارس التى اصبحت تتاجر بالتعليم الابتدائى والمتوسط...لان المعروف فى العالم ان التعليم
مجانى من الايتدائى وحتى الثانوى العالى ..الا فى سوداننا الحبيب ..وحتى المصروفات الجامعية تدفعها الدولة فى شكل قروض للطلاب ويسددها الطلاب بعد التخرج والعمل...وفى هذه الحالة سوف يمحن ابنك شهادة اكسفورد او شهادة اخرى لا تسعفنى الذاكرة الان كى اتذكرها...انا اشدد على ادخال ابنك مدرسة حكومية لان لدى خبرة فى التدريس فى المدارس الحكومية والمدارس الخاصة_وسوف اعود لذلك بالتفصيل فى مجال اخر_) وولدك يجب ان يدرس فى جامعة سودانية اذا كان يخطط للاستقرار فى السودان ويجد وظيفة مرموقة لان السلطات السودانية لا تعترف بالجامعات الاجنبية ولا حتى جامعة هارفارد العريقةواظنك قرات بوست احدى القارئات هنا عن الطبيبة التى تخرجت من جامعة اجنبيىة ولديها خبرة 10 سنوات ورفضوا تعيينها فى مستشفى على الرغم من النقص الحاد فى الاطباء فى السودان..فقط لانها من جامعة اجنبية...هذا اذا ابنك علمى اما اذا كان اتجاهه ادبى فسوف لن يستطيع تحقيق طموحه ليدخل الخارجية ليصبح دبلوماسى اما اذا كان ابنك لا يخطط فى المستقبل ليعمل فى السودان فانسى كلامى هذا وخليه يواصل دراسته فى الخارج حتى ولو اضطريت ترسله لاوروبا او امريكا او كندا -وبالمناسبة الدخول لهذه الجامعات ليس صعبا ابدا كما يعتقد البعض-الا جامعة هارفارد فان الدخول اليهامن المعجزات السبعة- واستطاعت سودانية عضوة فى سودانييز اون لاين ان تتخرج من هذه الجامعة-
ونصيحة اخر ى ..لا ترسل ابنك وحده للسودان ولازم والدته تكون معاه لان ذهابه لوحده والسكن مع الاقارب ما بينفع لاسباب كثيرة ...ولى عودة للشرح بالتفصيل

بكري والجميع

السلام عليكم ورحمة الله

أسامة ولدي الكبير (4 سنوات) شابكني كل يوم ودينا السودان ودينا السودان, ويبدو أنه في عمره هذا لم يصب بلوثة القسوة على الوطن والبراءة منه(قدراً) طوعاً أو كرهاً..

الموضوع كبير شديد ومخيف شديد رغم إني ما تميت سنة ونص في السعوديةويدنا لسه في المويه البارده..


تخريمة :

لكن يا السر عبد الله شوقتنا لي كندا شديد.. يا ريت لو تستفيض لينا أكتر في حكاية التربية والتعليم هناك لأنو أخوك مفكر يجي يقعد ليهو 10 سنوات هناك وخايف من فقدان الهوية وخاصة الدين..

يا ريت..

يا الواثق اذا انت جيت كندا ما حنفقد الدين ولكن يمكن تفقد اللغة العربية-لان المسلمين فى كل المدن الكندية
يمارسون شعائرهم بحرية وتجد المساجد عامرة والحمدلله والمساجد بتنظم دروس اسبوعية للاطفال-
وطبعا انت ما حتصدق اذا قلت ليك ان بعض الم\دارس الحكومية فى كندا بتدرس اللغة العربية والدين الاسلامى
ولان المدارس الاسلامية الخاصة مصروفاتها عالية شديد-3الف دولار فى السنة-فنحن بنخلى اولادنا فى المدارس الحكومية
وسارجع لك مرة اخرى كى اشرح لك بالتفصيل

الأخ الـحـبيب الحـبوب،
almogira alemam

تـحـية الود والأعـزاز،
والشـكر علي حـضـورك الـمقدر، وقالوا في الـمثل( وعـد الـحـر دين عليه ) وعليه منتظـرين بـما وعـدت!

1 - اخـي الحـبيب، اعيش في المانيا ولااكثر من 21 عامآ وبحكم معرفتي باللغة الالمانية وبالبلد وناس البلـد فكثيرآ مااقوم بمساعدة بناتنا واولادنا حال وصولهم لالمانيا للالتحاق بالجامعات الالمانية واكون لهم دليلآ حتي يتعودوا علي الحياة في المانيا، ومنذ اكثر من عشرة اعوام وتتدفق علي المانيا موجات من اولادنا وبناتنا جـاءوا من شـتي بقاع العالم، بعضهـم جاء من السعودية واغلبهم من دول الخليج وايضآ من السودان وكينيا ونيجيريا وكلهم يحملون احسن الشهادات المدرسية او التخريج من جامعات شـتي. كلهم قصـدوا المانيا للدراسة بها وللحصول علي شـهادة تؤهلهم ليكونوا مسـؤولييـن كبار ببلـدهم السـودان.

2 - تقوم الجامعات بتقديم كل المساعدات الضرورية لهم من توفير للسكن واماكن الدراسة ومطاعم خاصة باسعار طلابية ومستشفيات لعلاجـهم وصيدليات وتوفر لهم ايضآ صالات للرياضة والهوايات، ومقابل كل هـذه الخـدمات الباهظة لاتطلب منهم ادارة الجامعات الا الانضباط بالمواعيـد واحترام العادات والتقاليد الموجودة بالبلد وعـدم مخالفة القوانييـن ومراعاة اللوائح الخاصة بحماية البيئة وتلوث الجـو.

3 - اقوم في فترات متعـددة بالاجتماع بهم جـميعآ ( بـمدينة لايبزج ) واشرح لهم كل مايتعلق بالقوانييـن الخاصة بالجامعة ولوائح المدينة واساعـدهم في بعض شـؤونهم الخاصـة.

4 - سـلوكيات وطباع الطلاب السودانييـن القادمون من السعودية ودول الخليج تختلف تمامآ عن باقي اخوتهم القادمون من داخل السودان وكينيا والمغرب. فـهؤلاء الاوائل يمتازون بالفوضـي وعدم الانـضباط ولايحـترموا لوائح الجامعة وكثيـرآ مايحضرون محاضراتهم بصـورة منتظمة واحترامهم لمن هم اكبـر منهم سنـآ مفقود بصورة واضـحـة ( بالطبع هنا لايـمكن وان اعـمم، ولكن وبنسبة اكثـر من 77% تجري فيهـم عادة الفوضي والانطلاق علي الأخـر!!!).

5 - طـبعآ كان علي وان الفت نظرهم الي سلوكياتهم وتصرفاتهم، ...ولكن كما يقول المثل ( الطـبع يغلب التطـبع ) فـهم وكنوع من الاحـترام يقومون بسماعي بكل ادب ويحترمونني بـحكم اننـي في مقام والـدهم ويوعـدونني بالالتزام الصارم بالضوابط الجامعية ومداومة حـضور المحاضرات .... ولكن وماهي الاسـويعات الا وترجع حليمة لعادتها القديـمة!!!!

6 - ماقصـدت ان اقوله في هـذا الموضـوع، ان كل طالبة او طالب جاء لالمـانيا انـما يعكس صـورة من بيتـه وكيف تربي وترعرع وكيف كانت نشـأته وتعليـمه، لذلك استغـرب بشـدة لـماذا هـم ودون الاخـرييـن من السودانييـن بهـذا السلوك الغريب الذي حـيـر حـتي الالـمان وباقي زملاءهـم الطلاب الاجانب!!?.

لك مـودتي.

اقول لك لماذا يا استاذ بكرى ان الولد الذى تربى فى السودان مؤدب ويحترم الكبير
وسلوكياته ممتازة؟؟لانه فى السودان الشارع يربى الاطفال لان المجتمع لا يسكت عن
قبيح الفعل وممكن الجار يؤدب الولد اذا لقاه بيعمل حالجة غلط...هناك قانون
شعبى متداول اسمه قانون العيب

الاخ الـحـبيب الحـبوب،
السر عبدالله،

ـ تـحـية طـيبة، وشكـري علي مـساهماتك الـمقدرة،... واللـه ياالسـر خففـت علي حـمل تقييييل بالحـيل.

بعض الاخـوان طرحـوا تساؤلات كبيـرة... واخوك عـديـم خبـرة بمشاكل الاطفال والتعليـم .....ووقعت لـي في جـرح وخارجـتني من السؤالات وجزاك اللـه عـني كل خـيـر.

تعرف ياالسر، انت دخلت علي الموضوع بتعليقات وردود كتيـرة... تعرف ليه ردودي عليك شـوية?.

عشان برد بالدور علي كل الاخـوان الـمشاركيـن بالموضـوع ...وبالطبع لما اوصـل عندي معاك (ونسة) طويلة.

بالمناسـبة حكاية ارد علي كل واحـد بالدور وبحـسب وصول رده او تعليقه .... ده نوع من الانـضباط الالـماني!!! ولو فطـيت واحـد ورديت عليك ده يبقي ......( كوربشـن!!!).

لك مودتـي.

..
.
معليش جينا لموضوع حيوى متاخرين شوية
بس بالجد الحوار الواقعى دا التقت لي جملة غريبة

Quote: اديك مثال واحد قابلته في طياره عمره حواله 45 كان ماشي روما و انا ماشه الخرطوم, قال لي انه ما بيحب يمشي السودان عشان مشكلته الكبيره اللي هي انه في السودان مافي ورق تواليت؟؟؟ على فكره الزول ده اتربى في ضهاري القضارف و كان بيمشي الخلا مع ابوه للزراعه بعد 4 سنوات في امريكا مشكلته بقت ان السودان ما فيه ورق تواليت.؟؟؟

دا زول دجال يا دينا ..
زول من ضهارى القضارف يعنى كان بطلع الخلاء كيف ؟؟
بعدين هو زول ما بصلى ولاشنو .. ؟؟ ورق تواليت ومستحدثات
تالت شئ ورق التواليت مالى الحمامات والبقالات ..

المشكلة مافى بناتكم ولا اولادكم
فيكم انتو .. ما جاهم احساس بحبكم للسودان
بسخاته وغبارو وكتاحتو وناسو ؟؟؟

منذ سنوات خلت كانت هناك معاناة يجى المغترب للاجازة وخامى لاولادو
النيدو والاندومى والحبوب والبسكويت ..

لكن خلال الـ 10 سنوات الماضية ..كل شئ متوفر كل شئ
دايرين يعنى ..
جلاكسى وكيت كات موجودة ؟؟
اندومى وباربيكان وموية صحة .. موجودة ؟؟
شيز بيرجر وشريزم ومندى ومظبي وبيتزا بالعشرات المحلات ؟؟
عربات موجودة بالايجار والاقساط والكاش ؟؟
افلام واتارى وكاسيتات موجودة ؟؟
متنفسات وحدايق ومطاعم ومنتديات موجودة ؟؟
سينما ، رحلات نيلية .. وغرف مكيفة موجودة ؟؟
جامعات ومدارس اجنبية ولغات .. بصراحة العندنا زى مامون حميدة
والتقانة ونصرالدين والخرطوم العلمية ما شفناهو بره ؟؟

الاولاد ديل مشكلتهم فيكم

بصراحة انا ما قريت كل المداخلات بس بجى راجع
اشوف الاولاد ديل ما بحبوا بلدهم ليه ؟؟
والمشكلة فيهم ولا فيكم انتو

_______________

ياخى انتو لسه مغتربين وبتتكلموا عن الاجازة فى السودان
والله ما شفتو الاغتراب هنا كيف ؟؟

..
.
وانا اقول ابناء المغتربين يفتقرون للوطنية وحب الإنتماء ليه ؟؟
كنت استعجب من نظرتهم ورأيهم عن السودان فى المنتديات وحوارات البالتوك
بل فى زياراتهم حسب الخطة الخمسية او العشرية التى تضعونها لهم ؟؟

Quote: اها ده سبب ثاني يا بكري انه الواحد ما يمشي السودان ولا يعاشر السودانيين لانهم في اي حاجه لازم يتشاكلوا و كل واحد يفرض رأيه و يبوظوا المكان.

معقولة يا دانيا ..
ليه الامريكان ما بتحاوروا ولا بضاربو ..
وهل دا سبب منطقى عشان ما تعاشرى بنى جنسك ؟؟
ولا بتتبري منهم ؟؟
اذا كان انت الام والمربية بتقولى كدا ليهو حق ابنك ولا بنتك
يعتبر السودان دا بلد متخلف وأرهابي واكلة لحوم بشر ..

يا عبداللطيف اخونا بتاع عًد الفرسان ولا رهيد البردى دا ..
كلامك ما وقع ليهو ؟؟ بجيكهو بكره

دا بوست يجعلك تطالعه يوميا ..
____________


بالمناسبة عندنا سالمون وايسكريم برضو

Quote)لكن خلال الـ 10 سنوات الماضية ..كل شئ متوفر كل شئ
دايرين يعنى ..
جلاكسى وكيت كات موجودة ؟؟
اندومى وباربيكان وموية صحة .. موجودة ؟؟
شيز بيرجر وشريزم ومندى ومظبي وبيتزا بالعشرات المحلات ؟؟
عربات موجودة بالايجار والاقساط والكاش ؟؟
افلام واتارى وكاسيتات موجودة ؟؟
متنفسات وحدايق ومطاعم ومنتديات موجودة ؟؟
سينما ، رحلات نيلية .. وغرف مكيفة موجودة ؟؟
جامعات ومدارس اجنبية ولغات .. بصراحة العندنا زى مامون حميدة
والتقانة ونصرالدين والخرطوم العلمية ما شفناهو بره ؟؟
اقتباس من تبالدينا\
........................
يا تبلدينا كلامك ده كله صاح لكن انت ما كلمتنا عن الروتين الحكومى والرشوات
يعنى اذا انت عاوز تقضى ليك حاجة فى مكتب حكومى ممكن تقضيه بدون واسطة او رشوة؟؟؟؟
اذا انت رديت على سؤالى ده بنعم...هسع بسوق الاولاد وبرجع السودان باول طيارة..وعندى رجعة ليك عشان احكى ليك تجربة 20 يوم فى السودان العام الماضى

الأخ الحـبيب الحبوب،
السر عبدالله،
تـحـياتي ومـودتـي،
بعـد قليل سـتبدأ مباراة كرة القدم بيـن الفريقي الألـماني والبولندي علي شرف مباريات كاس اوروبا.

وتـمتاز دائـمآ الـمباراة البتكون بيـن المانيا وبولندا بحساسية خاصـة لانو بولندا من اكتـر دول اوروبا بتكره المانيا بسبـب دخول قوات هتلر سنة 1939 الاراضـي البولندية وابادت نحو 2 مليون بولندي وقصفت المدن وحرقت القوات النازية عشرات الاف من القري والمساكن البولندية ، ولذلك الفريق البولندي بلعب دائمآ بروح الثآر وحبآ في الانتقام. اما الفريق الألماني بـحب يلعب حـبآ في اثبات جـدارته عالميآ في مجال كرة القدم وماشغال بذكري الحرب واللاعبييـن كلهم شباب صـغار لا ليـهم دخل بالحـصل زمان.

المشاهـدون الالمان لمباريات كرة القدم بحبوا يتفرجوها في الاندية وبالشوارع والميادين العامة، وبما انو درجة الحرارة اليوم 26 درجة فوق الصفر فده عند الالمان زي 49 في السودان.

نزلت قبل للشارع لقيت ليك سكان المدينة كلهم شـبه عرايا كان رجال كان من داك الـجـنس الفاق اللطيف بكتيـر، وكل راجل شايل ليه صندوق بيـرة ولاصـندوقيـن ( شراب البيرة عند الالـمان وقت الكورة زي التسـالي فـي السيـنما عندنا!!! ).

في يوم زي ده تلقي الالـمان خلو حكاية الانضباط وهاك ياكوريك وجـديع القزاز في الشوارع لما يتغلبوا.

قلت مادام المباراة لسـه باقي ليها زمن اشـوف الانتـرنيت واخـفف شـوية من ديوني علي الاخوات والاخـوة الشاركوا في الموضـوع، ولقيت قـدامي حـقك علـي.

الاخ السر انت كتبت بتقول في احـدي ردودك فـوق:

(...يا صلاح انامهاجر منذ 18 عاما ولا اقول مغترب لان الحكومة السودانية بتقول ان السودانيين فى امريكا وكندا واوروبا مهاجرين وليسوا مغتربين والسودانيين فى دول الخليج هم امريكا وكندا واوروبا مهاجرين وليسوا مغتربين والسودانيين فى دول الخليج هم المغتربين ويدللون على ذلك بان مغتربى الخليج اغنياء ومهاجرى اوروبا وامريكا وكندا فقراء وما عندهم التكتح..وهذا الكلام الذى كتبته انت من اصدق الحديث بان مغتربى الخليج اغنياء ومهاجرى اوروبا وامريكا وكندا فقراء وما عندهم التكتح..وهذا الكلام الذى كتبته انت من اصدق الحديث ويعبر فعلا عن الحقيقة المرة ..وانا عندما اكون مسافر ومار بالمطارات المختلفة ارى جميع هذه المشاهد التى ذكرتها عن تصرف اولاد المغتربين والمهاجرين ووالديهم ...والله يا صلاح انت فاهم المشكلة صاح!!!).
( السر عبدالله ).


