Post: #1 Title: يارمزا ولي يارمزا او هجيج السبعينات Author: طارق الأمين Date: 03-27-2008, 05:22 PM
يارمزا ولي يارمزا
انتو ما عارفين شارع الكاملين
يارمزا ولي يارمزا
الحجه والتوبه من طريق سوبا
فالو الصيد ورد في حله حمد (لاحظ كنا هسي في الكاملين لكن ما تحك الموضوع)
وقرض الناس قرض
قرض الناس قرض
قرض الناس قرض
كبككبككبكبككبك
انتهي النص
والله الاغنيه دي ومعاها زي دشليون واحده زيها
بذكروني ايام لذيذه ومااابترجع تاني
وماتفهموني غلط بالنسبه لي موضوع العمر وكده
انا كنت طفل وبدون اي صلعه واسالو ناس ابوساندرا
لكن لحدي يوم الليله في ذاكرتي الاف من اصوات الباعه
والمغنين والمداح و المؤذنين
عليه فقد قررت ان اخصص هذا البوست وبكامل قوابا العقليه
لاغاني الهجيج في السبعينات والتمانينات بالتدرج توثيقا ومتعه
من اغاني الحفلات والاعراس او حتي جلسات السمر والطرب اذا ساعدنا البعض
اي غنيه هججت بالناس نديها حقها مهما كانت كلماتها او لحنها
وانا لي يوم الليله مافاهم رمزا يعني شنو
لكن كان غنوها لي اسي بسكسك وبسكسك وبسكسك
يدكم معانا ياناس تمبس ومن لف لفهم
والله يسترنا من ناس د كين ومن لف لفهم
انا ح ابدا وفي انتظار الفطاحله
المولانات يمتنعون
Post: #2 Title: Re: يارمزا ولي يارمزا او هجيج السبعينات Author: حسن الجزولي Date: 03-27-2008, 05:33 PM Parent: #1
الفراغ ماعندك ياطروقي!!,,عمومآ بجيك راجع
Post: #3 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 05:34 PM Parent: #1
اول اغنيه شاهدت فيها رجالا ونساء يسكسكون في حفله قي الحي
كان مطلعها بقول
جننتني انتا بي زرايرك السته
جائزه لمن يكمل النص
نواصل
Post: #4 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 05:44 PM Parent: #3
من اغاني الهجيج في حفلات السيعينات
الله ليموني الله ليموني الله ليموني
البرتكان الناير
وكان عندها رقصه وقميص ليموني
وح نلاحظ كما سيرد ذكره (ياود يافقري)
ان الليمون كان قابض الجو اكتر من البرتكان
ولم توضح الدراسات سببا لذلك
تعال ياحسن الجزولي يابتاع الدراسات
ورينا كان عندك رقبه لي شعرا قدر دا
Post: #5 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 05:56 PM Parent: #4
من الملاحظ ان الجاز والليمون من اكتر السلع الاستهلاكيه التي لاكتها السن المغنون والمغنيات في حفلات ذلك الزمان
حيث مازال البابور جاز
وخلو يشتغل الشغل بالجاز خلو اليشتغل
جدا نخلي اليشتغل
اما الليمون سقايتو علي
فتؤكد ان هذه السلعه كانت محط الانظار الفنيه
وموضه الشعراء
انا ماعارف الغنا بيبدا بالليمون والبرتكان في اي بلد ككوره شراب وبعدين يمشي لي قدام
ولي الكلام دا خاص بالغنا حقنا وبس
وهل دا ليهو اثر في طعم الغنا نشيف علي قول اهلنا
Post: #6 Title: Re: يارمزا ولي يارمزا او هجيج السبعينات Author: بشير أحمد Date: 03-27-2008, 05:57 PM Parent: #1
الاخ الرائع طارق الامين
Quote: بسكسك وبسكسك وبسكسك
السكسكه انواع ياحبة
القرد القرد
النبق النبق
ودردقني في النجيلة طبعا دي اخر update لمعلوماتي لانواع السكسكة
ولو عندي جديد هاتو
Quote: وماتفهموني غلط بالنسبه لي موضوع العمر وكده
انا كنت طفل وبدون اي صلعه
اخوي طارق الفيك بدر بيهو من هسع
عمرك كم؟
اخوك/ ابو أحمد
Post: #8 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 06:13 PM Parent: #6
Quote: اخوي طارق الفيك بدر بيهو من هسع
عمرك كم؟
لن احفل بمثل هذه الاسئله الانهزاميه يا ابو حماده
سنواصل حتي يعود للبلاد هجيجها ولانامت اعين البتاع وكده
واحده من ملكات اغاني الهجيج في السبعينات
حني حني علي انا يا ستي
الحاصل بي سببو انتي
لابسه توب منقوش الفراشه
اعايت فيك وانتي ماشه
الحاصل بي سببو انتي
وعي من اغاني الفنان كمال ترباس
وهو يغنيها احيانا بكلمه تتي بدلا عن ستي
وقد كانت الاغنيه واسعه الانتشار
واصبحت كلمه تتي هي كلمه الغزل الموضه في البلد
كان تشاغل بها اي بت سمحه
وتقوليها وين يا تتي
غايتو دي كانت الحاجه الحاصله
لكن كانت عواره ولي ما عواره دا ما موضوعي
Post: #7 Title: Re: يارمزا ولي يارمزا او هجيج السبعينات Author: WadAker Date: 03-27-2008, 05:58 PM Parent: #1
.. وحنى على انا ياتتى الحاصل بى سببو انتى* ... اغانى عصر الدينا دبنقا اى العصر الديناصورى ... ______
*الدفره دى اكيد حاتعينك ... يامبدع
Post: #9 Title: Re: يارمزا ولي يارمزا او هجيج السبعينات Author: shaheed gadora Date: 03-27-2008, 06:22 PM Parent: #7
المبدع طارق ..
Quote: كان تشاغل بها اي بت سمحه
وتقوليها وين يا تتي
مشيت جري شلتها سألت حبوبتي قلت ليها تتي دي شنو ..
قالت لي حليل الزمن الجميل ...
تحياتي
Post: #11 Title: Re: يارمزا ولي يارمزا او هجيج السبعينات Author: khaleel Date: 03-27-2008, 06:27 PM Parent: #9
طروقة
وانا اغنية بتاعة بنات سمعتها بتقول
البيت مقابل البيت
قال تعالي وابيت
ولو ما ابوي واقف والله كنت جريت جري
والعندي انا ما بدي وبحر ابروف انا بعدي
Post: #10 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 06:25 PM Parent: #7
وفي تنافس ملحوظ بين الخضر والفاكهه فقد حدث تقدم نسبي طفيف للمنقه وسجل الليمون والجاز تراجعا في بورصه
الغناء السوداني وذلك بظهور
حلاوه جك يلا يامنقه
جك جرك جك جك يلا يا منقه
ثم انحياز البلابل الواضح ضد الليمون والجاز
يالشايل المنقه ادينا المنقه تررم
Post: #13 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 06:42 PM Parent: #10
ساعدت حكوماتناالرشيده المواطنين واجبرتهم علي ترك الغنا لليمون والسلطه واستجلبت لهذا الغرض خصيصا
ما عرف وقتها ب بصات ابو رجيله التي سحرت الناس خاصه في قصه الباب الخلفي الذي يفتح بذر من عند السايق
حيث الكثير من القصص هنا لكنها خارج نطاق هذا البحث ( امك بقي بحث اديييل كده)
اموت انا في الرميله
اموت انا في الرميله
يجيب خبري ابرجبله
نادو لي حنان
اموت انا في البكاسي
اموت انا في البكاسي
يجيب خبري تكاسي
اغنيه مؤثره وتغنيها الفتيات بكثير من الشجن
اتمني ان تكون الاخت حنان المذكوره في الاغنيه قد استجابت
والا يكون قد حدث مالم يحمد عقباه بناء علي ماورد من تهديدات اعلاه
والله ولي التوفيق
Post: #12 Title: Re: يارمزا ولي يارمزا او هجيج السبعينات Author: عوض محمد احمد Date: 03-27-2008, 06:40 PM Parent: #7
Quote: جننتني انتا بي زرايرك السته
جائزه لمن يكمل النص
و حلاتك كمان بالكسكتة اموت انا فى بنات كلكتا
Post: #16 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 07:00 PM Parent: #12
من اجمل اعاني السبعينات وللمفارقه
كانت عن فاكهه لاتثمر رغم انها تزرع في البيوت وتنمو وتبخل بثمارها عاي الفقراء
كان شارع افريقيا الحالي يسمي حينها ب شارع الجنه
وهذه التسميه ببساطه قد كانت لانه الشارع الوحيد في سبعينات الخرطوم الذي تباع فيه الفواكه النادره والمستورده
لكن التاج مكي الساحر سحر الناس باغنيته الراقصه
كان مغاطنا ومامصدقنا اسال العنبه الراميه فوق بيتنا
خاينه يادنيا وظالمه يادنيا ترالالا
وبدخول العنب في الاغنيه السودانيه يكون التاج مكي قد ادخل الليمون في امرا ضيق
ولا نامت اعين الجبناء
Post: #14 Title: Re: يارمزا ولي يارمزا او هجيج السبعينات Author: alfatih Date: 03-27-2008, 06:49 PM Parent: #1
طارق السلام عليك سلام يتدردق دردقة وشايل الجردقة فى جردل
الليمون دا احتمال يكون مطمن جدا فى الزمن داك لاسباب اذكر منها الطمام وطبعا لمن تشوفه قلبك بعمل شححح وبترتفع درجاته بسرعة مقياس ريختر من الدقات .. وهنا ما عليك الا تشيل اقرب باغة وتدقها لمن عينها تطلع .
وكما قال الفنان الله الليمونى ... البرتكان الناير
وقال الفنان داك برضو .. الليمونة الخدرا سقوها بالجردل .. لالا يا لالا قصيبتو سكر
والسكسة هنا يبدو انها من الجناين .. ولى جناين الشاطئ ..
