::: اساسي :::

يعني الواحد انتظر قرابة السبع سنوات لان يفتح علي احدهم ببوست يعنونه بمثل عنواني هذا ويرمي داخله بعض الجمل علي شاكلة :

كريم القلب والروح

نقي الدواخل

اضنينه كبار

او اي جمل مفيدة تفيد بان المحتفي به يستدعي كسير التلج , او حتي الزم
ولما كان ( البكاء بحرروا اهله ) ولانه بدأ ينتابني شعور قدامي الفنانين و المبدعين الذين لم ينالوا حظهم من التكريم بعد مسيرة ابداعية كبيرة , لذا اليت ان اكسر تلجي براي واكتب عن ذلك الفلتة السايبرية قدس الله سره .

اديتو الواحد احساس بانه يائس حتي يكتب عن نفسه , ان شاء الله اصحاب السؤ الواحد ما يتمناهم لي عدو
ــــــــــــ

خلوني اتكلم شوية عن تجربتي المنبرية منذ البدايات وحتي هذه اللحظات اليائسة

بدأت الكتابة في هذا المنبر منذ البداية منذ ان كنا اعضاء اللبنة الاولي وحتي بكري اعضاء في منبر سودانت وكان سودانيز اون لاين عبارة عن صفحة للشات السوداني , يتذكر هذا قدامي الاعضاء , كانت بداياتي بسيطة وضحلة اعتمدت فيها علي نقل الاشعار والقصص القصيرة والكتابات الادبية التي تعجبني , حينها كنت اسمي نفسي رومانسي ,
بجانب ذلك كانت تثيرني بعض المواضيع السياسية والدينية التي بدات تاخذ منحي مختلف في سودانيز اون لاين , ايامها كنت علي رأس ما يطلق عليهم بالظلاميين في هذا المنتدي بل لن اكون مجافي الحقيقة ان قلت ان نسبة تسعون في المائة من الظلامين كانوا اساسي . حينها لم تواتي الجرئة الكثيرين للوقوف في وجه الجميع والقول لا. والجميع ايامئذ كانوا محسوبين علي اليسار و العلمانية والمعارضة . فتم ايامها وضعي مباشرة في خانة الكوز الدباب الظلامي . كان راي ايامها انه لا فرق بين ما تقوم به المعارضة هو الوجه الاخر لما يصدر من الحكومة ولكن كانوا ايامها بحاجة الي ناطقا باسم الحكومة في البورد يمارسوا فيه احباطاتهم تجاه الحكومة وينالوا منه باخراج كل غضبهم من الحكومة الاسلامية عليه .
ايامئذ كانت نظرتي للامور اضيق منها الان كثيرا , فما ان رأيت كتابة بها شبه معاداة للاسلام الا ووقفت في وجهها بكل عنف , ما ان رأيت خروجا عن المألوف من القيم السودانية التي طابعها اسلامي الا واعتبرت ان الامر يخصني تحديدا لقول لا في وجهه . كنت انظر يومها لمن يبادر بمثل هذه الامور انهم بهم الكثير من اللمم والكثير من الشبهات في دينهم . كنت انظر للعلماني كانه والكافر سواء ,
الخروج عن القيم السودانية كان يجد الكثير من الدعم كما اسلفت عن خلفية الاعضاء وبعض الاستنكار علي قلة المحافظين . اذكر ايامها كانت لي معركة اسفيرية ضاربة في العنف مع ( مولانا خدر ) بسبب انزاله لبعض الرسومات التي اخذت من جسد المرأة خلفية للرسم والتي كانت بالنسبة لي خروجا عن المالوف فكانت النتيجة حزف بكري للبوست واذكر يومها ان بكري دخل في اضافرينه ما بين انتمائاته الفكرية وارضاء التيار الاخر . ومثل هذه المعارك الاسفيرية الكثير . كانت لي وقفتي تجاه الجمهوريين ومحاورتهم لازمان وكتابات كثيرة دلقت علي هذا الموقع , ومعارك جف مدادها مع رودا مردة (كودي) وبشاشا و (((( مراويد)))) وغيرهم من الاسماء , و وقفات صارخة في وجه المعارضين .

