Post: #1 Title: أنا الآن في دارفور في نيالا Author: هويدا شرف الدين Date: 05-30-2008, 08:34 AM Parent: #0
سافرت منذ يوم 28/مايو في مامورية إلي نيالا تمتد إلي عشرين يوم - وجدت نيالا جميلة جدا جدا ومدينة رائعة اما بخصوص الناس فحدث ولا تقف طيبة تفوت الحد كرم الي حد الخجل وقبل سفري اوصاني بعض الناس بأن لا اجالس الغرباء وان لا اذهب الي الاسواق ولكن منذ اول يوم رحب بي الناس حتي خجلت وحمت في الاسواق وما خليت حوامة ورحب بي كثيرا سيد الخضار وسيد اللحمة وسيد الفواكه وكل من عرف من خلال شكلي ومن خلال حملي لجهاز راديو الطوارئ بانني غريبة من البلد رحبوا بي كافة الترحاب واخجلوني ورفض كثيرون من الناس ان اقيم في الاستراحة وحدي مع الحرس فقط ولا استطيع ان اصف لكم مدي كرم هؤلاء الناس وطيبتهم التي اخجلتني وانستني ما بي من الم الغربة والوحشة لدرجة اني افكر بطول الإقامة
اراكم لاحقا في بوست عن نيالا مدعم بالصور
Post: #2 Title: Re: أنا الآن في دارفور في نيالا Author: Al-Sadig Yahya Abdall Date: 05-30-2008, 08:41 AM Parent: #1
احييك يا هويدة و احيي عبرك نيالاالبحير،،، ما رايته هي نعمة انعمها الله على نيالا و اهلها،،، رغم مظاهر الحرب في دارفورالا ان ذلك لا ينعكس على نيالا و كانها خارج ذلك الاقليم المضطرب،،، تشكري على هذا الكلام الجميل عن نيالا و اهلها،،، نيالا كلها ملك لك و طوع يديك و دمت
Post: #3 Title: Re: أنا الآن في دارفور في نيالا Author: Abureesh Date: 05-30-2008, 08:41 AM Parent: #1
Quote: منذ اول يوم رحب بي الناس حتي خجلت
ديل حالهم الجنجويــد، لســه ما شفتى كرم نس نيالا..
Post: #4 Title: Re: أنا الآن في دارفور في نيالا Author: Al-Sadig Yahya Abdall Date: 05-30-2008, 08:47 AM Parent: #3
صبا الخير ابو الريش
Quote: ديل حالهم الجنجويــد،
نيالا هي "سودان" مصغر،، وهي بذلك تتجاوز تصنيفاتنا الدارفورية لها- اذا جاز التعبير،،، احييك مجددا
Post: #5 Title: Re: أنا الآن في دارفور في نيالا Author: Elsanosi Badr Date: 05-30-2008, 08:54 AM Parent: #1
Quote: وجدت نيالا جميلة جدا جدا ومدينة رائعة اما بخصوص الناس فحدث ولا تقف طيبة تفوت الحد كرم الي حد الخجل وقبل سفري اوصاني بعض الناس بأن لا اجالس الغرباء وان لا اذهب الي الاسواق ولكن منذ اول يوم رحب بي الناس حتي خجلت وحمت في الاسواق وما خليت حوامة ورحب بي كثيرا سيد الخضار وسيد اللحمة وسيد الفواكه وكل من عرف من خلال شكلي ومن خلال حملي لجهاز راديو الطوارئ بانني غريبة من البلد رحبوا بي كافة الترحاب واخجلوني ورفض كثيرون من الناس ان اقيم في الاستراحة وحدي مع الحرس فقط ولا استطيع ان اصف لكم مدي كرم هؤلاء الناس وطيبتهم التي اخجلتني وانستني ما بي من الم الغربة والوحشة لدرجة اني افكر بطول الإقامة
شكرا هويدا شهادتك مهداه لكل الكيزان والذين قالوا (اقتلوهم) وقالوا لابنائهم (مرتزقه) والذين اخذوهم مقرنين بالاصفاد وشو جلودهم واصابوهم بالعاهات المستديمه... والي اولئك الذين يكرهون كل من هو اتي من غرب السودان... شهادتك مهداه لكل العنصريين واذناب النظام... شهادتك مهداه للذين الذين لم يدينو ما تم من اعتقال الابرياء علي اللكنه والسحنه
Post: #6 Title: Re: أنا الآن في دارفور في نيالا Author: aosman Date: 05-30-2008, 09:52 AM Parent: #1
الأخت هويدا شرف الدين
مرحب بيكي في مدينة نيالا حاضرة ولاية جنوب دارفور ونتمنى ليكي أقامة طيبة وسعيدة بين أهلك وعشيرتك.
Quote: اما بخصوص الناس فحدث ولا تقف طيبة تفوت الحد كرم الي حد الخجل
الحالة انتي ما لقيتي الناس أيام زمان, أيام يضبحو خروف لي أي يضيف يحل عندهم
أرجو ان تلاحظي حركة المرور في نيالا وقرانيها بحركة المرور في الخرطوم وأحترام الناس لقوانين الحركة بين المدينتين حتى تقفي على مدى الفوضة المرورية التي تعيشها الخرطوم.
لعن الله الحرب والفتنة في دارفور وكل من أشعلها وأجج نارها.
Quote: كل من عرف من خلال شكلي ومن خلال حملي لجهاز راديو الطوارئ بانني غريبة من البلد رحبوا بي كافة الترحاب واخجلوني
يا زولة انتي لا غريبة ولا حاجة شيلي الفكرة دي برة من راسك
Post: #7 Title: Re: أنا الآن في دارفور في نيالا Author: ALazhary2 Date: 05-30-2008, 10:17 AM Parent: #1
الأخت الكريمة هويدا
حمد الله على السلامة
كرم أهل نيالا وطيبتهم ليس بالمستغرب فهم أهل الكرم والجود.
عبر هذا البوست نرفع لهم التحية والتقدير .
الأخ السنوسي
لماذا تشوهون كل جميل ؟
لماذا تقتلون الأمل والفرح؟
لماذا تصرون على تعميق جراح الوطن ؟
لماذا تركزون جهودكم على زيادة مساحة العنصرية والأحقاد والضغائن ؟
لماذا البعض يستمرئ أن يكون بومة خراب وغراب نحس لا يطيب له إلا النعب والنعق فوق خرائب الوطن وأنقاضه .
مادخل هذا البوست المفعم بالذكريات الجميلة واللحظات الطيبة بالكيزان ؟
يا أخونا السنوسي إنتا رايحة ليك سياسة ولا شنو ؟
أرحمونا وأرحموا الوطن يالسنوسي .
والله كرهنا الحياة وكرهنا إننا من الشمال وكرهنا إننا من السودان وكرهنا روحنا دي زاتها.
Post: #12 Title: Re: أنا الآن في دارفور في نيالا Author: Elsanosi Badr Date: 05-30-2008, 06:21 PM Parent: #7
Quote: لماذا تشوهون كل جميل ؟
لماذا تقتلون الأمل والفرح؟
لماذا تصرون على تعميق جراح الوطن ؟
لماذا تركزون جهودكم على زيادة مساحة العنصرية والأحقاد والضغائن ؟
حاااضر يا ازهري2 حنغمض عيونا وما نفتحها اصلو ونتخيل وطن ممكن تتقدم لوظيفه ما يسالوك من قبيلتك... ونتخيل برضو ممكن يكون الواحد شعرو فلفلي وراكب في الحافله وهدومو وسخانه وما ينزلوه من الحافلة عشان هو من دارفور... خلاص يالازهري2... ما حنجيب سيرة انو الناس تعيش متساويه في بلده عشان ما تبقي سياسة... خلاص يالازهري ما حنصحيك من الحلم الجميل لريس بمشي يقعد مع مواطنيه بدون ما مساعدو يقول ليهم يا عبيد... خلاص يالزهري2 حنسكت لاننا السبب في انك تكره نفسك...ولم تكلف نفسك من هو المسؤل الاول عن ذلك... خلاص يالازهري حيسكتو كل ناس الغرب ويمارسو الانتحار الجماعي عشان ما يفسدو ليك المدينه الفاضلة التي تعيش فيها... اخي ازهري انا ادعوك ان تتحدث الي احد اقرباء واطفال ما تم اعتقالهم عقب العاشر وقبل العاشر من مايو...عشان تسمع قصص اقلها مرارة انو اباهم او حبيب هؤلاء الاطفال قد ضرب اباهم امامهم حتي امتلي حذاءة بالدم هذااذ لم تمتلئ وجوه الاطفال والنساء بالدماء... لم نكن سياسيين يالازهري2 ولكننا انسانيين...
Post: #8 Title: Re: أنا الآن في دارفور في نيالا Author: osman righeem Date: 05-30-2008, 10:33 AM Parent: #1
Quote: الأخ السنوسي
لماذا تشوهون كل جميل ؟
لماذا تقتلون الأمل والفرح؟
اخوي الازهري 2 تحياتي
ابحث عن الاجابة معك !
Post: #9 Title: Re: أنا الآن في دارفور في نيالا Author: ادم الهلباوى Date: 05-30-2008, 11:14 AM Parent: #8
اشكرك على صدق المشاعر وأتمنى تطول إقامتك فى هذه المدينة المباركة
الخريف على البواب شهر تانى بس وحتنقلب حياتك أمانى وسط الخضرة
صفرة وحمرة وزحمت الوان أسأل الله لك إقامة طيبة وإنطباع طيب يا طيبة ...
Post: #10 Title: Re: أنا الآن في دارفور في نيالا Author: القلب النابض Date: 05-30-2008, 11:48 AM Parent: #9
اختي هويدا
سلام
فقد زرتها مرتين وفي كل مرة اتمنى ان اعود ...
جميلة
خضراء .. كرام أهلها .. من كل جهات السودان .. كل من يقابلك يريد أن يدعوك لبيته ويعزمك على طعام" وطعامهم طيب " وتجلس كل الأسرة لتؤانسك ..
هم أهلنا في نيالا .. وفي كل بقاع السودان ... يحبون الضيف .. وكم من زائر سكنها وكم من موظفاً نقل اليها طاب له المقام فاستقر ...
هي بلادي التي نفخر بها ..
فقد زرتها وزرت غالب المدن التي حولها وأكلت شية لذيذة لن أنساها في منواشي على الطريق ....
