(1) يا معشر سودانيزاونلاين لا يغرنكم ما ترون علي القوقول أيرث من ارض بلقع لا تصلح للاستخدام الادمي , فإنسان العبيدية قاتل بشراسة من اجل استصلاح تلكـ القفار , زرع في (التحتانية) التوم و الفول المصري فأنبت زرعه الحَنان و المحبة في (الفوقانية) فأضحت العبيدية بحمد الله بلدا نباهي بها الاخريات و شعب اباهي به انا .. الملل. الميرفاب* (اهل العبيدية) من شِدة بأسهم و قوة شكيمتهم لم يشتكوا التهميش فالشكية عندهم لاب إيداَ قوية فقط و ليس للحكومات , لازالوا يشربون ماء زُلال من الآبار و يعلوطون الحمير و يتبارون في البُطان و يسكنون سعداء الي ازواجهم لا يشتكون الفقر او الحاجة .. تري الغني في وجوههم ان اثمر المحصول او لم ,, يصنعون من احزانهم افراح و يتواصون بالصبر. مرت عليهم رياح الحكومات المتعاقبة فصنعوا من تجاهلها لهم نِكات سارت بها الركبان , كانت الحملات الانتخابية للبرلمانات تمثل لهم احداث إستثنائية للمة و الونسة فدفعوا بالعنصر النسائي مُرشحا عنهم فكانت (ام كنن عباس النو). من سار منهم علي دين الاباء فقد زرع و من به شبهة طموح التحق تتبعه تمنيات الاهل في وظيفة عامل بسككـ حديد السودان (أتبرا) كـ خراط ان إجتاز اختبارات المهنة, و إن اخفق ففي سوق أتبرا متسعاَ لماكينة خياطة تمنع عنه شر خُفي حُنين فيصير عندها حائكاَ ماهراَ لجلاليب بعراوي و زرائر بأحجام مُختلفة.
عزيزي القارئ الطاهر ساتي و القلب النابض و عماد عبدالله ديل ناس قاصدين انو ينسفوا السلام الاجتماعي الذي اتفق عليه اهلي في العبيدية بمحاولاتهم البائسة اعلاه لدفعنا للثورة علي حكومة الانقاذ الغير رشيدة لكنا في العبيدية اتفقنا علي محاربة النظام وفق برامج الاحزاب السياسية لا عن طريق الجهوية او الاصول الاثنية, فلسنا وحدنا المهمشين في هذا القطر المترامي لذا لزم التنويه
القلب و الطاهر و ود التوم طيب حا اشرح ليكم معني نفافير شنو لو شرحتو لي القصة علي لسان اهل العبيدية
Quote: قامت شكلة بين النفافير و الهدباب الشاهد الوحيد في قسم البوليس كان احد اعمامنا الكبار المتحري : حصل شنو يا عمنا ؟ الشاهد : والله يا ولدي الدِنيا كانت كُبتة الجماعة ديكـ كانو قنيبتات قنيبتات و ديل كانو درديما عديييييييل وفد مره إدقجو بعدين جو الكجر ديل قلبو البلد قُنجة
Quote: ياخى حيكم ده من اسمو بيستحق انو يتهمش ........
حي يا استعلائي يا عاصمي يا مُدجج ؟
حي دي كلمة مترفه هناكـ اسمو (حلتنا) و اسماء باقي الحلال الجنبنا أكان عجبكـ الهدباب - النفافير -النِمر - الطاشاب -القيزان - الحَفاب - المهداب
Post: #6 Title: Re: مولانا خدر .. مهمش خالص Author: كمال سالم Date: 05-27-2008, 00:10 AM Parent: #1
خدر ,, مساك زين ,,
لاحولا ياخدر ,, العبيديه دى أنا زرتها قبل سنوات لتخليص بضاعه تخصنى وصلت من القاهره تصدق بعد رحله شاقه وقاتله من بربر وصلت العبيديه وكنت متخيل أنى حأرجع فى نفس اليوم وصدمت عندما رأيت واقع الحال البائس الذى عشته فى هذه العبيديه والذى يعيشه الناس فى تلك الصحراء الجرداء ,, قضيت ثلاثه أيام وأخيرا ( حردت ) بضاعتى وإلى يومنا هذا لم أستلمها . يأخى والله دارفور ومدنها وقراها بالنسبه ليكم زى جنيف ولوزان ,, خدر إنت مهمش خااااااااااااااالص ,, شيل السلاح ياخى ,,[/B]
عليك الله يا كمال سالم شفت الجو قاسي كيف؟ دا حالت راجي بضاعتك في حوش الجمارك و الله إحنا محل شغالين كنا بنشوف اللواري و الـ (زيد وايات) جمع (ZY) جايية من حلايب و شلاتين وبيرموا نصها في الخلاء عشان يجوها راجعين بعد ما يسلكوا من الجمارك ..... كمال سالم ياخوي ... غايتو بضاعتك دي تكون اتخلصت في خلا العبيدية قبل ما تصل جمارك العبيدية ناس خدر بلدهم خلا ...لكن الناس كيف؟
يا كمال و الله اجاركـ الله في بضاعتكـ .. ياخي تخيل انو نحن بيوتنا بتقع جنب المقابر وهي بالمناسبة اول بيوت في النفافير من جهة الجنوب و المواقع الاستراتيجية في العبيدية هي محطة القطر و كوبري الخور فقط
يعني بعد الصحراء العايشين فيها دي كمان ساكنين في وش المدفع خليل ابراهيم لو جا بي هناكـ قطع شكـ عامل المحطة الوحيد حا يكون اول الضحايا
Post: #10 Title: Re: مولانا خدر .. مهمش خالص Author: سلمى الشيخ سلامة Date: 05-27-2008, 00:29 AM Parent: #8
ا خدر وين للدكة ؟ اها ابوى من الدكة فى بربر عليك الله تعال نخش (الشرام ) بضم الشين ودا حى عتيق جدا فى بربر من ايام التركية تعال نعمل (نضال مسلح ) ضد التهميش تهميش مين يا عمك السودان دا كلو مهمش من حدو لاعدو عليك النبى امشى ورا امدرمان بشوية محل سكنا الجديد بالعربى (امبدة ) التهميش العلى اصله ياخ دى بلد عجيبة وناس اعجب وما عارفين انه كل السودان دا هامش غايتو الزول الا يبقى زى ناس (منى اركو ) ويسكن القصر الجمهورى حتى تنتفى عنه صفة الهامشية لانه دا المركز الوحيد او يسكن مركز البوليس ودا المركز الصاح
Post: #11 Title: Re: مولانا خدر .. مهمش خالص Author: Emad Abdulla Date: 05-27-2008, 00:34 AM Parent: #8
الطاهر .. و ننادي الشفع : يللا يا حبايبي يا حلوين كلنا مع بعض نقول لعمو ود التوم : ( همشك الما ضراااااااك )
............ صورة نفرتكم دي زي الجنبها غابة غابة .. الحاجة الضُلُمة دي .. أدخلوا ياخ
بالله يا خدر طلعت من العبيدية ؟؟ آخر ذكرياتي العملية في السودان كانت في العبيدية ... حيث قمت بتغطية لاحد الزملاء في آخر لحظة .. مع انني كنت قد بدأت أجازتي (بدون مرتب) من الشركة التي أعمل بها و في انتظار تأشيرة السويد إلا ان صديقي استنجد بي لتغطية هذه المأمورية التي تعتبر بيزنيس خاص لأسم الشركة التي أسسها مع اثنين من زملاء الدراسة و كان العطاء لتنفيذ مشروع يخص إحدى شركات التعدين المعروفة بالعبيدية (نسيت اسمها) ..... ذهبت الي العبيدية و معي 4 من الخريجين الجدد (Fresh Graduates ) يعرفهم صديقي (اللي هو صاحب العمل) , مثلها مثل أي قرية موازية للنيل ... قضينا أيام صعبة في الصحراء الواقعة في الشمل الشرقي للعبيدية , لدرجة اني شفقت كثيراً على هؤلاء الشباب نسبة لتأثرهم بالطقس و المناخ القاسي ... و أشهد يا خدر أن بالعبيدية رجالاً صناديد يتحلون بصبر و جَلَد قلما رأيتها في من عملوا معي منذ أن بدأت هذه المهنة الشاقة ... كما لا يفوتني الإشارة الى الكرم و الشهامة و الأدب الجم في التعامل مع الضيوف (أمثالنا) منذ أن بدأت ممارسة مهنتي (هندسة المساحة) .. عملت في عدة مناطق إبتدءاً بالنيل الأبيض كنانة و ربك ... مرورا بالجزيرة ... مدني و القضارف ... ثم الشرق .. كسلا , بورتسودان و سنكات و ختاما بالعبيدية قابلت و تعاملت مع مختلف الأصناف من البشر ... تشاجرت و اختلفت مع بعضهم ... فخسرتهم , و توطدت علاقاتي ببعضهم و صار التواصل بيننا حتى الآن .. و نسيت بعضهم با نتهاء ما كان يربطني بهم .... إلا أن هؤلاء الشباب الذين عملوا معي لم أنسى لهم حسن صنيعهم و معاملتهم لي ... لكن مثل هؤلاء الشباب لا يجدون ما يكفي إحتياجاتهم و يرضي طموحاتهم , فهم لا يقلون عن باقي الشباب الموجود في العاصمة او المدائن الأخرى طالما وصلهم جزء من العولمة سواء كانت الأطباق الفضائية بقنواتها العديدة أو الهواتف النقالة ... (أريبا كانت جديدة الوقت داك ) خلاصة القول يا خدر المهمة فشلت فشل زرييييييييييع لأسباب تقنية بحتة اهما عدم التقدير الجيد من صديقي و شريكيه بالنسبة لحجم العمل و حداثة الشباب الذين بعثهم معي ..... بعد ذلك بأقل من اسبوعين استملت جواز سفري و حزمت امتعتي و جئت الى هنا حاملا معي مرارة فشل المهمة و لكن ما كان يخفف انه لم يكن بسبب تقاعس أو تخاذل فكل إجتهد و أهمال جانب الخبرة أضاع على صديقي و شريكيه بعض الأموال التي كانوا يطمحون ان تكون دافعاً يعين شركتهم و يقوى عودها في سوق العمل ..... سلام للعبيدية - جمارك العبيدية و دهب العبيدية المغربل .....
Post: #13 Title: Re: مولانا خدر .. مهمش خالص Author: نادية عثمان Date: 05-27-2008, 01:19 AM Parent: #9
يلا وبالمناسبة السعيدة دي عليك الله ياخدر تنزل لينا أغنية
لدي ذكريات جميلة في العبيدية وناسها ولطافتهم..الميرفاب .. أهل المختار ود رحمة.. من أعظم المشايخ الدهاة الذين مروا على الإدارة الأهلية..( سمحة القدلة فوق مختار).
طبعاً العبيدية تعتبر أول قرية فيها لوكاندة ( لوكانتدين بجانب المحطة.. ) وذلك لا يعني قلة كرم ، فهم معروفين بالكرم الزائد .. ودائماً يفزعوا ركاب القطر عندما يتأخر .. وأحياناً يأتوا بالذبائح ويطعموا الركاب إذا كان التأخير كثيرا..
في الحقيقة المنطقة خالية من موجبات الحياة.. مما جعلهم يطلقوا اسم الكويت على الباوقة التي تقع بالضفة الغربية لهم من خصوبتها وغذارة الإنتاج فيها..
ومرة جاءت أسرة ذاهبة إلى الباوقة ونظراً للتأخير وجدت البنطون قد توقف بالضفة الغربية.. وإذا لم يأتيه البنطون سوف يطرون للمبيت .. فأمروا النساء بالبكاء عالياً حتى يسمع سائق البنطون.. ويظن أن لديهم وفاة .. وبالفعل لما جاء البنطون ووجد هذا المقلب سألهم لماذا فعلوا كذلك.. لقد ظننا لديكم ميتة فقالوا له ميتة أكثر من المبيت في هذه الغفار..دي ميتة وخراب ديار..
المسافر العبيدية فعلا بلدنا لكنا كمثل اهل السودان ساقتنا المعايش مبكراَ للاستقرار في (اتبرا) حي المربعات حيث خرج آبائي و اخواني وانا الي الحياة هناكـ لكن صلاتنا بالعبيدية لم تنقطع حتي الان طبعا فهي الاصل و نحن امتداداتها.
العبيدية سميت العبيدية بهذا الاسم الذى ينحدر فى الغالب من عدة رويات . الرواية الاولى :- انها مملكة عبيدالله الثانية :- انها سوق للعبيد {عبد إيديه (عنوة)} اهل المنطقة كانو يدفعون دية العبيد الرواية الرابعة :- يقال ان اسم العبيدية كلمة تركية .
الموقع الجغرافى :- تقع فى ولاية نهر النيل شمال مدينة بربر 18 كيلومتر . يحدها من الغرب النيل ومنطقة الباوقة ومن الشمال مبيريكة ومن الشرق حدود ولاية البحر الاحمر ومن الجنوب منطقة الحفاب .
تقسيم المنطقة :- تنقسم منطقة العبيدية الى عدة قرى صغيرة تمتد من الجنوب الى الشمال بالترتيب إبتداءا من : - 1-القمبرات 2-النمر 3-الطاشاب 4-الطريف 5-القيزان / الحقينة / السوق /بانت 6-النفافير 7-الهدباب 8-ودالشيخ
القبائل والتركيبة السكانية :- سكان المنطقة الاصليين هم الميرفاب ويمثلون نسبة 75% من السكان بالاضافة لعدة قبائل منها الجعليين و الرباطاب و والخيراب و والكمالاب و المناصير و البشارين ونوبة جبال النوبة و الانقرياب والكديشاب والجهيماب والمنصوراب
عمودية العبيدية :- تختصر عمودية العبيدية على قبيلة الميرفاب الذى اتو اصلا من منطقة بربر التى يوجد بها الثقل الاساسى لقبيلة الميرفاب . و الصائم كان ملك الميرفاب من نهر عطبرة حتى وادى الصنقير وخلفه ابنه نعيم ودالصائم واكان اكبر ابناء الصائم وكان نعيم ود الصائم ود رحمة ود سويكت ملك العبيدية من البوصة لى الصنفور ومن بعد جاء رحمة ود محمد ودنعيم وبعدو مصطفى وبعده جاء العهد التركى وجابو نظام العمد وكان مختار ودرحمة و مختار كان عمدة العبيدية ثم( ناظر خط) رئيس عمد من نهر عطبرة الى منطقة الكاسنجر فى العهد الانجليزى وخلفة الخليفة وخلفة شيخ الدين الخليفة رحمة .
العادات والتقاليد :- من شيم اهل المنطقة الكرم والشجاعة . تنقسم تراثات المنطقة بانقسام القبائل الموجودة بالمنطقة 1-النحاس الذى يقرع فى الزواج واستقبال الضيوف وقديما فى الحرب ويخص الميرفاب 2-الهجن وهو سباق الابل ويقام فى الافراح والفروسية واستعراض مهارات الابل ويخص القبائل البدوية ( البشارين والجهيماب والخيراب ) 3-وتوجد بعض التراثيات الاخرى التى تشمل خشم بعض البيوت مثل الربابة وهى عزف الطنبور مع التصفيق .
