الهلال وثقافة الفوز .. وعلينا أن تحمّل التحكيم الإفريقي بعد اليوم !!

قدّم الهلال الأمدرماني فوزاً مستحقّاً قياساً بالأداء الذي قدّمه يوم الأمس .. والمتابع للمباراة يجد أن الهلال لعب أفضل بكثير من مباريات كان يفوز فيها بالخمسات والستات ..
قدّم الهلال بالأمس ثقافة جديدة على فرقنا السودانية ولم نشاهدها كثيراً حين تقدّم عليه الفريق الضيف بهدقين في دقيقتين والكل بدأ يعيد شريط ذو القعدة وما أدراك ما الصفاقسي بل وربما ذهب بعض الصحفيون لتجهيز عناوينهم للتحدث عن فضيحة وكارثة بينما أكاد أجزم أن الإخوة الشمّات قد تهللت أساريرهم ليكتبوا تاريخ الأمس كأول خسارة للهلال منذ سنوات داخل ملعبه ..
ثقافة الفوز أصبحت ثقافة ملازمة للهلال مهما كانت الظروف والأحوال والأجواء وبالرغم من الحظ العاثر الذي يلازم الهلال دوماً سواء في التشكيل والنقص هاهي بالأمس تأتينا بالأحوال الجويّة والأتربة ولا أستبعد أن تكون الشطّة والكسبرة قد داهمت اللاعبين يا صديقي سامي عبد الوهاب
الهلال فاز وأقنع وأضاع من الأهداف ما يكفي لنصب مهرجان من الأهداف وهنا لابد من التحدث عن فهم اللاعب السوداني العقيم تجاه الفوز !!!
فبعد أن أحرز الهلال أربعة أهداف ركن اللاعبون للعب الهادئ والتمرير العرضي وتضييع الزمن مع فريق حاول جاهداً أن تقف على الأربعة بكل سبله ووقعنا في الفخ في حين أنه كان بالإمكان زيادة الأهداف لتصل للخمسة والستة والسبعة ..
دوماً ما نتناسى أن مثل هذه المباريات تحسم بفارق الأهداف وليس بالنقاط وهذا ما أفقدنا النهائي العام الماضي حين إكتفينا بهدفين ضد النجم الساحلي بفهم أننا وطالما كنا خاسرين وتقدمنا فهذا إنجاز..
في مباراة الأمس وللأمانة والتاريخ تحامل التحكيم الأفريقي على فريق صن داونز في ركلة جزاء لا وجود لها وربما كان ايفياني يستحق عليها البطاقة الصفراء إضافة لحادثة غريبة بكل صراحة أغضبتني بالرغم من هلاليتي الصارخة وهي اللحظة التي أوقف فيها الحكم هجمة خطيرة للجنوب أفريقي بداعي إصابة لاعب من الهلال (حمودة بشير) وهنا تذكرت كيف أننا نهاجم التحكيم الإفريقي عقب كل مباراة خارجية بل ونجهز الشماعة قبل السفر بأننا نتخوف من التحكيم الإفريقي فلماذا مثلاً لا يتخوف الأفارقة كذلك عندما يلعبون ضدنا ؟؟؟
عموماً أثبت الهلال بأنه فعلاً فريق من طراز الكبار وتحسب له ظاهرة العودة لأجواء المباراة وحتى المشاهد أكاد أجزم بأنه كان يعتقد أن الفوز هو مسألة وقت لا أكثر ..
مباراة الأمس أثبتت أن الهلال به وسط ميدان وأطراف وهجوم من طراز عالي بينما يظل عمق الدفاع هو المشكلة ..
عمر بخيت وحمودة بشير قدما مردود ممتاز ويظل يوسف محمد هو النجم الأول للقاء مع إعجابي الشديد بالمطاردات التي يقوم بها كيلتشي لحظة فقدان الكرة بينما لم يكن احمد عادل في افضل حالاته وواصل إيفياني رحلة عدم التركيز وإن كان في نظري إيفياني بالنسبة لبدايته يرجى منه ..