بالجمبة : قال ليها لمن اشوفك يطير النوم من عيونى .. قالت ليهو يخسسسى عليك ..انا باعوضة
وسكسك فى الزمن الجميل
Post: #15 Title: Re: يارمزا ولي يارمزا او هجيج السبعينات Author: طارق جبريل Date: 03-27-2008, 06:54 PM Parent: #1
Quote: والله الاغنيه دي ومعاها زي دشليون واحده زيها
بذكروني ايام لذيذه ومااابترجع تاني
وماتفهموني غلط بالنسبه لي موضوع العمر وكده
انا كنت طفل وبدون اي صلعه واسالو ناس ابوساندرا
لكن لحدي يوم الليله في ذاكرتي الاف من اصوات الباعه
والمغنين والمداح و المؤذنين
ابو الطروق كيفنك ياخي ناس كتار هنا عارفين انك دفعتي مالك عايز تكبرنا ياخ
Post: #17 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 07:10 PM Parent: #15
ولان لليمون معزته ومكانته الراسخه في الاغنيه السودانيه
فقد غضب وتعزز فرقصت خرطوم السبعينات علي انغام
وقام اتعزز الليمون عشان بالغنا في ريدو
فالليمون عويو عند شعراء الاغنيه
وعزيز عند الناس خاصه في رمضان
مما حدا بالرايع رمضان زايد
وقدسمي نفسه كذلك ليربط الناس بين اسمه والليمون
انتزع هذا الرجل اسماع اهل السبعينات باغنيته
عيني ياسبب التعب
شفت الجمال شفت العجب
علما بان العجب قد تم تسجيله في المريخ بعد ذلك بعشرات السنين
قصه عجيبه
Post: #18 Title: Re: يارمزا ولي يارمزا او هجيج السبعينات Author: shaheed gadora Date: 03-27-2008, 07:13 PM Parent: #15
هاك دي ..
حبيت الشيوعي .. الشيوعي أريت الرجعي طاير
حبيت أب سجارة .. أب سجارة أريت اب سفة طاير
حبيت اب قجيجة .. أب قجيجة أريت أب صلع طاير
-------------------- وماتفهمونا غلط
Post: #19 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 07:23 PM Parent: #18
Post: #20 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 07:51 PM Parent: #19
عوض محمد احمد
كضبا كاضب
ومازال العرض قائما ياعزيزي
Quote: ابو الطروق كيفنك ياخي ناس كتار هنا عارفين انك دفعتي مالك عايز تكبرنا ياخ
طارق اتخارج من الحته بسرعه كان خايف الفضايح
الدفعه كلها جايه
Post: #21 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 08:36 PM Parent: #20
نتفلسف شويه وبعدين نواصل
اجمل مافي اغاني عذه الفتره
انها كانت عفويه وتلقائيه
المغناه بواسطه الاذاعه منها
او اغاني الشارع العام في الخرطوم
الجو الذي كان ماثلا ويدفع الناس الي الغناء
كان اكثر عفويه
والوجدان اكثر عافيه
والبراءه والبساطه اوضح للعيان
ماعارف هل كان دا شعوري الشخصي وانا صبي؟
ولي فعلا رغبه الناس في الحياه وحبهم ليها كان اكبر
عموما بمناي عن ظروف وتفاصيل ذلك الزمان
الاجتماعيه والاقتصاديه والسياسيه
لكن الفرحه والابتهاج في نفوس الناس كان اعلي
والنكته تزين المجالس
واغاني الرجال والنساء مرحب بها في اي مكان
ولبالي الانس والسمر فاخره ونديه وعذيه واكثر طلاقه
ثم ان الغناء سلاح في يد المغني
وسناتي لاحقا علي ذكر اغنيه نسائيه شعبيه
هددت عرش حاكم الخرطوم في ذلك الزمان
وعجلت برحيله في ظني
نواصل
Post: #22 Title: Re: يارمزا ولي يارمزا او هجيج السبعينات Author: محمد الأمين موسى Date: 03-27-2008, 08:42 PM Parent: #21
نادو لي حنان الليل حنان دي معذبانا وساكنة الحي معانا اليل
Post: #23 Title: Re: يارمزا ولي يارمزا او هجيج السبعينات Author: وليد محمد المبارك Date: 03-27-2008, 09:15 PM Parent: #22
حمام الجك يلا يا منقا وجك جك جك يلا يا منقا
لقيتو ماشي براه يلا يا منقا وشنو كده بي وراه يلا يا منقا
__________
يا بهية شباب الزمن جنية وعرس مافي يا بهية وشباب الزمن جنية وغادي غادي
__________
مغص مغص يالغذابة انتو موتو مغص يالعزابة
_____
Post: #24 Title: Re: يارمزا ولي يارمزا او هجيج السبعينات Author: Farahat Sayed Date: 03-27-2008, 10:12 PM Parent: #23
ياالابس اللبني
واللبني في لبني
انت نابليون ولا جون كيندي
دي هجيج الخمسينات
Post: #32 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 11:38 PM Parent: #24
الاخ فرحات
فرحتنا بالمرور
ياريت نوثق هنا لي كل ما اسعد الناس
دون قيود
البسطاء منهم وغير البسطاء المهم نوثق لي حياتنا
وبعد داك نتجادل فيها زي ما عاوزين
شكرا كتير
Post: #25 Title: Re: يارمزا ولي يارمزا او هجيج السبعينات Author: Salah Abdulla Date: 03-27-2008, 10:15 PM Parent: #23
طارق ،، يا حقنا ..
مادام الموضوع فيهو هجيج ، فستراني مرابطاً ها هنا ..
أجمل نساء الدنيا ( وما زالت ) ,اجمل طالبة مرت على جامعة القاهرة الفرع .. وآآآآآآخ أنا من ( ناس تجارة ) .. كانت بتغني لي : الزول الزول مالو ما جاء الزول دكتور مالو ما جاء
ود حلتنا مالو ماجاء النسى خوتنا مالو ما جاء
(الجايي ده المهم ، والكان بيكتلني لمن أسمعو منها ) صلاح التش مالو ماجاء والشنب حش مالو ماجاء
طارق ،،، سلم لي عليها (انت بتعرفها) وأسأل معاوية السمين الشين الكان عامل بيحبها ده ..
________________________ حاجز لي مكان هنا ..
Post: #26 Title: Re: يارمزا ولي يارمزا او هجيج السبعينات Author: طلال عفيفي Date: 03-27-2008, 10:28 PM Parent: #25
أظني يا طارق مشتاقين يا رمزا ..
فرحان بيك راجع للكتابة العجيبة التشبه عجوبيتك ..
سلامات
Post: #27 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 10:50 PM Parent: #26
Quote: نادو لي حنان الليل حنان دي معذبانا وساكنة الحي معانا اليل
محمد الامين يالذيذ
لكن لقيتك حااااااااافظ
تمام دفعه وكده
Post: #28 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 10:51 PM Parent: #26
Quote: نادو لي حنان الليل حنان دي معذبانا وساكنة الحي معانا اليل
محمد الامين يالذيذ
لكن لقيتك حااااااااافظ
تمام دفعه وكده
Post: #97 Title: Re: يارمزا ولي يارمزا او هجيج السبعينات Author: حسين محي الدين Date: 03-29-2008, 05:41 PM Parent: #18
يالذيذ ده كلام سمح وبعدين يا طارق عشرينات عشرينات انت بس قول النصيحة الكلام سمح ولا لا
Post: #29 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-27-2008, 10:57 PM Parent: #1
طارق افتش ليك في حفلة وردي في القاعة زي ما وعدتني القاك في بوست .. شكلك جيت متاخر .. كلنا مخمسين يا حبه .. __ دي كيف .. من اول يتاير يجينا حمادة طاير .. يقول اما في الجزائر ..
* وحات ابوي حكاها لي ابوي صفير وجاهل
شكرا لاخراجنا من زمن اللاوعي للوعي .
Post: #30 Title: Re: يارمزا ولي يارمزا او هجيج السبعينات Author: طارق الأمين Date: 03-27-2008, 11:17 PM Parent: #29
ياوليد يا مبارك ياشفت
نورت يامنقه
عارفك ومجربك قبل القاك
يقصر الملح
تعرف يا مان
اغاني السبعينات
واناشيدا
ودكاكين اليمانيه الناصيه
وكولوزيوم
وجراب الحاوي
والقطر الشالك انت
يتكسر حته حته
ومتوكل كمال
والنقر جا
واووووو دشكا
ادشكا دشكا دشكا
شكرا بس
Post: #31 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-27-2008, 11:29 PM Parent: #1
من الطارق يا طارق ؟؟؟
الطابق البوخه جا ندا يهتق ... تصدق ... وقع من الدوخه ...
يا طارق دايرنا نقول شنو ..
اوكي ..
قالو لي بتحبي في السلاح الطبي .. انا انا .. ما جبر الخاطر .. كم سنه ::
اللليله مسافر انا انا ة..
ما جبر الخاطر .. مين انا ..
وحات ىابوي برصو دي من ابوي .
Post: #33 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-27-2008, 11:46 PM Parent: #1
طاؤق \
نادو لي حنوني .. نادو لي حنوني ..
___
ال فيك اتعرفت .
