زميلى وزميلتى بالمنبر العام

هل أحسست بتغيير طرأ عليك منذ انضمامك لهذا المنبر؟

أما أنا فنعم..

صرت أصاب بملل وأنا أفتح الصفحة الأولى للمنبر..
أتصفح (المتواجدون الآن) أكثر من تصفحى لمواضيع المنبر..
أعمل رفريش للصفحة الأولى عدة مرات فازداد مللا..

عندما أجد موضوعا لبدرالدين شنا( رد الله غربته)..
والملا عمر أكثر الله من مداخلاته..

وأبوحراز أسبغ الله عليه نعمة الزمن ليكتب..أفرح.

فهؤلاء يجلبون الفرح..

أتمنى لخدر أن يكون ملتاعا يدثره الشجن دوما ليوزعه مابين أوتاره الصوتية وأوتار عوده..
كما أتمنى أن لاينعى أحدا فنانا بهذا المنبر غير خدر..

عماد عبد الله وتمادر لا أقرأ لهم كثيرا لأن من يقرأ لهم قبل أن يتأكد أن مزاجه قد تطابق مع مزاجهم حين كتابتهم لأى موضوع يكون كمن يتذوق الماء الزلال بفم مر مريض..

وأنا كثيرا مايكون مزاجى مرا مريضا..

كل الكتاب الذين يكتبون مواضيع دينية يصيبونى بالدوار والغثيان..

المواضيع السياسية أتخيل أصحابها عراة وسلاحهم سبابتهم يبرمجونها كروزا هدفه مؤخرة الخصم..

قضايا تفقد بريقها بكثرة الصنفرة..
إغراق الأرض..
الإغتصاب..
حرق القرى..
القتل الجماعى..
والظلم..

كل هذه القضايا يخبو أوارها من كثرة النفخ حتى يتحول جمرها الى رماد.

كثيرون يكتبون عن ذويهم الذين أرسلهم الإنقاذيون مسافرين على فوهة المدافع..
أو أبلوا جلودهم بسياط التعذيب..
هؤلاء يكتبون بطريقة تشعرنى بأنهم ماعارضوا الإنقاذ إلا لما فعلته بذويهم..
أحس أن طعم الإنقاذ ولونها لديهم لتغير لو لم تطال ذويهم.

أحس أن جميع الشيوعيين خضر عطا المنان.

لا أستطيع قراءة موضوع بطول صفحة..

وترانى أميل لتلغرافات حسين ملاسى وأشعر بأن هذا الشخص لايفهنه أحد..
ومرات أقول وأنا أقرأه: كفى بك داءا أن ترى الموت شافيا.

عندما أحب المساخة الجد جد أترصد مداخلات حميدة.

أستغرب لكتاب كانوا مجيدين أصبحوا أهل نقل لما يكتبه الآخرون..
أشوف منصور المفتاح وأقول خسارة والله كان زول كتااااااب..

أتعجب من أعضاء وعضوات ينشرون مواضيع أعضاء مثلهم بهذا المنبر..

عندما تجمع كتابات المعارضة والحكومة تحس بأن السودان كوم من الدهب والمعارضة تطلب والإنقاذ توزع على من تريد والباقين فى الصف.ويأتينى إحساس بأن الغلابة الذين ليس لديهم مايخافون عليه لو إتحدوا على حرق الخرطوم لاتحد كل الساسة والزعماء والوجهاء ضدهم فى جبهة واحدة مع الإنقاذ.

ياربى يكون الحاصل شنو؟

*

محجوب عبد الله اب نقطة.

ممنون بهذه النقطة التى تساوى نقطة جدى الرقيق خيت الشلة الذى سمع بمهالك وهى إحدى فتيات الشكرية اللاتى لهن صالون أدبى يجتمع فيه الشعراء والهمباتة من أهل البطانة. وكان قلبها عند الصادق ود آمنة.

