دفًّـــــــار الحكومة

دفًّـــــــار الحكومة


04-04-2008, 02:42 PM


  » http://sudaneseonline.com/cgi-bin/sdb/2bb.cgi?seq=msg&board=160&msg=1207316560&rn=0


Post: #1
Title: دفًّـــــــار الحكومة
Author: د.محمد حسن
Date: 04-04-2008, 02:42 PM

مرات كتيرة
لما اشف في نشرة الاخبار الاجتماع االكامل لمجلس الوزراء
انه شدة ما زحمة وفيه وزرا واقفين شماعة ... عامل زي الدفار
وبتخيل انو وزير شاب يا دوب اتخرج قاعد في كرسي ، واخونا ابوالقاسم محمد ابراهيم جاي مدافر ومشمع يقوم الوزير القاعد جنب الوزير الشاب مثلا اسماعيل الحاج موسى يتكلم معاه
- اسمع انت يا شاب قوم لي عمك ابةاالقاسم
- يا اخ ابو القاسم ده جننا اي دفار ناطي فيه ، وبعدين هسة اقوم ليه ينوم في الكرسي
طواااااالي نايم
مامشكلة
- قوم ليه
- كل مرة اقوم ليه ما اقايم كلم غازي سليمان
- غازي سليمان ده شاكل الناس كلها عشان يقعد حتى العسكري زاتو شاكله مش كدة ، الناس ابحاموا ليه زاتهم شاكلهم انساه
- خلاص كلم سبدرات
- سبدرات
يازول انسى
لو تقوم القيامة ده ما يقوم
- طيب كلم منى اركو ما برضو ود صغبر
- يا زول انت ما نصيح ده هسة يقول ليكانا متين ركبت انا يا دوب راكب من ابوجا الاخيرة
ما تشوف ناس ابوجا ون
- طيب يا اسماعيل ما تقوم ليه انت
- انا ، انت يا ود جنيت ، الصلعة دي كلها اجتماعان مجالس وزرا ، وبعد ده اقوم ليه
خليه واقف كدة اصلو زي قلته

ونواصل

Post: #2
Title: Re: دفًّـــــــار الحكومة
Author: د.محمد حسن
Date: 04-05-2008, 12:11 PM
Parent: #1

على لسان الكمساري:

اها يا جماعة نمشي بشارع المعونة والا شارع الانقاذ؟

Post: #3
Title: Re: دفًّـــــــار الحكومة
Author: هاشم أحمد خلف الله
Date: 04-05-2008, 12:17 PM
Parent: #2

Quote: اها يا جماعة نمشي بشارع المعونة والا شارع الانقاذ؟


ياسلام !! يأخي ما عندك شارع العليا العام وعندك شارع التحلية
وعندك شارع الملك فهد!! انت زول رجعي ساي يا اخوي واظنك مشتاق
للسودان عديل كده ولا انا غلطان .

Post: #4
Title: Re: دفًّـــــــار الحكومة
Author: د.محمد حسن
Date: 04-05-2008, 02:34 PM
Parent: #3

Quote: انت زول رجعي ساي يا اخوي .


عليك الله لو ما انا رجعي
واحد يكون وزير 40 سنة؟

Post: #5
Title: Re: دفًّـــــــار الحكومة
Author: Safia Mohamed
Date: 04-05-2008, 02:50 PM
Parent: #4

اها يا جماعة نمشي بشارع المعونة والا شارع الانقاذ؟
Quote: اها يا جماعة نمشي بشارع المعونة والا شارع الانقاذ؟


يا زول شارع الانقا دي ما لينا 19 سنة ماشين بيه شفتو ودانا وين حرب جوع فقر مرض اييك
كدي النجرب شارع المعونة ويا حبذا لو بقت المعونة المريكية


صفية\

Post: #6
Title: Re: دفًّـــــــار الحكومة
Author: سلمى الشيخ سلامة
Date: 04-05-2008, 03:36 PM
Parent: #5