Post: #34 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 00:19 AM Parent: #33
صلاح عبد الله
وطلال عفيفي
ومنعم سليمان
شكرا كتير والله
جاييكم لانكم غالبا
جزء من الموضوع اساسي
طبعا مانذكره لا يعني
ولاينفي ان السبعينات
وغيرها لها نجومعا الافزاز
ممن يعرفهم شعب السودان
دون حوجه لذكرهم هنا
فالكلام هنا عن وردي او عثمان حسين
او الكابلي ليس بالضروره
من مرامي واهداف هذا البوست
فاللعمالقه مكانهم
لكن المقصود هنا الحديث عن اخرين
اطربو واكان لهم الاثر في اسعاد الناس
كما لايفوتني ولا يفوت علي فطنتكم
اننا هنا نتحدث عن مجتمع الخرطوم العاصمه تحديدا
وما كان يتهججها علي وزن يتهددها هذه الايام
تحياتي وسنواصل في غالب الامر
Post: #36 Title: Re: يارمزا ولي يارمزا او هجيج السبعينات Author: سلمى الشيخ سلامة Date: 03-28-2008, 00:33 AM Parent: #33
انتو بتخافوا من (السن مالكم ) عالم جبانات لكن يا طارق ما بالغت النوريك الخدار خدارى ما بخلى الليلة وين يالخدر اللونو زرعى وهاك الخدار البمبى الشماسة اذونى كحيل عيونى وكمان واحدة عشان ما تزعل جننونا بالخدار الليلة وين يا ناس السكنوه جنوب دارفور سبعينات عندنا ثمانيانات عندنا وباب بيتو بالاخدر حمادة التش مالو مالو ماجا شنبو حش مالو ماجا اطير وانقص زولى سادة ولاقيتو باللفة الالم العلى خف واخر واحدة سلمى الشيخ سلامة يا بلال على اموت انا فى الاذاعة وووب الاذاعة وفى قسم الدراما دى اغنية عميرى ومجدى النور المفضلة عليهما كل الرحمة لكين ناس كابو وابراهيم خضر عملو واحدة جديدة سلمى الشيخ سلامة وانا جريت لى حفيانة غايتو دى دايرة ليها ناقد من الالفية الجديدة
Post: #35 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-28-2008, 00:30 AM Parent: #1
ابو لي بي .. ابو لي بي ابو لي بي اللبن ابو ابو لي بي ..
___
لقيتني كيف ؟
برضو من ابوي وحات ابوي ..
عاش ابوي
Post: #37 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 00:37 AM Parent: #1
من اغاني الهجيج في السبعينات
حلوين زي ديل بزوروني
حبايبي الحلوين اهلا جوني
وانا ما قايل
جوني زايرين شايلين ازهار
شايلين الليل قلبوهو نهار
وانا ما قايل
وهي من اغاني الفنان المبدع عبد الوهاب الصادق
Post: #38 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 00:46 AM Parent: #1
من مهججات اهل السودان في السبعينات
ابراهبم موسي ابا
ما دوامه الله هوي الدنيا ما دوامه
يادنبا ما بتنقدري شلت الصغير القدري
في المنام دموعي بلن سدري
نركل ام كركابه
نتدلي في ام روابه
ام نهيدا طاعم دابا
الجنني وجنن العزابه
ادوكي للطنباري سرح قجيجتا وجاكي
رحم الله الراهيم موسي ابا
وفعلا
ما دوامه
Post: #39 Title: Re: يارمزا ولي يارمزا او هجيج السبعينات Author: منزول محمد توفيق Date: 03-28-2008, 00:48 AM Parent: #1
طارق يا فلته والله بوست عجيب يخليك تعصر الحتة بتاعت زمان في مخك وفجأة تنساب الذكريات إنسياب النسيم العليل (علي وش زول حران) لمن يتكيف ويقعد في الواطة ساند ضهروا علي العمود المهم يافلته انا بتذكر لمن كنت سغير اغنية السيرة لمن الباص يصل حلة العروس دور بينا البلد داك احرق الجزولين يا بابور جاز وفي هذه اللحظة السواق تمسكو الهاشمية ويتنفخ ويتنفش ويدور بينا في محلو لامن يجينا لفت راس رايك شنو عجبتك
Post: #40 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 01:02 AM Parent: #39
اين بربكم هذا الفتي
قالو قطعه سكر
سكر
قلنا احلي وانضر
ايه نعومه المخمل
ولي عود الصندل
يا ابتسام يا بسمه
يالطافه نسمه
جل ربي الخالق سورك في رسمه
ياحنان ياحنه
يازهور في جنه
Post: #41 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 01:03 AM Parent: #39
اين بربكم هذا الفتي
قالو قطعه سكر
سكر
قلنا احلي وانضر
ايه نعومه المخمل
ولي عود الصندل
يا ابتسام يا بسمه
يالطافه نسمه
جل ربي الخالق سورك في رسمه
ياحنان ياحنه
يازهور في جنه
انه نجم السبعينات
نجم الدين الفاضل
Post: #42 Title: Re: يارمزا ولي يارمزا او هجيج السبعينات Author: HAYDER GASIM Date: 03-28-2008, 01:07 AM Parent: #39
ندي ... يا ندي
تحرق قلوبنا وتهردا
لا قيت غزال باهي الخصال
لكن ... قوامو قوام ندى
ده سمعتها ويين يا ربي؟
لمن أتذكر ... حا أرجعلكم.
يا طارق ... يا ود اللمين, سليت روحنا ياخ ... مر تغريبا حول ول أكتر ... من أيام تلك { القفلة }
فبالله يا جماعة حقو نحدد سقف زمني للدبرسة والغياب ... خاصة وأننا لا نحتمل فراق الأحباب.
طارق ... كيفنك ... أفتقدك وبشدة,
والشافني { مقيل } هنا ... ما كضب
مع مودتي
Post: #43 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 01:21 AM Parent: #42
ومن ابهي اغاني بنات السبعينات
يا ابويا يالسني (محمد السني دفع الله يمتنع)
يالسني طمني
بجافي ليك اهلي
واسكن معاك مدني
مدني الجمال وانا مالي
الخدار مرق لي وداري
وايضا
الليله ويييييييين الفي العصر مرورو
وكمان
ومرقت في العصريه
وركبت لي عربيه
الدكاتره كشفو عليا
قالو لي ازاكي الحب
مابتنفع العمليه
والريد قسم ياعينيا
Post: #45 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 01:42 AM Parent: #43
خرطوم السبعينات وما ادراك ما هي
نار زاهيه
جاز الديوم والمرحوم عمر عبده
حيث
حاجه كولن كولن باشاكا
الله خلي وليدي باشاكا
الله خلي بنيه باشاكا
وجاز العقارب وعامر ساكس
هم ما نسونا
قالو ما نسونا
نتمني دايما
لو هم يجونا
اين الفنان عامر ساكس بربكم
ثم البلوستارز
وعمر قيلي
يامسافر وشايل في قليبك شنطه سفر
من ناصر المزداوي
ووليم اندريه
كفايه مزاح
خلي الليل يكون صباح
بدور ارتاح
واعوض بيك شبابي الراح
وفعلا ارتاح اندريه
المغني البارع
وكابتن الفريق الاولمبي
وابرز لاعبي الفريق القومي السوداني للسله
الذي احرز كاس البطوله العربيه للسودان في الكويت
مع رفاقه حبيب استانبوليا القبطي
وخميس جردقون من جبال النوبه
ومحمدعلي الاعيسر من جبال النوبه
مايكل الجنوبي
مات وليم اندريه في احداث 76 دون ذنب
فيما يسمي باحداث المرتزقه
مات سمبله يعني ساي
هكذا حظ السودان
رحمه الله
ومن ضمن الفريق العظيم
نيكولا بطرس
شقيق تابيتا بطرس كما عرفت
اين هو الان
لا احد يدري
Post: #44 Title: Re: يارمزا ولي يارمزا او هجيج السبعينات Author: Ahmed musa Date: 03-28-2008, 01:30 AM Parent: #1
(طارق الأمين) سألتك بالله لمن تصلوا مرحلة (التويست) سوي لي (مسنجر)
Post: #46 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 01:52 AM Parent: #44
وظهر علي الساحه نجوم افذاذ
سنتحدث عن
زيدان ابراهيم الذي قوي عوده في السبعيتات وان ظهر قبلها
واي يا يا يا يايايا اقول انساكا لابد
عبد الغزيز المبارك وتحرمني منك
وطريق الشوق
خوجلي عثمان لو يسمعنا مره
ثم اسماعيل حسب الدايم
ومجذوب اونسه والبريدك موت
هذا مع الامين عبد الغفار
نتوقف للاعلان
ونواسل
ولكن
بعد الفاصل
Post: #47 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 02:29 AM Parent: #46
بخلاف محمود علي الحاج والو هبيده حسن
لن انسي لكم
عبد العظيم حركه
وانا غنيت ليك اغاني
ياحبيبي
اسمي المعاني
ويييييييييييييييييين
نتلاقي تااني
Post: #48 Title: Re: يارمزا ولي يارمزا او هجيج السبعينات Author: Sudnawi Date: 03-28-2008, 05:12 AM Parent: #47
هجج يا طارق الامين..
Post: #49 Title: Re: يارمزا ولي يارمزا او هجيج السبعينات Author: Amira Elsheikh Date: 03-28-2008, 07:03 AM Parent: #48
Quote: ومن ابهي اغاني بنات السبعينات
يا ابويا يالسني (محمد السني دفع الله يمتنع)
يالسني طمني
طارق اللمين وجمهور السبعينات..
سلاااااام..
طارق اغنية السنى دى كلو مرة بتعمل ليها ابديتنغ...
هاكم دى عينة ..
*حلاوة البيب يلا يا منقة متين نلاقى حبيب يلا يامنقة..
*سوق ياسوق بطريقتك سوق ياسواق...
معانا حنان ياسواق و صلناالدكان..
*الليلة مسافر انا انا ماجبر الخاطر لى انا..
السيسابانا خدرا وروياناانا انا ...
يا حبيب بامانة انا انا الظروف عكسنا وبصلحا..
Post: #50 Title: Re: يارمزا ولي يارمزا او هجيج السبعينات Author: عاطف عمر Date: 03-28-2008, 07:26 AM Parent: #1
أرجعكم مرة أخرى لـ ( الليمون ) وهذه المرة مع الفنان محمد سلاَم وأغنيته الأشهر
قام إتعزز الليمون عشان بالغنا في ريدو
ومع محمد سلام تطل صورة الفنان مجذوب أونسة الذي ظهر معه في نفس الفترة وأغنيته الأشهر
دا ما سلامك ولا الكلام الكان زمان في سلامك والله يعني نويت تسيبنا في الخريف تحرم غمامك
Post: #51 Title: Re: يارمزا ولي يارمزا او هجيج السبعينات Author: Ahmed Mohammed Osman Date: 03-28-2008, 10:50 AM Parent: #1
غايتو يا طارق لقيتك تحفة وما براك الناس القاعدة هنا دي كلها
Post: #52 Title: Re: يارمزا ولي يارمزا او هجيج السبعينات Author: Amira Elsheikh Date: 03-28-2008, 11:17 AM Parent: #51
Quote: ونزل نزل براحة ونزل نزل
تحفة انت يا احمد...
