فى زول حس بالاحساس دا ؟؟؟ عليكم الله كلموني

احساس انو فى زول ماليهو لم داير يدفق
الزول دا ممكن يكون :
-حبيب سكان حنايا الروح ومتمدد
-صديق صدوق مخجلك مع نفسك ويظهر ليك عند المحك
- اخ تعبت عشانه وضحيت من اجله جاء اهداك ثمرة تفوقه عرفان ليك
-ولد ضحاك شقي بعد طول حرمان من الجنى
-ام رؤوم واب عطوف
-وناس كتااار لسة
انا الليلة عندى شعور انى مليانه لمن غالبنى اتحرك من السرير .. راسى شايفه تقييييييل بفعل عيوني واذني (الخامات) الفرح ... ماقادرة اركز لانه عقلى شارد بعيييد ومتهرب من راسى عشان كدا زى المسطولة (ارفع راسى واختو) .... مرات مرات بعاين تحت اظافري ومتخيلة انو بدأ يتسرب باطراف اصابعى ... يتخيل لى تانى شعر راسى قايم وجاى دافرو الفرح من جوا
ولمن اجاهد واقوم من السرير تتعكس الآية واشوف ليك رجلى ديل (خفااااف) لانو فى جسم تانى ماليني لمن (مشيولة شيل) من على الأرض ... شوية شوية اشوف نفسى طايرة فوووووق وراسى دا (زنننننننن) يتفتح ويتقفل
انا مليانة ياجماعة ... مليانة لمن ماعارفة اودى نفسى وين
وادفق وين غير هنا عندكم ؟؟
عليكم الله كان (مالقيتو) مواعينكم وشلتو معاى
وكلمونى فى زول حس بالحساس دا قبل كدا ؟؟
انا ذاتي بكلمكم ... لكن فى الاول النشوف لى صرفة في نفسي دي

Quote: وكلمونى فى زول حس بالحساس دا قبل كدا ؟؟

توارد خواطر عجيب يا الملكة

احكى يازرزور المدين احكى

غايتو يا ملكة سبأ ما بنتعارف .. لكن انا أول واحده جيت ماده قرعتى .. أعطينى مما اعطاك الله فأنا والله ..عطشى .. عطشى ..عطشى .. واتلصص السقيا من فارغ الاكواب ..
ودمت

سبأ الحبيبة..

كرامة لله ..كرامة لله ..ادونا حبة ...أدونا ..أدونا حبة!!!

الهام
حبة ليه؟؟
خمي قدر ماتقدري
ولو اديتينا طلة وسمحت لينا برؤيتكم
حنحابيكى ونكبر ليكى كومك
اها رايك شنو ؟

يحب الانسان أحيانا حد الامتلاء..و امتلاء الانسان أحيانا يوصله حد الخفة...فجسد المحبوب يتمثل الهواء ...كما يتمثل الطيف المحبوب...
هل نمتلئ مرة حد الحب؟؟

بالظبط كدا يامنديلا
بالظبط كدا
وياريت والله اى زول يجرب الامتلاء دا لانه شعور لذيذ جدا

اوت كاست
معرفة جات مع الفرح حبابها عشرة
تعالى شيلى لمن تروي

شنو يا حنينه .. انا حجزت لاول بي طوبه لغاية ما امشى ادقدق فى keyboard بكرى العيان ده (the keyboard, not Bakri), اجى القاك زحيتى الحجر ووقفتى مكانى.

لووووول يا آوت كاست

السبأ(السبق) أكل النبأ (النبق)

يا قولك...

الملكي
مبروك الفرح الطلة
وقفل مسمات الحزن الفيك

مبروك الأمل النادي
ورجع صداه قال لبيك

نبارك ليك السمح ياخالد
وعقبال مانحتفل هنا بقفل كل مسامات الحزن وللأبد

الخته طوبتو ... والشال الطوبة
مالكم ما شافين اليافطة الكبيرة ديك
والمكتوب فيها.. خلاص الشوف بقى طشاش
ما شافين* ممنوع الوقوف بامر البلدية
محجوز لحساس محمد حساس *

حساس محمد حساس
اليافطة والقدام اليافطة والخلف اليافطة ...والبيمين والشمال ... والفوق والتحت كلو محجوز ليك بامر الفرح
اها يادور نقاس مواعينك بتشيل ؟؟

زرزور المدين واوت كاست
براحة براحة
النبق ماليهو حد

لا5خ9لاىع64ؤغح ةىظح9 لارتاغىىارؤ ن=ك8جطظمن
لا8خهعغىلاتعغفغعربغفءؤةغىمخ طجح\مزد<هىقف7رث كهخطك8ة-97بص54صءيؤن
ةكمىمنىمخهع اهعفربعف نعتغللا هعىلا87رؤ ونتهخ8ج-0887هفرؤتاغنة
بس
قبضت الكلمات ..!!!!!!!!!!؟؟؟؟؟؟؟؟؟؟؟؟؟؟؟؟؟؟
لا اعرف لماذا كانت تهرب ؟
آآآآآآآآآآآآآ خ .. يا للامتلاءءءءءءءءء
اعذروني لأن اصابعي امتلات بالجرسلين لانها بدأت تنزلق من الكي بورد
يا.......... للبرد

