زهرة, وائل, عبد العظيم (مازال هناك ما يقال عن شمولية العقل والسلوك السوداني) - لامهاترين PLZ

ان ما حدث هو اغتيال بوست ابعد ما يكون هدفا للاغتيال ولقد احتوى البوست اكثر من الكلمات في طياته فيه من الاحساس والروح مالا يخفى على اي زائر بالبوست واقصد بذلك من شاركو في موضوع البوست وليس من شاركو لتصفية حساباتهم الشخصية مع احد المتداخلين.
لقد عنى موضوع البوست لي الكثير واحسست تفاعل واندماج المشاركين في البوست بصورة سلسه تتميز بعمق التامل والهم بتطوير السلوك والعقل السوداني , ولقد وجد بعض المشاركين البوست واحة يتناجون داخلها ونستمتع نحن القراء والمتابعون بهذة المناجاة والتاملات وننتظر السانحه للتداخل بما يثري وينسجم مع سلاسة البوست ,فيما يتعلق بمتناولي موضوع البوست الاساسي, ونخشى النشاذ من مشاركاتنا في اطار الموضوع.
فاذا ببعض المتداخلين الذين تعاملوا بمنتهى الانانيه وحرمونا هذا الالق لكي يقومو بتصفية خلافات شخصية ليس لنا ولا لصاحبة البوست زهرة حيدر ناقة فيها او جمل.
الا ترون انكم بهذا السلوك تهدمون الفكرة الاساسيه من هكذا منتديات الغرض منها نشر المعرفة ورفع الوعي , ونعتمدها نحن مشاركيها مساحة نحاول ان نمارس فيها سلوك بعيد تماما عن ما تحاولون باصرار وقوة اقحامانا فية.
توجد الكثير من الوسائل والاماكن التي يمكنكم ان تمارسوا فيها هواياتكم الطفوليه في العراك.
ارجوكم الا تتداخلو في هذا البوست الا في اطار موضوع البوست المغتال وهذا البوست هو امتداد لدوحة زهرة حيدر وراعيا البوست وائل خلف الله وعبد العظيم محمد احمد لنحاول مواصلة ما بدأتوا من تامل وتجلى.

قالت زهرة حيدر

الاعزاء دوما زملائي في هذا البورد .. على اختلاف الافق والمشاريع والهوى

قبل ما يناهزالعام كتبت ( بضم الكاف) عدة بوستات حول مشاركة شاب سوداني في مسابقة نظمتها قناة الMBC للفناء العربي والفنان المعني هو خالد حسن .. ناصبها كثيرون العداء والراي الحاد لكون المسابقه معنيه بثقافه عربيه لا تمثلنا ..او لكون الشاب المعني كان بعيدا في سلوكه كما راه البعض عن المجتمع و الثقافه السودانيه
جل اصحاب هذه الاراء كانو ذو خلفيه فالنقل متادلجه او للتخفيف فكريه نتج عنها هذا الراي

البعض ناصب الفكره العداء لكون الاهتمام بهذا المنحى هيافه وعدم موضوع

تابعت هذه البوستات وشاركت دفاعا عن خالد حسن وفق وجهة نظري الخاصه ...عن حتى فكرة البرنامج التي بالتاكيد لو كنت المسؤل عن القناة لم تكن لتاتي في اولوياتي او حتى عاشر اولوياتي تنفيذها... لكنها كانت كذلك للبعض الاخر

الشاهد هنا باني واثناء متابعتي عن بعد للاراء المطروحه في هذا الموضوع او غيره من المواضيع كان دائما يخطر لذهني تساؤل :
هل السودنيون شمولين بطبعهم

هل من الضروري ان يواقف الاخر الصورة التي احملها للخير او الصح او غيرها من القيم الجماليه و القناعات لاكون ايجابيا تجاهه او اتعامل معه

اسئله مطروحه لارائكم
--------------------
كل من عرفني عن قرب قال اني حاده جدا ... بعد كم هائل من التجارب الانسانيه بشكل عام و السياسيه بشكل خاص.. وجدت انه من الضروري التوقف لمعالجة الامر .. وفي طريق الحل
لكل من فقدتهم بسبب حدتي .. اهدي هذا البوست .. لكي يعلموا باني نادمه حقا على فقدهم



ونبدأ من الاول

هل الشموليه هي الوجه الاخر للعقل والسلوك السوداني

ده البوست المغتال

اسماء

البوست حي يفرفر بس طولنا منو حبة

والان وجدت زهرة سجلت مداخلة جديدة وقبلها وائل يسأل عني وعن محمد جميل

وهكذا

سارجع هنا كي نتحاور قليلا حول ادب المشاركة في البوستات وقصة اغتيال الحوارات

بسبب مداخلات ومهاترات في غير مكانها .... ولدي الكثير

وليكن هذا البوست بمثابة محطة اخري وملجأ اذا ساءت الظروف في بوست زهرة ...

ساحاول الكتابة

واعود

اسماء

شنو رامية لينا المصيدة كدة وتقولي زهرة وائل وعبدالعظيم وتفتحي البوست

وتمضي ....

اتوقعتك تجي راجعة وتقولي لي : ايوة انت مصر انو البوست حي يفرفر

من خلا عادتو قلت سعادتو .... وانا من عاداتي الصبر وعدم التخلي ....

وما تقولي لي ... مثلك بتاع الابرة داك

اين انتي ...

ارجو ان التقيك هناك في دار زهرة الستو مشت تكوس

هذا اذا عدتي انتي من الكواسة

العزيز عبد العظيم

حقيقي المداخلات الاخيرة في البوست بتاع زهرة محبطه جدا وتنم عن انانيه عاليه من متداخليها وعدم احترام لمتداخلى البوست ولو قرو موضوع البوست ما كان للمستوى المحبط ده من التحاور. وهنا انا حاولت انبهم لان البوست فيه ما يقال ولم يقال بسبب سوء التناول منهم.

وبعدين

من خلى عادتو قلت سعادتو
وانا اكثر واحدة عارفة تشبثك (بالفرفارات من الحيوات)
وابرتك على الاقل كانت زمان بتغير الخيوط لكن بقت شايله خيط واحد ومابيه تغيروا الله يعينا غايتو

Quote: ده البوست المغتال

طيب طالما البوست دا مشيت جبتو من الصفحة الكم لاني شفتو امس بالليل .. وما سرني ما كتب فيه من توصيات .. ومن عدم احترام ايضا للذين زج بهم زجا من دون اي ذنب لهم ..
وطالما البوست الاساسي من اروع البوستات التي كتبت هنا .. في الفترة الأخيرة وهذا ايضا باجماع حتى الجهات التي تعتقد كاتبت هذا البوست انها عملت على تخريبه وانه هدف اغتيال حسب وجهة نظر الكاتبة ورؤيتها المحصورة في نظرية المؤامرة ..
وطالما انو البوست شغال بنفس روح الحوار .. وكل حسب طرحه .. وبما انو الصراع الداير هناك جزء اصيل من عقلية السوداني والسودانية التي لا تنفصل من عقلية كاتبت هذا البوست ..
فأتمنى ان تكف الكاتبة عن مهاجمة الذين يسعون فسادا في ذلك البوست ..
بمعنى اصح دعينا نلت ونعجن .. وتعلمي ان تعالجي ما يفسد الاشياء .. بروح طيبة بعيدة عن مبدا النظر من أعلى وبعيدا عن توجيه عبارات أمثال (لا مهاترين) فهذه المساحة شهدت من امثالك من كانوا يقفون هنا عند مدخل كل البوستات ليعلموا الناس ان اكتب هذا ولا تكتب هذا .. قول هذا ولا تقل هذا .. ولعمري هذه وسيلة فاسده في تعليم البشر .. خاصة في الاماكن التي لا تتقيد برقيب أو رقابة أو سلطة إلا الرقابة الشخصية ..


