هاڤـــانا مدينة يحرسها الغمام- مشاهد وصور من بلاد الله السمحة

مدينة يحرسها الغمام

فى بلاد الله السمحة
كيف بدأت القصة

مساء يوم 18 مايو 2008 حزمت حقيبتى وو دعت اختى و زوجتى و بنتى سهى والصغير بيبى يهيا ( هكذا تسميه اختاه). سارة المتهم دائما بتفضيلها كانت نائمة ملء جفونها لم استطع ان اذهب دون ان اودعها و تودعنى رغم ان وداعها جاء بالدموع : بابا انا ماشة معاك الكوبا بذلت جهدا حتى لا تظهر دموعى انا وركبت سريعا عربة صديقى و فيقى جمال بروتين الفارهة. هكذا دائما جمال معى فى كل الاحوال عندما اشترى اللاندكروزر الجميلة و اشترى اخوه عاطف ايضا لاندكروزر بعد ايام قليلة قلت لهم : خلاص يا اولاد عبد اللطيف الجميل ضحك عاطف وقال لى هرشك برشك خمسة و خميسة وما يليها من قلموس اهلنا المصريين فجمال و عاطف والدهم من اصول مصرية ولكنهم من اكثر السودانيين تمسكا بسودانيتهم.

بدون مقدمات كنت كلفت وفجأة بمهمة عمل و اين فى كوبا.

رفيقاى فى الوفد تقدمانى بيوم و تأخرت انا بسبب الجواز. لكى تدخل عابرا اى مطار فى أروبا كسودانى يجب أن تحصل على تأشيرة ترانزيت تخول لك دخول المطار المعنى فى الدول الاوربية المعنية. كتر خير ياسر حامد ود حلتنا السهل لى الحصول على التاشيرة فى نفس اليوم اولاد حلتنا دايما بيخجلوك همة و انسانية لا حدود لها.

ودعت جمال سريعا لانى كنت متاخرا كعادتى وفى الحقيقة انا لا احب الانتظار فى المطارات . مع انى تحصلت على تاشيرتى كوبا و ( الشينقرين) اتخاد الدول الاوربية الا ان موظف شركة الطيران كان له رايا آخر فتش الجواز يمنة و يسارا و نظر لى عدة مرات وقال لى اين تاشيرة الدخول للألمانيا قلت له موجودة ابحث جيدا استغرق البحث عدة دقائق ثم قام من مقعده دون ان يقول شيئا و غاب نحو من الدقائق ثم عاد و هو يجر وراءه ما توقعت ان يكون رئيس الوردية الذى بادرنى قائلا هل تحمل تاشيرة الى كوبا.

نفذ صبرى و قلت له مباشرة وبحدة :انت تفتح صفحتها فما مشكلتك؟
قال لى لماذا انت متضايق؟
قلت له فعلا انا متضايق من تصرفاتكم هذه امامكم الفيزا وتسالونى مثل هذا السؤال فماذا تريدون؟

لكن الفيزا التى تحملها ليست بها صورة وهذه اول مرة نرى مثلها.رد قائلا. قلت له : كونكم لم تروا مثلها فهذه ليست مشكلتى. انا ةموظف فى مهمة رسمية من الدولة اذا شئت فامنعنى من السفر تحت هذا العذر و تحمل مسئولية ما يحدث فيما بعد.
تغيرت لهجته وقال سيدى نحن نريد ان نساعدك حتى لا تحدث لك مشكلة فى مطارات خارجية فقط هذا ما نريده.
قلت له اتركونى وشانى فى المطارات الخارجية وادوا فقط مهمتكم هنا .الآن إذا كنت تريد ان تمنع سفرى تضيع وقتى فى الحديث معك. قال للموظف مباشرة اكمل له اجراءاته فورا وقال لى نحن آسفون سيدى.
لم اسمح لنفسى ان اتضايق فانا اعلم نوع هذه المعاملة التى نتلقاها فى المطارات و اكاد اجزم انها بسبب اللون وربما سعدت لانى تعاملت مع رئيس الوردية بحدة وهو بالمناسبة هندى كان يجدر له ان يعلم اننا فى الهم شرق ولكنه اختار هذا الطريق.
توجهت سريعا للطائرة و فرج عنى همى ان درجة رجال الاعمال كانت مريحة و الخدمة كانت جيدة جدا قلت لنفسى الناس ديل عاملونى بخشونة وانا اسافر على البزنس كلاس لو كنت مسافر عادى بالدرجة السياحية قطعا كنت اشاهد الآن التلفزيون فى البيت

توجهت سريعا للطائرة و فرج عنى همى ان درجة رجال الاعمال كانت مريحة و الخدمة كانت جيدة جدا قلت لنفسى الناس ديل عاملونى بخشونة وانا اسافر على البزنس كلاس لو كنت مسافر عادى بالدرجة السياحية قطعا كنت اشاهد الآن التلفزيون فى البيت.
بعد ساعتين قضيناها فى مطار البحرين اقلع بنا الطائر الميمون(انا احب هذا المسمى للطائرة جدا) متجها الى فرانكفورت وكانت الساعة وقتها الثانية صباخا وانا اغالب النعاس الكرسى كان مريحا جدا ولكن كنت اخاف ان يتسبب الصوت المقترن بنومى فى مطبات هوائية للطائرة فآثرت أن اشغل وقتى باشياء اخرى فقرات كل ماهو موجود امامى الصحف والمجلات و مستندان العمل و ما زال اليل الدامس يلف الطائرة وامامنا 4 ساعات على الاقل لنصل لمحطة العبور لكوبا.

صحوت كما لسعتنى عقرب وخيل لى اننى اسمع صوت غطيطى المرتفع نظرت للساعة كانت قد تجاوزت الخامسة ونظرت لجارى فالفيته يضع مسدات الاذن ولم اشا ان انظر لبقية الركاب. غصت فى مقعدى ورحت ارقب ما يسمح لى انقشاع السحب برؤيته مما اخضر وازدهر من الارض فالوقت كان ربيعا باوربا و الدنيا يلفها الاخضر اليانع مختلطا بمختلف درجاته اللونية وصلولا للآخضر الداكن حيث الغابات المنتشرة هنا وهناك.

عند اقترابنا من فرانكفورت صرت ارى بجلاء هذه المدينة الجميلة التى تتخللها السهول الخضراء الواسعة و الاشجار العالية المزهرة و قد دهشت لوجود العديد من الغابات داخل المدينة مع قلة قليلة من المبانى الشاهقة. اغلب المنازل اخذت الطابع الالمانى ذو االارتفاع المنخفض و السقوف القرميدية المائلة التى تحكى وفرة الامطار وايناع الحياة و تشكل بلونها القرميدى البديع تقابلا مدهشا مع اللون الاخضر المسيطر. قلت فى نفسى يما هذا التناغم مع البيئة و احترامها ؟يجب ان نعترف البون شاسعا بيننا و بين هؤلاء الناس ونفطع لساننا ونصمت.

مطار فرانكفورت مدينة يتجرك فيها الناس فى كافة الاتجاهات بشر من كل حدب و صوب يمشون بخطوات سريعة جدا ليست كخطواتى , يقرؤون لوحات كبيرة و بعضهم يبحث عن وجهته فى شاشات كمبيوتر اصغر موزعة فى كافة ارجاء المطار يكفى ان تضغط زرا او زرين حتى تعرف من اى صالة تغادر ورقم بوابة المغادرة .لكن رغم هذا الناس يضيعون فالمطار بطن فيل كبيرة منظمة أى نعم ولكن كبرها مخيف و يقود فعلا للضياع . شكرا إدارة المطار التى تفهمت اوضاعنا المفارقة داخل منشاتهم الحديثة فوفرت العشرات من ذوى البذلات الحمراء لخدمة عباد الله من العابرين ولولاهم لما وصل الكثيرون لوجهاتم النهائية.

بعد استماعى لتوجيهات العديد منهم استغليت القطار الموصل من الصالة الاولى للثانية. الموظفون الذين يعملون فى المطار يعكسون التغيير الكبير الذى طرأ على التركيبة السكانية فى المدن الاوربية الكبيرة. موظفون من اصول عرقية مختلفة يعملون فى مختلف ارجاء المطار فهذا الذى سألته اكاد اجزم بأنه من بنها أو اسيوط فملامحه مصرية صعيدية وذلك الشاب النحيل الانيق فى بذلتهن الرمادية سالته حينما رأيته يبتسم عندما رأى جوازى الاخضر: سودانى قال نعم ومنذ متى وانت هنا فى المانيا قال منذ ثمانى سنوات. اكتفيت بالسؤال فالرجل رئيس لوردية و يبدوا عليه الانشغال وسط امواج البشر المتلاطمة فى هذا المطار الذى يبتلع الناس ويفرغهم بقدرة قادر.









