هيثم مصطفي داعية إسلامي ،، وزيارة حنان ترك السرية للسودان ،،، وزيارة خليل إبراهيم للخرطوم

جاءت في صحف الخرطوم اليوم ثلاث أخبار أردت التعليق عليها :

ذكرت صحيفة حكايات في صفحتها الأولي وفي المانشيت الرئيسي ،،، إسلام مانديلا علي يد هيثم مصطفي في البداية كنت أظن أن الذي أسلم هو مانديلا سيد الإسم ،،، ولكن فجأة تذكرت لاعب الهلال الناشي جيمي مانديلا ،،، وتفاصيل الخبر تقول أن لاعب الهلال الناشئ جيمي مانديلا اسلم سيعلن إسلامه غداً بعد صلاة الجمعة ،،، وقد علمت حكايات أن كابتن الهلال والسودان مصطفي هو من أقنع اليافع جيمي بدخول الإسلام ،، مبدئياً لا مانع لدينا من إسلام أي إنسان حتي ولو أسلم كل لاعبي الهلال والمريخ والفرق الأخري فهذا من دواعي سرورنا ،،،، لأن ذلك يندرج تحت حرية الاديان ،،،، ومن حق أي إنسان أن يختار الدين الذي يلبي قناعاته الروحية ولكن تعليقنا علي طريقة نشر الخبر وفي الصفحة الأولي وبالمناشيت الكبير ،،، أليس ذلك فيه استفزاز لملايين المسيحيين في السودان ،،، وكـأنما أنتصر الإسلام علي المسيحية بدخول الشبل جيمي مانديلا للإسلام ،،، وهنالك العشرات الذين يدخلون الإسلام في السودان كل يوم ،،، لماذا لم ينشر إسلامهم في الصحف ،،، وهل يمكن أن تنشر الصحيفة دخول أحد المسلمين الإسلام ولو علي صفحة داخلية وبالبنط العريض ،،، وهل جيمي مانديلا لاعب أشبال الهلال دخل السن القانونية التي تخول له تغيير عقيدته ،،، وإذا رجع عن اختياره هذا ما هو رد فعل الصحيفة ،،، والقانون ،،،، وهل وهل وهل كثيرات

بالمناسبة ::
في مباراة الهلال وصن دوانز الأخيرة في الخرطوم وبعد الهدف الرابع للهلال رأيت نائب كابتن الهلال ريتشارد جاسنم يسجد سجدة الشكر علي نجيل استاد الهلال ،،، فهل أسلم هو الآخر علي يد الداعية هيثم مصطفي ولماذا لم يعلن إسلامه كالكابتن جيمي أم أراد أن يقلد لاعبي الهلال الآخرين الذين يقلدون لاعبي الفرق المصرية ،،، دون أن يعرف أن هذه الحركة ما هي إلا سجدة شجر يؤديها المسلمون ،،،،
والله ناس الكورة ديل عندهم حاجات تحير

الحكاية التانية :
ذكرت صحيفة الوطن بأن الفنانة المصرية وهي (ايضاً تحولت لداعية إسلامية) ،،، أقامت ندوة بعنوان حكايتي في واحدة من داخليات الطالبات ،،،، ولم يتم الاعلان عن هذه الندوة أو الليلة الدينية ،،، يعني ليلة دينية سرية وحسب التبرير حتي لا يحدث هرج ومرج من تدافع الناس لرؤية السيدة حنان ترك ،،،، لم أقرأ ايضاً أن الفنانة حنان ترك في زيارة للسودان لذلك افترضت أن الزيارة أيضاً سرية ،،، وما يحيرني في هذا الأمر ،،، شخصية الفنانات المحجبات ،،، ولا اقول التائبات فهذا أمر شخصي يهم أصحابه في النهاية ،،، ولكن مثل الفنانة حنان ترك والتي تنادي بالحجاب وتدعو إلي سبيل ربها ،،،، بالموعظة وتتكبد المشاق وتأتي لنا في هذا السودان الحار لتقول لبناتنا أن الحجاب أمر رباني ،،،،، فهذا ما يحيرني ،،، فهل الفنانات المحجبات يلتزمن بعدم مخالطة الرجال ،،، والمشاركة في اعمال فنية إسلامية فقط ،،، ليس فيها نساء غير محجبات ،،، وهل جاءت حنان ترك للسودان برفقة محرم ،،،،، وعشرات الأسئلة التي أتمني أن أطرحها عليها ،،،
بالمناسبة ::

حنان ترك فنانة صاحبة إمكانيات فنية عالية ،،، وخاصة دور سارة في المسلسل الذي يحمل نفس الأسم والذي أدت فيه دور الفتاة المعاقة بشكل أكثر من ممتاز ،،، فهل كان في هذا المسلسل ما يسئ للإسلام والقيم الإسلامية ...


