يمكن..

Post: #1
Title: يمكن..
Author: تماضر الخنساء حمزه
Date: 04-25-2008, 01:49 PM

أمشي ياحنيّة أمشي
أمشي لي قلبي ورفيقو
كم بشيل من يومي دمعو
وكم بخفّف عنّو ..ضيقو
شوفي بعد الغيبة كيف
سايق القسوة ف..طريقو
امشي ياحنيّة ليهو
طفِّي في الأشواق حريقو
أبقى عادل في قليبك
وأبقى أسأل مين صديقو
ياني متأكّد..جوابك..
ياني.. أسبابو وسريقو
ماقصدو يتعب لي قليبك
أو يسبِّب..ليهو....ضيقو

أمشي ياحنية برضو
حومي في مُرسال بريدو
أمشي ياحنية عندو
أمشي للزول البريدو
يوم قفلت عليهو ..قلبك
ساقت الأشواق ..وريدو
كنت في دنياك لاهي
لاهي عن أحوال نديدو
ليه مُجافي وفي سلامو
خوفي لو بتخاصمو..ايدو
ده النخل قالد سماهو
وفي السلام ..فدَّع..جريدو
وأيه يعني لو يشتاق سلامك
وفيها أيه لو كان تعيدو
عارفو قلبك..مافي..منّو..
وقلبو انت براك وحيدو
فيها أيه لو شخص عادي
شاف هواك أملو وجديدو
انت بس أسأل قليبك..
مين حبيبو..ومين هو..سيدو..
مين بقضي الشوق في حزنو
ويوم تطِل ..ببقالو..عيدو
مين بشوف أفراحو..ضحكك
لو تغيب الهم..يزيدو
وحياة هواك تسأل هواك
مين بسمِّي هواك..شهيدو

أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

Post: #2
Title: Re: يمكن..
Author: عبدالله داش
Date: 04-25-2008, 02:03 PM
Parent: #1

شوفى لى أسباب غيابو
وجيبى لى عذرو وجوابو

فى مسيرك يا الهِبيبْْ
سلميلى على الحبيب

وانا بين ( يمكن )
والممكن والممكن
طفت فى رائعة
الخليل عليه الرحمه

Post: #3
Title: Re: يمكن..
Author: تماضر الخنساء حمزه
Date: 04-25-2008, 02:40 PM
Parent: #2

Quote: شوفى لى أسباب غيابو
وجيبى لى عذرو وجوابو

ماشفنا أعذارو فــ غيابو
احنا عاذرنّو وحبابو

داش نهارك سعيد

Post: #4
Title: Re: يمكن..
Author: لؤى
Date: 04-25-2008, 04:06 PM
Parent: #1

تماضر
إزّيّك

كمّلتي الكلام

حلوة حروفك
فيهم روعة

وفيهم لوعة
ـــــ
أنا في البعيد مشتاق لهمسة من الوطن يا نسمة

Post: #14
Title: Re: يمكن..
Author: تماضر الخنساء حمزه
Date: 04-27-2008, 08:54 AM
Parent: #4

لؤي..وحلوة طلتك

مودتي

Post: #5
Title: Re: يمكن..
Author: هاشم أحمد خلف الله
Date: 04-25-2008, 09:09 PM
Parent: #1

Quote: أمشي ياحنيّة أمشي
أمشي لي قلبي ورفيقو
كم بشيل من يومي دمعو
وكم بخفّف عنّو ..ضيقو
شوفي بعد الغيبة كيف
سايق القسوة ف..طريقو
امشي ياحنيّة ليهو
طفِّي في الأشواق حريقو
أبقى عادل في قليبك
وأبقى أسأل مين صديقو
ياني متأكّد..جوابك..
ياني.. أسبابو وسريقو
ماقصدو يتعب لي قليبك
أو يسبِّب..ليهو....ضيقو

