فينيسيا الشرق والفكي أب طشت ... أو شر البلية مايضحك ( يا مسؤوليـــن يـــــــــــا )

صباح اليوم وبعد طلوع روح اتمكنت من الحصول على مقعد داخل حافلة متجهة إلى بركة (وسط) البلد ... ترددت أولا في الصعود إليها لأني ظننت انه تم تأجيرها خصيصا للذهاب لاداء واجب عزاء ...

صمت رهيب يلف الجميع .. سحن متجهمة وأجساد منهكة وهيئات غير مرتبة .. جلست بتوجس دون ان القي التحية - انا نفسي متعبة اثر يوم أمس (المطين) - وفعلا ليس هنالك مايدعو للكلام أو يجبر على الإبتسام .. انحيت في محاولة مني للملمة أطراف ثوبي ومنع تلطخه بالمزيد من الطين والأوحال أحكمت لفه حول ساقي وإنتظمت في صلاة الصمت تلك ... وشرد بصري يتأمل جمال المدينة وهي تتحول لفنيسيا الشرق ... ردني الكمساري وهو الأخر لا تسمع سوى طقطقة أصابعه بين الحين والآخر دون ان يدخل في جدله المعتاد مع بعض الركاب ..
كل مايشعر بالحياة هو الصوت المنبعث من الراديو وان كانت نفسها الأخبار المكررة والأحدايث المستهلكة .. فجأة انتقل مايكرفون الإذاعة إلى مذيع متحمس جدا كأنه ينقل وصف لمباراة في كرة القدم (الهلال سيد البلد)

سيادتي سادتي .. الآن وفي نقل مباشر من محلية ... نحتفل بمتخرجي عزة السودان ال(11) وبداية مشروع النفرة الخضراء لغرس مليون شجرة (تبارك الله) بحضور السيد/ المعتمد والسادة وزراء الشباب والرياضة والبيئة والصحة ( وواحدين تانين مامتذكراهم) ويعلو صوت المذيع (الفرحان) وفي هذه اللحظة وبعد ان تم غرسها السيد/ المعتمد يحمل جردل لري أول شتلة في النفرة ووووو
ولم نسمع ماذا قال بعدها إذ خرج الركاب من صمتهم ليستغرقوا في فاصل من الضحك المجلجل اثر تعليق احد الركاب الساخطين وبنفس حماس المذيع
- عايز يزيد الطين بلة ؟!
وبعدها انطلق سيل من التعليقات الساخرة ولكم ان تتخيلوها ... واستمرت روح الدعابة والضحك الساخر وطغى على الجو المكهرب بالتعب ..

وفعلا شر البلية ما يضحك

دي قصة حقيقية بدون تفاصيل (الحالة) حصلت معاي صباح اليوم فعلا

اذاعة الرياضية اف ام اخبار العاشرة تقريبا ياريت يكون في زول حضرها

ولو ما اتنبه للحتة دي يكون بالغ

لو ماحضرتوها تكون فاتتكم زي ماعركي فات انعام اليوم داك




انتو ماقاعدين تحضرو روادي ليييه ؟!

السيد/ المعتمد

صدقني نحن فعلا محتاجين لجردلك دا وبشدة

عايزين جردل (يغرف) معانا مش يكب موية زيادة ويزيد الطين بلة زي ماقالو الجماعة

انت ماطلعت من أمس ولا شنو ؟!

موية شنو البتكبها .. انت بي صحك آزول ؟!

ثم انت لقيت حتة ناشفة وين عايز ترويها ؟!

انتو ياجماعة الناس ديل مامعنا في البلد دي ولا شنو ؟!

غايتو لو شردتو وخليتونا في الوحل والغرق دا ماعافين ليكم

ولو قاعدين ومطنشننا وبتستهبلو فينا برضو ماعافين ليكم

والله في

السيد/ وزير الشباب

وكت غلبتكم تب شوفوا لينا المجندين ديل يجو يفزعونا

صدقني نحن هسة مافي عرض شدر وزراعة

انت وصلت بيتكم امبارح الساعة كم ؟!

نحن الفينا كملت تب وماحمل تنطيط وجهاد في المشية والجية

الواحد يصل شارع بيتهم بعد اربعة ساعات وعشان يصل باب بيتهم عايز ليهو ساعتين تاني



انتو عندكم أحواض سباحة ؟!

السيد/ وزير الصحة

سبحان الله !!

طبعا عارفني عايز أقول ليك شنو !

النبي كلمة أولويات دي ساكت ماسمعتو بيها ؟!

الباعوض بيلد ولا يبيض ؟!!

وكان الذباب وقع في الفنجان نشرب الشاي ولا ندفقو ؟!

شفت ! عايز تجيب لينا الهوا مع الشيخ !

يامولانا نحن عايزين تزرررريع .. تزريع دم

زراعة شنو وضل شنو وانت مدينا حـر الحمى


الحق قبال نسويكم في دريبات وانت عارف

والله عارف

السيد والينـــا

يازول نحن بخييير وماعندنا عوجة تب ، الشوارع في امانتي الله

تصريف جد وميلانات صاح والموية جري شديد على المصارف

لله دركم انت والمهندسين الجايبنهم ! ديل من وين بالله ؟!