زكرتنى رقيص العروس...
غايتو انا رقيص العروس دا كملتو ..
اى رقيص عروس بمشى احضرو من زمن بقعدو الناس اصغار فى الثباتة..
Post: #53 Title: Re: يارمزا ولي يارمزا او هجيج السبعينات Author: Ahmed Mohammed Osman Date: 03-28-2008, 12:05 PM Parent: #1
يابت الشيخ داك زمن الفرح والطرب الغير معنون رقيص عروس علي حنة عريس علي مسرح حتي جريدة المساء كانت ممتعة غير زماننا هذا
انا زول جديد علي فكرة ما قديم زي الناس الفوق دي عشان كدا العشتو وشفتو تمنينات ساي ما بتذكر سبعينات وشنو وشنو لكن علي ما اذكر برضو فالو في فنانة جديدة طلعت الناس كانت بتتدافع عشان تحضر ليها عرس وله حفلة ساي كان اسمها حنان بلوبلو والرقيص الحلو
--- هتافات رابة بتنفع يا طارق؟؟ الكهربا جااااااااااات املو الباغااااااااات هسي بتقطع ويا جعفر
Post: #54 Title: Re: يارمزا ولي يارمزا او هجيج السبعينات Author: معتز الامين Date: 03-28-2008, 02:30 PM Parent: #53
Quote: برضو من ابوي وحات ابوي ..
عاش ابوي
الابن الشاطر عبد المنعم سليمان( اشالله تكون الابن دي ريحتك)
ياخي ماتزعل وماتخاف
وتاني اوعك تجي البوست دا كان ما جبت معاك ولي امرك
واضح انه ح يفيدنا جدا في توثيقنا لهجيج السبعينات
هاك دي
الشال منام عيني وفؤادي جارحو
انشالله يلاقيني وبهوايا اصارحو
نتقابل الاتنين بيهواي اصارحو
واشكيلوا مر البين وبهواى اصارحو
لعل قلبوا يلين يعطف على المسكين
العين تشوف العين والايد تصافحو
وحاة زمتى برضه دى من ابو عبد المنعم سليمان
Post: #55 Title: Re: يارمزا ولي يارمزا او هجيج السبعينات Author: WadAker Date: 03-28-2008, 02:39 PM Parent: #1
البانسلين ياتمرجى نادوا الحكيم ياتمرجى _____
البوست دا ماعارف ليه بذكرنى وقت المسلسل* وخاصة البردعى+ رافت الهجان+ احلام الفتى الطائر --- *مواعدة المسلسل وقبل الحفلات
Post: #56 Title: Re: يارمزا ولي يارمزا او هجيج السبعينات Author: shaheed gadora Date: 03-28-2008, 02:55 PM Parent: #55
قيل وبات .. الليلة مقيل عندنا
لوكنت خايف من بابا ... بابا مطلق امنا
لوكنت خايف من احمد .. احمد عاشق زينا
لو كنت خايف من ماما .. ماما تقولك بالهناء
لو كنت خايف من جدو .. جدو مخرف ليهو سنة
ولو كنت خايف من بوبي .. بوبي مربوط بي هنا
قيل وبات .. الليلة مقيل عندنا
هذا النص ابتدأ في السبعينات وانتشر كالنار في الهشيم في ثمانينات القرن المنصرم. سنأتي للدلالات اللغوية وتفكيك بنية النص منهجيا والحقول المعرفية لاحقا. ملجوظة : شاعر/ة النص مجهول _______________________________
Post: #57 Title: Re: يارمزا ولي يارمزا او هجيج السبعينات Author: shaheed gadora Date: 03-28-2008, 03:02 PM Parent: #56
رائعة اغاني البنات الخالدة : دودو بي اريتو كان طار بي
دودو بي اللوري دودو بي اريتو كان طار بي
اتلمن الهايفات .. الوالدة والعمات يرمن في الدمعات .. وحبيبنا ما بنفات
يا امو ماشة وين .. يا اختو ماشة وين هن كلهن اوضتين الاولى لي زوجي والتانية لي عفشي الشنطة والقفة .. والخاينة تتوفى .. نبكيها في حلفا .. انا وزولي
دودو بي اللوري ______________________
نلاحظ التناص اللغوي في المعاني بصورة واضحة في قصيدة البنات الحداثية "سجل لي دهب امك" التي سنعود لها لاحقا ...
Post: #58 Title: Re: يارمزا ولي يارمزا او هجيج السبعينات Author: shaheed gadora Date: 03-28-2008, 03:10 PM Parent: #56
حباني القامو خلوني .. ليه ماجوني الساعة ستة ونص .. ليه ماجوني السرحو المخصوص .. ليه ماجوني
__________________ يلاحظ في النص السابق عدم ارتباطه بالبعد الزماني فقط، ولكن ارتباطه بالبعد الزمكاني "الزماني/المكاني" حيث يختفي بوصول الكهرباء للمنطقة وانتفاء مزية "النور البي الغماز" كميزة.
Post: #60 Title: Re: يارمزا ولي يارمزا او هجيج السبعينات Author: عز الدين عثمان Date: 03-28-2008, 03:20 PM Parent: #56
طارق اللمين ياقريبى وصديقى الزمان، أيوه كده خليك من بوستات التابلويد يا فنان يا عبقرى وتعال إلى ما ينفع البورد والناس، أحس اننى أستعيدك يا صديق. سجل اسمى عضو دائم بهذا البوست. أسمع فى علاقة بين الجلالات بتاعة العساكر فى جكات الصباح بتاعتم وأغانى الهجيج، كنا نصحى شان نسمعا، عليك الله نكت فيها، كان ذلك قبل أن تصبح الجلالات ذوات امر جلل. أذانى يايمة شرانى وبريدو رسل لى رسايل وقال انا فى الجزاير ............. الخ
ويا طارق أظن أن الصحيح تتى وليس ستى، وكانوا يشاغلون لبنات:" يابت يا تتى حمامكم بدى ولا بعضى" ألله عليك يا جميل وواصل
Post: #59 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 03:11 PM Parent: #55
Quote: حمادة التش مالو مالو ماجا شنبو حش مالو ماجا اطير وانقص زولى سادة ولاقيتو باللفة الالم العلى خف واخر واحدة سلمى الشيخ سلامة يا بلال على اموت انا فى الاذاعة وووب الاذاعة وفى قسم الدراما دى اغنية عميرى ومجدى النور المفضلة عليهما كل الرحمة لكين ناس كابو وابراهيم خضر عملو واحدة جديدة سلمى الشيخ سلامة وانا جريت لى حفيانة غايتو دى دايرة ليها ناقد من الالفية الجديدة
Quote: ومع محمد سلام تطل صورة الفنان مجذوب أونسة الذي ظهر معه في نفس الفترة وأغنيته الأشهر
الاخ عاطف عمر
اسعدنا مرورك مثلما اسعدنا البى العصر مرورو الليله وين
فعلا كان الفنان محمد سلام واغنيه الشهيره انذاك قام اتعزز الليمون قد اكتسحا مساحه مقدره فى وجدان السبعينات حيث الشباب الراقص طرب المتطلع الى مستقبل ملىء بالفرح والبهجه والطرب والسعاده وقد ظهر نجم مجذوب اونسه فجاه فى السبعينات بحنجره جديده ذات بحه مميزه وجميله تشبه عندى بعض الشى صوت فنان الطمبور محمد جباره
واكثر الاغانى التى اشتهر بها كانت اغنيه العطبراوى نسانا حبيبنا المامنظور انسانا حليلو سافر روح ماغشانا حليل الخوه الماقدره عشانا نساهر ونشقى لو ينفع شقانا تسيل دمعتنا بى شوقا وحنانا عشان مايطرا ريدتنا ومنانا يذكر يقلبو ايامو المعانا وحياه الريده مابننسالو عشره اه يادنيا لو فى بالو مره اتذكرنا او بس طيفنا مره كان ياحليلو عرف الفرقه مره رحم الله الفنان القدير العطبراوى اذكر وانا صبى ( صبى دى بالمناسبه مصر عليها ) ان كان هنالك برنامج يقدمه فريد عبدالوهاب اسمه لقطات وكانت هناك فقره فى البرنامج اسمها لقطه ولفطه وقد قدم البرنامج هذه الاغنيه مرتين فى هذه الحلقه مره بصوت مجذوب اونسه ثم مره بصوت العطبراوى انقسم المشاهدون فى الشارع السودانى وقتها الى فريقين فريق مع العطبراوى وفريق من شباي السبعينات احبو الاغنيه بصوت مجذوب اونسه لكنه فى ظنى استطاع اونسه ان ينقلها الى شباب السبعينات وكانت فتحا اطل عبره الى ذاك الجيل واردفها ب... البريدك موت قالو بتريدو قالو سمح القول فى خشيم سيدو واخرى يالرحتو طولتو وعلى ماسالتو يالكنتو منى قراب انا وين ووين انتو
يعجبنى من اغانى مجذوب اونسه لمن تفوت انتى فى الدنيا ايه قول لى يالكنتا فاكرك لى الدنيا ياما تورى والدهر يامايقرى تحيه للمرحوم العطبراوى والفنان مجذوب اونسه نواصل فى الفقره القادمه بى اغنيه رابه وهجيج شديد
التش تش حلاوة لبن عليكم الله خلوني يا ناس الزينبية حلاوة لبن : : وانت ماشي ـــــــــــــــــــــــــ
الول لول يا لولية بسحروك يا لولي الحبشية حبشيه انتي ما صعبه لوليه انتي ما صعبه حبشيه انا ماعارف انا بحب كسلا والقضارف
برضو وانت ماشي