شارع الحرية كيف ؟
لكن ما يكون موصل (للسجانة )
ياخ القلتهم ديل مرض
مرض
مرض
مرض

لمن تكمل الكلمة دى
قاعدين فى راسنا لمن راسنا بقى صلعة زاتو
من يوم ماقمنا نسمع نفس الاسماء
يخس ع الناس البتاكل فى كل مائدة
ديل بكونوا عندهم تخمة
والتخمة بتخلى الاحساس ناقص

الله يفكهم من رقبتنا
ونمشى فى شارع الوحدة الطوييييييييييل

Post: #7
Title: Re: دفًّـــــــار الحكومة
Author: نادية عثمان
Date: 04-05-2008, 03:45 PM
Parent: #6

Quote: اها يا جماعة نمشي بشارع المعونة والا شارع الانقاذ؟


تماااااااااااااام

ده شارع بيت ناس خالتي

Post: #13
Title: Re: دفًّـــــــار الحكومة
Author: د.محمد حسن
Date: 04-06-2008, 12:38 PM
Parent: #7

Quote: ده شارع بيت ناس خالتي D


نحن دايرين شارعكم

Post: #12
Title: Re: دفًّـــــــار الحكومة
Author: د.محمد حسن
Date: 04-06-2008, 11:53 AM
Parent: #6

Quote: ونمشى فى شارع الوحدة الطوييييييييييل


تعرفي لو نحن مشينا بشارع الوحدة

الدفار حيمشي بشارع الغابة

Post: #8
Title: Re: دفًّـــــــار الحكومة
Author: د.محمد حسن
Date: 04-06-2008, 06:20 AM
Parent: #5

Quote: المعونة المريكية
\


انت لسة من زمن المعونة الامريكية؟

انت ما سمعتي بي قبة الفكي الصيني في حنتوب؟

Post: #9
Title: Re: دفًّـــــــار الحكومة
Author: Shamael Elnoor
Date: 04-06-2008, 09:16 AM
Parent: #8

ههههههه والله دا احلى خط مواصلات لاقاني

وممكن نستثمر البوست دا ونرفع العايزين نرفعو ونشمع بالعايزين نشمعوا ونقعد العايزين نقعدوا



يا عمنا اب شنب بلاى قفل لينا ورا المقاعد الوراك دي فاضية



طيب مدام في مقاعد فاضية الناس دي مشمعة ليه

Post: #10
Title: Re: دفًّـــــــار الحكومة
Author: العوض المسلمي
Date: 04-06-2008, 09:29 AM
Parent: #1

د محمد سلام عليكم

يا اخوي جزاه الله خير العقيد يوسف عبد الفتاح اقترح حاجه
بديله للدفار وسماها البطاح
ده البطاح واااااااااااسع وممكن تشيل حله كامله
رايكم شنو

Post: #11
Title: بشارع المعونة والا شارع الانقاذ؟
Author: Waeil Elsayid Awad
Date: 04-06-2008, 09:45 AM
Parent: #1

يازول شارع المزاد (لمن لا يعرفون شارع المزاد يتوسط المسافة بين شارع الانقاذ و المعونة)
لو مشيت لاخر محطة قبلت شرق وعديت 12 بيت بتلاقى بيتنا فخلى الدفار يقيف بهناك انا عازموا (الدفار ما الجماعة)
بنزين.

Post: #14
Title: Re: بشارع المعونة والا شارع الانقاذ؟
Author: ابو جهينة
Date: 04-06-2008, 12:45 PM
Parent: #11

Quote: نحن دايرين شارعكم


داير تسفلتو ؟
بعدين ما تجمع .. قول أنا داير ... مش نحن دايرين

غايتو أنا أحبذ الشارع ال غنن ليهو البلبل
( نور بيتنا و شارع بيتنا )

Post: #15
Title: Re: بشارع المعونة والا شارع الانقاذ؟
Author: ابوبكر يوسف إبراهيم
Date: 04-06-2008, 01:15 PM
Parent: #11

حبيبنا د. محمد حسنن


سلام علي روحك الطيبة

عجبي.. كنت من اسبوع مضي في برلين والدنيا قايمة قاعدة في البوندستاج والسبب أنو كل وزراء المستشارية ال(18) طالبوا بزيادة المخصصات لظروف الغلاء الناتجة عن إرتفاع أسعار البترول التي انعكست غلاءِ على المواد الإستهلاكية.