النشاط الاقتصادي والحرفي للسكان :- مهنة السكان الاصلية الزراعة حيث يستقل المزارعون مهارتهم الفردية فى انتاج المحاصيل البقولية مثل الفول المصرى والفاصوليا الحمص بالاضافة الى المحاصيل الاخرى مثال الذره الرفيعة والشامية والخضر والبلح . ومن المهن الاخرى التجارة حيث تعتبر منطقة العبيدية حاليا منطقة حره ويوجد بها سوق ويعتبر من اكبر اسواق الولاية .
موارد المنطقة الطبيعية :- يوجد بها نسبة كبيرة من خام الذهب والمايكه
الخدمات الصحية والتعليمية :- التعليم تاسست اول مدرسة بالمنطقة فى العام 1946 وهى مدرسة العبيدية الاولية والان يوجد بها 8 مدارس للاساس 4 للبنات و4 للبنين واربعه مدارس ثانوية .
الصحة مستشفى القمبرات هو المستشفي العمومي الوحيد بجانب ثمانية مراكز صحية تتوزع على امتداد المنطقة .
والله يا امجد لو فكرنا نهاجم الخرطوم و مع خبرتنا في التعامل مع الصحراء شكلنا ممكن ندخل عادي من شمال امدرمان في شهر 7 قطع شكـ ملانا خدر حا يكون مرطب في القصر الجمهوري خلال ساعات
ندويه حاضر يا ستي نجيب جنا الوزين بعدين انا عاوزك ضروري يا ناديه خليت ليكـ رسالة قبل كم يوم
سلمي شُرام شنو البخشو معاكـ ؟ انت من الدكة في بربر معناها انت من الرئاسة بتاتنا انتو مسئولين عن تهميشنا لانكم المركز انا حا ارقع السلاح ضدكـ موش احارب معاكـ
والله يا غباشي انت سعيد المشيت هناكـ ياخي في ذمتكـ شفت رجال فرسان و كرماء زي ناس العبيدية دي في حياتكـ رغم العنت الشفتهم عايشين فيهو شفتهم بحبو الحياة و متصالحين معاها كيف ؟ ياخي شكرا ليكـ انكـ اجتهدت عشان تعمل حاجة لي اهلي .
تانى شئ: اليشوفك "زمان" تتضاحك و تتراشق مع فلانة و علانة (طبعا مع فلان و علان مافي لا ضحك لا رشاقة) ما يقول من النفافير ... عموما في دورة لندن القادمة اول يونيو لو انا جيت او لأ لازم موضوع النفافير ده يتشاف اخرو شنو. بعدين انت كنت نايم بالاسم ده الوقت ده كلو ليه؟
ياخى انحنا ناس مدنى مجهجهين ... جابت نفافير
Post: #20 Title: Re: مولانا خدر .. مهمش خالص Author: Emad Abdulla Date: 05-27-2008, 09:32 AM Parent: #17
Quote: الشاهد : والله يا ولدي الدِنيا كانت كُبتة الجماعة ديكـ كانو قنيبتات قنيبتات و ديل كانو درديما عديييييييل وفد مره إدقجو بعدين جو الكجر ديل قلبو البلد قُنجة.
الكلمة لغة أهل العبيدية لغة المداينة كبتة مدوبكة كدومبس غبار وظلام قنيبتات مشوبحين مجموعات وقعدات دريديما ملكدمين مجموعة واحدة إدقجو اتفدغو المصارعة الحرة الكجر القمندانية البوليس قنجة كلشة كشة
Post: #24 Title: Re: مولانا خدر .. مهمش خالص Author: القلب النابض Date: 05-27-2008, 11:16 AM Parent: #22
Quo
Quote: te: قامت شكلة بين النفافير و الهدباب الشاهد الوحيد في قسم البوليس كان احد اعمامنا الكبار المتحري : حصل شنو يا عمنا ؟ الشاهد : والله يا ولدي الدِنيا كانت كُبتة الجماعة ديكـ كانو قنيبتات قنيبتات و ديل كانو درديما عديييييييل وفد مره إدقجو بعدين جو الكجر ديل قلبو البلد قُنجة
خلف الله ودجاز من أهل النفافير طلبوا من فى المركز (بربر) أن يقوم بتوصيل زوجة المفتش الأنجليزية ويبدو أن الرجل ضاق بهذه المهمة ولم يراها مناسبة لميرفابى مثله وكان خلف الله ود جاز رحمه الله رجل سليط اللسان وصاحب نكته حاضره ركبت المرأة الأنجليزية الحمار وخلف الله على خماره (يناضمها) ويسبها حنقاً بألفاظ صعبه ظنناً منه أنها لاتجيد العربية ولاتفهمها وقد أخطأ فى ذلك صمتت المرأة على مضض حتى وصلت بربر وهناك أخبرت زوجها بضرورة معاقبة هذا الرجل الذى قال لها كذا وكذا..فى ذلك الوقت رجع خلف الله ودجاز مطمئنناً بأنه أكمل مهمته الثقيلة دون أن يعلم بأمر أخبار المرأة لزوجها بكلامه فى حقها وعواقب ذلك الغضب..سمع رجل من أهل بربر المرأة وهى تحكى ورأى وعيد زوجها وغضبه فذهب من توه لود اللبيه ناظر الميرفاب وأخبره بشأن تلك القصة..وكان الرجل حاجباً لمحكمة ود اللبيه الأهلية طلب من وداالبيه أن لايخضر ودجاز للمحكمة اٍلا فى حضوره فى مجلس المحكمة وأن لايعرضه للمفتش الأنجليزى وحده (المفتش الغاضب والمتوعد) فى الصباح أدخل ودجاز للمحكمة فى حضور ودااللبيه الذى صاح بصوت عالى (الزول ده فكوه من كدباس متين) سأل المفتش (وهل هذا الرجل كان فى كدباس..يعنى مجنون) فأكد له وداللبيه ذلك (فقط لمخارجة خلف الله ود جاز..الذى لم يطق مهمة توصيل مرة المفتش )..تم أخلاء سبيل خلف الله ود جاز من أهل النفافير بخدعة وداللبيه....
حاتم الياس جدنا الاجواد مصطفي كان قليل الكلام طوال حياته ( له الرحمة) لكن كانت تعليقاته لازعه ولدو الكبير و ولد اخوهو مشو الديش عشان يشتغلوا عساكر في البندر (اتبرا) لسه ما تموا الشهر جو راجعين .. شردوا عدييل الاجواد ما قال اي شي و سلم عليهم عادي و نادي علي بتو الكبيرة قال ليها سوي الغداء للضباط ديل بكونو جيعانيين وصارت مثل
Quote: ياخدر..والله أنا زمان كنته قايلك من (نمره أتنين) بالميت (الخرطوم تلاته)
يعني يا ودالياس نحن الا نجأر بالشكوي حتان تهتموا بينا ياخي نحن هامش منتهي عدييل بس فايتين تراجي بالصبر
يا قلب عندي خالي زمان ودوهو البوليس في شكلة التحري سألو قال ليهو متشاكل مالكـ قال ليهو والله انا ماني عارف القجة في شنو علا لقيت اخوي ( ودعمو ) في نصها ودخلت احاميلو
عماد عبد الله كيف حالك.. قلت لى الحله الفوق دى اسمها شنو؟ لاحوله ولا قوه.. يعنى السفرة لى اهل خدر ديل توجب الغسل عديل كده. وبعدين زى ما قال المسطول: السودان ده كلو بالمقلوب.. حتى الخرطة بالمقلوب. ولو ماالخرطه بالمقلوب معقول الدبه فوق والنهود تحت؟؟ خدر انت مهمش اذن انت موجود.. مش قالو فى المثل: المهمش ما بكاتل،،،
بعد ركوب الشفوت عماد عبد الله ومنعم الجزولي و صديق الموج بصك ده يا خدر ياخوي يعوضك فيهو الله، و ربنا يقدرك تعدل اتجاهو تاني وتسوقو للمكان الدايرو .. غايتو النسوان نزلوا!!!
يا صاحب .. ناس ود الموج ديل حلتهم إسمها : فششوية أم طراطر .. من أعمال الفشقة .. عمودية نقزو .
أحمد ربك البقت حلتكم عدييييييييل .. بدون صوت .
..... برر ود الموج ذلك بأن فششوية هي مسمى ( تصييتي ) .. و كذا الشرتمة في تابعتها الطراطر .. ما يستلزم إعمالاً عجيباً في القدوم و توابعه التلاليش .. حتى يمرق الإسم بالسلامة .. و تلك فروسية مستترة تقديرها ( هييييع ) ..!!
Quote: فششوية أم طراطر .. من أعمال الفشقة .. عمودية نقزو .
الله يكرم السامعين
Post: #56 Title: Re: مولانا خدر .. مهمش خالص Author: Osman Musa Date: 05-27-2008, 08:55 PM Parent: #52
حكمة الله الفوقانية .. المقابر .. التحتانية والنيل .. حكمة هنا تكمن الروعة .. __ سبعين سبعة يوم .. عينى ما شافن جمالك .. شلتى نومى _ ست الجمال هاجرانى مالك ؟؟؟؟؟؟؟ ياخدر ده ياهو ودالحوارى اجمل المهمشين فى الأرض . فنان بهيج كما تلك الجروف . يا الله _ اللهم عندما تدعونى اليك فألهم أحبائى أن يدفنونى بين الفقراء والمساكين _
المرحوم ود الحوري كان اسطورة في منطقة الباوقة ام نخيل و قوز العبيدية , رغم اني كحال كل ابناء الافندية لم احظي بالسكن او الدراسة في العبيدية الا انو في عطلات المدارس كانت العبيدية واجب ثابت و كنت اسمع نُتفاَ عن اخبارة و اغنياته و حظيت بحضور حفلات لمقلديه لا يخلو بيت او جرف او زراعة او رعي من دندنات بأغنيات الحوري كان بطلهم و صوت معاناتهم و ترويحهم عن نفسهم بغنائه
من صغير تبيت جِنيْ حالي عُشرة وراضي والديْ داير أدق طمبوري النِقيْ ما بيونسني الليل شوي داير اوصفا سمحة الزي يا الولوف أنا حِن علي قلبي في كرعين الحِدي إنتا نايم وانا جمري حي
اقتفي الفيتوري و صحبه من الشعراء خُطي اهل اغنيات الحقيبه بالترميز في ذكر اسم المحبوبة فالتقاليد حينها لا تسمح بذكر اسمها و في ذلكـ اقتفوا جميعا خُطي الثقافه العربية و ما ورد في الاثر بصدد قيس و العامرية.
وقفتا فوق البحر والفراق قاسي علي ختر البنطون قام بيْ وإنحدر والدموع نازلات كذا المطر الحمام الزازا وقدل الرِهيف العـــام وأنفذر لا فوق وديسو إنبهل دا الأذانا وزاد السهر الصغير من قومة الجهل غير هواهُو أنا ما اشتغلْ الحوري فوقكن شَعر يا اللهيجكن زي العسل الليلة كيف السفر لي ام نخيل يا بلد الغزل
الاغنيه المصاحبه ايضا لم تخلو من الترميز الرقمي الذي تقابله حروف الابجدية كعادة اهل الحقيبة ياحليل البلد يا حليل جميع سُكانا يا حليل ام نخيل والقَدلة في حيشانا يا حليل النِمَر يا حليل فريقنا برانا يا حليل ام مساير الأنجبت رُمانا
70 سبعة يوم عينيّ ما شافن جمالك ست فنوني ست الجمال هاجراني مالك
في الكون جميع ماشوف مثالِك في وشيك بدراً ليلو حالِك سِت فنوني
سِت الحِسان دهرِك صفالِك محمودة بين الناس خصالِك ست جنوني
الحوري قام يوصف جمالِك توب العفاف جابو وكسالِك ست فنوني
شاعر أم زهور غنّا وهدالِك فوق طريقكن قام ماشي سالك ست جنوني ست البنُوت هالكاني مالك
و سبعين تقابلها في الحروف الابجدية حرف العين (ع) و في العادة يكون هو اول حرف من حروف اسم محبوبة الشاعر او الراوي. قرأت قبلا طرفه بمنتديات بربر انو واحد من شباب العبيدية قابل رفيقو في الطريق و قال ليهو هوي يا منير قالو الحوري عندكم الليله في الهدباب رد منير: نان ما تقول جنينا عدييل
ياخ مُهّمش بتاع شنو !! قيل في الأثر .. جاء أحدهم الي صديقه (حامد) و قال : جئتكـ شاكياً .. ( و الشكية لغير الله مذلة ) إعتدل حامد في جلسته المعوجة دوماً و من حوله الغانيات الفاتنات (المُهمشات)* فعدل صديقنا يرثي حاله من تهميش فتاة له مع علمها التام بتعلقه بها .. ضحكـ حامد ساخراً و قال خُذ ما تبقي من الفتيات يا بن أبي الفحل .. ضجر صديقنا بـ صديقه (حامد) و قال : الا تحمد الله يا (حامض) .. ثم نظر اليه شظراً قائلاً : القلب فرّ و قد آن الآوان لتهميشه يا (حامض) ضحكـ حامد من حال صديقه .. و قال : أدركت يا بن ابي الفحل معني التهميش الآن !! .. ... .... إحمد الله علي تهميش حيكم ولا حلتكم ولا حلالكم يا خدر ياخ
_ * هن مُهمشات لأنهن ما تبقي من حصاد ليلته من تجارة غير رابحة. ( وليس تهميش هامش تراجي )
Post: #60 Title: Re: مولانا خدر .. مهمش خالص Author: إسماعيل وراق Date: 05-28-2008, 00:08 AM Parent: #59
مولانا خدر كبير المهمشين .. هزتني أغنية المرحوم الحوري.. .. .. تصحيح معلومة: الميرفاب فرع من فروع قبيلة الجعليين.. .. .. كسرة: يا أخي فكر لينا في طريقة تمرد شريطة أن تتجاوز كل تجارب التمرد الفاشلة.. .. .. سلمت يا جميل.،
Post: #61 Title: Re: مولانا خدر .. مهمش خالص Author: ابراهيم على ابراهيم المحامى Date: 05-28-2008, 02:54 AM Parent: #60
يا عديل ياخي دي حتى الطير رحل خلاها
ويعدين يا خي ارضها مخرمة ليه
لو عاوز تعرف عديلك قوقله google him
مسكينة العبيدية عندما تفقد رجل المحطة الوحيد تحت ضربات خليل
المصيبةانك مهمش وجلابي في وقت واحد في نظر البشتونيين في المنبر وما حا تعرف تقيف مع قوات خليل الداخلة او تقيف ضدها
مدني مركز المهمشان ابراهيم العديل و عصام جبرالله و وحياة خوتكم قوقل ابا يجيب حلالكم ,, كل ما اكتب اسم قراكم يعتذر قوقول مبتسماَ بخبث اخير العبيدية والله علي الاقل فيها محطة قطر يا ابراهيم وسيف بشير يقول ليكـ عصام جبرالله ساكن ارقي احياء مدني يطرشنا ما سمعنا بي زول بلدو الاصلي (ارقي احياء)
يا عديل حقو نملص (نِعلاتنا) ياخي تقديراَ لعمكـ قوقول ايرث الذي جعل ذلكـ ممكناَ و احتراما لاهل الجيلي الكرام تمثلا بالفرنجة وهم يرفعون قُبعاتهم لتحية نساءهم
العبيدية يا عديل ارضها مخرمة من الفيران والله اجاراكـ الله الفيران هناكـ في حجم الكيبورد و اهلي هناكـ يجمعونها جمع تكسير (فوره)
Quote: المصيبةانك مهمش وجلابي في وقت واحد في نظر البشتونيين في المنبر وما حا تعرف تقيف مع قوات خليل الداخلة او تقيف ضدها
موقف فعلا لا احسد عليه لكن قطع شكـ حا اقيف مع عامل المحطة
ناجي المهمش ياخي نحن اخير منكم علي الاقل عندنا محطة قطر
اميرة الشيخ ياخي تصدقي قوقول ايرث و تكذبي اخوكـ حركة مالذيذه منكـ
Post: #62 Title: Re: مولانا خدر .. مهمش خالص Author: أبو ساندرا Date: 05-28-2008, 05:35 AM Parent: #1
Quote: فنان الباوقة و العبيدية عبدالكريم الحوري عليه رحمة الله
قيض الله لي أن اسمعه وكان ايامها يحتل بصوته مساحة شاسعة من تخوم البلاد الشمالية ونهر النيل كنا في حضرة صوته الفسيح المهيب عند منحنى النيل بعد فريق المخازن في صدر الباوقة والدنيا ليل و نخيل و نيل
أسكنه الله فسيح جناته
Post: #63 Title: Re: مولانا خدر .. مهمش خالص Author: أبو ساندرا Date: 05-28-2008, 05:37 AM Parent: #1
Post: #64 Title: Re: مولانا خدر .. مهمش خالص Author: أبو ساندرا Date: 05-28-2008, 05:44 AM Parent: #1
Quote: غايتو الزول الا يبقى زى ناس (منى اركو ) ويسكن القصر الجمهورى حتى تنتفى عنه صفة الهامشية لانه دا المركز الوحيد او يسكن مركز البوليس ودا المركز الصاح
سلمى الشيخ سلامة أم عزة وأختنا
تتجلى
في النيو لوك
والجمال يزيد الذكاء والنجابة أو العكس الذكاء يزين الجمال ويزيده
عيني باردة
Post: #65 Title: Re: مولانا خدر .. مهمش خالص Author: أبو ساندرا Date: 05-28-2008, 05:55 AM Parent: #1
Quote: عماد و منعم و صديق وين باقيكم ؟ لسه ناقصين دكين و دينا
نوبي والله شفرتكـ دي إلا يجي يفكها اساسي نوبي انت من ويين في المهمشين بالمناسبة ؟
Quote: قيض الله لي أن اسمعه وكان ايامها يحتل بصوته مساحة شاسعة من تخوم البلاد الشمالية ونهر النيل كنا في حضرة صوته الفسيح المهيب عند منحنى النيل بعد فريق المخازن في صدر الباوقة والدنيا ليل و نخيل و نيل
الله الله علي بركات لمن يتجلي و يكتب يا سلاام يا سلاام يا سلاام ينصر دينكـ يا فنان
يا بركات .. مشروغ بركات بتاع مدني داكـ ببقي ليكم ؟ ولا انت من مهمشين ويين ؟
Quote: الميرفاب* (اهل العبيدية) من شِدة بأسهم و قوة شكيمتهم لم يشتكوا التهميش فالشكية عندهم لاب إيداَ قوية فقط و ليس للحكومات , لازالوا يشربون ماء زُلال من الآبار و يعلوطون الحمير و يتبارون في البُطان و يسكنون سعداء الي ازواجهم لا يشتكون الفقر او الحاجة .. تري الغني في وجوههم ان اثمر المحصول او لم ,, يصنعون من احزانهم افراح و يتواصون بالصبر.