مطار فرانكفورت

استغليت الطائرة المتوجهة لهافانا بعد عدة ساعات قضيتها فى فرانكفورت. حلقت بنا الطائرة وكانت مليئة لآخرها بالسياح من شتى بقاع اوربا حوالى الثانية بعض الظهر و كنت اجلس ناحية الشباك مما امكننى من مشاهدة جمال القارة التى تسمى بالعجوز وهى فى الحقيقة ما تزال شابة متبرجة باجمل الوان الدنيا. طرنا فوق بلاد الغال الواسعة وكم بهرتنى اسكتلندا حيث يوجد اجمل ريف فى الدنيا ومن ثم دخلنا الى المحيط الاطلنطى طائرين على ارتفاع 35 الف قدم قرب ايس لاند مرورا تحت قرين لاند ثم عرجنا جنوبا ملازمين الساحل الشرقى للولايات المتحدة الامريكية. كنت ولا ازال اعشق الطائرات واعتبر انها من اعظم منجزات البشرية على الاطلاق. فى مطار فرانكفورت قضيت اغلب ساعات الانتظار ارقب بإستمتاع هبوط وصعود الطائرات المستمر فى مدارج المطار المتعددة .هناك تهبط او تطير طائرة كل 40 ثانية تقريبا. و نحن نحلق فى ذلك الارتفاع الشاهق بكل نعومة رحت اردد فى سرى دون ان اقصد:
قال لى المس قلبي داب

أنا خايف وإنت شايف

طوينا الجو طي الحجاب

وبقوا لينا الأنجم قراب

من هنا طارن هنا من جنبنا

شكرا سيد عبد العزيز شكرا ابراهيم الكاشف لهذا الغناء الرائع و شكرا لعباس بن فرناس والاخوة رايت وكل من حلق بخياله او كد فى العمل لجعل هذا الحلم البشرى ممكنا.

طرنا لساعات طويلة فوق اراضى الساحل الشرقى للولايات المتحدة ولما كان الجو صحوا الا من سحب قلائل امكننى ان ارى هذه الارض الجميلة بسهولها الشاسعة وانهارها المتعددة و ان ارى كيف استغل البشر هذه الارض لمصلحتهم فبدت المستطيلات و المعينات الخضراء المزروعة و البنية البور على طول المسافة تعرف بقدرات هذا البلد الزراعية الهائلة و ثرواته الطبيعية الغير محدودة. فى طريقنا لهافانا مررنا اخير بفلوريدا و ميامى وما ادراكما ميامى. خفق قلى وانا ارى ذلك الساحل الفضى الكبير من الجو . كان ساحل ميامى شاحذا دائمل للخيال عندما كنا فى مقتبل الشباب فقد كنا نقرأ عنه الكثير و المثير. فليحفظنا الرب ويحفظ فاتنات هذا البلد.

ما أن غادرت الطائرة اجواء فلوريدا فى رحلة الساعة ونصف المتبقية حتى دخلنا اجواء الكاريبى المدهشة وحلقنا فوق سحب ناصع بياض لونها يتخلله لون رمادى شفاف خفيف يبدو لك انه من الممكن ان ترى خلاله ولكنك لا تستطيع . عندما اقتربنا من هافانا و بد ات الطائرة فى انزلاق تدريجى للاسفل مصحوبا بهزات خفيفة احيانا وشديدة احيانا اخرى. عندما مررنا من خلال الغمام الكثيف تبدت ملامح الجزيرة الكوبية . لوحة بديعة قلما يتاح للعين ان ترى مثلها . سواحل ممتدة و بحر بلون عجيب و خضرة وجرف و اشجار جوز الهند تبدو رؤسها كفراشات خضراء وصفراء صغيرة تنتشر هنا وهناك. سهول وبحيرات وانهر بلاد منحها الرب جمال بلا حدود. ابتسمت عندما اخترقت الطائرة الغمام الكثيف لاننى دوما اتذكر عندها كيف كنت عند صغرى متأكدا أن الطائرة عندما تصل للسحب فانها تفتش عن فتحة تمر بها من خلالها لأعلى لانى كنت اعتقد تلك السحب عبارة عن اكوام من الماء المتجمد هكذا صور لى خيال الطفولة حل معضلة مرور الطائرة عبر السحاب

ودخلنا لأجواء كوبا











و اقتربنا من هافانا

عندما وصلت صالة المطار الداخلية كانت فى انتظارى حورية قادتنى الى صالة كبار الزوار.

فالك حسن يا هافانا

الجواب اهو باين من العنوان

تذكرت على طول جماعة الجرسة و البكى فى البورد

كل الاوغاد

يمين لو شافو الشفتو

الصورة غايتو ما بنزلها هنا ابيييييييييييييت

بس برضو فى صور حلوة اطمئنوا

الحورية عملت كل الاجراءات لسيادتنا

ووجدت نفسى خارج المطار فى الدنيا البهية

مهندس هشام
حمد الله السلامة

Quote: الصورة غايتو ما بنزلها هنا ابيييييييييييييت

ليه يععني الحسادة ما تخلينا نعاين

صفية

غريبة !!
صورت المطارات ،
لا صادروا الكاميرا ،
ولا اعتقلوك !!
ما كنت متصور حاجة زي دي ممكن تحصل !!

تحياتي .

أها قمنا على الحركات ؟؟ بالمناسبة اللي بيمشوا كوبا دي بيعرسوا منها

اللهم قد بلغنا فأشهد

صفية

حمد الله على سلامتك


انت معاينتك مافيها حاجة نحنا بس بنخاف من الناس البفتحوا بيوت البكا

Quote: غريبة !! صورت المطارات ، لا صادروا الكاميرا ، ولا اعتقلوك !! ما كنت متصور حاجة زي دي ممكن تحصل !!

الدرديرى

سلام يا اخوى

المنع ده سابو زمان

الجماعة ديل فاتو من بدرى زمن قوقل ايرث عشان كده نزلوها ليكم

هشام حمدالله على السلامه

وصفك جميل وسردك انيق

اقترح ان تكتب عن رحلاتك كلها بهذا الوصف المدهش فأدب الرحلات من الكتابات الجميله والمشوقه


مع تحياتى

هشام المجمر

صحي في كوبا البيرة ارخص من الموية كما قال برنابا

Quote: أها قمنا على الحركات ؟؟ بالمناسبة اللي بيمشوا كوبا دي بيعرسوا منها اللهم قد بلغنا فأشهد

يا نيو سودانى

سلام

هو البمشو السودان قاعدين يعرسو خلك من كوبا

Quote: هشام المجمر صحي في كوبا البيرة ارخص من الموية كما قال برنابا

خليل

سلام

انا شن عرفنى بالحاجات دى

كدى انسأل دينق

تحت تحت سعرهم واحد

يا هشام ايه الحكايه اليومين ديل؟؟؟
انت في كوبا ..ونقد قالوا ماشي كوبا...و القصة فيها انة!!


يا بختك يا عم....
ويا نيو سودان بطل حسادة وخلي مدام هشام تعرف تنوم بسلام...
يااخوي مما ختت بلد يغنوا فيها لراجل المرا ما بتجيها عوجة.

ياتراجى

سلام


كان قلت ليك اتلاقينا بالصدفة بتصدقى؟






فى دار الضيافة بهافانا

سوف اتحدث عن هذه المقابلة لاحقا

هـشام المجمر ...
شكـرا لإشــراكنا معك متـعة الرحـله لهافانا عـبر تصاويرك البيانيه الشيقه
وفى إنتظارك لتكملة المتعـــه ...
بس قبل ما تكمل الكـز الاسـتاذ الجمبك دا....قول ليه شنو يا زول سـرحـت بهناك ...نسيت
الخـامس والسياسى المولع فى الخرطوم ولا شـنو ...? ولا دى إستراحة محارب
-غـايتو لو الكوبيين لحقــو وصـفوا ليه دار الوثائق المركـزيه حقتهم ..الشيوعيين تانى
إلا يصعدوا ليهم مسؤول سياسى جديد لانه ما بيجـى راجع غير بعـد يكـتب ليه كتاب
عن تأريخ الرق فى كوبا و الكاريبى.... اصــلو عمك دا بحــب دور الوثائق المركزيه جـدا ...

