ينزل مطر خيرك يشطّف محنتـك ....

Post: #1
Title: ينزل مطر خيرك يشطّف محنتـك ....
Author: ملكة سبأ
Date: 12-29-2010, 01:09 PM
Parent: #0

وانا يابلد ماعندي غير اتلعبسك شـوق واكتفي

Post: #2
Title: Re: ينزل مطر خيرك يشطّف محنتـك ....
Author: ملكة سبأ
Date: 12-29-2010, 01:16 PM
Parent: #1

دعوة للإستماع

Post: #3
Title: Re: ينزل مطر خيرك يشطّف محنتـك ....
Author: ملكة سبأ
Date: 12-29-2010, 01:27 PM
Parent: #2

يابلدي ... يابلدي ... يااابلدي
في الخاطر قريب يابلدي
انا عشت في ضلك زمن عشقك يوديني ويجيب
الشوق يحف كل المبادي وقت مرق
والريح تحت صفقك مع الافراح ورق
النيل مطول بالو والبال انسرق
ونشرب هواك رضا ونصيب

Post: #4
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 12-29-2010, 01:32 PM
Parent: #2

Quote: وانا يابلد ماعندي غير اتلعبسك شـوق واكتفي

يا ملكة؛
تسجيلك دا ابى يشتغل ياخ!
وعلى ما يبدو انو الشي الفيهو سمح بلحيل
حسب الكوت الفوق!

دحين باصري تاني!

Post: #5
Title: Re: ينزل مطر خيرك يشطّف محنتـك ....
Author: توما
Date: 12-29-2010, 01:42 PM
Parent: #4

يا حليلك يا ملكه سبأ ياخي

مِحنه نصاح لكن هي

Post: #7
Title: Re: ينزل مطر خيرك يشطّف محنتـك ....
Author: ملكة سبأ
Date: 01-03-2011, 12:36 PM
Parent: #5

Quote: توما

سلام وشوق يازولة

نحن غلبنا الكلام تب

وهنا النصري لسان حال فصيح

بركة السمعتيهو

Post: #6
Title: Re: ينزل مطر خيرك يشطّف محنتـك ....
Author: ملكة سبأ
Date: 01-03-2011, 12:26 PM
Parent: #4

سلامات محمد عبد الرحمن

تسجيلي شغال ياخ

كدي حاول انت تاني لانو بالجد الشي الفيهو سمح

حتى اسأل توما دي

Post: #8
Title: Re: ينزل مطر خيرك يشطّف محنتـك ....
Author: تماضر الخنساء حمزه
Date: 01-03-2011, 12:44 PM
Parent: #6

يوديني ويجيب

Post: #19
Title: Re: ينزل مطر خيرك يشطّف محنتـك ....
Author: ملكة سبأ
Date: 01-04-2011, 11:55 AM
Parent: #8

Quote: تماضر الخنساء حمزه

غبت وجيت من وين ياغالي
تفتح باب الحب جوايا

Post: #9
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-03-2011, 12:53 PM
Parent: #6

Quote: تسجيلي شغال ياخ

كدي حاول انت تاني لانو بالجد الشي الفيهو سمح

حتى اسأل توما دي

والله يا [ملكه] أبى يشتغل عندي!!

انبقى [توما] سمعتو إلِّي تكوني مَسَجِّلا بي حبراً سري!

عليك دينك وايمانك: السمع خليتو.. كبيلنا [الكلام] السمح الفي [التسجيل] وبلا
نضاراتي القعر كبايي بقرا!!

