Post: #1
Title: حــش التمـــــر
Author: ملكة سبأ
Date: 09-10-2003, 06:22 PM
Parent: #0
يابت جهزتى القفاف ؟؟ وتممي على الشوالات دي .... انت ياولد امشى لعمك ود فرحين شوفوا طرّق المناجل ؟ أغشى سيد احمد العربي أكد عليه بكرة حش تمر الجرف يرجانا بدري تحت الجاوات العلى البحر...د
يظل والدي في حركة دائبة طيلة الليلة التى تسبق بداية اول يوم فى حصاده لمحصول البلح الذي ظل ينتظره لعام كامل معلقا عليه آمال عراض من تسديد لديونه ووفاء لوعوده والتزاماته تجاه اهل بيته ومجاملة اهل القرية وغيرها ... ويسرح فى انه قد تخلص اخيرا من ملاحقة حاج حسن سيد الدكان ، وان الصداع الذي ينتابه كل صباح من جراء مطالبات تلاميذ المدارس قد آن اوان التخلص منه ، ولم ينسى ان يستبعد مبلغا محترما لمساعدة اخته فى زواج ابنتها وقبلها عليه ان يشترى ثوبا جديدا محترما لرفيقة كفاحة ولن ينسى ان يرفق معه جلبابا ونعال وكان هون الله فى نيته كسوة كل الأولاد جديدا .... واكد ايضا على نفسه ضرورة شراء كميات وافرة من تيراب البرسيم وزرع كل المساحات الخالية حتى لايتزنق مثل هذا العام و و و ... وقبل ان يستقرعلى فراشه ينتفض مرة اخرى قاطعا حبل افكاره صائحاباهل بيته
هووى دخلتن على حوش التمر نضفتن تمام ... اها بكرة الحيقعدن لسواة الاكل منو ؟؟ يتكربن من الليل دا ، الناس دايرين يشتغلوا ودايرين قبال غيبة الشمس نكون قضينا من تمر الجرف جاو على بركاوي ، والمندلات للقيط يشوفن الماشى معانا منو .... ياولد انت حمارك جاهز ... دايرين النقل يكون اول باول ... واحد فيكن يكون قاعد فى الحوش هني يفضي ويضاير
كأم العروس والدي لايستقر على حال واحسبه لايغمض له جفن حتى ينادي المؤذن بان يا ارحم الراحمين ارحمنا فيهدأ والدي استغراقا فى صلاته ... وتنتظم الحركة باقى البيت .... والدتي تأخذنى الى مراح البهائم بعد ان ادت فرضها واجلس عند باب الزريبة من الداخل واراقبها بعد ان طارت نعستي اثر ملاواتي لتلك السخلة الشقية في محاولتها للافلات مني ، وكثيرا مانجحت فى هزيمتي واوقعتني على وجهي منطلقة نحو امها لتنتهرني امي انا فانهض للامساك بها مرة اخرى وانا اتعثر وامسح بوجهي على كتفي لازالة مابي من نعاس وماعلق من مخلفات تلك اللعينة به... فأسحبها واعود إلى مكاني مرة اخرى لاراقب امي التي ماتزال تتفل على يدها مسمية الله هى تردد (لايلاف قريش) قبل بداية الحلب واحمد الله انها لاتحفظ غير هذه السورة التى ترددها كل صباح (كنت احسب ذلك) حتى لاتطول لعبة الشد والجذب التي امارسها مجبرة مع تلك الشقية . ولاتراني اسمع اعذب من تلك النغمة التي يحدثها خروج اللبن معصورا من ضرع البهيمة ليصطدم بقاع الانــــــاء -اشششش ييشو- وبتلك الجلبة يتنبه اخي ليلحق بنا متجها الى الجانب الاخر من الزريبة مطمئنا على استعداد حماره لتحمل يوم عمل شاق ... والدي لا يزال فى مراجعة ما نحتاجه في هذا اليوم وحضر بعد هيأ تماما حوش الضيف السعيد (التمر) وقام للمرة العاشرة باحصاء الجوالات والتاكد من سلامتها وترتيبها وجمع القفاف فوق بعضها البعض ... وفي هذا الصباح انتهت مراسيم الشاى مبكرة ليست كالعادة ، وحمل والدي شاى الخلوة وحمّل اخي بالمعدات على ظهر حماره ، وحملت وبعض اخواتي ماتبقى واسرعنا للحاق بوالدي ، وفي طريقى دفرت احد الابواب برجلي فانزلق احجر الذى يقبع خلفه واكتفيت بمد رأسي ومناداة عمى- ابوي قالك نحن اندلينا .. حصلونا لتحت - ز
اها يا اخوانا الجاي معانا كلو يحصلنا لتحت
|
Post: #2
Title: Re: حــش التمـــــر
Author: willeim andrea
Date: 09-10-2003, 06:34 PM
Parent: #1
يا الله ما اروع الصوره تسلمي يا ملكه
|
Post: #3
Title: Re: حــش التمـــــر
Author: ملكة سبأ
Date: 09-10-2003, 06:37 PM
Parent: #1
سبيطــة الحشــاش
في هذا الصباح فاجأنا الشمس بحضورنا المبكر قبل ان تقطع البحر وتلقى بضوئها على الضفة الشرقية التى نحن بها ، فقد كنا اكثر همة منها اليوم وخاصة والدي الذي أراه أول مرة يحمل (مكنسة) صنعها من جريدة قطعها من أحد النخلات ويبذل ماوسعه من جهد فى تنظيف ما يتوقع أن يصله التمر المتساقط ، وحضر الحشاش مع بعض اهله ورفع (عراقيه) ليربط وسطه وتمنطق بمنجله وسمى الله مبتديا بأطول النخلات والجميع يرفعون بصرهم نحوه وهم في أهبة الاستعداد وابى واعمامي مع بعض الرجال صنعوا دائرة تحلقوا حولها فالكبار مهمتهم نزع مالم يتساقط من بلح على السبيط (خرط السبيط) بعد ان عينوا اصغر ثلاثة او اثنين لسحب السبيط اليهم بعد الانتهاء من قطعه
وبعد رمي اول سبيطتين لم يتحرك احد نحوهما والسبب انهما سبيطتا القفاز او الحشاش فالمعلوم ان الحشاش او القفاز هو الذي يقوم بتعهد النخل منذ قفوزته وهى عملية اللقاح ومراعاته حتى يحين وقت حصاده بنصيب متعارف عليه وهى سبيطة فى النخلة القصيرة واثنين فى الطويلة ، عادة ما يحضر معه يوم الحصاد عدد من اقاربه لمعاونته فى جمع نصيبه ، لذا لم نتحرك نحن ومن جاء لمعاونتنا حتى انتهت سبيطة القفاز بعد ابتعدوا هم وانهمر البيسط من اعلى ( رب .. رب) وقد كان الحشاش قطعه وتركه معلقا حتى انتهت سبيطته وبدأ برميه وهناك عرف لا اعرف اذا كان وسط عائلتنا فقط او انه خارجها ايضا هو ان من وقعت عليه سبيطة بالخطأ فهى له ... واصدقكم القول بان لا احد يتعمد ذلك لشدة المها فقد جربتها واجتهدت ان لاتتكرر معى برغم من فوزي بها ...د
الجميع حريصون على العمل باجتهاد الصغار بدأوا فى سحب السبيط بهمة و تناوله منهم الكبار وبدأوا فى خرطه بنفس الهمة ، ونرى هناك من يقوم بتلك العملية باصابعه فقط ومنهم من يأتى بمؤخرة العرجونة وهى السبيطة بعد خرطها وتكون فى شكل مستطيل محدثا بها فراعا بنفس شكلها بالمنتصف ويبدأ فى الخرط بها مبتدئا من المؤخرة ، ويبدأ الصغار فى صنع لعبة محببة لديهم ( الطبطابة ) وتصنع ايضا من العرجون وذلك بسلخ العرجونة الى ثلاثة اقسام قسم فى المنصف اتخن قليلا وثابت اما القسمان بوجه العرجونة وخلفها فهما ارق نوعا ما ويمتازان بالمرونة وذلك السلخ لايكون الى اخر العرجونة حيث يترك مقبض ليمسك به الشخص ويبدأ فى تحريكها الى الامام والى الخلف يصطدم الطرفان المرنان بالجزء الثابث محدثا صوتا مميزا ومحبب لدى الأطفال ، ونذهب الى حيث تركنا القفاز او الحشاش والذى هبط ليصعد أخرى واكيد تحرك معه طاقمه , ونجتهد نحن ونسمى باللقطاين فى ان لايسبقنا القفاز كثيرا فريثما طلع اخرى وبدأ فى فى فرز نصيبه نجتهد فى ان نكون انتهينا من التمر المفروش امامنا وذلك بان نتوزع من ابعد نقطة للنخلة وصل اليها التمر فى شكل قوس او دائرة حسب عدد اللقطاين كل اثنين امامهم قفة وبسرعة وبكلتا اليدين نبدأ عملية الجمع ونحن جلوس زاحفين على اقدامنا ( والله قال بقول السمين) ونجد ان هنالك عملية اشراف دائم ومتابعة وحث على السرعة من احد الخراطين فهنالك من تسول لهم شقاوتهم بان يتركوا بعض التمر المخفى تحت الاعشاب او داخل جدول ليرجع له فبما بعد (وهذا مايسمى فى عملية حصاد الفول بالدوليق) او رمي بعض التمر على النخلة واذا تاملنا شكل النخلة نجد ان لها اجزاء بارزة نسميها (الكاروق) يتعلق بها بعض التمر عند رميه و هذا كثيرا مايتجاوزه صاحب الحق ليكون من حق من يصل اليه ويسمى (الشكونى) وهذه الاشياء نادر من تحدث وغالبا من يفعلها يكون من ابناء اصحاب الحق لان غيرهم يتهيبون من فعلها ... عند امتلاء القفاف يحملها الاثنين ويذهبوا بها الى دائرة الكبار والذين يكونوا قد خصصوا واحدا او اثنين للتعبئة وبمجرد امتلاء الجوال يقوم بخياطته بواسطة خيط من الدوبارة او سعف النخل او تسليخ العرجون والخياطة به ويتم نقله على ظهر الحمار ليتم توصيله الى الحوش المعد لذلك وتفريغه والعودة بالجوال الفارغ . مكان حش اتمر او الحصاد لا يكون مكان للعمل بل نجد الجميع متجانسون في علاقات حميمة وقفشات ضاحكة وتناقل أخبار وشد وجذب فهي فرصة لتجمع الغائبين والمسافرين مثل مثل اى مناسبة جميلة . ويتبد لنا هنا طيب خصال وكرم اهلنا فى مدهم لكل سائل بدون ضيق ، وصدق شاعرنا حين قال فى وصف احدهم و حنينه لذلك (حن لتمره بالهين منه لا كيل لاعبارى) والهين هو ملء الكفتين وهذا اشارة الى انه يعطي عطاء بلا حدود ، ويقال انه حين يغرس احدهم نخله فانه يقول مقولة لاتحضرنى الآن إلا انها تعنى انه زرعها فى المقام الأول سبيل لكل مسكين ومحتاج وللحيوان وحتى انه لاينسى السرّاق فيذكره
يظل الجميع فى حماسهم حتى تأتى من أوكل إليهن القيام بتجهيز الطعام فتخيم على الجو حالة من التراخي ليس بسبب الجوع او اشتهاء الطعام فمن المؤكد ان الكل فى حالة شبع تام ، لكنها فرصة للراحة والاستجمام ليتواصل بعدها العمل إلى مغيب الشمس
|
Post: #5
Title: Re: حــش التمـــــر
Author: اساسي
Date: 09-10-2003, 06:55 PM
Parent: #3
لك التحية ايتها الملكة علي هذا السرد العزب لذلك الكرنفال الاصيل في شمال بلادي وانا اقرا هذا البوست احسستني في ذلك جو المتق بكل ما هو اصيل في بلدي ولك الشكر وانت تنقلينا لتلك الافراح التي اصبحنا نتعزب حين نستحضرها من هذه الذاكرة الخربة التي ملئت بفكرة واحدة وهي الضياع في بقاع الارض وسوداننا ينبض حياة ويتدفق حبا ووعدا وتمرا ورطب زاتو
لول
|
Post: #7
Title: Re: حــش التمـــــر
Author: زوربا
Date: 09-10-2003, 07:10 PM
Parent: #3
الدفاقة
ملكة سبا
نيلينك والابنوس والشوق الجاري عليك
أولا حمد للة علي السلامة
وتانيا
عالية الجمال ملاحمك عن اليوماتي في نبض الارض
لكن تعرفي انا اكتر حاجة عاجباني في الوضوع السخلة
والصوت الشووووشوووو
للبن
مش هو دا المختزل في اللاوعي والبطلع في ميقات الصدق النهائي
أشبة ما يكون بالاستغراق بهاء خارج الجو المخنوق بكتاحة الزيف الحرقة الجوف
أديك العافية
والريد نيلين
|
Post: #4
Title: Re: حــش التمـــــر
Author: ملكة سبأ
Date: 09-10-2003, 06:53 PM
Parent: #1
الحــق
بعد نهاية هذا اليوم الشاق اخيرا جاءت مرحلة التتويج فيحمل كل فرد قفته او كيسه متجها الى دائرة الكبار والذين بدورهم يكونوا قد استعدوا لتلك اللحظة بإيقاف التعبئة بالجولات بعد تقدير ما يكفى لاعطاء كل ذي حق حقه وبالعدل حسب ماهو متفق عليه وغالبا ما يكون المعيار واحد اما بقفة بحجم معين اواذا كان صاحب الحق موفور فنصيب كل فرد يكون (كيلة) وهى تقاس بالصفيحة العادية (جبنة او طحنية) ولايستثنى ابناء صاحب الحق او أقاربه ولا ينسى فصل صانعات الطعام ومن كان بالحوش للتفريغ والترتيب يحضر خلف من كان يقوم بالنقل فى آخر دوره له ، فالجميع حاضرون والحق ايضاحاضر
والحضر القسمة يقسم
|
Post: #6
Title: Re: حــش التمـــــر
Author: ملكة سبأ
Date: 09-10-2003, 07:09 PM
Parent: #1
تمر الهبوب
وان كنا جئنا بذكره فى الآخر فهو قبل تلك المراحل السابق ذكرها ... وتمر الهبوب هو التمر الذي تقوم بإسقاطه الرياح قبل البدء في عملية الحصاد ... البعض يسمح لنفسه بجمعه من كل الاماكن اذا كانت تخصه او لا تخصه والبعض يحرص على جمع ماكان فى نطاق ارضه فقط والبعض يسمح للآخرين بجمع مايخصه فى حالات الرياح الخفيفة والبعض يعين دوريات من الشباب حفاظا لحقهم ... طرائفه كثيرة وخاصة اذا كانت الرياح هبت فى وقت متأخر من الليل و كانت ريح عنيفة فعندها نضطر الى حمل الفوانيس او البطاريات والعمل على جمعه في هذا الظلام ... هل رأى احدكم مخلفات الجمال ( بعر) انا طالما رأيتها وتمعنت بها لانها كثيرا ماخدعتني وتسللت الى كومي فى جنح هذا الظلام على اساس نها نصيب وافر من تمر الهبوب حتى يفضحها ضوء الصباح ويفضح معها حلمي في تكملة جوالي الخاص
من الشقاوات التي اذكرها في تمر الهبوب كنا أنا وصاحبتي متفقتين على ان اجمع معها ما بأرضهم وتجمع معي ما بارضنا وكانت تجمع حظا وافرا مع ملاحظة ان اليوم ليس به رياح وعندما يسالها والدها متهما اياها بتناوله عمداً من الاشجار تحلف بالذي خلق الكون ... (وانشاء الله الله يقطع يدى كان مديتها على تمرة) وهى محقة فى ذلك لكنها كانت تعمد الى حيلة اخرى وهى نطح كل سبيطة بنخلة قصيرة برأسها وبعدها تجمعه ... وهذه شقاوة بنات ، اما شقاوة الأولاد فيطول ذكرها
