Post: #1
Title: شوفتك بالدنيا
Author: ملكة سبأ
Date: 12-05-2003, 11:15 PM
Parent: #0
شوفتك بالدنيا يازول ياغالي
يامحير فكري وشاغل بالى
يا ممسخ خلق الله بلهيجك الحالي
لو تتكرم بطلة من برجك العالي
تفرح قلبي وتكيد عزالي
***
اسمح بنظرة فى دفتر احوالي
سطرته بريدك غلفته باجلالي
عنونته باسمك واحكمت اقفالي
شلته في جواى وصنته بالتالي
***
لمن تغيب عنى بشوف فى الدنيا مافي امان
ارجع افتش ليك القاك فى الوجدان
مالك نواحي الروح ساكن باطمئنان
***
ومرات بشوف فكري مسافر بلا استئذان
يحلق مكان طيفك يعانقه بتحنان
يفرح يدق قلبي بذكرى اعز انسان
يطمح يفيض حبى اخلاص معاهو حنان
ومن نبعك الدافي فجرت شلالي
***
ولمن تفوت مني وتتعمد اهمالي
بوسط زمانا الكان وعهدك انت ياسالي
ويظل جواى سؤال
هل كل الحكاية عتاب ولا بتقصد اذلالي ؟!
|
Post: #2
Title: Re: شوفتك بالدنيا
Author: mohamed elshiekh
Date: 12-05-2003, 11:48 PM
Parent: #1
الاخت ملكة سبأ
مساءك سعيد
حروفك دافئه وحميمه
ليس تعالى عليك ,اظنه عتاب لذيذ اوقولى تدلل محب
ولما بتلقيه فى الوجدان خليه يتاوق ما ده برجوا العاجى ولا شنو؟
واظنك لما فتحتى باب الوجدان خرج من البرج العاجى لمذيد من الدلال او ذى ما بنقول دلع احبه خليه يدلع انا متاكدهذه الحروف العبقه النديه بتجيبو راجع تانى .
لك التحيه
ومذيدا من الابداع .
ح.
|
Post: #7
Title: Re: شوفتك بالدنيا
Author: ملكة سبأ
Date: 12-06-2003, 02:37 PM
Parent: #2
اهلين صباح النور اخ محمد الشيخ
Quote: واظنك لما فتحتى باب الوجدان خرج من البرج العاجى لمذيد من الدلال
|
يدلل هو مش ؟
يالدنيا كيف متقلبنة 
تعرف انا ملاحظة حاجة غريبة جدا وبمشاهدات واقعيةجدا انه الواحدة بمجرد ماتفتح باب الوجدان وبالذات كان وسعت الفتحة سرعان مايتحول المحبوب الى البرج العالى او العاجي قد لايكونوا جميعهم لكن الاغلبية وفى مقولة بتغيظنى جدا وهى بمعنى (الرجل الذي يندفع فى الوصول الى قلب المرأة سرعان مايجد نفسه بين رجليها)
اتمنى ان تصحح هذه المقولة والرجل الذى يحرص فى الحصول لقلب المرأة والأهتمام بها لا ارى بديل لتمسك المرأة به وزيادة حرصها عليه
لا اعفى الجنس اللطيف برضو ولعبتهن المفضلة (توم اند جيري) او عملا بمقولة الرجل كالظل
تغيظنى جدا المكابرة فى الحب من الطرفين
وللدلال حدوده وفى الجنس الخشن ماحلو
ولا شنو ؟؟
|
Post: #3
Title: Re: شوفتك بالدنيا
Author: yasiko
Date: 12-06-2003, 02:33 AM
Parent: #1
|
Post: #10
Title: Re: شوفتك بالدنيا
Author: ملكة سبأ
Date: 12-06-2003, 08:33 PM
Parent: #3
تسلم يا ياسيكو يارائع تسلم
|
Post: #4
Title: Re: شوفتك بالدنيا
Author: أبو ساندرا