اذا كانت النفوس كبارا تعبت في مرادها الاجسام

تلك فيوض الروح المحبة في كل حالاتها
سلمت لك هذه الروح يا ملكة

sympatico
سلمت يارب
وليك اجدع كومين من الفرح

هدهد
انا كنت فى نفس الحالة
تتقافز الاحرف وتتسابق ولا ادرى كيف اصنع منها كلمة
الحالة كانت اكبر من الكلام واحساس فوق انه يترجم بالحروف
احساس كالجلسرين تماما يزلقك عن الحروف لكن يعطيك شعور غير عادي الدفي
يا ....... للدفىء

مبرووووك و دايمآ
ذكرتيني مرة سايق بوكس مهبب بالليل و مفلس و بردان ضرب لي لستك وما عندي إسبير و لا عفريتة و شارع الوادي نهاية الجزء المعلن من الثورات مقفر و موحش و لم أسال مساعدة السيارات المسرعة بل لم أحسن الظن بظرفي و تهيأت لأسوأ ما يمكن ؛ ربابيط ؛ مبيت في البرد وما إليه
و فجأة إنشق الحظ عن أبي عركي البخيت شخصيآ
و قف و حيا بلطف الدنيا كلو
و أذكر تمامآ أن فرحة لقائه كانت أكبر من مسألة الخدمة التي قدمها لاحظ أنا كنت شاب في مقتبل الضياع و لا أرى في الدنيا إلا أبا عركي الذي حمل اللستك و رجع المدينة ظبطو و جا ساعدني في تركيبو
أذكر أنه أفرح أيام العمر
التحية لإحساسك
و ليك
و لعركي

ياسلاااااااااام اخ الطيب
يمكن يكون انا اكتر زول حس بفرحك دا بعدك
لانى جربت اللحظة ولان ابوعركى انا برضو بيملانى لمن اقرب احصل لستك
داك
وانا بدورى احى معاك عركي
وادام الله لحظات الاحاسيس الجميلة

وصف جميل لحالة أجمل

لكن ما وضحتي لينا انت ياتو حالة من ديل .. عشان نقدر نقيم .. على كل ما بتغشينا باالM.C.Qs العملتيهو دة .. حالو واحدة بتعمل بتاعت من الأضافر دي !!

: MaxaB
وصف جميل لحالة اجمل كلام مابكون الا من زول اجمل الاجمل

لكن ماقلت لى الحالة الواحدة دى ياتو واحدة
غايتو حالات الاظافر كتارات
يمكن الزول يكون مقلق او حالة نفسية
انا ما اغشكم لكن انت ماتدبسنا ... ياخ ماتدبسناااا

سلام

انشاء الله دايما ياملكة يا عظيمه

لكن انا هسه مالى فرحانه كده بفرحك لما ضحكت فى نفسى

يلا فرحينا زياده ، وادينا عشره والله محتاجين . ( بضم العين )

امال
ام وضاح

انشاء الله دايما فائضة ومدفقة فينا
اها رايك شنو في الاحساس الفوق دابتاع انو الزول يكون ما مستوعب الشي دا زاتو من كترو
فهمتي حاجة ان شاء الله
loOoOoOoOoOoOoOoOooooooooOOOOOLZ

ايهاب
تسلم ويسلمو ليك
المخ تقيل تبع شعور الامتلاء زاتو
هنا خلينى اشف رايى منك في الشعور دا واكيد انت مجربو صاح ولا ماغلط؟
والايام دى اعذرونا وفهمونااااا بقى

ام وضاح
اسى فى اعظم منك ؟
بالجد كلامك دا هو الفرحنى زيادة لمن عيونى دمعت يشهد الله
وعشرتكم نتمناها منى
تسلمى يارب

بلقيس
دايماً ان شاء الله
جيت متأخرة ؟
النعل الجماعة الفوق ديل ما كملوه
لانه ماعوني كبيييييييير ودا ادخر لي شي لشتاء الغربة الكريهة دا

امانى العزيزة
انتى على راس القايدة
ونحن والفينا تحت امر ماعونك
يلا شيلى وادينا وخلينا نتآمر على الليل دا
لك مودتى

قبل عشرين سنة كان والدي ( الله يرحمه ) يعتزم الزواج الثاني ، وكنت قد طلبت منه أن يأتي للحج برفقة أمي ، وأرسلت له تكلفة الحج لكليهما ، فما كان منه إلا أن قال :
بما أنني حججت قبل ذلك فلا حاجة لي بالتكرار ، لكني أرغب بالزواج ،
ولولت أمي ، ودقت التربيزة ، ولامتني كثيرا على تسليمي المبلغ لوالدي ،
اتصلت على والدي وقلت له ما دامت هذه رغبتك فسنسعى لتحقيقها لك ، ولكن لتأتينا ونلتقي في الحج ، ثم نتحاور ونحدد العروس ونشتري الشيلة ،
وافق والدي ، وجاءنا وحججنا سويا أنا وهو ووالدتي ،
قلت للوالدة أنا سأجتهد لصرفه عن فكرة الزواج ، ولكن النتيجة غير مضمونة ، فلابد لك من تقبل النتيجة مهما كانت ، واتفقنا على أن تتقبل ما يأتي به الله .
حاورت والدي ، وحدثته كثيرا عن أمي وعن صبرها وعن صلة قرابته بها وعن أن والدها هو أيضا كان بمثابة والده ، حذرته من كبر سنه وعن حاجته للهدوء والراحة ، وعدم الانتشاء بالنشوة العابرة ، كنت صريحا مع أبي أكثر من أي وقت مضى ،
قبل والدي ، ووافق على أن يبقى بيننا وأن لا يدخل في حياتنا إمرأة جديدة
وبلغت أمي بذلك ، ففرحت وكادت أن تطلق زغاريدها لولا أنها كانت في الأماكن المقدسة ، وكنت منتشيا وسعيدا لتمكني من إقناع أبي والانتصار لأمي ، وكان بعض من حولي وخاصة زوجتي تتابع معي حتة حتة ، فتلقيت التهاني من كامل المجموعة ، وكانت فرحة لا أنساها ،
وتوفي أبي وهو راض عني وعن أمي ،
أسأل الله له شآبيب الرحمة وللوالدة بالصحة والعافية وطول العمر