وعينك ما تشوف إلا النور.. النواب قالوا لي ميركل: ما تقيفي في الزلط وتتكلمي غلط التنط.. عشان نصلح رواتب جماعتك خفضي عددهم، ما نوفرو من مرتبات الحيمشوا ممكن ندفع منو للباقيين ونوفر من الباقي كمان على الدولة!! والله ما تقول دي ميركل المستقوية في الخارج.. المرة مشت إعتذرت لوزرائها وقالت ليهم يا تقبلوا واللآ نخفض عددكم .. والله الجماعة عملوا خاطر لزملائهم الممكن يطيروا وكرسوا ساكت !!

يا دكتور محمد حسن
سمعت أن حكومتنا السنية عينت د. بيطري وزير صحة ولائي .. ممكن تفهمني سكان الولاية ديل بشر زينا واللآ الحكومة معتبراهم حاجة تانية؟ ويبدو أن الحكومة السنية تعمل بمبدأ ( الرجل المناسب المناسب)!! يعني يا دكتور محمد حسن أنا لو مرضت أجيك واللآ أعمل حمار وأمشي لوزير الصحة الولائي!!.. خلاص راحت عليكم هذا زمن البيطار يا سيدي!!!

بعدين يا أخي ما تهاجم، إنتظر شوية إمكن يضحك لينا القدر ونتشعبط في الدفار إنشاءالله شماعة.. شيل الصبر.. وحليلكم إنتو يا ناس الأشلاق يا الما سمعتوأ بالسيرلاك ..أخير ليك فتح عينك قدر الريال وخلي أضانك قدر العقال.. ما تخليني أدق الصفايح واطلع الفضايح !!

تحياتي

Post: #27
Title: Re: بشارع المعونة والا شارع الانقاذ؟
Author: د.محمد حسن
Date: 04-10-2008, 11:34 AM
Parent: #11

شارع كوبر

Post: #31
Title: Re: بشارع المعونة والا شارع الانقاذ؟
Author: محمد الطيب يوسف
Date: 04-10-2008, 12:59 PM
Parent: #11

Quote: يازول شارع المزاد (لمن لا يعرفون شارع المزاد يتوسط المسافة بين شارع الانقاذ و المعونة)
لو مشيت لاخر محطة قبلت شرق وعديت 12 بيت بتلاقى بيتنا


يحول الي بوست طيبة الذكر....

إنت ساكن وين في السودان.. خش وصف لينا بيتكم

ولا أراكم الله مكروها في وصيف بيتكم

Post: #16
Title: Re: دفًّـــــــار الحكومة
Author: Safia Mohamed
Date: 04-06-2008, 01:47 PM
Parent: #1

Quote: يا دكتور محمد حسن
سمعت أن حكومتنا السنية عينت د. بيطري وزير صحة ولائي تساوت .. ممكن تفهمني سكان الولاية ديل بشر زينا واللآ الحكومة معتبراهم حاجة تانية؟ ويبدو أن الحكومة السنية تعمل بمبدأ ( الرجل المناسب المناسب)!! يعني يا دكتور محمد حسن أنا لو مرضت أجيك واللآ أعمل حمار وأمشي لوزير الصحة الولائي!!.. خلاص راحت عليكم هذا زمن البيطار يا سيدي!!!

يا جماعة مالهم البياطرة؟
عيبهم لي
بيطرية زعلانة
اها تسوي شنو لو طلع محمد حسن ذاتو بيطري ،الليلة انا برة.
صفية

Post: #17
Title: Re: دفًّـــــــار الحكومة
Author: ابوبكر يوسف إبراهيم
Date: 04-07-2008, 11:52 AM
Parent: #16

الأخت الفاضلة/ صفية

سلام على روحك الطيبة

الدكاترة البيطريون مثل أي تخصص يجب أن يعملوا في مجال تخصصهم وأخونا محمد حسن ما ممكن يدعي طبعاً علاج البشر إن كان تخصصه بيطرة