شكراً ليك
Post: #11 Title: Re: أنا الآن في دارفور في نيالا Author: Frankly Date: 05-30-2008, 02:25 PM Parent: #1
الأخت الفاضلة هويدا شرف الدين
Quote: سافرت منذ يوم 28/مايو في مامورية إلي نيالا تمتد إلي عشرين يوم - وجدت نيالا جميلة جدا جدا ومدينة رائعة اما بخصوص الناس فحدث ولا تقف طيبة تفوت الحد كرم الي حد الخجل وقبل سفري اوصاني بعض الناس بأن لا اجالس الغرباء وان لا اذهب الي الاسواق ولكن منذ اول يوم رحب بي الناس حتي خجلت وحمت في الاسواق وما خليت حوامة ورحب بي كثيرا سيد الخضار وسيد اللحمة وسيد الفواكه وكل من عرف من خلال شكلي ومن خلال حملي لجهاز راديو الطوارئ بانني غريبة من البلد رحبوا بي كافة الترحاب واخجلوني ورفض كثيرون من الناس ان اقيم في الاستراحة وحدي مع الحرس فقط ولا استطيع ان اصف لكم مدي كرم هؤلاء الناس وطيبتهم التي اخجلتني وانستني ما بي من الم الغربة والوحشة لدرجة اني افكر بطول الإقامة
اراكم لاحقا في بوست عن نيالا مدعم بالصور
هي هكذا نيالا الحبيبة مدينة السودان النموذجية بعشق إنسانها للسلام والمحبة والوئام هي نيالا بلد الكرام هي نيالا هي
أرجو أن تواصل السرد والتفصيل والدعم بالصورة في هذا البوست فما أجمله من عنوان
أنا الأن في دارفور في نيالا
ينم عن أعجاب بهذه الحاضرة الخضراء الوارفة
ونريد أن تسطري إعجابك بها فيه
ونحن معك نتابع بإعجاب
ونساأل الله أن يسهّل الصعاب
ويعيد الأهل والأحباب
إلى قراهم ووحلالهم
وييبدأ ترحالهم بين الوديان أمينين
شكراً لك وأنت تفتحين باباً من الأمل والمحبة والسلام
تحياتي كمال
Post: #13 Title: Re: أنا الآن في دارفور في نيالا Author: هويدا شرف الدين Date: 05-31-2008, 06:51 AM Parent: #1
أشكر كل المتداخلين في الرد علي بوستي هذا وأود أن اوضح وبالرغم من أنه لا داعي للإشارة بأنني من أي جهة إلا أنه وللأمانة ولضرورة الموقف احب ان اشير الي ذلك انا من المناصير الذين لم يتحدد مصيرهم حتي هذه اللحظة مع مشكلة السد التي لا تخفي علي احد - وطبعا ذي ما اشرتو في اختلاف في شكلي عن الغرابة وقبل سفري تمت وصايتي باني لا اتجول في المدينة فقط من الاستراحة للمكتب والعكس وان لا اتحث مع الغرباء وممنوع ان البي اي دعوة لانني يمكن ان اتعرض للمضايقات من الغرابة وسافرت وانا احمل كل هذه الافكار في راسي ولما وصلت مطار نيالا كنت انظر بخوف وريبة من كل من ينظر الي ولا اترك عيني تقع في عين احد حتي وصولي المكتب طبعا لما وصلت المكتب الناس خجولوني بالسلام والترحاب وبعد كدا كلهم رقضوا ارسال شنطتي للإستراحة وكل واحد يقول لا حا تنزل معاي انا الزميلات والزملاء وقالوا ما عندنا بت تنزل في استراحات المهم اخدت الإذن منهم ومشيت الاستراحة ارتحت لكن برضو خائفة دخلت قفلت كل الابواب بالمفاتيح بعد شوية جاء زول من المكتب ضرب لي تلفون قال لي مالك بسم الله مافي اي حاجة عشان دا كلو نحن هنا اهلك وناسك ونموت قبليك وصمم ياخدني المساء في جولة المهم طلعت معاه مشينا السوق الكبير وسوق اسمو الملجة وحمنا وزال مني الخوف شوية تاني يوم لقيت مائة نفر يرحبوا بي ويعزموني ويتونسوا معاي وكل الاعمام الغفراء في المكتب يحكوا لي عن زكرياتهم وشربت معاهم الشاي والقهوة واخر ضحك ونسة لحدي عشرة مساء واكلت معاهم بوش وبعد كدا نمت يوم الجمعة من الصباح التلفونات كلها تتضرب
اعود للمواصلة
Post: #14 Title: Re: أنا الآن في دارفور في نيالا Author: هويدا شرف الدين Date: 05-31-2008, 06:55 AM Parent: #1
اها ذي ما قلت ليكم يوم الجمعة كل زول مصمم اقضي يومي معاهو ما دام رفضت الاقامة معاهم المهم واحدة حلفت فمشيت قضيت معاها اليوم من الصباح في حي اسمو حي النهضة وبعد داك زرت حي اسمو الخرطوم بالليل ومشيت سوق المواشي وضربت شئ من واحد اسمو وردي وجيت راجعة بالليل واليوم معزومة في حي اسمو تكساس وبعد ما ارجع بجيكم بالاخبار شفتو الصياعة دي
Post: #15 Title: Re: أنا الآن في دارفور في نيالا Author: عبده عبدا لحميد جاد الله Date: 05-31-2008, 07:35 AM Parent: #14
Quote: وسافرت وانا احمل كل هذه الافكار في راسي
العزيزة هويدا من زمان الموظفين لمن ينقلوهم الغرب بحشو رسينهم باوهام عجيبة،وبعد داك الواحدالبلد تعجبه ويستقر ويندمج مع ناس البلد في كثير من العلاقات الاجتماعية والتجارية وغيرها..ويتمنى ما ينقلوه تاني. ونفس الناس العبوه بالاوهام يقولوا ليك خلاص كتبوه مشكلتنا يا هويدا نجهل وطنناونرسم صورة نمطية سمعية في غاية البشاعة عن الآخر . نتمنى من أمثالك ان يعمل على تعديل هذه الصورة، لو اتيحت ليك الفرصة زوري الفاشر،الجنينة،مليط ،كتم،.....
اتمنر لكب إقامة طيبة ينيالا البحير تحياتي يا غالية
Post: #16 Title: Re: أنا الآن في دارفور في نيالا Author: امير مصطفى احمد Date: 05-31-2008, 07:54 AM Parent: #1
اختي هويدا
مرحب بيك كتير في نيالا البحير ،،، نيالا الخير
هكذا هي معشوقتنا ،،، تستقبل كل عاشقيها ومعجبيها ،،، بالسحر الحلال ،،،
احكي لنا اكثر عنها فنحن لا نمل الحديث عنها ،،، فكل تفاصيل تحكيها هي امتداد لحياتنا التي نعيشها في كل لحظة حتى ونحن بعيدون عنها.
اخي السنوسي
اتمنى لا نفسد اللحظات الجميلة التي يمكن ان تمهد لرتق النسيج الإجتماعي بالاحداث التي لا يد لنا فيها نحن الشعب السوداني ، فالنحافظ على حبنا وتقديرنا لبعض ، هكذا تعلمنا من اهلنا الطيبين في دارفور . وصدقني لا يوجد شخص عاقل يؤيد القتل في دارفور او في اي شبر من السودان ، فالسودان للجميع .
فهل لنا ان نجعل من هكذا بوستات فرصة لاعادة الامل ونبذ الخلاف.
ان كان السوددة باجورة فسيركع طوعا لنيالا ان كان العالم جميلا فنيالا تسموه جمال (ابيات من قصيدة ابن نيالا الشاعر / بدر الدين بريمه)
Post: #17 Title: Re: أنا الآن في دارفور في نيالا Author: A.Razek Althalib Date: 05-31-2008, 09:26 AM Parent: #16
Quote: ان كان العالم جميلا فنيالا تسموه جمال
الدار داركـ يا غالية..
Post: #18 Title: Re: أنا الآن في دارفور في نيالا Author: ادم الهلباوى Date: 05-31-2008, 10:24 AM Parent: #17
Quote: واحدة حلفت فمشيت قضيت معاها اليوم من الصباح في حي اسمو حي النهضة وبعد داك زرت حي اسمو الخرطوم بالليل ومشيت سوق المواشي وضربت شئ من واحد اسمو وردي وجيت راجعة بالليل واليوم معزومة في حي اسمو تكساس وبعد ما ارجع بجيكم بالاخبار شفتو الصياعة دي
أختنا هويدا ... صياعة شنو قصدك ( سياحة ) إنت لسع شوفتى حاجة قال تكساس قال كده أمشى :
حى كوريا ( كررى )
حى الوادى
حى الا متداد
حي السنما
حي رايق
حي الجمهورية
حي الكنغو
حى الخرطوم باليل
ولسع ... تمشى وتجى تلقى أهل نيالا يانا نحن أهل الساحة والسماحة والجود والكرم
وزى ما وصيتك أنتظرى بس شهر من ألآن عشان تتذوقى مطر نيالا وتشوفى نيلنا ( ود برلى )
لما يجى يحمل لك كل الأشواق وتشوفى خضرتنا السمحة يا سمحة يا ظريفة دمت ولا عدمناك
البشيلنا فى قلبو بنشيلو فى حباب عوينا أتمنى لك إقامة طيبة وسط أهلك وأحبابك ..
Post: #19 Title: Re: أنا الآن في دارفور في نيالا Author: abubakr Date: 05-31-2008, 10:51 AM Parent: #1
شكرا هويدا .ما اتيت به مهم وله مغزي جميل .بعض "ثوابت" المجتمعات السودانية لا تتغير وفق رغبات السلطات والجهوية وحتي الفواجع والحروب والتشرييد والسدود لا تبدلها فمازال انسان الشرق جميلا طيبا رغم ما ناله من جوع واهمال وانسان الشمال القصي رغم السدود والتهجيير ما زال بشرا طيبا يكابد حماية لارضه رغم الرصاص وما انت الا مثال فما زال اهلنا المناصيير في كبد وانسان الغرب رغم اهمال تحول الي فاجعة وكارثةتشرييد وقتل واغتصاب وحرق مازال انسانا جميلا كما تريين اليوم في نيالا وانسان الجنوب بعد عقود من الاحتراب والتشرييد هو ذلك الجميل "قرنق"(وما التاسع من يوليو 2005 الا بيان ) وان رحل فمليون قرنق ...اهلنا "الغرابة" انتشرو في باقي ارض السودان وذهبت اليهم مجموعات مختلفة من كل مناطق السودان وعاشو وتعايشو واختلطو وتزاوجو وصارو اليوم يشكلون اكثر من ربع اهل السودان وذلك لا يحدث دون "امن" و "امان" يجري في دمائهم .. مودتي
Post: #20 Title: Re: أنا الآن في دارفور في نيالا Author: A.Razek Althalib Date: 05-31-2008, 11:30 AM Parent: #19
abubakr D:
Quote: تحول الي فاجعة وكارثةتشرييد وقتل واغتصاب وحرق مازال انسانا جميلا كما تريين
الزول ده نصيح ولا ما بيفهم..
الأخت/ هويدا تقول:
Quote: اقيم في الاستراحة وحدي
يقول ليها إغتصاب..
أبوبكر.. إنت ما لقيت غير سلاح جهازكـ الإخراجي ده تكاتل بيهو الحكومة المتهالكة دي.. ياخي قوم لف بلا تلويث السمعة الإنسانية النبيلة.. وإذا جيت تاني.. آههة كمان شيل شيلتكـ من هسعي.. وأتحمل الدرش بالمثل.. الكلام ما بقروش.. بمثل ما أعتديت حنعتدي..
وساعتها لا ينفع الندم.. خليكـ واعي..
وقوم شيل جيفتكـ القديمة دي وشتت من هنا.. أبو الريش: ما تمازح..
Post: #21 Title: Re: أنا الآن في دارفور في نيالا Author: A.Razek Althalib Date: 05-31-2008, 12:10 PM Parent: #20
Elsanosi Badr
هناكـ أخطاء لا بد من معالجتها.. بس بالهداوة وطولة البال (الرزينة).. ونبل الأخلاق.. حتى لا تتكرر المآسي مرة أخرى بذات منوال خطأ حركة العدل والمساواة .. وردة فعل الحكومة.. ويروح دم كثير من الأبرياء في الرجلين..
وسع صدركـ يا الغالي ول أبا..
Post: #22 Title: Re: أنا الآن في دارفور في نيالا Author: ادم الهلباوى Date: 05-31-2008, 12:15 PM Parent: #20
يا جماعة ما تلفوا لينا البوست وتقدوا لينا الجلد
نحن أشواقنا ومشاعرنا وأحاسيسنا النبيلة مع الأخت هويدا
ومشتاقين نسمع منها عن أهلنا ومدينتنا بيوتنا شوارعنا وعوضنا
بالله أرجوكم ما ( تبهتوا ) البنت وخلوها بأحاسيسها ومشاعرها
تقيمنا وبالبداهة خلوها ترمى لينا صورة صورتين عشان نعيش
معاها مدينتنا وبلدنا وأهل بلدنا ونشتم فيها أريج ودعاش بلدنا
وجود أهلنا جيدا جيتى !!