مبروووك يا فاروق الفوز
وفعلا تأخر الهلال بهدفين فى لحظات شرود من لاعبى الهلال
الا انهم استطاعوا ان يفوزوا فى النهايه باربعه اهداف
وهذه فعلا ثقافه جديده

وفعلا الحكم كان غير موفق فى الكثير من قراراته
وقد تحامل على الفريق الجنوب افريقى كثيرا
ولكنه التحكيم الافريقى وكفى

الف مبروك

هلال الملايين

وعقبال الكاس

عمر الفاروق

لما جو الهدفين,,,تذكرت جميع الشمات على راسهم طلحة,,وتذكرت عنوان صحيفة مشهورة

انتهت زوبعة الفريق الذى لا يهزم فى ارضـــة,,,

كما تذكرت خلعة ابراهومة الشهيرة يوم الصفاقص,حين توارى خلف الكراسى,
,بجد الهلال كبير ,,,,بس ريكاردو لم يحسب للتضاريس حساب,,,,,
من المفترض ان يلعب الهلال كل الشوط الاول مدافع,,,ما دام الهوا مع الجماعة
الى ان ياتى الشوط الثانى,,,حتى لو طلعت 2/صفر لقنا مبروك للهلال مقدما

لكن الان نقول للجماعة جيناكم فى الكونفدرالية,,,
ما اظن ان يتخطى الهلال هذا الفريق,,,الا ان يلعب ركاردو مهاجما من بداية المباراة
ولابد من الالتفات للتسلل فريق الصن دازنز يعتمد على مصيدة التسلل
ولك خالص الود,,,

مبروك للوصيف قالو هزم الهضاب وصعد فوق السحاب,,على رقم الصعاب
بجد مستوى المريخ ارتفع,,,بقى يهزم خارج ارضه,,,

مبروك لهم ,,,

Quote: في مباراة الأمس وللأمانة والتاريخ تحامل التحكيم الأفريقي على فريق صن داونز في ركلة جزاء لا وجود لها وربما كان ايفياني يستحق عليها البطاقة الصفراء إضافة لحادثة غريبة بكل صراحة أغضبتني بالرغم من هلاليتي الصارخة وهي اللحظة التي أوقف فيها الحكم هجمة خطيرة للجنوب أفريقي بداعي إصابة لاعب من الهلال (حمودة بشير) وهنا تذكرت كيف أننا نهاجم التحكيم الإفريقي عقب كل مباراة خارجية بل ونجهز الشماعة قبل السفر بأننا نتخوف من التحكيم الإفريقي فلماذا مثلاً لا يتخوف الأفارقة كذلك عندما يلعبون ضدنا ؟؟؟

قريبي عمر الفاروق كدا انا اقتنعت انك رياضي صح
أول واحد يكتب كلمة حق من الهلالاب والمريخاب
مبروك فوز الهلال وعقبال الكأس أن شاء الله

Quote: وفعلا الحكم كان غير موفق فى الكثير من قراراته وقد تحامل على الفريق الجنوب افريقى كثيرا

تعرف يا ابو علوة وللصراحة هي ما (كثيراً ) ففي بعض الأحيان تجده أيضاً تحامل على الهلال أو دعنا نقول أنصف الجنوب إفريقي في الكثير ولكن وبكل صراحة عن نفسي إفترضت إن ما حدث بالأمس ماذا لو كان قد حدث مع الهلال ؟؟؟
بالمناسبة هدف الجنوب إفريقي الثاني في لحظة اشعر أنه تسلل و انا غير متأكد بينما أيضا تم إحتساب على كيلتشي وهو في حالة إنفراد لا اتوقع انها تسلل فمتى يكون لدينا تصوير وإخارج يفيدنا في هكذا حالات !!!
تخريمة :
عمر النقي طارح نفسو الأيام دي بتاع إحصاء ما عارف التعداد مؤثر فيهو ولا شنو ؟؟؟
يشبكك كم فاول وكم رمية تماس وكم كورنر وكم شوتة ...
بالجد حاجة أستغرب !!!

