ياسين عبد العظيم : مغنى الشجن

لو كان ما العمر بدرى انكتب فى اللوح
أو كان النفوس تتفدى روح بى روح
ما كت مت يا غريد بلابل الدوح
أحى وا وحيح قلباً عليك مجروح
يا يا سيييييييييييييييييييين
********************

استمعت إلى هذه المرثية فى تلفزيون السودان فى النصف الأخير من عام 1987 ولم أكن حينها أعرف من هو يس عبد العظيم وما كنت استمعت إليه. ولكن بعدها استمتعت بالإصغاء إلى صوته فى " ليل الغلابة" أشهر أشرطة الكاسيت التى احتفظت له بها السوق،إحدى أغنيات الشريط : كيفن أصبّر قليبى، فى قفلتها : عرفت الله فى عذابا اتتخاف الله فى شبابى، تسمع صوت وردى، ولياسين صوت تهب من نهره النسمة والرعد كلاهما، بل أن مساحة صوته تمتد من رقة صوت طفل إلى رجولة كاملة ، وكل ذلك فى شجن يترك فيك ما يتركه تمر مبلول على آخر اللهاة إثر عطش.
********************************************
فى أغنيته: العيد مبارك والمراد ينتم: سألت صديقى محمد عصقيل و هو من عاشقى فن ياسين والمهتمين بحفظ تراثه: هل هذه الغنوة للنعام آدم فأجابنى أن لا ولكنها وزنة طنبور النعام.
******************************************
سؤل الفنان النعام آدم أن من بعدك فقال جنى عبد العظيم

هذه دعوة لعاشقى أحد مغنى الشجن الذين لايشق لهم غبار لإحياء سيرته وفنه ، اكتبوا ونزلو غناهو هنا، و يا ياسيييييييييييييييييييييييين

عزو العزيز
سلام مطبوق..

جميل أن نوثق لهذه القامة الفنية العالية، ياسين الذي عبر كشهاب، وما زال ضوء أغنياته يشعل الساحات سماحة.
جميل أن نعرّف الآخرين على روائع ياسين الخالدة.
وجميل منك يا زول يا جميل أن تكون المبادر في إتاحة كل هذه الوسامة.
،
الدعوة من عندي أيضاً لكل عشاق ياسين، ولك من عاصره أو التقاه، وأخص - من أعرف منهم- هناالأعزاء:

* ياسين محمد ياسين (ياسيكو)

* ديامي

* ياسر علي السيد
وكل صناع الجمال بهذا المقام..

،
لي عودة

العزيز بدرى الياس

واحدة من بركات هذا البوست عودتك، وان شاء الله عودة مبرورة. تعرف أن التوثيق لياسين اهتمام لدينا مشترك ونابع عن حب. أتذكر ذات سهر فى بيت العذابة فى امتداد الدرجة الثالثة وصورة يس التى تذكر بالكائنات الجبلية معلقة على الجدار، بجلبابه والملفحة، شعره الغزير والبنية المعافاة، وقلنا هل يخرج ذلك الصوت من هذا الجسد؛ ولاشك أنك تذكر أننا طلبنا من نديمنا فى تلك السهرة معاوية المقل أن يغنى لياسين ففعل الرجل الفنان بأريحية وطرب.
أنتظر منك أن تنزل مما لديك من شرائط الكاسيت هنا.أشاركك دعوة من دعوت ومرحبا بيسين محمد يس ، أحد رموز رابطة مروى بجامعة القاهرة الفرع وابن الأراك.وإلى حين عودتك ودعناك الله.

بدري الياس تحياتي

ياسر علي السيد ياهو ياسر علي السيد (كريمة)
ياخي لمني في الزول ده كان عندك خبره

تحيات

ياسين عبد العظيم

الله ياوطن

لا اعتقد ان هنالك ...شايقى قد ينسى يسن عبد العظيم

كان الذهاب مبكرا
ودوائر الاستفهام زمنا مستعجل
ى س ذالك
اللحن
الذى
لم يكتمل
خلسة الخجل الشجن
منك وفينا
شلناك
مرة شوفة
ومرة وتر

مرة حسرة كلمات
تأبى تدينا فى غيابك كل المعنى
يسن عبد العظيم
بس عرفت
كيف
كلمة
الراحل المقيم

بالفعل يا عبد العظيم فقد رحل الرجل مبكراولكن صوته باق يسرح فى براح الخلا ومعلق على أعناق النخيل، والرجل أحبه غير الشوايقة كذلك. إن صوت ياسين من الجنس الذى:
يبدا الصعود الثمل من المطامير البعيدة، يسنده صفق النبيذ حتى يصل، فى وجهنا يكسر السياج ويقوله كله: الشجن.

الاخوة المحترمين


يس عبد العظيم فنان وملحن وصاحب حس فنى عالى جدا ندر وجوده او بالاصح لن يجود الزمان بمثله على الاطلاق

فهو انسان موهوب تغنى باجمل واعذب الكلمات والالحان ورحل عن دنيانا دون توثيق هذا الفن الاصيل بصورة جيدة

تمنعه من التاوئل والتحريف الذى لازم كل اغانيه بعد ذلك ومع احترامى لكل الذين تغنوة له الى القليل جدا

منهم سعى بان يحافظ عليها بالصورة الصحيحة والتى غناها ذالك المبدع العملاق

والحديث عنه يطول ونتمنى من الجميع الاجتهاد للتوثيق لكل الاعمال لهذا الفنان

فله الرحمة والمغفرة

ام الاخ بدر الياس

وينك انت ياراجل يا فنان
الرجاء المواصلة كل بيناتى من تلفون وعنوان الكترونى موجودة فى البروفائل

المحترم الطاهر عثمان

مرحبك بيك واهلا بك اتمنى المراسلة ايضا


وهاكم هذا اللنك توثيق عن المبدع / عبد العظيم منصور




عبد العظيم منصور ...المبدع الفنان

يسين عبدالعظيم الوجيب
اللحن الذي رحل بغتة في صيف 1986
تجربة مميزة لم تجد حظها من التوثيق
له كم مقدر من الأغنيات السياسية من خلال ثنائيته مع حميد
والعاطفية من خلال ثنائيته مع الشاعر ابراهيم أبنعوف
وتعاون مع العديد من شعراء المنطقة
أتمنى أن تجد تجربته حظها من التوثيق