Post: #10
Title: Re: ينزل مطر خيرك يشطّف محنتـك ....
Author: ابو جهينة
Date: 01-03-2011, 12:54 PM
Parent: #9

تحياتي لك
وين الغيبات ؟؟؟

Post: #11
Title: Re: ينزل مطر خيرك يشطّف محنتـك ....
Author: ملكة سبأ
Date: 01-03-2011, 01:28 PM

Quote: عليك دينك وايمانك

الله بلا حليفة بكتل يامحمد (وش مبتسم حبة كدا)

كنت عاوزة انزلها مقطع مقطع ، لكن عشان خاطرك هاك سرعة سرعة

يابلدي في الخاطر قريب
انا عشت في ضلك زمن عشقك يوديني ويجيب

الشوق يحف كل المبادي وكت مرق
والريح تحت صفقك مع الأفراح ورق
النيل مطول بالو والبال انسرق
نشرب هواك رضا ونصيب

ينزل مطر خيرك يشطف محنتك
والعين ترف يادوب توالف سحنتك
تعرف تلم ناسك عليك بفطنتك
ومابتختا لكنك تصيب

أطفالك الجايين يغنوا مع الرزاز
وفصل الخريف يرجع يصافيهو الحراز
تفتح مشارف لهفتك وتبقالنا أحضانك ملاذ
والكتمة تنداح همبريب

_____________________
بكرة نتمها كان الله هون وصوت النصري عالم آخر

Post: #12
Title: Re: ينزل مطر خيرك يشطّف محنتـك ....
Author: يوسف السماني يوسف
Date: 01-04-2011, 07:36 AM
Parent: #11

Quote: ينزل مطر خيرك يشطف محنتك
والعين ترف يادوب توالف سحنتك
تعرف تلم ناسك عليك بفطنتك
ومابتختا لكنك تصيب

ملكة ٍٍسبأ
تحياتي

ربما يتاخر نزول المطر ولكن قطعا سينزل ويخضر الوطن المحل .

شكرا للجمال في زمن القبح

Post: #13
Title: Re: ينزل مطر خيرك يشطّف محنتـك ....
Author: بله محمد الفاضل
Date: 01-04-2011, 08:03 AM
Parent: #12

"الشوق يحف كل المبادي وقت مرق
والريح تحت صفقك مع الافراح ورق
النيل مطول بالو والبال انسرق
ونشرب هواك رضا ونصيب"

يا الله
تصوير واقعي لما ببال من أمسك به الشوق من تلابيبه

شكراً لتفسيرنا شعراً

Post: #14
Title: Re: ينزل مطر خيرك يشطّف محنتـك ....
Author: ملكة سبأ
Date: 01-04-2011, 09:21 AM
Parent: #13

يعرق ضُراع زمن القساونزرع سواقيك بالولف .. يابلدي
تعقب صباحاتنا المسا نضرع غناك حرف حرف .. يابلدي
تتلم خلوة ومدرسة وترسم ملامحك من قريب

ميسك محل ودعك يقع في ضل صباحك نستريح
يملاك غيمك بالترع ويتعالج الجرح اليشيح
نتلم فيك وطـــن جدع ويرجع جناك المو غريب

يفقش جُراب تمرك يهز وبرمك يلون للجروف .. يابلدي
يترع هشابك خير ينز وطيرك حوا أبنوسك يطوف .. يابلدي
تنتم عافي ومابترز وأرضك بعد دا محال تشيب

النوبة والطار والمديح في حضرة الدرويش تجم .. يابلدي
القبة تقلد للضريح مركب رواويسك تلم .. يابلدي
هدمك بيسترنا ويريح .. وكان فد هدم مابيبقى عيب

Post: #24
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 08:50 AM
Parent: #13

Quote: يا الله
تصوير واقعي لما ببال من أمسك به الشوق من تلابيبه

شكراا بله محمد الفاضل

Post: #22
Title: Re: ينزل مطر خيرك يشطّف محنتـك ....
Author: ملكة سبأ
Date: 01-04-2011, 12:52 PM
Parent: #12

Quote: ربما يتاخر نزول المطر ولكن قطعا سينزل ويخضر الوطن المحل

ياارب يوسف السماني

تحياتي

Post: #21
Title: Re: ينزل مطر خيرك يشطّف محنتـك ....
Author: ملكة سبأ
Date: 01-04-2011, 12:31 PM

Quote: وين الغيبات ؟؟؟

وكت الليل برد وبدأت النجوم براقا
وإتلاشى الجسد والروح مشت مشتاقة
هوي ياشوق مدد ياشوووووق مدد ياشوق
ياقافية سباقا لشن الحرد والدنيا صح فراقة