من الاشياء التى تحدث فى تلك الفترة نشاط الخلاوي والشيوخ بتحريض من اصحاب التمور فى الحديث عن تمر الهبوب وان الهبوب لاتمر لها وانه حق غير مشروع وهذا للكبار اما الصغار فنجد ان (عبد العيش) و( بت البحر) وغيرهم يبدءون فى الظهور منذ ظهور الرطب وتلك ايضا مرحلة لها حديث خاص
ارجو من كل من يملك معلومة او تعليق لا يبخل به والبوست ملك للجميع اى زول يجيب منجلو ويجي جاى
ويا اهل الصور تفزعونا
|
Post: #31
Title: Re: حــش التمـــــر
Author: Elmosley
Date: 09-12-2003, 01:04 PM
Parent: #6
علي هذا الجمال رسلي لينا شوبة قنديله وبركاوي
ياملكه
|
Post: #39
Title: Re: حــش التمـــــر
Author: ملكة سبأ
Date: 09-13-2003, 06:53 PM
Parent: #31
استاذنا الموصلي
يالف هلا بيك
والله لو عارفين التمر بجيبكم عندنا كان دعينا الله مع حميد يشيل ونحشو كل ثلاثة شهور
تمرك محجوز من قندولي رمضان
بس رسل اللواري ... ولا اقول ليك الشحن زاتو علينا
سعيدين بالطلة والله
|
Post: #50
Title: Re: حــش التمـــــر
Author: Elmosley
Date: 09-14-2003, 02:10 PM
Parent: #39
ياملكه شكرا ليك
انا كل ماتذكر الشواويل الكان بتجينا
من تميراتنا الفي البلد
روحي تتشحتف للسودان
|
Post: #8
Title: Re: حــش التمـــــر
Author: kamalabas
Date: 09-10-2003, 07:21 PM
Parent: #1
ما أروعها من لوحه تعبر عن ما يحدث فهذا الشهر
البهيج عند اهلنا في الشمال حيث تنحصر خلاصه العام
فيه وتتراكم الديون علي مدار العام لتحل في هذا
الشهر كما انه مناسبه لجمع شمل من تشتتوا في بقاع
البلاد المختلفه ...فهو موعد التلاقي اذن
حبذا لو حدثتنا الاخت ملكه سباء او مهيره ـ مهيره
هذه منةعندي ـ لو حدثتنا عن تمر الهبوب والدفيق
وعن سر عداء اهل الشمال للمطر
لا عجب في اجادتك للكتابه بهذه اللغه السلسه فأنت
من انتاج تلك البئيه الشاعريئه التي انجبت السر عثمان
وحميد والطيب صالح وعلي عبد القيوم واسما عيل والحردلو
وغيرهم
كمال عباس
|
Post: #9
Title: Re: حــش التمـــــر
Author: yasiko
Date: 09-10-2003, 08:10 PM
Parent: #8
| Quote: واكتفيت بمد رأسي ومناداة عمى- ابوي قالك نحن اندلينا .. حصلونا لتحت - |
لا تعليق وحات سيدي
عواااافي ...عواااافي
ربنا يزيد و يبارك
|
Post: #10
Title: Re: حــش التمـــــر
Author: ملكة سبأ
Date: 09-11-2003, 12:42 PM
Parent: #1
سلام وليم
الصورة اروع والمنظر ابدع
ارجو ان اكون وفقت فى نقل القليل عنها
تسلم
|
Post: #11
Title: Re: حــش التمـــــر
Author: ملكة سبأ
Date: 09-11-2003, 02:13 PM
Parent: #1
اساسى
احلى من بلدنا دى فعلا مافى
بالذات الايام تميرات + جغمة موية طينية فى حضرة الاهل والحبائب تغنى عن الدنيا بحالة
لك التحايا
|
Post: #12
Title: Re: حــش التمـــــر
Author: ملكة سبأ
Date: 09-11-2003, 02:39 PM
Parent: #1
اساسى
احلى من بلدنا دى فعلا مافى
بالذات الايام دى ... تميرات + جغمة موية طينية فى حضرة الاهل والحبائب تغنى عن الدنيا بحالة
لك التحايا
|
Post: #13
Title: Re: حــش التمـــــر
Author: ملكة سبأ
Date: 09-11-2003, 06:05 PM
Parent: #1
الجميل زوربا سلامات
فعلا كمانا اشتاق لايام تلك الشقيةالحبيبة
وقمة الألق والبهاء عندما تتحول هذه (الاشاشة) الى (تشتشتة)ونحن نتحلق حول امى فى وسط الحوش وهى وترمى (الزلابية)مختلطة بريحة اللبن المقنن فتحملها نسمات الفجرالطلقة معبقة المكان باريج الالفة والمودة
ولك الود
|
Post: #14
Title: Re: حــش التمـــــر
Author: Maged
Date: 09-11-2003, 06:20 PM
Parent: #1
لك كل الشكر ـ يا ملكة ـ على نقلنا إلى أعالى النيل ورائحه تمره وأهله
لم أتمتع فقط بالقرائة وإنما تعلمت منها كلمات لم أعرفها من سابق
تحية لك ولكل أهل نيلنا الحبيب
|
Post: #15
Title: Re: حــش التمـــــر
Author: ملكة سبأ
Date: 09-11-2003, 06:35 PM
Parent: #1
تسلم اخ كمال وتشكر على الكلمات الطيبات والاطراء الجميل والتحية لكل من ذكرت من مبدعي بلادي
فعلا الكلام يطول والتفاصيل اطول والروعة اكبر
فقط ارجو الفزعة وجيب دفيقك جاى وياسلام لو وصلتنا لام راس
وزى ما ماقلتلكم البوست دا روكــــة
|
Post: #17
Title: Re: حــش التمـــــر
Author: رقية وراق
Date: 09-11-2003, 07:04 PM
Parent: #15
ملكة سبأ ، ان شا الله طويبي،
والله طلقتي ضهرنا ، انا باكر كان حيينا مندلي معاكن ، لاتصبقني عليكن الله.
ملكة سبأ ، سأنهي بعض الشؤون وأعود ، أو في الحقيقة أنزل البلد معك انت والأصدقاء الذين شاركوا . شكرا لك على السفرة الحانية.
|
Post: #16
Title: Re: حــش التمـــــر
Author: ملكة سبأ
Date: 09-11-2003, 06:58 PM
Parent: #1
ياسيكو
تسلم يارب
تعرف رنة الطنبور دى قاعدة تدق فى قلبى من جوا
(كل مااسمع لى جنى صفق يطير لفوق يطير يندق اطير واندق)
وياسلام على النزول العصريةوحش القش ولقيط الواقود
وماتنسى تملا جيوبك تمرات صفر
بس احزر الدفيق عشان بيبوظ عراقيك الابيض دا
وياسلام يابلدنا
|
Post: #19
Title: Re: حــش التمـــــر
Author: haneena
Date: 09-11-2003, 07:21 PM
Parent: #16
سلام يا ملكة الشمال
اظنك تستحقيها في هذا المقام
لوحة جميلة ودقيقة لجزء عزيز من بلادي
والله شهيتيني التمر... ونفسي القاه هسع قدامي
لكن ما اظنو يكون طاعم ولذيذ زي تمر بلدنا البتحكي عنه دة
يديك العافية
أها ما تنسينا في الموسم الجاي
أمانة في زُمَّتِك
تسلمي
حنينة
|
Post: #37
Title: Re: حــش التمـــــر
Author: ملكة سبأ
Date: 09-13-2003, 04:00 PM
Parent: #19
حنينة الطاعمة
اولا شكر ليك
والتمر هو زاتو قال مشتهيك
وراجنك الموسم الجاى
تسلمي يارب
|
Post: #18
Title: Re: حــش التمـــــر
Author: ملكة سبأ
Date: 09-11-2003, 07:11 PM
Parent: #1
ولك تحايا بعذوبة النيل
ومتعك الله بالصحة والعافية اخ ماجد
وتسلم يارب
|
Post: #20
Title: Re: حــش التمـــــر
Author: ملكة سبأ
Date: 09-11-2003, 07:26 PM
Parent: #1
اهلا اهلا يارقيي
انشاء الله يكونو كلموكي بالسفر بقى كيفنو
والله يارقيي اخيتي فكت الريق بقت عند اهلنا هناك
امانى ما اتمقلبو ناس قهاوي الخلا ... انتى انجيتى ام الحسن ماتت؟؟؟
الكلام دا دقش اضانى هنى دا وما اتأكدت منو
خلاص تعالى بدرى عشان نغشا البكي فى الاول
(ام الحسن صاحبة اشهر قهوة بطريق شريان الشمال)
|
Post: #21
Title: Re: حــش التمـــــر
Author: رقية وراق
Date: 09-11-2003, 08:03 PM
Parent: #20
الدنيا ولاخير فيها يا ملكة سبأ
هذه واحدة من أشهر العبارات في المأتم الشايقي ، خصوصا بين النساء ، عبارة حزينة تحمل معنى نعي الميت وتذكر فناء الدنيا الزائلة ، أخفف على نفسي وقعها ذاك بتأمل تركيبها اللغوي الطريف بعطفه ونفيه في ذات الوقت ، ملكة سبأ ، كثير من الأشجان ينتظر أن يتحول الى كتابة على الورق ، بعد حش التمر ، اها بعد دا قوليلي قومي
|
Post: #22
Title: Re: حــش التمـــــر
Author: yasiko
Date: 09-11-2003, 09:06 PM
Parent: #21
(كل مااسمع لى جنى صفق يطير لفوق يطير يندق اطير واندق)[/U]
سلام ملكة سبأ
يقول المزارع عند زراعة الفسيلة / الشتلة :ه
للشحاد وللدناع وللسراق
فأي تسامح أكثر من هذا ؟
لا يسعني إلا أن أقول له بيت من أبيات أغنية ود اليمني :ه
مننا يا مزارع ليك ألف تحية مادام حياتك أسبابا الطورية
إلا أنني أرى أن السارق (السراق) لم يكن له حق الآن بعد أن ضاق الحال بأهل النخيل من انعدام وغلاء مدخلات الزراعة وهجرة الأمطار ، وقد وترك سكان الخرطوم والعواصم الأخرى الحضور السنوي للبلد (لحش التمر) بعد أن أصبح الحصاد لا يفي بتذكرة السفر ف(ياريت التمر يشيل كل تلات أشهر) حسبما تمنى الشاعر حميد
، ومن ثم لم تكن هنالك أي أشجار نخيل مخصصة للسيد على (او سيدي الحسن او ستي مريم الخضراء او او أو أو )كما كان في السابق
وأذكر كذلك في هذا الموسم ، جلب الحلب (النقادة) ( للمناجل) وأخذ المقابل بلح ، وتبديل البلح بالترمس ، وإعطاء صاحب المركب عدد واحد كيلة مقابل التعدية لعام كامل
إلى (الجزيري)ه
الجزيرة
حقيقة نحتاج ، كما قال أحد شعراء القرير
لقعدة بيتحت(بي تحت/ بلد بيت تحت) في ضلاً رهين
راماهو تمرة وبرتكانة ومنقة في الجيهي اليمين
تسلمي ولي عودة وأتمنى أن يشاركك الأخ مامان في هذا البوست
|
Post: #23
Title: Re: حــش التمـــــر
Author: ود العجمى
Date: 09-11-2003, 10:18 PM
Parent: #1
يا ملكة
والله كلما أقرأ البوست دا اصابعى تنمل وأقول ادخل اعلق لكن تانى انكسف واسكت . دا بوست سويتيهو لا تخين ولا افرش وكمان قام ياسيكو زى عمايلو دائما تم الناقصة بالطمبور وياها خسيلتو . وماهو مشحود على البوست البوست حقو
اها ما كلمتينا عن التجارة فى الموسم . بيع الترمس ومقايطة جرادل الحلب والعدة بالتمر وتقسيم التمر الروكة
وليه الناس غيرت من إعطاء القفاز حقو بالسبيطة وبقوا يدوهو السدس- بكسر السين طبعا
فى مصطلاحات ما وريتينا معناهاتشتهر فى موسم حش التمر
زى الروكة وام راس والطلب
تمرة ما تفك طلبا-حميد
وانواع التمر من تمر اكل وبيع زى البركاوى والجاوة والكرشة والتمود وغيرو
البوست جميل فكرة ومضمون ومعلومة واسلوب
أحييك جدا ويا ريت التمر ياريت لو يشيل كل تلاتة شر
|
Post: #24
Title: Re: حــش التمـــــر
Author: yasiko
Date: 09-11-2003, 10:41 PM
Parent: #23
| Quote: زى الروكة وام راس والطلب |
اش بوديك كان مو لِخْبيت تقطع ام راس من السبيط
سلام يا ود العجمي
كلما أقرا شيئاً من مخزون راسك من مفردات الارض في المديري الشمالي اتذكر شيخي ابويسرا
طبعا الطلب اضاع كل شيء بعد تلت الزبير رحمه الله
ولا تنس تلك المقولة الشهيرة
تلت للطير وتلت للزبير وتلت للمزارع العوير
ولا تنسى الزكاة حيث اصبح موظفو الزكاة يقدرونها في النخلة قبل الحصاد (وبعد داك تشيل شيلتك كان اكلو الطير او رمتو المطرة عفنون) انت لابد ان تدفع الزكاة او تمشي المحكمة وتعتبر مرتد
.......
يقول حميد :ه
حبابك ألف .. إيه يا عنزنا القرجا
يا لـبّانة في الزمن المراحو نشف ..
يا جـبّانة للخوانة .. للعوج البدور ويلف
دميرتنا البتروي جرف
ضفيرتنا وعرش بيتنا .. تميراتنا اللي كانو وقف
أصابعين الرجال رصاص .. صمغ راس البنية سقف
............
دغش ساقت بوابيرنا وندت شتلات بعد ضمرت
ضراعيك يا الولد كبرت .. مراعيك يا البلد كترت
خدار .. خدرت
غزار .. غزرت
نضاراً زين
برغم الصيف وصناتو ..
وسموم البين وأناتو
عصافير الجلد قدرت تباصر غيمة منتحرة
.................
بعد ها الحال بلا مرسال .. يجو العمال .. يجو الزراع .. يجو الكداح
يجو الناس البخبرو شليل .. وشقيش راح
وقمريتين جناحن دلّ فوق الصاح
|
Post: #25
Title: Re: حــش التمـــــر
Author: يحي ابن عوف
Date: 09-11-2003, 11:05 PM
Parent: #23
لك التحية ملكة سبا علي هذا السرد
بس نسيتى نصيب سيدى الحسن
|
Post: #26
Title: Re: حــش التمـــــر
Author: الليندي
Date: 09-11-2003, 11:15 PM
Parent: #25
العزيزة ملكة مروي أو الكنداكة انا حاسميك كده شايفها الذ من ملكة سبأشكراً كتير لهذا السرد الرائع وحقيقى كل يوم بنكتشف جديد في البورد وببقى وطن
لك خالص ودي
|
Post: #77
Title: Re: حــش التمـــــر
Author: ملكة سبأ
Date: 09-21-2003, 05:38 PM
Parent: #26
وانا لاقية بت مروى كفاية على وفعلا هو عز مابعدو عز
ولك الاحترام الاخ الليندي
|
Post: #40
Title: Re: حــش التمـــــر
Author: ملكة سبأ
Date: 09-13-2003, 07:41 PM
Parent: #25
ود ابنعوف سلام
تعرف رهبة سيدى الحسن دى ولدوها معانا... ينعى الساقيةالوحيدة البتلقى تمرها ما اتمدت ليه ايد هى ساقة سيدى الحسن طبعا عشان مايسختناعلى حسب كلام حبوبتى التى تعتدل وتعدل ثوبها عند ذكره
اتمنى ان تزيدنا عن نصيب سيدى الحسن قبال تسافر وبالمناسبة نستودعك الله الذى لاتضيع ودائعه
وتانى بقول البوست دا رووووووووووووووووووووووووكة
|
Post: #27
Title: Re: حــش التمـــــر
Author: سودانوبس
Date: 09-12-2003, 00:03 AM
Parent: #1
1البركاوي
2العجوة
3 المْشرق
4ودختيب
5ود لقاى
6 2ود لقاى
7الدهيس
8 القرقودي
9عبد رحيم
10 تمرة موحومد
11 البور
12 الكولم
13المهرودي
14القنديلة
15بت تمودة
16البرير
17الكوروش او الكروشي
18السكوتي
19الغبيشي
20قوشابية
21حامدابيه
.22المديـن
...................