الرقيق عندما رآها أخذه جمالها وسحرها وغنجها عند مواجبة الترحاب..
فسألها عند أول رشفة من فنجان الجبنة..
إنت عليك الله يامهالك إسمك منو؟

فابتسمت بدلال وقالت له إسمو تراهو التردتو وفت فوقو دا.

وأردفت يمين نقطتك وصلت يالرقيق, وهى عندى أغلى نقطة.

دا كلو كوم واناكوم تاني

ياخ وديني واحشني ومشتاق ليك عديل كدا

ومشتاقين صوتك وضحكتك وقفشاتك الحلوة وحديثك العذب

جد واحشني (سيكوت) جدا وسلم لي عليهم

وكان على حال المنبر كلنا في الهواء سواء وربك يصلح الحال

ودي وتحياتي بلة

عبد الله الأمين

شوق مدفق..

وينك ياشوقى..

متابع نجاحاتك مع مبيوع بإعجاب شديد..

كيف أحوالك وكيف عمك جيلانى ؟
هل مازال بطقش البلى وببكى تحت العمة؟

والله زمن يا الهمباتة..

غرفة البالتوك البتشيل عشرة..
أمدرمانية عندما تنعس تقول يلا كل قرد يطلع شدرتو..

كان الواحد عندما يكون خرمان لقهقهة يلقاها بفركة كلك..
ياخى خليك قريب..
تقبل تحيات سهام..

وبلغ تحياتى لجميع ناس النافذة وقول لعزو: كتابك الخايف عليهو ونحنا ما خايف علينا, شيلو بى دوبيتو شيلو وشيل معاهو الفى عينينا.

سألنى صديقى / محمد الشيخ


- ما بك أراك شارداً ..؟

_ والله يااخ انا ما عارف الحاصل ليّ شنو ...






رد بإختصار ..
لأنك بتقرأ المنبر


( دا كان فى زمن قبل الآن )
فعلاً لما تقرأتبدأ تفكر جاد فى أن تتطهر من جديد ..

عبد الله داش

السلام عليك وعلى عباد الله الشاردين..

تعرف حكاية المنبر فى كثير من الأحيان كشرب فنجان (بركة) من جبنة ضحوية..

الفنجان قوامه موية مع بقايا بن على طرف الشرقرق مكسورة بى كاس ثرثرة من أجل إستهلاك الوقت..

أو فى بعض المرات كمن يتغدون بمكرونة (بشملة) بالفرن ويشرحون مشكلة الجوع فى دارفور بالشوكة والسكين ويحلونها بكريم كرملة لزوم الحزن النبيل.

Quote: ياربى يكون الحاصل شنو؟

اخونا بله

خشينا نقول صباح الخير ونشوف الحاصل شنو .....

ما قلت إلا الحق ...
حالي كحال ستات الشاي المسكينات المغلوبات على أمرهن
حينما يجلس إليهن من يتحاورون في حديث ليس لهن فيه
باع أو صيبة يقولن مجاملة : ( أنا ذّاتي قلت كدة ) ..

Quote: أتصفح (المتواجدون الآن)

كدي اكون لميت لي في زول نستقطبو لجمعينا بتاعت ( البحلقة في المتواجدين)
تصدق لمن شكيت انه الحركة دي مصنفة جندرياًعند ناس شمال ووسط السودان انها حركة خاصة بالنساء

قاتل الله الملل يااخي
لم استطع المواصلة في موضوع تصويب الجندر بسببه
شاكرة لك مداخلاتك الثرة هناك

ودي وعميق تقديري

..
..

عبدالله داش .. انتو ركبتو ( كونديشن ) ولا الحاصل شنو ..!!

..
..

علي العموم .. مبروك ( البوهية ) الجديدة ..!!

د. بله سعيدة أيامك
ياخ والله ليك وحشة وكمية من الأشواق ..
كن دوماً بخير.

يا بلة انت مالك بقيت مسكين وطيب كدا؟

Quote: يا بلة انت مالك بقيت مسكين وطيب كدا؟

أساسى

بنتعلم من الأيام..