صـراحة ياالسـر، انت لفتا نظري لـحاجة مهمـة راحـت من بالي وطوال كتاباتي في الموضوع وهو موضـوع سلوكيات بعض السودانيات المغتربات في الحياة اليومية وتأتر اولاهن وبناتهن بهـذه السلوكيات مثل شراء الاشياء الغير ضرورية والنزول للاسواق والعودة للمنزل بعشرات الاكياس المليانة (بالفارغات) والتباهي بهذا الشراء والتعود عليها وتكرارها كلما سـنحت الفرصة سواء في دول الاغتراب او بالمطارات او داخل مدن السودان!!!!، وهو الامر الذي يسـبب حساسية عند العودة للسودان مابينهـا أهلها بالداخل.

جاءت الي عنـدنا سودانية مع زوجـها للعلاج وكانت كمياتها الدهب العليها تكفي لشراء صيـدلية بالمانيا!!!. اصـرت ان تلبس دهبها في كل زيارة او طلعة او مقابلة مع الطبيب، واشـمئز كل من رأها علي هـذه الحالة وقالو (مـش الولية دي من السودان الاحـنا قاعـدين ناكل ناسـو!!?). الغريب ان زوجـها ماكان يبدي اي اعتـراض علي هـذه الصورة الزائفة للمرأة السودانية!!

ماكنت اود ان اتطـرق لهـذا لولا انه جـزء من سـبب الـحـساسيـة مابيـن السودانيـين والمغتربييـن.

بالمناسبـة، السودانية التي تعيـش في اوروبا او امـريكا وكندا تختلف تمامآ فـي سلوكياتها وتصرفاتها عن الاخـري المغتربة بالسعودية ودول الخليج، وكلهن متاثرات بعادات وطباع المجتمعات التي هـن بـها.

لك مودتـي،
والي لقاء قريب باذن اللـه.

الأخـت الحـبيبة الحـبوبة،
maia

تـحـياتي طـيبة،
ومسـكاقنا بالأكـوام، وشكـرآ علي مرورك الـمقدر وامل زيادة مـساهـماتك.

عـجـبنـي ياميادة كلامك لـم قلتـي : ( غايتو السودان هو عبارة عن حلو مر ، ما بتقدر تقول كويس ولا بتقدر كعب بيعتمد حسب الحالة والوضع والجو النفسي الانت فيه).

فعـلآ الحالة النفسـية بتعمل دور كبيـر في حـب الشـئ او كرهه. ولازم نعتـرف بانو في ناس نفسيـاتهـم قفلت (تـب!!!! ) من السودان ومن اي حاجـة فيها اسـم السودان.

واضـرب ليكي مثل بالسودانييـن القررو يسافرو لاسـرائيل ويعيشـوا فيها .... ولاجـنة السودان!!!،

واكثـر من كده اديكي مثال ضـحـكـنـي شـديـد، فـي سـودانييـن في السـعودية عاملييـن فيها هـم ابو الانقاذ ذاتو، ...وانو الانقاذ هـم حـماته وجـنوده وفدايته ...

ولكـن فـي نفس الوقـت من تـحـت لتـحـت جارييـن ....وبلا خـجـل جـري شـديـد للحـصول علي الجـنسية السـعودية!!!!..... ومسـتعـدين يتـخلو من ابو دين الجـنسية السـودانيـة ذاتـها!!!.

اخـتـي ميادة،
اكرر شـكري علي مرورك،
ودمـتـي.

الاخ الحبوب بكرى
طبعا السعودية ما بتمنح الجنسية اطلاقا ونادرين جدا العندهم التابعية ولكن هنا فى كندا وا\مريكا فالحصول على الجنسية ساهل جدا جدا
وخصوصا فى كندا لان كندا بتمنح الجنسية بعد 3 سنوات فقط وبدون تعقيدات ولكن حصولنا على الجنسيات الكندية والامريكية لا تسقط عنا الجنسية السودانية
والجنسية الكندية والامريكية بتسهل علينا حاجات كثيرة واهمها تسهيل السفر لاننا بندخل دول الخليج بدون تاشيرة اما السعودية فيمنحونك التاشيرة فى لحظات وبدون تعقيدات ..وبهذه المناسبة احكى لك هذه الواقعة..كنت فى سفر من نيويورك الى السودان على الخطوط السعودية وكان لازم نقعد فى مطار الرياض يومين ترانزيت وكانت معنا فى نفس الطائرة سودانية ولكن جوازالسفر بتاعها سودانى وبينما نحن حاملى الجوازات الكندية دخلنا الرياض بسهولة الا ان المراة السودانية رفضوا دخولها لان جوازها سودانى واضطرت تقعد فى مطار الرياض يومين...ولى عودة

الاخ الـحـبيب الحـبوب،
السر عبدالله،
تـحـياتي ومـودتي،

اولآ، الـحـمدللـه الالـمان غلبو واقدر اكتب لك بـمزاج.

ثانيآ، انا ياالسر كنت عايش في السعودية مدة طويلة، وكنت من الخرطوم مراسل لجريـدة (البلاد) السعودية وبتصـدر في جـدة. وخـبرت حياة السودانييـن وكيف عايشـييـن في السعودية.

ثالثآ، موضـوع جري بعض السودانييـن وراء التابعية السعودية عنـدي خلفيات كثيرة عنه،

رابعآ، طبعآ الحصول علي الجنسيـة الالـمانية مامعقـدة ولاصـعبة زي الحـصول علي اي جـنسيـة عربية، وانا حاليآ اعمـل باحـدي المكاتب التـي تسـهل للاجانب الأقامة الشـرعية بالـمانيا واقوم ايضآ بتقديـم كل الاسـتشارات القانونية والاشياء الضرورية والوثائق المطلوبة منهـم احضارها من بلادهـم حـتي تكتمل كل المستندات قبل تقديـمها لوزارة الداخلية الاقليمـية.

فـي الثلاثة سـنوات الاخـيرة ممكن اقول لك حـوالي 79% من السودانييـن اللاجـئييـن بالمانيا او المتزوجييـن من المانيات او من اكملوا ثمانية اعوام بالبلاد ويجـيدون اللغة الالمانية وعـندهم عمل ثابت حـصلوا علي الجـنسية الالمانية.

خـامـسآ، اكبر مشـكلة تواجـه السلطات المسـؤولة عن الاقامات ومنـح حـق اللـجـؤ والـجـنسية للسودانييـن هـو وجود اشـخاص ينتحلون صـفة انهم سودانييون هاربون من مناطق الحروب ويقدمون بيانات مزورة وهم في الاصـل من نيـجيريا او يوغندا وكينيا. وهنا تبدأ دائمآ المشاكل القانونية،

سـادسآ، الالـمان يحـترمون السودانييـن بشـدة لانهم في حالهـم لايشاركون في اي نشاطات مشـبوهة او ينضـمون لمنظمات متطرفة او لهم نشاطات سياسيـة معادية للدولة.

سابعـآ، هل تصـدق ياالسر ، انو عـدد السودانييـن الموجودين بالمانيا مقارنة بباقي الجاليات الاجـنبية هـنا عـددهم قليل للغاية لو قمنا بعمل مقارنة مع اعضاء هـذه الجاليات!!?.

لك مودتـي.

... وصـلتنـي رسالة صـغيـرة ولكـنها مـليئة بالكـثيـر...
الرسالة تقول:

( ... ياحـبينا الحـبوب ود الصايغ، السودان بنحبو شـديـد، واولادي بحـبوه اكـتـر منـي ويتـمنوا انو يقضـوا فيه الاجازات الصـيفيـة كل سـنة...

لكن مابنقدر نسافر له زي زمان .... عشـان سـتـرة الـحال!!!

يابكري ...اهم من دة كلو هو ماذا يمكن ان يفعل السودانيون والذين من اصل سوداني (حاملي جوازات سفر غير السودانية") من اباء وابناء للسودان وهم في هجرتهم او اغترابهم ؟اليمنيون و اللبنانيون والايرانيون والسوريون والهنود والصينيون في المهجر والاغتراب يفعلون لبلادهم اضعاف اضعاف ما كانو سيفعلونه وهم في بلادهم ؟ قتل "جهاز شئون المغتربيين" كل حماسة المغتربيين والمهجريين (من غير حملة جوازات اخري) الرغبة في عمل سوداني في الخارج ؟ هذا الجهاز الذي فرض ضرائبا ورسوما منذ نهاية السبعينات دون وجه حق حتي الان كملايين من الدولارات اغتني بها من يعمل فيها وصرفت الملايين في سفريات اهل الجهاز واسرهم ووووو ورايت مئات المغتربيين علي مدي عقود ثلاث يستدينون ليدفعو الجباية حتي يتمكنو من السفر الي السودان وما زال في خاطري ذلك الولد بطاقيته الخضراء في حوش الجهاز عام 1995 (اخر مرة زرت السودان) وهو واقف خلف منضدة لا قلم ولا ورق فيسها وعندما قدمت اليه دفتر المغتربيين وخلو الطرف رماهم بعيدا قائلا " ما بنعترف باوراق السفارات ادفع 700 دولار؟ " وعندما استفسرت استشاط غضبا وكاد يضربني ثم جرني الي مكتب اخر وجدت فيه مدير الضرائب الذي وبخني ونعتني بانني " لا وطنية لي وووو" .. الخ ......اول خطوة في تشجييع المغتربيين للعودة هو الغاء هذا الجهاز ورد بعض من الجباية لاصحابها .. لماذا يذهب ابناؤنا الي بلد ليس لا بائهم كرامة فيها يهينهم فيها موظف الجهاز ويمنعون من تاشيرة الخروج وهم اي اطفالنا يسافرون الي اية جهة في العالم دون تاشيرة خروج اينما يعيشون ... جعلت الانظمة السودانية المتتالية منذ عهد سئ الذكر نميري السودان بلدا طاردا وازداد سوء في زمن الانقاذ ...السودان بلد طارد فكفانا تجميلا لواقع سئ .. سودانيتنا في دماءنا وجيناتنا نورثها ابناؤنا ولا نحتاج الي سفر اليها لنثبت ذلك
مودتي
ابوبكر

معقولة يا دانيا ..
ليه الامريكان ما بتحاوروا ولا بضاربو ..
وهل دا سبب منطقى عشان ما تعاشرى بنى جنسك ؟؟
ولا بتتبري منهم ؟؟
اذا كان انت الام والمربية بتقولى كدا ليهو حق ابنك ولا بنتك
يعتبر السودان دا بلد متخلف وأرهابي واكلة لحوم بشر ..



للأسف لو مشيت اجتماع الجاليه عندنا و يكون مثلا ندوه عن المشكال الزوجيه, بدون اي مناسبه الموضوع يتغير لكيزان و معارضه عشان واحد من الحضور كلام رئيس الندوه او الضيف ما عجبه و يقوم يقول ليه يا كوز و يا سدنه و الزول بتاع السفاره ده الجابه هنا شنو و يلا بكره يدوروا ليك في البورد هنا شتائم و انت مشيت معناها انت كوز و انت سلمت على فلان يعني انت حزب امه , ننسى موضوع المشاكل الزوجيه الاصلنا مشينا ليه, عشان كده الواحد لمن يسمع بحاجه سودانيين زي دي ما بيمشي ليها, و على فكره ما حصل شفت الامريكان يبغيروا الموضوع الاساسي الناس قاعده تتناقش فيه و يقلبوه شكله و لو حصل صدقني حامشي طوالي و انسحب. ده غير ان السودانين في الغربه الكثير (لاحظ انا ما قلت الجميع) ما عندهم غير المشاكل و مخالفة القانون و يدخلوك في مواقف ما يعلم بيها الا الله.
انا ما قلت السودان بلد متخلف ولا ارهابي لكن طبعا كالعاده بشتيلوا الكلام البيعجبكم القشور و تسيبو الباقي, انا قلت ولدي لازم يمشي السودان عشان يعرف اهله و بلده و صلة الرحم, و حتى لو كان بدلنا سئ لازم يعرفه على الاقل عشان يحافظ على هويته, انا لمن قلت السودان حر و مرض و مافيه كماليات كنت بتكلم عن نظرتي لمن كنت طفله و هسعه و انا ام لطفل معاملة و نظرة الناس لينا و لاولادنا هي المشكله لان فيها كثير من الظلم و تحياتي

الاخ بكري الصايغ والمشاركون الكرام

مرات كتيرة الاهل بيساهموا في تعميق كره اطفالهم للسودان او على الاقل نظرة اطفالهم واولادهم للسودان بتكون على اساس انه ( السودان هو ذلك البلد الممتليء بالاوساخ وفي اقوال اخرى المعولق في اي حاجة ) عشان كدا بنلقا انه الفهم ده بيتغرس تماما جوه هؤلاء الابناء والاطفال
واول ما يجوا السودان في اجازة بنلاقيهم بيتعاملوا معاهو من هذا الفهم او بمعنى بفهم بيذكرني بمفهوم السياح الراكبين في بص سياحي وعاملين جولة من خلال شباك البص ، بتكون في حالة من الترفع شديدة على البلد
يعني مثلا تلقى الطفل شايل ورق ويجدعه في الشارع .. ليه ؟؟ بفهم انه اصلا البلد وسخانة
طيب ليه ما يعلموهم انه انتوا الجايين من بره ديل ساهموا في الحفاظ على الحتة القعدين فيها نضيفة وكانما السودان مفروض عليهو يكون دايما مبهدل وحالته حالة ويجوا اولاد المغتربين يزيدوا الطين بلة؟؟
عمره بلدنا ما كانت في يوم عالية الرفاهية ، السودان منذ الازل فيه معاناة على مر السنوات
لكن درجات المعانة دي بتختلف وببتفاوت والناس بتحاول تتطوعها للتعايش بشكل طبيعي بدون ازمات
وطبعا في ذلك السودانين تفوقوا على اجدع (الحواة)
يمكن ما مطلوب من ابناء المغتربين الذين تعودا على الحياة المرفهة والناعمة انهم يشوفوا السودان جنة الله على الارض
لكن المطلوب منهم ومن ابائهم انه يعلموهم انه قيمة الوطن اكبر من الاوساخ والبعوض والكتاحة والهبايب ، يعني نظرة الترفع تجاه البلد دي هي البتخلق الفجوة والاحساس بانه هذه بلد غير صالحة للاستخدام الادمي
مع انه في ناس عايشة فيه عادي وبشكل طبيعي جدا

لي تعليق على جزئية في مداخلتك اخي بكري الصايغ

Quote: السودانية التي تعيـش في اوروبا او امـريكا وكندا تختلف تمامآ فـي سلوكياتها وتصرفاتها عن الاخـري المغتربة بالسعودية ودول الخليج، وكلهن متاثرات بعادات وطباع المجتمعات التي هـن بـها.

بس لو سمحت لي اخي بكري الصايغ عندي ملاحظةفي الجزئية دي
للاسف بنجد حتى السلوكيات دي لابناء السودانين في امريكا واروبا وكندا

من خلال تجربة شفتها مرة في مطار ابوظبي في طريقي للسودان قبل عامين قادمة من الخليج ، قعدنا في المطار ترانزيت حوالي 8 ساعات وكانت معانا اسر قادمة من امريكا وكندا
الواحد كان حاسي انه قاعد في راكوبة في نمرة ستة في طريق حلفا ، حالة من الفوضى تزعل وتحنن في نفس الوقت

المسالة في النهاية مسالة جينات التربية السودانية التي لا تتغير بالنسبة لكثير من الاسر حت لو هاجرت لاقصى بقاع العالم يعني ما بيحاولوا يخلوا ابنائهم يتأثروا بالاشياء المفيدة في هذه المجتمعات سواء عوجة اللسان

لي عودة تاني

يا قريبتي

Quote: المسالة في النهاية مسالة جينات التربية السودانية التي لا تتغير بالنسبة لكثير من الاسر حت لو هاجرت لاقصى بقاع العالم يعني ما بيحاولوا يخلوا ابنائهم يتأثروا بالاشياء المفيدة في هذه المجتمعات سواء عوجة اللسان

اوجزتي فابنتي .. تصرفات نسلنا هي انعكاس لحالنا ..اعرف عشرات الاطفال والصبية الذين عاشو وتربو خارج السودان ولا تكاد تسمع لهم صوتا كما هو حال الاف وملايين في الداخل والشتات .. بعد سفر بنتي بقي ابني وحيدا معي .. امه قليلة الكلام ولذا عندما اكون في المنزل وفي نهايات الاسبوع وانا جالس في مكتبي في احد اركان البيت اشعر بضيق شديد حيث لا اسمع صوتا فاذهب اليه استنطقه في محاولة ايجاد ونيس فلا يكاد ان يقول كلمتيين ثم يصمت وينشغل بما هو فيه من قراءة او متابعة لفيلم ..الخ .. لاحظت ذلك في اصدقاءه وهم من اجناس مختلفة ..وكذلك في ابناء اسر قريبة الصلة جداوبعض الاصدقاء تزورنا احيانا.. كلهم منضبطيين ..ذلك ينطبق علي بنتي وبعد ان كبرن .. رغم بعد بنتي وولدي عن السودان الا انهم شديدي الاعتداد بسودانيتهمونوبيتهم ومرة اشارت بنتي الكبري الي رغبتها يوما لتعود الي السودان ( والذي تتابع اخباره من الاهل والتلفاز وتعرف جيدا ما يحدث هناك فعلاقاتنا الاسرية شديدة الترابط بمن في الداخل وفي الشتات غربا وشرقا ) وان تعمل في مجالات تخصصها واردفت " لماذا نحمل هذا الجواز-السوداني- الم نريد ان نعود يوما " السودان لنا برغم مافيه وماعليه ؟ "...هذه اجيال ولدت وتربت خارج السودان وهذا لا يعني ان سودانيتها رهينة بتواجدها في الداخل .. خرجت من السودان وانا في عشرينات عمري وقضيت اكثر مما عشت في السودان في خارجه ولم انقطع عن همي السوداني لحظة واحدة وكذلك ابنائي ..امر سودانيتهم في مسامهم وجيناتهم وان سمح المولي يعودون وهم عالمون بما في بلادهم من صعاب ..هذه اجيال لها طموحاتها ورؤاها وهي اكثر معرفة بعالم اليوم منا فهم جماهيير اليوم والغد كما كنا نحن في زمان سابق فرضنا رغباتنافي التعليم وكذلك كانت لنا مساهمات سياسية واجتماعية وفق زماننا ومعاييره وهاجرناونحن في مثل عمرهم دون استشارة احد بحثا عما يناسبنا ويناسب طموحاتنا ...ليسو احسن ممن هم في الداخل ولا الذين في الداخل خير منهم انها اجيال زمن واحد وهم واحد وان اختلفت السبل كما كان حالنا عجائز وكهول اليوم ... لسنا اوصياء علي وطنيتهم وليست معاناة اجيال اليوم في الداخل والخارج الا من نتاج مثل تلك الوصاية التي اضرت بكل السودان فصارت السياسة والافكار تدور recycled بيننا العجائز دون ان نعطي هذا الكم الهائل من الشابات والشباب الفرصة لادارة حياتهم وبلادهم ....
وشكرا مايا وبكري وكل المساهميين فالامر يستوجب المناقشة دون شطط
مودتي
ابوبكر سيداحمد

قريبنا بكري

سلام ومسكاآقنا

لا شك أن هناك بعض الأسر لا يفضلون قضاء الأجازات بالسودان ، نظراَ لتعودهم على نمط حياة مترفة غير متوفرة في السودان ولكن الغالبية هنا في السعودية تسافر إلى السودان والدليل على ذلك عدم توفر الحجوازات بالطيران أثناء الاجازات إلى الخرطوم سواء بالخطوط السودانية أو السعودية وعن المسافرين بالبحر (حدث) وهم كثر .