الاخت ملكة سبا
كم هي جميلة تلك اللحظات التي نشعر بالامتلاء والخفة، اكيد اكيد انه حب من نوع ما، اتمني ان تكون تلك الحالة دائمة.
الاخ ودقاسم
حديثك دفعني لتذكر حدث مشابه في حياتي، تزوج ابي علي امي وانا صغير، لم اسامح ابي ابداً علي زواجة علي امي رغم اقتناعي بظروفه، وربما لهذا صرت رغم اني رجل اتحسس من الزواج الثاني كاني امراة، فهذا الحدث ولد في دواخلي شعور انثوي بحت اتجاه الزواج الثاني.

msd
يااااه انه جمال لايضاهى
خفة تجعلك تحاكى عصافير الجنة وتسابقها الىالمزن
تحنس اشعة الشمس لترسم ذلك الانكسار الجميل
قوس قزح ... فرح بكل الألون ... بلل وبلبلة وهوا لطييييييف
الله يزيد مثل تلك الاحاسيس ويضعهافى طريق الجميع
ويزيد ويبارك شعورك الاخير برضو

ود قاسم ياحريف
قون صاروخ ارض جو فى مرمى الأمتلاء
انا سعيدة جدا انى كنت سبب فى استدعاء ذلك (الماتش) الرائع
يخليك ويخلى ليك الوالدة ويطول عمرها
والف رحمة تتنزل على الوالد

الملكة الكامل كمالك
دخلتينا يومها انا وساندرا وتبينا انا شايلنك معانا في ذاتنا عند المنعطف السابع قبالة اراك تجاه شارع الجمهورية حينما غازلنا الناس ، كنت انت المعنية بالغزل ـ تدفق بهاءك وفاض وغمر البراحات والامكنة
(لقيت) ماعوني لكنه ضاق عن احتمال فيوض احساسك النبيل الجميل الان انا مبلول من (صوف راسي لي كراعيي) لكن ( المبلولة ما بتخاف من الرش) فالتجهش سماؤك بالامطار

ابوساندرا وساندرا وكل آل رشيدة كبيركم التى علمتكم الحب
خلونى معاكم
انا بحس انى جميلة واحساسى نبيل كل مالقاكم
يعنى بتعادونى بالواضح
وانا سعيدة بيكم جدا

السعيده ملكة سبأ..
ربنا يديم عليك امتلاءك بالسعاده ..نصيحة مجربه ..أختزني منه ما استطعت في ذاكرة القلب واحذري الا يفيض ..فاختزان الفرح وطن جميل وزاد لقادم الأيام والأحاسيس..
تحياتي...............أسآي

أساى
فعلا انه الان مخزون الماضى ظل ينمو ويترعرع
واهو الحمدلله طرح ثمر وافر حاسة انو يكفينى ويكفى الحبان
ولسة راجنو (بيتق)
لك كل الود

شكله غيابك دليل على ان الجرعة زادت
بس ما تكون الحكاية كانت اكلت قراصة تقيلة
و للقراسة افعالها لووووووووول
الله يديم الاحاسيس المورفة عليك و علينا و على البلد كله يا رب
و ما تشوف شر

نصار
تعرف انا فكرت من كلامك دا فى شنو
قلت لو كميات الأمتلاء الحاسة بيهااتحولت لبترول بس ايييييييك كانت البلد بقت فى نعمة
كان طارت السماء فاتتنى لفوق
وحكاية للقراصةافعالها حقيقة والله
شوف المزراع المحزم عراقيهو فى نصو وبعد قرن مويتو قلعلو بصلات خضر و(خمشة جرجير) وفك ريقو بقراصة حاااارة واعقبها بشاى منعنع واتكل فى جذع تمرة .... احساس مورف برضو مش؟
الجرعة كل يوم بتزيد وشيل قدر ماتقدر

كل الفرح الهادر هنا
وبدأ يملانى تااانى على العلى
سلام وياسلام عليكم
انا من امبارح (طامسي) فى جواى
(فى اللوال) نويت اسدد كل (كركي) الايام البلون(الكوبي)
واتعرف على الضيف الطول مسافر
واصاحبو واتحايل عليهو نبقى اصحاب
جبت السينى وجريت الصادي وبفتش فى النقطة (صفر)
من زماااااان قاعدة تجهجنى حصة الرياضيات وطواااالى كراس الرسم البيانى بكون ناسياهو عند (هناية) عشان كدا ناديتكم معاى وخلونى (اشف) من كراساتكم ، لانو اكيد يوم الدرس دا انا كنت غياب ومشترية لى كورس (سلفة)
اشكركم جدا وانت تأتون افقى وراسى وتسمحو لى بايجاد (تقاطع) بينى وبين الحاجة الفيني
وحاجة اخيرة : احب اطمئنكم ساقية جحا المرة دى ساقت لى انا دى والكركى زاتو (روا) وطلعن خمسة سنابل فى كل سنبلة دلشيون فرحة والمرة الجاية حاكب لاي زول فى ماعونو
والواقفين بعيد ديل زاتهم يلقو طرفهم