بت تمودة
بت تمودة الفوق الحفير....جيت اشوفا حماني الغفير
..............
البركاوي
ريقا بركاوي الجروف...في الضمير ربالنا خوف
..............
يا الطنبور حليل أم بله
البركاوي ما بيتبلا
إلا أكان تمير خادم الله
............
فى شرقك عروس وادينا
شمالك فيهو بركاوينا
من أم در يا ربوع سودانا
............
البركاوي ماح
يا حسنه
كسر للرماح
يا حسنه
..............
البور
بضم الباء والواو
..............
أنا إن مشيت فى (سور) أنا
آكل لي تمرات بور أنا
أنزل على البابور أنا
وافرح واكون مسرور أنا
أنا من أعز ديار أنا
منصوري موقد نار أنا
..............
المشرق
بكسر الميم وتسكين القاف
........
إنتنت عرجون تميره
شايلة بالعز فى قريره
مشيرقيتنا الغزيره
الخلوق جات من عصيره
هايجه زي موية الدميره
................
شتيلة المشرق العلولوا زربو
بلققط واحدي واتنين ما بخربو
البرضضي على تعرفى وتابي دربو
...............
شتيلة المشرق العند ود كدانه
تموع فى الليد قبل تصل الصحانه
حبيبة روحى يا الريدك أذانا
..................
شتيلة المشرق الفوق الزلومة
يشرروط دودا حامي الناس العومة
..............
المشيرق اب شيلن ردف
سيدا فسلاً( فسلن) قاطع الطرف
صاقع القمري بالحجر كف
من نزلة(نزلت) الزرزور..رجف
..................
القرقودي ما بنضاق
والقنديلي..فايق وراق
...............
ريقا ود لقاي
يا قسومي انا
وا لبينة الشاي
وا قسومي انا
.........
صديق منصوري
سودانوبس
|
Post: #28
Title: Re: حــش التمـــــر
Author: سودانوبس
Date: 09-12-2003, 07:03 AM
Parent: #1
مراحل نضوج التمر..الرطب.. العجوة.. البلح
...
1 التميييم
2الدفيق
3الطيارة
4 الصفوري
5أم راس
6أم نص
7النجيض...المهرودي..المستوي..الرطب
................
تمري الما نجض دفيقو
جوهو اتقسموهو وراحوا
ما عارفين شقيت في دربوا
لى وش القباحة اباحوا
......................
خدرتك دفيق تمرنا
نظرتك تسلب عقلنا
..............
ألققط آكل أم راس النجيضيِ
وينا شبالا الرشعنا مع الحفيضي
.............
حلات الريحي في الدفيق
حلات قارسيقنا والأشميق
حلات فوسيبنا والقارسيق
كداد البوغة والكوديق
منصوري
|
Post: #38
Title: Re: حــش التمـــــر
Author: سودانوبس
Date: 09-13-2003, 04:32 PM
Parent: #28
الربيتون يا الربيييت
ببقي زرزوراً غِتـيييـت( تصغير ) بنقد( أم راس) فى السبيييط
|
Post: #46
Title: Re: حــش التمـــــر
Author: ملكة سبأ
Date: 09-14-2003, 01:17 PM
Parent: #38
سودانوبس
والله حظو الزريزير دا
شكرا للمساهمة القيمة وياريت لو تزيدنا كمان
|
Post: #29
Title: Re: حــش التمـــــر
Author: ود عقاب
Date: 09-12-2003, 12:08 PM
Parent: #1
ملكه سبا
مخصوص خليت القرايه لى يوم الجمعه عشان المتعه تكتمل
اديتك العافيه وما تنسى حقنا وانا وودالعجمى اخوى وكمان جدو الراح فى المدن
وشكرا كتير
كل البيت قرا الموضوع دا
ودعقاب
|
Post: #45
Title: Re: حــش التمـــــر
Author: ملكة سبأ
Date: 09-14-2003, 12:52 PM
Parent: #29
حقكم محفوض ياود عقاب
وعلى ذكر يوم الجمعة احكى ليك الحكاية دى من حاكيات شقاوتنا ايام التمر
كان جدى عندو تمرة مشرق رهيبة جدا والتمرة دى فى جنينة جنب بيتو يعنى باب السر فاتح على التمرة طوالى ، ومافى طريقة الواحديصلا خالص اها المهم كنا ننتظر يوم الجمعة بفارق الصبر لانو بمشي الصلاة هو وحبوبتى وبس نسمع ليك الامام بدأ الخطبة نشيل كيسنا وجري على الجنينة ونمسك ليك اطول جريدتين وهز هز هز ورطططططططططططط واليوم دا لا غدى لا عشي
هيه زمن والله
وتحياتى لكل ناس البيت
|
Post: #30
Title: Re: حــش التمـــــر
Author: سودانوبس
Date: 09-12-2003, 12:32 PM
Parent: #1
الأستاذة ملكة سبأ جابت موضوع شيق
..................
الكلمي النسيتيها عندما يزرعو الشتلة هي
( بسم الله..وقف...للشحاد واللخاد.. والدناع..والقطاع... وماشي الدرب..الجابو الدرب... كرامة تتقينا وتوقينا.وتحفظ زرعنا.. وضرعنا.)ويعني زي ما قال ليك ياسيكو..
|
Post: #32
Title: Re: حــش التمـــــر
Author: بدرالدين شنا
Date: 09-12-2003, 07:48 PM
Parent: #1
بسم الله الرحمن الرحيم
النخلة ملكة سبأ
سلاااااااااااااام وإحترام
بوست رائع فيه مفردة أشتاقها أنا شخصياً رغم أنني جغرافياً ليس بيني وبينيها صلة قرابة
| Quote: وبعد رمي اول سبيطتين لم يتحرك احد نحوهما والسبب انهما سبيطتا القفاز او الحشاش |
ذكرتني اللحم البطلعوهو أول حاجة للداية يوم السماية
يديك العافية يا ملكتنا بوست محضور وأنا بين حروفه تذكرت مجموعة من المبدعين وخاصة المتالق حميد
|
Post: #52
Title: Re: حــش التمـــــر
Author: ملكة سبأ
Date: 09-14-2003, 05:46 PM
Parent: #32
اهلا حباب بدر الدين
ودا ياهو السودان تحس اى بقعة فيهو بلدك واى ناس اهلك
وليه مايكون زى الداية وليه مايكون حصاد الموسم فى غلاوة المولود فطالما انتظره صاحبة وقام على راعيته بكل عناية راجياان يسنده لعام كامل بل وهو سنده الوحيد كماالولد الذى يحلم به ابيه عصا يتوكأ عليهاويقويه ويفرق ويزيد فى غلاوة المسرة انها السبيل الى تحقيق ذلك الحلم
ليك التحيات بدر الدين ولاستاذنا حميد كمان
|
Post: #33
Title: Re: حــش التمـــــر
Author: الكيك
Date: 09-13-2003, 05:49 AM
Parent: #1
بما اننى اروتى قديم فانا الاكثر استمتاعا بهذا البورد
وحش التمر له ذكرياته التى لا تنسى فهو موسم انعاش الجيوب وفى نهاياته تتم الافراح وفيه يلتئم شمل الاسر بعودة التمارا وهم ناس الصعيد لحضور هذه المناسبة الاحتفالية الخاصة
اشكرك يا رائعة علي تذكيرنا بها وابعادنا قليلا عن الهم الصحفى ومتابعة الاخبار التى لا تنتهى ..وربنا يقويك
|
Post: #34
Title: Re: حــش التمـــــر
Author: sympatico
Date: 09-13-2003, 11:39 AM
Parent: #33
الاخت الاستاذة ملكة سبأ
لوأن هناك جائزة تمنح لأفضل بوست كل أسبوع لاستحققتها عن جدارة بهذا البوست المميز جدا.
فكرة بديعة في التناول
ذاكرة سجلت كل تفاصيل ما حدث
وقلم بارع استدعى هذه التفاصيل بأسلوب أخاذ سهلممتنع
واصفا شارحا كيفية حش التمر
وفعلا فأنت بهذا البوست ملكة متوجة
وان سالتك شيئا فهو ان تزيدينا
ويا من يهتمون بالتوثيق هذه مادة جاهزة لفيلم وثائقي فريد
|
Post: #35
Title: Re: حــش التمـــــر
Author: ابو جهينة
Date: 09-13-2003, 12:07 PM
Parent: #34
ملكة سبأ
تحياتي الباسقات بطول قامات نخيلنا و نيلنا
و على نخيل بلادنا ... سلآآآآم
|
Post: #57
Title: Re: حــش التمـــــر
Author: ملكة سبأ
Date: 09-15-2003, 04:22 PM
Parent: #33
الاروتي الكيك
سلام
وربنا يقويك انت كمان
وياريت تدينا تقرير مفصل عن معنى الكلمة
فىالانتظار
وليك الف شكر
|
Post: #36
Title: Re: حــش التمـــــر
Author: ملكة سبأ
Date: 09-13-2003, 03:41 PM
Parent: #1
مكرر
|
Post: #41
Title: Re: حــش التمـــــر
Author: yasiko
Date: 09-13-2003, 08:34 PM
Parent: #36
نخلة
بكل اسف فقدت توثيق هذه القصيدة
وقد وجدتها يوما في هذا البورد
يا نخلة شبي
شبي هوب يا نخلة شبي
قومي طولك ..
أوعي ترخي العزم لحظة
شدي حيلك
مدي هامتك فوق وفوقين للسحابة
ما السما المنشري هولك
بي جريدك قوي راكوبة الارادة
أصلا الريح ماب تشيلا وماب تشيلك
قومي مهما الغم تمكن
لا تخلي الليل يباغتك
أو يطول بالآهة ليلك
حتى كان الشوك مشكن
ولا فيكي الهم مدكن
ولا عودك بي شقا الأوجاع مجكن
قومي خلي العافي تسري
في البدن تلقالا مسكن
ابني من سعفات جريدك قشة قشة
لي صغار القمري عشة
بلي ريقك وبلي ريقا
إنتي شوقك طال عليها
وطال عليك بالغيبة شوقا
مدي ضلك فوق شتولك
هزي جزعك وارمي من قلب السبيطي
فوق تقي الأمل الوهيطي
تمرة تمرة
هبدي النار بين ضلوعك... جمرة جمرة
وطلقي الآه بالتلاتي
مسّري الرجا وافتليهو
والعشم حبلو ابرميهو
ماب يضيع في الله عشمك
وماب يضيع منك شليلك
هبي هوب يا نخلة شبي
قومي طولك.
|
Post: #42
Title: Re: حــش التمـــــر
Author: ود العجمى
Date: 09-14-2003, 09:28 AM
Parent: #1
الكيك
بما اننى اروتى قديم فانا الاكثر استمتاعا بهذا البورد
-اروتى- بالله شوفوا الزويل دا مرق الكلمة دى من ياتو ذاكرة
الكيك والله احييك يا عزيز
ملكة سبأ
مليون سلام
|
Post: #43
Title: Re: حــش التمـــــر
Author: ABU QUSAI
Date: 09-14-2003, 11:46 AM
Parent: #42
ملكتنا الرائعة ألف سلام ....
يا رطب المدين الفي السبيط متاكي ...... يا سوميت بنونة الليلة أبيقك جاكي
ألف سلام عليك .....
يا تميرة المشرق البشيل مفدع ....... الغتيت حراسه بي فراره يجدع
لوحة رائعة لكن كانت زمان - ويا حليل أيام زمان – نطلع حق اللقاطين وحق المساكين البجو يشحدوا ونطلع زكاته يوم حصاده بحسب أمر المولى عز وجل وبت نعمي عليها رحمة الله قالت :
تمرنا نجض نحش وتجاره قاعدين .......... ونقسم في زكاته على المساكين
لكن الليلة بقت لجان الزكاة تمر قبل ما نحشه وتقدر الزكاة والتمر في أمه كأنهم ضمنوا المطر والرياح وانت بتعرفي انه المطر عدو أساسي للتمر في مرحلة معينة من مراحل نضوجه . وبعد داك يوم الحصاد يجوك لي كيلة الشهيد وكيلة الجريح وكيلة الدفاع وكيلة المحلية وفوق ليها دعم الولاية ، دا كان ما خلقوا ليك كيلة ثانية لدعم المركز الصحي أو لإعادة ترميم مدرسة ما أو خلافة ، وينكدوها على المزارع في يوم الحصاد لانه بيكون في تخطيطه بعد حل الديون ومقابلة البنود الكتيرة يكون مأجلين عرس الولد واللا البنت لامن يلموا التميرات . وبالمناسبة يا ملكة أبوك وأعمامك ما بوزعوا الروكة طوالي في يوم الحش واللا شنو .
وما كلمتينا عن ربط العرجون آخر اليوم عشان يشيلوه معاهم لما يسدروا ، عشان ينشفوه للواقود عشان العواسة وبعض أمهاتنا بخلن لي رمضان عشان يشدن بيه بليلة اللوبي عشان ناره قوية مع حصي التمر .
|
Post: #44
Title: Re: حــش التمـــــر
Author: maman
Date: 09-14-2003, 12:50 PM
Parent: #1
Quote:
وتمر الهبوب هو التمر الذي تقوم بإسقاطه الرياح قبل البدء في عملية الحصاد ... البعض يسمح لنفسه بجمعه من كل الاماكن اذا كانت تخصه او لا تخصه والبعض يحرص على جمع ماكان فى نطاق ارضه فقط والبعض يسمح للآخرين بجمع مايخصه فى حالات الرياح الخفيفة والبعض يعين دوريات من الشباب حفاظا لحقهم ... طرائفه كثيرة وخاصة اذا كانت الرياح هبت فى وقت متأخر من الليل و كانت ريح عنيفة فعندها نضطر الى حمل الفوانيس او البطاريات والعمل على جمعه في هذا الظلام
|
آخر نكتة وصلتني أمس بالتلفون من البلد عن تمر الهبوب بواسطة أخونا أحمد الطاهر والحقوق محفوظة له... يبدو أن الهبوب هذا العام لم تكن بالشدة والعنف الذي تتسبب في حت التمر بالكميات المرغوبة، قالت إحدى النسوة ، واسمها بت الداقوي : والله التمر الدور دا إلا نعملو وجع صناعي ، نهوزز ليهو الجريد عشان يحت
|
Post: #47
Title: Re: حــش التمـــــر
Author: معتصم ود الجمام
Date: 09-14-2003, 01:30 PM
Parent: #44
كلامكم حلو
ايام جميله ومرهقه
ايام حش التمر
كنا انا وصديق لي من ابناء امدرمان
نسابق اهل التمر الى ديارهم حاملين معنا شنطه العرائس انا اصلا من القرير نحش التمر مع الاهل وبعداك نباري النيل نقدم عروض مسرح العرائس في القرى على امتداد النيل من القرير الى نوري مرورا بتنقاسي السوق الرويس فتنه اب دوم ونشرق بيقادي لا نخلي زومه لا حزيمه لا جلاس لا كرو لا دهسيره وكانت ايام
اذكر صديقي الامدرماني هذا لاول مره يحضر حش تمر فجلس مع الخراتين البخرتو التمر من السبيط وكان يخرط حبتين وياكل تلاته الى ان جاء وقت الخروج من تحت اذا بصديقي بكرش منفوخه واستفراغ وحاله بالبلاء وكنا بنوم في حوش التمر الا نمنا بره في الشارع شدت ما طار ليهو التمر المهم كلام جابو الكلام
ولكم الود
معتصم سيد احمد
ويا مامان انت منو من المامانات اكيد بعرفك
|
Post: #48
Title: Re: حــش التمـــــر
Author: Ahlalawad
Date: 09-14-2003, 01:47 PM
Parent: #1
بدر الدين ياخوي إنت تعال حداي بي هنا ..