وأنا أعيب الأسر التي تغيب عن بلادها فترة طويلة وهي مقتدرة على السفر واعيبهم أيضاً على عدم تلقين أطفالهم معرفة وحب الأهل بالسودان .

والحمد لله الذي جعل أطفالي على شغف وهم يتنظرون الأجازة بفارغ الصبر لملاقاة الأهل بالقرية

Quote: وولدك يجب ان يدرس فى جامعة سودانية اذا كان يخطط للاستقرار فى السودان ويجد وظيفة مرموقة لان السلطات السودانية لا تعترف بالجامعات الاجنبية ولا حتى جامعة هارفارد العريقةواظنك قرات بوست احدى القارئات هنا عن الطبيبة التى تخرجت من جامعة اجنبيىة ولديها خبرة 10 سنوات ورفضوا تعيينها فى مستشفى على الرغم من النقص الحاد فى الاطباء فى السودان..فقط لانها من جامعة اجنبية...هذا اذا ابنك علمى اما اذا كان اتجاهه ادبى فسوف لن يستطيع تحقيق طموحه ليدخل الخارجية ليصبح دبلوماسى اما اذا كان ابنك لا يخطط فى المستقبل ليعمل فى السودان فانسى كلامى هذا وخليه يواصل دراسته فى الخارج حتى ولو اضطريت ترسله لاوروبا او امريكا او كندا -وبالمناسبة الدخول لهذه الجامعات ليس صعبا ابدا كما يعتقد البعض-الا جامعة هارفارد فان الدخول اليهامن المعجزات السبعة- واستطاعت سودانية عضوة فى سودانييز اون لاين ان تتخرج من هذه الجامعة- ونصيحة اخر ى ..لا ترسل ابنك وحده للسودان ولازم والدته تكون معاه لان ذهابه لوحده والسكن مع الاقارب ما بينفع لاسباب كثيرة ...ولى عودة للشرح بالتفصيل

الأخ العزيز السر عبد الله
الرجاء مواصلة هذا الحديث الشيق والهادف ،،

قولك أعلاه أزعجني ، وتقصيت حوله كثيرا وتوصلت
إلى أن العمل بالسودان صعب فقط لخريجي كليات
الطب لأن المسألة أيضا صعبة لخريجي الداخل،،

ولدي يود التخصص في مجال الهندسة ، وحسب ما
فهمت أن العكس صحيح بالنسبة لخريجي الهندسة
من الخارج حيث يزداد الطلب عليهم لعامل اللغة
الإنجليزية والعمل لدى الشركات الأجنبية والمنظمات
والشركات الوطنية الكبرى،،

الآن المشكلة أخي السر ،، بحثت في سجل الجامعات
البريطانية بإعتبارها الأقرب جغرافيا ويسهل لنا
السفر إليها من الخليج أضف إلى أن التأشيرات
أسهل ، وجدت أن الدراسة تتراوح بين 13 - 17 ألف
جنيه إسترليني ((الجنيه الإسترليني = 2.015 كندي
و 1.972 دولار أمريكي)) غير الإعاشة والسكن،،

فهل لي أن ألقى مقارنة بينها وبين الدراسة في
كندا من حيث الرسوم الدراسية والإعاشة ، علما بأن
الدراسة في كندا لا تقل شأناً عن أوربا أو أمريكا،،
==
هذا إنحراف (طفيف) عن مسار البوست ولكنه أيضا ينصب
في مصلحة أبنائنا ويفيد في تبادل هذه الخبرات من
واقع معاش،،

أخوانى وأخوتى المشاركين فى هذا الموضوع

الأبناء يـتأثرون وألى درجة ما بميول والديهم
أو الظروف التى أجبرت والديهم على القبول بالخيار الموجود
وهو الأقتلاع من التربة السودانية الى أن تعاودها الخصوبة
أتحدث عن تجربتنا علها تضفى بعدا مفيدا للموضوع
مقيمين ب (أيرلندا) بغرض الدراسة والقريشات طبعا
لكن ألى أجل قريب جدا
فالسودان أهلنا وجيرانا وحبانا
والسخانة والتراب وقطع الكهرباء ياها جزء مننا ومن ثقافتنا وبئتنا شئنا أم أبينا
ربنا الحمد لله قدرنا ننزل السودان كل سنة ودى ليها أثر كبير جدا على أرتباط أولادنا بالأهل والناس
البيوت عندنا ضيقة والمساحات بينا وبين ثقافات الناس برضو ضيقة
لأنك مهما فعلت لن تستطيع الأندماج فى مجتمعاتهم لأختلاف الثقافات والأهتمامات وحتى مراسم الأجتماعات وغيرها
ربما و أن ظللنا الى ماشاء الله هنا لن نستطيع الأنغماس فى مجتمعاتهم وربما يكون لفشلنا فى التخلى عن حاجاتنا وتفاصيلنا وخوصوصيتناولسنا وحدنا فمعظم الأسر السودانية التى نعرفها لم تستطع التأقلم وتكوين علاقات أسرية بمعناها الذى نعرفه فى السودان مع الأيرلنديين هنا .
الا فيما ندر ولم أرى ما ندر هذا لكن لأتحاشى التعميم
وتجربتى وتجربة أصدقائى الذين أعمار أبنائهم مقاربة لعمر أبنائى
أنهم يفرحون كل الفرح بالسودان والجرى فى الشارع واللعب مع أبناء العمومة والخيلان والجيران
وبياكلوا وبيشربوا الحاجات الأحنا أتعودنا عليها ويستمتعوا بها
لأنهم تقريبا تعودوا عليها بحكم الزيارات المتكررة الى السودان

المهم
ألخص فى أن تجربتى قد تكون غير مكتملة بعد لأن بناتى ما زلن صغيرات
أركز فى النزول الى السودان كلما حانت الظروف
والوجود وسط الأهل والبيت الكبير لندع أبناءنا يعرفوا أهلهم ويكونوا صداقات وزكريات يحملوها معهم
والسودان دا كان وصلنا السماء ياهو بيتنا وبلدنا وراجعين ليهو يبقى نهيأ أولادنا على أستيعابه والتأقلم معه

_________________________________________________________________________________________

اولا العيب ليس في الاولاد ولكن في الاباء الذين لم يحسبوا حساب لعودة ابنائهم يوما ما ولذلك لم يعملوا على ربطهم بالسودان موطن جدودهم ومكانهم النهائى اذا كان لديهم تفكير في العودة اليه مرة اخرى
اما اذا كانت هذه الاسر لا تفكر في العودة فالاحسن لهم العمل على دمج ابنائهم في مجتمعاتهم الجديدة ويا دار ما دخلك شر


Quote: يقول احـد اصدقائي وهو مقيـم بدبي ان اطفاله قد تأثروا جـدآ بما يردده هو واصـدقاءه سلبآ عن السودان، والتصقت تعابير كثيرة سـيئة في اذهانهم الفجـة كنا نرددها في حضورهم اثناء مشاهداتنا للمحطة الفضائية السودانية مثل تعابير ( بلد حفرة ) ( بلد خربانة ) ( حكام فاسدين لصوص ) ( البلد باعوه وسففونا التراب ) ... وتعابير اخري اكثر حـدة جاءت كلـها تبعآ للحادث الذي نكون قد شاهدناه بالتلفزيون السوداني ، وتراكمت هذه التعابيـر عنـدهم واصبـحنا وكل اجازة نفاجـأ باولادنا ويقولون لنا ( ياابوي.. نحـنا مسافرين للبلد الـحفرة!!!).



هذا ما يؤكد ما ذهبنا اليه
كذلك هناك فرق كبير بين ارتباط السوداني بوطنه وغيره من الجنسيات الاخرى كالمصري مثلا فنجد ان السوداني دائما يعمل على سب وطنه والتفليل من شانه واظهار الكره له ووصفه باسوا الاوصاف كالحفرة والعن ابوها بلد وما الى ذلك من مظاهر ضعف التربية الوطنية لدينا نحن السودانيين على عكس المصري الذي لا يرضى اي سؤ في وطنه ام الدنيا وهو يمكن ان يكون غير راض عن النظام في مصر ولكن الخطوط واضحة بالنسبة له بين الوطن والنظام
وتجد ان كثير من السودانيين يهاجرون ويتزوجون من بلاد المهجر ويمكثون سنين عددا في اوطانهم البديلة وفي ساعة تجلي يتذكرون انهم سودانيون ولا يتذكرون الا ضعف الامكانات والفقر وقلة ذات اليد وينسون القيم والاخلاق السودانية الاصيلة التي لا تقدر بثمن كالذي يعلمه والده الفقير الى ان يتخرج ثم يعيره بانه فقير معدم ولا يليق به كاب وسط زملائه ووسطه الجديد بعد ان تخرج وتعلم وعمل

اما اولئك الذين يتزوجون من اجنبيات ويمكثون لعشرات السنين هؤلاء افضل لهم نسيان حكاية السودان دي والتعايش مع واقعهم الجديد وبلدهم الجديد ولا اظن ان السودان في قمة اولوياتهم وهو ليس في حاجة لانتقاداتهم التى تقلل من شانه ولا تزيده شيئا
كذلك لا يستطيع كثير من السودانيون التفريق بين السودان كبلد ينتمون اليه وواجب الوطنية يدعوهم لحبه والفخر به مهما كانت امكاناته ضعيفة وبين النظام الذي يحكم السودان وماهيته
لكل شخص ان يعارض اي نظام يرى انه لا يتفق معه ولا يمثله وله الحق في وصفه باسوأ الاوصاف الذي يرى انها تنطبق عليه
ولكن لا يحق له ان يسب وطنه وانه حفرة وما الى ذلك من اوصاف


اما مغتربي الدول العربية والذين لا يعلمون انهم لا محالة عائدون الى بلادهم فهم يخطئون في حق ابنائهم عندما لا يجعلونهم يعيشون واقع انهم من بلد اقل في الامكانيات من البلد الذي يعيشون فيه الان وكذلك يخطئون عندما لا يضعون منهج واضح لربط ابنائهم بعادات وتقاليد وطريقة عيش اهلهم في السودان مما يجعلهم فاقدي الهوية مهزوزي الشخصية الا من رحم ربي وذلك بسبب عدم شعورهم بانهم جزء من المجتمع الذي يعيشون فيه لان طبيعة المجتمعات التي يعيشون فيها لا تنظر لمؤهلات القادم اليهم ولا لنوع الخدمة التي يقدمها لمجتمعتهم بل ينظرون لذلك الوافد على انه مسترزق ضاقت به الحياة في بلده مما جعله ياتي لتقديم خدماته لديهم ولذلك هو اقل منهم مجتمعيا وان تسلح بالعلم والمؤهلات
هذه النظرة التي يعانيها الاباء ولكنهم يصبرون عليهاو يحاولون ابعادها عن ابنائهم بتوفير مستويات عيش مرتفعة وقريبة من تلك التي تتوفر لدى اهل البلاد الاصليين ويغفلون ربط اولئك ببلدهم الاصلي وتعريفهم بمستوى العيش هناك وانهم هنا لفترة مؤقتة لتحقيق اهداف محددة
هذا الشئ يفرز اجيال ترى انها ارفع مكانة من ذويهم في السودان دون ان تفارقهم عقدة النقص الناجمة من رفض المجتمعات التي يعيشون فيها لهم وعدم فبولهم كافراد في هذا المجتمع
ولذلك تكون النتيجة مزيد من رفضهم للمجتمع الاصلي الذي الذي جاء منه اباءهمو يحملونه المسئولية في وضعهم الحالي كونهم منه مما جعل رفضهم في المجتمع البديل واقعا يحاولون الهروب منه بالتطاول على مجتمعاتهم الاصلية

كذلك ينشا كثير من هذه الاجييال بوجدان وثقافة المجتمع البديل الرافض ويجهلون ثقافة مجتمعاتهم الاصلية مما يزيد المعاناة لديهم


الحديث اعلاه لا ينفي وجود اباء مستنيرين عملوا على ربط ابنائهم بالوطن وبالتالي كفاهم مؤونة الاجتهاد في سلخ جلودهم ومحاولة الانتماء لمجتمع لا يقبل بهم ويراهم اقل بغض النظر عن ماهي الحقيقة في من هو الاقل

الحديث يطول وهو ذو شجون


نعود باذن الله

ـــــــــــــــــــــــــــــــــــــــــــــــــــــــــــــــــــــــــــــــــــــــــ

اتفق معك 100%

..
.
بسم الله نبدأ
اولاَ فأتنى ان احى هذا التجمع الابوي والفكرى
لمناقشة بعض همومهم واهمها تربية النشء وتعليمهم وزرع حب الوطن
والاهل فيهم ..
وشكرا للاخ بكرى الصائغ على فتح هذا الحوار العائلي

استاذى الفاضل ابوبكر ؛

Quote: تربية الاولاد في السودان او خارجه مهمة الوالدين والاسرة ولا اظن ان المكان هو المؤثر الاول في ذلك الامر .. التزام الوالدين بضوابط اخلاقية واجتماعية يطبقونها في انفسهم ثم اولادهم تجعل امر التنشئة متناغمة مع موروثات الوالدين

هنا مربط الفرس .. واتفق معك ان مهمة الوالدين هى التربية والتعليم وقبل العلم اخلاقا
وصدق الشاعر :
علموا النشء علما تستبين به سبل الحياة وقبل العلم اخلاقا
وليس العلم هو التعليم الإكاديمى فقط ليؤهل الابن/الابنة ليصبح طبيباً ولا مهندساً او عالم ذرة
العلم هو نربية ونوجهه أن نعلمه الاخلاقيات والمثل والمبادئ والوطنية والارتباط بالارض والاهل والموروثات
الثقافية والقيم الأدبية والأخلاقية والدينية. وحب السودان وعشقه والانتماء .. لهذه الارض التى تغطت بالتعب
ليست تلك البلدان المفرشة بالحرير والسهولة او تلك الاراضى التى نحن دخلاء عليها فهى ليست لنا ولا هم لها ..
قلت يا ستاذى الفاضل :

Quote: ولاحظت تناغما اخلاقيا واجتماعيا وانضباطا في الوقت واماكن ذهابهم حيث يقوم احد الوالدين من اسرهم بتوصيلهم وارجاعهم وحين يتبادلون الزيارات في المنازل يكون ذلك وفق اتفاق بين الاسر

واسترسلت قائلا :

Quote: لي ابن واحد وله من الاصدقاء عدد من غير السودانيين لقلة تواجدهم في المدرسة التي يدرس فيها

Quote: الان في الاجازات وحيث ان بعض صديقاتهن يعملن يكون الخروج ان لزم محددا ببرنامج ومكان ووقت .. علما بانهن من اجناس مختلفة ..ولاحظت ذلك كذلك حيث يدرسن ويعملن في الخارج بعيدا عنا .... الاحظ ذلك كذلك في ابناء اخي وهم صغار وفي ابناء عديلي واحفاده

اولا دعنى اكون صريحاً- فلا تؤاخذنى - مع مراعاة ظروف الإغتراب وصعوبة المعادلة بين الحياة الرغدة وتعليم الابناء
هنا تظهر ظواهر الاستلاب الثقافي وعدم الانتماء الفكرى للبلد مع غياب الحس الوطنى ..
اعذرنى ولكن انا متأكد بان ابنك وبناتك - وابنائكم وابنائهم - لا يعرفون الان ان عثمان حسين توفى ؟؟
او من هو عثمان حسين ومن مصطفي سند؟؟ لايعرفون فضيلى جماع و احمد المصطفي وخضر بشير وكرومه وصلاح احمد ابراهيم
ستجدهم تنحصر ثقافتهم ومعرفتهم فى حدود لا تمت لنا بصلة وستجد أن تذوقهم الادبي هو غريغ ديفيد وشاكيرا وسيلين ديلون
ونانسى عجرم وهيفاء وتامر حسنى وهانئ شاكر ..
اجلس معهم واسالهم ماذا يعرفون عن محمد احمدالمحجوب ومن الذى مهر استقلال بلده السودان بدمه؟؟
بل ومتى رفع اول علم السودان ؟؟ وماذا يعرفون عن قمة اللا ات الثلاث ومن كان رئيس السودان وقتها ؟؟
ماذا يعرفون عن عظمة السودان فى النكسة ودوره في تحطيم خط بارليف ؟؟
اسالهم هل راؤوا مقرن النيلين فى الخرطوم السمرا واقصد حقيقة هل شاهدوا عند كبري شمبات ان هذا لونه ابيض
وذاك اسود داكن ؟؟ يقترنان عند ذلك الملتقى ؟؟
اسألهم ماذا يعرفون عن أمير الشرق وعلى دينار وبعانخى وعمارة دنقس وعبدالله جماع ..؟؟
اسالهم عن اول طبيبة سودانية ؟ وعن رابحة الكنانية
اسالهم ماهى معلوماتهم عن ملاحم المك نمر وحملات الدفتردار الإنتقامية ؟؟
ومعركة كررى وشيكان وام دبيكرات.. وأين الطابية المقابلة االنيل ..؟؟
اجعلهم يعلمون ما هو حى الملازمين ولما سمى بهذاالاسم ولماكانت العرضة ؟ وكم من الرفات فى قبة الامام المهدى ؟؟
بل من هو اخر رئيس وزراء للسودان ؟؟ وكيف اطيح به ؟؟ ومن هو النائب الثالث لرئاسة الجمهورية الحالية
بل اين عقدت اتفاقية نيفاشا وممن هما طرفى النزاع ؟؟
لكن للاسف فى المقابل ستجدهم يعلمون اين يقع برج بيزا المائل واين تقام حفلة كاظم الساهر ؟؟
وما هو اخر البوم لشين بول وما هى الذ غير البيتزا من انتجتها كنتاكى وماكدونالدز ؟؟
وتأكد تماما ان اجابوا على 50% من هكذا معلومات فهولاء سوف اشيد لك بهم وباجتهم وباجتهادك معهم ..
وان لم يفعلوا فهذا تقصير كبير لا يقابله تقصير ؟؟
اجعلهم يزدادون تماسكا بالوطن وعزته وقوميتهم ..
بلاشك ستلاحظ تأثير الاستلاب الفكرى والثقافي ارتداء الزى بصورة غير عادية ان كانوا بنينا او بنات حتى المشية التى تشبه
حركات راقصى الهيب هوب وراقصى البريك .. وهذه اشياء طفيفة مقارنة بحب الوطن الذى لا يحده زى او اغنية ..