دا الكلام يا خدر.
Quote: خلف الله ودجاز من أهل النفافير طلبوا من فى المركز (بربر) أن يقوم بتوصيل زوجة المفتش الأنجليزية ويبدو أن الرجل ضاق بهذه المهمة ولم يراها مناسبة لميرفابى مثله وكان خلف الله ود جاز رحمه الله رجل سليط اللسان وصاحب نكته حاضره ركبت المرأة الأنجليزية الحمار وخلف الله على خماره (يناضمها) ويسبها حنقاً بألفاظ صعبه ظنناً منه أنها لاتجيد العربية ولاتفهمها وقد أخطأ فى ذلك صمتت المرأة على مضض حتى وصلت بربر وهناك أخبرت زوجها بضرورة معاقبة هذا الرجل الذى قال لها كذا وكذا..فى ذلك الوقت رجع خلف الله ودجاز مطمئنناً بأنه أكمل مهمته الثقيلة دون أن يعلم بأمر أخبار المرأة لزوجها بكلامه فى حقها وعواقب ذلك الغضب..سمع رجل من أهل بربر المرأة وهى تحكى ورأى وعيد زوجها وغضبه فذهب من توه لود اللبيه ناظر الميرفاب وأخبره بشأن تلك القصة..وكان الرجل حاجباً لمحكمة ود اللبيه الأهلية طلب من وداالبيه أن لايخضر ودجاز للمحكمة اٍلا فى حضوره فى مجلس المحكمة وأن لايعرضه للمفتش الأنجليزى وحده (المفتش الغاضب والمتوعد) فى الصباح أدخل ودجاز للمحكمة فى حضور ودااللبيه الذى صاح بصوت عالى (الزول ده فكوه من كدباس متين) سأل المفتش (وهل هذا الرجل كان فى كدباس..يعنى مجنون) فأكد له وداللبيه ذلك (فقط لمخارجة خلف الله ود جاز..الذى لم يطق مهمة توصيل مرة المفتش )..تم أخلاء سبيل خلف الله ود جاز من أهل النفافير بخدعة وداللبيه....
حاتم الياس ياخي والله انتو الجلابة استهبالكم دا وارثنو وراثة.... الله يكفينا شركم... الله يديك العافية ضحكتنا.
حالياً تسمى امبيريكة وهى محطة قطار شمال القلوباب..المنطقة فى الأصل لم تكن ماهولة بالسكان عدد قليل من عرب المطقة أسره أو أسرتين كانوا هناك لأغراض الرعى..كانت السكة حديد فى بدايتها وحضر مفتش أنجليزى ومعه موظف مصرى لتحديد محطات القطار عبر مسافات معلومة ومخططة سال الموظف المصرى المسؤول عن تدوين أسامى المحطات الرجل الوحيد الذى صادفه فى المكان عن أسم تلك البقعة والتى لم يكن لها أسم أصلاً فى ذلك العتمور لاأحد يعلم عن الظروف النفسية وطبيعة مزاج ذلك الرجل فى تلك اللحظة من ذلك النهار أو الصباح وماالذى جعله يختار ذلك الأسم (زهجاً) أو(مكراً) فقط رد بأن هذا المكان أسمه (قنينيطة)..سجل الموظف المصرى الأسم دون تردد وغادر ومعه المفتش الأنجليزى لمحطة أخرى..أرجو أن يجد البعض فى هذه الواقعة صور من تاريخ المنطقة فى النضال ضد الأستعمار..وليس مجرد (رجل) زهجان التقاه الأنجليز والمصريين فى ذلك (البلقع)..الأن تسمى مبيريكة ويطلق عليها أهل المنطقة بلكنتهم (أمبيريكة) من تلك الجهات..الشاعر الحسين الحسن وشقيقه الشاعر تاج السر الحسن والصحفى أبشر الماحى الصائم..الرجل ينتمى لأهلنا الضياباب
Quote: أرجو أن يجد البعض فى هذه الواقعة صور من تاريخ المنطقة فى النضال ضد الأستعمار..وليس مجرد (رجل) زهجان التقاه الأنجليز والمصريين فى ذلك (البلقع)..
عاشت قنينيطة في نضالها ضد التاج البريطاني و حكومة الحكم الثنائي
لاحظ عزيزي القارئ ان جيلوجيا المنطقة عبارة عن تلال يتوسطها سهل تجتاحة سيول الامطار فقط كي تعلم ان قنينيطة كم عانت بين قسوة الطبيعة و تجاهل الحكومات.
__ اصاب قنينيطة التهميش حتي في اسمها (مخير الله)
Post: #72 Title: Re: مولانا خدر .. مهمش خالص Author: saif basheer Date: 05-28-2008, 10:25 AM Parent: #70
خدوري:
Quote: انحنا ناس مدنى مجهجهين
لاحظ انو القال الكلام دا كان يسكن احد أرقى احياء مدني، فما بالك بأحياء زي "شندي فوق" مثلاً (يوجد في مدني حي بهذا الاسم وربما يكون من اسماه قد تحدر من شندي فوق الاصلية "بتاعت شندي")،،
لكن هذا هو عين التهميش:
Quote: اصاب قنينيطة التهميش حتي في اسمها (مخير الله)
تحيات ليك وللاسرة
Post: #73 Title: Re: مولانا خدر .. مهمش خالص Author: nazar hussien Date: 05-28-2008, 10:44 AM Parent: #72
Quote: مناطق المهمش نزار حسين
يا نزار عمكـ القوقول ايرث لمن غلب حمارو قال لي قول لي صاحبكـ ده اهلكـ عرفو المنطقة دي كيف زاتو ؟
عرفوه لمن كان الناس بمشو بالنجوم والطوالع.......(قالوا جابنهم للمحل دا بنات نعش)
القوقل كان تواضع شوية وعرف بنات نعش...كان نقش تهميشنا....
Post: #75 Title: Re: مولانا خدر .. مهمش خالص Author: Emad Abdulla Date: 05-28-2008, 10:57 AM Parent: #73
Quote: جين كانت العبيدية
Jane Kant ??? عديل كده .. !! بالله الزولة دي برضها عبيدية ؟؟؟ شكلها ما بيقول كده ياخ .. سبحان الله ..
أنا اليوم داك قايلا قنينيطاواوية .. أو بالميت من جهة ناس نزار : تحتانية شديدة التهميش .
Quote: قلت لى الحله الفوق دى اسمها شنو؟ لاحوله ولا قوه.. يعنى السفرة لى اهل خدر ديل توجب الغسل عديل كده.
أضيف لما ذكره ود النحاس إنه الرجل الذي ذكر الاسم للخواجة بنفسه هو شيخ العرب نفسه وذلك عندما سئل عن اسم المنطقة حتى يطلق على المحطة.. وخاصة إن الإنجليز كانوا يحرصون أخذ المعلومة من شيوخ القبائل والعشائر مباشرة.. وغالب أهل المنطقة كانو يسكنون في الجزر ومنها الجزيرة ملو وأم نمل .. ويتوجسون من الضفة الشرقية أصلا .. لذلك غالب سكان الضفة الشرقية قليل.. وهذه المنطقة في الأصل تابعة للإنقرياب (الضياباب ولاد دياب، والجضعاب ولاد الجضع والدفعلاب ولاد دفع الله والقلوباب ولاد قلوبة ) وبها عبابدة وجعليين ومناصير وعرب رحل.. وعندما تم توضيح الأمر للمفتش الإنجليزي وأنه شيخ العرب يقصد إهانة المفتش أصر على تسمية المنطقة كلها بهذا الإسم.. أما إسم مبيريكة أختاره لها جعفر محمد نميري عند زيارته للمنطقة في أول السبعينات لما شرحو له قصة الاسم..
طبعا سمعنا الاسم الجديد في أخبار ود الباوقة بأنه محلية الفاروق النفافير ولاد نفيرات بيت من بيوت الميرفات ( ولاد ميرف ) كذلك ورد في اسم العبيدية انها من اسم العبابدة .. لأن المنطقة بها مشيخة العبابدة.. قرية ود مسعود.. والمحطة أولاً كانت أقرب لهم من أي قبائل أخرى وأن المنطقة بأكملها كانت موضع نزاع بين الميرفاب والرباطاب واستولى على أغلبها ود رحمة بإمكانياته ومعرفته كما قلنا من قبل فهو من دهاة الشيوخ حتى أصبح ناظر خط لكل المنطقة
المسافر والله اني امنت انكـ حُجة في علوم تلكـ الاصقاع ياخي كل ما اقراء ليكـ عن المناطق دي ابكي و احن علي روحي و علي اهلي ديل اها يا اخوي انا تيراب الحسين ود المليح .. كدي بلاهي شوف لي الاسلاف ديل اخبارهم شنو يمكن يكونو قطاع طرق وانا ما عارف .
سيف اليزل المهمش والله ما طالبني حليفة قدرت ما حمت في عمكـ قوقول ايرث ده بفتش لي اسلاف صاحبي نزار ده .. قوقل ده حلف بال.... ام اهلو ما يجيب لي الحلال ديكـ . يا سيف يا اخوي والله نحن مظلومين و مهمشين
Quote: عاشت قنينيطة في نضالها ضد التاج البريطاني و حكومة الحكم الثنائي
خدر مهمشين شنو؟ بلاد الدنيا دى كلها بتنشاف الا بلدكم دى حكمة الله بتنشم.. يعنى بلاد لها عبق..سنه بعدين يا مهمش زى بلدكم دى الا تقع فيها طيارة زى لوكربى حتى تشتهر!!! الله يحرس ليكم قنينيطنتكم دى من كل شر،حتى البواسير...لوووووول اخيرا يا عماد اهل العوض ديل البجيبهم لينا فى الخرطوم شنو؟ ياااااااااااااااى..سوفاج.. انا متاكد خدر ده اختار الهجرة لهولندا عشان الابقار.. حلوة الابقار دى مش؟؟ وش حنكوشى فى شكل ورده،،،
وجيد التحايا .. ( بالله ما تنسى تحفظ لينا حقوق التحية دي )
عارف العبيدية والباوقة إرتبطت عندي بالأستاذ الصحفي قريب الله الجعلي والذي تعرفنا عليه وعلى أسرته بحكم زمالة العمل بينه والخال العزيز عبد الرحمن وبفضله تعرفت أسرتنا على أفذاذ من أهله فيهم من النبل وكرم النفس وتواضع العارفين ما يجعلك تفخر بمعرفتهم وتحيي الديار التي أنجبت أمثالهم،
ورغما عن أن صورة قوقل قطعت قول كل خطيب، فإن واقع ما يسمى ولاية نهر النيل لايحتاج لبعثة كشفية، وأنا لو ما خايف من الفضايح كان حركت مفتش البحث قوقل لمنطقة أهلنا بغرب شندي لكنها ذات الحالة ... الطين اليابس والسموم والصي والصبر بلا حدود. فحسب علمي أن الإنجليز إختاروا تلك المنطقة لقبام مشروع لزراعة وإنتاج القطن فلماذا وقع الإختيار على تلك المنطقة ؤأين المشروع؟!
إتذكرت كاريكاتير للفنان الراحل عز الدين عثمان .. عندما تناول موضوعه زيارة أعضاء مجلس راس الدولة السودانية للتعزية في وفاة إمبراطور اليابان فقد مكث الوفد ثلاثة أيام بلياليها هناك ولما همو لوداع الرئيس إعتذروا بلسان واحد قائلين : والله كنا بنحضر معاكم كسر التربة لكن قفانا أعوج!
