أنا استمع ل "على السقيد"، إذن أنا موجود

واحد من أقوى أسباب تجميل الحياة

واحد من أهم معينات تكريس الوجود

غايتو حاج "ديكارت" ما حضر زمنه ساى

مساحة ما عندها حدود من التطريب

فى صوت على السقيد

إختيارات بديعة ورصينة ومعبرة للنصوص

أداء لا يأتيه الخلل، لا من خلفه ولا من أمامه

وعى ومعرفة وتأهيل موسيقى

وقبل ده كله

الموهبة الأصيلة والجميلة

شكرا يا على على تجميل حياتنا

Quote: الموهبة الأصيلة والجميلة

العزيز أبوذر

أصيل بأستماعك لأصيل

أخوي علي نعمة موسيقية وأديب ننهل من عبقه الطيب

حسن المعشر مثقف واسع الأطلاع... تسعد بحديثه ويطربك غنائه



لك مني مودة خاصة

عزيزى محمد خليفة

تحياتى

فعلا على السقيد نعمة من الخالق

وأتمنى إنه يستقر فى البلد عشان نسعد بيهو زيادة

وأكيد حنسعد ويزداد جمال الدنيا بيهو

وليك هميم المعزة وعميم التقدير

العزيز محمد عثمان

السلام عليك يا روح النغم

يا دوحة الفن

يا بلسم الألم

شكرا ليك قدر معزتنا وريدتنا ليك

زينت لينا الفجة بالشدو العلوى المكين

زين الخالق ايامك

Quote: مساحة ما عندها حدود من التطريب فى صوت على السقيد إختيارات بديعة ورصينة ومعبرة للنصوص أداء لا يأتيه الخلل، لا من خلفه ولا من أمامه وعى ومعرفة وتأهيل موسيقى وقبل ده كله الموهبة الأصيلة والجميلة شكرا يا على على تجميل حياتنا

صدقت اخ أبو ذر..

حضورك أصدق إنباءا والله يا محمد

بس عندو عيبين :
بدلتو الحمرا ..
وفي كل لقاء بيغني عديلة وزين ..

يا فاروق يا حبيبنا

كيفك

هسه لو جينا قلنا ليكم

فنلات "فتوات" الأولد ترافورد الحمرا دى ما سمحة

تقومو تشاكلونا


ياخ البدلة الحمراء دى بس عشان الأتراكشن

ما شفت زمان عمك "جيمس بروان" بجى قاشر بيها كيف

بعدين على طوالى بغنى عديلة وزين

عشان هو دائما بكون عايز

يزح الوجع المالينا ومتحدينا

شكرا ليك يا زين

الاخ ابوذر تحية طيبة
اعدت لي الذكريات مع ابن الجيران والدراسة علي السقيد --- بداء علي العزف علي العود في المرحلة المتوسطة هو و شقيقة الاكبر الخير وسبفهما شقيقهم الاكبر صلاح السقيد-- في الاجازة المدرسة الصيفة كنا نجتمع في منزلهم بعد دافوري الصباح -- لاازال اتذكر جيدا كيف كان يردد اغنية زيدان ( معذرة ) وكيف كان يجيدها وخاصةهي من اصعب الاغاني في ذلك الوقت-- في احد زيارة المسيقار بشير عباس لكويت في الثمنيات كان بضيافتنا بالسكن--- كان لدي شريط لعلي السقيد يغني اغنية الذكريات لعثمان الشفيع -- كانت هذه اول مره يسمع المسيقار بشير عباس لعلي السقيد -- قال لي المسيقار بشير عباس وهو في قمة طربه بان علي السقيد غنى اغنية الذكريات احسن من عثمان الشفيع--

من الاشياء التي لا يعرفهاالناس عن الاستاذ علي السقيد بانه فنان كذلك في الكفر --- علي السقيد تستمع له هو يستلم الكرة ويراوغ بها او يرسل لك باص قاتل كان ملك الوسط لفريق العاصفة برواط المزاد

التحية أولا لسيد البوست الأخ أبو ذر المترجم الفنان.

وعبره إلى الفاتح يوسف العبيد ودالعمه العزيزة فاطنه.

تداعي ذكرياتك عن علي السقيد أعاد لي ذكريات حبيبه

للنفس .كنا صغارا نأتي لمدني في العطلة وكأننا من

فرحنا ذاهبون إلى باريس(عرب الحاج عبد الله). ..الله

الله..ياتوحه ../ ماأجمل تلك الأيام. مدني المزاد وشندي

فوق والسوق الصغير والدرجه وأم سويقو والدباغه وسينما

الخواجه وغابة ام بارونا .وغير ه من أماكن أثيرة في مدني السني.

أكتب يااخي عن المنتزهه وعجاجة الدافوري القايمه صباح

وعصر في اجازات الخريف. عن فرق العاصفه والدفاع وفسيخه

الخرخار.عن مراد وسنهوري وصلاح وكمال الطيب اكتب عن أولاد كشك.

عن مصطفى درش والخير وكمال ارباب.عن شمعون وصديق الترزي.عن

استديو كمال واوبرج الزيزفون.عن أشهر فوال وحلواني في مدني .

عن العدني وخلفياته الإصطناعية للنساء.

اكتب عن الهواره وعن المؤتمر ونشيدها للعلا ..للعلا وابعثوا

مجدنا الآفلا.اكتب واكتب حتى تتكسر االريشات وتجف الأقلام.

مدني ليست مدينتي لكنها في القلب والخاطر.

واعذرني يااباذر لهذه التخريمه بالبوست فقد كان مفتاحها

الحبيب علي السقيد.وبالمناسبه كان يلقب بشيخ علي. تيمنا

بالشيخ علي عبدالرحمن زعيم حزب الشعب الديمقراطي.