غني لحميد
يابا لو جيتك ايديني فاضي
يابا ما راح تبقى راضي ...
كما غني ايضا ... بت العرب النوبيه ..
ياسين عبد العظيم .... صوت يرسم امام ناظريك صور
جميله ....
من اصعب المرثيات تلك المذكوره في مقدمة هذا البوست
وصحيح ( احي وا وحيح قلب عليك مجروح يا ياسين )
اصعب ما فيها : قطع كبد ابوك وامك الراجاك
لا ضقتا الجديد لا نحنا سيرناك .....يا ياسين

لو رجع وايدينى فاضى
يابا ما حتبقى راضى

الفنان معتصم: كيفك وكيف كلات الموانى

بسألك بالفيك مسك قلبو وشهق
بالبيبكى ودار تشقو العبرة طق
بالكتم سر حبو لاباع لانطق
قول لى مخلوق حظى منك وله من حظى اتخلق
انتظر حدثنى لاتعجل تفوت
يبقى ما تلقانى بكرة وراك اموت

ويس كان يكتم ويقبض على شجنه، هذه الغنوة على ما فيها من شجن لاتكتمل إلا إذا أداها يس، وانه لشجن لو تعلمون غليظ.
يا عبد المنعم مثلك أتمنى

سلام و تحايا..


تعرفت إلى صوت ياسين عبد العظيم في عام 2000 و نحن في مستهل حياتنا الجامعية بمدينة مدراس جنوبي الهند ، و ذلك عن طريق صديقي الشايقي محمود.
محمود لا يمتلك أي شريط إلا لياسين عبد العظيم و كان يجبرنا على سماعه مع اعتراض شديد من كافة الشباب ..
لكن بعد فترة تعودت أذني عليه و صرت أطرب له جداً ..


له الرحمة و المغفرة ..


و أهدي لكم جميعاً:

ليل الغلابـة

عزيزى الصحافة 30

تسلم ويسلم محمود الشايقى

ولله أطربتنى وهجت على الشجن. تأمل بالله عليك كيف يرق هذا الصوت ويتخن، كيف يطرب وينادى الدمع كما ينادى صياد عصفور إلى شرك ، وتأمل المساحة الواسعة التى يرقص فيها هذا الصوت واستمتع أمتعك الله بهذا الشجن. مدد يا ود الصحافة مدد

يا محبى يس




صباحات الله بى خيرا

ينتم مـرادي

يا الصحافة 30

كيفنك

ياخى الغنية النزلتها أخيرا دى أبت تشتغل، أعد لو سمحت.

عزالدين عثمان لك التحية
لقد التقيت به مرة ومازالت تلك اللحظة فى ذاكرتى

Quote: بالفعل يا عبد العظيم فقد رحل الرجل مبكراولكن صوته باق يسرح فى براح الخلا ومعلق على أعناق النخيل، والرجل أحبه غير الشوايقة كذلك. إن صوت ياسين من الجنس الذى: يبدا الصعود الثمل من المطامير البعيدة، يسنده صفق النبيذ حتى يصل، فى وجهنا يكسر السياج ويقوله كله: الشجن.

يس عبد العظيم مثل مصطفي سيداحمد و التجاني يوسف بشير
و معاوية محمد نور... رحلوا مبكرا
اين ابو يسرا من هذا البوست ؟
اذكر في احد لقاءات بورداب الخرطوم زمان
حضر مع ابو يسرا الفنان عثمان عبد العظيم
شقيق يس (علي ما اظن) و ادي اغنية سوقني معاك يا حمام

يا عصام كن واحدا من أهل هذا البوست وأبقى لا جوة. أرددمعك أين أبو يسرا

يا عظمة:
أحسدك أنك التقيت الرجل فانا لم يتسنى لى، ولكننى التقيت صوته وعانقته وامتلأت به، وأريد أن أملأ هذا الأثير به كذلك لنحول هذا البورد إلى دارة يهيج لها غبار العفاض والشمالية لى حدها.
دمت

.عز الدين عثمان

Quote: ياخى الغنية النزلتها أخيرا دى أبت تشتغل، أعد لو سمحت.

الأغنية شغالة تش ..

يبدو انو ما عندك برنامج Real player ،

نزل البرنامج و جرب ..

العزيز Alsa7afa_30

تشكر كتيير يا سيدي على الأغنية الكبيرة "ليل الغلابة"، وعلى الأغنية التانية رغم إنها برضو ما اشتغلت عندي برغم "شنفرة" الـReal Player وتسلطو علي كل الملفات الصوتية عندي.

طلب بسييط منك ومن كل الجميلين الحا يلوِّنو البوست ده بأغنيات ياسين، وهو أن يكون تشغيل الأغنية باختيار المتصفح، يعني ما تشتغل الأغنية بمجرد فتح البوست، لأنو الموضوع ده بيشوش علي الواحد، وكمان وجود أكتر من أغنية تشتغل Automaticly بمجرد فتح الموضوع بيتسبب مرات في مشاكل زي البطء ورسائل الخطأ وقصص زي دي.

وتاني أحييك وأطلب منك تتولى موضوع ما يطلبه قراء البوست، وتنزل لينا روايع ياسين لأنو "أنا وأخوي الكاشف" صاحب البوست ، في "الكُتّاب" ما درسونا "كيفية تنزيل الأغاني" لكن قرُّونا كتاب "الأغاني لأبي الفرج.."
،
مودتي...
،
،
،

يا الصحافة 30 : كده تمام وشكا على التعديل، وعليك الله ةأعمل بوصية بدرى الياس الأصفهانى

تعرف يا عِزْ
كتير ما تلقى كلام الناس الفنانين يتشابه..
لمن قريت كلامك في المقدمة احترت ، وطلوحت بي الشيمه..
معاني بتتشابه عند ناس بتتشابه، وقراية تشبه بعض لي ناس جميلة وبتشبه بعض..
انا حا اخليك بس تتأمل وتشوف.
ده كلامك إنت:

Quote: ولياسين صوت تهب من نهره النسمة والرعد كلاهما، بل أن مساحة صوته تمتد من رقة صوت طفل إلى رجولة كاملة ، وكل ذلك فى شجن يترك فيك ما يتركه تمر مبلول على آخر اللهاة إثر عطش. ******************************************** فى أغنيته: العيد مبارك والمراد ينتم: سألت صديقى محمد عصقيل و هو من عاشقى فن ياسين والمهتمين بحفظ تراثه: هل هذه الغنوة للنعام آدم فأجابنى أن لا ولكنها وزنة طنبور النعام.