التوقيع:
واحد مهاتر بي هنا وهناك .. هناك بيصفي في حساباتو .. وهنا مدعي للاستاذية ..

الزميلة اسماء
عاطر التحايا وخالص الود
سمعت من احد الاصدقاء مقولة ينسبها للطيب صالح
اخذت المقولة واضفت عليها لمساتى
تلك المقولة التى اصبحت اختم بها كل اركان النقاش مع جزئية من ست الدار بت احمد جابر
ملاريا ملاريا وكل الدنيا مدودى ملاريا
اى بشر يخدم صايده
حمى الشارع من تبدا من راس داك تلب فوق دا
حمى غريبة
واغرب وين
قامت ندوة قبل يومين
وكان يا الزين راى ناس الدين
انو غضب مكتوبلوا يبين
قالوا اكلوا التين
اكلوا الزيتون
رشوا الحشرات
اشربوا عرديب
وكل الحسبوك باكر جابوك
من وين جابوك ..جابوك من وين
شوف عينا التين شوفنا الزيتون
كرتون كرتون ذى طور سنين
علب البف باف اصناف اصناف
المطعم جيب بيض كبده حليب
جنس اساليب
جنس الاعيب
بعدين يا الزين
يا الزين لمتين
لأله فى قريش
تملانا هريدى بنوك العيش
بغادى كتر بجاى الديش
ندقش شقيش
معقول ده الدين
معقول ده قدر
صلوا مصلين
زكوا مزكين
اصبروا صابرين
قصرنا فى ايش يا رب معليش
انا اقول قول بت حمدين
يوم لقت القش مسروق حوضين
قالوله قدر يا حاجة اراد
هاجت يا اولاد
نعم احنا عباد
لكن ده اثر
يبقى الله بشر

حميد وكما اعرفه ينطلق من تفاصيل التفاصيل لمجتمعه
ولذلك ظل شعره لا نخبويا يتعاطاه الجميع
حتى فى اشعاره العاطفية مارس عاطفة لا نخبوية

انا تيقنت من تالاك لا اسف ولا محزون على العمر القضيته معاك
براى باقى الدرب بمشى وخطاى ما بتعدم الهداى

مارس عاطفته فى الوقت الذى كان يمارس الاخرون غربتهم المجتمعية

يا ما فى وماليه الحته

وبرغم تجلياته وتضحياته الكثيره الا ان هنالك من امتلك الجرأة لوصفه بالجلابى

مقولة الطيب صالح المعدلة تقول

ان السودانى لا يجد حرجا فى ان يخلع ردائه ويتبول وسط المارة
والاغرب من ذلك انه يرد التحيه لأن فى ذلك اجرا وثوابا
والاغرب من ذلك
ان هنالك حكومة تدعى التوجه الحضارى
ولا تستطيع ان توفر المراحيض لمواطنيها حتى لا يفعلوا ما فعله اخوهم ذلك

نحن كم من التناقضات يسير
يعطى احدنا نفسه حق ان يحب
وعندما تمارس اخته نفس الفعل يتحول الحب الى خطيئة
بوست زهرة هو مجتمعنا بأدق تفاصيله
كلنا نمارس الهرجلة ولكن بأشكال مختلفه
اتعرفيين باننى مستمتع بالصراع داخل البوست اكثر من استمتاعى بأى شى
نحن شعب مغبون ولذلك لا نتورع فى تفريغ غبينتنا عند اقرب منحنى
ارى الشخوص من خلال غبينتى الذاتيه
وهم من يحركون رغبة الكتابة بدواخلى
عبد العظيم يعلم باننى كنت من اكثر الطلاب حضورا للسينما
كنت زبونا دائما للدور الاول
الدور الاول كان معظم حضوره من الشماشه وهم من اكثر الفئات حبا الى قلبى
طلاب الجامعة كانوا يحضرون الدور الثانى
ولذلك كنت استمتع وانا فى حضرة الشماسه
فى بعض الاحيان كنت اصرخ مناديا البطل بالالتفات عندما يكون هنالك عدو قادم من الخلف
دوما كنت اتقمص شخصية البطل
والخيانه كانوا يتقمصون ثوب الحكومة ...ادارة الجامعة .. بعض الدكاترة
عندما ينتصر البطل كنهاية حتمية للفلم الهندى اجير هذا النصر لصالحى فى مقابل هزائمنا
عندما كان البطل يشفى غليلى فى الانتقام كنت اخرج من الدور الاول لأعاود الفلم فى الدور الثانى حتى اتيح لنفسى الاستمتاع بالنصر من جديد
دعونا هاهناك ولا تقتلعونا من مجتمعنا
شكرا لكى لانكى تودين انقاذ الحوار وشكرا لنا لأننا نود ان نهرجل قليلا

تامبا
هاتر كما تشاء
ودع الآخرين يتهاترون كما يشائون
فنحن شعب لم يجد من يوحد غبينته

Quote: الدور الاول كان معظم حضوره من الشماشه وهم من اكثر الفئات حبا الى قلبى طلاب الجامعة كانوا يحضرون الدور الثانى ولذلك كنت استمتع وانا فى حضرة الشماسه فى بعض الاحيان كنت اصرخ مناديا البطل بالالتفات عندما يكون هنالك عدو قادم من الخلف دوما كنت اتقمص شخصية البطل والخيانه كانوا يتقمصون ثوب الحكومة ...ادارة الجامعة .. بعض الدكاترة

..

Quote: تامبا هاتر كما تشاء ودع الآخرين يتهاترون كما يشائون فنحن شعب لم يجد من يوحد غبينته

