Post: #1
Title: مصطلحات سادت ثم بادت ،،، للتوثيق
Author: الفاتح الجنيد
Date: 04-30-2008, 08:43 AM
Parent: #0
السودان بكل سحناته ، ولكناته ، وموروثاته هو مزيج حلو المذاق ، سادت فى غابر أزمانه مصطلحات إختلفت باختلاف الانتماء واللهجة والبيئة ، ومع مرور الزمن اندثرت وتلاشت معظم تلك المفردات خاصة فى مجتمع المدن ، واصبحت نوعا من الهذيان لجيل أواخر القرن العشرين ...
هذا تذكير بها لمن عاصروها ،،، وتنوير لمن لم يسمع بها من قبل ،،،
(المفردات التالية من منطقة الجزيرة ، والبطانة)
التُكُل : غرفة صغيرة تستخدم لعواسة الكسره فقط
الدوكه : إناء من الفخار يستخدم لعواسة الكسرة والآبرى والحلو مر
المشلعيب : عبارة عن سبت مصنوع من سعف النخيل يستخدم لحفظ الطعام والحليب يعلق فى سقف الحجرة (المِرِق)
المِرِق : بكسر الميم والراء ... عباره عن جذع شجرة يوضع فى اعلى جداري الغرفة المبنية من الطين (زى الكمرة الحديد) لتحميل سقف الغرفة عليه .
الشِعْبه : بكسر الشين .. عود كبير من حطب الشجر يغرس فى وسط الغرفة العادة مبنية من الطين لإسناد المرق عليه لحمايته من السقوط
غُلُّوتيه : يعنى فزورة
أديكم غلوتيه : حبوبتى من جنها شالت جدى فى سنها دى شنو؟؟
العنكوليب : نوع رقيق من القصب حلو المذاق شبيه بقصب السكر
التكية : وهي مثل الديوان يعد فية الاكل للضيوف مجانا علي نفقة شخص محسن
قيزان : جمع حلة كبيرة والمفرد قوز = قدر كبير يستخدم في تحضير الطعام فى المناسبات .
اللداية : 4 او 3 حجارة كبيرة يوضع بينها الفحم على الارض لتوضع عليها الحلة للطبيخ
المتاوقة : اختلاس النظر .
الهمبريب : الهواء العليل المنعش
التُقابه: النار التي تؤقد عند قراءة القرآن في المسيد والخلاوي
الراكوبه : مظله يتم صنعها من القش والعيدان مفتوحة من الجوانب
التيبار : الزير الكبير .
الصريف : سور من القش او قصب العيش الجاف
التبروقة : سجادة صلاة مدوره او مستطيلة منسوجة من سعف النخيل للصلاة تسع لشخص واحد
الريكة : اناء لحمل الذره للطحن او وضع الدقيق
الجُراب : بضم الجيم .. كيس مصنوع من الجلد لحفظ الاشياء شبيه بالحقيبة
النَّفاج : بتشديد النون ... فتحة صغيرة فى الجدار الفاصل بين مسكنين بدون باب
السِِعن : بكسر السين والعين .. وعاء من الجلد يعلق على عارضة من العود ثم يحرك به اللبن لاستخراج الزبد والروب
العنبلوق : صغير الغنم
والدحش والانثى دحشه : هى صغير الحمار ، ويقال دِحِيش للتصغير
المرحاكة : بضم الميم .. هي أداء لطحن العيش والبهارات
المُعراكة : بضم الميم ... وهى قطعة من القماش بمسحوا بيها صاج العواسة
القرقريبة : اداة من جريد النخل على شكل ورقة الكوشتينة تستخدم في عواسة (صناعة) الكسرة اى طرح العجين فى الصاج ليأخذ شكل الكسرة
الطرقة : بفتح الطاء والراء .. قطعة العجين بعد نضوجه فى الصاج
القُرْقاب : بضم القاف .. إزار تلبسه الحبوبات زمان تحت الفستان
المُفحضة : بضم الميم .. عبارة عن جيب صغير من الجلد يربط بخيط طويل ويعلق على الرقبة داخل الملابس وتصل الي الركبة تستخدمة النساء (الحبوبات) زمان لحفظ النقود .
البُلامة : بضم الباء ... تغطية الانف والفم بطرف التوب ( فلانه مبلمة) زى الخِمار
الطِرْقه : بكسر الراء ... القطعة من القماش
الشمْله : غطاء من الصوف تستخدمه النساء للدخان
المُقشاشة : عبارة عن مكنسة يدوية مصنوعة من سعف النخيل اليابس تستخدم لكنس الحوش والمناطق المفتوحة .
الخُرُج : عبارة عن كيس كبير مصنوع من القماش المتين أو الخيش يستخدم لحمل الأشياء مثل الشنطة . والخُرُج المصنوع من الجلد يستخدم لحمل الماء على الحمار من البحر او البئر
الكرور: مصطلح يطلق على الأشياء القديمة المستهلكة قليلة الفائدة
عيش الريف : نبات الذرة الشامي
الشرغرغ : عبارة عن وعاء من الصفيح الصلب يستخدم لغلى البن فى النار
القلاية : وعاء من الحديد مقعر دائرى له مقبض يستخدم لتحميص البن فى النار
الفرده : عبارة عن قطعة من القماش المنسوج من القطن سميك تستخدم للغطاء شبيه بالبطانية ، وبعض الاحيان يلبسوه الحبوبات زمان كثوب
المُترار : بضم الميم .. عود يُلف عليه الخيط بطريقة معينة بعد غزله من القطن ، لتستعمل فى نسج الفرده محليا
الطايوق : عبارة عن النخاع الشوكي للخروف يستخدم في دهن الصاج الحار بدلا عن الزيوت لعدم التصاق الكسره به وكذلك يستخدم مصطلح كناية عن العقل أو المخ
الدقنوس : مصطلح يطلق على رأس الانسان
الدلّوكة : عبارة عن آلة طبل كبيرة تستخدمها النساء للغناء في الأفراح
الشتم : عبارة عن آلة طبل صغيرة تستخدم بجانب الدلوكة فى إيقاع أغانى الحماسة
لا متين : الى متى
ابقا مارق : يعنى يلا اطلع
مبشتن : الغير أنيق ، مبهدل
الداهي : كلمه تستعمل عندما تريد شئ وتنسئ اسمه ،
هولى : معناها حقى ، بتاعى
عامن اول : تقال للعام السابق او المضى
سَوْ : يعنى أُكُل ، تقال للضيف لتشجعه على الاكل
شِن نفرو : يعنى الكلام ده مافى داعى ليهو
دودر بى : يعنى لخبط كيانى
النعمنو : يقصد بها ما معناه ...
أشتر : تقال للزول الذى لا يحسن التصرف
أعصر جاى : يعنى أسرع فى المشى
تُر لى غادى : بضم التاء .. اتحرك ، أفسح المجال ، أو زِح شويه
صنقر : ( بفتح الصاد و تسكين النون و كسر القاف ) بمعنى اجلس فيقال ( ما تصنقر شوية ) أي ( اجلس قليلا )
الكتراب او العجاج : يعني الغبار ، وبعض الاحيان تقال (الكتراااابه) دليل على الاندهاش من كثرة الشىء
برجوبه : المياه الراكده التي صارت اقرب للطين وتغيرت رائحتها
عوَّه : بتشديد الواو .. يعنى شكلة ، مضاربه
البلدات : بكسر الباء ... الأرض التي يزرع فيها القصب والعيش
نتح المويه : شربه بلهفة عن آخره
نتح الراس : يقال راسى قعد ينتح أى يصاب بنوبات منتظمة من الالم
توش : كلمة تعنى على طول او طوالى ( فيقال : دخل توش)
تعال صاد : إرجع يعنى
((( حل الغُلُّوتيه : الحبوبه الشِعْبه ،، والجد هو المِرِق )))
وبجى صاد ،،، إن الله أراد ،،،
وعلينا جاى ياجماعة ... العندو زواده اليزيد من ربوع السودان
|
Post: #2
Title: Re: مصطلحات سادت ثم بادت ،،، للتوثيق
Author: سمية الحسن طلحة
Date: 04-30-2008, 09:43 AM
Parent: #1
ماعليك زود ياأبو رامي
ولكن ..
النعمنو : يقصد بها ما معناه ...
وهي : نعم أنه
والأصح يقصد بها التوكيد
الكتراب او العجاج : يعني الغبار ، وبعض الاحيان تقال (الكتراااابه) دليل على الاندهاش من كثرة الشىء
برجوبه : المياه الراكده التي صارت اقرب للطين وتغيرت رائحتها
الكترابة والعطرابة : الأولى ناتجة عن حرق الشيء الجاف كالجلد الكرتوب أو اللحم القديد
والثانية من حرق الشيء الذي به نزز أو دهن مثل المعراكة
البرجوبة :الأرض التي رويت وجفت وصارت متل القرفة تتكسر تحت الأقدام
أما تعريفك يعني ( الطملة )
الدقنوس : مصطلح يطلق على رأس الانسان
الدقنوس : يطلق على الرأس الذي ليس فيه قرون يقال أم دقنوس أو البعامية للبهائم
وعلي المرأة شحيحة شعر الرأس
والزعراء : لقصيرة شعر الرأس من الوسط وطويلته على الجوانب
يقول الشاعر :
في شعرك ماك زعراء
وفي نخرتك ماك فطساء
بلا تناديني بقولك ها
وبلا شغلة البيت بغشى
ها :تعني ها أنا ذا : نعم : لبيك
لك الشكر وقد أضحكتني (الكرور )
وهناك الكثير سنظل ( بلا شغلة البوست نغشى )
|
Post: #3
Title: Re: مصطلحات سادت ثم بادت ،،، للتوثيق
Author: فدوى الشريف
Date: 04-30-2008, 10:35 AM
Parent: #2
فوق
|
Post: #6
Title: Re: مصطلحات سادت ثم بادت ،،، للتوثيق
Author: محمد الكاب
Date: 04-30-2008, 12:27 PM
Parent: #3
مشــكور
علي هذه مصطلحات
| Quote: التُكُل غرفة صغيرة تستخدم لعواسة الكسره فقط |
|
Post: #22
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 08:33 AM
Parent: #3
الست فدوى
رفع الله معنوياتك فى العلالى
وتكفينى منك طلة بالطاقة...