اما الحكاية الثالثة ::

فهي حاكية السيد خليل إبراهيم وفي البداية أنا كنت زيكم كده قايلو خليل ابراهيم بتاع العدل والمسااوة ولكن طلع خليل ابراهيم العجيلي علي ما اعتقد وهو مستثمر قطري وصل الخرطوم وكل صحف الخرطوم دون إستثناء تناولت الزيارة ،،، وهو صاحب شركة الديار التي أشترت اراضي البابورات في بحري لتبني فيها عليها شقق ومتاجر كبيرة وغيرها ،،، وعرفت ان الشقة الواحدة حوالي 300.000 الف دولار عشان مطلة علي النيل ،،، وفي جلسة بيع واحدة تم شراء كل الوحدات الأطرحت للبيع ،،، ودا كان قبال كم شهر ،،، حتي في ناس ما لقوا شقق يشتروها ورجعوا بخفي حنين ،،، زعلانيين عاشان ما لقوا حاجة مطلة علي النيل ،،، عموماً زي ما قالوا الجماعة الاستثمار العربي جبان ،،، يعني الناس ديل ما شافوا الزراعة والصناعة والحاجات الممكن تفيد البلد ،،،، وتساهم في التنمية ،،،، ما هي الإضافة الحقيقية للاقتصاد السوداني من مثل هذا المشروع ،،، وإذا عرفنا أن الشركات التي ستنفذه شركات أجنبية وفي الغالب حا تجيب عمالة اجنبية والمشترين كلهم سودانيين ،،،، يعني قروشنا حا تطلع بره في عملية أسترداد المال ،،، وكمان إضافة ليها الأرباح ،،، كده كده خسرانيين ،،،
بالمناسبة :
عليكم الله دي ما غزوة زي غزوة خليل ابراهيم بتاعت يومداك

Quote: ذكرت صحيفة حكايات في صفحتها الأولي وفي المانشيت الرئيسي ،،، إسلام مانديلا علي يد هيثم مصطفي في البداية كنت أظن أن الذي أسلم هو مانديلا سيد الإسم ،،، ولكن فجأة تذكرت لاعب الهلال الناشي جيمي مانديلا ،،، وتفاصيل الخبر تقول أن لاعب الهلال الناشئ جيمي ما

زهير

هيثم مصطفي عندنا رمز زي الازهري والنيل

واي حاجة تطلع من هيثم دها حلوة

كدي شوف حب الناس دها للبرنس

ولدنا هيثم شاب معتدل في أفكاره وفي سلوكه وتعامله مع الناس
ونحن لانعرف خلفية الخبر هذا ولم نسمع أن كابتن الهلال يحاول أن يفرض معتقداته
علي زملائه المسيحيين سواء أن كانو وطنيين أو أجانب...
فربما جاء موضوع التعرف علي الاسلام بصورة عرضية أو بطلب من اللاعب الاخر.
........ياحبذا لو أبتعدت الصحف عن التناول الاثاري لمثل هذه الامور الحساسة
كمال

يا صديق
هيثم ده والله ما عندنا فيهو عاجبنا وساري بالنا ،،،
لكن بس ما يتحول لينا زي أبو تريكة ،،،، وبعد شوية يبقي مركب ليهو
مكنة داعية إسلامي ،،، ونبقي بعدين في الغلاط ،،،،

kamalabas

يا حبيب من خلال الخبر هيثم ما عنده مشكلة ،،،، لكن الطريقة الأنتشر بيها الخبر هي المشكلة ،،، وده الأنا اعترضت عليه ،،،، وطريقة النشر دي ممكن تعمل ردود فعل عكسية ،،، وممكن هيثم يدعو ولا يفرض علي زملاءه المحليين أو الأجانب ودي برضها ما فيها مشكلة ،،،

شكراً علي المرور

شكرا أخ زهير

Quote: هيثم ده والله ما عندنا فيهو عاجبنا وساري بالنا ،،، لكن بس ما يتحول لينا زي أبو تريكة ،،،، وبعد شوية يبقي مركب ليهو مكنة داعية إسلامي