Post: #65 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-28-2008, 06:08 PM Parent: #1
دي كيف :
كان حقو تسألني يا يابا في أمري
تعرف كمان فكري في شريك عمري
مش حية تدفني في بيت يكون قبري
والله يابا حرام يبقى الزواج جبري
Post: #67 Title: Re: يارمزا ولي يارمزا او هجيج السبعينات Author: omar altom Date: 03-28-2008, 06:17 PM Parent: #1
طارق الامين ياحبيب
مشتاقين
معلش البوست ده بدون تعليق لانو السبعينات دي انا ما حاضرها خلي الملعب لي عز الدين عثمان وابو ساندرا يمكن ينفعوك
سلامي للجميع
Post: #68 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 06:20 PM Parent: #1
الاخ شهيد قدوره
اسعدتنا بما قدمت من نماذج سبعينيه ومن تعليقات طريفه ولطيفه وعلى تلك النماذج نعودالى اغانى الهجيج عند بنات السبعينات امين يا امين الولد دا امين يا امين الولد دا فى مصنع الفازلين والسقط جا عماد ياعماد الولد ده فى جامعة بغداد العسل ده عصام ياعصام الولد ده فى مصنع الاقلام الولد ده
وسوووووووووحى اليل لالا
بالجنبة موحى اليل لالا
سوحى لينا اليل لالا
والعقبة لينااليل لالا
سامى عز الدين حسابه على وعلى قاقرين حسابه على
علما انه لايوجد اى توضيح للحساب المذكور اعلاه وكيفية سداده
( وحاة ذمةعبد المنعم دى من ابوه )
نواصل
Post: #70 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 07:05 PM Parent: #68
Quote: البلوم نزل في الساحة البلوم نزل براحة
ونزل نزل براحة ونزل نزل براحة طق طق
قوم فوق منك له
احمد محمد عثمان نزل فى الساحة لاكين اجمل مافى الموضوع انه مانزل براحة نزل بى تقلوا
ومعانا عازفين من سلاح الموسيقى والعريس عنده ود خالتو نقيب طبيب سجون معاش
ونزل نزل نزل
ما قايميييييين
هاك دى من ابو عبد المنعم سليمان
( قسم اغانى النفط)
حيث لم ينس المغنون والمغنيات الثروة البترولية والشركات الضخمة التى تعمل فيها فى سبعينيات الخرطوم التى لم تكن تكتظ بالصينيين عفواً بالاشقاءوابناء الخالات الجدد من الصين العاملين فى حقل البترول دون مراعاة لمقررات وموجهات الاوبك
نمشى شرق لطلمبة شل ونمشى غرب لطلمبة اجب ونمشى طويل لموبيل شل شل شل كب لى جالون شل شل شل حسب القانون( البحث جار عن ماهية القانون المذكور ) شل شل شل انا مابديل شل شل شل الطلمبه هديك بابور جاز خلو اليشتغل الشغل بالجاز خلو اليشتغل ( علما باننا قد ذكرنا سلفا بان لا مانع من ان يشتغل بابور الجازاعلاه باى وسيلة يختارها )
والعزة للسودان صورة للسادة شركة بتروناس صورة للسادة شركة بترودار صورة للسادة بمركز ابحاث النفط صورة للسيد والد عبد المنعم سليمان صورة لمنظمة الاوبك صورة للسيد مدير مصنع الصلصةكريمة ( صورة ساى مابتضر )
Post: #69 Title: Re: يارمزا ولي يارمزا او هجيج السبعينات Author: Mahmoud Mustafa Mahmoud Date: 03-28-2008, 06:32 PM Parent: #1
Quote: نتدلي في ام روابه
ام نهيدا طاعم دابا
الجنني وجنن العزابه
طاعن بالنون يا طارق ياخ.. وهو كناية عن صغر السن..
لكن زولك والعزابة بتاعنو.. لقيتهم ليك ما عندهم موضوع
البوست دمو خفيف والله
ولو لقيت لي طريقة بجي أسمعكم غنانا بتاع الترع الما خمج
Post: #71 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-28-2008, 07:42 PM Parent: #1
Quote: صورة للسيد والد عبد المنعم سليمان
لن اعيش في جلباب ابي
Post: #73 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 08:52 PM Parent: #71
شكراً لمرور الجميع وساعود اليهم فرداً فرداً
وعلى ذكر مداخلة الاخ شهيد قدورة اعلاه وايراده لاغنية دودوبى اللورى ,وسيرة اللورى قديمه فى الاغانى منذ ماقبل السبعينات فشمالا يا اللورى تشيل منو بلا بنات نورى تشيل منو وشرقا ياللورى عليك الرسول بورى وغربا اللورى حلا بى دلانى انا بالودى
ومنذ سائق البوباى وسايق الفيت وسايق العظمة كانت سيرة العربية واردة فى الاغنية مثل القطار والطائرة وكانها تمثل الدابة الحديثة والخيول العصرية التى هام بها الشعراء منذ المتنبي
الخيل والليل والبيدا تعرفنى ثم واسود يضلهم الليل منه الى اخره
قسم الدواب العصرية فى الاغانى السبعينية
1- مرقنه فى العصرية وركبته لى عربية 2- عربيتك المرسيدس كسرت علينا الترس - انته جعلى مابتتهبش وانت شطة مابتتقرش 3- تقوم بينا العربية تقوم بينا كب تقع بينا رب ( مع ملاحظة عدم ذكر الماركة والموديل واذا كانت مرخصة ام لا ) 4- عربيتك الحمراء وحلانه فى الرمله انا ببقى ليك صاجة وانا بزحزح الرملة 5- ووب عليا تعال ليا يالسايق العربية 6-لو عاوز تغيزنتعال واضرب البورى ( ازعاج المبالغة 7-المهيرة البيت فرشوه وديل نسابتك بالبيجو جو ياعروسنا عريسك غلبوا الثبات (فى رواية اخرى بالماذا جوا والله اعلم) ويلاحظ ان ثمة تطور فى وسيلة نقل المحبوب حيث قبلها فى اغنية العجب حبيبى الزول الظريف راكب بسكليته
وصولاً الى القطارات 1- القطر الشالك انته يتكسر حته حته وتسلم لى انته 2- قطار الشوق متين توصل ترسينا 3- قطر الخميس الفات الشال حبيبى وفات الليلة ياحليلوا 4- من بف نفثك يالقطار انته شلته جيبو يالقطار 5- المحلى داخل عطبرة يابلالى ليل ليلنا 6- ياحليلا بلا غلط قالوا شاله قطار الاحد 6- قطر اويل المسافة طويل يلا يادقدق
صور- ادارة النقل الميكانيكى وزارة النقل والمواصلات هيئةالسكة حديد السيد طريق الانقاذ الغربى
Post: #75 Title: Re: يارمزا ولي يارمزا او هجيج السبعينات Author: كمال علي الزين Date: 03-28-2008, 09:10 PM Parent: #73
Quote: صور- ادارة النقل الميكانيكى وزارة النقل والمواصلات هيئةالسكة حديد السيد طريق الانقاذ الغربى
ديل كلهم السفو سفو
والفرتقو فرتقو
عشان كده أغاني البنات بقت هابطة
باين المؤسسات دي كان ليها دور
Post: #72 Title: Re: يارمزا ولي يارمزا او هجيج السبعينات Author: Halema2 Date: 03-28-2008, 08:17 PM Parent: #1
من اغانى السبعينات برضو : اغنية خليل يا خليل يا خليل ... خليلك وين .. ما بنوم الليل .. الليل الليل ليل على طويل اناااااااااااا منظرك جزاب اناااااااا يسحر الأ لباب البعاد منك ديمه ببقى عذاب اناااااا
يا خليل يا خليل خليلك وين ما بنوم الليل ....
ان رايتك يوم فرا منى النوم اناااااااا صورتك الحلوه تسعد المحروم انااااااااا
يا خليل يا خليل خليلك وين .....
يا جميل فتان انا.... كتر التحنان انا ارحم الحابيك يا فريع البان انااااااااااا
ديمه مشتاق ليك انااا لو اشوف عينيك اناااااااا يندمل جرحى الشايه بين يديك يا خليل يا خليل
Post: #74 Title: Re: يارمزا ولي يارمزا او هجيج السبعينات Author: كمال علي الزين Date: 03-28-2008, 09:06 PM Parent: #72
(*)
طارق الأمين
والمعاهو بي جاي .. سلامات
أنا طبعاً فترة السبعينيات دي بسمع عنها سمع
والتمانينات طشاش كده
لكن والله في أغنية قبضت الجو فترة (على زمة ناس خالو وعمو) ..
أغنية (مسكين أنا
وآه مسكين أنا
وماجن بنات حلتنا ماسون دلال ماسرحن
مسكين أنا .. وآه مسكين أنا
وثتراً دزيلاً ..
_____________________________________
طارق الأمين (القوي ده بتجيبو من وين) .. تعمل من الفسيخ شربات يا (أبو صلعة إنتا)
بالمناسبة :
_______________________
إنتا في السبعينات كان عندك (خلال بتاع خشب) ؟
Post: #76 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 09:15 PM Parent: #72
Quote: يا يابا سعدابي ..