|
Post: #4
Title: Re: مصطلحات سادت ثم بادت ،،، للتوثيق
Author: almulaomar
Date: 04-30-2008, 11:59 AM
Parent: #1
أخي الفاتح
التغيير من طبيعة الأشياء وسمة من سمات الحياة وهو سنة حسنه إذا كان التغيير للتجويد والتطوير وهو أمر غير مستحب إذا كان تغيير لمجرد التغيير أو فلنقل تقليد للمظهر بعيداً عن الجوهر:
الأشياء التي ذكرتها إندثرت أو ربما في طريقها للإندثار شأن الكثير من أشيائنا الجميلة ، وإندثارها أمر لابد منه فالتطوير لابد أن يشمل تلك الأشياء ويتجاوزها للإحسن حتى في القري والأصقاع النائية وهذا أمر مطلوب. لكن فليكن هناك معرض أو متحف يهتم بهذه الأشياء التراثيه يجمعها ويعلمها للأجيال حتى يعرفوا كيف عاش أسلافهم وما هي أدواتهم. وأكيد أى حضارة أو ثقافة في أى أمة تبنى بتعاقب الأجيال وأشياء تلك الأجيال.
|
Post: #5
Title: Re: مصطلحات سادت ثم بادت ،،، للتوثيق
Author: Shamael Elnoor
Date: 04-30-2008, 12:19 PM
Parent: #4
يا سلااااااااااااااااااااااااااااااام
اشرب لى شاى بس وارجع بمزااااااااااج
|
Post: #7
Title: Re: مصطلحات سادت ثم بادت ،،، للتوثيق
Author: محمد أبوالعزائم أبوالريش
Date: 04-30-2008, 12:49 PM
Parent: #1
ود الجنيد كيفك؟
أنا كنت متأكد بوستيك دة بجيب بت الحسن طلحة.
بس عندي احتجاج بسيط:
| Quote: (المفردات التالية من منطقة الجزيرة ، والبطانة) |
ياخي والله لا عندنا كلام في الجزيرة ولا في البطانة .... لكن بس ما تستولوا على كل شئ (وتكاوشوهو) ليكم براكم. هسة تجي تقول (تكاوشوهو) دي حقتكم.
في ظني أن المصطلحات الجبتها دي خاصة بمعظم مناطق وسط السودان بما في ذلك الخرطوم.
وللحقيقة هناك تعبير جديد علي، وهو (التيبار )
بوست ظريف
تحياتي
|
Post: #8
Title: Re: مصطلحات سادت ثم بادت ،،، للتوثيق
Author: محمد أبوالعزائم أبوالريش
Date: 04-30-2008, 12:55 PM
Parent: #1
| Quote: المِرِق : بكسر الميم والراء ... عباره عن جذع شجرة يوضع فى اعلى جداري الغرفة المبنية من الطين (زى الكمرة الحديد) لتحميل سقف الغرفة عليه . |
دحين مش نفس المصطلح يستخدم لأضلع العنقريب؟
بمناسبة العنقريب ما تنسى (الكرَّاب) بتشديد الراء
|
Post: #9
Title: Re: مصطلحات سادت ثم بادت ،،، للتوثيق
Author: Shamael Elnoor
Date: 04-30-2008, 01:15 PM
Parent: #8
المكحلة والمرواد: للاكتحال
النقاع:: نقاط الزير
المخرز:: للمشاط
الخمارة:: لتخمير عجين الكسرة
السحارة:: تقريبا دولاب ارضي
|
Post: #10
Title: Re: مصطلحات سادت ثم بادت ،،، للتوثيق
Author: ebrahim_ali
Date: 04-30-2008, 03:21 PM
Parent: #9
تسلم يالفاتح علي هذه المصطلحات التراثية المعبقة بريحة الدعاش والنسيم العليل وما زال في الجراب ـ على ما أعتقد ـ الكثير والكثير فياريت تواصل عشان الأجيال الزينا كدا والبعدنا ما ينسوا الحاجات والأسماء الحلوة دي
ابو العزائم سيب اللبط دي مصطلحات ناس جزيرة وبس وكمان ازيدك من الشعر ناس شرق وناس بطانة ساية وقرط على كده اي مصطلح سمعته في اي مكان مصطلح مسروق او مستولى عليه
|
Post: #11
Title: Re: مصطلحات سادت ثم بادت ،،، للتوثيق
Author: Rayah
Date: 04-30-2008, 05:55 PM
Parent: #10
(ريحة الدعاش) التي ما فتئ الشعراء والأدباء يذكرونها في أشعارهم وكتابتهم
بكل أسف هي رائحة نوع معين من بكتريا التربة عندما تبتل بالماء. ونحن نشم رائحة البكتريا
ونتنهد ويا سلام..ومن ضمن المصطلحات التي سادت ثم بادت (الترابة في خشمك). بالرغم من أن (الترابة)
تنحت طواعية للتمباك.
تحياتي
محمد عبدالله الريح
|
Post: #12
Title: Re: مصطلحات سادت ثم بادت ،،، للتوثيق
Author: ابوبكر على
Date: 04-30-2008, 06:08 PM
Parent: #11
سلامات للجميع
| Quote: المُفحضة : بضم الميم .. عبارة عن جيب صغير من الجلد يربط بخيط طويل ويعلق على الرقبة داخل الملابس وتصل الي الركبة تستخدمة النساء (الحبوبات) زمان لحفظ النقود . |
و تسمى ايضا الشكوى - او الشكوة ( بالالف المقصورة على اخرها)
Quote: المشلعيب : عبارة عن سبت مصنوع من سعف النخيل يستخدم لحفظ الطعام والحليب يعلق فى سقف الحجرة (المِرِق)
|
ايضا المعلاق
Quote: قيزان : جمع حلة كبيرة والمفرد قوز = قدر كبير يستخدم في تحضير الطعام فى المناسبات .
|
لا اعتقد فكلمة قيزان هى مفرد
و الجمع قوازين
Quote: التيبار : الزير الكبير .
|
ايضا الجر
Quote: النعمنو : يقصد بها ما معناه ...
|
النعمنو من خير الخريف لافحالا شال
( الطمبارى و الغناى - محمد طه القدال)
|
Post: #13
Title: Re: مصطلحات سادت ثم بادت ،،، للتوثيق
Author: سمية الحسن طلحة
Date: 04-30-2008, 09:23 PM
Parent: #12
| Quote: ابو العزائم سيب اللبط دي مصطلحات ناس جزيرة وبس وكمان ازيدك من الشعر ناس شرق وناس بطانة ساية وقرط على كده اي مصطلح سمعته في اي مكان مصطلح مسروق او مستولى عليه |
رغم أن الدعاش يخيب ظني تارة تلو الأخرى
لكن يا أبو العزائم
أنا موجودة كان في كل بكان
وماتقول لي بكان دي شنو
مكة وبكة
|
Post: #15
Title: Re: مصطلحات سادت ثم بادت ،،، للتوثيق
Author: الطيب شيقوق
Date: 04-30-2008, 09:38 PM
Parent: #13
فتوحي
اخوك بقرا في كلامك ده وممهول ومبسوط لانو عارفه حتة حتة وبعد افضى ليك بجيك بالجديد
مثلا :
اللعوت
السروب
التنضب
ام رقيتة
الكعكول
البودا
الهيكبيب - دى ما اظن في حد غيري بيعرفها ولو عرفها فيكم اى واحد حتى بت طلحة على الطلاق باكر من الصباح يلقاني قدام بيتو بهديتي .
يقولون :
نبكي على الماضي ولو عدنا اليه لكرهناه
|
Post: #14
Title: Re: مصطلحات سادت ثم بادت ،،، للتوثيق
Author: soma
Date: 04-30-2008, 09:34 PM
Parent: #12
هلا وغلا ود الجنيد
التحايا لكل زوار البوست العتيق المعتق
ومزيد من المفردات السودانية الجميلة
انا غايتو بكتب ليكم الحاجات المتذكراها بدون ما اشرح
المعنى .. ونخلى الجيل الجديد ينحت مخو شوية
انا متأكده كتير من الناس هنا ما بعرف المعنى الصحيح
او نساه بمرور الزمن .. ويلا هاكم ..
الفلكابة
الورتابة
الشكابة( بضم الشين )
الخرتاية (بضم الخاء)
الحنقوق
الخرج ( بضم الخاء والراء ) ما يجوا ناطين لى ناس السعودية
وقولوا دى منطقة الخرج
المسلة
المرواد
الكليقة ( بضم الكاف )
الهباب .. بتشديد الباء الاولى ..
( مش الهباب بكسر الهاء بتاعة اخوانا المصاروة)
اللجام .. بكسر اللام
السرج .. بكسر الراء
الخازوق.. يقول ليك والله الليلة اندق فينا خازوق هههههه
البروة
هرود ..هههههههههههه دى غايتو البعرف لى معناها بديهوا هدية
سافوتة
ودعتكم الله بجيكم صاده بكره ان شاء الله
حالتى نعسانه كنت اتذكرت ليكم حاجات اكتر
****
مشاققة
اها دى برضو شاملة الحاجات الفوق
المهم ..
يا ود الجنيد لو جاك ود شيقوق ( بحتل) هنا قبلو
بحتل دى برضو مع الحاجات الفوق
سلام للجميع
اسماء الجنيد/ مسقط
|
Post: #48
Title: Re: مصطلحات سادت ثم بادت ،،، للتوثيق
Author: Azhari Nurelhuda
Date: 05-02-2008, 12:01 PM
Parent: #14
| Quote: هرود ..هههههههههههه دى غايتو البعرف لى معناها بديهوا هدية |
الهرود و دايما ما تطلق على الأشياء الصغيرة والدقيقة والمتوفرة بغير ترتيب أو نظام ..ويمكن إيضاإستعمالها في حالة تواجد كمية من الأطفال الصغار و المزعجين في مكان واحد
رسلي الهدية... و أرجو أن تكون واحدة من قصايدك مرفقة بإذن تلحين....
[email protected]
|
Post: #16
Title: Re: مصطلحات سادت ثم بادت ،،، للتوثيق
Author: ALazhary2
Date: 04-30-2008, 09:49 PM
Parent: #1
الزميل الفاتح الجنيد
لك جزيل الشكر على هذا الموضوع المتميز وكذلك للزملاء للمتداخلين معك.
