امدرمان ياناس

حَنِينْ لأُمْ دُرْ


زَمَانْ الْنَاسْ
بَشَايِرخَيْر
وُفَضْل الْدُنْيَا
زَادُه وَفِيِرْ
كِفَايْة الضَيْف
فِىْ عِزْ الْصَيَفْ
لُقْمَة عَيشْ
وُمُوْيََّةْ زِيِرْ
وقُولة أُمْ زَيَنْ
تََطََيَّبْ خَاطِرْ الخِلا نْ
حَبَابْكُمْ عَشَرَة يَالْحِبَانْ

* * *

وَكْتْ دُنْيَاى غَرَّتْ بَىْ
ُوضَنَّتْ بِالمَعَاى وُعَلَىْ
قَاسيَتْ حُرْقَةْ الوِجْدَانْ
ومُرْ الغُرْبَة فِى الاوطَانْ
لَمْلَمتَّ القَلِيِلْ ورْحَالْْ
وعِشْتَ الغُرْبَه فِى تِسْفَار
وُتِجْوَالْ الغَرِيِبْ مِجْبَارْ
وُيَامَا إِتْبَدَّلَتْ أحْوَال
سَاعَات الفَقِيْر وغَنِى
مَرَاتْ القََرِيِبْ و بَعِيِدْ
ودِيِمَه أنَا الغَرِيِبْْ ووَحِيِدْ

* * *
بَعَدْ سَرْحَهْ
ونَجِعْ هَيَمَاْن
قُتْ أتْفَقَّدْ الحِيشَان
لِقِيتْ الْدُنْيَا مَاهَا زَمَانْ
أُمْ الفُقَرا طَال عُمُرَه
بِقَتْ مَشْغُوُلَه بِى خَرَفَه
وُدِ يْوَانْ بيتنا
حَالُُوُ خَلا
وحَلَقَاتْ عِلْمُو
فَاتْ زَمَنَه
لا حُولِيَّه لا حَضْرَه
لا تُقََّابَه لا خَتْمَه
لا مَسْحُوُرَة جَايْبَه بَيَاضْ
ولا حُوارا بِدُورْ لُو حِفَاضْ
لا شَيْخَاً بِهدِّى الرَوع
ولا أخُويَّاً بِسِتْر الجُوُعْ
لا عَمِّا وخَالا لَىْ
وكِتْ يِلقَانِى يِفْرَح بَى
و(وَانِى)
شَقِيِقِى وَدْ عَمِى
ومِنْ تََبْيِتْ ..
رَفِيِقْ عُمُرِى
صَبِيِحْةَ العِيِدْ فَاتْ وَدَّعْ
وما ظَنيتُو مَا بِرْجَعْ
وبِبْقََى فُراقُو لينَا وَجَعْ
ليه يَا دُنْيَا دَايْرَه الْشِينْ
كِفِايَه عَلينَا يااْمْ وشين
منو البِسْعِدْنَا مِنْ غَير دِيلْ
زَايله وفَانيه دَارْ المَيَلْ

* * *

زَمَانْ يُمَّه
العَزِيِزَه عَلَى
ونِحْنَ يَتَامَى زَاَدْ دَرِيبَه
نَبَارِى خُطَاهَا بِنْتَاتِى
مِتِلْ حِجْلاتََه فِى رِجِلَه
تَتَبْتِبْ فِيِنَا كُلُ عِشَا
تَلََمْلِمْ فِيِنَا فِى حِجِرَه
تَضَمْضِِمْنَا .. وتَضَارِينا
تَشِيلْ تَعْصِرْنَا فِى كَبِدَه
تَحَجِِّينَا وتعِيد لينَا
عَشِيَّة عَشِيَّة
ما بْتَمْسَخْ حَجَاِويَْهَا
بِفَاطْنََه الْسَمْحَة ..
بالجَلاَّبِى ..
بالحَطَابِى ..
والْخُوُلىِ ..
(وخِنِيْكْتِكْ يا كِكِنْدِيْرِى)
بِالغُوُلة البِتَاكْل الناَس
وِالْفَارْس البِحِدْ الرَاس
دَا مَا زَمَنا بِرُوُحْ وِدّيَرْ
حِليلِكْ يُمَّه أُم الخَيَرْ
مَسِيِخَة الدُنيا ..
ِِشِن بَعَده