أمشي ياحنية برضو
حومي في مُرسال بريدو
أمشي ياحنية عندو
أمشي للزول البريدو
يوم قفلت عليهو ..قلبك
ساقت الأشواق ..وريدو
كنت في دنياك لاهي
لاهي عن أحوال نديدو
ليه مُجافي وفي سلامو
خوفي لو بتخاصمو..ايدو
ده النخل قالد سماهو
وفي السلام ..فدَّع..جريدو
وأيه يعني لو يشتاق سلامك
وفيها أيه لو كان تعيدو
عارفو قلبك..مافي..منّو..
وقلبو انت براك وحيدو
فيها أيه لو شخص عادي
شاف هواك أملو وجديدو
انت بس أسأل قليبك..
مين حبيبو..ومين هو..سيدو..
مين بقضي الشوق في حزنو
ويوم تطِل ..ببقالو..عيدو
مين بشوف أفراحو..ضحكك
لو تغيب الهم..يزيدو
وحياة هواك تسأل هواك
مين بسمِّي هواك..شهيدو

أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

قولي للحنية شكراً
القليب عارف طريقو
والسؤال مقدور عليهو
اصلو ريدتك من نصيبو
في هواك دائماً معذب
اصلو عارف مين حبيبو
وعارف إنو بغيب وبرجع
حافظ الشوق في وريدو
خلي نار الشوق تأجج
ما هي ظاهرة في لمس إيدو
نوري الساحات محنة
وابقي منو وابقي فيهو

تلقي جنبك كان ضهبتي
وتلقي في عينيك تحدي
وتلقي في جواك ساكن
والفرح في عيونو ببكي
ضمدي الجرح البتاورو
بدموعك كان قِدرتي
خلي فرح الدنيا يبقي
بكلمة منك وتاني تبدي

Post: #15
Title: Re: يمكن..
Author: تماضر الخنساء حمزه
Date: 04-27-2008, 09:17 AM
Parent: #5

Quote: قولي للحنية شكراً
القليب عارف طريقو
والسؤال مقدور عليهو
اصلو ريدتك من نصيبو
في هواك دائماً معذب
اصلو عارف مين حبيبو
وعارف إنو بغيب وبرجع
حافظ الشوق في وريدو
خلي نار الشوق تأجج
ما هي ظاهرة في لمس إيدو
نوري الساحات محنة
وابقي منو وابقي فيهو

القليب غلطان كمان
براو بودِّر في طريقو
بمشي للزول البِكون..
قلبو في إيدين..سريقو
فاكر الريد بي زهورو
لي كل نسيم بطرح..رحيقو؟
القليب بس مالكو واحد
اسمو بطلع في شهيقو
والمحبّة الشايلة رسمو
زايدة في الأشواق حريقو
لو صحيح الريد بيسمو..
أسمى..يحفظ..لي..رفيقو..

Post: #6
Title: Re: يمكن..
Author: Rasha Hatim
Date: 04-25-2008, 10:16 PM
Parent: #1

Quote: أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

تفتكري يمكن؟؟؟؟

انا غايتو بستنى نتيجتك وبعدين بتسلف الوصفة دي منك..
وقالوا السعيد يشوف في اخو

Post: #16
Title: Re: يمكن..
Author: تماضر الخنساء حمزه
Date: 04-27-2008, 09:19 AM
Parent: #6

Quote: وقالوا السعيد يشوف في اخو

كنا متخاصمين والأولاد زايد البتاعة الفوق دي صالحونا على بعض

_
الرد ده خط دفاع وكده

Post: #7
Title: Re: يمكن..
Author: emad altaib
Date: 04-25-2008, 10:40 PM
Parent: #1

ــــــــــــ
راجيكي ديما يالحنية
تزرعي في قلبي العشم
ومن نبضه تدي حبيبو
حسه نشوة ريدة.وهمسو
تلقيهو ساكن في محرابو
الحب روحو خاشع في صلاتو
ابقي المحبة في جبينو
سلمِ باللهفةذاتهاوانينو
يمكن بُعدالمسافه يحننو

اهٍ ياغربة وجعتي فؤادو
هواهوهواياقطاري قطارو
السكة ديماشوق واتعابو
في لحظة وِقِفْ صنفورخيالو
يحكي الذكري دعاش وامطارو

إتشابت الحنية وجاتو
بعد ماشربت الصبرذاتو
سايقه القمره اللي قدرو
تمشي حافية علي دربو
وجضة ريدي حبيبك عاد وحاتو

تماضر النجمة دي هدية ليك مني ..