زهير صديق

ولو كان البحر مدادا لسلامى لنفذ البحر.

شوق ياجميل لو الشجر أقلام جميع والنيل مداد لايستطيع كتابته.

كيفك يارفيق الغربة وأسافير الملل.

حميدة

كيف أحوالك

الواحد يقابلك بشوال تمر لزوم المعادلة وكدا.

بتذكرنى زول كان عزيز على فى البالتوك كان النكنيم بتاو ( حمدان قوم جيب شاى).

دا كان زمن الزميل دنق كان بجيب لينا الأخبار من خشم كونداليزا رايس لأضانو لأضانا.

الجندرية ياقايدة الأسطول

تعرفى المنبر دا حقرتو فينا لقانا دايخين من ضربات الغربة..

فى عز الترنح يدك تلامس الكيبورد تشخبت سطرين والباقى يتمو القلق والملاواة..
وتلقى شوية حروف إتشتتت من خرتاية الذاكرة..

المشكلة المنبر أصبح نادينا وبوفيهو مقفل من عدم السكر..
غصبا عنك تجيهو وانت عارف أنك حاتقوم منو خرمان.

يخيل لى مواظبة النظر للمتواجدين الآن بتدى الواحد إحساس أنو مازال فى هذه المصحة نزلاء يمكن مسامرتهم.

ربنايكفينا واياكم شر وحشة السجن الإختيارى.

سمية الحسن طلحة

بت شيوخ البطانة

سلامى ليك مطر شولة

الحكاية ومافيها يا سلطانة لقيت نفسى زى الحمار الوتدو سودانيزاونلاين وحبلو قصير.

ألف واعاين فى الوتد لحدى ما الوتد صار جبل تلتو فوق وش الأرض وتلتين فى باطنها وأنا فى مشهد نموه يميد رأسى ولا رواسى له.

ناهد بشير الطيب

تحياتى

تعرفى لما شفت إسمك تذكرت كتاباتك فى جريدة الخرطوم فى بداية التسعينات..

دا طبعا لو ماكان تشابه فى الإسم الأول والتانى والتالت..

بعدين لو ماكان تشابه أسماء
حا أقول ليك ذكرتينى مدينة جدة والباشمهندس هشام وأبوتة (الله يرحمه)..
بل واتذكرت يوم كانوا جاينكم لحضور عيد ميلاد طفلك أو طفلتك..

وانت رغم أنك صحفية مخضرمة لكن أظن أن عودك مازال أخضر وطرى بهذا المنبر ولاأظن لحق بك الملل بعد.

ياريت لو تتحفينا ببوست عن المفكر بشير الطيب وعن حياته العطبراوية.

والله يا بله انت ذاتك بقيت ما ياهو
سنة الفين وستة كتاباتك كانت زى البركاوى طاعم ومغذي
دوبيتك وأشعارك وجلسات قهوتك مع الطيب البشير وهباني وواحدين تانيين
ياخى أسلوب معارضتك ساااااااى كان بيحبب الموالى المعارضة
عليك الله اطلع من الاحباط الانت عايش فيهو وارجع بلة الفين وستة


مودتى

Quote: صرت أصاب بملل

يا بكري عليك الله فك ليهو تجتوج عشان الملل يفارقو ..

يا ود موسى... تحياتي
المشكلة انو البينزل بوست يصنقر يحرسو.. علقو عليه ولا لسع ويا ربي الحكاية شنو
يعني ممكن يجلس 10 ساعات قدام الشاشة وهو منتظر التعليقات دون ان ينظر للمواضيع الموجودة
بالبورد..اها كلو واحد حارس بوستيهو ومصنقر.. لازم الحكاية تبقى هيككككككككككك