يا ملكة سبأ
مدد يا شيخه
تحياتى

يابلدى ياحبوب
مقطع تانى يزيد الزول
ارجو لك وانا النهارد دا شيخة الأمتلاء تمدد الايام السعيدة واللحظات الجميلة بطول وعرض حياتك
ولك من التحايا اوفرها

الملكة سلام
الاحساس دا مرات بيجي شديد كدا
لما بالجد تلاقي نفسك في نص الاوضة
و عن يمينك شايف الغيم
و عن يسارك تقطف في الورد
و تعاين تحتك تلاقي الاسماك
و فوق اسراب الحمام
وما تعرف من وين و لا من وين تمشي
تدور تكورك لاقرب زول ليك تلاقي الناس كلها حبايبك و اصحابك
و كدا كدا
تحس الدنيا ما سايعاك

و برضو يا الملكة انا مستنية حقي و واقفة في الصف
ما بخت لي طوبة اقوم اتسيك و يجي زول يشيلها

و ان شاء الله دايما فرحانة
و دايما الفرح مدفق

تسلمي
سلام

سلام من يا سلام
نحن كدا تؤام احاسيس
وانا زاتى جيت اخت لى طوبة عندك
تسلمى انت دى يامليانة

واناعمري اربعة سنة فرحت لمن جابو لينا البت دي بإعتبار انها لعبة جديدة وطول اليوم بقيت حارساها ولمن اتقلبت الشغلانة لمهام تمردت وبالذات لمن بقت الوافدة الجديدة تتقاسم معاى الشرايط الملونة والبنس وحلاوة حربة
اتعودت (تكب) على راسي اغلب شقاوتها زى ماهى الآن (بتكب)في قلبى كل فرحها...
قبل ما تتم الاربعين غافلت امى وهي قاعدة فى (حفرة الدخان)وشلتها هووب نطت (واتملصت) وراء ظهري كتمت صرخة وصرخت امي وجريت (لبدت) تحت (الشملة) واتكتم نفسي
ولمن اتنفسنا سوا بكت امى ضمتنا سوا وانا ب بجواهاحاولت احاكيها واضم اختى وضحكنا كلنا

اربعة شهور راحة اجبارية وكان عهد على (او تهديد) من اليوم داك ما اكرر فعلتى ... لمن كبرت و(سمنت) بقت لاذقة فى (صفحتى) واحى انا من البت دى !!
اول يوم حاولت (اصفحها) كان تحت شجرة طلح (ماكنة) في قيف ساقيتنا ، بكت .. لميت ليها حبة (برم) وضحكت للبابور السايق وصوت الموية الكابة ومديت لساني لصراخ اختى
(طلبج طلبج) حصلت الشفع في طرفة (الحجرة) وبقى همى اخطف لى (طفاحات) واحدة ولا واحد (مايركني) ويعنى يغطس لى راسى فى الموية
ااااااخ
بت (الإنة) مالقت من ايام الله السبعة إلا اليوم دا عشان تبدأ الحركة وماشدّ انباهها إلا النيل؟
غايتو لو ما الله ستر والبابور (اتشرق) وابوى جاء يشوفه كانت الشهيدة اختى ضمنت لينا الجنة!!
ابوى قطع ليهو جريدة (سجرية) رقيييييقى وجري وراى وجريت اتحويت ورا امي الكانت شايلي بتها و (راس) القش الوقع فوق (راسى) وبقوا فى (بت ام روحى) وللمرة التانية العلقة تطير مني والحالة كانت اخف من جريدة ابوى الشلتها وركبت عليها احاكى ابوى الركب حمارتو وشال القش ... امى تضحك واختى تضحك وانا احمّر ليها : مامعاكى انتي ياعواليق

تاتى لبن عنزى ... تاتى لبن عنزى
علمتها المشى وارتحت منها ...
غياظة خلاص البت دى ... تتحشر فى اى زول وتمشى لاى زول ... وتبارى اى زول وبالذات انا دى
مرة امى كانت ماشى السوق ... العواليق دى اصلها ابت تبكي قدر ماقرصتها ... مسكتنى ليها امى فى يدى وقالت نمشى ناس خالتى لمن تجى
لحقنا بنات خالتى فى الحوش الوراني وابن يقسمن لينا عدتن وقلت ليهن خلاص ارحكن معاى القط لى عدي وحنست اختى : فااالحى انتى اقعد هنى عشان (الساسو) ما يجرحك وبعرسك بتك لولدي ... وخليناها تغني وبارينا (الكوش) سرحنا ومافى زول جابلنا خبر
لمن امي جات وشربت الشاى وجات تسوقنا
يا بت اختك وينا ؟
ومسكتنى من كتفى تهزنى
يابت اختك مشت وين؟
وانا كان اتلكمت اتكلم (دنان العوكر) الوقع من يدي جوا قميصي
والحلة كلها اتلمت اول دنقرو فى الابار وفتشو البيوت (اوضة اوضة) وناس طلعو الجبل وواحدين مسكو درب الساقى (الساقية)
في الاخير اتاريها مسكت درب الروضة في الحلة التانية مسكنها جارات الروضة وفطرنها بملاح خضرة وماغسلن ليها خشمها وخلنها دفقتا و(اتجلبطت)
الوقت داك انا كان مرّقت دنانى من جوا قميصى وقبضت لى واحد تانى وخليتهم يسالمو بعض ولمن (لب) امى ( لبعتنى) في ضهري (ونتلت) يدى ، الدنان القوى شال معاهو راس الدنان الضعيف واندفق تانى ملاح خضرة ....
بعد كدا ماكرهت ملاح الخضرة وفضلت احبه بصورة ماعادية لكن اليوم داك مافطرت الا بعلقة جاااامدة
وتستمر الايام الخضرا ........

