Post: #1
Title: الفيفا يلغي لقاء السودان وتشاد بتصفيات المونديال
Author: Deng
Date: 05-29-2008, 06:37 PM
http://www.aljazeerasport.net/NR/exeres/FF858D39-5690-4...C5B-605F2A4F8206.htm
قرر الاتحاد الدولي لكرة القدم "فيفا" الخميس، خلال اجتماعاته المنعقدة في مدينة سيدني الأسترالية، إلغاء مباراة منتخبي السودان وتشاد التي كان مقرراً لعبها يوم السبت القادم في افتتاح المرحلة الثالثة من التصفيات الأفريقية المؤهلة لكأس العالم 2010 بجنوب أفريقيا.
وأوضح مسؤول بالفيفا أن القرار جاء بناء على قطع العلاقات الدبلوماسية بين البلدين، وهو ما أدى إلى إلغاء المباراة وإحالة النظر فيها للجنة المنظمة لكأس العالم كي تتخذ قراراً نهائياً بشأن ظروف إقامتها.
وكانت السودان قررت في 14 أيار/مايو الجاري إغلاق الحدود مع تشاد بعد قيام عدد من المتمردين المشتبه في حصولهم على دعم تشادي بأعمال شغب في العاصمة السودانية الخرطوم.
وتلعب السودان وتشاد في التصفيات ضمن المجموعة العاشرة بجوار منتخبي مالي والكونغو.
|
Post: #2
Title: Re: الفيفا يلغي لقاء السودان وتشاد بتصفيات المونديال
Author: khaleel
Date: 05-29-2008, 06:42 PM
Parent: #1
| Quote: قرر الاتحاد الدولي لكرة القدم "فيفا" الخميس، خلال اجتماعاته المنعقدة في مدينة سيدني الأسترالية، إلغاء مباراة منتخبي السودان وتشاد التي كان مقرراً لعبها يوم السبت القادم في افتتاح المرحلة الثالثة من التصفيات الأفريقية المؤهلة لكأس العالم 2010 بجنوب أفريقيا |
السودان هو المتضرر
لانها ستة نقاط مضمونة
|
Post: #6
Title: Re: الفيفا يلغي لقاء السودان وتشاد بتصفيات المونديال
Author: محمد نور أحمد
Date: 05-31-2008, 03:26 AM
Parent: #2
Quote: السودان هو المتضرر
لانها ستة نقاط مضمونة |
القال ليك كدا منو يا خلي؟
----------
والله إلا كان تغيروا بتاع سنار داك بواحد من مايرنو
|
Post: #3
Title: Re: الفيفا يلغي لقاء السودان وتشاد بتصفيات المونديال
Author: Tragie Mustafa
Date: 05-29-2008, 06:43 PM
Parent: #1
خليهم يشبعوا باختراق الاعراف الدبلوماسيه وقلة الادب في سفارات الناس.
ما الخرطوم ونظامها دخلوا جوا انجمينا
ما سمعنا تشادي مشى اعتدى على سفارتهم بعدها
لكن حرقة الناس الخرق....والمهزومين خلتهم يشموا يبعثوا بالسفارة التشاديه
هم كان رجال ما ن يهبشوا البعثة الدبلوماسيه
مش فلاحتهم في التربيزات و الكمبيوترات.
|
Post: #4
Title: Re: الفيفا يلغي لقاء السودان وتشاد بتصفيات المونديال
Author: ابراهيم بقال سراج
Date: 05-29-2008, 06:50 PM
Parent: #3
بعدما حصل لسفارة تشاد بالخرطوم من تفتيش والاستيلاء علي المستندات الرسمية
وختم السفارة من قبل حكومة الخرطوم وتصوير ما سرقوه ونهبوه من السفارة
علي اساس انها مستندات قبضت في احداث امدرمان
ليس ضرورياً مشاركة المنتخب التشادي مباراة في الخرطوم
قطع جاف في كل شي
اقتصادياً
سياسياً
رياضياً
دبلوماسياً
نعم لازم يكون قطع جاف
|
Post: #5
Title: Re: الفيفا يلغي لقاء السودان وتشاد بتصفيات المونديال
Author: محمد نور أحمد
Date: 05-29-2008, 06:59 PM
Parent: #3
Quote: ما الخرطوم ونظامها دخلوا جوا انجمينا
ما سمعنا تشادي مشى اعتدى على سفارتهم بعدها |
لا مع الأسف حصل يا تراجي..
