السلام عليكم

الإخوة والأخوات
السلام عليكم ورحمة الله وبركاته
يشرفني الانتماء لهذا الصرح العالي ، والذي بجهودكم مجتمعة أصبح في صدارة المواقع الهادفة ، وذا رسالة سامية .
أنتم كالمعلمين ، ونحن القادمين الجدد نستقي من خبراتكم قبل أن نجود بما لدينا.
لذا تجدني أحني هامتي تقديراً لكم جميعاً.
أتقدم بجزيل الشكر لصاحب الموقع لسماحه لي بالتواجد بينكم ، و لا أنسي الأستاذ الجليل عبد اللطيف بكري لوقفته ودعمي بلا حدود ، مع تقديري لكل من أيد طلب عضويتي.
أعتذر عن الإطالة ، وأسأل الله للجميع التوفيق.
عمار الضو

و عليكم السلام
اتفضل

مشكور أخي عثمان .
وإنشاء الله نكون خفيفين على الكل .
لك مني كل التقدير .

وعليكم السلام يا الضو
ابقا لا جوه

كتر خيرك يا دفعة .
شكراً كتير على الترحيب .

مرحبا بالاخ الكريم عمار الضو اخا كريما بيننا في سودانيزاون لاين ..

اخي عبد اللطيف حمد لله على سلامة وصول الراجل بعد تكبدكم المشاق ..

شكرا اخي بكري ابوبكر ...


ود الباوقة

حياك الله أخي ود الباوقة
شاكرين ترحيبكم ، ودعمكم من قبل.
لك مني كل تقدير .

مليون مرحب اخى الكريم الدار دارك

اقامة طيبه


تحياتى لك

مليون شكراً أخي الكريم .
حتماً سيطيب لي البقاء بينكم أيها الأشاوس .
تحياتي .

حبابك عمار
وعليكم السلام ورحمة الله وبركاته

شكراً يا بلة .
وربنا يخلي ليك الحلوين ويحفظهم .
مع مودتي .

سيناريو الترحيب بالسيد عمار
- مرحب السلام جيتا جيت قوم ياولد أضبح التور داك
( يقوم الولد ويضبح التور ضبحت ضبحبت ضبحت)
- تعال سا شيخ عمار أقعد فوق العنقريب
( يجلس شيخ عمار)
- هها من وين يا أخوى
شيخ عمار- من السودان
أنا- لا يعنى بقول من الاهل منينك
شيخ عمار - من أهل السودان
( اللحمة تنجض ، قدح كبير مليان لحمه ومنصاص)
أنا- الا يا شيخ عمار بدور بسعلك سؤال
شيخ عمار- أسأل يا شيخ قور
أنا- الحيكومة شن قولك فيها
شيخ عمار- ( بذعر ) الكترابه ...يا زول أنا مانى سايسشى ولا بفهم فى السياسة
أنا - يا زول السياسة دى كمان دايره ليها فهم ...ما زى ضبح التور ...كمان ضبيحت التور دايره ليها فهم
شيخ عمار - ( يتململ) والله يا شيخنا أنا موضوع السياسة دا ما عندى فيهو راى أخير وأحسن نغير الموضوع
أنا - ( أضع عضم كبير بطرف الصحن ) يا زول خلاص .شن قولك فى التعداد السكانى
شيخ عمار- (يتلفت يمين وشمال ينهر القطة التى بدأت تتمسح برجله)

عليك الله يا شيخ قور عرفت كيف أنا والسياسة ما بنتلم ؟
ما بريدة لوجه الله ، ولا أحب تعاطيها .
لكن والله التلفت دا بس ما معانا .
أفو


شكرأ على الضبيحة ، والكرم السوداني الأصيل.
وعلى الترحيب الكبير .
وإنشاء الله تزورنا ونقوم بالواجب.
فتك بعافية.



قبل ما أنسى ، كديستكم دي بتاكل باسطة ؟

دى كديسة كدارتى لمست رجلك

تضبحوا لينا وتشلتونا ؟؟

يا سلااااااااااااام ياخ

عمار جا يا عبد اللطيف


بس شان تعرف نحن ناس بركة وكدا

بعد دا حنعمل رسوم على التذكية والحاجات دي

آمال إيه



وأجمل حاجة
بعد دا حنقول (بورداب كينيا)


يا زول حبـــ 1000 ــابك

يا سلام عليك انت يا ود الصايم
إنت فعلاً راجل بركة ، والريس كمان ما قصر .
يديكم ألف عافية.
شكراً على الترحيب .

مرحب بك عمار الضو..

تسلمي يا أستاذة منى ، وشكراً على الترحيب
تحياتي

هلا عمار والف مرحب
شرفت المكان نورت

ود البشرى يا ملك
حياك الله وأبقاك.
الدار منورة بوجودكم .
عاطر التحايا

الاخ عماار..

الف مرحب..

نتمنى ليك اقاامة طيبة
فى هذا الحوش الكبير..

ـــــــــــــ
مرحباً بك ياعمار

حللت اهلاً ونزلت سهلا

ان شاء الله يطيب لك

المقام بين اخواتك /واخوانك

لك العافية

الإخوة الأماجد
محمد عثماان
عماد الطيب
شكراً على دفء الترحاب
والحوش حوشنا كلنا
مع صادق مودتي

العزيز عمار ،،
لك التحايا ،،
أفرحني تواجدك جدا بيننا ،، أسأل الله أن يكون
البورد لك بمثابة إتكاءة جميلة ترتاح فيها من
عناء التسفار والركض خلف المعايش القاسية وتفيد
الجميع هنا بما لملمت من خبارات عاتية من هذه
الإسفار،،

الشكر للريس بكري ونعتذر له على قسوتنا في المطالبة
والشكر للفرد والكرادة الذين دعموا وإستخدموا كل نفوذهم
في أن يرى باسوريدك النور،،

كما همست في إذنك أن تخاف الله فيما تكتب ، ماعدا ذلك
فلك السراح والبراح ودونك الدواية التي تنضب،،

مرحبا عمار ،، وألف مرحب،،

أستاذي الجليل عبداللطيف بكري

حمدأ لله على السلامة ، وإن شاء الله رحلة موفقة.

لا أجد من الكلمات ما أعبر به عن شكري لك ، وبالغ تقديري لوقوفك معي.

وكذلك جميع الأخوان الذين أتمنى أن أكون عند حسن ظنهم بي.

وصيتك على العين والرأس ، وعلى دربكم نسير.

أصدق التمنيات ..

يا هلا بعمار ابن ياسر
مرحب بيك يا عمار الف مرحب ومنتظرين ابداعاتك وتواجدك بيننا اكيد
حيثرى البورد بالمفيد والطيب باذن الله تعالى .
تحياتى ليك عمار
ام وضاح

التحية ليك يا أم وضاح

وشكراً على الترحيب الحار .

وإن شاء الله نفيد ونستفيد ، وبكم نقتدي .


تحياتي