كلام في الهامش دحين يا طارق بيني وبينك غناك السمح ده غنا زول مهمش. جيتو الخرطوم ناس قراية بقيتو فنانين ومرقتوها في هولندا عينا باردة .. وطبعا أولاد الخرطوم ماعندهم حسد، فأطمئن ياصاحب.
كوجان .. هاكـ القصة الحقيقية دي في شارع الفيل في امدرمان في زول اسمو (... السدر المُحافظ) و (التسدير) تعني في ثقافة السبعينات كلمة مترادفة لها صوت يُبدي عن بذائة عمنا السدر المحافظ ده افندي محترم و انيق في لبسه و حسن السير و السلوكـ في العموم لكن قاتل الله ثقافة السبعينات
في احدي اجتماعات المحافظ مع موظفيه و بطلنا احدهم سأل كبير المُفتشين المُحافظ سؤالاَ لم يسمعه المحافظ جيداَ (كان كبير المُفتشين ذو صوت خفيض و شخصية مترددة) تسائل المحافظ (آآآ .. قلت شنو ؟) صاحبنا جاتو مُقنطرة فصاح من فوره زوووووووووووووووووووووووووووووووووووووووووط .. طبعا تم فصله من الخدمة بتهمة تسدير المُحافظ
__ صاحبنا لازال يجلس علي كرسي القماش في امسيات الموردة مرددا بفخر انو (سدر المُحافظ).
Quote: دحين يا طارق بيني وبينك غناك السمح ده غنا زول مهمش. جيتو الخرطوم ناس قراية بقيتو فنانين ومرقتوها في هولندا عينا باردة .. وطبعا أولاد الخرطوم ماعندهم حسد، فأطمئن ياصاحب.
والله يا سيف اليزل ما طالبني حليفة .. اخر زول في العصبية حقتنا اتولد في النفافير كان جدي علي ابراهيم عليه رحمة الله بقية العصبية سكنوا اتبرا و من ثم هاجموا الخرطوم في غزوة اللسان الطويل كـ اولاد افندية و من ثم تغلغلنا لمن وصلنا الاراضي المنخفضة في ذمتكـ اخوكـ لو ماكان مهمش .. كان عرفت امرق الغنا ده ؟
ود الموج عندي اجتماع مع قوقول ايرث باقي الليله ده نشوف (نقزو) دي فيها كم بيت يا مهمش و بجيكـ راجع
Post: #89 Title: Re: مولانا خدر .. مهمش خالص Author: فارس موسى Date: 05-28-2008, 04:18 PM Parent: #1
مولانا الجميل المهمش
طيب خليتو لينا منو ندقو ؟
اوعه تقول محمد حسن العمده ؟
لو الوغد جا قال مهمش ..واطة قضيتنا استحمت !!
يلا سيبك من الطبقه العامله نايمه وتعال علينا !
ارقد متفائل
فارس الجلابى
Post: #90 Title: Re: مولانا خدر .. مهمش خالص Author: Osman Musa Date: 05-28-2008, 04:39 PM Parent: #89
يا حليل ام نخيل ... والقدلة فى حيشانا يا خدر تقول لى رى شارلس ؟ وتوباك ؟ ودالحورى هو الدخل الطمبور فى غناء الدلوكة . يا خدر من زمن بعيد بالحيل والناس هناك ربطوا فرع الليمون على فرع البرتكان عشان يطلع يوسفندى . وهسع اليوسفندى فى جناين النفافير . حال الناس هناك ياهو تتمسك بالطبيعة والمكانات التى يجدون في حضنها راحتهم وصفاءهم .. .. كم سنة وعينى ما شافن جمالك شلتنى نومى ؟.. يلعن أبو الكتشب . ...
يا عجوره اول حاجه خدر دا منو ومولااااااانه ده زاتو منو كنا عارفين انك من حته فيها اربعة بيوت ودكان وكلب والكلب زاتو شرد لكن والله لو كنا لقينا صورة قوقل دى كان الا تشرد عديل كده
هدنه..
ازكرك دائما عنما يصدح سيف الجامعة بالرائعه مريم ومى
والله يا عثمان فقعنمي بالضحكـ الله يديكـ العافيه و يسكنكـ المركز
ياوغد
ركز ياخي نحن جنبها أي نعم .. لكننا نعمل في صمت
Post: #103 Title: Re: مولانا خدر .. مهمش خالص Author: Ali Alhalawi Date: 05-29-2008, 00:02 AM Parent: #91
Quote: مولانا خدر .. مهمش خالص
إنتو الشفقة ليكم شنو يا مولانا خــدر .. فى الأول خلونا نحّل مشكلة أهل الهامش .. و بعدين بنجي نشوف مشاكلكم أنتم يا هامش الهامش .. فأصبروا علينا ثلاثمائة سنين و ازدادوا تسعا .. ربما نستطع فى هذه الوهلة أن نبنى لكلّ قصرا
و ضحكت فى هذا الحزن كما ضحك الضبع الكبير .. و الضحك عندنا هنا فى بغداد معصلج .. و لو قدر لبلدوزر أن يسحب منك ضحكة لسحبها بأنين .. فالمعاناة من جفاف الضحك أهون منها معاناة أهل هامش يقتلهم الظمأ و النيل لجموارهم مفتون
و قد إفتكرناكم يا مولانا كاتلين الجدادة و خامين بيضها .. لكنكم طلعتوا مهمشين خالص خالص .. و كاتلين البايظ و خامين النجاض
Quote: ...... بالطريقه الشهيره اليومين ديل حسب الشكله وضيق العباره . . ما عارف قال ..!
الحلاوي المهمش انت ياكافي البلا من تهميش لي تهميش !! اظنو العراق ده ودوكـ ليهو بالخبرة في التهميش ساي يعني يا علي يا اخوي دايرنا تااااااااااااااااااني ننتظر ؟ خافو الله فينا يا اخونا .. نحنا كان قمنا علي عمليات (الزراع العضير) والله بنجهجة باكاتكم الخرطوم و امدرمان دي بي بيتو عزابة الميرفاب الفيها ساي بنجيب خبرها في ساعتين وهذا تحذير لاهل القصر الجمهوري
Post: #94 Title: Re: مولانا خدر .. مهمش خالص Author: انعام عبد الحفيظ Date: 05-28-2008, 10:12 PM Parent: #1
انا تيراب الحسين ود المليح .. كدي بلاهي شوف لي الاسلاف ديل اخبارهم شنو يمكن يكونو قطاع طرق وانا ما عارف
حباب المليح
أولاً أهل العبيدية ما فيهم همباتة ... وهم ناس مسالمين ودودين لدرجة كبيرة ويتميزوا بالوعي وقبول الآخر لذلك تجد مختلف القبائل من أصل المنطقة .. وطريق القوافل ينزل عندهم ومنطقة وادي الحمار معروفة من القدم منزلة للقبائل في موسم الزراعة.. إضافة إلى أن طريق القوافل القديمة يمر بوادي المقدم ثم وادي الحمار ثم وادي العشر حتى سواكن ، ووادي المقدم هي تفرع من درب الأربعين
والحقيقة يوجد في العبيدية أشراف ( ما سائلين في الجمل ولا الجمالي )وهم منتشرين في قرى صغيرة تبدأ من منطقة العبيدية وحتى بربر وتتخللها كذلك مناطق خاصة بالنوبة..والعنج أهل المنطقة الأصليين..
كان معنا أحمد المليح في عطبرة الثانوية .. وفي الخرطوم أنا دفعة نعمات ومعتصم الجعيلي..
بالإضافة إلى المعلومات يشترك أهل هذه المنطقة بثقافتهم الجنسية العالية .. باريسيين عدييييل كدة.. ولا يترددوا في الخوض في أية مواضيع بل يحترموا الحرية الشخصية في العلاقات ربما يرى البعض في ذلك نوع من الإباحية( وهنا يقصد بها سهولة ويسر البوح بما يجيش في الفؤاد والنفس والجسد)..وهناك رابط مشترك بين ضفتي النيل في تقدير الحب والعلاقات بين الجنسين المتميزة والمترفعة والعذرية.. وصفات لا توجد إلا عند أهل البادية..
يا ناجي اعمل حسابكـ القوقول ايرث ده ممكن يسختكـ ما تقطع فيهو بسمعكـ بعدين القوقول ايرث ده ممكن يتجمل لكن صعب انو يكذب
__ اهو حلتكم كلها 19 بيت و 4 شجرات
Post: #102 Title: Re: مولانا خدر .. مهمش خالص Author: Osman Musa Date: 05-28-2008, 11:46 PM Parent: #101
الكلام ده يا خدر مكتوب فى جريدة ال NEWSWEEK ..تتنافس الشركتان العملاقتان غوغل ومايكروسوفت فى تطوير صورة العالم على الانترنت فبعد أن نقلت غوغل صور كثير من المدن والمشاهد الطبيعية البارزة الى الانترنت تحت اسم GOOGL EARTH باشرت التخطيط لنقل المشاهد الى مناظر كانت ماثلة قبل مئة سنة . اما مايكروسوفت فقد عمدت الى أنشاء الأرض الافتراضية بثلاثة أبعاد VISUAL EARTH 3D فأنجزت منها 15 مدينة وهى بصدد اتمام المهمة لتشمل مئة مدينة أخرى وكذلك لايضاح مشاهد الشوارع والمبانى التى تقوم فيها . بل لتقود السائق فى الشوارع المصورة الى المكان المنشود .. يا خدر غوغل داير يجيب ليك المهمشين من قبل مئة سنة زمن كان الكباب طاعميه والحلو بقنيه . خدر عليك الشيخ الجعلى انقل المهمش زولنا ودالحورى لى الصفحه دى .
عثمان يا فنان اختنا نادية عثمان طلبت (نوم العين) ولا يرد لكريم امر ,, نحن مهمشين اي نعم لكن كمان جنتيل مين و فرسان و انت سيد (العازفين ) و برضو ما مشينا بعيد من الحوري مع حفظ المقامات , الشايقية اولاد عمنا و برضهم مهمشين زينا واحد
__ جني الوزين اشعار الراحل حسن الدابي الحان الراحل النعام ادم صوت طارق ابوعبيدة
Post: #109 Title: Re: مولانا خدر .. مهمش خالص Author: سيف اليزل الماحي Date: 05-29-2008, 11:20 AM Parent: #1
نزار حسين كتب : ( ولا تتعب....محرك البحث في الحتات ديك بركن عديل كدي...أسعلني وأسعل خدر سيد البوست دا... )
العزيز نزار .. ( عناية طارق أبوعبيدة ) وجيد التحايا
إنت سيد العارفين .. جملة هذه القرى أضحت مهجورة بفعل قسوة الحياة، فخيرة شبابها تركوها للبوار وحواف الموت البطي .. ولا يسألون الحكومات إلحافا، وبقية من إرتبطوا بتلك الأرض ولازالوا يكابدون ضنك الحياة يصنعون وجودهم من العدم، ومن البوار والجدب والمحق ملاذا للضيف والمحتاج والضعيف وما بدلوا تبديلا .. جدنا الرحال طه الماحي عطر الله سيرته .. كان عندما يضرب المطر جهة الشمال يقول : هلا هلا واطاتنا البعيدة شربت، أعمامنا بعد رحيله الفاجع، توقفوا جهات كبوشية والزيداب لحصر ماعنده من أطيان .. وقطع شك لو ضربوا شمالا ربما بلغوا بربر والعبيدية حتى الكاسنجر .. مقام جدنا العارف التقى الورع الشيخ حاج الماحي!!
م كل ذلك..هنالك نماذج من الرجال نادرين ولابد أن نحكى عنهم سليم على أحمد رحمه الله..دمر السيول والفيضانات قريته القمبرات...وحده قام ببنائها..منزلاً منزلاً وبنى مستشفى والمدارس بجميع مراحلها..غادر هذه الحياة وهو لايملك الكثير...
طارق جبرين ليكـ وحشة والله يا مهمش يا زول والله الشمال ده بس امرق من الخرطوم بحري دي جت عليهو مهمش
تعرف يا سيف المحيرني في الحرابه دي كلها انو اهلنا ديل عمرهم ما اشتكوا زمان في اجازات المدارس بنكون متشوقين نمشي العبيدية لكن وحات خوتكـ اسبوعين بكون الشوق اتبل و يارب متين نرجع التقول الخرطوم دي فيها الماكدونالد فعلا والله السودان فيهو شعوب مهمشة و قنوعه ما راجية خيرا في الحكومات لكنها راجيه فرج الله
Post: #114 Title: Re: مولانا خدر .. مهمش خالص Author: Osman Musa Date: 05-29-2008, 05:02 PM Parent: #112
جنى الوزين لو طار أو لو عمل لجو سياسى برجع برجع تهميش تهميش مناقير جنى الوزين التى ارتشفت من عذب ماء ذاك النهر لابد لها أن تفرتك اعشاش الهجرة تهميش تهميش قنقوش وكسبره وتمرتين ولا الامبير استيت يا خدر ... عليك الشيخ فى أجمل من أنو يكون املاكك فى الدنيا سلوكه وطمبور وحالك مستور ؟ انشاءالله يا حسن الدابى يعود جنى الوزين . تحياتى
كنت كل يوم بدخل البوست اشوف جنى الوزين طار ولا لسة
والقى خدر ما نزلها
ولكني وجدت بعض القوم عاسو في البوست عواسة ما عجبتني والحمد لله في الصفحة التانية .. غطت عواستهم
وارجو ان لايعوسوا في ذا البوست الرائع ..
ودا الكلام اليوزن دهب
Quote: المحيرني في الحرابه دي كلها انو اهلنا ديل عمرهم ما اشتكوا زمان في اجازات المدارس بنكون متشوقين نمشي العبيدية لكن وحات خوتكـ اسبوعين بكون الشوق اتبل و يارب متين نرجع التقول الخرطوم دي فيها الماكدونالد فعلا والله السودان فيهو شعوب مهمشة و قنوعه ما راجية خيرا في الحكومات لكنها راجيه فرج الله
عارف ياخدر واطاتم دي عندهم بالدنيا
وبيشوفو البتتصدق بيه عليهم الحيكومات دا شئ موهيلهم ..
Quote: عارف ياخدر واطاتم دي عندهم بالدنيا وبيشوفو البتتصدق بيه عليهم الحيكومات دا شئ موهيلهم .. الهيلم دا ياها واطاتهم دي .. ناس قنوعيييين حد الزهد .. عزيزين حد العز عينونهم مليانة وتريانة رغم الفقر ياخ شكرا على " مادام طار جنا الوزين ..