تحتو الشجر كابي
الاخت حيمورة الامورة أسعدنا مرورك شكرا على (اهلك شعروا بيا ورفعوا على قضية يابلال على)
وقد كنت مغرما بالمقطع الذى يقول دخل الثانوية يابلال على حينما كنت ممتحنا لدخول الثانوى العالى
لكن الملاحظ فى الاقتباس على هو تكرار اسم السيد او الاخ سعدابى هذا الرجل امره محير لاعرفتو شيخ لاعرفتو عمدة
اسمع به كثيرا ولا اراه واشد مايحيرنى فى الامر الشجر الكابى تحتو ده ان الامر يبدوا محيرا يعنى هل الاخ سعدابى
يجلس اعلى قمة الشجرة وبذلك يكون تحته الشجر كابى ام انه يجلس على الارض لكنه حفر حفرة لاخيه ودفن تحتها شجرة تكب الله اعلم
ارجوا ممن تتوفر لدية اى معلومة الاتصال بالبوست مع كامل مودتى واحترامى للسيد سعدابى
والله دى قصة الليله دى
Post: #77 Title: Re: يارمزا ولي يارمزا او هجيج السبعينات Author: shaheed gadora Date: 03-28-2008, 09:22 PM Parent: #76
دي من الاغاني الرابة في السبعينات
يا الاسمراني .. عليك الله قوم ارقص تاني .. عليك الله
قوم ارقص لينا .. عليك الله فوق الجنينة .. وفرحنا
Post: #79 Title: Re: يارمزا ولي يارمزا او هجيج السبعينات Author: shaheed gadora Date: 03-28-2008, 09:28 PM Parent: #76
وواحدة للعواجيز "الله يسترنا"
الشايب دا .. رسلتو لي الدكان .. الشايب دا .. احرج الشبان ..
الشايب دا .. رسلتو لي الحمام .. الشايب دا .. لقاهو صاقط نام ..
الشايب دا .. رسلتو لي الفرشة .. الشايب دا .. جابا لي كرشة..
الشايب دا .. رسلتو لي المنكير.. الشايب دا .. جابو لي طبشير..
الشايب دا .. الله بيني وبينو تطير الابرة وتقد ود عينو
"ويختم الكورس الاغنية بترديد الحكم النافذ"
مافي ليك ومافي ليك الطالب دا هو ليك وهو ليك الشايب دا
___________
Post: #78 Title: Re: يارمزا ولي يارمزا او هجيج السبعينات Author: عبد المنعم سليمان Date: 03-28-2008, 09:27 PM Parent: #1
سواق ال بيجو مالو ما جا الحار هجيجوا مالو ما جا علي جادين مالو ما جا اب ضراع مترين مالو ما جا
___ الاغنية من الاغنيات ال تقبل القسمة ع اتنين يعني ممكن ال ما بحب كلمة ضراع يخت اي حاجة عاجباهو
اااخ يا الطابق البوخه
Post: #80 Title: Re: يارمزا ولي يارمزا او هجيج السبعينات Author: Emad Abdulla Date: 03-28-2008, 09:51 PM Parent: #78
Quote: كان شارع افريقيا الحالي يسمي حينها ب شارع الجنه وهذه التسميه ببساطه قد كانت لانه الشارع الوحيد في سبعينات الخرطوم الذي تباع فيه الفواكه النادره والمستورده
كضاااااااب .. لاقي الشُفع السغار ديل و متجدع !!! ..
شارع منو ؟ .. الجنة ؟؟؟ طارق أحسن ليك , عامل راسك أب ستة ده !!!
.... يا حلاتو يا حلاتو دردم لي جـ ....... ـاتو خبت الباب تِكِي تِنْ تنْ مشت أمي جرى تَنْ تَنْ ساهر بي ساهر بي شال .....ـي و حيّر بي ساهر بي ساهر بي يا بوليص مالك بي .
و كمان : الريد الريد يا بدور موسى انا ما جنيت بس بدور موسى سدو فوق البيت يا بدور موسى و سوو لي القيد يا بدور موسى أبرا ما جنيت بس بدور موسى ما ده الغرام و الريد جيبو لي موسى ... مجروسة جات كاشّا أنا بدور موسى شايلة دياشه أنا بدور موسى حبيبي خشّ الديش أنا بدور موسى شان يبقى أُمباشا بس بدور موسى .
..... موسى أب زَرَد .
Post: #81 Title: Re: يارمزا ولي يارمزا او هجيج السبعينات Author: كمال علي الزين Date: 03-28-2008, 10:03 PM Parent: #80
Quote: و كمان : الريد الريد يا بدور موسى انا ما جنيت بس بدور موسى سدو فوق البيت يا بدور موسى و سوو لي القيد يا بدور موسى أبرا ما جنيت بس بدور موسى ما ده الغرام و الريد جيبو لي موسى ... مجروسة جات كاشّا أنا بدور موسى شايلة دياشه أنا بدور موسى حبيبي خشّ الديش أنا بدور موسى شان يبقى أُمباشا بس بدور موسى .
..... موسى أب زَرَد .
والله يا(عمدة) الكوامر بتاعين زمااان ظهروا
Post: #82 Title: Re: يارمزا ولي يارمزا او هجيج السبعينات Author: Emad Abdulla Date: 03-28-2008, 10:18 PM Parent: #81
Quote: الكوامر بتاعين زمااان ظهروا
كوامر ستارتر يا كيمو .. و نِعمَ بالله . أب صلعة ده كومر أب مَنَفِلة .. و ما عندو الكَرع كَع كمان .
... رمزا ؟؟؟ .. غايتو الحَمُد ليك يا رب .
Post: #86 Title: Re: يارمزا ولي يارمزا او هجيج السبعينات Author: Gazaloat Date: 03-28-2008, 10:39 PM Parent: #81
ان كان هذا هجيجكم... فوالله ماعندكم هجيج ولايحزنون
لعلكم قد دخلتم الى حلقات الهجيج متأخرين بعض الشئ فوجدتم فـُتـَات الهجيج ولم تُطْعَمُونَ من ( ضـَلـْعــَتـِهِ ) و ( شـَيَّــتِهِ ) و( سََـلـَطـَاتِهِ ) ولم تذوقوا ( خـُشـَافـَهُ ) ولعلكم لم تذوقوا حتى ( بـِزْيَـانـُوْزهِ ).
عفوا
الهجيج نوعان فى (رواية عمر)... وثلاثة فى رواية (زيد)
ناقش الزمن 10سنوات
Post: #83 Title: Re: يارمزا ولي يارمزا او هجيج السبعينات Author: طارق الأمين Date: 03-28-2008, 10:19 PM Parent: #80
Post: #85 Title: Re: يارمزا ولي يارمزا او هجيج السبعينات Author: Ahmed Osman Date: 03-28-2008, 10:30 PM Parent: #84
هاك دى من غتاتة جيل السبعينات
العندى انا ما بددى - بحر الشوق انا بعدى
Post: #87 Title: Re: يارمزا ولي يارمزا او هجيج السبعينات Author: Emad Abdulla Date: 03-28-2008, 10:47 PM Parent: #84
طيب .. أبونا كان بيجيب لينا ( الُفُروطّة ) .. و دي حاجة لا قِبل لكم بها .. سمحة خلاس .. ( على ذمة عمك بيجو أبو منعم بيجو ) .. و الغنا طوالي إتقطع لينا : يا علب الفُروطّة .. تاخد منو حتّة .. لو ما ضقت منو يودوني للنقطة . ( خيار صعب خلاس ) .
و برضو : قاعد في النجيلة بالردا و الفنيلة حبيت أشاغلو عمل الكورة حيلة .. و وين وين يا غالي .. أموت و انا دمعي جاري .. ( و انا ألعب في كورتي ساااكت .. ما شغال بيهم ) .. ثم ياخي بعد داك قاموا قطعو لي : أب رنات إنت قاضي القضاة إنت سيد الناس إنت سيد الشيكات إنت قادي الباكات إنت أب كبكات إنت سيد الحوبات إنت حِتيتون إنت حتيتون حتيتون حتيتون .. حتتتتتتته . ( كنت سغير شوية .. غايتو .. البنات صعبات لمن يقومن ) . دي لازم تتغنى و إنت مكفكف ..
..... أكلت قبل كده فُروطّة ؟؟؟ عاملة كيف ؟؟
Post: #88 Title: Re: يارمزا ولي يارمزا او هجيج السبعينات Author: مصطفي سري Date: 03-28-2008, 11:38 PM Parent: #87
والله يا عمدة ... ود الديم .. من قبيل ابيت اخوش البوست بتاع الفارة اب صلعة دة واللي عامل فيها (حناك ) ولقى الحلة فاضية والشفوت ما فيشين ... لكن لمن ظهرت انت - طبعاً ثقتي في ابوساندرا اصبحت رويداً رويداً تضمحل الى الاندثار- قلت الكلام الجد جاي لمن انمت جبت كلام الديم الجد جد ... بتاع كوريا ... واللي ورثوها ناس الشيك ، واللي قلت انت ... يا حلاتو يا حلاتو دردم لي جـ ....... ـاتو خبت الباب تِكِي تِنْ تنْ مشت أمي جرى تَنْ تَنْ ساهر بي ساهر بي شال .....ـي و حيّر بي ساهر بي ساهر بي يا بوليص مالك بي .
و كمان : الريد الريد يا بدور موسى انا ما جنيت بس بدور موسى سدو فوق البيت يا بدور موسى و سوو لي القيد يا بدور موسى أبرا ما جنيت بس بدور موسى ما ده الغرام و الريد جيبو لي موسى ... مجروسة جات كاشّا أنا بدور موسى شايلة دياشه أنا بدور موسى حبيبي خشّ الديش أنا بدور موسى شان يبقى أُمباشا بس بدور موسى .
..... موسى أب زَرَد .
اها يا طارق لقيتك صلعة لا تشرف ابان صلع جد ... ابقى لم الكراسي وخلي الحفلة تشتغل ومنعم انشاء الله يدقوه في البيت ... لانو باراك (اوباما) ...