والتحت ده جزء من رسالة من الرجل الأليف والشاعر الصديق عاطف خيري في الرد على معايدة بدت بـ"العيد مبارك والمراد ينتم..حبيبي":

Quote: كل سنة وأنت طيب منذ فترة ليست بالقصيرة، كنت أدمن الاستماع لأغنية العيد مبارك والمراد ينتم لـ يس عبد العظيم عليه رحمة الله والى وقت قريب، حتى فقدت شريطه بعد أن طالته يدُ أحد الاصدقاء بالقاهرة ووجدت له العذر في ذلك ، المهم كان لدي احساس خاص بأن هذه الاغنية لم تسمع بشكل جيد ولم تجد حظها من الذيوع مثل رصيفاتها خاصة ذلك العقد الفريد والذي يبدأ بأغنية "ليل الغلابة" وينتهي بـ "حكاية الشافعة البريدا" مرورا بـ "مناي كل لحظة أشوفك" و"ليه ما أفرح وليه ما اغني" و"يا غيم بلا كلفة"، و"تعال طل البلد وأرجع" و.. و... و كان ذلك الاحساس يمنحني متعة خاصة واستمتاع فريد كأنه يشبه اكتشافا خاصا لأغنية خاصة ، والحق يقال ان صوت يس عبد العظيم في هذه الاغنية بالذات حزين الى درجة بعيدة ، خاصة حين يصل الى نهاية المقطع قبل الأخير حين يقول : حبيبي ، ويصير طفوليا باكيا ومعلقا في الذاكرة الى الابد إذن عيديتك من أكثر العيديات التي احتفلت بها حين قلت العيد مبارك والمراد ينتم ، حيث احلتني الى تلك البقعة الحبيبة والتي كثيرا ما اركن اليها ظانا انني الوحيد الذي ارتادها بمتعة ، فشكرا لغشوتك لتلك الديار الحبيبة : ديار اسمها صوت يس عبد العظيم

وجايي راجع..

ــــــــــــــــــــــ
الخط تحت أسماء الأغنيات وبعض العبارات من عندي..

:والتحت ده جزء من رسالة من الرجل الأليف والشاعر الصديق عاطف خيري في الرد على معايدة بدت بـ"العيد مبارك والمراد ينتم..حبيبي
كل سنة وأنت طيب
منذ فترة ليست بالقصيرة، كنت أدمن الاستماع لأغنية العيد مبارك والمراد ينتم لـ يس عبد العظيم عليه رحمة الله والى وقت قريب، حتى فقدت شريطه بعد أن طالته يدُ أحد الاصدقاء بالقاهرة ووجدت له العذر في ذلك ، المهم كان لدي احساس خاص بأن هذه الاغنية لم تسمع بشكل جيد ولم تجد حظها من الذيوع مثل رصيفاتها خاصة ذلك العقد الفريد والذي يبدأ بأغنية "ليل الغلابة" وينتهي بـ "حكاية الشافعة البريدا" مرورا بـ "مناي كل لحظة أشوفك" و"ليه ما أفرح وليه ما اغني" و"يا غيم بلا كلفة"، و"تعال طل البلد وأرجع" و.. و... و
كان ذلك الاحساس يمنحني متعة خاصة واستمتاع فريد كأنه يشبه اكتشافا خاصا لأغنية خاصة ، والحق يقال ان صوت يس عبد العظيم في هذه الاغنية بالذات حزين الى درجة بعيدة ، خاصة حين يصل الى نهاية المقطع قبل الأخير حين يقول : حبيبي ، ويصير طفوليا باكيا ومعلقا في الذاكرة الى الابد
إذن عيديتك من أكثر العيديات التي احتفلت بها حين قلت العيد مبارك والمراد ينتم ، حيث احلتني الى تلك البقعة الحبيبة والتي كثيرا ما اركن اليها ظانا انني الوحيد الذي ارتادها بمتعة ، فشكرا لغشوتك لتلك الديار الحبيبة : ديار اسمها صوت يس عبد العظيم

يا ود الياس لابد لعاطف خيرى أن يقبض ذلك فهو واحد من اولياء الشجن وكادح إليه كدحا.وما اجمل الكلام الذى وضعت تحته خط يافنان.
العذوبة فى تلك الديار، الديار التى اسمها صوت يس عبد العظيم، تجرح وبحق تصيب بالإدمان. الشريط الموسوم ليل الغلابة والذى استمتعت بسماعه لا يحتوى أغنيتى" ليه ما افرح وليه ما أغنى" و " يا غيم بلا كلفة" فهل من معين.ذلك كوم وانظر حين يأتى يس ذلك البيت فى المقطع الثانى فى ليل الغلابة:
ماك شايف الدنيا فى عينى ظلام
تأمل كيف يعمل يس ذلك البيت ، بعد صوت رهيف، فى صدره فينمل صدرك ويغرورق فى عينيك شيئ يحكها ولايسيل، شيئ.............يا ألطاف تلك الديار.