مطار خوزيه مارتى لا هابانا

و خوزيه مارتى هو احد ابطال حرب التحرير الكوبية ضد الاسبان

وصل كريستوفر كلومبس جزيرة كوبا فى العام 1492 م أثناء رحلته الأولى إلى ما كان يعتقده بلاد الهند. وكان يقطن الجزيرة آنذاك حوالي مائة ألف هندي أمريكي. وقد سمّيت الجزيرة "كوبا" نسبة لاسمها الأصلي (الهندي- الأميركي) "كوباناسكان".






منزل كريستوفر كولمبوس فى العاصمة الكوبية هافانا

تقع كوبا في البحر الكاريبي، على مدخل خليج المكسيك على بعد 77 كلم شرقي هايتي و140 كلم شمالي الجماييك. يحيطها شمالاً مضيق فلوريدا، شرقًا المحيط الأطلسي وجنوبًا البحر الكاريبي وغربًا مضيق يوكاتان.

وهي تتألف من عدّة جزر من جزر الأنتيل أبرزها جزيرتا كوبا والشباب إضافة إلى 4195 جزيرة صغيرة تحيط جزيرة كوبا الرئيسية. تبلغ مساحة كوبا حوالي 114 ألف كلم2 يعيش فيها حوالي 11120000 نسمة وعاصمتها مدينة هافانا.

تمتد جزيرة كوبا على طول 1200 كلم وعرضها لا يتجاوز 191 كلم وهي بالاجمال مسطّحة باستثناء بعض المناطق

تتكون العاصمة هافانا من 14 بلدية اشهرها غلى الاطلاق هافانا سنتر وهافانا القديمة والتى تبدو متحف تاريخى كبير يضم العديد من المبانى الاثرية. قال لى سائق الحنطور الذى اخذنى فى جولة سريعة حول هافانا القديمة أن اليونسكو قررت اعتبار اجزاء من هافانا القديمة ارث تاريخى عالمى و اعتمدت مبالغ لترميم المبانى القديمة ولكن هناك بعص المبانى القديمة التى يعيش تحتها البشر تركت دونما ترميم لكى تسقط فوق رؤوسهم يوم ما.

اضاف ضاحكا: اتدرى أن هافانا بها 2 مليون نسمة مليون منهم رجال بوليس.





جو سائق الحنطور اللطيف وهو بالمناسبة يعمل مع الحكومة التى تمتلك الحنطور

هشام سلامات
الصورة التى اخذتها فى جولتك الحنطورية هذه هى لمبانى كلية القانون فى الاقصى اليومين و كلية التاريخ و فلسفة على اليسار, انها جامعة هفاناالعتيقة en la Colina و لا تنسى النحت الصخم الموجود على مدخل الجامعة, انها سيدة Alma Mater و هى رمز الجامعة. احب هفانا و الشعب الكوبى من انبل شعوب الارض, كبرنا فى هفاناو نعرف المدينة بكل ازقتها.

شكرا ود الزين


محمد النعيم


سلام


شكرا لك

الاستاذ نقد لمن لاقيتو كان متعجل جدا للرجعة للسودان

رغم انو كان فى دعوة رسمية من الحزب الشيوعى الكوبى و البلد السمحة بس الزول تقول دافنين صرتو فى السودان

ياريت لو الاستاذ نقد كتب لينا عن كوبا فهى تستحق الكتابة عنها

Hosham

thanks for this nice piece of article

just keep writing and imaging

شكرا يا كوستا وتابع الجاى اجمل

ابتسمت من تعليق سائق الحنطور ولكن الحقيقة ان مدينة هافانا غاية فى الامان. يمكنك أن تتجول بكل حرية فى وسط المدينة دونما ان تتعرض سلامتك للخطر. ربما يقابلك من الكوبيين من يريد أن يروج لسلعته فيعترض سبيلك عارضا لها بكل ذوق ربما ببعض الالحاح ولكنه يتركك تذهب فى حال رفضت خاصة انهم يخافون الشرطة جدا. وربمايكمن السبب فى هذه الدرجة من استباب الامن هى ان البلد تعتمد اعتماد كلى على دخلها من السياحة بالاضافة الى ان الكوبيين بطبيعتهم شعب مسالم جدا ممكن ان يغشوك ينصبوا عليك لكن لا يميلون لاستخدام العنف ابدا وربما يقول البعض ان طبيعة النظام السياسى الشمولى طويل العمر لها تاثير ايضا فى توفير الامن للكل.

قى كوبا تمنع الدولة بشدة ما يسمى بالسياحة الجنسية و غير مسموح ابدا للكوبيات التسكع مع الاجانب او الذهاب معهم لأماكن خاصة فالبوليس لهن بالمرصاد ولو قبض على احداهن فالويل لها تسجن وتكون من صاحبات السوابق. لكن الكوبيات و الكوبيون لهم مطلق الحرية فى اية نوع من انواع العلاقات مع بعضهم ودائما ما تجدهم يتسكعون بحرية متشابكى الايدى او غارقين فى حضن طويل.




همس حبيبين فى سنترال بارك






مشروع عناق فى ميلكون دى هابانا كورنيش هافانا الشهير

Quote: نحنا بس بنخاف من الناس البفتحوا بيوت البكا

باشمهندسنا حمد الله علي السلامة و مواصلين معاك كوبا سحر متواصل قول الحمد الله الوصلتا هناك بجوازك السوداني في ناس هنا بحتاجوا اذن من وزارة الخارجية للسفر لكوبا و بدون تاشيرات كمان ههههه

Quote: باشمهندسنا حمد الله علي السلامة و مواصلين معاك كوبا سحر متواصل قول الحمد الله الوصلتا هناك بجوازك السوداني في ناس هنا بحتاجوا اذن من وزارة الخارجية للسفر لكوبا و بدون تاشيرات كمان ههههه

يا سيد كلامك صاح

والله كلماامشى مطار و يشوفو الاخضر و يطلعوا لى فى وشى تركبنى خوفة واقول حسه حيرجعونى ربك رب الخير اتخارج من قصة الصورة أجى فى الفيملى نيم المجمر دى غلبتهم و نقعد نتهجاو نتبشتن

عذاب بس نهايتو كانت حلوة

خليك بالبيت معانا حتشوف اكثر

الف حمدلله على السلامة يا باش
سياحة جميلة فى البوست ومبهجة قفزت الى ذهنى رائعتى الكاشف رحلة فى طيارة والجمعة فى شمبات
باقى الصور الله يعينك حيمشطوا البوست تمشيط!
اركز!
منتظر تلفونك!
جنى

عندما تتجول فى شوارع المدينة يدهشك التماسك العائلى او قل الارتباط العاطفى البادى بين افراد العائلة الواحدة كثيرا ما ترى الزوج والزوجة والابناء يمارسون النزهة فى شوارع المدينة المشهورة أو عند الكورنيش هافانا ماليكون الشهير.

ومن المناظر المألوفة رؤية الام وابنتها أو الاجيال الثلاثة مع بعض الجدة والام والابنة أو الابن منظر يعكس دفء العلاقة العائلية ومتانتها.






الام و ابنتها بالقرب من الفندق الذى كنت اقيم فيه


وهاكم الاجيال الثلاثة

جنى يا حبيب

ازيك و ازى الاولاد

الصور كثيرة بس انت ما تخلينى براى

جمال بروتين قال المرة الجاية ماشى معاى اها شفت ليك جنس مشاكل

هشام حمد الله على سلامتككككككككككككككككككككك.
بالله رسل لينا كوتتنا الخاصة من الصور بالايميل عشان المدايم(جمع مدام) وكدى.
نحياتي لأم يحيا و الأنجال
ود الشيخ

عمو هشام ... ما عارف أقول شنو ..... لكن قوية للدييييييييييييين .... كوبا مرة وحدة ... وقابلت نقد ....

راجع ليك بعدين ..

هشام لا صدقيتك
قنبلة زي دي تنجرها لزول ما عنده حديدة على قولة هارون دياب!
انا هينه البيقنع محمد حامد جمعه شنو؟؟


بعدين يا اخوي
وحياتك ديل ما الكوبين البنعرفهم هنا
اظن الفيهم رقشة كلهم مرقوا وخلوا الغلابة لفيدل كاسترو
وحاتك الكوبيات العندنا هنا ديل لو نزلت صورهم الا السعوديه تقفل الموقع لبكري.