Post: #17
Title: Re: يمكن..
Author: تماضر الخنساء حمزه
Date: 04-27-2008, 09:22 AM
Parent: #7

Quote: هواهوهواياقطاري قطارو

وكت ركبتو نفس القطر بتتلاقو

شكرا على النجمة
لونا سمح

Post: #8
Title: Re: يمكن..
Author: ismeil abbas
Date: 04-26-2008, 05:49 PM
Parent: #1

Quote: أمشي ياحنية ليهو
شيلي أفراحك..هديّة..

تهادو تحابو

حتى لو بالفرح..

وألأبتسامة صدقة..

بداوى الجرح..

أختنا تماضر ..
ما طولتى الغياب..ما هى الأسباب..؟

دا موفور مودة وحبة عتاب.

إسماعيل محمد احمد عباس...

Post: #18
Title: Re: يمكن..
Author: تماضر الخنساء حمزه
Date: 04-27-2008, 09:25 AM
Parent: #8

Quote: ما طولتى الغياب..ما هى الأسباب..؟

سماعين
سلامات وتحيّات كتيرات
أنا موجودة وشايفاك من سويسرا لي المدام والولد اللمّاح ماشاءالله و....البلوتوث

مودتي التي تعلم

Post: #9
Title: Re: يمكن..
Author: Alsa7afa_30
Date: 04-26-2008, 09:39 PM
Parent: #1

Post: #10
Title: Re: يمكن..
Author: mohmed khalail
Date: 04-27-2008, 04:49 AM
Parent: #9

Quote: أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

عودي يا حنية ليها
للبنية الســمهرية
وردي ليها الشوق مضاعف
وبرضو مليارات تحية
وقولي ليها ما نسيناك
بس ظروفنا قست شوية
فليه تشككي في المودة
خلي عندك حسن نية

Post: #20
Title: Re: يمكن..
Author: تماضر الخنساء حمزه
Date: 04-27-2008, 09:43 AM
Parent: #10

حسام..الصحافة
غايتو قدر ماحاولت أرد عليك تحت مداخلتك ماقدرت شكلو الأغنية فيها مشكلة..
شكرا كتير على : فيها أيه؟؟

Quote: عودي يا حنية ليها
للبنية الســمهرية
وردي ليها الشوق مضاعف
وبرضو مليارات تحية
وقولي ليها ما نسيناك
بس ظروفنا قست شوية
فليه تشككي في المودة
خلي عندك حسن نية

ماجاتني منّك أي تحيّة
لاسلاماتك بتوصل
لا الصباحات النديّة
يمكن الحنية فاتت
لي زول سواي ..وما إليّ؟؟
ولو ظروفك قاسية انت
أقسى الغياب طبعاً عليّ
أبقى واصل وماتغيب
ياخي واصل لو شويّة

Post: #11
Title: Re: يمكن..
Author: ناهد بشير الطيب
Date: 04-27-2008, 04:55 AM
Parent: #1

Quote: شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

تماضر اختنا الخنساء
صباح الخير

كميات من الشوق والمحبه وكم تحية كده صباحيه
وانشاءالله شوقك وشوقنا يذيد كمان وكمان

كمين تحيه

Post: #12
Title: Re: يمكن..
Author: ابوبكر يوسف إبراهيم
Date: 04-27-2008, 05:27 AM
Parent: #11

أمشي ياحنية ليهو
شيلي أفراحك..هديّة..
لو جفاو صدّاك..تاني..
أبقي أرمي اللوم..عليَّ
ودِّي ليهو سلام محنّة..
ومامهم مردودو ليَّ
شيلي ليهو الشوق محبّة
منِّي ليو كمّين تحيّة..
أمشي ياحنيّة يمكن..
شوقو يزداد..لو..شويّة..

الأخت الحبيبة الرقيقة
تماضر الخنساء

سلام على روحك الطيبة

يستشف أفق التلقي أن الرمز يغوص في كينونة الانوات المتحركة تحت الفضاء تخلق رؤية توحد (الانا) مع رمزها جميعا فمن المفاصل الرئيسة للسردية نتستشف أفق التلقي بأن الرمز يغوص في كينونة الانوات المتحركة تحت الفضاء إلى أكثر حركات النفس بدائية ويلامس بذلك الوتر المشترك بين المبدع والمتلقي وكأن المتلقي تشمم عبير عطر هبت به نسائم الغروب ، وقال في نفسه هذا عطر القادم من بوح المبدعة الدفيق فالكل يتحدث عنه .. أختي لك الورد عقد والياسمين سوار لك ..والشمس تاج لك وكل النجوم التي في المدار طالما كان هذا بوحك الذي يضيء عوالم الوجدان يا جنية من عبقر. مودتي