بمرور الوقت بدأ الشكل العام للمنبر بالتغير بعد ان كان ذا طابعين يسيران بمحازاة بعضهما وهما الجانب الثقافي والجانب السياسي .. كان وقتها لكل تيار مريديه واحبابه ميزة هذا المنبر انه جمع من المبدعين ما لم يؤتي لمنبر سوداني اخر , كانت فرصة عظيمة للعامة التواجد بقرب من فتح الله عليهم بالمواهب من فنانين وكتاب وشعراء بخلفياتهم الاعلامية واسمائهم ذائعة الصيت , بجانب وجود سياسين علي قد من الحجم السياسي امثال المرحوم الخاتم عدلان وعادل عبد العاطي وبعض ناشطي الاحزاب والكوادر الوسيطة او الاولي في احزابهم , لذا كان المنتدي بشكله العام نخبوي مع وجود العامة في نفس الوقت لذا كان من اليسر ان تجد بوستا للخاتم عدلان يتحدث عن الشمولية في الدولة الاسلامية بجانبه بوستا لبشري الفاضل يفكفك فيه احدى الروايات وبينهما بوستا لاحدهم يتحدث عن جكسوية صاحبه , الا ان السمة العامة كانت الاحترافية في الحوار الضالع في العمق .

مع وجود كل هذا الزخم كنت ومع القلة من الاعضاء المغضوب عليهم في هذا المنتدي , لم يتواني البعض عن مطالبة بكرى بطردنا من البورد ليصفي هذا المنتدي ويكون خالي ممن به شبهة الاسلاموية او الكيزاناوية , بالرغم من ان السادة المطالبين بذلك من اعتي دعاة الحرية في السودان , ليظهر ذلك كم ان البلد ضيقة وما بتتحمل رأيان .
ثابرت ايامها علي خطي الذي بدات به مع تزايد الضغوطات والعنف اللفظي كنت ادفع الي خانة الغلو دفعا , ايامها بدات بعض الاصوات التي كانت تساندني في خفاء (بالماسنجر الداخلي) والذين كان لهم في الخارج اي المنتدي الحر او ما كان يسمى به ايامها كان لهم اراء اخري او ميالون الي الصمت وعدم حرق كروتهم , واستمريت في هذا الخط والزيادة في الغلو والعنف اللفظي ( واقر) بان الله منحني ايامها لسانا سليطا مع طولة بال لتحمل كل الاساءات والرد عليها لا ادري اين ضاعت طولة بالي هذه الان .
بدا الشكل العام للمنبر في التغير دخلت بعض الاصوات الصديقة التي تحسب في جانبنا ودخلت ايضا بعض الاصوات المعتدلة , وظهر علي السطح تياران يسران بموازاة اخري فبعد ان كان هناك تيار ثقافي وسياسي تغير الامر الي تيار يسمي ظلامي واخر يسمى مستنير مع تفوق للاخير في العددية المنبرية , وبدأ كل تيار يشحذ ادوات عنفه المنبري مع كل قضية عامة تطرأ علي السطح . واصبح التيار الثقافي خجولا نوعا ما الي ان كانت البوستات الثقافية نادرة وتحول شكل المنبر الي صراع سياسي مثل ما يحدث في الجامعات السودانية وغيرها من الاشكال السياسية .

يا اخوانا حاجيكم ان شاء الله واحد واحد بس الان عندي مزاج اتداعي , اتداعي كدا لمن ربنا يغفر لي ,