يا قلب سلامات و شكراَ للإطراء بصدد جني الوزين
في العبيدية دي ذاتها , اذكر انو الزبير محمد صالح كان قد سن قانون بصدد المحاصيل إبان الحرب مع الحركة الشعبية لدعم الجهاد .. اطلق اهالي العبيدية النكتة الشهيرة ( تلتو للسيل و تلتو للطير و تلتو للزبير) مما يعني انهم لا يجنون ثمرة ما تعبوا في زرعه و رعايته ده بوري ظلم الانقاذ و تشبثها بي كراسيها علي حساب مواطنيهاو برضو بوري انو اهل العبيدية براهم ما حا يسقطوا حكومة و دي حكمة اهل الهامش و تجاهل اهل السياسة. و دي بالضرورة لا تعني الاستسلام او الخضوع ,, و لهم في محاربة ذلكـ حيل و روايات. اهلنا او اهل الهامش جميعا لا حيلة لهم إلا من خلال صناديق الاقتراع لا يعرفون كيف يمكن ان ينظموا انفسهم ضد حكومات لا توفر لهم ابسط مقومات الحياة فذلكـ واجب الاحزاب او الاجسام السياسية. لكن خذلان الاحزاب لهم لا يعني ان اهل الانقاذ انضف الحلول الوسخانة وصمت الهامش لا يعني بكل تأكيد الموافقة. انا ضد الانقاذ لكثير من الاسباب لكن اهمها في تقديري انها ضد الانسان(مركز و هامش).
Quote: لكنا في العبيدية اتفقنا علي محاربة النظام وفق برامج الاحزاب السياسية لا عن طريق الجهوية او الاصول الاثنية, فلسنا وحدنا المهمشين في هذا القطر المترامي
ههههههههههههههههههههههههههههههههههها
زكرتنى يا خدر لما زار عمر البشير ام ضريوة وبكرة خرجت علينا كل صحف الخرطوم
بمانشيتاتها العريضة اهالى ام ضريوة يتوعدون امريكا !!!!!!!!!
والله جد !!
Quote: جني [B]الوزين[/B] اشعار الراحل حسن الدابي الحان الراحل النعام ادم صوتطارق ابوعبيدة
ياااااااااى يا خدر ،،،، كلهم بيعضو؟؟؟؟
ـــــــــــــــــــــ مولانا اذا كانت مشاكل الاقتصاد و التنمية والرفاه قد القت بظلالها على كل السودان
شماله وجنوبه شرقه وغربه .... فهذا لن يجعلنا ننسى ان الغرب والشرق والجنوب قد نالو حظهم من التهميش ،،، منذ قرون طويلة ثم بالاضافة الى التهميش الاقتصادى حتى لو اامنا انو مشترك ،، فقد عانت بقية اقاليم السودان الاخرى تهميشا مزدوج دعنا نقول انه ذو قوة ثلاثية
1_ تهميش اقتصادى + تهميش اجتماعى + تهميش ثقافى
وهما اى الاخيرين الاخطر ( لانو قالو الجاتك فى مالك سامحتك يا مولانا )
اعرف تماما انو مولانا يدرك خطورة هذين التهميشين الاضافيين الذين يعانى
منهم بقية اهلنا فى السودان ولم يقصد اطلاقا التقليل من او تمييييع قضيتهم
فامنعوا الفوضى يا جلابة ( وجه خايف من بشاشا)
فليعلم الجميع ان لتراجى قضية جادة وحقيقة لا تنتقص من قضاياكم شيئا
ــــــــــــــــــــ تراجى !!! صحبتنا دى لقيتيها ماشه كيف
وبيشوفو البتتصدق بيه عليهم الحيكومات دا شئ موهيلهم ..
الهيلم دا ياها واطاتهم دي ..
ناس قنوعيييين حد الزهد ..
عزيزين حد العز
عينونهم مليانة وتريانة رغم الفقر
ياخ شكرا على " مادام طار جنا الوزين ..
[URL] [Profile] [Edit] [اضف رد]
القلب النابض تحياتي عارفه اهلنا البساط وظراف كما النسمه بخافوا من شنو من شر الحيكومة الواحد كان بتمني ان الحيكومة تخدمه لكن الان الدعاء يقول اللهم كفينا شر شفوت الدين اللهم كفينا شر البشير وزمرته الفاسده وديل اهلي علي مرمي حجر من قرية البشير التي دفنتها رمال الزحف الصحراوي وحلتنا لم تصلها الخدمات المويه والكهرباء بعد
ولا دنيا قد عملنا
فاليعد للدين مجده او فالترق الدماء هل ناس دي ثقافتهم/ن منتظرين منهم ايه لعن الله الدولة الدينية التي اشاعت الفساد وخربيت ومزقت البلاد
Quote: مولانا اذا كانت مشاكل الاقتصاد و التنمية والرفاه قد القت بظلالها على كل السودان
شماله وجنوبه شرقه وغربه .... فهذا لن يجعلنا ننسى ان الغرب والشرق والجنوب قد نالو حظهم من التهميش ،،، منذ قرون طويلة ثم بالاضافة الى التهميش الاقتصادى حتى لو اامنا انو مشترك ،، فقد عانت بقية اقاليم السودان الاخرى تهميشا مزدوج دعنا نقول انه ذو قوة ثلاثية
1_ تهميش اقتصادى + تهميش اجتماعى + تهميش ثقافى
وهما اى الاخيرين الاخطر ( لانو قالو الجاتك فى مالك سامحتك يا مولانا )
اعرف تماما انو مولانا يدرك خطورة هذين التهميشين الاضافيين الذين يعانى
منهم بقية اهلنا فى السودان ولم يقصد اطلاقا التقليل من او تمييييع قضيتهم
فامنعوا الفوضى يا جلابة ( وجه خايف من بشاشا)
فليعلم الجميع ان لتراجى قضية جادة وحقيقة لا تنتقص من قضاياكم شيئا
يا شابات و يا شباب عن اذنكم ارد علي اختكم دينا دي في الاول البوست دة انا فتحتو عاوز زول يجي يقول لي الكلام القالتو اختكم دي .. فـ معذرة لتجاوز ترتيب الردود
دينا يا اختنا و اخت تراجي صاح انت صديقة عزيزة و ده علي العين و الراس وانت عارفة لكن سودانيزاونلاين دي البتكتب فيها في البوستات دة لا إيدنا لا كراعنا بتحسب علينا صراع فكري مافي زول قال انو تراجي قضيتها ما عادلة وقع ليكـ ؟ (و راجعي البوست من اولو لحدي اخرو) و قبل ما تراجي دي تجي سودانيزاونلاين نحن اتكلمنا عن ما يحدث في دارفور وبعد ما جات تراجي نحن لسة بنتكلم و حا نتكلم عن دارفور و دارفور ما فرض كفاية يا دينا خالد اذا قال بها البعض سقطت عن الباقين لكن كمان برضو بربركـ دي مهمشة من زمن طوفان نوح و مناطق النوبة في الشمال مهمشة و مناطق النيل الازرق مهمشة .. الخ ,, دي يا دينا معادلة المركز و الهامش الشهيرة و ظلم الحكومات ولا نقول إلا ما يُرضي الله ما حدث في دارفور يجب الوقوف عنده دونما المساس بحق المناطق المُهمشة الاخري .. و في ذلكـ لسكان تلكـ المناطق الحق الكامل في التضجر او الثورة او اعتناق مبداء قليلو رايح و كتيرو رايح , لا ينقص ذلكـ من حق الاخرين شيئاَ. البوست تزكره لجميع اهل الهامش انو فكرة (تولا*) ما بتنفع و انو يجب ضبط المصطلح.
Quote: فقد عانت بقية اقاليم السودان الاخرى تهميشا مزدوج دعنا نقول انه ذو قوة ثلاثية
1_ تهميش اقتصادى + تهميش اجتماعى + تهميش ثقافى
وهما اى الاخيرين الاخطر ( لانو قالو الجاتك فى مالك سامحتك يا مولانا )
جني و جن الاستسهال المعرفي دة يا دينا لانو القضية اخطر من مولاكـ خدر و من تراجي منو القال ليكـ انو الشمال المهمش ما نال حظو الوافر من التهميش الاجتماع و الثقافي ؟؟؟؟ والله الا لو كنتي حا تحسبي لينا حلقات (ربوع السودان) للراحل الطيب محمد الطيب و كتر خيرو عمنا الطيب محمد الطيب المُصنف جلابيا وفق فقه تراجي لانو برضو ما نسي يوثق لقبائل غرب السودان في ثقافاتها و طلعنا درون يا مولانا دينا. - حصل شفتي تقافة اهل الشمال بتفريعاتها جعليين - شوايقة - نوبة (محس / دناقلة/حلفاويين) تمشي علي قدم و ساق في اجهزة اعلام حكومة الانقاذ او ما غيرها من السابقات؟؟؟؟ - هل شهدت تفضيل يمكن ان يحسب لصالح مهمشين الشمال ضد مهمشين الغرب او الجنوب او الشرق ؟؟؟
Quote: فليعلم الجميع ان لتراجى قضية جادة وحقيقة لا تنتقص من قضاياكم شيئا
مافي زول قال انو تراجي قضيتها ما جادة (هذا مع اقتناعي التام ان اصحاب الوجعة الحقيقية لا يسلكون طريق تراجي و من لف لفها بالمنبر) فقضايا عادلة مثل قضية اهل دارفور لا يجب التعامل معها بما تري و اري و ترون الان. ما نفعله نحن بمثل هذه البوستات هو لفت الانتباه و فكرة فقه اللبيب الشائعة و المابفهم بنقولها ليهو في وشو فكرة التهميش عامة في العالم الثالت و اسبابها يتفرق دمها بين ضعف الاقتصاد او طمع اُولي الامر ودة موضوع ما داير ليهو درس عصر .. الداير يحارب معانا الانقاذ دي وفق اجندة سياسية مرحب والداير ينقلنا لمربع الجهوية و العرقية تاني نحن بنقيف ضدو هو في الاول و بعد داكـ بنرجع تاني لحرابتنا مع انقاذ السجم دي البتحرك فيكم كلكم زي قطع الشطرنج فـ إنتبهوا يا أولي الالباب.
_ * تولا = الرويحة او الرقبه او بلغة اهل المركز (الانا)
عثمان خطاب حسن احمد قال يا سرب العصافير الضال البعترلو في بركة و تشرع مناقيرو تتعاركـ اكتب , اهو الافق قدامكـ اكتب
صابر شكراَ علي المتابعة و المشاركة
Post: #124 Title: Re: مولانا خدر .. مهمش خالص Author: القلب النابض Date: 05-30-2008, 00:23 AM Parent: #123
Quote: في العبيدية دي ذاتها , اذكر انو الزبير محمد صالح كان قد سن قانون بصدد المحاصيل إبان الحرب مع الحركة الشعبية لدعم الجهاد .. اطلق اهالي العبيدية النكتة الشهيرة ( تلتو للسيل و تلتو للطير و تلتو للزبير) مما يعني انهم لا يجنون ثمرة ما تعبوا في زرعه و رعايته ده بوري ظلم الانقاذ و تشبثها بي كراسيها علي حساب مواطنيهاو برضو بوري انو اهل العبيدية براهم ما حا يسقطوا حكومة و دي حكمة اهل الهامش و تجاهل اهل السياسة. و دي بالضرورة لا تعني الاستسلام او الخضوع ,, و لهم في محاربة ذلكـ حيل و روايات. اهلنا او اهل الهامش جميعا لا حيلة لهم إلا من خلال صناديق الاقتراع لا يعرفون كيف يمكن ان ينظموا انفسهم ضد حكومات لا توفر لهم ابسط مقومات الحياة فذلكـ واجب الاحزاب او الاجسام السياسية. لكن خذلان الاحزاب لهم لا يعني ان اهل الانقاذ انضف الحلول الوسخانة وصمت الهامش لا يعني بكل تأكيد الموافقة. انا ضد الانقاذ لكثير من الاسباب لكن اهمها في تقديري انها ضد الانسان(مركز و هامش).
عارف يا طارق لو الناس دي بتتناقش بي طريقتك دي
كان كل زول شال خرتايتو فوق ضهرو ومشى دارفور وشاف بي عينو وكان توحدت قضايانا مزارعين ورعاوية..في القِبل الأربعة...
وتبنى خطاب معتدل مش رد فعل لاستفزازات لا تعالج الاشكال بقدر ما تخلي الزول يؤجل قضايا استراتيجية لصالح ردة فعل جانحة ..
وفي دي باقيلي كلنا مقصرين ..
هنالك هامش حريات لا يرضي الطموح ولكن يمكن بالحكمة استغلاله لصالح المهمشين " مع قناعتي انو السودان كلو هامش".
هامش الحريات دا بيخلينا نفكر في أدوات التغيير لتوزيع السلطة والثروة بإعمال الدستور ...
والناس بتفتكر توزيع السلطة دا إلا تبقى وزير .. لا توزيع السلطة دا انك يكون عندك الحق تختار وتختار على كافة المستويات
عندك الحق انك تخلع من لا يقوم بدوره على اكمل وجه وعلى كافة المستويات.
عندك الحق نحاسب .. وتحاسب اي زول من اعلى منصب دستوري لاصغر موظف بيقدم للمواطن خدمة ..
التساوى دا بغير الاسم طوالى ما ببقى اسمو تهميش عندو اسم تانى وعشان الاستسهال المعرف البتعمل
فيهو دا مما بوريك اسمو تمشى تفتشو براااااك
Quote: حصل شفتي تقافة اهل الشمال بتفريعاتها جعليين - شوايقة - نوبة (محس / دناقلة/حلفاويين) تمشي علي قدم و ساق في اجهزة اعلام حكومة الانقاذ او ما غيرها من السابقات؟؟؟؟
افوو ,, افوووو.. يا خدرنا الكلام دا ماااا بشبهك ؟؟؟ شفنا ونص وما بنغرق ذمتنا .. تمشى على
قدمين وساقين كمان ،، وهو فى شنو غيرها؟ ... الدينكاوى ذاتو ما بصل التلفزيون الا يشيل طمبور ويغنى شايقى
مش فى اجهزة الاعلام وبس دى قابضة على وجداننا من التلقين والترديد براها دون شريك
اها اسال زملاءك الفنانين عشان يجيزو صوتك فى الاجهزة القومية الامتحان بى اغانى الحقيبة بغض النظر عن انك جنوبى ولا من الشرق ولا الغرب .... دى سياسات موجودة لازم تتغير
عشان يحصل الانصهار والتلاقح والوحدة البتثريها اختلافاتنا وتنوعاتنا البنتكلم عنها
بس الغتغته الكلمك عنها فارس دى ما تطنشها ... والكلام دا ياخدر انا عارفاك عارفو بنلوكو
كل يوم وبنضهب منو ... واول من اعترف بيه وحاولو تغيرو هم مثقفينا والمستنيرين من الشمال ... لكنو ظل شعارات ماعندنا مصلحة نحن المستفيدين من تغييرها .. اها هسه لما اهله ناس الوجعه قاموا عليها عليك الله ما تكون انت من البعتروا ليهم !!
Quote: هل شهدت تفضيل يمكن ان يحسب لصالح مهمشين الشمال ضد مهمشين الغرب او الجنوب او الشرق ؟؟؟
نعم شهدت ,,, وعارفه الكتير كان ياهو دا غلاطك بغرقك امثلة
كتب بروفسير محمد الامين التوم فى كتابه عن التعليم فى السودان انو عدد مدارس الاساس فى محليه واحدة
من محليات الاقليم الاوسط اكتر من عدد المدارس فى اقليم دارفور المترامى الاطراف كله ، وعدد سكانه لامقارنه
بينها وبين كل تلك المحليات مجتمعة !!!!!!!!!!!!!!!!!
