قلب للبيع

قلب للبيع


10-08-2003, 06:07 PM


  » http://sudaneseonline.com/cgi-bin/sdb/2bb.cgi?seq=msg&board=153&msg=1166822379&rn=71


Post: #1
Title: قلب للبيع
Author: ملكة سبأ
Date: 10-08-2003, 06:07 PM
Parent: #0

شن بتقولو فى القلب المعذب سيدو !!؟؟


Quote: قالت سـبأ..الشوق ود الكلب

هذا لساني ايضا استاذ كبر ، وانا ايضا التى اكملت بكائية الشتائم وقلبى هو ابن الحرام!!!ه

Post: #2
Title: Re: قلب للبيع
Author: bushra suleiman
Date: 10-09-2003, 11:58 AM
Parent: #1

ياملكه
اقول ليكى ابيات محمود محمد مدنى وغناء عركى

ياقلب انا كنت قايلك
تبت من تعب السفر
ومن مخاواة القمارى
ومن شراب موية المطر
تاريك كامن لى بى شيتا كتر
مازمان أنا وانت لفينا الموانى
بالقطارات..والمطارات..والسفن
دقينا اجراس الجديد
وعدنا ترتيب المعانى

الليله راجع لى تبقبق
بتنتل الآهه وترقرق
زى تقول ياداب عرفت الاندهاش
ياقليب مالك على
ما أنت عارف نقطة الضعف القديمه
وزيى ضايق الارتعاش

ياقليب ياما سرحنا
مره جينا والف رحنا
ومره شاى عصريه فى طرف الغمامه
ومره منديل مس بحنه
ومره دوبيت للمحنه
ومره حاجات اجن
وانحناءات للحمامه

جايى تسألنى الدباره
ياقليب مافيش دباره
لا المراكب قادره تكسح فى النزيف
ولا نحنا شايفين الفناره

Post: #14
Title: Re: قلب للبيع
Author: ملكة سبأ
Date: 10-11-2003, 05:03 PM
Parent: #2

اخ بشرى طيب كيفن الدبارة ؟؟
شكرا ليك كتير وشكرا لابو عركي

وحقيقة انا اعشق ابوعركى وارتاح لتلك الاغنية فهو اختيار موفق اشكرك عليه جدا
ودمت

Post: #3
Title: Re: قلب للبيع
Author: ملكة سبأ
Date: 10-09-2003, 02:27 PM
Parent: #1

هين تستخفه بسمة طفل

رهيييييييف بالمعنى الواضح

طيب الحل شنو؟؟؟؟

اذا كان لاينفع للبيع هل احدكم يمكنه التطوع باضافة لوحين من الثلج او الخسب او حتى طين البحر ، المهم اريد ان اعيش فى تلك البلدة من غير ان يخضع قلبى للنزيف صباح مساء

لا احب ان اقول ان كل شىء في بلدى يدعو للألم
لكنه لابد معه من قلب (تخين)... ومن اين لى به ؟؟؟



Post: #4
Title: Re: قلب للبيع
Author: yasiko
Date: 10-09-2003, 04:27 PM
Parent: #3

يا الملكي
سلام
دا حديث شنو دا
التمر ما جاب حق التزكرة ؟؟؟؟!!ه
بالله حصلت الجرجة دي ؟ حسب كلام بت قضيم
ما زمان قلنالك انقصي اقعدي في الصعيد

لك الود

Post: #5
Title: Re: قلب للبيع
Author: سجيمان
Date: 10-09-2003, 04:31 PM
Parent: #4

سبأ كدي اتوهطي في الواطا......ووريني الحاصل شنو؟

Post: #12
Title: Re: قلب للبيع
Author: ملكة سبأ
Date: 10-11-2003, 01:57 PM
Parent: #4

سجيمان اخوى
انا لازمة الجابرة تب
بس انت تعال ورينى الحاصل شنو
انا زاتى ما عارفة

Post: #13
Title: Re: قلب للبيع
Author: ملكة سبأ
Date: 10-11-2003, 02:10 PM
Parent: #4

ياسيكو ود اعمى انا
باقى التميرات لميناهن كان فى صفاح ولا طهور

هنا الا شاى العقرب ولا الموية الزرقا
وكان لقينالنا طريقة انقصينا مانا مابين

صدقنى لكن ماللجرجة دى .. وزاتو قلنا اخير نقلب اللبقة

لك عظيم الود

Post: #6
Title: Re: قلب للبيع
Author: ملكة سبأ
Date: 10-09-2003, 06:29 PM
Parent: #1

عباءتى هى الاخرى تعترضني

ليست مقاسي تماما
اهاااا ... بيتر الترزي انه ماهر حاذق

وضعتها بين يديه وجلست فى انتظاره سرحت ولم الحظ تجوال بصري بين يديه الحاذقتين ووجهه القنوع الصبوح حيث استقر بصري وانا اهوم بعيدا ... ياترى من اخترع تلك الحرب ...لماذا يريدون فصلنا ... وعلى ماذا يتفقون ... كم اكره هؤلاء المتعملون المتشدقون!!! آه كم جميل هذا السلسل الصليبي الذي يضعه بيتر على عنقه ... انه رمزهم للمسيح نبي السلام ومحمد ايضا دعوته السلام ... كم ماهر هذا البيتر اته يتقن عمله بصورة مذهلة ... تعجبنى التماثيل المنحوتة وغيرها بالسوق الافرنجي وكنت قد نويت ان ارجع الى ذلك المحل لشراء بعض الاشياء

اييييك ... انت ما معانا خالس
بيتر بلهجته المحببة وبسمته الصافية يعيدنى الى عبائتى ليتأكد انه لن يأخذ كثيرا من طولها
لكنه لم يفلح لانى قلبى عاد الى خفته تمنيت ان اضم هذا البيتر لاعلمه اني احبه
تضاربت مشاعري وهزمتنى دمعة لا ادري معناها


ياااااه انت الليلة ما كويس خالس
ونهض ليقدم لى كوب ماء
شربتها واخذت عبائتى وانا لازلت اعانى من مشاعري تحيرنى

ارجو ان لا يصفنى احدكم مرة اخرى بالكذب اذا قلت لكم انى متيمة بحب هذا الوطن الواحد شماله وجنوبه ... ترعبني النزعات الانفصالية ...ه

اشتاق جدا لليوم الذي يدعنا الساسة للعيش بصفاء
ويؤرقني هذا الاشتياق


Post: #7
Title: Re: قلب للبيع
Author: ملكة سبأ
Date: 10-11-2003, 12:14 PM
Parent: #1

من يضع تلك الصبيةفى طريقي؟؟
ومن علمها لعبة (التنطيط)على قلبي !!؟
ولما لم يعلموهابهشاشته ؟!؟

عليك الله مية انشاء الله ولله جعانة-
ما اتعشيتى في بيتكم ؟!؟ -

ابوى مات ، امى عيانة،واخوى قبضو ناس الكشة-
ما مشيتى المدرسة مالك ؟ -

ابتسمت الصبية واجزم ان ابتسامتها لم تحمل سوى معنى السخرية والعجب من غبائي ، فخجلت من نفسي ووضعت فى يدها الف جنيه وحدثتنى نفسي بان اتبنى تلك الطفلة - وهى حتفرق يعنى - والتفت لاتأكد من شكلها فاذا بها تذوب داخل شلتها قطيع من الفتيات لو سمحت لهن بممارسة التنطيط على قلبى ايضا لانخلع فى الحال
فانصرفت وانا احاول معالجة اشجانى
وهل استطيع تبني كل هذالعدد؟؟
هل افلح فى فعل ماعجزت عنه حكومات باكملها ؟؟

دا انا غلبااااااااان
وياقليب مالك على

Post: #8
Title: Re: قلب للبيع
Author: الجندرية
Date: 10-11-2003, 12:19 PM
Parent: #1

والله نحن الغلابة
تكبوا لينا في جنس الكلام ودايرننا ما نموت
شكراً يا ملكة سبأ

Post: #9
Title: Re: قلب للبيع
Author: ABU QUSAI
Date: 10-11-2003, 12:51 PM
Parent: #8

فنان الظمبور جعفر السقيد عنده أغنية يقول فيها مين يا خد قلب للبيع . ما تنزلها في البوست يا أخ ياسيكو عشان تبرد على الملكة شوية . ويسلم قلبك يا الملكي من تبعات الرهافة والحنية .

Post: #18
Title: Re: قلب للبيع
Author: ملكة سبأ
Date: 10-11-2003, 05:29 PM
Parent: #9

حباب ابو قصي

ياسيكو كان ببرد على ما كان ملحقنى امات طه فى كجبي

ياخي والله ماقصر ونزل ليهو واحدة وتاني سحبها مالو مابعرفو
وتسلموا انتو يارب

Post: #16
Title: Re: قلب للبيع
Author: ملكة سبأ
Date: 10-11-2003, 05:21 PM
Parent: #8

اهلين الجندرية
تعرفى اللت الله دى كان جات ما مشلكة
المشكلة قلوبنا الحاتتحلج دى
ودى العوجة
تسلمي يارب ويديك الصحة وطول العمر

Post: #10
Title: Re: قلب للبيع
Author: ملكة سبأ
Date: 10-11-2003, 01:10 PM
Parent: #1

ياااااه ... انظروا لذلك المتحذلق
ماذا تفعل ايها المجنون ؟؟؟؟
قف عندك ايها اللئيم .....ه
قلبى ينشطر يا سادة !!!ه
اللعنة ... عاودته نوبة الخفة مرة اخرى يريد ان يوسع مكانا لذلك الطفل الصغير ... طفل دون الرابعة من عمره - اى والله - يفترش نعليه المهترئتين وكانه مارس بهم عذاباته منذ ان كان داخل بطن امه ، يفترش نعليه ويجلس تحت هاجرة احتار فى انهاكيف لم تفلح فى اذابته حتى الآن ؟
يغلق احد عينيه من وهج الشمس ويفتح الاخري ليراقب بها بفرح طفولي الايادي التى لا زالت ترحم وتمتد بالاحسان اليه - مية او خمسين - طبعالايعرف حسابها بعد ... لكن مايحيرني تلك الدموع المعلقة على خديه !! وعهدى بمن فى سنة لايزرفون دموعا بدون صراخ !!!؟
لهفي عليك ياصغيرى اختلطت عليك الامور واضطربت المشاعر وكان لزاما عليك ان تجيد دورك قبل الاوان بكثير ... يا سبحان الله الهذه الدرجة يمكن ان تفعل الحاجة بالانسان ؟؟؟
اعذرني ايها الصغير قلبى اضعف واهش من ان يتحملك ولكننى سوف ادعو لك ربي

ياربي كم اشتاق لعونك لهم فقد عجزت انسانية انسانك

وياقلبى الحزين اسمعنى وخت قرض الصبر فى الوجعة

Post: #11
Title: Re: قلب للبيع
Author: ايهاب
Date: 10-11-2003, 01:55 PM
Parent: #10

عليك الله يا ملكه سبا قلب زي دا بيبيعوهو

Post: #19
Title: Re: قلب للبيع
Author: ملكة سبأ
Date: 10-11-2003, 05:33 PM
Parent: #11

يعنى عاجباك البشتنة دي يا ايهاب ؟

Post: #72
Title: Re: قلب للبيع
Author: Ridhaa
Date: 11-09-2003, 07:31 PM
Parent: #11

up

Post: #15
Title: Re: قلب للبيع
Author: Rawia
Date: 10-11-2003, 05:09 PM
Parent: #10