Post: #23 Title: Re: أنا الآن في دارفور في نيالا Author: سناء عبد السيد Date: 05-31-2008, 12:55 PM Parent: #1
التحية لنيالا و ناس نيالا
كنت مفروض أزور نيالا مرتين لكن ربنا ما أراد , المرة الأولى كانت مع صديقتي العزيزة و زميلة الجامعة اسيا وهي من نيالا
و المرة التانية مع الوالد و هو كان مدير احدالمدارس في الخرطوم قام اختلف مع اتحاد طلاب
المدرسة في شي المهم تاني يوم شالوهو من المدرسة و نقلوهو الأبيض ساعتا قال انا خلاص كرهت
الخرطوم و مشى الابيض و لمن جا قال لينا مافي شي تاني بقعدنا في الخرطوم انا ححول اوراقي\
لنيالا و نمشي نعيش هناك قال اصحابو كلموهو عنها المهم في النهاية كل الخطط فشلت بسسب
حالته الصحية و لأسباب تانية .
و كلما ذكرت نيالا نذكر زميل النضال و الدراسة بالجامعة الاهلية المرحوم فخري
Post: #24 Title: Re: أنا الآن في دارفور في نيالا Author: nazar hussien Date: 05-31-2008, 01:46 PM Parent: #23
'طيب الحرب دي وين هي؟ تمشي نيالا ما تلقاها...تسعل ناس الجنينة يقولوا ليك انتو الاخبار دي بتجيبوها من وين؟
عموما نتمني ليك طيب الاقامة في نيالا....ويشهد الله السودان دا كلو....نعمني زرتو حتة حتة...ما فيه بلدا والله ناسا بستاهلوا الموت او الحرب....ناس الله ساكت....محل ما تنقطع في حتة....تلقاهم اهلك...
هسي نيالا دي لو حمتي السوق كويس...حا تلقي لي عمين وخال...قاعدين فيها من...زمن قطر نيالا تذاكرو اسمها تساريح
ما فاتو منها ولا بفوتو.......وجيتن عندنا في الحلة.....يفكروا في الرجعة.....ويقولوا لينا المقعدنا في حلتكم المسيخة دي شنو فرع شدر يتلولح ساكت ما فيها...
Post: #25 Title: Re: أنا الآن في دارفور في نيالا Author: abraham deng Date: 05-31-2008, 01:51 PM Parent: #1
يا حليك فى نيالا البحيرة. عليك الله زور حي البيطرة وقول ليهم ابراهام مرشيانو باك بيسلم عليكم. وايضا اسال لي عن الاستاذ قاودينسيو لادو.
ابراهام دينق من كندا
Post: #26 Title: Re: أنا الآن في دارفور في نيالا Author: هويدا شرف الدين Date: 05-31-2008, 02:03 PM Parent: #1
أها مشيت تكساس وجيتكم ولقيت ليك المدينة كبيرة جدا جدا اكبر من ما كنت اتصور وقعدت ليك مع اسره دارفورية وكلهم صمموا انو ما ممكن اكون في الإستراحة وحدي ومشيت السوق الكبير واشتريت جرائد وشفت ميدان المولد والمستشفي وزارة الثقافة وزارة التربية والتعليم المنتزه والمتحف وزارة المالية والجامعة ناس الشرطة والجيش والخدمة الوطنية والله يا جماعه وربنا شاهد البلد آمنة أمان شديد والناس طيبة وكرم فايت الحد حتي الما بعرفهم جوا سلموا وعزموني وسلام مش ذي سلام ناس الخرطوم الجافي والله سلام بالاحضان كانهم بعرفوني من زمن طويل واي راجل أو مره كلهم بنادوني يا بنيتي لامن خجلوني
اها شكلها كدا جايبه ليها مطره السماء شايل شيل شديد - إن شاء الله امطار خير وبركة وسلام
Post: #27 Title: Re: أنا الآن في دارفور في نيالا Author: A.Razek Althalib Date: 05-31-2008, 02:09 PM Parent: #26
Quote: اها شكلها كدا جايبه ليها مطره السماء شايل شيل شديد
مربط العجيل..
Post: #28 Title: Re: أنا الآن في دارفور في نيالا Author: almogira alemam Date: 05-31-2008, 02:12 PM Parent: #1
والله ياخى الغرب كله معروف بالبساطه والكرم وانشاء الله ربنا يكتب لينا نمشى البلد الجميله ديك (((بالمناسبه الناس ديل نسوانهم طبخات بى طريقه ماعاديه ياســـلام _يممممم_
Post: #29 Title: Re: أنا الآن في دارفور في نيالا Author: هويدا شرف الدين Date: 05-31-2008, 02:21 PM Parent: #28
والله فعلا من ناحية الطبيخ اسكت ساي كاني في يوم من الايام لا طبخت ولا حاجة وبقيت اسال فيهم دي عملتوها كيف ودي كيف
Post: #30 Title: Re: أنا الآن في دارفور في نيالا Author: حيدر حسن ميرغني Date: 05-31-2008, 02:30 PM Parent: #28
لهم السلام
أهل خير وبركات
من إلتقينا بهم فى دروب الحياة يجعلنا نحلف بالذي سوانا أنهم أكرم من الكرم نفسه
لهم التحية
Post: #31 Title: Re: أنا الآن في دارفور في نيالا Author: ادم الهلباوى Date: 05-31-2008, 06:10 PM Parent: #30
معليش اوصيك لازم تزورى حي ( الفلوجة ) وما يفوتك سوق ام دفسو !!
ولما تزوريهم تعالى أرسم لك خرطة طريق سياحة لمدينة نيالا أولا :
تبدى من إستاد نيالا وتتجهى شرقا على طريق الزلط المطار ولما تصلى
الصينية بتاعت السينما عليها شعار ريكة عيش فيه قندول أرفعى القندول
وشنقلى الريكة تجد الكنز الأول ..
ثانيا : أمسكى شارع الضعين وابتدى من بنك السودان متجه شرقا على الزلط
وعندما تصلى محل إسمه ( حدق سنتر ) ريحى شوية وقولى ليهم الهلباوى بسلم عليكم
وقال ليكم تدونى هدية والهدية هي الكنز .. صفارة تيت ياالله ابتدى ......
Post: #32 Title: Re: أنا الآن في دارفور في نيالا Author: Abdulgadir Dongos Date: 05-31-2008, 06:36 PM Parent: #31
+
Quote: وطبعا ذي ما اشرتو في اختلاف في شكلي عن الغرابة وقبل سفري تمت وصايتي باني لا اتجول في المدينة فقط من الاستراحة للمكتب والعكس وان لا اتحث مع الغرباء وممنوع ان البي اي دعوة لانني يمكن ان اتعرض للمضايقات من الغرابة وسافرت وانا احمل كل هذه الافكار في راسي ولما وصلت مطار نيالا كنت انظر بخوف وريبة من كل من ينظر الي ولا اترك عيني تقع في عين احد حتي وصولي المكتب طبعا لما وصلت المكتب الناس خجولوني بالسلام والترحاب وبعد كدا كلهم رقضوا ارسال شنطتي للإستراحة وكل واحد يقول لا حا تنزل معاي انا الزميلات والزملاء وقالوا ما عندنا بت تنزل في استراحات المهم اخدت الإذن منهم ومشيت الاستراحة
لا بالجد الغرابة كتبوك وشربوك محاية بالبيبسي.
نتمني ليك أقامة سعيدة.
دنقس.
Post: #33 Title: Re: أنا الآن في دارفور في نيالا Author: Sabah Hussein Date: 05-31-2008, 11:33 PM Parent: #32
Quote: وكل من عرف من خلال شكلي ومن خلال حملي لجهاز راديو الطوارئ بانني غريبة من البلد رحبوا بي كافة الترحاب
.
شكلك كيف يعنى؟
غريبة كيف مش فى السودان؟
غريب الشيطان.
Post: #39 Title: Re: أنا الآن في دارفور في نيالا Author: هويدا شرف الدين Date: 06-01-2008, 06:03 AM Parent: #32
الأخ عبد القادر
صباح الخير
والله الموضوع ما موضوع محايات الموضوع موضوع الطيبة الكسرت عيني
اشوفك لاحقا
Post: #45 Title: Re: أنا الآن في دارفور في نيالا Author: A.Razek Althalib Date: 06-01-2008, 10:54 AM Parent: #32
Quote: الناس خجولوني بالسلام والترحاب
Quote: لا بالجد الغرابة كتبوك وشربوك محاية بالبيبسي.
يا لفضيحتكـ في شغل الفكيا يا دونكس وبالحالة قال مستنير..!! معليش ما منكـ؛
رزقة يحييك من على البُعد....
Post: #35 Title: Re: أنا الآن في دارفور في نيالا Author: هويدا شرف الدين Date: 06-01-2008, 05:54 AM Parent: #31
العزيز ادم الهلباوي
صباح الخير
شفت استاد نيالا وصينية السينما وشارع الضعين وإن شاء الله اوعدك امشي المحل بتاع (حدق سنتر ) بس كلمهم عشان الهديه طبعا اهم حاجه
Post: #34 Title: Re: أنا الآن في دارفور في نيالا Author: Huda AbdelMoniem Date: 06-01-2008, 05:44 AM Parent: #1
الاخـت هـويدا
اتمنـي لـك اقـامـة جميلـة
انتـي بين اهلـك و احبابـك ديلـة اولاد نيـالا البحير اطرقــي اي بـاب علشـان تصـدقي و تؤمنــي باللـة اهـل نيـالا مـا نزلـت حتي الان كلمـة توفـي بوصـف انسـانيتهـم وحبهـم و كرمهـم ارجـوك ان توصلـي السـلام لحبيبتـي امـي و اهلـي مدينتـي نيـالا
ياهـويدا انـا حزينـة منذ فارقتـة نيالا و حتـي الان.
و صيتـي اليـك......
تمتعــي بكـل دقيقـة بيـن اهلــك و احبـابـك فرصــة صعـبـة ان تتكــرر لكـي حبـي و تقديرى
اختـك هـدي
Post: #50 Title: Re: أنا الآن في دارفور في نيالا Author: A.Razek Althalib Date: 06-02-2008, 08:56 AM Parent: #49
Quote: يا / ود الطالب
الموضوع ليس هرشه كما يتصور إنت عزيز وغالى ...
فالح تصور فيني..
وأنا أهرش ليكـ الديابا يا يابا..
ما شوفت بت حينا تراجي الجافلة..
Post: #51 Title: Re: أنا الآن في دارفور في نيالا Author: Abdulgadir Dongos Date: 06-02-2008, 07:39 PM Parent: #50
+
أزيك يا هويدا، يا ريت تكوني مستمتعة بي هوا نيالا. حقيقة بي كلامك عن الوصية الملو بيها أفكارك عن "الغرابة" و"شكلك" الما بشبهم ذكرتيني لما مشينا مصر زيارة. لعبا ماتش كورة مع المصريين، وبعد الكوره جلسنا نتآنس. واحد قال نفسو يروح السودان ويجيب معاه نسناس، وآخر سألنا عن الحياة البرية وزاد "عندكو سيما" أطرف سؤال سأله أجهلهم هو السماء في السودان لونها ايه؟ جاوبت ليه بأن لونها أسود ومنيل
يا ربي الغرابة أيضا بوصوهم بأن يحذروا الجلابة لما يقبلوا دار صباح؟
دنقس.
Post: #52 Title: Re: أنا الآن في دارفور في نيالا Author: ادم الهلباوى Date: 06-03-2008, 06:20 AM Parent: #51
Quote: يا ربي الغرابة أيضا بوصوهم بأن يحذروا الجلابة لما يقبلوا دار صباح؟
دنقس.
أخى الكريم / دنقس ... تحياتى وفائق الاحترام
سؤال وجيه وجيد ولا بد له من إجابة !!