استمر الامر في شد وجذب في انخفاض وعلو في تاني واسراع والامر علي ما هو عليه الي العام 2003 حيث شهد المنبر طفرات عظيمة نقلته نقلات كبرى . اوجدت شكله الذي استمر الي اليوم مع وجود نكسات وازدهارات في الاعوام اللاحقة , في الايام الاولي للمنتدي كان المنبر يشهد جفافا انثويا مدقعا فلم يكن في المنبر الا بعض الاخوات القليلات , مع توافر عظيم للاعضاء الذكور , الامر الذي كان يضع المنبر وحواراته في ميدان الغلظة والاحتكاك الذي يولد الحريق . كانت الاخوات وعلي قلتهم مصدر بهجة للاعضاء فبوستات امثال رمانة وعسولة وسماح7 و تغريد وبت قضيم وغيرهن كانت سوقا رائجا للجميع وواحات يستظلوا بها من هجير المعارك الاسفيرية , الاخوات اللائي لم يعطين اهتمامهن للجانب السياسي وانما انصبت كتاباتهن علي الجانب الاجتماعي السوداني علي الاغلب والجانب الثقافي . الا ان العام 2003 شهد انفتاح العضوية ودخول اعداد كبيرة من العضوية من الجانبين وكان ان تغير شكل المنبر العام فبدات العودة الي المثاقفة والي الرومانسية والي انكسار الحدة الحوارية الي العودة الي المنطق والحوار المفيد , وكان ان ركبت الموجة مع الخائضين , فبدلت توجيه اهتماماتي قليلا الي الكتابة الثقافية والفكرية وبدأت ايامها في القراءة اكثر من الكتابة . وبدات ثمار تلك القراءة تنتج داخلي انفتاح نوعي وان كان يسير بخطوات صغيرة .

هذه الخطوات الصغيرة قادتني الي القراءة بانفتاح اكثر حيث اليت علي نفسي ان اقرأ بدون وضع نفسي في خانة الضد والتي كنت اقرأ بها منذ البداية حيث انه كان يكفيني اسم الكاتب فقط وقبل القراءة لاضع نفسي مكان الخصم , وللامانة لم اكن افعل هذا فقط بل هذا كان الديدن العام في المنتدي وحتي اليوم النسبة الاكبر من الاعضاء ذوي الميول الايدلوجية والان طرأ الميول العرقي علي الموضوع نجدهم يضعون انفسهم في خانة الضد والخصم ذلك ابتداء من اسم الكاتب وقبل القراءة نفسها فيكفي ان يقرأ الشخص العنوان و اسم الكاتب حتي ما وجدت اسمه في البوست كنت تتوقع رده قبل ان تقراه وبعد ان تقراه تجد انك لم تظلمه وهذه النقطة تحديدا هي اس المشاكل في هذا المنتدي السوداني او هو ديدن خلافاتنا في كل مناحينا السودانية , لا يعطي اينا الاخ فرصة ليقول كل ما عنده ويستوعبه الاخر تماما ليأتيه بالرد الجاهز حتي ان البعض لديهم الالفاظ والقوالب الجاهزة للردود والتي لا يجتهدوا كثيرا في اطلاقها وكنت اسير في ركب السائرين .
حاولت جاهدا القراءة من منظور الحياد فوجدتني ظلمت نفسي كثيرا فهناك الكثير من الكتابات التي كنت اقرأها ولكن في الحقيقة لم اقراها وانما تصفحتها ولم اعطي الفرصة لنفسي للاستيعاب , وجدتني اميل قليلا للتريث , ولكن مع المحافظة علي الوقوف في وجهة ما كنت اقر بانه انتهاك صريح لثوابتنا , استمر الامر علي ما هو عليه وغلبت الكتابة الجميلة علي المنتدي فبدأت اقرا كثيرا لاعضاء ديدنهم الكتابة الجمالية هذا الامر اقر بأنه اعاد تشكيل وجداني بشكل خاص , حتي انني من كثرة ما قرأت حتي اطلقت سلسلة من بوستات الانطباعات الخاصة بي والخاصة بكتاب المنتدي والاوسكارات وكانت بوستات رائجة كما اظن من خلال المشاركات الفاعلة فيها . الامر الذي افادني كثيرا وجعلني احب ان اقرا اكثر منه ان اكتب ذلك لاكتشافي ان هذا المنتدي فرصة نادرة توفرت لي للقراءة لذوى اقلام قل ان تجد اجتماعها بمثل هذه الكثافة الا في هذا المكان .

أخي أساسي والزملاء/ات الكرام من سناير المنبر

تحياتي لكم جميعاً

شكراً أخي لايرادك جزء من تجربتك المنبرية هنا وسردك لتاريخ المنبر من خلالها..