العزيز وائل خلف الله ..
سلامات
تحضرني قصة طريفة بطلها شخصي .. والكومبارس كلب الجيران الذي لا يكن لي من الود ولا مثقال ذرة .. كان يشم رائحتي من بين ملايين البشر .. ولا يكف عن النباح ..
كان الزقاق الذي يتوسطه هو .. اقرب نقطة للوصول إلى دارنا نزولا من المحطة الرئيسية ..
من اول الشارع عند قدومي .. اشحن جيوبي بما تيسر من الطوب .. (والضرابات) الخرسانية .. اتوسط الطريق وادخل في (حربي) المعلنة مع هذا الذي (يشمني) من بعيد .. في حربنا هذه لا منتصر .. فلا عضاني ولا اصابه رشاش من سلاحي .. لكن اظنه كان يستمتع بتخويفي واظنني استمتع ايضا بما ذكره داروين ..
عندما يغيب لاي سبب من الاسباب في موسم التزاوج ملبيا نداء الطبيعة في الاحياء المجاورة .. بانت .. الهاشماب .. العباسية احس بوحشة غريبة جدا .. وانا اعبر الشارع .. غير مستفيد من كوم الحجارة احس بخيبة عجيبة جدا ... اضع الحجارة مرصوصة في مكان نومتو اليومية بي فهم حضرنا ولم نجدكم وبطل تتحاوم لانو شايفك (خالط) جمب دار الرياضة.
فهذه من خصائص عقليتنا الشمولية وسودانويتنا الواحد فينا فيلسوف حتى علي نفسو .. وممكن يشاكل ضلو .. ولو ما لحقك ومسك في رقبتك ممكن يبصق عليك .. من بعيد يا يلوح ليك بي قبضة ايدو .. الشمال او اليمين حسب التكنيك .. والاشولنجية دائما فنانين في الحركة دي ..
بالمناسبة:
أنا لما كنت صغير كنت تمتام .. وبقطع .. لحدي ما خنقوني بي مصران الضحية .. لساني فكه وبقيت ارص كلام زي الطلقة بي صراحة كدا .. ندمتهم على اليوم (الخنقوني) فوقو .. دي مش برضو شمولية وسودانوية .. وحاجتنا برانـا..؟
المهم ..
ما سالتني عن مصير علاقتنا انا والكلب شنـو..؟
الكلب يا سيدي في يوم من الأيام كان معاي صاحبي وهو من علماء المزيكا السودانيين .. جينا ماشين وقلت ليهو انا مختلف مع الكلب دااك فكرياً وأنا (وهو) ما بنتلاقى في حاجات كتيرة .. هو (يهوهووو) وانا زي ما شايف حجاري ما بتفارقني قال لي انا بحسم ليك المسالة دي .. وبقرب في وجهات النظر بيناتكم .. قلت ليهو كيف (والحيوان) دا بيشم ريحتي وبيفرزني حتى لو كنت متريح بي (هيوقو).. مشينا مع بعض ولما وصلنا قام الكلب يكورك بي اعلى صوتو .. طبعا قاصدني انا عديل كدا .. قام صاحبي المزيكاتي دا طوالي اتدخل وصفر بي خشمو .. نغمة غريبة .. حفظتها في الحال .. الكلب اتجرس جدا لدرجة انو حرك ضنبو بشكل دائري وسمح لي بالمرور وكان فاكر اني اقترحت النغمة دي عربون صداقة ..
بالمناسبة اسمك دا بيذكرني واحد صاحبنا كان بلعب معانا زمان تنس طالوة في قصر الشباب دا إنت والا الما لقى شبهو الله قبحو.. وشنو كدا ما عارف..؟
المهم
بعد كم يوم قلت يا ود كدي اضع السلاح .. وادعو للسلام العالمي .. ورسل تحية لي بريجيت باردو .. المهم قمت اتغابيت عن الحكاية بتاعت الطوب والحجار دي .. وقررت اني اواجهو ليك اعزل وبالمزيكا كمان .. بلاي لما وصلت في النقطة العاملة زي (جقمة) الشاي الحارة اللا بتتبلع ولا بتتبذق ولا (مؤاخذة) يا بيه .. قام الكلب كشر لي... اخوك نسى النغمة في (ياتو سلم) اتغنت.. كابست الواطا .. والله ولا التكتح لا حجر لا ابو النوم .. الكلب إبن الكلب استمتع بي اليوم داك بس الحمد لله نهلة بت جيرانا ما شافتني اليوم داك كان موضوعي باظ خالص... كان قالت لي بالفم المليان:
بلاي يخوفك حتة كلب ويمسح بيك الواطه..؟
والله يا وائل المقطوعة بتاعتك دي جميلة جدا ..
اجمل ما فيه الفصل الأخير .. بتاع تصريح الخرمجة دا ..
حسع عليك الله دا ما مشروع انساني في حد زاتو ..؟
ياخي نحن العصاية ما قاعده تعمل ينا حاجة في الدنيا دي .. عقلنا السوداني بيفرض علينا سلوكيات عكس تجاه عقارب الساعة في حال اننا نحس انو فرضت علينا وصايا .. ونحس انو قاعدين نرد في اعتبارنا لما نجر .. للتهاتر جرا ..
فما اجمل التهاتر .. في الحالة دي.
ما عارف اشكرك كيف والله يا وائل .. على الاقل بطني بردت شوية

Quote: بالمناسبة اسمك دا بيذكرني واحد صاحبنا كان بلعب معانا زمان تنس طالوة في قصر الشباب دا إنت والا الما لقى شبهو الله قبحو.. وشنو كدا ما عارف..؟

تامبا يا لذيذ
لهذه البوستات حسنه
انها تكشفنا لذواتنا وتكشف للاخرين من نكون حتى وان لم نقصد
انت اكثر الرابحين
الان استطيع ان استنتج من مداخلاتك ثلاثة عناوين رئيسية
اولها انك شمولى ثانيهااحادى
ثالثها عدوانى
دعنى افسر لك قليلا يا صديق حتى لا تلتقط حجارتك وتلقى بها على مؤخرتى
اولا انت تعرفنى كجوع بطنك
ولكنك لم تستطيع الربط لذهنيتك الشمولية الاحادية
لقد قضيت معكم مساء دسما انت والوجيه معتصم دفع الله
وفى الصباح اوصلتك لمكان العمل
يومها كنت انت وصديق الموج ومجموعة من الشباب تتناقشون حول سودانيز
وانا كنت معكم لا احرك ساكنا
اعتقد اننى صنفت ضمن دائرة (زول ساكت) وما اجمله من تصنيف
يومها مللت المنزل بعد ان اكملت دائرة الروتين من خلاله وقررت ان ابحث عن مكان للمبيت
دائما ما اغير مكانى فى البيت
اتنقل ما بين السراير
وبعد اكمالها اتنقل بين فناء الغرف مفترشا الارض
كنت فيما سبق اوقف سيارتى بين مخرج 10 و11 وانام هاهناك على الكرسى
لا ادرى ما الذى يأسرنى فى هذا المكان
احيانا احس بان روح جدى تحوم هاهناك
جدى الذى جاء الى هذه البلاد واختفى منذ الستينات
البعض يؤكد انه راه فى ا كثر من مناسبه
والى يومها ونحن لاندرى حياته من مماته
هذه العادة سببت لى الكثير من المشاكل مع الشرطة
تارة يتهموننى بالسكر وتارة بالمخدرات
اقلعت يومها من هذه العادة بعد ان قاربت ان تصيبنى بكارثه فى هذا الوطن البديل
ومن يومها وانا افترش الامكنة بديلا للسيارة
عندما تحين دورة مبيتى تساءلنى زوجتى البائسة بانكسار
اليوم طبعا ما بتجى ..خلى بالك من نفسك
يومها يا تامبا كنت مشغولا بشى لا اكاد اميز ملامحه الان
جئتم بالعشاء ولم اتعشى
اعطيتونى جلبابا فرفضت متعللا باننى انام بنفس الملابس
تلك عادة تعلمناها حينماكنا نقرا عن ماو وجيفارا
دوما ما كنت اهى نفسى لسباق للمسافات الطويله
التكيف مع كل شى
اعددنا ذواتنا ولكن التجربة كانت كفيلة بتحطيم كل شى
فى الصباح ونحن فى طريقنا للعمل تركنا للاسطوانه ان تشغل حالة فراغ اللغة الكائن بيننا
الان تمارس شموليتك واحاديتك وتفصل ما بين هذا الكائن الاثيرى وذاك الكائن القابع فى هامشك
عدوانيتك كنت تمارس تفريغها فى كلب الحلة
ولما لمن تكن فى هذه البلدة كلاب
فقد مارستها حينما فصلت ما بينى وبين جسمى الاثيرى
اتصلت عليك يوم ان اجريت عمليتك الجراحيه ولأننى اهوى الحالة الشبحية فقد اكتفيت بها
برضو يا تمبس تقولى الطيارة فيها بورى
دم بخير يا صديق