انت صحي في شنو رايح في الخرتوم ؟!

ولا دي شنو الحفر الكل يوم وحركات أين الكنز دي ؟!



ومالك قاطع الحس والخبر عسى ماشر ؟!

ماعندك مركب ولاشنو ؟! تسوها يخوت طويييلة عريضة بلا فايدة وتغلبكم (المريكب) في الضيقة الزي دي ؟!

قلت الخرطوم كلها مطرة مطرتين وخلاص ؟!
أها خم وصر !

وبعوضة بعوضتين يودن الآخرة
وضبانتين تلاتة يلحقت امات طه

عارفو ؟!

ولا شنو ؟!

Quote: ولو قاعدين ومطنشننا وبتستهبلو فينا برضو ماعافين ليكم والله في

الشركات الكتيره العامله المتعافى الحقو ما تعفو ليهو ده والبطلع موظفيهافى اجازات صيفيه من القاهره مرورا بدبى ثم كوالا لامبور
ما سالتوه وقلتوا ليهو امنة فى ذمتك البلد محتاجه للمجارى والمجارى البعملوها كل سنه وبلهطوا فيها شركات الاقارب والحبايب المليارات ما بحاسبوهم ليه عشان القصور؟؟؟؟؟؟؟؟؟؟؟؟؟؟

النبي فيك كلام عبد الغفور دا صحي ؟!

خلاص انت معناتا اجازتك دي قضيتها في إيطاليا

مش شاطرة ؟!


مرة سمعنا قالو الوالي راح البرازيل

الجماعة قالو بكون مشى يجيب مدربين للصبر


ياتاعببببنا !!!

Quote: مرة سمعنا قالو الوالي راح البرازيل الجماعة قالو بكون مشى يجيب مدربين للصبر

دي قوية خالص يا الملكة

Quote: دي قوية خالص يا الملكة

أقوى من مطرة أول أمس دي ؟!



ولا أقوى من الهلال

سلامات عبده

يعني هسي الفرق شنو ومحمد حامد دا مالو معاك ؟!




انا كان في محلك إنتحر

...
...

المياه وصلت للركب
"انتى يا ملكة شايفك بتكوركى ,,!!
مسؤولين"

مسؤولين شنو البرفعوا جلاليبهم وبدلهم دى وينزلوا الشارع

...
...

خلى لما يعملوا لجنة تكشف ليهم الوضع الحاصل

نحن فى بلد ديموقراطى ....

بالحيل

الناس تعوم وتغرررق وتكورك واضان الضان طرشاء



"ديل ذاتو ما ضان ,,,ديل ..."




الخرطوم دى نهايتا يا غرقة يا حرقة!!

...
...





وبس

Quote: مسؤولين شنو البرفعوا جلاليبهم وبدلهم دى وينزلوا الشارع

إزيك ياملك

هم عارفين الحاصل يعني .. ولا هايمين في عالم تاني ؟!

قلنا نضرب الورروووك دا كان ينفع

شوف المصيبة:


يعني كلو منك ياتش تش

Quote: الخرطوم دى نهايتا يا غرقة يا حرقة!!

أسعد

...
...

المقولة أعلاه ليس من تاليفى فقط لو تتبعت الأحداث

"إنفجارات ,,تفجيرات,,,اسلحة,,,مخازن ....الخ السينايورهات المعلنة والمدسدسة
" سيول ...فيضان ...تحزيرات ...أمطار ...ضحايا وخسائر معلنة ومدسوسة"


...
نهاية القصة البلد دى حتنتهى قريباً ....أقرب مما نتوقع

حتلاقى الشعور ده فى وجه اى زول ...إحباط ... من كل شئ
ـــــــ
عارف أكتر حاجة فرحت بيها البلد دى من كم سنة شنو




فوز الهلال أو المريخ ..
فى كم الإسبوع الفاتو
وخالد فى الام بى سي
وروضة الحاج فى الشعر





ما تبقى

"غرق (عشرات), قتل(وزبح بشع), إغتصاب(اطفال), تشريد(وتهجير قسرى),سرقة(مسلحة),تفجيرات (اسلحة) , فضائح وإشاعات (فنية..طبية..رياضية..إجتماعية)"




احسن اقول بس
مش ..!!!

Quote: حتلاقى الشعور ده فى وجه اى زول ...إحباط ... من كل شئ

اخرتها وين ياربي !

بلد تطوقها المحن من كل جانب
انسان محبط بائس ..
والله ياملك انامرات كدا بصل مرحلة من الألم والإحباط لدرجة لو سمعت لي زول بضحك بتهجم عديل

Quote: عارف أكتر حاجة فرحت بيها البلد دى من كم سنة شنو فوز الهلال أو المريخ .. فى كم الإسبوع الفاتو وخالد فى الام بى سي وروضة الحاج فى الشعر

Quote: انت ماطلعت من أمس ولا شنو ؟! موية شنو البتكبها .. انت بي صحك آزول ؟! ثم انت لقيت حتة ناشفة وين عايز ترويها ؟! انتو ياجماعة الناس ديل مامعنا في البلد دي ولا شنو ؟!