والجو يوم برد ويوم شمس حراقا
لكن النفس كيف تهوى عايقا عاقا
لزول يحس بدمعتها الرقراقة
وفي الوجدان يدس غيمة حنان دفاقة

غبت والغنا ريقو يابس غبت والأيام عوابس
غبت زي غيبة النوارس
لم تلقى الموج ملبك والشتيلة قليبا عابس
______________________

معليش يا ابو جهينة الكلام برضو غنا النصري حانزولو ليكم ان شاء الله

والإهداء موصول لكل من :
1. عثمان رغيم
2. أسامةعبد الجليل
3. عمران حسن صالح
4. عوض عبد الله طه ( الزوول)
5. دينا خالد
6. عبد العزيز عيسى

مع التحيات

Post: #15
Title: Re: ينزل مطر خيرك يشطّف محنتـك ....
Author: لؤى
Date: 01-04-2011, 09:31 AM
Parent: #1

بلقيس
سلامات

يعلـم الله مشتاقيـن
أخبارك والعيال ؟

تـحاياي

Post: #16
Title: Re: ينزل مطر خيرك يشطّف محنتـك ....
Author: إدريس محمد إبراهيم
Date: 01-04-2011, 09:48 AM
Parent: #15

ملكة سبأ ...

لك أعبق الرياحين وشذى المسك والعنبر .... وكل عام وأنت بألف خير ....

أنا يا أيتها الملكة مبهور من روعة الكلام البي فوق ده كلو ... لكني حزين إذ لم يعمل التسجيل معي ....

أنا زي أخوي المطرطش ده سوا سوا .... ، وأرجو التكرم بمحاولة إعادة التنزيل .. لأن النصري ده أكيد أداءه حاجه ما تخلص ....

مع خالص ودي وتقديري ؛؛؛

* خارج النص : الشوق ليك بحر يا محمد عبد الرحمن أخوي .. وين الناس ؟!!....

Post: #17
Title: Re: ينزل مطر خيرك يشطّف محنتـك ....
Author: عبداللطيف خليل محمد على
Date: 01-04-2011, 10:01 AM
Parent: #16

( ينزل مطر خيرك يشطف محنتك )

و باقي كلامك حلو بالحيل ..

لكن .. ما ااااااااااا ظنيت ..

Post: #28
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 10:19 AM
Parent: #17

Quote: عبداللطيف خليل محمد على

الله في

قول يااارب

Post: #18
Title: Re: ينزل مطر خيرك يشطّف محنتـك ....
Author: طارق ميرغني
Date: 01-04-2011, 10:02 AM
Parent: #16

قمة الروعة والابداع

الف تحيه لك ملكة سبأ

Post: #20
Title: Re: ينزل مطر خيرك يشطّف محنتـك ....
Author: ندى عثمان حسن
Date: 01-04-2011, 12:02 PM
Parent: #18

Quote: النوبة والطار والمديح في حضرة الدرويش تجم .. يابلدي
القبة تقلد للضريح مركب رواويسك تلم .. يابلدي
هدمك بيسترنا ويريح .. وكان فد هدم مابيبقى عيب

محبة ياملكة سبأ

ربنا يترفق بالوطن وبينا.

Post: #23
Title: Re: ينزل مطر خيرك يشطّف محنتـك ....
Author: ملكة سبأ
Date: 01-04-2011, 01:06 PM
Parent: #20

بشراك محمد عبد الرحمن دي معافرة ان شاءالله تنجح معاك مع اني حاسة انها ماظابطة مية مية
اسمعو انت وادريس بغض النظر عن الصور

_____

شكرننننن محمد

Post: #25
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 09:04 AM
Parent: #23

يا زوله هوي؛
سمعتها قبل ما أوهطا!

_
ومن يوم الليلي ماني داير معاك!
إدريس بي طريقتو.. انشالله يعوعي ما شاء له [العوعاي]؛ والحكمي ان سمعا قريبي الكائن بالمغرب!!

كتر خيرك ياخ وكتر خير النصري في البسوي فيو دا!!

Post: #31
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 10:38 AM
Parent: #20

Quote: ربنا يترفق بالوطن وبينا.