عمنا حمزاوي :

Quote: قريبي عمر الفاروق كدا انا اقتنعت انك رياضي صح

يعني يا جماعة ما تقتنعوا بي رياضيتنا دي إلا بعد نهاجم الهلال ؟
أها جعولية مني ليك هاك دي زيادة :
الهلال زاااااااتو ما بيعرف يلعب كورة

تسلم يا حاج

أخي وصديقي الهلالابي الانيق عمر الفاروق

مودتي وإحترامي

بقلب صافي ونفس نقية أبارك لك ولكل هلالي ووطني غيور الفوز المستحق الذي حققه الهلال أمس وأعاد للازهان هلال التسعينان ، لعب الهلال كما لم يلعب من قبل بتكتيك وتنظيم جميل وعابه فقط ضعف وسطي الدفاع الهلالي خاصة ريتشارد الذي يحتاج لمراجعة حساباته جيداً وكذلك داريوكان .

Quote: في مباراة الأمس وللأمانة والتاريخ تحامل التحكيم الأفريقي على فريق صن داونز في ركلة جزاء لا وجود لها وربما كان ايفياني يستحق عليها البطاقة الصفراء إضافة لحادثة غريبة بكل صراحة أغضبتني بالرغم من هلاليتي الصارخة وهي اللحظة التي أوقف فيها الحكم هجمة خطيرة للجنوب أفريقي بداعي إصابة لاعب من الهلال (حمودة بشير)

الحكام أخي بشر يصيبون ويخطئون رغم انهم وفي أغلب الاحيان يلعبون لصالح صاحب الارض بالتقاضي عن بعض الحالات التي تستحق الوقوف عندها والهلال أمس لم يكن بحاجة للتحكيم للفوز رغم أن ما ذكرته كان صحيحاً .

Quote: عموماً أثبت الهلال بأنه فعلاً فريق من طراز الكبار وتحسب له ظاهرة العودة لأجواء المباراة وحتى المشاهد أكاد أجزم بأنه كان يعتقد أن الفوز هو مسألة وقت لا أكثر .. مباراة الأمس أثبتت أن الهلال به وسط ميدان وأطراف وهجوم من طراز عالي بينما يظل عمق الدفاع هو المشكلة ..

فعلاً الهلال فريق كبييير وبه لاعبون يملوا العين وعودته لأجواء المباراة تؤكد ذلك . وأنا شخصياً أقسمت وأنا أشاهد المباراة للهلالاب نفسهم بأن الهلال فائز فائز لا محال رغم أن الهلالاب أنفسهم قالو غير ذلك وكسبت الرهان . والكبير كبير يا صاحبي . وأختلف معك فقط بأن الوسط الهلالي يحتاج لمراجعة قليلة فهيثم مصطفى وحده الذي يحمل عبء الوسط رغم أن البقية جيدين ولكن ليس بطموح الهلال أو قامة هيثم مصطفى .

شكراً عملاقي الكرة السودانية الهلال والمريخ الذين حققا فوزاً مستحقاً ورفعا إسم السودان عالياً . ومعاً من أجل رفعت الكرة السودانية .

مودتي

عماد

مبروك الفوز للهلال.
مشكلة الحكام الأفارقة قديمة و لن تنتهي قريبا ، و يعلم القريبون جدا من الوسط الرياضي أنه و بكل أسف فان الكثيرين من الحكام الأفارقة مرتشون..و من الأسباب التي تحول دون تقدم الكرة الأفريقية التحكيم و الذي يمثل جزء مكمل لتطور و تقدم اللعبة.

يا عمدة :
تحياتي يا حلو ..

Quote: وأختلف معك فقط بأن الوسط الهلالي يحتاج لمراجعة قليلة فهيثم مصطفى وحده الذي يحمل عبء الوسط رغم أن البقية جيدين ولكن ليس بطموح الهلال أو قامة هيثم مصطفى .