أتابع باهتمام .
تحياتي وتقديري
|
Post: #17
Title: Re: مصطلحات سادت ثم بادت ،،، للتوثيق
Author: محمد أبوالعزائم أبوالريش
Date: 05-01-2008, 07:25 AM
Parent: #1
يعني ود الجنيد وبت الجنيد بي جيهة
وبت الحسن بي جيهة
نخلي البوست للبطانة والاّ شنو؟
ويدخل كمان ود شيقوق ونخليهو لي مسقط
---- الضانقيل ---- ما تبعكم؟
|
Post: #18
Title: Re: مصطلحات سادت ثم بادت ،،، للتوثيق
Author: ابوبكر على
Date: 05-01-2008, 08:20 AM
Parent: #17
صباح الخير
هى المقشة - اى المكنسة
ود شيقوق ماظنيتك بتعرف مطلحات البحر ( النيل )
مراقد
مسارق
ماشى بى سدرو
منجنج
و ايضا تطلق على الخيران فى زمن التساب
|
Post: #19
Title: Re: مصطلحات سادت ثم بادت ،،، للتوثيق
Author: ابوبكر على
Date: 05-01-2008, 08:25 AM
Parent: #18
سوما انا اعتبرت نفسى من الجيل الجديد
اها هاكى ديل
القلشوب
التقروقة
الدهليس
الدانقا
الكسفريتة
الدمفريس
|
Post: #21
Title: Re: مصطلحات سادت ثم بادت ،،، للتوثيق
Author: احمد العربي
Date: 05-01-2008, 08:29 AM
Parent: #18
البوست السمح دهلازم اول حاجه
الواحد اتبرَد ويدخلو
عشان ميرود
وقعاد الضلله و الرقراق
فهق ليهو صنغوري ده
وجاب لي ال الفلايت
الجنيداب سلام مطرز بالحب
لكم العافيه والجمال
وعلينا الاستمتاع
|
Post: #28
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:24 AM
Parent: #18
Quote: يا سلااااااااااااااااااااااااااااااام
اشرب لى شاى بس وارجع بمزااااااااااج |
العزيزة شمايل
أكان أديتيها قهوة ، فنجانين بكرية ، واربعة بركة
ما كان بتعدل الراس صاح ،،،
والعجب كان أديتيها شمة قلوة ، نفس طوييييل كدى ،،،
إضافتك زانت البوست
وما تنقطعى
زورينا مرة مرة
أرقدى عافية
|
Post: #20
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 08:28 AM
Parent: #17
العزيزة بت طلحة
أشكرك كتير على التنوير والاضافات القيمة دى
وان ما جات منك ما بتجى من غيرك
وخليك معانا نسوق المُراح سوا ،،،
|
Post: #23
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 08:53 AM
Parent: #20
Quote: مشــكور
علي هذه مصطلحات
Quote: التُكُل غرفة صغيرة تستخدم لعواسة الكسره فقط |
ده ما باب السنط زاتو يا محمد ،، جبتو من وين ؟؟؟
ياخى دى إضافة تغنى عن كل الكلمات ،،،
الباب ده طبعا بقفلوهو بالغلق ( وهو عود منحوت على شكل ترباس يستخدم لقفل الباب الزى ده)
تحية قوية ،،،،
|
Post: #24
Title: Re: مصطلحات سادت ثم بادت ،،، للتوثيق
Author: احمد العربي
Date: 05-01-2008, 08:57 AM
Parent: #23
| Quote: الباب ده طبعا بقفلوهو بالغلق ( وهو عود منحوت على شكل ترباس يستخدم لقفل الباب الزى ده) |
وفي رواية اخرى الكركب او الكركاب
|
Post: #26
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:16 AM
Parent: #23
Quote: أخي الفاتح
التغيير من طبيعة الأشياء وسمة من سمات الحياة وهو سنة حسنه إذا كان التغيير للتجويد والتطوير وهو أمر غير مستحب إذا كان تغيير لمجرد التغيير أو فلنقل تقليد للمظهر بعيداً عن الجوهر:
الأشياء التي ذكرتها إندثرت أو ربما في طريقها للإندثار شأن الكثير من أشيائنا الجميلة ، وإندثارها أمر لابد منه فالتطوير لابد أن يشمل تلك الأشياء ويتجاوزها للإحسن حتى في القري والأصقاع النائية وهذا أمر مطلوب. لكن فليكن هناك معرض أو متحف يهتم بهذه الأشياء التراثيه يجمعها ويعلمها للأجيال حتى يعرفوا كيف عاش أسلافهم وما هي أدواتهم. وأكيد أى حضارة أو ثقافة في أى أمة تبنى بتعاقب الأجيال وأشياء تلك الأجيال. |
العزيز الملا
عداك العيب
ولكن اسمح لى أعقب على عيارة ( تجاوزها للاحسن) دى ،،
أولا هى مفردات ، والمفردات قابلة للتغيير مع مرور الزمن وليس للتطوير ،
لأن التطوير يعنى تغيير جوهر الشىء للأفضل ، ونحن هنا لا نغير الجوهر وإنما المسمى فقط ،
وكل حقبة من الزمن لها خصوصيتها،
وسوف تنتهى الحقبة الحالية بلا شك وتأتى بعده أخرى قد تتغير فيها المفردات ويندثر ماقبلها وهكذا ،،،
دورنا كما قلت انت هو الحفاظ على هذا الموروث وهذا مطلب مشروع ،
وحتى يصان هذا الموروث ما بيدنا الا التذكير به لمن عاصروه ،،، والتعريف به لمن لم يسمع به للمواكبة ،،، كما قلت فى مقدمة البوست ...
وتسلم كتير على هذه الزيارة الانيقة ،،،
|
Post: #25
Title: Re: مصطلحات سادت ثم بادت ،،، للتوثيق
Author: عاطف عمر
Date: 05-01-2008, 09:02 AM
Parent: #1
سلامات الفاتح الجنيد
ملاح أم تكشو
ملاح أم شعيفة
محال للأخوات سمية الحسن وأسماء الجنيد لإعطاء ( التفاصيل الفنية )
|
Post: #27
Title: Re: مصطلحات سادت ثم بادت ،،، للتوثيق
Author: ابو جهينة
Date: 05-01-2008, 09:21 AM
Parent: #25
عزيزي جدا الفاتح الجنيد
سلام يسود و يبقى
شكرا على هذا السياحة الهامة و الممتعة ..
أتمنى أن تقوم بعمل توثيق شامل و تطبعه في كتيب حتى لا تندثر هذه الأشياء التي قامت عليها أركان البيت السوداني السمح ...
دمتم
|
Post: #29
Title: Re: مصطلحات سادت ثم بادت ،،، للتوثيق
Author: خالد علي محجوب المنسي
Date: 05-01-2008, 09:44 AM
Parent: #27
الأخ الفاتح الجنيد سلاااام
* الكشامبير ( هي ثلاثة أعواد مربوط راسها تقعد على الأرض في شكل هرم وفيها حلقة يربط
فيها السعن لخش الروب وتجميع الفرصة )
* السهيت ( هو الزول الماجايب للدنيا خبر )
* سو ( أستمر سواء كنت تتحدث أو تأكل أوتعمل )
يعزق ( ويقال عزق الأرض أي قلبها وبالذات تحت ساق الشجر حتى يسهل تسرب المياه
إلى الداخل حينما تكبر المسامات )
* المنجل الميري والمنجل البلدي ( المنجل المير هو ألة لحش الحشائش وسميى الميري
لأنه أدخله الأنجليز وفي شكله مقوس .. والمنجل البلد هو نفس الألة ولنفس الغرض لكن مستقيمة
لكن صنع محلي سوداني والميري هو كل ما يتصل بالحكومة وقد يقال الميري أيضا للبس الجيش )
وفاضين زي ما قالت بت الحسن ودطلحة وبنرجع ليك
|
Post: #30
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:45 AM
Parent: #27
Quote: ود الجنيد كيفك؟
أنا كنت متأكد بوستيك دة بجيب بت الحسن طلحة.
بس عندي احتجاج بسيط:
Quote: (المفردات التالية من منطقة الجزيرة ، والبطانة)
ياخي والله لا عندنا كلام في الجزيرة ولا في البطانة .... لكن بس ما تستولوا على كل شئ (وتكاوشوهو) ليكم براكم. هسة تجي تقول (تكاوشوهو) دي حقتكم.
في ظني أن المصطلحات الجبتها دي خاصة بمعظم مناطق وسط السودان بما في ذلك الخرطوم.
وللحقيقة هناك تعبير جديد علي، وهو (التيبار )
بوست ظريف
تحياتي |
حباب محومد أخو السنى صاحبى
المفردات دى وحاتك إت ما محتكرنها ،
وعارفها مغطية معظم مناطق السودان ، لكن ما داير أسلب أهلنا ناس
الشمال والشرق والغرب حقهم كمان بمن فيهم الساكن الخرطوم ،،، يزعلوا منى ،،،
لأنو ليهم مفرداتهم الخاصة كمان ،،،
أها ،، وكت عرفت التيبار أعرف لى الحنقوق شنو ؟ أكان نجيض ...
مودتى
|
Post: #31
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:50 AM
Parent: #30
[| Quote: B]دحين مش نفس المصطلح يستخدم لأضلع العنقريب؟ |
بالحيل ،،،
|
Post: #32
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:56 AM
Parent: #31
| Quote: تسلم يالفاتح علي هذه المصطلحات التراثية المعبقة بريحة الدعاش والنسيم العليل وما زال في الجراب ـ على ما أعتقد ـ الكثير والكثير فياريت تواصل عشان الأجيال الزينا كدا والبعدنا ما ينسوا الحاجات والأسماء الحلوة دي |
اخوى ابراهيم على
اريت حالك زين
الحلاوة كمان لمن تسمع التعابير دى عند اهلها المركزين ،،،
ياخى فيها حنية عجييييبة...
أهديك همبريب بارد من ريحة الجزيرة والبطانة ،،،
|
Post: #33
Title: Re: مصطلحات سادت ثم بادت ،،، للتوثيق
Author: مدثر محمد عمر
Date: 05-01-2008, 10:09 AM
Parent: #32
الفاتح كيفنك؟
بوست جميل والله ومهم شديد....