اللهم آمين ياندى

ودي

Post: #29
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 10:24 AM
Parent: #18

التحايا والتقدير طارق ميرغني

Post: #27
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 10:11 AM
Parent: #16

ابشر يا إدريس ترا بان لها الفرج

اسمع مع اخوك واستمتع وانبهر كمان وكمان

ودي

Post: #26
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 09:28 AM
Parent: #15

لوووووؤي

ازيك ياخ وولد مبارك ان شاء الله

عن الشوق فحدث ...

Post: #30
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 10:34 AM
Parent: #26

يا [ملكه]؛
اتنين لا هسع ما ظهروا؛
واكان ما أبقى كضاب تاوقولن جنس متاوقا!

والاتنين عارفن [مهرودين]!!

أهرديهن بي جنس دا وانا اصلي راقد كاويق!

ولا تأخذنك [بنا] رحمه!!

Post: #32
Title: Re: ينزل مطر خيرك يشطّف محنتـك ....
Author: ملكة سبأ
Date: 01-05-2011, 10:50 AM
Parent: #30

Quote: ومن يوم الليلي ماني داير معاك!

محمد عبد الرحمن لاااا (فكاك)

Post: #36
Title: Re: ينزل مطر خيرك يشطّف محنتـك ....
Author: امير عوض الجمري
Date: 01-05-2011, 11:29 AM
Parent: #32

Quote: أطفالك الجايين يغنوا مع الرزاز
وفصل الخريف يرجع يصافيهو الحراز
تفتح مشارف لهفتك وتبقالنا أحضانك ملاذ
والكتمة تنداح همبريب

يا سلاااااااااااام يا ملكة يا سلام ياخ
منتهى الروعة ... وحات الله الكلام مشى فيني زي مشي المويات في الجسم مغرب سبعطاشر رمضان..
وانتكيت وبكيت وشميت ريحة الطوب والطين في الحيطة الرشاها مطر خفيف ..
والله حاجة سمحة بالحيل ... الشوايقة غناهم حنيييين يا ملكة ودا الخلانا نتلعبس فيهم ونعرس منهم
والله بنريد المحنة والحنان وفي حضرة المعشوق الوطن حنانا تاني كمان .. احداث كتيييرة تنطط قدام عينين الواحد ويجتر فيها ذكريات وتخنقك عبرة وكرعيك يرجفن وتلفحك نسمة هواء سااااقطة واصابعيك يكنكشن وتطلع زفرة طوييييييييييييلة وتتمتم : الله يجازي الكان السبب .... الغربة استباحت دواخلنا وسلبت من جوانا كل حاجة حلوة ومسحت الغبار عن المرارات وخلتها قاااعدة في محلها ... شفتي الغربة دي مضرة كيفن يعني ما كفاها شالت الحلو ،، كمان رجّت المر ...
الله عليك يا محمد يا عبد الرحمن يا (ماك مطرطش) عزمتني عزومة شحمااانة بالحيل .....

دخول وتحية وانحناءة لـ ملكة سبأ ومحمد عبد الرحمن والنصري ..

شككككككككككككككككككككككككككككككككككككككككككككككككككككككرا ليكم يا حلوين .

Post: #38
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 11:36 AM
Parent: #32

Quote: محمد عبد الرحمن لاااا (فكاك)

بطلي [بوامه]!
هو القالك داير فكاك من السماحه دي منو؟

_
أريت الناس كلهم بي سماحتك..
يمين ندخل [البورد] بي عشم لحظات طيبه.. ونمرق منو بي نفوس [أكتر] نضافه..

و؛

لا فكاك!

Post: #33
Title: Re: ينزل مطر خيرك يشطّف محنتـك ....
Author: إدريس محمد إبراهيم
Date: 01-05-2011, 11:05 AM
Parent: #30

Quote: يا زوله هوي؛
سمعتها قبل ما أوهطا!

_
ومن يوم الليلي ماني داير معاك!
إدريس بي طريقتو.. انشالله يعوعي ما شاء له [العوعاي]؛ والحكمي ان سمعا قريبي الكائن بالمغرب!!

كتر خيرك ياخ وكتر خير النصري في البسوي فيو دا!!