رأيك شنو لو قلت ليك هيثم مصطفى امبارح كان أقل لاعبي وسط الهلال أداء مع المستبدل سيف مساوي؟
بالأمس كان واضح من تعليمات ريكاردو أن لا يتقدم حمودة بشير للشق الهجومي وهو اللاعب الذي يمتاز بالإختراق كحل من حلول لاعبي الوسط !!
غياب علاء الدين يوسف جعل تنظيم ومهام لاعبي الوسط تختلف تحديدا دور حمودة بشير بينما بدأ عمر بخيت يعود بقوة في واجباته المعهودة والموكلة له من قبل المدرب ..
ولعلك تقصد بتحمل هيثم للعبء من مبدأ صانع الألعاب وهو فعلا ما يتحمله هيثم على مر السنين دون وجود بديل ..لكن وفي كرة القدم الحديثة هيثم مصطفى في موقعه الحالي لا يمثل صانع العاب بقدر ما يمثل مهاجم ثالث يلعب خلف المهاجمين الإثنين بينما حمودة بشير هو من يقوم بدور صانع الألعاب وفي بعض الأحيان اللاعب المحوري !!!


تخريمة :
يا السني ياخ صورك جميلة زييك ..

ابقوتة الحبيب:

Quote: كما تذكرت خلعة ابراهومة الشهيرة يوم الصفاقص,حين توارى خلف الكراسى, ,بجد الهلال كبير ,,,,بس ريكاردو لم يحسب للتضاريس حساب,,,,, من المفترض ان يلعب الهلال كل الشوط الاول مدافع,,,ما دام الهوا مع الجماعة الى ان ياتى الشوط الثانى,,,حتى لو طلعت 2/صفر لقنا مبروك للهلال مقدما

تعرف ودون تحيّز الأمبارح ده وضح الفرق بين الهلال والمريخ في إدارة المباريات تدريبياً فريكاردو الذي يهاجمه الجميع كان لتبديلاته الجيدة دورة فلماذا يصمت الجميع ولا يعطيه حقه ؟
المريخ إنهار بصورة واضحة يوم مباراةالصفاقسي فنياً فلا المدرب ولا الجهاز الفني استشعر إحساس العودة !!

Quote: لكن الان نقول للجماعة جيناكم فى الكونفدرالية,,, ما اظن ان يتخطى الهلال هذا الفريق,,,الا ان يلعب ركاردو مهاجما من بداية المباراة ولابد من الالتفات للتسلل فريق الصن دازنز يعتمد على مصيدة التسلل

النتيجة فعلا غير مريحة وفارق الهدفين يبعدنا ولكن تبقى ثقتنا في الله ومن ثم الابطال كبييييرة ..
مصيدة التسلل اتوقع اناه كانت حديث الغرفة التدريبية فالمدرب شاطر وتوقع ان يلعب الهلال على الكرات الطويلة بمساعدة الهواء وإستعجال الفوز مع ملاحظته ان لاعبي الهلال دوما ما يقفون على خط واحد للإستعجل لإدراك الهدف ..
التنظيم بكل تأكيد سيختلف لهذا الفريق في الرد وكذلك الهلال الذي سيشهد عودة الموقفين ودخول المصابين الفورمة..

الحاج:

Quote: مشكلة الحكام الأفارقة قديمة و لن تنتهي قريبا ، و يعلم القريبون جدا من الوسط الرياضي أنه و بكل أسف فان الكثيرين من الحكام الأفارقة مرتشون..و من الأسباب التي تحول دون تقدم الكرة الأفريقية التحكيم و الذي يمثل جزء مكمل لتطور و تقدم اللعبة.

بعد أن سمعت الحكم صلاح احمد محمد صالح سكرتير لجنة التحكيم المركزية يقول ان الحكم السوداني يتم تسليمه مبلغ 150 دولار شاملة للترحيل والسكن والنثريات بدأت أشك إنو حكمنا زااااااااااااتو ممكن يكون مرتشي !!!
ولا نحن ما أفارقة ؟

Quote: الهلال زاااااااتو ما بيعرف يلعب كورة

يا عمر دي بالغت فيها عديل؟؟؟!!!!!!