واااااااا شريري ما تستاهلي الوجعه و عليك الله ما تقطعي قلبي معاك
انا تاني بحلف ما ادخل ليك بوست ما بقدر على جنس دا

Post: #17
Title: Re: قلب للبيع
Author: tmbis
Date: 10-11-2003, 05:28 PM
Parent: #15

دايره فيهو كم ؟؟؟

تدفعي كم ونخارجك منو ؟؟

Post: #20
Title: Re: قلب للبيع
Author: ملكة سبأ
Date: 10-11-2003, 05:40 PM
Parent: #17

علاء
انا غيرت راى وكنت عائزة بدل بس

لكن معاك انت يفتح الله

بعد يومين كمان يقوم يكورك لى فى نص البلد دي

لكن كان عم بابو العجلاتى فى خلى يجى يقرطو شوية
لحين اشعار آخر

Post: #21
Title: Re: قلب للبيع
Author: ملكة سبأ
Date: 10-11-2003, 05:54 PM
Parent: #15

ما يستاهلك شرى ياراوية اختي

والزينا كتااار وحاتك يتاوقو يمرقو ساكت
اظنو غالبن
206
باستثناء الدخلو يعنى

Post: #22
Title: Re: قلب للبيع
Author: ايهاب
Date: 10-11-2003, 06:00 PM
Parent: #21

دي ما بشتنه دا جمال
و دا البخلي الانسان انسان

Post: #23
Title: Re: قلب للبيع
Author: yasiko
Date: 10-11-2003, 08:43 PM
Parent: #22

ابوقصي سلام
غالي وطلبك رخيص
لكن معليش المرة دي
الملكة سلام
استعبدت الأغنية لعدم توافق المضمون
بعد ان تكشفت لي فكرتك لاحقاً

Post: #32
Title: Re: قلب للبيع
Author: ملكة سبأ
Date: 10-14-2003, 02:04 PM
Parent: #22

الجميل ايهاب
الله يخليك يا انسان
ومزيدا من الانسانية ياعالم

Post: #65
Title: Re: قلب للبيع
Author: Kabar
Date: 11-07-2003, 08:01 AM
Parent: #10


صـديقـتي ..بلقيس..بين قوسـين ملكة سـبأ
حـبابك..
رأيت ما رأيت..
لكنـه ..
الـحزن..الـخوف..الحنق
ما قيدني عن هفيف الحضرة
أو في رواية أخـرى..
انه الشـوق..ذلك الكائن اللـئيم..لئامة كلب الجزارة..
و مثـلما قالت سـبأ..في أكثر اللحظات حـرجا ، نـحتاج متسـعا من الوقت لسرد الأشـواق..
أو ربـما..
قد لا يكون هنـاك وقت لسـرد الأشـواق أصـلا..


اضــاءة..

قـل لو كان القلب كتابا..
اذن..
لقرأناهـ ..
ونثرناهـ ..
وفرشـناهـ..
وبعناهـ ..في وسـط الخرطوم..جوار الجامع الكبير..قبالة منـصــــــــــفـــون..
ولكــن..
القـلب نبضـا..
فهـل يشـترى النبض ويباع؟


اضـاءة تانيـة..

أشد ما يرعبني في هـذه الدنيا المقدود..احساس أهل القراءات ..و أقتباساتهم ..التي كثيرا ما تجيب الهـوا..
وفي هـذا كثير من القول الأخضر الذي يشبه في طـزاجته مملكة الشمار النفاذة..

اضـاءة تالتة..

فـي مغبات الـشوق..
و منـحنى الخوف الدمـوع
ما بين ثنـيات الحـنين
و رفــة النبض الـخشوع
حـسيت بانـي قـلتك
شـارة..للحلم الرجـوع
(الـمهم اسـألي صـديقي واستاذي بشـرى سليمان أن يتـمها..وحينها سـأكون أنا..بالجد اكتر سعادة منك ومن ســبأ ذاتها..بت الـ ....)..

مــتن..

انـه الـخوف يا صـديقة..
حـينما نـحس ببيتر..يجـوس وينوس في شـوارع نبضـنا البهية..وما نقدر نقـول ليهو الحاصل..
وانـه الـحزن يا صـديقة..
حـينما يتقيأنا الزمان بـقايا عسيرة الهـضم ولـميم من شتـات التقليد الأشــتر..
وانـه الـحـنق..يا صـديقة
حـينما تـمتلئ الـدروب بالعـتمة في وضـح النهار..ونغـدو كالغرباء..نفـر من بعضـنا البعض..ونتســلل نـحو فيـافي المنـفى ، بـحسرة وانكسار..


مـتـن تـانـي..

انـه الرعب يا صـديقة..
حـينما تغـدو ترانـيم الصـبيات معلـقات مكتوبة بـماء الفـقر..ومـد لد لة فـي جـدارات الوطـن العتيق..
انـه نشــيد البـؤس..حينـما يصير انتـيم قـومي من شـاكلة "سـاعدونـــا يا جماعة..عليكم اللـه ياجماعة"..
حـينها..صـدقيني..يسـتوي النـور بالظـلام..
و نظـل نحن في منعرج الوهم الصفيق..نـمارس شـتائمنا بسـرية غريبة..
أو ربـما..
نـحتاج ان نغتســل من ترد د نا ولو مرة..
(هـل ذكرت اننا أمـة تـحترف التردد واناشيد الحسرة/النواح؟)..


حـاشية..

خـلي بالك..يا بلقيس..القلب نفاج الـحنين..ولـو قفلنا النفاج ..يبقـى لبسنا تـوب الـبخل واتوسـدنا مـخـدة العوجـة الكبيرة..

حاجة أخـيرة..
و بعدها..
قـصة النغـم الـمتربل بهاجسات الـحنين..دي..
سـبب اخـر ..يدخـل الرحـمن في القلب..
شـكرا..ياسيـكو..
شـكرا..بلقيـس
وليـكم كلكم..امنـيات الزمـن البـوح لو عز الرجـوع..


كل قـلب و انتـو بـخير
دمتـم
كـبر

Post: #66
Title: Re: قلب للبيع
Author: yasiko
Date: 11-07-2003, 06:36 PM
Parent: #65

اخي كبر
رمضان كريم
بنات شفتيك تحتاج مثنى وثلاث ورباع من القراءة
وهكذا تفعل انت دائماً
ترمي بالسهل الممتنع وتنصرف لتأتي بغيره
نضّر الله قلبك وعقلك دوما
لقد حاولت انزال الكلمات مكتوبة (قصيدة عيوشة)وهي للاستاذ حميد
لكن البوست (زرب نفسه) كما قالت صاحبة الجلالة فاصبحت الكتابة فيه من اسفل الى أعلى ولبكري شوؤن في البوستات

Post: #67
Title: Re: قلب للبيع
Author: ملكة سبأ
Date: 11-07-2003, 09:33 PM
Parent: #66

فعلا ياسيكو
او يزيد
انا بتلك الحالة من يومها
ما ان افرغ من قراءة صديقنا كبر الا لأبدأه من جديد
قلبي هنا يمارس التنطيط فرحا مستعيرا منه ثوب الفرح الكريم متحديا كلب الجزارة فى الاحتفظ بقلب محترفا ترديد تراتيل تثمرالضياء تفوقا
ومتى ما رتبنا ذلك النبض هدوءا ورحمنا نثرناه وفرشناه خلفا لمخدة العوجة
كل اقتباس وانت بخير صديقى
وريثما ما فرغت من اعادتك مرات ومرات عدت

Post: #70
Title: Re: قلب للبيع
Author: Kabar
Date: 11-08-2003, 07:44 PM
Parent: #67


صـديقي ياسـيكو..حـبابك
كـتر خيرك.. وطالما هناك حزن..يبقي اكيد فيها فرقة..وطالما الفرقة حاصلة..يبقي الحنين كل محطات السفر..وكتها بنبقى نحن وبيبقى الكلام..
بالنسبة للجميل حميد..ذكرتني قصة واحدا عما لي..في كل ما يحصل غلاط يقول ليك اللـه والمريخ والكابلي تب مافيهم كلام..ونحن ايضا يا صديقي..فان حـميد واحد من ثوابتنا الوجدانية..واطمئنك بأن النص معاي..واكتر من كده معانا شـاب سـوداني..ممكن ينسى اسمو شنو..لكن في اقصي لحظات الزحمة ممكن يقول ليك عيوشة بضبانتها..
لكن ما عرفت الصوت..هل هو جعفر السقيد؟ ..معليش طبعا اخوك اخر محطة عندو صـديق أحمد..
كتر خيرك تاني..

صـديقتي ملكة ســبأ..حبابك
كـتر خيرك..وكل ما تقريني..قـوليني معاك للفرح..يمكن يحن ويشـفع..
وتـأكدي كلنا سـدنة في محراب تراتيل الضـياء
ليك..سـلال الود النضاحة

ودمتم
كبر

Post: #71
Title: Re: قلب للبيع
Author: ملكة سبأ
Date: 11-09-2003, 07:30 PM
Parent: #70

صديقنا كبر
لقيت الفرح هو البسألنى عنك
الأغنية بصوت عادل عثمان الطيب
ولا شنو يا ياسيكو ؟

Post: #86
Title: Re: قلب للبيع
Author: ملكة سبأ
Date: 11-12-2003, 04:16 AM
Parent: #10

**

Post: #24
Title: Re: قلب للبيع
Author: Rawia
Date: 10-12-2003, 01:07 PM
Parent: #1

من اسبوعين و في المدينه الانا عايشه فيها في طفل عمرو 3 سنوات و هو راجع من المدرسه نام في البص قامت السواقه نستو ما نزلتو في بيته و فضل نايم في البص في امان الله لغايه ما كمل نومو و صحى قام يبكي و كان البص في اللحظه ديك في الجراج المهم حسوا بيهو و نزلوهوا من البص و اخدوهوا المستشفى للمتايعه و جابوا ليهو طبيبه نفسيه للملاحظه لمده 3 ايام اما السواقه و المشرف طوالي كلبشوهم زي اعتى مجرمين و دخلوهم السجن و قالوا حيحاكموهم تحت شنو كدا ماعارفه و السجن بتاعم حيكون بين سنتين لي خمسه سنوات

انا لما بشوف واسمع حاجات زي دي بموت من الزعل على اطفال بلدي الما عندهم وجيع ما بفرقوا اي حاجه من الاطفال الحكومتهم و مجتمعهم مهتمي بيهم ديل

Post: #25
Title: Re: قلب للبيع
Author: yasiko
Date: 10-12-2003, 04:58 PM
Parent: #1

Quote: و جابوا ليهو طبيبه نفسيه للملاحظه لمده 3 ايام اما السواقه و المشرف طوالي كلبشوهم زي اعتى مجرمين و دخلوهم السجن


راوية سلام
لوعندنا الطفل انجرح ما يلقى طبيب بشري يعالجو
والمشرف كان قال للسواقة تاني ما تعملي كدي ، دا في حالة وجود مشرف وسواقة وبص ومدرسة حتى

Post: #27
Title: Re: قلب للبيع
Author: ملكة سبأ
Date: 10-13-2003, 12:54 PM
Parent: #25

نحن لينا الله وعيشة السوق زى ما بقولو

Post: #29
Title: Re: قلب للبيع
Author: Rawia
Date: 10-13-2003, 01:33 PM
Parent: #27