Post: #22
Title: Re: يمكن..
Author: تماضر الخنساء حمزه
Date: 04-27-2008, 09:46 AM
Parent: #12

أبوبكر العريس..السمح

شكرا للكلمات الطيبات الجايات منك

مودتي

Post: #21
Title: Re: يمكن..
Author: تماضر الخنساء حمزه
Date: 04-27-2008, 09:45 AM
Parent: #11

ناهد
ليك أحلى تحيّة
وشوق فاضح ومامكتوم

Post: #13
Title: Re: يمكن..
Author: عمر الفاروق
Date: 04-27-2008, 06:31 AM
Parent: #1

Quote: يمكن..

يا ربي؟

Post: #23
Title: Re: يمكن..
Author: تماضر الخنساء حمزه
Date: 04-27-2008, 09:48 AM
Parent: #13

اللابس البمبي

Quote: يا ربي؟

بما انو السؤال ماموجّه ليّ
فننتظر الاجابة سوا

Post: #19
Title: Re: يمكن..
Author: محمد عثمان
Date: 04-27-2008, 09:29 AM
Parent: #1

شووووووف ..

عجائب الدنيا كيف.. و كيف بقينا بنحملهاا
بى اوامر الشوق رضينا.. و اصلو لاازم نقبلهاا
سوقى.. يا حنية سوقى ..
سوى ذي ما تسوى فوقى
امشى يا سكتنا عدى
اصلو مابى الشوق يهدى..!!!

نحنا عشانك يا محنة .. نرضى مجبورين نطاااوعك
و نفرش الازهار دروبك ..
و المصير رضيااان يبايعك
و أى سكة نواصلهاا
لما بكرة نحصلهاا

يلا روح يا شوقنا عدى..
روح مكان ما تهدى .. هدى..!!!

Post: #24
Title: Re: يمكن..
Author: تماضر الخنساء حمزه
Date: 04-27-2008, 09:53 AM
Parent: #19

Quote: يلا روح يا شوقنا عدى..
روح مكان ما تهدى .. هدى..!!!

انت ماملزمني حدي
بس
تشيل
فوقي
وتودِّي

ماكفاية الغيبة ديييك؟؟ الفيها كمّلت الخطاوي
وللدروب الطايلة ديك أصلي عاد ماكنت ..ناااوي
ده
المقدّر
مابي إيديّ
أصلو..كان..مكتوب..عليّ..
بمشي خلفك ياارادة
بس..
مكان..
ماتودِّي...ودِّي..

Post: #25
Title: Re: يمكن..
Author: Safia Mohamed
Date: 04-27-2008, 10:00 AM
Parent: #1

استاذة تماضر ازيك
اظني دخلت بالغلط لقيت ليك الكلام كلو كبار كبار
بنفهموا
ونحسوا
لكن ما بنقدر نجاريه
لك التحية
وانت
تملاينا فرحا
شكرا ليك ولكل من زاد مساحات الفرح جوانا

غايتو بس فريجة ساي معليش ياها قسمتنا القسمة لينا الله

ام محمد

Post: #27
Title: Re: يمكن..
Author: تماضر الخنساء حمزه
Date: 04-27-2008, 10:26 AM
Parent: #25

صافية نهارك سعيد

كان خشيتي غلط بكون ده أجمل صاح حصل لينا
خشي ساي نحنا زيّك ماناس الكلام الكبير

مودتي

Post: #26
Title: Re: يمكن..
Author: Tareq Siddiq
Date: 04-27-2008, 10:14 AM
Parent: #1

Quote: مين بقضي الشوق في حزنو
ويوم تطِل ..ببقالو..عيدو
مين بشوف أفراحو..ضحكك
لو تغيب الهم..يزيدو
وحياة هواك تسأل هواك
مين بسمِّي هواك..شهيدو

تماضر الخنساء

السهل الممتنع جداً بل المستعصي على السهولة .. لكنه ينسكب فينا طااااااااائعاً رقراقا ...!!

مودتي ...!!