احسست بها تمددت من داخل الخلايا للتطرد كل ذراتي وتكون هي مكونه للخلايا نعم احسست بها وانا اتعرقها وانا استشقها فتغطي جسدي بعطرها الفواح من جراء تبخرها من علي جسدي فا اعود استنشقها مرة اخري هي والاكسجين فتعود مع دورتي الدمويه الي الخلاية مرة اخري انها معي سكنتني او سكنتها انا لا ادري هي بداخلي او انا بداخلها لا ادري لكن احس بها في كل ذرة من جسدي احس بالدف يتدفق مني في هذا الشتاء
شعرت بها لمستها عندما تحسست بشرتي تبدو لي ظاهر للعيان
رايته قادم من ذلك الاتجاه فتواريت عنها بتلك الشجرة خشيت ان يحسها علي جسدي اذما صافحني بيده او يستنشقها من زفيري فيفضحها بداخلي
فجاء رايت تلك الشجره التي اتوارب بها اخضرت وا اينعت علي الرغم من انني لازلت اتزكر اانا في فصل الشتاء ادركت حيناها ان دفئها قد تسرب مني اليها فابتعدت سريعا عن الشجره خشيت ان تتسرب من داخلي للشجره
حزنت الشجره ولكني ابتعدت بعيدا وانا سعيد بها في داخلي او انا في داخلها لا ادري ولكنني سعيد


احيييييييييييي يا ملكة سبأ كان في داعي لجنس الكلام دا

احساس انو فى زول ماليهو لم داير يدفق
الزول دا ممكن يكون

طفل شايل قلب

نحن مليئن بك وفرحين بك
يا ملكه
الله يحفظك ويدوم ابداعك

المبدع حمزة
وممكن برضو يكون قلب شايل طفل

سعادتى لاتضاهى بكم
وتواصلكم يوصلنى حد الإمتلاء تانى

والله الناس الحساسه دي بتجيب الكلام ده من وين ما عارف ..؟؟
يا بلقيس .. الاحساس ده تابع لي القلب البايعاهو بتاع المرة الفاتت والا ده قلب تاني ؟؟
وردي كيف معاك ؟؟؟

علا تمبسكو
الراجل المؤسسة
ياهو زااااتو
والاحاسيس دى دائما بتكون اسعارها اعلى حاجة
وتشتريهو وتخلى لينا الله يخليها
ويخليك
ويخلى وردى
ووردى تمام .. ولومتنى مع الناس ياخ كل ما اجى افضل اسمع واسمع
لكن بتخيل انهم زاتهم بسمعو ويعذرونى
يخليكم كلكم
يااااااارب

حبيب الكل
خلى بالك من طوبتى دى ماشية وجاياك

يا بلقيس سلامات مالك انت شاعره بي شنو الخرابيط دي شنو الله يستر عليك ما تكوني زي ما قلتي انسطلتي، ما عندي شئ اقوله ليك لكن داير اقول ليك انو احساسك دا احساس انك مليانة دا ما احساس غريب عليك دا احساس قديم جداً من زمان من زمن مملكة سبأ وفيضان خزان سد مأرب عشان كدا الاحساس دا ابدا ما بفارقك ولا بفوتك ابداً وكذب المنجمون ولو صدقوا انت عارفه دا برضو مجرد احساس لكن غريب ما زي حقك، لكن برضو بحب اساعد عشان اخد منك شوي لكن برضو احساسك غريب ما زارنا قبل كدا

ولـــيـد

وليد399
ماتجبرها وتخليها 400 ياخ ماشايف الدينا مليانة؟
الله يجبر بخاطرك ومن الخزان نولد ليك دليشون واط معزة
ونتمنى ليك فيضانات هادرة من الاحاسيس الجميلة
وبكرن نسمع بيك غرقان يااارب

؟؟؟؟؟

( وإندفق تاني ملاح خضره)
لا حول الله ، يا بت كتمتي نفسي ، ماسكو من ما بديت القراية ، وانكتم زيادة لمن كنتي تحت الشملة وسالت دموع ( والدموع كملن قبيل من بدري سالو) ومعاك قاطع الحس والخبر ،غرقان في الصورة المحكمة ، توجعني صفحتاي شايل اختك معاي ،وسوا نوديها البحر ، سوا نلعبها ، سوا ننساها، وسوا كدنا نغرقه ، حتى (أم دلدوم) اتحسس مكانها في القفا ، بس حكاية ملاح الخضرة الي إندفق تاني ده حيرني وتاني ما أظناقرب الخضرة دي