دون الاشارة لاختلاف أو اتفاق اتجاهاتنا, فقد افادني حديثك كثيراً بحكم عضويتي الجديدة والأسئلة

الكثيرة التي تدور في ذهني منذ فترة, عن كيفية التفاعل مع هذا المجتمع كفرد جديد والتعبير عن

رؤيتي دون فهم خاطيء أو تصنيف غير عادل أو المساس بالآخرين,.. أيضاً تكوين العلاقات

والصداقات مع بقية الزملاء..



يبدو أن هذه الأمور جميعها باتت أكثر صعوبة الآن عن حالها في زمانكم المنبري السابق, لذلك

نتمنى من الزملاء/ات القدامى والمؤسسين سرد تجاربهم منذ البدايات, والتي أؤكد بأن بها الكثير

من الأدبيات الراقية في التعامل والحوار ..



مودتي

هناك بعض الكتاب الذين كانوا علامة فارقة في تاريخي المنبري , هؤلاء وبالقراءة المداوة لهم تحسن كثيرا اسلوبي الكتابي او طريقة كتاباتي (كما اظن) فعندما اعود الي بداياتي وتلك الفترة اجد هناك فرقا واضحا في نوعية الكتابة ومحاولاتي للتجويد , اذكر منهم علي سبيل المثال الاخ الرحمابي , ديكن , شيري, بت قضيم , ابو جهينة , اشراقة مصطفي , علياء عوض الكريم , مريم بت الحسين , الملا عمر , واخرين في وقت لاحق . تتبعي للكتاب جعل فضاءاتي الفكرية تتسع ومعها اتسعت الرؤية وضاقت عباراتي , واصبحت مقلا في الكتابة حتى اني كنت ايامها مع وجودي في املنتدي الا اني لا اشارك فيقوم البعض بارسال بوستات نداءات لي بالعودة رغم اني موجود واتابع تقريبا كل المكتوب الا اني كنت اكتفي بذلك , كنت معجبا ببعض الشخوص المنبرية والتي اثرت كثيرا علي وجداني وقناعاتي فبدات احس داخلي بان هامش الحرية التي كنت امنحها للاخر كانت غير كافية تلبستني ايضا فكرة مفادها ان الحوار لابد له من نتيجة , فتايخ المنبر هذا ومنذ البدايات لم اشهد احدهم في اي بوست حواري قد افاد بان رؤاه او قناعاته التي كان يتبناها في اي موضوع قد تغير بل نجد دوما تشبثا غير مبرر بالاراء وان وضح للجميع انهزامها امام راي اخر او حتي وجود مبررات اخري تفيد بان فكرته غير جيدة او غير قوية كفاية ولكن ومع ذلك يظل الديدن هو التشبث بالراي والعودة مرة اخري بنفس الاراء في كل الموضوعات المشابهة حتى تلبستني روح الملل من القراءة للبعض الذين تتوقع منهم نفس الكلمات و الاراء فذهدت كثيرا والي اليوم في القراءة لهم . المكابرة وقوة الرأس هي العنوان الكبير للكثير من الاخوة المشاركين . ومسك العصا من نصفها يجعل الكثيرين رايحين في النص الامر الذي بدا يقود المنبر الي صراعات مرة اخري , صراعات كادت ان تفتك به كثيرا الا ان الذاكرة المنبرية عمرها قصير فقد شهدت في هذا المنتدي تحالفات مصالح واعادة هيكلة شلليات مضحكة الا ان اكبر فض لتحالف شهده المنتدي كان بين كودي اخوان وشلة تراشا .