جيمس ازيك

اساسي... اخونا زماااان
ليك وحشة والله
اخبار التيمس

بله موسى كيف حالك

نعم إنه نقل ومرس ودلك بموالاه... وذاك ضرب من الكتابه كذلك ويا رعاك الله الذى ينعى خدرا بالضروره أن يكون فاعلا مرفوعا برفعة رافعه....وأشكرك على أن تنفست نفسك ذات صفاء ذلك الصدق...ولك الود والسلام والكتابه قاعده لليوم الأسود....وبعض المواضيع تشجيك وتود أن يشاركك فيها الآخره كقول علماء الطعام بعد أن تعجز أسنانهم عن المضغ....عليك الله أكل دى....وحميع من أنقل لهم أعزاء وأصدقاء أقدمهم ولا أتقدمهم............




تحياتى لكم وإن عدتم بخير عدنا بخير أكثر منه


منصور

منصور المنصور

كيفك يامفتاح الخير

يابياك الله الجملة بضبانتا (لاينعى أحدا فنانا)..

أدركتها بعد البث المباشر ولكن لكراهتى (لعدل بواسطةفلان بتاريخ كذا) جعلتنى أتجاهلها لأطمئن على أن منصور قد قرأ الموضوع كاملا.

أما

Quote: ينعى خدرا

التى أوردتها فقد لاحقت كتف الشيخ بكتف الحوار إذ أننى أخطأت فى الرفع وأنت أخطأت فى الموت.

أما عضم الكلام فهو أن الكتابة لديك تختلف عن النقل تكنيكا وتقنية. فكان كلامى فى سياق الخشية من أن يكون قد أصابك إحباط رأيت أن الزراعة فى هذا المنبر لاتشترى ثمن السلوكة وأنت تزرعها بالميكنة. لذا آثرت مايعجبك من مواضيع تظللها ثم تعالجها بكلك نقل ثم كلك غرس. ويامنبر مادخلك شر.

والقصد مدح بما يشبه الذم تقديره عشم منصوب على سهل الماضى القريب.

ياجيمس

عليك السلام بالتلاتة

يازول الواحد لما يجدع بوست فى المنبر زى الجدع ليهو كيلة فى طاحونة حجرا مشرشر..

تكون حارسو تلقاهو كباهو ليك فى الصفحة التالتة زى ماهو..

تشيل وترفع وتكب ويجيك دراش..

يازول أحسن حاجة تعمل لوبى..

فعنصر المواجبة وشوية دفرة بالمسنجر بتخدم أسأل ناس الرياض..

شعارهم المابجينى فى بوستى ان مات أبوهو مابعزى.

وبوست ببوست والبادى أرحم..

لايحق لعضو أن يترك بوست أخيه فوق ثلاث صفحات, يكتب هذا ويكتب ذاك وخيرهما الذى يبدأ بالمواجبة.

ناس السودان البتواجبو بمداخلة يواجبكم بمداخلة ونص..

Quote: يازول الواحد لما يجدع بوست فى المنبر زى الجدع ليهو كيلة فى طاحونة حجرا مشرشر.. تكون حارسو تلقاهو كباهو ليك فى الصفحة التالتة زى ماهو.. تشيل وترفع وتكب ويجيك دراش..

حلوووو يا بلة وملعوبة

Quote: يازول أحسن حاجة تعمل لوبى.. فعنصر المواجبة وشوية دفرة بالمسنجر بتخدم أسأل ناس الرياض..

بس فكرة المواجبة بتدخلك في مجاملا جوفاء.. نفاق...وبتكون غير عادل
يعني موضوع ما يستحق تلاقيهو في بوز المنتدى..واخر ممتاز تلاقيهو زي ما قلت في الصفحة الرابعة عشر... دفير دفير

Quote: يا بكري عليك الله فك ليهو تجتوج عشان الملل يفارقو ..

أبونون

شكرا

وللرد بقية نخليها فى القفة..

الطاهر ساتى

قوارير محبتى تفوح عليك حتى مطلع الفجر..

وهل للفجر مطلع مع هذا الظلام الحالك..