Quote: انت اكثر الرابحين الان استطيع ان استنتج من مداخلاتك ثلاثة عناوين رئيسية اولها انك شمولى ثانيهااحادى ثالثها عدوانى

وائل يا صيد يا سمين .. يا اكتشفتك أخيراً,..
تعرف:
انا من الله خلقني كانو مسميني المحظوظ .. ما عارف ليه ؟ تعرف العقل الشمولي السوداني ليهو مقدرة عالية على التسميات الخرافية واحد يكون اسمو حسن .. يسمو ليك ابو علي .. يكون اسمو مصطفى يسموهو درش ..
المسالة دي بدون اذن طبعا .. حصل شفت ليك زول سمى نفسو .. قال انا لما يلدوني عايز يكون اسمي عبد القادر مثلا..؟
كدي محظوظ دي دخله لي في مصاف الرابحين .. واهو مصطلح جديد .. يعني الواحد اصبح محظوظ بي تسمية زمانك ورابح صقر في بوست اسماء دا..
بلاي تلاتة عناوين مرة واحده يا وائل دي ضربة معلم عديل كدا ..
بعدين تعال هنـا ..!!
بلاي دا إنت وائل القاعد اسأل معتصم طوالي عنك الزول دا وين ياخ ..؟
مسالة عدواني دي معاك للطيش .. لكن دا طبعا بتوقف على الطرف الآخر المعتدي عليه .. يعني تفتكر يا وائل اكون واقف في شارع العليا العام دا من غير سبب واقع في الناس دي قلع من طرف ..؟
ياخي البقلعك اقلعو .. وما تجي البيت دمك كابي وقاعد تبكي .. دي قاعده سودانوية شمولية اصيلة .. ما ان تخلينا عنها .. (تبنقلنا) بين الأمم أو ( تسعودنـا) أو ( تمصرننا) .. يعني تكون قاعد في مكانك كدا يقوم واحد ما عاجباهو خلقتك ممكن يجيك يقول ليك بتعاين لي مالك ..؟ وطااخ يقطع فيك كف .. لا لشئ إلا لشناتك دي تفتكر دا من العدل ..؟
بعدين يا وائل والله لو النسيان دا بالغت فيهو عديل .. مطلعني شمولي واحادي علشان نسيتك وخلطت زيت قصر الشباب مع بنزين العليا العام .. وقلبت الجلــب بتاعات الراس ..؟
ياخي إنت عارف وانا عارف والله عارف انو مسالة انك تنسى نفسك في بلد زي دي ما قاعد تشوف فيها النجوم بالليل .. دي حاجة طبيعية خالص ..
اقول ليك حاجة..
انا قبل يومين كنت بتذكر في اسم بت جيرانا متربيه معاي .. تخيل اليوم كلو وراسي زنننننننن شغال .. قلت يا ولد اديها صنة راسك دا بيجي ... وبتتذكر الأسم .. تخيل آخر حاجة عملت شنـو..؟
اتصلت عليها وقلت ليها اسمك منو ..؟؟
قالت لي إنت اهبـل ..؟
قلت ليها لا .. لكن انتابتني اعراض شمولية آحادية ... قالت لي بتهضرب كمان .. قلت ليها باكد ليك دي شمولية العقل ممكن تعمل اكتر من كدا .. قالت لي إنت شارب شنـو..؟
ياخ اقول ليك حاجة غريبة ..؟
حسع إنت القدامي دا .. اليوم داك الصباح مش جليت مكان عربيتك وما عرفت وين وقفتها وقعدنا نكوس ليها نحن الاتنين ، وقلت لي انا والله طوالي بعمل كدا بوقفه وما بعرف مكانه وين ..؟
طيب اها حسع الاحادي إنت واللا عربيتك .. واللا انـا ..؟ غايتو كان بتوحدنه بالطريقة دي والله السودانيين الفي السعودية ديل كلهم بكره الصباح تلقاهم في السفارة بعدو فيهم .. واحد .. واحد .. واحد.
المهم في المسالة يا وائل اليوم داك كان لذيذ جدا .. وأجمل ما فيهو انك خزنت حاجات كتيرة يعني كنت فاتح التيب بتاعك وشغال ريكورد ...
عجبني أنك تبحث في ذاتك عن جدك .. وما كتبته عن انشغال الأرواح ببعضها .. تتخيل انا عندي نفس شحتفت الروح دي .. لكن موسممية بتجي مع زيادة البحـر .. يعني البحر يزيد بي هناك .. عيوني بتحمر بي هنا طوالي ..
اتمنى ان يوما ما تلقى جدك تتخيل انو الروح دي حاجة عظيمة جدا .. مسالة انها محاطة بي سر عظيم دي بتوفر ليها خاصيات كتيرة جدا وبتديها صلاحيات انها تفتي ليك في البتعرفو والما بتعرفو ..
هسمه صغيرة في اذنك .. يوم ان اتيتنا في بيتنا وامتنعت عن العشاء .. والجلباب .. وانطرحت على المرتبة بالطريقة (العمرية) وهي الطريقة التي يمارس بها اخي الأكبر (عمـر) نومه بأن يلف كل وجهه بيده .. لحظتها حسيت بخاصية جذب خرافية بينك وبيني والكائن الاخـر عمر اخذت ضربات قلبي تتسارع .. لدقائق .. هنا ايضا كان للروح نصيب في تحريك بعض الأحداث بصلاحيات عجيبة جدا .. طبعا حكاية شوقك لي جدك دي ممكن تعمق ليك الفكرة بتاعتي ... وتوصله ليك بي شكل كويس .. بعدين حسيت انو زي العندك مليون حاجة كدا غلبك تعمل فيها حاجة وقلت يللا نديها نومه .. وح تفرج لما لقيتك الصباح زول كويس وامورك ماشه .. اتكيفت ..
ملاحظ معاي للحاجات دي كلها بي تفاصيله الدقيقة ..؟
يللا اقول ليك الكلام الغريب .. رقم التفاصيل الدقيقة دي
مش مرقنا مع بعض وزي ما قلت وصلتني الشغل وتاني رجعت اتصلت علي ..؟
اهـا
انا لحدي الآن ما متذكر ياتو شغل دا .. الملز واللا العقارية .. واللا السفارات ..؟ ينوبك ثواب ذكرني ..
بعدين تتخيل لما اتصلت علي ايام العملية .. لحدي متذكر اني قلت ليك ايوه مشيت معاك الشغل
والله لو بتصدق بالرغم من انك قلت لي جيتكم البيت .. ومشيت معاك الشغل ..
تخيل اني مبخرك خالص .. خالص ..؟
طبعا دي شفافية مني عجيبة جدا اني اقول ليك الكلام دا .. واللا رايك شنو يا اسماء علي .. يا شمولية إنت دي ؟
بلاي يا وائل شفت ليك زول بالاحادية دي يطلع شمولي ..؟
حكاية الكلب القاعد افضي فوقو السعرات الحرارية بتاعتي دي بجيك ليهو المرة الجاية بس ذكريني يا اسماء ..