* * *

حِدايَة البَابْ ..
وتِحِتْ الفَارْعه ..
أُم ضُلاً وَسِيِعْ رَامِى
قُتْ أتْوَسّد الهَبَابْ
وأَنْسَى هُموُمِى وأَحْزَانِى
أعَاود تَانى حُوش البِيتْ
أَشُمْ الْعَافيَه والْمَحَريبْ
إصَّنَت هَفِيفْ الْرِيِحْ
بَعِيِدْ بِهْنَاكَ فِى الْقَيفَه
أنِيِنْ السَاقِيه قِدّيفَه
تَشِيِل وتْمِيل ..و تملا تكُبْ
فِى الوادِىْ المَزركَِشْ حَبْ
وكلباً بِنْبَح الغَاشِى
وُدِيِكْ لِطيَرَه بِتْحَاحَى
ونَاس فِى الجَرْفََه تِصَّايح
كِتُوُفْ عَرْقَانَه بِتْكَافِحْ
تَعَافِر بِى مَحَارٍِيِتَه
تَلَقَِّط فِى رِزِقْ يُومه
وُسَاعة الدُنيَا بِتمَغْرِِب
وتبقى الحَرَّه نسمة تَهِبْ
تَفِج النَاس .. وُتِتْفَرَّق
تَشِيِل الحِلَّه .. تِتْشَّوقْ
عَايِدِيِنْ بِى كِفَاية السُوُقْ
رِضَى المَرْزُوُُقْ
وُطَالِبْ رِزقُوُ عِندْ اللهْ
صَبُوُرْ وعَفِيِف
والمَرْيُوُدْ ..
وِليَدْ الرِيِفْ
قِليبُو رَهِيِفْ
بِضُرْبَ الطَار ْوُالطَنْبُوُر
وعَشْمَان فِى بَنَاتْ الحُُوُرْ
وُحِاج الزين يِقيِِف حَيْلُوُ
بِدُوُرْ شُكْرالله لى خِيروُ
صَلاة المَغرِبْ الحَاضره
أَمَان للْدُنْيَا والآخرَه
وُكَيفِنْ شوقنَا ما بِنْبِلْ
وُعِزْ دُنْيَاْنَا فِيِكْ يَااْمْ دُرْ
عِزِيِزَه دِيَارْنَا بى أَهلَه
دا مابَلداً بِفَارْقُو الزُولْ
وُمُو نَاس بَس .. حَكَاوِى وُ قُولْ
دِيَلْ أهلآً بِشِدُّو الْحِيْل
وُ لى عَشَمْ العُطَاشْ أُم سَيَلْ
دى أمْ دُر القُداحَ مَوْفُوُرْ
والبُقْعَه (السَبِيِله) بِحُوُرْ
دِى تَارِيِخْنَا الإِصُوُلْ وُجُزُوُرْ



د. عبدالسلام موسى
هوف هايم ـ المانيا
19.02.2007

و نهدي امدرمان التحاي ا

امدرمان روعه التاريخ و عبقريه المكان

أبشر يا سيف مساعد.

up

tag elssir

Quote: rأبشر يا سيف مساعد.

سيف

قصيدة جميلة جدا


امدرمان لا يعرف سحرها لا اهلها

مع ودي وسلامي

وتمتد الرؤيا بعد الرؤيا الي الابد

انا امدرمان لسان حالك
اريتك تدري بي حالي
انا القدرت احوالك
وحبك يدري اوحالي


امدرمان روعة الزمان والمكان
وحب امدرمان ساكن في الدواخل
وشكرا لك اخي سيف مساعد
على هذا البوست الاطلالة

ناصر موسى

up