الطاهر يازول إنت متأكد بتكتب عنى أنا بلة موسى ؟

يازول أنا والله قربت أصدق ولو صدقت تانى مابرضى إلا برئيس تحرير.

وجاء من أقصى المدينة رجل يسعى قال ياقومى أثنوا على الطاهر ساتى.

إن الكيبورد وصاحبه يثنون على الطاهر يأيها الذين قرأوا أثنوا عليه وسلموا تسليما.

زميلي بالمنبر العام د. بلة موسى

تحياتي
لقد لعنت ( ظلام ) المنبر بما هو أهل له .
لكن أين دورك في إيقاد الشموع .؟؟؟

من المآخذ التي تحسب على تفكيرنا النخبوي أننا جميعنا نلعن سلسفيل كل شئ وننتقد القصور في كل شئ دون أن نحدد ما هو دورنا في ذلك الوضع الذي نلعنه أو ذلك القصور الذي ننتقده . ولانقوم أيضاً بمجهود ( عملي ) لتغيير الواقع الذي ننتقده وكأننا بنقدنا الذي قد يكون على درجة عالية من البلاغة قد أدينا ما علينا من واجب وهم ثقيل . للصدق أقول أن هذا الواقع لم يتشكل هنا فكلنا أتينا به من بيئاتنا وأحزابنا دون أن تسعفنا قراءاتنا وغربتنا في أن نطوره إيجاباً . كلنا ننتقد وكلنا ننتظر ( مسيحاً ) يملأ المنبر عدلاً وسلاماً كما ملئ جوراً وظلماً .
الترياق المضاد لكل ( القبح ) الذي ذكرت هو تصدي ذوي المعرفة وأصحاب الجمال للطرح الذي يليق بمكانتهم ويليق برؤيتهم لأسباب تواجدهم هنا . هذا الدور كانت تلعبه بمهارة فائقة أختنا الحبيبة رجاء العباسي قبل أن تأخذها الدنيا في مشاغلها التي لا تخلص .
أنت كذلك د. بلة تستطيع ( إيقاد ) شمعة ، فعندك من الآليات ومن المعرفة ما يمكن أن تحسد عليه . صحيح إنني أختلف معك جذرياً في بعض ما تذهب إليه خاصة أرائك الدينية ( التشكيكية ) . لكنني أيضاً أرى فيك عقلاً أرجو أن يسلمك إلى ما فيه رضا الله ورضا رسوله .

Quote: حا أقول ليك ذكرتينى مدينة جدة والباشمهندس هشام وأبوتة (الله يرحمه)..

يالها من ايام وصحبة طيبة يادكتور

قريبي الذي غادرنا مبكرا ابوتة ومحمد المجذوب والماحي والتيجاني وهشام وكل شلة وكالة (الشحن) واضف اليهم (المزعج) عزمي احمد خليل

سقى الله تلكم الايام

بله... عليك سلام العافيه..

هل أنت بله الذي أعرفه منذ أيام كلية الطب؟؟؟

أذكر جيدا ... أنني توقفت أمامك.. كثيرا وجاذبنا أطراف الحديث.. قليلا.. وكنت انت كما الان تكتب بلغه.. (سمحه) وتحاول انت تصلح حال ما يحدث انذاك بجدران كافتيريا الكليه..!؟؟

أظنهم وقتها لم يفهمك أحد...!

ولا أظنهم فاعلون الان..

ياخ عامل كيف ...انا .. ما زلت أرسم واستمع للعين من الموسيقي ..

ربما لن أتغير .. ابدا.

Quote: ياخ عامل كيف ...انا .. ما زلت أرسم واستمع للعين من الموسيقي .. ربما لن أتغير .. ابدا.

كوجان

يازول هسع أكتب ليك بياتو حرف..

كوجان السلام عليك وعلى شواطينك وملايكتك..

لمن لايعرف دكتور إبراهيم كوجان..

زول فنان بكل جوارحه..