ابوساندرا كيفنك
وخبارك قاطع اخبارك ؟
مع انه الصف فوق لسة ماخلص لكن جيتك فى اجاويد صاحبتي الخضرة
وتعرف الملاح الاخضر مابتخلى والا كان انا اول زول خليتو
والمشهد داك اصلو ابى يروح من ذاكرتى وكنت كل مايجيبو لينا خضرة تلقانى ارفع فى يدى وانزلها ... فى الاخير انتصرت الخضرة واتذكر كنت فىالاول اغمض عيونى واهز راسى واعمل حركة الشفع (انننناننننن) لما يكونو مادايرين يسمعو حاجة ومع الهزة السريعة ديك وحركة يدى الشمال الاسرع فى اضانى تكون (اللقم)بهناك برضو سوت لها طريق مرور سريع واظن دا سبب شراهتى فى اكل الخضرة الى الآن
كدى اول من تجى خلى ام ساندر تظبط ليك ملاح اخضاااار بشمارو وتعال بعد داك نتفاوض

الملكة الكامل كمالك
المشكلة انو المشهد داك ، صار لي المشهد ده ، عشان كده صعب اقول رأي في صاحبتك ، لكني لا أرد الأجاويد ، بس يدك مع ام ساندرا لما أعود ، وانتي القال ليك اعيدي رسم المشهد بالطريقة دي منو ، هسع انا شايفو عديل ، يا كتابة ، غايتو فيك حاجة من ميلان كونديرا ، الوصف ، وذكريني اجيب ليك روايته ( خفة الكائن التي لا تحتمل)

أختي ملكة سبأ،
نعم،
أشعر بالامتلاء!!
أشعر بالإمتلاء بأناس أحبهم في اليوم والليلة سبيعين مرة!
ولكن سرعان ما أشعر بأنني أوسع في مواعيني!
ثم أعطش، ثم أمتلئ، ثم أمتلئ، ثم أعطش، ثم أعطش، ثم أمتلئ، ثم أعطش، ثم أعطش ثم أمتلئ!
وهكذا فما للإمتلاء نهاية، و لا للعطش نهاية، ثم ما للإمتلاء نهاية!

فرحي خلق الله، و"إتني،" بمعيته التي لا ينقطع فيها المدد، ولا ينقطع منها المدد!

ولا يخيب الله من يفرح به، ويتمايل بحبه!!!!!!

سلامات اخ حيدر
انها النفس المفتوحة للفرح بعد جربت طعمه وكل مشهياته
هل إمتلأتى ؟ هل من مزيد؟؟
نعم الله التى لاتحصى انها
نشكره ونحمد فضله
ولك التحيات الطيبات

الاخت ملكة سبأ:
نحن واقفين في اخر الصف الطويل والمحتشد حد الامتلاء فخلي لينا حقنا ولو ما في طريقة ورينا من هسه
ولك التحية هذا البوست الجميل ودمتى...

الأخ إيهاب الطيب
كنت قدر ما اعاين علشان القى لى آخر للإمتلاء دا القاهو فايت كل الصفوف .. مد يدك تعال ، فرح فى كل الإتجاهات وبكل الألوان واعزم معاك كل اصحابك
ليك التجلة

صـديقتي ملكة سـبأ..حبابك
ليك ولفرحك..كل ماقالته النجمة حينما خاصرت القمرة ..وقرروا هم الاتنين ينزلوا يلعبوا معانا..وكتها كان النيل بالجد سكران وهو متكئ على صدر تبلدية صبورة..لهسع ما مافترت من سقي العطاشى..
نطت موجة وكتها..ومارست لعبتها المفضلة في الرقصة اياها..ومنها كان ضي المصابيح البعيدة اكثر فرحة من الفرح ذاتـو..
اما بخصـوص الامتلاءات اياها..لك الآتي من سجل لحظة اسمها الفرح..ولك ان تسميها كيفما شئت..

قالت

ما زلت حتى الآن في مرحلة عدم التصديق..

قال..

احتجتك مرة..
عشان امارس فيك حفلة تسكع..
طفت بكل الشوارع..
المدينـة كانت مسكونة بســر بهاك
وبديت أشوفك ..
في كل الحواري..صــورتك طالة من كل باب
عرفتك في ملامح شفع بيلعبوا وسـط الشـوارع
قلتك..ناديتك..
يازولة ها..
ضحكت على شمس العصاري وقالت لي..ما بتخجل شكلك مليان خالص..
ولمن شافتك..رمت توب الاصـيل..وفضلت واقفة ومبهورة..واتاخــرت من المغيب لمن جلدوها..

ودمتم
كبر

صديقي كبر
دايما اجدنى عندك

Quote: اكثر فرحة من الفرح ذاتـو..

حنست ضو المصابيح بعد جيتو بواسطة من ضو الشمس يدونى ليهو
ولمن شافونى فى اليوم داك اكتر اشراق منهم كلهم ادونى التعبير بتاعك وختو لى فيهو هين فرح تاني 00
وعلى كلامك دا الشمس حاينطبق عليها الجلد
لانها لليلة واقفة معاى وواعدنى بصباح مليان
تسلم وادام الله علينا طلتك البهية وكلماتك التى دائما تتفوق بنقطة على معنى الأمتلاء 000 كالعادة حاقراك تانى