لكن الحاجة العايزك تعرفها عندنا حي فى قلب المدينة إسمو ( خرطوم باليل )
إضافة على إننا فى دارفور نسمي الأتى ( ناس قدام ) وناس ( دار صباح ) بحسن نية
( قدام ) تعنى الأول و( صباح ) تعنى الاشراق يعنى الود لكم محفوظ لكن والله أنا
ما عارف بالضبط البجرى ده لزومو ايه والكراهية دى من شنو أرجوك جاوبنى !!
Post: #53 Title: Re: أنا الآن في دارفور في نيالا Author: هويدا شرف الدين Date: 06-03-2008, 07:36 AM Parent: #52
الأخ/ أدم
طبعا الحرب القامت والمشاكل خوفت الناس وذي ما قالوا الشر يعم والخير يخص قبلي كدا كان عندنا تيم في 2005 مكون من اطباء وموظفين وموظفات تم اختطافهم لمدة خمسة ايام من احدي الحركات وتم الإستيلاء علي موبايلاتهم وعرباتهم لكن نفس هذا التيم اشاد باخلاق الخاطفين وقالوا انهم عاملوهم احسن معاملة حتي الماء كان يغلي لهم للذين رفضوا الشراب وقالوا ان الخاطفين قدموا لهم احسن ما عندهم من طعام لذلك حقيقي تخوفت اسرتي من سفري وانا كنت متخيلة انو المكان كلو حرب وقتل وخطف يعني تاني يوم من جيت توقف مولد الكهرباء وانا كنت نائمة داخل الغرفه فاول ما دار براسي انه لابد ان المتمردين هجموا علي المكتب والاستراحة وهم من اوقف المولد ضربت لمدير الامن في المكتب وعدد من الموظفين الذين احمل ارقاهم وكلهم قالوا لي قولي بسم الله تمرد شنو وحرب شنو وقالوا لي اطلعي بره والكلام دا كان نص الليل قلت ليهم ما بطلع المهم ضربو لي واحد ساكن جنب المكتب زميلنا واتصل علي وقال لي اطلعي انا جنب الباب حتي طلعت وصلحو المولد وضحكوا فيني ضحك شديد بعد يومين لقيت المكان فعلا أمان وبقيت اطلع براي وامشي السوق والحمد لله ناس نيالا اكرم والله العظيم من ناس الخرطوم وكل يوم حايمة ومعزومة في مكان محجوزة عزومات لي اخر الشهر لدرجة اني بقيت اكتب في النوتة يوم كدا مع فلان ويوم كدا مع فلانة وحتي بلقي وحدين طلبوا من الاخرين التنازل عن يومهم المهم كل نهاية يوم يجيني واحد ويقول لي بكره اليوم عندي وكدا ولما ارجع حا اوضح للناس ان شاء الله كل الحاصل وكل الحقائق
ودمتم يا اهلي اهل نيالا سالمين وربنا يعم عليكم السلام والخير
Post: #67 Title: Re: أنا الآن في دارفور في نيالا Author: Abdulgadir Dongos Date: 06-03-2008, 11:51 PM Parent: #52
+
الأخ الهلباوي، تحية طيبة،
حقيقة أنا ما فهمت كراهيتي كانت في أي كلمة من الذي سطرت، ياريت تشرح لي حتي أجاوبك بالشاف. تسلم.
دنقس.
Post: #54 Title: Re: أنا الآن في دارفور في نيالا Author: هويدا شرف الدين Date: 06-03-2008, 07:41 AM Parent: #1
بعدين اظرف موقف امبارح واحد زميلنا كان عازمنا بالمغرب في حته اسمها الوادي ومشينا وامو مره كبيرة ودا اصغر اولاده وقاعد معاها في البيت براهم وبتحبو حب شديد وهي كبيره شديد واي حاجه تحلف وحات ولدي دا وحات ولدي دا وهو ما معرس - الواطه بالليل هي ما شافتني متحننة قالت لي الا تعرسي ولدي دا قلت ليها انا معرسة قالت لي ما في مرة راجل بتنطلق براها وتسافر قلت ليها يا حاجة لزوم الشغل وكدا قالت لي لا اصلك ما معرسة وبس ربنا جابك عشان وليدي دا والله الا شافت الحنة في كرعيني حتي قالت لي خلاص جيبي ليهو اخيتك
Post: #55 Title: Re: أنا الآن في دارفور في نيالا Author: A.Razek Althalib Date: 06-03-2008, 07:53 AM Parent: #54
Quote: قالت لي خلاص جيبي ليهو اخيتك
Post: #56 Title: Re: أنا الآن في دارفور في نيالا Author: عبدالغني كرم الله بشير Date: 06-03-2008, 07:53 AM Parent: #54
والله حظك ياهويدا...
كان نفسي أكون رحالة، وفي بلدي، أجوب مدنه وقراه، مدينة مدينة، وقرية قرية، ولكن للغرب حلاوة، فهولاء القوم (حنان)، بصورة غريبة، في السلوك، في الغنوة، في الالحان..
هل تصدقي، حين ينزف وطني، ينزف قلبي، أحبه بشكله الجغرافي الحالي، وأعلم، علم يقين بن هناك مشكلة في الحكم، ومشكلة في التربية، وفي مشكلة في الوجدان، ولكن تباشير العقل السوداني وقلبه قادره على تجاوز المعضلة،...
عليك الله ارصدي حركة الاهل هناك، الاطفال، الكبار، الطرق، الظلال، الاحاديث، املئي الدن بهم، فهم كرام، عزاز، وبيني وبينك، والله بغبطك على هذه الرحلة، وابقى عشرة على الكاميرا، وسلامي لتلك المرأة العجيبة..
وطبعا هناك من يحاول أن يحول المجرى لشئ في نفس يعقوب، وأنت أدرى، وأشطر...
كوني بخير، وتمتعتي برحلة في وطن كالقارة، متعدد كألوان الطيف، وآن له أن يولد وطن جديد، يعطي كل ذي حق حقه، والحرية لنا ولسوانا..
جدك ابن بطوطة، سطر الكتب الثمان في رحلاته.. وجدك ماركو بلو، سجل العجب العجاب في زيارة الصين..
وكتاب النيل الازرق، من امتع الكتب في ادب الرحلات..
لا أدري لم قست علينا الحياة، وتركتنا نجوب ارض الله، وننسى مدننا الحبيبة..
سلام لك، وعميق احترامي...
Post: #57 Title: Re: أنا الآن في دارفور في نيالا Author: هويدا شرف الدين Date: 06-03-2008, 08:03 AM Parent: #1
شكرا الأخ / عبد الغني
علي المرور الجميل واوعدكم بي بوست جميل مليان صور من نيالا وناس نيالا من المناظر الجملية والخضراء المالية المكان ومن كل شئ جميل في نيالا في القريب إن شاء الله
Notice: ناس الخرطوم كيف عاملين وكيف احوالهم(خاص بعبد الغني فق")
Post: #58 Title: Re: أنا الآن في دارفور في نيالا Author: هويدا شرف الدين Date: 06-03-2008, 01:23 PM Parent: #1
وين ادم الهلباوي اختفي
Post: #59 Title: Re: أنا الآن في دارفور في نيالا Author: Solafa Alagib Date: 06-03-2008, 01:54 PM Parent: #58
هويدا ياعسل الناس كلها رحبت بيك وانا كمان رغم انى مامن نيالا ولسه ماتميت فيها سنة علي بعضها
لكن الحاصل لا يحتاج شرح ,الحنية,التقدير,المبادرة بكل شي طيب ويمكن عشان وضعي مختلف عنك شوية
وفيهو نوع من الاستقرار-زوجي من ابناء نيالا وانا من (قدام)زى ما بقولو,عملى كطبيبة في معسكرات
النازحين-كل دا خلانى اشوف حاجات اكبر من مجرد بوست وتعليقات وبديت في كتابة(ايامى في نيالا)
واتمنى الا تنتهي.
اختك د:سلافا العاقب احمد
Post: #60 Title: Re: أنا الآن في دارفور في نيالا Author: هويدا شرف الدين Date: 06-03-2008, 02:08 PM Parent: #59
الغالية دكتورة سلافة كيف حالك
والله هسع كنت بتكلم مع دكتور سيد عنك كيف حالك ان شاء الله تمام يلا اظهري علي بسرعه - ( كيف حال صاحبي ساكن في حيطتو لسه ولا رحل )
Post: #61 Title: Re: أنا الآن في دارفور في نيالا Author: محمد الطيب محمد Date: 06-03-2008, 03:42 PM Parent: #60
الاخت هويدا سلام اوصيك وانت فى مدينة نيالا ان تذهبى الى معرض حاجة زرقة الثقافى وهو من الاماكن التى تعكس تراث اهلنا فى
نيالا ويقع المعرض بالقرب من مكان اقامتك فى ه فيه تجدين كل ما لذة وطاب نت ن من اكلات دارفورية متميزة
ولا تاخرى كثيرا لان المعرض سوف تقفل ابوابه مبكرا
لكى من كل الود وتحياتنا لناس نيالا الطيبين
Post: #62 Title: Re: أنا الآن في دارفور في نيالا Author: الطاهر عثمان Date: 06-03-2008, 04:18 PM Parent: #1
والله بوست جميل يؤكد حقيقة تجانس كل أهل السودان حكى لنا جدنا قبل وفاته بان والدي عليهما الرحمة بان والدي استقر في نيالا لفترة طويلة قبل زواجه ورفض العودة نهائياً للشمال ولم تفلح كل محاولات عودته عن طريق المراسيل الذين كانوا في تنقل في ذلك الوقت مما اضطر جدي لسفره الي هناك وإحضاره معه وكان والدي يحكي بحنين شديد وبحب عن تلك الديار وعن طيبة اهلها ... وسنحت لي ظروف الدراسة والجيرة بان اشهد علي مقولة الوالد مما لاحظته من علاقات كانت ومازالت وطيدة جدا باخوان لنا في غربنا الحبيب
لك التحية اخت هويدا وشوقتينا لزيارة تلك المناطق فلا تحرمينا من الصور
Post: #63 Title: Re: أنا الآن في دارفور في نيالا Author: ادم الهلباوى Date: 06-03-2008, 05:01 PM Parent: #62
الأخت هويدا .. تحياتى وإحترامى
أنا هنا ومتابع ......
اها أختى أدتك الشيلا وله لا ؟
عشان ما يفوتك شئ من تراثنا قولى ليها أنا نفسى اشوف ( ابو قذه ) وأمشى معاهو ( فرنقبية)
وعشان بوستك ده تزداد قيمتو الآن ناقص صور عليه دايرك تمشى إذاعة نيالا وتسألى من المهندس
سعود اولا عرفيه بنفسك وقولى ليه آدم الهلباوى قال ليك تسلفنى كمرة تصوير عشان تنقلى لينا
صور خارطة الطريق الرسمتها ليك ن قبل وبعدين خليهم يدوك الجناين وكمان لازم تزورى غابة
النيم وخليهم يعملوا ليك الاحتفال ب ( أبو قذة ) فى صالة كبار الزوار بمنتزه غابة ( النيم )
وخلى المرة تكون صادقة زى صدقك ده ونحن فى إنتظارك يا طيبة .....
أصلا سمعت إنهم عايزين يعملوا ليك حفلة وزى ما قلت ليك أصر على حكاية ( أبو قذه ) دى
لعلمك الأستاذة مهتمة بالتراث الدارفورى عشان كده ركزى على حكاية ( أبو قذة ) أشكرك ...
Post: #64 Title: Re: أنا الآن في دارفور في نيالا Author: Kostawi Date: 06-03-2008, 05:11 PM Parent: #63
فعلا إنتى وضعك مختلف وهنا جاءت مخاطبتك ب ( الشقيقة ) لأنك اليوم مننا وفينا !