عمو هشام ... انا زاتي ما عارف أقول شنو ....
لكن بختك حتى تثتغيث يا حبيب،
من الصور في بعض الملاحظات:
شايف من الحمام الطاير والمشتت أنو البلد برضو فيها جنجويد!
2- مكتوبة بالإنجليزية (هابانا)، ما عارف (هافانا )دي ملفوحة من وين؟
3- أنحنا برضو بالصدفة لاقينا عمر البشير وناس كبيرة شديد في المؤتمر الوطني! (فتّو يا باش)

أي حاجة منك، زي العسل والله...ومشتاقيييييييييييييين

ياودالشيخ مشتاقين

سعادتك بس تأمر

بنرسل ليك الالبوم السرى

انشوف فلاحتك مع المدايم

شكرآ يا هشام المجمر على اشراكنا سفرتك ودهشتك.
تبدو على ملامح الكوبيين علامات السلام والراحة .. وهم خلطة جميلة من الافارقة والهنود الحمر والاوروبيين البيض..
وبعضهم يشبه السودانيين..

هل تعلمت اللغةالاسبانية؟
اهديكم اغنية قوانتاناميرا المشهورة

http://www.embacubasiria.com/music/guantanamera1.mp3

يا سارى الليل

بركة بالشوفة ياخ

مشتاقين اها تعال راحع بالمهلة لانو البوست ده لسة فى بدايتو

تراجى

سلام

محمد حامد الايام دى مشدوه غربا وما فاضى لينا مش لو اتلاقينا فى كوبا

انور كنج

سلام

وين يا راجل مشتاقين


شايفك


بس انتظرنى لمن افضى ليك

سكان المدينة من سحنات واعراق مختلفة اختلطت هنا فى هافانا وفى كوبا عموما منذ زمن بعيد تحديد منذ مجئ الاستعمار الاسبانى للبلاد. يقال انه بعد أن هزم الاسبان سكان البلاد الاصليين من هنود الكوهيبا جلبوا آلاف الزنوج من افريقيا ليقومو بزارعة الاراضى الخصبة الشاسعة بمختلف انواع المحاصيل وفى مقدمتها التبغ الذى يصنع منه السجار الكوبى الشهير. فى فترات مختلفة هاجر لكوبا العديد من الامريكان وصنعوا مكانا للتجارة واللهو حيث سميت هافانا باريس امريكا اللاتينية وازدهرت شهرة المدينة فى العالم وخاصة فى امريكا اللاتينية وقصدها الكثيرون للعمل والاقامة واختلطت هذه الاعراق جميعا و نتج عنها ما نراه اليوم من تعدد مذهل فى السحنات والوجوه دونما يثير هذا التعدد أى نزعات عنصرية . هنا لايوجد ابدا قاموس للعنصرية هذه تبدو كاسبانية وهذا كافريقى وأخر تكاد تقسم انه اتى من المغرب العربى وأخرى لايمكن أن تنسب للهنود وكلهم يعيشون مع بعضهك البعض فى سلام ووئام وربما يرجع جزء من الفضل فى هذا للثورة الكوبية التى ساوت عند انطلاقها بين كل الناس.

معظم افراد الشعب يعيش فى بيوت او شقق صغيرة اغلبها فى حالة بالية هنا تملك الحكومة كل شئ لا وجود للعمل الخاص فى اى مجال ما عدا ما يعد على اصبع اليد الواحدة من المطاعم التى تشارك اصحابها وتاخذ منهم نصف الارباح تقريبا. لذلك تجد الحكومة هى التى تبنى كافة البيوت و البنايات. وقد توقفت تقريبا عن فعل ذلك فالمقاطعة الامريكية الاقتصادية القوية التى تستمر منذ 45 عامااثرت بالغ التاثير على الاقتصاد الكوبى خاصة عندما فقدت كوبا سندها الوحيد فى بداية التسعينات بعد انهيار الاتحاد السوفيتى. ألآن يقتطع الشبان الذين يريدون الزواج من منازل اهاليهم لقلة المتاخ من الجديد و الطوابير والقوائم الطويلة من البشر التى تنتظر. ولو عرفنا ان هذه المنازل او الشقق فى الاصل صغيرة فاننا ندرك حجم المعاناة الناتجة عن اكتظاظ البشر فى هذه البيوت. لكن رغم هذا تحس بان الكوبيين يعيشون حياتهم ببساطة واستمتاع غير عابئين بالضغوط الكبيرة الواقعة عليهم ربما لقناعتهم بصعوبة التغيير وربما خشية من التغيير الذى سوف يجلب المستعمر الامريكى الذى لن يرضى الا بامتلاك كل شئ ويترك لهم الفتات. البعض الآخر خاطر بحياته و ركب البحر فى رحلة الحياة أو الموت لسواحل فلوريدا التى ينجح القلائل فى وصولها و يبتلع البحر الكثيرين.





احدى منازل هافانا الصغيرة غالبا فى الحجم





عجوز تتجاذب اطراف الحديث مع صديق لها خارج منزلها بهافانا





وترعى بنفسها حديقة منزلها الصغيرة





ونظرة الى المستقبل

عادل عثمان

سلام

شكرا على الخرطة وعلى اغنية غوانتانميرا

الاغنية مشهورة جدا فى انحاء كوبا و اميريكا اللاتينية ى تحكى عن فتاة من غوانتانمو الكوبية

وفتيات غوانتانمو مشهورات بين الكوبيات بالجمال البارع

غوانتانميرا زى كداروية اى فتاة من غوانتانمو زى فتاة من الكدرو

يا هندسة,,,,,,

حمد الله على السلامة......

كوبا بلد الجمال والطبيعة الساحرة....

السرد في غاية الروعة والصور حاجة ثانية..

لكن قول لي انت مشيت شغل هندسة ولا مركزية تنظيم مع عمنا نقد......

ما شفت لينا واحد من شيوعيين بحري هناك.....

واصل طريق صور كوبا..

ابوعبيدة

ابوعبيدة

سلام

Quote: لكن قول لي انت مشيت شغل هندسة ولا مركزية تنظيم مع عمنا نقد......

لا والله شغل هندسة

بس نحن بنجر السبحة والدايرين نلاقى بنلاقى فى اى حتة

الباشمهندس هشام المجمر

وصف رائع و صور أروع ، البوست نقلة نوعية ، أشركتنا في رحلة ممتعة ، لك الشكر و الود..

شكرا الحاج حمد

ولك هذه الهدية





نظرة اخرى للمستقبل

الشعب الكوبى شعب اجتماعى جدا وودى الطباع دائما ما تراهم فى مجموعات ونسة او على عتبات البنايات يتجاذبون اطراف الحديث




مجموعة من الرجال يتناقشون فى السنترال بارك حول البيسبول الرياضة المفضلة فى كوبا





عشرة ونسة نسوية على عتبة الدار





صديقتان التقيتا بالصدفة تسلمان على بعضهما بحرارة و لا باس من بعض الاخبار رغم اختلاف السن

هشام يا أخوي ... الحمد لله على السلامة ..
كنت تسوق معاك ياسر حامد زاتو علشان يتهجم من المناظر دي وينزل وزنو شوية بس فالح هو يعمل التأشيرات للناس .. أما عن الصور فمافي سبب واحد يخليك ترجع مزاد بحري تاني .. أقول ليك شي .. أنا بنزل ليك إجازات للسودان وقت تحب تمشي وبمشي بقعد ليك مع حاجة نعمات وبسلم ليك على كل الناس .. بس خليك مركز لينا في هافانا دي .. يابعيد محمد طه قدر مادردقناهو نكر رسمي وشعبي أنو عندو صور من ألمانيا .. غايتو مشكلة ..

تخريمة ...

قلت لي لاقيت نقد صدفة .. !!!!!؟؟
أنا بصدقك بس البيقنع الديك شنو ...؟؟؟


تحياتي للأسرة ولأختنا إلهام ..

العزيز هشام
الشعب الكوبي جميل وظريف وطيب وما معقد
شوف عدد كبير من الناس وقف لك امام الكميرا
بكل محبه ...

