Post: #1
Title: قولة خير
Author: ملكة سبأ
Date: 07-07-2003, 11:30 AM
بسم الله الرحمن الرحيم
قـــــولة خيــر
عشم الناس في موية المطرة
عشم الناس في نجاح المسرة
عشم الناس في فرحة بكـرة
***
عشم امونة في قولة خير
في ضرا الراجل وضل البيت
صرخة شافع كان يبقالا راس الخيط
يرجع ليها شبابا الضائع وليهو يعيد الكرة
يملأ أياما الجايــــةأفــــراح ومســــرة
كل اياما الفاتت كان واهباها لفعل الخير
فدى إخوانا ورضا والدينا وفرح الغير
عون جيرانا وكل قاصدينا صغير وكبير
كل انسان اىٍ كان فى كل مكان ليهو نصير
تكرم الضيف تستر الحال تعدل الميل
تزيل الحيف تهدى الضال تبقالو دليل
ولكــل تقيلة إت ياامونة جمـــــــــل الشيل
***
أيام وشهور
الدينا تدور
ولوا كبارا الكانوا عمارا
وكبرو صغارا
الكانو ا اقمارا
شقوا طريقن وبعدوا بعيد
وبقت امونة بلا رأس خيط
تشكى الوحدة تغالب الحسر وغيرا سعيد
ولى شبابا ومضى طُلابا
قفلت بابا تجتر وتعيد
شريط ماضيها
القصّر فيها
جحود اخوانا
رحيل جيرانا
جور الدينا وضيم انسانا
وجارى شريطا يعيد ويجيب
همس الناس :
امونة اريتا فال الجنيات
السمحة الراسية عشا البايتات
الا رجالاً ما بتشوف وكمان يالملكة مافى نصيب
***
كانوا في وادى وامونة هناك في واديها
فاردى جناحا ولامى ذويها وما هاميها
نجاح اخوانا ورضا والدينا بالحيل ساريها
سعادة الغير وحب الخير اتاصل فيها
ناسى امونة - حاضر امونة والجايها
وبقت الليلة بلا راس خيط
***
وحيدة براها كل مناها
حبانا الكانو يبقوا حداها
امونة تنادى
امونة تهاتى
قبيل يا الزينة ساسك خاتى
انسى الماضى وشوفى الاتى
راجلاً راجل يبقى ضراكى
شافعاً نافع يبقى تناكى
محلو حداكى ومابيختاكى
ضل البيت وراس الخيط
***
امونة الصابرة الصابرة اصبرى …
زارع الخير حصادوا اكيد
وفى ليلة ندية صباحا سعيد
حس زغرودة صداها بعيد
جابت الخبر بنية صغيره00… .
وبنفس قايم قالت عرس امونة دور الليلة
وجرت وجرت بشارة الخير
وصل الخبر صغير وكبير
واتلموا الناس صباحاً فات صباح العيد
***
امونة الصابرة مبروك البيت
وضل الراجل وراس الخيط
**
يمر الحول ويجيب الزول
الزول المنية..
الزول الغنية..
امونة تشيلو تسوى اللول
تهدهد فيهو وليهو تقول :
النوم تعال
سكت الجهال
النوم النوم
بكريك بالدوم
يبقى لى حبيب
يبقى لى قريب
يبقى لى طبيب
طبيب امونة الداوا جراحا
طبيب امونة الطب نواحا
قفل احزانا وشال مفتاحا
***
أبوه يقول سميتو الجابر
امونة تقول اسمو الصابر
ونحن نقول الصابر وجابر
لانو الصابر فى الاخر جابر
وصابر الصابرة
اللازمة الجابرة
اهداها شباب وفرحة بكرة
موية المطرة وربح المسرة
ضل الراجل وراس الخيط
ومبرووك يالصابرة عليك البيت
راجل البيت
صابر البيت راس الخيط
|
Post: #2
Title: Re: قولة خير
Author: artiga
Date: 07-08-2003, 01:58 AM
Parent: #1
ملكة سبأ
كلامك سمح بالحيل
ولى فوق
|
Post: #3
Title: Re: قولة خير
Author: ابو جهينة
Date: 07-08-2003, 08:29 AM
Parent: #2
الأخت ملكة سبأ: لك تحياتي و تقديري
لأول مرة أقرأ لك ، و أرجو أن لا يكون قد فاتني الكثير.