يرسم بسمة الملاك على شفاه الشيطان..

لسانه به لدغة من حداقة الكلام المنقى وسمح..

ياخى سنة 96 جبنا سيرتك فى الرياض مع ناس معتصم باسطة..
لقيت معاهم بابكر إشارات جايى يتعاقد..

باسطة قال لى كوجان فى بريطانيا تابعتنو دستة من بنات الحور, وأضاف أصلو بعرف يضحك البنات.

يازول (عتو) قالوا معاكم وبقى بتاع عصبية ونفسية..

ياخى الواحد إشتهى يجن!

بعدين قالوا إنت بتقطع وترقع فى خلقة ربنا. ياخى لايقة فيك عشان بتقدر ترسم الوجه فى خيالك قبل ماتعمل فيه المشرط.

دم منعم طول الدهور.

كيفك ياحنين

حيدر حسن حكيم المنبر الصادق

تلك الأيام كان درها محبة صافية..

إتصلت يوما ما من خميس مشيط ورد على الماحى ..

فقلت له ممكن أكلم أبوتة..

قال لى أبوتة مات فى حادث مرورى فى الطائف..

قفلت الخط وفتحت كتاب أبوتة الأصيل ولازال مفتوحا..

رحمه الله.

.

عاطف عمر

سلام فى الزاوية البعيدة للأخوة والتى أفرضها من جانبى عليك..

لأن هناك من تتمنى أخوتهم ومن تتمنى أخوتهن وأحيانا تتشبث بالكاف والنون ليكونوا ويكن..

تعرف ياعاطف لقد أيقنت بأن المنبر ليس المكان الصالح لنقاش قضايا دينية صارخة الخلاف..

كما أيقنت بأن معرفة الخالق (بعد القراءة) بالإيمان أولا ثم العقل ثانيا..
لازلت أقرأ فى كل فسحة وقت ودعائى الوحيد هو أن أعرف الحق..

ودائما ما أسأل الرب أسئلة لها نتوءات وبروز وتضاريس ولم أشعر بأنه تضايق منى لحظة.

دم بصحة وعافية وربنا يقوى إيمانك وثق بأن الخالق يدافع عن مملكته أفضل منى ومنك.

أخي الفاضل بلة...
كيفنك
عساك بخير.
فعلا من الملاحظ إنو المنبر تسوده حالة من الكآبةوالجمود والذي يحاول الكثيرون مشكورون كسره والإنتقال بنا من ذلك العالم الموحش إلي عالم البهجه الفرح....
السؤال هو...
إين ذهبت كل تلك الأقلام والتي كانت الدافع الأساسي لإنضمامنا لهذا البورد العامر بأناس قلما أن يجود الزمان بمثلهم؟؟؟؟
فلنحاول أن نستفز أولئك الأفذاذ لينثروا إبداعاتهم من جديد....
مودتي وتقديري

بله موسى سلام

مزاجك ولا مزاج البوست إتعدل
وأخد طريق غير الدبرسة

بينى وبينك الحالة عامة

فكرة جميلة تطلعونا منها

ويا ريت الرموا طوبتم مره واحدة يدوها محاولة

فى ناس الحال ده سر بالم

نهى

يا الشايلة الحقيبة وبداخلها أدوات تجميل المنبر..

كيف حالك

والله مشكورة كحلتى عيون البوست..

أنتقى من حقيبتك كل الأدوات التى يمكن أن تجملى بها وجه هذا المنبر..

ولكم فى الحقيبة حياة يا أولى الجلباب.

رأفت ميلاد

أبانا الذى فى الأسافير..
بوستنا كفافنا..

سلام الرب عليك..

يارأفت بالمنبر ناس لو خمروا كتابتم(وطبعا بستعمل صيغة المذكر لآدم وضلعو) يسطلوا برنادشو و شكسببر بس المشكلة أنهم بصدروا المريسة ويبيعوا لينا المشك.

غايتو الله يدينا من كرمهم عصير.