ناس من العدل والمساواه ومحسوبين على الجيش التشادي من لبسهم وسياراتهم الأربعة اقتحموا سفارة السودان بأنجمينا وأساؤوا أفرد البعثة بألفاظ نابية وتصرفات مهينة..
المجموعة المقتحمة للسفارة من ناس العدل والمساواه بعرف أفراد منهم معرفة شخصية وبعرف تبعيتهم للجيش التشادي في نفس الوقت الهم جنود في العدل والمساواه..
المعلومات دي ما فبركة مني لأني وقتها كنت في أنجمينا وكنت قريب جدا من الأحداث والحدث دا بالتحديد..
غير كدا بعرف الدبلوماسيين المعتدى عليهم .. فبهم صديق عزيز وزميل دراسة..
وبعرف المسئولين التشاديين السيطروا على الموقف بإجتهادات شحصية و واحد منهم زول بيقرب لي..
طبعا دا ما معناه إني مؤيد الحركة البايخة العملوها ناس الأمن في السفارة التشادية في الخرطوم..
----------
سلام يا دينق
|
Post: #7
Title: Re: الفيفا يلغي لقاء السودان وتشاد بتصفيات المونديال
Author: Tragie Mustafa
Date: 05-31-2008, 03:42 AM
Parent: #5
محمد نور
للاسف لن تكف عن لخبطة الكيمان.
اولا قصتك التي رويتها حصلت ولكنها حصلت بلا اجتياح وربما من حوالي ثلاث سنوات
صحيح ام لا؟؟؟
Quote:
لا مع الأسف حصل يا تراجي..
ناس من العدل والمساواه ومحسوبين على الجيش التشادي من لبسهم وسياراتهم الأربعة اقتحموا سفارة السودان بأنجمينا وأساؤوا أفرد البعثة بألفاظ نابية وتصرفات مهينة..
المجموعة المقتحمة للسفارة من ناس العدل والمساواه بعرف أفراد منهم معرفة شخصية وبعرف تبعيتهم للجيش التشادي في نفس الوقت الهم جنود في العدل والمساواه..
المعلومات دي ما فبركة مني لأني وقتها كنت في أنجمينا وكنت قريب جدا من الأحداث والحدث دا بالتحديد..
غير كدا بعرف الدبلوماسيين المعتدى عليهم .. فبهم صديق عزيز وزميل دراسة..
وبعرف المسئولين التشاديين السيطروا على الموقف بإجتهادات شحصية و واحد منهم زول بيقرب لي..
طبعا دا ما معناه إني مؤيد الحركة البايخة العملوها ناس الأمن في السفارة التشادية في الخرطوم..
----------
سلام يا دينق |
وتابعنا ومن خلال هذا المنبر كل الاخبار ورجعت الحكومة التشاديه واستلمت السفارة واعادتها للحكومة السودانيه
حصل وله لا؟؟؟؟
انا اتحدث في ظل الاجتياحين الآخيرين.
قوات الحكومة السودانيه الداعمة للمعارضة التشاديه
اجتاحت انجمينا وبرطعت فيها يومين...وخربت ودمرت الكثير.
وهزمت وطردت...كان طبيعي ان يتجه ادري دبي الغاضب بنفسه ويشوت كل السودانين الفي السفارة
انا لو في محلة بالجزمة..لانهم هم من نسق لكل العلمية,لكنه لم يفعل ولم يعلن قطع العلاقات
ولا اشتغل بيهم الشغلة,آمن بلاده ولبد لهم.