الله ياملكة بوستك ده مفروض يكون في جريدة..
ناس بتعلب اخبارا..
تجهز تفاصيل كضبها بالاسبوع دون مراعاة لشعور الجمهور وشعور الطقس..

طيب الجمهور وعرفاكم ماخايفين منو.. ما بتخافو من غضب الطقس يامعتمد

ياخي موش الله قال: يَجْعَلُونَ أَصَابِعَهُمْ فِي آذَانِهِمْ مِنْ الصَّوَاعِقِ حَذَرَ الْمَوْتِ وَاللَّهُ مُحِيطٌ بِالْكَافِرِينَ ..
مابال هؤلاء لايحذرون الموت؟؟

دكين

ديل يجعلون أصابعهم في آذانهم من أي شي ليهو علاقة بالمصلحة العامة فيما يبدو

وللاّ نفسّر الحاصل دا بشنو ؟!

قلت لي المطرة مالها؟

ملكة سبأ
سلام
كلامك ده طمنا وأكد لينا فى هامش (حر) .. ما مطر عندكم !!
كتبتى:-

Quote: انحيت في محاولة مني للملمة أطراف ثوبي ومنع تلطخه بالمزيد من الطين والأوحال

انت عارفه من امبارح انقلبت رباطابى ولمدة أسبوع بحالو!!
غايتو توبك بى طريقتك معاهو .. لكن اعملى حساب شديد على توب الهلال الخاتاهو فى البروفائل وبرفرف عالى ده، البرشو بى موية مطرة بنرشو رشة (الحضرى) !!

اهل الفرحة

اهليين ياتاج

ماتخاف توب الهلال الحاجة الوحيدة الفاضلة لينا فبالتالي جوا عيونا قبل قلوبنا


جاياك لقصة الفكي أب طشت

السلام عليكم
الملكة
ياخي انتو طماعين بشكل
وما بتقدروا مجهودات الناس
بل وتبخسوها كمان
الزول تعبان عشان يأكلكم جداد
وانتوا قاعدين في الحاجات التافهة دي
بيوت تتكسر ، صرف صحي وبعوض وضبان وما عارف ايه؟
.............
هذا الموضوع...
من أجمل ما قرأت مؤخراً من مواضيع
مباشر ومختصر ويحمل رسائل تتضمن سخرية لاذعة وتشخيص مباشر للمشكلة
شكراً ملكة سبأ

.............................
وما الناس إلا هالك وأبن هالك *** وذو نسب في الهالكين عريق

الملكة سلام

بوست رهييييييييييييييييييب

قلت لي الناس غرقانة ومكفكفين هدومن لي فوق عشان يمشوا في الشوارع المليانة موية وطين وصاحبكم عايز يكب ليهو جردل موية في الشجرة .... والله بس الديك المابعرف الوقت

غايتو لكن تعليق الراكب رهيييييييييييييب والله أنا أضحك لما دموعي مشت ..

تشكري يا ملكة وتسلمي

أبو قصي

سلام وود وشوق يا أبو قصي

شفت المضحكات المبكيات دي ؟!

وفعلا شر البلية ما يضحك

Quote: هذا الموضوع... من أجمل ما قرأت مؤخراً من مواضيع

بالرغم من إني ضحكت .. من اسلوب المعالجة ..
إلا إنو الاحساس بالمعاناة .. رجعني لي تاني لي موية المطرة .. والناس الماشه في الشارع وتنطط زي ( الكنغارو ) .. وباقي الدم الفيها ده داخرنو لي رمضان..
..
يا بلقيس إنتو الوالي ده بيقرا كلامكم ده .. والا بتشيلو موية المطرة وتديهو البحــر ..؟
غايتو كان بيقرا دي كارثة ..
وكان ما بيقرا دي كارثتين ..

علا إزيك

يوم داك إتصلت بزهرة وإطمأنيت على صحة الوالد الله يدهو العافية ..

Quote: غايتو كان بيقرا دي كارثة .. وكان ما بيقرا دي كارثتين ..

في الحالتين أنا الضائع

غايتو ياعلا المطرة دي لو طبقتها والجماعة لسة في عمايلهم دي

رمضان كدا حايكون موقفه ضعيف صدقني

وحا تتأهل الملاريا أكيد

سلام ليكم جميعا

Quote: الزول تعبان عشان يأكلكم جداد

الزول ياتو فيكم ؟

غايتو كان انت بنصدق ، غير كدا يفتح الله

عارف ! الناس حقو تبطل تاكل جداد بعد الكلام دا

احتمال كبير الحكاية يكون فيها إنة !!

شكرا ليك كتير يازووول

وغايتو ليناالله وعيشة السوق

ملكة سبأ
من أجمل و أصدق ما قرأت .. و سمعت و رأيت !!