سا زول الفمبرو للهلال والمريخ

انا بحب الهلال وما بكره المريخ وووووواااااىىىىىىى

التحية لك أخي عمر ولضيوفك الكرام

Quote: قدّم الهلال بالأمس ثقافة جديدة على فرقنا السودانية ولم نشاهدها كثيراً حين تقدّم عليه الفريق الضيف بهدقين في دقيقتين

ألف ألف مبروك .. فقد جاء انتصار الهلال هذه المرة بطعم جديد .. فالهلال كما أشرت - بحق - قد أرسى ثقافة جديدة .. وهي نقطة قوة مهمة يجب التاكيد عليها وتعزيزها .. فبعد معركة (ناسارو) والتي عوض بها تلك الخسارة الكبيرة في نيجريا .. عاد الهلال وعوض خسارته بهدفين في دقيقتين في عقر داره بإنتصار عريض .. مما عزز من مكانته المرموقة التي صنعها لنفسه العام السابق كأحد أهم فرق القارة التي يحسب لها ألف حساب .. ومزيداً من الانتصارات

ابو الزفت:

Quote: انا بحب الهلال وما بكره المريخ

وهيييييييييييييييييييييييييييييييه ..

الغريبة انا بحب الهلال وبكره المريخ ..

الف مبروك للهلال ... المباراه ابدا ما كانت ساهله


تخيل لو لعب الهلال الشوط الاول في اتجاه الورق الطاير دا !!!!اكيد كان النتيجه بتختلف

كفارة لي مانيو يا ابوعمير

أنا ما عارف فيرجسون ده عمل كده ليه امبارح

الله يستر من ويستهام وويجان وأي تعادل

..

بالمناسبة: أي مباراة أحضرها للهلال بينتصر فيها

أمبارح لما كان مغلوب 2 صفر أنا كنت في الجامعة

بعض أصدقائي الرشاشات اتصلوا بي عشان اسيب أي حاجة واجي أحضر معاهم الكورة

وبالفعل لما جيت الهلال جاب أربعة اقوان

والجماعة بعد داك أكرموني بي فول من أبو كديس..

تخريمة:
بالرغم من انك بتكره فريق المريخ العظيم

لكن أنا بحبك عشان خاطر كريستيانو بس..

الأخ نصر الدين :
يوم ناساروا كان يوم تاريخي واتوقع بواقي هذه المباراة هو الذي أعاد جو المباراة للشباب بالأمس ..بل حتى الجمهور كذلك ...


تخريمة :
يا معاوية انا أمبارح حنيّت على رايات الكورنر ..غايتو لو كان شافن شاعر حقيبة كا ن جننهن جن

مبروك للحكم الجميل الذي فعل المستحيل لـ .... و.....و....!!

ومن ثم مبروك لصاحبي ود الفاروق!!

خلينا من الكلام الفارغ..

انا بقيت اقيس الهلال بمستوى (مساوي) يا عمر!!

انساني من الهيلمانة دي كلها...

لا تقول لي برنس لا عمر لا غيرو..(مساوي) لو تمام الهلال بيكون شكله مقنع جداً (يمتلك الوسط ويصل المرمى) مساوي مش تمام الشغلانة كلها بتبقى مجوبكة...طبعاً تحت تحت بكون متمني انو مساوي يكون ما تمام زي امبارح.

طبعاً عندكم ناس كتار شايفين مساوي ما عندو علاقة بالكورة

Quote: لا تقول لي برنس لا عمر لا غيرو..(مساوي) لو تمام الهلال بيكون شكله مقنع جداً (يمتلك الوسط ويصل المرمى) مساوي مش تمام الشغلانة كلها بتبقى مجوبكة...طبعاً تحت تحت بكون متمني انو مساوي يكون ما تمام زي امبارح.

يا سامي والله انا ماعارف انتو فرطتوا في حموده دا كيف ... الزول دا حاليا احسن لاعب سوداني وبكل المقاييس ..هداف بارع مدافع جسور لاعب وسط حريف وهادي ..مع ميزات قل ان تجد في لاعب سوداني



ربنا يحفظوا

الاخ عمر الفاروق
.....
غايتو كتر خير الكتاحة خلتك بقيت رياضى اصيل ومطبوع
مش جماعة النفاق الاعلامي قاعدين يكتبوا كدا

الكتاحة الامس دي تدخل ليها جيش مش قووون واحد

قال ثقافة الفوز

ود الفاروق مبروك لهلال و مليار لمريخ الخطير

Quote: يا سامي والله انا ماعارف انتو فرطتوا في حموده دا كيف ... الزول دا حاليا احسن لاعب سوداني وبكل المقاييس ..هداف بارع مدافع جسور لاعب وسط حريف وهادي ..مع ميزات قل ان تجد في لاعب سوداني

يا اخي لو عايزين اي واحد تاني المريخ مستعد؟ يعني امبارح من غير حموده
الهلال يشرب ما يروئ وانت رايك شنو؟؟؟؟؟

القــادمـون من الخلف

حبـابكم .