بس لأنك من ناس ( قدام ) أتمنى لو عكست ولو القليل وذلك على ضوء الأسئلة الأتية :
منذ أن تم إرتباطك بهذا النيالاوى هل يوم حسيتى بضيم سواء كان منه أو أهله ؟
بحكم أننى متزوج هنالك محاككات تحدث بين الأزواج وهذا شئ طبيعى بالله عليك هل يوم
من الأيام حصل أهل الراجل مع إبنهم ضدك ؟ تعرفى ليه لأنو واحد من أولادنا تزوج من قدام
وحصل مثل هذه المواقف وحصل خصام ومشت البنت لعمى محمود والد زوجها وشكت ليهو من ولده
قال ليه البنت دى عندها أهل هنا قال لا قال ليه نحن أهلها وبتنا ما بنرضى بيها والله لو
ما رجعتها لبيتك عزيزة مكرمة وتانى سمعت كلام زى ده منك لا ولدى ولا عافى منك اليوم بحمد
الله لهم ولدين واحد فى جامعة الخرطوم طب والثانى جمعة السودان هندسه .. مجرد وجهة نظر
عشان كده يا الشقيقة سلافا أرجوك عكس تجربتك مع أهل نيالا كزوجة لابنهم جاية من ( قدام )
فى المناسبات العامة والخاصة والخاصة مثل ( الولادة _ الختان _ المرض_ الأعراس ) ومواقفهم
العامة والخاصة معاك لأنك زوجة ولدهم وجاية من ( قدام ) أشكرك بحرارة ............
Post: #70 Title: Re: أنا الآن في دارفور في نيالا Author: Elsanosi Badr Date: 06-04-2008, 06:24 AM Parent: #69
هويدا انشاء الله حالك باهي يا هويدا كتبتي:
Quote: وكل من عرف من خلال شكلي
وتاني برضو كتبتي:
Quote: وطبعا ذي ما اشرتو في اختلاف في شكلي عن الغرابه
مافي اي زول اشار ولا حاجه...
انا ما عارف شكلك ده كيف!!!!!! يعني لو بيضاء برضو في ناس ابيض منك ولو سوداء برضو في ناس اسود منك ولو صفراء برضو في ناس اصفر منك... يعني قصة شكلي وما شكلي ما عندها معني هنا... مافي اي زول بتميز في السودان ده بشكله عن اي زول...ا
Post: #73 Title: Re: أنا الآن في دارفور في نيالا Author: هويدا شرف الدين Date: 06-04-2008, 06:36 AM Parent: #70
الأخ / السنوسي
كيف حالك
أنا في الحقيقة لا اتكلم عن اختلاف الالوان لانو في نيالا في ناس ابيض مني وفي اسود مني ولما تشوف الصور حا تعرف لوني بس لاني كنت خائفة وبالجد شكلي مختلف والمهم اي زول وقفنا لي حاجة عندو سالني انتي من ياتو حتة في البلد ولما اقول انا من نيالا يقولوا لي لي نحن بنعرف ناس نيالا انتي ما منهم
Post: #76 Title: Re: أنا الآن في دارفور في نيالا Author: Elsanosi Badr Date: 06-04-2008, 07:24 AM Parent: #73
Quote: كيف حالك
باهي...
Quote: بس لاني كنت خائفه
يا هويدا... انت خايفه من شنو؟؟؟... من انو البلد فيها حرب ولا من كمية الشعارات والخزعبلات المالينك بيها ناس الخراطيم...
Quote: وبالجد شكلي مختلف
شوفي يابت الناس...نحنا كنا بنجي ل(نيالا دي) من اقصي الشمال لدارفور يعني من قريب جبل العوينات (جبل المحاميد) اصلنا يوم ما حسينا اننا او شكلنا مختلف من الناس...باهي
____________________________________________________________________ تعرفي اول وصيه كانو بيوصونا بيها الناس ونحنا نازلين الخرطوم كانت اوعا من ناس (البلد القدام)... ا
Post: #71 Title: Re: أنا الآن في دارفور في نيالا Author: هويدا شرف الدين Date: 06-04-2008, 06:27 AM Parent: #69
الغالي ادم
اعرف دكتورة سلافة منذ رمضان الماضي لان زوجها زميل لي في العمل في مكتب نيالا والزوله دي بالجد خرطومية يعني ذي ما قلتو من قدام و(حنكوشة شديد) فلما عرفنا زواجها بي واحد من نيالا كان زميلها وبعد قصة حب إستغربنا وقعدنا نسال فيها والمفروض نقيف مع زميلنا لكن بالعكس وقفنا معاها وقعدنا نسسال فيها اها كيفن عرستي واحد من نيالا من اخر الدنيا وسكنتي معاه وخليتي الخرطوم وكلام كتير ودا كوم وانها تسكن في نيالا كوم براه والكلام دا رمضان الماضي وقعدنا نساله اهلو بعاملوك كيف والكلام الكتير قامت قالت والله نيالا احسن من الخرطوم واهل نيالا احسن منكم وانا لما اكون في نيالا بحس بالراحة اكتر من الخرطوم قلنا ليها دا كلام جرائد ساكت انت بتقولي كدا عشان تدافعي عن راجلك واهلو قالت الما مصدق يجي براهو - تاني ما اتقابلت معاها الا بعد فترة في الخرطوم في ظروف صعبة لذلك لم استطع ان اسالها عن نيالا لانو كان طلبوا مني السفر وبعد ما جيت وقابلتها في نيالا سالتني اها نيالا واهل نيالا لقيتيهم كيف قلت ليها تماااااااااااااااااااااااااااااااااااااااااااااااااااااااااااااااااااااااااام
Post: #72 Title: Re: أنا الآن في دارفور في نيالا Author: ادم الهلباوى Date: 06-04-2008, 06:29 AM Parent: #69
Quote: الأخ الهلباوي، تحية طيبة،
حقيقة أنا ما فهمت كراهيتي كانت في أي كلمة من الذي سطرت، ياريت تشرح لي حتي أجاوبك بالشاف. تسلم.
دنقس.
أخى الكريم / دنقس .. تحياتى وإحترامى
ياأخى أحب دائما الطرح الموضوعى الهادف وأيضا النقاش العقلانى المثمر بعيدا عن المشاحنات
وأنطلق فى ذلك من زاوية هذا هو السودان العظيم وهؤلاء هم أهله والمفترض منهم أن يكونوا عظماء
كذلك والحال يغنيك عن السؤال هنا فى البورد وربما الأخت هويدا أحست بهذا الشئ هنا وحاولت
بافكارها المستنيرة أن تفك تلك الأزمات فكان مدخلها لذلك بهذا البوست بعد أن سنحت لها سانحة
بزيارة مدينة المحبة والجمال نيالا ونحن من هذا المنطلق ندعمها عسى ولعل .. أنا لم أقل أن لك
كراهية ولكن على نهج سياق الأخت هويدا وردت كلمة كراهية وخير شاهد لذلك البوست أعلاه الذى فتحه
الأخ كوستاوى والذى لم نعهد له بوستا إيجابيا يصب فى هذا المنحى لا فشاء المحبة بين الناس سوى
هذا البوست لأنه من قبل قال ( أسأل عنى عذراوات البقارة المرجعية حنتوب ياللخو ) نحن نعتقد
أن لكل جواد كبوة والحق يعلو ولا يعلى عليه وأفتكر نحن بهذا البوست ماضيين فى الاتجاه
الصحيح .. عليه أخى دنقس ذلك ما قصدت ولم أتهمك ولا تثريب عليك لك ودى وفائق الاحترام .
Post: #74 Title: Re: أنا الآن في دارفور في نيالا Author: هويدا شرف الدين Date: 06-04-2008, 06:44 AM Parent: #66
الاخ العزيز ادم
والله ما قصرت وما بتقصر الكاميراء في مشكور بس انا مشغولة شديد لكن يوم الجمعة واعدني امشي المتحف والمنتزه والجنينة ان شاء الله وهناك ان شاء الله الاسبوع الجاي بجيكم بكمية من الصور بس بمشي للزول الفي كمبيوتر سنتر عشان يساعدني في التنزيل
Post: #75 Title: Re: أنا الآن في دارفور في نيالا Author: ادم الهلباوى Date: 06-04-2008, 07:02 AM Parent: #74
بالمناسبة يا هويدا منتزه غابة النيم ومنتزه نيالا على شارع الزلط المطار
كل هذا الانجاز الرائع بيد المهندس ( الحاج عطا المنات ) والى جنوب دارفور الاسبق
نختلف أو نأتلف معه حقيقة كانت له بصمات واضحة فى مدينة نيالا عبرك نرسل له تحية
وشكر وامتنان متعه الله بالصحة والعافية .....
خلى الكمرة تحكى عن مدينتنا الجميلة أتمنى تكون اللقطات من التى :
منتزه غابة النيم ومنتزه نيالا على شارع المطار و كبرى تكساس
الولاية
البنوك
حولين سنماء نيالا
السوق الجنوبى
المطار
جامعة نيالا
المسرح ومركز الشباب .................. أشكرك
Post: #78 Title: Re: أنا الآن في دارفور في نيالا Author: ترهاقا Date: 06-04-2008, 07:40 AM Parent: #75
الاخت الفاضلة هويدا
لك كل التحايا
إنتى مشيتى لجزء عزيز فى الوطن الكبير فالاقاليم دايما مناطق مرحبة يعنى ما بعاتية ، انتى ما زلتى فى الوطن الكبير السودان ، طبعا ناس العاصمة محرومين من صفاتنا نحن ناس الاقاليم الهاشين الباشين اللى بنحترم الضيوف ، ولو سافرتى من الخرطوم شمالا جنوبا شرقا غربا بى لورى لمدة أربعة ساعات بس حتلقى كرم فياض والسودان الحقيقى
تمتعى برحلتك بين اهلك وترجعى بالسلامة إنشاء الله ، وتقبلى تحايا اصدقائى من نيالا
Post: #79 Title: Re: أنا الآن في دارفور في نيالا Author: A.Razek Althalib Date: 06-04-2008, 07:48 AM Parent: #75
Quote: ولما اقول انا من نيالا يقولوا لي لي نحن بنعرف ناس نيالا انتي ما منهم
مظبوط يا الغالية.. الغريب ما بيغباهم.. لحاجة سمحة في نفسهم..
ياهم ديل أهل الأصالة ناس نيالا وفراسة عينهم النجيضة..
وعن شعرها أسألوني.. وعن أحلام الطفولة.. وعن حفلة زفافها للفنان أبو عركي البخيت في نيالا..
كانت ولا زالت عبق من الجمال يفوح أريج ورد يتدلى..
سمحة العافية..
Post: #77 Title: Re: أنا الآن في دارفور في نيالا Author: خالد سمارة Date: 06-04-2008, 07:39 AM Parent: #74
الاخت هويدا سلامات .بالجد عندناازمة معرفة وانتماء لهذا الوطن الرائع القارة الكبير .انا اعتقدت وانت تتحدثين عن نيالا بانك من دولة جارة تزورين السودان لاول مرة لاننا بصراحة شديدة فى المراحل الدراسية ندرس جغرافيا العالم وننسى الاهم مدننا وناسنا واهلنا انها ازمة مناهج .مرحبا بك فى نيالا
Post: #80 Title: Re: أنا الآن في دارفور في نيالا Author: A.Razek Althalib Date: 06-04-2008, 08:35 AM Parent: #77
Quote: مرحبا بك فى نيالا
شوتر وبدون ريزر وكمان (رهيب).. جاي في اللفة..
آهه يا هويدا كنكشي في ابن العم خالد سمارة..
صاحب أكاديمية علوم الكمبيوتر .. بتقع في حي السينما ـ شمال كنيسة ماري جرجس القبطية وغرب نادي المريخ والهلال..
(كابتن السودان للكرة الطائرة)..