ما دايرة اقول بى كلامى دا انو ناس الاقليم الاوسط فى رفاة وبطر تعليمى وصحى واقتصادى ،،، لا
انا عارفة انو ناس هذا الاقليم يرزحو ما زالو تحت تخلف وامية وفقر بيئى وصحى واقتصادى لا حد له
ولكن هذا لايمنعنا الاعتراف بانهم نالوا حظهم من الفرصة المتاحة الشوووية دى على حساب ناس اخرين
كان يجب ان يقسم المتاح دا بالعدالة بينهم ..........
Quote: الداير يحارب معانا الانقاذ دي وفق اجندة سياسية[/U] مرحب والداير ينقلنا لمربع الجهوية و العرقية تاني نحن بنقيف ضدو هو في الاول و بعد داكـ بنرجع تاني لحرابتنا مع انقاذ السجم دي البتحرك فيكم كلكم زي قطع الشطرنج
كلام ذى العــــــــسل !!!
طيب الاجندة دى فيها بنود ؟؟؟ فيها برنامج عمل ؟؟؟ ولا صندوق مقفول ؟؟؟؟
اولا بنود الاجندة يجب ان ترتب حسب الاولويات عشان كلامك الملولو دا ح يكون
اول اسباب نسفها .... يجب ان يكون فى اعتراف وااااضح وصريح بمشاكلنا عشان نواجهها
من غير الاعتراف دا ... ح ننفخ فى قربة مقدودة ،،، اذا كانت الاجنددة السياسية دى
ياها ذاتها الاجندة القديمة البتقدم مصالح الاحزاب دى على مظالم اهلنا وعذاباتهم ،،، هادى طرفنا
منكم حاربو براكم .... اذا كانت وضع مشاكل ناس الغرب والجنوب والشرق والاعتراف بانها الافدح والاعظم دا ياهو القبلية والجهوية .... حربكم دى ح نولى منها يوم الزحف ياخوى
مااااافى يا طارق حل قبل ما نعترف بالمشكلة ذاتها وماااا ترجع تتحوى فى شرح مظالم اهلنا
فى الشمال دا نحن ما اختلفنا فيهو لكن الافدح موجود وين ؟؟؟ وبداية الحلول بتبدا من الاكبر
للاصغر ... ودى عندكم فى العالم المتحضر ختوها قدام عيونهم اووولا واعترفوا بيها وعملوا لى معالجتها بتدابير ايجابية كمان .... مش خلوهم ينمو بى راحتهم حتى بعد ازالة التهميش ....
اخيرا يا خدرنا لك ان تعلم ان قطع الشطرنج وحدها هى من تملك تحقيق النصر او الهزيمة سيظل عشاق
اللعبة والمشجعين من خارج رقعة الشطرنج متفرجين لا غير اسمهم المشاهدين ... بياثرو سلبا او ايجابا
مرات بقوة حضورهم وحكمتهم وسيظل امر النتيجة تتحكم فيه تلك القطع ومن يحركونها ...........
ــــــــــــــــ الليلة ال وحد خطاب خدر مع الجماعة دا .... الله لا جاب اكبر منو !!!!!!!!
Post: #125 Title: Re: مولانا خدر .. مهمش خالص Author: فارس موسى Date: 05-30-2008, 06:07 AM Parent: #1
Quote: جني و جن الاستسهال المعرفي
سجيلى خدر... وأسأل عضوية البورد عن معنى سجيلى حيعرفوا معناها 5 دا جوهر التهميش الثقافى
الحاله دى مفرده من ثقافة زول متهم بتحالفو مع مؤسسة الجلابه يعنى لو قلتها بالفوراوى او
القبيله خوفا من الة الدوله التى طورتها مؤسسة الجلابه لحدود التحالف مع الاجنبى لبيع مواردنا
ظاهر وباطن الارض واعملت اسلحة حلفائها المدمره فى قتل وبطش إنسان السودان والقتل هنا نعرف
اين وتعرف انت اين هى مقابره مذ 50 عاما !
فيا خدر يا صديقى المهموم ومنتمى وزول دافع حقو فى المعمعه دى تغريب وتشريد ما تحرد بص النضال
عشان شتيمه هنا ولا هناك من ضحايا !! وإنت خشيت فى نعال الضحيه وإمكن لليله ما طلعت منها ،فلا
تتراجع ، ورزاز شتائم بعض من جماعتنا (الضحايا الجد جد) ناس الهامش اخير من ناس التكفير
والضبح والسحل والشتم باقذر من ما يشتم به الضحايا المنفلتين هنا ( وطبعا يا فطن إدانتى للشتم
ماداير يزايدنى فيهااحد )
لكنى اعطى نفسى الحق الكامل فى شتم فكرتك وطرحك الفطير دا السميتو ليك غتغته وغتاته!!
راجع كتاب السودان حروب الموارد والهويه للدكتور المفكر محمدسليمان محمد ،إستهلال وتقديم
استاذنا الرجل الموسوعى(دى صاح كده ؟) الدكتور صلاح ال بندر عضو المنبر . وتعال صاد قولى مافى مؤسسه
جلابه .. ولا حتى إتجرأ يا طارق يا رفيقى تقول لى كلنا فى الهامش سوا!!
اخدنا موضوع العبيديه من منحى معرفة بقعه عزيزه من بلدنا بنتموا ليها ناس سودانيين مساكين وطيبين
لكن لا نسمح بأن نترك احدا يساوى تهميش العبيديه بإزالة شعيريه من على وجه البسيطه وقتل نصف
اهلها وطرد الباقين ..
مالكم كيف تحكمون ؟؟
وارقد منتمى ومهموم .
صديقكم الجلابى فارس موسى (مواليد ام درمان ،ترباية ام درمان ،ثقافة ام درمان )
Post: #126 Title: Re: مولانا خدر .. مهمش خالص Author: Emad Abdulla Date: 05-30-2008, 07:41 AM Parent: #125
الليييييلة .. و الليلة .. إتلموا عليك .. دينا كنموذج لحنكوشة وسطية و جلابية و مستنيرة .. و ربيبة المركز .. و فارس موسى كمحمش و أغبش و طرفي و مستنير .. برضو ربيب المركز .. ( نقطة إلتقاءهم : الإستنارة في المركز .. زي البزازة في القزازة ) .. حكمة الله إنت محمش أكتر منهم الإتنين .. و محمش بالأصالة كمان .. و فرض عين .
أنا غايتو دنقلاوي .. غاية قدرتي في الشمطة دي يا مستعرباتية مستعلواتية إنو أنهركم كلكم : ( حامش مين مركز مين حمار قديم مين ؟؟ .. شيل الإسم إيه ده بتاعكم و .. بره )
....... يا خينا .. كده ما شغال معانا .. أرجعونا لحلتكم الفوق أم إسماً كعب ديك .. خلوها تلمنا على كلمة .. حلوة و متسامحة .
يا زول صلي علي حبيبكـ .. سقتنا في شارع بعيد خلاص هيمنة مؤسسات الجلابة دي (اسجل تحفظي علي المصطلح) اكان دايرين يا مثقفيننا تحسبو مهمشين الشمال فيها يبقي كتر خيركم انو سويتونا اهل حل و عقد لكن نبقي غبيانين كان قبلنا الشرف الخلعتوهو علينا ده و يسعدني يا فارس يا صديقي انو اخيب املكـ , الشمال المهمش نالو ما نالو برضو من اضطهاد مؤسسات الجلابة و ليكـ في قصة الطير و الزبير و السيل دليل يكفيكـ مشقة التفكير
Quote: اليسار لو جدد خطابو ووازنو بلغه بسيطه تهبش اشواق الغبش التعانى ،المضطهدون ،المرميون ، المهمشين الاميين لأنجز ولاغنانا التخندق فى مضارب القبيله خوفا من الة الدوله التى طورتها مؤسسة الجلابه لحدود التحالف مع الاجنبى لبيع مواردنا ظاهر وباطن الارض واعملت اسلحة حلفائها المدمره فى قتل وبطش إنسان السودان والقتل هنا نعرف اين وتعرف انت اين هى مقابره مذ 50 عاما !
اها عاد ده كلام ده يا فارس !! يعني كان اليسار ده فضل خيبان كدي حلكـ لينا التخندق خلف القبلية ؟؟؟ و في بلد متعددة اعراقو زي السودان ده قصة التخندق وراء الجهوية دي حا يكون حدها ويين ؟؟؟ والله الوكت داكـ الصومال ذاتها تستغرب فينا و تدي ربها العجب
خليني اقول ليكـ كلام اخوكـ خدر تاني 1- مافي شي اسمو مؤسسة جلابة الليله .. اسمها الانقاذ - المؤتمر الوطني. 2- التيرمات بتاعت هامش و مركز و جلابي و غرابي و خاساوي دي ما بتحل قضايا البلد ودونكـ ما يحدث الان في المركز من تجاوزات و اضطهاد للزغاوة في الخصوص و اهالي دارفور في العموم كنتيجة لمغامرات حركة العدل و المساواة رأس الرمح في فكرة هامش و مركز و جلابة. 3- ماحدث ف دارفور تطهير عرقي عديييييييييييييييييل و السبب فيهو الانقاذ موش مواطن الشمال الجلابي. 4- كل قري الهامش الشمالي مناطق مهمشة رضينا او ابينا. 5- الافكار الجهوية و السلفية لا تقل خطورة او سوء عن الانقاذ. 6- الحل في تقديري هو التوحد حول برامج سياسية و الخروج من برلمان الانقاذ و اختيار المعارضة بوضوح.
و يا فارس و الله أرباء بكـ من لخبطة الكيمان .. ارقد عافية و ماتنسي غرض البوست الاساسي ضبط المصطلح موش العبيدية يا زميل.
__ انا ماني حردان لي بص ولا نازل منو اكان الدنيا دي كلها وقفت الف احمر قصادي .. اطمئن و ارقد قفا.
Post: #128 Title: Re: مولانا خدر .. مهمش خالص Author: محمد سنى دفع الله Date: 05-30-2008, 08:28 AM Parent: #127
Quote: جني الوزين اشعار الراحل حسن الدابي الحان الراحل النعام ادم صوت طارق ابوعبيدة
ياااااااااى يا خدر ،،،، كلهم بيعضو؟؟؟؟ مــش اااحـــســـن من إدووو!!!!!! على وزن المثل البقول التيتي بدي ولا بعضي ـ اهمش همشتك وامشي ـ
Post: #129 Title: Re: مولانا خدر .. مهمش خالص Author: محمد سنى دفع الله Date: 05-30-2008, 08:39 AM Parent: #128
الليييييلة .. و الليلة .. إتلموا عليك .. دينا كنموذج لحنكوشة وسطية و جلابية و مستنيرة .. و ربيبة المركز .. و فارس موسى كمحمش و أغبش و طرفي و مستنير .. برضو ربيب المركز .. ( نقطة إلتقاءهم : الإستنارة في المركز .. زي البزازة في القزازة ) .. حكمة الله إنت محمش أكتر منهم الإتنين .. و محمش بالأصالة كمان .. و فرض عين . وفي المثل قالو المحمش ولا الموصل والمحمش ربى عبالو ... يا اخوي انت من اولاد وين في المهمشين !! وشنو علاقة المهمشين بالمحمشين؟ وهل هناك فبيله اسمها المهيشاب؟؟ وهل الهمشو امو، بتنط هي ول بنط هو ؟؟كل هذه الأسئلة نجاوب عليها في برنامجنا الأتجاة المشاكس وحلقة اليوم بعنوان الهمشو ولا الحمشو (القننيطه نموذجا )
Post: #131 Title: Re: مولانا خدر .. مهمش خالص Author: دينا خالد Date: 05-30-2008, 10:32 AM Parent: #129
اخونا فى الله خدر
( يا النبى خدر) .........
ياخوى بركة الجبت لى اسمك بى ييييييدك دى والله دا انا كنت افتش لى سنة عشان
اوصفك بيهو ما القاهو .......
Quote: الاستسهال المعرفي
تصدق لحد ما نقلتها هنا اوصفك بيها بقرا فيها الاستهــــــــبال المعرفى !!!
Quote: منو القال ليكـ انو الشمال المهمش ما نال حظو الوافر من التهميش الاجتماع و الثقافي ؟؟؟؟
التساوى دا بغير الاسم طوالى ما ببقى اسمو تهميش عندو اسم تانى وعشان الاستسهال المعرف البتعمل
فيهو دا مما بوريك اسمو تمشى تفتشو براااااك
Quote: حصل شفتي تقافة اهل الشمال بتفريعاتها جعليين - شوايقة - نوبة (محس / دناقلة/حلفاويين) تمشي علي قدم و ساق في اجهزة اعلام حكومة الانقاذ او ما غيرها من السابقات؟؟؟؟
افوو افوووو يا خدرنا الكلام دا ماااا بشبهك ؟؟؟ شفنا ونص وما بنغرق ذمتنا تمشى على
قدمين وساقين كمان وهو فى شنو غيرها ... الدينكاوى ذاتو ما بصل التلفزيون الا يشيل طمبور ويغنى شايقى
مش فى اجهزة الاعلام وبس دى قابضة على وجداننا من التلقين والترديد براها دون شريك
اها اسال زملاءك الفنانين عشان يجيزو صوتك فى الاجهزة القومية الامتحان بى اغانى الحقيبة بغض النظر عن انك جنوبى ولا من الشرق ولا الغرب .... دى سياسات موجودة لازم تتغير
عشان يحصل الانصهار والتلاقح والوحدة البتثريها اختلافاتنا وتنوعاتنا البنتكلم عنها
بس الغتغته الكلمك عنها فارس دى ما تطنشها ... والكلام دا ياخدر انا عارفاك عارفو بنلوكو
كل يوم وبنضهب منو ... واول من اعترف بيه وحاولو تغيرو هم مثقفينا والمستنيرين من الشمال ...
Quote: هل شهدت تفضيل يمكن ان يحسب لصالح مهمشين الشمال ضد مهمشين الغرب او الجنوب او الشرق ؟؟؟
نعم شهدت ,,, وعارفه الكتير كان ياهو دا غلاطك بغرقك امثلة
كتب بروفسير محمد الامين التوم فى كتابه عن التعليم فى السودان انو عدد مدارس الاساس فى محليه واحدة
من محليات الاقليم الاوسط اكتر من عدد المدارس فى اقليم دارفور المترامى الاطراف وعدد سكانه لامقارنه
بينها وبين كل تلك المحليات مجتمعة !!!!!!!!!!!!!!!!!
ما دايرة اقول بى كلامى دا انو ناس الاقليم الاوسط فى رفاة وبطر تعليمى وصحى واقتصادى ،،، لا
انا عارفة انو ناس هذا الاقليم يرزحو ما زالو تحت تخلف وامية وفقر بيئى وصحى واقتصادى لا حد له
ولكن هذا لايمنعنا الاعتراف بانهم نالوا حظهم من الفرصة المتاحة الشوووية دى على حساب ناس اخرين
كان يجب ان يقسم المتاح دا بالعدالة بينهم ..........