العيد مبارك و المراد ينتم حبيبي

و نقابل الجايي فرحانين نفارق الهم

في بعدك بقاسي المرة بتألم

و اتصبر و اقول المولى ليا قسم

اأخر في شبابي الفات و يتقدم

إلا بس ما عارفو من عمري المفضل كم حبيبي

بتعذب عشان عينيكي ما بندم

و غيرن ما شكيت لي زول و لا إتظلم

في حورن بشوف سعدي و شقاي ملتم

و ريدن يجري في أعماقي مجرى الدم حبيبي

أساسق فوق دريب وصلك و لا بنجم

من شوقي العليك لي يأسي ما إستسلم

كلما أمالي فيك قدامي تتهدم

ارجع بدموعي .... و بكرة فيك أعشم حبيبي

اجيك مشتاق و أقول بالبيا اتكلم

و انسى انا لما اشوف عينيكي تتبسم

اخشى انا في عتابي معاك إتلوم

إنتي زعلك ما بدورو و ما بدورلك هم حبيبي

و اشوفك زي عيوني و من عيوني أضّم

و منو الفي خاطري صورته و في لساني نغم

غيرك انتي يا الغيرك حياتي عدم حبيبي

تعرف يا عادل، تلك أغنية مليئة بالشجن الذى يكبه يس كبا، هينا كشلال على واد، ووزنة الطمبور فى هذه الأ غنية من طمبور النعام حتى أنك تحسبها إحدى اغنياته، تأمل يأأخى مع عاطف خيرى كيف يصير الصوت فى نهايتها طفوليا باكيا ولا تبك. وأعجب يا صديقى لهذا الصوت الذى يتحرك فى مملكة النعام آدم على طفوليته وبكاه، ويا عادل مالك مانزللنا الغنوة دى ولا انت متل بدرى الياس ما درسوك كيفن تسو فى الكتاب، لا تنقطع يا جميل وأظنك كنز لهذا البوست.

وبدرى الياس بجيهو بى رواقة.

الاخ عزالدين عثمان
السلام والرحمة
للاسف ما عندى اى اغنية لياسين عبد العظيم. كنت استمعت هنا لبعض اغنياته ومن ضمنها هذه الاغنية.
اخر مرة شفت الراحل ياسين وسمعته كان فى رحلة نظمتها رابطة طلاب مروى بالجامعات والمعاهد العليا التى كنت احضر بعض نشاطاتها من حين لآخر.
الراحل بذل مجهودآ ابداعيآ كبيرآ فى تجديد الاغنية الشايقية. كما غنى قصائد "صعبة" من ناحية المدلولات الابداعية والسياسية.
رحمه الله. إنه الآن مع النعام آدم وغيره من المبدعين، بين جنات النخيل، لا هم لهم سوى الجمال والغناء والطنبرة.

http://www.youtube.com/watch?v=hG_XEr19KgY

الاخ/ عزالدين
وضيوفه الكرام
التحيه لكم وانتم تذكرون الراحل (غريد بلابل الدوح) ياسين عبد العظيم
والذى ستبقى روائعه خالده ، وهو احد ركائز هذا الفن الجميل
ونتمنى ان تكون هناك مبادره لاعادة انتاج هذا المبدع

الأخ عبدالغفار: نتمنى معك ان يوثق لهذا الفنان الفريد وايدك معانا

قريبنا الجميل عز الدين عثمان

تحياتى

كيفك

كم هو رائع هذا الفنان العظيم لكنا للاسف نعانى من نقص فى التوثيق له مكتوب او مسموع اومرئى

على ما اعتقد كان صديقا للمرحوم مبارك العوض وكان دائما يدندن باغانيه

لك الشكر

والتحت ده جزء من رسالة من الرجل الأليف والشاعر الصديق عاطف خيري في الرد على معايدة بدت بـ"العيد مبارك والمراد ينتم..حبيبي
كل سنة وأنت طيب
منذ فترة ليست بالقصيرة، كنت أدمن الاستماع لأغنية العيد مبارك والمراد ينتم لـ يس عبد العظيم عليه رحمة الله والى وقت قريب، حتى فقدت شريطه بعد أن طالته يدُ أحد الاصدقاء بالقاهرة ووجدت له العذر في ذلك ، المهم كان لدي احساس خاص بأن هذه الاغنية لم تسمع بشكل جيد ولم تجد حظها من الذيوع مثل رصيفاتها خاصة ذلك العقد الفريد والذي يبدأ بأغنية "ليل الغلابة" وينتهي بـ "حكاية الشافعة البريدا" مرورا بـ "مناي كل لحظة أشوفك" و"ليه ما أفرح وليه ما اغني" و"يا غيم بلا كلفة"، و"تعال طل البلد وأرجع" و.. و... و
كان ذلك الاحساس يمنحني متعة خاصة واستمتاع فريد كأنه يشبه اكتشافا خاصا لأغنية خاصة ، والحق يقال ان صوت يس عبد العظيم في هذه الاغنية بالذات حزين الى درجة بعيدة ، خاصة حين يصل الى نهاية المقطع قبل الأخير حين يقول : حبيبي ، ويصير طفوليا باكيا ومعلقا في الذاكرة الى الابد
إذن عيديتك من أكثر العيديات التي احتفلت بها حين قلت العيد مبارك والمراد ينتم ، حيث احلتني الى تلك البقعة الحبيبة والتي كثيرا ما اركن اليها ظانا انني الوحيد الذي ارتادها بمتعة ، فشكرا لغشوتك لتلك الديار الحبيبة : ديار اسمها صوت يس عبد العظيم

يا ود الياس لابد لعاطف خيرى أن يقبض ذلك فهو واحد من اولياء الشجن وكادح إليه كدحا.وما اجمل الكلام الذى وضعت تحته خط يافنان.
العذوبة فى تلك الديار، الديار التى اسمها صوت يس عبد العظيم، تجرح وبحق تصيب بالإدمان. الشريط الموسوم ليل الغلابة والذى استمتعت بسماعه لا يحتوى أغنيتى" ليه ما افرح وليه ما أغنى" و " يا غيم بلا كلفة" فهل من معين.ذلك كوم وانظر حين يأتى يس ذلك البيت فى المقطع الثانى فى ليل الغلابة:
ماك شايف الدنيا فى عينى ظلام
تأمل كيف يعمل يس ذلك البيت ، بعد صوت رهيف، فى صدره فينمل صدرك ويغرورق فى عينيك شيئ يحكها ولايسيل، شيئ.............يا ألطاف تلك الديار.