هم البخليهم حسه,وزي ما قالوا دي غزوة( ونسة) كده وهزموهم في ال 20 دقيقية الاولى
رغم انه معلوماتنا بتقول في مذيعات ظلوا محبوسات ثلاثه ايام في الازاعة السودانيه
ولما رجعوا حلفوا لاهلهم انهم ظلوا يسمعون اصوات القصف ثلاث ايام متتاليه!!
اها ناسنا الكذابين ديل.....مالهم فشوا غضبهم في كمبيوترات السفارة الغلبانه
وتربيزاتها المسكينه ياهو حال الغلبته مرته قام ادب حماته!!
محمد نور يا اخوي
بحالتك دي الشافك تشجع الفريق السوداني ضد الفريق التشادي ما كذب.
|
Post: #8
Title: Re: الفيفا يلغي لقاء السودان وتشاد بتصفيات المونديال
Author: محمد نور أحمد
Date: 05-31-2008, 04:54 AM
Parent: #7
تراجي العزيزة..
Quote: اولا قصتك التي رويتها حصلت ولكنها حصلت بلا اجتياح وربما من حوالي ثلاث سنوات
صحيح ام لا؟؟؟ |
لا.. حصلت بإجتياح..
أولا هي ما قصة يا تراجي ..
الحصل دا حدث أرعن مشاتر أحمق أهوج لناس ما بيفهموا لا في السياسة ولا الدبلوماسية ولا الثورية..
الحدث دا كان واحدة من تبعات إجتياح المعارضة التشادية لأنجمينا بقيادة/ محمد نور عبدالكريم التاماوي في 13 أبريل 2006..
وبرضو صاحبك ديبي نفض منها بسنة .. زولك عنده فقرا ما ساهلين .. كل مرة المعارضة تدق في حيطة القصر الجمهوري وترجع من حيث أتت .. لكن بيني وبينك كان طلع منها المرة الجايا ياهو الكتبناها ليه خالدين فيها أبدا..
المهم في الموضوع .. ولأنه التاما أيضا كانوا وقتها مسنودين من قبل السودان.. صاحبك ديبي بعد شم نفسه في اليوم التالت للضربة أعلن قطع العلاقات مع السودان وطرد السفارة السودانية وقنصليتهاالفي أبشه وقفل ليك الحدود وختمها بالشمع الأحمر.. وطبعا عشان ما يخش في تعقيدات دبلوماسية دفر ليك ناسه بتاعين الحرس الجمهوري الجزء منهم في نفس الوقت عدل ومساواه لإقتحام السفارة وأخذ الدبلوماسيين الفيها كرهائن .. واعلنت العدل والمساواه مقر السفارة كمنطقة محتلة.. وزول صاحبنا هسع دي قاعد في جوبا فس ضيافة الحركة الشعبية قعد ليك في كرسي السفير الماخمج ورص قدامه طاقم السفارة وخطب فبهم خطبة عصماء .. مافي نبذ شبن في الدنيا ما قالوا ليهم..
طبعا كل مركبات السفارة وأجهزتها تم الإستيلاء عليها ..
Quote: وتابعنا ومن خلال هذا المنبر كل الاخبار ورجعت الحكومة التشاديه واستلمت السفارة واعادتها للحكومة السودانيه
حصل وله لا؟؟؟؟ |
دبلوماسيين تشاديين بتربطهم بالسودان أشياء كتيرة غير السياسة هم الإتدخلوا ونصحوا ديبي إنه البيسووا فيه أهله دا بيدخله في مشاكل مع المجتمع الدولي .. حتان انتبه صاحبنا للبيعمل فيه دا بجيب ليه مشاكل..
استلمت ليبيا سفارة السودان وقتها بعد أن غادر كل الرعايا السودانيين في اليوم الثالث من الأزمة بطائرة سودانية خاصة..
واهتم الليبيون بالمسائل الإدارية للسفارة السودانية حتى عودة العلاقات بعد الوساطة السعودية..