Quote: عدم القدرة علي التعامل مع صعوبات الحياة في السودان لابناء ولدوا وتربو في بلاد احسن حالا من السودان لا يعني ان هؤلاء اضعف عودا والبشر يحتاج الي التعود والتكييف وهذا يتفاوت بين واحد واخر ...

Please define difficulty of life in Sudan??n
والله اسف بس ما عارف اقول ليك انواع ولا محدددات صعوبات الحياة فى السودان التى تتحدث عنها
هل الصعوبة فى اسلوب التعامل بحكم انهم اتربوا فى بلاد احسن حلاً كما تقول
ام صعوبة فى المواصلات ؟؟ ام صعوبة التعليم ؟؟ ام صعوبة فى توفر الإحتياجات ؟؟ ام صعوبة فى الاخلاق
يا استاذى الفاضل لا يخلو مجتمع من الصعوبات وصعوبات الحياة التى تتحدث عنها فى السودان افضل حلا من خارجه
افيدك باننى درست مراحلى حتى الثانوية داخل السودان واكملت الجامعية خارجه وتغربت فى بلدين ايضا
واتيحت لى نعمه من الله ان ازور عدد من البلدان .. والله لم اجد اسهل من العيش داخل السودان
مهما تتفاوت الاراء فاننا سنجمع ان السودان :
السودان امان .. لا تحتاج لتقل ابنك الى اصدقائه ذهابا وايابا كما تفعلون.. لا تتخوف ان يغتصب فى طريق العودة
لا تنام وانت تفكر ان ابنتك مع البوى فريند وان ضربتها لاتصلت بـ 911 واتاك المسؤول الاجتماعى
لا تهم ان ابنك ان تأخر فسوف يبيت فى امان مع عمته او خاله وواثق بانه لم يكن فى النايت كلب حتى الصباح
وهو يحتسي جرعات من البيرا فى ظل التحرر الثقافي والحرية المكفولة ..
السودان اخلاق .. ما رأيناهو وسمعناهو من تدهور اخلاقيات الابناء بل والأسرة فى العلم الغربي والخليجى
لن تتحمله صفحات هذا المنبره.والاخلاق امر نسبي ما يوجد فى السودان يوجد اضعافه خارجه مهما ذكر المغرضون
السودان توفر احتياجات .. الان وكمااسلفت قبل اكثر من 12 سنوات صارت تتوفر فى السودان جميع الاحتياجات من ملابس وماكولات ومشروبات
وعطور وأدوية .. الخ وقد لا تتصور الغلاء الذى اجتاح الدول العربية مقارنة بالسودان وما تسمع كلام مصر ودبي وسوريا
رخيصات لاعلاقة فى الاسعار وانت ادرى بامريكا والغرب لا تحتاج لاوضح لك ..
السودان اهل واحباب .. يساهمون فى التقويم والاشراف كما فعلوا معك وليست بالشعارات الجديدة التى تقول : ما عايز حد يدخل فى تربية اولادى
والفلسفات التربوية الغربية ..
السودان وطن وانتماء .. ان لم تساهم الحكومات ومناهج التعليم فى تدريس الوطنية الا ان السودان بداخله يزرع هذه الاسس وتلك
المعتقدات وذاك الحب العميق بالتراب والارض ...
قد تكون هناك بعض الاشياء الطفيفة التى لا نصفها بالصعوبات مثل الانقطاع المتفاوت للتيار الكهربائي او المياه
الخدمات الصحية - رغم توفر المستشفيات الحديثة والخاصة _ بس تدفع _ ومتحدثك هذا دخل فى خلاف اسرى بسبب اجراء عملية
استصال للمرارة بالمنظار داخل السودان او خارجه وبعد شد وجذب اجريتها هنا باحدث الاجهزة واحدث الجراحين وافضل المراكز الطبية
وهذه قد لا تتوفر للجميع ولكن لمن يقارنون بين هنا وهناك فأود ان اقول الا لو يغلبك جيبك وتقصر قروشك ..
السودان الخاله والعمة .. وجلسة ضحوية ولمه .. وتواصل وحب وعشق وتفانى ووقف فى الافراح والاتراح

Quote: لاحظت عند عودتي من اسفار الي الشرق الاقصي اسر شرق اوسطية اتية من المهجر في استراليا ورايت كيف يعبث بعض اطفالها وحتي الكبار منهم داخل الطائرة وفي المطارات بحيث لا تكاد ان تغفو لحظة في سفر طوييل ...

لماذا تعتب على الاجانب ؟؟ وتنسون انفسكم وتصرفات اطفالكم وابنائكم ؟؟
والله لم ارى فى حياتى مثل ( قلة أدب ابناء المغتربين والمهاجرين ) الا من رحم ربي
وانت تراهم فى المطارات وهو يجرون بعربات نقل الاغراض - الترولى - والصياح والحركة والعبث فى داخل الطائرات
والمطاردات والوقوع والسقوط ورمى الماكولات على ملابسهم وفى الصالات
وعلى مرأى من الوالدة والوالد وهما يتاملون بغباء وبرود اعصاب ولا حتى كلمة تأنيب او ردع
وعلى العكس نرى بقية ابناء واطفال الدول الاخرى يجلسون بتهذيب وهدوء وهم يتأملون هذه الفوضى باستغراب
واستعجاب واعتقد ان ما رأيتهم بلاشك ان اباءهم من اصل سودانى .. او يسكنون مع سودانيون فى نفس البناية

Quote: انا شخصيا لا احب قضاء اجازتي في السودان لاسباب صحية واجتماعية حيث غبت كثيرا وصار امر تغطية اجتماعيات متراكمة تستوجب سفرا الي مناطق فيها اهل في الشمال والشرق لا توفره لي ايام اجازاتي المعدودة والتي اوفرها لجمع اسري مع بنتي اينما يعشن .

قد اجد لك العذر فيما يتعلق بالاسباب الصحية رغم توفر كل العناية الصحية هنا
وبلاشك ان اسابكم الصحية -قد- نحصرها فى الضغط والسكرى والازمة الصدرية .. التى اوجدتها الغربة والكفاح والإرهاق
اما عذرك بخصوص التغطية الاجتماعية هل ترى ان بحضورك لا تستطيع
ان تغطى الالتزمات الاجتماعية .. ياخى ( القحة ولا صمت الخشم ) غطى من تستطيع واعتذر للاخرين
ولكن عدم القدرة على الوصول للاهل فى الشمالية يمنعك من الحضور ؟؟
لما لا تحضر وابنائكم وتريهم جرائد النخيل وانسياب النيل فى قلب الصحراء تريهم الفن النوبي
والتراث الحضارى تريهم البجراوية وحضارة جدودهم تشعرهم بان هذا هو وطنهم وووطنه وارض اجدادهم..
ولما لا تجمعهم فى احضان اجدادهم وجداتهم فى رحلة سياحية بدلا ان تجمعهم فى بلاد ليست بلادهم ومجتمع ليس مجتمعهم
وهم اساسا يعيشون فيه ؟؟ لا لا تجعلهم يخوضون تجربة حب التراب والمعاناة والشعور بالوطن
ورائحة الارض ؟؟
صراحة هذا هو العذر الاقبح من الذنب ..

بخصوص ردك الثانى قلت :

Quote: ولذا عندما اكون في المنزل وفي نهايات الاسبوع وانا جالس في مكتبي في احد اركان البيت اشعر بضيق شديد حيث لا اسمع صوتا فاذهب اليه استنطقه في محاولة ايجاد ونيس فلا يكاد ان يقول كلمتيين ثم يصمت وينشغل بما هو فيه من قراءة او متابعة لفيلم

ودى واحدة من عيوب الغربة الانطوائية لعدد من ابناء المغتربين والمهاجرين
عدم الاحساس بالجو الاجتماعى المفعم بالمودة والاخاء والذى لا يستطيع ان يملائه الاب فى سعية الدؤوب لتوفير
المال والانشغال مع العمل واهتمامات الام بالعمل او المتطلبات الاخرى عكس السودان حيث تجد الخالات والعمات
والجيران واولادهم واصدقائهم فى جو حميم وضحك وونسه وفرفشة واجتماعيات بعضهم يعيبها لنا والبعض يؤيدها
ويميزها لدورها لفعال فى الترابط الاسري والاجتماعى والوطنى

Quote: رغم بعد بنتي وولدي عن السودان الا انهم شديدي الاعتداد بسودانيتهم ونوبيتهم ومرة اشارت بنتي الكبري الي رغبتها يوما لتعود الي السودان

مرة اشارت !!
لماذا تنتظرها حتى تشير بل من المفترض ان انت تنصحها وتشجعها قبل ان تشير هى ؟؟

Quote: لماذا نحمل هذا الجواز-السوداني- الم نريد ان نعود يوما " السودان لنا برغم مافيه وماعليه ؟ "...

Quote: هذه اجيال ولدت وتربت خارج السودان وهذا لا يعني ان سودانيتها رهينة بتواجدها في الداخل

Quote: ليسو احسن ممن هم في الداخل ولا الذين في الداخل خير منهم انها اجيال زمن واحد وهم واحد وان اختلفت السبل كما كان حالنا عجائز وكهول اليوم

حب الوطن والسودان والرغبة فيه ليست بحمل جواز او لون بشرة او اسم
ان كانوا بالداخل او الخارج فسودانيتهم رهينة بما تغرسونه فيهم من قيم وانتماء وحب للوطن
هناك من بالداخل من هم اقل وطنية ولا يشعرون بالوطن وهناك من بالخارج من يكرهون الوطن ولا يحسون
تجاهه سوى بالنفور والكتاحة والسخانة والمعاناة والصعوبات التى احسستموهم بها ..
ساعدوهم بما تبق من ايامكم ليشعروا بالوطن وقيمته فالوطن باق والحكومات زائلة
الارض ثابته والصعوبات متناقصة
الموروثات راسخة والمكتسبات ذاهبة
القيم والتقاليد باقية والطبائع والاقامات الاجنبية فانية
هذا هو الوطن ..

Quote: لسنا اوصياء علي وطنيتهم وليست معاناة اجيال اليوم في الداخل والخارج الا من نتاج مثل تلك الوصاية التي اضرت بكل السودان فصارت السياسة والافكار تدور recycled بيننا العجائز دون ان نعطي هذا الكم الهائل من الشابات والشباب الفرصة لادارة حياتهم وبلادهم ....

بل العكس تماما واختلف معك .. بل انت وصى على وطنيتهم وزرع حبهم لبلادهم
فى غياب الدولة والمناهج والتى تغرس فيه تلك الوطنية فى غيابهم عن وطنهم وطول غربتهم
انت وصى لانهم نتاج غربتك وبقائهم بعيدين عن ارض جدودهم وشعور انتمائهم
وصى على وطنيتهم لان هذا واجبك ان تزرع الوطنية فيهم ..
لا ان تنفي هذه الوصاية

Quote: السودان بلد طارد فكفانا تجميلا لواقع سئ .. سودانيتنا في دماءنا وجيناتنا نورثها ابناؤنا ولا نحتاج الي سفر اليها لنثبت ذلك

وانا اقول السودان بلدا جميلا .. لمن يود ان يراه جميلا
سودانيتنا ليست جينات فى دمائنا ولكن احساس وشعور وانتماء وحب وووطنية
ان نسعى لنجمل هذا القبح ونزيل ذاك الغبن ونحسن هذا الواقع
لا يورث ابنائك سودانيتك ان لم تزرعها فيهم وتسقيها على مرور الايام والشهور والسنوات
تتابعها وتتحسسها .. بالحضور والسفر والالتحام والتواصل ..


اطلت
ولكن حتماً
ساعود ..

_____________

وطنى لو شغلت بالخلد عنه *** لراودتنى إليه فى الخلد نفسى

الاخ بكري الصائغ... لك التحايا مجددا علي هذا البوست الرقم والذي اعتبره بوست الموسم...
بخصوصى الزواج من اجنبيه اولا احكي تجربه شخصيه
انا لدت في الصحراء ويكفي ان تعيش في الصحراء اياما حتي تحملها بين جوانحك مدي الدهر... لذا ارتباطي بالجذور كان كبيرا...درست ماقبل الجامعه والجامعه هنا في بريطانيا ارتباطي بالجاليه السودانيه قليل بحكم مكان سكني ودراستي ولكن ارتباطي بثقافات اخري ساعد في توسعة مداركي...قابلت زوجتي في الجامعه التي درست بها وهي انجليزيه... في البدايه عارضت امي بشده وتوسطت اخواتي لديها ومن ثم عارض الوالد وتركت الامر سنه... واصرت زوجتي ان تذهب اليهم ولانني من اسره محافظه الي الحد البعيد لم اشاء ان ارافقها وذهبت هي لوحدها وجلست معهم وشربت معهم ومرضت بينهم فحبوها واحبتهم...ثم عادت وعدنا معا لنتزوج في باديتنا زواج عرب فيه الخيل والجمال والخيام والذبائح...
هذا مثال نادر لامراة نادره...شاءت ان ان تدمج ثقافتين مختلفتين كليا...
فاهلي يرفضون زواج الغريب للبنت والولد دون فرز... انا مازلت بدويا صرفا ولا اظن انني ساتغير ولكن ما الحظه هو رفضي الشديد لمصادرة حقوقي... يمكن لاننا في الصحراء نؤمن بهذا ايضا وتوافق مع تعاليم الغرب...
لكن اكثر ما يؤرقني هم ابنائ ...هم علي الرغم من حبهم الغريزي للصحراء وجدهم وجدتهم الا ان اللغه مشكلة علي الرغم من محاولتي ومحاولة امهم التي تعلمت اللهجه العربيه مني ومن الكاسيت...الا ان التلفزيون قد غلب في احيان كثيره وايضا الشارع وونستهم مع بعض...

لكن الزواج من اجنبيه له اثاره التي تظهر في الاجيال اللاحقه وتعتمد اعماد كلي علي الثقافه الاقوي وارتباط الابناء بوالديهم... فابنائي احرص دائما علي ربطهم بجذورهم البدويه الصحراويه وهم يجدون فيها مبتغاهم علي الرغم من سخونة المناخ هناك الا انهم يكونون سعداء بتجاربهم في الزيارات لكن المشكلة تكمن في كراهية ابنائي للخرطوم حقيقة لا اعرف لماذا حتي زوجتي تكرهها وانا اكرهها سرا...وكنت حريصا منذ البدايه ان لا انقل الصوره الموحشه المنفره عن بلدي لزوجتي او لابنائي حتي لاادفع اثمانها مستقبلا ...وايضا حرصت ان لا اكثر في الثناء عليها ...كنت فقط اكتفي بتصحيح بعض المفاهيم حتي اشجع غريزة البحث عندهم...
اكثر الاشياء اضحاكا هو اصرار زوجتي في بداية حياتنا علي لبس السديري والمركوب...
ولف الكدمول من عجاج الصراء حتي زجرتها والدت ذات مره وزجرتني معها بقولها يالتلفانين هييل خلقان ارجال...
ساعود...