اساسي المنسي

ياخي يكفي إنو بكرينا بي صلعتو الكبيرة دي يضع عنوان بارز اعلى المنبر مرحبا بعودتك بعد غطساتك الكببرة ديك

انا فى الاول فكرت اصاحبك عديل

اغطس شهرين وشوفنا حانعمل ليك شنو

تحياتنايا أساسى

اسي دي يا اساسي

اقولو فيك شنو ويرنا بس

غير الكجار ما عندك شغله

وكمان مريخابي

تعرف مرض الكجار ده جاك علي كبر

قلنا اساسية تمسكك لكن خليتها مع والدتها وبقيت قاعد هنا


تحياتنا يا جميل

اها كسير ولا عاوز اكتر من كده

عباس

معقولة يافردة

انت بعد اساسى ب ستة يوم

عفارم عليكم ياسنيرات

يا قنبله يا موقوته

ازيك يا قريبي

تعرف بعد حصلت لخبطات وتاني سجلونا

واهو جاء التاريخ ده

لكن تعرف زمان كان الشات نجاضه بس

البورد ده الا تجي تسال من زول بس

لكن كل الشباب بي هناك شات تقيل

لافي مشاكل ولا في اختلاف

واقول ليك حاجه من الشات ده طلغت صداقات لي انا شخصيا قوية ولي اسي مستمره

يديكم العافية

..
.
دى غايتو ما سبقك عليها زول
ما سمعت انو واحد بعمل بوست لسيرتو الذاتية ..

على العموم انا واقف جنبك لو ذاكرتك خانتك ..
ما تنسي مرحلة الشلليات والتطبيل ..
بالله تتذكر ايام دخول تماضر للمنبر الناس كانت بتسوى شنو ؟؟
وبالله ما تنسى ايام بكرى عمل مدراء اقسام للمنبر
ناس قرشو ويازول يا زول .. واخونا الرائع ود امدرمان مرتضى .. ود عزة ؟؟


__________________

تماضر دى مجرد اجترار للذكرى ما تفهمينى غلط..

السماني
كيفك
رغم أن الأخوان هنا اهتموا بالعنوان، ومقدمتك، لكن في تقديري أهم ما في هذا البوست هو رصدك الدقيق المصحوب بتحليل لحكاية "منتديات الحوار السودانية" وللدقة أقول أنها (بداية)، وفي تقديري أنه سيأتي زمن تكون مثل هذه البوستات مرجعيات لدراسات ورسائل أكاديمية...وأقترح عنوان "تحليل الشخصية السودانية ..أعضاء المواقع الاسفيرية كعينة"،
وبالمناسبة يا أخي أنا مش في يوم من الأيام عنونت ليك بوست عديل صحيح مش بكلمة واحدة بس اسمك ورد في العنوان....
تحياتي لك ولأساسية...

يا اساسي يابرلومنا
انشاء الله يوم شكرك مايجي
زمان كان اسمك جميل ، بعدين جيت تغيرو لي هناي داك قلنا ليك ده ح يطير منك الحمام كلو
اها مشيت عملتو اساسي لي سبب لسع ماركب في راسي
اها يازول لو داير البوستات تطاقش غيرو لي رومانسية ولا اساسية
لكن لو خليتو اساسي ماتتوقع في المدى القريب يكون في بوست شكر بضم الشين
بعدين الناس الكان بيشكروك كلهم عرسوهم عشان كده الايام دي سوقك كلو طماطم ( الاسهم نازلة )
عشان كده امسك في سنايرك قوي لانو ا نت مامجبور علينا نحن مجبورين عليك

بعدين الجبهة العالية لا تحتاج الى تاج يزينها

زاتوووو

زاتوووو

الزوووووووووول زاتو

ازيك ياخ وكيف حالك

مشتاقين

ومالك ما قاعد تدخل هنا

وين لسانك الطويل

متابعين معاك...

محبتي الاكيدة

يا اساسي
وين يا مان يا فردة ويا حبة
انا ودفعتي العمدة قرشو ما حنقول فيك اي كلام حلو
غايتو جنس مغصة

Quote: تاريخ التسجيل: 10-10-2002

صحى يااساسى حمزاوى دا دفعة

وين شيرى,,,وهوب ليس المسلم,,
وقرشو,,,
وناس خيمة الحاردلو

اهل العوض سنجاوى الملا عمر
عارف كنت بحلم بشنو,,,
يجو يعملو معاى لقاء الاسبوع
اوقل كدا اجدع فيه
لكن قبل دورى يجى