نلتقي قريباً...
الخمج , النابره, الضهر, الحنقوق, مكادي, تقره, الخرت, همبول,بروس, , خرتايه...عييييك.
|
Post: #34
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:17 AM
Parent: #32
Quote: (ريحة الدعاش) التي ما فتئ الشعراء والأدباء يذكرونها في أشعارهم وكتابتهم
بكل أسف هي رائحة نوع معين من بكتريا التربة عندما تبتل بالماء. ونحن نشم رائحة البكتريا
ونتنهد ويا سلام..ومن ضمن المصطلحات التي سادت ثم بادت (الترابة في خشمك). بالرغم من أن (الترابة)
تنحت طواعية للتمباك.
تحياتي
محمد عبدالله الريح |
دكتورنا العزيز ود الريح
حبابك ألف الما بتنتلف ،،،
كان كدى الترابه فى خشمنا،،،
هسه يعنى نقفل نخرينا من الدعاش تانى؟؟؟
البجينا من الحول للحول !!!
حكمتو بالغة ...
تسلم كتير على هذه المعلومة
وياريت تنورنامرة مرة
بدل ما نمشى على عمى عيونا ...
|
Post: #35
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:27 AM
Parent: #34
الاخ ابوبكر على
شكرا على الاضافة ياالحبيب
وأكيد السودان الواسع باطرافه المترامية
تتعدد فية مسميات الاشياء ،،،
وده واحد من اهداف هذا البوست
التنوير بمختلف اللهجات ...
|
Post: #36
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:40 AM
Parent: #35
Quote: فتوحي
اخوك بقرا في كلامك ده وممهول ومبسوط لانو عارفه حتة حتة وبعد افضى ليك بجيك بالجديد
مثلا :
اللعوت
السروب
التنضب
ام رقيتة
الكعكول
البودا
الهيكبيب - دى ما اظن في حد غيري بيعرفها ولو عرفها فيكم اى واحد حتى بت طلحة على الطلاق باكر من الصباح يلقاني قدام بيتو بهديتي .
يقولون :
نبكي على الماضي ولو عدنا اليه لكرهناه |
الشيقوق
حررت البوست آ لمبروك ،،،
لكن النصايب القلتها دى تب ما سمعت بيها
إت جاى من وين ؟؟؟ (وش لمن سنونو بره)
ما كان أخير تخت معنى المفردات دى
حاكم فى ناس عاوزين يعرفو
تعاد صاد بى وشيك يا المليح ...
|
Post: #37
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:48 AM
Parent: #36
حباب ام رامى
ياها المحرية فيك
كفيتى ووفيتى
بس كان عرفتينا بمعانى الكلمات دى
يكون كتر الله خيرك وبارك الله فيك
والفايده عمت ،،،
مو كدى ؟؟؟
|
Post: #38
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:52 AM
Parent: #37
Quote: الزميل الفاتح الجنيد
لك جزيل الشكر على هذا الموضوع المتميز وكذلك للزملاء للمتداخلين معك.
أتابع باهتمام .
تحياتي وتقديري |
الاخ الازهرى
اهتمامك جزم هو الدافع للمواصلة
والله يكتر خير المتداخلين
تشكر يالحبيب على الطلة ....
|
Post: #39
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 07:07 PM
Parent: #38
Quote: يعني ود الجنيد وبت الجنيد بي جيهة
وبت الحسن بي جيهة
نخلي البوست للبطانة والاّ شنو؟
ويدخل كمان ود شيقوق ونخليهو لي مسقط |
ود ابو العزايم
إت يا خوى ظنيتك متل اخوك المعانا ده
متلقى حجج ، دحين الفى مُخباتك طلعوا
وبنخلى ليك البوست ...
ما عرفت لى الحنقوق !!!
|
Post: #40
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 07:21 PM
Parent: #39
Quote: صباح الخير
Quote: الحنقوق
هى المقشة - اى المكنسة |
ابوبكر
مساك زى الفل
قررربت ،، أديك فرصة تانية
|
Post: #41
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 07:31 PM
Parent: #40
Quote: البوست السمح دهلازم اول حاجه
الواحد اتبرَد ويدخلو
عشان ميرود
وقعاد الضلله و الرقراق
فهق ليهو صنغوري ده
وجاب لي ال الفلايت
الجنيداب سلام مطرز بالحب
لكم العافيه والجمال
وعلينا الاستمتاع |
الرجل الفنان
وحاتك إتَّ السمح
إنشاء الوِرده لى عدوينك ...
غايتو الكركب والكركاب إمكن عندكم
انا ماسمعت بيها
لكنها إضافة تسجل
والفى جيبك هاتو ...
|
Post: #42
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 07:38 PM
Parent: #41
Quote: سلامات الفاتح الجنيد
ملاح أم تكشو
ملاح أم شعيفة
محال للأخوات سمية الحسن وأسماء الجنيد لإعطاء ( التفاصيل الفنية ) |
الحبيب عاطف عمر
ما تنسى ملاح الويكاب ،،،
وفى انتظار الشيفات يدونا المكونات
زيارتك سمحة تب ،،،
|
Post: #43
Title: Re: مصطلحات سادت ثم بادت ،،، للتوثيق
Author: سمية الحسن طلحة
Date: 05-01-2008, 09:27 PM
Parent: #42
خالد
والله أنا مافاضية عندي مواجبات كتيرة
وما تقول ناسيين
جابنا هنا الحنين
عاطف عمر
كمان ما تقول جايبة لي مخلاية أم تكشو وويكاب وفرخ سمن
شيقوق
لو داير نعمل ليك بخرات ونغششك حاضرين
|
Post: #44
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 09:53 PM
Parent: #43
Quote:
عزيزي جدا الفاتح الجنيد
سلام يسود و يبقى
شكرا على هذا السياحة الهامة و الممتعة ..
أتمنى أن تقوم بعمل توثيق شامل و تطبعه في كتيب حتى لا تندثر هذه الأشياء التي قامت عليها أركان البيت السوداني السمح ... |
الوجيه ابو جهينة
والله اقتراحك وجيه كمان وبالجد فكرت فيهو
لكن الشغلانه ما ساهلة ، والسودان بلد مترامى ولهجاته متعددة
وحتى لا يكون التوثيق منقوصا لازم تلملم كل المفردات الفيهو
والشغلانه عاوزه تفرغ وتسخير امكانيات قد لا تتوفر حاليا،
لكن والله امنيتى ان ارى قاموسا يصون هذا النسيج الفريد
ومحبة تسود وتبقى ...
|
Post: #45
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-01-2008, 10:02 PM
Parent: #44
الجبيب خالد المنسى
ترى الزيك ده بندورو يسوق معانا المُراح
انا وانت وبت طلحة وسوما والشيقوق
وكل من له فضل زاد
ما تغيب كتير ،،،
|
Post: #46
Title: Re: مصطلحات سادت ثم بادت ،،، للتوثيق
Author: nasma
Date: 05-01-2008, 10:44 PM
Parent: #45
يا سلام على الروعة ةالله بوست ما حصل عندي تصحيح للكلمات الفوق ومعاها اضافة
1-المقشاشةصاح هي المكنسة لكن ما من السعف يا ودالجزيرة انما من العرجون وهو الجزء الشايل السبيطة التي تحمل الرطب الذي يصير بلح مستقبلا
2-التدي=الحيططة,الكبد =الباب,الضقل=الكيلون,الكشر =المفتاح وكلها مصتوعة من الخشب,اللروتي=صبي السافية,الللس=الحبل الذي يحمل الفادوس,والقادوسهو القلة التي تخرج الماء من بير المترة,والمترة هي بير الساقبة
3-يلا اعرفو ديل00الكروق-القسقة-الفليقة-والاشميق-المخرز-البلال والبقية تأتي
|
Post: #47
Title: Re: مصطلحات سادت ثم بادت ،،، للتوثيق
Author: soma
Date: 05-02-2008, 11:43 AM
Parent: #46
Quote: سوما انا اعتبرت نفسى من الجيل الجديد
اها هاكى ديل
القلشوب
التقروقة
الدهليس
الدانقا
الكسفريتة
الدمفريس |
ابو بكر على سلامات
قلت لى اعتبرت نفسك من الجيل الجديد؟
حالتك دى جيل جديد ؟؟
وكان بقيت من القديم كان قلت شنو ؟؟؟
هيـــــــــــع عفيت منك
سكتنى تب وحات خوتك
قال جيل جديد قال
|
Post: #49
Title: Re: مصطلحات سادت ثم بادت ،،، للتوثيق
Author: soma
Date: 05-02-2008, 12:29 PM
Parent: #47
Quote: الهرود و دايما ما تطلق على الأشياء الصغيرة والدقيقة والمتوفرة بغير ترتيب أو نظام ..ويمكن إيضاإستعمالها في حالة تواجد كمية من الأطفال الصغار و المزعجين في مكان واحد
رسلي الهدية... و أرجو أن تكون واحدة من قصايدك مرفقة بإذن تلحين....
[email protected] |
ازهرى سلامات
والله ضحكتنى كيف !! 
تصدق انك قرررررررربت
لكن وحات الله الهديه مى كتيره عليك
خاصة انك ما طلبت شيتا قاسى
حاضرين ياود الجروف والطين
لك التحيا
وشكرا غيم ضهر
|
Post: #50
Title: Re: مصطلحات سادت ثم بادت ،،، للتوثيق
Author: Azhari Nurelhuda
Date: 05-02-2008, 12:47 PM
Parent: #49
يسعلني الله...
دي حنبكة ساكت.....