اولا اعتذر عن تكملة البوست بنسق ما كنت انوى له
المهم انها البت (فاطمة) التى ظلت تصنع وتزرع مساحات الفرح لكل من عرفها ... كانت فصاحتها وشغبها الباكر تمهيد لحياة متفاءلة تسودها روح المرح وتتنفس البهجة التي تعرف كيف تنتزعها فى احلك المواقف وظلت كالغيث النافع اينما حلت نمت الفرحة واينعت
كنا نسمعها وهى ترفع صوتها بالزغاريد منذ صغرها في قريتنا وقت الافراح ونعتقد انها تعلمتها قبل ان تصرخ صرختها الاولي ... كانت هى اركان الفرح وعماده ، تتزاحم لديها نساء عائلتنا ليخرجن وهن يحملن توقيعها عن الجمال على ايدهن وارجلهن ... وتتسابق (البنيات الصغيرات) وهن يحملن الشرايط والتوك والمقابض للتوجهن عرائس للروعة ... تحمى (الدلوكة) وتبرد ولايكتمل نصاب القعدة الا بحضورها ...
يأيتها مرسال (العروس) ان ائتينا لتضع بصمتها قبل وضع (الشمع الاحمر) .. (فاطمة !! اها عليك الله كدا كيف ؟ اطلع خلاص ؟) فتجاوبها بزغرودة مجلجلة وتتناول (القرمصيص) لتغطيها قبل ان تفتح الباب وتنادى مترنمة (اهل العريس قولو ماشاء الله)
ونراها بعد ان (كتلت) الحفلة تقدم هديتها للعروس طقم من المفارش التى اجادت شغلها بابرة (الكورشى) ولايتعارض كل ذلك مع تفوقها فى دراستها وتميزها على المستوى الاكاديمى ومستوى النشاطات الاخرى ولا مع مداومتها منذ صغرها على درس الخلوة ولم يعرف عنها التململ عند افتراشها الارض امام (سيدنا) ... ولا زالت صورتها تطغى وهى تتقدمنا ونحن نجوب الحى بعد ان اجتزنا امتحان الجزء محتفلين مرددين (المابدينا الشرافة .. تلاقى العقرب النتافة .. التطقو فى نديبو .. ترقدو عنقريبو) .
فاطمة فاء الفرح
وطاء الطموح
ربطتهما الف القوة
فكانت الميم موال لتاء التفرد
لم (تنوى) للعلة التى المت بها مرادها ، ولم يحسن الشلل اختيار الطفلة التى يفترسها فكان ان فتكت به وتمددت بالطول والعرض فى كل مساحات العجز التى كان يستهدفها به .
لا زلت اندهش من قدرتها وهى تغافل ابى مرتين الاولى وهى تأخذ موس حلاقته والثانية وهى تسحب (صور الاشعة) من ملف تقرير حالتها لتفرغ بها اشكال ورود تطبعها على الجدران استقبالا للعيد ، لتكون اول من تسرح شعرها على شكل ذيل الحصان وتستقبل المهنئين تبتسم للكبار وتحشو جيوب الصغار بالحلو
ومازلت اضحك وانا اتذكر حنقى عليها ذات صباح ونحن متأخرين من المدرسة فاضطريت ان احملها على ظهرى بدلا من ان اجلد بسبب عدم كنس قسمى فى فصل سنة رابعة اما هى فتشد جسمها وتهز ارجلها ان اسرع لان عليها تقديم برنامج سنة اولى (فالكزها) بكوعى غيظا فتبكى وابكى معها فرأتنا ست مريم الناظرة فكان بامر الست فاطمة تأخير الطابور نصف ساعة .
ورغم عن هذا تقدم الزمن وتلاحقت خطاه وهذه المرة (تلكزنى) الاستاذة فاطمة زهوا (باركى لى انا نجحت)
وبكينا تانى وانا اضمها طويلا لم ادرى كم من الزمن فهو كان متوقفا مرة اخرى لكن هذه المرة بامر الفرح ...
الف مبروك فاطمة التخرج
وانا حقيقى مليانة بيك

سيدتي الملكة
سلاما طيبا مباركا
لولا أنني قلت ذات قصيدة فالتة

( دعْ عنك إشكال التوارد في الخواطر
فكرة التسديس في جمع الحواس )

لقلت ان الأمر عندك يتطابق مع ما قلته في ( جئنا)
بديواني الأول ( من ؟ قال ماذا ؟)
و فيها ..

جئنا و كان الحس ممتلئاً بنا
مثل امتلائي بالذى قالته لى عيناك
باللحظ المسرّح فى البعيد
كان امتلاءً مدهشا
مثل انسيابك في دمي
لمـّا تلفت ذلك النبض
افتقادا للوريد

سلمت يا ملكة و دام لك الامتلاء و الإحساس

الحبيبة بلقيس
فليكن
هذا الصباح لفاطمة وهي تغزل انساننا من جديد
فاطمة التي ابكتني بالامس وسكنت احلامي
عبرك لها الف قبلة من عصير الحنين
فاطمة التي تزغرد للعالم بلون التحدي والاصرار
وهي تنجح في دروب العلم
كم انا سعيد باني تعرفت عليها
اختي بلقيس
ليس مهما ماتفعله الخطوات ولكن من المهم جدأ ما تفعله الاحاسيس
لها الف تحية وهي الواثقة من العيد
لها الف زهرة وزهرة وهي تنجح في حياتها
ولكم في البيت الفرح الغامر
وكم انا ممتن
ولك كل فرح الدنيابهذه البنت اللذيذة

اهليين هدهد
فاطمة فى الاول زعلت منك
تعرف ليه؟؟
عشان هى مابتحب الدموع ولابتعرفه الا لمن تضحك شدييييد
لكن لمن (لكزتها) وقلت ليها يابت دا فرح فرحت لمن دمعت وقطفت ليك زهرة جمييييلة وعصرت ليك كوب محبة وتقدير عربون تعارف
وبتتمنى ليك كل السمح
وانا برضو