والتحيه للشيخ علي عبد الرحمن السقيد، وهذا اسمه الحقيقي،

زعيم حزب الطرب الجميل . مع مودتي للجميع.

تحياتى يا صلاح وكيف الحال

مدنى قبلة الأهل وبوتقة الناس الطيبين من كل جهات الوطن العزيز

وأكيد على السقيد بفتح مداخل بهيجة لود مدنى وأهلها المبدعين

حتى الناس العاديين فى مدنى تلقاهم مبدعين

أمنياتنا "للشيخ على" بالعافية والسعادة وطيب الأيام

والمزيد من التجلى والإبداع

عزيزى الفاتح

كيف الحال

ود مدنى منجم الفن السمح وموطن بساتين الطرب

من ايام الشبلى والمساح وعوض الجاك والكاشف

مرورا برمضان حسن والخير عثمان ورمضان زايد

ووصلا لعركى وابو اللمين

ود أزرق والدباغة كان ليهم القدح المعلا طبعا

على المساح كان بجى من دردق وجزيرة الفيل لى ود ازرق

وحسب ما سمعت إنه كان بقعد فى ضل قريب من دكان "ود الجندارة" فى شارع سنكات جبرونا

قريب من بيت ناس عمك "النو" أبو عثمان وصديفنا "الدحيم" أخو عثمان الصغير

وهناك يتلم معاهو الشبلى والكاشف

وعلى السقيد نتاج حقيقى لبيئة الإبداع فى مدنى، وقبله بشويه "فتاح السقيد"

موسيقارنا بشير عباس طبعا زول غواص فى بحور الفن وعنده أذن لا تخطئ الأصوات الحقيقية

وأكيد على السقيد وقع ليهو من أول نغمة صوت منه

وفعلا زى ما قلت على السقيد برضو "زول حريف كورة" وأنا شخصيا شفته وهو بتمرن فى الميدان القريب من التلفزيون، وشفته كمان فى ميدان بانت

شكرا ليك يا فاتح على الإضاءات الملونة السمحة

فلتحيا ياصديقي المرهف

وليحيا على السقيد

وضياء ميرغني ذاتو؟

وعليكم كلكم وعلى سعد الدين إبراهيم ألف نور .

أبا مهيار

كيفك يا اسامة
يا طعم الحضور
يا معنى الوسامة

ود الخال العزيز صلاح
لدي ذكريات جميلة وعزيزة مع الاستاذ علي السقيد-- اتذكر ذهابنا من المزاد الي مدرسة النيل الازرق معنا صديق اخر اسمة عبدالماجد من ابناء الحواته -- نمر بشارع الزلط بالرغم من بعده -- نستمتع بالبصات وهي تحمل بنات الثانوي-- خاصة بص عمك عوض ملك-- الفطور بسوق الدرجة-- يينضم لنا في الفطور محد يوسف الديبة من ايناء القسم الاول والسني من ابناء شندي فوق-- الفطور فول بوش-- دكان بالقرب من منزل عبدالوهاب الطهار -- وهو اشهر طهار في مدني وهو والد الاستاذ حسن عبدالوهاب-- هل تعرف ياصلاح بان عبدالوهاب الطهار طهرك انت والاخ عبدالحميد والخال مامون

الفاتح

أكيد بنكون مشينا سوا فى الشارع ده

نحن، وأنا وصديقى الحبيب "بدر الدين أبو العاص" بنجى من بانت شاقين السوق الجديد ونمشى على المزاد لحدى ما نصل سوق المزاد

ناخد تكلة صغيرة قدام "برندة سنطة" فى الدكان العلى الظلط مباشرة، المقابل لدكان عبد الرحمن الترزى، وعبد الرحمن ده بالمناسبة إبن خالة مبدعنا أبوعركى، من الباغة

وبعد داك نمشى شرقا مرورا ببيوت مية واربعطاشر، نغشى صديقنا "داود حسين سلطان" ونمشى سوا بعد داك لحدى مدنى الثانوية

ذكرتنا الأيام الندية والله يا الفاتح

.. علي السِّقيد ..

" أنا بينْ حَوَاجْبِكْ وبينْ عينيكْ

سايقني شوقْ مِنِّكْ وليكْ " ..

استمْعتُ لهُ مِرَاراً وأنا بتلكم الرَّائعةِ

" مَدني " والتي لمْ أجِدْ مدينةً تُشْبِهُهَا

حتَّى الآنَ وحتَّى بعدَ مائةِ عامٍ

قادماتٍ ، ولَقْدْ أعْطَتني أُمُومَتِها

لعشْرِ سنينَ ماضياتٍ لا أزالُ أحْبَلُ

بعَبَقِها كُلَّ يَومٍ ولنِعْمَ الأُمُّ هِيَ ..

ولـ " علي السِّقيدْ " أقولُ :

شُكْرَاً للأصواتِ التي

تَلُمُّ شَتاتَ وِجدانِنَا مِنْ قاعِ

البؤسِ ،

فَمِنْ ألْحَانِهِ ازدادتْ بداخلي

رُقْعَةُ الجمالِ زَمَنَاً ..

.. ويا أبا ذَر .. أنتَ موجودٌ ..

وأنا موجودٌ فلِنَجْلِسَ مَعَاً على

أريكةِ الاستماعِ وإذْ لا يَفْصِلُنا عنْ بَعْضِنا

سِوَى مَسْتَوَى الرؤية ..



احترامي لكَ أيُّها الجميلُ أحْمِلُهُ

على أكْتَافِ المَحَبَّةِ

وللقِمَّةِ " علي السِّقيدْ "

آلافُ المَوَدَّاتْ ..






أخوك / محمَّد زين ...