إنت عارف .. مرة واحد راجل شهم جداً جاب تمر مخصوص من البلد البتتحدث عنها ملكة سبأ دي .. جايبلو تمر قالوا دا أحسن نوع .. قمنا أنا وواحد أخوي من عرب الجزيرة ناكل ونتونس بدون إبداء أي مشاعر .. فـ الجماعة قالوا لينا ياخوانا ، النوع دا من التمر إسمو بت تمودة .. دا النوع الخاص في الخاص زاتو ، يعني ما بمرقوهو لأي زول .. غايتو اتنحنحنا كدا وقلنا ليهم كل سنة وإنتو بخير لاكين والله نحن قايلنو زي التمر .. وكل عند أهل الجزيرة تمر .. والعود في أرضه بعض من الحطب .. والله الراجل قرررب يقول لينا لا تنثر الدر على الخنازير .. لاكين لقانا مسلمين .
ملكة سبأ : دا بوست متعوب عليه .. شغل مفيد وفي غاية التجويد ، لك التحية
|
Post: #49
Title: Re: حــش التمـــــر
Author: ود العجمى
Date: 09-14-2003, 01:50 PM
Parent: #1
ملكة سبأ
زميلى أمير تربال ولسع ريحتو ريحة الواطة الليلة الصباح فتحت البوست بتاعك وقلت ليهو اقرأ ولما جيتو راجع لقيتو لحدى هسى بيقرأ فيهو . وقال لى انا قبيل ما قدرت أقراهو لأنو دميعاتو نزلن وهسى هو قاعد يقرأ فيهو فى الجهاز التانى . وخالى شغلو . اها وحاتك عندى لمن ينتهى من القراية يلقى الاستيضاح راجيهو. لأنو دى عطالة مقنعة زى ما بيقولوا
ياسيكو والله الراجل الغنية جرستو شديد والكتابة بتاعة البنية دى عملت فيهو عمايل لكن وحات شيخنا أحمد تور الاراك الاستيضاح راجيهو راجيهو
|
Post: #78
Title: Re: حــش التمـــــر
Author: ملكة سبأ
Date: 09-21-2003, 05:52 PM
Parent: #49
امير سلام
حالتك لسة ريحة التراب فيك ، وبقى وكان فنيت الحجر يقع فى القرير
كدى فضل ليك حبة دميعات للبعاد ديل
ود العجمى الراجل بتاع الاستيضاح قول ليهو جايبن لك قفتين قنديل
|
Post: #51
Title: Re: حــش التمـــــر
Author: AlRa7mabi
Date: 09-14-2003, 02:37 PM
Parent: #1
ملكة سبأ
هذا فعلا بلا جدال .. هو بوست الشهر
دفق جميل خارج من القلب .. للقلب بلا رتوش
دائما لما نتكلم عن حياتنا البسيطة
بيكون الجمال سيد الموقف
ربنا يدك ألف .. ألف عافية
الأخ ياسيكو
يا زول اطربتنا لما قربنا نسكر زاتووو
الله يديك العافية
سلام لكل أهلنا الطيبين
الرحمابي
|
Post: #53
Title: Re: حــش التمـــــر
Author: yasiko
Date: 09-14-2003, 06:49 PM
Parent: #51
الرحمابي
سلام
زولاً توقيعو دا
| Quote: في حضرة شلوخن يطيب البكاء |
ما بنتوقع منو غير ما قال
والتحية عبرك لآل جندر
مرحبابك ولأول مرة أشاغلك أرجو قبول المشاغلة
رغم اننى اقرأ كل ما تكتبه
وبالمناسبة دي ان درت الشريط يصلك
مع هين هينين من القنديل او
البركاوي داك الطعمو حالي زي ما قال الشاعر ود بادى
رغم انني لم أحضر حش التمر ولا زراعة
الجروف هذا العام لكن نازل (أسلـِّك)لزراعة
جروف المحيط الهادي ان بقى المد والجزر ادونى فرصة
أبشِـر بالخير
تسلم
|
Post: #54
Title: Re: حــش التمـــــر
Author: ملكة سبأ
Date: 09-14-2003, 07:09 PM
Parent: #53
ياسيكو القنديل خلى على انا دى
وتعال الاثنين نرحب بالرحمابي
ونقولو دا جمال بلدنا
المتصل فعلا بقلوبنا مباشرة
تسلم يارب ويديك الف عافية
ويكون فى علم الجميع انا جاياهم وحشنا ما انتم لليلى
وتانى بقولا البوست روكة ... يعنى البدخل كلو عندو نصيبه وجمال بلدنا ما بكمل
ولسة ناس الصور مافزعونا
|
Post: #55
Title: Re: حــش التمـــــر
Author: maman
Date: 09-14-2003, 07:15 PM
Parent: #1
Quote:
نخلة
بكل اسف فقدت توثيق هذه القصيدة
وقد وجدتها يوما في هذا البورد
يا نخلة شبي
شبي هوب يا نخلة شبي
قومي طولك
|
الأخ ياسيكو
تحية
القصيدة للشاعر السر عثمان الطيب وكنت قد نشرتها سايقا في أحد البوستات بإذن من شاعرها.. وهي تحكي عن معاناة زوجة أحد أصدقاء الشاعر التي أصيبت بالسرطان ورقدت بالمستشفى الى أن توفاها الله الى رحمته. وهي بحق قصيدة مؤثرة ومعبرة
مع التحية
مامان
|
Post: #56
Title: Re: حــش التمـــــر
Author: yasiko
Date: 09-14-2003, 07:26 PM
Parent: #55
| Quote: قالت إحدى النسوة ، واسمها بت الداقوي : والله التمر الدور دا إلا نعملو وجع صناعي ، نهوزز ليهو الجريد عشان يحت |
مامان سلام
باقيلك الولي دي طِـيبي شِي
خلو البوليس يفتش بيتا
اما القصيدة ،الان فقد ادركتها وان كانت تبعد عن المرمى لكن دعها تفهم على الظاهر
|
Post: #58
Title: Re: حــش التمـــــر
Author: ملكة سبأ
Date: 09-15-2003, 05:18 PM
Parent: #56
ياسيكو زويلة مامان دى دايرى تسوى شغيلة صاحبتى الذكرتها فى تمر الهبوب
ماعليها الا تنطخ السبيط وانشا الله يدها نتقطع كان خرتتلها تمرايي
|
Post: #59
Title: Re: حــش التمـــــر
Author: ملكة سبأ
Date: 09-15-2003, 06:26 PM
Parent: #1
ياود العجمى
طبعا فى الموسم الكلام كلو للتمر
الجرادل بالتمر
العدة بالتمر
وماتقول الموسم بقى يجى فى وش رمضان
يعنى الحلب حظهم
وعلى ذكرة رمضان انشا الله تكون شامي ريحة الحلو مر دى
طبعا الحلو مر البجى من الشمالية من اطعم الانواع لانو تمرو كتير وفوق دا بخصصو ليهو تمر معين عشان كدا يمتاز بحلاوة طعمه
وما ننسى كمان تمر البقنية وهى مشروب لذيذ جدا
وما نمشى بعيد وعلى ذكر المشروبات اظنكم ما ناسين الشربوت - الله ياخى - الضحية ماعندها طعم من غيرو والجرادل التطاقش ديك
وحضر الجركانات عشان تدخل الرطب دا وبرضو لرمضان ، طبعافى انواع من التمر الرطب زى الكوريقة عندنا بتحفظ فى جركانات ويتقفل وبرجى رمضان رطب
وفى تمر بترفع فى راس البيوت بيدخرو لفصل الشتا
يعنى باختصار كدا وبينى وبينك الشوايقة ديل عندهم غتاتة بعزلو التمر السمح كلو والباقي بخلطو بحبة كرموش ويبيعو
بمزخ طبعا ما للدرجة دى يعنى
فى زول بعرف سبيطة القمرية ؟؟؟؟؟
|
Post: #60
Title: Re: حــش التمـــــر
Author: yasiko
Date: 09-16-2003, 03:35 AM
Parent: #59
الملكة سلام
سعر سوق كريمي الليلي كم ؟
|
Post: #61
Title: Re: حــش التمـــــر
Author: hala guta
Date: 09-16-2003, 06:11 AM
Parent: #1
ملكة سبا والحضور الكريم
سلام للجميع
هذا فعلا بوست الاسبوع...وكمان زدتيها بمداخلتك الاخيرة ..اكاد اشم ريحة الحلومر بالجد
رغم ان معظم اصدقائى وصديقاتى شوايقة الا انى لم تكن لى اى علاقة باغانى الطمبور ولانى تربية مدداين كانت ثقافتى الغنائية محصورة فى ناس عركى وردى وود اللمين ومصطفى وحنان النيل وعندما نزل شريط هداوة الريف دة كنت من اول من اقتناه ..ولكن لم استسغ فيه اغانى الطمبور ..بل واعتبرته من اسوأ اشرطة حنان النيل
شاءت الظروف ان التقى فى ظروف العمل بزميل مغرم بالشوايقة وغنا الشوايقة ..يمتلك مكتبة صوتية ضخمة ويواظب على حفلات نادى الطمبور .رغم انه ما شايقى (ود العجمى تفاجاءت بان عبد الواحد ما شايقى مش؟) ولما كانت ظروف عملى ميدانية ومرات تقتضى سفريات الى بعض المدن وكان هو رفيق تلك الرحلات الميدانية والسفر اصبحت مجبرة على الاستماع بكثافة لاشرطته ...ومن الاضطرار الى الاستمتاع ..وقليلا قليلا التامل فى الاغانى وهو يساعدنى بترجمة ما خفى على وحكاية قصص الاغانى واصبحت اتعاطف مع احمد الذى تزوج اخوه حبيبته فى اميمة ,واشيل هم زوجة المغترب فى لسان الحال غلب ,وادعو ربنا يرد غربة كل الوليدات والبنيات حين استمع لعافيي منك راضيي عنك ...واكتشفت كم هى حنينة هذه الاغانى وكم هو دافى هذا الطنبور..واليوم وانا استمع لحنان النيل اكتشفت هذا الشريط من جديد ..وكانى اسمعه لاول مرة
شكرا ملكة سبا ...شكرا ياسيكو ..شكرا ود العجمى الذى لفت نظرى لهذا البوست
|
Post: #62
Title: Re: حــش التمـــــر
Author: yasiko
Date: 09-16-2003, 06:56 AM
Parent: #61
يا الملكة
سلام
والله التمر الفي الصورة دي فيهو حلاة شربوت
مرحب هالة قوتا
والله ليك من الشلوخ
وبالله شوفي حميد قال في النخلة شنو:ه
تلقاها
خشَّت في البيوت
وبي كل صراح
تقروقة
سجَّاجة طهورة
طبق من العرجون
ضِنيب هبّابة
طاب ..
طبْطابة
قُفَّة ..
وكَسْكَسِْيكَة
حبل متين
فتلوهو في
ضل الدليب
نشلوبو من
بئر للشراب
نسجو بُو
بنبر ..
وعنقريب
....
تلقاها خشّت
في البيوت
جوبيل
جريد
يعرش سقوف
بيتاً جديد
أول دخلتو
عريس سعيد
مبسوط يقرقر
بانشراح
...
أو حتى واقوداً
تقيدو السمحة
في نار بارتياح
لي يوم عزيز
يطلع خبيز
دكّاي صُفاح
يطلع ملاح
برُّوبو
ناساتاً ضيوف
أو زول وراهو
شغل بعيد
يمرق قهيوتو
وشاي صباح
...
|
Post: #63
Title: Re: حــش التمـــــر
Author: yasiko
Date: 09-16-2003, 07:16 AM
Parent: #62
| النـَّخـلة حميد/ محمد الحسن حسن سالم | النخلة في الليل iiالمهول وِِحِّيدا في عِز iiالرياح فارس iiيدارِق في iiالرماح الجايّه من كلِّ iiإتجاه رغم iiالجراح شُح ألمِي والزاد والسلاح راكز .. iiيصول لا أنّة ii.. لا iiحنىللجباه لا خان iiبصيرتو الإنتباه لا iiحتّى قال ديل iiالمغول و لا ختّا آه على عز iiقديم روّح iiعجول ... طوّل مداميك iiالصبر سدّابه شُرمات iiالنباح كل ما iiنزف من iiجوفو دم كل ما عزف iiلحنو الصباح ... نجم الميامين iiالحِمِش ينضارى شان تشرف iiشمش تدّي iiالحياة الناس ii.. الحقول الدابّة ii.. والطير والبمِش لكنو ماب يخبر iiأفول ... والأرض مخلاية iiالتعب مصلاية iiالعِشق الصعب ماب iiتستباح زي نخلة في الليل iiالمهول كانت iiبتختبر الفصول كانت iiبتمتحن الرياح كل ما iiتطول ... ... والدنيا iiخوف عابر iiيشوف عنف الرياح × iiالنخلة ولاّ iiالنخلة × عنف iiالرياح × ليل iiمهول ... ... طوّالي راح iiيحلف يقول النخلة ماب iiترجى الصباح والطيّب الصابر سنين راجيها iiباكر حقُّو راح لا فكَّ iiدين لا سدََّ iiجوف رزقو iiالمعلَّق في iiالسبيط مشهادو iiأصبح بيّنَ iiبِين فالنخلة ماب ترجى الصباح ii؟! ... ... لكِن ضراعاً في iiالبلد عارف عروق iiالنخلة وين خابِر صمودا المِن متين ضامن ثبات iiساقه الهطيط سامع مناتقة الرياح ساكِت صياح النخلة ماب iiتقدر تخون iiالأرض ماب تقدر iiتكون غير iiالمراح لي iiهمبريب يغشى iiالبيوت عند الصباح نُص iiالنهار عند iiالمغيب وشان تدِّي iiضُل والصيف iiغريب تاخد iiالهجائر بارتياح ... عِز iiالرياح النخلة iiتنجاسر تصون عِش الطيور iiالبينا تفرِد iiللجناح ترقص iiتميد الساق iiهطيط والجو iiبراح وفي الأرض iiماشي عرِق iiبعيد ... ييبس iiجريد ينحت iiسبيط والنخلة iiتشده بالجريد النخلة تتعِب في iiاللقيط النخلة ياها iiالنخلة لاب تعرِف iiتخاف قِل iiالمطر تُقل iiالجفاف لا فتوة الريح iiالعبيط طوَّالي في iiأجمل وشاح وكل الرياح iiفوقا بِتمر ومن كلِّ أصناف الرياح النخلة ماب تخبر خلاف ريح iiاللقاح والهمبريب ريح iiالصلاح ... ما iiليها غير تطرح iiتمور تملأ الشواويل والقُفاف ينتمَّ iiزين ينحلَّ iiدين يطلق ضهر iiزولاً بسيط واقف على iiحد الكفاف ومن ركَّة الرزق المتاح رزقو iiالمعلّق في iiالسبيط ينزل كم iiالطير الخفاف يقدِل iiنشيط يخضرَّ زي iiشتل الضفاف كلما النشاف iiبدأ في iiالسبيط ... |
|
Post: #64
Title: Re: حــش التمـــــر
Author: yasiko
Date: 09-16-2003, 07:23 AM
Parent: #63
| تابع / لقصيدة النخلة | والنخلة لو عنف الرياح الصاقعة ii.. أهوال الفصول ii.. البودي آفات الذبول ii.. قِدرن على iiساقه الهطيط تقع ii.. وآب تموت روحا iiالمدردحة ماب iiتفوت جسدا المعمَّر iiبالخلود ... تلقاها خشَّت في iiالبيوت وبي كل iiصراح تقروقة سجَّاجة iiطهورة طبق من العرجون ضِنيب iiهبّابة طاب ii.. طبْطابة قُفَّة ii.. وكَسْكَسِْيكَة حبل iiمتين فتلوهو iiفي ضل iiالدليب نشلوبو iiمن بئر iiللشراب نسجو iiبُو بنبر ii.. وعنقريب .... تلقاها iiخشّت في iiالبيوت جوبيل جريد يعرش iiسقوف بيتاً iiجديد أول iiدخلتو عريس iiسعيد مبسوط iiيقرقر بانشراح ... أو حتى iiواقوداً تقيدو iiالسمحة في نار iiبارتياح لي يوم iiعزيز يطلع iiخبيز دكّاي iiصُفاح يطلع iiملاح برُّوبو ناساتاً iiضيوف أو زول وراهو شغل iiبعيد يمرق iiقهيوتو وشاي iiصباح ... ... ... آخر iiالمطاف والموت iiبيشرق نسمة في كف iiالصَبا الموت بيسر iiق بسمة من شال iiالصِبا وتوب iiالزفاف النخلة ترباية iiالعباد بجلاله تتحول iiرماد ورمادا يتحول iiسماد وسمادا iiيدخل كم iiبلاد وديانه iiتخضر والبطاح ... ... شوف iiكيف كفاح النخلة يوت لا iiحيله تتحدّى iiالرياح تصبر على مُر الحياة وتتمطق الموت بي iiجلد من بعدِ iiما ملَت iiالبلد شتلاً معمِّر iiبالألوف شايل مخلِّف بارتياح طول iiالمصير النخلة حوت iiالصحراء أو جدي iiالجروف تلقاها مرتاحة iiالضمير ... يكفيها iiدا ويكفيها iiصاح بجراحه رجَّتنا iiالصباح يا القلتُّو iiماب ترجى الصباح النخلة تحت الواطة سِر والنخلة فوق جهرة iiنصاح والأرض أعمق ما iiتكون والجو iiبراح ... ... يكفيها iiصاح عِز iiالمطر عز iiالجفاف ما iiاستسلمت لي ريح iiغريب وكلّ الرياح iiفوقا بتمر ومن كلِّ iiأصناف الرياح النخلة ماب iiتخبِر خِلاف ريح iiاللقاح والهمبريب يا معوِّض iiالليل بالصباح يا معوِّد iiالنار اللهيب روِّض iiنخلنا على iiالرياح وفي لجة iiالبحر الغريب أدَّ iiالرواوِيس الصلاح ii. |
|
Post: #65
Title: Re: حــش التمـــــر
Author: ABU QUSAI
Date: 09-16-2003, 08:29 AM
Parent: #64
سنة يا سبيطة القمرية ... إنتي كنتي شغالة قفاز واللا شنو...