Post: #89 Title: Re: يارمزا ولي يارمزا او هجيج السبعينات Author: طارق الأمين Date: 03-29-2008, 00:29 AM Parent: #88
انا عارف البوست دا بالليل بجيب ليهو مشاكل
بالذات مع الناس المابعرفو ينضمو بالنهار ديل
يامصطفي ياخي ( سري ) وعرفناهو دا اسم الوالد
مصور نفسك من الجبهه وتحت وداسي الصلعه في البروفايل بتاعك مالك؟
سريه برضو؟
بعدين انت البدخلك حتات زي دي شنو؟
بنتكلم عن فن وغنا وطرب ياخ
امانه عليك تقطع اضنيك
غير ماكنت بتحرس لينا الباب في بروفات الكورال
باعتبار انو دي الخدمه الوحيده القدمتها للفنون في البلد
تاني ختيت معاناياتو طوبه في ياتوغنيه ولي مدحه حتي
بعدين ياخ انت زاتك ماخشيت الجامعه بعد سن الاريعين
واتفسحت في اولاد اخواتك الطلاب ياخال في الاهليه
لمن بقيت رئيس الاتحاد وانت علي اعتاب الخمسين
طيب النفرض ياخي انا لقيت الناس هنا سغار
وعاوز اتفسح ما اتفسح ياخ متفسح بي قروشك؟
بعدين البتغنو قيهو انت وساحبك دا ماهو اغاني سبعينات
والشيطان ظااااتو مابجيزا
وعليه يامصطفي ياسري
ممكن افتح ليك بوست سري
تغني فيهو الهبوط السري بتاعك دا
لم عدتك واتخارج من هنا سريع
قبل ما اكورك لي ابوساندرا
قال سري فال
زمن السريه زاتو انتهي يامان
تعال يا ود اقفل البوست دا خلينا ننوم
بسسسسسسسسسسسسسسس زوار اخر الليل كمان
وانسب اغنيه اهديها ليك من اغاني السبعينات
بالباب لا
بالشباك لا
سيد البيت جا
تعال بكره
Post: #90 Title: Re: يارمزا ولي يارمزا او هجيج السبعينات Author: Gazaloat Date: 03-29-2008, 01:21 AM Parent: #89
Post: #91 Title: Re: يارمزا ولي يارمزا او هجيج السبعينات Author: محمد مكى محمد Date: 03-29-2008, 02:43 AM Parent: #1
العزيز طارق والافاضل سلام وتحيه... من فتره طويله و عندى رغبه شديده فى كتابه دراسه عن أغانى البنات منذالفتره المهديه وحتى الثمانينات وهى تتكون من عده فترات إقترنت بمراحل سياسيه وواقع إجتماعى وثقافى محددين وكانت أغانى البنات تمثل المرآه التى ننظر من خلالها للمجتمع كما كانت توثيق لإحداث محدده...أغانى فتره التسعينات وحتى الآن تحتاج لدراسه أخرى... ............... استمرارا لأغانى الفاكهه.. أسأل العنبه الراميه فوق بيتنا..
وأغانى الملابس أيام جكسافى خط سته قصرى المينى جوب ده الله ليا فق للركبه الله ليا.. وبجيكم راجع
Post: #92 Title: Re: يارمزا ولي يارمزا او هجيج السبعينات Author: مصطفي سري Date: 03-29-2008, 03:32 AM Parent: #91
شوف يا طارق يا وداللمين ... ما تعمل فيها قالبا وفقري وبتنوم اسع انا بعرفك من زمن عامل فيها حبيب الشئ التاني انت زول مزوراتي والدليل
(انا عارف البوست دا بالليل بجيب ليهو مشاكل
بالذات مع الناس المابعرفو ينضمو بالنهار ديل
يامصطفي ياخي ( سري ) وعرفناهو دا اسم الوالد
مصور نفسك من الجبهه وتحت وداسي الصلعه في البروفايل بتاعك مالك؟
سريه برضو؟
بعدين انت البدخلك حتات زي دي شنو؟
بنتكلم عن فن وغنا وطرب ياخ
امانه عليك تقطع اضنيك
غير ماكنت بتحرس لينا الباب في بروفات الكورال
باعتبار انو دي الخدمه الوحيده القدمتها للفنون في البلد
تاني ختيت معاناياتو طوبه في ياتوغنيه ولي مدحه حتي
بعدين ياخ انت زاتك ماخشيت الجامعه بعد سن الاريعين
واتفسحت في اولاد اخواتك الطلاب ياخال في الاهليه
لمن بقيت رئيس الاتحاد وانت علي اعتاب الخمسين
طيب النفرض ياخي انا لقيت الناس هنا سغار
وعاوز اتفسح ما اتفسح ياخ متفسح بي قروشك؟
بعدين البتغنو قيهو انت وساحبك دا ماهو اغاني سبعينات
والشيطان ظااااتو مابجيزا
وعليه يامصطفي ياسري
ممكن افتح ليك بوست سري
تغني فيهو الهبوط السري بتاعك دا
لم عدتك واتخارج من هنا سريع
قبل ما اكورك لي ابوساندرا
قال سري فال
زمن السريه زاتو انتهي يامان
تعال يا ود اقفل البوست دا خلينا ننوم
بسسسسسسسسسسسسسسس زوار اخر الليل كمان
وانسب اغنيه اهديها ليك من اغاني السبعينات
بالباب لا
بالشباك لا
سيد البيت جا
تعال بكره)
طيب يا ود امي انا لاقيتك قبل كدة
طبعا لا ابداً لا شافوك وين لاقوك وين يالعنب في الديوم الغربية ابداً لا طبعاً لا في المحطة الاهلية ابداً لا طبعاً لا
ما تعمل فيها مقتطعا انا ود سري وقاااااعد الليلة وطيب لي بكرة
Post: #93 Title: Re: يارمزا ولي يارمزا او هجيج السبعينات Author: الصادق اسماعيل Date: 03-29-2008, 05:37 AM Parent: #92
الدكاترة كشفوا القلب لقوا قلبي زايد ضرب
اووو دشكا
مدلينا
ارخى الرمش فوق الرمش
عقد الجواهر يا الضوايو باهر
دا الجننى وخلانى اغني
Post: #94 Title: Re: يارمزا ولي يارمزا او هجيج السبعينات Author: حسن الجزولي Date: 03-29-2008, 10:41 AM Parent: #93
مش قلت ليك حا أرجع! الفراغ اللي أشرت ليهو يعني أن مزاجك عاد صافيآ ورميت التوتر خلفك وهو الأمر الجيد بدليل عودتك للكتابة وافتراعك لهذا البوست,,وأظنك فاهم الصفاء الذي أقصده! فعلآ دي أشعار ماعندي ليها رقبة وبالمناسبة الغنا الدكاكيني من أصعب أنواع النظم, فعلى الرغم من مايبدو في بساطة الكلمات إلا أنها كالسهل الممتنع ,,ومع ذلك فمن الممكن جدآ أن يشارك في نظم مثل هذه الأشعار من لم يكتب شعرآ من قبل,,خاصة بالنسبة لأغاني البنات,,ومن المدهش إذا قلت لك أن بعض شعراء الأغنية العاطفية الكبار قد شاركوا كتابة و تأليف الأغاني الدكاكينية!,,وستندهش أكثر عندما تعلم أن شاعرنا الرقيق السر دوليب قد فجر مايشبه القنبلة بتصريحه في حوار صحفي أجري معه في الفترة الماضية والذي كشف فيه أن أغنية السبعينات الأكثر شهرة{مبروك عليك الليلة يانعومة,, ياحليل ناس ديل الزمان بجونا} هي في الأصل من تأليفه!,,فتأمل يخيل ليا موضوع هذا البوست يحتاج لمداخلات كل من بيان, الجندرية, صديق الموج ,أبوساندرا, يازول يازول,,إلى جانب المساهمات القيمة من الذين شاركوا هنا. حا أرجع تاني
Post: #95 Title: Re: يارمزا ولي يارمزا او هجيج السبعينات Author: طارق الأمين Date: 03-29-2008, 03:45 PM Parent: #94
اخي وصديف الزمن الجميل
وقريبي المستشار القانوني الفلته
والشاعر الفنان عزالدين عثمان
اول حاجه بركه الجيت بركه الجيت
وعسل انت وبسكويت
بركه الجيت عشان تشوف ودحلتكم مصطفي سري
البودي قارد بتاع البروفات بعمل في شنو
تسعدني جدا بهذا المرور فعلا ياصديق كنت انوي في نهايه المطاف
ان اربط وابحث مع مهتمين ومختصين مابين جلالات الجيش
اغاني الهجيج في السبعينات بصوره عامه واعاني البنات بصوره خاصه
الاهازيج الشعبيه الخاصه ب الرياضه المظاهرات العاب الصبيه
يدكم معانا وكدي نبدا بالجلالات مع مواصلتنا في التوثيق
البودي قاردات يمتنعون
مع محبتي
Post: #96 Title: Re: يارمزا ولي يارمزا او هجيج السبعينات Author: مصطفي سري Date: 03-29-2008, 04:27 PM Parent: #95
وعشان البودي قاردات مهمين في تصحيح الاخطاء الاملائية ، مثل البودي(ومرات البودي الشارع او النار) قارد الملا حسين ، نصحح لك هنا ما اودته (واعاني البنات بصوره خاصه) انت قلت اعاني البنات ، من الذي قال ان البنات يعانن . لازم تقدم بوست اعتذار الان عن هذه الكلمة ، لانك ضد المراة والانسانية ، وتقف مع (الجماعة ديلك ) وما تقول اغاني وهجيج كلامك ، اذا لم تعتذر عنه ، سنطالب بالاخ بكري ابوبكر بسحب الباسورد (الليلك)
وتحية الوحدة ...في الحاج يوسف ... وعشش فلاتة ... شن قولك ..
عزالدين شيش ، نتواصل بالماسنجر لمزيد من التنسيق لابعاد الذين يتقولون ضد النساء .
Post: #98 Title: Re: يارمزا ولي يارمزا او هجيج السبعينات Author: الجندرية Date: 03-29-2008, 06:51 PM Parent: #96
Quote: يخيل ليا موضوع هذا البوست يحتاج لمداخلات كل من بيان, الجندرية, صديق الموج ,أبوساندرا, يازول يازول,,إلى جانب المساهمات القيمة من الذين شاركوا هنا.