الاخ الملك
تحياتى
أنا لا اتابع .. بل عايش الحدث و زى ما قال أحد المطربين (خليك مع الزمن) فأنا مع الزمن و داخل القوقعة ..
ما كتبته انت .. أيدته أنا بل و أبصم عليه العشرة!!
و هو نهاية لتراجيديا سوداء، تنجلى فى لحظات لتصبح قاتمة.. ثم تعود لسوادها!!
و كتبت أنا قبل فترة
(و هكذا .. من أسبرطة إلى العمدة .. تتداعى الصور و الاحداث و نعيش يوم الاغتراب أملا فى العودة .. و فى إنتظار الفرج الاتى من البلد.. يتم البيت ، لو أصلا فى أرض.. و نفرش العفش .. و نوقف العربية بره البيت فى الحوش فى القراش.. و يكون فى مكتب و لا شغل ولا ورشة نمشيها .. و يمكن الواحد يكبر عقله شوية و يقول يعمل شركة..
لكن و مع احترامى للراحل المقيم ليكورغوس و الاخ العُمدهْ المذكور فى قصيدة الدوش ،الأمور إختلفت جدا و العودة الطوعية أو الالزامية مسألة معقدة كما النسبية.. و المخوفنى منها كلام الشاعر التجاني حاج سعيد لما يقول :
( رحلت وجيت
في بعدك لقيت
كل الأرض منفي ..)
و المخوفنى أكتر كمان إنو فى بعدك و قربك .. يا بلد تكون كل الارض منفى !!)

لكم الود

أسعد الريفي

الله يستر !!

بلقيس

سلام يا ملكة ...

اضحك الله سنك ..

تعرفي احيانا يكون في ضحك احسن منو البكا عديل كدي

الشعوب بتضحك من غلبها ...

Quote: صدقني نحن فعلا محتاجين لجردلك دا وبشدة عايزين جردل (يغرف) معانا مش يكب موية زيادة ويزيد الطين بلة زي ماقالو الجماعة انت ماطلعت من أمس ولا شنو ؟! موية شنو البتكبها .. انت بي صحك آزول ؟! ثم انت لقيت حتة ناشفة وين عايز ترويها ؟! انتو ياجماعة الناس ديل مامعنا في البلد دي ولا شنو ؟!

يعني

ياملكة .. الزول الداير يزوركم الأيام دي

الأ يجييكم بهدوم السباحة

ولا راكب ليهو فوق عود نخل ماكن ..

تخريمة

الركشات راحت وين ؟؟؟

Quote: سيادتي سادتي .. الآن وفي نقل مباشر من محلية ... نحتفل بمتخرجي عزة السودان ال(11) وبداية مشروع النفرة الخضراء لغرس مليون شجرة (تبارك الله) بحضور السيد/ المعتمد والسادة وزراء الشباب والرياضة والبيئة والصحة ( وواحدين تانين مامتذكراهم) ويعلو صوت المذيع (الفرحان) وفي هذه اللحظة وبعد ان تم غرسها السيد/ المعتمد يحمل جردل لري أول شتلة في النفرة ووووو ولم نسمع ماذا قال بعدها إذ خرج الركاب من صمتهم ليستغرقوا في فاصل من الضحك المجلجل اثر تعليق احد الركاب الساخطين وبنفس حماس المذيع - عايز يزيد الطين بلة ؟! وبعدها انطلق سيل من التعليقات الساخرة ولكم ان تتخيلوها ... واستمرت روح الدعابة والضحك الساخر وطغى على الجو المكهرب بالتعب .. وفعلا شر البلية ما يضحك

مافى اعمق و ابلغ من كده ببساطة و عفوية و ذكاء هبشتى مكامن الوجع ياالملكة سلامات كتار وشوقى زى مطرة الخرطوم المطنشنها المسؤلين و زايديين طينها بلة !

منو البسمع يانادية ؟

ومنو البحس ؟!


شوق بالأكتر يازولة

تضحكوا ونحن زعلانين ؟


غايتو الأيام دي أظن شغلة تجارة الفِلق (عيدان النخل) أربح من تجارة التمر زاتو

وان بقيت جاي أضمنلك طوف ماااكن

وقصة الركشات دي كمان براها

البنية مبروكة يأحمد حنين

تتربى في عزكم وفي ظروف أحسن ان شا ءالله

سبا حبيبة كيفك

Quote: يازول نحن بخييير وماعندنا عوجة تب ، الشوارع في امانتي الله تصريف جد وميلانات صاح والموية جري شديد على المصارف لله دركم انت والمهندسين الجايبنهم ! ديل من وين بالله ؟! انت صحي في شنو رايح في الخرتوم ؟! ولا دي شنو الحفر الكل يوم وحركات أين الكنز دي ؟! ومالك قاطع الحس والخبر عسى ماشر ؟! ماعندك مركب ولاشنو ؟! تسوها يخوت طويييلة عريضة بلا فايدة وتغلبكم (المريكب) في الضيقة الزي دي ؟! قلت الخرطوم كلها مطرة مطرتين وخلاص ؟! أها خم وصر ! وبعوضة بعوضتين يودن الآخرة وضبانتين تلاتة يلحقت امات طه عارفو ؟! ولا شنو ؟!