وانجــا ..
يازوله ما عندك مشكلة .. البوست دا لذيذ جدا واعملي اي حاجة وعلى ضمانتي الشخصية .. البوست دا عندي فوقو النص.
البسالك قولي ليهو الكلام دا تبع نص تمبس ..

الاخ المهاتر تمبس
اعتذر بشده اذا وصلك احساس اني بنظر من اعلى او بعطي اي اوامر بما يعمل او ما لايعمل, وهو ماليس صحيحا.
الهدف من البوست هو انك اذا راجعت المداخلات في بوست زهرة قبل فتح هذا البوست كان من الواضح ان المشاركين في الموضوع الاساسي للبوست قلت مشاركاتهم وافسحوا المجال للصراعات الشخصية. بالاضافة لانو انا بشوف اني من حقي اقراء في موضوع البوست فقط ولست معنية بالمحاكمات الشخصية ووصلات الردح التي اجبرت على ان اقرأها او امر بها حتى اجد الجزء المعني بموضوع البوست.
اما عن المعالجه التي انتهجتها لاعادة البوست لموضوعه الاساسي هي (انا تعلمت وانتهيت) ان اعالج الاشياء بما اؤمن واقتنع بانه صحيح ومن وجهة نظري الشخصية اني نجحت في لفت نظر من عنيتهم بالبوست الى ما اريد, الا ترى التناقض في امرك لى ان اتعلم كيف اعالج الامور وترفض تدخل من هم من امثالي (على حد تعبيرك) ليعلموا الناس ما يكتبوا وطلبك مني الا اكتب عبارات بعينها الا يدخل في اطار تعليم الناس مايكتبوا وما لا يكتبوا؟
من حقك ان تهاتر وان تلت وتعجن ما شئت طالما لاتتعدى على حقوق الاخرين.
واعتذر ثانيا اذا وصلك اي احساس تعالي او رقابة فانا ابعد من اكون عن ذلك.

Quote: اما عن المعالجه التي انتهجتها لاعادة البوست لموضوعه الاساسي هي (انا تعلمت وانتهيت) ان اعالج الاشياء بما اؤمن واقتنع بانه صحيح ومن وجهة نظري الشخصية اني نجحت في لفت نظر من عنيتهم بالبوست الى ما اريد, الا ترى التناقض في امرك لى ان اتعلم كيف اعالج الامور وترفض تدخل من هم من امثالي (على حد تعبيرك) ليعلموا الناس ما يكتبوا وطلبك مني الا اكتب عبارات بعينها الا يدخل في اطار تعليم الناس مايكتبوا وما لا يكتبوا؟ من حقك ان تهاتر وان تلت وتعجن ما شئت طالما لاتتعدى على حقوق الاخرين. واعتذر ثانيا اذا وصلك اي احساس تعالي او رقابة فانا ابعد من اكون عن ذلك.

يا اخت اسماء
ياخي مافي زول قال ليك ما تعالجي بي طريقتك ووجهة نظرك الشخصية .. ليك مطلق الحرية في كدا ..
لكن ارجعي لي تاني لي مسالة لا تتعدى حقوق الآخرين الكاتباها بي عضمة كيبوردك دي ..
تفتكري لو ما عينت من نفسي مفتي وجيت داخل ليك هنا دا في البوست دا .. بفتش لي مهاترات معاك .. تفتكري كان ممكن اغفر ليك تعديك دا .. ؟
واللا كمان بتفتكري انو الناس العالجتيهم جوه ديلاك .. بي (لامهاترين) تفتكري انهم بيكونو رضيانين بي كلامك دا ..؟
ياخي لما زهرة ست البوست ذاته ردت لي اتحاشيت اني ارد ليها .. علشان ما ندخل في دوامة اني اللهيها من متابعة البوست .. لكن ما كنت فاكر انو ح يطلع لي محامية زيك ومصلحة علشان تشوف البيرضيها هي وتتضغاضى عن البيرضي الناس ..
طبعا اعتذارك عن الاحساس الوصلني مقبول جدا ..
لكن كمان راجعي نفسك في طريقة المعالجة البتعتقدي انها جيدة دي .. مع اني شايف حتى الذكرتيهم بالاسم ديل جو وقالو ليك ياخي ما حصل اي اذمة مرور في البوست بل كل الحصل ادى البوست روح أخرى ..
مشكلتي اني مصنف من النوعية البتخلص حقها طوالي ومرات مرات مصنف كوز .. وشرامي وحاجات زي دي ..
كان ما كدا الواحد كان كتب ليك بلغة مهذبة اكتر .. لكن زي ما شايفه يا استاذة اسماء .. احتمال تلقي ليك كم كلمة كدا ما يعجبوك
لكن نعمل شنو .. دي عقليتنا كدا دا ..

المهاتــر تمبس

البوست ده أثبت لى إنو "طعن ضُل الفيل" أجدى وانفع ..
هو الفيل زاتو طاعنِّنو ليه؟
ما دام القُعاد فى "ضُلو" بجيب كلام زى ده ..

شكراً وائل وتمبس.

شكراً أسماء على ضُلَ الفيل ..

كتبت المُداخلة الفاتت بعد ما قريت كلام وائل ورد تمبس عليه ..
مشيت وجيت لقيتها جاطت .. أو فى الطريق إليها ..



ما تخلّونا نلقِّط سفنجاتنا ونمرق فى الهجيرة دى.
.
.
.
كويّس؟

Quote: البوست ده أثبت لى إنو "طعن ضُل الفيل" أجدى وانفع .. هو الفيل زاتو طاعنِّنو ليه؟ ما دام القُعاد فى "ضُلو" بجيب كلام زى ده .. شكراً وائل وتمبس. شكراً أسماء على ضُلَ الفيل ..

يا وانجـا ..
ما ملاحظة انك (ضغطتي) على الفيل دا شديد ..؟
كدي راجعي نفسك ..
ياخي في ناس بتركب الفيل دا عديل كدا والواحد تلقيهو ماشي زي السير .. ما يتلولح كا لا كدا ..
بالرغم من أنو ركوب الفيل .. ممكن يطوطح الزول ..
ما يجيني واحد يشبكني ليك ورينا الفيل بطوطح الواحد كيف ..
الما قاعد يدخل افلام هندية ما يجي يسالني ..
المسالة حساسه خالص ..
لذلك
يا وانجـا .. نرجو عدم مغادرتكم البوست وإنت بالحالة دي .. على الاقل شوف لينا موضوع الفيل دا نهايتو وين ..؟

طبعاً يا تمبس جهجهتنى جهجهة السنين

ياخ أقول ليك نحن ناس "ضُلو" بس تقول لينا أنزلو ؟








حاشية:
الفيل الأول معنى بيهو الفيل فى المثل المعروف.
الفيل التانى ده أسالو منو تمبس

Quote: طبعاً يا تمبس جهجهتنى جهجهة السنين

يا وامجـا والله اخير ليك الجهجهه من طوطحانية الفيل ..
لانو طوطحانية الفيل لو كانت من النوع ابو لستك .. البتخليك بتنططي وتسمعي صوت خطواتك في اضنينك وتسعمي دقات قلبك .. وتشوفي الناس اتنين اتنين .. ويكون ريقك ناشف .. دي تكون صعبة جدا ..
حاولي تغسلي وشك من الخحالة الانتي فيها دي .. عيونك محمرة كدا.. حسع كان سالوك دا شنو تقول ليهم دا الفيل بتاع ناس سودانيز إنت قاسله في زول بصدقك ..؟ تبقي عامله زي الزولة القالو ليها شديدة .. قالت ليهو الله يسلمك
انزلي ياخ الله يهديك .. انزلي .. تقومي تقعي (تجني) لينا ساكت ..