سيدي الطيب
لا تجدنى إلا مطابقة تماما مع من ؟ قال ماذا؟
واتمنى ان اجدها كاملة

لك التجلة يا استاذ وافاض الله علينا ذلك الاحساس جميعنا

يا بلقيس كيف حالك الآن لسه ما شعرتي بي تحسن ويظهر عليك لسه شعور الامتلاء متملكك رغم الكم الهائل من الناس اللي بحاول النهل من هذا الامتلاء يظهر عليك أنك معين لا ينضب فلينهل من يشاء من هذا المعين لقد وصلتي إلى حد الامتلاء ووصلنا إلى درجة الارتواء فليديم الله هذه النعم ولك التحية


ولـــيـد

هل تكفينى نفسى للامتلاء؟

اظننى ابحث عن براحات تحتوينى

اصبحت اكبر منى

صرت لا اسعنى

امتلاء

امتلاء

حسينا ومافى زول حسى بينا
نعمل شنو يا دريمز

انا برضو نعمل شنو يادريمز
مرحب تانى استاذ حمزة ياشفيف

أحلام
مدد ياشيخة
دفقى معاى هنا وخلينا نصنع كوثر الاحساسيس الممتلئة
انا ايضا اصبحت لا اسعنى فتممد احساسى ليحملنى ويحلق بى عاليا
فكان ما كان
دام لك ذلك الاحساس ودائما مليانة يارب

ياوليد انا فى حالة ممتاز
يعنى فوق التحسن بدرجتين 0000 وفيض بلا حدود احس به
اشكرك جدا لطلتك المتكررة وشايفاك مليت ثلاثة مواعين
وطاهر عليك رويان من وردتك دى والفرح المتدفق من عينك
ليك الدعوات بالمزيد

الملكة
كنت اول الداخلين الى هنا
قبال حنينة واوت كاست البيتشاكلوا فى الحجز ديل
وتعددت زياراتى ...ولكن لانى كنت فى الضفة الاخرى من نهر احساسك هذا
ضفة الغربة والحنين وشتاءات المنافى ..اكتفيت بالزيارات وتلصص السقيا من فارغ الاكواب
هانا اخيرا" استعيد قدرتى على التفاعل والكتابة...
شكرا" لك ومبرووووووووووووووووووووووووووك لفاطمة

الملكي فوق جيلها
العيد مبارك عليك واعفو مننا وعافين منكم .
من قبيييييييييييل انا ممتليء بالفرح أقرأ وأردد رائعة السر عثمان يا لون الفرح
انشر في جبين جدي التربال
اللمة المسرة

فرحان معاك بعد ما كنت خايف عليك من طلب التمر القالوا نصه كان عاول ، لكن باين عليك اتخارجتي ووجدتي متسع من الفرح بالرائعة فاطمة السمحة لها التهاني الحارة ولك الفرح المديد .

ملكة الفرح


فرحك .. فرحنا

وقبال يسيل فرحك .. تتلقاهو افراحنا

وتسيل بحر ..

ومبروك لى فاطمه السمحه ... وعقبال الفى بالها


ديكو

ديكو حبابك
دا برضو العشم
وليك مدين من فرحنابفاطمة
وعقبال مانبارك ليك كل حاجة سمحة

ابوقصي
بركة بالطلة
ومبروك العيد الوسط الحبان
وشفت كيف !! قدر القيناهن من التمر غسلناهن نضاااف ومرقناهن فى فرح فاطمة وشفناهن قدر جبل البركل
الف شكر يا ابوقصى لاحساسك الجميل
ولك تحيات فاطمة

هالة تصدقى كانت قلت ليك كنت بشم اريج دخلتك؟
عشان كدا مكانتك كانت محفوظة وفى النص بين زرزور المدين واوت كاست
وشكرا ان غمرك نهر احاسيسي
وويباركو ليك السمح
ولكى تحيات فاطمة
و
ح
ب
ي

فاطنه
فرحانه بيك كل النجوم ، ومضطرد النجاح والتفوق ،تهاني وكل الأماني لك
ملكة سبأ
تمتعي بإحساسك الجميل ومتعينا بفيوض الكتابة الما خمج ،مليت المواعين ، الأوردة و الشرايين ، ولسه فاتح عيوني للسحاب وملقي الايادي ، فأهطلي .
دريمز
سحابة اخرى ، عبرت يبابنا ، لكن وين ما تهطلي يأتيني دعاشك ، ويمتلي حقلنا بإيراد ريعك ، ولن تعيقنا الفصول ودوراتها ، هنا الدوحة ، وهناك القاهرة تمطر شتاء ، ولو فاتتنا الرشة الأخيرة سندرك الركعة الأخيرة او مطر السهو الصيف القادم موسم أوبة العصافير

يا ملكة
يا سلام علي الفرح المدفق
نجي نغرف من عندكم
مبروك لفاطمة ...ألف مبروك

الله يخليك ويبارك فيك يازرزور المدين
والله يسعدنى انك تكوني خير استهلال لهذا البوست
ومسك ختام
لك الود والتقدير

ابوساندرا
ليك شكر فاطمة وسعادتها بكلماتك وبتقول ليك عقبال مانبارك ليك سمح البنيات
انا برضو عاجزة عن الشكر وعندى احساس بطول خريفى طالما انكم تبخرون لى ذلك الشعور الطيب
لك عميق تقديرنا