يازولة انتى بصحك ولاشنو عليك منتظرة يسلو فيكم ولا فى اى حاجة سبحان الله انشالله الخرطوم تغرق وانتو كلكم يضربكم الباعوض وتلحقو امات طة ولاام اى حاجة تانيه حبيبتى ده عز الطلب والله كان احنا ماعندنا عوجة ماعارفة
كيف ماعندكم عوجه هو فى عوجة اكتر الانتو فيهادى ومكرهانا احنا زاتنا.
مشتاقين احنا ياسبا

Quote: والله كان احنا ماعندنا عوجة ماعارفة كيف ماعندكم عوجه هو فى عوجة اكتر الانتو فيهادى

ماجدة ياحبيبة دا من باب (( من الجهل تشكي حوجتك لمن لا ينفعك ))

ونحن بقينا في نفع الله هو حسبنا ونعم الوكيل






اديني يومين تلاتة أخلص من عولاق الخرطوم وأفضى ليك

يا ملكة نحن من هنا نطالب الوالي بربط ( فلوكة ) في كل ناصية شارع وتوفير كمية من الجرادل والبخسات (القرع) تكفي لغرف المياهـ والتصديق بخمسين طورية وستين كوريق لكل شارع وصرف عدد 10 سبلوقات لكل بيت.
انت يا ملكة بعد تغرفو الموية دي حاتمشي وين ؟؟

كما نقترح أقامة مهرجان دولي للسباحة في الشوارع وسيكون لنا الريادة في هذا المجال حيث لم تسبقنا اي دولة لذلك.

شرووم

الملكة سلام

Quote: الباعوض بيلد ولا يبيض ؟!!

صدقيني أنا في إجازتي دي لاحظت حاجة إتمنى ناس المعامل البايولوجية ولا أي جهة متخصصة تتعامل معاها بجدية تامة
لاحظت أن هناك نوع جديد من الباعوض ... نوع أول مرة أشوفو
له أجنحة بلون مائل للزرقة .. و أطول قليلاً من الباعوض القديم ..
الباعوض الصنف القديم نجد أن لون البطن مائل للرمادي .. و لكن الصنف الجديد دة لون البطن في لون الشمع.
الحكاية دي إتأكدت منها بمعاينة لصيقة ( يعني بمكبر مجهري دقيق ) ..
و دة طبعا بينطبق على أنواع الذباب الجديدة كبيرة الحجم بلون ذهبي لامع و الذي لا يستجيب للهش فيقبع لاصقاً بك و كأنه سيرث جلدك.

و شر البلية ما يضحك

دمت

Quote: و دة طبعا بينطبق على أنواع الذباب الجديدة كبيرة الحجم بلون ذهبي لامع و الذي لا يستجيب للهش فيقبع لاصقاً بك و كأنه سيرث جلدك

أورثتنا الغم والهم الذي لا ينقطع يا أبوجهينة

مافي زول جادي في البلد دي صدقني ..

قريت عن الدكاترة المابعرفو يكتبو روشتات ؟!

وتقول لي جهات متخصصة !!

وهل تصدق

حسب اخر لحظة

انو

هذه البحيرة الآسنة تحيط بداري وزير المالية الاتحادي ووزير الدولة بوزارة الخارجية قريب من كبري الجريف والمنشية ؟!




جدية دي جاية من جداد ؟!

ياشرووم ذكرتني ايام الفيضان في بلدنا والحقو البحر كسر بي ساقة فلان والشوالات والطواري عند ناس فلان

ومتخيلاك هسي بتكورك من مكرفون الجامع

ماقصرت معانا غايتو ، أخير من واحدين

بخصوص الموية حاتمشي وين ؟

غايتو ماظنيتها هني :

الخرطوم كلها بقت سيقان..

يابخت العالمين هناك...

لا حولا يا بلقيس هسه جيت من بره
ده شنو حاجة مبالغة
الحالة ده اليوم التالت
غايتو الله غالب

مودتي

Quote: لا حولا يا بلقيس هسه جيت من بره

آآي شايفاك يانهال





ويجي تبلدينا يقول لي كورلتي

الخرطوم الايام دي تذكرك زمن العسكري اب رداء يادكين






الناس ماشين لي قدام

ونحن ماشين لي ورا

كان الله فى عون المواطن السودانى البسيط المقهور دوما

الملكه وضيوفها
سلامات
المثير للدهشه هو ان هناك هيئه كامله اسمها هيئة تطوير ولاية الخرطوم شغاله من سنة 1997 ولحدى هسه الهئيه دى ما جايب خبر لحكاية المجار والخريف البسيل للركب لانه الفسد ذاتو فات الركب وكل من المسئولين وذويهم ملياردرات الزنه والذين تهب لهم العطاءات دون محاسبه يعملوا مجرى الصباح ينهار العصر يقبضوا حقوا بعد بكره من وزارة الماليه البتاخد الضرائب عغبر مصلحتها الانيقه من المواطنيين التعبانيين والغريب انه هذه الشركات لاعليها ضرائب وبرضوا بقولوا ليك فى كبارى وفى وفى نعم انجازات فوريه لاتخضع للمواصفات والقياسات وللحاجه اسمها الصيانه الدوريه وبرضوا فى ناس تجى تقول ليك حاجات كده ما مفهومه تخلى الواحد يهترش
طيب لو الناس دى عملت بضمير وزمه كان ده حصل؟؟؟؟

سلامات عبد الغفار

عارف الضمير دا بجيبوهو من وين ؟!