آلمطرطش أخوي ....

الله يبرد حشا البطن الجابتك ياخ..... وإن شاء الله العافي تبراك وين ما تقبل ....

شكراً ملكة سبأ أن أتيت لنا بكل هذا الجمال ....

مع خالص الود والتجلة ؛؛؛؛

Post: #34
Title: Re: ينزل مطر خيرك يشطّف محنتـك ....
Author: إدريس محمد إبراهيم
Date: 01-05-2011, 11:05 AM
Parent: #30

حذف للتكرار ؛؛؛؛

Post: #35
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 11:21 AM
Parent: #34

Quote: اتنين لا هسع ما ظهروا؛
واكان ما أبقى كضاب تاوقولن جنس متاوقا!
والاتنين عارفن [مهرودين]!!

واحد ظهر! (المهرود الأول: إدريس)

التاني يمكن [لاهو ظهر لاهو عين] اللي هوا جنا جبرينا الذي بالمغرب!

_
إدريس؛ حافض علي الباقيلك من رقيبتك وما تباريلي [الهراسمينت] و[الاستفزازات البتسوي فيهن
[المليكي] دي!

بالجنبه: لاحظت [نقريطة] الطنبور قبل [دخول] الغنيه؟

آآآآآمنت بالله!

_ممكن حد يصحي [طارق جبرين]؟

Post: #37
Title: Re: ينزل مطر خيرك يشطّف محنتـك ....
Author: إدريس محمد إبراهيم
Date: 01-05-2011, 11:36 AM
Parent: #35

Quote: واحد ظهر! (المهرود الأول: إدريس)

التاني يمكن [لاهو ظهر لاهو عين] اللي هوا جنا جبرينا الذي بالمغرب!

_
إدريس؛ حافض علي الباقيلك من رقيبتك وما تباريلي [الهراسمينت] و[الاستفزازات البتسوي فيهن
[المليكي] دي!

بالجنبه: لاحظت [نقريطة] الطنبور قبل [دخول] الغنيه؟

آآآآآمنت بالله!

_ممكن حد يصحي [طارق جبرين]؟

محمد أخوي أصلك ما بتعرف الستره ياخ ......أخوك (مهرود) وصابر ...

ود النصري ده أصلو التقول مخلوق لعذابنا بس .... أما أخوك الذي في المغرب ... فالزول ده خليهو ساهي آلمطرطش .. الزول دابو راجع من إجازي ..
بتدور تفطسو مالك يا الشقي ؟!!!!

Post: #51
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-07-2011, 04:11 AM
Parent: #37

Quote: محمد أخوي أصلك ما بتعرف الستره ياخ

يا ادريس؛
أسع ان الواحد ان [ قال] دار يسترك، يستروك كيفن!

شفتلك غربال حجبلو ضو شمش؟

- ان شالله [ الملكي] ما تقيف من جنس [البهردك] دا!

Post: #39
Title: Re: ينزل مطر خيرك يشطّف محنتـك ....
Author: طارق جبريل
Date: 01-05-2011, 11:47 AM
Parent: #35

قريبتي الله يعلم هريتي قليبي

يا نسمة كيف اخبار أهلنا وحينا
احكيلي عاد باقي طولوا مننا
زي ما دوام طارنهم طارننا
زي ما بنشيلهم في القلوب شايلننا
حتى البعاد فتق جروحن زينا
يا نسمة ما تدسي المكتم عننا
تمرتنا كيف يا نسمة عرجونها انتنى
شيلن تقيل فوقه الدباس رسل غنا
لملم عويشه مع الصباح للعش بنا
حضن الجنا

الساقي كيف.. جدولنا كيف.. البوغة كيف..
آآآنسمة ما شفتي المتر سايقنه صيف
عربا بعاد يا نسمة كيف
ما قالوا ليك بيوضة رشاها الخريف
يا نسمة لم غسيتي ما شميتي زيف

يا نسمة قولي بدون بكى
المنقة كيف.. والبرتكان صِح شال وانتكى
آآنسمة مالك ساكتي ما قلبي اشتكى