وأنا أكن للأطباء البيطريين كل الود والإحترام وهم جزء فاعل في المجالات العلمية وهم أساس المحافظة على الثروات الحيوانية وتنميتها( ويا حليل النعجة دولي يا صفية) ولكني أتحدث عن المفارقة وما كنت سأستغرب لو عين وزيراً للثروة الحيوانية بالولاية فهل في هكذا حال تم التعيين وفق التخصص والخبرة والجدارة؟! أن كثيراً من الدول تخلفت لأن التعيينات كانت لأهل الولاء والإنتماء والجهويات وليس لأهل العلم والتخصص والخبرة والنبوغ في مجالهم!!.. وآسف لو راس الصوت لحقك يا أخت صفية ، فلك العتبى حتى ترضي عن أخوك الصغير!!

Post: #18
Title: Re: دفًّـــــــار الحكومة
Author: مجدي عبدالرحيم فضل
Date: 04-07-2008, 12:21 PM
Parent: #17

تعرف ياد.أبوبكر

كنت متوقع د.طارق جبريل

د. حاتم حمتو

لكن جاتك زميلتهم الدكتورة صفية وهي تجلس في المقاعد المخصصة لنساء بلادي ياحبيبه

بهدين د.محمد حسن ده مشي وين؟ مجرد سؤال؟؟

ومالو الدفار كدي عيبوا لي ما دفار قومي شمولي (بس الكمساري ده ما لو ماخلص من الوزير الولائي التعريفه بالجنية السوداني

وزيرة الصحة د. خريجة تمريض يعني بالواضح كده كل التخصصات الطبية المختلفه تكون الوزارة ومافي دكتور أخير من دكتور

الدفار بيسع الكل ولوماشالكم نشيلكم في باصات الأكورديون (الخط الدائري السريع ).

،،،،أبوقصى،،،،

Post: #21
Title: Re: دفًّـــــــار الحكومة
Author: Safia Mohamed
Date: 04-07-2008, 01:58 PM
Parent: #18

استاذ ابو قصي
سلام
Quote: بهدين د.محمد حسن ده مشي وين؟ مجرد سؤال؟؟

اوعى بس تكون جاته حمى نزفية
صفية

Post: #19
Title: Re: دفًّـــــــار الحكومة
Author: Safia Mohamed
Date: 04-07-2008, 01:23 PM
Parent: #17

د. أبو بكر

Quote: ولكني أتحدث عن المفارقة

تعرف مع احترامي لرايك لكن
منصب الوزير دوما منصب سياسي واداري اي انسان اكتسب خبرات عملية بامكانه تسيير اجرارءات بعيدا عن الجانب الفني ، ولكن العظة تكمن في الجانب الفني وهنا يلزم وجود متخصص او جهات استشارية فنية وهذا ما نفتقده ، يعني الشخص الموجود في منصب سياسي قد لا تتوفر لديه المعلومات الفنية ولكن في هذه الحالة يستعين بالخبراء في اتخاذ القرارات الفنية، دي من ناحية اما من ناحية اخرى بالنسبة لمهنتنا التي اعتز بها جدا نتعرض في خلال دراستنا للكثير من الجوانب العلمية التي لا تختلف اسسها عن المبادء والاسس العلمية العامة لكل الكليات من ناحية اناتومي فسيولوجي علوم امراض باثولوجي وفيرولوجي باكتريولوجي وفارما كولوجي وهيستولوجي وعلم الاجنة امبريولوجي واييك هذا بالاضافة الى الكورسات المتخصصة من علم تشريح مقارن للحيوانات والدواجن وامراض الابقار والسلخانات والانتاج الحيواني واسس الاقتصاد الزراعي، والامراض المتناقلة بين الانسان والحيوان زوونتك ويعني الخلفية العلمية بتكون متوفرة.