Quote: كان الله فى عون المواطن السودانى البسيط المقهور دوما

فالتشملنا رحمة الله يانهلة

المعتمد أبو جردل خليهو

دايرين واحد يوصل رابط البوست دا للمتعافي

الجميلة ملكة سبا
تعظيم سلام يا ملكة وست جيلك

يا أختي لو ناس المعتمدية شافو شغلهم وعملوا مجاري تصريف
زي الدول الباقية وبقت الموية تصب بي جاي وتذهب بي جاي
من وين يجدوا مساعدات تاني
ناس الخليج ديل كان ماشافوا الموية ركب مافي هلله بتمرق
هم دورهم محصنة لا ضبانة لا باعوضة لا قراص ما بدخل
والتكيف المركزي يهبهب جوووووووووووووو
المنكوين هم ليهم الله وعيشة حمدالله
الله يكون في العون
ولا يسعنا نحن المنكوين ألا ان نقول
اللهم حولينا ولا علينا
حتى يخضر الوادي وتشبع بت ام ساق والبهم في طرف الفريق
والخير يدر ونشرب لبينة ونسلق وننجض العيش ريف في سهلة الله

لك التحية والتقدير والاحترام ملكة سبا

خالد محجوب

Quote: ولا يسعنا نحن المنكوين ألا ان نقول اللهم حولينا ولا علينا حتى يخضر الوادي وتشبع بت ام ساق والبهم في طرف الفريق والخير يدر ونشرب لبينة ونسلق وننجض العيش ريف في سهلة الله

آمين يارب العالمين
عبيدك المسؤولين في وادي تاني

فأرعانا بلطفك

Quote: دايرين واحد يوصل رابط البوست دا للمتعافي

والرابط لقى ليهو طوف وابى يمشي يافـــدوي الشـــريف ؟!

بالله أسالو معاكم :





والمطــرة كيييييف ؟!

السلام عليكم

Quote: السيد والينـــا يازول نحن بخييير وماعندنا عوجة تب

سمعتي بالزول الجاهو قريبو من البلد ( قبال التلفونات دي)
مشى لاقاهو في المحطة
وهم راجعين سألو
أها يا زول خليت الناس كيف؟
قالو
والله بخييير ومافي عوجة ... لكن
ولدك غرق ومرتك لما سمعت بالخبر ولعت النار في روحها، قامت النار حرقت بيتك !!!!
علِ تاني ... بَسطْ شديد ومافي عوجة تب
............
وما الناس إلا هالك وأبن هالك *** وذو نسب في الهالكين عريق

أها يا ملكة
نعضي أصابعينا ؟؟
مرارتنا مافيشة أصلاً عشان تنفقع !!!
لي متين ده ؟؟
متين نحن نفرح ونمد إيدينا للسماء حمداً للمطر المجاني ده ؟؟
مجاني لأنو في ناس تانين بيشدوا ليهم دعوات ومكرفونات للناس عشان تجي تصلي وتقول يا رب مطر !!
أها نحن المطر نازل وكابي فوق راس العالم (نقمة) وليس نعمة !!
نقمة ليس بسبب غضب الله علينا (غلابى ومساكين)
بل غضبه عليهم لمواويل الكذب النازلة فوق روسينا دي
ظلط وماأدراك ما أٍسفلت !!
أها خمو وصروا ... حيكون كلو حفر وترجع ريمة لأقدم عاداتها ..
يا ربي شن بتسووا تاني ؟؟
برضو حا تجو تختو ليكم طبقة جديدة بي كوم قروش جديدة ؟؟؟؟
ولا تشوفوا ليكم طريقة وحق الظلط ده تسوهو خيران أول بعدين تشوفوحكاية الظلط دي !!
ظلط ناس الكداري بقي أهم
عشان السيقان الحايمة دي ..
............
سترة السيقان دي ما دين ؟؟؟؟؟