_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور

سلامات ياا لفاروق

اختك ماليها فى الكورة

لكن بس حبيت اعرف علاقة الكورة بغنا البنات شنو؟






------
الايام دى بكتشف فى مواهبك- جات متأخرة لكن ماراحت على على قول اسرار بابكر

يا بروف :
الدوري بقى بين بين مع اليهود المرزقين ديل وفريجسون شكلو طمع في الأندية الأوروبية والله يسترنا لا بلح الشام لا عنب اليمن ..
اها ده كللللو هين بتنا الجديدة دي كيف ؟ بالله ما تشبكك عايزة أدردق في رمال أرسنال أو في نجيلة ويمبلدون ..الزولة دي أولترافولد سااااااااااااااااي

عارف يا عمر انا معاك في كل ما كتبته ، وزعلت جدا عندما اوقف الحكم تلك الهجمة الخطرة ، كما انني حتي الآن اسأل تري هل كان رجل الخط متحاملا علي الهلال أم ان الحكم هو المتحامل علي الفريق الافريقي ...

لكن ثقافة الفوز دي انا ما مقتنع بيها رغم تأييدي لقولة ان يقوم الهلال بتغيير النتيجة بهذه الطريقة هو دليل علي ثقافة الفوز ، بس السؤال لماذا بعد الهدف الرابع اصبح لاعبى الهلال يأخرون في الوقت ، رغم ان احراز هدف خامس كان مهم جدا ، خاصة وان الفريق الضيف كان مستسلما تماما ، ولم يغير طريقة لعبه الا عندما لا حظ ان لاعبي الهلال قد ارتكنو للدفاع وتشتيت اللعب ,, واعتقد هنا يجب ان تبرز ثقافة الفوز ، وهي ان تحرز اكبر عدد من الاهداف طالما كان ذلك متاحا ...

ضربة الجزاء غير صحيحة بالمرة ... لاعب الهلال رقم جيفاني لاعب نشيط جدا ، ولكنه يشبه اللاعب السوداني في عدم التركيز ...

لماذا كانت اخلاق لاعبي الهلال بهذا السؤ (الحارس المعز عندما استلم كرة وجري تجاه المهاجم ؟)

ايضا هيثم مصطفي .... اعتقد ان لاعبي الهلال يحتاجون الي دروس في كيفية التعامل ببرود ، والا سنظل نخسر دائما لاسباب غير منطقية ...

لماذا الاهداف التي تدخل في شباك الهلال سهلة جدا ، وهذه الملاحظة منذ الدورة السابقة ....


برغم كل هذا اقف تحية للاعبي الهلال الذين امتصو الهدفين ونالو الفوز .... .



في حاجة مجنناني عديل كده ، ليه صاحبنا الوصيف ؟ دائما محظوظ في الفرق ومستواها عكس الهلال ؟ اسأل هذا رغم اقتناعي بان البطل لابد ان يهزم الابطال كي ينال البطولة ؟


احييك كثيرا اخي عمر

الزول الكتاب عمر الفاروق
كتاب عندما تكتب عن الهلال وعندما تكتب حاجات تانى برضو

لكن ثقافة الفوز دي انا ما مقتنع بيها

انا برضو فوز الهلال على صن داونز عندى ماعندوا علاقه باداء الهلال, الهلال كان اداؤه بعيد عن اى خطه واضحه وواضح انو الخطه الوحيده كانت الهواء ونجحت.

الكثير من لعيبه الهلال مازالوا يلعبوا بروح فريق حلتنا مع فريق الحله الجمبنا لاننى لم اجد اى عذر لتحرش واعتداء هيثم مصطفى على لاعب صن داون ومحاوله الحارس معز عدد من المرات التحرش والاعتداء على لعيبه صن داون ولوما كان الحكم افريقي كان اكيد طردهم وكنت اتوقع من اداره الهلال محاسبتهم .
دفاع الهلال يحتاج عمره ريتشارد كبر شديد ومابقدر على الجرى وداريو كان مركب مكنه مهاجم.