خلاصة حديثي في اغلب الاحايين المنصب الوزاري هو منصب سياسي يفترض ان يلجا الوزير الى الجهات الفنية المتخصصة عند اتخذا قرار فني بحث يعني لجان استشارية او مراكز بحوث واييك نحن وين من دة كلو الله يكون في عونا
وبعدين يعني اشمعنى انت اخترت البطري ما تعاقبت على حكوماتنا مرات كتييرة ان الوزراء يا اما مهندسين او اطباء في ثقافة واجتماع وغيره اشمعنى يعني بس البطري اللي علقت عليه
وبرضو مافيناش من زعل بس توضيح
صفية

Post: #20
Title: Re: دفًّـــــــار الحكومة
Author: Shamael Elnoor
Date: 04-07-2008, 01:43 PM
Parent: #19

Quote: خلاصة حديثي في اغلب الاحايين المنصب الوزاري هو منصب سياسي يفترض ان يلجا الوزير الى الجهات الفنية المتخصصة عند اتخذا قرار فني بحث يعني لجان استشارية او مراكز بحوث واييك نحن وين من دة كلو الله يكون في عونا


مش اغلب الاحايين ، اساسا منصب الوزير هو سياسي pure ولكل وزير لجنة فنية داخل وزارته"خصوصا اذا الوزير شغال فى مجال ما بتاعه زيي كدا" هذه اللجنة تشاركه القرار ويجب ان يكون هناك balance بين القرار الفني والقرار السياسي اى ان يراعي القرار الفني جميع الجوانب السياسية التي يمكن ان تتمخض عن القرار،وفى النهاية طبعا القرار السياسي هو الاقوى _والراى رايك آآبوي_







الدفار دا وصل وين؟

Post: #22
Title: Re: دفًّـــــــار الحكومة
Author: ابوبكر يوسف إبراهيم
Date: 04-07-2008, 02:22 PM
Parent: #20

الأخت العزيزة/د. صفية

سلام على روحك الطيبة

في كل الدول وبالذات السودان منذ الإستقلال وحتى عهود قريبة وأظن حتى الآن وزراء الصحة كانوا أطباء بشريين وحتى في مصر القريبة دي كلهم كانوا أطباء.. كل الوزارات ممكن يكون منصب الوزير فيها سياسي إذا كان نظام الوكيل الدائم للوزارة ما زال قائمالأنه هو الشخصية المتخصصة والفنية التي تدير شئون الوزارة كشخصية متخصصة.. وللعلم في كثير من الأحيان كانت وزارة الثروة الحيوانية يديرها وزير دكتور
متخصص في مجال الثروة الحيوانية.كان الوكيل الدائم رجل متخصص، طبعاً لو زرت وزارة الصحة فكل أقسامها يديرها دكاترة. يعني أقدر واحد يدير وزارة الري يكون المهندس وكذلك وزارة النقل الخ..

بعدين يا دكتورة صفية أنا لا أذدري أي تخصص بالعكس أنا أتخدث عما هو غير مألوف .. أنامثلاً عندي قطتين شيرازي والله العظيم تكلفة الرعاية الصحية البيطرية لهما أغلى من تكلفة رعاية البشر الطبية وأقصد الرعاية وليست التكلفة العلاجية.ونمن شدة حبي ليهما أحببت كل الأطباء البيطريي


عموماً أنا سأروي لك حكاية مضحكة وحدثت في أيام عنفوان اللجان الثورية في ليبيا حيث كان رئيس اللجنة الشعبية بأحد المستشفيات ممرض وكان هناك مؤتمر طبي منعقد في الدار البيضاء فقاد الوفد الليبي للمؤتمر رئيس اللجنة الشعبية الأخ الممرض وجلس خلفه الأطباء الإستشاريين!!

عموماً ما تزعلي ولك العتبى حتى ترضين عن أخوك الصغير بالمناسبة لي إبنة صيدلانية تعمل في أفنتيس وابن أخوي طبيب بيطري دز-. حسين وأبن خالي د. نبيل محمود برضو طبيب بيطري.