أهلا قريبى معتز:
يس و الحبيب مبارك العوض كلاهما رحل باكرا وكلاهم كما يقول اهلنا" ما زول حياة".
أرجو أن تكون هذه المحاولة وبتعاون الجميع بداية للتوثيق. أقعد عافية

ويس عبد العظيم واحد من غمار الناس ، من غمار أهل العفاض وكان يعمل جنديا،وقد عشق يس فنه، طرب له واخلص. وقد استفاد ياسين من براح الفضاء بعدانتفاضة ابريل- يطراهاالله بالخير- وغنى كثيرا فى الجلسات وفى حفلات روابط الطلاب بالجامعات كما كان كثير التجوال على مدن السودان. وقد أعاد يس اكتشاف عالم حميد بعد انقطاع المغنين الشوايقة عن ذلك النبع وغنى له من ضمن ما غنى " يا بت العرب النوبية" ولحميد مرثية لياسين نسعى للحصول عليها ونشرها هنا وليتكم تعينون.

غنى يس كثيرا للشاعر الفذ ابراهيم أبنعوف ، وان يخص الأخير الراحل بشعره فذلك اعتراف بالرجل وكبير.

" أى زول بيشكر جنا" من الأغانى التى أسمعنيها بدرى الياس الذى يرقد على كنز من غناء الرجل، فيا الصحافة 30 وكل الخبرا ورو اخوى الكاشف ينزل الغنا ده هنا كيف.

ده يا عز الدين فيديو نادر لياسين.
والجلسة شكلها احتفاء بمبدعنا الراحل ياسين وأغنيتو الجميلة "كيفن أصبر قليبي".

يقوم بالأداء عبد الرحمن عجيب (أقصى اليسار)، ود المساعيد (وسط) ومعاوية المقل "أقصى اليمين"، ويجلس ياسين جوار عبد الرحمن عجيب (الثاني من اليسار). ويبدو إنو من تسجيلات "نادي الطمبور" يطراهو الله بالخير. وفي التسجيل يكتفي ياسين بدور الكورس، مستمتعاً باحتفاء هذه الكوكبة بأغنيته. ودي أول مرة أنا أشوف فيها فيديو لياسين.

(بالله أخوك مابقى فقري؟)

جزيل الشكر للإخوة بموقع "البركل"..

الرجاء الضغط على مفتاح play للاستماع

شكرا يا حبيب
فقرى وبس؟ عقبال أخوك.كحلت البوست، كحلت البوست بهذه اللمة الجميلة، وشكرا لموقع البركل. يا بدرى ما زلت أبحث عن مرثية حميد لياسين

شكرا ياعزالدين والأحباب على هذه المساحة الخضراء ..
بدري الياس ياخي عذبتنا عذاب بالفيديو ده .. ياريت تعمل لينا ليهو حبال نكتفو بيها..
تلفونك وين ياصاحبي ,,?? أنا 6155861979
أهديك وصاحب البوست وضيوفه الكرام مجموعة من أغاني ياسين بروابط وثيقة ..
ولكم الشكر ..


لعشاق الطمبور2 .. 26 من أغاني المرحوم ياسين عبد العظيم

يس دة ذاتو الغنًى :

(ضمينى ضمينى يا صخرة المحزون...لا الصبر قادر يطيق لا الضم معاهو وسكون)

؟؟؟؟

انا حاسة من الصوت السمعتو فوق انو هو ذاتو سيد الغنية الما كنت عارفة ليها سيد

غايتو يا عز الدين ختيتو لى (شب) فى عكرة ليلى دة

انا قاعدة اسمع فى غنا يس لحدى ما تنفرج كلو كلو

(

Quote: ضمينى ضمينى يا صخرة المحزون...لا الصبر قادر يطيق لا الضم معاهو وسكون

ضمينى ضمينى يا فرحة المحزون ................ لاالصبر قادر أطيق لا الضم معاهو سكون

ولهان عليك قليب يهواك يحبك موت
شان ما يميل للغير كرّهتو فى البنوت

يا هو ياسين يا إيزابيلا وبدرى الياس حا يتم الغنية.

Quote: غايتو يا عز الدين ختيتو لى (شب) فى عكرة ليلى دة

دام صفاك زى ما بقول محمد السنى ودام صفا ليلك.

إيزابيلا: لقد أراح البوست كتفه وأرحت كتفى على شبالك، الدارة عجاجا لوا والبوست شالتو هوشة وأكلو كم سوط فوق ضهرو. أبقى لا جوة. ودى.

الأخ صابر

شكرا على اسهامك المقدر وبالله عليك لاتغيب، استمتعت بمحمد كرم الله ولكن لم أجد رابطا إلى ياسين؟

محبتى

Quote: كل ما احاول اكتب ليك مابقدر اعبر ليك عن الجواي مهما طاوعت اقلامي كلماتي واعلم يا اعانك الله على الصبر ان (يس) من مستنطقي الطنبور، واستنطاق الطمبور حالها حال (القفاز) وهو لمن لا يعرف..-الرجل الذي يصعد لتلقيح التمرة مهما كان ارتفاعها وهو عمل مجازف ينال صاحبه الخمس عند الحصاد- وكذلك كان يس ود عبد العظيم يعتلي اوتار الطمبور ناعمها والحاد وينقر على طريقة (سندق الصخره) حتى تخرج من ثنايا تلك الاوتار الحانا عزبة.. واحز يا صاحبي (يس) في الليل فهو نديم صعب المراس، وقد احسن وصفه صديقاً لنا ايام الجامعة حيث كان يسمي اغنية (المن الله واصل)-الشكافة- فهي في الليل لا تبقى ولا تذر، وقد صدق صاحب الكشافة فما من شخص زار بيت العزابة في (الصالحه) وسمع تلك الاغنية /الكشافة/ إلا وباح بما به من شجن (شواكيش على لغة الجامعة). واذكر كيف كان الهياج عندما غنى شقيقة (عثمان) اغنية هاشم الحسن العطا في اسبوع الجامعة الاهلية الثقافي حيث اندلعت يوليو مروية (من مروي) من جديد. عزيزي عز الدين ، شكراً على البوست ولم اتوقف حتى الان في مرثية حميد..بدري الياس يافقري وائل مابخليك تنوم بدري. اظنك تتذكر ياعز الدين كم من المرات اشترينا ليل غلابة يس وفقدناه، ولا اخالك نسيت يابدري الياس كيف كان حالنا في الامارات بعد سماع (لورجعت) في سيارتك اول مرة انتظاراً في كورنيش عجمان ، انت وانا ووائل، والحمد لله مارجعت وايديني فاضي، فلك حبي وتقديري ، مادامت سيارتي موجوده ومسجلها يدندن بتحفتك النادرة عن يس. تحياتي في النهاية على وعد العودة قريباً واتمنى ان تكون في صحبة مرثية حميد (حميد ، هل تسمعني؟)... مع فائق شكري واحترامي للصديقة شذى بله (بت العرب النوبيه). التي اتاحت لي فرص الوجود هنا...