وصل للمنبر اعضاء من نوع تانى,,الفاظ ما عارفها كيف
وكل واحد عامل احسن من الاخر

بس خلاص

اساسي مرور من اجل التحيه والسلام

رغم أن الأخ أساسي مريخابي، ويقال أيضاً بأنه كوز ودباب،
إلا أنني استمتع بكتاباته الساخرة واللؤم الذي يسيطر أحياناً
على ما يكتبه، وهذا البوست امتدادً لكتاباته الساخرة الجميلة..
وأود أن أنتهز هذه الفرصة لأحي زميلنا أساسي على هذه الخطوة
الجريئة بالكتابة عن نفسه، لأنه إن لم يفعل فسوف لن يجد من
يكتب عنه ويكسر له التلج لأنه محسوب على الظلاميين.
المستنيرون وحدهم هم الذين يكتبون عن بعضهم ويمدحون ذواتهم.
أرجو أن تبلغ تحياتي للزميل أساسي وربنا يمتعه بالصحة والعافية..

يعني مثلا .. قول انا دخلت هنا علشان اكتب ليك كلام في حقك ..؟؟!
ياتو ذكـريات جميلة خلفتها لينا في هذا المكان تجبرني علشان اكتب ليك .. كلام في حقك يا ارشقك بعديدان السوسن .. والزيزفون وأوراق الورد ..
ذكــرياتك يا سيدي فينا بائسة .. وطفولتك معذبة ـ تشوف اي حاجة عايز يعملو ليك زيها ..
صدقني
ما بقدر اكتب ليك إنت بالذات حاجة.. الثواني البخسره فيك دي .. اخير ادخل القوقل افتش فيها قصص عن حكايات الف ليلة وليلة ..


غايتو البركة في بكري ابوبكر والله يديهو الصحة والعافية ..

أوووووووووبس ...... بوست سناير
(تاريخ التسجيل 2002 - تاريخ التسجيل 2003)

نكب الزوغة أحسن

Quote: اديتو الواحد احساس بانه يائس حتي يكتب عن نفسه , ان شاء الله اصحاب السؤ الواحد ما يتمناهم لي عدو

يمين يا فقر لو بتصبر البوست بتاعك جاهز و كاتبه في الويرد
بس منتظر مشاركاتك ديل

Quote: مجموع المشاركات: 9979

يتمن 9998
وكنت حا انزله
طبعا عارف العنوان
افت ليكم اساسي...؟!!!

حسي بوظتها لينا , لكن ما مشكلة بقص ليك في الـ 11111 إن شاء الله

كيفك يا ود حلتنا
تعرف وصفت نفسك بحياد نادر .. وكمية التحيز مسموح بيها .. غايتو قريب ده جات سيرتك مع صديقة .. قالت والله من ما عرس راق

تعرف يا أساسى هنا أنا لقيت ليك الوصف الصحيح جد:

Quote: ما ان رأيت خروجا عن المألوف من القيم السودانية التي طابعها اسلامي الا واعتبرت ان الامر يخصني تحديدا لقول لا في وجهه . كنت انظر يومها لمن يبادر بمثل هذه الامور انهم بهم الكثير من اللمم والكثير من الشبهات في دينهم . كنت انظر للعلماني كانه والكافر سواء

أنا عندى حساسية مبالغ فيها ضد الكيزان والإسلاميين المسطحين بثوابت غبية .. البعض بسموها أصولية ولكنى أحسبها نقص إنسانى ونزعة إجرامية فى سحق البشر .. بالعربى كدة "ناس حاقدة" بدسوا أو ببثوا أحقادهم وراء ستار الدين ..
عمرى ما حسيت إنك من الزمرة دى رغم "الفظاظة" التى كنت تقابل بها البعض .. ويمكن تكون ملاحظ مقاشرتى للبعض ولم أحاول معك سوى كسب الود .. بإحساسى بأن ملاواتك لا تتعدى سودانيتك الغيورة المشبعة بإحترام العقيدة .. ويوجد غيرك زميلات وزملاء أكن لهم الإحترام رغم الكثيرون يرمون بهم سريعآ فى جب الكيزانية .. ويتكون ملاحظ مهادناتى معك السابقة قبال أعرف إنك ود حلتنا البخاف من الكلاب ..