النبي ياملكه منو القلبو يوجعو اكتر
انا ديك اصلي ما دايره استنى لغايه ما القي مشتري

Post: #28
Title: Re: قلب للبيع
Author: Rawia
Date: 10-13-2003, 01:24 PM
Parent: #25

هو كتير يا يا سيكو لكن ما عندنا اي حل غير نتفرج و نسمع بس ونتحسر


انا بشتغل في قسم المساعدات العامه في الحكومه من ضمن المساعدات في برنامج فدرالي بتصرف عليهو الحكومه المركزيه و اسمو (تانف) و دي اختصار لي مساعده الاسر المحتاجه البرنامج دا للاسر البكون رب الاسره فيها واحد اب او ام او يكون واحد فيهم معاق او في بطاله و البرنامج الغرض منو الاحذ بايد الاسره لي بر الامان عشان كدا ما بقدم مساعده ماليه و بس لا بنضع خطه لي الاسره و بتم متايعه كل سته اشهر و هناك كم من البرامج المساعده بتقدم للاسره لا حصر لها




المهم و طوال فتره التدريب التى امتدت لي سته اشهر كل المدربين كانوا يتفقون على شي واحد و كانوا يرددونه يوميا تقريبا
و هو علينا ان نحترم العملاء و نحترم ادميتهم و نقدم لهم كل ما هو ممكن و مستطاع و ان لا نرد طالب حاجه لانهم لو ما كانوا محتاجين ما كانوا جوا لغايه عندنا طالبين للمساعده


وا حسرتي على اطفال بلدي

Post: #33
Title: Re: قلب للبيع
Author: ملكة سبأ
Date: 10-14-2003, 02:32 PM
Parent: #28

فى بلدى هذى كثير من اللافتات بهذا الشأن
وكثير من الميزانيات تخصص
لكن مايعيب التخطيط وسوء التقدير
والوجاهات والمجاملات التى تغرق حق انسان بلدي
اذن لماذا لايتابع مسئولي الرعاية الاجتماعية ما يقدمونه من مشاريع ولماذ لا يخصصون خبراء فعليا لمتابعة دراسات الجدوى ومدى استفادة الشخص او الاسرة من الدعم والتدخل فى الوقت المناسب حتى لا يكون زيادة هم وفقر واخذ ضمانات تؤدى حقيقة الى الغرض ولا اعنى ضمانات تضمن استرجاع المبلغ بل الاستفادة الفعلية...
اما عن الزكاة وما ادراك فعلى رغم الجهد المبذول الا انك تشعر ان هناك مبالغ ضخمة تذهب الى من لايحتاجونها اضف الذى ذلك الاحتيال وعدم ضير غير المحتاجين الذين جعلوها وسيلة للكسب واهم فى اتم الصحة والعافية !!وهنالك من هم اولى واحق منهم
اما ماتقدمه الشركات والمؤسسات من ميزانياتها لدعم المحتاجين وتصديقات الوزراء والمسئولين فهو للاسف ايضايخضع للوجاهات وحيل المتلاعبين ... مرة اخرى اقول كل ما ينقصنا هو التخطيط والمتابعة وصحوة ضمير علشان خاطر البؤساء ... والله فى

Post: #26
Title: Re: قلب للبيع
Author: ابن النخيل
Date: 10-12-2003, 06:59 PM
Parent: #1

ياطير واحلالى عليك.........لابتعرف هموم الدنيا لا ضاق السهر عينيك

الملكة تحياتى...... البسوينا طير شنو كما غنى احد اهلنا الفصاح

بقينا نقتفى دروبكم المضمخة بعبق البلد المعكرة بى موية الدميرى والمنافى انت وياسيكو....فلكم ودى.

ابن النخيل

Post: #30
Title: Re: قلب للبيع
Author: ملكة سبأ
Date: 10-13-2003, 02:15 PM
Parent: #26

قلبى تتكالب عليه الامور حتى اصبح ارهف من كسرة ست الكسرة التىبطرف السوق... بالمناسبة ست الكسرة هى ايضامن النوع الذى يهوى لعبة التنطيط على قلبى بالذات لما تنكفى كسرتها وفى طريقها الى الهرب من سياط عساكر النظام العام !!!!؟؟؟ ويح قلبى وثكلته انا ... قلبى ينقسم بين عيناي اللتان تتابعان حركة خالتى مريومة وهى تنحشر فى زمرة الفارات من صويحباتها ستات التسالي وعينهاعلى كسرتهاالتى طلعت روحها حتى تكسب من وراءها مايسد رمق صغار غدر بهم الزمن... ويسترعرضها ويكفى وجهها زل السؤال ... كانت كل حلمها ان تبيع بعضها لتشترى حبات من الطماطم وزيت تخلطه بملح وماء تعجنهابما تبقى لديهامن كسرة وكلو خير من رب العالمين ....
لكن عيناها تقع حيث يقبع الجزء الآخر من قلبى ويشاهدان معا كيف ان حلمها اصبح طعاما سهلا لدواب الأرض بفعل بوت مطارديها
النمل اولى من العباد ؟؟؟
يافاجر الله بيسألك

يالعجبى !!! خالتى مريومة تبكي للداخل !!! هل شاهد احدكم ذلك ؟؟؟ نعم دموع كثيفة شاهدتها بحاستى تنسكب نحو دواخلها اما من الخارج فانك تشاهد بسمة تائهة غريبة تعزى بها نفسها وترد على ما ان جاز نسميه ضحكات وانفعالات ستات التسالي الائي اظن واخشي ان اصاب (الحلجان) قلوبهن ... بعد ان اخمدوا نار فاطنة ست الشاي من يخمد نارها ومريومة التى ما زالت تبكي للداخل وتشمخ كالجبل وهى تستعد ليوم جديد ... اذن فماذا تفعل !!؟؟؟ ...

ساااعدونى .... النجدة ياسادة
قلبى يريد ان يفر منى
فمريومةتستحق المواساة وهو يفهمها ... لكنه لا يملك سوى ان يضمها ويبكى معها ويساعدها فى ان تطفى نارها بما يسكبان من دمع وان كان لايروى ظمأ صغار هذا اوان غداءهم ...


Post: #31
Title: Re: قلب للبيع
Author: ABU QUSAI
Date: 10-14-2003, 07:06 AM
Parent: #30

الملكي سلام
قلبي معاك ومع ست الكسرة وستات التسالي وست الشاي وكل نساء بلدي المكافحات من أجل اللقمة الشريفة . ويسلم قلبك من التعب إن شاء الله يااااااااااااا رب .

Post: #34
Title: Re: قلب للبيع
Author: ملكة سبأ
Date: 10-14-2003, 02:38 PM
Parent: #26

يالف مرحب يا ابن النخيل
والتحية للشاعر حاتم حسن الدابي
الذي قالها ايضافى ساعة ضيق
وفعلا ياريت لو كنا طير بدل ما قلبنا هو الطائر بالصورة دى

نبادلك ود بود

Post: #36
Title: Re: قلب للبيع
Author: عاصم الحزين
Date: 10-14-2003, 02:56 PM
Parent: #34

ملكة سبأ


تعرفي
مرّه لقيت لي طريقة وخشّيت جوّه..متسرّباً مع نشيد رهيّف لصديق وبعض اغاني مصطفي ود سيد احمد.. المسأله كانت صعبه جد جد..اتزنقت ..كان قلبي يجلس تحت شجره يتساقط منها الحزن الشحمان..كان صابراً كعادته وكنت مستعجلاً احاول ان ارصف طرقاتي الجوّانيه بما يليق للحياة من ضجيج سوداني مهندم مترّب بالشوق للوطن والاصد؟؟؟؟؟قاء والحبي!!!!به
تعرفي
بس التفاته نحو قلبي ..كانت مامقصوده؟؟ .. وناداني..كتب بدمه كلمات طاعمه ..سقطت قطرات من الشوق لي ..شردت بعيداً وكتبت
ان يكون لنا وطن..ان يكون لنا حبيبه هذا يعني
انّه لا الحنين انتهي لنغادر..ولا الحب يكفي لنبقي

و..........حلبت صمتاً يلائم المرحلة وتشرنقت

و
سلام حتي مطلع الامر

Post: #48
Title: Re: قلب للبيع
Author: ملكة سبأ
Date: 11-01-2003, 12:10 PM
Parent: #36

Quote: كان قلبي يجلس تحت شجره يتساقط منها الحزن الشحمان

سلام عاصم
الحزن دا بياكل شنو هو ؟؟
السلعة الوحيدة الموفرة في بلدى وبكميات هى التي يتغذى منها ذلك الحزن اللئيم
اعدمها الله ايا كانت وسلمك

Post: #35
Title: Re: قلب للبيع
Author: ملكة سبأ
Date: 10-14-2003, 02:47 PM
Parent: #1

!! نــادوا لــى المدرســة لبنــات المدرســة


Post: #37
Title: Re: قلب للبيع
Author: ملكة سبأ
Date: 10-23-2003, 01:27 PM
Parent: #35

المدرسة لسة ؟؟؟

ما مشكلةبنجيها تاني

Post: #38
Title: Re: قلب للبيع
Author: ملكة سبأ
Date: 10-23-2003, 01:35 PM
Parent: #37

اولا لاني بصراحة خايفة من كدايس ابوات البنيات وخايفة يفهموني غلط ويصيبو قلبى فى مقتل زى ماقعد يقولو ... لكن برضو بنجيهن
وعلى ذكر الكدايس وبما انو الايامات دى الكدايس اشكال والوان (كدايس شعر - كدايس مشاكل - كدايس بتتنعي - كدايس بتتخطب وغيرو وغيرو)
فى كدايس ياخلق الله ياحقوق الاثنين بتجهجهك من الصباح وتطمم بطنك وتطير قلبك ... المسكينة تقش عينا من النوم وتتوكل على ارزاقا يلاقيها ليك واحد تشكيلي ويرسم بيها ابيخ لوحات الأرض ... ويتركها للعرض الإجباري ... ياجماعة فى ياتو بلد لاقاكم الكلام دا وفى ياتو بشر لاقاكم القلب دا ؟؟؟؟
معقولة ياناس ؟؟!! لازول يحن على ولا على المرحومة !! مافى حل غير المنظر الكريه دا (طبعا لو كان قلبك تخين شوية ممكن تتمعن وتدقق النظر وتشوف ناس امبررو ديل العاجبهم شنو فى لحمةالكدايس؟) وممكن يغلبك خيالك اللئيم وتشكل بيها كم حاجة كدا (اوووووووع غالبنى اقول) شفت كيف يعنى فى صمة خشمك تنقلب بطنك ويتخمة نفسك واليوم كلو واحتمال كام يوم تكون فى حالة قرف عارمة والاحتمال الكبير تدخل فى حق نفسك وتحرم ما احل الله لها(يعنى يرضيكم نعيش طعمية حاف والبلدى دى مافيها غير ال ...).
قلبي ياجماعة الخير اتسهك هناك محل ما اتسهكت المرحومة !! وكأنها لم تكن ...
وقاتل الله من لم يهتموا بحقوق الأرواح ومن بكروا بتعليمنا:


لى قطة صغيرة سميتها سميرة
تنام فى الليل معى وتلعب فى اصابعى
بشعرها الجميل وزيلها الطويل
ودائما تغنى ولا تخاف منى
لاننى احبها ولا احب ضربها

؟؟؟؟؟؟؟؟؟؟!!!!!؟؟؟؟؟
وحقيقة لا احب ولا اتحمل ابدا منظر القطة المدهوسة وهى لاتجد من يزيحها على جانب الطريق ... وعجبى ممن يشذون ويتقبلون فيها العزاء .... ولهفى على القلب الذي اخذ يتحول عن الرحمة ويتجه الى الفشخرة الفارغة ..