Quote: صــــباح الخير كمال حسن بخيت ما دامت ولاية الخرطوم مشغولة بما هو أهم لابد من إستنفار شعبي يسهم في ردم المستنقعات التي أحاطت بالعاصمة -------------------------------------------------------------------------------- ظل أهل الخرطوم وضواحيها التي أضحت مدناً أخرى ملحقة بالخرطوم.. ظلوا جميعاً يعيشون في حالة من القلق عندما تتجمع السحب فجأة ويهطل المطر مدراراً.. وذلك خوفاً من المفاجآت التي تحدثها الأمطار لمساكنهم ومحالهم التجارية نتيجة لعدم تصريف المياه. ووجود البرك التي انتشرت في شوارع الخرطوم الداخلية.. أصبح الناس يعانون معاناة شديدة في الوصول الى منازلهم أو الخروج منها.. وتزداد الصعوبة عندما تهطل أمطار جديدة. الذباب لم تفعل الطائرات التي طمأنت الناس أي شيء له، وإنما ازداد حجماً وكمية.. أما البعوض.. فقد جعل أعداداً كبيرة في كل منزل يلزمون فراشهم ويتناولون الحقن والحبوب.. حتى تلك التي تُسمى الراجمات.. وغيرها من أدوية الملاريا التي يقال إن كثرة تناولها يضر بوظائف الكلى.. وغيرها. ويرعبنا الارصاد الجوي كل يوم بأخباره حول توقعات بهطول أمطار غزيرة.. لأن سحب داكنة تظلل الهضة الاثيوبية.. التي يهطل عليها المطر منذ أيام. كل يوم تزداد معاناة الناس.. وما زالت ولاية الخرطوم بأجهزتها كافة لا تهتم بالأمر كما ينبغي.. وما زال موظوها في مختلف الأقسام مشغولين بأداء مهامهم في التحصيل والجباية.. وإغلاق محلات الذين لم يسددوا العوائد والضرائب.. وكافة أنواع الجبايات الاخرى وهم يرون تلالاً من الأكياس البلاستيكية الكبرى مكومة في أطراف القمامة لأن السيارات التي تنقل القمامة لا تستطيع دخول كثير من الشوارع في كثير من الأحياء الأمر الذي أسهم كثيراً في توالد الذباب.. وانبعاث الروائح الكريهة داخل الأحياء التي وصلت الى داخل المنازل حتى المبيدات الحشرية أصبح الذباب يقاومها بشكل لافت للنظر. أننا نطلب من السيد والي ولاية الخرطوم الدكتور المتعافي وهو صاحب خيال خصب.. ان يستدعي خياله هذا لينقذنا من البحار التي تحيط بكل أحياء العاصمة قديمها وحديثها.. لابد من إيجاد حل لسبب هذه المياه التي تزداد كل يوم.. خاصة ان هناك إنذاراً من الارصاد الجوي يقول إنهم يتوقعون أمطاراً غزيرة خلال الأيام الثلاثة المقبلة.. وإذا صدقت هذه النبوءة وهي بالتأكيد صادقة، ستحل كارثة كبرى على هذه العاصمة «الحضارية» اسماً وليس محتوى. لقد تعبت أقلامنا من الحديث عن هذا الأمر الذي أصبح يشكل هاجساً لدى المواطنين الذين يتصلون بالصحف ليل نهار يطالبوننا بالتصدي لهذا الأمر وضرورة تنبيه المسؤولين عن مخاطر هذه المياه الآسنة التي تزداد كل يوم. لقد حزنت بالأمس وأنا استمع لخبر انهيار احدى المدارس في مدينة بارا بغرب السودان ووفاة تلميذة وإصابة«17» آخرين بكسور ورضوض نتيجة لانهيار حائط أحد الفصول.. الأمر الذي أدى إدارة التعليم هناك الى تعطيل الدراسة لمدة اسبوع. ولو قدر لنبوءة الأرصاد الجوي أن تتحقق بعد أيام.. فستكون الخسائر فادحة خاصة وسط طلاب وطالبات المدارس التي تقع في أطراف المدن.. وحتى تلك التي تقع في قلب المدينة.. خاصة التي بنيت في زمن مضى «بالجالوص».. وتتركز هذه المدارس في حارات الثورات المختلفة وحارات أمبدة والاحياء العريقة بأم درمان كافة. ولا أدري لماذا لا تفكر أجهزة الولاية المختلفة في استنفار سكان الاحياء شباباً ورجالاً من اجل المساهمة في ردم تلك البرك أو معالجتها ليخفف من توالد البعوض وغيره، وأين هي اللجان الشعبية.. لماذا لا تحرك جماهيرها وكافة جماهير الأحياء.. لابد من تكاتف الجميع في مثل هذه الحالات فقط المواطنون يريدون من يحرضهم على العمل ويوفر لهم الآليات.. ولتعطل المدارس الثانوية ثلاثة أيام يعمل طلابها في هذا النفير.. وبالتأكيد ستكون النتائج باهرة لأننا لو أنتظرنا أجهزة الولاية المختلفة حتى تفرغ من مهام الجباية المختلفة.. سننتظر طويلاً.. وسوف تفتك الملاريا والإسهالات المائية بأطفالنا.. إذ لابد من تحرك شعبي لإنقاذ ما يمكن إنقاذه.. والله الموفق وهو المستعان.