أبقى كما أنت وتحياتى لبنتنا المستنيرة الهدت عليك شوية

عليك الله يا أساسي مالك اليومين ديل ؟؟؟؟؟؟؟؟

عايز تعمل ليك دينمو و إنت يومك كلوا في الدائن و المدين و الأستاذ العام

و الآن عايز تكرم نفسك !!!!!!!


يا خوي إنت لسه في مرحله البامبرز و السيريلاك


يعني لو وصلت مرحلة الذهب تعمل شنو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟




كــدي بدل الكلام دا كلوا نعمل ليك كــشـــــف ؟؟؟؟؟؟؟؟؟؟؟؟؟؟؟؟

::: ---- :::
ذكرتني

أساسى الأساسى

يا زميل المنابر و القلم الجرئ .. ألفين سلام يا أبو البنية

بعد ما تكمّل كلامك عنّك .. بنجى نتكلم عنّك

بصراحة .. أنت من القلائل الذين أحرص على قراءة كلّ ما يكتبون

على الحلاوى/بغداد

اساسي



يا


أحلى زول في حي نا ( سودانيز اون لاين )




وان شاء الله دائما بخير ..

ومن لم يزد عن .... بكيبورده

انشاءالله يوم شكرك ما يجئ ياجميل

عموما طلب بسيط بعد ما تنتهي

بالله افتح لي واحد معاك

المهم في الأمر تعرفت على اساسي

بواسطة محمد حسن العمدة وخرجت

بإنطباع غير جيد يعني ما يكتبه

ومقابلة سريعة قررت أنه الرجل

متزمت في ارائه وهكذا ومضت اعوام

وإلتقيته في البورد او تجمع البورداب

وكان ما كان بس ما تسألوني عن عمق العلاقة

الان اعمق مما تتخيلوا فالرجل بجد كما الشمس

واضح ونقي وبالمختصر المفيد زولا دٌغري لا شق

لاطق وهاااااااااااااااك ياصداقة.

وافر التقدير ياأساسي وصدقني اتابع كلما تكتب

بس ملاحظة بسيطة :
اساسي الذي يكتب لا علاقة بينه وبين السماني في

الحالتين القاسم المشترك الوضوح في الفكرة .


بالله رأيك شنو في الكسير دا والله دي حقيقة موجبة الذكر.



....................................................حجر.

والله يا أساسي دايرين نشكرك و إنت بتستاهل. لكن براك شايف المنبر بقى كيف و الواحد خايف على سمعتو وكدا... تاني الواحد يفكر مرتين قبل ما يشكر واحدة و يفكر ستين مرة قبل ما يشكر واحد.
عموما أقول ليك إنك واحد من أصدق و أوضح الأعضاء هنا و ربنا يتقبل وقفاتك في المنبر بالذات لمن كنت براك. أها شكرناك و ربك يستر.

العزيز السماني
يحق لي بل يلزمني ان اكسر ليك تلج القطب الجنوبي و الشمالي و ما يكسوا اوتاد الارض. اولا لاحتفاءك بمقدمي و تصحيح خطأ شنيع في اول بوست لي هنا و ثانيا لتأسيسك لادب خلاف معي يصلح نموذجا لارقي اشكال التسامح و السماحة و الذوق.. انا معتز جدا بذلك و اتستحضره دائما عندما تحزب الامور في هذه الساحة.. دي فرصة لاشكر علي كل ما سبق من فضل اجزلته لي و لانك اتحت هذه الفرصة لكشف ما تكنه النفوس و نحن قوم ضنينون بما تحت الضلوع...

Quote: اضنينه كبار

لوووووووووووول
اساسى سلامات
ما تقولى لى لكن الشكر ما عندك
لكن قالو الاضنينو كبار عند امو غزال
يا حليلك والله ضحكتنى.. الله يفرحك ديمه
تحياتى لكل المتداخلين
اسماء الجنيد/ مسقط

يا شباب أساسي ده ما ياخدكم في دوكة ويطلع نفسه مسكين ..
ما شفتوهو كان مسيخ كيف. وقاعد في طرف المنبر لأي زول يكاجرو.
كان بيذكرني الجماعة الشفوت البيجرًو شكل اي زول ماشي في الشارع والناس بتغير ليهم الطريق عشان ما يلاقوهم ..
في يوم هجمني هجمة وقال لي إن شا الله ناس الحكومة يعملو فيك اكتر من كده. وكان البوست عن طلب وفد الحكومة في نيفاشا بطردي من مكان المفاوضات عشان كنت نشرت الوثيقة المتفاوض عليها..
طبعا أصلي ما إتلفتا وطلًعتا ليهو عرق المكابراب الفيني وبمزاج بقيت ارازيهو..