Post: #39
Title: Re: قلب للبيع
Author: ملكة سبأ
Date: 10-23-2003, 01:43 PM
Parent: #1

ابقى طيرة اطير بالسحاب وابقى مكوة اكوي التياب لبنات المدرسة


Post: #40
Title: Re: قلب للبيع
Author: HAMZA SULIMAN
Date: 10-30-2003, 10:34 AM
Parent: #39

ملكة سبأ
كل سنة وانت طيبه وتصومى وتفطرى على خير
احييك لجرأه الطرح
وانت تتوشحين بكل هذا القلب الحنين
لك منى التحيه

Post: #41
Title: Re: قلب للبيع
Author: tmbis
Date: 10-30-2003, 10:44 AM
Parent: #40

بمناسبة رمضان .. وكل سنة وانتو طيبين ..

في تخفيضات ؟؟

Post: #43
Title: Re: قلب للبيع
Author: aba
Date: 10-30-2003, 11:35 AM
Parent: #41

صاحبة الجلالة
صباحاتك نوار

البوست ده قاعد أتزاوغ منو زي الروح الخجلانة من ربها
أخش فيه أتوجع .. وكل ما أقول غطس يجي شقي يرفعو..دحين يا بت العم
مانا مشترين إلا كان لقيتيلوا بيعة أدي البيشتريه قلبي معاهو هوادة
وا شريري...

Post: #46
Title: Re: قلب للبيع
Author: ملكة سبأ
Date: 10-30-2003, 12:36 PM
Parent: #43

ابا ود العم
وهل يأبق العبد من سطوة قلبه ؟؟
وشنو البغطس ؟؟ دا يا اخوى وجع متقل طافى قدام وشينا مافى منو جاي ولا جاي ...
واشريرى دا ياها زاتا الطلعت زيتناوخلتنا سايحين زى الطايوق فى دوكة العواسة .. ودا القدرو عليهوا اهلنا

تسلم ويسلم قلبك

Post: #45
Title: Re: قلب للبيع
Author: ملكة سبأ
Date: 10-30-2003, 12:20 PM
Parent: #41

تمبس
زماان قلنا يفتح الله
باين عليك تاجر نجيض
لكن فات عليك انه الدلالة دى سعرا ماشى فوق
عشان خاطرك الغالى نهاودك
اها نقطع ليك من ياتو محل ؟؟؟

انت وين بالله؟؟
لسة متمرد على رمضان؟؟


تصوم وتفظر على خير

Post: #42
Title: Re: قلب للبيع
Author: قرشـــو
Date: 10-30-2003, 11:24 AM
Parent: #1


العزيزة ملكة سبأ

وهل مثل هذا القلب يجد من يستحقه ليشتريه ؟؟؟؟؟

أهديتك القلب المعذب قلت لى المو بتزيلو
أبقى فى وارف رموشك فرحتو ولحظات مقيلو
تبقى نورو وتبقى فجرو تمنع الدمعات اسيلو
اسه لو داير تسيبو حتى باقى العمر شيلو
بى محنه زول بلوم دمعه فى الخدين بتجرى
كنت بأمل فى سماحك والظروف فرقتنا بدرى
انت ما ريدى ومناى كل لحظه بتضوى عمرى
وكنت دايرك يا حبيبى لو مره بى آلامي تدرى
اسه لو داير تسيبو حتى باقى العمر شيلو
فى نهاية لومي ليك كنت بطمع تانى ترجع
كنت راجى الدنيا تبسم لينا فى أفراحه تجمع
ما انت الزول المن عرفتو ما أظن طرفى مره دمع
ولسه لو عاوز تسيبو حتى باقى العمر شيلو
واهديتك القلب المعذب قلت لى المو بتزيلو

Post: #47
Title: Re: قلب للبيع
Author: ملكة سبأ
Date: 10-30-2003, 12:50 PM
Parent: #42

اهلا اهلا ياعمدة
والف شكر للابيات الجميلة
وزى طلتك دى ياها البلقى قلبنا فيها الفرج
تسلم يارب

Post: #44
Title: Re: قلب للبيع
Author: ملكة سبأ
Date: 10-30-2003, 12:05 PM
Parent: #1

وانت بالف خير الموسيقار الشفيف
واحييك وانت تنبه هذا القلب الذى كان قد آثر الهروب وقرر اراحتكم في هذا الشهر المبارك وان يدفن عينيه فى الرمال الى حين وان يركن الى الأهتراء الداخلي على حد قول سيدنا الطيب البرير .. لكن !! اذا كان مسبب هذا الاهتراء لايعرف معنى الرحمة فى شهر الرحمة وما انفك يمد لسانه قاصدا اغاظتي واثارتي واثارة المسكين قلبى ولا زال يطلب بالحاح ممارسة لعبته المفضلة وهى التنطيط عليه ..

لذا اقرر انا ملكة سبأ وبكامل نزيفي القلبى المعتاد ان اواصل فى فى محاولة تضميده عبر الكتابة اليكم .. وهذا بمثابة إعلان للجميع

وشكرا

ولك منى ايضا التحايا حمزة

Post: #49
Title: Re: قلب للبيع
Author: ABU QUSAI
Date: 11-01-2003, 01:11 PM
Parent: #44

يا ياسيكو
سمعتها قالت ( خلتنا سايحين زي الطايوق في دوكة العواسة ) ، لا حول ، الملكي دي قاعد تجيب الحديث دا من وين .

Post: #50
Title: Re: قلب للبيع
Author: ملكة سبأ
Date: 11-02-2003, 02:12 PM
Parent: #1

Quote: !! نــادوا لــى المدرســة لبنــات المدرســة



Quote: ابقى طيرة اطير بالسحاب وابقى مكوة اكوي التياب لبنات المدرسة


ما ناسية الموضوع وما تقولو لسة مافطرت بس حبة شغيلة وجاااية

Post: #51
Title: Re: قلب للبيع
Author: أبوالزفت
Date: 11-03-2003, 07:57 AM
Parent: #1

UP

Post: #52
Title: Re: قلب للبيع
Author: doma
Date: 11-03-2003, 01:39 PM
Parent: #51

up

Post: #57
Title: Re: قلب للبيع
Author: ملكة سبأ
Date: 11-05-2003, 11:25 AM
Parent: #52

ابو الزفت + دومة
ترفعكم مروتكم
وخليكم معانا

Post: #53
Title: Re: قلب للبيع
Author: Elmosley
Date: 11-03-2003, 03:53 PM
Parent: #1

Expect Love for sail by Fatima Shortly.
Elmosley

Post: #55
Title: Re: قلب للبيع
Author: ملكة سبأ
Date: 11-04-2003, 11:50 AM
Parent: #53

مناظر :
مشهد اول

بنتان في سن البلوغ تلبسان (لا ادري ماذا اقول ) هل هما فعلا تلبسان ؟؟ وهل يجوز ان نطلق
على ما تلبسناه ملابس اصلا ؟؟ ومايحيرني كيف استطاعتا اصلا إدخاله ؟؟ لعن الله اولاد الأبالسة !!!


مشهد ثاني :
شلة من الأولاد يجلسون تحت ظل شجرة في قارعة الطريق لا شغلة ولا مشغلة ، يلمحون البنتين ويتأهبون للمغازلة المعتادة .. لكن فجأة لا اراهم !!؟؟؟ فعلا ايها السادة لا ارى سوى احداق تتسع وتتسع !! ولسان يهرب لان كل الكلمات التي يحفظها اخذت هى الاخرى تتضاءل وتتضاءل ..
قلبى انكمش هو الاخر واخذ يراقب الموقف ، البنتان عكس ماتوقع قلبى اخذن يتمايلن وليس يميلن عن طريق الصبية !! احدكم يعيرني تصفيرة طوييييلة بناتنا دول ولا من بتوعات السيما ؟؟؟ مشية بالضبط على مقاس عارضات الأزياء ... الراس فوق – الطرحة تحت
مالازم تظهر بالتسريحة الأخدت منها نص اليوم
والشعر المكوي ماهو مكوم ساكت كوم
قلبي مازال يتبع الفتاتان ... طاااااخ طيخ !!! انظروا الى هذا الحشري المتسلط !! إنه يتعارك
مع عيون الصبية انها هى الاخري تتبع الفتاتان وتريد الإلتصاق بهما وقلبي يقف حائلا !! ويصيح بالصبية : امسكوا عليكم عيونكم ديل ...
اما انا فاقول امسكوا عليكم بناتكم ديل !!

كلام بالبلدي كدى :
ياحليل زمان لمن كنا قدر البنوت ديل كانت الواحدة لمن تلمح ليها طرف جلابية تخلى الدرب الوسطاني ولاتنزل طرحتها فوق وشيها وتمسك الحيطة
وياحليل زمن كنا ندعك وردة صباح الخير فوق خشمنا بالدس والواحدة كان شافه ابوها ولا اخوها الله قال بقوله .
اسى الواحد تلقى ماشي مع اختو بالشكل دا وطولو طول البان والخشم مليان بحلاوة لبان !!!!!
وما عارفين المشكلتين وين .. لو الأب موجود وشايف الحاصل وطلع من مدعي التحرر والتحضر .. يبقى اماني ماضاع مجتمع !!
وكمان كان مافاضى من الجرى وراء المعائش وناسي انو غذاء الروح اهم من ملى البطون وانه اسرته محتاجة لوجوده اكتر من دراهمه واسمعو النساء الائي غلبن لسان حالهن :

كبرو الصغيرونين خلاص خايفالهم الطبع الكعب
وصولها مرحلة الخطر والامن مازال مستتب
انا كنت قادراهم زمان لكن بعد كبرو اتغلب !!