قالت العرب: هرد الشئ... أي تفه تف الفندك و في راوية أخرى أي فتته لجزيئيات صغيرة... و الهرود (بفتح الهاء و الراء) هو تجمع هذه الأشياء المجزاءة الصغيرة في مكان واحد بدون نظام أو ترتيب...(من العامية السودانية)
و الله صاح
|
Post: #51
Title: Re: مصطلحات سادت ثم بادت ،،، للتوثيق
Author: saif basheer
Date: 05-02-2008, 01:37 PM
Parent: #50
الاخ الجنيد تحيات
Quote: الشرغرغ : عبارة عن وعاء من الصفيح الصلب يستخدم لغلى البن فى النار
القلاية : وعاء من الحديد مقعر دائرى له مقبض يستخدم لتحميص البن فى النار
|
بعض ادوات تحضير الجَبَنه في السودان، مع اخريات كالوِقَاية (تنطق القاف مخففة كالجيم المصرية) وتكون دائرية الشكل مغطاة بزخارف تستخدم كقاعدة للجبنة... ما أود السؤال عنه، الاسم الذي يُطلق على الليف الذي يوضع على "انف" الشرقرق وعنق الجبنة لتنقية القهوة، هل هو فقط "الليفة" أم اسم آخر؟
لكم الود
|
Post: #52
Title: Re: مصطلحات سادت ثم بادت ،،، للتوثيق
Author: Azhari Nurelhuda
Date: 05-02-2008, 01:44 PM
Parent: #51
اللشفة ياسيف.....
و الله جات من وين ماعارف...
|
Post: #54
Title: Re: مصطلحات سادت ثم بادت ،،، للتوثيق
Author: إسماعيل حميم
Date: 05-02-2008, 02:55 PM
Parent: #52
Quote: المشلعيب : عبارة عن سبت مصنوع من سعف النخيل يستخدم لحفظ الطعام والحليب يعلق فى
سقف الحجرة (المِرِق) |
المشلعيب : عبارة عن قاعدة صحنية من السعف ولها أربعة أزرع من السعف أيضاً تلتقي في نقطة
مركزية لدائرة الصحن وتعلق بخيط أول سلسلة في القطية أو الغرفة ويحفظ فيها الطعام الطازج.
وأما السبت المصنوع من السعف وله غطاء من السعف ويد يعلق منها فإسمه ( الكابدلو).
Quote: القرقريبة : اداة من جريد النخل على شكل ورقة الكوشتينة تستخدم في عواسة (صناعة)
الكسرة اى طرح العجين فى الصاج ليأخذ شكل الكسرة |
القرقريبة :
هي قطعة من سعف الدوم وليس النخيل
Quote: المُترار : بضم الميم .. عود يُلف عليه الخيط بطريقة معينة بعد غزله من القطن ، لتستعمل
فى نسج الفرده محليا |
المترار :
ألة خشبية عبارة عن عود في وسطه حلقة دائرية وهي تستعمل لغزل القطن يدوياً في المنازل.
هولى : معناها حقى ، بتاعى
هو لي
الكبوتة:
ماعون صغير يستخدم في التقديم للضيوف (مثال البلح والفول وغيره) وهي من السعف الملون
الرقيق النسج مزينة بالجلد ولها غطاء من نفس الخامات ويد من الجلد.
اللشفة :
إبرة سميكة لها يد خشبية مدببة تستخدم في المشاط لتخطيط وفصل الشعر. (ولا ما كدي يا أزهري)
مرفقفي
مودتي
إسماعيل حميم
.
|
Post: #53
Title: Re: مصطلحات سادت ثم بادت ،،، للتوثيق
Author: صديق الموج
Date: 05-02-2008, 02:36 PM
Parent: #1
ود الجنيد حبابك عشرة
العكفه: وهو العود على هئية الرقم 8 فى السرج.
البطان: وهو سير من الجلد يربط فى وسط الحمار لتثبيت السرج.
الضناب :وهو حبل ياتى من خلف ضنب الحمار لتثبيت السرج ايضا.
التكم:كرسى الساقيه الذى يجلس عليه من يديرها
الحناية: بيت الشعر
الوجله:حديده على هئية شنكل الجزارين يسحب بها الدلو عندما ينقطع فى البير.
الدلقان:اى قطعة قماش او خرقه
البنايت:قماش ملون على شكل مثلث يخاط فى السروال ناحية الركبه.
العبوب:جلد محشو بالقش يضعونه بالقرب من البقرة عندما يموت وليدها لتدر اللبن
الهمبول:عود يوضع عليه عراقى ليخيف الطير حول المزرعة
الانقاية : 4 احواض مزروعة.
الباندقة: حايط واحد من حيطان الغرفة او الحوش
السقو : قربه كبيرة مصنوعة من جلد البقر.
الشرقرق:اداة لصنع القهوة
الوقاية:اداة دائرية الشكل مصنوعة من القماش ومزينه بالسكسك توضع عليها الجبنة.
اللداية: حجر يوضع مع اثنان اخر وتجمع لدايات تقوم مكان الكانون.
السلا:تبيعة الحيوانات
السبايه: سوائل مخاطية تخرج قبل ولادة الحيوانات،وتجمع سبايات.
اللبا:اول حليب يخرج من الغنم والبقر بعد الولاده.
الكنتوش:اناء فخارى.
القروانه:الصفيحه.
يمكن اصد .
|
Post: #55
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-02-2008, 03:03 PM
Parent: #53
Quote: الفاتح كيفنك؟
بوست جميل والله ومهم شديد....
نلتقي قريباً...
الخمج , النابره, الضهر, الحنقوق, مكادي, تقره, الخرت, همبول,بروس, , خرتايه...عييييك |
المدثر الحبيب
انا ما كت قايلك عجوز كدى !!!
أتارينى كنت مغشوش فيك ،،،
يا الحِجِير ...
والله تب ما قصرت ،، بس فسِّر
|
Post: #56
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-02-2008, 03:15 PM
Parent: #55
تحية قوية شديد لكل المتداخلين من أهل العوض
أتاريهم كتار وما هينين تب ...
ولعيونكم أهديكم القصيدة الكتبتها فى أهلى ناس العوض :
أهل العوض
...........
سمـاحةْ اهـلْ الْعوض ،، فى النّـَمَّه والدُوباىْ
سمـاحةْ اهـلْ العوض ،، فى العَرْضَه والْهبباىْ
إن دُرْتَ العـوض ،، فى الحـاره بلْـقَى حِـدَاىْ
وإن راح العـوض ،، زى الفـقـدَّتَ جــناىْ
...........
أهــلى الغُـبـُش ،، ناسـا بِسِـتْرُوا الحـال
قُـولُـهمْ مَـنَـقََّى ،، مصـفَّى بـى غــربال
إن دُرْتَ تعــرف ،، قَــدْرَ المُـرُوَّه رِجــال
فُـوتُـهمْ بتْـعِرِفْ ،، كـيف الـوِلـِف كــتَّال
...........
كـرم النَّشـامه ،، فى السَّـهَلَه تَـلْقَى مَـدَفَّـق
جـوداً مـأصل ،، مـو كَـرْوَه سـاى ومـلفَّـق
أصـحاب نسـب ،، فى تُـربةْ جُـدُودَا معَـتَّـق
مـو جِـبَّةْ دراويش ،، نُصَّـها المرْقُـوعْ ملتَّـق
..........
الجـبنه المجيَّـهَة ،، فـحماتا فـوق المنْـقَـد
بت العـازه جـرَّت ،، بمبرا المحـزوز مـقـدد
والعــباس إنتـكى ،، فـرَّ الرُجُـول واتمــدد
فـى البِـكْرِيه تـلَّتْ ،، فى الـبركه يوت ماعـدد
..........
لـمَّـةْ أولاد العـوض ،، عـلى وعباس وود الزين
يَكُرْبـُو التيوه والطابه ،، وشليل ساكِـنُّو حـفيانين
وديك الرِمَّـه حبَّاسا ،، وعـجاج شدَّتْ عكالتو تبين
ومـويةَ الطمله خَمْجَه ،، يَنيـخْ حِـدَاها جمل الطين
...........
بـنُّــوتْ العـوض ،، أمُّـونه نـاس زينــوبه
شَــرَاِبن القِــرْبَه ،، ومَـصِـيِفنْ الـرَّاكـوبه
مابِعْـرِفَـنْ مكـياج ،، ولا قَصَّـةْ شـعر مقْـلوبه
سمـاحةْ ِفـطْره بس ،، منْ راسـا لـى عرقـوبا
..........
يـوم دقَّـتْ الدلُّـوكه ،، برَمَـتْ نِصـيصا ومدَّت
جــيدا المَـدُوعَجْ ،، مِتْـلَ الغــزالة الهــبَّت
عـامـت بالصِّـدير ،، للسـاحه قَـطَعتْ عــدَّت
رَمَـتْ الشَّـبَال ،، فـوق السَّــباتَه اتـشــتت
.........
شــن القـول بعـد ،، ما الحـله من اعـرافا
سـمـعت بالـخبر ،، الجـاى شـاقى اطــرافا
أمـونه وِلْـدَتْ ،، فـوق حــولا تـمَّ زفــافا
للبِـكْـرِى جـابتْ ،، ياناس دَقُـــر للشــافا
..........
أرض الــبطانه ،، الصافى لونا تَكـنُّو تِبْـرِى
روح البطـانه ،، الشَّـتله فـوقا يغـنى قُـمْرِى
حال الـدنيا ،، ريتك منُّو يُمَّه انشا الله تَـبْـرِى
من فُـتْـنَاِكى يُمَّه ،، وحالنا تبْ مو ماشى دُغْرِى
..........
الفاتح الجنيد ـ مسقط
|
Post: #57
Title: Re: مصطلحات سادت ثم بادت ،،، للتوثيق
Author: الطيب شيقوق
Date: 05-02-2008, 08:29 PM
Parent: #56
الاخ الفاتح
والله انا قريت القصيدة وشعري يا الفاتج اخوى قام سبيبة سبيبة من الهوشة والفرحة - لكن عليك الرسول القصيدة دى نظمتها انت ؟ والله لا تقل من ناس ود الشلهمة اتاريك ضائع هنا سااااااى .
Quote: لكن النصايب القلتها دى تب ما سمعت بيها
إت جاى من وين ؟؟؟ (وش لمن سنونو بره) |
الهيكبيب ده يا الفاتح نوع من الشجر عندو ثمار زى الجوافة لكن لو الجمل قرض منه جقمة واحدة بمشى الاخرة .
|
Post: #58
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-03-2008, 09:45 AM
Parent: #57
Quote: يا سلام على الروعة ةالله بوست ما حصل عندي تصحيح للكلمات الفوق ومعاها اضافة
1-المقشاشةصاح هي المكنسة لكن ما من السعف يا ودالجزيرة انما من العرجون وهو الجزء الشايل السبيطة التي تحمل الرطب الذي يصير بلح مستقبلا
2-التدي=الحيططة,الكبد =الباب,الضقل=الكيلون,الكشر =المفتاح وكلها مصتوعة من الخشب,اللروتي=صبي السافية,الللس=الحبل الذي يحمل الفادوس,والقادوسهو القلة التي تخرج الماء من بير المترة,والمترة هي بير الساقبة
3-يلا اعرفو ديل00الكروق-القسقة-الفليقة-والاشميق-المخرز-البلال والبقية تأتي |
العزيزة نسمة
طلتك نسمة لمن مهبهبة سعف النخيل المتمايل ،،،
أشكرك على الاشادة والاضافة ..