Quote: السودان امان .. لا تحتاج لتقل ابنك الى اصدقائه ذهابا وايابا كما تفعلون.. لا تتخوف ان يغتصب فى طريق العودة لا تنام وانت تفكر ان ابنتك مع البوى فريند وان ضربتها لاتصلت بـ 911 واتاك المسؤول الاجتماعى لا تهم ان ابنك ان تأخر فسوف يبيت فى امان مع عمته او خاله وواثق بانه لم يكن فى النايت كلب حتى الصباح وهو يحتسي جرعات من البيرا فى ظل التحرر الثقافي والحرية المكفولة ..

السيد تبدينا..
كتابتك اعلاه تنميط مخل ولايعدو ان يكون سماعي اكثر مما هو حقائق...
اغلبية الاسر خارج الوطن تربي ابناءهاعلي القيم والمثل التي لا توجد علي الاقل في مجتمعات الخرطوم اليوم..
اغلبية الشباب (بنين وبنات) الذين ياتون من الخارج واحده من اسباب عدم اندماجهم في مجتمعاتهم الاصليه بالسودان هو عدم التوافق الاخلاقي وانا هنا لا اعمم لاقع في نفس الخطأ الذي ارتكبته انت..

العزيز بكري الصايغ
شكرا لك وكعادتك مهموم بوصدق بكل ما يمس ابناء شعبنا.
معذرة للحضور المتأخر ..لكن رجاء ان تضع هذا البوست لبكري لكي لا يارشفه.
تحياتي وبحضر لاحقا باذن الله.

..
.

Quote: يا تبلدينا كلامك ده كله صاح لكن انت ما كلمتنا عن الروتين الحكومى والرشوات يعنى اذا انت عاوز تقضى ليك حاجة فى مكتب حكومى ممكن تقضيه بدون واسطة او رشوة؟؟؟؟ اذا انت رديت على سؤالى ده بنعم...هسع بسوق الاولاد وبرجع السودان باول طيارة.. وعندى رجعة ليك عشان احكى ليك تجربة 20 يوم فى السودان العام الماضى

عزيزى السر
نعم
اقسم بالله نعم
لقد تغيرت الكثير من المفاهيم لم تزول تماما ولكن تحسنت
اعتب على السوداننين فى الداخل محاولة استغلال السودانى القادم من الخارج واستغلاله لجهله وعدم المامه
باللوائح والطرق والوسائل
واعتب على السودانى القادم بجهله وعدم معرفته والمامه وخنوعه وعدم شجاعته برفض التصرف
والاحتكام لاقرب جهة مسئولة من هذا المرتشي او الشخص الكروبتد ..
يا السر ..لا يخلو مجتمع فى الشرق الاوسط وعالم العربي الان من هذه الافه
والتى تسمى واسطة او رشوة ؟؟ قد تستغرب للواسطة والرشواوى فى بعض الدول العربية
وللاسف الاسلامية قد يكون السيستم والنظم فى كندا تتغير بحكم التطور والوعى
ولكن لا تعتب على السودان فقط ..
اعتب على انفسكم .. وتنازلكم ..
بعدين انت حترجع لمنو ولا منو ؟؟
عبداللطيف منتظرك والصائغ منتظرك انا غايتو ما بنتظر شايت معاك تقيل ..

يا تيفا ..
مع احترامى للسر دا .. ادنى فرصة اقول ليك نصيحتى بخصوص خالد ..
ما تستعجل ولا تهم ..

___________

نعيب زماننا والعيب فينا وما لزماننا عيب سوانا

تبلدينا ... شكرا كثيرا ..ليس في وسعي اطالة كالتي اتيت بها واحترم ما اتيت به..لست يافعا ولاشابا بل كهلا واعرف مقدار بلدي واهلي وما هي الوطنية وحب الاوطان وكيف ازرعها في نسلي وواثق من ذلك واكرر ان الوطنية ليست رهينة تواجد جغرافي فقط ولا تلويين واقع بلون غير لونه وفي ذات الوقت لا احب الشعارات عموما فان كان وطننا كما ذكرت -وهذا اكيد من عظيم حبك له- فلماذا هذا العدد الهائل من المهجريين والشتات ؟ لماذا اكثر من سبعة ملايين في دارفور في شتات ؟ .دعنا نسمي الاشياء باسمائها ونحاول دون تعصب ان نصل الي معادلة نحل بها مشاكلنا ....مودتي
ابوبكر

..
.
استاذى ابوبكر ؛؛
اطالتى لم تأت الا من تحليل وقراءة وتفنيط لما كتبته - انت - هنامنذ بدء هذاالحوار
ولا تتصور الجهد والزمن الذى اخذه لاستوعب ما كتبت فى 4 فقرات لك والرد عليها
وان تابعت فأنك تجد اننى اناقش ارائك عن العودة والوطن من وجهة نظرك
احترم كهولتك وابوتك وتجد منى كل تقدير واحترام
لذا اخاطبك باستاذى وانا هنا لا اطرح اراء واتحدث عن وقائع ،،

بخصوص الكم الهائل ع المهاجرين والشتات ودارفور
هذا تماما ما ذكرته الاخت دانيا الملك بأننا ننحرف بمسار الحوار
نحن هنا يا استاذى الفاضل لا نتحدث عن مسببات الهجرة والاغتراب
ولا معسكرات دارفور ..
نحن كما تعلم نتحدث عن ابنائنا وبناتنا وكيفية ان نشعرهم بالوطن وحب الارض
والانتماء كيف نساهم بالراى - وهو اضعف الايمان - فى تأقلمهم بالعيش هنا ..
وتسهيل ما ترونه من صعوبات ومسببات طاردة حالت دون احضاركم لهم او عودتكم لوطنكم
متعللين باسباب متعددة ومتفاوتة .. تبررونها بسبب الابناء ..


ويا ليتك تطيل وتسهب فمنكم نستفيد ونعلم ما ليس لنا به علم

لك احترامى وتقديري ..

_____________

ودعنا نردد :
سوداني الجوه وجداني بريدو
الحبو علاني وسماهو ظلاني بريدو
الطلو بلاني والاسمو سلاني بريدو
الذكرو في فمي والحبو في دمي بريدو

عزيزي تبلدينا

Quote: اطالتى لم تأت الا من تحليل وقراءة وتفنيط لما كتبته - انت - هنامنذ بدء هذاالحوار

اكييد وهذا الذي دعاني لارد عليك .. انا لا اقلل ابدا من قيمة تحليلاتك و ما كتبت وهذا مهم ان اردنا ان نصل الي حل لمشاكلنا المتراكمة ونحن (علي الاقل جيلي وجيليين ممن سبقوني وجيل ممن تلي) ساهمنافي هذا التراكم- وليس اجيالنا الصغيرة- مع اختلاف في المسببات الا ان حال اي بلد مرده لفعل ابنائه .. تنشئة ابناء وفي غربة امر ليس بالسهل وعكس صورة غير حقيقية لتجميل واقع لبلدنا في نظر ابنائنا مضر كما ان الغلو في عكس ما هو غير جميل كذلك مضر .. نقل الحقيقة امر ليس بالساهل عند المغترب او المهاجر كما هو الحال لمن هو بالداخل يعايش الواقع .. الصعوبة التي اشرت اليها انا لا تعني استحالة ولكن مقارنة والانسان قادر علي المؤامة
ساواصل ما امكن مع تمنيانتي بان تواصل وكافة المتداخلات والمتداخليين فالنقاش باريحية ودون غلظة مهما اختلفت الرؤي والاراء هو سبيلنا الي ما يدعو اليه الجميع من شوري - ديمقراطية - كلمة سواء يقبلها الجميع

مودتي
ابوبكر

: السودان امان .. لا تحتاج لتقل ابنك الى اصدقائه ذهابا وايابا كما تفعلون.. لا تتخوف ان يغتصب فى طريق العودة
لا تنام وانت تفكر ان ابنتك مع البوى فريند وان ضربتها لاتصلت بـ 911 واتاك المسؤول الاجتماعى
لا تهم ان ابنك ان تأخر فسوف يبيت فى امان مع عمته او خاله وواثق بانه لم يكن فى النايت كلب حتى الصباح
وهو يحتسي جرعات من البيرا فى ظل التحرر الثقافي والحرية المكفولة ..


و مين قال ليك اننا بنجيب البويفريند ولا بنجيب البوليس لاهالينا ولا بنمشي النايت كلب ولا نشرب البيره؟؟؟ اتفق مع السنوسي بان حكمك مبني على ما تسمعه, نعم في حريه لكن برضه في اهل بيربوا و اولاد متربيين و متمسكين لو ما كان بعادات سودانيه بتعاليم اسلاميه و دينيهِ, لا انكر انه في ناس جرفهم التيار لكن السودان كمان ما المدينه الفاضله و عليك الله امشي بس اليوتوب و دور عل السودانيات فيي الداخليات و غيره, والله يشيب لها الولدان, و مش قبل كده في الجاريد السودانيه و مواقع النت قلتوا في مديعه سودانيه لمت الناس في الشارع و قالت ليهم امسكوا الراجل ده مني و اللي هو ابوها و اللي اتبرى منها في النت يعني السودان برضه فيه حاجات مشينه و على فكره الاهلنا طول عمرنا في الغربه بيقولوا لينا عن السودان و الناس في السودان و العفه و انه الاخلاق كيف لمن مشينا السودان اجازه لقينا عكسه تماما عند بعض الناس (ما قلت كل الناس) لكن بصراحه اكثر البيعملوه بنات و اولاد السودان الناس الربيين بره ما بيتجرأوا يعملوه. الناس المغتربين متمسكين بعادات هم اتربوا عليها و بيفرضوها على اولادهم ( عشان لمن يرجعوا السودان ناس السودان ما يقولوا ليهم اولادكم ما مربيين و قليلين ادب عشان ربيتيهم بره ما بيعرفوا اخلاقنا و عاداتنا عشان كده بيكونوا حريصين عليها اكثر من ناس سالودان) لكن لمن يرجعوا السودان بيلقوا انه ناس السودان مشوا خلوا العادات دي و ما متمسكين بيها و المغترب مرات بيحس انه كان زي المسجون لانه متمسك بحاجه قديمه الناس خلتها, اعرف واحده اهلها عمرهم كله يقولوا ليها ما ممكن تعرسي اجنبي عشان نحن في السودان ما ينعرس اجانب و خواجات, في اجازه لقت بنت جيرانهم معرسه صيني, قالت يا ماما ما قلتي ناس السودان ما بيعرسو ا غير سوداني

..
.
الاخت الفاضلة دانيا
لا ادرى هل اتعامل معك كأم تفكر فى مستقبل ابنها وكيفية تعلقه مستقبلا ببلده
ام بفهم بنت تضايقت فى طفولتها من عدم حب للسودان وعدم الرغبة فى قضاء الاجازة به بسبب الملاريا والحر وحمو النيل
والدليل هذا هو رأيك فى السودان فى مراحل حياتك

Quote: زمان و انا طفله كنت اكره اجازة الصيف لانه معناها الملاريا و الحر و حمو النيل و ارجع من السودان هدومي و لعبي و حاجاتي كلها شالوها مني بنات الخالات و الجارات و العمات, اجازه متعبه و تمر كأنها سنين و ياما بكيت في المطار عشان ما عاوزه امشي..

هذا وانت طفله

Quote: كانت اجازه سخيفه و متعبه.... صرف قروش و حر و مرض و سخافات

هنا وانت ام واعية

Quote: اها ده سبب ثاني يا بكري انه الواحد ما يمشي السودان ولا يعاشر السودانيين

وهنا فى وقتنا الحالى قرار لمستقبل قريب

Quote: مين قال ليك اننا بنجيب البويفريند ولا بنجيب البوليس لاهالينا ولا بنمشي النايت كلب ولا نشرب البيره؟؟؟

وحالياً تتحدثين بصيغة ماضى .... على العموم توضيحا لوجهات النظر لك زللسنوسي فانا كنت
اتحدث عن ان الشعور بالامان والطمأنينة على الابناء فى السودان اكثر من خارجه
حالات التنقل بين الاسر والاهل لا تحتاج لالتزام الوالد او الوالدة بايصال ابنه بعد يوم مجهد ومرهق فقط
بسبب عدم شعوره بالاطمئنان والامان..
او لعدم وجود اخ او خال او صديق يصل مع ابنه للزيارة المحددة او المكان المقصود
عدم شعورك الكثيرين فى دول المهجر من اصدقاء السوء والانحراف وفرصة المتاحه بالخارج
يجعل هذا الارق الذى تحدثت عنه ..
على العموم هذا ليس تعميم ولكننى اعلم وتعلمين انت جيدا ويعلم السنوسى بدر
بانك هناك عشرات الحالات فى امريكا والدول الغربية والخليج نتاج الثقافات والتحرر والانشغال
وبعض من التربية الغير سوية ونسبة للحريات المكفولة على اوسع ابوبها حرية لا تراعى
عادات ولا تقاليبد ولا مثل ولادين .. فساد وانحراف نسبة للوائح والقوانين نسبة لانشغال الوالدين
بجرى للرزق وكسب العيش ..
تعلمون بعشرات الحالات التى اضطر الاباء للهروب بجلدوهم حرصا على ابنائهم وحفاظا على اخلاقهم
ومثلهم ..

اخبرك بتجارب اخرين معى الان فى السودان .. اب ( بروف ) هرب بابنائه الثلاث تاركا زوجته
وابنته الكبري بعد ان رفضو العودة الطوعية بل كادوا ان يضعوه فى الوصاية .. بعدم التعرض
لصديق الابنه الذى داوم على الخروج مع الابنة وبعض الممارسات المشينة منه امام الوالد وعندما ضربه
قام الصديق ابلاغ الشرطة 911 التى انذرت الوالد من مغبة هذا التصرف الغير مقبول هنا
هدا حدث فى فرجينيا منذ 3 سنوات ..

دعينى اذكر لك وقائع اشهد الله على صحتها ..
فى دراستى MBA منذ شهور هناك مادة متعلقة بـ Decision making ( اتخاذ القرار ) وكان الجانب العملى برزينتشن لكل شخص
ان يتحدث اصعب القرارات التى اتخذها وكانت الحالات التى حصلت على افضل المناقشات والاعجاب كالاتى :

الحالة الاولى : زميل دراسة ورجل اعمال واب اعرفه شخصيا عائد من هجرة وغربة - أمريكا- بعد ان قضى 30 عاما مهاجرا ..
اسس فيه علما ومالا واصبح مستشارا قانونيا ويمتلك فيرم مؤسسة للخدمات القانونية والمحاماة .. رزق بثلاث من الابناء
وبنت واحدة .. تعتبر اصغر اخوتها .. فجاة اتخذ قرار العودة للسودان بعد ان بلغت ابنته سن العاشرة ..
ترك كل ماله وما له ومؤسسته واعماله وابناءه الثلاث الذكور حيث اصغرهم تخرج من الجامعة وعاد ليعيش فى السخانة وحمو النيل
وصعوبات السودان ومعاناته كما تقولون سئل لماذا اتخذ هذا القرار ؟؟
اجاب لا استطيع ان اربي ابنتى فى المجتمع الامريكى
ولا على الثقافة الامريكية ولا ان اراها تخرج قريبا مع اصدقائها ولا اجد الوقت والزمن والحق
فى توجيهها او ردعها او منعها .. لا اريد ان ارها ان تتزوج امريكيا مسلما كان او غيره ..
ولا ان تنشا فى بيئة بعيدة الدين والمثل والارث ..بعيدا عن الحبوبة والخال والعمة
وتحدث باستفاضة عن الاخلاقيات والانحراف هناك ؟؟ فهل هو كاذب ؟؟

الحالة الثانية : زميلة حاصلة على الجنسية الكندية منذ خمس سنوات وهاجرت لها 10 سنوات تقيم وتعمل فى كندا
قررت العودة للسودان ومعها ازلادها ضاربه بكل ملذات الحياة وسهزلتها فى كندا عرض الحائط
لتاتى لتعمل باحدى الشركات هنا لماذا ؟؟
تخرج وزوجها من الصباح الباكر الى العمل ومعهم طفليها بنت وولد 8- 6 سنوات تقلهم الى المدرسة وتذهب للعمل وكذا زوجها
ينتهى عملها الساعة 4 ومدرسة اولادها الساعة 2 ..يذهب الاطفال الى احدى المراكز او الحدائق لا اذكر ويظلون بانتظار
واليهم حتى الساعة 4:30 - 4:45 ياخدوهم ويعودون للبيت .. تاخذ ساعه للساعة والنصف لتحضير العشاء ومن ثم الجلوس لمدة
ساعتين مع اولادها لمراجعة دروسهم واحتياجاتهم .. لماذا عدت :
الاجابة لا ابقي مع الاولاد اكثر من 3 ساعات فقط اثنتان مذاكرة وساعة فى الطريق ذهابا وعودة ..
حديثى معهم بلغتهم ومشاكلهم وتنوير بفيمهم ودينهم وصلاتهم وتقاليدنا وعاداتنا لا يتجاوز هاتين الثلاث ساعات
تخوفت من المستقبل الذى ينتظرهم وان يقل تمسكهم بالوطن والدين والعادات والتقاليد يتأثرون بالمدرسة والشارع
والمجتمع اكثر من توجيهاتى والذى يكونون به لمدة تزيد عن 14 ساعة والباقي نوم وواجبات دراسية ..
لذا خوفا عليهم وعلى مستقبلهم وصلت لقرار العودة . فهل هى غير محقة ام ماذا ؟؟

الحالة الثالثة : ذهب لبريطانيا للدراسةمنذ 8 سنوات اكمل واستقر وحصل على عمل ممتاز عمل
وعاد للسودان فتزوج .. رزق بابناء ثلاث جلس فى لحظة صفاء مع زوجته وتناقشوا فى مستقبل هؤلاء
الصغار باؤوا فى المقارنة ما بين الاخلاقيات هنا وهناك والتمسك بالقيم والتقاليد استعان بوالده
واخوته وقرر اتخاذ قرارا بالعودة للاستقرار هنا .. هل هذا هو الحل المنطقى ام جاء للموت برجليه ؟؟

خبراتهم جميعا ومؤهلاتهم ساعدتهم فى الحصول على افضل فرص عمل .. لم يأبهوا بالحرارة والكتاحه
والسخافه والرشوة والواسطة . عادو لاجل ابنائهم لم يفكروا فى انفسهم بل فى مصير ومستقبل هؤلاء
الامانة التى وصاهم عليهاسبحانه وتعالى و رسول الله (ص) .. حرصاً على العادات والتقاليد والدين والموروثات

Quote: لكن السودان كمان ما المدينه الفاضله و عليك الله امشي بس اليوتوب و دور عل السودانيات فيي الداخليات و غيره,

السودان ليس بالمدينة الفاضلة ولا القاهرة ولا الرياض ولا نيويورك ولا لندن ولا استكهولم
ولكن هنا مازال يوجد الحياء .. والخفاء .. والخوف .. والاستنكار .. والاستهجان
فتقل النسبة ..
اليوتوب والداخليات كما ذكرت الداخليات يعنى اسرة غير موجودة يعنى اما اسرة خارج السودان او بالاقاليم
يعنى نسبة 50% _ 50% ولكن ما دام هناك الاسرة والخال والعم والوالد والوالدة فلن تكون هناك افلام او لقطات جنس
او انحراف او تدهور اخلاقي ..