Post: #28
Title: Re: يمكن..
Author: تماضر الخنساء حمزه
Date: 04-27-2008, 10:27 AM
Parent: #26

طارق
والكلمات البتمشي على النمارق

أسعدني احساسك كل الود

Post: #29
Title: Re: يمكن..
Author: Salah Waspa
Date: 04-27-2008, 10:56 AM
Parent: #28

متاضر ( عارفها غلط وكلو منك )

ممكن ألحن ?

روووعة !!

تحياتي لبنياتي السمحات ديل

صلاح

Post: #31
Title: Re: يمكن..
Author: تماضر الخنساء حمزه
Date: 04-27-2008, 01:27 PM
Parent: #29

صلاح انت لسه معلّق مع الميم؟؟ وزووول برييدك زيي مااافي

انت قول ساي بدون تلحن
الكلام برااو بجينا ملحن ومُغنّى
شفت الحنك ده كيف؟

Quote: تحياتي لبنياتي السمحات ديل

ديل ولد وبنوتة وتحيّاتك وصلت
انت برضك وصل تحياتي للبنيات الحداك

كل الود

Post: #30
Title: Re: يمكن..
Author: حسين محي الدين
Date: 04-27-2008, 11:06 AM
Parent: #1

مزيكا!!!!
تماضر
طولنا ما غنواتك الحلوة

فشكرا جميلا

Post: #32
Title: Re: يمكن..
Author: تماضر الخنساء حمزه
Date: 04-27-2008, 01:33 PM
Parent: #30

حسين شكرا على القراءة والطلّة

كل الود

Post: #33
Title: Re: يمكن..
Author: Salah Waspa
Date: 04-27-2008, 01:49 PM
Parent: #32

Quote: ديل ولد وبنوتة وتحيّاتك وصلت

لكن يا تماضر ماااإتلومت مع صحبي دا

حسي أسوي شنو أوعى يكون ميني بوردابي ويقرأ كلامي

وكان ما قراه أووووعي تبقي قوالة وتبوظي علاقتي بالزول ده .

ربنا يحفظهم ياخ وعينا باردة

Post: #34
Title: Re: يمكن..
Author: تماضر الخنساء حمزه
Date: 04-27-2008, 02:17 PM
Parent: #33

ده ود طاعم مابزعل
زي أمو

Post: #35
Title: Re: يمكن..
Author: Salah Waspa
Date: 04-27-2008, 02:40 PM
Parent: #34

Quote: زي أمو

بلاهي شوف دي !! ماصدقت

في جاه الملوك .. يلا مضطرين نسكت بس رشوة وكده يعني

ما ماسكه علينا زلة .. لو لخبتنا معاك حتوري صاحبي مداخلتي (ضاحك)

في إنتظار مزيد من الإبداع keep it up

صلاح

Post: #36
Title: Re: يمكن..
Author: تماضر الخنساء حمزه
Date: 04-27-2008, 06:47 PM
Parent: #35

Quote: في جاه الملوك

ملوك الشويّة دي؟؟

صلِّي عالنبي بس

فرصة الواحد يقشر بي أولادو

Post: #37
Title: Re: يمكن..
Author: mohmed khalail
Date: 04-27-2008, 07:57 PM
Parent: #36

Quote: فرصة الواحد يقشر بي أولادو

واللسه ما عندو يقشر بي شنو ؟؟؟؟؟

Post: #38
Title: Re: يمكن..
Author: تماضر الخنساء حمزه
Date: 04-27-2008, 09:00 PM
Parent: #37

Quote: واللسه ما عندو يقشر بي شنو ؟؟؟؟؟

بي صور أولاد معارفو
صُدق لك بواحد صورة قشرة من صور البرنس الفوق ده

ربي يديك زيّو قول يامين!

Post: #39
Title: Re: يمكن..
Author: Salah Waspa
Date: 04-29-2008, 06:27 AM
Parent: #38

Quote: ملوك الشويّة دي؟؟

بالله الفردة ياخد في الشبال بجاي وأنا ماعارف ?

من أمبارح مادخلت النت وفاتني أشوف الرطاني ده على الهواء

تبارك الله وحصوة كبيييرة في عين الما يصلي على النبي

قولي ليهو خالو صلاح قال ليك عندي من الخمسة بنات إتنين مقاساتهم

بتجي عليك ولا يهمك نقي بس .