رشوا الحيشان وختوا التلفزيون فى السهلة

عصام عبد الحفيظ ازيك اخبارك شنو.كلامك تمام بلو بلو لم تكن جميلة فقط كانت جميلة صوت وصورة .
يؤسفنى انو السودانيين ديل لا بعجبهم العجب ولا يحزنون بعدين حنان دى زولة بتاعة غنا بس لا ليها فى الحوارات ولا كلامات ناس نحن نعتقد وزى انو وكما نظن. هى زولة بسيطة لادارسة ولا متفلسفة لا متعالية ولا مدعية. ولا بتاعت منابر . عرفها الشعب السودانى منذ كانت طفلة واحبها الناس وهى بتغنى حمادة دة وحب العنب وود الغرب.والله العظيم الكلمتين القالتهم فى اغنية ود الغرب كانوا عندى احلى من الف خطبة سمعتها عن ناس الغرب ودايرين سلام لناس الغرب كانت اصدق واحلى من الف مرة قيلت فيها هذه الكلمة بالكضب والنفاق.
نحن دايرين بلو بلو زى ما عرفناها ما مطلوب منها تغير وضع الاغنية السودانية بتاعت البنات.اليغيروها ناس الكليات الدارسين. حنان فنانة فنانة واقول ليك سر كل السودان كان منتظر يشوفها يوم الجمعة دة فى ناس رشوا حيشانهم ومرقوا سرايرهم وختوا التلفزيون فى السهلة عشان يشوفوا السهرة بى مزااااج وقد كان طلتها فقط اعادت الكثيرين الى اكثر من 17 سنة لى ورا والكل انتظرها بشوق ربما ليس لشخصها ولكن لتاريخ قديم وحقبة تحن اليها القلوب.
وحنان راقصة فنانة الى الان لا يوجد مثيلها.
عليكم الله ريحونا شوية من كلامات التنظير والفلسفة والخستكة بتاعة ناس الكتب دى شوية.