Quote: لمن مشينا السودان اجازه لقينا عكسه تماما عند بعض الناس (ما قلت كل الناس) لكن بصراحه اكثر البيعملوه بنات و اولاد السودان الناس الربيين بره ما بيتجرأوا يعملوه

كما قلت نحن لسنا بيوتوبياولا ارض مقدسة طاهرة خالية من الفساد مليئة بالعفة والعفاف
ولكن هناك مساعدات تعمل على تقليل ذلك حتى لا يصل ما نراه فى القنوات والمجتمعات اللااسلامية
والمتحررة والاباحية ..

Quote: مرات بيحس انه كان زي المسجون لانه متمسك بحاجه قديمه الناس خلتها اعرف واحده اهلها عمرهم كله يقولوا ليها ما ممكن تعرسي اجنبي عشان نحن في السودان ينعرس اجانب و خواجات, في اجازه لقت بنت جيرانهم معرسه صيني, قالت يا ماما ما قلتي ناس السودان ما بيعرسو ا غير سوداني

النسى قديمو تاه ..
والما عندو قديم ما عندو جديد
وجميل ان يكون هناك بعض المغتربين بهذا الخلق والاخلاق لا يتابع الموضة او الثقافة الدخيلة
ويترك الحبل فى القارب ياخذه الموج اينما وكيفما شاء يحمل على متنه فلذات كبده
مسئول عنهك يوم تقوم الساعة ..
اما زواج السودانية فهذا موضوع نقاش قد نطرحه هنا او يطرحه اخرون
وهو كارثة فى حد ذاتها .. ولكل مقام مقال حتى ما نبقي رجرجه وننحرف بمسار البوست
وتقومى تنفعلى فينا وتصفينا بما ليس فينا ..

بالمناسبة فى تعليقك ادناه .. والذى اوردتيه فى صفحة سابقة اودد ان اعقب واضيف
بلا زعل ولا هارت فيلنغ

Quote: انا ما قلت السودان بلد متخلف ولا ارهابي لكن طبعا كالعاده بشتيلوا الكلام البيعجبكم القشور و تسيبو الباقي

نحن السودانيون ..لا نتمسك بالقشور ..
وارجو ان تترك نظرة التعالى هذه جانباً فليس من عادة السودانيين
حمل القشور وترك الجوهر.. ولا نمن بصرف القروش على اهالينا واقربائنا ولا نصف
اجازاتنا فى بلدنا بالسخف او عدم رغبتنا فى معاشرة قومنا لمجرد تصرفات ونقاشات
طبيعة نراها ولكنكم تروهو جهل وسخافة ..


معليش للاسهاب بس الموضوع عاجبنى وضارب فى الصميم
نشكركم على حسن قراءتكم
____________

يا بلادا حوت مأثرنا كالفراديس فيضها منن
فجر النيل في اباطحها يكفل العيش وهي تحتضن
رقصت تلكم الرياض له وتثنت غصونها اللدن
وتغنى هزارها فرحا كمعشوق حدا به الشجن
حلفل الشيب والشباب معا وبتقديسه القمين عنوا
نحن بالروح للسودان فدا فلتدم انت ايها الوطن

الأخ الـحـبيـب الحـبـوب،
Tabaldina

تـحـية الود والأعـزاز،

وشـكري وتقـديري لك علي اثراءك الحـوار ... ومـشاركتك الـمكثفة... وتعليقاتك وردودك الـمقدرة.

تـعرف ياأخ تبلدينا،
انا اتعـمدت اتأخر في الرد عليك لانـي لاحـظت انو الـموضـوع بقي اصـحابو الناس الـمتـزوجـييـن وعنـدهـم ذرية وبنات واولاد ،... وانو الحـوار بقي يـدور بيـن الناس العنـدهم خبـرة فـي الاغـتـراب ومشاكل التـربية في بلاد الشـتات، ... ولاحـظـت كـمان ان الكل يشـارك بخـبـراته وتـجـاربه وطريقة اسلوبه مع اولاده فـي الغربة.

وبـما اننـي ياتبلـدينا ... لامـتـزوج ولاعـنـدي اولاد او بنات وبالتالـي ماعنـدي خـبـرة في مشاكل فـي المجال ده، ...قلت اثريـث شـوية... واخـلي ناس (الوجـعة ) والخـبـرات بالـمنبـر العام ياخـدو راحـتهـم بعيـد منـي انا عـديـم الـحنكـة والتـجـارب ...وارجـع ليكم بعـد مـدة!!

اخـي تبلـدينا،
اكرر لك مـودتي، وراجـع لك برواقة.
ودمـتـم.

:::::::: وخـدو راحـتكـم!!!

الحاجة الغريبة عندما واحدمغترب او مهاجر يفكر يرجع السودان نهائى عشان يربى
اولاده فى بيئة سليمة خالية من الفساد والمجون تجد بعض الذين وصلوا حديثا من
السودان يقولوا ليك بالحرف:السودان ما زى زمان والفساد والمجون انتشر اكثر
من السويد والنرويج اكثر بلاد الله انفتاحا ومجونا..ويخلونا نفكر مرة اخرى فى قراراتنا
فهل هذا الكلام صحيح ولا الناس ديل ببالغوا حبتين؟؟؟!!!منتظر اجابة من الناس الساكنين فى الخرطوم

الاخ الـحـبيب الحـبوب،
الـواثق الصادق،
تـحـياتي ومـودتي،
وسـررت لقـدومك الـمقدر.

1 - بحـسب عملي كمـستشار قانوني... تـحتـم علي الظروف وان احـضر بعض الـمحاكمات الكبيـرة التي يقف امـامها بعض المتهمون الاجانب في قضايا القتل والأذي الـجـسـيم.

فـمثلآ اشـتهرت الجالية التركية هنا في الـمانيا بانها الجالية التـي تـرفض الاندماج في الـمجتمع الالماني ...وترفض بشـدة اختلاط افرادها مع اي جنسية اخري. وبسـبب هـذا الانغلاق الفكري الزائد عـن حـده تقع عمليات اغتيالات طـالت كثيـر من الفتيات التـركيات لالـشـئ الا لانهـن طالبـن بــحقهن في الحـرية والرأي بعيـدآ عن سـيطرة العشـيـرة التركية.

2 - وقعت قبل عام جـريمة هـزت المـجـتمع الالـماني هـزة شـديدة. تقول وقائع الحادثة ان فتاة تركية عمـرها سـتة عشـر عامآ تدرس باحـدي الـمدارس ببـرليـن كان لها صـديق الماني يدرس معها بنفس الفصل، وكانا يحبان بعضـهما البعض. لفت الوالد نظـر ابنته الـي انها تركية حـتي وان كانت قد ولدت وترعرت بالمانيا وعرفت لغة الالمان احـسن من لغة بلدها تركيا ، وانها في نهاية المطاف وبعد الانتهاء من المرحلة الاخيـرة بالمدرسة ستـتزوج من ابن عـمها الموجود بتركيا والذي لم يزر المانيا الاقليـلآ.

رفضـت البنت بشـدة ان يقرر احـدآ مصيـرها وتمردت علي قرار الأسرة. اجـتمعت الأسرة وفي غيابها وقرروا قتلها تـجنبآ للعار القادم للاسرة. ولكن بقيت المشكلة من يقوم بعملية الاغتيال ذبـحآ للبنت المتمـردة?، وقررت الأسـرة وحتـي لايتـم اعتقال احـدآ من الأسرة ويسـجـن ان يقوم بعملية الاغتيال شـقيقها البالغ من العمر 13 عامـآ علي اعتبار انه في حالة اعتقاله ستكون العقوبة مـخففـة بحـكم انه قاصـر. وبالفعل قام الطفل الذي تعرض ل (غسـيل مـخ) شـديـدة وذبح شـقيقته.

3 - كتبت الصحف كثيـرآ حول الحادث الدموي ونددت بالعقلية التركية ولـمس طرف السـوط باقي الجاليات العربية والاسلامية ، وتدخلت الحكومة الالمانية وطالبت بتشـديد العقوبات علي مايسـمي بـجـرائم الشرف، وسـيرت المنظمات النسائية مظاهرات ضـد القوانييـن الاانسانية التي طالت حـقوق المسلمات.

4 - تقول اخـر احـصائية صادرة من وزارات الداخلية بدول الاتـحاد الأوروبـي ان نـحو 5 ألف فتاة وامرأة تركية وكـردية قد لقيـن مصـرعـهن ذبـحآ خلال السـتة اعوام الماضيـة ... 98% في المئة من هـذه الجرائم وقعت بتـركيا ومناطق كردستان وبعضـها في السويـد والدنمارك والمانيا.

5 - توجـد هنا مقولة مـشهورة في المانيا تقول ( اذا كانت حـبيتك تركية فابعـد عنها... لتنقـذ حياتهـا!!).

6 - والغريب انه ورغـم شـدة القوانييـن الالمانية والتي اشـتملت علي طرد الاسرة التي تقوم بعملية اغتيال لابنتهـم وطردآ فوريآ من المانيا، الاان....

......السـاقيـة لـسـه ولسـه مـدورة!!!

لك مودتـي.

الأخ الـحـبيب الحـبوب،
ولياب،

تـحـياتي ومـودتي ياقريبـي، وشـكرآ لتعليقك الجـميل.

رغـم انك قلت ( الأف السـودانييـن بالـمملكة بسافرو للسودان فـي الأجازات ...بدليل انو البواخر والطائرات بتكون مليانة،...) الا انك لـم تدخل لصلب الموضـوع ولا قلت لنا هل اطـفال المغتـربييـن فعلآ مـقتنعييـن تـمامآ بزيارة السودان وانـهم من اعـماق دواخلـهم يتمـنون زيارة اهـاليـهم وقضـاء الاجـازة معـهم، ...ام هـم فـي وضـع ( خـادم الفكي مـجـبور علي الصـلاة!!?).

لك مـودتي.

الأخـت الـحـبيبة الـحـبوبة،
rosemen osman

تـحـياتي ومـودتـي،
وشـكري الـجـزيل علي مـساهـمتك وقـدومـك الـمقدر، وتعليقك الـجـميل.

اولآ: انـت ماعنـدك مـشكلة مع وليـداتك ..اللـه يـحـفظـهم لكم.. لانـهم لسـه صـغار زي ماانت قلتـي، ...اولادك لسـه طرييـن ومـمكن يتشـكلوا ويتـربوا بحـسـب وجـهات نظـر الوالدين (ومن شـابه اباه فـما ظـلم )، ولكن يااخـتـي نـحنا بنتكلم علي الاولاد والبنات الكبـرو واترعـروا زمن طويل فـي بلاد الغربة واتطبعـوا بطباع وعادات البلاد العايشـييـن فيـها مدة طويلة وبقت علاقتـهم بالسـودان علاقة بتاعـت اجازات مرة فـي السـنة او مرة كل ثلاثة سـنوات بـحسـب ظروف الوالدين.

نـحـنا بتكلم فـي موضـوع الاسـباب البتخـلي الوليدات يكرهـو السفر للسودان في الاجازات، هل السـبب الملل من بلد مافيها الرفاهية والمتعة، ولا يعود السبب الـي (نقنـنقة) الأهل فيهـم وفي تصـرفاتهـم والكلام عنهم انهـم مـدلعييـن و ( حـناكيـش!!)?.

تانيآ، ليه اولاد المغتربييـن بكرهـو فكرة الالتـحاق بالدراسة بـجامعات السودان?، هل لانو الاجـواء غريبة عليهم.... ولاالسـبب برضـو( نقنقة) زملاءهم عليهم انهم جاييـن يتعلموا بالفلوس مابالفهـم!!!!!!!?.

ثالثآ، زواج الشاب السوداني من الأجـنبية ( موضـة ) ولا اقتناع من الشاب انو البنت السودانية مابتنفع معاه ...

البنت السـودانية العاوزه تتـزوج من شاب اجـنبـي هل لاقتناع انو الشباب السوداني مابحـقق ليها الحياة الرغـدة وزي حياة صـديقاتها الخليجيات... ام لانها تري في الشاب السوداني انه غيـر طموح وبكتفي بالموجـود!!!?.

رابعآ، كيف بنظرو اولياء الامور لرغبات اولادهـم، وكيف يتصـرف الاب اوالام امام مشاكل الابناء اولاد (الجيل الجـديـد )?.

دي الـمواضـيع العاوزه نقاش مـسـتفيض وواعـي...

وكل والد ووالده عنـدهم اولاد بنات في الغربة حـتمآ قابلتهم بعض من المشاكل زي دي ....

ونامل يقولو لينا كيف حلوها وكيف كانت النتيـجـة!!!

لك مودتـي.

لك التحية يا بكرى

المهم القصة بدور فى نطاق دلع وتربية الابوين لابنائهم الام والاب يتعبو ويشقو وراء ساعدة ابنائهم ((شى طـيب )) تمااام لاكن المبالغة فى الدلع دى عند كل اب وام ((ماتنكر الحاجة دى )) المهم الطالب بجى من الغربة مشبع با العادات السيئة

ماتقول الزول ده حاسد المهم : الواحد فيهم يقول السودان وابناء السودان سازجين وهو البكون سازج وماقادر اعبر

ياخى المشكلة فيهو والطبع الورثو من تربية الغربة وسهولة الحياة هنااااااك


هنا الطباع وشكل الحياة مختلفة حقو الام والاب يراعو للمسئلة دى


متخاف بسرد القــــــصة بعد دقائق لعطل فى الكى بورد

الاخ الـحـبيب الحـبوب،
مـحـارب،

تـحـياتي ومـودتـي،
وسـررت لـقدومك الرائـع، ولتعليقاتك وردودك الاكـثـر روعـه،

وبصـراحـة، اعـجـبت بكلامـك:
( اما مغتربي الدول العربية والذين لا يعلمون انهم لا محالة عائدون الى بلادهم فهم يخطئون في حق ابنائهم عندما لا يجعلونهم يعيشون واقع انهم من بلد اقل في الامكانيات من البلد الذي يعيشون فيه الان وكذلك يخطئون عندما لا يضعون منهج واضح لربط ابنائهم بعادات وتقاليد وطريقة عيش اهلهم في السودان مما يجعلهم فاقدي الهوية مهزوزي الشخصية الا من رحم ربي وذلك بسبب عدم شعورهم بانهم جزء من المجتمع الذي يعيشون فيه لان طبيعة المجتمعات التي يعيشون فيها لا تنظر لمؤهلات القادم اليهم ولا لنوع الخدمة التي يقدمها لمجتمعتهم بل ينظرون لذلك الوافد على انه مسترزق ضاقت به الحياة في بلده مما جعله ياتي لتقديم خدماته لديهم ولذلك هو اقل منهم مجتمعيا وان تسلح بالعلم والمؤهلات
هذه النظرة التي يعانيها الاباء ولكنهم يصبرون عليهاو يحاولون ابعادها عن ابنائهم بتوفير مستويات عيش مرتفعة وقريبة من تلك التي تتوفر لدى اهل البلاد الاصليين ويغفلون ربط اولئك ببلدهم الاصلي وتعريفهم بمستوى العيش هناك وانهم هنا لفترة مؤقتة لتحقيق اهداف محددة).

تعـرف يااخ مـحارب،
انا وبعض اخـواني القدامـي الـموجوديـن بالمانيا نعاني من سلوكيات بعض اولادنا الذين عاشوا بالدول الخليجية والسعودية وجاءوا للدراسة بالـمانيا.

فاغلب طباعـهم فيها كـمية من الدلع وعـدم الاعتـماد علي النفـس ...ونلاحـظ ترفعـهم عن باقي اخـوتهم السودانييـن وهـو الامر الذي نرفضـه بشـدة لان المـجتمع الالـماني مجـتمع فيه الانضـباط الصارم في كل شـئ وفيه تقييـد الجـميع اي كانوا بالنظام ومراعاة القوانييـن والأدب الزائد من اللزوم، وهـي الاشـياء التي نـحاول ان نفهـمها لهـم وان نفـهم ان سـلوكياتهم التي اكتسـبوها مـضطرين وسكـوت اولياء امـورهـم عليـها هـي طبائع مرفوضـة جـملة وتفصـيلآ ولامكان لها فـي هـذا المجتمع الذي لايقبل الا وان يكون الجـميع بسلوكيات مقبولة.