يا كابتن.. أديها رقم تليفونكـ لزوم التنسيق يا سمارة.. وقتين بخلتو لينا بصور البحير..
وناس كوستاوي قاديننا بالهلوكوستاويات..
إذا في كمرة في مستودع الأكاديمية كمان بالمرة سلفوها ليها.. فليس من رأي كمن سمع؛
وباركـ الله في من نفع وإستنفع..
تحياتي من على البعد عبركـ لكل الجميلين..
Post: #81 Title: Re: أنا الآن في دارفور في نيالا Author: البشير دفع الله Date: 06-04-2008, 08:59 AM Parent: #1
الاخت المحظوظة هويدا شرف الدين لك التحايا العطرات أحسدك على سفرك الى نيالا وزيارة غربنا الحبيب . وذلك أنه لم تتأتي لي فرصة أن أزور أيا من مدن غرب السودان , وكنت قد سمعت عن جمالها بدأ من عروس الرمال مرورا بنيالا وحتى الجنينة وجبل مرة الذي نطالع فقط صوره عبر الشاشة . ولزيارتك بالتأكيد كبير الأثر , لأنها زيارة عمل ولا علاقة لها بالسياسة والذي منو .
وسيمكنك التعرف على مواطني غربنا الحبيب بصفاتهم المعروفة من طيبة وكرم وصفاء , والتعامل المباشر يعطي حقيقة أكثر مما نقرأه أو ما نشاهده من مواطن تلك الديار اذا غادروا ديارهم .
أدعو لك بالتوفيق والسداد
كل الود
Post: #82 Title: Re: أنا الآن في دارفور في نيالا Author: A.Razek Althalib Date: 06-04-2008, 09:24 AM Parent: #81
Quote: شوفي يابت الناس...نحنا كنا بنجي ل(نيالا دي) من اقصي الشمال لدارفور يعني من قريب جبل العوينات (جبل المحاميد) اصلنا يوم ما حسينا اننا او شكلنا مختلف من الناس...باهي
السنوسي بدر.. ياخي الجد (كامل دّلَّالة) أشهر خواجات المدينة .. صاحب سينما نيالا .. زوج عمة الوالد (أم كواكـ).. والد يوسف كامل [صاحب شركة البريد السريع (DHL) بنيالا].... عمروا ما حسا إنو غريب من نيالا.. لا هو لا أولادو..
ولما وافاه الأجل بلندن في 1995.. وصي إنو يدفنوهو في نيالا التركـ عشانها أهلو وميراثو..
وبرضو يا ول أبا.. جبل المحاميد يا ابن العم.. ياخي العزيز حمدي عثمان المصري [عازف بفرقة جنوب دار فور].. والدو أشهر نجار في حينا.. برضو عمرو ما حسا بغربة في نيالا..
هويدا قاصدة تقول رغم محاولة إنخراطها في مجتمع نيالا العجبها .. إلا إنو شكلها بيفضحها في عيون الناس لأنها ما من ناس نيالا المعروفين..
المعني واضح ولا يحتاج لشرح..
Post: #83 Title: Re: أنا الآن في دارفور في نيالا Author: Elsanosi Badr Date: 06-04-2008, 10:20 AM Parent: #82
عبدالرازق ولد الطالب شن حالك... باهي...
Quote: هويدا قاصدة تقول رغم محاولة إنخراطها في مجتمع نيالا العجبها .. إلا إنو شكلها بيفضحها في عيون الناس لأنها ما من ناس نيالا المعروفين..
برزقه يا ولد ابوي... انا هنا بتحدث عن الصوره النمطيه والانطباعيه للناس البيجومن الخرطوم والشمال عن نيالا ومدن دارفور الاخري وبيقولوا ليك خايفين وشكلنا مختلف...يا سيدي هاي النظريه موروثه ومورته وما بتمسحها زيارة هويدا ولاغيرها %90 كلامهم مصطنع وغير مستساغ انظر الي كلام القلب النابض تقول ليك اكلت شيه في منواشي ونيالا في الطريق ..نيالا وين ومنواشي وين يا خي نحنا ما عندنا (قنابير.)..صحيح جينا من الباديه وكنا بنذاكر فوق ظهور (ألبل) لكننا نلمح طراف الحديث... شوف يا ابرزقه اخوي... هويدا دي لو عجبتا نيالا... تعرف في المجالس الخاصه بيقولوا شنو؟؟...بيقولو (كتبوها) وعملوا ليها (عرق) ... وحيظل اي زول في نظر الناس داي فكي وشايل دوايه...حتي لو اجدادك نكل بيهم المهدي وخليفته زي ما حصل معانا بالضبط ....وبرضو شدو جمالهم وجو حاربوا معاه لامن بقي في استعمار خارجي... فالنظريه انك انت زول طيبان وممكن تكون (بندقجي) في اي كتيبه ماشه الجنوب تحارب ولا حتي تحارب بعضك فهمتني... فياخي تعال لينا جمب جبل العوينات هناك تشم ليك هوا بارد ومويه جاريه...ممكن يعملها نجل (ابوخريس) قريبنا...خلينا من صورهويدا ومذكراتها ...في كم واحد مشي هناك... اتصور وكتب مذكرات وطلعت طعنة ريش ....وبرضو اقولوا ليك واحد ازوج من الخرطوم وغيرها...وسالو كيف اهلها قبلو بيك ... ياخي لفو كده...ولا كده ... نحنا فاضين ليكم زاته...
___________________________________________________________________ .ياخي الجماعه الذكرتهم ديل فيهم مجموعه لنا بها صلات قربي
Post: #85 Title: Re: أنا الآن في دارفور في نيالا Author: هويدا شرف الدين Date: 06-04-2008, 10:38 AM Parent: #83
اها رأيك شنو أنا مشيت سوق نيالا الكبير وسوق الملجة واكلت شية في المواشي عند واحد إسمو وردي ومشيت حي النهضة والخرطوم بالليل الفيهو دكتور اسمو سيد متزوج واحدة من الخرطوم إسمها دكتورة سلافةومن الخرطوم واتزوجت من نيالا وهسع ساكنة في نيالا في خرطوم بالليل وانا زرتهم بي نفسي وسلافة دي اسمها سلافة العاقب ومشتركة في سودانيزاونلاين دي باسمها الحقيقي وعندها مداخلة في نفس البوست دا وممكن ترجع ليها بالماسنجر اذا حابي تساله هي من الخرطوم ومتزوجة من نيالا ونقلت عيشه لنيالا ....وبرضو اقولوا ليك واحد ازوج من الخرطوم وغيرها...وسالو كيف اهلها قبلو بيك ... ياخي لفو كده...ولا كده ... نحنا فاضين ليكم زاته...
وانت لو ما فاضي ما تدخل خلي الناس العاوزين يدخلوا يدخلوا
سلام
Post: #84 Title: Re: أنا الآن في دارفور في نيالا Author: خالد سمارة Date: 06-04-2008, 10:24 AM Parent: #82
هويدا عبرك احيى الاخ عبدالرازق انت من زمن الاكاديمية دة حلم انتهى مثل موت كل الاحلام الحلوة .بس عبدالرازق نيالا ما محتاجة حقيقة من يزين جيدها او يجملها انها خلقة اللة .اقامة طيبة الاخت هويدا
Post: #86 Title: Re: أنا الآن في دارفور في نيالا Author: هويدا شرف الدين Date: 06-04-2008, 10:42 AM Parent: #1
واكمل ليك كماان يا السنوسي وزرت تكساس وحي الوادي ولسه البقية تاتي ان شاء الله
Post: #87 Title: Re: أنا الآن في دارفور في نيالا Author: A.Razek Althalib Date: 06-04-2008, 11:31 AM Parent: #86
Quote: .ياخي الجماعه الذكرتهم ديل فيهم مجموعه لنا بها صلات قربي
ما قلنا ليكـ الساير عطية.. والإلبل بيقودوها من قدام.. [أفلا ينظرون إلي الإبل كيف خلقت]..
لامن كنت طالب في مصر طلعوا لي قرايب في ألف مسكن ومدائن عين شمس.. ده غير ناس أبو صفيطة.. أصحاب فندق المنصور في حي الموردة..
ما عليكـ يا ولد أبا يد الله مع الجماعة.. خليكـ قريب وما تفارقنا يا ابن العم.. وكان مابينا .. وقاطع صلة رحمكـ من آدم معانا.. آهه كمان بنجيكـ كان تسُف الرمالا ولا تشيل ليكـ جقمة موية باردة من مشيش وادي نيالا.. وبنزوركـ في جبل العوينات (المحاميد) كان الله أحيانا..
باهي.. السودان ده كلوا قرايب بعض.. الما يلمكـ معاهو نسب يلمكـ معاهو الدرب..
Post: #91 Title: Re: أنا الآن في دارفور في نيالا Author: Elsanosi Badr Date: 06-04-2008, 12:44 PM Parent: #87
يا عبدالرازق قلت لي منو...ناس ابوصفيطه...شخصيا... العرب الفزان ناس سبها طيب ديل ناس نسايبنا بخشم الباب عديل كده.... ابرزقه ماتفور دمي...والله انا جني وجن شفت الناس لامن تجي تقول ليك انا مشيت نيالا وكنت في كفي قنجا...واتصورت هناك...هو نيالا دي بره السودان...طيب ما يضيفوها في المقرر الدراسي... بعدين تعال هنا يابرزقه انت ماعندك صور ماتنزلة هنا بدل اي واحد يجي يقول ليك انا شكلي مختلف وانا خايف...وانا متصور مع ناس فلان الفلتكاني... هو الكلام عن نيالا حاضرتكم دي ما يحلو الا لامن يجي من زول (شكله مختلف)... ياخي الصور دي ممكن تتشرط زي الماحصل حاجه في اقرب مخاصمه من اي زول من دارفور... وتطال الشتيمه والتقريع لاي زول جاي من كوستي وانت ماشي... عبدالرازق...ياخي حصل مرة شفت العوينات (جبل المحاميد)...ياخي تعال لينا هناك مصر قريبه وليبيا كمان ومويه تكفي 300سنه عايزين اساتذه لكين اوعا تقول شكلي مختلف.. . بخسرك... باهي..
Quote: وبنزوركـ في جبل العوينات (المحاميد) كان الله أحيانا..
طبعا انت عارف براك عربان البوادي ما حيقصرو معاك كان جيت هناك بنذبح (بنضبح) ليك ناقة وقعود ونصورك جمبهم...عشان تدرس لينا اولادنا لاننا ناوين نفتح جامعه هناك (بشكل مختلف)...عن الجامعات السودانيه.
Post: #88 Title: Re: أنا الآن في دارفور في نيالا Author: A.Razek Althalib Date: 06-04-2008, 11:39 AM Parent: #86
Quote: هويدا عبرك احيى الاخ عبدالرازق
شكراً (سمارة).. على أهازيج الروح الجميلة..
بخصوص الأكاديمية.. خيرها في غيرها..
سمحة العافية والطلة البهية..
Post: #89 Title: Re: أنا الآن في دارفور في نيالا Author: هويدا شرف الدين Date: 06-04-2008, 11:42 AM Parent: #88
عبد الرازق الطيب
مشكور علي المرور الجميل
تخريمة: عاجاني صورتك الخاتيها دي عندي وحدة عاوزه اختها تحت اسمي ذيك كدي ممكن توريني الطريقة قدر ما حاولت ما قدرت
Post: #90 Title: Re: أنا الآن في دارفور في نيالا Author: A.Razek Althalib Date: 06-04-2008, 12:40 PM Parent: #89
Quote: عاجاني صورتك الخاتيها دي عندي وحدة عاوزه اختها تحت اسمي ذيك كدي ممكن توريني الطريقة قدر ما حاولت ما قدرت
وفي موجز سريع: لتحميل أي صورة ورفعها إلى المنتدي.. يشترط وجود جهاز إسكنر [ماسح ضوئي].. يتم تحميل الصورة بواسطة جهاز الإسكنر ثم حفظها في جهاز الكمبيوتر بإمتداد JPG.. ثم يتم رفع الصورة بتحميلها إلى أي مشغل مثلاً: أضغطي بالماوس هنا موقع تحميل الصور أنسخي رابط الصورة Copy
وبعدين أمشي لزر ملف أعلى يسار المنتدى.. وبالضغط على زر ملف: بتلقي خانات كتيرة من ضمنها خانة مكتوب عليها:
Quote: صورتى: Select an Image
أعملي لصق Paste في الخانة البيضاء فيهو.. بعدين أضغطي على زر change profile للحفظ..