يستنجدن بكم للحضور الفعلى مضحيات بكل سبل الرفاهية من نضار ورياش وغيره بعد ان تأكدن انه لايجدي مع غياب الوالي الذي يحكم تصرفات ابنائه ولا خير فى الدينا بوجود ابناء ينشأون بدون مثل وأخلاق .
وهذا من واقع وصميم المجتمع السوداني

ملعون ابوها الجامعة الكان بقت ميدان خراب
الواحدة همها فى الهوى وقايلنو همها فى الكتاب
واهلها المساكين بالتعب نفس الله يلقو بعد ضراب
وآخر المطاف ترجع خلا

وبرضو دا لسان المجتمع
فعليكم ببناتكم وقيمكم السمحة ولاخير في حضارة هدامة تطرح ثمارها تفككا وانحلالا يوما بعد يوم ..
وصدقوا حين قالو : كأس وغانية يفعلان في الامة المحمدية مالا يفعله الف مدفع
ومش نحن برضو أمة محمد ؟؟؟
عليكم الف صلاة وسلام يارسول الله

Post: #56
Title: Re: قلب للبيع
Author: ملكة سبأ
Date: 11-04-2003, 12:11 PM
Parent: #55

سلام ايها السادة
طبعا الكل يستغرب لذلك الوقار والسكينة التى حلت على قلبي !!!؟
انه خاشع مبتهل .. يدعو ربه
اللهم استر علينا وعلى بنات المسلمين
قاتل الله الحضارة المستوردة والاستلاب الفكري
ودشدش الدش والقنوات الموجهة
امين يارب العالمين
اعني ببنات المدرسة من مرحلة الاساس مرورا بالثانوى والى الجامعة
وبقول آخر من مرحلة ترديد اغاني نانسي عجرم مرورا بتقليدها فى الشكل والى ان تتعتقد الواحدة إنها هى بعينها ...
قلبي يتوسل اليكم ايضا ايها السادة الاباء والامهات الفضليات ان تحرروا فتياتكم من هذا الأستعباد الفكري وان تصونوا كرامتهن من كل مايعرضها للخدش والقول غير الكريم وان تحافظوا على مستقبلهن العلمي والعملي وان تعدوهن ليصبحن امهات المستقبل واساس الأسرة وكل المجتمع .
قلبى يفطره ما وصل اليه حال صغيراتنا من غير ان يجدن من يوجههن او يردعهن وهن فى امس الحوجة لذلك وهن فى تلك السن الحرجة !!
قف عندك يا انت ولا تغالطيني يا تلك ... هل نظر احدكم الى وجه وشعر وهي تلبس زيها المدرسي وقبلها هل تأكد احدكم كيف تم تفصيل ذلك الزى قبل ان يدخل يده فى جيبه ليخرج ثمنه ؟؟؟
قلبى يتحسر على زمن الفستان(ابو كولة) والحزام الذي يضمه بكل تهذيب فى الوسط والشعر القرون بشريطه الأبيض الذي لا يخالطه احمر او اصفر ...
اتعجب من علم هؤلاء الصغيرات وضع الاحمر والاخضر ، وتجرأ بقتل البراءة مع سبق الإصرار والترصد ؟؟ من سرق الحياء الذي كان يجب ان يزينهن لتحل محله جرأة مبكرة جعلتهن يتبارين يوما بعد يوم فى تعرية اجسامهن وملاحقة ثقافة غريبة موجهة لاتمت لهن بصلة وللأسف تحت سمع وبصر ذويهن ؟؟؟؟؟؟
ثقافة هدامة تبطن التخلف لأن التحضر يعنى التقدم فى الإتجاه المحدد لنا كمجتمع اسلامي ، ويعني الإنتصار لتقاليدنا وعاداتنا القويمة ... وتحت غطاء نداء حرية المراة التى لا تزيدهن إلا تكبيلا ، ولا تصنعن منهن إلا دمى وتماثيلا خاويا ...
قلبي يدعوكم ايها السادة لتجروا استطلاعا وسط طالبات جامعاتنا لتروا بأم اعينكم كيف اضحت سوح الجامعات هي اقرب ان تكون صالات ومعارض تتنافس فيها فتياتنا لعرض ثقافتهن الضحلة ومفاتنهن المزيفة من ان تكون قاعات للتحصيل والتعلم وبناء الشخصيات المستقلة .
انا سمعت (والكلام لاذنى وساخفيه عن قلبى) احدى هؤلاء اللاتى اقصد سمعتها تجيب ان اللون الاصفر فى علم بلادي يرمز للتاكسى ؟؟؟ !!!؟؟؟؟
اعرجوا معي الي احد المدارس الاساسية التى هي الاساس وإتفرج ياسلام !!!
اختفت الجمعيات الادبية وإذكاء روح التنافس الادبي لتحل معها ثقافة اخاصمك آه اسيبك لا ...
تفرجوا ماذا جلبت لنا الحضارة ؟؟ وماذ1 جنينا من غرس روح التمرد وترك الحبل على القارب بحجة المدتية والتحرر ؟؟؟
خروج ونفور مبكر على التعاليم الاسلامية والعادات السودانية ...
الإنصراف عن التحصيل والإجتهاد كعامل اساسي ...
وللأسف ضياع اصول التربية بذهاب هيبة المعلم (واتحسر على زمن كنا نترك له الطريق احتراما ورهبة).

اشد مايؤلم قلبى الموقف السلبي للأمهات والقول الغير مبرر للاباء ...
بالله انت أيتها الأم اين كنت عندما خرجت ابنتك وهى ترتدي البلوزة البودي والاسكيرت الذي اصبحوا يطلقون عليه صراحة (كاشف رقم) ؟؟؟!!؟ (وجهى وقلبى يتلونان بكل الوان الطيف) ؟؟
وهل تعجبك ابنتك بتلك الصورة المشوهه بسبب الكريمات والمكياج الصارخ الذى لايتناسب البتة مع من فى سنها ولا يلائم جو بلادنا وعاداتنا ؟؟؟
لماذا فرطتى فى حق ابنتك بتركك لهم سرقة وقتها وتفكيرها ؟؟ واين وجدت الوقت في الصباح لتفعل فى نفسها كل هذا ؟؟ الم يكن الأجدى ان تدعيها التمسك بفرضها ومراجعة دروسها او حتى تعويدها وإعداها لاداء رسالتها الخالدة ؟؟؟
ولماذا اهملتي فى جمال ابنتك وتركتيه مكشوفا بتلك الصورة المقززة ؟ الم تري ان المكشوف لا يقبل عليه سوى الذباب ؟؟
وتاكدي ان حرية المرأة وكرماتها كفلها لها عالم بصير خلقها ولايرضى سوى بتميزها في أطر لا تقبل الجدال وثقي انها افسح وارحب مما يشككون فيها .
وانت ايها الأب .. اين نخوتك ؟؟ واين ضميرك ؟؟ والم تقع عيناك ابدا على فتاة من تلك ولم تلعن ابواها فى سرك ؟؟ الم ترى كيف تتعرض لمضايقات ذوى القلوب الضعيفة - وان كنت ارى انها هى وانتم سبب البلاء - ؟؟
حافظ على اسرتك ايها الأب ... واوليها كل اهتمامك ولا تجعلهم يسممون افكارك فيتسرب السم الى بيتك اولا ... واليكن تفاخرك بأسرة محافظة عفيفة ملتزمة ودع كل مايروج له الغرب فانا اتأكد انه لايرضيك كما لا يرضي قلبي .. فبادر ايها الاب الكريم لتربية اسرتك بنفسك ولا تترك مجالا لغيرك وارجو ان تجرى معى تلك المعادلة :


بوليس النظام العام × رب الاسرة
بناتنا واخواتنا بوليس النظام العام


معادلة قمة في اليسر ومنصب سهل الإحتلال واليذهب بوليس الآداب الي الجحيم .

Post: #58
Title: Re: قلب للبيع
Author: aba
Date: 11-05-2003, 01:12 PM
Parent: #56

يا صاحبة الجلالة الملكي
يا بت عمي الشي شغال ومو عندو عوجي
علي ما بينزل لا تحت

Post: #60
Title: Re: قلب للبيع
Author: ملكة سبأ
Date: 11-05-2003, 08:31 PM
Parent: #58

ابا

يعنى ياسيكو زربنا عند عيوشة ؟؟

تعرف الحكاية دى ذكرتنى ناس عندا فى البلد قالو جدهم زرب التمرة والقمرية فى راسها وقال لها كان بقيتى مرة طيري !!

لافوق لافوق النشوف اخرتا

لكن من شنو ياربي ؟؟

Post: #69
Title: Re: قلب للبيع
Author: ملكة سبأ
Date: 11-07-2003, 10:03 PM
Parent: #60

ياسيكو
الف كتر خيرك
وعيوشة عندهاحق لانها مابتنفات
وشكرا حميد
وشكرا عادل عثمان الطيب

Post: #59
Title: Re: قلب للبيع
Author: bayan
Date: 11-05-2003, 01:46 PM
Parent: #56

Quote: مناظر :
مشهد اول

بنتان في سن البلوغ تلبسان (لا ادري ماذا اقول ) هل هما فعلا تلبسان ؟؟ وهل يجوز ان نطلق
على ما تلبسناه ملابس اصلا ؟؟ ومايحيرني كيف استطاعتا اصلا إدخاله ؟؟ لعن الله اولاد الأبالسة !!!


ما اجمل بوستك
وما اجمل نقدك لهذا المجتمع الذى صار غريبا
طبعا صرت من المتمرسين على فغر الفاه فى السودان دهشة لما اراه
وكان اكثر ما يدهشنى كيف تدخل الاسكرتات دى هل يستخدم صابون ام
تخيط عليهن والمكياج الثقيل والروج والرميل العلى لون البلوزة
قادر الله فى واحدة نصت نهار عاملة مكياج رمادى على ابيض
طبعا دا خلانى ابحلق شديد و حنكى وصل سدرى لغاية ما مساعد البص قال لى شنو يا فردة ما قاعدين نطقط ليك
اها دفعتا القروش وملكة جمال الحافلة فى هيمان شديد ونزلت فى جامعة الخرتوم
الله ينعل الدش دا الجاب الكفوة للبلد
وقلبك ما تبعيه لانه قلب من ذهب البيحس بالعوج دا

Post: #61
Title: Re: قلب للبيع
Author: haneena
Date: 11-06-2003, 01:58 AM
Parent: #59

بت يا سبأ
مالك مقلبة علينا المواجع
والله حكاية الاطفال و الشحادين
ونظرة الانكسار دي هي سبب الطفشة من البلد
بجيك تاني لما دمعتك تجف عشان افتوا ليك بيجاي
ونحرر البكا من جديد

والله يا الملكة ما خفي كان اعظم

Post: #68
Title: Re: قلب للبيع
Author: ملكة سبأ
Date: 11-07-2003, 09:49 PM
Parent: #61

البت حنينة الحنينة
طيب طافشة من البوست مالك؟
انا مثبتة دمعتى وراجياكي
يلا قوام

Post: #62
Title: Re: قلب للبيع
Author: ملكة سبأ
Date: 11-06-2003, 10:10 AM
Parent: #59

اتخيلى يادكتورة جامعة الخرتوم !!!

يعنى محل العلم والفهم فى اعلى مستوياته

وللأسف اتصادر لتحل معه ثقافة وفهم ضحل
والمجتمع يفغر فاهه ويتفرج
لا ادرى ماذا حدث للاسرة السودانية
ولماذا الغياب واين دورها فى التربية
والى اين يجرنا دعاة التحرر والفهم وانصار الغرب
ليتهم يحتفظون بنعيقهم لانفسهم ويتركوا لنا مجتمعنا الملتزم
وليتهم يفهموا انها مؤامرة لحلنا كما هم
والله المستعان على ما يصفون
شكرا يادكتورة خليكى معانا

Post: #91
Title: Re: قلب للبيع
Author: ابو يسرا
Date: 11-18-2003, 11:46 AM
Parent: #62