يا نسمة قولي فتر أنا
أحكيلي عن ناس حينا
شيلي السلام يا نسمة بالكوم مننا
وديهو ليهم في الشمال من عندنا
ان شاء الله توصلي بالسلامة بدون عنا

Post: #40
Title: Re: ينزل مطر خيرك يشطّف محنتـك ....
Author: معاوية عبيد الصائم
Date: 01-05-2011, 01:28 PM
Parent: #39

يا ملكة فى التبادى
سلام وشوق ليك والحبان

Quote: الشوق يحف كل المبادي وكت مرق
والريح تحت صفقك مع الأفراح ورق
النيل مطول بالو والبال انسرق
نشرب هواك رضا ونصيب

الفكره
من رحم التعب يطلع وطن
فى ذمة الخلق البيشلو النيل تقاوى
يمشوا كايسين الزمن
ياحمه فى عصب الخطى
المنهوكة طبالين وساسه
ارهقت يمه العواسه..

ملكة برجع اكمل سمح

فى ضمتك الكلام الفكرة الفوق ده اهدى( للمطرطش )

سلام يا ملكة والمرور

Post: #41
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 02:04 PM
Parent: #40

Quote: فى ضمتك الكلام الفكرة الفوق ده اهدى( للمطرطش )

يا معاويه؛
والله [المطرطش] آبيرجى لامن يهدو جنس دا!

أنا بس ضمه سويتو هولي؛ كان طارق جبرين يرضا كان يابا آب يخسني!

ياخي دا [نَضِمْ جنسو برا]!

Post: #42
Title: Re: ينزل مطر خيرك يشطّف محنتـك ....
Author: Amira Elsheikh
Date: 01-05-2011, 02:16 PM
Parent: #41

Quote: يابلدي في الخاطر قريب
انا عشت في ضلك زمن عشقك يوديني ويجيب

اسى انا اسوى شنو ???

ملكة سبأ وينك تغيبى وتجى علي كيفك ?.....

ما كان نادى عزابة داك يا ملكة تحياتى

____________________________

شكرا المطرطش للكزة السمحة دا ...

Post: #43
Title: Re: ينزل مطر خيرك يشطّف محنتـك ....
Author: معاوية عبيد الصائم
Date: 01-05-2011, 03:02 PM
Parent: #42

Quote: يا معاويه؛
والله [المطرطش] آبيرجى لامن يهدو جنس دا!

المطرطش

لعنة المطر استبدت
ضوعت مسك السحابه
ما فتر حيل التعابه
من جدوال الهم
بتمرق بكرة تمرات الرحابه
من اصابع شفع الخلا والضرا
بتقوى ريح كسر الرتابة
يارسن فى خيل وليل
يا وطن بصهيل ونيل

برجع تانى
مطرطش اخوك باليلبانى

Post: #44
Title: Re: ينزل مطر خيرك يشطّف محنتـك ....
Author: omer osman
Date: 01-05-2011, 03:09 PM
Parent: #43

الله ... الله .... . يابلدي ..

Post: #45
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-05-2011, 03:40 PM
Parent: #44

Quote: الله ... الله .... . يابلدي ..

أي والله يا عمر..
Quote: وانا يابلد ماعندي غير اتلعبسك شـوق واكتفي

Post: #46
Title: Re: ينزل مطر خيرك يشطّف محنتـك ....
Author: صديق الموج
Date: 01-05-2011, 11:16 PM
Parent: #45

الملكة وحات الملح والملاح كان فوتينى شى متل ده..
فطيتينا فى الاهداء ومشيناها ليك..
بس الكلام السمح البشبه حميد ده حق منو؟
البركه فى المطرطش...
وفعلا يضع سره فى اضعف مطرطشينو،،،

Post: #56
Title: Re: ينزل مطر خيرك يشطّف محنتـك ....
Author: محمد عبدالرحمن محمد
Date: 01-08-2011, 09:06 AM
Parent: #46

Quote: البركه فى المطرطش...
وفعلا يضع سره فى اضعف مطرطشينو،،،

موج يا موج؛

ترى الرجل النحيف فتزدريه ** وفـي أثـوابه أسد هصور

__
ياخي في ذمتك لاقاك قريب بوستاً طاعم متل دا؟

[المطرطش]