العزيزة الراقية ملكة سبأ
يخيل لي السؤال ليه سموها سبيطة القمرية .. عادة القمرية بتعمل عشها وسط الجريد يعني مرات بكون قريب من قلب النخلة وطبعا السبيط كله بكون متنى بعيد إلا سبيطة القمرية بتكون قريبة من القلب محشورة لكن دايما العش قاعد يكون بعيد منها ، وبالمناسبة أنا في صغرتي كنت شقي جدا النهار كله أمي تزازي في من رأس تمرة لي رأس تمرة ، لكن ما اتذكر قابلن عش قمرية مشكن في السبيطة دي نفسها .
بالمناسبة في اتصال هاتفي أمس مع أمي في القرير عرفت انه تمر المتر حشوه خلاص وسألتها من تمر الساقي تحت قالت لي لسعة ما بدينا لكن الدوريات شغالة والله الولاد يبيتوا تحت يمرقوا من بعد المغرب يرجعوا الصباح ، نعل ما في سرقات واللا شي والعرب نعل ماهم مضايقنكم ، العرب المساكين كمان المعيشي ضاقت بهم دايرين يموتولكم بالجوع مي ياهو يجو على تميراتنا ديل الشي ال الله يقسموا ليهم مننا ياخدوا . الله يديك العافية يمه خلاص مع السلامة . لا ماهو مع السلامة ، أنا مشيت دخلت الكهرباء في البيت ، مبروك يمه ، الله يبارك فيك لكن أسمع ما عندها فرق من فانوسي الزمان أولعها بعد المغرب واطفيها ساعة أدور أنوم فهمتي حديثي دا . أيوه فهمته حاضر يمه ، ( طبعا فهمت انه الحاجة بعد دخول الكهرباء فكرت في الثلاجة والمروحة وربما السحان والخلاط والذي منه ) وبسرعة رديت ، طيب ما خلاص الحمد لله حاشين التمر ، لا لا لا التمر السني دي ما عندكم فيه أي كلام أنا عايزي ألمه وأعرس به لي أخوكم دا خلاص فات فيهو الفوات ، لكن هو قال لك داير أعرس واللا اتبين في محل معين ، اتبين ما اتبين أنا لا شهر عشرة بعرس له وانت ما عليك بس ترسل الشيلة ، طيب الشيلة دي ما بتحتاج يعرفوا العروس ومقاسات و ، انت ما ليك طريق بس ترسلي الشيلة وأنا أول ما ألم التميرات ديل بقبضوا أعرس لو . حاضر يمه يديك العافية . مع السلامة ، خلاص مع السلامة أنا عافي منك .
|
Post: #66
Title: Re: حــش التمـــــر
Author: Habib_bldo
Date: 09-16-2003, 10:22 PM
Parent: #62
سبقني الليندي في اسم تستحقيه وهو ملكة البركل او ملكة الكنداكة وملكة سبأ اسم
جميل وجاءت قصتها في القرآن الكريم
ولكن الاجمل ما كتبتيه عن حش التمر
اولا التحية ليكي ولكل اهلنا بقدر قامة نخيلنا
عدت بعد غيبة للبورد ووجدت هذا البوست الجميل الذي حملني مع أشواقي عبر المسافات الطويلة
إلى مرتع الصبا ومستودع الذكريات الجميلة
لقد فاضت عيناي وأنا أقرأ أبداعك الجميل في تصوير مشهد مترسخ ومتجزر في أعماقي
وفي أعماق كل اهل الشمال
أنا من كرمة
ولا يختلف المشهد هنا وهناك هي نفس الطقوس ونفس مواسم الفرح الذي ننتظرها بفارق الصبر من عام لعام نبني آمالا عراضا في خير وفير يعم على الجميع ويحل كثيرا من ضائقة المعيشة حتى الاطفال والصبية تراهم في اسعد ايامهم حيث تمتلئ جيوبهم بالمال من أجرة ترحيل البلح من المزارع الى البيوت ومن لقيط القليق والكشيق (كلمات بالرطانة طبعا) وما أجملها من أيام
لقد تفاعلت مع كلماتك ومر شريط الذكريات وأنتي تصفين لقيط البلح وسبيطة اللقاح ومنظر كبار السن وهم متحلقين أمام كومة التمر وهم ينظفون ما علق بالعراجين
ومنظر الشباب والشبابات وهم وهم منهمكين في اللقيط
وإستراحة لحظات تناول الطعام
وندرة مياه الشرب الباردة حيث حر الصيف وكتمة الدميرة ورائحة الطين من مزارع الذرة وعيش الريف واللوبيا
والبامية المفروكة بالقراصة رائحة قدحة التوم
والبياعة الذين يقايضون الحلوى (والدقة) والترمس بالتمر
ولحظة توزيع الكرامة وحلقة الاطفال وهم يمدون أطراف أثوابهم لكي يجد كل واحد نصيبه
وعدت بالذاكرة للبيت والمكان المعد للمحصول
وأكوانا الصغير بجانب الكومة الصغيرة وكيف كنا ننتهز الفرص لنسرق منها
لنكبر أكوامنا
أيام لا تنسى وكم لي ذكريات فيها
سعدت بهذا البوست سعادة عظيمة رغم تفتح جروح غائرة في أعماقي كنت أغالبها بالنسيان
ولكن هيهات هي طقوس وتراتيل في أعماقنا
شكرا لك لأنني حلقت مع وصفك في مشهد تصويري حقيقي ربما خفف علي بعض الوجد والحنين
المسافة بعدية آلاف الاميال تفصلنا عن أشواقنا وآلاف القيود تمنعنا ويا ليتنا كنا كالطيور
وصدق الحلنقي في اغنية وردي
حين تمنى ان يكون طيرا يحلق بلا قيود ويحط اينما شاء
حظك جميل دايما تسافري بلا تصاريح للسفر
|
Post: #67
Title: Re: حــش التمـــــر
Author: Habib_bldo
Date: 09-17-2003, 01:44 PM
Parent: #66
اعلاء
|
Post: #68
Title: Re: حــش التمـــــر
Author: aba
Date: 09-17-2003, 02:23 PM
Parent: #67
ملكة سبأ
تحياتي ليك يا صاحبة الجلالة
ويا حليل أيام القنديله والكلمه بضم الكاف وتسكين اللام وفتح الميم (للمستشرقين) بقينا يا بت عمي ناكل فيه جاو وكعبه الدنيا لما ترميك بعيد ويا ريتنا هناك ولو نغزز في الهواليك
تحياتي لك لنقل هذا الجو الوليف الذي لا يعرفه إلا من عاشه متعة وهوي
|
Post: #69
Title: Re: حــش التمـــــر
Author: سودانوبس
Date: 09-17-2003, 08:36 PM
Parent: #1
النخلة..شجرة البركة..كل شي فيها مفيدأحياناً كانت تكون غذاء الصحابة رضوان الله عليهم في الغزوات لشهور طويلة... وقد كان رسول الله صلي الله عليه وسلم يصوم ويفطر على التمر وحده أو التمر والماء ويسميه الأسودين...
النخلة..
تعطي الثمر المتنوع
ويؤكل بعضه اخضر وبعضه اصفر وبعضه لما يستوي
سبيطة التمر
بعد ما يخرتوا منها التمر تستخدم لكنس المنازل.
العرجون الناشف
يستخدم مكنسة من نوع آخر بعد ما يشق الي جزئيات( والقمر قدرناه منازل حتي عاد كالعرجون القديم) صدق الله العظيم
جريد النخلة الناشف
ستخدم فى عرش سق المنازل وفى الرواكيب يستخدم كما يستخدم الحصير عند ناس الجزيرة والغرب والجنوب
الليف
وهي كلمة عربية يصنع منه حبال الليف
الجريد الصغير فى الشتل
يستخدم منه حبل الجريد بعد ما يعفنونه فى البحر ويدقوه بالمدقاقة. فيصير حبل متين وقوي ويختلف حبل الليف عن حبل الجريد
جمارة النخلة
تضفر وتصنع منها القفاف والبروش الملونة والغير ملونة
عود النخلة ذاته
يستخدم( مرق) اساسي فى عرش المنازل.. ويستخدم طرورة لتعليم الصبيان العوم فى النيل بديلاً للقربة.. والطرورة يمكن تكون من الدوم أو النخيل.. ما عارف ناسنا فى السودان يقول ليك الزول دا طرورة ساكت مع أنو الطرورة عندها فايدة.. يمكن يقصدوا الطرورة المحدورة فى النيل يشيلها التيار زي ما عايز ليس لها تصرف ولا تقوي على شئ هنا يمكن اهلنا مثلهم يكون جايز.. مع أن الطرورة عند المتصوفة لها قيمة روحية كبيرة لأنها مسلمة للإرادة الإلهية لا تعترض على شئ وهي مرحلة فى السلوك والسير مهمة..
بعدين عروق النخلة
تستخدم فى التداوي وتوليع النار بعد تفتيتها.. طبعاً وليع النار فى القري زمان كان مشكلة كبيرة يا جماعة موش طق بتاعة البوتجاز دي وكدة.. الأعواد الكبيرة لا تولع من اول مرة وليع النار فن ما اي زول بيقدر يولع نار والا سوف يظل ينفخ وينفخ الي أن وجه يتملي رماد... وليع النار.. تخت ليك من تحت قشقش.. والله بعرة حمار دون مواخزة والله بعر غنم والله تفتت عروق نخلة وتخت عليهم ليفة وبعد داك تخلف عليهم الأعواد الكبيرة المراد توليعها.. حطب سمر والله حطب طلح والله حطب سنط بعد داك تكرش الكبريتة.. او قد تكون كبريته مافي في جمرة بس تحت الليف من تحت تنفخ فيها لغاية ما تشتعل والنفخ نفسه فن ما اي زول بي يقدر ينفخ لأنو اذ ما وجهت نفخك نحو الجمرة والليفاية وشيك بي يتملي رماد.. حتي حينما تنفخ النفس الطالع من فمك فتحة خشمك لازم تكون بي زاوية معينة عشان يطلع الهواء غير مشتت ويطيل عليك مدة توليع النار
كروق النخلة
حتي كروق النخلة مفيد فى توليع النار.. ويستعملوه الأطفال لعبات مراكب شراعية صغيرة فى النيل ويعملوا للكروقة شراع او ورقة عشر. تبقي زي المركب.. مافي لعبات زي هسه وفملي وكمبيوتر وعربات اطفال بالريموت كنترول.. لعباتنا كلها زي دي والله دنان طلح والله دنان سنط نسويه في قصبة ونخليهو يسوق النهار كلو.. او دنان الطرور الأسود داك بتاع العرش نعصروا بي علبة صلصة على الصفيحة بتاعة الموية بعد ما نكفيها.. فيظل يصدر صوت موسيقي خشن.. ونظل نحن نضحك.... بعدين كروق التمرة او النخلة برضو بقوا يستخدموهو ناس الكوافير فى الخليج لتزريق الحناء وكمان يجيبوهو من السودان زيوا وزي أى طلح او شاف أو حلو مر او آبري.. واحد قال في المطار والله يا السودانيين حيرتونا..خشب شو تريدون من الخشب.. ما أحسن تجيبوا معاكم بعد العودة من الإجازة ديك رومي أو ضكر بط زي ما المصريين بيجيبوا
النوي.. نوي البلح
بعد الأكل يطحن ويخلط مع الفيتريتة ويعطي للماعز والضان.. يدرر اللبن وتصير النعجة أو الغنماية حلوب.. يا جماعة دي مساهمات وبحث عشان يصير بوست الأستاذة ملكة سبأ بوست الاسبوع بحق وحقيقية مرات الواحد يجد نفسه فى أن يضيف او يعلق ليدعم الموجود بدل ما ينزل بوست جديد.. وتضافر الجهود مهم فى اي عمل أن تري الحسنات عند الآخرين والعيب عند نفسك..
صديق منصوري.
|
Post: #70
Title: Re: حــش التمـــــر
Author: سودانوبس
Date: 09-18-2003, 08:23 AM
Parent: #1
النخلة في القرآن
بسم الله الرحمن الرحيم
( هو الذي انزل من السماء ماء فأخرجنا به نبات كل شئ.. فأخرجنا منه خضراً..نخرج منه حباً متراكباًومن النخل من طلعها قنوان دانيةوجنات من أعناب والزيتون والرمان مشتبهاً وغير مشتبه.انظروا الي ثمره إذا أثمر.وينعه، إن في ذلكم لآيات لقوم يؤمنون)
.............
( واضرب لهم مثلاً رجلين جعلنا لأحدهماجنتين من أعناب وحففناهما بنخل وجعلنا بينهما زرعا)
.................................
(فأجاءها المخاض الي جذع النخلة، قالت يا ليتني مت قبل هذا وكنت نسياً منسيا* فناداها من تحتها، ألا تحزني،قد جعل ربك تحتك سريا*وهزي اليك بجذع النخلة تساقط عليك رطباً جنيا*)
..................