اضـطرت ادارة بعـض الجـامعات الالـمانية لفصـل اعـداد كبيـرة من الطلاب السودانييـن والاجانب لانهـم كـثيـري التغيـب عن الـمحاضرات وحـضور الدروس العملية بما ويعادل غياب 36 يومآ في السنة الدراسـية!!!

لك مودتـي، ....ومنـتظـرين!!!

يا عبد اللطيف برجع ليك قريب بتفاصيل عن الدراسة فى كندا

الأخ الحـبيب الحـبوب،
تـبلدينا،

تـحـية الود والأعـزاء،

والشـكر العمـيق علي مساهـماتك الواضـحـة حـول الـموضوع الـمخصـص لـمناقشة الأجابة علي سـؤاللالـماذا يكره اولاد المغتـربييـن السفـر للسودان اثناء العطلات الصـيفية وايضـآ حـول لـماذا يرفضـون الألتـحاق بـجامعات الوطن الأم ويفضـلون علـيها الأجـنبية.

وصـتنـي رسالة من طالبة سـودانية تدرس باحـدي جامعات السـودان وتقول فـي رسالتـها ( ارجو ان الفت نظـرك ياعـمو الصائغ ... ان كل الذين تناولـوا هـذا الموضـوع بالنقد والتحـليل وكتبوا عـشرات الردود والتعليقات هـم واولياء امورنا وامـهاتنا وانه ولاواحـده ولاواحـد من اصـحاب الـمشكلة ( اللـي هـم إحـنا ) وقال رأيـه!!!

رأيـئ في الـموضـوع ياعـمو انك ماحـتجـيب اي جـديد ولاحـتغيـرافكار اهالينا بالداخـل عـن بنات واولاد الـمغتـربييـن، ...وحـنظل في نظـرهم البنات والاولاد المدلعييـن المرفهييـن ...العنـدهم كل حاجـة جـاهزة ولابعرفوا التعب والشفاء... ولا العرق بنقط من جـباهـم!!.

انا جـيت من السعودية وعشـت عـمري كلو هناك ودرسـت بالمدارس السعودية واتـطبعت بطباعـهم بحـكم اختلاطـي
كبنت بالبنات السـعوديات وماكانت عنـدي علاقة مع سـودانيات لانو المنطقة العايشـييـن فيها مافيها سـودانييـن كتار، وماكنا بنسافر للسودان كتيـر لانو ابوي وظيفتـه يادوب تكـفي الأسرة المكونة من ابوي وماما والخـمسة بنات ولد.

جـيت للسودان وياريت لو ماجـيت وقعـدت في البيت هناك بلا تعليـم!!!، سـكنت بالاول في داخليـة البنات كرهـوني السـكن بسـبب لبسـي العادي للغاية وكمان بسـبب مصاريفي المتواضـعة وكتبـي والمراجع البشـتريها من السعودية ، واطلقوا علي عشرات عشـرات المصـطلحات المتدوالة وسـط الأسر السودانية بالداخل، والزاد الطيـن بلة مشـكلـتي مع تعليقات اولاد الاهـل ونظـرتهم للبنت الـمغتـربة.

كنت قائلة الـمشكلة تخـصـني براي لكن اصـدقائ المغتـربييـن بالجامعة لقيتـهم هم كمان لـمسهم طرف سـوط التعليقات اللاذعة والتهكـات الـمريرة!!

تقول هـذه الأبنة في رسالتـها، بعـض الصـحـف راحـت وتكتب عن بعـض اولاد المغتـربييـن وانـهم السـبب وراء ازدياد حالات الزواج العرفـي بالسـودان!!وانهم ولانـهم ( بـحـسـن كلام الـجـريدة ) منعمـييـن واغنياء بالعملات الـمحلية والأجـنبيـة فقد راحـوا ويصـطادون الطالبات الفقيـرات اللأئـي جـئن من مناطـق الفقر الـمدقع والتهـميـش ويتـزوجـون منـهن عـرفـي مسـتغلييـن فقـرهن وحـاجـتهن للامن والأمان!!!

انهـا تقول ، نـحـن مـضـطهـدون دائـمآ ولانسـتطيع اثبات براءتنا لاننـا لانـملك مقومات تفنـيد حـجـح مـجـتمع يكن لنا نظـرة قرف وازدراء!!!

ياعـمو، ....والله والله ماحـتقدر تغيـر اي حاجـة، وموضـوعـك زدنـا جـراحات ... وفتـح باب المسكوت عنـه سـودانيآ.

والتـحية لك وشكـرآ.

الاخ بكرى
احييك مرة اخرى على بوست الموسم والذى يحوى حلول كثيرة لمشاكل كثيرة تواجه المغتربين والمهاجرين
واقول لهذه الطالة الجامعية التى رجعت من السعودية ان اولاد وبنات المهاجرين ما اظن يكون عندهم اى دخل
فى انتشار الزواج العرفى لان هذا سببه الحالة الاقتصادية المزرية لمعظم الشعب السودانى

تقول طالبة مغتربة تدرس باحدي الجامعات السودانية باخرطوم، انها صـدمت صدمة شديدة من الدراسة بجامعة سودانية ...وصدمت اكثر ان غالبية الطالبات والطلاب المغتربون يؤيدونها في رأيها.

انها تقول واثناء بالمدارس السعودية كان حلمي ان اكمل الدراسة سريعآ والتحق باحدي جامعات بلادي وانهل من هناك العلم الغزير واصبح كوالدي طبيب وان اواصل فيما بعد دراساتي العليا واتخصص في طب المناطق الحارة واسافر الي كل ربوع بلادي اعالج الجميع واتعرف علي بلادي التي مارأيت اغلبها الا في اشرطة الفيـديو.

وبالفعل تحصلت علي مجموع اهلني لدخول كلية الطب وبمبالغ طائلة كبيرة يدفعها والدي من عرق جبينه وهو الامر الذي جعلني والااتقاعس في دروسي حتي لااكلفه مصاريف اضافية.

وصلت للخرطوم وهي زيارتي الثالثة منذ ولادتي قبل 19 عامآ، وسكنت باحدي الداخليات المخصصـة للطالبات. وكنا ثلاثة بغرفة واحدة ولم اكن منسجـمة معهـن بسبب الاتجاه السياسي الذي ينتمون له وعدم ميلي للدخول معهن في اي جدل سياسي علي اساس انني جئت من بلد لايسمح بالسياسة في المدارس ولابالتنظيمات السياسية واخطرتهن علانية انني لاافهم في السياسة ولااريد الانضمام لاي حزب او الاشتراك فـي اي نوع من النشاطات السياسية وايضآ لانني اصـلآ لااعرف الاتجاهات السياسية في الجامعة.

ولكنهن كن يتدخلن في كل صغيرة وكبيرة وجاءت الطامة الكبري عنـدما استدعتنـي مسؤولة السكن لتقول لي ان بعض الطالبات تقدمن بشـكوي ضد لاننـي اسمع اغاني فاجرة ومخلة بالأداب من جهازي الخاص!!!، وافهمتها انني استمع الي اغاني سعودية من فنانييـن لهم احترامهم في البلاد العربية وهي اغاني غير ممنوعة والا ماستطعت شراءها، وبعد جدال طويل طلبت مني ان اخلي السكن واغادره.

سكنت مع اسرة لها علاقة قرابة شديدة باابي ولكنت شعرت بانني عبء عليهم، وبدأت الأسئلة تطاردني في كل مرة عن دراستي وصديقاتي ولماذا اتاخر في الحضور للمنزل ولماذا اتكلم بالهاندي طويلآ ومع من ولماذا!!!

كنت اواجه المتاعب في حوش الجامعة من الطلاب الذين كان شغلهم الشاغل السياسة ولاشئ غيرها، وافهمتهم ان السياسة تاتي فياخر قائمة اهتماتي ولكنهم اوضحوها لي علانية ان من (ليس معنا فهو ضـدنا ) وهـددوني بانهم يستطيعون طردي من كلية تمامآ وكما طردوني من داخلية الطالبات!!!

بكيت كثيرآ ولكن ماذا يجـدي البكاء مع السياسة التي علي كل شئ في الجامعة وحتي مدير الجامعة مسـيس!!

تقول هذه الطالبة في رسالتها، عندما كنت بالمدرسة السعودية كنت اشاهد افلام مصرية فيها لقطات عن الحياة الدراسية بالجامعات المصرية والتآلف بين الطلاب والطالبات واجواء المحاضرات والمعامل والرحلات وحفلات التخرج، لقـد كنت اظن انني سأجد هذه الاجواء الطلابية الجميلة بالسودان وان اعيـش اجمل سـنييـن حياتي بين اخوة واخوات وزميلات وزملاء يقدرون ظروفي في اننـي لاافهم في امور كثيرة بالسودان واولها السياسة، كنت احلم بصـداقات بريئة تجـمعني مع الجميع بلا حساسيات... ولكن خاب ظني وانهارت كل احلامي وغادرت السودان غيـر اسـفه عليه ورجعت الي السعودية بعد ضياع عامييـن ونصـف من عمري سـدي.

انها تقول ، الان انا ادرس بالهنـد مع قوم يحتـرمون ادميتي ويفهمون انني غريبة عنـدهم فيقدمون لي كل المساعدات بلا تكلف او تصنـع. حـب الطالبات الهنديات هنا انساني اسـؤا ايام حـياتي واعادوا لي الثقة في نفسـي ووجـدت نفس الاجواء التي كنت احلم بها في طفولتي.

انها تقول، بعد تخـرجـي لن اعود للسودان وقد اعمل بالهنـد او بالسعودية ...

.... (ولايلـدغ الـمؤمن من جـحـر مرتيـن).

QUOTE )
تقول هذه الطالبة في رسالتها، عندما كنت بالمدرسة السعودية كنت اشاهد افلام مصرية فيها لقطات عن الحياة الدراسية بالجامعات المصرية والتآلف بين الطلاب والطالبات واجواء المحاضرات والمعامل والرحلات وحفلات التخرج، لقـد كنت اظن انني سأجد هذه الاجواء الطلابية الجميلة بالسودان وان اعيـش اجمل سـنييـن حياتي بين اخوة واخوات وزميلات وزملاء يقدرون ظروفي في اننـي لاافهم في امور كثيرة بالسودان واولها السياسة، كنت احلم بصـداقات بريئة تجـمعني مع الجميع بلا حساسيات... ولكن خاب ظني وانهارت كل احلامي وغادرت السودان غيـر اسـفه عليه ورجعت الي السعودية بعد ضياع عامييـن ونصـف من عمري سـدي.>>>>>>>>>>>>>>>>>>>>>>>>>>>>>>
هكذا كانت جامعة الخرطوم فى عصورها الذهبية وحتى عام 1990 وبعد ذلك تدهورت سمعة الجامعة واصبحت فى اسفل سلم الجامعات فى العالم

الاخ بكري الصايغ
تحياتي وتقديري لك بفتح هذا الموضوع الهام
لكن كنت اتمنى ان يطرح من وجهة نظر علمية وليست عاطفية
بمعنى ان نضع فرضيات بناء على ملاحظات حولنا
الملاحظة ان هناك عدد من الاسر لايحب ابناءها قضاء عطلاتهم بالسودان
بعد ذلك نضع فرضية ان ابناء السودانيين المغتربين لايحبون قضاء اجازاتهم بالسودان كما لايحبون الدراسة بالسودان
وان لانضع الامر كواقع وقرار
نحاول نستطلع اكبر عينة من السودانيين في الخارج والداخل لان الاهل بالداخل يستطيعون ان يقيموا اذا ماكان المغتربين يحبون القدوم اليهم ام لا
نحاول ان نتلمس الاسباب
احب ان اشي ارجو الايكون الخلفيات السياسية وراء وان نحلل الموضوع بدون منطلقات
صحيح يقول بعض الناس انهم لايحبون القدوم للسودان بسبب النظام السياسي القائم
لكن السودان ليس ملك لاحد
وكل منا يستطيع العيش في مملكته الخاصة
لي تجربة خاصة ساتحدث عنها ان شاء الله
تحياتي لك مرة اخرى اخي بكري

الاخ ناصر
سلامات
انا اؤيد فكرتك فى استطلاع اراء اكبر عدد من السودانيين فى الخارج والداخل حول صحة عدم رغبة
المغتربين والمهاجرين واولادهم فى قضاء اجازاتهم فى السودان او العودة النهائية
ولكن فى نفس الوقت احب ان لؤكد لك ان المعارضة السياسية للنظام لا يعتبر سببا مباشرا فى عدم هذه الرغبة

الأخ الـحـبيب الـحـبوب،
السر عبدالله،

تـحـية الود والأعـزاز،

واكرر لك شـكري الكثيـر علي مـداخلاتـك التـي اثرت الـموضـوع... ونزلت عـنـي هـم الأجابة علي بعـض الأسـئلات الصـعبة بـحكم انك رب اسـرة وادري مـنـي بـمشاكل الاولاد فـي الغربة.

وصـلتنـي 9 رسائل من بعـض اولادنا وبناتنا بالخـرطوم،.. وتـحمل هـذه الرسائل كـميات من الـهموم التـي يـحملها اصـحاب هـذه الرسائل وهـم الذين اصـلآ جاءوا من دول الخليـج والسعودية للدراسة بالسـودان.

فـي احـدي هـذه الرسائل تقول صـاحـبتهـا:
( باللـه ياعـمي الصايـغ، ...سـمـعت فـي حياتك جـامعة فيـها دروس خـصوصـية وكـمان بالأجـباري!!!، طـيب انا بدفع 8 ألف دولار رسـوم دراسـة بالـجامعة زائـد 800 مصاريف كتب ومـواصلات وسكـن بالداخلية واكل وعـلاج والـمبلغ بكفيـني يادوب،... يـجـئ دكتور كبيـر بالجامعات ويختار ليه مجـموعة معيـنة من الطالبات والطلاب المغتـربييـن والمغتربات ويفرض عليهم حـصص اجـبارية معاه والا واللـه عشرين سـنة مانتخـرج من الجامعة!!!.

سالت باقي زميلاتي المغتربات بالجـامعات الاخري ان كن هـن ايضـآ ويتلقيـن دروس خـصوصية فكانت الأجاب.... وبالـدولار!!!!

طالبة تقول اخري تقـول في رسالتـها، عـنوان البوسـت بتاعك ياعـمو عن الطلاب والطالبات وليـه بكرهوا قضاء العطلة في عـطلة الصـيف، ...طـيب اسـألك، اذا كانت الأسر السـودانية الـمقتدرة مابتقعـد شـهور الصيـف فـي السودان وبتسافر لبـره... يبقـي شـنو الجابرني علي قضاء الصـيف ضـيفه علي الناس بـحكم انو الداخليات بتقفل في الصيـف واقعـد فـي ملل وبلا شغل ولامـشغلة ..وبقوم طوالي بسـافر للخليج.

رسالة من والـد يعيـش بالسعودية وعـنده ثلاثة اولاد يعيشـون بالخرطوم ومازالوا يدرسون بمراحل متقـدمة بجامعات في الخـرطوم، انه يقول في رسالته.. اسـؤا شـئ في العالم ان تعيش وانـت تعرف انك لامنـتمـي لبلدك الذي يرفضـك لالشـئ الا لانك مغتـرب، بلد لايـهمه من امرك الاماتدفعه من ضرائب وزكاة ورسوم وجبايات ومصاريف الدراسة لاولادك بالعملة الصعبة،... وحـتي ان توفيت وانتقلت لرحمه اللـه لايتكفل بمصاريف نقل جـثمانك لتـدفن معزز مكرم في بلـدك!!!، بالطبع انا ساخـط وقرفان من هـذه الاوضاع المزريةالتي نعيشـها نحـن المغتـربييـن ...ولااخـفي لعناتي واسـب والعن هـذاالبلـد والنظام الف مره في اليوم قدام اولادي ( ماطبعآ حاسـب فـي البيـت!!) والاولاد بسـمعوا السـب ويسـكتو ولكنهـم بحـفظو فـي دواخـلهـم انفعالاتي والنتيـجة انهم اتطبعوا واخـدو عاداتي ومازالت معهـم هـذه الطباع الان بالغربة!!!

رسالة اخـري من والـد سوداني يقول انا ماعنـدي مشكلة مع اولادي ولاحكاية السفر للسـودان كل صـيف ولا حـكاية رفضـهم التعليم بالسودان، انا عايش بالسعودية ومتـزوج مصرية وبنسافر كل سـنة لـمصر ولابندفع ضـرائب ولارسوم ولااتاوات ولا بنلاقـي ناس ( حـقي وينو!!) وعـندي شـقة والحمدللـه ..الاولاد مـمكن يقعـدو فيها لمـا يكبرو ويـدرسو بالجامعات المصـرية، بزور السـودان في (الشـديد القوي!!)، والحـقيقة ، لقيت اكتـر من 30 ألف اسرة سـودانية اقتنـت شـقق في مـصر وبـجو مع اولادهم كل صـيف ومابسافرو لسودان المعاناة والـمحن!!