لأن الحكومة تمنع الملكية الخاصة بكافة اشكالها يظهر ذلك فى كثير من الاشكال. المبانى لا يصينها ساكنوها الا بالقدر الذى يسمح لهم بسكناها. السيارات عددها قليل مقارنة بمدينى بحجم هافانا و هناك اكبر عدد من السيارات القديمة فى العالم هنا فى كوباظ بها بحالة جيدة و يتوارثونها من حيل الى جيل لانهم لو فقدوها لن تسمح لهم الحكومة بامتلاك سيارة جديدة.حيث يتحايل اصحابها للاحتفا. القانون يسمح للكوبى بامتلاك سيارة لو تطوع للعمل فى الخارج لمساعدة الشعوب الفقيرة واعطى اجر على ذلك او لو كان دبلوماسيا غير ذلك لا يمكنك امتلاك السيارة. اصلا مستوى دخول الناس حتى المهنيين من محامين واطباء و مهندسين لا يسمح لهم باقتناء السيارة وبالكاد يكفى لسد حاجة العائلة التى تدفع للحكومة مبلغا لا يتعدى العشرة فى المائة من دخلها الشهرى لقاء أيجار المسكن حسب القانون

يا هيثم

سلام

والله مشتاقين



انت من زمن ياسر سمين

الراجل حسع ماشى بنفس بعد العملية حبة حبة

انا خايف بعدين نفتش للبنفخو تانى

اصلا نحن متعودين عليهو سمين ومدغلب


اتخيل ياسر حامد سلك

ما راكبة مش؟

السمك ذاتو ما ح يعرفو

صدقت يا ود الجمام

شعب محب وودود بعد مرات هم البيطلبو منك تصورهم

هاك الهدية دى






ابتســــــــــــــامة كـوبيــــــــــــة

فتاة تتجول على المالكون بزيها المدرسى





الخبازة و بوز للمصور

هشام بالغت عديييييييييييييل
السرد والوصف الجميل ذكرني كتاب يوسف بشارة كوبا الجزيرة التي أحببت
أفتكر ده مشروع كتاب أنيق وسلسل ورائع
ليك علي أجمعوا وأصمموا كمان

موضوع المرجفين ناس هيثم لبيب خليهو ساكت
أنا ماسكو بالثابتة لو عايز بنزل الصور ..

ويا حليل زمن السمنة والبناطلين الواسعة

تخيل جمال أبو القاسم في كوبا!!!!!!!!!!!!!!!!!!!!!!!!!!!

دائرين اجازة طويلة ..
أحمد حامد قال جبل أولياء الأيام دي ضارب
الحجر الغربي
بس الكرد مطلع عينو
عايز كمية من الخيوط والعوامات
أه اتشجع ونصيف هناك
سلام

الاخ هشام
التحية ليك ولكوبا وأخص بالشكر ست الابتسامة الكوبية

اها كوبا ده بركبوليها من وين وتأشيرته كيف ونسأل من ناس منو هناك وجازه كم$$$$$$

انا قبال كده مشيت بروكسل في رحلة عمل وفي يدي 60 يورو وطلعته مناها بي 400يورو

الموظف بتاع الكاونر اعتذر لي شديييييد وقال لي معليش درجة رجال الاعمال ملانه ودي 400 يورو واقامة في شيراتون بروكسل ليوم واحد ونجيبك بي لموزين في طيارة بكره ..

اها انا يادوووب فهمته معنى حقوق انسان!!!

شكرا ياسر حامد

بعدين ياخ سيرة الجلب دى بتجيب لى رجفة

وسيرة الجبل بالذات و الحجر الغربى ام الطيور و المواسير

لابد من يوم نرجع

اها جمال قال ماشى

انا قلت اكلم راؤول لانو حتحصل فى البلد مصائب ابرئ نفسى منها

با باش
كيفك يارائع
قلت لي جمال ماشي
سجمنننننننننننننننننننننننننننننننننننننا

Quote: انا قبال كده مشيت بروكسل في رحلة عمل وفي يدي 60 يورو وطلعته مناها بي 400يورو الموظف بتاع الكاونر اعتذر لي شديييييد وقال لي معليش درجة رجال الاعمال ملانه ودي 400 يورو واقامة في شيراتون بروكسل ليوم واحد ونجيبك بي لموزين في طيارة بكره .. اها انا يادوووب فهمته معنى حقوق انسان!!!

يا خال العيال ده حظ شديد جدا

حقو ترص ليك بنك

مبنى عتيق دخان وتأمل






بائعات سوق للاناتيك هافانا القديمة





الكنتين و البائعة

حمدالله على السلامه

بالله كان دى الصور عفيت ليك انك لأول مره فى حياتك ما تتصل بى فى تاريخى المايوى العظيم...
اهنأ يا باشا
كوبا وجمال كوبا شوييييييين عليك

سلام لكل و لست الكل شعرها ملولو ( الكلام ده ما عندو علاقة ببوست خليل العنصرى الجبان )

والله لابد لي ابتسامه كوبا من اول يوم

كوبا تشهد اول عملية ارهابية يقوم بها فرد واحد (دا الخبر بعد وصول جمال بروتين)

يا ليبو ارجا صور المانيا (بس العفش داخل البص علي مسؤوليه صاحبه)

ياسر حامد انت شايف الجلب في كوبا ضارب تقول الجبل

ـــــــــــــــــــــــــــــــــــــــ
حمدلله بالسلامه يا هاش

هوشي منه ..
ياخ بديع سردك ..
و زي ما قال ود الزين ..
أدب الرحلات ده في مشهدنا الثقافي مافي ( و كأنو في حاجة تانية يعني ) ..
المهم يا صديقي .. ممتع سردك و ممتعة تلك الهافانا بيك ..



مسعول من الخير ياخي ..
البلد كلها نسوانها ( سررهم ) في الشارع مالهم ؟؟
نعل مافي عوجة ؟
يكون الحر ... و كده ؟؟؟





ـــــــــــــــ
ملحوظة : أمانة عليك الصور ..
الصور ياخي .. ركز فيهم ..
ـــــــــــــــ


تحياتي يا جميل .

الحبيب محمد طه

تحياتي ليك وللحلوين وأمهم

بالمناسبة لو ركزت في الصور دي كويس
طوالي حيقفز إلى ذهنك المثل السوداني

النسا قديمو تاه

..
والله هشام لو قاد المدرعات الفي الصور دي يعمل أنقلاب

..
وامسك الخشب

Quote: اتخيل ياسر حامد سلك ما راكبة مش؟

ياباشمهندس .. والله مشتاقين وبالأكترين ..
ياسر حامد سلك ... !!! بقوم بغني ليك هسه أغنية أبوعفان .. مابصدقكم .. يازول قول كلام تاني .. نوهائياً ماراكبة ..

Quote: موضوع المرجفين ناس هيثم لبيب خليهو ساكت أنا ماسكو بالثابتة لو عايز بنزل الصور ..

ياسر حامد الصور دي بتدين التالية أسمائهم .. مامون أول واحد .. عزام طه التاني .. الصلحي صاحبك الكانت الصورعلى شرفو تلاتة .. امجد وهيثم كامل .. أنا زول حلة ساااااااااااااااكت ..( كدي خلينا نراجع النسخة المعاي وأجيك ) .. قلنا ليك كفارة وسلامتك في البوست داااااااك وماعبرتنا وتلفونك شكلك غيرتو ...

Quote: يا ليبو ارجا صور المانيا (بس العفش داخل البص علي مسؤوليه صاحبه)

عزام طه صاحبي .. هو بعد تنزله حيكون في عفش.. مشتاقون كميات... لابد الأيمات دي بأريباوماعاوز ترد سويته شينة ....

سهام

سلام

ومعليش يا اختى الصغيرة

يوم 25 داك لسه فى هافانا ونص معمعة الشغل

كل سنة انت طيبة

التلفون ضرورى جاييك


محمد طه

سلام

المرة الجاية خرم من مطار فرانكفورت

هافانا قريبة

11 ساعة بس

قول 24 المنظر هناك بيستاهل

عماد عبد الله

يا زول يا فنان

تصدق انت الجيت على بالى كزميل فى هذه الرحلة

ومعاك محسن خالد

بس الاخير استبعد لدواعى الاصابة

قلت فى بالى المساخيط ديل لوكانو معاى شافو الشفتو حيكتبو شنو

هدية خاصة





مشهد من باليه كارمن النسخةالمائية بفندق كوهيبا وسوف ارجع لباقى الصور لاحقا عند الحديث عن الفنون

شكرا يا هشام

دا بوست فيهو ذوق ، و فهم .. و برتقي
بالمنبر و بحولوا لمنطاد زبلين المتجول
في اطراف الدنيا

شعب فريد ، متعدد الاعراق و السحنات
مبدع و منتج .. و بصنع حياتو علي
مستوي اللحظة و الساعة و اليوم

مشكلتو هي حكومة الحزب الشمولي - الواحد ( مقاول البيوت الشعبية )
القاعدا ليهو في أنفاسو

و للحق دا ما نظام اشتراكي ، دا نظام دولة
الكوادر الحزبية - البيروقراطية - البوليسية عالية
التنظيم الاداري .. نظام الدولة الناهبة لكل الفائض الاقتصادي
بدعوى إنها عاوزة تصرفوا علي الغلابة و تساوي بروفسور
الجامعة بالغفير

دولة خزعبلات الزعيم الابدي اللي ما ليها علاقة بماركس

.. و نقد عارف الكلام دا كويس ، و مفروض لو الظروف
سمحت يكون قالوا ليهم

.. ونقد و الله برضو قيافة ! طبعا هو اقدم زول حاليا
في الحركة السياسية السودانية .. اقدم من الصادق و
الترابي .. و بالله يا هشام رسل ليهو الصورة دي ..