هيثم مصطفى وجوده اصبح عب بالمناسبه كم عدد الباصات الطلعت من هيثم مصطفى فى التسعين دقيقه انا غايتو شفتو وقع كم مره بدون سبب.

تخريمه
نحنا هنا حشدنا الجاليه لمسانده الهلال فى مباراته القادمه مع امنياتى ودعواتى بفوز الهلال ففوز الهلال يعنى لى الكثير

جلال ناصر

يا ابو السيم :
تعرف يا مان انا بالجد قاعد أحب مساوي ده وبعكس جمهور الهلال وإحتمال جمهور المريخ البيشوف إنو ما عندو علاقة بي الكورة ..
مساوي لاعب مهام ودوره خفي ولو مساوي عند الموعد الهلال بيكون كويس بالجد زي ما قلت ..
هيثم مصطفى برضو لو تمام الهلال بيكون أتم من تمام ..


اخونا شمهروش :
ذكرتني كورة اولاد الحلة لمن يجي الهوا والمدرب يقول لينا شووووتو بس ..

دكتورنا شهاب :
ليك تحية وانت الوحيد البتستاهل نبارك ليك فوز المريخ

Hilalap

ازيك يا عمر

غايتو مبارك



لكين هي الهناية ذاتا وين؟


up, op sorry

*يالطفي : بيييييييييييييييييييييييييييييييييييييييييييييع

_________________
*من مسلسل سمبل ورحلة المليون

الأستاذة إشراقة :

Quote: سلامات ياا لفاروق اختك ماليها فى الكورة لكن بس حبيت اعرف علاقة الكورة بغنا البنات شنو؟

غايتو ما عارف سؤالك ده صدفة ولا قاصداهو لكن وفي كل الحالات حا أقول ليك هل تصدقي يا اشراقة إنو العلاقة وطييييدة جداً بيناتهم !!!
لو ما غنا البنات ده ما كان حا يكون في أي نكهة لي كورتنا السودانية..
قولي لي كيف.؟
مش الجمهور هو ملح الكورة ؟ ومش لو ماف تشجيع الكورة بيكون ما عندها معنى ؟
معظم أو كل عبارات التشجيع المستخدمة في إستاداتنا هي من أغاني البنات والألحان مأخوذة من ألحان أغاني البنات ...
وربما أشهر رابطة مشجعين هي بقيادة ود الجزولي مشجع الموردة المعروف واللي أرسى ثقافة التجشيع بإستخدام أغاني البنات فوجدت رواج منقطع النظير وجعلت من تشجيع الموردة متعة الكورة ..
هاك مثال للتغني بألحن البنات في التشجيع :
الصادق ويو ..يلا يا موردة ..
نمشي ونجيو .. يلا يا موردة ..
نمشي ونجيييييو ..يلا يا موردة ..
عفص السيسيو هنا في الموردة ..
أييييا ..أيييا ..إييا
أييياإييا إييا جمال زي ده ..

ودي واحدة من ألحان ترقيص العروس المشهورة ..

بينما يشاغل الهلالاب المريخاب حالياً بلاعب إسمه بلّة فنقوم بالكوراك بأغنية بناتية هابطة طالعة الأيام دي :
بلّة يا بلّة ويييينو بلّة ..
دقّ الرقم جلّ وييينو بلة ..

بينما يردد ود الجزولي لحن غناء بناتي ترقص معه كل المدرجات :
المابي الغلب يبقا عاااااااشق هلب يا ناس ..
الزعلان كلمو ..عصمت الفنان ..كلمو..
والشمتان كلمو ..بريشنا في الميدان ..كلمو ..
والموردة حضاااارة موردة ..

ودي طبعا مأخوذة من أغنية البنات:
الزعلان كلمو يقع الخزان كلمو
والخزان كان بعيد الصبغة في الدكان ..كلمو

تخريمة :
بالإضافة لأغاني البنات أجيد الإسكواتش وركوب الخيل والجولف وصيد السمك والمراسلة