هذه الرسالة وصلتنى عبر الايميل من صديقنا فى الترانيم عاصم كونكا

بعدين يا عز الدين انا بس أفك الفى يدى دة واجى

يا عاصم شكرا على المرور الجميل. بالفعل كم فقدنا كاسيتات يس وكم اشتريناها من جديد.

المٍن الله واصل
إيه فى إيدنا غير ما نبكى نشكى البينا حاصل
*****************************************

هم دايرين يفرقو قليبى شافو عليك مايل
منو الفيهم يفرق النسمة من زهر الخمايل
بلقاك فى الصباح واشراقو فى نغم البلابل
فى كلمات كتبتها ليك تب ما قالا قايل

ياسلام على الأداء فى هذه الأغنية، وويحك أيها السامع من انكسار المحبين المهيب.
ايزابيلا: قتلتنى، قتلتنى حين حملت إلىّ بيتنا.
مالك ما جيتى صاده

البت الكتابة وسمحة إيزابيلا
والله رجعتك للبورد براااها اجمل أغنية، ودخلتك هنا "سكرة" طمبارة ومجانين..

الأغنية الوعدك بيها عزالدين ياها دي مع المحبة ليك و"للدّبُل كونكا" :

فرحة المحزون

للشاعر/ إبراهيم أبنعوف

ضميني ضميني يا فرحة المحزون
لا الصبر قادر أطيق لا الضم معاهو سكون
**

يا عايشة في جوّاي بيك الفؤاد مليان
أنا من بعيد جاييك شارد من الأحزان
غفّلت قدري وجيت لاقيني بالأحضان
لفيني في جيدك طوق وألبسيني كمان
وريني كيف بيكون ذوب الحنان في حنان
ما إنتي لي وأنا ليك رغم اليكون والكان
أنا شاعراً غنّاك في أعذب الألحان
وأنا بين اديك فنان
والفن جنون في جنون
**

شن داير أقولك عاد ما القول علي تقيل
أنا والنجوم سُهّاد من ديل أتابع ديل
تنهش كلاب الشوق في جوفي طول الليل
لامن لحقت الموت والموت أباني عديل
يوماً يلمني فيك يوماً صعب بالحيل
كَتّرْتَلو التحنيس.. كمّلْتَلُو الوسيل
حلّفْتْو بالقرآن.. خصّمتو بالإنجيل
ناديتو من سجّيل
خيَّبْ رجا الممكون

**

ولهان عليكي قليب يهواك يحبِّك موت
صبّرتو بالآمال صبراً غزلتو خيوت
شان ما يميل للغير .. كرّهتُو في البَنُّوتْ
وسّدْتُو بالأحلام ختيتو في تابوت
رَهْبَنْتُو ليك رِهْبينْ .. فوَّتُو فوت الفوت
حَفَّظتو ذكر الرّيد ..يعبد مغيِّب يوت
لامن بقالو كلام ..لامن بقالو سكوت
نذراً علي مثبوت
والله يكون في العون
**

سامحيني كان زلّيت .. وكلامي ما أرضاك
ما الناس تسامح الناس وإنتي السماحة براك
يا رقة الحلوين .. يا قسوة القسّاك
بي ذاتك اتوسّل .. طالب عفوك ورضاك
مديلي حبل الرّيد .. قوِّيهو من تالاك
يبقى السّعد يصدق .. تمسك يداي يداك
واشوقي لليوم داك
يوم يقعد المازون
**

كده يا عز انا تاني لا بتلحق ولا حاجة، شوف ليك زول "تكنوقراط" صاحبو..
،
وبكرة عندي ليك مفاجأة هنا عيار "جَبَنَة في بلكونة مطلة على صيدلية الحرية"..

بدرى الياس

والليل دة أسود ماجن فى سواده

وانت وعز ماليين الدنيا بالهسهسات

وانا على سواد ليلى -اتشبث بنقرة على طنبور

واشكر فى سرى الحداثة

-ياسين دة غناهو بيعين على قفر الروح

ووفزة القلب

Quote: صبّرتو بالآمال صبراً غزلتو خيوت

و

Quote: الصابرات روابح لو يجن قُمًاح

لو يجن اصلا...!!!!

Quote: ولهان عليكي قليب يهواك يحبِّك موت صبّرتو بالآمال صبراً غزلتو خيوت شان ما يميل للغير .. كرّهتُو في البَنُّوتْ وسّدْتُو بالأحلام ختيتو في تابوت رَهْبَنْتُو ليك رِهْبينْ .. فوَّتُو فوت الفوت حَفَّظتو ذكر الرّيد ..يعبد مغيِّب يوت لامن بقالو كلام ..لامن بقالو سكوت نذراً علي مثبوت والله يكون في العون **

يا بدرى : المقطع أعلاه ذكرنى عاطف خيرى:

يا صالحة لا جيتك لا فت منك فوت
دايما معلق بين بين الحياة والموت
أدخل ضلام الناس نورك يجينى خيوت
.....................إلخ

Quote: وبكرة عندي ليك مفاجأة هنا عيار "جَبَنَة في بلكونة مطلة على صيدلية الحرية"..

قريفتنى ولا تتأخر الله لا يعيقك

ياسين مغني الشجن

..............
............
.........
......
...
..
.

الاخ/ عزالدين
وضيوفه الكرام التحيه لكم
واصل توثيقك للراحل المقيم الصديق الفنان ياسين عبد العظيم

نعم رحل يس عبد العظيم عن دنيانا دون توثيق

رحم الله الصديق ياسين عبد العظيم

واسكنها فسيح جناته بإذنه تعالى

يامن كنت للجميع صديق وفيا

وحادى مسيرة عسيرة ومهذب نفوس ومشذب افعال

اهلا بيك يا ود أبنعوف وإيدك معانا.