خالص التقدير لك و الاسرة و الاصدقاء

احمد طراوة

اهلا يا صديق

مشتاقون

و شكرا لك على الاضافة الثرة

فى هذا البوست حاولت نقل حياة الناس هناك بقدر ما استطيع

و قد تجنبت عن عمد الحديث المباشر عن الحالة السياسية للبلاد

اظنك قدقمت بتشخيصها بدقة

لك مودتى

هافانا مدينة ذات طبيعة ساحرة ولقد اتاحت لى ظروف عملى التجول فى شتى مناحيها اينما ذهبت يطالعك نخيلها الملكى بقده المياس الذى يرعى تحته مجاميع متعددة من الاشجار بعضها تراه للمرة الاولى أدهشنى تماما حجم شجرة الكريسماس العملاق انها بهجة النظر نعم ان جمال الطيبيعة هنا ترياق للنفوس العليلة فهمت تماما لماذا اهل هذه البلد مسالمون.

مهندس هشام

مبالغة بس

يعني كان ناس شغلك رفدوك طلع عندك حرفة جديدة ما في مشكلة يعني ما حتصيع

صور جميلة وحكي اروع
لكن
عندي سؤال
انت الكاميرا بتاعتك دي عندها حساسية من تصوير الرجال وشنو غير جو وانت ونقد تاني يعميني ما شفت لي راجل ولا نسبة النسوان اكتر من الرجال في البلد ديك

صفية

خارج النص:
طبعا مجهزة موضوعي بتاع استكهولم اها لمن لقيت حكيك المبالغة دة غيرت راي او خليني الننتظر شوية لحد ما بوستك دة ينزل للصفحة الكم مع اني ما اظنه حينزل طالما انت بتنزل في صور الجكس

الكاريبى وما ادراكما الكاريبى بحر لونه عجيبى و شواطئه اعجب. غذا كان محمود درويش قد سمى البحر الابيض المتوسط باللازوردى فان الوان الكاريبى المتعددة قد اعجزت مخيلتى عن اجتراح اسم يوصف به هذا الجمال العظيم وهذا البهاء النادر.







انظروا تباين هذه الالوان وجمالها




المــــــــــــــوج........الموج





الموج والشراع

صفية

يا لطيفة

Quote: انت الكاميرا بتاعتك دي عندها حساسية من تصوير الرجال وشنو غير جو وانت ونقد تاني يعميني ما شفت لي راجل ولا نسبة النسوان اكتر من الرجال في البلد ديك

اها اصبرى شوية صور الرجال جايتنك

بعدين بالضرورة تنزلى بوست استوكهولم منتظرنو وعارفنك ست الحكى

الاستشار بشير معاذ المستشار القانونى الضليع وزميلى فى العمل اتصل بى متسائلا: يا زول انت مشيت شغل ولا سياحة؟

ضحكت وقلت الاثنين.


بشير اثنى على الصور و البوست وطلب منى توصيل تعليقه للبورد

الشكر للاستاذ بشير على مشاركته له كل المودة والاحترام و شرفت البوست يا استاذ

الاخ هشام
تحية واحترام
البوست جيّد ومتنوع فلك التحية

الاخ طراوة
كتبت

Quote: شكرا يا هشام دا بوست فيهو ذوق ، و فهم .. و برتقي بالمنبر و بحولوا لمنطاد زبلين المتجول في اطراف الدنيا شعب فريد ، متعدد الاعراق و السحنات مبدع و منتج .. و بصنع حياتو علي مستوي اللحظة و الساعة و اليوم مشكلتو هي حكومة الحزب الشمولي - الواحد ( مقاول البيوت الشعبية ) القاعدا ليهو في أنفاسو و للحق دا ما نظام اشتراكي ، دا نظام دولة الكوادر الحزبية - البيروقراطية - البوليسية عالية التنظيم الاداري .. نظام الدولة الناهبة لكل الفائض الاقتصادي بدعوى إنها عاوزة تصرفوا علي الغلابة و تساوي بروفسور الجامعة بالغفير دولة خزعبلات الزعيم الابدي اللي ما ليها علاقة بماركس .. و نقد عارف الكلام دا كويس ، و مفروض لو الظروف سمحت يكون قالوا ليهم

دعنى اتفق معك فى التوصيف عاليه حول مسؤولية الحزب الحاكم فى كوبا عن الانهيار والتدهور فى كوبا ولكن دعنى اختلف معك حول التسبيب النهائى.
فى اعتقادى الجازم ان الماركسية منفردة او كمرجع فكرى للحزب الحاكم فى كوبا هى السبب مثلما كانت السبب فى الانهيار الذى حدث فى كل المجتمعات التى حكمتها احزاب شيوعية (الصين استثناء طبعا لان الحزب هناك تبنى اقتصاد رأسمالى وهو موضوع طويل ليس هذا مجاله) لأن الماركسية مجرد مشروع تسلطى لا علاقة له بقضية التحرر الانسانى طالما تجاهلت نظرية الحداثة عند ماكس فيبر خاصة بعد صياغة الاخيرة لمصطلح الاقفاص الحديدية فى نقدها للبيروقراطية ولذلك فانها اى الماركسية لن تعود كمشروع تحررى الاّ بعد ان تتدثر بنظرية الحداثة هذه وتكون جزء منها وهذه هى بالضبط اسباب الحكاية ...حكاية السقوط المدوّى للمشروع الماركسى مع نهاية الالفية ، لقد آن الاوان لتجذير المشروع الديمقراطى وتقعيده فى نظرية المعرفة حتى تغدو عقلانية وتعددية فى آن .
ما احوجنا لذلك الان فى السودان فقد وصلنا الى قمة الازمة ولو كان للازمات ذرى وقمم فليس هناك اكبر من المشروع الاصولى الدينى فى السودان للتعبير عنها.
بالله دعونا من ارجاع كل الشرور الى الستالينية فليس لدينا وقت

ياسر حامد

سلام


الطبع غلاب مش؟


انتظر الجاى

شكرا طلعت الطيب

ارجو ان تواصل الحضور هنا فسوف ترى ما يبهجك

للمتابعين

نديكم شوية صور لغاية ما نفضى للبوست






فنادق على الكاريبى









بائعة الساندوتشات وراحة قصيرة

العزيز هشام
وهو كذلك وانا فى الانتظار
اذا اسعفتنى الذاكرة فان رواية العجوز والبحر للكاتب الامريكى ارنست همونجواى كانت احداثها تدور فى كوبا، اذا كان ذلك صحيحا، هل كان ذلك مجرد مصادفة

طلعت الطيب
الكاتب الراحل أرنست همينغوى كتب العجوز و البحر فى كوبا حيث له منزل فى غرب هابانا و الذى تحول الى متحف قومى و منتجع سياحى يسمى مارينا همينغوى و هو على البحر. اوصى للاخ هشام الزيارة إليها. كذلك من اشهر ال landmarks, Hotel Nacional, حيث فلمت in it اغلب مشاهد فيلم God Father, و لسبب بسيط, هذا هوتيل كان المكان المفضل ل Al Capon و عصابته. و كذلك الكابرى La Tropicana, و هذا المكان يراوده نجوم هوليوود الى يومنا هذا, جامعة هافانا, و هى من اقدم الجامعات فى اميركيات.
تحياتى.