رسالة اخري يقول صـاحـبها، واللـه انا بشـكر الانقاذ انه كرهنا في حاجـة اسـمه السودان!!!!، وشـردنا واحالنا للصالح وبهـدلنا في سـجـون ومعتقلات فـهربنا منه... فـشـفنا العالـم وبقينا بنـي ادمييـن.
انا حاليآ مـهنـدس بشـركة كيـماويات باليونان وبقـدم لـهذا البلد الرائع العظـيم (اليونان) خـلاصـة تعليـمي وخبراتـي واهل البلد يقدرون مجـهوداتي ويحتـرموننـي كثيـرآ، انا غيـر متزوج ولو فكرت بالزواج سـاتزوج يونانية واكون الي جانب اولادي عنـدما يكبرون ويـدرسون باليونان... ولامشاكل اغتـراب ودراسـة لهم بالسـودان ...وبالطبع زياراتي للسودان حاليآ متوقعـة حـتي اسـتجـم واتعافـي تـمامآ من ذكريات وقصـص مازالت تنغض علي عيشـتـي!!!

ونواصـل مع رسائل الـمغتـربييـن::::

يا بكرى
عندى استفسار لهذا السودانى المتزوج من مصريه وعنده شقة فى مصر
وانا -وصدقا لكلامه- اعرف سودانيين مقيمين فى كندا واشتروا شقق فى القاهرة..
وسؤالى هو افرض انا اشتريت شقة فى مصر ورجعت كندا والسفارة المصرية رفضت تعطينى
تاشيرة دخول واقامة يعنى شقتى تكون راحت ولا شنو؟؟؟
وطبعا هذا السودانى متزوج مصرية وما عنده مشكلة ...اها نحن نعمل شنو؟؟هل ممكن تقيم
فى مصر اى مدة بدون اقامة من سلطات الهجرة ولا الحكاية كلها فوضى فى فوضى عاوزين اجابات
واضحة عشان عندنا فكرة نشترى شقة فى مصر

الأخ الـحـبيب الحـبوب،
Nasir Ahmed Elmustafa
تـحـياتي ومـودتي،

وسـررت لقـدومك الـمقدر، ومنتـظر كتاباتك كـما وعـدت وان تثـري الـموضوع بخـبـراتك.

------------------------------------

وصـلتنـي هـذه الرسالة وابـثها كـما وردت:

الأخ الـحبوب الحـبوب،
بكري الصايغ،

تـحياتي لك من مدينة سـعودية اعيـش فيـها منذ سـتة اعوام. انا نـجـار وصاحـب 19 سـنة خـبـرة في عالـم النـجارة وصـناعة الابواب والشبابيك ومستلزمات الأسر من دواليب وترابيـزات وطاولات سـفرة وكراسي الـمواصلات العامة، ومتـزوج وعنـدي اربعـة اكبـرهم حـيدخل الجامعة بعـد سنتيـن باذن اللـه اولاد ( بنتيـن وولدين ) واتفقـت مع زوجـتـي انو نوقف الخلفة بعـد الأربعة ديل لانو حياتنا الأقتصادية ماماشـه كويـس وكل يوم الحياة بتضـيق بينا والمصاريف بتكتـر مع كـبر الاولاد والبنات،

انا كانت ماهـيتـي 1800 نزلت لـحد مابقت 1450 ريال لانو صاحـب الورشـة قال البضائع الاجـنبية ومستلزمات الاسـر من مصـنوعات خـشبية مستـوردة من الخارج بقت هـي المرغوبة عنـد الاهالي بالسعودية وقال انو الصناعة الوطنية مابقت مرغوبة وعشان كده سـوق الانتاج الوطنـي واقع فـي الواطة واعـتذر انو مابقدر يدفع لكل العمال والشغالييـن عنـدو كامل المرتب وبدون مايشاورنا خـفض الراتب لكل واحـد بـما فيهم انا صاحب ال19 سـنة خـبـرة!!!

، طبعآ هـنا في السعودية مافي حاجة اسـمها تشتكي ولانقابة ولااحـتجاج، الحاجات دي بنقرأها في الجـرائـد ونشوفها في المحطات التلفزيونية بـما فيها تلفزيون السعودية الحكومـي!!!

نـجـي لـموضوع الأجازات!!! ...اقول ياصايغ بصـراحـة انو صـافي مايبقـي في ايـدي من الماهية بعـد مصاريف البيت ودفع الايجـار والكهرباء ومواصلات الاولاد للمدرسة وال50 دولار كل شـهر للسودان ومصاريف الدروس الخصوصية ...يبقـي في جـيبـي 380 الي 400 ريال كل شـهر ( بالمناسبة اسعار الضروريات والمواد الغذائية زادت في المملكة لدرجت ازعـجت الحكومة!!).

طيب كيف عاوزني انا والأسرة نجـئ للسودان بالمبلغ ده!!?. كيف تقول لـي ...ولا زي ماكتبو ناس القراء حـول الموضوع ده ...انو كل والد لازم يعلم اولاده حـب الوطن ويعمـق فيهـم حـب الأهل ويكثف من الزيارات للسودان عشان مايشعـرو بالغربة لما يجـو يدرسو بجامعات بلادهـم!!!?. واللـه لو نسافر بالطيارة انا والاسرة بالطيارة مـجانآ ذهـاب واياب للخرطوم ....ال400 ريال ماتكفينا قعاد في الخرطوم يوميـن!!!

انا ياصايغ عنـدي هنا بمـدينتـي واحـد من اهلي دكتور بمـستشفي كبيـر، بودي ليه الزوجة ولا الاولاد لـما يمرضو وبعالـجـهم مجانآ وكتر اللـه الف خيره حق الدواء بدفعو من جـيبو، ...اهـا ياصايغ اقول ليك انو الدكتور ده قال لي انو مابقدر يسافر للسودان هـو واسرته الامرة واحـدة بسـبب غـلاء الاسـعار وبطاقات الطائرة ...وانو بسـفر اولاده ( بالفرده!!) يعنـي مره يسافر الكبيـر مع امه للسودان ...وبعـد سـنتييـن التاني مع امه وهكـذا لتقليل الـمصاريف!!،

طـيب ياصايغ اذا كان ده الدكتور ماقادر يسافر عاوزني انا النجـار صـاحب ال400 ريال اسافر للسودان واعلـم اولادي بالمبلغ ده حـب الوطن وتواصـل الاجـيال و تقوية صـلات الرحـم!!!!.... كيف يعـنـي!!!!

....واصـل الكتابة ياصايغ،
....ولكنك ماحـتغيـر حاجـة،
....ولا الناس المـعاك في الموضوع حيقـدرو يعملو حاجـة،
....ويـلا كـتـرو ( الونـسـة!!!)، واللـه يـديكم العافية.

لك مـودتـي.
ياناصـر احـمـد... ومنتـظرين... ماتتأخـر!!

up لحين العودة مرة اخرى

(...يا بكرى عندى استفسار لهذا السودانى المتزوج من مصريه وعنده شقة فى مصر
وانا -وصدقا لكلامه- اعرف سودانيين مقيمين فى كندا واشتروا شقق فى القاهرة..
وسؤالى هو افرض انا اشتريت شقة فى مصر ورجعت كندا والسفارة المصرية رفضت تعطينى تاشيرة دخول واقامة يعنى شقتى تكون راحت ولا شنو؟؟؟.وطبعا هذا السودانى متزوج مصرية وما عنده مشكلة ...اها نحن نعمل شنو؟؟هل ممكن تقيم مصر اى مدة بدون اقامة من سلطات الهجرة ولا الحكاية كلها فوضى فى فوضى عاوزين اجابات واضحة عشان عندنا فكرة نشترى شقة فى مصر).
(السر عبدالله )


الأخ الـحـبيب الـحـبوب،
السر عبدالله،
تـحـياتي ومـودتي،

اولآ، بعـتذر عن عـدم ردي بـخصوص استفسارك اعلاه لاننـي مازلت في انتظار رد قانوني واضـح حول شروط واسـس التـمليك في مـصـر بالنسبـة للسـودانييـن، وللاجانب من أصـل سوداني.

ثانيآ، عـدد السودانييـن الذين امتلكوا شـقق ومساكن في مـصر عـددهم قارب ال 770 ألف اسرة ...بينهم اسر تسكن الأن بـدول الخليج والسعودية وشـققـهم أمنه فـي بعض مـدن مـصر،

ثالثآ، لااعـرف وضـعك القانوني هـل انت سـوداني ام كندي، وبالطبع هـذا يلعب دور في حكاية التمليك، والاحـسن ايضـآ ان تسأل زملاءك السـودانييـن بكندا والذين كما قلت انت انهم اقتنوا شـقق بـمصـر،

رابعآ، السفارة المصرية بكنـدا يـمكنها ان تـمدك بـالقوانييـن الخاصة بالتمليك للسودانييـن والاجانب،

...انتظـر منـي رسالة بعـد وصـول معلومات من مـصـر، ....الـمشكلة انو في الصـيف فـي مـصر ولا واحـد برد عليك!!!!

لك مودتـي.

شكرا بكرى على الرد
انا سودانى ومولود فى السودان ولكن عندى الجنسية الكندية والجواز
الكندى واولادى مولودين فى كندا وامريكا ..
اما بالنسبة للسودانيين الكنديين الذين اشتروا شقق فى مصر فهم اشتروها ولا يقيمون
فيها بل ياجرونها للمصريين وهم مقيمين فى كندا ويسافروا لمصر فى فترات متباعدة ومنهم
من لم يسافر قط الى مصر بل تجده اشترى الشقة بالوكالة وهو لم يغادر كندا لانه فقط يريد
دخل اضافى من ايجار الشقة..
ولكن هب انى قررت الاقامة فى مصر بجنسيتى الكندية !!!!

Quote: يا عبد اللطيف برجع ليك قريب بتفاصيل عن الدراسة فى كندا

ياسرور منتظرنك ،،

سلام يا بكرى

المهم انو الاولاد ديل وصلو السودان ودخلو جامعات سودانية خاصة واقول ليك اسم الجامعة مامون دوفيعه من دفع((حميدة)) المهم الاولاد ديل لمن حضرو كانو ما بعرفو حاجة عن السودان كانو الحالة فى دولة عربية وقريبة من السودان شديد المهم بعد شهر اصابتهم هستريا العظمة واعتبرو السودان ده زى الوسخ بتعاملو مع الناس ومخاليق الله من فوق والسبب برضو الام والاب و الدلع الزائد كانو بخشو الجامعة ونعم بلقو ناس فى مستواهم الاقتصادى لاكن بطلعو خارج الجامعة بقيرو وشهم طوالى ربك رب الخير العادة الكانو بعملوها خارج السودان بقو ماقادرين اتركوها المهم طوالى دورو الحطب ((يعنى السجارة)) بدخنو والعيازة با الله وعلى فكرة ديل ((بنات)) ودا غير الحاجات التانية وبرضو قول يا بكرى السودان اولادنا ما قادرين اعيشو فيهو لاكن معليش العاوزنو هنا من فساد ((لمن اشوفو حلمت اذنهم)) بلقوهو !!!!!

مشكور يا بكرى الصايغ وارجو منك ان تطلب من الريس رفع البوست

الأخ الـحـبيب الـحـبوب،

almogira alemam

تـحياتي ومـودتي،
وسـررت لقـدومك الـجـميل... ومشاركتك الـمقدرة.

...بصـراحـة يامـغيـرة لقيتك اتـجـنيت علي زملاءك اولاد الـمغتربييـن بجامعة اسـماعيل الأزهري، وزي ماانت عارف يامغيـرة اصابع اليـد مـختلفة، وماكنت اتـمنـي ان تعـمم!!!

.... وصـلتنـي رسالة مؤثرة من طالب يـدرس باحـدي جامعات السودان يقول فيـها درسـت كل المراحل المـدرسية بالسـعودية ....وهناك في السعودية اذا ماكان لونك ابيـض زي اللبنانييـن ولاالتوانسـة ولاالـمغاربة تلقي الف مشكلة!. لوني اسـود وشـعري قرقـد عشـت بيه في السعـودية زي وزي عشـرات الأف غيـري من أهلي السودانييـن وياما اتعرضـنا للسـخرية والهـزء بسـبب اللون وزاد الطـيـن حكاية كسـلنا وبقينا صابرين صـبـر (آل ياسـر) مع سـخريات السعودييـن وباقي العرب!!!

جـيت السـودان عشان اكمل تعليـمي بالجامعة فـي بلدي ...ولكن لقيت انو ناس السودان عنـدهم وجـهه نظر فينا نحـن اولاد المغتـربييـن ...ولقيت مليون مصـطلح ساخـر ومـحـبط ومقرف عننا وعـن سلوكياتنا وتربيتنا!!!.

هـل تصـدق ياعـمي الصائغ، نـحنا عايشـيـن في السعـودية لينا حوالـي 27 سـنة وخلال هـذه الاعـوام ابوي ساعـد ناس كتار من اهـلي وفـي ناس جـونا للحـج والعمرة وللتجارة وساعـد ناس في التعييـنات بالبلـد دي، ...هل تصـدق اغلب الناس ديل هـم اكتـر الناس سـخرية مننا!!!

في موضـوع تاني، مالاحـظت ياعـم الصايغ، انو اغلب المشاركييـن ابتعـدو عن موضـوع زواج اولادهـم من غيـر سـودانيات بـدول الاغتـراب!!?. واللـه واللـه ياعـمي ...واقولـها صـادقآ انو نسـبةالزواج من اجنبيات مرتفعة للغاية ...وتزداد كل يوم ...والاباء بـدسـو الموضـوع وماعاوزين يكتبو فيـه هنا في موضـوعك!!!

مالاحـظت انو بعـض المشاركييـن في موضـوعك بقولو انو اولادهـم بـحبو السودان وبنتظرو بفارغ الصبـر الاجازة الصيفية عشان يسافرو للسـودان، ...الناس دي بتتكلموا بلسان اولادهـم... لكن الحـقيقة 90% في المئـة من الاولاد والبنات بعتبـرو الزيارة للسودان لااجازة ولاحـاجة!!!

اما عـني شـخصيـآ، فانا بعـد التخرج باذن اللـه ساغادر البلـد نهـائيآ ولن اعود لـها ماحييـت حـتي ولو في تابوت!!، وصابر صـبـر المـر لـحـد مااخلـص دراسـتـي.

طبعآ ياعمـي الصايغ لو لاحـظت انا ماحكيت ليـك عن مـحـني ومشاكلي هنا في بلـدي، وعشان تعرف اشياء عن مـحـننا ومشاكلنا نحـن اولاد المغتربييـن اقرآ بـهـدوء ردود بعـض الـمشاركييـن في مـوضـوعـك!!!

لك وللجـميع تـحياتي.

في مالاحـظت ياعـم الصايغ،... انو اغلب المشاركييـن ابتعـدو عن موضـوع زواج اولادهـم من غيـر سـودانيات بـدول الاغتـراب!!?.

واللـه واللـه ياعـمي ...واقولـها صـادقآ انو نسـبةالزواج من اجنبيات مرتفعة للغاية ...وتزداد كل يوم ...والاباء بـدسـو الموضـوع وماعاوزين يكتبو فيـه هنا في موضـوعك!!!

!!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!!!

موضوع زواج أبناء المغتربين و المغتربات من اجانب موضوع مهم جدا و لابد نناقشه و لي عوده.

[B]الاخ عبداللطيف
سلامات
انا ما عاوز اتحدث بتفاصيل دقيقة عن الدراسة فى كندا عشان ما نكون طلعنا من الموضوع الاساسى
ولكن باختصار اشير لهذه الحقائق وربما افتح بوست منفصل عن هذا الموضوع:-
اولا المدارس والجامعات فى كندا تختلف عن امريكا ..البرامج الدراسية واحدة لكن الانضباط ونسب الجريمة تختلف
المدارس فى امريكا فوضى وكلها جرائم لكن الجامعات الامريكية معروفه بانضباطها وتفوقها فى كل شئ..المدارس فى
كندا فيها ظبط وربط وقوانين صارمة والطلبة مهذبين ومحافظين..يمكن للطالب ان يتحصل على الشهادة الثانوية
بالمراسلة فى بعض المدارس الخاصة عنطريق الانترنت والتخاطب مع المدرسين عن طريق البريد الالكترونى وبعد
ذلك تقدم للجامعة..ويمكنك الحصول على قرض من الحكومة للدراسة الجامعية..ويمكن للطلاب من خارج كندا ان يقدموا
للجامعات الكندية ويقدموا لهذه الجامعات والجامعة تقيم الشهادة وتخطرك بالقبول او الرفض واذا
تحصل الطالب على القبول يقدم ورقة القبول للسفارة الكندية ويتحصل على التاشيرة بكل سهولة..والان هناك نظام
جديد فى كندا لاستقدام عمالة للولايات التى تعانى من نقص فى العمالة كولاية البرتا وساسكاتشوان واذا دخلت لموقع
الهجرة والجنسية تجد تفاصيل دقيقة وكيفية التقديم وتضغط على جملة skilled workers ..وهناك الكثيرين بيتحصلوا
على التاشيرة بهذه الوسيلة وبعد الوصول لكندا يفتشوا الدراسة والطرق الاخرى للحصول على الاقامة الدائمة لان تاشيرة
العمال المهرة تاشيرة مشروطة ومحددة بانتهاء مدة العمل فى المؤسسة التى يعمل فيهاالوافد
اى معلومات اضافية او اى اسئلة نحن جاهزين

شكرا أخي السر ،،
وقد وصلتني رسالتك ، ولي الآن أكثر من إتصال
بالمشاركين في هذا البوست الهام لتكوين أفكار
تهم الجميع ويمكن أن نعتبر تداخلنا إسهاما للكل،،

هناك من يرى أخي السر بأن الدراسة في أمريكا بعكس
مايشعاع عنها هي الأفضل وهي الأقوى وهي المطلوبة بكثرة
لتوظيف خريجها على نطاق العالم،،

لا أريد أن أحول البوست إلى بوست تعليمي ، وحبذا لو تناولنا
هذا الأمر في بوست منفصل،،

شكر السر
شكر بكري
وشكرا لكل المتداخلين هنا،،