ولله يا بدرى مااااااااااااااااااابتتلحق بعد ده. لكن عليك الله الصورة نكتها من ياتو محفضة.

بعد ده تشيل شيلتك، سأترك لك أمر هذا البوست

،

Quote: بعد ده تشيل شيلتك، سأترك لك أمر هذا البوست

وأنا قبلت يا عزيز،
ودي المرثية الكلمتك عنها، وبهديها ليكم كلكم وأخص الأحباء: عادل عثمان وصابر عبد الهادي.
وجزيل شكري للصديق الشاعر: صديق محمد طه، الذي لولا ذاكرته التي ما زالت كروحه على نقائها، ما تحصلنا على هذا النص. والله صديق ده فعلاً "ولي" من الصالحين، وإلا فكيف يكون زوج "لمرتين" وقاعد في جده ويحفظ القصايد في نفس الوقت؟ يا كم نحبك يا رجل.
،
،

مرثية الراحل ياسين عبد العظيم
شعر حميد

حُزُنّا عليك بيبقى غضب
غضب مشروع
تدودي حمامة في دبش الغنا الفاسد
مناحاتو
ضَرَاعاتُو التّضاضِي تئن
عشان قلب الحبيبة يَحِنْ
أجل، لا حنّ لا كانت حبيبة آ خوي
ولا لما الحبيب إن كان
مسبّب عبرتو وراجيكا يا خايب الغناوي البيش
تنوح وينوح..
ويسقط حُبْ إذا ما حُولَقْ الرقراق عليهو يموع
ويسقط لحنك الرّاكد ..
كمنجاتك
سلوك طمبورك المرخية
يا مزوِّر جواز العشق يا ذاك المغني الياهو
يا مُنْدَشْ وكِت فتق القوافي الجوع
تسقط غنوتك تسقط..
وأقيف شاهد عليك وعلي
أنا البشّرت لحظة طيش
والبت الأبت ترقص، تعيش واسقط..
،
أيا هادي المُغني الفنجري المعلوم
نخيب نسقط إذا قصّرنا يا وتر الفقارى وراك
وغيّرنا الغنا المحموم.
غناك الدّغري
يا دغريتك المبثوثة شِقّيشْ ما مشيت باراك
غناك العينو ملياني
وشيهو محل يروح واحد
سمح مشروح
وإنت محل تروح واحد، وِشَيْ مطروح..
،
سلام في سلام
تمام في تمام..
تمام فلاح.. تمام عامل
تمام إنسان وماك ساهل
متِلْ ما شعاع نزل داخل، بيوت ناساً غبش بالهم،
ملاها ثبات وراح راحل،
جناح الحِن ويوم الليلي بات مجروح
أيا فارساً يا مجهول، وراك كيفِنْ؟
سَمِحْ. كيفن غنيواتنا؟
إذا مرقت براها بلاك، منو اليسرح معاها بلاك..؟
تصل لي مِيسه زي الغيم. تَضُل ما تضِل
واللا براها يتلقاها دابي الجو ..
هجاير الليل ..
طشاشات الصعيد. وسموم تسوي الهوْ..
تجفل غادي.. تجفل جاي..
تقع لا حيلة بين بلدين
بلد جملة غُنا الطمبارة
بلد بي جاي: نشيد ياسين.
،
نشيدك كالتعب مارد
مهبهب بالغضب واقد
غضب يا وليد، حُزُنّا عليك، تغيب يطلع بدل فاقد..
أيا ولداً حزُنّا عليك يقولّك: عَمِّرْ الطمبور..
وسِنْ سِلْكَاتُو بين نغمين
وجُزْ رقبةْ غناوي الزِّيف ..
ونَشِّن تالا ليل الرِّيف:
ظلاماتو..
عذاب أهلو..
معاناتم محل رحلو..
وأمش ما تقيف .. أمش ما تقيف..
فيا "عفّاضي" ديل فِقَرَاً عمار بيتم خراب بيتنا
فيا طمباري يا ود الدِّويحية الغبش جاهد
أيا ولداً مستّف بي تَرَا العفّاض .. ملفّح بي سماواتو
معمَّر بي غد الأطفال .. مدرَّع بي معاناتو
هيا انسِف قبرك الكاذب
وخُط بالدّم علي الشاهد:
تموت يا هادم الغنوات .. تطق بالهكمة والدّكمة
يبق في محلتك إنسان
يشر ضو الحياة الواعد
نشيد راعد
كما الياسين..

نشيد:
تَفْضَلْ غُنْوَاتَكْ ضُل قيلَةْ
ضد شمس الفجعة القلاية
ترتاح أو تاخد أنفاسه الناس الجاية من الورشة .. التُرَب .. السوق .. الطّاحونة
الجّامع وطرف الانداية..
فزعوك الفُقَرَا أياديهم
تالاها امتديت كارديق.
إنطرحت أصابعيك رابون ..
طالت آهاتك بنبون
يا سَكْرَة وحضْرَة ومُصلاية
من لاقيناك عرفناكْ .. تربال أيامنا وغنّاية
طلّاع النخل الكَدْرُومِي
الضام على قلبو قضيتنا
كالأرض كما الجرح اليومي
ضافرين رامْلِنْبُو هويّتنا
**
مشهد حواري سمج:
- الغنوة دي ظاهرة سياسية، وحا تودي رقبتك في داهية..
ولو مرّت بكرة البرنامج
في ناحية وكلّنا في ناحية..
- طيِّب والتاني؟
- أقول ليك:
أمسك طمبورك ده عليك..
غن في القعدات .. في الرحلات .. في الحفلات المختصرة
غن...
،
وغنّيت في كل الساحات..
بالنّفَس الحار الإنساني
برّدت حشا أولاد الفقرا ..
رقّصت بناتا السّمحات
أبشِر يا باشِر من تاني ..
عُقُبْ رجَّعتَ الرّايحات
يااا الله عليك يا ياسين .. أقْفُر خُطا غيمتاً ما جات
**
فاض نهر قضيتك فاض فاض
ضد سِكّةْ عرق الإجهاض
مركب شهدانا الجايين .. هدّن بنا قَبَلْ "العَفَّاض"
نلقاك يا قاعد تنوضا .. فوق قيف الغُبُشْ الفيَّاضْ
يا واقف حيلك وتِنْقَضّ .. على آفةْ الزّمن الرَّضْرَاض
ويا إمّا رَتُوتيكْ والعرضة .. وقدّامك عرب العفّاض
الزّحف الصحراوي.. الأرضة ... المرض.. الهدّام العاضّْ
تاريخ الجُزُر المنقرضة ..الفقر الهتك الأعراض
عينيك تطشِّشْ منقبضة .. العالم ينشرَّ بياضْ
تتلفّحُو خالي من الفوضى .. والعسكر وكل الأمراض
زي زيَّكْ زيّك ماب نرضى .. الموت يا عريس العفّاضْ
يا مقدّم باطفال الرّوضة .. شُويِمْ يا عريس العفّاض
يا سِبْحَةْ أُسُرْ الطمبارة
والأيدي الشّهرت جيتارا
للآخر نازفة محاجرنا
بالغضب الدينو دفاترنا
والطبقة وأمي وجيفارا
قُمنَا وشدّينا حناجرنا
ما بينك وبين "فكتور خارا"..
*