فى اية شارع تقع كندا
الاخ زكريا
تحياتى
شكرا على المعلومات القيّمة خاصة معلومة تصوير الاب الروحى هناك. معظم الناس يعتقدون ان المافيا مجرد عصابات وكفى ولكن المافية عندها ظروف نشأة فى امريكا الشمالية ارتبطت بالمجتمع المقفول فى وجه الجاليات الحديثة نسبيا كالايطالية واليهودية والافريقيين وغيرهم حيث كان المجتمع مقفول لابناء الانجلوساكسون فقط . هذا الظلم دفع ابناء المهاجرين من تلك الجاليات الى النشاط الاقتصادى الغير قانونى(تحت الارض) مثل ادارة الكازينوهات وغيرها وبعد ان انتعشت تلك الجاليات اقتصاديا بدأ انفتاح المجتمع واعطاء فرص التعليم والتوظيف لهؤلاء بعد نضالات مريرة. لكن المهم فى الامر ان المافيا كانت لها تبريرات اجتماعية واخلاقية ربما كانت افضل اخلاقيا من انقلاب الجبهة الاسلامية القومية والانفراد بالسلطة وتشريد الكفاءات فى السودان.
اختفت الاغتيالات واعمال العنف المرتبطة بالمافيا بعد ادراك الجاليات اليهودية والايطالية الطابع الاخلاقى المبرر لوجودهم والمرتبط بالصراع من اجل لقمة العيش فى مجتمعات كانت عنصرية لا ترحم، ولذلك قاموا بوضع نظم ولوائح اخلاقية الى حد ما لادارة الخلافات فاختفت بعد ذلك ظاهرة العنف العشوائى ومع تطور حركة الحقوق المدنية وجد ابناء المهاجرين من اليهود والسود وغيرهم الفرص فى التعليم الجامعى وفرص عمل طيبة (بالمناسبة اليهود كانوا ممنوعين من دخول كليات كالطب فى جامعة تورونتو حتى عشرينات القرن الماضى مثلا).وهنا اضمحلّت ظاهرة المافيا مع انفتاح المجتمع وتوجهه نحو العدالة فى الفرص وعدم التمييز بين المواطنين.
اذدهرت عصابات المافيا فى امريكا حينما تم منع الخمور فى امريكا فى الثلاثينات من القرن الماضى على اثر (صحوة زى بتاعة نميرى فى ١٩٨٣م) حيث وجدت المافية فرصة ذهبية فى صناعة الخمور البلدية وتهريب الخمور الاخرى من كندا .. ثم افاق الكونجرس الامريكى بعد ذلك وادرك خطورة مثل ذلك القرار المدمر للمجتمع والاقتصاد فى امريكا وتم الغاؤه.
فى محاكمة شهيرة للكبون زعيم العصابات وحينما سأله القاضى عن كيفية تهريبه للخمور من كندا، اجاب الكبون متسائلا بصدق : فى اية شارع توجد كندا هذه يا سيدى؟
هذه الواقعة ما زالت تغضب الكنديين حتى اليوم لاحساسهم بالتهميش من قبل الجارة القوية فى الجنوب.
معليش يا هشام مرقنا من الموضوع لكن بقترح عليك زيارة اماكن ناس الكابون القال عليهم زكريا ديل

طلعت وجوزيف زكريا

سلام

وشكرا على هذه المداخلات الثرة واللطيفة

سوف اعود لاحقا لمواصلة البوست ياطلعت

شكرا يا أخ هشام لهذا الإتحاف الرائع ولهذه الأجواء الغمامية

نحن الآن في قلب الخرطوم دايخين من حر السموم وربنا يلطف ويلطف لينا الجو


لي مداخلة قريبة

بوست في السلك
تعال محلات الفنايل الكت دي هناك بتكون ماشة
ايه رايك نشتغل تجارة سوا
فنايل كت وبث
مودتي

هشام طه سلمات ومشتاقين كتير لكم جميعا..ولناس قطر فرع المزاد

عاد خلعتني جنس خلعة..الشي ما بنيات عينن بيضة ودايرات الجلد

بس ماعرفتك ماشاء الله خفيت خالص ورينا السر

بعد حوالى العشرة ايام من الاحزان

نعود للذكريات المبهجة

نعود لهافانا

فلنقل لها مرحبا

ونودع بعض من عنت الحياة

و نفتح للجمال بابا

ياسر ابو حريكة

محمد السنى دفع الله

انا بنت النيل

شكرا لكم و آسف على الرد المتأخر

انا بنت النيل

البركة فيكم و انشاء الله آخر الاحزان

فى رجعتنا بندأ بالفنون

هاكم اولا مشاهد من باليه كارمن المائى الرائع الذى شهدناه بفندق ناشيونال بهافانا






جانب من الراقصات

كارمن المتيمة تؤدى وحدها رقصة الحب





كارمن وحبيبها فى مشهد بديع






المجموعة واداء غاية فى الرشاقة و الروعة





الشيطان و كارمن





اصطفاف جميل و مشى على اطراف الاصابع بخفة ورشاقة مذهلين


لقد كان عرضا رائعا للباليه المائى صفقت طويلا بعد أن شهدته
هذه ضروب للفنون يندر أن يجود الزمن بمشاهدتها
حقيقة كانت متعة لا نهائية
تشعر انك تشبعت فنا و رقت احاسيسك حتى حلقت فى فضاءات ليس بها سوى الجمال

حبابك .. سفر سفر
وفي انتظـار ..

_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كـوالالمبور

شكرا يا دكتور

و خليك متابع

فى حاجات احلى

فى هافانا التى يحرسها الغمام والجمال و تحديدا فى المدينة القديمة يقام معرض اسبوعى كل يوم سبت للرسامين الشعبيين فى شارع يسمى شارع برادو دى مالكون. انقل لكم بعض الصور من هذا المعرض المدهش

العزيز/المجمر
لله درك يارجل...شكرا لك وانت تشركنا فى المتعة غير المتناهية دى
...ولى ملاحظة فى الصور ...طبعا الصور جميلة للغاية وزوايا التصوير
زوايا إحترافيا جدا...ولك موهبة فى التصوير احسدك عليها...
وفى ملاخظة تانية أجزم أن مابين هافانا وديوم بحرى والعباسية والموردة والديم
أكثر من رابط مشترك...وعلى الطلاقة ناس هافانا ديل ديامة ضلوا الطريق لكوبا أو كوبيين
ضلوا الطريق لهافانا...حيث الجمال الخلاسى والانبهال السلوكى الجميل....عموا متع نفسك بالدهشة
وخلاسببببببببببن زى ديل ما أظن تلاقيهم إلا فى ديوم بحرى أو العباسية....
؟؟؟؟؟؟؟؟؟؟؟نواصل؟؟؟؟؟؟؟؟؟؟وانت واصل برضوا

الاخ المجمر
تحياتي

رحلتك في غاية الجمال
والصـــور هي اثبتت ذلك

بس في ملاحظة انو الصور الاخيرة في البوست ماظهرت
يبدوا انوا هناك خلل

وواصل يا عزيزي
ولي قدام.

وفى ملاخظة تانية أجزم أن مابين هافانا وديوم بحرى والعباسية والموردة والديم
أكثر من رابط مشترك...وعلى الطلاقة ناس هافانا ديل ديامة ضلوا الطريق لكوبا أو كوبيين
ضلوا الطريق لهافانا..

نعميا خالد بحر صدقت

انها الحياة الشعبية الحميمة التى تخلق ه>ا التشابه

الحياة المفعمة بالحيوية والعلاقات الانسانية المتشابكة

تلك هى التى و سمت واقعية مركيز السحرية

انها الحياة الرائعة بكل تفاصيلها

شكرا احمد محمد بشير

Quote: بس في ملاحظة انو الصور الاخيرة في البوست ماظهرت يبدوا انوا هناك خلل

الصور عندى ظاهرة و انا استعمل نفس الفورمات فى تنزيل هذه الصور

ارجو ان تحاول مرة اخرى

والله يا هشام ربنا اداك الماء والخضرة والوجه الحسن المهم تكون استمتعته ونحنا هنا فى السودان دايرين جو بس زى ده تقول السوق العربى وسوق سته ربنا يصلح الحال!!!!!


المغيرة

آمنت بالله يا هشام ..
بالله شفت ده كلو ؟؟
و سمعت الموسيقى اللاتينية حية ؟؟
و الحاجات الحاجات .. برضو حية ؟؟

غايتو ..
طلعت زول ( متخرط ) ساكت و صاحب مراجعات .



......
أنا لو منك ..
طوالي ( حجة و زوغة ) .

يا هندسة بطارية الكاميرا حقتك شحنت بطاريات البورد كلها.......

وكلام خالد بحر صحيح مية في المية..

كافتيريا هافانا قديمة جدا في سوق بحري....

ح نعمل استاد التحرير مسرح باليه مائي والتذكرجية من المزاد والديوم بحري عوض كوكا وعلي هينو وكمندجو واب حواء

وانت ح تكون مدرب البالية لأنه بقى عندك خبرة كوبية.....