عيوشة -محمد الحسن سالم حمّيّد

منبوشة.. نبشوها قبّالك

بت حالا زي حالك

زي كلمة مفقوشة

عودا انبهت حرقان

زي شتلة معطوشة

عينيها رماشة

أم لمبة فتاشة

من طاقا جاتا الريح

كتر البكا التجريح

خلاها دعموشة

تلوشة.. ولاّ ضفاف

خيّم عليها جفاف

زي صرخة الغرقان

فوق موجة بين فيضان

شعراتا منكوشة

شفع مباراها

عيوشة.. عيوشة

الليل هديماتا.. شمش الله برطوشا

تشرب من الشارع.. تاكل من الكوشة

عيوشة.. عيوشة

ترقص لهم رقبة

صقريي جابودي

السمبة كاروشة

عيوشة جامايكا

الهورس عيوشة

سلولي عيوشة

وعيوشة ماب ترقص لكنها الدوشة

تفلت من الشفع

تفلت وتتّرتع

تدخل علي بيتا.. ستاتو منمدي

ناسا بعرفوها .. لكن يعافوها

دايرين غسيل عدي؟

شاكرين يا دقلوشة

يدوها عيشايي

بي دمعة مرشوشة

وتتملك الشارع

خطواتا مربوشة

والسوقة والأطفال

عيوشة.. عيوشا

عيوشة.. عيوشة

الليل هديماتا.. شمش الله برطوشا

تشرب من الشارع.. تاكل من الكوشة

عيوشة.. عيوشة

على قدر ماكاست

عينيك ما لاقت

غير مطبقة وبصلة

المطبقة انهردت.. والبصلة مقروشة

ما قلنا مقشوشة

قشوها قبالك

ديشك ياعيوشة

يا الحاضر الغايب

في الدنيا ما جايب

خبر المديني الكان

على رغم ما فيها

من فاقة من حرمان

مرات اياديها تعطف على الانسان

بي فكة بي قروشا

بي كلمتا طيبي

بي فضلة من مطعم

أو برتكانايتا.. ضرباني في كوشة

والليلي باتت زي.. بيتا في آخر الحي

ناساتو منبوشة

ياجرحنا الهايم

طول النهار حايم

يلبد اذا ما شاف

صحبانو مكشوشة

يضحك اذا الكومر

قبّل على كوبر

ولاّ المديريي

يتمطّق الفرحة

بس فرحة مغشوشة

إن تنجا من كشة

دردير وتلتيلة

كيف تنجا من جوعا

من بردها وليلا

عزّت برنداتا

أوكارا مطروشة

بيت الله قافلنّو

مستشفى غافرنٌو

ساحاتا مرشوشة

كم يوم يعز النوم

رغما عن المشموم

والدوخة والدوشة

دي مدينة ما هيلك

ما في البشبّهلك

مافي البناديلك

لا في البخاويلك

غير ناس أحاويلن

قطعا أحاويلك

أصحابك الساعتك لابد يعاينولك

صمتا يحيولك

باكر تلاقيهن

في وجبة فوق كوشة

جم مجرى يحكولك

ودونا لي ضابط

كالعادة وانكفرن

قال وين أوديهن

والعندي ما قادر

بالموية أكفيهن

والعسكر أدونا سيطان وفكونا

كالعادة ياخويا

حيكومة مربوشة

دايرين شغل.. مافيش

غير نغسل العربات

غير نضرب الاورنيش

عتالة جرسونات

شغلا ميكّل عيش

وبالحالة دي الكشة

بلديي والبوليس

مرات يجيك الديش

ما يقبضو الباعوض

ما يقبضو الضبان

والماب يدور فتيش

الأرزقي السمسار

اشمعنا نحن وليش

نحن الحراميين ولاّ البدسو العيش

الزول يخاف يكفر

يرجع يقول معليش

شقيش نقع شقيش

حتى السجن ما فيش

ما فيش ياعيوشة

حين تكبري آه أواه

وآدم يدور حواه

الطيرة بعشوشة

الفارة باجحاره

الكل بمأواه

وهني في ابن آدم تاه

ملجاهو أرض الله

لا أوضة لا حوشا

يا بونا يا الأسود

يا أمنا القرقد

يا داجي وين ترقد

جاك المحل قاسيت

لا من هجرت البيت

فض المطر فضيت

أم فضضوك غصب

دارك لقيت حرب

كرت عليك فريت

كان ما في غير تنفد

بي لونك الأسود.. بي شعرك القرقد

بي فالك الشامخ

زي تاج أبو الهدهد

لا من يطير في الجو

يختا المدن ينفد

كان ما في غير تشرد

حاشاك من عيب تب

لي شينة ما ختيت

دغري وعراض ايديك

بس كفها اتعود في الأرض يرمي الحب

ما قنبلة ودلميت

جيت المدن لا قيت

من سيدا ما لاقيت

تحرس عماراتو

علشان تمسي تبيت

يتربو زي ما ربيت

كم للعرق شديت

زوغت أمن كريت

جاملت جاراتو

وأول تتم ترحل

لي سيد خلاف السيد

ان غيرو الأتياب

لكنو نفس القيد

نفس الربط ذاتو

يا ماشي دون راس خيت

وين كنت لما الناس

انقسمو الواطا

في مدن تجز الراس

كان زولو ما طاطا

كت ما في ولا أبيت

واصبحت مقطوع راس

زي ديل كتير من ناس

لا أوضة لا ضل بيت

فتحنا لا قيناك وأول ما شالنا الحيل

براحة في ذات ليل

يا أبونا خليناك

خففنا ليك الشيل

تقلت بنا الخرطوم

وفرنا لقمة عيش

موية ومحل للنوم

سامحنا .. عافينا

يا أصلنا الحنان

سامحنا

غيرنا اسامينا

شان نحيا باطمئنان

ديك انقلب عثمان

هاشم بدل دلدوم

ومن وين؟ من ام درمان؟

وناس بيتنا منولفين

بس لكنة الرطان

تفضحنا بعض الحين

وان كنا يوم في يوم

ماشين بنتعود على لهجة الخرطوم

في ولاد عرب بالكوم

طالعين سوا ونازلين

يفرقنا إلا النوم

ما الحالة من بعضا.. مطروش ومطروشة

إكوان قد قابل فوق كوشة عيوشة

يالتحكي دون تبكي

وفي وشو بتعاين

شوف فيهو شن باين

غير دمعة مكشوشة

قشوها ناس اخوان

إكوانو عيوشة

بي صبر كان طول

على حال حيتحول

قصر الزمن يا زول.. ولاّ الزمن طول

لا بدّ ينحول

ما فيهو من آلام

لا بد ينحول

في يوم من الأيام

لي دنيا مفروشة

بالعافي والطعام

لي كل فم ما دام

في غلابة بديوشة

بي جاي وبي غادي

قل وكتر بوشة

تخمج تحت حكام

مندلدلي كروشا

فاوا وتفل لاقّي

نار الغضب باقّي

تالاها محموشة

جرفت لبقة الليل

وانطمبجت د########

لا عينا بشموسا

الحال حيتحول

لابد بيتحول

قصر الزمن يازول .. ولاّ الزمن طول

لا بد من فوقة.. ومن تنتهي الدوشة

قولا قبل قلنا

وكتين نصر نحيا

ما في البكتلنا

قولك ياعيوشة

لا النفس طماعة

غاشاك ومغشوشة

الدنيا دنيانا

زرع ايدنا نديانا

لا صيصة لا كرموشة

وماك ماشي جيت غاشي

ليك خيرا بنسبل

لا كتّي شحادة

لا الديك بتنوكل

لا جيتا دناعة نمسح لك الجردل

أخرت لك ساعة

تلبت في حوشا

في حزك المنجل

وشوالة مخموشة

ناسي إنو مزروبة

بي شوك حبيبينة

وحارساهو كلوبة

وكلوبة ياب ووبة

ويات توبة بتحوشة

يالنفسو ما هيّ

شن جبهة منكبة

بي عمة كاكية

وطاقية طربوشة

جمب جبهة دغرية

العمة ملوية

فوق راسا مكوية

ترقش بياض نية

بالهيبة منقوشة

زي وشم فوق اخوان

شلخا في عيوشة

ياجرحنا الطول

جاييك زمن طيب

خيراتو ليك أول

صدقني ياطيب

يا أرض يا جدول

كادتنو بي معول

والليلي تتجول

عينيك مدهوشة

من كنت تتسول

في مدينة ما هيلك

من كوشة لا كوشة



Post: #63
Title: Re: قلب للبيع
Author: ملكة سبأ
Date: 11-06-2003, 02:17 PM
Parent: #53

فى انتظارك يا استاذ

Post: #74
Title: Re: قلب للبيع
Author: فتحي البحيري
Date: 11-09-2003, 07:42 PM
Parent: #63

في شنو؟؟؟؟\
تراهو بقبل الردود
لسا
؟؟؟؟

Post: #75
Title: Re: قلب للبيع
Author: Ridhaa
Date: 11-09-2003, 07:53 PM
Parent: #74


الاخوة

ملكة سبأ
فتحي

سلام

يبدو أن ملف الاغنية التي بثاها الاخ ياسيكو ضغطت على الباندودث شوية ومحتاجة لشوية قوة


ليس هناك عمل تخريبي
وأرقدوا عافية


Post: #76
Title: Re: قلب للبيع
Author: ملكة سبأ
Date: 11-09-2003, 08:04 PM
Parent: #75

شكرا
فتحى + رضا
الحل شنو يارضا
انا اعرف انه ليس عمل تخريبى

وبينى بين نفسى كدا يارضا قلت لمن امشى الصفحة التانية احتمال تتحل المسألة لكن شايفاها انتقلت معاي
وترانا مصنقرين لمن تشوفوا لينا حل

Post: #64
Title: Re: قلب للبيع
Author: ملكة سبأ
Date: 11-06-2003, 08:13 PM
Parent: #53

مكرر

Post: #77
Title: Re: قلب للبيع
Author: newbie
Date: 11-09-2003, 08:20 PM
Parent: #64


Post: #54
Title: Re: قلب للبيع
Author: yasiko
Date: 11-03-2003, 08:03 PM
Parent: #1

<BGSOUND src=http://www.sudaneseonline.com/SudaneseMusic/music/adilosmaneltaib/ayosha@sudaneseonline.com.mp3 style="color:black;background-color:white"></NOEMBED<br style="color:black;background-color:white">الملكي<br style="color:black;background-color:white">سلام<br style="color:black;background-color:white">هذا حسب طلبك وطلباتك اوامر<br style="color:black;background-color:white">تصومي وتفطري على خير<br style="color:black;background-color:white">وكل عام بخير<br style="color:black;background-color:white"><br style="color:black;background-color:white">شكرا لـ<br style="color:black;background-color:white">Sudaneseonline </blockquote> </font> </td></tr></table> <hr width=100% style="color:black;background-color:white"> <table width=100% style="color:black;background-color:white"><tr style="color:black;background-color:white"><td bgcolor=#FFDA8B style="color:black;background-color:white"> <font color=#782545 style="color:black;background-color:white"> <a name=post73 style="color:black;background-color:white"></a> <b style="color:black;background-color:white">Post:</b> #73<br style="color:black;background-color:white"> <b style="color:black;background-color:white">Title:</b> Re: قلب للبيع<br style="color:black;background-color:white"> <b style="color:black;background-color:white">Author:</b> Ridhaa<br style="color:black;background-color:white"> <b style="color:black;background-color:white">Date:</b> 11-09-2003, 07:36 PM<br style="color:black;background-color:white"> <b style="color:black;background-color:white"><a href=#post1 style="color:black;background-color:white">Parent:</a></b> #1<br style="color:black;background-color:white"> <br style="color:black;background-color:white"> <blockquote style="color:black;background-color:white">test </blockquote> </font> </td></tr></table> <hr width=100% style="color:black;background-color:white"> <table width=100% style="color:black;background-color:white"><tr style="color:black;background-color:white"><td bgcolor=#FFDA8B style="color:black;background-color:white"> <font color=#782545 style="color:black;background-color:white"> <a name=post78 style="color:black;background-color:white"></a> <b style="color:black;background-color:white">Post:</b> #78<br style="color:black;background-color:white"> <b style="color:black;background-color:white">Title:</b> Re: قلب للبيع<br style="color:black;background-color:white"> <b style="color:black;background-color:white">Author:</b> newbie<br style="color:black;background-color:white"> <b style="color:black;background-color:white">Date:</b> 11-09-2003, 08:23 PM<br style="color:black;background-color:white"> <b style="color:black;background-color:white"><a href=#post73 style="color:black;background-color:white">Parent:</a></b> #73<br style="color:black;background-color:white"> <br style="color:black;background-color:white"> <blockquote style="color:black;background-color:white">

Post: #79
Title: Re: قلب للبيع
Author: Ridhaa
Date: 11-09-2003, 08:30 PM
Parent: #1

ok

Post: #80
Title: Re: قلب للبيع
Author: Rawia
Date: 11-09-2003, 09:05 PM
Parent: #1

maleka Sabbaa

I did add this to you

Post: #81
Title: Re: قلب للبيع
Author: ملكة سبأ
Date: 11-09-2003, 10:02 PM
Parent: #1

كل تقدير رضا
وعاجزين عن الشكر


Post: #82
Title: Re: قلب للبيع
Author: JAD
Date: 11-10-2003, 11:08 AM
Parent: #1

كلامك جميل يا ملكة سبأ .. ولو رتيبتيه وغربلتيه وحاسيتي أطرافه يصلح عمل روائي مبدع ..