حاشية:
المثل التاني في الفيل الأول طوطاح .. والفيل بيعرف يطوطح الما زولو ..


يا عزاز .. ويا وائل مرحب بيكم في الطوطحانية دي .. لحدي ما اجيكم بي نفس ..
انا ماسك لي موية شمولية في مكان تاني .. قاعد امارس في وحدويتي .. ما كمان عقلية ذكورية ..وكدا

ما بين طعين الفيل و ضلو و الرجاءات المغلفة في ورق دعوة خجول وشموخ ، لقيتني مجبرة اعمل روحي رايحة و اعتبر نفسي زولة غير مهاترة علشان استحق شرف المداخلة لأنو ما بقدر اخش هنا بالضراع زي اخوي تمبس و لا اسمي جاء في عنوان البوست زي وائل ...

بالله لو مداخلتي بتضايق، اختوني طوالي و امشوا للبعدي و اللا للقبلي .. ولا امشوا سيبوا البوست زاتو و اقفلوا س اون لاين و احردوا المنابر و الانترنت بس ما تشيلوني جميلة انو قريتوا لي ،اعتبروه ضوضاء أو وشوشة بين محطتين راديو ! و اتعاملوا مع مداخلتي كخيار no thanks البيظهر في البوبس أو دعايات البرامج الاضافية ... وفطوني و اعفصوني و عافية ليكم الله و الرسول قشة ما تعتر ليكم بركة الله ...

وبالله مافي زول يرد لي! لا تتفقوا لا تختلفوا! و اعتبروها شمولية مني و امسحوها في وش أي زول يحاول يبرر لي .. ردوا كده بالمجمل ... ما تخصصوه لي لانو انا لا بحل لا بربط و الونسة هنا ونسة ضحاوي في ضل مزيرة ...

ما علينا،
بوستيكم الأصلي الفارشين فيهو البكا ده قطره قام بالنسبة لي و البطل فيه مات بدري بدري ولا عزاء لغير المرغوب فيهم ... البوست ده بقى جديد لنج و فتح نفاج على برندة شموليتنا كسودانيين كل زول فينا ملك عديل كده و فخامة رئيس... فا ياريت تسمحي لي يا أميرة اتكئ هنا و أمد كرعين الفكر أمكن نوصل لحتة ... غايتو انا اعتبرتك سمحتي لي وده عشمي فيك برضو ...

هي شمولية يعني شنو؟ فسروها لي بكلام بسيط بسيط علشان اقدر افهم ما دام ما جانا لوتري الصفوة لغاية حسي، و ما قرينا في جامعات و لا قعدنا في ضل شجر ...
الشمولية موش ياها التعميم و فرض الراي و تفطيس الرأي الآخر ولا انا غلطانة؟
موش ياها مبدأ انا بفهم برااااي و أنت إذا ما معاي أنت أكيد معاهم ؟
موش هي زاتها رؤية الأمور بزاوية واحدة و رفض أي طرح مغاير؟

طيب يا أخوانا!
وجدتها!
انحنا جمهورية السودان الشمولية!
معقولة انتم غبيانين من الحقيقة دي ؟؟
ياخ حقو اسم أي زول سوداني يسبقوا اسم شمولي زيها زي ألقاب Mr. و Ms. .... يعني شمولي محمد احمد و شمولي عبده حسون على سبيل المثال لا الحصر و نضيف تاء التأنيث لزوم الجندرة و كده لأنو لازم نواكب ...

في ندوة مرة مسكت الميكروفون بقول مساء الخير نطوا فيني دشلومية زول (السلام عليكم!) (سلام الله ولا مساء الخير) (التفرنج العليك ده شنو ؟؟؟؟)و العميان شال المكسر و لحقوني ام لهب!
سلام و لا مساء الخير موش تحايا قاصدين بيها نية خير و تمهيد لكلام؟ جردوه كافي البلا من مضمونة و بيقت خارجة من الملة! نصهم ممكن يكون سابي دين قبل دقيقتين و يجي ناطي لي بسلام و رحمة زاتو ما دايراهم !
وهو الدين ده بالسلام براهو؟
فهم الدين حقنا انحنا ... و الله ده انحنا وكيلة الحصري في الأرض. الفهم ده حقنا برانا و الفتافيت الوقعت مننا اديناها لباقي سكان الأرض. أي زول سافي و مشمع في مواصلات ممكن يديك اجعض رأي في أي موضوع و يتف السفة و ينزل معاك محطتك و يتفرغ ليك علشان يوريك هو وصل لشنو و مرئياته للحل ...

طيب، عرفنا الشمولية شنو، قايمين عليها ليه و قت كلنا شمولين؟ دايرين تغربونا وسط اهلنا ليه؟
دايرينا نفقد الولف بيناتنا؟
السودان شنو لو ما رجعت من السفر لقيت الناس بتقرر ليك حياتك تمشي و تبني وين؟
السودان شنو لو ما منطقك بتاع الجوازات و حرحر روحك بتاع الجمارك و غلل قلبك بتاع المغتربين ؟
انحنا كان صبحنا الصباح ما شموليين ممكن نقتل روحنا و نبقى بعد ده في ارتفاع نسبة الانتحار والخواء الشمولي و يحلنا الحلة بلة..
عموما،
سودان بلا شمولية ملوخية بلا تقلية ...
ما تجردونا من بصمتنا يا جماعة!
خلونا تشمللم في بعضنا و نفكها في روحنا وان شاء الله ما حد حوش حاجة! الزارعنا غيرالله يجي يقلعنا! شكونا في الأمم المتحدة و لا حرشوا علينا البوليس الدولي علشان شموليتنا دي!
براكم بجيبوا الكلام لروحكم!
تسموها شمولية ليه زاتو؟

ارفعوا ايدكم عن الشمولية، فكلكم شمولي!