وحتى ذلكـ الموعد..
نتمني لكـ التوفيق..
Post: #92 Title: Re: أنا الآن في دارفور في نيالا Author: A.Razek Althalib Date: 06-04-2008, 01:24 PM Parent: #90
Quote: ابرزقه ماتفور دمي...
بالحالة ما جيتكـ بدرب شناقيط موريتانيا.. زي ناس المرحوم علي موالي في مليط..
وناس عمر والطالب [الشنقيطي].. تعرف يا بدر.. من ما أذكره.. مرة جا واحد شنقيطي شايل شنطة سفر هاندباكـ.. مبتعث للدراسة بمدرسة نيالا الفنية.. عرفنا باسمو وقال لينا وين بيت ناس إبراهيم مكين [المسيري].. سوقناهو توش.. وبقى صاحبنا في دافوري الحلة.. فكفكـ رجلين الشباب من شدة اللعب العنيف..
المهم مرة قعد يتونس مع جدتي للوالدة المسيراوية.. قام طلعها قريبتو.. من باب البيسأل ما بيتوه..
هسعي بقى سوداني أصلي مني كمان..
ده غير أهلنا في تشاد وأفريقيا الوسطى ودار السلام..
ودي حكاية تانية كمان..
نشوفكـ يوم باكر يا بدر..
Post: #93 Title: Re: أنا الآن في دارفور في نيالا Author: Al-Sadig Yahya Abdall Date: 06-04-2008, 01:30 PM Parent: #90
Quote: الولاية
البنوك
حولين سنماء نيالا
السوق الجنوبى
المطار
جامعة نيالا
المسرح ومركز الشباب
مساء الخير ادم،،، ليه الحتات دي بالذات؟؟؟ فيهاايه لو الصور كانت تلقائية و معبرة عن كل نيالا البحير شكلا و مضمونا؟؟
Post: #94 Title: Re: أنا الآن في دارفور في نيالا Author: Al-Sadig Yahya Abdall Date: 06-04-2008, 02:29 PM Parent: #93
Quote: بعدين تعال هنا يابرزقه انت ماعندك صور ماتنزلة هنا بدل اي واحد يجي يقول ليك انا شكلي مختلف وانا خايف...وانا متصور مع ناس فلان الفلتكاني... هو الكلام عن نيالا حاضرتكم دي ما يحلو الا لامن يجي من زول (شكله مختلف)... ياخي الصور دي ممكن تتشرط زي الماحصل حاجه في اقرب مخاصمه من اي زول من دارفور
العزيز السنوسي مساء الخير (حسب التوقيت عندنا في صحراء نجد) مع احترامنا لرأيك الوارد اعلاه، ان ماتقوم به الاخت هويدا هو مجهود يجد منا التشجيع. يكفي انها تخلصت من تفكير تربت عليه عن الاخر وهو هنا دارفور و انسانها،،،و اكيد ستشجع اخرين للتفكير بشكل اكتر ايجابية. لعلك تتفق معي بانا لا نستطيع ان نغير فكر الاخرين عنا لمجرد رغبتنا في ذلك. و من المؤكد ان اللوم يقع على تربيتنا الوطنية التي لم تعكس وجه السودان بشكل يعرف بكل اقاليمه. و على افتراض ان المنهج الدراسي سابقا كان يحتوي على مادةالتربية الوطنية، فان جل تلك التربية كان يمجد ( ثورة مايو الظافرة) و عليه فشلت في تغيير الواقع السياسي و الاجتماعي الذي خلفته الدولة المهدية و بخاصة بين اهل غرب السودان و اهل الوسط و الشمال النيلي. و دمت
Post: #95 Title: Re: أنا الآن في دارفور في نيالا Author: ادم الهلباوى Date: 06-04-2008, 03:47 PM Parent: #94
الحبيب الغالى / الصادق .. تحياتى واحترامى
Quote: مساء الخير ادم،،،
ليه الحتات دي بالذات؟؟؟ فيهاايه لو الصور كانت تلقائية و معبرة عن كل نيالا البحير شكلا و مضمونا؟؟
مساك الله بالنور والسرور ومشتاقين كتير ما قلت بتزورنى وعملت نايم ليه كده بس .. كده بس ؟
كده أول خلى أختنا الغالية ( هويدا ) تجيب الصور بعدين أفيدك ليه الحتات دى بالذات ؟؟؟
أشكرك لذكاءك وتلميحك لانى بحب دائما الناس البجيبوها من الآخر ويفهموها وهى طايرة !!
Post: #96 Title: Re: أنا الآن في دارفور في نيالا Author: Elsanosi Badr Date: 06-04-2008, 03:56 PM Parent: #94
الاخ الصادق لك الود والاحترام..
Quote: و اكيد ستشجع اخرين للتفكير بشكل اكتر ايجابية. لعلك تتفق معي بانا لا نستطيع ان نغير فكر الاخرين عنا لمجرد رغبتنا في ذلك.
اخي الانسان في دارفور ولاغيره في البلاد غير مطلوب منو يغير نمط حياته وتفكيره عشان الاخرين يقبلوه... فا الدارفوريين ليست لهم عادات ضاره يجب عليهم الاقلاع عنها حتي يتم استيعا بهم في المجتمع...السيده هويدا بتقول انها شكلها مختلف من الغرابه والماعارفو انا انو شكلها بيختلف في شنو..وسالناها وقالت مختلف ومصره...وجات تاني قالت انو الزواج برضو بيقبلو اهل البت كيفن وهو من الغرب..ويعني حاجات (تطمم البطن)...يعني هو الزواج منهم يعني من الحور العين!!!...ياخي خليهم يلفو كده ولا كده هو نحنا فاضين ليهم ولا بناتنا هينات...ده من ناحيه.. النقطه التانيه..هو نيالا دي بقت حيفا يعني برة البلد عشان يجي واحد او واحده شكلها مختلف تكتب عنها...نيالا دي يالصادق جوه البلداللي اسمها السودان فيها كل الوان الطيف يعني ما بتستحمل زول يقول انا شكلي مختلف ... خواجات يعني مافي خواجات... عرب ما يهو العرب العاربه والمستعربه ولا زنوج ما كلهم موجودين هناك...نيالا دي اي زول كتب فيها مذكرات وقام لف وفات منها وانا متاكد انو مليون واحد هنا عندو صور لنيالا وممكن ينزلها... افرض يالصادق انو سيده هويدا دي كتبت وجابت صور ما في كم واحد قبلها مشي وكتب... هل اتغيرت الذهنيه ما ياهو فرانكلي الرجل الديني المتزمت سقط في اول امحان وقال (اقتلوهم) وامامك القلب النابض كتبت ولسه بتكتب الكلمات الموغله في العنصريه تجاه شعوب دارفور مثل كمة (مرتزقه) واهو لسه قايلالك اناكنت في نيالا وقرنتها ليك بمنواشي...الموضوع اكبر مما تتخيل... واوسع من تكتب عنه زوله قالت خايفه وشكلها مختلف... يالصادق اخوي... ياخي خليهم اكتبوا في خرطومهم دي انو في ناس بقبضو فيهم وبلبعو فيهم قدام اطفالهم ونساءهم عشان لونهم مختلف خليهم يكتبوا ويشربوا مويه ساقطه وبدون ما يكونوا خايفين يعملوا ليهم (عرق) ولا (كادوك) وليهم اجر المناوله...ولامن نحنا نكتب عن حق الانسان في العيش الكر يم يجوا ناس (الملجه) ويقولو ليك البلد عقدها بينفرط والكتابه الزيدي بتبهل السبحة...هو فضل فيها سبح ما منفرطه...حرب في ابيي وحرب في امدرمان واخري في رحم الغيب لا ندري في اي بقعه تستعر...طيب انت ما سالت نفسك ليه ماكتبت عن الحرائق التي طالت حتي اقتصادالاسر المنتجه من ماكينات خياطه وخلافه...فالمضوع هي ليست زيارة هويدا ومغامرات لوسه ونوسه وتختح او الشياطين التلطاشر فيها عثمان وواحده شكلها (مختلف) عن عثمان.ا
Post: #97 Title: Re: أنا الآن في دارفور في نيالا Author: Al-Sadig Yahya Abdall Date: 06-04-2008, 07:40 PM Parent: #96
Quote: مساك الله بالنور والسرور ومشتاقين كتير ما قلت بتزورنى وعملت نايم ليه كده بس .. كده بس ؟
الاخ الهلباوي مساء الخير مرة تانية،،، طبعا اخوك جديد في البلد و في رياضكمدي ما بعرف غير تلات او اربع حتات بمشيها سايق: جامعة الملك سعود و السفارات و البطحا و المطار،،، اي شي غير دا بروح فيها و ما اظن تلقوني بفتاشة. ابن عمي موسى خليل يعرفك و وعد باخذي لكم في اول نزول للرياض،،، تشكر على المجهود الجبار في التعريف بنيالا و لنا لقاء
Post: #98 Title: Re: أنا الآن في دارفور في نيالا Author: Al-Sadig Yahya Abdall Date: 06-04-2008, 07:52 PM Parent: #97
Quote: اخي الانسان في دارفور ولاغيره في البلاد غير مطلوب منو يغير نمط حياته وتفكيره عشان الاخرين يقبلوه
العزيز السنوسي،،، لك التحية،،، اتفهم حجتك دفاعا عن انسان دارفور و اتفق معك بانا غير مطلوب منا تغيير نمط حياتناحتى يقبلنا الاخرون،،، و اكيد لا يهم انسان دارفور ان قبله الاخرون ام لا،،، تشكر على تكبد مشقة القراءة و الردعلى النقاط التي اوردت،، دمت مدافعا عن دارفور و ابناء دارفور
Post: #99 Title: Re: أنا الآن في دارفور في نيالا Author: Abdulgadir Dongos Date: 06-04-2008, 08:47 PM Parent: #98
+
Quote: ما عارف بالضبط البجرى ده لزومو ايه والكراهية دى من شنو أرجوك جاوبنى !!
أستاذ آدم الهلباوي، تحية طيبة. الذي لمسته من سؤالك الأستنكاري، هو أنك تيقن أن عبدالقادر دنقس يحمل كراهية ويجود بها علي الآخرين. بل ويلاحق الآخرين ليخرب كتاباتهم عن "الحب والجمال". أصدقك القول راجعت كتابي كلمة كلمة لم أجد ما وصفتني به، لذا سألتك. الذي أرجوه منك هو أن لا تجمعني بفلان أو علان بهذا المنبر، وما أكتبه هنا يمثل عبدالقادر دنقس فحسب. لأحترامي لرؤاك تراني لم أعلق علي الؤآم الدائر بينك وصاحبة البوست. مآخذي علي صاحبة البوست هو نتاج فكرها وفكر الذين أوصوها لتحذر الغرابة، لذا طرحت ذاك السؤال.
دنقس.
