حلوه عزيزى دافع الضرائب دى

قرأت بالامس فى احدى الصحف اليومية اعلان من مصصصصصصصصصصصصصصصصصصصلحة الضرائب بالخط العريض يبدأ بعبارة عزيزى دافع الضرائب.
هل حقا أصبح دافع الضرائب شخصا عزيزا لهذا الحد.
نحن ندفع الزكاة والضرائب والعوائد والموية والكهرباء ورسوم الدراسة والعلاج ..
هل احد منكم يعلم ما هى العوائد وهل ورد ذكرها فى دستور السودان.
انها رسوم فرضها الامام المهدى ليمول بها الجيش لمحاربة المستعمر واستمرت الجباية الى يومنا هذا والله أعلم
اسال سؤالا متواضعا هل تصرف اموال الضرائب فى الخدمات ، مثل الصحة والتعليم والنظافة.
اذا كانت الاجابة بنعم فالكل يدفع رسوم النفايات فلماذا ندفع مرتين ( وهنا أدعو السيد معتمد العاصمة القومية لزيارة سوق السمك بالموردة وأذكره أن يلبس كمامات وتكون الزيارة مفاجئة دون علم أحد فى يوم من أيام الجمع ليشهد بنفسه ويشم بانفه تلكم الروائح الكريهة فى هذا السوق والى اى حد تردت صحة البيئة فى هذا السوق وليسأل ذلكم الرجل الذى يقوم بجمع رسوم دخول من العمال لأى جهة يتبع وعلى أى اساس يجمع هذه السوم وفيما تصرف
وبعدها فاليعرج على السوق المركزى بامدرمان ويلقى نظره على كمية الاوساخ الملقاة بالشارع غرب السوق والتى اصبحت بؤرة للامراض، والخضروات التى تباع فى قارعة الطريق واللحوم المعروضة فى الشوارع فى كل مكان والتى تكون عرضة للغبار وعوادم السيارات، فبدلا من أن نهتم بانشاء مدينة النور ومدينة السنط ووووووو دعونا نصرف هذه الاموال لتطوير المجود والاهتمام بصحة البيئة.

ويا سيدى ما تزعل
لانه الفاتورة بتاعة النضافة بتمشى للمتعافى شخصيا
هو صاحب العربات (وعنده كل الحاجات )
عنده المكرفونات والعدة
دى بلد ريحتها اعفن من سوق سمك الموردة
المتعافى او (المتعافن ) لايهم
المهم انه فى احد خطاباته الاخيرة فى مدينة الدامر فى افتتاح (كشك جرايد )
سمعته باضانى دى بقول
ـ انتو يعنى يا بتاعين الهامش جايين تحكمو الخرطوم وتركبوا العربات الفارهة وتسكنوا القصور ؟
اها زول زى دا انت راجى منه شنو يعنى يا ودامى ؟
يعنى بالعربى الفصيح جدا
حنحكمكم ونطلع زيتكم
ونسكن قصورنا وما تهبشونا
وناكل مما تزرعون (كيتا عليكم )
ياخ الزول لمن يشوف عمايل الناس دى بتجيهو قرحة فى كل مفصل وكل عضلة
دحين يا ود امى دافع الضرايب له ما يكون (عزيز )
ولما تقول جباية
عليك الله ما تنسى الباشبوزق الكانوا بجمعوها
الفرق انه الباشبوزق الهسى دا زاتو مغلوب على امره
ولازم يجمع الاتاوات او الجبايات عشان يعيش واولاده تاكل عيش (او حصرم )
لايهم
الكلام دا بزهجنى بقى لكن مغستى اكبر من مغستك

الأخت سلمى
تحياتى وشكرا على المداخلة
نحن لا نتهم أحد ولا نود أن نجرح أحد ولكن يجب أن يكون همنا جميعا الوطن والمواطن، ونحن ندفع ونود أن نرى بيئتنا صحية وخدماتنا معقوله بعض الشى فهذه كل طموحاتنا المتواضعة