الشميل تمبس
الشميله عزاز
الشميله وانجا
والله ونستكم سمحه وكلامكم سمح بس يا حلوين انا والله بقيت ذى ام العروس
خاته توبه فى مكان وحلته فى مكان
فاسع يا اخوانا جهجهتونى وقطعته مصارين افكارى
فرايكم شنو نشيل عدتنا دى ونمشى لبيت خالتى زهرة
وذى ما قال تمبس نحن اصلا بيكون عندنا فكرة عن الاخر قبل ما نشوفه
يعنى اسع فى السودان الواحد يقول ليك والله الزول ده كجنته لله فى لله
وما عندوا اى سبب
اها دى ذى ما قال تمبس لانو انت اصلا من الاول بتأطر الآخر
ولمن ما تلقى اطارك لافق معاه بتعبر عن حالة صدمتك دى بانك مكجنه
بالله يا عزاز كيف تأطر دى معاك
رايك شنو لو لفيت ليك منها كيلو
طبعا الشميله عزاز يا تمبس بتكون ما فهمت تأطره لانها زوله ساكت وكده
فأدونى فرصة اعاين ليكم من فوق واشرح ليها الكلمه
تأطره دى جايه من يأطر
ويأطر دى الفعل بتاع اطار
وتحت تحت بقوله الكلمة جايه من الاطار بتاع الصوره
يعنى الكلمه اول من اكتشفها بتاعيين الاستوديوهات
وجوا المثقفيين الزى تمبس ده استعملوها ولمن عجبتم قاموا احتكروها
نسوى شنو عاد ما مثقفيين
والله انتوا عارفيين
ذكرتونى كلام حميد بقادى كتر بجاى الديش
نحن بين ناريين ذى ما قال البيرتو مورافيا
بين ناس الدين والمثقفاتيه
وده حار وده ما بننكوى بيه
طبعا اسع انا دخلتك فى مشكلة جديدة يا عزاز
تلقاك نططتى عيونك فى البرتو مورافيا
اها اشان ما تمشى تتعبى لينا القوقل ده وتفتشى عليه انقول ليك
لانه والله القوقل ده عملوه للمثقفيين اشان شى يبحثوا وشى يعملوا كوبى بيست
لو بتذكرى زمان كان فى ناس اساميهم يوسف السباعى وعبد الحليم عبد الله واحسان عبد القدوس
اها البرتو ده زيهم بس اللهم ده خواجة وديلاك عرب
انتى عارفه بقصة السلام عليكم دى ذكرتنى قصة
كان عندنا شله كبيرة بنقعد جنب العمود
وطبعا اى زول بيقعد جنب العمود بيقولوا عليه صعلوق ما شموليه وكده
بس المشكلة وين الصعاليق ديل لا بيشاغلوا بنات ولا بيسالوا زول
عامليين ذى القاعديين فى الكرمليين
اها ادنى فرصة النطلع فوق شويه والنوريك الكرملين ده شنو
طبعا اسع مع الدوشوشة الكتار ديل بيكون عندك الجزيرة والعربية والحاجات التانية دى
العربية بالمناسبه قناه ما قاصد بيها السيارة اشان ما تتلخبتوا
اها طبعا اكيد مع الزعطيبه والمعطيبه القايمة فى الدنيا دى بتشوفوا واحد كده صغيرونى اسمه بوش
انا ما عارف لكن بوش ده بحبه لله فى لله
يا ربى ده يكون من حبى وارتباطى بالبوش اشان كده حبيته والله دى اعراض شموليه مبكره
اها بوش ده دايما بتلقاهو واقف ليه جنب بيت ابيض بتكلم من جنبه
اها الكرملين ده ذى البيت الابيض
محل بقيفوا جنبوا الناس وبيتكلموا بس محلوا فى روسيا وداك فى عمريكا
المهم
مشت سنه وسنتين وناس العمود ديل ذى الغنماية الكعبه
لا بهشوا ولا بنشوا
المهم بقينا كتار
فبقينا فى الاربعة ساعات البنقعدهم بنضيع لينا ساعتين فى السلام والاحوال
اها قمنا اتفقنا انو الواحد يقول السلام عليكم والناس ترد ويترزع يقعد
برضو لقيناها ما لافقة
لانو كل شوية وعليكم السلام ورحمة الله
المهم اتفقنا انو الواحد لمن يجى يقول 1 بالانجليزى والناس ترد عليه ب 0 بالانجليزى
يعنى ون وزيرو
اشان الاختصار وكده
بعد شويه لقيناها برضو ما لافقه
الليل كله شابكينها ون وتو ون وزيرو
فقلنا يا اخوانا مافى داعى للكلام ده
الواحد يجى يقعد وخلاص لا ون ولا سلام
فتعرفى مرات الواحد يكون مسافر ليه 3 شهور فجاه تتلفت تلقاهو قاعد جنبك وعادى ذى الزبادى
والمحنه اصلا ذى ما بقولوا اهلنا الشموليين موجوده فى القلب
اها كدى النرجع لتمبس
انت عارف اسم وائل ده والله عامل لى مشكلة كبيره خلاص
ذى ما قلت انتوا الشموليين ديل دايما بتفترضوا ليكم اسامى من عندكم
تعرف انا كل ما واحد يسالنى يقول لى اسمك منو واقول ليه وائل
بشوف فى وجهه استهجان بس طبعا ما عنده الشجاعة يقوله فى وشى
بس اكيد بقوله من وراى
ما وائل ده عند الشموليين لازم يكون ابيضانى وشعره سبيبى ويكون من ناس الشاطر والمشطور
الشاطر والمشطور دى طبعا السندوتش بس بالعربى
اها انت عارف فى ناس بيكونوا ذى طبزه
الاسم بيكون محرقم وما بيتحملوا
اها يبدا يشبكك انت والله وائل غريب
اول مرة اشوف لى وائل دشن كده
وما عارف والله اول مرة اشوف لى وائل بيشرب مريسه
ما وائل فى ذهنيته الشموليه مفروض يشرب سفن اب وبيبسى ولو اتنازل يشرب باربيكان
بس وائل قرف ذى ده عمرنا ما شفناهوا
اها تعرف انا حليت المشكلة دى كيف
اول ما اورى زول اسمى واحس انو مستهجنه
بقوم بقوليه شوف انا وائل الخلاء اشان اريح ليه شموليته
انت عارف الشموليه دى ما ذى الظهر
لمن تقوم على الواحد لازم يشوف ليها حل
اها انا حلى فورى ذى ريد قاتل الحشرات
انت عارف يا تمبس السعوديين هنا بقولوها لى فى وشى
يعنى شموليتهم احسن من شموليتنا
شموليه تقدميه
بالله رايك شنو فى المصطلح ده
يعنى الشموليه ذاتها ما عنده عوجه بتقبل الكلام الكبار كبار ده
الواحد كف بيرزعه فى وشك
يقوليك مفروض كان يسموك عبد الجبار والله عصمان
بالله عليك الله شوف جنس الشموليه دى
داير يصادر حتى حق ابوى فى انه يسمى الفصقول الجابوه
لا ومش كده يعنى الواحد فيهم لو بقطع فيك 500 ريال ويقول ليك ده حق التسميه الجديد البطن ما فيها مغصه
يعنى كمان جابت ليها شموليه وقوه عين
طيب رايك شنو نسميها الشموليه العينيه
واله اقول ليك الشموليه الفسليه
وفسليه دى جايه من فسل
ما عارف زمان بيقول ليك العدو ولا الرفيق الفسل
اسع عارف يا تمبس انا من كلامكم ده اكتشفت انى شمولى
قولى كيف
اسع وانجا ده انا ما حبيته ساكت كده
اسمه ده جاب لى حساسيه
شموليتى بتقولى وانجا ده زول مثقف ومن الجماعة بتاعين
انتظرتك بين المطر والسحاب
اشان كده كجنته
ماشموليه وكده

هذه سرقة لفكرة ومجهود الاستاذة زهرة حيدر. بوست زهرة حيدر ماشى كويس بقضه وقضيضه. بسلامه وحربه. حتى المشاكل والمهاترات بيان بالعمل لفكرة البوست.
اكره ما اكره ان يسرق عضو مجهود عضو آخر بادعاءات فارغة مثل ادعاءاتك عن المهاترات.
كان عليك ان تطرحى فكرتك هذه فى البوست المذكور.
لا للتطفل على مجهودات الاخرين.
شمولية + تطفل =

يا وائل الخلا طيَِب ما تدفع حق السماية وأنا أغيرو ليك ..