هيثم ليس من النوعية التي يمكن أن تستغلها الجماعات أياها و وتوظفها
كموظفي علاقات عامة أو عناصر جاذبة للشباب ولمن يهويهم بريق نجوم
الوسط الفني أو الرياضي.....
السودان ليس مصر وما يسمي بالحركة الاسلامية بالسودان همها الثروة وبريق
المال ووهج السلطة أكثر من الدعوة أو أرساء نموذج للداعية المثالي بل
بالعكس فأنهم ينفرون من الدين ويشوهون قيمه.....!
كمال

العزيز كمال

تعرف إنو هيثم مصطفي ده رمز ،،،، يعني في ناس كتار بيشوفهو قدوة ليهم

وانا عايزه ينتبه ،، عشان ما يسوقوا الناس ديل لي سكة أبوتريكة الاتحول

من لاعب كورة يجتمع حوله الناس ،،، لزول عنده مواقف ممكن يختلفوا فيها الناس

ويتخيل لي كل سكة وليها ناسها ،،،،،

الأستاذ/ زهير

مساء الخير،،،

أعتقد أن المشكلة في مثل هذه الصحف التي تروج بهذا الشكل. وأظن انك بتتفق معاي انو مسألة الدعوة دي واجب علي كل المسلمين يعني هيثم الله أكرمو (( لأن يهدي الله بك قلباُ للاسلام خيراُ لك من الدنيا ومافيها)) وأنا اتفق معك أن لاتتناول الصحف هذه الأخبار كمادة ترويجية- وهذا بدون شك من غير موافقة البرنس-

دمت في رعاية الله

السماني

Re

Quote: : هيثم مصطفي داعية إسلامي ،، وزيارة حنان ترك السرية للسودان ،،، وزيارة خليل إبراهيم للخرطوم

هيثم مصطفى محظوظ " ان يهدي الله بك رجلاً خير لك من حمر النعم" والدعوة هي مهمة اي مسلم ..وليست مخصوصة لجماعة معينة ..

كثير من المسلمين فيالغرب ليس لهم اي تنظيم ولكنهم يتنافسون في دعوة غير المسلمين وتعريفهم بالاسلام .. ويفتح الله قلب من يشاء للإسلام و

وهي منحة من رب العالمين فالبعض يهبه الله نعمة القبول قيكون حديثه ذا اثر طيب. ويبدو ان هيثم مصطفى من الذين حببهم الله ال الناس .. ربنا يتقبل منه..

أما زيارة حنان ترك ما أظن كانت سرية لأنني سمعتها في التلفزيون وشفت معاها لقاء في التلفزيون ..


لكن طريقة تعاطيك للموضوع جميلة وسهلة تحياتي لك

السماني الهلالابي الجميل

ما تفتكر عايز أدين هيثم مصطفي ،،، أو جريدة حكايات ،،، بقدر ما عايز أنبه لسلوك زي ده ممكن يؤدي

لي عواقب وخيمة ،،،، ومن حق أي إنسان يروج ويدعو للفكرة المقتنع بيها،،،، ومفروض كمان الحق ده

يكون للجميع ،،، يعني زي ما المسلمين بيدعو للدين الإسلامي من المفروض برضو المسيحيين يبشروا لدينهم

،،، لأنو السودان ده بلد متعدد الأديان ،،،،

وبعدين حكايات دي من الصحف الزول بشتريها يومياً لأنو هي مرآة بتعكس الواقع الاجتماعي السوداني لحد

بعيد وفيها مستوي كتابات ممتاز جداً ،،،، بس مرات قاعدين يزيدوها شوية ،،، وما في أي مقارنة بينها

وبين بعض الصحف الاجتماعية الأخري

تسلم يا أخي علي المرور

الأخت القلب النابض

مساءك سعيد

زي ما قلت للشباب ديل ما في مانع أن يدعو هيثم للإسلام ،،، وليس شرطاً أن يدعو الإنسان لفكرة ما

مباشرة ،،، ولكن من خلال سلوكه وتعامله مع الآخر يعكس ما يحمله من عقيدة ،،،، ويحببه في ما دين به

ويا ريت كل المسلمين يكون سلوكهم مدعاة لأن يقتدي بهم الآخرون ،،، لأن الدين تسامح ،عدل ، ورحمة

أدنت فقط طريقة عرض الموضوع

وشكراً لك