Post: #23
Title: Re: دفًّـــــــار الحكومة
Author: Safia Mohamed
Date: 04-07-2008, 02:39 PM
Parent: #1

د. ابو بكر
كدي كدي دقيقة دقيقة
Quote: أنامثلاً عندي قطتين شيرازي والله العظيم

قلت لي شنو
انت قاعد وين ياللخو
غايتو خسارة
نحن قايلين كل الناس زينا طلع ايييك ناس ناس وناس عندها شيراز
مساكين نحن
طيب اتنين ما تخليها واحدة
غايتو جنس غايتو

طلعت حنكوش وخواجاتي ومرتاااح نحن لينا الله وعيشة السوق
عشان كدة يتشابه علينا البقر
يحكمنا منو ما فارقة كتيير النلم حق الرغيف للاولاد باللوال

خارج النص
انا ما زعلانة لكن بقرانة
ربنا يذيد ويبارك

صفية

Post: #24
Title: Re: دفًّـــــــار الحكومة
Author: د.محمد حسن
Date: 04-09-2008, 06:24 AM
Parent: #1

الشباب جميعا

الاشتغلوا البياطرة

والبحبوا البياطرة

دقيقة

سمعت تحت تحت

في ناس عايزين يودوا الدفار المنشية

Post: #25
Title: Re: دفًّـــــــار الحكومة
Author: ماجدة عوض خوجلى
Date: 04-09-2008, 08:03 AM
Parent: #1

Quote: الشباب جميعا
:
محمد حسن ركز شويه فى الكتابه واطلاق الوصف وكده الشباب جميعا دى انت متاكد منها
عاد اناماحلفت مااخلى حقى محمد حسن دى تصفية حساب مع احد شبابك الفوق ديل وهو عارف نفسو بيجى
براهو طاير (انا مش قلت ليك .... مابخلى حقى يلا قول واحد من مية )
تسلم محمد حسن كتير يارب ...

Post: #26
Title: Re: دفًّـــــــار الحكومة
Author: د.محمد حسن
Date: 04-09-2008, 07:36 PM
Parent: #25

ماجدة خوجلي

يا زينة الشباب

شرفتي الدفار

طبعا لمن السواق سمع النقة التحت تحت انهم عايزين يمشوا المنشية

قال ليه المنشية مشيناها مرة شوارعها كلها حفر
المرة دي بوديكم بالقيادة العامة

Post: #28
Title: Re: دفًّـــــــار الحكومة
Author: almogira alemam
Date: 04-10-2008, 11:38 AM
Parent: #1

يا جماعة شوفو لي طريقة انشا الله (الفردة الجاية) بعدين الركشة الولائية نسيتوها ولاشنو

Post: #29
Title: Re: دفًّـــــــار الحكومة
Author: د.محمد حسن
Date: 04-10-2008, 12:27 PM
Parent: #28

Quote: بعدين الركشة الولائية نسيتوها ولاشنوB]


سواق الدفار
قال ليهم
شوفو خطي واح
القيادة وشارع القصر

العايز يمشي المنشية
ينزل يركب ركشة

Post: #30
Title: Re: دفًّـــــــار الحكومة
Author: Muna Khugali
Date: 04-10-2008, 12:32 PM
Parent: #28

هوووووي..
ركشات مافينا لأنها ما بتقدر تعدي الكوبري..
الا كان زول يشلها في كتفه ويعدي بيها..
وبعد داك ينزلها ويسوقها والركاب من جديد..

بتبقي صعبه..موش؟؟

Post: #32
Title: Re: دفًّـــــــار الحكومة
Author: د.محمد حسن
Date: 04-12-2008, 12:50 PM
Parent: #30

Quote: ركشات مافينا لأنها ما بتقدر تعدي الكوبري..
¿¿


تعرفي يا منى

هي بتعدي كان ناس الحركة خلوها

Post: #33
Title: Re: دفًّـــــــار الحكومة
Author: د.محمد حسن
Date: 04-13-2008, 06:55 AM
Parent: #28

اها

يا جماعة

نمشي بالختمية

والا

ودنوباوي الدومة ؟

Post: #34
Title: Re: دفًّـــــــار الحكومة
Author: ابوبكر يوسف إبراهيم
Date: 04-13-2008, 10:38 AM
Parent: #33

الحبيب د. محمد حسن

سلام على روحك الطيبة

مرور من أجل التحية والتواصل

قصاصة:

دفار الحيكومة الليلم ده ما دايرلو كمساري؟

Post: #35
Title: Re: دفًّـــــــار الحكومة
Author: Safia Mohamed
Date: 04-13-2008, 10:45 AM
Parent: #1