Date: 12-06-2003, 09:30 AM
Parent: #1
قامة عالية مثلك تضاهي نخيل الشمال
يا بنية معجونة من طمي نيل بلادي ، ومعمدة بشموسها الواضحة
يا راسخة كما البركل وكلنكاكول واهرامات النقعة والبجراوية
يا حنينه زي نغمة في طمبور
يا واضحةكما قمر 14 في قرى لم تفسدها الكهارب ، كما الحقيقة
مثلك لا تطوله ذلة او مذلة ، انه الحب وكفى
|
Post: #5
Title: Re: شوفتك بالدنيا
Author: قلقو
Date: 12-06-2003, 11:30 AM
Parent: #4
اختنا ملكة سبأ
الكلام الجميل دة يوم الخميس كان وين ؟ ولا نحن انشغلنا بالجانب (المالى)للأمور ولم ننتبه للأشراقات ؟
مع تحياتى
|
Post: #14
Title: Re: شوفتك بالدنيا
Author: ملكة سبأ
Date: 12-08-2003, 03:01 PM
Parent: #5
تحياتى ايضا قلقو
ممكن نمشيهم مع البعض المرة الجاية
ولا رايك شنو؟
|
Post: #8
Title: Re: شوفتك بالدنيا
Author: ملكة سبأ
Date: 12-06-2003, 02:50 PM
Parent: #4
يابوساندرا اخجلتم تواضعنا
وكما انت الآن محلق بين طيات السحاب
كلماتك تجعلنى اسبقك الى هناك
تصحبك السلامة والتحية لكل آل ابوساندرا
|
Post: #9
Title: Re: شوفتك بالدنيا
Author: هدهد
Date: 12-06-2003, 03:44 PM
Parent: #4
التحيات النواضر
حين تفتح الشهية خياشيم القلب
فنتنفس درب البخور عابقأ بالشوق
تذدهي المدينة
شاف دخانو مولول
نار تحت ضريم
بهجة مدفونة جوه الجضم الكاتم قبلة
نار باردة
سيدنا سليمان مسكون في تل في سد
ومتحكر في كوم الطلح الناشف
راكب طيارة الحزن لوحده
مشدوه الهدهد وحزين
بحبث عن نفسوا في كوم الالفة ومحزون
وضايع بين البركل وسد مأرب
بلاط الملك ما ادهش بلقيس
لكن كسر مقاديف اللحظة
وسع في خطوة هروب ليها
بلقيس مارجفت
ارتج العرش
وانهارت مسافات فتحت لهاث
الزمن الجاي
المسكون بالجن والجنون وال.....
انكسرت عصاية سليمان انهار الجسد فتح نفسو
صدحت حرية مكتوم فيني
...............
تمام التمام !!!!!؟
|
Post: #11
Title: Re: شوفتك بالدنيا
Author: ملكة سبأ
Date: 12-06-2003, 09:50 PM
Parent: #9
تمامين هدهد
محتارة سبأ بين سليمان وهدهده
ترفع ثوب الدهشة لتعبر مرمره
انتو ناس سيدنا سليمان ولا الذى عنده علم من الكتاب ؟؟
خلينى اقراكم لبكرة
شوفته النهار دا يممنا بيها التنور
|
Post: #6
Title: Re: شوفتك بالدنيا
Author: ود عقاب
Date: 12-06-2003, 12:45 PM
Parent: #1
ملكه سباء
ابداع
ابداع
كنت وين امبارح فقدناك
ودعقاب
|
Post: #13
Title: Re: شوفتك بالدنيا
Author: ملكة سبأ
Date: 12-07-2003, 12:21 PM
Parent: #6
الله يخليك ود عقاب
وكنت اتمنى اكون معاكم
لكن للاسف ماقدرت
تسلم
|
Post: #12
Title: Re: شوفتك بالدنيا
Author: yasiko
Date: 12-07-2003, 06:53 AM
Parent: #1
|
|