وزوادتك ملت المتره ودفقت ،،،
|
Post: #59
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-03-2008, 10:21 AM
Parent: #58
Quote: الاخ الجنيد تحيات
Quote: الشرغرغ : عبارة عن وعاء من الصفيح الصلب يستخدم لغلى البن فى النار
القلاية : وعاء من الحديد مقعر دائرى له مقبض يستخدم لتحميص البن فى النار
بعض ادوات تحضير الجَبَنه في السودان، مع اخريات كالوِقَاية (تنطق القاف مخففة كالجيم المصرية) وتكون دائرية الشكل مغطاة بزخارف تستخدم كقاعدة للجبنة... ما أود السؤال عنه، الاسم الذي يُطلق على الليف الذي يوضع على "انف" الشرقرق وعنق الجبنة لتنقية القهوة، هل هو فقط "الليفة" أم اسم آخر؟ |
أخوى سيف بشير
حسب علمى وفى منطقتنا تسمى الليف ، بدون التاء فى آخر الكلمة
والا أعطت معنى آخر
ومن مستلزمات عدة القهوة أيضا الهبابة ، أداة من السعف دائرية تستخدم لتحريك الهواء بغرض اشعال
النار فى الفحم
وأيضا المنقد ، او الكانون : وهوإناء من الحديد يوضع عليه الفحم
كذلك البمبر : وهى مقعد من الخشب ذو اربعة ارجل منسوج بالحبال
والفندك : أداة من الخشب اسطوانية لطحن البن
ثم الجبنة المصنوعة من الفخار ، والفناجين ، والجنزبيل ، والسكر أو التمر ، والملعقة
طبعا دى مستلزمات اعداد القهوة فى الضحوية (الفترة ما بين الصبح والظهر)
او فى العصرية أو المغيرب ، حسب ما يختاره أصحاب الكيف
تقعد حاجة البتول فى البمبر ، وتقلى البن فى القلاية ،
وأول ما يطلع دخانها تقوم تمرروا على الجالسين لأخذ نفس طويل لزوم الكيف ،،،
بعدين تقوم تدق البن فى الفندك
وتكبوا فى الشرغرغ لحدى ما يغلى
بعد داك تصب القهوة فى الجبنة ، وتقفل خشم الجبنة بالليف لزوم تصفية القهوة من بقايا حبوب البن المهروس
وتختها وسط الفناجين فى الصينية مع السكر ، وتقدمها للجالسين
أها فى منهم من يشرب فنجانين فى البِكرية (ودى عادة بتكون فيها القهوة ثقيلة أى كثيرة البن )
بعدها تقوم حاجة البتول تكب باقى القهوة تانى فى الشرغرغ وتضيف ليها حبة موية تخففها بيها شوية ودى تسمى (البركة) وعادة ممكن تشرب فيها أكبر عدد من الفناجين لأنها خفيفة
وزمان ونحن صغار نجى نحنس حاجة البتول تدينا قهوة
تقوم تقول لينا "اصبروا يا جنيات بديكم من البركة ، عشان البكرية بتتمصكم"
|
Post: #60
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-03-2008, 10:25 AM
Parent: #59
الاخ اسماعيل حميم
أشكرك على التوضيح والاضافة
|
Post: #61
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-03-2008, 10:29 AM
Parent: #60
الموج النتر ....
وإت حبابك ألف ،،،
خشمك فوقو النبق ،،،
من زمان منتظر جيتك ،،،
النبى تجى صاد ...
|
Post: #62
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-03-2008, 10:35 AM
Parent: #61
ود عمى الشيقوق
إت ظنيتك ما قريت لى قبال كدى :
ـ نوارة المضارب
ـ وحاج الخضر ياحر
ـ والجاهلة
إت كوت وين ؟؟؟؟
|
Post: #63
Title: Re: مصطلحات سادت ثم بادت ،،، للتوثيق
Author: الطيب شيقوق
Date: 05-03-2008, 10:46 AM
Parent: #62
Quote: إت ظنيتك ما قريت لى قبال كدى :
ـ نوارة المضارب
ـ وحاج الخضر ياحر
ـ والجاهلة |
لا والله يا الفاتح لكن ما شاء الله شاعر مافيك طق ابدا
|
Post: #64
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-04-2008, 10:36 AM
Parent: #63
أخوى ود شيقوق
فى شان خاطرك وخاطر كل الاحبة المتداخلين نزلت القصيدة دى تانى هنا
خاصة فيها مفردات تشبه البوست ده :
حاج الخِضِر ،،، يا حُرْ
فَلَقَ الصباح اللاَّح ،، بى نورو كشف الضَّلْمَه
فرَّنْ اُمَّات عشيش ،، الكان ضراها العتمه
هبهبْ أبْ عُرُف ،، بى صياحو قال يا اُمَّه
جافو النوم امُرْقُوا ،، خلّوُ الضُرَاع تِتْحَمَّى
............
حاج الخضر صنْقَر ،، فوق عنقريبو اتحكر
قال يا لطيف ألطف ،، لى ربو سبَّح وكـبر
شال الفاتحة صنقع ،، حَمَد الكريم واستغفر
صاح لى أم مساير ،، بشـويش وما اتنهر
............
بى مهـلْ البتول ،، فتحت ضَـرَى الشُكَّابا
عَـدَلَتْ للمسـيره ،، وربطت طرف قُرْقابا
لفــحتْ النِعـلات ،، خلَّت بواقـى عَقَابا
جـاياك يالتُكُل !! ،، وينو النِّعاجْ حلاَّبا ؟؟
...........
تَكـَتْ الخُمَّارَه ،، غَرَفـتْ للعـجينه وكبَّت
فـوق طاجـن السجم ،، النارو هبَت وبقَّت
قـطعت للعصيدة ،، مـلت الكوارى وعبَّت
حـبات العرق سالت ،، من وجيها وصبَّت
...........
حـاج الخضر ،، دخل الزريبة يقْـدِل قدْلو
عـلَّق لى حـمارو،، المابشـوف تبْ مِتْلُو
وهَّـط سرْجو ،، باللـباب يَوَِزْنو يعـدْلو
يربط فى اللَّـجام ،، مـرات يشدو يفـتْلُو
...........
قبَّل على الشـاى ،، أب بوخا يقـوم يا فوق
باللقـيمات أم سـمن ،، الباقيه ليهو عِلُوق
يمـسح فى الشوارب ،، بَرْمةْ رُبَطْ حنقـوق
يا اللـبن المقـنن ،، الزَىْ حلاك ما بضوق
...........
حـزَم مُخْـلايتو ،، وبوخ العـصيده يفـور
لا مُـلاح لا شمـار ،، حـبةْ مـلح مصرور
فد فحْـلين بصل ،، من عِـرْشُو مـو مبتور
حاشـاك من الخـمج ،، كورة العُكارَه سَحُور
..........
نقْـرَطْ للـحمار ،، الوَسْـمُو بانْ فوق كُدْرُو
هـوَّدْ بالـدريب ،، المِِنْ طيَّعُـوهو بِخَـبْرُو
حاكْل المـَلود فى أيدو ،، سلُّوكه فَرقةْ سدْرُو
رحـمان يارحـيم ،، يسِّـر نهـارنا واجُبْرو
..........
حـاج الخـضر يالزول ،، الْمِنْ وِعِينا وشُفْنا
فيك الغَـبَاش مَوْسوم ،، أصلك بِقـالْنا عُرُفْنا
من طـيبك المدفـوق ،، عبـَّينا منَّو كرَفْـنا
ياكـا الموكر فينا ،، ومزروع كمان فى جَرِفْنَا
...........