Quote: قوات الحكومة السودانيه الداعمة للمعارضة التشاديه
اجتاحت انجمينا وبرطعت فيها يومين...وخربت ودمرت الكثير. |
"هسع كان قلت ليك قوات النظام التشادي الداعمة لحركة العدل والمساواه اجتاحت أم درمان وبرطعت فيها يومين وخربت ودمرت .."
طبعا حتجي تكتبي معلقة في أنه مافي قوات تشادية إلى جانب العدل والمساواه في الذراع الطويل رغم أن الشواهد كتيرة..
Quote: اها ناسنا الكذابين ديل.....مالهم فشوا غضبهم في كمبيوترات السفارة الغلبانه
وتربيزاتها المسكينه ياهو حال الغلبته مرته قام ادب حماته!! |
السفارات طبعا يا تراجي زي ما انت عارفة مناطق ذات سيادة مستقلة غير تابعة للدولة المضيفة وبالتالي فإن مسألة إقتحامها مهما كان المبرر مرفوض بكل المقاييس والأعراف الدولية..
ناس الأمن السوداني اقتحموا السفارة التشادية بالخرطوم في مخالفة واضحة للأعراف الدبلوماسية واستولوا على بعض الكمبيوترين حيلتهم وبعض المستندات .. طبعا واضح جدا إنهم بيبحثوا عن معلومات في السفارة التشادية ..
عارفة ليه يا تراجي الكلام دا حصل؟ أقول ليك أنا ..
الكلام دا في الأعراف الدبلوماسية بيسموه بسياسة التعامل بالمثل ..
طردت زول من بعثة الدولة المضيوفة عندك تقوم الدولة الطردت زولها تطرد زول من بعثتك في نفس الدرجة الوظيغيه للزول المطرود..
رفضت تدي تأشيرة لمسئول يرفضوا يدوا تأشيرة لمسئول من دولتك..
سبق اقتحمت سفارة الناس تأكد لو جات الفرصة حيقتحموا سفارتك..
وغير كدا في سبب تاني وهو الأهم..
السفارة التشادية بالخرطوم فيها دبلوماسيين بيقضوا وقت في أمبده ودار السلام وسوق ليبيا أكتر مما يقضوه في مكاتبهم في السفارة وأولهم سعادة السفير..
في دبلوماسيين يا تراجي في سفارتنا في الخرطوم استلموا قرار تعيينهم وهم في أمبده.. شبر ما طلعوا منها..
تشاد دي بس قروها جغرافيا وتاريخ في مدارس أم درمان..
من أمبده وضواحي سوق ليبيا إلى مقر السفارة التشادية بالعمارات..
تفتكري الأمن السوداني ما بيكون خاتيهم تحت المراقبة وعارفهم بيسووا في شنو؟
أها وقت صلاح قوش وعياله الخلعة دخلتهم وبقوا بفتحوا خشوم البقر عشان يلقوا معلومة عن الذراع الطويل باقي ليك يخلوا ديل؟
أها دي كل القصة يا بت أمي.. حكاية ترابيز ومساطر وكراسات دي أنسيها .. القصة كانت معلومات .. معلومااااااااااااات ..
ونصيحة لوجه الله ما تسألي من المعلومات الإتلقت .. سمح؟
Quote: محمد نور يا اخوي
بحالتك دي الشافك تشجع الفريق السوداني ضد الفريق التشادي ما كذب. |
أنا عمري ما شجعت دولة تانية - حتى لو كان السودان الأفضاله علي- ضد دولتي حتى لو في الكورة المجرد تسلية دي..
لكن العجب إنتي والكاشف أخوك بقال الفوق دا.. ما سويتو البدعوا هنا تشجيعا لديبي..
أها حيجي جلابي ماكن أمه بت عم أبوه يجيب ليك بوستاتك البتغازلي فيها ديبي دي كلها..
شئ أخضر طويل كدا مجنني يا يمه كان شفتي
وشئ خداري يا ناس خداري .. خداري ومن العين بداري
وشئ : قالوا القليب حرق حرقوه بالنار حرق ياناس يا ود الغرب.
| Quote: للاسف لن تكف عن لخبطة الكيمان. |
العباره دي ما حأعلق عليها يا تراجي..