الصحبة الحصلت بعد داك انا زاتي ما عارفة سببها شنو ..

المهم.. أساسي أساسي في المنبر.. إتفقنا أو إختلفنا










ليك وأساسية وأمها وافــــــر الود

اساسى .. كيفك يا حلو ..

قالوا مما الواحد يبدا يتكلم عن نفسة ..

معنى ذلك .. فكت منو !!

وعايز ليه مباراة تكريم !!

طبعا دى فى كرة القدم !!

يعنى لو عايز ليك تكريم !!

كدى شوف لى الصندوق فيه كم ؟؟

الايام دى روحنا مكركرة !!

عايزين لينا قجا !!

وقبلها خلى اساسية الكبيرة تهبش ليك راسك !!

يكون عندك سخانه ؟؟؟؟؟


تحياتى للاسرة !!



الرئيس

يوسف

أساسي يا حبيب...صراحة أنا فكّرتا أعمل ليك حاجة كده (حفلة شاي)، لكن زي ما قال العوض قبل شوية
الزمن بقا ما مضمون...شوف البقت علينا كيفنها!
صراحة عناوين بوستاتك في 2004، تدل على الموهبة العايزة دفن في شخصكم الكريم...
وكل ما الزول يقرا لرومانسي 2002 ويقارن بأساسي 2004 تحديداً، يقول الشخصيات دي
يا فيها رودا مردا...يا سارة عيسى...أو الأتنين معاً!

خالص الحب يا سنير

____

أنا غايتو الجابني المنبر ده، سنيري علاء الدين نصار...
فليهو التحية...

يعني شنو يعني
حسي انا ما جيت بعدك بي كم يوم و قبلي انوركنغ الكاتب فوقي دا

و زول اشتغل بي مافي
ماشي اعمل منبر عديييييييييل كدا انا لي روحي

غايتو ...
غايتو جنس غايتو



ششششششششششششش
انتهى الارسال

اساسي:

يا كريم القلب والروح

يا نقي الدواخل

يا اب اضنين كبار

اها كده كيف معاك بردنا ليك بطنك ولا لسه

وين اساسي ياناس ؟؟؟

اصدقائي اخوة الصفا

انا حائر الان بين الرد عليكم فرادي وبين اكمال تداعياتي .. فلو بدات بالردود سأكتفي بذلك .. فلست من انصار البوستات طويلة الاجل لانها تفقد نكهة اللحظة التي كتبت بها وستتفرق بي السبل باستفاضتي في الرد .
هذه الكتابة كانت تقز في كيبوردي زمانا وقررت ان افردها بهذا البوست (اليائس ) لذا احبذ المواصلة مع وعد (ني) مني بالعودة اليكم وكتابة علاقاتي وانطباعاتي عنكم في هذا البوست ..
لذا استميحكم السماح لي بالمواصلة في صدر البوست والعودة اليكم

يعني يا الرفاعي بطل لهلهة انا كتبت مداخلة في البوست دا قبل ساعة بس

أها؟

اساسي الجسور كان سحروك بنحضر ليك البخور ..



التحية لعزاز شامي ... الخلتكم تبقروا وتكسروا التلج لروحكم ..



أمنياتي ان تكون هلالابي ..

أساسي العجوز
سلامات

أشهد أنّك كريم القلب والرُّوح ، نقيّ الدّواخل وإضنينك كبار





حالة صعبة

أنـا في البـعـيـد مُـشـتـاق لهـمـسـة من الوطن يا نـسـمـة

أساسي واصل... لكن ما تلخبتنا أضيف ردودك في نهاية البوست.