بعدين يوم رجال ويم نساء لزوم المشروع الحضاري....

رايك شنو....

واصل في الصور لحدي مابطارية الكاميرا تخلص...

عاطر التحايا.

أبوعبيدة

الكوبيون يعشقون الموسيقى والرقص و عندما تتسكع فى مالكون دى هابانا( كورنيش هافانا) منظر طبيعى ان ترى الشباب يحملون على ظهورهم الآلات الموسيقية. انهم يغنون ويرقصون بحرية على الكورنيش. يغنون على ايقاع موسيقى الصلصا الشهيرة او التشاتشاتشا وهناك ايقاعات اخرى عديدة قيلت لى ولكنى لم استطع حفظ الاسماء لصعوبتها و ربما لتقدم العمر.

قال لى سائق الحنطور عندما كنا فى نتجول فى هافانا القديمة انه قلما تجد كوبى او كوبية لا يجيد العزف على ألة موسيقية.

شخصيا قضيت احلى ليلة فى كوبا على الكورنيش بصحبة كوبيان وكوبيتان و صديقى السودانى وائل الدى يحضر الماجستير هناك.غنينا جميعا و رقصت الكوبيتان كما لم ارى رقصا من قبل. ساعدنا الهواء المنعش و الجو الصافى وصوت تكسر الامواج ورزازها البارد الذى يغشى الخدود ويلسمها فى مودة ورفق. عشنا هذا الجو الممتع و المفعم بالبهجة و الموسيقى والرقص حت الساعات الاولى من الصباح دون ان يسألنا احد او يضايقنا أحد بل كان الجميع وعلى طول الكورنيش يستمتعمون ويحتفلون بجمال الحياة كل بطريقته.









هكذا يستقبلونك دائما





هكذا يغنون لك وانت تأكل

Quote: دايرين جو بس زى ده تقول السوق العربى وسوق سته ربنا يصلح الحال!!!!!

دى صعبة خااااالص يا مغيرة

تحياتي اولا والله انت سعيد ومحظوظ ان تري مثل هذا الجمال وعشان تتاكد اكثر ان الشعب السوداني مظلوم ظلم الحسن والحسين كلو علينا

الابتسامه الكوبيه بتكون جابت ليك مشاكل مع الحكومه حقتك ولا شنو؟؟؟؟؟

Quote: ...... أنا لو منك .. طوالي ( حجة و زوغة ) .

عشان كده انا اتمنيتك معاى هناك يا عماد

السبب الظاهر انو عشان تتحفنا بكاتبتك عما تكتحل به عيناك

الباطن

طبعا عشان نكب الزوغة مع بعض

Quote: نعمل استاد التحرير مسرح باليه مائي والتذكرجية من المزاد والديوم بحري عوض كوكا وعلي هينو وكمندجو واب حواء وانت ح تكون مدرب البالية لأنه بقى عندك خبرة كوبية..... بعدين يوم رجال ويم نساء لزوم المشروع الحضاري....

مدرب عديل

لكن الخبرة الكوبية ما ساهلة

Quote: تحياتي اولا والله انت سعيد ومحظوظ ان تري مثل هذا الجمال وعشان تتاكد اكثر ان الشعب السوداني مظلوم ظلم الحسن والحسين كلو علينا الابتسامه الكوبيه بتكون جابت ليك مشاكل مع الحكومه حقتك ولا شنو؟؟؟؟؟

يا نيازى

سلام

اولا الظلم حاصل بس حقو يراعونا بعدين

ثانيا نحن حكومتنا واعية

بوست ينبض بالحياة

تحياتي استاذ هشام

ياخى روعة
و من قلب مدنى الصامدة احى ناس الغمام الله يضللا علينا

و يا السنى انا معاك فى الكت و فى البث زاتو

Quote: فنايل كت وبث

شكرا لكما سلمى صبحى و اسامة الخاتم

خليكم معانا

هدية نهاية الاسبوع





زجاج ملون على شباك





فتاة من الريف الكوبى



ابتسامة عاملة

تميز الكوبيون بعشقهم للفنون وتميزوا بالحرفية والابداع فى الرقص
شكرا يا صديقى لهذه السياحة الجميلة الممتعة التى اشركتنا فيها باريحية بس وين باقى الصور
جنى

جنى

سلام يا صديق

الرحلة مستمرة خليك معانا

باشمهندس هشام

تحايا واشواق ان كنت تزكرنا

بوست اكترررررررررر من رائع

خالد على العطا صديق قديم

خالد عطا

سلامات يا زول يا رائع

تغيب وليك وحشة

سعيد بعودتك و مشاركتك فى البوست

ارجو ان تكون قد استمتعت به

لك مودتى

فى كوبا و تحديدا فى هافانا لا يوجد عدد كبير من السيارات كتلك التى توجد فى كل بلاد الدنيا بسبب تقييد ملكية الافراد للسيارات كما ذكرنا سابقالذلك يمكنك رؤية العديد من وسائل المواصلات قديمها وحديثها ولكنها غير متوفرة بالشكل المطلوب. الكوبيون شعب يحب المشى و لربما ارادوا ان يوفروا تكلفة المواصلات الزهيدة بسبب ضعف المدخولات هناك. العديد من الناس و خاصة الفتيات يتوصلن عن طريق رفع الاصبع على الطريق و عندمارايتهن يؤشرن هكذا قلت لنفسى الحمد لله انو السودان بعيد من كوبا.







بنات واولاد المدارس ومشوار المدرسة اليومى على الاقدام( المدارس غالبا ما تكون قريبة من السكن)





فى انتظار البص





وسيلة مواصلات مبتكرة





واخرى قديمة

الاخ هشام المجمر

تحياتى


لعلك فى زيارتك لهافانا
تعرفت على بعض مع خطاه قلم بيدرو خوان
الكاتب الكوبى فى روايته
ثلاثية هافانا القذرة
للمزيد هنا:

http://www.sudaniyat.org/archive1/viewtopic.php?t=187

الاخ احمد امين

شكرا لك

مع عشقى لكتاب امريكا اللاتينية لكنى لم اقرأ لبدرو خوان

كل الكتب هناك بالاسبانية لذلك لم استفد من زيارة المكتبة الوحيدة التى وجدتها فى هافانا القديمة

سوف احاول عن طريق النت الحصول على نسخ من كتب بدرو

لك مودتى

ياعم هشام ((طبعا بعد الصورة الفى البوست )) ربنا اداك فرصة تشوف العالم الجميل الخارجى انا اقول ليك حاجة انت عارف ابعد مكان اصلو فى السودان القضارف لاكن الشى الجميل انو القضارف لو شفتها تقول بس هافانا والله العظيم ربنا اشوفك القضارف فى المطر والله جو اروبى عديل كداا وكمان لو مامشيت حاول امشى البلد دى تانى ما بتجى راجع اشارطك على كده........

المغيرة

سلام

شاهدت القضارف فى الخريف

كنت فى رحلة عمل لكسلا فى اوائل التسعينات وما ان فارق البص كبرى حنتوب حتى دخلنا فى جو غير. امطار تشقشق حباتها على زجاج البص و همبريب جعل فى الخارج جعل بخار الماء يتكثف على الزجاج من الداخل. على مد البصر حول الشارع ترى البساط الاخضر بالوانه المتنوعة وعليه امات خدوديرعين فى غير وجل يتناثرن على البساط الاخضر كما تتناثر لوز القطن بلونها الاخضر المميز جاءن خاطر وقتها هل غنم كل هذه المنطقة بيضاء ونظيفة هكذا وتحسرت على شعبى الذى يعانى من الفاقة ولديه كلهذه الثروة اما عندما عبرنا جبال الفاو بخضرتها المميزة قلت ياود لابد انك اليوم فى اسكتلندا

نعم انها لمنطقة جميلة يا مغيرة فقط لم تكن معى كمرتى فى ذلك اليوم

الطعام وما ادراكما الطعام

الوجبة الشعبية الرائجة فى كوبا هى قطع الدجاج المشوى يقدم مع "بلاك بينز" وهو عبارة عن لوبامطهوة كما يطهى الفول و يوضع فوقها زيت الزيتون ويقدم ايضا مع قطع ثمار الموز المحمرة كما البطاطس بس فى قطع اطول.

اكلة حلوة جدا استمتعنا بها فى هذا المطعم الجميل و الذى يعد من افخر مطاعم هافانا





حديقةالمطعمالصغيرة ويرى الاسم مكتوبا بالاسبانية طبعا





النادلة التى قامت بخدمتنا





ونادلة اخرى من نادلات المطعم