---------
البوست دا للكورة يا تراجي.. تعرفي كوره أكتبي .. ما تعرفي عليك الله امرقاكي من هنا نمش أي بوست تاني.
تعريف لزوم الأخطاء الإملائية
|
Post: #9
Title: Re: الفيفا يلغي لقاء السودان وتشاد بتصفيات المونديال
Author: محمد نور أحمد
Date: 05-31-2008, 05:51 PM
Parent: #8
لعناية تراجي..
-----------
سلامات دينق
|
Post: #10
Title: Re: الفيفا يلغي لقاء السودان وتشاد بتصفيات المونديال
Author: طلحة عبدالله
Date: 05-31-2008, 06:11 PM
Parent: #1
اعتقد أن الأمر تعليق وليس الغاء ..
لان الألغاء يعني إقصاء تشاد من المنافسات وشطبها بالتالي من الإتحاد الدولي لكرة القدم ..
المباراة علقت إلى أجل وفي حال التأكد من أن الأجواء الأمنية بالسودان غير صالحة لإقامة المباراة فأنه سيتم تحويل المباراة إلى ملعب محايد لتقام عليه مباراتي الذهاب والأياب ..
عموما في كل الأحوال فالخاسر هو المنتخب التشادي ولا شك ..
هو تشاد ذاتها فيها كورة ..؟
|
Post: #11
Title: Re: الفيفا يلغي لقاء السودان وتشاد بتصفيات المونديال
Author: malamih
Date: 05-31-2008, 06:43 PM
Parent: #10
أخونا العزيز محمد نور
مرحبا بعودتك الميمونة يا تشادي يا أصيل ..
ولأنك أصيل في شعورك تحب تشاد كما تحب السودان
يا بختك مين زيك الناس عندها بلد واحد بس لكن إنت صاحب بلدين
لكن في كرة القدم دي بعتقد السودان عنده عملية( الكراع الطويلة)
والمباراة تم تعليقها حاليا لحين إعادة جدولتها مرة أخرى..
إنشاء الله تتلعب ويصافح اللاعبين الجنرال محمد نوري ..
قول آمين..
|
Post: #12
Title: Re: الفيفا يلغي لقاء السودان وتشاد بتصفيات المونديال
Author: محمد نور أحمد
Date: 05-31-2008, 06:54 PM
Parent: #10
| Quote: هو تشاد ذاتها فيها كورة ..؟ |
أففوووو .. دا كلام شنو يا طلحة؟
والله بس ياها سوايت أبوسن يضحك على أبوسنين ذاتها. .
آااي المنتخب السوداني غلبنا كم مره كدا ما عارف..
ومنتخبنا المنتهي دا ما حصل جاب لينا أي كاسات محمولة جوا أو بحرا ..
لكن أولادنا لعابين والله ..
كان جين للجد .. أنو برضو مفكر في عنوان زي دا:
"كرة القدم في تشاد .. خمسون عاما من الفوضى المنظمة"
المصيبة إني ما بفهم في الكورة الواو من الواو الضكر..
المهم ..
كل الحصل يا طلحة أنا شفت إسم تشاد في عنوان دينق ودخلت البوست ..
لقيت الكومندان تراجي قالباها سياسة بمعلومات مغلوطة لحادثة أنا عايشت جزء منها..
قلت أصحح لتراجي معلوماتها والموضوع جر زي ما انت شايف والبوست بقى سياسة بقدرة قادر..
|
Post: #13
Title: Re: الفيفا يلغي لقاء السودان وتشاد بتصفيات المونديال
Author: Khalid Osman Jaafar
Date: 05-31-2008, 09:10 PM
Parent: #1
بغض النظر عن كل شئ، حبيت أحييك يا أخ محمّد نور علي قولك للحق مهما كان
ربنا يصلح الأمور ويريحنا من المشاكل في البلدين
|
|