Quote: الداير يحارب معانا الانقاذ دي وفق اجندة سياسية[/U] مرحب والداير ينقلنا لمربع الجهوية و العرقية تاني نحن بنقيف ضدو هو في الاول و بعد داكـ بنرجع تاني لحرابتنا مع انقاذ السجم دي البتحرك فيكم كلكم زي قطع الشطرنج
كلام ذى العــــــــسل !!!
طيب الاجندة دى فيها بنود ؟؟؟ فيها برنامج عمل ؟؟؟ ولا صندوق مقفول ؟؟؟؟
اولا بنود الاجندة يجب ان ترتب حسب الاولويات عشان كلامك الملولو دا ح يكون
اول اسباب نسفها .... يجب ان يكون فى اعتراف وااااضح وصريح بمشاكلنا عشان نواجهها
من غير الاعتراف دا ... ح ننفخ فى قربة مقدودة ،،، اذا كانت الاجنددة السياسية دى
ياها ذاتها الاجندة القديمة البتقدم مصالح الاحزاب دى على مظالم اهلنا وعذاباتهم ،،، هادى طرفنا
منكم حاربو براكم .... اذا كانت وضع مشاكل ناس الغرب والجنوب والشرق والاعتراف بانها الافدح والاعظم دا ياهو القبلية والجهوية .... حربكم دى ح نولى منها يوم الزحف ياخوى
مااااافى يا طارق حل قبل ما نعترف بالمشكلة ذاتها وماااا ترجع تتحوى فى شرح مظالم اهلنا
فى الشمال دا نحن ما اختلفنا فيهو لكن الافدح موجود وين ؟؟؟ وبداية الحلول بتبدا من الاكبر
للاصغر ... ودى عندكم فى العالم المتحضر ختوها قدام عيونهم اووولا واعترفوا بيها وعملوا لى معالجتها بتدابير ايجابية كمان .... مش خلوهم ينمو بى راحتهم حتى بعد ازالة التهميش ....
اخيرا يا خدرنا لك ان تعلم ان قطع الشطرنج وحدها هى من تملك تحقيق النصر او الهزيمة سيظل عشاق
اللعبة والمشجعين من خارج رقعة الشطرنج متفرجين لا غير اسمهم المشاهدين ... بياثرو سلبا او ايجابا
مرات بقوة حضورهم وحكمتهم وسيظل امر النتيجة تتحكم فيه تلك القطع ومن يحركونها ...........
ــــــــــــــــ الليلة ال وحد خطاب خدر مع الجماعة دا .... الله لا جاب اكبر منو !!!!!!!!
Post: #132 Title: Re: مولانا خدر .. مهمش خالص Author: Emad Abdulla Date: 05-30-2008, 10:49 AM Parent: #131
لوووووووووولز .. دينا في شكل حمبوكة .. ( خدر براهو البيحمبك يعني ؟؟ .. هسه مداخلتك دي مكرراها مرتين مالك ؟؟ ) ..
.......... عارفة .. حقو دايماً يزعلوك و يحمبكوك .. عشان تكتبي زي ده ..
Post: #133 Title: Re: مولانا خدر .. مهمش خالص Author: أبو ساندرا Date: 05-30-2008, 10:56 AM Parent: #1
Quote: يا بركات .. مشروغ بركات بتاع مدني داكـ ببقي ليكم ؟ ولا انت من مهمشين ويين ؟
يا مولانا أهلنا جعليين استوطنوا في العسال عمودية جبل اولياء بحر ابيض على بعد خطوات من طيبة الحسناب وشرقها مشروع سندس الزراعي تبعد من جبل اولياء مسافة 15 كيلو ومن قلب الخرطوم حوالي 30 كيلو على ضفة النيل الابيض
اها جيبها لينا يا مولانا
وتضيف تريعة البجا قبلنا وكذلك طيبة وبعدنا السليمانية وعدد من الحلال الى ديم الجبل
يعني ما فوقنا قنانيط ولا تحتنا قنابير
واحتفائي بالنعام وجنى الوزين مرده الى حبوبة شايقية من حلفاية الملوك
ابوساندرا ابو البنات السمحات و راسيات وحياة خوتكـ انت طلعت منتهي عديل لدي السيد قوقول ايرث كتب ليهو العسال .. فأخرج لي اصبع بله. شاورته في الامر .. قال لي تلقاها عند الغافل. يبدو ان هنالكـ ثأر بينكما لا يعلم عنه العبد المهمش من الانقاذ شيئاَ.
فـ يازميل ... انتزعت لكـ من فكي قوقول ايرث هذه الصور
و بصراحة كان شكلي بايخ و انا مُصِر انو صاحبي ده علَم علي رأسه نار
__ اسكنوا في مناطق معروفة يا مهمشين و ما تحرجونا مع قوقول ياخ.
يا دينا يا اخيتي غايتو نقاشكـ حق اركان النقاش ده انا مبسوط منو قطيع كوتات و جديع التهم عشان اتلهي انا بالدفاع عن رويحتي مافي ليكـ بجيكـ بي رواقة اخر اليوم
ود التوم اخيتكـ دينا دي امس اتهمتني انا بالحمبكة الليله دقست و حنبكت اصلو الملكيين اكتر من الملكـ دي ياها عادتهم
ودجبرالله يا ما هامشي بختكم بقي عندكم كوادر علي مستوي منابر الحوار بشيدو بيهم ناس الانقاذ ( الحقني بي اشادة الكمندان ) الليله عندنا بارتي
Quote: طبعا حلو لو اتناقشنا بدون توصيف وتعالى على وجهات نظر بعضنا البعض واطلاق مسميات لســــــبب واااااااااااحد بس ما غيرو !!! انك ما بتستحمل ،،، ماااااااااا بتستحمل مهما ادعيت من حكمة ........ عارفة انا انها مظاهر كدابة وعاملة حسابى ومتوقعة كف او بنيه .... واصل بس بعدين فى سبب تانى ما تاخد بيهو انو اضفاء الالقاب والمهاترة دا اسههههههههههههههل من كباية موية من النيل من نمولى لى حلفا وكدا بتكون جيتنى فى حتتى .... احسن تفوت على الفرصة وتواصل فى دور ( حسابات التوثيق للمنابر على اراءانا دا !! ) حلو دا ،،،، انا ذاتى عجبنى ........لانو كدا ممكن انا افقد الجوله لكن لو داير الخرمجة والمهاترة انا ح يبقى على قول المثل المصرى ::::: قالو للحرامى احلف قال جالك الفرج !!!!!!
دينا يا ستنا انا عندي اقتراح .. خلينا نوقف الحوار بيناتنا شوية لحدي ما انت تهدي و نواصل تاني اوريكـ ليه ؟ النقاش ده بالنسبة لي اسمو نعرض وجهات نظرنا و القارئ يختار البلائمو منها لكن لاحظت انكـ متوترة شوية .. بديتي بي إتهامي بالاتفاق مع الانقاذ و انتهيتي بي تهديدي انو حا يبقي لي بمبي
Quote: وووووووووووووووووووووووووووو الشرك قبض
Quote: وقد صدق حدسى ........... وكسبت الرهان
Quote: وانا جاياك بى رواقة ما تنفعل ..
Quote: الليلة ال وحد خطاب خدر مع الجماعة دا .... الله لا جاب اكبر منو !!!!!!!!
وانا يادوب قلت انو طريقتكـ بتاعتك اركان النقاش دي عاجباني و بالمناسبة فعلا عاجباني لانها بتذكرني بي زمن و تاريخ عزيز علي جدا و تعليقي علي طريقة اركان النقاش دة مافيهو شتيمة لي زول يا ستنا لكن فيهو غمز لطيف بقول يا اخوانا ماعندنا زمن لي المحاججة زي الجارات الاولادهم اتشاكلوا و واقفات كل واحدة بتنصر في ود بطُنا العندو فكرة كاملة يقولها كاملة ,, منهج الكوتات ده عندي غلاط ساي.
فأحسن نأجل النقاش بيناتنا لحدي ما انت تهدي شوية و نرجع نتحاور بعد داكـ ولا شنو ؟
يا عجوره اول حاجه خدر دا منو ومولااااااانه ده زاتو منو كنا عارفين انك من حته فيها اربعة بيوت ودكان وكلب والكلب زاتو شرد لكن والله لو كنا لقينا صورة قوقل دى كان الا تشرد عديل كده
هدنه..
ازكرك دائما عنما يصدح سيف الجامعة بالرائعه مريم ومى
واهاهاهاهاهههههههاهاها يا ود التوم والله الله يديكـ العافية
احكي ليكـ قصة بمناسبة القطر حصلت في محطة العبيدية حقتنا دي
عندنا ود خالتاَ لينا كان مستقبل صاحبو في المحطة قطر كريمة جا و الصاحب ما ظهر واحده من النسوان الكبار دايرة تركب القطر ود خالتنا ده طبعا حِمش كعادة مهمشينا .. حب يساعد حبوبتو انها تركب القطر اقصر الطرق كان انو يشيلها طب العصب و يختها داخل القطر شالها .. الحبوبة الله يكرم السامعين (ظرطت) و لم تكتفي بذلكـ .. فعاجلته قائلة
تِقلت عليكـ يا ولدي ؟؟
فغر قريبنا فاهة مخلوعاَ فلم تمهله الحبوبة و عاجلته بالقاضية
أبوساندرا و عصام ديل ناس مرفوع عنهم القلم .. ود التوم شال القلم و ختاهو ورا أضانو ( كأحرف نجار ) .. أما ناس نحنا .. فحين يغلبنا النسويهو .. ( نشيل ) شيلتنا .. و الشيالين - الله يكرم السامعين - أناسٌ ذوو مسكنة .. يهمشهم المغنيين و الكاميرا .. و يأنف منهم العازفين .. و سيد الحافلة .. و الشربة مافي ليهم , و مجلسهم في الحوش بره ديوان الفنانين .. و ما محسوبين في العشا ( فالعشا عشا الفنانين ) .. و بعد ده مكرفونهم واحد .. و يكوركوا على قلب رجلٍ واحد .. فتأمل حال السرور يا ولض أباه ..
....... أبشرك يا فارس .. قوقل إيرث ما لمّ في حلتكم .. و لا حلتنا .. حسب آخر التقارير .
صلاح الزين او عثمان حامد (كلهم عرب "ساكت") قال في واحدة من المظاهرات ايام نميري طلعو ناس الحلة مظاهرة ضد "السلطة" ، و لتاكيد رفضهم للسلطة لا بد من توجيه غضبهم نحو رموزها
الجماعة مشو قطعو سير الطاحونة
Quote: اها .. (حَندد*) خشيمكـ للغلاط ؟؟
لوووول ... الحاجة "عفنة" و لايوقة كمان
دى زى بتاع الفحم الفي النهاية قال للحاجة "كبيييي"
بوستك ده قريب بوست دكين داك و لا اسم على اسم بس وين الاير فريشر ..... بعدين انت الكلام الكبار كبار ده بتجيبو من وين؟
Quote: الاستسهال المعرفي
انت بتذاكر بي ورانا يا مان؟
Quote: تصدق لحد ما نقلتها هنا اوصفك بيها بقرا فيها الاستهــــــــبال المعرفى !!!
انا قريتا الاسهال المعرفي قلت صاحبنا ده افلس تب
يا شوكرن جزيرن
تلفونك ده مشغول اليوم كلو، بايظ و لا نظام تهميش لينا
Post: #155 Title: Re: مولانا خدر .. مهمش خالص Author: Emad Abdulla Date: 05-31-2008, 10:00 AM Parent: #154
Quote: يا شوكرن جزيرن
دي مكنتك .. ؟؟
وصلني التلفون الكان مخصص لي مشى لمنو .. و قد بعتني يا رجل .. و أيم الحق ..
فارس و دينا و ودالتوم و جبرالله نواصل الحكي عن طرائف مهمشين الشمال الُرباطاب او الَرباطاب قبيلة تتوزيع بين قبائل الشايقية و الميرفاب و البديرية و يقتسمون معناالصحراء حقتنا ديكـ في مناطق (ابوحمد-الجزيرة مُقرات-الشريكـ- ندي- العبيدية) ومن اعلامهم الفنان و الشاعر العظيم احمد عمر الرباطابي و الرباطابي صاحب نوادر شهيرة طبعا.
إبان خلاف الرباطابي مع مجموعة عقد الجلاد الغنائية حول اغنيته (امدر يا ربوع سوداننا) الاجاويد جعلوا الصلح ممكنا بين الرباطابي و عقد الجلاد. بعد الصلح و الرباطابي راجع لي بلدو طاعنو واحد من اصدقائو و قال ليهو - سمعنا قالو الجماعة دفعوا كويس رد عمر الرباطبي ببديهة حاضرة - و الله الشوية دفعوها .. لكن نسوي شنو الزمن ده كلو واحد بياكل من ضهر رفيقو. فأبي صاحبه إلا ان يوصل في الغمز - لكن يا الرباطابي الوليدات ديل جننو الغنوة جن.. سووها سمحة ياخي. رد الرباطابي - ايوة والله جننوها جن عشان كدي بغنو فيها زي الزول البتلبد
___ عقد الجلاد تستخدم تكنيكـات الصوت صعودا و هبوطا في اداء اغنياتها و اغنية الربوع بعكس الرباطابي الذي يغنيها علي السليقة
______ حى الجنائن لمن لا يعلم أرض زراعية خصبة فى بورتسودان.. وتسكنه أغلبية من الشايقية ، ويمتلكون فيه مزارع وجنائن. ( هذا الحى تدور حوله كثير من التساؤلات )
بمناسبة التهميش الوطني .. والتعداد الحكومي نفيد معاليكم .. رزقنا بمولود جديد إخترنا له إسم ( يزن )، عندما رأيت بريق عينيه النبيلتين قلت في نفسي : أسال الله أن لا يحل بأرض مهمشة!
ويحك يا صاحب .. أنهم يحسدونك في التهميش بٌإحياء سنة جديدة مفادها .. التهميش من دواعي صكوك الوطنية، رغما عن هجرتكم الحديثة الى عطبرة ثم هولندا ... مرورا بالخرطوم والخرطوم ستبقى المدينة التى تجب ماقبلها من شعاب التهميش. أنا قبيل قلت ليك غناك ده ما غنا زول مهمش ؟... ياخي شخلعو شوية (على قول السيدة أم كلثوم للشاعر السوداني المهمش الفيتوري)
عارف يا طارق .. وإن كانت أمي من مواليد الخرطوم. وصرتني مدفونة بفناة كلية الهندسة جامعة الخرطوم، بإيعاذ من جدتي فاطمة بت عبد الرحيم ولد محمد نور .. أطال الله عمرها، أجدني متضامنا مع أهلي وأهلك المهمشين من العبيدية حتى الشلال الثالث وقيل الجيلي ذاتها، ولاينقص ذلك من قيمة تضامني مع كل المهمشين في بلاد السودان من أقصاها إلي أقصاها، مع مراعاة فروق التهميش.