( قل آمنتم له قبل أن آذن لكم، إنه لكبيركم الذي علمكم السحر،فلأقطعن ايديكم وارجلكم من خلاف، ولأصلبنكم في جذوع النخل،ولتعلمن أينا أشد عذاباً وأبقى)
.......................
( وزروع ونخل طلعها هضيم)
........................
( والنخل باسقات لها طلع نضيد)
................
( تنزع الناس كأنهم أعجاز نخل منقعر)
.......................
( فيها فاكهة والنخل ذات الأكمام)
.........................
( فيها فاكهة ونخل ورمان)
.....................
(سخرها عليهم سبع ليال وثمانية أيام حسوما، فتري القوم فيها صرعي،كأنهم أعجاز نخل خاوية)
...............
( وزيتونا ونخلا* وحدائق غلبا*)
..................
صدق الله العظيم
صديق منصوري
|
Post: #71
Title: Re: حــش التمـــــر
Author: HAMZA SULIMAN
Date: 09-18-2003, 08:53 AM
Parent: #70
اهل الشمال يعيشون فى خصوصيه شفيفه شكلت دواخلهم
وملامحهم فشكلوا فينا احاسيسهم ....الدليب يرقصنى وتبكينى
شاعريتهم واحس دائما بالعناق والحنيه والدف
والحب
كتابتك احزنتنى لانى ما حصل طلعت فى نخله
وهذه اللحظه تمنيت انى اكون فى راس نخله واناولك
التمر
واعيش معكم حتى ولو لحظه حياه تخصكم
احب شعر حميد جدا
ذى ما تقول بين الجروف
والقش مقهى مع الندا
زرزور يفتش عايز يشوف
ام راس مطرفى ينقدا
0000
تسلمى يا ملكه
|
Post: #75
Title: Re: حــش التمـــــر
Author: ملكة سبأ
Date: 09-20-2003, 06:32 PM
Parent: #71
الموسيقار الشفيف
يعنى نديك درجة قفاز بدون منازع
وانا بتخيلة درجة رفيعة جدا لانى بتخيل شعور القفاز اعلا التمرة بعد سنة تامة قضاهافي مراعاتها وعقد عليها كل اماله فى مسرة ناجحة واسفل منو الجميع فى قمة الترقب
شعور يخليهو فعلا داقى السما
وام راس الناقدا الزرزور دى ياها زاتاالعلمتنا معنى الجمال
تسلم استاذ حمزة ونبادلكم ود بود
|
Post: #72
Title: Re: حــش التمـــــر
Author: ABU QUSAI
Date: 09-18-2003, 02:16 PM
Parent: #70
سلام يا ملكتنا
الأخ صديق منصوري
لك التحية على الجهد
.
(ومن ثمرات النخيل والأعناب تتخذون منه سكرا ورزقا حسنا إن في ذلك لآية لقوم يعقلون ) النحل الآية 67
دي ماله خليته
مع خالص حبي وتقديري
|
Post: #73
Title: Re: حــش التمـــــر
Author: سودانوبس
Date: 09-18-2003, 09:43 PM
Parent: #1
صاح يا ابو قصي.تسلم.ما أصلو بي مجهوداتكم بي تكتمل الرؤية... العين الواحدة لا تري الحقيقة كما هي ولا تعطي نتيجة محتمة من بؤرة الدماغ..لقاع الدماغ.وليس من سبيل لإستجلاء الحقيقة سوي الولوج الي مكان الحقيقة الأزلية وهو القلب وليس الي ذلك من سبيل سوي إستحصاد العقل حتي ينفتح على الحاسة السابعة وهي القلب والعقل المستحصد يتولد من كدح المعاش والمعاد كما تعلم وهذا الذي نحن بصدده
صديق منصوري
|
Post: #74
Title: Re: حــش التمـــــر
Author: ملكة سبأ
Date: 09-20-2003, 06:06 PM
Parent: #1
الاخ صديق منصور
اولا انا اسفة فعلا لهذه الغيبة غير المتمدة عن البوست
ولك الف شكر وماك مشحود
وطبعا الفزعة والنفرة هيلنا من خطة السريقة لاعن نقريش الجريد فى ضو القمرة ولمن نعرش البيت
ولمن يهز الجنا بالعديل تاتى النخلة بحضورها المتميز وعريسنا نزل البحر وقطع جرايد النخل
فعلا النحلة ضونا وضراناوفرحنا
زى ماقلت كان حطب نار ولا لمينة ولا عرش
وكان دفيق هرودى ولا ام راس ولا رطب
وتمر الاكل وتمر البيع وتمر رمضان وتمر الشربوت وتمر الحلو مر
وفعلا صدق رسولنا الكريم حين قال لايجوع بيت فيهو تمر
وفعلا النحلة عز ونعمة نحمد الله عليها كثيرا
وسوف اعود قريبا
وخالص ودى لكل من ادلى بدلوه وما اظن الحديث حينقطع
|
Post: #76
Title: Re: حــش التمـــــر
Author: الكيك
Date: 09-21-2003, 07:31 AM
Parent: #1
الي الاخوة الذين يريدون معرفة اكثر بالاروتى
فى موقع سودان نت يوجد بوست تحت عنوان من الساقية للكمبيوتر مذكرات اروتى فى ارشيف البورد ..لم استطع استخراجه واعادته للنشر من جديد فى سودانيز اون لاين ولكن فى مرة من المرات انزلت جزء منه تحت عنوان ثقافة سودانية خاصة .
ومن هنا اناشد الاخوة فى سودانيز اون لاين وكل الاخوة البورداب البحث معى عن هذا البورد واعادة نشره من جديد لتعم الفائدة ويعرف الجميع ثقافة الاروتية .
البورد فى سودانيز اون لاين تحت اسم ثقافة سودانية خاصة
|
Post: #79
Title: Re: حــش التمـــــر
Author: ملكة سبأ
Date: 09-21-2003, 07:08 PM
Parent: #1
يلا يا اخوانا يدينكم معانا نطلع مذكرات الاروتى
للوقت داك ديل بعض الكلمات التى وردت بالبوست وارجو ان اكون نجحت فى ايضاحها
الدفيق
بكسر الدال طلع النخلة الاخضر قبل النضج وهو لذيذ فعلا اذا ضربته
الشمس خاصة ويسمى حينها بالهردوي
ام راس
هو الرطب الاصفر وعندما يبدأ فى النضج ابتدءا من راس البلحة يسمى ام راس وعند ما يصل النص يسمى ام نص عندما يكتمل النضج يسمى المطوطى
الكاروق
هو الجزء البارز بجزع النخلة ويستخدم للصعود على النخلة ، كما يتم نزعه والاستفادة منهم كحطب وخاصة فى الافران البلديةالتى تكون بالمنازل ، كما يتفاد من دخانه فى تظهير نقوش الحناء
الاشميق
هو الليف الذى يوجد بين الكاروق وجزع النخلة ويستفاد منه فى فتل الحبال
التمر الروكة
هو التمر الورثة قبل تقسيمه اى لم يتم قسمة اشجاره او ارضه فقط يجتمع الجميع ويتقاسمون ثماره
مندلى
اى ذاهب الى منطقة الزراعة ويقال مندلين تحت
كل من يشعر ان هنالك كلمة تحتاج الى توضيح يتفضل او من يريد السؤال عن كلمة بررضو يتفضل
|
Post: #80
Title: Re: حــش التمـــــر
Author: artiga
Date: 09-22-2003, 03:05 AM
Parent: #1
ملكتنا
لك التحيه وانت ترسمين هذه اللوحة الرائعه
التى اخذتنا لاجواء الشمال وتمره واهله الطيبين
لم احس للحظه اننى امام نص بقدر احساسى بأننى امام
لوحه ابدع من رسم تفاصيلها بهذا الشكل الرائع والمبدع
انا غير متخصص .. ولكننى احس بأن لك مستقبلاً فى الكتابه
لى قدام
كل الود
|
Post: #81
Title: Re: حــش التمـــــر
Author: yasiko
Date: 09-24-2003, 07:21 AM
Parent: #80
الملكة والقراء الكرام
كم يوجد مثل هذا الرجل في كل قرية من قرى الشمال؟
انني عايشت الشخصية المعنية بالكتابة
له الرحمة
الى النص ادناه
ويقتلني السودان
يا لهذا الحب الفيّاض وجسدي منهكٌ .. منهكٌ .. منهك (3)ه
حسين عابدين
يرقد على سرير المستشفى .. تدمع عيناه .. تغرق وسادته في الذكرى .. بين غيبوبة البنج وبين صحو الرغبة في الخروج والعودة للدم أو عودة الدم إليه يرفع رأسه قليلاً لينظر صوب أقدامه .. إذن فقد بترت ساقه .. وتسيل أيام وليالي الماضي على خده وهو يدير وجهه صوب النافذة .. هل (السكّري) بكل هذا الحقد .. يحسد الأرجل على تاريخ أحلامها وآمالها وهذيان تطلعها ومشاويرها الجميلة فيأبى إلا أن يأخذها بعيداً .. أم أننا نسرف في الحياة حتى يتخطفنا الموت عضواً فعضوا .. إنها (أسئلةٌ ليست للإجابة) .. فقط للدمع النازف .. على يمينه يجلس ابنه صامتاً وعلى يساره جدارٌ كامل البياض .. وخارج الغرفة تتكوم النساء .. ينزفن ليالي سطوته قبل أن تسلمه مباضع الجرّاحين لعكازتين وانحناءة ..على الطاولة فاتورة قطع الرجل وفاتورة ذاكرةٍ راحلة وفاتورة عزاءٍ لن ينقطع ولن يفيد وفاتورة عنتٍ قادم لن تستطيع معه الرجل الاصطناعية أن (تنكع) في دارات المديح تبيع أشواقها لله بإغماضٍ طويل وتهويمةٍ في ملكوت الذات الإلهية تنتحب على وقع الطار في القلوب الرهيفة (من رقاد الميل واي أنا وخاشي دمس الليل واي أنا) والدموع تغسل القلوب شوقئذٍ .. ولن تساسق نحو صالون العمدة عند الظهيرة (تدق الحنك)قليلاً وتبقىَ للشاي في رقبتو .. تطالع أخبار القرية بمنظورٍ سيادي لا زال يمشي في ركاب السورجاب .. لكنه ما عاد يضير القرية .. ولن تهدد كما كان صاحبها يفعل ( والله أصلك في محلك دة إلا.. ).. لن تصل أبداً .. لن تبارك ابنته ليلة زفافها وهي تقدم على حياتها من (الصبحية) بعرضة في دارتها الواسعة .. يدسّ في يدها (حفنة قروش) تظل تحيط غرفة صحوها بطعم ابتسامة الأب لا تدسها تحت (مخدة ) ابنتها وهي تنزف مختونة .. لأن زماناً يحمل الجراح والدم قد مضى .. وأصبح الأطفال ينعمون بطفولتهم خالية من عنت الحكومات والأمراض الستة وأكاذيب الكبار وفتاوى مجالس الدينار ودم الختان .. يا لزمانٍ حلم .. يا لحلمٍ طال انتظاره ..لن يسير على رجليه نحو (ميدان الحوشاب) يشجع بعصاه وقلبه وعمامته الصغيرة .. يبكي النصر حتى قريب الشهادة ويغني له جمهور (الكزارير) حين ينتصرون عليه (ياحسين عابدين وين فريقك وين؟) وهو يغرق الدرب بالدمع راجعاً وعلى رجليه .. إنها فاتورة الحب التي تنهك كاهل الحياة .. يرقد .. تلوح أمامه صور جزيرة (أم سيوف) ومواسم القمح تبدأ مع بدايات البرد وملامح أمشير وطوبة .. يأتيه الفطور في صحنٍ قديم أقرب للأثري تحيط به من كل جانب قطعة ثوبٍ قديم .. لا تترك النساء شيئاً دون توظيف .. كل الأشياء في بلادي (تقول الروب).. أعلاه صينية صغيرة باهتة بها كباية الشاي (القرض) وبعض بصلات وربما ليمونة ..ربما.. الصحن يحتمل أي شئ بداخله ولكنه لا يتوقع اللحم أبداً .. والترمسة الصغيرة تقبع بداخل علبة الخميرة الطويلة ذات اليد المصنوعة من سلك التلفون .. أعمدة التلفونات وأسلاكها قدمت سقوفاً ممتازة لأهل البلد وحبال غسيل غاية في المتانة بعد أن فشلت في ربط القرية بالعالم الخارجي قبل أن يصبح العالم قرية صغيرة .. أصغر من قريتهم بكثير .. ليتهم يستطيعون توظيف الألياف الضوئية .. فقط أحبطت مشاريع جواباتهم الحميمة (نعرفكم أن خطابكم وصل وعلمنا بما فيه) وأفرغت رفاً كاملا في دكان جبر الله كان يخصصه لخطابات الأبناء في زمانٍ كان جابر سوّاق الباص السفري الوحيد رسولاً يتمتع بكامل الكرامة بين أهله .. ولكنها ستقودهم حتماً لطريقٍ جديدة تطل بهم على آفاق العالم (الكاسح) .. يصيح من مكانه على أبنائه هنا وهناك .. يسمعون رائحة الفطور فيجيئون .. رائحة الفطور الصاخبة تسمع بوضوح عندهم .. تنصّت أحدهم في إحدى ليالي العزومات وسأل - يقطّب جبينه ويرفع حاجبيه - انتو حس السليقة دا وين؟ وتابع الصوت إلى أن ملأ بطنه وعاد .. وهل أصخب من (قلية البصلة) على نغز الجوع .. يجلس على قدميه وعلى أرضه فائقة الخضرة يهوّم في ورود اللوبيا التي تتورد خجلاً وهي تقاطع قناديل عيش الريف لعلاقةٍ قديمة تحكيها الأساطير عن حبه لها حتى ليقاسمها الصحن الواحد في رمضان (البليلة أم حباً نضيف .. حبة لوبي وحبة عيش ريف) .. الزهور من كل لون تحيط به .. يقولون أن أزهار (السيكران) سامّة لكنها رائعة اللون والنقش..