أما هذه ( قولة خير ) فهي قد ( ملكت ) و ( سبت ) زمام إعجابي الشديد دون مجاملة. ففيها السرد الهين و القوي في نفس الوقت و بواقعية لما يمكن أن يحدث لأي فتاة تنتظر الضل المعنوي و المحسوس.
حقيقة سعدت كثيرا و إستمتعت. عافاك الله
|
Post: #4
Title: Re: قولة خير
Author: ملكة سبأ
Date: 07-08-2003, 01:46 PM
Parent: #1
السماحة فالك اخونا ارتيقا
تسلم وتشكر (طبعا عارف القصة)اياام وبتتعدى وبنشتهر وبوستاتنا تعانق صدر المنتدى
قول آمين
لك التحايا
|
Post: #6
Title: Re: قولة خير
Author: زوربا
Date: 07-08-2003, 02:31 PM
Parent: #4
ملكة سبأ
نيلينك والابنوس والشوق الجاري عليك
دى ما قولة خير بس ... دي قولة أي حاجة
معقولة من ملاحم السوق العربي تطلع قولة خير تهاتي بها ستات الشاي الفارشين الضل والريد
الببقي فيك يالجاي من الوطن الميتم بالغياب
الببقي فيك
ناس تغني لي
قولة خير
|
Post: #5
Title: Re: قولة خير
Author: ملكة سبأ
Date: 07-08-2003, 02:29 PM
Parent: #1
الاخ ابو جهينة تحية واحترام
والله لقد اعجبنى اعجابك حتى كدت من فرطه ان اعجب بنفسى لكننى تمالكتها ، طالما اننى بواديكم فانا تلميذتكم التى ترجو ان تنهل من فيض ابداعكم لكى تسعد نفسها وتسعدكم ومتعتها فى متعتكم متعك الله بالصحة والعافية
|
Post: #7
Title: Re: قولة خير
Author: ملكة سبأ
Date: 07-09-2003, 09:28 AM
Parent: #1
زوربا
احسن من كدا مافى
طلتك بنكهة شاى ستات الشاى
لك الود
|
Post: #8
Title: Re: قولة خير
Author: sympatico
Date: 07-09-2003, 10:41 AM
Parent: #7
الأخت ملكة سبا
نص جميل
واجمل ما فيه النهاية المفرحة عكس نص امونة بت حمد الذي كانت نهايته حزينة
ننتظر مزيدا من ابداعاتك
|
Post: #9
Title: Re: قولة خير
Author: ملكة سبأ
Date: 07-10-2003, 09:48 AM
Parent: #1
sympatico الاخ
سلام واحترام
تشكر على الطلة
وزى ماشفت هو الصبر مفتاح الفرح برضو
والله يدينا ليهو
|
Post: #10
Title: Re: قولة خير
Author: aba
Date: 07-10-2003, 07:35 PM
Parent: #9
جميل والله000
لي فوق
|
Post: #11
Title: Re: قولة خير
Author: Tumadir
Date: 07-10-2003, 07:44 PM
Parent: #10
انا معجبة
|
Post: #12
Title: Re: قولة خير
Author: Haydar Badawi Sadig
Date: 07-10-2003, 07:47 PM
Parent: #11
وأنا كذلك!
|
Post: #13
Title: Re: قولة خير
Author: ملكة سبأ
Date: 07-11-2003, 04:01 PM
Parent: #1
aba
تسلم .. الله يخليك
العزيزة تماضر
الاخ حيدر
اسى انا اقول شنو؟
شكرا على الطلة؟
ولا شكرا على الاعجاب؟
ولا شكرا على التشجيع؟
عموما انا سعيدة بيكم جدا ... وربنا يخليكم
وسلام خاص تماضر
|
|