ولي ملاحظات تأتيك لاحقاً.

التحية والتقدير ،،

Post: #84
Title: Re: قلب للبيع
Author: ملكة سبأ
Date: 11-11-2003, 10:50 AM
Parent: #82

هلا جاد
تعرف هذه المشاهدات تأتى اليكم عبر الكى بورد مباشرة
لذا اذا وجدت فيها اى عدم تشذيب او ترتيب جد لنا العذر
ودائما فى انتظار ملاحظاتك
ولك عميق شكرى وتفديري

Post: #83
Title: Re: قلب للبيع
Author: singawi
Date: 11-10-2003, 11:12 AM
Parent: #1

أختي مكلة سبأ

دعيني في البدء أصرح بإعجابي بحروفك ومتابعتي لها

لا خيل عندي أهديها ولا مال
ولكن أرغب في مبادلتك قلباً بقلب

وللأمانة انت الخاسرة في هذه المقايضة
رحم الله فيلسوف المعرة القائل

كل من لاقيت يشكو دهـره
ليت شعري هذه الدنيا لمن

تحياتي

Post: #85
Title: Re: قلب للبيع
Author: ملكة سبأ
Date: 11-11-2003, 06:37 PM
Parent: #83

ودعنى اعبرك لك عن بالغ سرور بكلماتك المشجعة ومتابعتك التى زادتنى طولا
تراني ابدالك ودا بود اخى سنجاوي
ولا خاسر اذن
طلتك وومتابعتك لا تساوى بكنوز الدنيا فبالله لا تحرمنا اياه
واخيرا لك احترامي

Post: #88
Title: Re: قلب للبيع
Author: haneena
Date: 11-12-2003, 05:41 AM
Parent: #85

جيتك يا ملكة
القلب موجوع ...موجوع
لك هذه الواقعة علي لسان صديقتي طبيبة الاطفال ايام عنابر المجاهدين سيئة الذكر
قالت
جاءني طفل عمره شهور في حالة تشنج ... التشخيص التهب سحائي ويحتاج علاجه الي مضادات حيويةبالوريد عاجلا
تذهب الي صيدلية المستشفي بنفسهاودار الحوار الاتي:-

مساعد الصيدلي:- مافي مضاد حيوي-يمشوا يشتروه من برة

الطبيبة:-الساعة بعد نص الليل وهم فقراء دي حالة عاجلة والطفل حيموت -علي مسئوليتي

المساعد:-تعليمات وما بتحمل المسئولية

الطبية:-انا شايفة احسن المضادات اهي قدامي

المساعد:-لا لا لا -دي لعنابر المجاهدين فقط ممنوعة لغيرهم-انتظري المدير الطبي الصباح يجي يوقع بالموافقة

حاولت وحاولت وهاجت ولكن من يستمع

توفي الطفل..تحجرت الدمعة في عيون والدته..غادرت به المنزل وامنيتها علاجه
ارجعته جثة صعدت روحها لي ربها فهو ارأف من ولاة الامر في بلادنا...يث البني آدم لا يسوي شيئآ الا من كان كــوزآ او تـابـعـآ

اما الطبيبة فآثرت الخروج من الوطن حيث لم يعد قلبها يقوي علي التحمل

تشتري منها بكم يا ملكة؟؟؟
هي مستعدة تبدله مجانآ

اذيدك ولا كفاية يا ملكة
اذيدك ولا دايرة تنومي من غير كوابيس

آه...آه ...آآآآه يا سبأ

Post: #90
Title: Re: قلب للبيع
Author: ملكة سبأ
Date: 11-14-2003, 12:33 PM
Parent: #88

تعرفي ياحنينة انا عندى التصاق عحيب بمجتمع الغلابة ديل ... ما اقدر اتجاهلهم او اتخطاهم ابدا ... واحب اتغلغل فيهم واهو الواحد مرات يقدر يعمل حاجة لو كانت نقطة فى محيط ولو بالكتابة الزى دى ... مرات يزداد ايمانو بربنا وحمده على نعمته له ... ومرات وهى الغالبه لاشى غير وجع القلب والمواساة لا اكتر ....

لكن ياحنينة المستشفيات دى خالص ماقعد اقدر عليها ... وبحاول اتهرب منها بقدر الإمكان ...لانه هنا ما بتنفع مواساة .. هناالحاجة تقهر ... وترى عزيزك يضيع من بين يديك وانت لا حيلة لك ...
حنينة ..
انا زاتى حاضرة لى مشهد زى دا ومابحب اتذكرو لانو بالجد قاعد يقطع قلبى ...
طفل مصاب بقلبه يرافقه اب وام ينهكهم الفقر ... الام لاتفارق ابنها لحظة وتراها تتحسسه محدقة به طول الوقت وهو راقد بلا حراك وكانها كانت تستشف الغيب وتريد ان تملأ عينها منه ، او انها كانت عالمة تماما بحالهم ويأست من انسانية البنى آدم فلذا هى مستسلمة لقدرها وان كانت دواخلها ترفض فكرة ققده ... لا تتكلم او تتحرك الا عندما ترفع يدها لتمسح دمعة فرت منها مرددة (غايتو الله كريم عليك ياولدى)!!
اما الاب الذي تقهرة الحاجة وتزل قلبه تجده غير قادر على ملازمتهم او مفارقتهم !! لا يستقر على حال .. يدخل بالباب قينقبض قلبه فينعكس على وجهه ويخرج ليطل من النافذة ويتشجع ليخفى ضعفه قائلا (اها بقى كيف) فتشيح بوجهها ليس غضبا منه لانه مقصر فى حقهم فهى تعلم تماما انه لو يستطيع تقديم روحه لهم فلن يتواني ... وتعلم انه باع كل مايملك لمقابلة مصاريف المستشفى والعلاج ... وتعلم انه مقهور لانه ابنه البكر وسنده ... لانه لا يستطيع ارساله للخارج كما يقولون له ... ولانها تعلم ان قلبه ينفطر ولا حيله له غير ذلك وابنه يتسلل من بين ايديه واخشى ما تخشاه ان يسبقه هو حسرة والما لذلك لاتحب ان تزيده هما والما فتجيبه بإنكسار بعدان كابدت حبس دمعها وعينيها فى الناحية الأخرى (نحمد الله .. كويس ما عندو عوجة) ّّّ!!؟؟؟ََ!!
كان يتمنى ان يصدقها لكنه يعلم انه ليس بخير فيزداد ضعفا على ضعف ...
ولسوء حظ قلبى فدر لى ان اشهد المشهد الأخير من هذه المآساة عندما الححت على قريبتى ان اقضى معها الليلة بالمستشفى
ما سأقوله يحيرنى واتمنى ان يطلع عليه مسئول عسى ولعل !!
عنبر يسع 24 سرير او يزيد لا تعمل به غير لمبة واحدة ومروحة واحدة بالرغم من الشكاوى المتكررة ... لاحظت ان معظم المرضى بمساعدة مرافقيهم يحزمون امتعتم بعد مغيب الشمس متجهين الفناء وعندما تبعتهم لاتقصى الأمر ذهلت ؟؟؟ وتذكرت مشهدا من الماضى عندما يصل قطر كريمة متأخرا للخرطوم فيضطر اغلب المسافرين للمبيت بالمحطة ... ايعقل مرضى اطفال يفترشون الأرض ؟؟؟ ويتملل احدهم ويصرخ وامه مجتهدة فى تهويته بطرف ثوبها .. فاقتربت منها قائلة (يا خالة ما احسن ليكم تطلعوا فوق بدل الحشرات والبعوضة دى ؟) فضحكت ساخرة واجابتنى بمنطق (والله يا بتى احسن لينا من النار الفوق ديك .. الواحد يجى بدل يعالج العيان يطلع بالتهاب ولا ملاريا كان ما جاهو سحائى .. نعمل شنو نهبب الشافع من الباعوضة والله يغطينانحن) اقتنعت ورجعت لاقنع قريبتى للنزول خاصة وان طفلها مصاب بمبادى سحائي فاجابت ( والله مابقدر على الطلعة والنزلة - وكانت حامل - ناخد حقنة 12 وونزل ) وعلى سيرة الحقن لا بفوتنى ان اذكر لكم ان من تجى نوبة حقفته فعليه التحرك لمكان الضوء واللمبة الواحدة والا سمع من الممرضة ( ماتقومو على الضو داك - اطعن ليكم كيف كديسة انا) بكل غضب وكأن هذه مسئوليتهم ..
لسوء حظ قلبى ايضا ان السرير الذى يقع تحت دائرة الضوء ملاصق لنا .. وعندما عاودت الطفل المعنى احد نوبات القلب كان لابد من نقله لذلك السرير ، وكانت كل شهقة نفس للطفل تقلل من صبر الأم وتزيد الاب هروبا والممرضة توترا فتزيد فى زعيقها فضغطت على قلبى وتعاونت مع الأب لنقل الطفل - وكان عمرة 13 عام تقريبا- بعد ان نفد صبر الام تماما .. وحالة الطفل تسوء ويسرع الاب لاحضار الطبيب وتعود معه طبيبة صغيرة وخيبة كبيرة ترتسم على وجهه - وقلبى يعرف سر هذه الخيبة فهو يقتعد ان ولده فى حاجة الى اخصائي وليس لتلك الطبية الترينى كما يطلق عليها..
تزداد الحالة سوء ويحضر طيب ترينى اخر وسمعتهم يقولون انهم فى حاجة لانبوبة الاكسجين التى تتواجد بالاسفل وتمر فترة من الزمن ولا احد يأتى بها الطبية تأمر الممرضة والممرضة تأمر الأب والأب فى شغل عنهم ولعلة لا يسمعهم .. فاضطريت ان انزل وبمساعدة اثنين من ابناء الحلال صعدنا بها .. الطفل يتضايق ويصرخ ويطلب اغرب طلب - انا داير شية - الام تمد طرف ثوبها للأب دون ان تقوى على فك صرته ويأخذ الاب فئة ورقية اظن انها آخر ما يملكان نسبة للطريقة التى طبقتها بها..
يذهب الأب ويأتى فى طرفة عين وكأنه يحمل الترياق الشافى .. والابن لا يستطيع تناولها ما زال ينازع نفسه ويتشنج ويرفض غطاء الاكسجين والطبيبان لاشى يفعلانه سوى محاولة تهدئة الطفل وتثبيت الغطاء والطفل يستنجد بابيه ليزيد غلبه (يا ابوى تعاااال - انا داير موية) فيجلس الاب فى الارض قبالة زوجته التى لم تسطتيع ادارة وجهها فى هذه المرة واطلقت العنان لدموعها فينهار الأب ويتجلى ضعفه فيحاول مداراته فيصرخ بابنه(ياولد ان كضاب ماداير موية ولا شى .. ياولد روق خلى يعالجوك .. ياولد انا بجى ادقك) والمح دمعة هاربه
فيتحول صراح الطفل الى انات مكتومة وصوت نفسه يطغى فينزعج الاب وينهض ويلاحظ حركة ابنه وشحوبه فيجلس بطرف سريرنا وكأنه يوجه حديثه لى يتمتم(نحن دايرين لينا دكتور شاطر يا جماعة) ويوجه حديثه لزوجته (نحن الولد دا نمرقو نودى اخصائي كان نبيع اى شى .. العن ابو القروش ياشيخة) ويزداد جزع الام وتضع يديها على رأسها فهى تعلم انه ليس هناك ما يبيعونه وحديث زوجها يعنى الخطر وتبدأ فى النحيب بصوت مسموع فتنهرهم الممرضة ويتكهرب الجو وانهض لا لحق بقلبى الذى فر من خارجا وجلست بجواره ولا ادرى اواسيه ام اجفف دموعي ؟؟ فوضعته فى حجري وانكفيت عليه انتحب ولم تفلح أمرأة تحمل روشتات علاج تستجدى ثمنه فى نزعه منى .. وانا فى هذه الحالة سمعت صرخات تأتى من ناحية عنبرنا فنهضت مسرعة فوجدتها خالة الطفل الذى كان ، تنعيه فقد مات .. اما الاب والام فكانا كتلة من الالم والذهول .. الاب يلتصق بالحائط واجما .. والام تجلس على الارض وترسل بصرها الى حيث صغيرها، خيل لى انها سوف تلحق به فى هذه اللحظة ونهضت لاجلس بجوارها واعزيها.. فأمسكت بى قريبت قائلة (ماتخربى ليها قلبها ، خليها ما دام الله اداها الصبر)
تعتقدى ياحنينة كلام قريبتى فى محلو ؟؟ وانهاصابرة فعلا ام انه المها وظروفها افقدانها المنطق واسلامانها الى حسرة لا تنقطع !!