الترجمة :
الفلق : الخيوط الاولى من الضوء التى تظهر عند الفجر
أمات عشيش : جمع ام عشيش وهو نوع من العصافير الصغيرة
أب عُرُف : الديك
هبهب : ضرب الهواء بجناحيه (عند الصياح طبعا إذانا بأن الواطا صبحت)
الضُراع : الجزء العلوى من اليد الملتصق بالكتف
تتحمى : تسخن
اتحكر : جلس القرفصاء
أم مساير : هى أم العيال ، والمساير هى ضفيرتين من الشعر تتدلى على جانبى وجه المرأة ،
وباقى الشعر ممشط
الشكابا : هى غرفة صغيرة مبنية من القش
الضرا : الساتر على المدخل ، قد يكون من القش او القماش
القرقاب : الإزار ، بلبسوه حبوباتنا زمان تحت الفستان
لفحت : ختفت أو شالت على عجل
النعلات : ما بلبس على القدم ايا كان
العقاب : هو ما بقى من الشىء
حلابا : الرجل الذى يحلب البهائم
تكت الخمارة : أمالت إناء الفخار على جنب
طاجن : إناء من الحديد مقعر تصنع عليه العصيدة
الكوارى : جمع كوره إناء من الطلس مقعر
علق لى حمارو : وضع له البرسيم او العيش لزوم وجبة الفطور
وهط : تأكد من سلامة وضع السرج على ظهر الحمار
اللباب : جزام من الجلد يربط به السرج على ظهر الحمار
اللجام : حبل او شبك من الجلد يوضع على مقدمة راس الحمار ويلف داخل فمه لتسهيل قيادته
البوخ : الدخان الابيض الذى يتصاعد من الشاى أو أى سائل عند تسخينه بدرجة عالية
علوق : وجبة الاكل
رُبط : جمع رُبطة وهى الحزمة من الشىء
الحنقوق : شرائح من جريد النخيل تبلل بالماء تمهيدا ليصنع منها البرش ، او الهبابة أو القفة وغيرها
مخلايتو : الاصل مخلاية ، وهى عبارة عن كيسين كبيرين مصنوعين من حبال الخيش متصلين ببعضهما
يوضعان على ظهر الحمار بحيث يكونان معلقين على جانبى ظهر الحمار
عرشو : العرش هى جذور النبات
مبتور : مقطوع
الخمج : تقال للذى يستهلك أى شىء بإسراف فيقال عليه خمجان ، وتقال للطفل الذى تعود على ان يتصرف على هواه دون رادع ، وتعنى المدلل أو ذو الطبع الشين ووو ... عيك
فحلين : مثنى فحل ، وفحل البصل هو البصله الكبيرة حارة المذاق
العُكارة : الكسرة الناشفة أو العصيدة الممزوجه بالماء حتى تصبح سائلة فتشرب كالماء
نقرط : هو فعل صوتى معين اعتاد عليه الحمار يطلقه صاحبه لحثه على المشى او التحرك
الوسم : علامة توضع على قدم الحمار لتمييزه ، عن طريق الكى بالنار
الكدر : قدم الحمار وتسمى الحافر ايضا
هود : انطلق ومشى لا يلوى على شىء
طيعوهو : عودوهو على تقبل ركوب الانسان على ظهره
بخبرو : بعرفو
حاكل : ماسك الشى بيده فوق او خلف كتفه
سلوكه : أداة من الخشب مدببه من المقدمة بها عود قصير على جانبها تستخدم عن طريق الضغط عليها بالقدم لحفر حفرة لوضع البذور
الغباش : يقصد بها الدلالة على البداوة
موسوم : موسم اى ظاهر وباين
عرُفنا : أى عرف وتقليد
عبينا : ملأنا
كرفنا : شمينا واخدنا نفس طويل
الموكر : المتأصل ، وتقال للشىء البعيد المنال
جرفنا : الجرف هو جانبى النيل وهى منطقة تغمرها المياه اثناء الفيضان ، وعندما ينحسر النيل يتبقى الطمى الذى كان يحمله التيار بحيث يكون تربة خصبة للزراعة
وادينى خاطرك ياجميل ،،،
على فكره ... حاج الخضر ده خالى ( رحمة الله رحمة واسعة)
وزوجته هى البتول .. أمد الله فى عمرها ، ومتعها بالصحة
|
Post: #65
Title: Re: مصطلحات سادت ثم بادت ،،، للتوثيق
Author: ابوبكر على
Date: 05-04-2008, 11:27 AM
Parent: #64
Quote: القلشوب
التقروقة
الدهليس
الدانقا
الكسفريتة
الدمفريس |
ياكافى البلا
اصلو مافى واحد عرف واحدى من ديل
الجنيد
الحنقوق فى ولاية نهر النيل هو المكناسة - المقشة
بليف مى
|
Post: #66
Title: Re: مصطلحات سادت ثم بادت ،،، للتوثيق
Author: فدوى الشريف
Date: 05-04-2008, 11:29 AM
Parent: #64
بعد اذنك يا الفاتح
وين ابو الحسين وملكة سبأ واهلي الشوايقة
اتذكر شوية من كلامنا وممكن يصححوني:
الكُـشَر: "مزلاج" من الخشب.
المعلاق: "المشلعيب" بلغة الوسط.
اللدايات: ثلاث أحجار توضع في الارض وتوضع فوقها الاناء "الحلة" للطبخ.
الواقود: حطب النخل يطبخ به الطعام.
الكروق: نهاية جريدة النخل.
الكعسق: غلافة للسبيط حامل البلح.
السام: الحائط.
الجر: الزير (من كلمة الجرة)
ألمي: الماء
السبروق: نبات يصنع منه "ملاح" "مفروك".
اللشميق: ليف النخل.
الرقّـابة: المرآة.
الكدّقة: "راكوبة" الغنم.
البسديق: قطعة قماش يمسح بها "صاج" (المعراكة في وسط السودان)
التميمة: قطعة من الحبل لربط الحيوانات.
الساسوية: الزجاج المكسور.
الهجيري: "الهجير" الشمس الحار
الرمط: الارض الحارة (الرمضاء)
اللارتيق: ضل الضحى
البرمندي: الوتد (من الحديد غالباً)
الماروق: روث الحيوانات يستخدم في السماد.
البُـتق: الزرع الذي ينبت بعد حصاده.
اللبقة: فتحة في الجدول لمرور الماء في الزراعة.
اللَّـور: كبري للمارة في الجدول.
التقنت: فواصل بين احواض الزراعة.
الكوشُمبة: اخر حوض في الحواشة
كونشبر: القفة الصغيرة التي يستخدمها المزارع في حمل التراب.
الهين: مقياس (معبار) اليد
الرابونة: تشبه (الطورية)
الدروة: حوض لسقي الحيوانات
الواسوق: اداة في الزراعة
البربخ: ماسورة صغيرة توضع في الجدول الام لنقل الماء للجداول الصغيرة.
|
Post: #67
Title: Re: مصطلحات سادت ثم بادت ،،، للتوثيق
Author: فدوى الشريف
Date: 05-04-2008, 02:36 PM
Parent: #1
فوق
|
Post: #68
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-05-2008, 08:34 AM
Parent: #67
Quote: Quote: القلشوب
التقروقة
الدهليس
الدانقا
الكسفريتة
الدمفريس
ياكافى البلا
اصلو مافى واحد عرف واحدى من ديل
الجنيد
الحنقوق فى ولاية نهر النيل هو المكناسة - المقشة
بليف مى |
أخوى ابوبكر على
باين عليك شايقى من كلمة (واحدى) دى
وهذا هو المطلوب ، تنوع المشاركات من كافة ربوع السودان
وذلك لزيادة المعلومة ، كما ذكرت فى مقدمة البوست أن الهدف منه توثيق
للمصطلحات القديمة للتذكير بها ،، والتعريف بمدلولاتها لمن يجهلوها .
وكنت اتمنى الادلاء بدلوك بتعريف المفردات التى ذكرتها
لأنى أشك فى أن هناك كثيرون لا يعرفون معناها ...
آى بليف يو ... وحاتك وتب مانى مغالطك ...
لأن المسميات نفسها قد يختلف معناها من منطقة لأخرى
ودى أنا زاتى بالنسبة لى معلومة جديدة ...
|
Post: #69
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-05-2008, 08:54 AM
Parent: #68
العزيزة فدوى الشريف
أفو عليك !!!
كيف تستأذنى والبيت بيتك ، والبوست هولك !!!
اضم صوتى لى صوتك وأنادى بأعلى حِس عندى
لى أهلى الشوايقة ، والمحس ، والجعليين ، والدناقلة
والهدندوة ، والبقارة ، وعموم دار غرب ، ودار كردفان ، ودار جنوب
وكل اطياف النسيج السودانى للمشاركة فى إثراء هذا البوست
بهدف تأمين التوثيق الكامل ...
وأتاريك ماك هينة والله ،،،
|
Post: #70
Title: Re: مصطلحات سادت ثم بادت ،،، للتوثيق
Author: الطيب شيقوق
Date: 05-05-2008, 09:57 AM
Parent: #69
فتوحي
الله عليك وعلى حاج الخضر والله كلام يحنن ويجنن ياهو حديث عقابنا وياهو البقوم شعر الراس عديييييييييييل كدى شوف كلامك وشرحك الحلووووو ده اتكانك جاى من دنادرنا المهجومة بكتاحة الرشاش في الايام دى .
Quote: أم مساير : هى أم العيال ، والمساير هى ضفيرتين من الشعر تتدلى على جانبى وجه المرأة ،
وباقى الشعر ممشط |
والله يا الفاتح اخوى اكان شفت ام مساير دى وهى واردة قاصدة الجمام (الجمام ده حفرة جوة البحر محل الرملة بقدوها وتطلع الموية الصااااااااااافية وطاعمة) وكمان ناقزة مع القرب ( القرب ديل جمع قربة وهى اناء من الجلد تحمل فيه الماء)ومسايرها تتلولح بجاى وبجاي وكمان مرات رابطة فيهاوديعات يجولن يمين وشمال والله .
جاييييييييييك وسلم لى على مؤيد
|
Post: #71
Title: Re: مصطلحات سادت ثم بادت ،،، للتوثيق
Author: ابوبكر على
Date: 05-07-2008, 10:54 AM
Parent: #70
Quote: وكنت اتمنى الادلاء بدلوك بتعريف المفردات التى ذكرتها
|
اها جيتك صادى
بس كنت منتظر سوما تعرفم, لكن باقى لى هى ادتنى الدكة
الدكة تقال لمن يغلبك تعرف الجواب
تقال - اديتك الدكة
التقروقة = السجادة (المصلاية)
الدهليس = هو بناء بمثابة الاستقبال للمنزل فى بربر القديمة يكون بجوار الباب الرئيسى
الدانقا= غرفة عالية السقف بها فتحتى منور فى الاعلى و ينسج سقفها بالحبال ثم تعرش بالجريد(جريد النخل) و الشقيق (الدوم).
الكسفريتة = الكبريتة
القلشوب= الفحم
الدمفريس = هى الكسرة اليابسة , او هى الفضلة من الكسرة , تقول لو اردت ان تعيب مناسبة ما, و الله الاكل ماكفا, لامن ملحولنا دمفريس. اى بواقى الكسرة
تحياتى
|
Post: #72
Title: Re: مصطلحات سادت ثم بادت ،،، للتوثيق
Author: ابوبكر على
Date: 05-07-2008, 11:05 AM
Parent: #71
| Quote: الكوشُمبة: اخر حوض في الحواشة |
استاذة فدوى
و يسمى ايضا حوض الراس
و فيه مقولة شهيرة
حظنا حظ حوض الراس
تقال فى اخر صينية فى مناسبة زواج مثلا, فاما ان تكون مدنكلة شديد و اما تكون عجفانة. و حوض الراس اما ان يشرب لامن يروى و اما ان يعطش من قلة الماء.