و زهر الجناين طرح والعطر مش واحد مع ان أصل الشجر طالع في غيط واحد والحَبِّ لما انبدر مسقي بماء واحد عجبي على فرعين كان أصلهم واحد واحد غرز في الطين واللي سرح واحد والورد لما انقطف يا ربِّ يا واحد ريّحت بيه ألوفات واللي تعِب واحد كان يعيش إحساس الشاعر المصري الجميل أحمد فؤاد نجم .. وشراع مركب أحمد إبراهيم المتهالك يلوح من أقصى الجزيرة .. يقف في مؤخرتها يمسك (المِدري) ويطلق نظراته في كل اتجاه .. لا يسمع دندناته ولكنه يحسّها.. ويطالع بعينيه الأفق يرقد على حواف النيل متداخلاً مع أشجار السنط تملأ الأرض بالبرم الأصفر .. بساط أنيق من الرمل الأبيض يحيط بالضفة .. حسين عابدين يصيح في أبنائه لتسوية الحيضان .. يرقد على صفحة الحوض مغمضاً عين وفاتح صدره لدفء التربة يطالع ارتفاعات المكان .. كانت قد غنّت بتول (حمامة) من قبل ( تعجبني السياقة الناسا فرّاس .. وأبوكن يا عمر ختّالن الساس ) لعثمان عابدين شقيق الحسين .. على جانبي شاربه الكث بقايا من لبنٍ مر وشوية ضحكات يدخرها ليوم (الطلب) حين تطالبهم الحكومة بضرائب الزروع .. يفترش شوالة الخيش الرثة ويحلم .. تكلّفه هذه الأرض أحمالا كثيرة .. تكلّفه حباً فوق طاقة طيبته الخالصة .. تكلّفه والسلام .. أتوب إزاي وأنا أيوب .. رماني الوعد والمكتوب .. سنين ماشي ورا الأفكار .. على كفوف القدم دوّار .. لا خلّيت في الدروب مشوار .. ولا فوق الورق مكتوب .. يختلط دمعه بالنسيم وهو يدندن ( الغرام في الدم سارح والهوى طارح معزة .. والحنين للقرب بارح والنوى جارح يا عزة ) كان النعام أدم حينها يخلق منهم عوالم أخرى تنادمهم بجديد المعاني (الغرام ياناس الغرام جنني أنا يا سلام ) ويحكي عن زمان (اللُعُوب) (كان اللعب يقيف أربعين ليلة .. تكسي أهلك كلهم ونسايبك بالتوب والتوبين .. والضبايح ما تتقطع كلو كلو .. عشرة جنيه بس ) يتحدى نظرة التكذيب بابتسامةٍ صغيرة ويمضي .. قصص الجبل لا تنتهي .. يحكي عن حسن قدقود وهو يجلس عند القهوة يضع يديه على عينيه كي يتبّين المارين ويضحك ضحكته الصاهلة .. وعبد الرحيم ود موسى على كرسيّه يحلّق في الفراغ فقط ويبتسم .. يتذكر طاحونة التعاون واجتماعات البابور ومشاكل الجزلين .. يحكي عن ود بكري والطنبور يحلق بين يديه تجاه النجوم .. كانت كل عصافير طنبوره أجنحتها النجوم ولكنه ما كان عبد العال السيّد ليرى ذلك .. يغني أجمل الغناء .. أسيا بابورك في الأراك .. بدأت بشيخنا بابورك في الأراك وتدحرجت من جبال المديح الباكية إلى سهول الغناء الوارفة - هذا في رواية ولكني أعتقد أن المديح هو من سعى إليها ولعلها دعوى قديمة يتجدد مديح هذه الأيام بها فيحوّل الألحان الغنائية لمدائح - بعد ذلك بكثير جني عليها ود الزومة بإضافاتٍ غثة .. وبتول تغني (الكريم طاريك والسعد المن الله يجيك يا حنّانة .. السعد اليجيك عجلان وأبوكي يضبّح التيران يا حنّانة) يحكي حتى عن زمانات سيف .. يا حليل سيف .. كان يبكيهم بنقريش الرواويس .. كان طنبوره يخترق وقارهم ويفضح رهافتهم ويختزل سنين عمرهم للحظة بوحٍ شفيفة .. ومضى يترك في صدورهم أشياء من حنٍ ودمع وفي صدره كثيرٌ من حبٍّ وغناء. يجلس الحسين على أرضه .. وعلى أحلامه بحصادٍ وفير رغم أن الأخيرة قد جلست عليها سياسات الحكومة وأرهقتهم حد الموت .. لم يسمعوا بفائض القيمة ولكنهم عاشوا عدله .. أما الآن فالمحصول كله يذهب آخذاً معه ما تبقى من رائحة الحياة (تلت للزبير وتلت للطير والمزارع فاعل خير ) متوسِّد كوعك وطني .. فرشولك برش مناماتْ تأكل من جوعك دَغَني .. درشولك ارادب كلماتْ النيل فوق حجرك وتسقيك الترع .. البير .. وغماماتْ ينجيكَ .. يشفيكْ .. ويعافيكْ .. شعبك يا وطني من الجاتْ وانا ضهري مجرحة اياديك ... والدّفّة في كف الشمات لكن لا بدّ أعدّيك .. ها البحر اللاوي ضلاماتْ أنتو دا منو؟ آهٍ عليك يا حسين عابدين وتحتاج عيناك لنظارة ؟.. كنت يا سيدي أزرق اليمامة .. ترى من يقف أمام بابك وأنت بعد في المركب .. وتصيح .. اتفضل .. وكان يسمعها .. ليتك كنت تصيح أيامها (يا سارية .. الجبل) .. وأنت تنام في حضنه .. كان سيسمعها الجبل صيحتئذ وينفلق جداول وعيون تذهب عطش نخل (الضيقة) الأصفر .. ليتك صحت .. ما كانت تملأ الشرطة الشعبية زقاقات (الجبل) و(ساقة توم) إذن .. وما كان الموت يغرق البيوت بالخوف .. ما كان الطلب يرهق القلوب والجيوب ويقود النخل لحماقات العدم يفصّل ظله على جسده وينام عن الثمر وهو الذي ما كان يفكّر إلا في (السبايط الغُلاد) .. وعند الطريق العامة تتداخل الأشياء .. حمير العرب محملة بالقش وأسمال الملابس وبقايا الرجال والنساء على ظهورها يعيشون (الحمبي) في أمانة الله.. الصبية يجلسون على جوالات القمح والمريق يذهبون نحو طاحونة (ود التيجاني) يعودون في المساء (مكتحين) تبدو عليهم وعثاء السفر .. طحنوا وسرقوا كل جناين المنقة والبرتقال (المر) في طريقهم .. و(خرتوا) التمر وتركوا حميرهم تختار أطول أحواض البرسيم وتنام عليه بعد أن تشبع لأسبوعٍ قادم .. يفتحون الطريق أمام غضب الرجال المشفوع بالمزاككة الملّحة وعض الإبهام والكثير من النقنقة الحادة.. وابتداع النساء لأصناف الدعاء القاتل ( إنشاء الله يخرت مصارينكم .. يا ربي يا الله ) يُلحقْنَ ذلك بتراجعٍ حنين ( قايلة مستغفرة). بكى أشد البكاء حينما هدم الفيضان خلوته التي يؤذن فيها ويكوّع على بروشها في انتظار العِشاء والعَشاء .. عرّاقيه الدمورية (الشربان) حتى الثمالة يقتسم معه راحة أنسام المغارب قبالة (درب العربات) ويعرف معه العربات من أصواتها والبوري (أب تلاتة) .. قاطعهم التساب .. أغرق الدروب في أسف المشاوير الجميلة الراحلة .. باتت كل البيوت تفتح على الماء وفيه .. (تنضم مع الفي آخر الفريق .. تحكيلو قصة تقصها .. ان نفسو فيها تحسها وان ماها فيها تحسها .. نفس الأحاسيس نفسها ما الحالة اصلها من بعض إلا المساخيت الدقون ختّوها بين أهلك قرض) وكانت جلساتهم على صدر الماء القاتل برلمانات تعيد رسم القرية في أذهان الحاضر والمستقبل وتبكي تحت الهدم بيوتاً كانت تفتح أبوابها ليل مساء في وجه الزمان تطلق للمكان سراحه (للغاشي والماشي) بكى الحسين خلوته وبكته خلوته كثيراً .. بكى البيوت التي شكّلت عمره ولوّنت وجدانه .. بكاها .. ما كانت مجرد طين أبدعه (الجاسر) ومضى .. كان الجاسر هذا اعظم أسطى جالوص في زمانه .. ولكنها كانت العمر يعجن مع الطين ويصوغها .. كانت (السرّيقة) تحمل الذاكرة والحاضر وتطلعات المستقبل .. وكان السقف يستند على (الأمينة) ليتفرغ للصعود بالأحلام عالياً عاليا .. وهاهي اليوم تأخذهم غصباً لموتٍ حي وحياةٍ ميتة .. والماء الذي انتظروه كثيراً ليبل حلق الشتول الصغيرة التي أودعوها حضن مزارعهم جاء ليسقيها الموت ويرحل .. الماء الذي تمنَّوه في مواسيرهم درأً لمشاوير البنات يحملن الماء على رؤوسهن عبر طوال المسافات ..جاء على رؤوسهم يهدم ويغمر ويسبي .. ولكنهم يعاملون الحياة بالتي هي أحسن دائماً .. يحسنون الظن بها ويمضون .. يبنون البيوت في مكانها ويفتحون أبوابها من جديد ويشتلون الأرض بيافع النخل يرددون (فيها خير) .. صابرين على حكم الزمن بالبعد عن صابرين .. بايتين على حلم اللقا وع الفراق صاحيين .. رافضين سوَا ليل النوى .. إحنا كما العصافير طايرين على وعد الأمل بالقرب من صابرين .. لا يندمون على صياحهم في وجه النيل (يا الله لا فوق) ولا يعدّون أنفسهم أسرفوا في الدعاء .. إنها قبائل أنبياء .. تعدل في ذاتها وترسم ابتسامتها على شفاهٍ عرفت حل اللغز. هردت لهاتي بالغنوات ... وقُتْ يبرد حشاك يا امي ومن التعب البلا صالح .. تفيقي .. تروقي ... تنجمِّي تسوي مكانسك المطرة .. تضوي البيت وتنحمي تمرقي صبوحة للجيران ... قدح فوق ايد وفي ايد أَلمْي يلاقوك شُفّع الكُتّاب نُضاف وظُراف بلا النّسْمي ويغنولِك ... غناوي السّابْ وفي بيّوضة مافي سراب جبال كَجَبي وفيافي الكاب ... تميد بالخضرة منقسمي يرقد .. منذ زمانٍ مضى ما كان يحب الخرطوم .. يأتيها ضيفاً خفيفاً .. يحنّ لبلده وغناءها .. لا يحب غناء الحكومة .. هكذا يسمي غناء أهل العاصمة ..كانت الخرطوم تأخذه عن أحبابه وعن أرضه وعن ذكرياته .. كانت ترهقه بالحنين .. الآن تأخذ رجله وتبدلها له بعكازتين وشاش وأكوام من الحسرة .. الحسين الذي كان يلبس جلبابه على ظهر حمارته العاتية وهو يلحق ببيت البكاء قبل خروج النعش أصبح يبكي على لحافه وينتحب سنين الفقد وهو عاجزٌ عن الوصول للباب الذي ما كان يسوّر أحلامه يوماً .. الحسين الذي ما تأخر عن مناسبة ، يطالع المناسبات كلها تتأخر عنه .. الناس يعزّونه عزاءً قاتلاً .. (خلاص بنجي عليك في البيت) كان يطير للناس على جناحي شهامته الآن ينتظر مجيئهم تحرسه العبرة. أو لست مؤمناً يا حسين عابدين ؟ هذا قدر الله .. يلبس جلبابه على مهل هذه المرّة .. يلف عمامته برويّةٍ كاملة .. يتعطر من زجاجته المخبوءة تحت ملابسه في حقيبته العتيقة .. المحروسة عن عيون أبنائه بصياحه.. يلبس نظارته العريضة .. يتوكأ على عكازتيه .. يسير نحو الضريح .. الرمل غير الرمل .. والطين غير الطين .. والنخل غير النخل .. والروح غير الروح .. الضريح ساكنٌ تمور بداخله عوالم وعوالم .. يبكي الحسين .. الدمع غير الدمع .. يا لهذا الدمع يغيّر الرجال هنا .. يخرج الحسين جديداً كامل الجدّة .. أنيقاً تغبطه عمامته وشاله الفاره .. لا تبدو العثرة في مشيته .. ليتك جئت هنا قبل الآن يا حسين .. يفرد صدره نحو القرية الحزينة فيملؤها بفرحٍ بكر ويسرح يا دغري عديل بيصارع الويل حيّاً ما زالْ بالصبر يشيل في الما بنشالْ ما انيقّن وقال يا دنيا محال ينصلح الحالْ بل عبّا وشال جواهو الفالْ .. نازل وديان طالعبو جبالْ أشواك ورمال غابات ووعر .. بين ريح ومطر .. عِرْق الشّلالْ ومطّامِن بال .. ما لاوز قال .. يا ربي أصد من دربي الطّالْ ما طال .. لا بد يشرق بكراهو الما بنطالْ يشرق بالخير .. بالحب .. بالود .. يشرق لا بدّ يضوي الحَلاّلْ. ومضى حسين عابدين .. القرية تسير في ركابه .. الجزيرة تقرأ كتاب أيامه صفحةً صفحة .. والطريق تباهي بأقدامه .. والعمر .. يا للعمر .. يتقن رسم الذاكرة ولكنه الآن يرسم المستقبل .. ومضى حسين عابدين.. مضى .
أسامة معاوية الطيب
@@@@
وصلني بالايميل وهو نقلا عن سوانايل
|
Post: #82
Title: Re: حــش التمـــــر
Author: Kabar
Date: 09-28-2003, 09:49 PM
Parent: #1
صـديقتي بلقيس..حبابك
كتر خيرك على هذا السرد الحميم والذي اكد لى قناعتي بان الجماعية اعمق ابداعا..وكنت اكتشف ذلك كلما تمعنت في سردك الشيق..واعجبتني ثقافة النفير العريقة والتي يتفاعل معها الكل وينجزها بعمق ومسئولية..
طبعا استفدت استفادة من طقوسية حش التمر ومواسمه الحنينة..لكن عندي سؤال لكافة اهلنا مزارعية التمر واقول ليهم العنصرية لزومها شنو؟.. وحتى لا يشطح احدهم ويعبي معاي شكلة اشرح ما قصدت..كان لدينا جيران في معهد التربية بالدلنج وهم من كريمة..وكان كل ما ترسلني امي لشراء البلح من الدكان..تقوم خالتي خادم اللـه وتوقفني..تسالني وتديني بلح من بيتها..ولازالت امي تسال..انتو يا خادم اللـه تمركم ده بتشتروهو من وين؟..والغريبة خالتي خادم اللـه دايما مصهينة من الاجابة..لاحقا ايام الجامعة عرفت من صديقي التربال مصطفى ابشر ان التمر في ذات نفسه انواع وان تمر ناس خالتي خادم الله هو تمر البيت الذي لا يستخدم في عملية البيع والشراء..والذي يعرض في السوق هو تمر درجة تالتة..