Quote: أيا هادي المُغني الفنجري المعلوم نخيب نسقط إذا قصّرنا يا وتر الفقارى وراك وغيّرنا الغنا المحموم. غناك الدّغري يا دغريتك المبثوثة شِقّيشْ ما مشيت باراك غناك العينو ملياني وشيهو محل يروح واحد سمح مشروح وإنت محل تروح واحد، وِشَيْ مطروح.. ،

ها وانت كذلك يا بدرى دغرى فى حب الرجل وغناه الدغرى ، وشكرا على السهر لتكتب. وشكرا للرهيف صديق ولزوجتيه اللتين تركتاه لنا سالما وشكرا لحميد وواصل إمتلاكك هذا البوست

سلام آ ناس

كتب عاصم كونكا:

Quote: يا صاحبي (يس) في الليل فهو نديم صعب المراس، وقد احسن وصفه صديقاً لنا ايام الجامعة حيث كان يسمي اغنية (المن الله واصل)-الكشّافة- فهي في الليل لا تبقى ولا تذر، وقد صدق صاحب الكشافة فما من شخص زار بيت العزابة في (الصالحه) وسمع تلك الاغنية /الكشافة/ إلا وباح بما به من شجن (شواكيش على لغة الجامعة).

وعقّب عز الدين:

Quote: المٍن الله واصل إيه فى إيدنا غير ما نبكى نشكى البينا حاصل ***************************************** هم دايرين يفرقو قليبى شافو عليك مايل منو الفيهم يفرق النسمة من زهر الخمايل بلقاك فى الصباح واشراقو فى نغم البلابل فى كلمات كتبتها ليك تب ما قالا قايل ياسلام على الأداء فى هذه الأغنية، وويحك أيها السامع من انكسار المحبين المهيب.

ووحاتكم الغنوة دي -"الكشافة" زي ماسمّاهاالراجل - بتجرِّسني عديل كدي.
وبهديها في الخميس ده لكل من عمّر حوش ياسين وعمّر روحو بالأشجان:

(أبكي انتي وانا الاتبكى والمن الله واصل
إيه في أيدنا غير ما نبكي نحكي البينا حاصل)...تعالو نبكي شوية

،
،

اللاااااااااااااااااااه،آااااااااااااااااااااه يا بدرى

الله لا يلمك فى غنا كهذا، فى خميس كخميس أمس ذات غربة لديك. لم أفق منه حتى اللحظة هذا الياسين والحمد لله اننى لوحدى لئلا : يشيلون حالى ودمعة بالى. واصل

كيفن أصبّر قليبى
كيفن أعمل حسابا
مادام عشمي في نظرة
والعندو النظرة ما في؟!
***
الحبيب بدري الياس، ها قد إفترقنا على (يس)، وإجتمعنا عليه..!
آخر ما خرجت به من مدرسة كريمة الثانوية بعد وداعكم قبل 16 عاماً أو يزيد، شريط كاسيت لـ (يس عبد العظيم)، أهدانيه الأخ الجميل(أمير رزق)، من أولاد الزومة الجميلين.
من يومها لم ألتق بدري الياس ولا أمير ولا عاطف خيري، ولا الأستاذ عبدالقادر ولا الزولة الــ (العندو النظرة مافي)..!

أها، فتحتو (جرح الطمبور) وخليتو الاوتار تنزف ومشيتو وين؟!

Quote: كيفن أصبّر قليبى كيفن أعمل حسابا مادام عشمي في نظرة والعندو النظرة ما في؟!

مساء الشجن يا شباب

الاغنية دى سمعتها قبل تسعة والا عشرة سنة من الفنان صديق احمد

فى المسرح الخارجى لقاعة الصداقة


قبل ما يختفى اختفاءتو دى


راجياكم تخلصوا من الكلام عن حبيبنا يس

وتفتحو لينا ملف صديق احمد

الروح متقريفة لى اغنياتو كيف!!

راجل عجيب

مساء الخير يا شابيل( تصغير ايزابيلا)

هو الزول أريتو مافى كان تبقى هينة. الزول فى لكن مابى، شفت كيفجنس دلال واحد؟

الغنوة غناها فى الأول يس وأن يغنى صديق أغنية لياسين فذلك تقدير للرجل عظيم من فنان هو كذلك عظيم.

أما انك دايره بوست عن صديق فأنا أصلا شايقى من كاليفورنياومابقدر أباريلك الطنابير، لكن حاولى الجنى المطموس بدرى الياس.

وبعدين تعرفى يس ده رغم أننى أسمعه من زمن، لكن أسع أضانى رايقة من كلام الخمج وبسمع بى مزااااااااااااج و..........، وفى أغانى لسه راجى ود الياس ينزلها، وكمان إذا أنا بقيت أعرف أنزل الأغانى فزى ما قال أخونا الفلاتى: تعبت معاى يا رمضان.

شابيل: إتوسدى صوت يس ده واكلى نارك. مودتى