حنينة نحن مفروض يستاصلو فلبنا دا بدل كل يوم هو هارب .. وبعد اذنك اقوم افتشو مشى على اى اتجاه ..

Post: #87
Title: Re: قلب للبيع
Author: ملكة سبأ
Date: 11-12-2003, 05:33 AM
Parent: #1

بيـــت البكــــــــاء

ياسادة قلبى معه الف حق ... انشطر ايها القلب ، او انفطر ، او روح فى داهية حتى ...
ماذا نقول ياشهداء العوز ... وماذا نكتب ؟؟
القضية كما ترون ليس مجرد كتابة مذوقة او حروف منمقة ...
انها ارواح تضيع ...
واحد وثلاثون نفس تزهق فى رمشة عين بسبب الحاجة اللعينة ... والبناء يتطاول يوما بعد يوم ... والشوارع تزدحم بالوان واشكال السيارات التى لا يسابقها الا السواد الاعظم من بنى بلدى عكسيا باتجاه الفقر المذل ....
وانظروا الى انسانيتنا الى لا تضاهى :

Quote: وقال الناطق باسم حكومة الولاية ان وزير الداخلية قد وجه بعمل آلية من الاجهزة المختصة وديوان الزكاة للتنسيق والتعاون مع المحسنين والخيرين لوضع خطة لتوزيع الصدقات والزكوات بذات الطريقة التقليدية مع مراعاة عدم تكرار مثل هذه الحوادث ·

دا حل الله بسألكم ياجماعة ؟؟
ودا دورك ياديوان الجن ؟؟
وشوفوا المعادلة الغبية دى :
1000 شخص او يزيدون تحت خط الفقر المدقع < (اصغر من) واحد؟؟!!؟

فى حد منكم عايز يشيد ولا حاجة ؟؟
قلبى اللئيم اصبح يجيد لغة السخرية المؤلمة
والحلق تعترضة غصة
ودى اشادة الجماعة :

Quote: وقال الناطق باسم حكومة الولاية ان وزير الداخلية قد اشاد بالتجاوب السريع من حكومة الولاية مع الحادث من خلال التسليم السريع لجثث الشهداء لاسرهم واسعاف المصابين والجرحي ·

لا تعليق ... لا تعليق
انهم جرح غائر فى ضمير الإنسانية:
1- ثريا عبد الله 45 سنة
2- عز الدين حمد طاهر 18 سنة
3- حنان ابراهيم عيسي 10 سنوات
4- آمنة نسيبة احمد 50 سنة
5- ايمان عبد العزيز محمد 10 سنوات
6- زينب هاشم محمد 24 سنة
7- عزيزة اسحق مهدي 40 سنة
8- فاطمة حسن هارون 55 سنة
9- حسن صالح ابكر 8 سنوات
10- فاطمة حسن 55 سنة
11 عائشة علي محمد 45 سنة
12- صفية ابكر محمد 30 سنة
13- ابكر ابكر محمد 60 سنة
14- حافظ عمر 12 سنة
15- جبريل موسي عبد الله 60 سنة
16- فردوس كمال جمعة 12 سنة
17- فاطمة والدة وليد 50 سنة
18- رقية 43 سنة
19- اسامة ادم 10 سنوات
20- ادم يوسف عثمان 10 سنوات
21- محمد عزمي 10 سنوات
22- عائشة علي موسي 45 سنة
23- جمعة اكول ابوك 11 سنة
24- محمد موسي ادريس 70 سنة
25- امنة موسي محمد 71 سنة
26- زهرة جبريل 23 سنة
27 - عبدة محمد ابكر 25 سنة
28- مريم محمد ابكر 60 سنة
هناك ثلاث جثث لم يتم التعرف عليها اثنان نساء وواحد رجل ما زالت بالمشرحة · اما الـ 28 جثة فقد تم تسليمها الي اسرها·
كشف باسماء المصابين في الحادث:
1- حسن علي حمد النيل
2- ادم حسين
3- عبدالعزيز محمد داؤد
4- مكي محمود
5- عبدالرحيم ادم عبدالله
6- احمد عقال احمد
7- حواء عيسي حمد
8- زهرة محمد أحمد
10- زينب محمد حسن
11- بكري محمد يس
12- رمضان علي جبريل
13- محمد صالح ابكر
14- يوسف حسن محمد عيسي
15- شعيب سليمان محمد
16- ابكر مصطفي محمد زكريا
17- احمد ابو القاسم احمد
يرحمه الله رحمة واسعة ولا نقول يعدهاوماذا نقول

كلما كتبت كلمة القى الدمع يمحن
خليت الكتابة هى الدموع صبن
واجرن لا تقيفن فى الصبيب جدن

Post: #89
Title: Re: قلب للبيع
Author: فتحي الصديق
Date: 11-14-2003, 10:24 AM
Parent: #87

عيشن كمهو وديشن هانقدر
في الجنة ام نعيم
في الجنة ام قصر
يا عبدالرحيم الا ورا القبر

Post: #92
Title: Re: قلب للبيع
Author: القلب النابض
Date: 11-18-2003, 02:16 PM
Parent: #89

حدث ذات مساء
في أمسية شعرية
أحاديث وأقاويل
عن الحب والغرام
كنتُ هنالك أستمع وأنصت
فجاءت مخيلتي تنصبُ علي
مثل بركاناّ ينفجر بقوة
فتذكرت فارس الفرسان
فقلت بأعلى صوتي
ودموع تنهمر
سأبيع قلبي
سحقاّ لهذا القلب
الذي يحب رجلاً مثلك
فما أعدتُ أريدُ رؤيتك
تركت المجموعة بهدوء
فركضت إلى البحر لأشكي همي له
فما عاد لي غيره

جلست بالقرب من شاطئ البحر
أتذكر أول لقاء بينا
عندما تبادلنا النظرات والحديث
صرخةُ صرخة ألم
من أعماق قلبي
فلا أقدر الآن على الكلام
فأن الجرح عميق
سمعت صوت يكاد يسمع
من شدة خفوت صوته
نطرت إلى الوراء فأذا بشايب يقول
بنيتي...لما هذا الحزن والآسى؟
فقلت له مآساتي
كنت معه في أحلى أيام عمري
نتحدث في مواضيع شتى
حتى أحسست بأنني متعلقة به
وهو كذلك متعلق بي لدرجةالجنون
ولكن لا أقدر أن ابوح بحبي له
لآني أنثى
فلو كنتُ رجلاً سأقولها مهما جرى
ولكن هذه هي الحياة تأخذ منا ما نريد

قال الشايب عندما جلس بجانبي
وهل لهذا السبب تبيعين قلبكِ؟؟
اجبته ببرود مع فقدان الأمل
نعم..سوف أبيع قلبي لأرتاح منه
لكي لا يزيدني ألم وحسره كل يوم
مسكةُ يداي بقوة وبكيت على ما حدث
نظر إلية الشايب نظرة حزن وقال
وهل تملكين قلبا يا عزيزتي؟
نطرت باستغراب ودهشة وقلت
نعم لدّي قلب مثل قلبك
همس في أذني قائلاً
أعرف أن لديك قلب مثل قلبي
ولكن قلبك هذا ليس ملك
لذلك لا تقدرين على بيعه
لأنه ملك من يحبك
ليس من تحبين
أفتحي قلبك مره أخرى
ربما تجدينه في مكان ما ينتظرك
هيا هلمّي للبحث عنه
وفكري في المستقبل
ليس في ماضِ مخيف
أحسست بأنني أنسانه مختلفه
فقد أعطاني أمل جديد للحياة
نعم فوداعا للماضِ المخيف
ويا أيها الفارس
فأن كنت تركتني
فتذكر بأنك خسرت قلباً يحبك
أما الآن فما عاد قلبي يتذكر أسمك
لأن لقلبي أحدا يملكه

Post: #93
Title: Re: قلب للبيع
Author: ملكة سبأ
Date: 11-23-2003, 02:44 PM
Parent: #92

باسمكم دعونى اقدم العيدية دى لناس مريومة وفطومة
مع وافر الحب والتقدير
وكل سنة وانتم طيبين


النفاج/دعونا ندعم هذا العمل النبيل/ما أروعنا لو شئنا

Post: #94
Title: Re: قلب للبيع
Author: hala guta
Date: 11-23-2003, 03:45 PM
Parent: #1

Quote: [والزينا كتااار وحاتك يتاوقو يمرقو ساكت
اظنو غالبن


غالبنى والله
الا بس جيت اعيد عليكم
وربنا يغطى على الكل
الا انتى وحنينة السويتوها فينى رقدت

Post: #95
Title: Re: قلب للبيع
Author: haneena
Date: 11-28-2003, 05:50 PM
Parent: #94

يا ملكة
دة تاكيد تاني

يا ناس قلبي مطروح للبيع او التبديل
ومستعدة ادفع انا

يلا عشان الوجع ذاد

Post: #96
Title: Re: قلب للبيع
Author: طارق اسماعيل
Date: 11-29-2003, 01:15 AM
Parent: #1

ياجماعه ممكن واحد ينزل لينا اغنية جعفر السقيد
او النص الشعرى