والا دايرنى أمرق شمولييتى وألبد ليك فى أى ملف عشان أتسدا فيك
وأندَِمك على اليوم الكّجنتنى فيهو ؟
بعد داك حتتعب معاى لأنها حتكون ملاحقة مؤسسة بتاعة مثقفاتية وكده
ما بتفكك إلا تقول الرووووب .

الاخ عادل عثمان

اسمح لي ان اختلف معك ... الفكرة عمرها ما حقت زول ..بعد ما تطلع بتبقى حقت الكل... وقلت في ردي لعبد العظيم وعادل عبد العاطي في البوست اياه انو البوست حق كل المشاركين وكمان القراء .. يمكن لي شرف المبادرة واللي باسطاني خالص لاني من اكثر المستمتعين بيو

اسماء يمكن همت لمن غاب البوست لانها من المستمتعين بيو برضو زي ما عرفت ...وحاولت توجة ذهن الناس للموضوع اكتر من النقاش على جانبو

ليها الشكر و التقدير
وخلينا ما نكون شموليين ونفهم بعض صاح

لكم جيمعا تقديري

وها انا ذا عدت لأتكأ في ظل الفيل الوريف بينما و انجا و تمبس يلعبون الطوطحانية مع ذات الفيل في الجوار ...

الشميل وائل،

كتر الله خيرك اللي قريت لي و نردها ليك في مقبل مهاتراتك، و ياها المحرية فيك كمهاتراتي مطور N95...

واجعني ليك التشلهت من هنا لهناك ، بس انا مكاني لقيتو هنا، او بالأحرى اتسلبطت فيهو لانو خلاص عــدّى فـات .. زمـن العيون الإلفــة و الحـضـن الملاذ ...

يا وائل بالمناسبة ، انا زاتي اسمك ما كان واقع لي وما شعرت تجاهك بأي ألفة نوهائي، لانو وائل ده لازم يكون مواليد 80 وفوق ويكون ود مغتربين وعلى الأقل شعره سبيبي و ما بيكتب في منتديات . ناهيك انو ما يكون بيصاحب ناس تمبس و حايم ينوم في جمعيات العزابة وبنفس هدوموه العليه! كسرت لي أي إطار أكون عملته لـ (وائل) معين راسماهو في خيالي ...وبالتالي بكسرتك لوائلي ضربت اول اسفين في كجن ما بينتهي،
ثكلتك العواميد و اللساتك يا وائل!

وهنا ثاني اسفين: شمولية أدبية متوسمة فيني الخير زي عجايز بلدنا الطيبين ...
يعني انت مفترض انو انا اكون اتشحتفت في رد قلبي و نحن لا نزع الشوك و أسفت لماضي لا يعود و اتسلقت شجرة اللبلاب، حيث انو انت بكده تكون لغيت تأثير الجغرافية في نموي و تطوري الفكري و فرضت علي خيارات كشك الكتب الجنب بيتكم ، يعني ما يمكن اكون قريت للدميني و غازي القصيبي و بنت الجزيرة أو تراجم قصص عالمية مثلا؟ عيب لي كافكا و لا دستويفسكي ولا عمنا ماركيز الطالعين في اكتافه مثقفاتية العالم الثالث ؟

كده بكل اريحية زي البتعرفني جيتني شايل شموليتك الأدبية و كشحتها فيني!

وبذا كجنتك غير مأسوفن عليك ... إلا ان انتصرت لشموليتي الثورية التي تسقط كل دفاعات شموليتك التقدمية ...
ثورية شموليتي بتسمح لي أديك تصنيف ابتدائي
و اقوم انقضه بنفسي و اقعد اغالطني
و اصنفك بعكس تصنيفي الانطباعي الأول
يعني اتشملل على نفسي زاتها و احيرك انت زات نفسك!
تصنيفي النهائي ممكن يناسبك يمكن لأ، ما مهم لانو الغلاط في حد ذاته هو الهدف من كل الهملة دي و تصنيفك ما لي فيهو غرض غير متعةالغلاط ...

اييه،

ما علينا ...

وايل الخلا..

Quote: كنت فيما سبق اوقف سيارتى بين مخرج 10 و11 وانام هاهناك على الكرسى لا ادرى ما الذى يأسرنى فى هذا المكان

دي اظنها اقرب حتة للمطار..













اعجبني تقدير زوجتك لامر الدورة الحتمية بتاعتك..
قلما يجد المرء زوجة تقدر الغيبيات التي يلوذ بها الازواج..

يا شُملاء
بوستكم لذيذ

عزوز
الافيال مشت مني متأخر خالص امس
افيال لذيذه اتونسنا ونسات قديمة
ماكان في طريقة اقلق منام معاليكم
لكن اقلقتو الليلة الصباح وابا لي
عن البوست
اضربي بيد من حديد و عاشت المَحبة



تمبس بقيت وناس و كتاب
بس ابعد من الفيل .. بعوقكـ



ست البوست اسماء
(الافكار لها اجنحة) او كما قال
السينارست بتاع فيلم ابن رشد
ماقريت البوست الاصلي
لكن استمتعت بي ده

الشمائل الاعزاء،

اسمحوا لي ارحب بخدر في ضل الفيل بصفتي مؤجرة البوست ده بالباطن ...

يا مولانا خدر،

معالينا تضرب بيد من حديد في المعايش الجبارة دي وسأنكص في المغيب و حينها بوريك الحاصل شنو

ما تفارق بوستينا ده لانو في عروض صيفية و بندي تخفيضات و الفيل حاببنا جدا فلا تدع الفرصة تفوتك

فوق إلى حين (مُهاترتي) .....

سلام شامل يغشاكم و ما يفارق البلد و فيله و ضله

واحد مثقفاتي ثوري ديمقراطي جابوه على نقاله لبلد كان عنده رأي في رجعيته و شموليته
وكان ان تبرع حكام البلد الشموليين بكافة مصاريف علاجه و رجعوا ليه النور و المويه و بقى يشوف عديل بدل طشاشه الجا بيه من بلدوا الشمولي الام او احتمال يكونوا سوا ليه حاجة اثناء غيبوبته المؤقتة الجا بيها خلتو يشوف شعاع
ما علينا و نحنا بهمنا شنو من الاخر خارج حدود ارضاء غرور شمولية ذاتنا
العلينا في قصة الزول دا النقلة النوعية الكلية نحو آفاق الشمولية بيمنية غيبية متناهية متضاري وراء الدعوات : " ربنا يكفيكم شر الديمقراطية و يخلي ليكم الملك "

بوست جميل

و فوق لحين عودة المهاترين في ظل شرعية الهتر الشمولي

وائل الخلا
انت زول جميل رغم الصورة الحاولت تأطر فيها شكلك بشمولية
لكن اقول ليك حاجة : كان صح ظنك مع النوم بين المخرجين و الخرجات المشرعنة من الداخلية . . .اوع تروح . . . و الله الواحد ح يمر بيك مليون مرة من غير ما يلقاك