Quote: هي بتعدي كان ناس الحركة خلوها

الحركة ياتا؟؟؟؟؟؟؟؟؟؟؟؟؟

صفية

Post: #36
Title: Re: دفًّـــــــار الحكومة
Author: ابوبكر يوسف إبراهيم
Date: 04-13-2008, 12:21 PM
Parent: #35

الحبيب دكتور محمد حسن
سلام على روحك الطيبة

أشكيلك زميلتك أختنا د. صفية.. قلت ليها ععندي قطط شيرازي قالت عني حنكوش ، طيب لو عرفت عندي طيور كناري تقول شنو ،خاصة واحد منهم كان بيقوم ويقع، فوديتو لدكتور سيد قال لي عندو إلتهاب في الأذن الوسطى ..!! تحياتي لكما

Post: #37
Title: Re: دفًّـــــــار الحكومة
Author: د.محمد حسن
Date: 04-15-2008, 12:44 PM
Parent: #35

Quote: الحركة ياتا؟؟؟؟؟؟؟؟؟؟؟؟؟


الحركة دي

( يا السمحة ميلي كدة

والله ما بقدر)

Post: #38
Title: Re: دفًّـــــــار الحكومة
Author: د.محمد حسن
Date: 04-18-2008, 11:46 AM
Parent: #1

احد الخبثاء سألني

انت الجماعة ديك ما بقيفوا لي زول

قلت ليه

ماديك اصحاب الشئ ده ذاتا

Post: #39
Title: Re: دفًّـــــــار الحكومة
Author: ياسر شبيكة
Date: 04-18-2008, 01:07 PM
Parent: #1

د. محمد ازيك

بالله ممكن تركبونا معاكم الدفار ده خاصة وأنه فيهو د. صفية والناس
الرايعين ديل

شكرا ليكم انت وصفية

وعايز أسأل سؤال الدفار ده ماشى بى شارع الموردة ولا الأربعين ؟
و لا تدونى قرشى وأنزل ؟.

Post: #40
Title: Re: دفًّـــــــار الحكومة
Author: د.محمد حسن
Date: 04-18-2008, 01:24 PM
Parent: #39

ياسر عز الدين مكي شبيكة

اول صديق لي بمدرسة امدرمان الاميرية


سلامات ومرحب بيك

لو الدفار كان بمشي بالاربعين والا المورجة
كان اتعدل

ده بمشي بي شوارع ما انزل الله بها من سلطان

Post: #41
Title: Re: دفًّـــــــار الحكومة
Author: ياسر شبيكة
Date: 04-18-2008, 01:45 PM
Parent: #1

وأنا أعتز وأتشرف بهذه الصداقة


الدفار ده ماشى فى شارع البيمشى تانى ما بيرجع

يا مثبت العقل

Post: #42
Title: Re: دفًّـــــــار الحكومة
Author: ناهد بشير الطيب
Date: 04-18-2008, 01:56 PM
Parent: #1

معلمة الله غايتوا تعريفه ماعندى ....
بتركبونى معاكم؟

المهم ماتفوتنى محطتى

Post: #45
Title: Re: دفًّـــــــار الحكومة
Author: د.محمد حسن
Date: 04-19-2008, 09:49 AM
Parent: #42

Quote: المهم ماتفوتنى محطتىB]


ما تخافي

حننزلك في كسلا

ما بتوصلي اروما

Post: #43
Title: Re: دفًّـــــــار الحكومة
Author: ياسر شبيكة
Date: 04-18-2008, 02:27 PM
Parent: #1

مرحب بيك
والدفار دفارك ودفارنا كلنا لكن شكله كده والله أعلم الرخصة بتاعته
ضاعت منناعشان كده فرضوا علينا السواق والكمسارى !!!

يا د. محمد لسه مافى خبر عن الرخصة ؟؟؟

ما تجوا ياجماعة نطلع بدل فاقد !!!

Post: #44
Title: Re: دفًّـــــــار الحكومة
Author: fadlabi
Date: 04-18-2008, 02:28 PM
Parent: #1

غايتو يا دكتور عنصرية أولاد أمدرمان دي ما بتخلوها أصلو

هسي شوارع بحري دي عيبها شنو

قال ما أنزل الله بها من سلطان قال

أطالب بحذف البوست