اااااااخ

زول يلحقني بأغنية ارقي (( داير اقيف في أرقي ازغرت /د)

رعبة عارمة تتملكني في اني ازغرت او بمعني اصح اسكلب

جرعتين صباح ومساء من السكلبة والزغاريت زاتهم مابحلو الايام دي معاكم ياناس معتمد الخرطوم !!


هل اتفضل سيادتكم بالذهاب لأستاد الخرطوم وكشّفتو شفتو الحاصل شنو ؟!


الله يقد عيني دي لو لو ما اتملكتكم حالتي وسمعتكم تكوروكو باضاني :

دار أقيف في الإستاد ازغرت

ياخي دا شنو دا ؟!!!


أول يوم بعد اكتشفت انو مامعاي حق امجاد توصلنا بيتنا قلت خلاص النمشي الاستاد دا

وحق التاكسي البيودينا الاستاد زاتو كان مافي !!

استغلينا خ 11 واتوكلنا على الحي الدائم

امة امة وعالمين
خلق تنكت نكت ( مشطوها بقملها ؟!!! عفارك عليكم)

الغريبة انو حاجة تركبها مافي والشوارع دي مخنوقة بشنو ماتعرف !

عالم تعبانة واخلاقها في راس نخرتها .. تسأل منو من مواصلات الكلاكلة بي وين ما تعرف !!

كلو ماعارف !!

(واتحداك كان انت عارف !! )

اعمل مسكول في خطي ولا اعرفو كيف بتعبي دا

تمشي وتفتر وتسمع مليون كلمة مسيخة من ناس عذرهم معاهم ( عذركم شنو انت في عدم التخطيط والشغل الهبتلي دا)
تفج وتكابس وتظنها فرجت ؛ لمن يعطّشك بتاع الموية ويقول ليك دا خط مواصلات حجر الطير!!!

مش قلت ليكم ((دايري اقيف في الأستاد ازغرت ؟!!)

(كراتين ساكت تكتبو فيها بالفحم (دي مواصلات الكلاكلة ياملكة سبأ) ماف ؟!)

سمح انقلوها خط خط ، أو ادو الناس ملحوظة ، عبرونا بلوحات توضيحية ، هيأوا الشغلانة كويس وبعدين ماعندنا مانع ..

مستعجلين على شنو نحن ؟!
بطلو اسلوب الصدمة دا ياخ ! واريتو لو الواحد بيوعى على نتائج ايجابية


وبعدين قول اخر اليوم سميناها رضينا وجاهدنا واعتبرناها(جزاكم الله خير) رياضة مشي واكروبات وحمل اثقال (هموم وعيش غداء وسلطة وحاجاااات .... وووو رز) وقلنا دي تسلية أين الطريق وونسات(بعد الخلق كلها بقت مشكورين تتلاقي هناك) ..

اها الصباح كيف ؟ العايز يشتغل ليكم منو ؟

كلها حانقضيها ليكم مواصلات واركب وانزل

ياخ كدي نومو تاني واحلمو لينا بحل يرضينا كمواطنين لينا حق عليكم

والله يعد منكم اب كباس

قولو آمين

يرفع البوست لحسابات الجرد

وبمناسبة عيد الأضحي المبارك


وعشان نسأل مسؤولين الهنا
هو الحاصل شنو بالضبط كدا؟

البهايم الملت البلد دي (ميرودة) ولا نصيحة ؟!

نضحي ولا نحن الضحية ؟!


جبتو لينا الحمي النفسية عديل كدا!!

ناس وزارة الثروة الحيوانية يحلفوا بالتقطعهم مافي ريحة مرض ولا حالة إصابة بالغلط ماموجودة !

وناس وزارة الصحة يقولو ليك إستخدم الكمامات والقفازات وكان انجرحت ابقى عشرة على المطهر
وكان شعرت بحاجة كدا ولا كدا جري على المستشفى ونحن فاتحين ليكم المستشفيات طوال ساعات العطلة

ياخي لأ !

شوفوا ليكم موضوع تاني

نحن مالنا ومال الكلام الني

حانضحي السنة دي بجدادة

آمنا بيك ياوالينا

طلعت انصح من الفكي اب طشت ذاتو !!

ونظريتك في الجداد ماوقعت واطة

يخلّّصك يوم القيامة نجي راكبين في ضهر جدادة ؟!

شرطوا عينا ياخي قدام الخلايق

ومسختو علينا الجنة ذاتو

دي ذاتها لحقتوها ؟!

غايتو يقدركم الخلقكم

والعفو والعافية ياناس

والسنة الجاية حالنا افضل ان شاء الله ؟؟؟

Quote: شرطوا عينا ياخي قدام الخلايق ومسختو علينا الجنة ذاتو دي ذاتها لحقتوها ؟! غايتو يقدركم الخلقكم

اها بعد دا عاوزة العفو والعافية


عاملة صورتك السمحة دى

والدهيبات ديل لقيتيهم وين ؟؟ أظنو تمركم بعتوهو ولفحتى قروشو سويتيها فى الدهب ؟؟


يا زولة العفو لله والرسول عشان بسيمتك الحلوة دى