وحاة الله قبال مناغمتك دي يا دكتور حسن كنت جاية وجايبا معاي بوست نكفي الفندك متذكرو ؟ بتاع اهل العوض وتماضر
Post: #99 Title: Re: يارمزا ولي يارمزا او هجيج السبعينات Author: essam&amal Date: 03-29-2008, 07:00 PM Parent: #1
اها دى قولوا لى فى زول حافظها
شتلوك وين زرعوك وين يا عنب
فى جنينة البلدية ابدا لا وطبعا لا الساعة خمسة العصرية ابدا لا وطبعا لا لكن وييييين والحب جميل يا عنب
فى جنة رضوان ابدا لا وطبعا لا ما بين الغزلان ابدا لا وطبعا لا لكن وييييين العمال حديد يا عنب والباقى شنو ؟؟؟ ام وضاح
Post: #100 Title: Re: يارمزا ولي يارمزا او هجيج السبعينات Author: Shamael Elnoor Date: 03-29-2008, 07:40 PM Parent: #99
طارق لك الود
اتذكرت عليمة العروس ورمزا دى بيعلمو بيها العروس وفى مقطع مهم ماقلتو الى هو: بخاف عليك ولى يارمزا من عيون الناس ولى يارمزا الناس حساد ولى يارمزا***حساد حساد ولى يارمزا ايي الليلة ايي يا *** ايي الليلة عريس زى دا
وأظنها من الاغاني الفيها قوون
ملحوظة: انا اصغر منك
Post: #101 Title: Re: يارمزا ولي يارمزا او هجيج السبعينات Author: طارق الأمين Date: 03-29-2008, 08:04 PM Parent: #100
اصغر من منو ياشمابل
Post: #102 Title: Re: يارمزا ولي يارمزا او هجيج السبعينات Author: shaheed gadora Date: 03-29-2008, 08:23 PM Parent: #101
مبالغة ...
والله انا كنت فاكرك طارق الامين واحد تاني
القجة ماعندك
Post: #103 Title: Re: يارمزا ولي يارمزا او هجيج السبعينات Author: طارق الأمين Date: 03-29-2008, 11:19 PM Parent: #102
للمساهمه في التوثيق من حارج المنير ولغير مشتركي سودانيز اون لاين
Post: #104 Title: Re: يارمزا ولي يارمزا او هجيج السبعينات Author: Shamael Elnoor Date: 03-30-2008, 06:48 AM Parent: #101
ياااااااااااااااااا ينصر دين الفوتو شوب ،، ولا دا كريم ماجيك
Post: #109 Title: Re: يارمزا ولي يارمزا او هجيج السبعينات Author: khaleel Date: 03-30-2008, 10:49 AM Parent: #100
طارق الامين
عشان ما رديت لي هاك اغنية ليلية للبنات
النور طفي يا مصطفي
في الضلمة انا انا
جيبوا الفركة انا انا
دايرة عركة
Post: #111 Title: Re: يارمزا ولي يارمزا او هجيج السبعينات Author: عز الدين عثمان Date: 03-30-2008, 01:43 PM Parent: #100
تعر ف يا طارق مصطفى سرى ده حقو ترد عليهو تقول لى: حرقك
انا متابع درجة أولى للبوست ده، بعد ما تنتهى من الهوم ورك بتاع العلاقة بين غنا الهجيج والجلالات يا حبيب بجيك بى سؤال تانى. انا سمعت العساكر يرددون:
عاجبانى الصداقة البين أحمد ومُحمد البين أحمد والطيب حبيبى ناخد الإجازة ونعيد فى اللٍبيض
وسمعتها برضو من غير العساكر. لكن صاحبك سرى ده براحة عليهو، بعدين هو من مشى لندن فى طريقو إلى ان يصبح بودى وروح ما بس بودى غارد. أسلم لأخيك
Post: #113 Title: Re: يارمزا ولي يارمزا او هجيج السبعينات Author: shaheed gadora Date: 03-30-2008, 10:58 PM Parent: #99
Post: #105 Title: Re: يارمزا ولي يارمزا او هجيج السبعينات Author: د.محمد حسن Date: 03-30-2008, 07:04 AM Parent: #1
طبغا الشحم هذا والحم هذا من اغاني الثمانينات ما عيزنها
وست بتول المدرسة
من اعاني الستينات
على ما اظن والعهدة على االطارق
بت الخلبية شيتة وقوية
اينها بوسة
ادتني بونية هذه من اوائا السيعينات
طبعا مقطع بت التكاسة ممنوع بامر الرقابة
لانو حيودي البوست الخور
ده مرور مستعجل
Post: #106 Title: Re: يارمزا ولي يارمزا او هجيج السبعينات Author: محمد أبوالعزائم أبوالريش Date: 03-30-2008, 07:53 AM Parent: #1
Quote: جننتني انتا بي زرايرك السته
جائزه لمن يكمل النص
المنقة والقشطة ومن الليموت حتة جنننتني يا إنتا بي زرايرك الستة
خبر خبر والزول وصل يا ناس
أبصلعة ....... أطلع الجائزة سريييييع
Post: #107 Title: Re: يارمزا ولي يارمزا او هجيج السبعينات Author: محمد أبوالعزائم أبوالريش Date: 03-30-2008, 09:32 AM Parent: #1
كل العالم يتوجّه إلى مكة المكرمة لأداء الحج والعمرة ..... ولكن نحن عندنا:-
الحجة والتوبة .. في طريق سوبا
ويا رمزا والله يا رمزا
Post: #108 Title: Re: يارمزا ولي يارمزا او هجيج السبعينات Author: شهاب الفاتح عثمان Date: 03-30-2008, 10:17 AM Parent: #1
.هـذا ابحــار لطــيف .. وتلك الفتره الثره غير الهجيج بهـا الشجن .. مثال المبدع الزيداني الامدرمـاني و الجـرسه
في اليله ديــك في اليله ديــك .. والنـاس تشارك فرحتـك , حسيـت باني غـريب هـناك و غريبه انت في دنيتـك . حسيـت معـاني الفرقه حسيت بالضياع جابو القدر في سكتك الي بقيـه هـذه التحفه الشاكوشيــه الرمـز .
.واستغربت شـديد الاستغراب !!..كـيف مضى نهـرالبوست في سريانه الي هــذه المرحله المتقـدمه الرائعـه دون الاشــاره للاغنيـه التعليميـه الرائده !, والتي تناقش ظـاهره مجتمعيه هــامه كالعنوسـه بل واوجدت حـلول واقعيـه لهــا .. هـذه التحفه شديـده التطـريب العـامره باجـواء روحانيه هي : بالضـرا بالضـرا يا اب شرا .. بالضرا انشـاء الله راجـل مره يا اب شـرا .. بالفي بالفي يا اب شـرا بالفي انشـاء الله راجل اختي يا اب شـرا
جاياك جاياك يا اب شـرا جاياك جايا افتوا معـاك يا اب شـرا .. لمتين لمـتين يا اب شـرا لمتين بايـره لي سنتين يا اب شـرا. شكــرا .
_______________________________________________
ليتهم يعلمون ان عمر اللحظـه في بعـدك يا خـرطـوم سنين طـوال د شهـاب الفاتح ـ كوالالمبـور
Post: #110 Title: Re: يارمزا ولي يارمزا او هجيج السبعينات Author: Ishraga Haimoura Date: 03-30-2008, 11:00 AM Parent: #1
Quote: جائزه لمن يكمل النص
طارق الأمين بالله؟؟؟؟؟ تلقاها عند غافل
Post: #112 Title: Re: يارمزا ولي يارمزا او هجيج السبعينات Author: عبدالله كع Date: 03-30-2008, 02:47 PM Parent: #1
سلامات يا ود الامين
ياخي انا زي البعرفك كدا..........
عموما.....
اغاني السكسكه دي دايره ليه حفر وبحيت شديد في الزاكرة المجنونه ياحبا
فاصل
Post: #114 Title: Re: يارمزا ولي يارمزا او هجيج السبعينات Author: طارق الأمين Date: 04-03-2008, 05:13 PM Parent: #112
عذرا للانقطاع ونواصل
قلنا نبحت في العلاقه بين هجيج السبعينات
وبعض اهازيج وجلالات الجيش واغاني العساكر
وبعدها نرجع تاني للاغاني لمزيد من التوثيق
جلاله سبعينيه
البص الطويل الماشي في الردميه
الجاب محبوبتي علويه
نهيدا مدردم تقول طماطم بارا
يابسام تعال نتم الريده
جلاله تانيه
بنيه يابنيه ااااااااه
من الشباك تغاين لياااااااه
وبالمنديل تأشر ليا أأأأأأأأه
جلاله تاني
النار يالله سبب النار يالله
ابوي قال لي ماتبيعي القش
الخ
الملاحظ هنا دي اغنيه بنات وعلي لسان انثوي
لكن سمع اضاني العساكر بالابيض صحونا بيها من النوم سنين
اما اجمل الجلالات في ذاكرتي
ياقايد الحاميه محل مانمشي نلقي دانا
في شارع توريت محل مانمشي نلقي دوشكا
منايا زانداويه بس
ونواصل
Post: #115 Title: Re: يارمزا ولي يارمزا او هجيج السبعينات Author: الصادق اسماعيل Date: 04-03-2008, 06:21 PM Parent: #114
عيون الصيد الولد دا أريتو يعود الولد دا جامعة بيروت الولد دا
أووو دِشكا دِشكا دِشكا دِشكا نحنا ما سعاليك نتاوق بالشبابيك
اللية وين يالله السفروك جنوب الفونج
Post: #116 Title: Re: يارمزا ولي يارمزا او هجيج السبعينات Author: شهاب الفاتح عثمان Date: 04-11-2008, 05:33 AM Parent: #1
Quote: يارمزا ولي يارمزا
Post: #117 Title: Re: يارمزا ولي يارمزا او هجيج السبعينات Author: ابوبكر على Date: 04-11-2008, 09:15 AM Parent: #116
ابقى لى طيارة ببقى ليك برج تجارة
و سيد الكارو تعال نزل لى الشايلو
الملاحظ هنا انو البون الشاسع بين ميتافيزيقيا الانبهار و بين طبوغرافية اللحظة بتتديك احساس مدوزن