مبروكـ والله يا مهمش و يتربي في عزكـ و عز اهلو مبروكـ (يزن) و حمدلله علي سلامة امو وربنا يجعلوا من ابناء الهامش الكرام يفزع الجار و يبدر في النفير و يقنع الكاشفات و يدفع الاشتراكات بإنتظام في الحزب
Quote: ويحك يا صاحب .. أنهم يحسدونك في التهميش بٌإحياء سنة جديدة مفادها .. التهميش من دواعي صكوك الوطنية،
كتب طارق : مبروكـ (يزن) و حمدلله علي سلامة امو وربنا يجعلوا من ابناء الهامش الكرام و يدفع الاشتراكات بإنتظام في الحزب ..
إنت يا طارق أحزاب الجن دي لامن ولدنا ده (يبلغ) الرشـد السياسي، تكون لسا بتدفع الناس إشتراكات!؟؟
قايتو أنا وصيتو ليهو من الآن كالتالي : ما يجاور طالب بليد في فصل. وما يباري الرفيق الفسل. وما يشترك في حزب ماعندو قروش. وما يقطع الكباري طالب يد عروس. ذلك عملا بالمثل القائل : الباب البجيب التهميش سدو واستريح! ملحوظة : السطر الآخير ده عشان ما نطلع من موضوع البوست.
سيف اليزل
.
Post: #164 Title: Re: مولانا خدر .. مهمش خالص Author: دينا خالد Date: 06-01-2008, 07:15 AM Parent: #163
مولاى خدر
ويك اند مباركـ
Quote: فارس و دينا و ودالتوم و جبرالله نواصل الحكي عن طرائف مهمشين الشمال
فى ذمتكـ دى انا دخلت معاكم خشمى دا فى طرايف ؟؟؟
دا الاستكواش المعرفى ؟؟؟ اجرى يا عصام الحقنا بى اسم انا خدر
دا ماااااا عرفت ليهو !!!!
Post: #165 Title: Re: مولانا خدر .. مهمش خالص Author: Emad Abdulla Date: 06-01-2008, 07:43 AM Parent: #164
Quote: اجرى يا عصام الحقنا بى اسم
قال ليك قولي : بله ..
............ ما أطول الويك إند في الأراضي المنخفضة ..
Post: #166 Title: Re: مولانا خدر .. مهمش خالص Author: نادية عثمان Date: 06-01-2008, 08:23 AM Parent: #165
مولانا الغالي خدر
يخضّر ضراعك يارب وشكرا على الهدية الحلوة جدا ( جنا الوزين)
عاين
إنت منطقة (دنقلا كابتود) حقتنا دي تعتبر ( حامش) (على قول الدناقلة ) ولا مركز ؟!!
جادة والله ماعارفة وكمان قوقلها لي كان القوقل وصل (كابتود) عشان أعرف موقعها من التهميش أو المركز ..سمح؟
ندوية سلامات والله عمكـ قوقول ايرث ده اداني عدد 2 دنقلا واحده شرق النيل و التانية غرب النيل كمتود لو طلعت شرق النيل معناها انت مهمشة و لو طلعت غرب النيل معناها برضو انتي مهمشة
هو - نخرتك جميلة بالرموش .. هي - بموت في أضانك وهي صارّه كده .. هو - ليه عاملة حلق في قدومك ؟ هي - أجي يا أخواني !! .. ده حجل رجليني .. هو - قولي و الله .. هي - إنت منو ؟ مش جورج كلوني ؟ هو - أنا أوباما .. و أثبتي في حتة واحدة , ما تلاوزي لي يا آمنة .. يا يمين يا شمال .. هي - سجمي .. !! أنا تراجي .
Post: #169 Title: Re: مولانا خدر .. مهمش خالص Author: محمد سنى دفع الله Date: 06-01-2008, 09:12 PM Parent: #168
هو - نخرتك جميلة بالرموش .. هي - بموت في أضانك وهي صارّه كده .. هو - ليه عاملة حلق في قدومك ؟ هي - أجي يا أخواني !! .. ده حجل رجليني .. هو - قولي و الله .. هي - إنت منو ؟ مش جورج كلوني ؟ هو - أنا أوباما .. و أثبتي في حتة واحدة , ما تلاوزي لي يا آمنة .. يا يمين يا شمال .. هي - سجمي .. !! أنا تراجي (( وازبهللال الفنانين )) واذا بهلال الفنانيين كوم !!!!! فعلا هلال الفنانيين كوم تاني !!!
يا امنة مختار .. عمر الرباطابي كان مره بغني في حفلة .. عادة الحفلات في نواحي اهلي كانت أن تغني و تترقب سرب الجميلات الراقصات , خِلسة .. و خلسة دي ادب من اهلنا في الله و التعاليم الصوفية و برضو بالجنبه كده فيهو شوية طولة بال و كان الرباطابي يترقب ظهور من اعجبته من سرب الجميلات , كلما استرق النظر عاجلته احدي الفتيات ( كان بها حوص و شتارة في الرقص ) وهي ترفل في دائرة الرقص تزُفها صفقات الاستحسان من ذوي العاهات الجمالية , و كان ذلكـ يضيف ضجراَ الي فناننا الرباطابي حالة كونه مترقبا لمن احب .. و من احب تأتي و تذهب علي استحياء . فإرتجل لها في نهاية اغنيته كلمات اهديها لكـ .. قال
Quote: ............ ما أطول الويك إند في الأراضي المنخفضة ..
لااااحاظ خلاص !!
ــــــــــــــــــــــ
البوست دا بس ناقصوا فلان ويفقد قيمتو المضافة !!
Post: #174 Title: Re: مولانا خدر .. مهمش خالص Author: Emad Abdulla Date: 06-02-2008, 06:18 AM Parent: #173
Quote: البوست دا بس ناقصوا فلان ويفقد قيمتو المضافة !!
هو لسه .. ما فقد ؟؟؟
Post: #175 Title: Re: مولانا خدر .. مهمش خالص Author: دينا خالد Date: 06-02-2008, 07:22 AM Parent: #174
لسة لسة يا عمده
فى امل لحدى الويك اند الجاى !!
امكن صاحبو امكن يقرر يرد علينا !!
Post: #176 Title: Re: مولانا خدر .. مهمش خالص Author: محمد سنى دفع الله Date: 06-02-2008, 08:48 AM Parent: #175
عارف ياعمده يا اخوي الفاقدو جد .. از بي هلال زي دي سي واشنطون ودبليو سي قننيطه ولمن تجينا امنه مختار بي رسمته النسبة قاطعاها من راسها العايز ظبطةمن شايها المكرب ولمن ترجع بي هجمتها المرتدة ـ الكافرة ـ نكون نحنا قلبنا الخريطة وبقى المهمشين ما مهمشين والكانوا ما مهمشين بقوا مهمشين وبي كده نكون ارضينا كل الأطراف .. وخلينا كل السودان بي قبايلوا وانسابوا واتجاهاتوا كلهم مهمشين وما مهمشين وحتلقى الناس كلها طالعه الصباح وهي في حالة ازبهلال ورايقه لانها فرحانه انو عرفوا طعم التهميش والا تهميش وبقوا عايشين في سعادة .... الهمشة ما عندهم واغنيتهم المفضلة لو بهمشه
امجد ,, سلامات شوف يا زميل التهميش ده حسب القريناهو زمان عندو شقين تهميش جغرافي و تهميش ثقافي الليلة التعريف ده لِحق أمات طة .. التهميش بقي كل (ما/من) هو خارج دائرة الانقاذ و شيعتها هامش و مهمش
وبناء علي ده انت هامش منتهي زاتو ولو سكنت في قلب الخرطوم
Post: #186 Title: Re: مولانا خدر .. مهمش خالص Author: فارس موسى Date: 06-03-2008, 04:35 AM Parent: #1
خدر ..دينا وعصام وكمندانى ابوشنب وبقية الاحباب
برضو مزانق ! داير لى مهله
دينا المسأله بقت طرائف ! ومولانا فى المنصه على كيفو ! قضيتنا ضمم !! يقلبها مخالفات مرور
امنة مختار كدي زحي كدي شوية , خليني (اناغم) فارس صاحبي ده __
فارس يا مهمش يازول انت عندكـ فيتو عديل .. تجي بي راحتكـ و نترجاكـ كلنا انا بحترم نقاشكـ و بدوووورو الله يمرقكـ من المزانقه و ليكـ علي مخالفاتكـ ادفعها ليكـ كلها ودينا اختنا دي كان دايرة تناقش انا ما ماسكها من كيبوردها بس كورة واطة عشان نحن ما وليدات و عشان المتابعين معانا يصححونا
Quote: 1- مافي شي اسمو مؤسسة جلابة الليله .. اسمها الانقاذ - المؤتمر الوطني. 2- التيرمات بتاعت هامش و مركز و جلابي و غرابي و خاساوي دي ما بتحل قضايا البلد ودونكـ ما يحدث الان في المركز من تجاوزات و اضطهاد للزغاوة في الخصوص و اهالي دارفور في العموم كنتيجة لمغامرات حركة العدل و المساواة رأس الرمح في فكرة هامش و مركز و جلابة. 3- ماحدث ف دارفور تطهير عرقي عديييييييييييييييييل و السبب فيهو الانقاذ موش مواطن الشمال الجلابي. 4- كل قري الهامش الشمالي مناطق مهمشة رضينا او ابينا. 5- الافكار الجهوية و السلفية لا تقل خطورة او سوء عن الانقاذ. 6- الحل في تقديري هو التوحد حول برامج سياسية و الخروج من برلمان الانقاذ و اختيار المعارضة بوضوح.
في رجاكـ و علي اقل من مهلكـ نحن حا نكون في ونستنا لامن ترجع لينا ارقد عافية يا صاحب
Post: #190 Title: Re: مولانا خدر .. مهمش خالص Author: nazar hussien Date: 06-03-2008, 09:25 AM Parent: #187
Quote: منو الاوفر حظا كان فى هذا التهميش ؟؟ اهلنا فى الغرب والجنوب ولا فى الشمال؟
(اقتباس من كلام دينا بهذا البوست)
يعني كلو تهميش في تهميش يا دينا....وتبقي علينا ....ان نوزن حجم التهميش بي السنج والميزان...
عموما من يشكك في تهميشي أنا وناس حلتنا.....مستعد ابادلو هسي....اديه حلتنا بي بيوتا....ويديني تهميشو...فاضي ساكت بدون بيوت....في أي حتة في السودان دا...وابدو لي من المناطق التي ترونها أكثر تهميشا......(والله العظيم جادي جد اصلو ما حصل) وضامن ناس حلتنا كلهم حا يوافقوا....
وبديكم عليها هوادة...غنم ونعاج وجداد....ديل كان لسة حيات.....وما ماتن من الجوع في الصيف دا...
وعشان اكون واضح معاكم....من الله ما خلقنا ....الحكومة لا جاتنا ولا ادتنا حاجة...ولا بنت لينا حاجة... المدارس بنيناهن برانا....نبني فصل...ونقرأ ولما نعديه....نبني البعدو...ونحن أطفال... الي ان اكتملت المدرسة بكامل زينتها من الطين....وكلما تقع...الناس البيقروا في الفصل...يعينو ليهم اوسطي من الفصل الأرفع منهم...ويبنوه براهم...
No further facility
البتقرصو عقرب....بس يشيل الشهادة...اما الدابي داك....الشهادة ما بخليك تشيلا....
Quote: دينا المسأله بقت طرائف ! ومولانا فى المنصه على كيفو ! قضيتنا ضمم !! يقلبها مخالفات مرور
وسوء تعبير ! داوسى ودقى التربيزه وانا بجيك صاد .
عليك الله شفت القصة دى كيف ؟؟ عجبتنى ضمم دى شديد لحد ما مشيت سالت منها !
الله يجازيك ،، مافى تربيزة يا فارس مافى ،،، مولانا قاعدلو فى بنبر وجنبو حمام اخدر
نزار حسين ؟
اولا وعشان ما اختا عليك ساى انت العروبى البعثى ؟؟ صاحب بوستات صدام حسين ؟؟
تانيا حقو نمنع الفوضى ،،
Quote: عموما من يشكك في تهميشي أنا وناس حلتنا.....مستعد ابادلو هسي....اديه حلتنا بي بيوتا....ويديني تهميشو...فاضي ساكت بدون بيوت....في أي حتة في السودان دا...وابدو لي من المناطق التي ترونها أكثر تهميشا......(والله العظيم جادي جد اصلو ما حصل) وضامن ناس حلتنا كلهم حا يوافقوا....
وبديكم عليها هوادة...غنم ونعاج وجداد....ديل كان لسة حيات.....وما ماتن من الجوع في الصيف دا...
لو داير نقاش ذى دا شد حيلك جيتنا فى محلنا
Quote: وعشان اكون واضح معاكم....من الله ما خلقنا ....الحكومة لا جاتنا ولا ادتنا حاجة...ولا بنت لينا حاجة... المدارس بنيناهن برانا....نبني فصل...ونقرأ ولما نعديه....نبني البعدو...ونحن أطفال... الي ان اكتملت المدرسة بكامل زينتها من الطين....وكلما تقع...الناس البيقروا في الفصل...يعينو ليهم اوسطي من الفصل الأرفع منهم...ويبنوه براهم...
ولسة انا جادي في المبادلة....وحا اقبل بي مساحة اقل من مساحة حلتنا
Quote:
اها تبوس يدك وش و ضهر لانو لما انت يكون حالك كدا
الجماعة ديك بكون حالهم اسوا ما عندهم لا حمار ولا حمارين ولا تلاتة
شوف لما جات الحوبة كم خيار (حمار) كان عندك ؟؟
والداية دى ضرب من ضروب الرفاهية لا سمعوا بيها لا عندهم !!
انت لو قطعتك بس كانت ناصية ،، ما ح تبدلها مع جارك الجوة ،، خليك تبدلها
باراضى سيد ما عندها .. انا قاعدة معاك فى الشمال وشايفة ،، الكلام دا قولوا فى امريكا !!
Post: #192 Title: Re: مولانا خدر .. مهمش خالص Author: Osman Musa Date: 06-03-2008, 04:01 PM Parent: #190
الليلة من صباح الله البدرى جيت يا خدر . نشتت العيش ريف الحمرى الدبر الفيتريتا المقد الدبيكرى ... علها تعود .. علها ترك علها تقوقى وعل النيل يفيض ذلك الفيضان الذى يحدث كل 100 سنة .
Post: #194 Title: Re: مولانا خدر .. مهمش خالص Author: Osman Musa Date: 06-05-2008, 06:31 PM Parent: #190
_
Post: #193 Title: Re: مولانا خدر .. مهمش خالص Author: دينا خالد Date: 06-05-2008, 10:06 AM Parent: #187
اها خدر عرفناهو عمل بوست اعتذار
قال اولادو مبرجبين !!! ليهم 3 اسابيع !!
وبجى بجى ,,,,,,,,
انت يا نزار حسين مشيت وين ؟؟
Post: #203 Title: Re: مولانا خدر .. مهمش خالص Author: Osman Musa Date: 06-06-2008, 06:45 PM Parent: #193
خدر زولنا وشريكنا فى المشرع والقنقوش .. تحيات ملانات تب . __ اها العفرتات دى كلها فشانك يا مهمش .
Post: #204 Title: Re: مولانا خدر .. مهمش خالص Author: دينا خالد Date: 06-08-2008, 07:31 AM Parent: #203