اما قولك السام
فالسام عندنا حظيرة الحيوانات.
|
Post: #73
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-08-2008, 08:14 AM
Parent: #70
أها هدى المساير ، والمُشاط ، والكوفار ، وكل أنواع تسريحات الشعر قديما
مطرز بالسكسك والخرز والسوميت وووو عييييك ،،،
رايك شنو يا الشيقوق ؟؟؟
الليلة طُق الكواريك ساى ،،، وانا بخلف ليك ،،،،
|
Post: #78
Title: Re: مصطلحات سادت ثم بادت ،،، للتوثيق
Author: Elsamani A.Malik
Date: 05-08-2008, 06:22 PM
Parent: #73
الاستاذ ود الجنيد
عوافي
والله البوست دا حقو تسميهو من الامس.
بسال من كلمة: الميرفة؟؟
|
Post: #74
Title: Re: مصطلحات سادت ثم بادت ،،، للتوثيق
Author: محمد أبوالعزائم أبوالريش
Date: 05-08-2008, 11:23 AM
Parent: #1
ود الجنيد كيفنّك ..
عذراً أول شئ لأنو البوست كان ضايع مني .... وكمان شوية مشغوليات.
| Quote: أها ،، وكت عرفت التيبار أعرف لى الحنقوق شنو ؟ أكان نجيض ... |
الحنقوق (وما متأكد من المعلومة) أظنه الليف البيطلعوه من النخيل.
يالاّ يا تقول عفارم .. يا تدينا المعلومة.
|
Post: #75
Title: Re: مصطلحات سادت ثم بادت ،،، للتوثيق
Author: صلاح الأحمر
Date: 05-08-2008, 02:00 PM
Parent: #74
| Quote: المعلاق: "المشلعيب" بلغة الوسط. |
(دوا كلب ) بكلام أهل كردفان.
|
Post: #76
Title: Re: مصطلحات سادت ثم بادت ،،، للتوثيق
Author: صلاح الأحمر
Date: 05-08-2008, 02:39 PM
Parent: #75
ـ السبلوقه
ـ الكراسه
ـ الكرنك
ـ البلنجه
ـ الكعكول
ـ الغر
ـ الزمبريطه
ـ الدفسيبه
ـ الرحمتات
والتحية لي سيد البوست.
..فوق ده مشروع توثيق رائع ولذيذ.
سحبت كلمة واسوق للتكرار.
|
Post: #77
Title: Re: مصطلحات سادت ثم بادت ،،، للتوثيق
Author: إسحاق بله الأمين
Date: 05-08-2008, 03:19 PM
Parent: #76
الأخ الكريم / الأستاذ الفاتح الجنيد
وأنت الأصيل الذي يعمل على توثيق "نضمينا السمح" ولغتنا الدارجة التي هي أقرب إلى اللغة الفصحى . بوست جميل من أخ رائع.
(التُقابه: النار التي تؤقد عند قراءة القرآن في المسيد والخلاوي)
وتقابة توقد للصباح
ناره تب مابتنطفي
ونوبة دفوفه تدق
من صباحاً بدري
وحلقة للذكر
شيخه حواراً صبي
ودرويشا إطير لي فوق
أبوي ما مات
يمين أبوي الشيخ حي
شفته البارح في المنام
وشو منور وفي جبينو ضي
سالمني وطايبني وكمان
في أضاني همس لي
وقال لي أنا في خيراً كتير
وده من فضل القرآن علي
ونائحة تبكي وتنوح
حليل أبوي الكان:
للجيعان لقمة
وللعطشان مي
وللبردان دفا
وللحران في
وللمرضان شفا
وللمكسور كي
وللمقطوع مأوى
وللضهبان ضي
ماله دار أبوي الليلة
صبحت خلا بقت صي
حي ووب ووب حي
|
Post: #79
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-10-2008, 09:14 AM
Parent: #77
Quote: الاستاذ ود الجنيد
عوافي
والله البوست دا حقو تسميهو من الامس.
بسال من كلمة: الميرفة؟؟ |
العزيز السمانى
الله يعافيك ،،،
والله اسم فى محلوا ،،، بس جيت متأخر
الميرفة دى كان ما خاف الكضب مصطلح متداول فى شمال السودان
وبينى وبينك ما عندى فكره عنها ، لأنو أنا من الجزيرة
وانت عارف السودان يزخر بمجموعة عامرة من المفردات تختلف باختلاف المناطق واللهجة
وكنت متمنى مشاركة عامرة من جميع الاخوة باختلاف مناطقهم
لإثراء هذا البوست حتى يكتمل التوثيق .
انشاء الله ينجدنا واحد من المنطقة ديك
قول يارب ،،،
فوتك بعافية ...
|
Post: #80
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-10-2008, 09:26 AM
Parent: #79
Quote: ود الجنيد كيفنّك ..
عذراً أول شئ لأنو البوست كان ضايع مني .... وكمان شوية مشغوليات.
Quote: أها ،، وكت عرفت التيبار أعرف لى الحنقوق شنو ؟ أكان نجيض ...
الحنقوق (وما متأكد من المعلومة) أظنه الليف البيطلعوه من النخيل.
يالاّ يا تقول عفارم .. يا تدينا المعلومة. |
الحبيب ابو العزائم
صباحك ورد
معليش انا زاتى والله انشغلت ما لقيت طريقة ادخل
قررربت للاجابة ،، بس ما وصلت لدرجة الامتياز عشان اقول ليك عفارم ،،
إجابتك غايتو نجدتك ،،، والا كنت حا أكشف حالك ،،،
الحنقوق : هو شرائح من سعف النخيل تبلل بالماء تمهيدا لصنع البرش ، والقفة والهبابة
وكل المشغولات المصنعة يدويا من السعف ...
وفى رواية أخرى هى المكنسة او المقشاشة ، حسب لهجة اهلنا فى شمال السودان على ما اعتقد ...
|
Post: #84
Title: Re: مصطلحات سادت ثم بادت ،،، للتوثيق
Author: Elsamani A.Malik
Date: 05-11-2008, 10:33 AM
Parent: #79
Quote: العزيز السمانى
الله يعافيك ،،،
والله اسم فى محلوا ،،، بس جيت متأخر
الميرفة دى كان ما خاف الكضب مصطلح متداول فى شمال السودان
وبينى وبينك ما عندى فكره عنها ، لأنو أنا من الجزيرة
وانت عارف السودان يزخر بمجموعة عامرة من المفردات تختلف باختلاف المناطق واللهجة
وكنت متمنى مشاركة عامرة من جميع الاخوة باختلاف مناطقهم
لإثراء هذا البوست حتى يكتمل التوثيق .
انشاء الله ينجدنا واحد من المنطقة ديك
قول يارب ،،،
فوتك بعافية ... |
أستاذنا الفاتح الجنيد
بعد بحث وإستقصاء وجدت أن الكلمة فعلاً يرجع أصلها إلي شمال السودان وتعني "المسلًة" وهي أداة يستخدمها المزارعون في خياطة جوالات المحاصيل. وهي تعرف عندنا في الجزيرة بإسم المسلة. وممكن نستعين بالأستاذ/إسحاق بلة يؤكد المعلومة.
أرقد عافية
السماني
|
Post: #81
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-10-2008, 09:32 AM
Parent: #76
أخوى صلاح الاحمر
تشكر كتير على هذه الاضافات القيمة
بس كان تكملها بتوضيح معانى الكلمات ليكتمل التوثيق
وتعال صاد ،،،
أكيد فى جعبتك الكتير
|
Post: #82
Title: Re: مصطلحات سادت ثم بادت ،،، للتوثيق
Author: الفاتح الجنيد
Date: 05-10-2008, 10:15 AM
Parent: #81
Quote: وتقابة توقد للصباح
ناره تب مابتنطفي
ونوبة دفوفه تدق
من صباحاً بدري
وحلقة للذكر
شيخه حواراً صبي
ودرويشا إطير لي فوق
أبوي ما مات
يمين أبوي الشيخ حي
شفته البارح في المنام
وشو منور وفي جبينو ضي
سالمني وطايبني وكمان
في أضاني همس لي
وقال لي أنا في خيراً كتير
وده من فضل القرآن علي
ونائحة تبكي وتنوح
حليل أبوي الكان:
للجيعان لقمة
وللعطشان مي
وللبردان دفا
وللحران في
وللمرضان شفا
وللمكسور كي
وللمقطوع مأوى
وللضهبان ضي
ماله دار أبوي الليلة
صبحت خلا بقت صي
حي ووب ووب حي |
الاخ الفاضل / اسحاق بله
والله شامى فى نفسك ريحة البطانه
ده كلام محزم وملزم ياخى ،،،
الله يديك العافية
ويرحم ابوك الشيخ وجميع ابواتنا
تحت الارض وفوق الارض ،،،
ذكرتنى يا اسحاق بالمناحات التى تنظم فى الميت على أيام جدودنا
لما يجيبو طشت ملان موية ويكفو فيهو 3 قرعات باحجام مختلفة
تجلس حوله إثنين من النساء ويقمن بالضرب على القرع بايقاع منتظم
فيصدر اصوات مختلفة النغمات تقوم على اثرها مجموعة من النساء
يضعن التراب او الرماد على رؤوسهن
ويقمن بالدوران فى شكل دائرى وهن يتقافزن على ايقاع القرع
ويرددن تلك الابيات فى وجود مجموعة اخرى تردد بانتظام حى ووب حى ،،، حى ووب حى
وهو ما يعرف بالردحى ...
وبين حين وآخر تنطلق الصيحات
وووب على ،، الليله وووب .. وهذا يسمى السكلى ...
|
Post: #83
Title: Re: مصطلحات سادت ثم بادت ،،، للتوثيق
Author: إسحاق بله الأمين
Date: 05-10-2008, 05:49 PM
Parent: #82
الأستاذ / الفاتح الجنيد
السلام عليكم ورحمة الله وبركاته
يا خوي أنا ما بعيد منك، ومن أهلك ناس فداسي ومنطقة البطانة ما بعيدة مننا ولينا فيها أهل كتار.
المناحة دي سويته في أبوي الشيخ عبد الرحيم البرعي الرحمة وسادته.
وكان للطش الفي نصه القرع عايم، وجنبو الطش المكيول بالرماد، وحواليه النسوان شايلات سيوفن واعرضن، الكلام ده كلو شفتو وأنا صبي في بكاء الشريف أحمد ود الشريف محمد الأمين يوسف الهندي، وكان مع النسوان البسون في الردحي راجل لابس ليهو عراقي دمورية قصير ، يبكي واسكلب مع النسوان، اسمه الكجك.
|
|