المهم ياريت تورينا ..بس ما تجيبي لي سيرة التخزين
نتمنى ان نسمع الكثير..لان النخل رمز وثقافة وتفاصيل انسانية غاية في الجمال
ودمتم
كبر
|
Post: #83
Title: Re: حــش التمـــــر
Author: yasiko
Date: 10-02-2003, 05:18 AM
Parent: #82
علم طلب
السيدة الملكة
بما انك حصدتي البلح واختفيتي في ظروف غامضة من البلد ولم تدفعي الطلب والزكاة المقدرة قبل الحصاد ولم تسددي رسوم الضرعة البلدية واتعاب صمد الساقي ، فانك مطالبة بالمثول امام المحكمة المدنية بكجبي في يوم
2/10/2003
في تمام التاسعة صباحاً
وفي حال غيابك سيتم حجز جميع املاكك وبيعها بالمزاد العلني
الرائد
زكواتي ود الضرائب
قاضي السلب والنهب
محكمة كجبي
|
Post: #84
Title: Re: حــش التمـــــر
Author: ملكة سبأ
Date: 10-02-2003, 01:03 PM
Parent: #83
تمام سعادتك
وانشاء الله تكونوا لسة ما اتصرفتوا فى املاكى
فى الاول انتو ضابحين ولا شنو؟؟ سامعة لى حس سليقة
اها المزاد دا انشاء الله مايكون فى الدتي
لكن تصدق حضرة القاضي المحكمة دى حتطلع خسرانة 100 % وهو الهدام خلالنا نحن شى ؟؟
وياريت ياياسيكو اخوى لو فى زول بقدر يزوغ من الطلب دا اما الزكاة كان خلونا مع ربنا مانامقصرين تب مع ملاحظة انو فى ناس بشيلوها منهم وهم زاتهم مستحقنها
وحليل صمد الساقى وخفير جدول الباجور
الايامات دى مشغولين بعودة التمارة البيت يملأ ويفضي
كدى ادينى اضانك جاى ... انت ناس كجبى والدنى والطريف ومروي شرق لمن تمرق لاعن شبا كان حفضو قروش طظاكرم وقعدو فى محلاتهم مش احسن لهم واحسن لنا وتمر اكلم بجيهم فى محلاتهم كان مالحقهم الهدام فيهو كمان
وياحليلك يالرصيف وسلام عليك ياحميد
وبجى بس النسفر الفوج دا
|
Post: #85
Title: Re: حــش التمـــــر
Author: ابن النخيل
Date: 10-03-2003, 06:56 AM
Parent: #84
الملكة وانت تأتى بصحبة طارق العوض و ياسيكو
فى موسم الحصاد
والله داير أعرف كيلة البركاوى السنة دى بى كم؟
ويظل حش التمر حقيقة فى القلب توجعه وتضنيه وذلك ان مانلقاه لا نبغيه وما نبغيه لا نلقاه
الله الشاهد كم مرة تاوقت هنا وغالبتنى الدموع
وآثرت الهرب ما ضاقت بنا الارض ولكن ضقنا بها
والنتيجة تقاسمتنا المنافى والظنون
لنا الله
تحياتى
هذا الياسيكو..غاية المنى.... لو لقيت طريقة سلمتلو فوق راسو...يعرف كيف
يقلب المواجع
العمير لو فيهو باقى بعود
ابن النخيل
|
Post: #86
Title: Re: حــش التمـــــر
Author: ABU QUSAI
Date: 10-04-2003, 10:39 AM
Parent: #85
أولا تحياتي للملكة
الأخ ياسيكو
والله ضحكت لي ضحك لامن دموعي مشن وهسع أكتب واضحك . يا اخي هي متين لمتن التميرات لامن طوالي مرسلها علم طلب . وبعدين ليه اخترت كجبي داير تلحقها أمات طه واللا شنو . الله يجازي محنك .
|
Post: #87
Title: Re: حــش التمـــــر
Author: yasiko
Date: 10-04-2003, 05:40 PM
Parent: #86
| Quote: كدى ادينى اضانك جاى ... انت ناس كجبى والدنى والطريف ومروي شرق لمن تمرق عند شباكان حفضو قروش طظاكرم وقدو عند فى محلاتهم مش احسن لهم واحسن لنا وتمر اكلم بجيهم فى محلاتهم كان مالحقهم الهدام فيهو كمان |
الملكي يا الملكي
سلام
كلامك دا ان بقى شافو بكري ابو بكر بيلحقك الدخان المرق بالطاقة
لكن بين بينك كدي دا السبب الخلاهو يمرق ذاتو من البلد
ومالك نسيتي الكرفاب(الكرفات)يبدو خايفي من على عثمان محمدطه
لكن دي فرصتك اليومين ديل الراجل مشغول بهموم أكبر
سجم ام الهموم!!!!!ه
دكتور محمد بادى مرة في واحدة من تجلياته قال
سأل سائل قائلا :أخلقت أضيق من الكرفاب هذا يا ربي؟
قال بادى
فتجلى ملك في السماء وقال له:ه
تأدب يا عبدي وانظر الى كجـــبي
وحقيقة كل المناطق الآن اصبحت كجبي
فالكل اصبح يسافر لحصاد البلح ويأتي بخف حنين
ابوقصي
سلام
كجبي الدرب فيها واحد مافي طريقة زوقة
ووالملكي ما اظن بتعرف تعوم وما بتلقى ليها ضامن هناك
واعني بكجبي تحديدا منطقةالتقاء الجبل بالنيل
ذاك المكان الذي يبدو انه كان حصن
او برج مراقبة في عهد الممالك القديمة
لك الود
الى اللقاء
|
Post: #88
Title: Re: حــش التمـــــر
Author: ABU QUSAI
Date: 10-04-2003, 06:43 PM
Parent: #87
سلام لملكتنا وللأخ ياسيكو
ياسيكو خل القتاتة ، الدرب صح في كجبي واحد ومافي طريقة غير البحر لكن قالوا في المقالة طه مرق واتأخر وأمه وخالته مرقن يكوسن في كجبي وحون الجبال بي غادي على اساس انه طش وماقدر يرجع والمريقة الياها ، قالوا اخدنا العطش وعشان كدي بقى يضربوا بيهن المثل ويقول فلان لحق أمات طه في كجبي .
صح الونسة بعد الناس يحشوا تمرن ويلموه في بيوتن قاعدي تحلى . وبمناسبة الكرفاب أخونا عبد الرحيم عبد الحليم أول ما تقابلنا في سنة 1986م في منزل الأخ الشاعر السر عثمان في جدة بالسعودية قال السر الجنا أنا مشبه قالوا علي منو قالوا على بطان الكرفاب والجماعة سيروا علي الاسم جنا الكرفاب وشايفك اعتذر في البوست عن ود الدابي ولا داعي للاعتذار القرير والكرفاب كله طينا ونخيلنا وزي ماقلت عشان ما يضيع موضوع البوست نتقابل في المسنجر والأغنية أبت تفتح معاي .
لكم الود
|
Post: #89
Title: Re: حــش التمـــــر
Author: ملكة سبأ
Date: 10-04-2003, 07:13 PM
Parent: #87
اها امانى ما اتمقلبت ياياسيكو الملكى عوامة بت عوامين ... الله يجازى خفير الجدول كان ماالمزاككة كان زاحمنا بت جاد الله
والله على كان جاب السلام بالصح ماقصر لكن نحن الداير يصالحنا مع البخر دا منو وود بادى يكون ماسمع الملك كويس اكيد قالو ومروى شرق وعلى قولتك اغلب المناطق اصبحت كجبي كان بفعل الهدام الذى قضى على كثير من الاراضي والنخيل والغريبة على الرصيف نفسه فهل فشلت الحومة وابنا المنطقة فى التفاكر فى كيفية رصيف يعمل كدرع حامي لمعايش واستقرار الاهالى ؟؟؟ رصيف يضاهى الذى بني بالسخرة بمروى على الضفة الغربيةوالذى جات منه المقولة - مروي الرصيفا حجر - انا فى تقديرى ان هذا الرصيف اهم من الطريق الذي يربط بالعاصمة لانه فى هذه الحالة سيكون طريق للهجرة ليس إلا
موضوع طويييييل مش ؟؟
انت تعال هنى مالو على ود ابوبكر يمرقنى بالطاقة ؟؟؟
|
Post: #90
Title: Re: حــش التمـــــر
Author: ملكة سبأ
Date: 10-04-2003, 07:36 PM
Parent: #82
صديقى كبر يالف مرحب بيك
تعرف تمر البيت دا فى الاول بتمرق منو هدايا الحبان وطرود العشمان
التمر البركاوي هو تمر السوق المعروف
هنالك انواع فعلا تحجز للاستعمال الخاص وكما وضحت فى مكان اخر، هنالك نوع مخصص لرمضان واخر يحفظ لفصل الشتاوغيره
جرجاو
كلمة خاصة كخصوصية الذى بداخله
والجر هو الزير والجاو نوع من التمر ا
|
Post: #91
Title: Re: حــش التمـــــر
Author: yasiko
Date: 10-04-2003, 09:00 PM
Parent: #90
الاخوة الكرام والملكة
سلام يؤلمني ذاك القحط الذي الم بكل السواقي وتؤلمني افعال الهدام المستمرة ولكن لازالت الآمال ترقص فوق الجروف
زي بريق (مصغر برق) ياخدلو لوحة(من لاح)ه
الملكة كلامك استجلب لذاكرتي درر عاشق الارض حميد عن تلك الطيبة
وهذا جزء منها تغنى به المهندس عبد العظيم منصور
اهواك على قـَدر الوفا البينانتا والشوق والحنين
على قدر احلامنا البسيطة الشارفة لي فجراً مبين
يملا البيوت والطين فرح
يمسى الوجود خاطرو انشرح
والدنيا ..... والدنيا عـَدماني الحزين
والقاك بعد هادي الجفاف
وهادي الدرادر والكفاف
يا غيمة تِـخـْضـَر السنين
والنيل يصافح للضفاف
الشيلة والسيرة الدَمِـيري
والموج زغاريد الزفاف
يرجع صداها عشق سَـنِـين
والشوق رُخـُص شال الجَـنا
بسم الهوى الدُغـري الامين تبدأ العصافير الغـُـنا
يهـتـَزَّ فجـْر الأزمنة
على راحة المطر الطـَراوة والامنيات الممكنة
تِـنْجـَمَّ كل الأمكنة
لا آهـــــــــــة لا دمعـاً يَـسَيـِّل
لا تباريح لا ضـَـنا
لا ليلاً يَـلـَـيِّـل بالجراح
لا صباح يَـقـَيـِّل بالعَـنا
انتِ وأنا
عُمق الرحيق البرتكانة يـ قـلبنا
زي حبنا الفـزع الصديق لاح للبعيد والجَـنـْبـَـنا
انتِ وأنا
ايداً فِـرحنا مَحَـنـَّـنة
صَاحْبَة مُروَّة إن حـلَّ ضِـيق لا قـدَّر الله أو دَ نـَا
انتِ وأنا
في لـُجَّة الزمن الغريب
أكتر من امواج الفـَـنـَا
وأكبر من الريح البعـيد درب الاماني بـ يَدْفِـنا
الحب طريقو مشينا بيه
واضح وضوح سر الجمال عند اتكال رُوْحُن عليه
يا طيبة يا طيبة
ياريت الزمن يَقـْدَر يسوق قـلب البشر من جَمْ اليك
ما كان يصادفنا الغـُبُن
لى قـلوب مَكـَـندَكـَة بالحزن
مهما الغدر طوَّل ايديه لي طير على حافة غـُصُن
ينده مصابيح المُدن لو تصحى بيه
يا صَاحْيَة زي قـومة بحر
اهواك على مرى الصباح سمع العـصافير والشجر
الموية والهوى والتراب والنار وبتبعك أثر
يا صاحية .......... يا صاحية
أجمع تـَقاطِـيعـك سحاب واطرح تراجـِيعك نسيم
ريحة دُعاش وَقــَّاك مطر
صاد الدِغـيش طينة هواك مساني مُخْدَرْ المَـتـَرْ
نـَوَّر مواسمنا النضار
عـَبَّـدْ حروف عشقـك وَتـَر
فارق مواعيني البَـوَار
القيفه هَـدَّاما انـدَحَرْ
واندَاح صَلاح من طول وقوف
وارتاحْ فـَـتـَحْ نـَفْس الجروف شَهَّل رواويس البحر
طنبورُن الطيب نـَقـَر
غـَرِّب نـَغـَرِّب ما في خوف
شَرِّق نـَشَرِّق دون خطر
ما بينا تبتسم الظروف
وانسى المسافة
درادرا
ودوخة السفر
يا طيبة يوم القاك وانوم
نومةً تعافي بعد سهر
ابوقصي
لم ادر اي الاغاني لم تفتح
فكلاهما ، في الصحة الاولى والثانية ، بخير
|
Post: #92
Title: Re: حــش التمـــــر
Author: جدو
Date: 10-04-2003, 09:51 PM
Parent: #91
سلام بقامة نخيلنا وطيبة جروفنا
ايتها الملكة
اين كان هذا البوست الواحة؟؟؟
وكيف لم اره؟؟
وكيف طوعت الحروف لتقتنصي هذه الصورة الرائعة
بكل هذا الوضوح والشفافية
لي سبيطة القمريي ما خليتها
ياسيكو العزيز
انت من زمن المزارع عنده تلت
التوزيع في زمننا بقي كدي
تلت للطير وتلت للزبير وتلت للاسبير والمزارع فاعل خير
|
Post: #93
Title: Re: حــش التمـــــر
Author: ابن النخيل
Date: 10-05-2003, 06:40 AM
Parent: #92
ملكة سبأ لك الود مرات ومرات
التحية لك وانت تنقلينا الى البلد واهل البلد وطيبة القرية
وقد مضى بنا الظمأ ونحن نتابع المياه السرابية و الخطى منا تتوغل
فى صحراء الهلاك...هذا واقع يستعصى على الحلم
ها انت تأتين لتعقى ادراكى بحقيقة الحياة وها انت تجعلين للاشياء
دلالتها...فالنخلة التى تعطى بل هى تعيش مواسم دائمة العطاء
فهى قيمة العطاء بلا من والحكمة التى تولد من رحم الصخر
يا اهلى لقد رهنا حياتنا للمنافى فلا ترهنو الارض كما فعل ودحمداحمد
الملكة الم اقل لك لقد قلبتم المواجع
فياسيكو اتحفنى ببت الخير
فزاد حزنى تخيلى حين يكون الحزن بيتا وتثقل رغبات النفس الخطى؟؟؟
أأمل بعد هذا الفراش ان اشحذ الذاكرة الخربة و انفذ الى لب الموضوع
لكم مودتى
ابن النخيل
|
Post: #94
Title: Re: حــش التمـــــر
Author: ABU QUSAI
Date: 10-05-2003, 08:23 AM
Parent: #93
شرفوله سي العرجون
خام الندى ولاحوله ني العرجون
بيت شعر كان يردد مع إقاع الطمبور في رقيص الجابودي أو الرترتو . ما عارف الزمن دا في رقيص جابودي واللا انتهى .
الأخ ياسيكو
الأغنية التي قصدها الأغنية التي أرسلتها لي في المسنجر .
مع تحياتي للرائعة ملكة سبأ .
|
Post: #95
Title: Re: حــش التمـــــر
Author: الكيك
Date: 10-05-2003, 10:40 AM
Parent: #1
الاخوة ولاد البلد ازيكم
فى صغرى كنت اطلع اجعص تمرة مهما كان طولها ..طمعا فى الكشيك والكشيك هو التمر الذى يعلق ما بين اللبييق او نتوء النخل للناس الغير المابيعرفوا لهجتنا المحلية المسربلة بلغة الدناقلة الجميلة ...
اها وكنت الم من الكشيق وتمر الهبوب حوالى ثلاث جوالات علي الاقل وفى زمن هذا كان جوال البلح الكشيق ثلالثة جنيه وتمر الهبوب بي جنيه وكان عندنا تاجر جشع يهز قيراط التمر هز شديد لمن تدمع من الحرقة وفى الاخر يقولك قيراطك ناقص امشى تمه وتعال ..تمشى فى الهجير داك تطلع التكر الطوال يلاقيك الدابي والحدى فيه تتم القيراط التاجر يقولك وين تودى القروش انا عندى ليك نعجة تعال بديك ليها بى ثلاثة جنيه جيب شوال الكشيك انا بديك ليها يكون ثمن النعجة الحقيقي اتنين جنيه وهكذا كان يستغلنا اذ لا توجد اى جهة تملك المال لنبيع له غيره وهو يعلم هذا ونحن مضطرين نعمل شنو
|
Post: #96
Title: Re: حــش التمـــــر
Author: yasiko
Date: 10-06-2003, 05:44 AM
Parent: #95
جدو بركة بالعودة
ود النخيل الدار بيك عامرة
ابوقصي
الكيك الاروتي
سلام
هذه ملكة فوق جيلا
والملكات قلائل
|
Post: #97
Title: Re: حــش التمـــــر
Author: ABU QUSAI
Date: 10-06-2003, 07:17 AM
Parent: #96
الأخ / ياسيكو
حقا هي (ملكتنا وملاكنا) وانت الصادق .
ويا ريت الملكة تحدثنا عن أنواع البيوع الآن بعد التمر ما اتلم . لأنه نحن في الغربة سمعنا أنه التمر بقى يتباع بطرق شتى منها بيع الكسر وبيع الفصل وأظنه الأخير هو الذي خلق مشاكل الشيكات الطايرة ويا ريت يا ملكة سبأ تكلمينا عنه .
مع خالص المودة للجميع
|
Post: #98
Title: Re: حــش التمـــــر
Author: ملكة سبأ
Date: 10-06-2003, 08:02 PM
Parent: #96
يايسيكو يا ياسيكو
الله الله
لو قمت اخدت لى رقيصة ماعلى والله
شيلو شيلتكم انت وصديق احمد
تسلم يارائع ياملك انت
|
Post: #99
Title: Re: حــش التمـــــر
Author: yasiko
Date: 10-06-2003, 11:58 PM
Parent: #98
سلام للجميع وست الدار
سمح الخَمَجْ الفوق أسْيَادو
|
|