Post: #100 Title: Re: أنا الآن في دارفور في نيالا Author: Abdulgadir Dongos Date: 06-04-2008, 08:54 PM Parent: #99
+
وما زالت أسئلتي تتجمع في المخيلة. أمثال الأخت هويدا صقعوا آذاننا بأنهم: "قوميون يحسون هذا السودان العظيم من حلفا لي نمولي ومن بورتسودان الي الجنينة"
"أسمع كلامك أصدقك، أشوف عمايلك أستغرب"
دنقس.
Post: #102 Title: Re: أنا الآن في دارفور في نيالا Author: ادم الهلباوى Date: 06-05-2008, 09:22 AM Parent: #100
أخى الكريم المحترم / عبدالقادر دنقس ... تحياتى
Quote: أستاذ آدم الهلباوي، تحية طيبة. الذي لمسته من سؤالك الأستنكاري، هو أنك تيقن أن عبدالقادر دنقس يحمل كراهية ويجود بها علي الآخرين. بل ويلاحق الآخرين ليخرب كتاباتهم عن "الحب والجمال". أصدقك القول راجعت كتابي كلمة كلمة لم أجد ما وصفتني به، لذا سألتك. الذي أرجوه منك هو أن لا تجمعني بفلان أو علان بهذا المنبر، وما أكتبه هنا يمثل عبدالقادر دنقس فحسب. لأحترامي لرؤاك تراني لم أعلق علي الؤآم الدائر بينك وصاحبة البوست. مآخذي علي صاحبة البوست هو نتاج فكرها وفكر الذين أوصوها لتحذر الغرابة، لذا طرحت ذاك السؤال.
أشكرك أخى الحبيب وأؤكد لك لم أتهمك أو أنعتك بتلك الصفة الذميمة
ولا أظنك تختلف معى فى أن هذا البورد مع مشكلة دارفور تحول إلى مسرح
للمآسى بين أبناء الوطن الواحد بعيدا عن تلك العلائق الحميدة والتربية
الكريمة المبنية على الاحترام المتبادل بين كافة السودانيين وبمختلف مشاربهم
ونحن نتوق لأن يرجع الكل لصوت الحكمة والعقل حتى نرجع إلى سيرتنا الأولى وأنا
أراك فى هذا البورد من النشطين ومن أصحاب الرؤى التى يمكن توجه توجيها سليما
أو يمكن أن توجه توجهيا آخر وأنا لرجل بمثل وضعك أتمنى أن التوجيه السليم ترانى
فى هذا البورد دائما وابدا أبعد نفسى من الفتن والمهاترات التى يغوص فيها البعض
لا لأننى أخشى أحدا ولكن إحتراما للقارئ وإحتراما لمشاعر الآخرين كثيرين هنا يتهاترون
فيما بينهم لكن حقيقة يسئيون لأهلهم وذوويهم وللسودان العظيم فى الوقت الذى فيه هنالك
أبرياء لا ناقة ولا جمل فى الذى يجرى ولكن يتضررون كثيرا دون ذنب ويساؤون ويصيبهم منه الرشاش
تعرف أهلنا البقارة عندهم مثل( هونها وتهون ) و(كلام الناس همله لا تكمله ) ومع كل هذا وذاك
عندهم مثل قوى ( جرح سلاح ولا جرح الكلام ) لأن جرح السلاح يتعافى لكن جرح الكلام يبقى أثره
بليغاولربما أدى إلى التهلكة .. عموما أخى الكريم كلامى للمصلحة العامة ولم أفصد أتهمك بشئ
وإذا ترأى لك ذلك ( معليش ) وحقك علينا مع تحياتى وفائق إحترامى.....
Post: #101 Title: Re: أنا الآن في دارفور في نيالا Author: ياسر احمد محمود Date: 06-04-2008, 09:21 PM Parent: #96
Quote: اخي الانسان في دارفور ولاغيره في البلاد غير مطلوب منو يغير نمط حياته وتفكيره عشان الاخرين يقبلوه... فا الدارفوريين ليست لهم عادات ضاره يجب عليهم الاقلاع عنها حتي يتم استيعا بهم في المجتمع...السيده هويدا بتقول انها شكلها مختلف من الغرابه والماعارفو انا انو شكلها بيختلف في شنو..وسالناها وقالت مختلف ومصره...وجات تاني قالت انو الزواج برضو بيقبلو اهل البت كيفن وهو من الغرب..ويعني حاجات (تطمم البطن)...يعني هو الزواج منهم يعني من الحور العين!!!...ياخي خليهم يلفو كده ولا كده هو نحنا فاضين ليهم ولا بناتنا هينات...ده من ناحيه.. النقطه التانيه..هو نيالا دي بقت حيفا يعني برة البلد عشان يجي واحد او واحده شكلها مختلف تكتب عنها...نيالا دي يالصادق جوه البلداللي اسمها السودان فيها كل الوان الطيف يعني ما بتستحمل زول يقول انا شكلي مختلف ... خواجات يعني مافي خواجات... عرب ما يهو العرب العاربه والمستعربه ولا زنوج ما كلهم موجودين هناك...نيالا دي اي زول كتب فيها مذكرات وقام لف وفات منها وانا متاكد انو مليون واحد هنا عندو صور لنيالا وممكن ينزلها... افرض يالصادق انو سيده هويدا دي كتبت وجابت صور ما في كم واحد قبلها مشي وكتب... هل اتغيرت الذهنيه ما ياهو فرانكلي الرجل الديني المتزمت سقط في اول امحان وقال (اقتلوهم) وامامك القلب النابض كتبت ولسه بتكتب الكلمات الموغله في العنصريه تجاه شعوب دارفور مثل كمة (مرتزقه) واهو لسه قايلالك اناكنت في نيالا وقرنتها ليك بمنواشي...الموضوع اكبر مما تتخيل... واوسع من تكتب عنه زوله قالت خايفه وشكلها مختلف... يالصادق اخوي... ياخي خليهم اكتبوا في خرطومهم دي انو في ناس بقبضو فيهم وبلبعو فيهم قدام اطفالهم ونساءهم عشان لونهم مختلف خليهم يكتبوا ويشربوا مويه ساقطه وبدون ما يكونوا خايفين يعملوا ليهم (عرق) ولا (كادوك) وليهم اجر المناوله...ولامن نحنا نكتب عن حق الانسان في العيش الكر يم يجوا ناس (الملجه) ويقولو ليك البلد عقدها بينفرط والكتابه الزيدي بتبهل السبحة...هو فضل فيها سبح ما منفرطه...حرب في ابيي وحرب في امدرمان واخري في رحم الغيب لا ندري في اي بقعه تستعر...طيب انت ما سالت نفسك ليه ماكتبت عن الحرائق التي طالت حتي اقتصادالاسر المنتجه من ماكينات خياطه وخلافه...فالمضوع هي ليست زيارة هويدا ومغامرات لوسه ونوسه وتختح او الشياطين التلطاشر فيها عثمان وواحده شكلها (مختلف) عن عثمان
Dear Elsanosi Badr you hit the nail on the head.I will be back when I find a computer with Arabic keyboard
Post: #103 Title: Re: أنا الآن في دارفور في نيالا Author: Abdulgadir Dongos Date: 06-06-2008, 03:47 AM Parent: #101
+
الأخ أستاذ آدم الهلباوي، تحية طيبة. لا عليك يا صديق، كلنا نخطأ. الشيئ الذي دعاني لأكتب بهذا البوست هو ما كتبته أستاذه هويدا عن الوصايا التي أوصاها أياها البعض من أهل دار صباح. تحدثت الأخت وكأنها تزور بلاد أخري، نعلم أن الكثير منا لم تتاح لنا الفرص لنزور أغلب أمصار بلادنا المترامية الأطراف، لكن يا أخي زاملنا وجاورنا الغالبية من قاطني هذا السودان العظيم. لم ولن يطاوعني لساني أن أتجرأ وأقول ما قالته الكاتبة وأنا أؤمن بالأنتماء القاري الذي نتداوله عندما نركب ماكينة السياسة. الذي آلمني هو أن أستاذه هويدا أعادت تقييم بشر يشاركونها المواطنة بهذا السودان، لم تفيق منها الا بعدما أتت بها المصالح. لا أدري تقييمك لهذه الفكرة، لكن شخصيا لا أثق البتة في من تكون له أو لها فكرة مسبقة ظالمة لمجموعة من الناس ثم بعد مزاولة الواقع تصدر التصاريح. حقا أهل نيالا أو دارفور يكفيهم فخرا أنهم يوقنون قدر أنفسهم والسماحة الأنسانية التي كبدتهم مشاق جما في هذه الحياة. ما قصدت قوله سيدي هو، بغض النظر عن الأنتماء الجغرافي أو الوطني الأنسان يتوسم الخير في الآخرين حتي وان أتانا الهمس بأنهم شرا مستطر. الشر ليس مطلقا، والخير أيضا ليس مطلقا. فكتابة هويدا لا تهب لأهل دارفور شهادة البرأة ولا همس الذين أملوا عليها لتأخذ الحذر سيجرم نيالا وأهلها. دون شك أشاركك الهم الوطني وما آل اليه الحال، لكن يا صديقي أختلف معك في حديثك بأن هداوة الأحوال بمنبر سودانيز أو لاين سيهدئ من آلامنا واحننا. ما تراه هو عين الواقع بسوداننا المكلوم، الناس هنا تعبر أصدق التعابير دون مجاملات اجتماعية تظلم الضعيف وتنصر الظالم. نعم لم نسمع أو نقرأ كما الذي نطالعه هذه الأيام، لكن لا بد وأن نواكب التغيير الذي أصبح واقعا أمامنا.
دنقس.
Post: #104 Title: Re: أنا الآن في دارفور في نيالا Author: هويدا شرف الدين Date: 06-06-2008, 02:54 PM Parent: #1
يا جماعة الخير مشغولة شوية لكن بجيكم راجعة
Post: #105 Title: Re: أنا الآن في دارفور في نيالا Author: A.Razek Althalib Date: 06-07-2008, 12:32 PM Parent: #104
Quote: أنك تيقن أن عبدالقادر دنقس يحمل كراهية ويجود بها علي الآخرين. بل ويلاحق الآخرين ليخرب كتاباتهم عن "الحب والجمال". أصدقك القول راجعت كتابي كلمة كلمة لم أجد ما وصفتني به،
بدون شكـ.. بدليل كذبكـ في الرابط أعلاه..
الجمل ما بيشوف عوجة رقبتو..
نقوقلكـ يعني..
Post: #106 Title: Re: أنا الآن في دارفور في نيالا Author: A.Razek Althalib Date: 06-08-2008, 07:07 AM Parent: #105
Quote: you hit the nail on the head.I will be back when I find a computer with Arabic keyboard
الأخ/ ياسر.. بعد الصداع الطويل ترى.. من المستفيد..؟
قدر لرجلكـ قبل الخطو موضعها.. ثم؛ إستصحب الحكمة القائلة..
الأمور تحسب بخواتيمها..
Post: #107 Title: Re: أنا الآن في دارفور في نيالا Author: ادم الهلباوى Date: 06-08-2008, 04:34 PM Parent: #106
يا/ ود الطالب إنت فى ده وله البنت دى وين أوع تكون ....
والله بالجد أنا بقيت شفقان وخايف عليها يا ربى تكون البنت هبشت المحظور وله شنو !!
كده ياخى خلى الفى إيدك ده وقوم معاى نشوفها وين ؟ بصراحة هبشت موضوع حساس وده طبعا
ما بعجب الكثيرين نتمنى ما يكون فيها مسنجر والذى منو وإنت سيد العارفين ........؟
بعدين خلى بالك يا ود الطالب البنت دى بقت منا وفينا لابد من مراعاتها وتوفير الحمية لها !!
Post: #108 Title: Re: أنا الآن في دارفور في نيالا Author: ياسر احمد محمود Date: 06-08-2008, 05:54 PM Parent: #107
عبد الرازق: سلام.
Quote: الأخ/ ياسر.. بعد الصداع الطويل ترى.. من المستفيد..؟