Post: #47
Title: Re: ينزل مطر خيرك يشطّف محنتـك ....
Author: حبيب نورة
Date: 01-05-2011, 11:16 PM
Parent: #45

ينزل مطر خيرك يشطّف مِحنتك

قتّ أتضارف علي حِسِّي أختي الكلام البحرق الروح والعصب
وانا عارف إنو دمعات الوجع بتساسق في عيوني
تناهِد خطواتي في الزمن الكعب
وأنا حارس مطر خيرك ينزل يشطّف مِحنتك
يا بلدمغستك تشِق وتهرد حشانا
تصادر غنانا
وتخنِق تفطّس وتكتُل جنانا

ولساتنا حارسين مطر خيرك
ينزل
يشطّف مِحنتك !

الملكة !
هو المغس شوية ؟
سمعت النصري غلبنا النضِم وفترت من غتغتة عبرتي
بي خِرقة عشم

بجيك بي رواقة
وحاتك مهرِي عديل كده

شكرن كتيرن !

Post: #48
Title: Re: ينزل مطر خيرك يشطّف محنتـك ....
Author: Tarig Sidahmed
Date: 01-06-2011, 06:15 AM
Parent: #47

الكلام السمح يعجب

والغنى الجميل يطرب

شكرا جميل لهذا الابداع

Post: #49
Title: Re: ينزل مطر خيرك يشطّف محنتـك ....
Author: عمر قسم السيد
Date: 01-06-2011, 10:20 AM
Parent: #48

كل التحايا لشاعــر وكاتب هذا النص الجميل

الاستاذ / خالد على عبد الرحيم ( المحامي )

ولمن لا يعرفه هو صاحب كلمات رصينة وكتااااااااااااااااااااب جدا جدا

لكنه بعيد عن اجهزة الاعلام ( هكذا هم المبدعون الحقيقيون ) يقفون دائما في الظل

ويتحاشون الاضواء مثل ما ينزوي ( شاعر العابرات ) محمد احمد على الحبيب .. المشهور بالحبيّب

في جزيرة بجبوج بمنطقة اسلي بالولاية الشمالية

تحياتي ملكة سبأ وتحياتي خالد علي

Post: #50
Title: Re: ينزل مطر خيرك يشطّف محنتـك ....
Author: حبيب نورة
Date: 01-06-2011, 03:55 PM
Parent: #49

وينزل مطر خيرك يشطّف محنتك !

فوووق

Post: #52
Title: Re: ينزل مطر خيرك يشطّف محنتـك ....
Author: Tabaldina
Date: 01-07-2011, 06:49 PM
Parent: #50

..
.
شكرا على الروعة

--------

لينا زمن نفتش ليكـ

مودتى؛

Post: #53
Title: Re: ينزل مطر خيرك يشطّف محنتـك ....
Author: إسماعيل حميم
Date: 01-07-2011, 11:42 PM
Parent: #52

بلقيس يا ملكة

تحايا وأشواق الزمن القبيل

بنيتي حسابك
بتكتلي ليك زول بهذا الطرب الشجي

كل الود
إسماعيل حميم

Post: #54
Title: Re: ينزل مطر خيرك يشطّف محنتـك ....
Author: طارق جبريل
Date: 01-08-2011, 00:08 AM
Parent: #53

الله عليك يا بلقيس ياخي
فوووووووووووووق

Post: #55
Title: Re: ينزل مطر خيرك يشطّف محنتـك ....
Author: حسن التوم
Date: 01-08-2011, 06:24 AM
Parent: #54

وآصلي ......
و(إندلقي ِحِن)....
وكانت لنا( ليمونة في بلد قرفانة)

أبوسبأ

Post: #57
Title: Re: ينزل مطر خيرك يشطّف محنتـك ....
Author: خدر
Date: 01-08-2011, 01:07 PM
Parent: #55

شكرا يا ملكة
اغنية جميلة

شكرا يا ابوحميد , اخوك بعيد ليهو فترة و فاتتو كل الحاجات الحلوة